«Қазақстанда жасалған» таңбасына қойылатын талаптар енді тек сауда желілеріне ғана емес, онлайн-платформаларға да қолданылмақ. ҚР Сауда және интеграция министрлігі отандық тауарларды офлайн-бөлшек саудада да, электронды коммерцияда да ілгерілету талаптарын күшейтіп жатыр. Маркетплейстер үшін қазақстандық өнімдерді іздеу нәтижелерінде басым көрсету және «Қазақстанда жасалған» арнайы бөлімдерін құру бойынша міндетті тетіктер енгізіледі. Қазіргі уақытта тиісті заңнамалық түзетулер пакеті мүдделі мемлекеттік органдармен келісуден өтуде. Бұл туралы ҚР Сауда және интеграция министрінің міндетін атқарушы Айжан Бижанова «Сауда желілерінде «Қазақстанда жасалған» ұлттық брендін ілгерілету» тақырыбындағы дөңгелек үстелде мәлімдеді.Жаңа талаптар отандық өндірушілерді қолдауға бағытталған мемлекеттік саясаттың маңызды бөлігіне айналып отыр. Қолданыстағы заңнамаға сәйкес, сауда нысандарында қазақстандық тауарлардың үлесі кемінде 30 пайыз болуы тиіс. Бұдан бөлек, «Даму» қорының қолдау бағдарламалары аясында сөре кеңістігінің тағы 20 пайызына дейін отандық өнімге бөлінуі мүмкін. Осылайша, қазақстандық тауарлар дүкен ассортиментінің жартысына дейін қамтуға мүмкіндік алады.«Сонымен қатар, тұтынушының отандық өнімді көруі де маңызды. Сондықтан заңнама тек сандық көрсеткіштерге ғана емес, тауарды орналастыру сапасына да талап қояды. Отандық өндірушілердің өнімі сатып алушының көз деңгейінде, қолжетімді жерде орналасуы тиіс. Бұл — «алтын сөре». Сатып алушы ең алдымен дәл осы сөредегі тауарға назар аударады. Қазақстандық өндіруші мұндай орынға лайық деп есептеймін», - деді Айжан Бижанова.Мұндай тәсілдердің тиімділігін Назарбаев Университеті жанындағы Ұлттық аналитикалық орталық жүргізген эксперимент нәтижелері де көрсетті. Magnum сауда желісімен бірлесіп, зерттеушілер қазақстандық ірімшіктерді ілгерілетуге арналған мінез-құлықтық құралдарды сынақтан өткізді. Жоба мінез-құлық ғылымы саласына маманданған британдық Behavioural Insights Team компаниясының әдіснамалық қолдауымен жүзеге асырылды.Дүкендерде баннерлер, сөре бөлгіштері, стикерлер, сөре ленталары және «Қазақстанда жасалған» таңбасына назар аудартатын аудиохабарламалар қолданылды. Эксперимент төрт апта бойы нақты сатып алу ортасында жүргізілді.Нәтиже халықаралық көрсеткіштерден жоғары болды. Пилоттық дүкендерде қазақстандық ірімшік сатылымы 20 пайызға артқан. Салыстырмалы түрде алғанда, әлемдік тәжірибеде мұндай мінез-құлықтық құралдардың орташа әсері шамамен 8 пайызды құрайды.«Біз мінез-құлықтық құралдарды қазақстандық жағдайда ірімшік мысалында сынап көруді жөн көрдік. Ірімшік негізгі азық-түлік тауарларының қатарына жатады, алайда бұл сегментте импорт үлесі жоғары — 47 пайыз. Эксперименттің небәрі төрт аптасында пилоттық дүкендердегі қазақстандық ірімшік сатылымы 20 пайызға өсті. Бұл — өте жоғары көрсеткіш. Эксперимент нәтижесі қазақстандықтардың “экономикалық патриотизмге” дайын екенін көрсетті. Ол үшін тұтынушыға дүкенде таңдау жасауға көмектесу қажет, яғни өнімді танымал әрі көзге көрінетін ету керек», - деді Ұлттық аналитикалық орталықтың Мемлекеттік басқару және мінез-құлықтық мемлекеттік саясат орталығының директоры Салтанат Джаненова.Министрлік талаптардың сақталуына бақылауды да күшейтпек. Заңнама талаптарының бұзылуы туралы шағымдар жоспардан тыс тексерулер жүргізуге негіз бола алады. Отандық тауарлардың сауда желілеріне қолжетімділігін шектеу, нұсқамаларды орындамау және жеткізушілермен жұмыс талаптарын бұзу фактілері үшін айыппұл қарастырылған.Сонымен қатар, Сауда және интеграция министрлігі жаңа заңнамалық өзгерістер әзірлеп жатыр. Атап айтқанда, «өнімсіз делдал» ұғымын енгізу, сауда кедергілеріне бақылауды күшейту және бос сауда орындары болған жағдайда отандық өндірушілерге сауда алаңдарына қолжетімділік беруді міндеттеу жоспарланған.Ақпарат көзі : https://www.gov.kz/memleket/entities/mti/press/news/details/1218105?lang=kk

2026 жылғы 22-24 мамыр күндері Астанадағы EXPO халықаралық көрме орталығында отандық өндірушілердің дәстүрлі Ulttyq ónim көрмесі тоғызыншы рет өтеді.Ulttyq Ónim – мемлекеттен қолдау алған қазақстандық компаниялардың өнімдері мен қызметтерін насихаттауға арналған ең ірі көрме алаңы. Мұнда қазақстандық өндірушілер, инвесторлар, мемлекеттік және қаржы институттар басшылары, сондай-ақ халықаралық сарапшылар бас қосады.Көрмені ұйымдастырушы – «Даму» кәсіпкерлікті дамыту қоры» АҚ («Бәйтерек» ҰИХ» АҚ еншілес ұйымы). Іс-шара Қазақстан Үкіметінің, Ұлттық экономика министрлігінің және Астана қаласы әкімдігінің қолдауымен өткізіледі. Ulttyq Ónim Қазақстандағы шағын және орта бизнестің әлеуетін көрсететін негізгі алаңдардың бірі ретінде танылып келеді.Көрме аясында компаниялар тамақ, жеңіл, ауыр және химия өнеркәсібі, жиһаз және құрылыс өндірісі, крафт индустрия және экономиканың басқа да салаларындағы өнімдер мен қызметтерін ұсынады. Жобаның басты мақсаты – отандық бизнесті қолдау, кооперацияны дамыту, жаңа серіктестер табу және қазақстандық өнімдердің өткізу нарығын кеңейту.2026 жыл көрме тарихындағы ең ауқымдысы болмақ. Оған 600-ден астам компания қатысады. Бұл – былтырғымен салыстырғанда екі есе көп. Экспозиция аумағы мен салалар да айтарлықтай кеңейді. Мысалы биыл «Қызмет көрсету» санатындағы кәсіпкерлер де қатысады.Көрмеде өндіріске ерекше назар аударылады, сонымен қатар өңірлерден қатысушылар саны артып келеді. Келушілер үшін live-аймақтар мен интерактивті форматтар ұйымдастырылып, нақты өндірістік процестерді көруге мүмкіндік беріледі. Сонымен қатар бизнесте – процестерді автоматтандырудан бастап бизнес-жоспарларды генерациялауға дейін жасанды интеллект қолдану бойынша шеберлік сабақтары өтеді.Ulttyq ónim – 2026 іскери бағдарламасы жетекші қазақстандық және халықаралық сарапшылардың, банк топ-менеджерлерінің және бизнес өкілдерінің қатысуымен өтетін панельдік сессияларды қамтиды. Негізгі тақырыптар – кәсіпкерлікті дамыту, қаржы алуға мүмкіндік беретін кепілдік құралдары, цифрландыру және жасанды интеллект енгізу.Сонымен қатар көрме аясында B2B кездесулер, отандық киімдер топтамасынан сән көрсетілімі, танымал блогерлер мен әртістердің қатысуымен концерттік бағдарлама, «Халық таңдауы» онлайн-конкурсы және құнды сыйлықтар тігілген ұтыс ойыны ұйымдастырылады. Келушілер отандық өнімдерді тікелей, өндіруші бағасымен сатып ала алады.Көрмеге кіру тегін. Қатысу үшін көрме ғимаратына кіре берісте немесе көрменің ресми сайтында (https://ulttyqonim.kz/) онлайн тіркеу өту қажет.Астана тұрғындары мен қонақтарын көрмеге келіп, отандық өндірушілерді қолдауға шақырамыз!Өтетін орны: EXPO халықаралық көрме орталығы (Мәңгілік Ел даңғылы, 53/1)Ашылу салтанаты: 22 мамыр, сағат 09:00Жұмыс уақыты: 22–23-24 мамыр, 08:00-18:00   Ақпарат көзі : https://www.gov.kz/memleket/entities/economy/press/news/details/1217535?lang=kk

     Байқауға кәсіби және әуесқой фотографтар, құқық қорғау органдарының қызметкерлері, сондай-ақ Қазақстан мен шетелдің шығармашылық өкілдері қатыса алады.     Конкурсқа арналған жұмыстар төмендегі үш номинация бойынша қабылданады:     1. "Заң мен тәртіп — қауіпсіз балалық шақтың кепілі"     2. "Цифрлық қауіпсіздік: қоғам тыныштығын күзететін заманауи технологиялар"     3. "Таза Қазақстан: тәртіп тазалықтан басталады"     Жұмыстарды қабылдау 2026 жылғы 10 маусымға дейін жалғасады.     Қатысу талаптары:     Бір қатысушыдан 3 фотосуретке дейін қабылданады;     Жұмыстар JPEG форматында қабылданады;     Сапасы кемінде 5 MP, 300 dpi болу керек;     Әр фотосуретке тиісті номинация көрсетілген қысқаша сипаттама қоса берілуі қажет.     Жеңімпаздар дипломдармен және бағалы сыйлықтармен марапатталады.Ақпарат көзі : https://www.gov.kz/memleket/entities/qriim/press/news/details/1217510?lang=kk

Экономиканың өсу қарқыны төртінші ай жеделдеуде.ҰСБ алдын ала дерегі бойынша, 2026 жылғы қаңтар-сәуірде Қазақстанның ЖІӨ өсуі өткен жылғы сәйкес кезеңмен салыстырғанда 3,6%. Бірінші тоқсанның қорытындысымен салыстырғанда экономикалық өсу серпіні айтарлықтай жақсарды (2026 жылғы қаңтар-наурызда ЖІӨ өсуі 3%)Төрт айдың қорытындысы бойынша өнеркәсіптік өндіріс оң аймаққа шықты – нақты көлем индексі 102,1% болса, бірінші тоқсанның қорытындысы бойынша 99,9%-ға төмендеу тіркелді.Өнеркәсіпті қалпына келтірудің негізгі факторы өңдеу секторын жеделдету болып, онда өндіріс қаңтар-наурыздағы 8,5%-ға қарағанда 9,9%-ға өсті.Машина жасаудағы жоғары өсу қарқыны (өсу 23,3%) көлік құралдарын, ауыл шаруашылығы және теміржол техникасын, электр тауары мен жабдығын шығару көлемін ұлғайту есебінен сақталады.Сондай-ақ жеңіл өнеркәсіп өнімі өндірісінде 2,3 есе, жиһаз өндірісінде 41,7%, фармацевтика өнімінде 35,2%, құрылыс материалдарында 27,7%, химия өнеркәсібінде 18,4%, тамақ өнімдерінде 14,4% өсу байқалады. Тау-кен өнеркәсібінде төмендеу сақталғанмен (92,7%), оның қарқыны бірінші тоқсанмен салыстырғанда айтарлықтай бәсеңдеді (88,6%). Бұл өндірістің біртіндеп қалпына келуін және мұнай секторының жалпы экономикалық динамикаға теріс үлесінің азаюын көрсетеді.Тұтастай алғанда, жылдың алғашқы төрт айындағы экономиканың оң серпіні негізгі секторлардағы орнықты өсумен қамтамасыз етілді. Ең жоғары өсу қарқыны мына салаларда тіркелді:құрылыс-114,5%; көлік және қоймалау – 112%;өңдеу - 109,9%;сауда – 105,1%;ауыл шаруашылығы-103,6.Осылайша, ЖІӨ-нің нақты өсуінің қазіргі құрылымы шикізаттық емес сектордың, атап айтқанда құрылыс, көлік, сауда және өңдеу өнеркәсібінің рөлін күшейтумен сипатталады.Ақпарат көзі : https://www.gov.kz/memleket/entities/economy/press/news/details/1217363?lang=kk

Астана, 2026 жылғы 11 мамыр - Қазақстан Республикасының Сыртқы істер министрі Ермек Көшербаев Қазақстанға ресми сапармен келген Бразилия Федеративтік Республикасының Сыртқы істер министрі Мауро Виейрамен келіссөздер өткізді.Кездесу барысында тараптар саяси, сауда-экономикалық және мәдени-гуманитарлық ынтымақтастықты, сондай-ақ халықаралық ұйымдар мен көпжақты алаңдар аясындағы өзара іс-қимылды қоса алғанда, екіжақты ынтымақтастықтың кең ауқымды мәселелерін талқылады.Сыртқы саяси ведомстволардың басшылары саяси байланыстардың, оның ішінде парламентаралық өзара іс-қимылдың және екі елге екіжақты, өңірлік әрі халықаралық күн тәртібіндегі өзекті мәселелер бойынша тұрақты түрде пікір алмасуға мүмкіндік беретін саяси консультациялар тетігінің дәйекті дамуын қанағаттанушылықпен атап өтті.«Қазақстан Бразилияны Латын Америкасындағы негізгі әрі сенімді серіктес ретінде қарастырады. Бүгінгі келіссөздер ынтымақтастықты одан әрі тереңдетуге және жаңа бірлескен бастамаларды іске асыруға өзара мүдделілікті растады», – деп атап өтті Е.Көшербаев.Сауда-экономикалық және инвестициялық ынтымақтастық мәселелеріне ерекше назар аударылды. Тараптар 2025 жылы 295 млн АҚШ долларын құраған тауар айналымының оң серпінін атап өтіп, өнеркәсіп, ауыл шаруашылығы, энергетика және инвестициялар салаларындағы өзара іс-қимылды одан әрі кеңейту үшін елеулі әлеует бар екенін айтты.Халықаралық нарықтарға шығуға мүмкіндік беретін көлік-логистикалық әлеуеттің стратегиялық маңызына да ерекше назар аударылды. Қазақстан мен Бразилия тиісінше Еуразия мен Латын Америкасына өзара «қақпа» бола алады.Халықаралық күн тәртібі аясында Қазақстан мен Бразилия халықаралық құқық пен БҰҰ Жарғысына сәйкес қақтығыстарды бейбіт жолмен реттеуге бейілділігін растады, сондай-ақ жаһандық климаттық күн тәртібі мәселелері бойынша ұстанымдарының ұқсастығын атап өтті.Осы тұрғыда Қазақстан Сыртқы істер министрі Қазақстан Республикасының Президенті Қасым-Жомарт Тоқаевтың БҰҰ құрылымы аясында Халықаралық су ұйымын құру жөніндегі бастамасын ұсынды.Келіссөздер қорытындысы бойынша тараптар қазақстан-бразилиялық ынтымақтастықты одан әрі нығайтуға және екіжақты серіктестікті дамытуға жаңа серпін беруге сенім білдірді.Сапар аясында екі елдің жетекші іскер топтарының қатысуымен бизнес-форум ұйымдастырылып, оның барысында B2B және B2G форматтарындағы кездесулер өтті. Қатысушылар жоғары технологиялық ауыл шаруашылығы, су ресурстарын басқару және цифрлық технологиялар секілді басым бағыттардағы бірлескен жобаларды іске асыру перспективаларын талқылады.Іс-шара қорытындысы бойынша екі елдің Ауыл шаруашылығы министрліктері арасында мал шаруашылығы саласындағы, сондай-ақ «KAZAKH INVEST» ҰК» АҚ мен «ApexBrasil» Экспортты дамыту агенттігі арасында өзара түсіністік туралы меморандумдарға қол қойылды.Ақпарат көзі : https://www.gov.kz/memleket/entities/mfa/press/news/details/1217285?lang=kk

Қостанай қаласында жастардың азаматтық белсенділігі мен қоғамдық бастамаларын қолдау бағытындағы маңызды жоба жүзеге аспақ. Қаладағы балалар алаңдарының бірін абаттандыру жөніндегі оқушылар ұсынған жоба «Халық қатысатын бюджет» бағдарламасы аясында жеңімпаз атанды.Инициатива аясында балалар алаңын абаттандыру көзделген.Ұсынылған жоба әкімдіктегі сараптамалық іріктеуден сәтті өтіп, тұрғындардың дауыс беру кезеңіне жолдама алған. Нәтижесінде жоба 322 дауыс жинап, қатысушылар арасында І орынға ие болды.Назарбаев Зияткерлік мектебінің баспасөз қызметінің мәліметінше, тұрғындардың қолдауына ие болған бастама балалар мен аула тұрғындары үшін қауіпсіз әрі жайлы орта қалыптастыруға бағытталған. Бұл – өскелең ұрпақтың қоғамдық өмірге белсенді араласып, туған қаласының дамуына нақты үлес қосып отырғанының жарқын көрінісі.Алдағы уақытта жобаны іске асыру кезеңі басталады. Аталған бастама қалалық инфрақұрылымды жақсартуға, қоғамдық кеңістіктердің қолжетімділігі мен жайлылығын арттыруға ықпал етпек. Сонымен қатар, бұл тәжірибе жастардың әлеуметтік жауапкершілігін арттырып, азаматтық бастамаларды қолдаудың тиімді үлгісі ретінде бағаланады.Ақпарат көзі : https://www.gov.kz/memleket/entities/kostanay/press/news/details/1217278?lang=kk

Астанада Қорғаныс министрі авиация генерал-лейтенанты Дәурен Қосановтың Халықаралық дзюдо федерациясының президенті Мариус Визермен кездесуі өтті.Тараптар келіссөздер кезінде Қазақстан Қарулы күштері жүйесінде дзюдоны дамытуға бағытталған ынтымақтастық туралы Меморандумға қойды.Құжат Қорғаныс министрлігінің жоғары әскери оқу орындары мен колледждеріндегі оқыту бағдарламаларына Халықаралық дзюдо жүйесін кезең-кезеңмен енгізуді көздейді. Дзюдо элементтері де Қарулы күштер әскери қызметшілерінің дене шынықтыру сабақтарына біріктірілмек.Материалдық-техникалық базаны нығайтуға ерекше назар аударылатын болады. Халықаралық дзюдо федерациясы мен "Жеңіс" клубының қолдауымен әскери білім беру ұйымдарын татами, спорттық жабдықтармен және кимономен қамтамасыз ету көзделген.Сонымен қатар, курсанттар арасында дзюдо лигаларын құру жоспарланып отыр. Мұндай бірлестіктер техникалық шеберлікті арттыруға, бәсекелестікті дамытуға және осы спорт түрін танымал етуге ықпал етеді. Тараптар мұндай өзара іс-қимыл дзюдоны дамыту үшін жаңа мүмкіндіктер ашатынын және спортшылардың жаңа биіктерге жетуге деген ынтасын арттыратынын атап өтті.Ақпарат көзі : https://www.gov.kz/memleket/entities/mod/press/news/details/1217266?lang=kk

Әуе қорғанысы күштерінің 19132 әскери бөлімінде қорғаныс ведомствосының басшысы авиация генерал-лейтенанты Дәурен Қосанов әскери қызметшілердің отбасыларының қатысуымен өткен Жеңіс күніне арналған іс-шараға қатысты.  Халық қаһармандары армия генералы Мұхтар Алтынбаев, авиация генерал-майорлары Тоқтар Әубәкіров пен Айдын Айымбетов, Қарулы күштердің ардагерлері авиация генерал-майорлары Жиентай Сандыбаев пен Алсай Жұманов, генерал-майор Қайрат Садықов және басқалар мерекелік іс-шараның құрметті қонағы болды.Майдангерлер мен тыл еңбеккерлерінің ерлігіне құрмет ретінде қорғаныс ведомствосының басшысы мен ардагерлер аумаққа ағаш көшеттерін отырғызды.- Соғыс жылдарында 1 миллион 200 мыңнан астам қазақстандық майданға аттанды. Олардың жартысы майдан даласынан оралмады. Біз мұны ешқашан ұмытпауымыз керек. Қазақстан Қарулы күштерінің әскери қызметшілері аға буынның ерлігін лайықты жалғастырып келеді. Армияның миссиясы - еліміздің қорғаныс қабілетін нығайту және қазақстандықтардың бейбіт өмірін қорғау. Біз мұны абыроймен атқаруымыз керек, – деп атап өтті Қорғаныс министрі.Іс-шара қонақтары ұшу және техникалық құрамдардың әскери киім нысандары көрмесімен, сондай-ақ қару-жарақ пен әскери техниканың заманауи үлгілерімен танысты. Бөлім аумағына қойылған ЕС-145 және Ми-171 тікұшақтары, Ан-72 және С-295 ұшақтары, Т-34 және Т-72 танктері, БМ-13 "Катюша" реактивті жүйесі, БТР-82 бронетранспортері, "Арлан" БКМ және т. б. балалар мен оқушылардың қызығушылығын тудырып, олардың фонында суретке түсті.Іс-шараға қатысушылар үшін ауқымды бағдарлама ұйымдастырылды. Қол күресі, қазақ күресі, бокс, гір тасын көтеру, арқан тарту және белтемірге тартылудан жарыстар өтті. Жарыстан кейін қонақтар сарбаз ботқасынан дәм татты.Қарулы күштер Ұлттық әскери-патриоттық орталығының шығармашылық ұжымы көрермендерге мерекелік көңіл-күй сыйлады. Концерт бағдарламасында патриоттық композициялар мен соғыс жылдарындағы әндер болды. Құрмет қарауыл ротасының қойылымы көрермендердің ерекше қызығушылығын туғызды. Олардың іс-қимылдарындағы үйлесімділік пен саптық дайындықтың жоғары деңгейі таң қалдырды.Ашық есік күні спорттық жарыстар мен асфальтқа сурет салу байқауының жеңімпаздарын марапаттау рәсімімен аяқталды. Іс-шара ардагерлерге құрмет және Отан қорғаушы ұрпақтарының сабақтастығының символына айналды.Ақпарат көзі : https://www.gov.kz/memleket/entities/mod/press/news/details/1217142?lang=kk

Отан қорғаушы күніне орай Қазақстан Республикасы Қорғаныс министрі авиация генерал-лейтенанты Дәурен Қосанов әскери қызметшілерге Жоғарғы Бас Қолбасшының атынан жаңа пәтерлердің кілттерін табыстады.Бұл игі шара – ел қауіпсіздігін қамтамасыз етіп жүрген азаматтарға көрсетілген құрмет пен қолдаудың айқын көрінісі.-  Бұл Отан қорғаушыларға мемлекет тарапынан жасалған  шынайы құрмет пен қамқорлық белгісі. Әскери қызметшілердің әлеуметтік жағдайы әрдайым назарда. Бүгінгі табысталған пәтерлер – сіздер  жасаған қажырлы еңбекке  берілген лайықты баға. Жауынгердің жеңісі – оның артындағы тылына байланысы, ол тыл - отбасы. Әскери қызметті адал атқару үшін, әлеуметтік жағдайға жалтақтап артқа қарамау өте маңызды. Бүгін Мемлекет басшысы атынан сіздерге жаңа пәтер кілттерін табысталды. Әр шаңырақта ертең ел тізгінін ұстайтын, Отанына адал қызмет ететін ұлықты ұрпақ өсіп-жетіледі деп сенемін. - деді Қорғаныс министрі авиация генерал-лейтенанты Дәурен Қосанов.ҚР Қорғаныс министрлігі Құрлық әскерлерінің бас қолбасшысы генерал-майор Мереке Көшекбаев те әскери қызметшілерді қоныстоймен құттықтады.-  Бұл үй Мемлекет басшысының тарапынан сіздерге көрсетіліп отырған үлкен қамқорлық пен қолдаудың айқын көрінісі. Отанға адал қызмет етіңіздер. Айбынды армиямыздың абыройы арта берсін. Жаңа баспана құтты болсын. Әрқашан шаңырақтарыңыз биік, керегелеріңіз берік болсын - деді Құрлық әскерлерінің бас қолбасшысы генерал-майор Мереке Көшекбаев.Жаңа баспанаға ие болған 15 әскери қызметші мен олардың отбасылары үшін бұл ерекше қуаныш пен үлкен көмек. Жаңа үйде тұрмысқа қажет дүниенің бәрі бар. Ішіндегі жаңа жиһаз бен тұрмыстық техника да көзді қуантады.-  Мен бүгін екі бөлмелі үйдің кілтін алдым. Мен және менің отбасым үшін бұл үлкен қуаныш. 11 жылдан бері әскери бөлімде телефонисші болып қызмет атқарамын. Мерекеде осындай сыйлық жасаған жоғары басшылыққа үлкен алғысымды айтамын, - деді ефрейтор Динара Бекмағамбетова.Мемлекет тарапынан көрсетіліп жатқан мұндай қамқорлық әскери қызметтің беделін арттырып, жауынгерлердің ел алдындағы жауапкершілігін одан әрі нығайта түседі. Жаңа қоныста шашу шашылып, үлкен  кісілер бата берді.-  Біз үшін бүгін өте қуанышты күн. Баспаналы болдық. 6 баланың әкесімін.  Мерекеде осындай керемет сыйлық жасап, көңілімізді көкке жеткізген Жоғары Бас Қолбасшыға, Қорғаныс министрлігіне алғысым шексіз. Барлық әріптестеріме жұғысты болсын, - деді 87962 әскери бөлімінің бөлімше командирі сержант Әлімжан Ырысбеков.Сержант Әлімжан Ырысбековтың кішкентай қызы Айым Рахымберді де қуанышты балалық көңіл-күйімен бөлісті.-  Алақай, біз бүгін пәтер алдық. Ас үйде анам және әпкелеріммен бірге әкем мен ағаларыма тәттілер пісіреміз, - деді 6 жасар Айым Рахымберді.Бүгінде Қазақстанның айбынды армиясы батыр бабалардың даңқты жолын лайықты жалғастырып келеді. Әскери қызметшілеріміз – қасиетті Тәуелсіздігіміздің берік қалқаны. Олар еліміздің тыныштығын, жеріміздің тұтастығын қас қақпай күзетіп тұр.Ақпарат көзі : https://www.gov.kz/memleket/entities/mod/press/news/details/1216148?lang=kk

2026 жылғы 13–15 мамыр аралығында Астана қаласындағы МВЦ EXPO Халықаралық көрме орталығында «InterFood Astana 2026» – «Азық-түлік өнімдері, сусындар, ингредиенттер, қаптама және тамақ өнеркәсібіне арналған жабдық» атты 26-шы Қазақстан халықаралық көрмесі өтеді.Көрме дәстүрлі түрде Қазақстандағы негізгі салалық алаңдардың бірі болып табылады және ол азық-түлік өндірушілерін, жабдық жеткізушілерін, қайта өңдеу өнеркәсібі өкілдерін, бөлшек сауда мен мемлекеттік құрылымдарды біріктіреді. Іс-шараға әлемнің 12 елінен шамамен 80 компания қатысады.Экспозиция азық-түлік және сусын өндірісінен бастап ингредиенттерге, қаптама шешімдеріне және тамақ өнеркәсібіне арналған заманауи технологиялық жабдықтарға дейінгі кең ауқымды бағыттарды қамтиды. InterFood Astana көрмесінің ерекшелігі — саланы кешенді түрде таныстыру, яғни өндіріс пен қайта өңдеудің толық циклін көрсету.Көп жылдан бері InterFood Astana көрмесі агроөнеркәсіптік кешен саласындағы мемлекеттік саясаттың басым бағыттарын жүзеге асыратын тиімді кәсіби алаң болып келеді.Форумның күн тәртібі елдің стратегиялық құжаттарында және Мемлекет басшысының тапсырмаларында айқындалған міндеттермен тікелей байланысты және тамақ және қайта өңдеу өнеркәсібін дамытуға арналған практикалық шешімдер әзірлеуге бағытталған.Екі күн ішінде Қазақстанның ет және сүт саласына қатысты мәселелер талқыланады.Ауыл шаруашылығы өнімдерін терең өңдеу, қосылған құнды арттыру, заманауи технологияларды енгізу және отандық өндірушілердің экспорттық әлеуетін кеңейту мәселелеріне ерекше назар аударылады.Іскерлік бағдарламаның басты оқиғасы — Қазақстандағы алғашқы халықаралық Meat & Dairy Industry Forum болады.Көрме аясында сондай-ақ Ритейл-дистрибьютор орталығы ұйымдастырылады — бұл азық-түлік жеткізушілері, сауда желілері және дистрибьюторлар арасындағы келіссөздерге арналған арнайы алаң. Бұл формат қатысушыларға тікелей іскерлік байланыс орнатуға, өткізу арналарының кеңеюіне және ынтымақтастық шарттарын талқылауға мүмкіндік береді.Сонымен қатар «Дәстүрлер сапасы» атты азық-түлік өнімдері мен сусындардың кәсіби дегустациялық байқауы өтеді. Байқау қорытындысы бойынша үздік өндірушілер алтын медальдармен марапатталады.Ұйымдастырушылардың айтуынша, InterFood Astana — тек көрме ғана емес, сонымен қатар салалық бастамаларды талқылайтын, мемлекет пен бизнес арасындағы келісілген тәсілдерді әзірлейтін және Қазақстанның тамақ және қайта өңдеу өнеркәсібіндегі реформаларды іс жүзінде қолдайтын жұмыс алаңы.Ақпарат көзі : https://www.gov.kz/memleket/entities/moa/press/news/details/1216216?lang=kk

Ақмола облысының Родина ауылында Қазақстан Республикасы Қарулы күштері Ұлттық әскери-патриоттық орталығы әскери-тарихи музейі филиалының салтанатты ашылуы өтті.Іс-шара Ұлы Отан соғысы батырларына арналған ескерткішке гүл шоғын қою рәсімімен басталды. Ескерткіште Жеңісті жақындатуға үлес қосқан 130-дан астам ақмолалықтың есімі қашап жазылған. Рәсімге Қазақстан Республикасының Қорғаныс министрі авиация генерал-лейтенанты Дәурен Қосанов, Ақмола облысының әкімі Марат Ахметжанов, Халық қаһарманы генерал-лейтенант Бақытжан Ертаев, Қарулы күштердің ардагерлері, қоғам өкілдері және өңір тұрғындары қатысты.Жаңа музей кешені жастарды әскери-патриоттық рухта тәрбиелеу мен тарихи жадты қалыптастыруда маңызды нысанға айналып отыр. Экспозицияда Ұлы Отан соғысы кезеңіндегі қару-жарақ пен әскери техника үлгілері, архивтік материалдар, жауынгерлік тулардың түпнұсқалары, сондай-ақ Ақмола өңірінің Жеңісті жақындатуға және елдің дамуына қосқан үлесі туралы баяндайтын жәдігерлер қойылған.Әскери-тарихи музейдің филиалы «Родина» агрофирмасының бас директоры Иван Сауэрдің бастамасымен және Қазақстан Республикасы Қорғаныс министрлігінің қолдауымен ашылып отыр.Музейді ашу ісіне Халық қаһармандары армия генералы Мұхтар Алтынбаев, генерал-лейтенант Бақытжан Ертаев, сондай-ақ генерал-полковник Руслан Жақсылықов, Қазақстанның еңбек сіңірген қайраткері Арман Әсенов және басқа да азаматтар елеулі үлес қосты. Жобаны жүзеге асыру үшін құрамына әскери-тарихи музей қызметкерлері, ауыл тұрғындары мен «Родина» агрофирмасының мамандары кірген жұмыс тобы құрылды. Сондай-ақ, Марат Құсайынов жетекшілік ететін «Мемориалдық аймақ» іздестіру жасағы зор көмек көрсеткенін атап өту керек.Музейдің негізгі міндеті – келушілерді өңір мен Родина ауылының тарихымен таныстыру, туған өлкенің батырларының есімін мәңгі есте қалдыру, сондай-ақ олардың ерлігі мен жанқиярлығы үлгісінде жастарға әскери-патриоттық тәрбие беру. Музейді ашу барысында заманауи әскери-музейлік кешендерді қалыптастырудағы озық шетелдік тәжірибе ескерілді.Музейдің ашылу салтанатында сөз сөйлеген Қорғаныс министрі ұрпақтар сабақтастығының ерекше маңызын атап өтті.– Бүгін біз жай ғана музей емес, болашақ құрметпен ұрпақ тәу етер тәрбие орнын ашып отырмыз. Мұндай жобалар арқылы жастар бейбіт өмірдің қадірін, аға буынның ерлігін және Отанға қызмет етудің маңызын тереңірек түсінетін болады. Тарих тек оқулықтарда немесе цифрлық кеңістікте ғана болмауы керек, оны көріп, сезіне білу қажет, – деп атап өтті авиация генерал-лейтенанты Дәурен Қосанов.Ұлттық әскери-патриоттық орталықтың бастығы Арман Әсенов музей ісін дамыту жастардың патриоттық санасын қалыптастырудың маңызды бөлігі екеніне тоқталды.– Мұндай музейлер балалардың өткен тарихпен танысып, ата-бабаларымыздың ерлігінің нақты айғақтарын көзбен көріп, жүрекпен сезінуіне мүмкіндік беру үшін ашылады. Патриоттық сезім өз тарихына, мәдениетіне және аға буынның ерлігіне деген құрмет арқылы қалыптасады. Келешекте осындай музейлер еліміздің барлық ауылдарында ашылуы үшін бар күшімізді саламыз, – деді ол.Музейге 100-ден астам жәдігер қойылған. Олардың қатарында 1939-1944 жылдары шығарылған 16 әскери техника бар. Атап айтқанда, бронды техника, артиллериялық жүйелер, ұшақ үлгілері, атыс қарулары және әскери тұрмысқа қатысты заттар. Көптеген жәдігерлер бұрын Қарулы күштер әскери-тарихи музейінің қорында сақталған.Экспозицияның жекелеген бөлімдері ақмолалық батырларға, соғыс жылдарындағы тыл еңбеккерлерінің ерлігіне, сондай-ақ өңір мен Қазақстан Қарулы күштерінің дамуына арналған.Іс-шара Қазақстан Республикасы Қарулы күштері Ұлттық әскери-патриоттық орталығының шығармашылық ұжымы мен «Жас сарбаз» балалар студиясының өнер көрсетуімен аяқталды.Ақпарат көзі : https://www.gov.kz/memleket/entities/mod/press/news/details/1216244?lang=kk

Ақтөбе облысына жұмыс сапары барысында ҚР Сауда және интеграция вице-министрі Жанель Кушукова бизнес өкілдерімен кездесіп, өңірдегі бірқатар ірі өнеркәсіптік кәсіпорындарды аралады.Сапар аясында сауданы дамыту, отандық тауар өндірушілерді қолдау, саланы цифрландыру және экспорттық әлеуетті кеңейту мәселелері талқыланды.Вице-министр «Зерде-Керамика Ақтөбе», Ақтөбе рельс-арқалық зауыты, «Alash Engineering Technology» ЖШС және «Қазақстандық мұнай жабдықтары зауытының» жұмысымен танысты. Өңір кәсіпорындары ішкі нарық үшін өнім шығарып, оны ТМД елдеріне, Түркияға және басқа да мемлекеттерге экспорттайды.Сапар қорытындысы бойынша Ақтөбе облысының жоғары өнеркәсіптік және инвестициялық әлеуетке ие екені, ал іске асырылып жатқан жобалар шикізаттық емес экспортты дамытуға және жаңа жұмыс орындарын құруға септігін тигізетіні атап өтілді.Ақпарат көзі : https://www.gov.kz/memleket/entities/mti/press/news/details/1216439?lang=kk

Астанада Отан қорғаушы күніне орай Қазақстан Республикасы Қарулы күштері Ұлттық әскери-патриоттық орталығы Орталық әскери оркестрінің шығармашылық ұжымы қала тұрғындары мен қонақтарына ерекше мерекелік бағдарлама ұсынды.Мерекелік шара Хан Шатыр сауда ойын-сауық орталығы маңында бастау алды. Әскери оркестр салтанатты маршпен жүріп өтіп, Қазақ радиосы көшесі бағытындағы алаңға дейін танымал әуендерді орындады. Музыкалық шеру қала тұрғындарының назарын аударып, мерекелік атмосфера қалыптастырды.Әскери музыканттар Н. Тілендиевтің шығармаларын, «Алматы» (В. Парпибаев), «Амангелді» және «Қазақ маршы» (Н. Самохвалов), «Сарбаздар» (Н. Қошқаров), «Дикси» (Л. Гурьянов) және қазақ әндерінен құралған попурриді орындады.– Бүгін Орталық әскери оркестр бірнеше көпшілік орында өнер көрсетті. Халыққа мерекелік көңіл-күй сыйлағымыз келді. Барша қазақстандықтарды Отан қорғаушы күнімен шын жүректен құттықтаймын. Еліміз тыныш, шекарамыз берік, аспанымыз ашық болсын, – деді Орталық әскери оркестрдің аға дирижері майор Нұрлан Қошқаров.Көрермендер әскери оркестрдің өнерін ерекше ықыласпен қабылдады.– Түркістаннан қыдырып келдік. Осындай әскери оркестрдің өнерін алғаш рет көруім. Әсіресе маршпен жүріп келе жатып орындаған әуендері қатты әсер етті. Мерекелік көңіл-күй сыйлаған әскерилерге алғыс айтамын, – деді қала қонағы Қыздаркүл Абдулатип.Әскери оркестрдің мұндай музыкалық шерулері Ұлттық әскери-патриоттық орталықтың игі дәстүріне айналып, ел ішіндегі патриоттық рухты нығайтуға үлес қосып келеді.Ақпарат көзі : https://www.gov.kz/memleket/entities/mod/press/news/details/1216451?lang=kk

Қазақстанда «Батырларға тағзым» ұлттық порталын құру және 1938–1945 жылдары қызыл әскер қатарына шақырылған қазақстандықтардың мұрағат деректерін цифрландыру жөнінде ауқымды жоба жүзеге асырылып жатыр.Бастама Президенттің Ұлттық құрылтайда берген тапсырмасы аясында қолға алынған.Ауқымды жұмыс ҚР Ұлттық қорғаныс университетінде жүргізілуде. Мұнда жоғары оқу орындары Қорғаныс министрлігінің Орталық мұрағатына тапсырған облыстық және аудандық әскери комиссариаттардың әскерге шақыру жөніндегі алфавиттік кітаптары өңделу үстінде.Осындай мақсатпен әскери оқу орындарын, министрліктің бейінді департаменттерін, Қарулы күштердің бөлімшелерін, Петропавл қаласындағы Ұлттық ұлан академиясын және азаматтық жоғары оқу орындарының 30 әскери кафедрасын біріктірген ведомствоаралық жұмыс тобы құрылды. Құжаттарды фотолап тіркеу және оларды бірыңғай электрондық базаға енгізу жұмыстары іске асырылып жатыр.– Біздің алдымызда соғыс жылдары әскерге шақырылған 1 миллион 200 мыңнан астам қазақстандық туралы деректерді цифрлық форматқа көшіру міндеті тұр. Көптеген отбасы үшін бұл – ата-бабаларының тағдырын білуге, олар туралы естелікті сақтап, кейінгі ұрпаққа жеткізуге мүмкіндік. Бұл жұмысқа 20 мыңнан астам әскери кафедра студенттері, одан өзге әскери оқу орындарының курсанттары мен кадеттерінің жұмылуы жобаға қосымша білімдік әрі патриоттық мән беріп отыр, – деді Қорғаныс министрінің тәрбие және идеологиялық жұмыстар жөніндегі орынбасары генерал-майор Асқар Мұстабеков.Алдағы уақытта цифрлық ресурс майдангерлердің ұрыс қимылдарына қатысқаны, марапаттары және өмірбаянын туралы өзге де деректерімен толықтырылады. Бұл ақпарат іздеуді жеңілдетіп қана қоймай, бұған дейін сол саланың мамандарына ғана қолжетімді болған бірегей мұрағаттық материалдарды ғылыми айналымға енгізуге мүмкіндік береді.Ақпарат көзі : https://www.gov.kz/memleket/entities/mod/press/news/details/1216547?lang=kk

Қазақстан Республикасы Сыртқы істер министрлігінің Инвестиция комитетінің төрағасы Ғабидулла Оспанқұлов бастаған қазақстандық делегацияның сапары аясында Корея Республикасының астанасында «Корея бизнесі үшін Қазақстанның инвестициялық мүмкіндіктері» тақырыбында дөңгелек үстел өтті.Іс-шараға екі елдің мемлекеттік органдарының, ұлттық компаниялардың, қаржы институттарының және бизнес қауымдастықтарының өкілдері қатысты. Талқылауларға энергетика, өнеркәсіп, инфрақұрылым, қаржы және технология салаларын ұсынатын шамамен 50 жетекші кореялық компания қатысты.Қазақстан Корея Республикасындағы Елшісі Әсет Исенәлі Қазақстан-Корея стратегиялық серіктестігінің үдемелі дамуын және Оңтүстік Корея бизнесінің Қазақстан экономикасына деген қызығушылығының артуда екенін атап өтті.ҚР Сыртқы істер министрлігінің Инвестиция комитетінің төрағасы Ғабидулла Оспанқұлов Орталық Азиядағы ең ірі экономика, маңызды көлік және логистикалық хаб және ұзақ мерзімді инвестициялық жобалар үшін сенімді платформа ретіндегі Қазақстанның бәсекелестік артықшылықтарына тоқталды.Кореялық серіктестерге энергетика, машина жасау, агроөнеркәсіптік кешен, көлік инфрақұрылымы, логистика және цифрлық технологиялар саласындағы ынтымақтастықтың перспективалы бағыттары ұсынылды. Азия мен Еуропа арасындағы негізгі транзиттік бағыт ретінде маңыздылығы артып келе жатқан Транскаспий халықаралық көлік бағытын (орта дәліз) дамытуға ерекше назар аударылды.Қатысушылар Қазақстанның арнайы экономикалық және индустриялық аймақтары ұсынатын мүмкіндіктерге, инвесторларға арналған қазіргі үкіметтік қолдау шараларына және «бір терезе» қағидатына негізделген жобаларды қолдау тетіктеріне назар аударды. Сондай-ақ, Ақтөбе облысы әкімдігінің, «Бәйтерек» зерттеу холдингі» АҚ, «Самұрық-Қазына» АҚ, «KAZAKH INVEST» ҰК» АҚ, «KEGOC» АҚ, «QazaqGaz» ҰК» АҚ, «Almaty Invest» және «Қорқыт Ата» АЭА басқару компаниясының өкілдері баяндамалар жасады. Баяндамаларда инфрақұрылымдық бастамалар, өндірісті оқшаулау жобалары және кореялық капиталмен жоғары технологиялық өндіріс жобаларын бірлесіп жүзеге асыру перспективалары талқыланды.Іс-шара барысында «Alatau City» жобасы бөлек ұсынылды. Қазақстандық тарап заманауи қалалық инфрақұрылымды дамыту үшін озық кореялық технологиялар мен инвестицияларды тарту мүмкіндіктерін және жаңа даму орталығының индустриялық-инновациялық әлеуетін атап өтті.Жобаның Қазақстан Республикасының қабылданған «Алатау қаласының арнайы құқықтық режимі туралы» Конституциялық заңына сәйкес жүзеге асырылып жатқаны атап өтілді, ол бизнес жүргізу үшін ерекше жағдайларды, жеңілдетілген әкімшілік рәсімдерді және шетелдік инвесторлар үшін тұрақты және болжамды реттеуші ортаны қамтамасыз етеді. Талқылауларға «KIND», «Korea Eximbank», «Doosan Enerbility», «KNOC», «Shinhan Securities», «BNK Financial Group» және басқа да жетекші оңтүстік кореялық корпорациялар мен қаржы институттарының өкілдері қатысты.Дөңгелек үстел аясында қазіргі және әлеуетті инвесторлармен бірқатар екіжақты кездесулер өтті. Тараптар нақты жобаларды, өнеркәсіптік ынтымақтастықты кеңейту перспективаларын және ынтымақтастықтың жаңа бағыттарын талқылады.Ақпарат көзі : https://www.gov.kz/memleket/entities/mfa/press/news/details/1216659?lang=kk

2026 жылғы 8 мамырдағы ҚР Парламенті палаталарының бірлескен отырысында депутаттар "Қазақстан Республикасындағы сайлау туралы "Қазақстан Республикасының Конституциялық заңына өзгерістер мен толықтырулар енгізу туралы" Конституциялық заң жобасын бірінші оқылымда мақұлдады.Түзетулер жобасын ҚР Премьер-Министрінің орынбасары – ұлттық экономика министрі Серік Жұманғарин таныстырды. Оның айтуынша, құжат сайлау науқаны барысында белгілі болған мәселелерді ескере отырып, сайлау заңнамасын жетілдіру үшін әзірленген.Түзетулер арқылы әкімдерді сайлау кезінде қайта дауыс беру мәселесін реттеу, кандидатты ұсыну тәртібін нақтылау, сондай-ақ бір адамның бірнеше сайлау науқанына бір мезгілде қатысуын болдырмау ұсынылған.Бұдан басқа, онлайн-кеңістікте сайлау алдында үгіт жүргізу, партиялық интернет-ресурстар мен әлеуметтік желіні пайдалану нормалары бар. Кандидаттардың сенімді тұлғаларына қойылатын талап, кандидаттарды қолдау үшін қол жинау тәртібі нақтыланған.Түзетулер бойынша вахталық жұмыс орындарында және арнайы уақытша оқшаулау мекемелерінде сайлау учаскесін құру мүмкіндігі қарастырылады.Серік Жұманғариннің айтуынша, ұсынылған нормаларды қабылдау сайлау процесінің ашықтығын арттыруға, қатысушылардың жауапкершілігін күшейтуге және рәсімдердің сақталуына мүмкіндік береді.Ақпарат көзі : https://www.gov.kz/memleket/entities/economy/press/news/details/1216734?lang=kk

Кеңес Одағының батыры, тұңғыш қорғаныс министрі, Халық қаһарманы, армия генералы Сағадат Нұрмағамбетов атындағы Әскери колледжде «Заң мен тәртіп» конституциялық қағидатын іске асыру аясында прокуратура органдары әскери ведомстволармен бірлесіп «Сарбазға прокурорлық кеңес» атты республикалық профилактикалық акция ұйымдастырылды. Оған Бас прокуратура мен Бас әскери прокуратура өкілдері, прокуратура органдарының ардагерлері, колледждің жеке құрамы мен кадеттер, жас сарбаздықтар қатысты.Бұл бастама әскери қызметшілердің құқықтық сауаттылығын арттыруға, әскери ортада заң талаптары мен тәртіпті сақтауды нығайтуға бағытталған.Іс-шара армия генералы Сағадат Нұрмағамбетовтің ескерткішіне гүл шоқтарын қою рәсімінен басталды. Одан бөлек қонақтар колледж музейін аралап, оқу орнының тарихымен және көрнекті қолбасшының өмір жолымен танысты. Делегация спорт кешенін, оқу павильондарын, кітапхананы, психологиялық қызметті, жатақхананы және асхананы көріп, курсанттардың тұрмыс жағдайы мен оқу үдерісіне жасалған мүмкіндіктерге баға берді.Бағдарлама аясында кадеттермен және «Жас сарбаз» қозғалысының тәрбиеленушілерімен ашық форматта кездесу өтті. Сұхбат барысында әскери қызметтің маңызы, құқықтық сауаттылықты арттыру, әскери ортада заң талаптары мен тәртіпті сақтау мәселелері кеңінен талқыланды.Кездесу барысында әскери прокуратура органдарының ардагері әділет полковнигі Болат Тазабеков өз ойын ортаға салды.– Бүгінгі кездесудің басты мақсаты – жас сарбаздарға заң талаптарын түсіндіру ғана емес, олардың бойында жауапкершілік пен тәртіпке деген берік көзқарас қалыптастыру. Әскери қызметте заңды сақтау – әрбір жауынгердің абыройлы міндеті, – деді өз сөзінде.Қонақтар сарбаздарға олардың құқықтары мен міндеттерін түсіндіріп, құқық бұзушылықтардың алдын алу және әскери тәртіпті нығайту жөнінде нақты ұсыныстарын жеткізді.– Осындай кездесулер біз үшін өте маңызды. Біз әскери дайындықты ғана емес, сонымен қатар өз құқықтарымыз бен міндеттерімізді тереңірек түсінеміз. Бұл болашақта саналы әрі жауапты әскери қызметші болуға ықпал етеді, – деді 3-ші оқу ротасының кадеті Әмзехан Сәтжан.Іс-шара соңында «Ұлан сазы» ансамблі мен Ұлттық әскери-патриоттық орталығы балалар студиясының бишілері өнер көрсетіп, қатысушыларға патриоттық рух сыйлады.Ақпарат көзі : https://www.gov.kz/memleket/entities/mod/press/news/details/1216803?lang=kk

Облыс әкімі Құмар Ақсақалов Жеңіс мерекесі қарсаңында Ұлы Отан соғысының ардагерлерін құттықтады. Майдангерлердің ұрпақ алдындағы ерлігі мен еңбегі қандай құрметке де лайықты.Бүгінде аймағымыздағы ардагерлердің барлығы ғасыр жасағандар.Жерлес жауынгерлер қатарында ақын, ұстаз, журналист Қасымхан Алдабергенов бар. Ол Украина майдандарында шайқасып, Венгрия, Австрия және Чехословакияны азат етуге қатысқан. Бейбіт күнде білім, мәдениет, руханият салаларының дамуына зор үлес қосты.Украина майданы құрамында жауынгерлік жолдан өткен Ділдәбек Нұрышев те – ортамыздағы мақтанышымыз. Ол Одер өзеніндегі ауыр шайқастарға қатысып, Польша жерін азат етуге атсалысқан. Соғыстан кейін аймақтың дамуына еңбек сіңіріп, өнегелі әулет қалыптастырды.Майдан даласында танк командирі болған Михаил Подоляков Курск шайқасы мен Украина жерін азат ету операцияларына қатысты. Елге оралып, ұзақ жылдар мемлекеттік қызметте еңбек етті, ардагерлер ұйымының жетекшілерінің бірі болды.Аймақ басшысы майдангерлерге зор денсаулық, ұзақ ғұмыр және отбасыларына амандық тілеп, олардың табандылығы мен Отанға деген адалдығы кейінгі ұрпаққа әрдайым үлгі болып қала беретінін атап өтті.Ақпарат көзі : https://www.gov.kz/memleket/entities/kostanay/press/news/details/1216932?lang=kk

«Ардагерлерге тағзым» республикалық акциясы аясында Құрлық әскерлері бас қолбасшысы басқармасының әскери қызметшілері Астанадағы жалғыз Ұлы Отан соғысының ардагері Рзағұл Байкешевті Жеңіс күнімен құттықтады.Құрлық әскерлерінің бас қолбасшысы генерал-майор Мереке Көшекбаев майдангерге Қорғаныс министрінің атынан алғыс хат, естелік сыйлық және соғыс жылдарындағы ауыр күндер мен майдандас достарын еске түсіретін далалық ас үлесін табыс етті.– Сіздің өмір жолыңыз бен теңдессіз ерлігіңіз біз үшін үлгі-өнеге. Сіз қазіргі Қазақстан армиясындағы әрбір сарбаз бен офицер үшін шынайы отансүйгіштіктің жарқын үлгісісіз, – деп атап өтті генерал-майор М. Көшекбаев.Соғыс ардагеріне Қорғаныс министрлігі арнайы парад ұйымдастырды. Орталық әскери оркестрдің салтанатты маршының сүйемелдеуімен құрмет қарауыл ротасының әскери қызметшілері мен Сағадат Нұрмағамбетов атындағы әскери колледждің кадеттері сап түзеп өтті. Ал Ұлттық әскери-патриоттық орталық Орталық ансамблінің әншілері майдангерге соғыс жылдарындағы танымал әндерді орындап берді.Құттықтауларды жылы қабылдаған ардагер көрсетілген құрмет пен ықылас үшін шынайы ризашылығын білдірді. Кездесу соңында Рзағұл Байкешев халық дәстүрімен әскери қызметшілерге батасын беріп, қызметтеріне табыс және тәуелсіз Қазақстанның өркендеуін тіледі.Рзағұл Байкешев 1923 жылғы 18 қазанда Ақтөбе облысының Мұғалжар ауданында дүниеге келген. Соғысқа дейін совхозда қарапайым жұмысшы болып еңбек етті.1943 жылы әскер қатарына шақырылып, Кеңес армиясы құрамында Ржев түбіндегі шайқастарға және Великие Луки қаласы маңындағы шабуылдау операциясына қатысты. Майдан жолы оны Польша, Румыния және Венгрия арқылы алып өткен. Соғысты ефрейтор шенімен аяқтап, елге оралған.Рзағұл Байкешев I және II дәрежелі Отан соғысы ордендерімен, Жуков медалімен және көптеген мерейтойлық наградалармен марапатталған.Соғыстан кейін Ақмола облысының Рождественка ауылында экспедитор болып еңбек етті. 1983 жылы зейнетке шықты.Ақпарат көзі : https://www.gov.kz/memleket/entities/mod/press/news/details/1216933?lang=kk

Теңіз жаяу әскерлері бригадасының әскери қызметшілері төл мерекелеріне орай  ұйымшылдық пен төзімділікті паш еткен патриоттық акция ұйымдастырды. Жүгіру басталар алдында  бригада командирі гвардия подполковнигі Азамат Сүлейменов жеке құрамға бастамалары үшін алғыс айтып, кәсіби мерекелерімен құттықтады. Бөлімшелер жүгіріске әскер тектерінің туларын көтеріп шықты. Теңіз жаяу әскерлерінің легі 10 шақырымдық қашықтықты сенімді еңсеріп, жоғары дене дайындығы мен ұйымшылдық көрсете алды. Бәрінен бұрын 4 жастағы Бек Әлиұлы көрермен назарын өзіне аударды. Жуырда ғана теңіз жаяу әскері қатарына символикалық қабылдау рәсімінен өткен ол әскери қызметшілермен бірге жүгіруге қатысты. Жас патриот қашықтықтың едәуір бөлігін өздігінен жүгіріп өтті. Офицерлер мен сержанттар оған қолдау көрсетіп, жігерлендіріп отырды. Ал ең қиын тұстарда оны көтеріп алып жүрді. Бектің төзімділігі, табандылығы және теңіз жаяу әскерлерімен бірге қашықтықты толық өтуге деген шынайы талпынысы ұрпақтар сабақтастығының, бірлік пен жауынгерлік бауырластық дәстүрлеріне адалдықтың жарқын символына айналды.Ақпарат көзі : https://www.gov.kz/memleket/entities/mod/press/news/details/1216972?lang=kk