Мумбай, 2026 ж. 27-29 сәуір – Қазақстан Республикасының Үндістан Республикасындағы Елшісі А.Есқараевтың Мумбай қаласына жұмыс сапары өтті. Сапар аясында қазақстандық және үнді компанияларының басшылығымен, Махараштра штатының саяси топтарының өкілдерімен, сондай-ақ дін қайраткерлерімен бірқатар кездесулер өтті. Сапардың басты мақсаты - сауда-экономикалық және инвестициялық ынтымақтастықты нығайту, сондай-ақ өзара қызығушылық тудыратын бірлескен жобаларды ілгерілету.

Ү.ж. 27 сәуірде «Өскемен титан-магний комбинаты» АҚ басшылығымен кездесу өтті. Келіссөздер барысында титан шлагын өндіруге бағытталған «IREUK Titanium Limited» Қазақстан-Үндістан жобасын іске асыру мәселелері қаралды. Титан өнімдеріне деген тұрақты сұраныс пен Қазақстан мен Үндістан арасындағы өнеркәсіптік кооперацияны дамытуға қосқан үлесін ескере отырып, оның стратегиялық маңыздылығы атап өтілді. Елші жобаны жан-жақты қолдайтынын және Елшіліктің оны іске асырудың барлық кезеңдерінде, соның ішінде Үндістанның мемлекеттік органдарымен өзара іс-қимыл жасау және келіссөздер үдерісін сүйемелдеуге дайын екенін растады.

Сапар аясында «Tata Sons Private Limited» компаниясының бизнесін дамыту және корпоративтік қарым-қатынас мәселелері бойынша Президенті  С.Чоударимен кездесу өтті. Инвестициялық ынтымақтастықтың перспективалары мен өзара іс-қимылдың басым бағыттары талқыланды. Үндістан тарапы елімізді Орталық Азиядағы негізгі серіктес ретінде қарастыра отырып, Қазақстанда жобаларды іске асыруға мүдделілігін растады. Қазақстанның ұзақ мерзімді өнеркәсіптік бастамаларды іске асыруға жағдай жасайтын жоғары әлеуеті атап өтілді.

Энергетика, тау-кен металлургия кешені және ауыр өнеркәсіп салаларындағы жобаларға, соның ішінде шикізатты өндіру мен өңдеуге, өндірістік қуаттарды жаңғыртуға және заманауи технологияларды енгізуге ерекше қызығушылық білдірілді. Сонымен қатар, цифрлық технологиялар саласындағы инфрақұрылымдық жобаларды іске асыру, оның ішінде Екібастұз қаласында жасанды интеллект саласында озық шешімдерді қолдана отырып, дата-орталық салу мүмкіндігі талқыланды. Әуежайлар құрылысына қатысуға, сондай-ақ көлік-логистика және индустриялық инфрақұрылымды дамытуға бағытталған ірі инфрақұрылымдық жобаларды жүзеге асыруға қызығушылық ерекше атап өтілді.

Елші мемлекеттік органдармен және ұлттық компаниялармен байланыс орнатуға көмектесуге, сондай-ақ инвестициялық бастамаларға қолдау көрсетуге дайын екенін растады. Ірі халықаралық инвесторларды тарту Қазақстан экономикасын әртараптандыру міндеттеріне сәйкес келетіні атап өтілді.

Тараптар нақты ұсыныстарды пысықтап, ақпарат алмасуды ұйымдастыруға және басымдықтарды, іске асыру кезеңдерін және жауапты тараптарды айқындай отырып, одан әрі ынтымақтастықтың «жол картасын» қалыптастыруға келісті. Тұрақты жұмыс диалогын, оның ішінде консультациялар мен кейінгі кездесулерді қолдауға дайын екендігі расталды.

Рухани-гуманитарлық саладағы ынтымақтастыққа ерекше назар аударылды. Діни қайраткер, «Somaiya Vidyavihar» индология орталығының президенті С. Сомайямен кездесу барысында Әлемдік және дәстүрлі діндер лидерлерінің съезінің конфессияаралық диалогтың тиімді алаңы ретіндегі маңыздылығы атап өтілді. Тараптар ынтымақтастықты одан әрі дамытуға және тұрақты байланыстарды қолдауға дайын екендіктерін білдірді. С.Сомайя Қазақстанның конфессияаралық келісімді қамтамасыз етудегі тәжірибесін оң бағалап, өзара іс-қимылды жалғастыруға мүдделі екенін растады.

Қазақстан Республикасының Махараштра штатындағы Құрметті консулдығының қолдауымен өңірдің саяси және іскер топтарының өкілдерінің қатысуымен іскерлік кешкі ас ұйымдастырылды. Шара бейресми жағдайда келіссөздер жүргізуге, іскерлік байланыстарды орнатуға және кеңейтуге, сондай-ақ ынтымақтастықтың перспективалық бағыттарын талқылауға және нақты бастамаларды әзірлеуге мүмкіндік берді.

Жалпы, осы сапар Қазақстан мен Үндістан арасындағы өзара іс-қимылды нығайтуға ықпал етіп, сауда-экономикалық және инвестициялық ынтымақтастықты дамытуға, сондай-ақ іскерлік және гуманитарлық салалардағы байланыстарды кеңейтуге қосымша серпін берді. Қол жеткізілген келісімдер мен орнатылған байланыстар бірлескен жобаларды іс жүзінде жүзеге асыруға және екіжақты серіктестікті одан әрі тереңдетуге негіз болады.

Ақпарат көзі : https://www.gov.kz/memleket/entities/mfa-delhi/press/news/details/1212447?lang=kk