Афина, 2026 жылғы 16 мамыр – Қазақстанның Афинадағы Елшілігінің қолдауымен қазақстандық «KISVA» брендінің концептуалды сән көрсетілімі өтті.

Іс-шараға дипломатиялық корпус өкілдері, шығармашылық индустрия, іскерлік орта, бұқаралық ақпарат құралдары, сондай-ақ грек жұртшылығы қатысты.

«Valley of Ants» коллекциясы көшпенді дала мәдениетінің кодтарына, ұжымдық жауапкершілік тақырыбына және өзара қолдау идеясына негізделген қазақстандық сәннің заманауи көрінісін ұсынды. Көрсетілімнің көркемдік тұжырымдамасы ұлттық дәстүрлерді, шығармашылық дамуды және халықаралық мәдени диалогқа ашықтықты үйлесімді ұштастыратын қазіргі Қазақстанның бейнесін ашып көрсетті.

Іс-шара Қазақстан Президенті Қасым-Жомарт Тоқаев белгілеген басымдықтарға сәйкес қазақстандық креативті индустрияны шетелде ілгерілету жұмыстары аясында ұйымдастырылды. Креативті индустрия қоғамның зияткерлік және мәдени әлеуетін ашуға, жастар үшін жаңа мүмкіндіктер қалыптастыруға, шығармашылық кәсіпкерлікті дамытуға және Қазақстанның ұлттық брендін халықаралық аренада ілгерілетуге ықпал ететін экономиканың перспективалы бағыттарының бірі ретінде қарастырылады.

«KISVA» көрсетілімінің Афинада өтуі қазіргі қазақстандық өнерді, дизайнды және сәнді шетелде танымал етудің маңызды элементіне айналды. Іс-шара грек және халықаралық аудиторияға Қазақстанның ұлттық бірегейлігін сән, визуалды мәдениет және заманауи өнер тілі арқылы білдірудің жаңа нысандарын таныстыруға мүмкіндік берді.

Көрсетілім грек жұртшылығы, шығармашылық орта және бұқаралық ақпарат құралдары өкілдері тарапынан елеулі қызығушылық тудырып, Қазақстанның заманауи мәдени және креативті әлеуетіне артып келе жатқан назардың айқын үлгісі болды. Іс-шара сондай-ақ Қазақстан мен Грекия арасындағы гуманитарлық байланыстарды нығайтуға және екі ел арасындағы мәдени диалогты кеңейтуге ықпал етті.

Ақпарат көзі : https://www.gov.kz/memleket/entities/mfa-athens/press/news/details/1222823?lang=kk