25–26 шілде күндері Шығыс Қазақстан облысы Астана қаласындағы QAZAQ CREATIVE HUB алаңында өткен Creative Aimaq креативті индустриялар республикалық көрмесіне қатысты.

Creative Aimaq жобасы Қазақстан Республикасы Мәдениет және ақпарат министрлігінің және Креативті индустрияларды дамыту қорының қолдауымен жүзеге асырылуда. Жобаның негізгі мақсаты – өңірлердің шығармашылық әлеуетін таныту, креативті экономиканы дамыту, отандық өндірушілерді, қолөнершілерді және мәдениет саласы өкілдерін қолдау, сондай-ақ өңіраралық ынтымақтастықты нығайту.

Көрме аясында Шығыс Қазақстан облысы мәдениет, туризм және креативті индустрия салаларындағы үздік жобаларын көпшілік назарына ұсынды. Қонақтарға театрландырылған қойылым, облыстың үздік өнерпаздарының қатысуымен концерттік бағдарлама, жергілікті шеберлер мен өңірлік брендтердің жәрмеңкесі, балалар мен ересектерге арналған шеберлік сабақтары, интерактивті VR-аймақтар, сондай-ақ өңірдің туристік әлеуетінің таныстырылымы ұсынылды.

Келушілердің ерекше қызығушылығын Шығыс Қазақстанның туристік мүмкіндіктеріне арналған экспозиция тудырды. Көрме қонақтары өңірдің бірегей табиғи көрікті жерлері, туристік бағыттары мен демалыс мүмкіндіктері туралы кеңінен ақпарат алды. Сонымен қатар көрменің жарқын оқиғаларының бірі ретінде Шығыс Қазақстан облысының көркем туристік аймақтарының біріне екі адамға арналған туристік жолдама ойнатылды.

Creative Aimaq көрмесіне қатысу Шығыс Қазақстанның туристік брендингін ілгерілетуге, өңірдің мәдени мұрасын насихаттауға, жергілікті өндірушілер мен қолөнершілерді қолдауға және креативті индустриялар саласында жаңа серіктестік байланыстар орнатуға мүмкіндік берді.

Creative Aimaq – Қазақстан өңірлерінің шығармашылық жобаларын, жергілікті брендтерін, қолөнер бұйымдарын, заманауи технологияларын және мәдени бастамаларын елорда тұрғындары мен қонақтарына таныстыруға бағытталған республикалық жоба.

Ақпарат көзі : https://www.gov.kz/memleket/entities/tourism-vko/press/news/details/1264899?lang=ru