Қазақстан, Өзбекстан және Ауғанстан арасындағы сауда байланыстарын нығайту мақсатында Өзбекстан Республикасындағы «Айритом» АЭА аумағында орналасқан «Термез» халықаралық сауда орталығында қазақстандық өнімдер ұсынылған павильон ашылды. Іс-шара Қазақстан Республикасының Сауда және интеграция министрлігі мен «QazTrade» АҚ қолдауымен өтті.Салтанатты рәсім аясында қазақстандық тарап пен «Айритом» АЭА дирекциясы арасында сауда павильонын жалға алу туралы келісімшартқа қол қойылды. Бұл келісім қазақстандық өнімдердің сыртқы нарықтардағы үлесін арттыруға және сауда-саттықты дамытуға жасалған маңызды қадам болды.«Термез» Халықаралық сауда орталығы кәсіпкерлер үшін қолайлы іскерлік ортаны қалыптастыру, логистиканы жақсарту және әкімшілік рәсімдерді жеңілдету үшін құрылған. Жаңа павильон қазақстандық тауарларды Өзбекстан мен Ауғанстан нарығына шығаруға арналған маңызды платформаға айналып, екіжақты ынтымақтастықты дамытуға және Қазақстанның экспорттық мүмкіндіктерін кеңейтуге жол ашады.Қазақстандық компаниялар павильон базасында өзара келісімдер жасап, ынтымақтастық орнатады. Мұнда бизнесті кеңейтуге және көрші елдердің нарығында өнімдерді ілгерілетуге барлық жағдай жасалған. Отандық өндірушілер өз өнімдерін павильонға орналастыру үшін «QazTrade» АҚ-ға хабарласа алады.Ақпарат көзі : https://www.gov.kz/memleket/entities/mti/press/news/details/900299

Олжас Бектеновтің төрағалығымен өткен Үкімет отырысында трансшекаралық хабтардың дамуы туралы сауда және интеграция министрі Арман Шакқалиев баяндады.Мемлекет басшысы Орталық Азия мен Каспий өңірінде Қазақстанды толыққанды көлік-логистикалық хаб ретінде қалыптастыру міндетін қойды. Белгіленген мақсатқа қол жеткізу үшін ел шекараларында – Қытай, Қырғызстан, Өзбекстан, Ресей Федерациясы және Каспий аймағында – көлік-логистикалық және сауда тораптары құрылуда. Трансшекаралық хабтарды құру мен дамытудың мақсаттары, міндеттері және тәсілдері Қазақстанның көлік-логистикалық әлеуетін дамытудың 2030 жылға дейінгі тұжырымдамасында көзделген. Хабтар құру шекара маңындағы елдермен сауда қарым-қатынастарын жеделдетіп, шикізаттық емес экспорт көлемін 30%-ға арттырады және бизнесті жүргізудегі логистикалық рәсімдерді жеңілдетеді.Индустриялық сауда-логистикалық кешені жобасының орналасу орны ретінде Қазақстан жағындағы «Қарасу» мен Қырғызстандағы «Ақ-Тілек» транзиттік өткізу бекеттерінің маңайы таңдалды. Бұл – Қырғызстанмен ең қарқынды транзиттік пункттердің бірі. Кешен «Алматы – Бішкек» бағытының бойында орналасады, бұл – халықаралық «Батыс Еуропа – Батыс Қытай» автожолы дәлізінің бір бөлігі. Индустриялық сауда-логистикалық кешен қызметтерді сақтау, тауарларды алдын ала сату үшін дайындау, консолидациялау және көтерме партиялар бойынша қайта бөлу қызметтерін ұсынады.Қазіргі уақытта Индустриялық сауда-логистикалық кешенінің әлеуетті резиденттер пулы қалыптасып жатыр. Оған ауыл шаруашылығы, тамақ өнеркәсібі, көтерме және бөлшек сауда саласындағы компаниялар кіреді.«Кешен аумағында жеңілдетілген шекаралық жүйе мен автокөлік құралдары мен жүктерді тіркеу жүйесі жұмыс істейді, ал тауарлар жаңа көпір арқылы тасымалданады, бұл қолданыстағы өткізу пункттеріндегі жүктемені айтарлықтай жеңілдетуге мүмкіндік береді. Кешенді 2026 жылға дейн іске қосылады деп жоспарланған», — деп атап өтті министр.«Орталық Азия» халықаралық өндірістік кооперация орталығы өңірдегі ең ірі жүк ағындарын консолидациялау, өңдеу және тарату, сондай-ақ «Солтүстік – Оңтүстік» дәлізі аясында өндірістік кооперацияны дамыту орталығы болады.Орталық «Атамекен» (Қазақстан) және «Гулистан» (Өзбекстан) бақылау-өткізу бекеттеріне жақын орналасады және өндірістік алаңдардан, сақтау қоймаларын, сондай-ақ көлік инфрақұрылымынан тұрады. Бұл жүк тасымалдауды жылдамдатуға, логистикалық шығындарды азайтуға, жеткізу тізбегіндегі қатысушылар санын қысқартуға, өнімнің соңғы тұтынушы үшін құнын төмендетуге және жеткізілімдердің жылдамдығын арттыруға мүмкіндік береді.«Орталық жаңа өндірістер мен жұмыс орындарын құруды, ауылшаруашылық және өнеркәсіптік өнімдерді қайта өңдеу, машина жасау мен металды өңдеу, фармацевтика, электротехника, химия, тері өңдеу, тоқыма және тігін өнеркәсібі саласындағы өндірісті дамытуға қолдау көрсетеді. Оған қоса, Global Textile компаниясының дайын тоқыма өнімдерін өндіру жобасы жүзеге асырылады. “Орталық Азия” халықаралық өндірістік кооперация орталығының құрылуы шекара маңындағы елдермен екіжақты сауда-экономикалық қатынастардың одан әрі артуына оң әсерін тигізіп, екі елдің өндірушілері мен кәсіпкерлері арасында іскерлік байланыстарды жандандырады. Өз кезегінде, арадағы тауар айналымды алдағы 5 жылда $10 млрд-қа дейін арттыруға ықпал етеді», — деп түсіндірді спикер. «Еуразия» трансшекаралық сауда орталығы Орынбор, Саратов, Самара қалаларына және Ресейдің ең ірі федералды округтеріне және Шығыс Еуропа елдеріне шығатын бағыттармен байланыс орнатылған жүк ағындарының түйінді нүктесі саналатын – Орал қаласының әуежайына жақын аумақта орналасады.Орталықты жүзеге асыру үшін бояулар, полимерлі жабындар, пластикалық қаптамалар/контейнерлер және 3D декор-панельдер өндірісі бойынша инвестициялық жобаларға арналған индустриалды аймақ құрылған.«Еуразия» орталығының іске қосылуы Батыс Қазақстан облысына макроэкономикалық әсер береді, яғни:жүк және тауарларды жеткізудің халық шаруашылығындағы үлесін 5-10%-ға төмендету;логистикалық шығындардың төмендеуі есебінен инфляция деңгейін төмендету;өндірістерді орналастыру жобаларының инвестициялық тартымдылығын арттыру.«Евразия» трансшекаралық сауда орталығының іске қосылуы 2026 жылға жоспарланған. Қорғас торабы – Қазақстан Республикасының транзиттік әлеуетін кеңейтуде ажырамас элемент, сондай-ақ Қытай Халық Республикасының «Бір белдеу – бір жол» ғаламдық концепциясының бір бөлігі, мұнда географиялық орналасу, инфрақұрылымдық әлеует, Еуропа мен Таяу Шығыс елдеріне шығу мүмкіндігі ескеріледі.«Қорғас торабы» жобасын жүзеге асыру инфрақұрылымдық нысандарды («Қорғас» халықаралық шекара маңы ынтымақтастық орталығы» арнайы экономикалық аймақ, «Қорғас – Шығыс қақпасы» арнайы экономикалық аймағы, «Нұр-Жолы» бақылау-өткізу бекеті, «Алтынкөл» т/ж стансасы және «Құрғақ порт» т/ж терминалы) біріктіру және интеграциялау арқылы экспорт, транзит көлемін арттыру және өндірістік кооперацияны дамытуға бағытталған. Қорғас торабы Қазақстан мен Қытай шекарасындағы сауда-экономикалық ынтымақтастықты дамытуға серпін береді. Каспий торабы 100 млн халқы бар Каспий маңы аймағының елдеріне (Әзербайжан, Түрікменстан, Иран, РФ) бағытталады. Жобаның практикалық іске асуы контейнерлерді сақтауға және теміржол вагондарынан теңіз контейнерлеріне қайта тиеуге арналған алаң салу, сондай-ақ олардың сапалы өңдеу қызметтерін ұсынуды қамтиды. Каспий торабы Қытайдан Еуропаға транзиттік жүктердің Транскаспий халықаралық көлік бағыты арқылы арқылы көлемін арттыруға мүмкіндік береді, сондай-ақ “Түркменбашы – Ақтау – ҚХР” контейнерлік желісін дамытуға жол ашады», — деді министр.Өз кезегінде спикер Каспий торабында хабтарды дамыту аясында іске асырылатын жобалардың бірі – «Ақтау теңіз портында контейнерлік хаб салу» жобасы екенін мәлімдеді. Бүгінгі таңда жобаны іске асыру бойынша жұмыстар басталған, «Ақтау теңіз порты» арнайы экономикалық аймағынан 19 гектар жер учаскесі бөлінген. Жобаның әлеуетті инвесторы – «ГК Порт Ляньюньган» портымен инвестициялар тарту туралы келісім жасалды.Сонымен қатар «PSA International» (Сингапур), «Abu Dhabi Ports Group» (БАӘ), «Adani Group» (Үндістан), «Rhenus» (Германия) сияқты халықаралық компаниялар жобаны іске асыруға қызығушылық танытты. Жобаны ҚР Көлік министрлігі Маңғыстау облысының әкімдігімен бірлесіп іске асыруда. Ақтау портындағы контейнерлік хаб құрылысы 2025 жылдың ІІ тоқсанында аяқталады.«Тағы бір жоба – Құрық портының дамуы мен өркендеуіне серпін беретін “Саржа” көпфункционалды теңіз терминалын салу. Жоба инвесторы – «SEMURG INVEST» компаниясы. Жобаны іске асыру аясында жалпы қуаты шамамен 10 млн тонна болатын жалпы жүк терминалын, әмбебап терминалды, сұйық жүк терминалын, сондай-ақ көлік-логистикалық орталық пен өндірістік кешен салу көзделген. 2023 жылдың қарашасынан бастап жалпы жүк ауыстырып тиеу жұмыстары басталды, қазіргі уақытта 73 мың тоннадан астам металл мен тыңайтқыш өңделді. Жобаның аяқталу мерзімі – 2026 жыл. Бүгінгі таңда хабтарды құруға қажетті ұйымдастыру және өкімдік құжаттарды қабылдау бойынша іс-шаралар мен рәсімдер толық аяқталды», — деп баяндады Арман Шаққалиев. Атап айтқанда, Өзбекстан және Қырғызстанмен 2 үкіметаралық келісімге қол қойылып, индустриялық аймақтар құрылған.Шекара маңы елдерімен бірлескен өндірістерді құру және шекаралық хабтар жүйесін қалыптастыру арқылы дамушы аймақтарды құру келесі нәтижелерге қол жеткізуге мүмкіндік береді. Атап айтқанда:Қазақстанның құрлықаралық және мемлекетаралық экономикалық дәліздер жүйесіндегі рөлін күшейтуге;елдер арасындағы тауар айналымының өсуіне және стратегиялық қатынастарды нығайтуға;өнеркәсіптік кооперация мен көлік-логистикалық инфрақұрылымды дамытуға;еліміздің экспорттық әлеуетін арттыруға;халықаралық жүк тасымалы ағындарын қамтамасыз ету үшін заманауи мультимодальды хабтар ұйымдастыруға ықпалын тигізеді. Дереккөз: https://primeminister.kz/news/transshekaralyk-kolik-logistika-khabtaryn-kuru-shikizattyk-emes-tauarlar-eksporty-kolemin-30-ga-arttyrady-29451 Ақпарат көзі : https://www.gov.kz/memleket/entities/mti/press/news/details/900516

Астанада өткен аптада әлеуметтік маңызы бар азық-түлік тауарларының баға индексі 99,7% құрады. Рожки (-7,6%), гречка (-2,1%), күріш (-1,3%), қырыққабат (-0,7%), қант (-0,5%) және сүзбе (-0,3%) сияқты тауарлар бағасы арзандады.Көктемгі-күзгі кезеңде көкөніс бағаларын тұрақтандыру мақсатында Павлодар (ТОО «КазПромАгро», ТОО «Arthur&Company») және Түркістан облысындағы шаруалармен (КХ «Нурбек») 14 мың тонна көкөніс жеткізу туралы форвардтық келісімшарттар жасалды.Ұлттық статистикасы бюросының мәліметтері бойынша, Астанада кейбір көкөністердің бағасы басқа өңірлермен салыстырғандаарзан.Сондай-ақ, 100 тонна сары май және 528 тонна ұн жеткізу туралы келісімшарттар жасалды, олар қаладағы сауда орындарында бекітілген бағамен сатылуда.Бұл шаралар нарықтағы бағаның өсуін бақылау және халықтың қажетті тауарларға қолжетімділігін қамтамасыз ету мақсатында қабылданған.Баға саясатын және заңнаманы сақтау үшін қаладағы сауда департаменті жергілікті әкімдікпен бірлесіп тұрақты мониторинг жүргізуде.Ақпарат көзі : https://www.gov.kz/memleket/entities/mti/press/news/details/900827

Президент Қасым-Жомарт Тоқаев Astana Hub инновациялық экожүйесіне барды. Цифрлық даму, инновациялар және аэроғарыш өнеркәсібі министрі Жаслан Мәдиев жасанды интеллект негізіндегі жобаларды көрсетті.Президент экономикада цифрландыруды жалғастырып, жасанды интеллект технологияларын кеңінен қолдануды тапсырды. Кездесуде министр Жаслан Мадиев жасанды интеллект тұжырымдамасын жүзеге асыру кезеңдері туралы баяндады.«Біздің алдымызда интеллектуалды, креативті және озық құралдармен жабдықталған технологиялық тұрғыдан дамыған қоғам құру міндеті тұр. Біз оны болашақ қоғамын қалыптастыруға бағытталған жаңа тұжырымдама ретінде «Generative Nation» деп атаймыз. Мұндай тәжірибе қазірдің өзінде басқа елдерде сәтті қолданылуда: мысалы, Сингапурда ақылды технологияларға бағытталған «Smart Nation» немесе Израильде инновациялық кәсіпкерлікке басымдық берілген «Startup Nation».» – деп атап өтті Жаслан Мәдиев.Министрдің айтуынша, GenNation.kz негізінде үш негізгі бағыт бар: институционалдық орта, инфрақұрылымды құру және адами капиталды дамыту.Биыл мамыр айында Жасанды интеллект комитеті құрылды. Комитеттің жетекші құрамы Президенттік жастар кадрлық резервінің резервистерінен жасақталды. Шілде айында жасанды интеллектті дамытудың алдағы бес жылға арналған тұжырымдамасы қабылданды.Бұл құжат негізгі сын-қатерлерді, оларды еңсеру стратегияларын, Қазақстанның аймақтық ерекшеліктері мен әлеуетін ескере отырып, қойылған мақсаттарға қол жеткізуге бағытталған нақты шараларды қамтиды.Сондай-ақ, институционалдық ортаны дамыту аясында «Жасанды интеллект туралы» заң жобасы әзірленуде.Инфрақұрылымды дамыту бөлігінде Президенттің тапсырмасы бойынша елде технологиялық инфрақұрылым белсенді түрде қолға алынуда. Бұдан бөлек, академиялық ұйымдардың бизнеспен әріптестігі арқылы министрліктің үйлестіруімен Қазақстандық суперкомпьютерлік кластер іске қосылды. Бұл кластер KazLLM дамыту және модель негізінде жасанды интеллект өнімдерін жасау үшін құрылған.«ЦДИАӨМ мен ҒЖБМ қолдауымен Назарбаев Университетінің ISSAI зертханасы KazLLM моделін қазақ, ағылшын, орыс және түрік тілдерінде 148 миллиард токен негізінде оқытуды аяқтады. Бұл модель ғылыми қауымдастыққа, стартаптарға және ірі корпорацияларға қолжетімді болады. Мемлекет басшысының бастамасына сәйкес KazLLM тюрк тілдес кеңістікте табиғи тілді өңдеу технологияларын дамытуға бағытталған ірі жоба TurkLLM-нің негізіне айналады. Түркі мемлекеттері ұйымының саммитінде тиісті келісімге қол қойылды», – деп мәлімдеді министр.Бұл жоба ұлттық жасанды интеллект инфрақұрылымын құрудағы маңызды кезең және Қазақстанның аймақтағы технологиялық көшбасшы ретіндегі мәртебесін нығайтудың дәлелі болмақ.Мемлекеттік қызметтерді трансформациялаудың басым бағыттарының бірі eGov жүйесінде жеке AI-көмекшілер құру болып табылады. Кәсіби тілде оларды AI-агенттер деп атайды. Мұндай AI-агенттер арқылы азаматтарға қайда жүгіну керектігін іздеудің немесе кезек күтудің қажеті болмайды. AI-агенттер азаматтар мен мемлекеттік қызметшілер үшін пайдалы болады, ал күнделікті процестер автоматтандырылып, қызметкерлердің күш-жігерін стратегиялық маңызды міндеттерге бағыттауға мүмкіндік береді.Мұның бәрі қорғалған контурда кез келген мемлекеттік орган үшін AI-шешімдерді тез жасауға арналған Ұлттық жасанды интеллект платформасын құруға негіз болды. Бұдан басқа, экономика салаларында жасанды интеллектті қолдану бойынша жобалар іске қосылды.Бұл бағдарламалар мемлекеттік органдар мен жеке сектор кәсіпорындары үшін AI-шешімдерді қабылдау процесін жеңілдететін және жеделдететін бірыңғай әдіснаманы қалыптастырады және Generative Nation тұжырымдамасын дамытуға ықпал етеді.AI-индустриясына тұрақты кадрлар ағынын қамтамасыз ету үшін министрлік AI-қозғалысты іске қосты. Оның аясында 5 жыл ішінде 1 миллион адамды оқыту жоспарлануда. Орта және жоғары сынып оқушылары үшін TUMO және Tomorrow School базасында ойын әдістерін қолдана отырып, бағдарламалау мен жасанды интеллектке бағытталған білім беру бағдарламаларын кеңейту ұсынылады.Нәтижесінде жыл сайын 100 мың оқушы математика, бағдарламалау бойынша білімдерін жетілдіріп, креативті технологияларды үйреніп, сыни ойлау қабілеттерін дамыта алады.Бұл Tomorrow School-да келесі кезеңде оқуға қажетті таланттардың сыни массасын құруға мүмкіндік береді. Мемлекеттік қызметшілердің деректерге негізделген шешімдер қабылдау құзыреттілігін арттыру үшін жасанды интеллект бойынша міндетті негізгі курсты енгізу ұсынылады. Корпоративтік сектор үшін жетекші IT жоғары оқу орындары базасында біліктілікті арттыру орталықтарын құру жоспарлануда. Бұл жобалар пилоттық режимде сәтті сыналған және 2025 жылдан бастап ел бойынша кең көлемде енгізу жоспарлануда.Әр түрлі кезеңдегі AI-стартаптарды қолдау үшін Astana Hub инкубациялық және акселерациялық бағдарламалар, мысалы, AI’preneurs, Google компаниясының Silk Way акселераторы, Draper University-дің Hero Training және басқа да жобаларды жүзеге асыруда. Astana Hub BigTech компаниялары үшін тартымды алаңға айналды, олардың кеңселері ынтымақтастық үшін ашылуда.AI-қозғалысының негізгі кезеңі – Президенттің тапсырмасымен құрылып жатқан Халықаралық жасанды интеллект орталығы – alem.ai болады.Alem.ai – үздік ақыл-ойлар мен озық технологиялар қоғам игілігі үшін жұмыс істейтін, адамның әлеуетін ашуға, экономиканың негізгі салаларын дамытуға және жасанды интеллектті өмірдің түрлі салаларына енгізуге көмектесетін платформаға айналады.Alem.ai Қазақстанның жасанды интеллект саласындағы әлемдік картада орнын нығайтып қана қоймай, елдің трансформациясының символы болмақ.Осылайша, институционалдық ортаны қалыптастыру, инфрақұрылымды дамыту және адами капиталды дамыту «Generative Nation» жаңа тұжырымдамасын іске асырудың негізі болады. ҚР ЦДИАӨМ баспасөз қызметі Ақпарат көзі : https://www.gov.kz/memleket/entities/mdai/press/news/details/901023

Көкшетауда Қазақстан Республикасы мәслихаттарының құрылғанына 30 жыл толуына арналған салтанатты іс-шара өтті. Мерекеге Ақмола облысының әкімі Марат Ахметжанов, ҚР Парламенті Сенатының, облыстық және қалалық мәслихаттардың депутаттары, ардагерлер мен қоғам қайраткерлері қатысты.Облыс әкімі өзінің құттықтау сөзінде мәслихаттардың жергілікті өзін-өзі басқару мен өңірдің әлеуметтік-экономикалық дамуына қосқан маңызды үлесін атап өтті.«Халық қалаулылары аймақтың өзекті мәселелерін шешуде елеулі үлес қосып келеді және сайлаушылардың мүдделерін қорғауда. Мәслихаттар мемлекеттік органдармен бірлесе отырып, халықтың әл-ауқатын жақсартуға және қабылданатын шешімдердің ашықтығын қамтамасыз етуге бағытталған міндеттерді тиімді шешуде», – деді Марат Ахметжанов.Салтанатты жиында ҚР Парламенті Сенатының депутаты Талғат Жүнісов, Сенат төрағасы Мәулен Әшімбаевтың құттықтау хатын оқыды.Іс-шара барысында жергілікті өзін-өзі басқаруды дамытуға, халықтың өмірін жақсартуға және өңірдің негізгі әлеуметтік-экономикалық мәселелерін шешуге үлес қосқан бірқатар депутаттар «Қазақстан мәслихаттарына 30 жыл» мерейтойлық медалімен, ҚР Парламенті Сенаты төрағасының құрмет грамоталарымен және алғыс хаттарымен, «Құрметті депутат» төсбелгісімен, сондай-ақ облыс әкімінің алғыс хаттарымен марапатталды.Мерекелік іс-шара Ақмола облыстық филармониясы әртістерінің концертімен аяқталды.Ақпарат көзі : https://www.gov.kz/memleket/entities/aqmola/press/news/details/901143

ҚР Президенті әкімшілігінің және аудандық мәслихат депутаттарының келісімі бойынша Шығыс Қазақстан облысы әкімінің өкімімен Самар ауданының әкімі лауазымына Жеңісов Серік Жеңісұлы тағайындалды.Жеке меншік сектор мен мемлекеттік қызмет саласында үлкен тәжірибесі бар. Еңбек жолын 2005 жылы Өскемен қаласының ішкі саясат бөлімінде бастаған. Әр жылдары ШҚО Мемлекеттік қызмет істері және сыбайлас жемқорлыққа қарсы іс-қимыл департаментінде, ШҚО ішкі саясат басқарма басшысының орынбасары, «Шығыс ақпарат» ЖШС басқарма төрағасы, Өскемен қаласы әкімінің орынбасары, Астана қаласы «Ақпараттық-талдау орталығы» АҚ басқарушы директоры, Өскемен қаласы әкімі аппаратының басшысы қызметтерін атқарған.Бұл тағайындауға дейін Шығыс Қазақстан облысының ішкі саясат басқармасы басшысы лауазымын атқарды.Ақпарат көзі : https://www.gov.kz/memleket/entities/akimvko/press/news/details/900546

ҚР Президентінің Әкімшілігімен және қалалық мәслихат депутаттарымен келісе отырып, Шығыс Қазақстан облысы әкімінің өкімімен Ақышов Алмат Талғатұлы Өскемен қаласы әкімінің лауазымына тағайындалды.Ол - Шығыс Қазақстанның тумасы. Өскеменде өсіп, еңбек жолын да осында бастаған. Әр жылдары туризм, дене шынықтыру және спорт басқармасында, ауыл шаруашылығы министрлігінде қызмет атқарды. Ұлан ауданы аппаратының басшысы, Аягөз ауданы әкімінің орынбасары, ШҚО Энергетика және тұрғын үй-коммуналдық шаруашылық басқармасының басшысы болды. Соңғы екі жылда Күршім ауданының әкімі лауазымында жұмыс істеді. Еңбек өтілі 14 жылды құрайды, оның 12 жылы мемлекеттік қызметте өтті. Сондай-ақ Алмат Талғатұлы Президенттік жастар кадрлық резервінің мүшесі, оның өңірлерді дамыту саласы бойынша магистрлік дәрежесі де бар.Шығыс Қазақстан облысының әкімі Ермек Көшербаев Алмат Ақышовтың экономика, энергетика және тұрғын үй-коммуналдық шаруашылық саласындағы мол тәжірибесін ескеріп, оған облыс орталығының әлеуметтік-экономикалық көрсеткіштерін дамытуды қамтамасыз етуде зор жауапкершілік артылатынын атап өтті.Аймақ басшысы жаңа тағайындалған әкімге экология мен көшелерді жарықтандыру мәселелерін назарға ала отырып, қаланы одан әрі дамыту бойынша ұсыныстар әзірлеуді тапсырды. Сонымен қатар экономика, құрылыс, абаттандыру және әлеуметтік саладағы маңызды жобаларды аяқтауды жүктеді.Туристік әлеуетті арттырып, облыс орталығының келбетін жақсарту үшін бизнес нысандардың бірыңғай дизайн-кодын енгізу туралы ұсыныстар дайындау тапсырылды.Сондай-ақ облыс әкімі қаланың маңызды әрі серпінді жобаларын жүзеге асыру үшін инвесторларды тартып, осы және басқа да тапсырмалар жөнінде тиісті жол картасын дайындап, тез арада бекітуге ұсынуды жүктеді.- Қала тұрғындары өз ауызбіршілігін көрсетіп, Өскеменнің өзекті мәселелерін шешуге белсене атсалысады деп ойлаймын, - деді Ермек Көшербаев.Ақпарат көзі : https://www.gov.kz/memleket/entities/akimvko/press/news/details/900757

«Ауылдық денсаулық сақтауды жаңғырту» Ұлттық пилоттық жобасы аясында облыста алғашқы медициналық-санитарлық көмек нысандарының құрылыс жұмыстары жүргізілуде.Үржар ауданының Лайбұлақ ауылында жаңа медициналық пункт ашылды. Бұл медпункттің ашылуы ауыл тұрғындарына сапалы амбулаториялық медициналық қызмет алуға мүмкіндік береді. Жаңа нысан өңірдегі денсаулық сақтау жүйесін нығайту жолындағы маңызды қадам болмақ.Медициналық пункт бір мезетте 25 адамды қабылдайды. Нысан дүйсенбіден жұмаға дейін сағат 8:00-ден 17:00-ге дейін жұмыс істейді.Заманауи стандарттарға сай салынған ғимарат ем-шара қабылдау мен физиотерапия кабинеттері, дәріхана және науқастар мен қызметкерлер жайлылығы үшін қажетті басқа да бөлмелермен жабдықталған. Пункт су, жылу желілері, электрмен жабдықталып, пандустар орнатылған.Ақпарат көзі : https://www.gov.kz/memleket/entities/abay/press/news/details/900703

Олжас Құрманбекұлы 1986 жылы 23 наурызда Шығыс Қазақстан облысы Өскемен қаласында дүниеге келген. 2008 жылы ҚазГЗУ Алматы заң академиясында «Құқықтану» мамандығын, 2011 жылы Абай атындағы Қазақ Ұлттық педагогикалық университетінде «Менеджмент» мамандығын, 2013 жылы «Құқықтану» мамандығы бойынша ҚР Президентінің жанындағы Мемлекеттік басқару академиясының магистратурасын тәмамдаған, заң ғылымдарының магистрі академиялық дәрежесі берілген. Францияның Париж қаласында тағылымдамадан өткен.Еңбек жолын 2008 жылы ҚР Бәсекелестікті қорғау Агенттігінің іс жүргізу жөніндегі инспекторы болып бастаған. Астана қаласында ҚР Ұлттық ғарыш агенттігі заң басқармасының сарапшысы және бас сарапшысы болып жұмыс атқарған. 2014-2020 жылдары «Самұрық-Қазына Ұлттық әл-ауқат қоры» АҚ-да заң департаментінің бас заңгері, сатып алу әдіснамасы қызметінің басшысы лауазымдарында еңбек етті. 2021-2022 жылдары Алматы қаласы әкімі аппараты бірыңғай персоналды дамыту қызметінің бас инспекторы, 2022 жылы Алматы қаласы әкімі аппараты бірыңғай персоналды басқару қызметінің бас инспекторы қызметтерін атқарды.Тағайындалғанға дейін Абай облысы әкімі аппараты басшысының орынбасары болған.Ақпарат көзі : https://www.gov.kz/memleket/entities/abay/press/news/details/900750

Еркеғали Рахмадиев атындағы Мемлекеттік академиялық филармонияда өткен мәдени шараға Қорғаныс министрінің бірінші орынбасары – Қарулы күштер Бас штабының бастығы генерал-лейтенант Сұлтан Камалетдинов, Қарулы күштер, басқа да әскерлер мен әскери құралымдар қолбасшылығының өкілдері, ардагерлер, мәдениет қайраткерлері мен ата-аналар қатысты. Ұйымдастырушылар концертті Кеңес Одағының Батыры, аты аңызға айналған қолбасшы полковник Бауыржан Момышұлының туғанына 114 жыл толуына орайластырды. Қорғаныс министрінің бірінші орынбасары генерал-лейтенант Сұлтан Камалетдинов студия тәрбиеленушілерін, педагогтар мен ата-аналарды құттықтап, өскелең ұрпақты рухани-адамгершілік тұрғысында тәрбиелеуде мәдениеттің маңыздылығын атап өтті. – Армия Ұлттық әскери-патриоттық орталығының атынан жас азаматтарға патриотизм рухын оятуға, олардың таланттарын дамытуға белсенді атсалысады. Орталық және оның филиалдарының педагогтары орындайтын миссия болашақ Отан қорғаушыларды тұлға ретінде қалыптастыру және олардың рухын нығайту үшін жұмыс істейді, – деп атап өтті ол.Шығармашылық студияның көркемдік жетекшісі 3-сыныпты сержант Альмира Асылбекованың айтуынша, «Жас сарбаз» балалар студиясында барлық күш құрылымдарының әскери қызметшілері мен азаматтық персоналының балалары үйірмелерге тегін қатысады. Олармен балетмейстер Ержан Құдайбергенов, вокалдан педагогтар Гүлмира Сейітова, домбыра тартуды – Бауыржан Жолдыбеков, «Шешендік шеберлік» курсының жетекшісі Бақыт Тәжинов жұмыс істейді. – Бұл біздің есеп беру концертіміз. Шараны ұйымдастыруға Қорғаныс министрлігінің басшылығы, Орталық әскери оркестр мен Қарулы күштер Ұлттық әскери-патриоттық орталығының Орталық ансамблі атсалысты. Балалардың шығармашылыққа бейімділігін дамытуға ұмтылатын ата-аналарға да алғысымыз шексіз, – деді А. Асылбекова.Концерт бағдарламасында «Сарыарқа» және «Адай» күйлері тартылды. «Атшабыс», «Сезім» «Қылықты қыздар», «Киелі қазақ», «Гүлдер», «Дәстүр», «Полет чмеля» хореографиялық композициялары орындалды. Студия вокалистері мен бишілері «Көңілді ән» нөмірін тарту етті. Одан өзге, «Болашақ» вокалдық тобының орындауында «Мама» әні шырқалды. «Он алтын қыз» музыкалық туындысын «Самға» тобының солистері республикалық және халықаралық байқаулардың лауреаты Сағын Өмірбайұлымен бірге шырқады. «Достар» вокалдық тобы көрермендерге «ABBA» әнінің әуендерін еске салды. ҰӘПО-ның Орталық ансамблі мен «Жас сарбаз» балалар студиясының би топтары көрермендерді «Ақсауыт» хореографиялық композициясымен тәнті етті. Концерт соңында «Жайна ұлы дала» әнінің әуенімен іс-шараның барлық қатысушылары сахнаға шығып, көрермендердің қошеметіне бөленді. Естеріңізге сала кетсек «Жас сарбаз» шығармашылық студиясы – қалалық, республикалық және халықаралық байқаулардың жүлдегері. 2024 жылдың маусым айында студияның би ұжымы Қырғызстандағы «Нәресте» халықаралық фольклорлық фестивалінде сәтті өнер көрсетсе, ал тамыз айында 20 би ұжымы арасында Көкшетау қаласында өткен Ұлттық Дельфий ойындарының жеңімпазы атанды.Ақпарат көзі : https://www.gov.kz/memleket/entities/mod/press/news/details/900489

Қорғаныс министрінің бұйрығымен подполковник Турабай Талғат Сайлауұлы Түркістан облысы қорғаныс істері жөніндегі департаментінің бастығы болып тағайындалды.Талғат Турабай 1977 жылы Көкшетау облысы, Ленинград ауданында дүниеге келген. Көкшетау университетін "заңгер" мамандығы бойынша бітірген. "Қорғау" жұмылдыру курстарынан өтті.1996 жылдан 1998 жылға дейін мерзімді әскери қызметін өтеген. Қарулы күштердегі қызметін Солтүстік Қазақстан облысы Ақжар ауданы қорғаныс істері жөніндегі бөлімі келісімшарт бойынша әскери қызметшілерді қабылдау және шақыру бөлімінің бастығы болып бастады. Осы бағыт бойынша өңірдің Тайынша ауданындағы бөлімшесін де басқарды.Осы тағайындалғанға дейін Талғат Турабай Ақмола облысының қорғаныс істері жөніндегі департаментін басқарған болатын.Ақпарат көзі : https://www.gov.kz/memleket/entities/mod/press/news/details/900734

Талдықорған қаласындағы десанттық-шабуылдау бригадасының әскери қызметшілері 800 метр биіктіктен парашютпен секіруді орындады.Бөлім командирінің әуе-десанттық дайындық жөніндегі орынбасары подполковник Данияр Сыдықов атап өткендей, парашютпен секіру десанттық-шабуылдау бөлімшелерінің жауынгерлік даярлық бағдарламасына кіреді.– Секіруге жіберілген барлық әскери қызметшілер алдын ала дайындықтан өтті. Парашютті ретке келтіру, әуедегі және қону кезіндегі іс-қимылдарды егжей-тегжейлі зерделеді, – деді подполковник Д. Сыдықов.Арнайы әуе-десанттық кешенінде жаттыққан десантшылардың моральдық-психологиялық жағдайын психологтар бағалады.– Ми-17 тікұшағының бортында бірлесе толқып, біресе бойымды мақтаныш сезімі кернеді. Парашютпен секіргенде өзімді нағыз десантшы сезіндім. Бұл биіктіктен төменге құлдилау сәтін ешқашан ұмытпайтын шығармын, – деді кіші сержант Ержан Лұқпан.Парашютпен секіру – әуе-десанттық дайындығының ең күрделі әрі жауапты кезеңі. Оның сәтті орындалуы жоғары шеберлікті, нұсқаулық ережелерін бұлжытпай сақтауды, батылдықты қажет етеді.Ақпарат көзі : https://www.gov.kz/memleket/entities/mod/press/news/details/900737

ҚР Еңбек және халықты әлеуметтік қорғау министрлігі Әлеуметтік қорғау саласындағы реттеу және бақылау комитетінің (бұдан әрі – Комитет) төрағасы Төлеген Оспанқұлов ҚР Президенті жанындағы Орталық коммуникациялар қызметінде өткен баспасөз мәслихатында 2024 жылғы мемлекеттік әлеуметтік қорғау инспекторларының жұмысы туралы айтты.Сөз басында ол әлеуметтік инспекторлар институттары көптеген елдерде бар екенін және азаматтарды әлеуметтік қолдау сапасын арттыруда маңызды рөл атқаратынын, сондай-ақ осы саладағы стандарттардың сақталуын нақты бақылай отырып, тиімді және ашық әлеуметтік қорғау жүйесін қалыптастыруға мүмкіндік беретінін атап өтті.Қазақстанда әлеуметтік инспекторлар институты көрсетілетін қызметті берушілердің әлеуметтік қорғау саласындағы заңнаманы сақтауын бақылауды күшейту және көрсетілетін қызметтердің сапасын арттыру үшін 2023 жылғы 1 шілдеде Әлеуметтік кодекс күшіне енген сәттен бастап енгізілді. Бүгінгі таңда халықты әлеуметтік қорғау саласында 111 мемлекеттік инспектор қызмет етуде.«Әлеуметтік қорғау инспекторлары қызметінің негізгі бағыты мүгедектігі бар адамдарды әлеуметтік қорғау, арнаулы әлеуметтік қызметтер көрсету және әлеуметтік қамсыздандыру саласындағы заңнаманың сақталуын бақылауды жүзеге асыру болып табылады.Әлеуметтік инспекторлардың функцияларына олардың құзыретіне кіретін мәселелер бойынша түсіндіру жұмыстарын жүргізу, әлеуметтік қорғау туралы заңнама талаптарының сақталуын қамтамасыз ету мәселелері бойынша мемлекеттік органдармен, жеке және заңды тұлғалармен өзара іс-қимыл жасау кіреді», - деді Төлеген Оспанқұлов.Әлеуметтік инспекторлар тексеру нәтижелері негізінде бақылау субъектісіне анықталған бұзушылықтарды жою, алдын алу, болдырмау және алдын алу бойынша орындалуы міндетті нұсқамалар шығарады және өрескел бұзушылықтар үшін әкімшілік айыппұл салады.«Бүгінде елімізде 730 мыңнан астам мүгедектігі бар адам тұрады, олар жалпы халық санының 3,6%-н құрайды.2024 жылдың 11 айында әлеуметтік инспекторлар 2 474 тексеру жүргізді, оның ішінде 2 307-і мүгедектігі бар адамдар үшін қолжетімділікті қамтамасыз ету мәселелері бойынша және 167-і арнаулы әлеуметтік қызметтер (бұдан әрі –АӘҚ) көрсету бойынша болды. 629 тексеру профилактикалық бақылау шеңберінде, 655 жоспардан тыс және прокуратураның талабы бойынша 1190 тексеріс жүргізілді. Тексеру нәтижелері бойынша көрсетілетін қызметті берушілерге 949 ұйғарым беріліп, 215 млн теңгеден астам сомаға 961 айыппұл салды. Тексерулермен: 174 әкімдік, 167 АӘҚ көрсету орталығы, 88 емхана мен аурухана, 11 оңалту орталығы, 468 балабақша, 802 мектеп, 144 лицей мен колледж, 110 жергілікті атқарушы органдардың бөлімдері мен басқармалары, 39 сауда үйі, 12 банк және т. б. қамтылған», – деді Төлеген Оспанқұлов.Комитет төрағасы мүгедектігі бар адамдар үшін қолжетімділік бойынша негізгі бұзушылықтар: пандустың болмауы; пандустың көлбеу бұрышының, сондай-ақ есік енінің нормативтерге сәйкес келмеуі; кіру тобында тұтқалардың болмауы; санитариялық-тұрмыстық орындардың бейімделмеуі; мүгедектігі бар адамдар үшін арнаулы тұрақ орындарының, көрсеткіштердің, көру қабілеті бұзылған адамдар үшін қарама-қарсы бағыттаушылардың болмауы болып табылатынын атап өтті.АӘҚ көрсететін кейбір ұйымдарда ағымдағы немесе күрделі жөндеу жүргізу қажеттілігі, сондай-ақ тұрғын үй-жайлар алаңының талап етілетін стандарттарға сәйкес келмеуі анықталды. Бұдан басқа, тамақтану нормалары мен талаптарын сақтау, дәрілік заттарды тағайындау және беру, бейнебақылау камераларын орнату, көрсетілетін қызметті алушылардың жеке істерін жүргізу, штаттық персоналды толтыру, жиһазды, жабдықты, қатты және жұмсақ құралдарды, киім мен аяқ киімді, көлік құралдарын ауыстыру қажеттілігі бөлігінде бұзушылықтар анықталды.Төлеген Оспанқұлов мүгедектігі бар адамдардың құқықтарын қорғаудың негізгі бағыты объектілерді бейімдеу болып табылатынын атап өтті. Қазіргі уақытта Қазақстан Республикасында Мүгедектігі бар адамдардың құқықтарын қамтамасыз ету және өмір сүру сапасын жақсарту жөніндегі 2025 жылға дейінгі ұлттық жоспар, 2023-2027 жылдарға арналған «Аманат» партиясының жол картасы және Мемлекет басшысының тапсырмасы бойынша әзірленген «Халықпен бірге» жобасы іске асырылуда.«Amanat» партиясының жол картасында 2023-2027 жылдар аралығында интерактивті қолжетімділік картасына (бұдан әрі – Карта) енгізілген 40 мыңнан астам нысанды бейімдеу бойынша жұмыс көзделген. Жыл сайын объектілердің 20%-ы бейімделуге жатады. 2024 жылы 40% немесе 17 325 нысанды бейімдеу жоспарланған 2025 – 60%, 2026 – 80%, 2027 жылы – 100%.«Қазіргі уақытта жергілікті атқарушы органдардың ақпараты бойынша 22 166 нысан немесе қол жетімділік картасына енгізілгендер санының 51,8% (жоспар бойынша 40%) толығымен бейімделген. Оның ішінде 3,4 мыңға жуық денсаулық сақтау объектілері, 7,5 мыңнан астам білім беру объектілері, 3,3 мың мекемелер мен ұйымдар, 1,8 мыңнан астам мәдениет объектілері, 4 мыңнан астам сауда, қызмет көрсету, ойын-сауық салалары объектілері және т. б.Сонымен бірге өңірлік аспектіде жоспарлыдан төмен көрсеткіштер Маңғыстау (36%) және Ұлытау (28%) облыстарында байқалды», – деді Комитет төрағасы.Төлеген Оспанқұлов осы жылдың тамыз айында тәуекел дәрежесін бағалау критерийлері мен әлеуметтік қамсыздандыру, оның ішінде міндетті әлеуметтік сақтандыру саласындағы тексеру парағы бекітілгенін айтты. Осы бағыттар бойынша тексерулер 2025 жылдың басынан басталады.«Әлеуметтік төлемдерді алушыларға уақтылы және дұрыс тағайындау және аудару бөлігінде халықты әлеуметтік қамсыздандыру саласы тексерілетін болады. Бақылау субъектілері «Азаматтарға арналған үкімет» мемлекеттік корпорациясы» КЕАҚ, «Мемлекеттік әлеуметтік сақтандыру қоры» АҚ, сондай-ақ олардың филиалдары болып табылады, олардың қызметі 12 критерий бойынша бағаланатын болады», – деді ол.Қорытындылай келе Төлеген Оспанқұлов Комитет жұмысының тағы бір бағыты 2025 жылғы 1 қаңтардан бастап АӘҚ көрсететін ұйымдарды лицензиялау болатынын хабарлады.«Лицензиялауды енгізу халықтың әлеуметтік осал топтары үшін көрсетілетін қызметтердің сапасын арттыруға бағытталған. Лицензия беру кезінде материалдық-техникалық база мен жабдықтың, медициналық лицензияның, өрт қауіпсіздігі лицензиясының болуы, бейімделген ғимараттың болуы, қызметкерлердің толық штаты және т. б. ескерілетін болады. Жүргізіліп жатқан жұмыстың арқасында сапалы қызмет көрсетуге мүдделі емес ұйымдар сүзіледі.Қазіргі уақытта әлеуметтік инспекторлар жергілікті атқарушы органдармен бірлесіп, АӘҚ көрсететін ұйымдардың лицензиялауға дайындығын талдау бойынша жұмыс жүргізуде. Лицензиялауға өтінімдер 26 желтоқсаннан бастап қабылданады», – деп түйіндеді Төлеген Оспанқұлов. Ақпарат көзі : https://www.gov.kz/memleket/entities/enbek/press/news/details/900720

Өңірлерде өрт қауіпсіздігі желісі бойынша үгіт-профилактикалық іс-шаралар жалғасуда. Мерекелік күндер қарсаңында елордалық ТЖД қызметкерлері халық арасында түсіндіру жұмыстарын жүргізуде. Елорда қонақтары мен тұрғындарына мереке күдерін қауіпсіз өткізу керектігі туралы айтылуда. «Мереке күндері қауіпсіздік шараларын сақтау мақсатында адамдар көп жиналатын объектілерде елордалық Департамент әзірлеген жадынамалар орналастырылды. Жадынамаларда орналастырылған QR-кодтар Қазақстан ТЖМ «112KZ» ресми Telegram-каналына өтуге мүмкіндік береді және түрлі төтенше жағдайлар туындаған кезде халықты іс-әрекетке оқытуға қол жеткізуге мүмкіндік береді», – деп атап өтті Астана қаласы ТЖД МӨББ бастығының орынбасары Евгений Гутяр. Рейдтік іс-шаралар EXPO халықаралық көрме орталығында, «Нұрсұлтан Назарбаев халықаралық әуежайы» АҚ-да, «Барыс-Арена», «Алау» көпфункционалды мұз сарайында, «ASIA PARK» СОО-да, онкологиялық орталықта және теміржол вокзалында өткізілді. Мемлекеттік өрт бақылау инспекторлары шұғыл қызмет телефондарын, тұрмыстағы өрт қауіпсіздігі ережелерін еске салып, өрт туындаған жағдайда іс-қимыл алгоритмін егжей-тегжейлі талдап, мереке қайғылы жағдайға айналмас үшін шыршаны безендіру және пиротехникалық бұйымдарды пайдалану кезінде сақталуы тиіс ережелер туралы айтып берді.Ақпарат көзі : https://www.gov.kz/memleket/entities/emer/press/news/details/900844

Инчхон қаласындағы семинарда шолуларды әзірлеу кезінде қабылдауға қажетті принциптер мен қадамдар, шолулардың ғылыми негізділігі, сондай-ақ Орнықты даму мақсаттарын іске асырудағы прогресті көрсету үшін нақты деректердің шектелуі мәселелері талқыланды.Іс-шара барысында ҚР ҰЭМ Әлеуметтік саланы, құқық қорғау және арнайы органдарды дамыту департаментінің директоры Нұргүл Жанназарова 2025 жылғы Ерікті ұлттық шолуды ұсыну бойынша Қазақстанның тәсілдерін таныстырып, сондай-ақ 2019, 2022 жылғы шолуларды ұсыну тәжірибесі туралы баяндады.Оның айтуынша, Қазақстан 2019 жылғы 16 шілдеде БҰҰ-ға мүше басқа 51 мемлекеттің қатарында жоғары деңгейдегі Саяси форум барысында алғашқы шолуды ұсынған еді. Негізгі назар 6 тақырыптық мақсатқа аударылды: «Сапалы білім беру», «Лайықты жұмыс және экономикалық өсу», «Теңсіздікті азайту», «Климаттың өзгеруіне қарсы күрес», «Бейбітшілік, әділеттілік және тиімді институттар», «Тұрақты даму мүддесіндегі әріптестік».Екінші шолу 2022 жылғы шілдеде ел үшін орнықты дамудың 5 басым мақсаты бойынша ұсынылды: «Кедейлікті жою», «Денсаулық пен әл-ауқат», «Сапалы білім», «Таза су және санитария», «Лайықты жұмыс және экономикалық өсу».Еске салсақ, Қазақстан 2025 жылғы Нью-Йорктегі жоғары деңгейдегі Саяси форумда БҰҰ бекіткен, биылғы жылы қазанда Ерікті ұлттық шолуды ұсынатын елдер тізіміне енді.Ақпарат көзі : https://www.gov.kz/memleket/entities/economy/press/news/details/901026

Негізгі баяндамашы ҚР Сыбайлас жемқорлыққа қарсы іс-қимыл агенттігінің превенция қызметінің аса маңызды істер жөніндегі офицері, Сыбайлас жемқорлыққа қарсы қызметтің полковнигі Жазира Жылқышиева болды.Лектор сыбайлас жемқорлық превенциясын жақсартуға бағытталған заңнамадағы негізгі өзгерістер туралы, оның ішінде озық халықаралық стандарттар негізінде сыбайлас жемқорлықтың алдын алудың жаңа құралдарын енгізу маңыздылығы жөнінде жасалып жатқан алғышарттарға тоқталды.Қатысушыларға мемлекеттік қызметшілердің шығыстары мен кірістерінің сәйкестігін бақылауға кеңес берді. Себебі тиісті органдар тарапынан аталған бөлік бойынша жіті тексерістер жасалатынын ескертті.Лектор Сыбайлас жемқорлыққа қарсы іс-қимыл туралы заңға енгізілген соңғы 4 пакет өзгерістердегі түзетулердің мәні мен мағынасын түсіндірді. Маман семинар соңында "Сыбайлас жемқорлыққа қатысты қылмысты болдырмау — ол қызметкердің адал еңбекті таңдауымен қашанда байланысты" деп түйіндеді.Ақпарат көзі : https://www.gov.kz/memleket/entities/transport/press/news/details/900806

Облыста агроөнеркәсіп кешенін дамытуға арналған Қазақстандағы бірінші ғылыми-технологиялық сессия өтті, оның жұмысына СҚО әкімі Ғауез Нұрмұхамбетов, Ғылым және жоғары білім вице-министрі Дархан Ахмед-Заки және ауыл шаруашылығы вице-министрі Ербол Тасжүректов қатысты. Отандық және шетелдік ғалымдар, сарапшылар, шаруалар мен бизнес жетекшілері инновацияларды енгізуге және агроөнеркәсіп кешенінің тиімділігін арттыруға бағытталған шешімдерді бірлесіп іздеуге жиналды.Мемлекет басшысы аграрлық ғылымды дамытудың маңыздылығын атап өткен болатын, бұл сессия қорытындысында көрініс тапты. Ғалымдар мен кәсіпкерлер ауыл шаруашылығы кәсіпорындарының өнімділігін ұлғайтуға арналған идеяларын ортаға салды. Қатысушылар жаңа технологияларды енгізу бойынша белсенді жұмыс істеуге дайын екендіктерін растады. Агрохакатонда саладағы негізгі проблемалар айқындалып, жаңа шешімдердің бағыттары, зерттеулердің міндеттері айқындалды.Ақпарат көзі : https://www.gov.kz/memleket/entities/sko/press/news/details/900719

Мемлекет басшысы Қасым-Жомарт Кемелұлы Тоқаевтың тапсырмасына сәйкес «Ауылда денсаулық сақтауды жаңғырту» ұлттық жобасы аясында БҚО, Шыңғырлау ауданына қарасты Ащысай ауылында жаңа фельдшерлік-акушерлік пункті халық игілігіне пайдалануға берілді.Ашылу салтанатына қатысқан Батыс Қазақстан облысы әкімінің орынбасары Бақытжан Нарымбетов ауыл тұрғындарын жаңа медициналық нысанның ашылу салтанатымен құттықтады.“Президенттің бастамасымен «Ауылда денсаулық сақтауды жаңғырту» ұлттық жобасы шеңберінде 2023-2025 жылдары аралығында осындай 50 нысан салынып, ел игілігіне берілмек. Бұл ауылдық елді-мекендерде тұратын азаматтарымыздың өмір сүру сапасын арттырып, сапалы медициналық көмек көрсету - басты мақсатымыз. Ауыл тұрғындарының денсаулығын сақтауда, алғашқы көмек көрсетуде фельдшерлік-акушерлік пункт маңызды рөл атқарады. Енді Ащысай ауылының тұрғындары да медициналық көмекті уақытылы және қолайлы жағдайда ала алады”,-деді облыс әкімінің орынбасары.Жаңадан бой көтерген медициналық нысан заманауи құрал-жабдықтармен жабдықталған.Айта кетейік, жыл соңына дейін өңірде 20-ға жуық денсаулық сақтау ғимараттары ашылады. Бұл ауылдардағы медициналық қызметтің сапасын арттырып, медициналық мекемелердің инфрақұрылымын жаңарту және сапалы медициналық көмек көрсету үлкен қолдау болмақ.Ақпарат көзі : https://www.gov.kz/memleket/entities/bko/press/news/details/900705

Игі істер марафоны аясында елорда жастары «Байқоңыр» ауданымен қала тазалығы үшін еңбек етіп жүрген коммуналдық сала қызметкерлеріне қолдау көрсетіп, ыстық шай мен бауырсақ ұсынды, деп хабарлайды қала әкімдігінің ресми сайты.Елорданың коммуналдық қызметі тәулік бойы күшейтілген режимде қала көшелерін қар мен мұздан тазарту жұмыстарын жалғастыруда. Ауа райының қолайсыздығына қарамастан, қала тазалығы үшін еңбек етіп жүрген коммуналдық сала қызметкерлеріне елордалық жастар қолдау көрсетіп, ыстық шай мен бауырсақ таратты. Аязды күндері қаладағы қауіпсіз және кедергісіз қозғалысқа зор үлес қосып жүрген коммуналдық қызмет мамандарына жастар осылайша алғыс білдірді.Қала көшелерінің тазалығын сақтау үшін коммуналдық сала қызметкерлері ауысымдық режимде тәулік бойы қызмет етеді.Айта кетейік, 11 желтоқсандағы күндізгі ауысымда қар тазалау жұмыстарында 2,7 мыңнан астам жол жұмысшысы және мыңнан астам арнайы техника жұмылдырылды.10-ынан 11 желтоқсанға қараған түнде елордадан 545 рейспен 7 мың текше метр қар жиналып, шығарылды.Қыс мезгілінің басынан бері қаладан 75 703 рейспен 961 мың текше метр қар шығарылды.Естеріңізге сала кетейік, елордада игі істер марафоны жалғасып жатыр. Акцияның басты мақсаты – еріктілер мен тұрғындарға халықтың әлеуметтік әлсіз санаттарына, қарт адамдарға, мұқтаж зейнеткерлерге барынша көмек көрсетуге мүмкіндік беру. Ақпарат көзі : https://www.gov.kz/memleket/entities/astana/press/news/details/900706

Елімізде 1 желтоқсанда басталған өрт қауіпсіздігі айлығы жалғасуда. Іс-шараның басты мақсаты – азаматтардың қауіпсіздік деңгейін арттыру. Республикалық өрт қауіпсіздігі айлығы аясында өңірлерде өрттің алдын алу бойынша ауқымды рейдтер ұйымдастырылды. Тұрғын үй секторын аралау барысында тұрғындармен түсіндіру жұмыстары жүргізілді. Халықтың әлеуметтік осал топтарына және зейнеткерлерге ерекше көңіл бөлінді. Жетісу облысы ТЖД айлық аясында жылыту маусымында және алдағы мереке күндері қауіпсіздікті қамтамасыз ету мақсатында кешенді алдын алу шараларын жүргізуде. Төтенше жағдайлар департаменті, полиция, жергілікті атқарушы органдар мен басқа да құрылымдардың қызметкерлерінен мобильді топтар құрылды. Бұл топтар пиротехникалық бұйымдарды сақтау және сату орындарын, сондай-ақ жаңа жылдық алаңдарды қауіпсіздік талаптарының сақталуын тексеру үшін рейдтер өткізуде. Халықпен жұмыс істеуге ерекше назар аударылуда. Жеке үйлерге он мыңдаған тексеру жүргізіліп, пештерді, электр жылытқыштарды пайдалану ережелері және балалардың қауіпсіздігі бойынша түсіндіру жұмыстары жүргізілді. Әлеуметтік осал топтағы отбасылардың үйлеріне газ бен түтін концентрациясын анықтайтын датчиктер орнатылды, бұл қауіпті жағдайлардың алдын алуға көмектеседі. Жаңа жылдық іс-шараларға дайындық аясында мектеп, медицина мекемелерінің басшыларымен және халық көп жиналатын нысандар иелерімен кездесулер мен нұсқаулықтар өткізілді. Сонымен қатар төтенше жағдайлар кезінде эвакуациялау және қызметкерлердің іс-әрекеттері тәжірибелік түрде пысықталуда. «Қабылданған шаралардың арқасында өрттер мен зардап шеккендер саны азайды. Тұрғын үйлердегі өрт саны қысқарды, бірақ шаруашылық құрылыстарда, шөп қораларда және моншаларда өрт санының өсуі байқалады. Өрттің негізгі себептері – электр жабдықтарын пайдалану ережелерін бұзу, қасақана өртеу және отты абайсыз пайдалану», - деп ТЖД Мемлекеттік өрт бақылау басқармасының бастығы Сергей Огай түсіндірді. Ұлытау облысында әлеуметтік 365 әлеуметтік осал топқа жататын отбасы тұрады, оларға ерекше көңіл бөлінуде. ТЖД қызметкерлері облыс аумағында айлық аясында ауқымды «Қауіпсіздік әрбір үйге» атты акция өткізілді. Профилактикалық іс-шараға полиция қызметкерлері, жергілікті атқарушы орган және «Бірлік» волонтерлік ұйымы, БАҚ өкілдері де қатысты. Профилактика барысында облыстағы пешпен жылытылатын үйлерді, әлеуметтік осал топтағы отбасылардың қауіпсіздігін қамтамасыз ету, мұздағы қауіпсіздік шараларын ұстану бойынша түсіндірме жұмыстары жүргізілді. Әлеуметтік осал топтағы үйлерге иісті газды анықтайтын датчиктерді орнату кезең-кезеңімен жалғасады, бүгінгі күнге дейін 93 датчик орнатылған. 673 тұрғын үйді аралау мен 1349 адамға түсіндірме жұмыстары жүргізілді. «Аталған іс-шара тұрғын үй секторындағы өрттердің алдын алуға, сондай-ақ түрлі төтенше жағдайлар кезінде Ұлытау облысының тұрғындарының өрт кезіндегі білімдерін арттыруға бағытталған», - деп ТЖД бастығының орынбасары Ч.Самиев атап өтті. Атырау облысы ТЖД, ПД, «QazaqQazAimaq» АҚ қызметкерлерімен және волонтерлер бірлесіп қала аумағында «Өрт қауіпсіздігі айлығы» аясында ауқымды профилактикалық іс-шара өткізді. Жеңіс саябағында авариялық және өрт сөндіру техникалары сапқа қойылды. Кейін құтқарушылардың бір тобы әлеуметтік осал топтағы тұрғындардың үйлерді аралауға, екінші тобы мұздағы қауіпсіздік ережелерін насихаттауға жұмылдырылды. Іс-шара барысында қала аумағындағы «Көктем» ықшам ауданының 20 астам тұрғын үйіне үйге түтін датчигі орнатылды. ТЖМ тұрғындарды жылыту маусымында және мереке күндері өрт қауіпсіздігі ережелерін сақтауға шақырады. Қырағылық пен жауапкершілік жазатайым оқиғалардың алдын алуға және өмір мен денсаулықты сақтауға көмектеседі. Ақпарат көзі : https://www.gov.kz/memleket/entities/emer/press/news/details/900578