Қазақстан Республикасы Президентінің Ауғанстан бойынша Арнаулы өкілі Еркін Тұқымов Доха қаласында Қатар Мемлекеті Сыртқы істер министрінің Арнаулы өкілі Фейсал Әл Ханзабпен кездесті.Келіссөздер барысында тараптар Ауғанстанды өңірлік экономикалық үдерістерге қосуға бағытталған Қазақстан мен Қатардың бірлескен гуманитарлық және инфрақұрылымдық жобаларының перспективасын талқылады.Ақпарат көзі : https://www.gov.kz/memleket/entities/mfa-doha/press/news/details/1077624?lang=kk

Қандас – бұрын ҚР азаматтығында болмаған, Қазақстанға тұрақтауға келген этникалық қазақтар және ұлты қазақ отбасы мүшелері.Этникалық қазақ – ұлты қазақ шетелдік немесе азаматтығы жоқ адам.Қандас мәртебесін алу/ұзарту туралы өтініш беру жолдары:• ХҚКО арқылы;• migration.gov.kz порталынан;• электрондық үкімет порталы арқылы.Қандас мәртебесін алуға өтініш беру үшін ХҚКО-ға құжаттар тізімі:Өтініш;Өмірбаян (еркін түрде) ;Өтініш берушінің және оның отбасы мүшелерінің қазақ немесе орыс тілдеріне нотариалды куәландырылған аудармасымен ұлтын растайтын және басын куәландыратын құжаттар;Көшу мақсатына байланысты басқа құжаттардың көшірмелері (туыстық байланысты растайтын құжаттар, еңбек шарты, оқу орнынан анықтама).Мәртебе беру туралы өтінішті қарау мерзімі 30 жұмыс күнін алады. Оң нәтиже болған жағдайда этникалық қазақтар мен олардың отбасы мүшелеріне қандас куәлігі беріледі. Қандас куәлігінің жарамдық мерзімі –1 жыл.Бұрын берілген қандас мәртебесінің мерзімсін қалай ұзартуға болады?Бұрын берілген қандас мәртебесін ұзартуға өтінішті жергілікті атқарушы органға немесе Мемлекеттік коорпорацияға беруге болады. Ол үшін өтінішке бұрын берілген қандас куәлігінің көшірмесін тіркеу қажет. Қандас мәртебесін ұзарту бойынша Мемлекеттік қызмет көрсет мерзімі – 5 жұмыс күні.Қандас мәртебесі 6 айдан аспайтын мерзімге бір рет ұзартуға болады.Айта кететін жайт, құжаттарды қабылдау күні мемлекеттік қызмет көрсету мерзіміне кірмейді. Мемлекеттік қызмет тегін көрсетіледі.   Ақпарат көзі : https://www.gov.kz/memleket/entities/akimat-karakiya/press/news/details/1077545?lang=kk

 🔹Ағымдағы жылдың 29 құркүйегінде бұқаралық ақпарат құралдары өкілдерінің қатысуында Қазақстан Республикасы Мемлекеттік қызмет істері агенттігінің Шымкент қаласындағы Әдеп жөніндегі кеңесінің көшпелі отырысы өтті.🔹Кеңес отырысында 1 мемлекеттік қызметшіге қатысты қозғалған тәртіптік іс, 2 мемлекеттік органның мемлекеттік қызмет және сыбайлас жемқорлыққа қарсы іс-қимыл туралы заңнаманы бұзушылықтардың профилактикасы бойынша жұмысының қорытындылары және 2 мемлекеттік қызмет саласындағы бақылау бағыты бойынша жүргізілген талдау және мониторинг жұмыстарының нәтижелері қаралды.🔹Атап айтқанда, Шымкент қаласының білім басқармасы басшысының орынбасары Г.Дәрібаеваға қатысты қозғалған тәртіптік іс қаралып, Шымкент қаласының экономика және бюджеттік жоспарлау басқармасының басшысы Е.Есқараевтың және Шымкент қаласының Тұран ауданы бойынша мемлекеттік кірістер басқармасының басшысы Б.Омартаевтың есептері тындалды.🔹Нәтижесінде Әдеп жөніндегі кеңеспен аталған лауазымды тұлғаларға бұзушылықтарды алдын-алуға, заңнама талаптарын қатаң сақтауға, қоғам тарапынан сынға себепкер болмауға, қызметтік әдеп нормаларын қатаң сақтауға байланысты профилактикалық ұсынымдар беріліп, олардың орындалуы бақылауға алынды.  Ақпарат көзі : https://www.gov.kz/memleket/entities/shymkent-ekonomika-karzhy/press/news/details/1077373?lang=kk

Телеграмм КС - https://t.me/consot_kz Конституциялық Соттың талдаушысы Әлия Бердібаева ІІМ Басқару академиясының докторанттары мен магистранттарына көшбасшылық дәріс өткізді.Кездесу барысында ол конституциялық бақылау органының қызметі және азаматтардың Конституциялық Сотқа жолдаған өтініштерін қараудың ерекшеліктері туралы айтты.Спикер Қазақстан Республикасының қылмыстық, қылмыстық-процестік және қылмыстық-атқару заңнамаларының нормаларын тексеру қорытындылары бойынша қабылданған Конституциялық Соттың нормативтік қаулыларын талдауға ерекше назар аударды.Тыңдаушылар өздерін қызықтырған сұрақтарға жауап алып, өзекті тақырыптарды талқылады. Бұл олардың құқық саласындағы кәсіби даярлығын арттыруға ықпал етеді.Ақпарат көзі : https://www.gov.kz/memleket/entities/ksrk/press/news/details/1077385?lang=kk

Жетісу облысының Сәкен Сейфуллин атындағы орталық кітапханасының ұйымдастыруымен жас оқырмандарды кітапханаға тарту және оқуға деген құштарлығын арттыру мақсатында Жетісу облысы кітапханалары арасында «Үздік балаларға арналған жоба» атты облыстық байқау өткізілді.«Үздік балаларға арналған жоба» атты байқау кітапханашылардың шығармашылығын дамытып, балаларды кітапханаға тарту және оқуға деген қызығушылықтарын арттыруға бағытталған. Байқау арқылы балаларға арналған тиімді жобалар мен инновациялық әдістерді анықтап, тәжірибе алмасуға жағдай жасау көзделді. Сонымен қатар, бұл іс-шара кітапхана қызметінің сапасын арттырып, жас оқырмандардың рухани және интеллектуалды дамуына үлес қосу         Бұл байқау үш кезеңнен тұрды:І кезең (өзін таныстыру,  50 беттен аспайтын слайд ұсыну)ІІ кезең (жоба аясында жүргізілген жұмыстары, бейне таныстырылым 1-3 мин.)ІІІ кезең (кітапхана саласына қатысты  5 сұраққа  жауап беру) Байқаудың қорытындысы бойынша Панфилов ауданы Жаркент қалалық балалар кітапханасының кітапханашысы Дәулетқазы Ақторғын Дәулеткелдіқызы үздік деп танылып, дипломмен марапатталды. Сонымен қатар, байқауға қатысқан барлық үміткерлерге алғыс хаттар табыс етілді.Ақпарат көзі : https://www.gov.kz/memleket/entities/zhetysu-archive/press/news/details/1077419?lang=kk

Қарағандылық Ерлан Тасмағамбетов батуттық гимнастикадан Әлем кубогында қола медаль жеңіп алды. Жарыс Болгарияның Варна қаласында өтті.Ұлттық құраманың сапында барлығы үш қарағандылық спортшы бақ сынады – дуэт құрамында Данил Мұсабаев пен Никита Тумаков, сондай-ақ Ерлан Тасмағамбетов болды. Ол павлодарлық Виктория Бутолинамен жұптасып өнер көрсетті. Нәтижесінде Тасмағамбетов пен Бутолина үшінші орынға ие болды.– Бұл жолы Мұсабаев пен Тумаковқа сәл ғана сәттілік жетіспеді, жүлдесіз оралды. Бірақ жуырда ғана Германияда өткен Әлем кубогы кезеңінде олар алтын медаль алған болатын. Мұндай жеңістер жас спортшыларды жігерлендіреді, жаңа биіктерді бағындыруға жол ашады. Біздің межеміз бұрыннан биік: ірі әрі беделді жарыстардың бірнеше дүркін жүлдегерлері мен чемпиондары атандық. Қазақстан батуттық гимнастикада әлемдік деңгейде танылған және мойындалған. Ерлан Тасмағамбетовтың бұл жолғы қола медалі – соның тағы бір дәлелі, – дейді Қазақстанның еңбек сіңірген жаттықтырушысы Сергей Вертянкин.Жыл соңына дейін қарағандылық спортшыларды қарқынды кезең күтіп тұр. Қазір батутшылар 29 қыркүйек пен 4 қазан аралығында өтіп жатқан ТМД ойындарында ел намысын қорғауда. Ал одан кейін Ерлан Тасмағамбетов, Данил Мұсабаев пен Никита Тумаков Испанияға аттанып, Әлем чемпионатына қатысады.– Әрине, біз медаль жеңеміз деген жігермен барамыз және жеңіске сенеміз. Біздің спортшыларда барлық мүмкіндік бар: сәтті комбинациялар, мықты дайындық, жақсы физикалық қалып. Сондықтан біз оларға жанкүйер боламыз! – дейді бапкер.Ақпарат көзі : https://www.gov.kz/memleket/entities/karaganda/press/news/details/1077432?lang=kk

       Астанада Қаржы министрлігі Мемлекеттік кірістер комитетінің және БОМКА бағдарламасының кездесуі өтті. Іс-шара барысында мобильді кедендік топтарға заманауи жабдықтарды тапсыру рәсімі ұйымдастырылды.       МКК Халықаралық ынтымақтастық басқармасының басшысы Ермек Қожабергенов көрсетілген қолдау қазақстандық кеден қызметінің әлеуетін нығайтып, шекарадағы тиімділікті арттыруға және заңсыз тауар айналымына қарсы күреске ықпал ететінін атап өтті.       Тараптар кедендік процестерді цифрландыру, инновациялық технологияларды енгізу және үздік халықаралық тәжірибелерді қолдану саласындағы ынтымақтастықты жалғастыруға дайын екендерін растады.Ақпарат көзі : https://www.gov.kz/memleket/entities/kgd/press/news/details/1077499?lang=kk

Л. Н. Гумилев атындағы Еуразия ұлттық университетінде запастағы офицерлер мен сержанттар даярлаудағы әскери кафедраның рөліне арналған "Отанға қызмет – абыройлы міндет" атты іс-шара өтті.Кездесуге Қорғаныс министрлігінің, Астана қаласының қорғаныс істері жөніндегі департаментінің, Әскери-тарихи мұражайдың өкілдері, ардагерлер, кафедраның оқытушылары мен студенттері қатысты.Запастағы подполковник Әбубәкір Смайыловтың айтуынша, жиырма жылда кафедра 4000-нан астам офицер мен 1000-нан астам сержант дайындаған. Бүгінгі таңда 670-ке жуық студент жоғары білім базасында әскери-есептік мамандықтарды меңгеруде.Проректор Ардақ Бисембай, әскери кафедра бастығы генерал-майор Еділ Оразов пен запастағы полковник Ғани Артықов студенттерге өздерінің кәсіби жолдары туралы айтып, әскери қызметтің көшбасшылық қасиеттер мен азаматтық жауапкершілікті тәрбиелеудегі маңыздылығын атап өтті.Түлектердің қызмет жолындағы табыс тарихы да қатысушылардың ерекше назарын аударды. 2009 жылы кафедраны бітірген подполковник Мұрат Әбуов бүгінде мемлекеттік басқару академиясының докторанты, ал майор Дәулет Қадыров (2015 жылғы шығарылым) Әскери-тарихи музейді басқарады.Болашақ офицерлер де өз таңдауларын жеткізді. Екінші курс студенті Аружан Олжабаева офицер тек форма ғана емес, сонымен қатар ел қауіпсіздігі үшін үлкен жауапкершілік екенін атап өтті.- Өзім бұл жолды таңдағанымды мақтан тұтамын. Мен абыроймен қызмет етіп, құрбыларымды да  әскери мансапқа шақырғым келеді, - деді ол.Кездесу барысында әскери дайындық, жастарды қызметке ынталандыру және ұлттық қорғаныс жүйесіндегі мансаптық өсу перспективалары мәселелері талқыланды.Ақпарат көзі : https://www.gov.kz/memleket/entities/mod/press/news/details/1077517?lang=kk

28–29 қыркүйек күндері Қазақстан Республикасы ІІМ Ұлттық ұланының әскери қызметшілері  қазақ күресінен республикалық «Әскери барыс» турниріне қатысты.Жарысты Қазақстан Республикасының Армия орталық спорт клубы ұйымдастырды. 90 келіден жоғары бір ғана салмақ дәрежесінде  еліміздің әртүрлі әскери бөлімдерінен келген 20 команданың құрамындағы 44-тен астам спортшы өзара бақ сынады.Қызу тартыстың қорытындысы бойынша Ұлттық ұланның 5573 әскери бөлімінің радиациялық, химиялық және биологиялық қорғау взводының аға сарбазы ефрейтор Жандос Сейтенов жоғары деңгейдегі дайындығы мен қайсарлығын көрсетіп, қола жүлдеге ие болды.Бұдан бөлек, Қостанай қаласында Ахмет Байтұрсынұлының құрметіне арналған қазақ күресінен республикалық турнир өтті.Бұл жарыста да Ұлттық ұланның 5573 әскери бөлімінің аға сержанты Бекзат Алтынбаев үшінші орынды иеленіп, ұландықтардың жоғары спорттық деңгейін тағы бір мәрте дәлелдеді.Құқық тәртібі әскерлерінің мұндай спорттық сайыстарға қатысуы жеке құрамның жауынгерлік рухы мен дене төзімділігін нығайтып қана қоймай, жастар мен әскери қызметшілер арасында ұлттық спорт түрлерін кеңінен насихаттауға ықпал етеді. ҚР ІІМ Ұлттық ұланының баспасөз қызметіАқпарат көзі : https://www.gov.kz/memleket/entities/kvv/press/news/details/1077532?lang=kk

Қонаев қаласында, Alatau Hub-та 29 қыркүйек пен 2 қазан аралығында жасанды интеллект технологияларына арналған AI WEEK апталығы ұйымдастырылады. Іс-шара өңірдегі IT-мамандарды, кәсіпкерлерді, студенттерді және жаңа технологияларға қызығатын қауымды бір арнаға тоғыстырып, практикалық білім мен тәжірибе алмасуға жағдай жасайды.Апталықтың басты мақсаты - жасанды интеллект құралдарын жергілікті бизнеске, білім беру және креативті индустрияларға барынша жақындату, олардың цифрлық трансформациясын жеделдету, аймақтық технологиялық экожүйені нығайту.  AI Week бағдарламасы әр түрлі форматтағы, практикалық құндылығы жоғары іс-шаралардан тұрады:AI Workshop - жасанды интеллект фаундерлердің күнделікті жұмысын қалай жеңілдететінін көрсететін, нақты кейстерге негізделген тәжірибелік кездесу;AI Bootcamp - генеративті жасанды интеллектінің қыр-сырын ашатын үш күндік қарқынды оқу форматы. Қатысушылар ЖИ негіздерін меңгеріп, нейрондық желілерді өз жұмыстарында (мәтін жазу, сурет жасау, процестерді автоматтандыру) тиімді қолдануды үйренеді;AI Pizza Pitch - еркін форматтағы стартап идеялардың таныстырылымы, пайдалы пікірлер мен жаңа байланыстарға жол ашатын кездесу;AI Speaker Talk - жетекші сарапшылардың қатысуымен өтетін ашық әңгіме алаңы. Мұнда қатысушылар жасанды интеллекттің бүгінгі трендтерімен танысып, нақты кейстерді талқылап, тікелей сұрақ қоя алады.AI Week- бұл өңірлік технологиялық экожүйені дамытуға бағытталған маңызды стратегиялық қадам.Іс-шара жасанды интеллектке қызығатын жастар мен кәсіпкерлер үшін бірегей мүмкіндік береді. Олар тек терең білім алып қана қоймай, саланың үздік мамандарымен тікелей байланыс орнатып, инновациялық қауымдастықтың белсенді бөлігі болуға мүмкіндік алады. Ақпарат көзі : https://www.gov.kz/memleket/entities/almobl/press/news/details/1077317?lang=kk

2025 жылғы 1 қыркүйектегі жағдай бойынша облыста 69 222 шағын және орта кәсіпкерлік (бұдан әрі - ШОК) субъектілері әрекет етеді, бұл 2024 жылдың деңгейіне 105,9% құрайды (2024 ж. 1 қыркүйек – 65 379 бір.), оның ішінде 9 568 – шағын кәсіпкерліктегі заңды тұлғалар, 148 – орта кәсіпкерліктегі заңды тұлғалар, 53 211 жеке кәсіпкерлер және 6 295 – шаруа қожалықтары.2025 жылдың 1-тоқсанның қорытындысы бойынша ШОК-та жұмыспен қамтылғандар саны 164 277 адамды құрайды (2024 ж. 1-тоқсанның қорытындысы – 159 195 адам), оның ішінде шағын кәсіпкерліктегі заңды тұлғаларда 50 082 адам, орта кәсіпкерліктегі заңды тұлғаларда – 25 341 адам, жеке кәсіпкерлікте – 77 089 адам, шаруа қожалықтарында – 11 765 адам жұмыспен қамтылған (статистикалық деректер есепті кезеңнен кейінгі тоқсанға кешіктіріліп, тоқсандық негізде қалыптастырылады).ШОБ субъектілерінің өнім шығаруы номиналды түрде 15,5%-ға ұлғайып, 515 962 млн. теңгені құрады (2024 жылғы 1-тоқсанның қорытындысы бойынша- 446 680 млн. теңге), оның ішінде шағын кәсіпкерліктің заңды тұлғалары 182 230 млн. теңге сомасына өнім шығарды, орта кәсіпкерліктің заңды тұлғалары – 133 525 млн. теңге, жеке кәсіпкерлер – 199 174 млн. теңге, шаруа қожалықтары – 1 033 млн. теңге. Бұл ретте өнім шығарудың НКИ 16,2% пайыздық тармаққа ұлғайып 106,4% құрады (2024 жылдың 1-тоқсанның қорытындысы бойынша – 94,7%), өнім шығарудың жалпы қосылған құны 11,1% ұлғайып 321 322,4 млн. теңгені құрады (2024 жылдың 1-тоқсанның қорытындысы бойынша – 289 308,3 млн.теңге). ЖӨӨ-дегі шағын және орта бизнестің үлесі 30,2% құрайды (2024 жылдың 1-тоқсанның қорытындысы бойынша– 29,7%, төмендеу-0,5%) (статистикалық деректер есепті тоқсаннан кейінгі тоқсанға кешігіп тоқсандық негізде қалыптастырылады).Ақпарат көзі : https://www.gov.kz/memleket/entities/kostanay/press/news/details/1077321?lang=kk

2025 жылдың 29 қыркүйек күні Шығыс Қазақстан облысы білім басқармасының «Örken» Шығыс Қазақстан өңірлік білім беруді ақпараттандыру және дамыту ғылыми - әдістемелік орталығы «Үздік Абайтану кабинеті» облыстық байқауын өткізді.Байқаудың мақсаты – абайтану кабинеттерінің жай – күйін бақылау, «Абайтану» вариативті сағатының маңыздылығын арттыру, мұғалімдердің педагогикалық тәжірибесімен бөлісу, іс - тәжірибелерін тарату.Байқауға жалпы орта білім беретін мектептердің қазақ және орыс тілінде оқытатын «Қазақ тілі мен әдебиеті» пәндері мұғалімдері қатысты.Байқауға Өскемен қаласы, Зайсан, Глубокое, Катонқарағай, Самар, Тарбағатай, Ұлан, Үлкен Нарын, Шемонаиха аудандарынан барлығы 9 жұмыс қаралды. Байқауға жұмыстар ұсынбаған аудандар: Алтай, Марқакөл Күршім және Риддер қаласы.Мұғалімдердің жұмыстарын комиссия мүшелері бағалады:І дәрежелі диплом - Самар ауданы бойынша білім бөлімінің «Абай атындағы орта мектебі» КММ қазақ тілі мен әдебиеті пәні мұғалімі М. Т Кабдиева;ІІ дәрежелі диплом –Глубокое ауданы бойынша білім бөлімінің «№1 Белоусовка орта мектебі» КММ қазақ тілі мен әдебиеті пәнінің мұғалімдері Ә. Әлібекова, А. Серік;ІІ дәрежелі диплом – Үлкен Нарын ауданы бойынша білім бөлімінің «К. Дамитов орта мектебі» КММ қазақ тілі мен әдебиеті пәні мұғалімі А С. Жарманаева;ІІІ дәрежелі диплом Өскемен қаласы бойынша білім бөлімінің «№ 48 мектеп – қосымша білім беру орталығы» КММ қазақ тілі мен әдебиеті пәнінің мұғалімі Е. Е. Мамырбеков;ІІІ дәрежелі диплом - Зайсан ауданы бойынша білім бөлімінің «Қаратал орта мектебі» КММ қазақ тілі мен әдебиеті пәнінің мұғалімі Т. С. Мухамадиева;ІІІ дәрежелі диплом - Тарбағатай ауданы бойынша білім бөлімінің «Т. Рысқұлов атындағы орта мектебі» КММ қазақ тілі мен әдебиеті мұғалімі Г. Б. Канапиянова иеленді.Келесі номинациялар берілді:«Цифрлы сауатты» - Ұлан ауданы бойынша білім бөлімінің «Таврия орта мектебі» КММ қазақ тілі мен әдебиеті пәнінің мұғалімі А. Ж. Дүйсенбекова;«Креативті мұғалім» - Катонқарағай ауданы бойынша білім бөлімінің «Сейткамза Ластаев атындағы орта мектебі» КММ қазақ тілі мен әдебиеті пәні мұғалімі Р. С. Рақышев;«Шығармашыл мұғалім» - Шемонаиха ауданы «Камышин жалпы білім беретін орта мектеп - балабақша» КММ қазақ тілі мен әдебиеті пәнінің мұғалімі М. И. Иманбаева.Байқау жеңімпаздары І, ІІ, ІІІ дәрежелі дипломмен марапатталды, номинация иелеріне грамоталар берілді.Ақпарат көзі : https://www.gov.kz/memleket/entities/vko-bilim/press/news/details/1077331?lang=kk

Құрметті жерлестер, ардақты еңбек адамдары!Сіздерді еліміздің ең қастерлі мерекелерінің бірі – Еңбек күнімен шын жүректен құттықтаймын!Бұл мереке – адал еңбектің, маңдай тердің, қажырлы қайраттың бағаланатын күні. Еңбектің арқасында еліміз дамып, ауданымыз көркейіп келеді. Әрбіріңіз өз салаларыңызда табандылықпен еңбек етіп, туған жеріміздің өркендеуіне үлес қосып келесіздер.Еңбек – адамның ең асыл қасиетін айқындайтын өлшем. Осы жолда аянбай еңбек етіп жүрген баршаңызға шынайы ризашылығымды білдіремін. Сіздердің адал еңбектеріңіз, елге деген сүйіспеншіліктеріңіз – жастарға өнеге, келер ұрпаққа мұра.Баршаңызға мықты денсаулық, отбастарыңызға береке-бірлік, еңбектеріңізге жеміс тілеймін!Еңбектеріңіз жана берсін, мерейлеріңіз үстем болсын!Құрметпен,Берік СәрменбаевСырдария ауданының әкіміАқпарат көзі : https://www.gov.kz/memleket/entities/kyzylorda-syrdarya/press/news/details/1077115?lang=kk

Бейімбет Майлин ауданының аумағында заңдылық пен құқықтық тәртіпті қамтамасыз ету, сондай-ақ халық арасында құқық бұзушылықтың алдын алу шеңберінде 2025 жылғы 26 қыркүйекте аудан әкімдігі ғимаратының үлкен залында Бейімбет Майлин ауданы әкімдігінің жанындағы құқық бұзушылықтардың алдын алу жөніндегі ведомствоаралық комиссияның отырысы өтті. Осы отырыс шеңберінде жеке адамға, оның ішінде пробация қызметінде есепте тұрған адамдарға қарсы құқық бұзушылықтардың профилактикасына ерекше назар аударылды, сонымен қатар жұмыссыздар жасаған құқық бұзушылықтардың профилактикасына да баса назар аударылды. Сонымен қатар, жол-көлік оқиғаларының алдын алу мәселесі қаралды. Осы комиссияның жұмысын тұрақты негізде жүзеге асыру ауданның мемлекеттік органдары мен мекемелерінің заңдылықты насихаттауға және құқық бұзушылықтар жасауға төзбеушілікке тәрбиелеуге бағытталған жұмысын жандандыруға мүмкіндік береді.Ақпарат көзі : https://www.gov.kz/memleket/entities/kostanai-bmalin-audany-akimat/press/news/details/1077129?lang=kk

Астана қаласының әкімі Жеңіс Қасымбек Instagram парақшасында қалада салынып жатқан жаңа агроөнеркәсіптік кешен жайлы жазды.«Астанада негізгі экономикалық көрсеткіштер бойынша оң даму динамикасы байқалады. Биыл 7 айдың қорытындысы бойынша негізгі капиталға салынған инвестициялар көлемі 1,2 трлн теңгені құрап, өткен жылдың сәйкес кезеңімен салыстырғанда 42,1%-ға артты. Оның ішінде өңдеу өнеркәсібі, медицина, білім беру, көлік, логистика және өзге де салалардағы жобалар бар.Биыл 55 инвестициялық жобаны қолданысқа беру жоспарланып отыр. Инвестициялар көлемі 300 млрд теңгені құрайды. Осы жобалар арқылы 3,6 мың жаңа жұмыс орны ашылады.Астанада ҚР Ауыл шаруашылығы министрлігінің қолдауымен дәнді және дәнді-бұршақ дақылдарын терең өңдеуге арналған интеграцияланған агроөнеркәсіптік кешеннің құрылысы басталды. Жобаны түркиялық Tiryaki Agro холдингі мен қазақстандық «Қазақстан астық консорциумы» ЖШС және «ADOtex» ЖШС бірлесіп құрған Kazak Protein компаниясы жүзеге асырып жатыр. Инвестицияның жалпы көлемі 320 миллион АҚШ долларын құрайды. Жоба аясында шамамен 400 жаңа жұмыс орны ашылады.Құрылыстың екі кезеңін аяқтау 2028 жылға жоспарланған.Агроөнеркәсіп кешенінің құрылысы екі кезеңнен тұрады: бірінші кезең – бидайды терең өңдеу – 2027 жылы, ал екінші кезең – бұршақ дақылдарын терең өңдеу – 2028 жылы аяқталады. Кешеннің өндірістік қуаты жылына 250 мың тонна бидай мен 80 мың тонна бұршақ өнімдерін өңдеуге мүмкіндік береді.Өңдеу нәтижесінде глютен, крахмал, лизин, құрама жем, өсімдік негізіндегі ақуыз изоляттары және басқа да өнімдер шығарылатын болады.Дайын өнім тек ішкі нарыққа ғана емес, сондай-ақ экспортқа да жөнелтіледі деп жоспарланып отыр», – деп жазды қала әкімі.Ақпарат көзі : https://www.gov.kz/memleket/entities/astana-uir/press/news/details/1077208?lang=kk

Елордада Дүниежүзілік туризм күніне орай баспасөз туры ұйымдастырылды. Іс-шараны «Astana Tourism» туризмді дамыту орталығы өткізді.Тур барысында БАҚ өкілдері ақпараттық киоск пен Taxi Point жүйесімен танысып, Ұлттық музейді, Бас мешітті және қаланың басты тарихи-мәдени нысандарын аралады.Сонымен қатар елорданың туристік инфрақұрылымындағы жаңашылдықтар көрсетіліп, Астананың қонақжайлық әлеуеті таныстырылды.Бұл шара елорданың тарихи-мәдени құндылықтарын дәріптеуге және туризм саласындағы ынтымақтастықты нығайтуға бағытталды. Толығырақ: https://www.instagram.com/p/DPBz-v3iBa4/?hl=ru Ақпарат көзі : https://www.gov.kz/memleket/entities/astana-uir/press/news/details/1077213?lang=kk

Бухарест, 2025 жылғы 29 қыркүйек – Қазақстан тарапының бастамасымен Румыния Президентінің экономикалық және әлеуметтік мәселелер жөніндегі кеңесшісі Раду Бурнэтэмен кездесу өтті.Кездесу барысында Қазақстан Республикасының Елшісі Ерлік Әли Қазақстан мен Румыния арасындағы саяси, сауда-экономикалық, инвестициялық және энергетика салаларындағы ынтымақтастықтың қазіргі жай-күйі мен болашағы туралы кеңінен хабардар етті.Сауда-экономикалық өзара іс-қимыл мәселелеріне ерекше назар аударылды. Мәселен, геосаяси тұрақсыздыққа қарамастан, 2024 жылы Қазақстан мен Румыния арасындағы тауар айналымының артқаны атап өтілді.Кездесу барысында басты тақырыптардың бірі – инвестициялық ынтымақтастық мәселелері болды. Қазақстан Румынияны Шығыс Еуропадағы негізгі серіктестерінің бірі ретінде қарастыратыны атап өтілді. Бұл тұрғыда Румынияда 20 жылға жуық уақыт табысты жұмыс істеп келе жатқан, елдегі ең ірі салық төлеушілердің бірі және мұнай өңдеу саласындағы стратегиялық инвестор саналатын KMG International N.V. (Rompetrol) компаниясының қызметіне баса назар аударылды.Кездесу барысында Rompetrol компаниясының бас директоры Эрик Сагиев энергетикалық саладағы ынтымақтастықты кеңейтуге бағытталған бірқатар бастамаларды таныстырды. Қазақстан тарапынан осы жобаларды іске асыруға румын тарапының қолдау көрсететініне үміт білдірілді.Келіссөздер қорытындысы бойынша тараптар екіжақты әріптестікті нығайтуға және өзара қарым-қатынастардың толық әлеуетін іске асыруға ниетті екенін растады.Анықтама ретінде: 2024 жылы Қазақстан мен Румыния арасындағы тауар айналымы 2,92 млрд. АҚШ долларын құрады, ол 2023 жылмен салыстырғанда 1,74%-ға артты. Ақпарат көзі : https://www.gov.kz/memleket/entities/mfa-bucharest/press/news/details/1077223?lang=kk

Мадрид, 2025 ж. 25 қыркүйек – Қазақстан Республикасының Испания Корольдігіндегі Елшісі Данат Мұсаев Испания Бас прокуратурасының халықаралық қылмыстық ынтымақтастық жөніндегі прокуроры Франсиско Хименес-Вильярехо Фернандеспен кездесу өткізді.Кездесу барысында халықаралық-құқықтық ынтымақтастықты дамыту мәселелері, оның ішінде екі мемлекеттің құзыретті органдары арасындағы өзара іс-қимыл және құқықтық көмек саласында күш-жігерді одан әрі үйлестірудің ықтимал бағыттары талқыланды.Жұмыс байланыстарын тұрақты қолдаудың, соның ішінде өзара сапарларды жүзеге асырудың маңыздылығы атап өтілді.Тараптар өзекті бағыттар бойынша ынтымақтастықты нығайтуға дайын екендіктерін растады.Ақпарат көзі : https://www.gov.kz/memleket/entities/mfa-madrid/press/news/details/1077246?lang=kk

Женева, 2025 жылғы 26 қыркүйек – Дүниежүзілік сауда ұйымы жанындағы Қазақстан Республикасының Тұрақты өкілі Қайрат Төребаев Климаттың өзгеруі жөніндегі үкіметаралық топтың (IPCC) төрағасы, профессор Джим Скэймен кездесті.Кездесу барысында тараптар климаттың өзгеруімен күрестегі жаһандық күш-жігер аясында Қазақстан мен IPCC арасындағы ынтымақтастықтың негізгі бағыттарын талқылады. Әңгіме барысында климаттық саясатты ғылыми негізде қалыптастыру, Орталық Азия елдерінің климаттық зерттеулер саласындағы әлеуетін арттыру және қазақстандық сарапшылардың IPCC жұмысына қатысу мүмкіндіктері қарастырылды.Тұрақты өкіл Қ.Төребаев Қазақстанның Париж келісімінің мақсаттарына және парниктік газдар шығарындыларын азайту мен климатқа бейімделу жөніндегі ұлттық шараларды іске асыруға бейілділігін атап өтіп, бұл бағыттағы IPCC тарапынан көрсетілетін ғылыми қолдаудың маңыздылығын ерекше атап өтті.Профессор Джим Скэй Қазақстанның ұлттық сарапшыларын IPCC-нің бағалау және арнайы есептерін дайындау жөніндегі авторлар ұжымдары мен жұмыс топтарының жұмысына белсенді қатысуға шақырып, IPCC бағдарламалары мен халықаралық ғылыми алаңдар аясында ынтымақтастықты одан әрі дамытуға дайын екенін білдірді.Ақпарат көзі : https://www.gov.kz/memleket/entities/mfa-wto/press/news/details/1077249?lang=kk

Қарағанды облысы Қазақстанда электронды сауданы дамытуда алдыңғы қатарлы өңір саналады. Бұл – жергілікті бизнестің белсенділігінің және отандық Teez маркетплейсінің серпінді дамуының нәтижесі. Қазірдің өзінде еліміздегі әр бесінші онлайн-тапсырыс Қарағанды үлесіне тиіп отыр.Teez – жеткізу мерзімі бар болғаны бір күнді құрайтын, қазақстандық қарқынды дамып келе жатқан онлайн-сауда алаңы. 2024 жылдың қыркүйегінде іске қосылған жоба қысқа уақыт ішінде зор нәтижеге қол жеткізді. 2025 жылдың қаңтарында қарағандылықтар берген тапсырыстар көлемі 2,3 миллионнан асып, бұл Қазақстандағы барлық онлайн-сатылымдардың 17,8 пайызын құрады.Арада бір жыл өткенде, 2025 жылдың қыркүйегінде Teez тәулігіне 10 мыңнан астам тапсырысты қабылдап, еліміздің 30 қаласына жеткізіп отыр.Қарағанды мен өзге өңір кәсіпкерлері үшін Teez – өнімдерін сату және нарыққа шығарудың тиімді құралы. Бүгінде алаңда 37 мың отандық кәсіпкердің тауарлары ұсынылған.— Біздің мақсатымыз – әрбір қазақстандық брендтің халықаралық деңгейде бәсекеге түсуіне мүмкіндік беру. Осы үшін біз қолайлы экожүйе қалыптастырып жатырмыз: төмен комиссия, тегін сақтау, жарнамалық қолдау және жедел жеткізу, — дейді Teez компаниясының бас директоры Линар Хуснуллин.Маркетплейстің өңірде дамуы жаңа жұмыс орындарының ашылуына да ықпал етуде. Бүгінде Қарағандыда 350-ден астам адам Teez компаниясында еңбек етсе, алдағы жылдары бұл сан бүкіл Қазақстан бойынша 8 мыңға жетуі жоспарланып отыр.Электронды сауданың өркендеуі логистика, курьерлік қызмет және қоғамдық тамақтану секілді салалардың дамуына да серпін беруде.Өткен жылдың қарашасында Қарағандыға жұмыс сапарымен келген ҚР Сауда және интеграция министрі Арман Шаққалиев атап өткендей, өзінің географиялық орналасуы мен инфрақұрылымдық әлеуетін ескере отырып, Қарағанды облысы Қазақстанның ғана емес, бүкіл Орталық Азияның да ірі сауда-логистикалық хабына айнала алады.Ақпарат көзі : https://www.gov.kz/memleket/entities/karaganda/press/news/details/1077274?lang=kk