Астана, 2026 жылғы 13 шілде – Қазақстан Республикасы Сыртқы істер министрінің орынбасары Әлібек Қуантыров Қазақстандағы Оман Сұлтандығының Төтенше және Өкілетті Елшісі Мұхаммед Әл-Бахраниді дипломатиялық миссиясының аяқталуына орай қабылдады.Сыртқы істер министрінің орынбасары Қазақстан мен Оман арасындағы ынтымақтастықтың жоғары деңгейін атап өтіп, өзара тиімді серіктестікті нығайтуға қосқан үлесі үшін М. Әл-Бахраниге ризашылығын білдірді.Өз кезегінде, Оман дипломаты Қазақстанда қызмет атқару барысында жинақтаған тәжірибесін ерекше атап өтіп, достық пен өзара түсіністікке негізделген екіжақты және көпжақты ынтымақтастықтың одан әрі дами беретініне сенім білдірді.Кездесу соңында Оман Елшісіне Қазақстан Республикасы Сыртқы істер министрі Ермек Көшербаевтың алғыс хаты табысталды.Ақпарат көзі : https://www.gov.kz/memleket/entities/mfa/press/news/details/1257425?lang=ru

Алматы облысының Талғар қаласында №17 өрт сөндіру депосы ел игілігіне берілді. Заманауи нысан 65 мыңнан астам тұрғынды өрттен қорғауға мүмкіндік береді. Ғимарат халықаралық талаптарға толығымен сай келеді. Мұнда арнайы техникаларға арналған кең көлікжай, жөндеу шеберханалары, оқу сыныптары, спортпен шұғылдануға арналған бөлмелер, демалыс орындары және соңғы үлгідегі радиобайланыс пункті қарастырылған. Сонымен қатар қызметкерлердің әлеуметтік жағдайына да ерекше көңіл бөлініп, депо аумағында өрт сөндірушілерге арналған төрт қызметтік пәтер бой көтерген, – деп хабарлайды Алматы облысы әкімінің баспасөз қызметі.Салтанатты рәсімге ҚР Төтенше жағдайлар министрі, генерал-лейтенант Шыңғыс Әрінов, Алматы облысының әкімі Марат Сұлтанғазиев, облыстық Төтенше жағдайлар департаментінің бастығы, полковник Дәурен Оразбеков, ардагерлер мен аудан тұрғындары қатысты.Алғашқы құттықтау сөз Төтенше жағдайлар министрі Шыңғыс Әріновке берілді. Министр жаңа депоның өңір тұрғындарының қауіпсіздігін қамтамасыз етудегі маңызына тоқталды.«Бүгін біз жай ғана жаңа өрт сөндіру нысанын ашып отырған жоқпыз. Бұл – дер кезінде жүзеге асқан маңызды жоба. Бұрынғы ғимарат әбден тозып, қазіргі заман талабына сай келмейтін еді. Ал Талғар қаласы бүгінде қарқынды дамып, халық саны жыл сайын артып келеді. Сонымен қатар елді мекендер арасындағы қашықтық пен жол ұзындығы өрт сөндіру қызметінің жедел әрекет етуіне қосымша қиындық туғызатын. Сондықтан бұл депоның пайдалануға берілуі өрт сөндіру жасақтарының оқиға орнына жету уақытын едәуір қысқартады. Ал төтенше жағдайда әрбір секундтың маңызы зор», – деді Шыңғыс Сайранұлы.Министрдің айтуынша, нысанның орналасқан орны мамандардың жан-жақты сараптамасы негізінде таңдалған. Жоба небәрі 100 күнде жүзеге асырылып, оның жалпы құны шамамен 350 миллион теңгені құрады. Құрылыс республикалық бюджет есебінен қаржыландырылды. Нысан Мемлекет басшысының тапсырмасына сәйкес Төтенше жағдайлар министрлігінің бастамасымен және Алматы облысы әкімдігінің қолдауымен салынды. Дәл осындай өрт сөндіру бекеті Кеген ауданында және Шыңгелді ауылында пайдалануға берілген. Алдағы уақытта мұндай нысан Шелек ауылында да салынады. Сонымен қатар Қарасай, Еңбекшіқазақ және Іле аудандарында да жаңа өрт сөндіру бөлімдерін кезең-кезеңімен ашу жоспарланып отыр.Салтанатты рәсім барысында Шыңғыс Әрінов жаңа депоның құрылысына үлес қосқан азаматтарға ведомстволық марапаттарды табыстады. Сондай-ақ «Toyota Hilux» және АЦ-5-40 КамАЗ арнайы техникаларының кілтін тарту етті. Бірқатар өрт сөндірушіге қызметтік пәтердің кілттері берілді. Ал жаңа өрт сөндіру депосының кілті аға лейтенант Ришат Рахимовқа табысталды.Шара барысында құттықтау сөз сөйлеген облыс әкімі Марат Сұлтанғазиев заманауи үлгіде бой көтерген бұл депо өрт сөндірушілердің еңбек жағдайын жақсартып, олардың кәсіби шеберлігін шыңдауға жол ашатынын айтты.«Төтенше жағдайлар қызметі – мемлекетіміздің берік қалқаны, ал құтқарушылар – еліміздің нағыз бейбіт күндегі батырлары. Өрт сөндіруші мамандығы тек кәсіби дағдыны ғана емес, ержүректілікті және Отанға деген шексіз адалдықты талап етеді. Сондықтан да Мемлекет басшысының тікелей қолдауымен құтқарушыларымызға қолайлы жағдай жасау, оларды заманауи техникамен және сапалы инфрақұрылыммен қамтамасыз ету бағытындағы жұмыстар елімізде жүйелі түрде жүргізіліп келеді. Осы орайда, материалдық-техникалық базаны нығайту жұмыстары тек бір ауданмен шектелмейтінін атап өткен жөн. Биылдың өзінде Нарынқол және Кеген ауылдарында, Талғар ауданының Жаңалық, Нұра ауылдарында заманауи модульдік өрт сөндіру депосының құрылысы сәтті аяқталып, ел игілігіне берілді. Мұның бәрі – халықтың тыныштығы мен қауіпсіздігі үшін жасалып жатқан нақты қадамдар», – деді облыс әкімі. Сондай-ақ бірқатар қызметкерге Алғыс хат пен жаңа техникалардың кілтін табыс етті.Жалпы ауданы 1154 шаршы метр болатын жаңа депо модульдік технология бойынша салынған. Ғимарат кеңейтуге қолайлы әрі тез құрастырылатын конструкциялармен жабдықталған. Мұнда заманауи байланыс және диспетчерлік жүйелер орнатылған, демалыс, киім ауыстыру, оқу-жаттығу және жеке құрамның даярлығына арналған бөлмелер қарастырылған.Депода 18 қызметкер тәулік бойы кезекшілік атқарады. Олардың қарамағында төрт өрт сөндіру автокөлігі және жедел әрекет етуге арналған Toyota Hilux автокөлігі бар.Салтанатты шара барысында жаңа ғимараттың қызыл лентасы қиылып, ақсақал ақ батасын беріп, дәстүрлі түрде шашу шашылды. Одан кейін қонақтар өрт сөндіру депосын аралап, оның материалдық-техникалық базасымен танысты.Ақпарат көзі : https://www.gov.kz/memleket/entities/almobl/press/news/details/1256914?lang=ru

Қостанайда «Халықтық Конституция: сенімді болашақтың бастауы» ғылыми конференциясы өтті. Жиынға облыс әкімі Құмар Ақсақалов, Конституциялық комиссияның мүшелері Үнзила Шапақ, Мәди Мырзағараев, Сайлаубек Ещанов, Қазақстан Республикасы Парламенті Мәжілісі VII - VIII шақырылымының депутаты Екатерина Смышляева, мемлекеттік органдардың, сараптамалық және ғылыми қауымдастықтың, азаматтық қоғам институттарының, этномәдени бірлестіктердің, бұқаралық ақпарат құралдарының өкілдері қатысты.Бүгінгі кездесу еліміз үшін қоғамдық-саяси жаңғырудың маңызды кезеңінде өтіп отыр. Өздеріңізге мәлім, 2026 жылғы 1 шілдеден бастап Қазақстан өзінің конституциялық дамуының жаңа кезеңіне қадам басты. Жаңа Конституцияның қабылдануы - мемлекетіміздің тарихындағы шын мәнінде тарихи оқиға. Бұл жай ғана маңызды дата емес, бұл -  заң үстемдігі мен құқықтық тәртіпке, адам құқықтары мен бостандықтарын құрметтеуге, ұлттық құндылықтарды ардақтауға және болашақ ұрпақ алдындағы жауапкершілікке негізделген мемлекетіміздің жаңа тарауының басталуы. Жаңа Конституцияны іске асыру аясында Қазақстан Республикасының Президенті бес дербес конституциялық заңға қол қойды 8 конституциялық заңға және 60-тан астам заңға түзетулер енгізілді, – деді аймақ басшысы.Мемлекет басшысы биылғы жылдың 23 тамызында Қазақстан Республикасы Құрылтайы депутаттарының сайлауын өткізу туралы жариялады. Бұл – еліміздің қоғамдық-саяси өміріндегі аса маңызды саяси науқан. Осыған байланысты Қостанай облысында қолданыстағы заңнама талаптарына сәйкес сайлауды ұйымдастыру мен өткізуді қамтамасыз етуге бағытталған кешенді дайындық жұмыстары басталды.Қазақстан Республикасының Конституциясы – елдің негізгі заңы ғана емес, сонымен қатар қоғам өмірінің барлық салаларындағы нақты өзгерістердің берік негізі. Оның қағидаттарының тиімді жүзеге асырылуы әрбір өңірдің дамуына тікелей ықпал етеді. Өйткені экономикалық өсім, тұрақтылық және азаматтардың әл-ауқаты ең алдымен қуатты әрі дамыған өңірлер арқылы қамтамасыз етіледі.«Алдымызда ауқымды әрі маңызды өзгерістер күтіп тұр. Оларды табысты жүзеге асыру уақытты, жүйелі әрі үйлесімді жұмысты, сондай-ақ әрбір азаматтың жоғары жауапкершілігін талап етеді. Өйткені қуатты, әділетті және өркендеген мемлекетке бастар жол Конституцияны құрметтеуден, заңды бұлжытпай сақтаудан және әр азаматтың белсенді азаматтық ұстанымынан басталады», – деп атап өтті облыс әкімі.Ақпарат көзі : https://www.gov.kz/memleket/entities/kostanay/press/news/details/1256954?lang=ru

Шалкөде төрінде өткен Райымбек ауданының 90 жылдық мерейтойына арналған «Хантәңірі қазынасы» халықаралық этнофестивалі өз мәресіне жетті. Мерекеге Қазақстанның түкпір-түкпірінен және шетелдерден келген 25 мыңға жуық қонақ қатысты. Шалкөде жайлауына жиналған қауым ауданның терең тарихымен, агроөнеркәсіптік, туристік әлеуетімен тереңірек танысып, тұмса табиғаттың тылсым сырына қанықты. Әсіресе «Жолан жүйрігі» республикалық ат бәйгесі халыққа ерекше әсер сыйлап, шара қорытындысында жүзден жүйрік, мыңнан тұлпар шыққандар марапатталды, – деп хабарлайды Алматы облысы әкімінің баспасөз қызметі.«Жолан жүйрігінде» еліміздің әр өңірінен және шетелдерден келген таңдаулы шабандоздар бақ сынап, тартысты дода өткізді. Республикалық аламан бәйгеде Қордай ауданынан қатысқан «Ботагөз» тұлпары (иесі – Нұрберген Айсұлтан) мәреге бірінші болып жетті. Топ бәйгеде «Желсұлы» сәйгүлігі (иесі – Нұрсейіт Жылқышабай) топты жарып, нағыз жүйрік атанды. Құнан бәйгеде Қордай ауданынан келген «Қызғалдақ» тұлпары (иесі – Дүйсеғұл әулеті) жеңімпаз болды. Аталған үздіктер «CHANGAN» және «KIA» маркалы автокөліктері мен 2 миллион теңге қаржылай сыйлықты жеңіп алды.Жергілікті шабандоздарға арналған аудандық бәйгелер де көрерменнің ерекше ықыласына бөленді. Онда Райымбек пен Кеген аудандарының сәйгүліктері сынға түсіп, бұл бәйгенің де жеңімпаздары автокөлік иесі атанды. Өзге қатысушылар да сыйлықтан құр қалған жоқ.Додаға қатысқан шабандоздың бірі – Исламәлі Ертөс. «Бұл бәйгеге Ұзынағаш ауылынан арнайы келдім. Шалкөде жайлауын екінші мәрте көріп тұрмын. 4 жыл бұрын дәл осы жайлауда өткен «Жолан жүйрігіне» қатысқан болатынмын. Бәйгеде бәсекеге түсіп жүргеніме бес жылдай уақыт болды. Талай мәрте жеңімпаз да атандық. Дегенмен бүгінгі жеңістің орны тым бөлек. Осындай дүбірлі тойда жүлделі болғаныма қуаныштымын», – деді ол.Мерейтой аясында ұйымдастырылған іс-шаралардың жоғары деңгейде өтуіне заманауи цифрлық технологиялар да сеп болды. Алматы облысының Цифрлық технологиялар басқармасы «Freedom Satellite» ЖШС-мен бірлесіп, Шалкөде жайлауында «Starlink спутник интернет жүйесін» іске қосты. Соның нәтижесінде фестиваль қонақтары мен қатысушылары таулы аймақта жоғары жылдамдықты интернетті еркін пайдаланды.Іс-шара аясында сондай-ақ «Таза Қазақстан» акциясы ауқымды түрде ұйымдастырылды. Санитарлық тазалықты қамтамасыз ету мақсатында іс-шара өтетін аумақта барлығы 105 биодәретхана және 75 қоқыс контейнері орналастырылды. Тазалық жұмыстарын жүргізуге 3 бірлік арнайы қоқыс тасымалдаушы техника жұмылдырылды. «Таза Қазақстан» акциясына 1000 қап, 1000 қолғап дайындалып, 110 волонтер тартылды, сондай-ақ ауыл тұрғындары, жастар, белсенді азаматтар қатысып, іс-шара өткен аумақтың санитарлық тазалығын қамтамасыз етті. Нәтижесінде 7 тоннаға жуық қатты тұрмыстық қалдықтар шығарылды. Іс-шара өткен 116 480 м² аумақта «Таза Қазақстан» экологиялық акциясын насихаттау мақсатында 20 баннер орналастырылды. Тұзкөл ауылынан іс-шара өтетін орынға дейінгі 28 шақырым жол бойына әр 5 шақырым сайын 8 қоқыс контейнері қойылды. Іс-шара аяқталғаннан кейін барлық контейнерлер мен қалдықтарды уақытша жинау орындарынан барлық қоқыс жиналды. Жиналған қатты тұрмыстық қалдықтар арнайы қоқыс тасымалдаушы техникаларға тиеліп, белгіленген қоқыс полигонына шығарылды.Ақпарат көзі : https://www.gov.kz/memleket/entities/almobl/press/news/details/1256910?lang=ru

Шалкөде жайлауында Райымбек ауданының 90 жылдық мерейтойына арналған «Хантәңірі қазынасы» халықаралық этнофестивалі басталды. Мерейтой аясында 150-ге жуық ақшаңқан киіз үй тігіліп, түрлі тақырыптар бойынша көрмелер ұйымдастырылды. Онда отандық және халықаралық қолөнершілер мен этнодизайнерлердің, қылқалам шеберлерінің үздік туындылары, ұлттық тағамдар мен ауыл шаруашылығы өнімдері халық назарына ұсынылды. Ұлттық спорт түрлерінен сайыстар өтіп, кіл мықтылар өзара сынға түсуде. Мәдени-көпшілік іс-шараға Қытай, Түркия, Ресей, Әзірбайжан, Қырғызстан, Тәжікстан, Беларусь, Армения, Өзбекстан, Грузия елдерінен, Қазақстанның түкпін-түкпірінен қонақтар ағылып келіп, ұлан-асыр тойдың куәсі болуда, – деп хабарлайды Алматы облысы әкімінің баспасөз қызметі.Халықаралық фестивальде Райымбек ауданының тарихи даму жолы мен әлеуметтік-экономикалық жетістіктері таныстырылды. Аумалы-төкпелі заманда елдің қауіпсіздігін күзеткен Райымбек батырдың ерлік істері дәріптелді. Асқар шыңды Хантәңірі баурайынан түлеп ұшқан Бердібек Соқпақбаев, Мұқағали Мақатаев, Еркін Ібітанов, Сағат Әшімбаев, Алтынбек Сәрсенбаев және Оразалы Досбосынов сынды біртуар тұлғалардың өнегелі өмір жолы насихатталды. Дала мәдениетін айшықтайтын, қазақ халқының қасиетті «Қарқаралы» жайлау көші көрерменді тарихтың терең қойнауына сапар шектірді. Мәні мен сәні келіскен салтанатты көш көшпелі елдің салт-дәстүрі мен мәдениетінен сыр шертіп, береке мен бірліктің жаршысына айналды. Шетелден келген шеберлердің шеруі де халықтың ерекше назарына ілікті.Шараға ҚР Президентінің кеңесшісі Мәлік Отарбаев та қатысып, Мемлекет басшысы Қасым-Жомарт Тоқаевтың құттықтауын жеткізді.«Райымбек – тарихы терең, ынтымағы жарасқан берекелі өңір. Осы өнегелі өлкеден көптеген тұғырлы тұлғалар шығып, ұлт мүддесі үшін қалтқысыз қызмет етті. Қазір аудан халқы ауыл шаруашылығы, туризм және басқа да салаларда қажырлы еңбек етіп, туған жерін көркейтуге атсалысып келеді. Сондай-ақ олар ел тағдырына әсер ететін бастамаларды үнемі қолдап, ұйымшылдықтың озық үлгісін танытып жүр. Аудан тұрғындарының жалпыхалықтық референдумға белсене қатысып, Жаңа Конституцияны қолдауы – соның айқын дәлелі. Осы орайда, аймақты дамытуға зор үлес қосқан азаматтардың бәріне шынайы ризашылығымды білдіремін. Сіздер алдағы уақытта да ел игілігі үшін еңбек ете бересіздер деп сенемін», – делінген құттықтау хатта.Облыс әкімі Марат Сұлтанғазиев өз сөзінде құт қонған, ырыс ұялаған Нарынқол өңірі халқымыздың рухани мұрасы мен тарихи жадының ажырамас бөлігі екенін айтты.«Бұл – елі үшін туған Райымбек батырдың, Ұзақ пен Жәмеңкенің ерлігі өрілген киелі мекен. Ұлттық рухтың бесігіне айналған осы топырақтан қазақ мәдениеті мен әдебиетінің талай бірегей тұлғалары түлеп ұшты. Балалар әдебиетінің классигі Бердібек Соқпақбаевтың 100 жылдық мерейтойының ЮНЕСКО деңгейінде аталып өтуі – осы өңірден шыққан ұлы тұлғалардың мұрасы халықаралық деңгейде мойындалғанының айғағы. Қазақ поэзиясының Хантәңірі Мұқағали Мақатаевтың жырлары – ұлтымыздың сарқылмас асыл қазынасы. Сол ұлылықтың ізін ала, сөз өнерінің туын жықпай ілгері сүйреген сыншы Сағатхан Әшімбаев пен жазушы-драматург Баққожа Мұқай да осы топырақтың перзенттері. Ал айтыс өнерінің айтулы өкілдері Еркін Ібітанов пен Оразалы Досбосынов қазақтың сөз құдіретін асқақтатып, төл өнеріміздің мерейін үстем етті. Мұнымен қоса, бұл құтты мекен ұлт мүддесі жолында аянбай еңбек еткен, ел басқарған саяси және қоғам қайраткерлерін де дүниеге әкелді. Осындай тау тұлғаларды қалыптастырған Райымбек ауданы – ел руханиятының алтын арқауы болып қала береді», – деді аймақ басшысы.Сондай-ақ Мемлекет басшысы Қасым-Жомарт Тоқаевтың ауылдық аймақтарды, стратегиялық маңызы жоғары шекаралық өңірлерді дамытуға, халықтың тұрмыс сапасын арттыруға әрдайым ерекше басымдық беретінін айтып, осы бағытта Райымбек ауданында да жүйелі жұмыстар жүргізіліп жатқанын жеткізді. Айтуынша, табиғи байлығы мен тарихи мұрасын сақтай отырып, аудан әлеуметтік-экономикалық дамудың жаңа кезеңіне нық қадам басып келеді. Өзінің аграрлық әлеуетімен еліміздің азық-түлік қауіпсіздігін қамтамасыз етуге, облыс экономикасын өркендетуге зор үлес қосуда. Райымбектің брендіне айналған картоп шаруашылығы мен дәнді-дақылдар өндірісі, мал шаруашылығы – отандық өнімнің алтын стандартына айналып отыр.«Аумақтың туристік әлеуеті де өте жоғары. Хантәңірі шыңы, тұнық Тұзкөл мен Тастау көлдері, Шалкөде жайлауы бұл өлкені еліміздегі ең көркем өңірлердің біріне айналдырды. Осынау қайталанбас табиғат байлығы треккинг, альпинизм, этнотуризм және экологиялық туризмді дамытуға кең жол ашады. Нарынқол өңірінің осынау экологиялық таза туристік мүмкіндіктері алдағы уақытта халықтың әл-ауқатын көтеретін, аймақ экономикасын өрге сүйрейтін негізгі қозғаушы күшке айналуы тиіс», – деді облыс әкімі.Айта кетейік, Райымбек ауданының мерейтойына арналған шаралар легі үш күн бойы Тәңіртау төсін думанға бөлеуде. 90 жылдыққа орай Қарасаз ауылында «Құлмамбеттің құлынын құндақтаған өлке» атты айтыскер ақын Оразалы Досбосыновты еске алуға арналған II республикалық оқушылар айтысы ұйымдастырылды. Нарынқол ауылында ақиық ақын Мұқағали Мақатаевтың шығармашылығына арналған ақын-жазушылардың қатысуымен ғылыми-танымдық конференция өткізілді. Сондай-ақ аудан орталығында облыс өнерпаздары мен еліміздің танымал эстрада жұлдыздарының қатысуымен өткен гала-концерт тұрғындар мен қонақтарға мерекелік көңіл-күй сыйлады. Үш күндік думан бүгін Шалкөде жайлауында қорытындыланады. Мерейтой аясында сондай-ақ «Жолан жүйрігі» республикалық ат бәйгесі мен ұлттық спорт түрлерінен жарыстар өтеді. Бәсекенің жүлдесі де қомақты. Шара қорытындысында табиғаттың тазалығын сақтап, экологиялық мәдениетті қалыптастыру мақсатында «Таза Қазақстан» бағдарламасы аясында сенбілік өткізілмек.Ақпарат көзі : https://www.gov.kz/memleket/entities/almobl/press/news/details/1256813?lang=ru

Мемлекет басшысы Қасым-Жомарт Тоқаев Райымбек ауданының 90 жылдық мерейтойына орай тұрғындарға құттықтау жолдады. Оны Шалкөде жайлауында өткен «Хантәңірі қазынасы» халықаралық этнофестивалінің салтанатты ашылуында ҚР Президентінің кеңесшісі Мәлік Отарбаев жеткізді.Президент құттықтауында осы қасиетті мекеннен ел мүддесіне адал қызмет еткен көптеген көрнекті тұлғалардың шыққанына тоқталып, бүгінде аудан халқы еліміздің ауыл шаруашылығы, туризм және өзге де салаларының дамытуға елеулі үлес қосып келе жатқанын атап өткен.«Райымбек – тарихы терең, ынтымағы жарасқан берекелі өңір. Осы өнегелі өлкеден көптеген тұғырлы тұлғалар шығып, ұлт мүддесі үшін қалтқысыз қызмет етті. Бердібек Соқпақбаев, Мұқағали Мақатаев және өзге де көрнекі қаламгерлер шоқтығы биік шығармалар жазып, өскелең ұрпақтың бойына отаншылдық, білімпаздық, еңбекқорлық қасиеттерін сіңірді.Қазір аудан халқы ауыл шаруашылығы, туризм және басқа да салаларда қажырлы еңбек етіп, туған жерін көркейтуге атсалысып келеді. Сондай-ақ олар ел тағдырына әсер ететін бастамаларды үнемі қолдап, ұйымшылдықтың озық үлгісін танытып жүр. Аудан тұрғындарының жалпыхалықтық референдумға белсене қатысып, Жаңа Конституцияны қолдауы – соның айқын дәлелі», – делінген құттықтау хатта.Мемлекет басшысы сондай-ақ өңірдің дамуына үлес қосып жүрген барлық азаматқа ризашылығын білдіріп, аудан тұрғындарына бақ-береке, толағай табыс және ел игілігі жолындағы еңбектеріне табыс тілеген.Айта кетейік, Райымбек ауданының 90 жылдығына арналған шаралар легі үш күн бойы жалғасты. Мерейтой аясында ғылыми-танымдық конференциялар, республикалық айтыс пен концерттік бағдарламалар ұйымдастырылды. Ұлан-асыр той Шалкөде жайлауында «Хантәңірі қазынасы» халықаралық этнофестивалімен қорытындыланды.Ақпарат көзі : https://www.gov.kz/memleket/entities/almobl/press/news/details/1256839?lang=ru

Алматы облысында Ветеринария қызметкерлері күніне арналған салтанатты жиын өтіп, сала мамандарының ерен еңбегі лайықты бағасын алды. Өз ісіне адалдығымен, кәсіби біліктілігімен ерекшеленген бірқатар сала қызметкері марапатталды. Атап айтқанда, үздік мамандарға ҚР Ауыл шаруашылығы министрлігінің «Еңбек ардагері» медалі, Құрмет грамотасы, Алғыс хаты және облыс әкімі Марат Сұлтанғазиевтің «Құрмет» грамотасы табысталды.Мерекелік басқосудың шымылдығын ашқан облыс әкімінің орынбасары Бақытнұр Бақытұлы ветеринария қызметкерлерін кәсіби мерекесімен құттықтап, өңірдегі мыңдаған маманның адал еңбегіне өз ризашылығын білдірді. Сондай-ақ ветеринарияның агроөнеркәсіптік кешенді дамытудағы стратегиялық маңызын атап өтті.«Ветеринар маманы болу терең білім мен жоғары біліктілікті талап етеді. Қызығы мен қиындығы қатар жүретін осы абыройлы кәсіпті адал атқарып, халыққа қауіпсіз өнімнің жетуіне қосып жүрген үлестеріңіз үшін шынайы алғысымды білдіремін», – деді облыс әкімінің орынбасары.Бақытнұр Бақытұлының айтуынша, бүгінде өңірдің ветеринария саласында 1386 маман еңбек етеді. Олар мал денсаулығын қорғаумен қатар, эпизоотиялық тұрақтылықты қамтамасыз етіп, халықтың азық-түлік қауіпсіздігін сақтауға өлшеусіз үлес қосуда. Облыс әкімінің орынбасары Мемлекет басшысы Қасым-Жомарт Тоқаевтың Ауыл шаруашылығы қызметкерлерінің II форумында ветеринариялық инфрақұрылымды дамыту, материалдық-техникалық базаны нығайту және сала қызметкерлерінің еңбек жағдайын жақсарту жөнінде нақты міндеттер жүктегенін айтты.Президент тапсырмаларын орындау бағытында өңірімізде де ауқымды жұмыстар атқарылып жатыр. Мәселен, соңғы үш жылдың өзінде өңірде 21 ветеринариялық пункт пен 19 мал қорымы пайдалануға берілді. Ал 2026-2027 жылдары қосымша 94 ветеринариялық пункт және 52 мал қорымын салуға жергілікті бюджеттен 4,1 млрд теңге қарастырылды. Бұл қаржы ветеринариялық нысандарға деген қажеттілікті толық өтеуге мүмкіндік береді. Материалдық-техникалық базаны нығайту мақсатында салаға 100 қызметтік автокөлік сатып алынды. Сондай-ақ аса қауіпті 12 жұқпалы ауруға қарсы эпизоотиялық іс-шараларды жүзеге асыру үшін 5 млрд теңге бөлінген. Бұдан бөлек, бюджет қаражаты есебінен 123 млн теңгеге 70 сібір жарасы көміндісі ветеринариялық-санитариялық талаптарға сәйкестендірілді.Мерекелік жиында сала ардагері Самғат Сүндетбаев бүгінде мемлекет тарапынан ветеринарияға көрсетіліп отырған қолдаудың ауқымы кеңейіп келе жатқанын ерекше атап өтті.«Ветеринария – халқымыздың әл-ауқаты мен азық-түлік қауіпсіздігін қамтамасыз ететін жауапкершілігі жоғары сала. Мемлекет тарапынан көптеген қолдау көрсетіліп, мамандарға ерекше көңіл бөлінуде. Жаңа ветеринариялық пункттер мен мал қорымдары салынып, қызметкерлердің жалақысы кезең-кезеңімен өсіп келеді. Мұның барлығы бұл сала мамандары ел дамуына тікелей қызмет ететінін көрсетеді», – деді ардагер.Осылайша, төрт түліктің саулығын сақтап қана қоймай, тұтас халықтың денсаулығы мен елдің азық-түлік қауіпсіздігін қорғауда тынбай тер төккен жандар құрметке бөленді. Мерекелік жиын ветеринария қызметінің қоғам үшін қаншалықты маңызды екенін тағы бір мәрте айқындай түсті.Ақпарат көзі : https://www.gov.kz/memleket/entities/almobl/press/news/details/1256410?lang=ru

ҚР Сыртқы істер министрінің орынбасары Әлібек Қуантыров METLEN грек өнеркәсіптік тобының басшылығымен кездесті.Тараптар Қазақстанның инвестициялық ахуалы жөнінде пікір алмасып, ынтымақтастық мүмкіндіктерін талқылады. Сонымен қатар металлургия және өнеркәсіп секторларындағы, оның ішінде аса маңызды шикізат, экономикалық цикл мәселелері және алюминийдің өндіру тізбегін дамыту бағытындағы инвестициялық мүмкіндіктер қарастырылды.Аталған сапар «Kazakh Invest» ҰК» АҚ қолдауымен жүзеге асырылып, шетелдік инвесторларға «бір терезе» қағидаты аясында компанияның Қазақстандағы инвестициялық жобаларын одан әрі пысықтау жұмыстары таныстырылды.METLEN компаниясы энергетика және металлургия салаларында қызметін жүзеге асырады, әлемнің 40-тан астам елінде жұмыс істейді және Лондон қор биржасында листингтен өткен.Ақпарат көзі : https://www.gov.kz/memleket/entities/mfa/press/news/details/1256005?lang=ru

Бүгін Алматы облысында Су шаруашылығы қызметкерлері күні қарсаңында өңірдің су қауіпсіздігін қамтамасыз етіп, ирригациялық жүйелердің үздіксіз жұмысын тәулік бойы қадағалайтын мамандарға құрмет көрсетілді. Іс-шараға сала ардагерлері, «Алматыоблсушар» мекемесінің, Д. Қонаев атындағы Үлкен Алматы каналы филиалының, Балқаш-Алакөл бассейндік инспекциясының қызметкерлері, сондай-ақ жобалау және құрылыс ұйымдарының өкілдері қатысты, – деп хабарлайды Алматы облысы әкімінің баспасөз қызметі.Жиында облыс әкімінің орынбасары Бақытнұр Бақытұлы құттықтау сөз сөйледі.«Егістік алқаптарының өнімділігі, аграрлық саланың дамуы және халықтың азық-түлік қауіпсіздігі – сіздердің қажырлы еңбектеріңіздің жемісі. Өңірде су қоймалары мен каналдарды жаңғырту, ирригациялық инфрақұрылымды жетілдіру бағытында атқарылып жатқан жұмыстар экономиканың өркендеуіне зор үлес қосуда. Баршаңызды кәсіби мерекелеріңізбен құттықтаймын!» – деген Бақытнұр Бақытұлы бұл салада қажырлы еңбек етіп жүрген мамандарға мемлекеттік және ведомстволық наградаларды, Құрмет грамоталары мен Алғыс хаттарды табыстады.Марапатталғандардың бірі – Тасқұтан су көтергіш бөгетінде инженер-гидротехник болып еңбек ететін Абзал Рахымбаев. Ол «Су шаруашылығының үздігі» ведомстволық төсбелгісінің иесі атанды. Осы салада он жылдан астам уақыт бойы еңбек етіп келеді.«Бұл марапат – тек менің емес, бүкіл ұжымның еңбегінің нәтижесі. Тасқұтан бөгетінде біз суармалы аймақтарға судың уақытылы әрі тұрақты жеткізілуін бақылаймыз. Әрбір литр су диқандар үшін аса маңызды. Сондықтан біздің жұмысымыз үлкен жауапкершілікті талап етеді. Әсіресе суару маусымында демалыс пен мереке деген ұғым болмайды. Бірақ еңбегіңнің арқасында елдің ырысы артып, мол өнім жиналғанын көргенде, мамандығыңның қаншалықты маңызды екенін сезінесің. Барша әріптестерімді кәсіби мерекемен құттықтаймын», – деді Абзал Рахымбаев.Бүгінде мемлекеттік деңгейде кеңінен талқыланып жатқан су инфрақұрылымын дамыту мен су үнемдеу технологияларын енгізу ісі дәл осындай өз кәсібіне адал мамандардың еңбегі арқылы жүзеге асуда. Ардагерлердің мол тәжірибесі мен жас мамандардың жігері су ресурстарын сақтай отырып, болашаққа нық қадам басуға мүмкіндік беріп келеді.Ақпарат көзі : https://www.gov.kz/memleket/entities/almobl/press/news/details/1255856?lang=ru

Қостанай облысының әкімі Құмар Ақсақалов Арқалық қаласына барып, шаһардың 70 жылдығы қарсаңында атқарылып жатқан жұмыстармен танысты. Қалада инфрақұрылым, спорт және көлік салаларын дамытуға бағытталған жұмыстар жоспар бойынша жүзеге асырылуда.3 жыл ішінде 138 тұрғын үйдің қасбеті жаңартылды, биыл тағы 50 үйдің сырт келбеті жөнделеді.Теміржол вокзалы жаңғыртылуда. Инженерлік желілер, күту залдары мен кассалық аймақтар, санитариялық жайлар жаңартылып, заманауи қауіпсіздік жүйелері енгізілетін болады.Биыл Арқалықта облыстық жазғы спартакиада өтеді. Жарыстар өтетін басты нысан — «Жігер» стадионы жөнделіп жатыр. Өткен жылы Арқалықта 3 жаңа спорт нысаны пайдалануға берілді.Жабық хоккей корты мен денешынықтыру-сауықтыру кешені салынып жатыр.Арқалық әуежайының құрылысы аяқталуға жақын. Терминал бойынша негізгі құрылыс және инженерлік жұмыстар орындалды. Авариялық-құтқару станциясының, диспетчерлік мұнараның құрылыс жұмыстары жалғасуда. Ұшу-қону жолағында асфальт фрезерлеу жұмыстары жүргізіліп жатыр. Автономды қазандық пен сорғы станциясы толығымен орнатылды.Ақпарат көзі : https://www.gov.kz/memleket/entities/kostanay/press/news/details/1255870?lang=ru

Бүгін Алматы қаласында белгілі актер Джеки Чанның қатысуымен түсірілетін Armour of God: Ultimatum («Доспехи бога: Ультиматум») халықаралық көркем фильмінің өндірісін ресми түрде бастау рәсімі өтті.Салтанатты іс-шараға ҚР Премьер-Министрінің орынбасары – Мәдениет және ақпарат министрі Аида Балаева, Алматы қаласының әкімі Дархан Сатыбалды, Алматы облысының әкімі Марат Сұлтанғазиев, сондай-ақ қазақстандық және халықаралық киноиндустрия өкілдері қатысты.Үкімет басшысының орынбасары Джеки Чанның Қазақстан мен Қытай арасындағы мәдени-гуманитарлық байланыстарды дамытуға қосып отырған үлесін жоғары бағалады.«Қазақстан мәдениетін әлемдік аренада танытуға және екі ел арасындағы мәдени-гуманитарлық байланысты нығайтуға қосып отырған үлесіңіз үшін Сізге алғыс білдіремін. Алдағы түсірілім жұмыстарына сәттілік, жаңа шығармашылық табыстар тілеймін», – деді Аида Балаева.Кездесу барысында Джеки Чан Алматының талантты жас суретшілерімен және Т. Жүргенов атындағы Қазақ ұлттық өнер академиясының түлектері – жас кинематографистермен әңгімелесті. Ол жастарға шығармашылық жолда табыс тілеп, үздіксіз ізденіс пен өз ісіне деген сүйіспеншіліктің маңызын атап өтті. Кездесу соңында балалар әйгілі актерге өздері салған портреттерді тарту етті.Іс-шара соңында қатысушылар дәстүрлі түсірілім тақтайшасымен естелік суретке түсті. Осылайша фильм өндірісінің ресми басталғаны айшықталды.Жоба ҚР Мәдениет және ақпарат министрлігінің және Қытайдың мемлекеттік кинокомпаниясы China Film Group Corporation-ның қолдауымен жүзеге асырылуда. Фильм өндірісімен қазақстандық Sәlem Entertainment компаниясы және гонконгтық Billion Target компаниясы айналысады.Фильм түсірілімі 2026 жылғы шілде мен қазан айлары аралығында Қазақстан аумағында өтеді. Картинаның қоюшы режиссері – қазақстандық Роберт Кун. Туынды кең халықаралық прокатқа бағытталған. Негізгі түсірілім алаңдары Алматы қаласында, Алматы және Маңғыстау облыстарында орналасады.Бұл жоба Қазақстан үшін стратегиялық әрі имидждік тұрғыдан маңызды. Оның жүзеге асырылуы еліміздің мәдени, туристік және инвестициялық әлеуетін ілгерілетуге, кинотуризмді дамытуға, халықаралық ынтымақтастықты нығайтуға және Қазақстанды әлемдік деңгейдегі ірі киножобаларды түсіруге қолайлы заманауи алаң ретінде кеңінен танытуға ықпал етеді.ҚР Мәдениет және ақпарат министрлігінің баспасөз қызметіАқпарат көзі : https://www.gov.kz/memleket/entities/almobl/press/news/details/1255715?lang=ru

Астана, 2026 жылғы 8 шілде – Қазақстан Республикасы Сыртқы істер министрінің Бірінші орынбасары Ержан Ашықбаев ҚР-дың АҚШ-тағы Аризона штатындағы Құрметті консулы Хью Холлманмен кездесу өткізді.Кездесу барысында білім беру, экономика, инвестиция салаларындағы қазақ-америкалық ынтымақтастықты одан әрі дамыту, сондай-ақ Қазақстанның серіктес Аризона штатымен кең ауқымды бағыттар бойынша дәйекті түрде дамып келе жатқан өңіраралық байланыстарды нығайту мәселелері талқыланды.Екі ел арасындағы академиялық өзара іс-қимылдың жарқын үлгісіне айналған Манаш Қозыбаев атындағы Солтүстік Қазақстан университеті мен Аризона Университеті арасындағы ынтымақтастыққа ерекше назар аударылды. Бірлескен білім беру бағдарламаларымен 1 200-ден астам студент қамтылғаны, сондай-ақ ү.ж. 11 шілдеде қос диплом бағдарламасының алғашқы түлектерін бітіру рәсімі өтетіні аталып өтті.Бұдан басқа, тараптар сауда-экономикалық ынтымақтастықты одан әрі кеңейту, жаңартылатын энергетика, ауыл шаруашылығы және ақпараттық технологиялар салаларына инвестицияларды тарту, сондай-ақ Қазақстан мен Аризона штаты арасында өзара іскерлік миссиялар ұйымдастыру перспективаларын талқылады.Аризона штаты жоғары технологиялар, тау-кен өнеркәсібі, ауыл шаруашылығы және білім беру салалары қарқынды дамыған АҚШ-тың жетекші экономикалық әрі инновациялық орталықтарының бірі болып табылады.Ақпарат көзі : https://www.gov.kz/memleket/entities/mfa/press/news/details/1254971?lang=ru

Алматы облысының Қапшағай су қоймасында ашық суда жүзуден өткен «OCEANMAN QAZAQSTAN – 2026» халықаралық жарысы өз мәресіне жетіп, жеңімпаздар анықталды. Бұл – Орта Азиядағы ең ірі сайыстардың бірі. Биыл 20 елден келген 3000-нан астам спортшы өзара сынға түсті. Сонымен қатар 10 мыңнан астам жанкүйер қатысушыларға қолдау көрсетті, – деп хабарлайды Алматы облысы әкімінің баспасөз қызметі.Қазақстанда бұл жарыс бесінші жыл қатарынан ұйымдастырылып отыр. Қатысушылар 500 метр мен 10 шақырым аралығындағы 5 санат бойынша бақ сынады. Олар – OCEANMAN (10 км), HALF OCEANMAN (5 км), SPRINT (2 км), OCEANKIDS (500 м) және INSPIRATION (балалар санаты). Ең бастысы, додаға кәсіби спортшылармен қатар әуесқой жүзушілер, балалар, ардагерлер және ерекше қажеттіліктері бар азаматтар да қатысты.Сайыстың салтанатты ашылу рәсімінде құттықтау сөз сөйлеген Алматы облысының әкімі Марат Сұлтанғазиев жобаның бұқаралық спортты дамытудағы және өңірдің туристік әлеуетін арттырудағы маңызын ерекше атап өтті.– «OCEANMAN QAZAQSTAN» байқауы – Алматы облысының ғана емес, еліміздің спорттық күнтізбесіндегі беделді мемлекетаралық жарыстардың бірі. Бүгінде әлемнің түкпір-түкпірінен келетін жүзушілердің басын қосатын үлкен дәстүрлі спорт мерекесіне айналған. Қатысушылар санының жыл сайын артуы жарыстың өзге де мемлекеттер арасында танымалдығы артып келе жатқанын және елімізде ашық суда жүзу спортына деген қызығушылықтың жоғары екенін көрсетеді. Жыл сайын Қапшағай су қоймасында ұйымдастырылатын бұл сайыс Алматы облысының спорттық және туристік әлеуетін арттыруға, өңірдің атын әлемге әйгілеп, салауатты өмір салтын кеңінен насихаттауға зор үлес қосып келеді, – деді Марат Елеусізұлы.Екі күнге жалғасқан жарыстың алғашқы күні ерлер мен әйелдер арасындағы ең ұзақ қашықтық бойынша үздіктер анықталды. Оған 1300-ден астам спортшы қатысты. Ерлер арасында 10 шақырымды бірінші болып Қазақстан ұлттық құрамасының көшбасшыларының бірі Лев Черепанов бағындырды. Қазақстан чемпионы, Азия чемпионатының екі дүркін қола жүлдегері атанған ол қарсыластарының арасынан топ жарып, шеберлігін тағы бір мәрте дәлелдеді.«Ашық суда жүзуден өткен әрбір жарыстың өзіндік ерекшелігі бар. Ал бұл додада кіл мықтылар бас қосқан. Сондықтан осы жолғы жеңістің орны ерекше. Жарыс жоғары деңгейде ұйымдастырылды. Барлық жанкүйерлерге қолдау көрсеткені үшін алғыс айтамын. «OCEANMAN QAZAQSTAN» фестивалінің жеңімпазы атанғаныма өте қуаныштымын», – деді Лев Черепанов.Әйелдер арасындағы OCEANMAN санатында қазақстандық Ирина Небесная абсолютті чемпион атанды. Ал HALF OCEANMAN қашықтығында мәреге бірінші болып қазақстандық Тимофей Лебедев пен Анна Резванцева жетті.Жарыстың екінші күні 16 жастан асқан 800-ден астам қатысушы SPRINT (2 шақырым) қашықтығы бойынша жарысты. Одан бөлек жүздеген жас спортшы үшін OCEANKIDS және INSPIRATION балалар жарысы ұйымдастырылды. Аталған санаттардың қорытындысы бойынша жүлделі орындар түгелдей қазақстандық спортшыларға бұйырды.Балалар бәсекесінде бақ сынағандардың бірі Астанадан келген – Фархад Жұманах.«Жарыс алдында қатты қобалжыдым. Бірақ ата-анам мен көрерменнің қолдауын естігенде өзімді әлдеқайда сенімді сезіндім. Осындай ауқымды шараға қатысқаным мен үшін үлкен жетістік. Болашақта жаттығуды күшейтіп, келесі жылы тағы да ерекше әсер мен жаңа жеңістерге қол жеткізгім келеді», – деді ол.Биылғы фестивальдің басты артықшылығы – екі бірдей ірі әлеуметтік жобаның жүзеге асырылуы. «Анашым, мен жүземін» бастамасының арқасында 130 ерекше бала халықаралық фестивальдің қатысушысы атанды. Олардың қауіпсіздігі арнайы жаттықтырушылар мен еріктілердің бақылауында болды. Ал екінші әлеуметтік бағдарлама ауылдық елді мекендерден және әлеуметтік осал топтардан шыққан балаларға қолдау көрсетуге бағытталған. Бұл жоба арқылы 90 бала алғаш рет халықаралық деңгейдегі жарысқа қатысу мүмкіндігіне ие болды.Фестивальдің ерекше атмосферасын ағылшын тіліндегі аты аңызға айналған жүргізуші Гордон Грэм толықтырды. Ол – әлемдегі Ironman сериясының ресми дауысы, халықаралық триатлон және ашық суда жүзу жарыстарының тұрақты жүргізушісі. Оның сайысты тізгіндеуі спортшыларға жігер мен сенім сыйлады.Жарыста үздік шыққан жеңімпаздар мен жүлдегерлер «Oceanman Worldwide Championship» финалдық кезеңіне жолдама алды. Алдағы уақытта олардың кәсібилігі мен шыдамдылығын тағы бір мәрте сынға түсетін болады.Ақпарат көзі : https://www.gov.kz/memleket/entities/almobl/press/news/details/1253748?lang=ru

Алматы облысында қазақ халқының ұлттық мұрасы – домбыраның қадір-қасиеті, күй өнері мен халық музыкасы кеңінен дәріптелді. Қонаев қаласында Ұлттық домбыра күніне орай қазақ халқының мәдениетіне деген құрметті арттырып, рухани құндылықтарды кейінгі буынға насихаттауға бағытталған тағылымды шара өтті. Оған зиялы қауым өкілдері, ардагерлер, жастар, мәдениет және өнер қайраткерлері қатысты, – деп хабарлайды Алматы облысы әкімінің баспасөз қызметі.Облыс орталығындағы Бердібек Соқпақбаев атындағы саябақта ұйымдастырылған шараға аймақ басшысы Марат Сұлтанғазиев те қатысып, елдің еңсесін көтеріп, рухын оятатын мерекемен құттықтады. 2018 жылы Қазақстан Республикасы Президентінің Жарлығымен шілде айының бірінші жексенбісі – Ұлттық домбыра күні болып белгіленгенін айтып, содан бері жыл сайын аталып келе жатқан бұл мереке ұлт руханияты төрінен лайықты орын алғанын жеткізді.«Президентіміз Қасым-Жомарт Кемелұлы Тоқаев Домбыра күніне орай: «Бұл – еліміз үшін ерекше мейрам. Оны ел болып атап өту арқылы халқымыздың рухын көтеріп, танымын арттырамыз. Сондай-ақ ұлы дала дәстүрін жас ұрпақтың санасына сіңіріп, төл өнеріміздің құдіретін танытамыз», – деген болатын.Домбыра – қазақтың жаны, тарихы мен бүкіл болмыс-бітімі. Қос ішекті қара домбыраның үнінде Алтай мен Атыраудың, Алатау мен Арқаның арасын ен жайлаған халқымыздың сан ғасырлық шежіресі, ішкі жандүниесі жатыр.Өздеріңізге белгілі 1 шілдеден бастап жаңа Конституциямыз өз күшіне енді. Жаңарған Конституцияда Қазақстан Республикасының азаматтары тарихи және мәдени мұраның сақталуына қамқор болуға, тарих пен мәдениет ескерткіштеріне ұқыпты қарауға міндетті деп атап көрсетілген. Ата Заңның қорғауында болған ұлт құндылығының ғұмыры мәңгі болмақ», – деді аймақ басшысы. Сондай-ақ өткен жылы ЮНЕСКО көлемінде аталып өткен даңқты жерлесіміз, Нұрғиса Тілендиевтің 100 жылдық мерейтойы да домбыраның мәртебесін асқақтата түскеніне тоқталды. Ұлы композитор салған осы сара жол бүгінде өңірімізде лайықты жалғасын тауып келеді.Облыс әкімінің айтуынша, өңірде күй өнерін дамыту мақсатында үйірмелер өз жұмысын жоспарлы түрде атқаруда. Биылдың өзінде өнерпаздарымыз Қытай, Марокко, Франция, Түркі елдерінде өткен шараларда ұлттық әуендерімізді домбыра аспабымен асқақтатып, көрерменді тамсандырып қайтты. Бұл халықаралық тәжірибе жас таланттардың шығармашылық өсуіне жол ашып, аймақтағы дәстүрлі өнер мектебінің іргетасын бекіте түсті.Мерекелік кеште көрерменнің құлақ құрышын қандырып, өнерсүйер қауымды сүйсінткен композитор, күйші, Қазақстанның еңбек сіңірген әртісі Секен Тұрысбек Қонаев қаласын думанға бөлеген шара көңілінен шыққанын айтты. Айтулы мерекенің мән-мазмұны жайлы да сөз қозғады. «Домбыра күні арнайы мереке болып бекітілгеннен бері домбырашы жастардың көбейіп келе жатқанын көріп жүрміз. Бұған қарап біз де марқайып, шабыттанып қаламыз. «Кіндікте бұлақ бұлқынса, көгілдір көлің қатпайды» демекші, сол жас буынға қарап, ертеңгі күнге деген сенім ұялайды. Дегенмен домбыраның қасиеті туралы тек мерекеде ғана еске алуға болмайды. «Нағыз қазақ – қазақ емес, нағыз қазақ – домбыра» деп Қадыр Мырза Әлі жырлағандай, әр күні ұлттық аспапты қастерлеп, төрде ұстау керек. Сонда келер ұрпақ өзі-ақ домбыраның күмбіріне көңіл түріп, ұлықтап өтетін болады», – дейді әйгілі күйші.Кеште сондай-ақ Қазақстанның Еңбек сіңірген қайраткері Гүлмира Сарина, «Алатау серілері» тобы, «Ақ жауын» камералық оркестрі және Сүйінбай атындағы Алматы облыстық филармониясының өнерпаздары көрерменге ерекше рухани әсер сыйлады. Олар ұлттық өнердің өн бойыңды шымырлататын шығармаларын орындап, тыңдарманның талғам-талабын тереңдете түсті.Ақпарат көзі : https://www.gov.kz/memleket/entities/almobl/press/news/details/1253710?lang=ru

Алматы облысында бірнеше күн қатарынан жауған нөсер жауын салдарынан өңірдің бірқатар ауданында өзендер арнасынан асты. Табиғи апат салдарын жою үшін тіпті аудандық деңгейдегі төтенше жағдай жарияланған. Су деңгейі ең көп көтерілген өзендер қатарында Түрген, Ақсай, Ұзынқарғалы және Талғар өзендері бар. Осыған орай облыс әкімі Марат Сұлтанғазиев сел жүрген аумақтарды аралап, апат салдарын жою жұмыстарын тексерді, – деп хабарлайды Алматы облысы әкімінің баспасөз қызметі.Аймақ басшысы алдымен Қарасай ауданындағы жағдаймен танысты. Мұнда Ақсай өзеніндегі су деңгейі күрт көтеріліп, «Toimart» сауда үйінің іргелес аумағы мен жертөлесін су басқан. Адам шығыны мен зардап шеккендер болған жоқ.Төтенше жағдайдың салдарын жою жұмыстарына барлығы 127 адам мен 7 арнайы техника тартылды. Оған Төтенше жағдайлар департаменті мен әскери бөлім қызметкерлері және жергілікті атқарушы органдардың мамандары қатысты. Жедел жүргізілген жұмыстардың нәтижесінде дүкеннің жертөлесіндегі су толық шығарылып, өзен арнасы лай мен қоқыстан тазартылды. Соның нәтижесінде су ағыны қалыпқа келтіріліп, кедергісіз ағуда.Бұдан бөлек Қарасай ауданының Жаңатұрмыс ауылындағы «Ақсай карьері» ЖШС аумағында өзен жағалауын су шайып, карьердің солтүстік-батыс бөлігіндегі топырақ сырғыды. Қазіргі таңда су тасқыны қаупін төмендету мақсатында ауқымды инженерлік жұмыстар жүргізілуде. Атап айтқанда, өзен арнасының 280 метрі 4 метрге тереңдетіліп, ал ені 5 метрге дейін кеңейтілген. Жалпы көлемі 5600 текше метр топырақ шығарылып, арнайы техниканың қауіпсіз жұмыс істеуі үшін ұзындығы 320 метр технологиялық жол салынған. Авариялық-құтқару және қалпына келтіру жұмыстарына 90 адам мен 29 арнайы техника жұмылдырылды.Өңірдегі Түрген өзенінің аумағында да дәл осындай жағдай тіркелген. Еңбекшіқазақ ауданындағы «Түрген – Асы» автомобиль жолының 24 және 26-шақырымдарында тас көшкіні жүріп, өзеннің арнасынан шығуына байланысты жол жабылды. Өзен бойында орналасқан, демалыс аймақтарына тиесілі 17 киіз үйді су басты. Сонымен қатар өзен үстінен салынған уақытша көпірлердің бір бөлігі зақымданды. Осыған байланысты 1 шілдеден бастап Алматы облысы Төтенше жағдайлар департаменті, облыстық және аудандық әкімдіктер бірлесіп жедел штаб құрып, күшейтілген режимде жұмыс жүргізді. Күн сайын 20-дан астам арнайы техника мен 60-тан астам қызметкер жұмыс істеп, өзен суы қайта өз арнасына бағытталды. Төрт күн ішінде туристер мен Асы жайлауындағы малшыларды қоса алғанда 100-ден астам адам қауіпсіз жерге көшірілді. Таулы аумақтарға адамдардың баруына уақытша шектеу қойылып, полиция бекеттері мен кезекшілік ұйымдастырылды. Қабылданған шаралардың нәтижесінде елді мекендерді су басуына жол берілген жоқ.Қазіргі уақытта «Түрген – Асы» автомобиль жолының бүлінген учаскелерінде қалпына келтіру жұмыстары жүргізілуде. Жол ағаш, бұталардан және тастардан тазартылып, жол төсемін қалпына келтіруге дайындық жұмыстары атқарылуда.Облыс әкімі жауапты мекемелерге төтенше жағдай салдарын жою жұмыстарын сапалы әрі қысқа мерзімде аяқтауды тапсырды.«Су өткізу жүйелерін тұрақты бақылауда ұстап, өзен арналарының өткізу қабілетін арттыру жұмыстарын жалғастыру қажет. Қауіп толық сейілгенге дейін барлық қызметтер күшейтілген режимде жұмыс істеуі тиіс. Техникалық мүмкіндіктерді барынша пайдаланып, су деңгейін төмендетудің барлық тиімді жолдарын қарастыру қажет. Ең бастысы – мұндай жағдайлардың қайталануына жол бермеу үшін алдын алу шараларын жүйелі түрде жүзеге асыру маңызды», – деді Марат Сұлтанғазиев.«Қазгидромет» РМК мәліметіне сәйкес, облыстың таулы аумақтарында жауын-шашынның жалғасуына байланысты қауіп толық сейілген жоқ. Осыған байланысты өңірдегі жағдай толық бақылауда болады. Төтенше жағдай салдарын жою, өзен арналарының қауіпсіздігін қамтамасыз ету және бүлінген инфрақұрылымды қалпына келтіру жұмыстары жалғасуда. Қауіп толығымен жойылғанша қызметкерлер күшейтілген режимде жұмыс істейтін болады.Аймақ басшысы сондай-ақ Талғар ауданы Белбұлақ ауылындағы өрт шыққан көппәтерлі тұрғын үйге барып, тұрғындарымен кездесті.Оқиға 27 маусым күні Жібек жолы көшесі 18-үй мекенжайында болған. Өрт 8 пәтерлі тұрғын үйдің шатырында тұтанған. Осыған орай үш жауынгерлік учаске құрылып, тілсіз жау ауыздықталды. Ол үшін Төтенше жағдайлар департаментінің 19 қызметкері мен 3 бірлік техникасы жұмылдырылды. Өрттің жалпы аумағы 500 шаршы метрді құрады. Оқиға салдарынан қаза тапқандар мен зардап шеккендер жоқ.Марат Елеусізұлы қазіргі басты міндет мәселені заң аясында әрі жедел шешу екенін айтты.«Нысанға мемлекеттік сараптама жүргізіліп жатыр. Оқиғаның нақты себептері мен мән-жайы толық анықталғаннан кейін тиісті шешімдер қабылданады: пәтерлер қайтадан қалпына келтіріледі не тұрғындар басқа үйлерге көшіріледі», – деген Марат Елеусізұлы барлық жауапты мемлекеттік органдарға түйткілді тездетіп шешуді тапсырды.Қазіргі таңда тұрғындармен тұрақты байланыс орнатылып, қажетті материалдық көмек уақытылы көрсетілуде. Төтенше жағдайға байланысты барлық тиісті іс-шаралар ұйымдастырылып, оқиға салдарын жою және қалпына келтіру жұмыстары жалғасуда.Ақпарат көзі : https://www.gov.kz/memleket/entities/almobl/press/news/details/1253659?lang=ru

Астана, 2026 жылғы 3 шілде – Қазақстан Республикасы Сыртқы істер министрінің орынбасары Әлібек Қуантыров Оңтүстік Африка Республикасының Қазақстандағы жаңадан тағайындалған Елшісі Лунгисани Нтомбеламен кездесті.Кездесу аясында Л.Нтомбела сенім грамоталарының көшірмелерін табыс етті. Өз кезегінде Ә.Қуантыров Елшіні жаңа қызметімен құттықтап, оның дипломатиялық миссиясы Қазақстан мен Оңтүстік Африка Республикасы арасындағы дәстүрлі достық қатынастар мен өзара тиімді ынтымақтастықты одан әрі дамытуға септігін тигізетініне сенім білдірді.Тараптар саяси диалогты одан әрі дамыту, сауда-экономикалық серіктестікті және мәдени-гуманитарлық ынтымақтастықты кеңейту мәселелерін талқылады.Сұхбат аяғында тараптар екіжақты және көпжақты форматта белсенді өзара іс-қимылды қолдауға келісті.Ақпарат көзі : https://www.gov.kz/memleket/entities/mfa/press/news/details/1253559?lang=ru

Бүгін Қостанай облысының әкімі Тобыл қаласында ашылған жаңа өрт сөндіру бекетінің ашылуы мен 12 арнайы өрт сөндіру көліктерінің кілтін табыстау салтанатты рәсіміне қатысты. Бұл шараға ҚР Төтенше жағдайлар министрі Шыңғыс Әрінов арнайы келді.«Мемлекет басшысы халықтың қауіпсіздігін қамтамасыз ету мақсатында өртке қарсы қызметті жаңғыртуға және оны заманауи материалдық-техникалық құралдармен қамтамасыз етуге ерекше көңіл бөліп келеді. Облысымызда осы бағытта ауқымды жұмыстар атқарылуда. Соңғы үш жылда аймақтағы төтенше жағдайлар жүйесін дамытуға 3 млрд теңгеден астам қаражат бөлінді. 20 өрт сөндіру автокөлігі, 1 командалық-штабтық автокөлік, жол талғамайтын 26 арнайы техника сатып алынды. Облыстық төтенше жағдайлар департаментінің ғимараты, қалалық және аудандық өрт сөндіру бөлімдері мен құтқару станциясына жөндеу жұмыстары жүргізілді. Биыл бұл салаға 1,4 млрд теңге қарастырылған, көрсеткіш 2022 жылмен салыстырғанда 4,2 есе жоғары», – деді облыс басшысы.Соңғы үш жылда орман шаруашылығы мекемелерінің материалдық-техникалық базасын нығайтуға 8 млрд теңге бағытталды. 51 өрт сөндіру автокөлігі сатып алынды. 86 трактор, 36 шағын орман өртін сөндіру кешені және 78 патрульдік техника алынды. Екі апта бұрын ғана 25 көлік тапсырылған болатын.Бүгінде орман шаруашылығы мекемелерінің техникамен қамтамасыз етілу деңгейі 90%-ке жетті. Ал өрт сөндіру автокөліктерімен қамтамасыз етілу көрсеткіші 100%-ті құрайды. Ақпарат көзі : https://www.gov.kz/memleket/entities/kostanay/press/news/details/1253352?lang=ru

Астана, 2026 жылғы 2 шілде – Қазақстан мен Норвегия арасында сімаралық саяси консультациялардың бесінші отырысы өтті.Қазақстан Республикасы Сырты істер министрінің орынбасары Арман Исетов Норвегия делегациясын қабылдап, саяси, экономикалық, мәдени-гуманитарлық салалардағы қазақ-норвег ынтымақтастығын ілгерілетудің маңызын атап өтіп, Астана мен Осло арасындағы өзара тиімді диалогты нығайтуға бейілділігін растады.Консультациялар барысында тараптар екіжақты және көпжақты ықпалдастықты нығайтудың жолдарын саралап, халықаралық күн тәртібіндегі мәселелер бойынша пікір алмасты.Сауда-экономикалық ынтымақтастықты жандандыру, парламентаралық диалогты нығайту және халықаралық ұйымдар аясындағы өзара іс-әрекетке ерекше назар аударылды.Норвегияның Сыртқы істер министрінің Мемлекеттік хатшысы Эйвинд Петерссон екіжақты байланыстардың даму қарқынын жоғары бағалап, Қазақстан Норвегияның Орталық Азиядағы маңызды әріптесі екеніне сендірді. Оның пікірінше, Норвегия және Қазақстан көпжақты ынтымақтастық күн тәртібіндегі бірқатар мәселелер бойынша ұқсас көзқарасты ұстанады.Кездесу қорытындысы бойынша тараптар сыртқы саяси мекемелер арасындағы тығыз диалогты жалғастыруға келісті.2023 жылы екіжақты тауар айналымы 169,2 млн. АҚШ долларына жетті (экспорт – 7,8 млн., импорт – 161,4 млн.).2005 бастап Норвегиядан тікелей шетелдік инвестициялардың көлемі 1,6 млрд. долларын құрады.Ақпарат көзі : https://www.gov.kz/memleket/entities/mfa/press/news/details/1252937?lang=ru

Қостанай облысы агроөнеркәсіптік кешеннің өңделген өнімдерін экспорттау бойынша еліміздегі жетекші өңірлердің бірі болып қала береді. 2025 жылдың қорытындысы бойынша Қазақстанда өңделген ауыл шаруашылығы өнімдерінің экспорты 8,5 млн тоннаны құрады. Оның ішінде Қостанай облысының үлесі – 2,7 млн тонна немесе республикалық көрсеткіштің 27,2%-ы.Өңдеу өнеркәсібін дамыту өңір экономикасының басым бағыттарының бірі саналады. Инвестициялық жобаларды іске асыру өндіріс көлемін ұлғайтуға, жаңа жұмыс орындарын ашуға, экспорттық әлеуетті арттыруға және қосылған құны жоғары өнім шығаруға мүмкіндік береді.Осы бағыттағы маңызды жобалардың бірі – Қостанай қаласында орналасқан KAIZEN жауапкершілігі шектеулі серіктестігінің қызметі. Кәсіпорын бұршақ тұқымдас ауыл шаруашылығы дақылдарын өңдеуге маманданған және экспортқа бағдарланған өндіріс болып табылады. Зауыт 2023 жылы Түркияның халықаралық Arbel холдингінің инвестициясы есебінен пайдалануға берілді. Жобаға 4 млрд теңге көлемінде инвестиция тартылып, 70 тұрақты жұмыс орны құрылды.Кәсіпорында бұршақ, ноқат, жасыл және қызыл жасымық өңделеді. Заманауи технологиялық жабдықтармен жарақтандырылған өндіріс бүгінде еліміздің солтүстік өңіріндегі бұршақ тұқымдас дақылдарды өңдеу саласындағы ең озық кәсіпорындардың бірі саналады.Кәсіпорынның жоғары өнімді өндірістік базасы технологиялық үдерістерді автоматтандырудың жоғары деңгейін қамтамасыз етіп, шығарылатын өнімнің тұрақты сапасы мен халықаралық талаптарға сәйкестігін қамтамасыз етеді. Өндіріс қосылған құны жоғары, бәсекеге қабілетті және экспорттық әлеуеті зор өнім шығаруға бағытталған.Осындай инвестициялық жобаларды жүзеге асыру Қостанай облысының өңдеу өнеркәсібін одан әрі дамытуға, өңірдің инвестициялық тартымдылығын арттыруға және агроөнеркәсіптік кешендегі өңделген өнім үлесін ұлғайту жөніндегі стратегиялық міндеттерді іске асыруға ықпал етеді. Ақпарат көзі : https://www.gov.kz/memleket/entities/kostanay/press/news/details/1252726?lang=ru

Қостанай облысының әкімі Құмар Ақсақалов қоғам қайраткерлері, еңбек ардагерлері және белсенді жастармен бірге аймақ орталығында салынып жатқан Marriott қонақүй кешенінің құрылысымен, «Астана» шағын ауданындағы атқарылып жатқан жұмыстармен танысып, экопарк құрылысының басталу рәсіміне қатысты.Мемлекет басшысы инвестиция тартуға қолайлы ахуал қалыптастырудың, шағын және орта бизнесті, заманауи туристік және сервистік инфрақұрылымды дамытудың маңыздылығын атап өткен болатын.«Жаңа инвесторлардың келуі мен іскерлік белсенділіктің артуына байланысты заманауи қонақүй инфрақұрылымына деген сұраныс та өсіп келеді. Осы жайттар ескеріліп, Қостанайда әлемге танымал Marriott, Novotel және Holiday Inn қонақүй кешендері салынады», – деді аймақ басшысы.Marriott қонақүй кешенінің құрылысы толықтай жеке инвестиция есебінен жүзеге асырылуда. Қонақүй нөмірлерінен бөлек, мейрамханалар, конференц-зал, келіссөздер бөлмелері, фитнес-зал, бассейн және басқа да қызмет көрсету нысандары кіреді. Жаңадан 140 жұмыс орны ашылады.Айта кетейік, Marriott Қазақстан бойынша Астана, Атыраудан кейін Қостанайда салынып жатқан қонақүй кешені.Ал «Астана» шағын ауданында 200 га аумақта 154 көпқабатты тұрғын үй салу жоспарланған. Бүгінде 10 тұрғын үй пайдалануға берілді. 23 үйдің құрылысы жүріп жатыр. Оның ішінде 13 үйді биыл пайдалануға беру жоспарланған.Ел Президентінің ірі қалалар мен облыс орталықтары маңында экосаябақтар құру жөніндегі тапсырмасына сәйкес, өңірде екі жаңа саябақ аймағы ашылады.Қостанай қаласы маңындағы орман қоры аумағында 43,8 га болатын экосаябақтың құрылысы басталды. Мұнда автотұрақтар, жүгіру және велосипед жолақтары, спорттық және балалар ойын алаңдары алаңдар, орындықтар, көлік тұрағы салынады. «Астана» шағын ауданына апаратын жерасты өткелі қарастырылған.Ақпарат көзі : https://www.gov.kz/memleket/entities/kostanay/press/news/details/1252632?lang=ru