Қытайдың Халық Банкі Төрағасының орынбасары Лу Лэй мырзамен кездесу барысында халықаралық қаржы нарықтарындағы ағымдағы ахуал, екіжақты қаржылық ынтымақтастықты дамыту туралы пікір алмасты және Қытай нарығында панда-бондтарды шығару бойынша өзара іс-қимыл туралы уағдаласты.Қытай Эксимбанкінің вице-президенті Ван Кан мырзамен Қазақстандағы инвестициялық жобаларды қаржыландыру мен іске асыруды, оның ішінде Қ.И. Сәтбаев атындағы каналдан Астана қаласына дейін № 4 сорғы-сүзгі станциясымен су құбырын, Алматы қаласындағы метроның жаңа желілерін салуды, сондай-ақ өткізу пункттерінің кедендік инфрақұрылымын жаңғыртуды талқылады.Бұдан басқа, экономикалық ынтымақтастықты дамыту, Әріптестік туралы негіздемелік келісімге қол қою және бюджеттік қолдау бойынша жаңа бағдарламаны дайындау мәселелері АИИББас инвестициялық директоры Константин Лимитовскиймен кездесуде қаралды.Кездесулер қорытындысы бойынша Тараптар бірлескен жобаларды іске асыруға, әріптестікті одан әрі дамытуға және өзара тиімді мақсаттарға қол жеткізуге сенім білдірді. Ақпарат көзі : https://www.gov.kz/memleket/entities/minfin/press/news/details/959674

Ақтөбе облысындағы Ойыл өзенінің бойындағы ауылдар арасына уақытша өткел салу үшін Қонаев гарнизонындағы Қарулы күштердің инженерлік-саперлік бригадасының әскери қызметшілері батыс өңірге темір жол көлігімен аттанды.Понтондық көпір паркінің элементтері теміржол платформасына тиелді, оның ішінде екі үлкен тонналық автомобиль-понтондық көпір сегменттері бар көлік (КрАЗ-255Б), суда жүзетін транспортер және КамАЗ және КрАЗ базасында екі сүйреткіш-моторлы қайық бар. Техниканы майор Наурыз Төлеуовтың басшылығымен 58012 әскери бөлімінің 11 әскери қызметшісінен құралған топ алып жүреді. Мамандар байланыс құралдарымен және қосымша заттармен жабдықталған.Әскери инженерлер бұл жерге келгеннен кейін тұрғындарды, техниканы, материалдық құралдарды және жануарларды тасымалдау үшін өткел жасайды. Айта кетейік, өткен жылы әскери инженерлер 4 паром өткелін жабдықтаған (Ақтөбе, Ақмола және Солтүстік Қазақстан облыстарында). Оның көмегімен 362 рейс жасалды, 3 мыңға жуық адам эвакуацияланды, 1 380 астам техника мен 423 тонна гуманитарлық көмек жөнелтілді.Ақпарат көзі : https://www.gov.kz/memleket/entities/mod/press/news/details/958971

Каспий теңізінің акваториясында генерал-майор Серік Борамбаевтың басшылығымен Қазақстан Әскери-теңіз күштерінің оқу-жаттығуы өтті. Оның белсенді кезеңін Қорғаныс министрінің бірінші орынбасары - ҚР Қарулы күштері Бас штабының бастығы генерал-лейтенант Сұлтан Қамалетдинов қадағалады.Оқу-жаттығу командирлер мен тактикалық буын бөлімшелерінің жауынгерлік дайындығы мен кәсібилігін арттыруға, олардың ассиметриялық қауіп-қатерлер жағдайында жауынгерлік іс-қимылдар жүргізу дайындығын тексеруге бағытталған.Үш кезеңдік командалық-штабтық оқу-жаттығу жұмылдыру ресурстарын қабылдау пунктерін орналастыруды, ұсынылған жолдарды практикалық тралдау, Ақтау теңіз порты кемелерінің кіруі мен шығуын, орналасу пунктерін және теңіз экономикалық қызметінің басқа да стратегиялық маңызды объектілерін күзету мен қорғауды қамтыды. Сонымен қатар, "күдікті" кемеге тексеру жүргізіліп, "апатты" кемеге көмек көрсетілді.Оқу-жаттығу аясында теңіз миналары, жер үсті және әуе нысандары бойынша практикалық атыстар өтті. "Камикадзе-катерлерінің", ұшқышсыз ұшу аппараттарының және әуе шабуылы құралдарының түрлі шабуылдарына тойтарыс берілді.Командалық-штабтық оқу-жаттығу ведомствоаралық өзара іс-қимыл тетіктерін жетілдіруге ықпал етті.Ақпарат көзі : https://www.gov.kz/memleket/entities/mod/press/news/details/959011

Армия орталық спорт клубының бастығы полковник Арман Әбеуов бастаған Қазақстан Қорғаныс министрлігінің делегациясы Тәуелсіз Мемлекеттер Достастығы Қорғаныс министрлері кеңесі жанындағы Спорт комитетінің кезекті отырысына қатысты.Беларусь, Қазақстан, Қырғызстан, Ресей, Өзбекстан қорғаныс ведомстволарының дене шынықтыру және спорт саласындағы әскери басқару органдарының басшылары, сонымен қоса ТМД Атқарушы комитетінің өкілдері 2030 жылға дейінгі әскери ынтымақтастықты дамытудың негізгі бағыттарын, одан бөлек әскери-спорттық ойындар мен түрлі деңгейдегі жарыстарға дайындықты талқылады.– Біз достас армиялардың әріптестері ынтымақтастықтың мүмкіндіктері бағалаймыз және бірлесе әскери қызметшілерді даярлау мен дене шынықтыруды дамытуда жаңа биіктерге жете алатынымызға сенімдіміз, – деп атап өтті полковник Арман Әбеуов.Отырыс қорытындысы бойынша Қазақстанда 2026 жылы екі маңызды іс-шара өткізу туралы шешім қабылданды. Сәуірде бізде ТМД Қорғаныс министрлері кеңесі жанындағы Спорт комитетінің отырысы өтеді. Бұдан басқа ТМД-ға мүше елдер достық армияларының XVII Спартакиадасы аясында қазақ күресі мен самбодан чемпионат жоспарланған. Сол сияқты жарыстың аталған түрі ТМД-ға мүше елдердің достық армиялары арасында тұрақты түрде өтетін Спартакиаданың бағдарламасына енгізілген.Ақпарат көзі : https://www.gov.kz/memleket/entities/mod/press/news/details/959451

Әскери қызметшілердің бешпент, шапан, қамзол секілді ұлттық киімдерді киюге әрдайым мүмкіндігі бола бермейді. Әйтсе де бүгін әскери қызметшілер дәстүрге құрмет көрсетіп, қызметке ұлттық киіммен келді.Қарулы күштердің алтыншы механикаландырылған бригадасында әскери қызметшілердің отбасы мүшелерімен жұмыс жөніндегі қызмет Жамал Оразбектің басшылығымен мерекелік іс-шара ұйымдастырды.Бақылау-өткізу пунктінде жауынгерлерді кезекшімен бірге ұлттық киім киген әйелдер қарсы алды. Бригада жеке құрамы сап түзеп, ақ жаулықты әжелер мен әскери қызметшілердің әйелдері «шашу» шашып, мерзімді қызмет сарбаздары тәттіден ауыз тиді.Бригаданың әскери оркестрі саптық шерумен жүріп өтіп, көпшілікке танымал «Қош келдің, Наурыз!», «Көктем шақырады» және «Наурыз-думан» композицияларын орындады.Әскери қызметшілерге ұлттық киімнің тарихы мен ерекшеліктері туралы айтылды.– Бұл мереке бізді ғасырлар қойнауына жетелеп, өзінің сұлулығымен және ыңғайлылығымен ерекшеленетін ұлттық киімнің тарихымен таныстырады. Бүгінгі іс-шара арқылы біз ұрпақтан-ұрпаққа жалғасып келе жатқан ата-бабаларымыз бен салт-дәстүрімізге құрмет көрсетеміз, – деп атап өтті бригада командирі подполковник Сергей Биболатов.Мерекелік іс-шаралар барлық гарнизондарда өтіп, ұлттық киім көрсетілімдері, челлендждер мен театрландырылған қойылымдар ұйымдастырылды. Іс-шараларға қатысушылар қазақ халқының бай мәдениетімен және өзіндік ерекшелігімен танысты.Ақпарат көзі : https://www.gov.kz/memleket/entities/mod/press/news/details/959593

Токио, 2025 жылғы 18 наурыз – Жапонияға ресми сапары барысында Қазақстан Республикасы Премьер-министрінің орынбасары – Сыртқы істер министрі Мұрат Нұртілеу жапон іскер топтарының өкілдерімен кездесулер өткізді.Министр Қазақстанда жапон компанияларының өнеркәсіп, цифрландыру, декарбонизация, көлік және логистика саласындағы жобаларын іске асыру барысымен танысты. Қазақстан экономикасына 8 млрд АҚШ долларынан астам инвестиция салған Жапония еліміздегі ең ірі инвесторлардың ондығына кіреді.Ол сондай-ақ жапон компанияларын Қазақстандағы экономиканың жаңа секторларына инвестиция салуға шақыра отырып, қолайлы инвестициялық ахуал жасауға бағытталған еліміздегі реформалар туралы егжей-тегжейлі айтып берді.«Marubeni» вице-президенті Акира Теракавамен кездесуде компанияның Қазақстандағы қызметі талқыланды, сондай-ақ компанияның ҚР Президенті жанындағы Шетелдік инвестициялар жөніндегі кеңестің мүшесі және Қазақстан-Жапония экономикалық ынтымақтастық комитетінің тең төрағасы ретіндегі рөлін ескере отырып, экономиканың инвестициялық тартымдылығын жетілдіру жөнінде пікір алмасу өтті.«Toyota Tsusho» компаниясының басқарма төрағасы Нобухико Муракамимен талқылау цифрлық инфрақұрылымды дамыту және энергия үнемдеу саласындағы бірлескен жобаларды іске асыру арқылы жапон капиталы мен инновациялық технологияларды тартуға бағытталды. Атап айтқанда, электр желілерін тұрақтандыру саласындағы жобаларды жүзеге асыру, сондай-ақ цифрлық инфрақұрылымды енгізу үшін әлеуетті тауашалар сияқты перспективалық бағыттар қаралды.«Komaihaltec Inc.» атқарушы директоры Эми Комаи «JCM» (Joint Crediting Mechanism) бірлескен кредиттік тетігі шеңберінде Қазақстанда жасыл энергетика саласындағы компания әзірлеп жатқан жобалар туралы хабардар етті. Компания өкілдері жақын арада жел генераторлары негізінде автономды электрмен жабдықтау жүйесін пысықтау және құру үшін Түркістан облысына барады.«Nissin» компаниясының президенті Масахиро Цуцуимен Транскаспий халықаралық көлік бағыты (ТХКМ, Орта дәліз) арқылы Жапониядан Еуропаға жүктерді тасымалдау мәселелері егжей-тегжейлі қаралды. М.Цуцуи Орта дәліз шеңберінде көлік-логистикалық қызметті жүзеге асыруға жоғары қызығушылық білдіріп, осы бағыт арқылы жүктерді тасымалдау кезеңін қысқартуды қамтамасыз ету үшін мүмкін болатын шешімдер туралы пікірімен бөлісті.Іскер топтармен кездесулер барысында Қазақстанда инвестициялық қызметті жүзеге асыруда жапон бизнесіне қажетті көмек көрсетуге дайындық расталды.Ақпарат көзі : https://www.gov.kz/memleket/entities/mfa/press/news/details/959435

Бухарест, 2025 жылғы 17 наурыз – Қазақстан мен Румыния арасындағы стратегиялық серіктестікті орнату перспективалары бүгін Бухарестте өткен саяси консультациялардың 8-ші раундының күн тәртібінің негізгі тақырыбына айналды. Қазақ тарапын Сыртқы істер министрінің орынбасары Роман Василенко, румын тарапын Сыртқы істер министрлігінің Стратегиялық мәселелер жөніндегі мемлекеттік хатшысы Ана Тинка басқарды.Дипломаттар саяси диалогты тереңдету, сауда-экономикалық байланыстарды нығайту және инвестициялық ынтымақтастықты дамыту мәселелерінің кең ауқымын талқылады, сондай-ақ жаһандық және өңірлік күн тәртібіндегі өзекті мәселелер бойынша пікір алмасты.Қазақ дипломаты Румыния еліміздің Оңтүстік Шығыс Еуропадағы және жалпы Еуропалық одақтағы маңызды серіктесі екенін атап өтті. «Бүгін біз Қазақстан-Румыния қатынастарының жан-жақты әлеуетін оларды стратегиялық серіктестік деңгейіне шығару перспективасымен ашу жөніндегі бірлескен қадамдарды талқыладық», – деп атап өтті Р.Василенко.Атап айтқанда, Қазақстан мен Румыния президенттерінің БҰҰ Бас Ассамблеясы (2023 ж. қыркүйек) алаңындағы келіссөздерінің қорытындысы бойынша, сондай-ақ Қазақстан Премьер-министрінің орынбасары – Сыртқы істер министрі Мұрат Нұртілеудің Бухарестке алғашқы ресми сапардың (2023 ж. желтоқсан) нәтижесінде қол жеткізілген уағдаластықтарды сапалы іске асыруға ерекше назар аударылды.Елдеріміз арасындағы сауда-экономикалық және инвестициялық ынтымақтастық келіссөздердің маңызды тақырыбына айналды, оған себеп Румынияның Қазақстанның тауар айналымының көлемі бойынша әлемде 10-шы орында ие болғаны. «Елдеріміздің ынтымақтастығы тек энергетикадағы әріптестікпен ғана шектелмеуі тиіс, Global Gateway бастамасы шеңберіндегі көлік-логистика саласында да айтарлықтай даму әлеуеті бар», – деді Р.Василенко.Өз кезегінде А.Тинка Румыния Қазақстанмен әріптестікті жоғары бағалайтынын және елімізді Орталық Азиядағы маңызды саяси және экономикалық одақтас ретінде қарастыратынын атап өтті. «Бухарест биік және жоғары деңгейдегі сапарлармен алмасуды, өңірлік қауіпсіздікті, сауда дәліздерін дамытуды, сондай-ақ энергетика, қорғаныс және ауыл шаруашылығы саласындағы өзара іс-қимылды кеңейтуді қоса алғанда, екіжақты және халықаралық күн тәртібінің негізгі мәселелері бойынша өзара іс-қимылды кеңейтуге мүдделі», – деп мәлімдеді румын дипломаты.Румыния Премьер-министрі кеңсесінің Экономикалық мәселелер жөніндегі мемлекеттік кеңесшісі Флорин Спатарумен кездесу барысында атом саласындағы жобаларды, сондай-ақ көлік-логистикалық және энергетикалық ынтымақтастықты тереңдету жөніндегі нақты қадамдарды іске асыруды жалғастыру уағдаластығына қол жеткізілді.Румыния Энергетика министрлігінің Мемлекеттік хатшысы Павел Ницулескумен өткен кездесуде Р.Василенко Қазақстан әлемдегі мұнай мен газды жетекші экспорттаушылардың бірі бола отырып, Бухарестті энергия тасымалдаушыларды жеткізу және «жасыл» экономика қағидаттарын іске асыруға бағытталған бірлескен инфрақұрылымдық жобаларды іске асыру үшін Еуропадағы стратегиялық серіктес ретінде қарастыратынын атап өтті. П.Ницулеску Румынияның энергетикалық қауіпсіздігін қамтамасыз етуде маңызды рөл атқаратын Қазақстанмен ұзақ мерзімді ынтымақтастыққа мүдделі екенін атап өтті.Румыния Қаржы министрлігінің Мемлекеттік хатшысы Радуем Калманмен келіссөздер барысында банк және қаржы секторындағы ынтымақтастық перспективалары мәселелері талқыланды, сондай-ақ «KazMunayGas International» компаниясының салық салу мәселелеріндегі мүдделерді қорғау жеке тақырыпқа айналды.Румыния Парламенті Сенатының Сыртқы саясат комитетінің төрағасы Титус Корлецянмен келіссөздер барысында тараптар халықаралық істер комитеттері мен достық топтары деңгейінде парламентаралық диалогты жандандыруға келісті. Екі елдің заң шығарушы органдары саяси диалогты ғана емес, сауда-экономикалық және гуманитарлық байланыстарды дамытуда маңызды рөл атқаратыны аталып өтті.Тұтастай алғанда, Бухаресттегі келіссөздер екіжақты өзара іс-қимылдың жоғары деңгейін растап, екі елдің тұрақты экономикалық өсуі мен халықаралық ұстанымдарын нығайту үшін жаңа тауашалар ашатын стратегиялық серіктестік орнату жолында бірлескен бастамалардың негізін қалады.Анықтама: Румыния – Орталық және Оңтүстік Шығыс Еуропа өңіріндегі Қазақстанның №1 сауда және инвестициялық серіктесі, Еуропада 5-ші және барлық сауда серіктестері арасында әлемде 10-шы орынға ие. Қазақстан мен Румыния арасындағы тауар айналымы 2024 жылы 2,92 млрд АҚШ долларын құрады (экспорт – 2,78 млрд долл., импорт – 138 млн долл.), бұл 2023 жылмен салыстырғанда 1,6%-ға артық (2,87 млрд долл.). Румыниядан ҚР экономикасына инвестициялардың жалпы ағыны – 1,57 млрд доллар (2005 жылдан бастап 2023 жылғы 3 тоқсанға дейін). Қазақстанда Румынияның қатысуымен 40-қа жуық компания, ал Румынияда қазақстандық капиталдың қатысуымен 35 заңды тұлға бар.Ақпарат көзі : https://www.gov.kz/memleket/entities/mfa/press/news/details/959193

Токио, 2025 жылғы 17 наурыз – Қазақстан Республикасы Премьер-министрінің орынбасары – Сыртқы істер министрі Мұрат Нұртілеу Жапонияға ресми сапармен барды.Сапар аясында Қазақстанның сыртқы саяси ведомствосының басшысы Жапония Премьер-министрі Шигеру Ишибамен кездесу өткізді. Тараптар сауда-экономикалық және мәдени-гуманитарлық салалардағы қазақ-жапон кеңейтілген стратегиялық серіктестігінің жағдайы мен даму перспективаларын, сондай-ақ халықаралық құрылымдар желісі бойынша бірлескен жұмысты талқылады.М.Нұртілеу Премьер-министрге Қазақстан Президенті Қасым-Жомарт Тоқаевтың ізгі тілектерін жеткізді. Ол Астананың екіжақты қарым-қатынастарды одан әрі нығайтуға берік бейілділігін растады.«Жапония – Қазақстанның Азия-Тынық мұхиты өңіріндегі негізгі серіктестерінің бірі. Біз Токиомен сауда-экономикалық және инвестициялық ынтымақтастықты арттыруға бел будық», – деп атап өтті Қазақстан СІМ басшысы.Өз кезегінде Ш.Ишиба Жапония Үкіметінің Қазақстанмен көпжоспарлы өзара іс-қимылды нығайтуға деген берік ниеті туралы сендірді.«Орталық Азия + Жапония» Диалогы шеңберінде кооперацияны дамытуға және алғашқы саммитті өткізу бойынша мәселелерге, сондай-ақ биік деңгейде тұрақты байланыстарды сақтау қажеттілігіне ерекше назар аударылды.Кездесу қорытындысы бойынша тараптар екіжақты ынтымақтастыққа жаңа серпін беруге өзара ұмтылыстарын білдірді.Ақпарат көзі : https://www.gov.kz/memleket/entities/mfa/press/news/details/958829

Токио, 2025 жылғы 17 наурыз – Жапонияға ресми сапары аясында Қазақстан Республикасы Премьер-министрінің орынбасары – Сыртқы істер министрі Мұрат Нұртілеу Жапонияның Сыртқы істер министрі Такеши Иваямен кездесу өткізді.Тараптар биік және жоғары деңгейдегі саяси диалогты жандандырудың, сондай-ақ сауда-экономикалық, инвестициялық және мәдени байланыстарды тереңдетудің негізгі мәселелерін талқылады.Министрлер қысқа тарихи кезеңде Қазақстан мен Жапония кеңейтілген стратегиялық серіктестік деңгейіне қол жеткізгенін атап өтті.«Осы ширек ғасыр ішінде біз сапалы саяси диалог пен өзара тиімді экономикалық ынтымақтастықты орнатып, сондай-ақ берік мәдени-гуманитарлық байланыстарды қалыптастыра алдық», – деп мәлімдеді М.Нұртілеу.Экономикалық өзара іс-қимылға ерекше назар аударылды. Жапония Қазақстандағы ең ірі шетелдік инвесторларының ондығына кіреді, 1993 жылдан бері инвестициялардың жалпы көлемі 8 млрд АҚШ долларын құрады. 2024 жылы екіжақты тауар айналымы шамамен 2 млрд АҚШ долларына жетті, ал Қазақстанда «Sumitomo», «Marubeni», «Toshiba», «Mitsui» және басқаларын қоса алғанда 60-қа жуық жапондық компания табысты жұмыс істеуде.Осыған байланысты қазақ тарапы жапондық компанияларды өнеркәсіп, энергетика, көлік және логистика салаларында бірлескен инвестициялық жобаларды іске асыруға шақырды.Кездесу барысында бейбіт атомды пайдалану саласындағы ынтымақтастық мәселелері жеке қарастырылды. Тараптар ядролық объектілердің қауіпсіздігін қамтамасыз ету және ядролық энергетикада білікті кадрлар даярлау саласында өзара іс-қимыл жасау уағдаластығына қол жеткізді.Сыртқы істер министрлері өңірлік және жаһандық күн тәртібіндегі өзекті мәселелер бойынша пікір алмасып, сыртқы саяси ведомстволар арасындағы белсенді өзара іс-қимылды жалғастыру ниеттерін растады.М.Нұртілеу ынтымақтастықтың негізгі мәселелерін талқылау үшін маңызды алаң ретінде «Орталық Азия + Жапония» диалогын одан әрі ілгерілетудің өзектілігін атап өтті.Сондай-ақ Қазақстан СІМ басшысы Орталық Азия мен Ауғанстан елдері үшін Орнықты даму мақсаттары бойынша БҰҰ Өңірлік орталығын құру туралы Қазақстан қарарын қолдағаны және тең авторы болғаны үшін жапон тарапына алғысын білдірді.Сонымен қатар сұхбаттастар мәдени-гуманитарлық өзара іс-қимылға серпін беруге деген өзара ниетін растады.Министр Жапония тарапына Осакада ЭКСПО-2025 көрмесін сәтті өткізуді тілеп, Қазақстан ауқымды іс-шараға жоғары деңгейде белсенді қатысуды жоспарлап отырғанын атап өтті.Министр Т.Ивая жапон тарапының Токионың маңызды стратегиялық серіктесі – Қазақстанмен ынтымақтастықты тереңдетуге ниетін білдірді.Кездесу қорытындысы бойынша одан әрі өзара іс-қимылдың перспективалық бағыттарын айқындайтын Қазақстан мен Жапонияның сыртқы саяси ведомстволары арасындағы 2025-2026 жылдарға арналған Іс-қимыл жоспарына қол қойылды.Ақпарат көзі : https://www.gov.kz/memleket/entities/mfa/press/news/details/958933

Токио, 2025 жылғы 17 наурыз – Қазақстан Республикасы Премьер-министрінің орынбасары – Сыртқы істер министрі Мұрат Нұртілеу Жапонияға ресми сапары барысында Жапония Министрлер кабинетінің Бас хатшысы Ёшимаса Хаяши, Экономика, сауда және индустрия министрі Йоджи Муто, сондай-ақ Қазақстанмен достық жөніндегі Жапония парламенттік лигасының төрағасы Тошиаки Эндомен кездесулер өткізді.Ё.Хаяшимен өткен келіссөздер барысында екіжақты саяси және экономикалық өзара іс-қимылдың өзекті мәселелерінің кең ауқымы талқыланды. Көлік және логистика, энергетика және өнеркәсіп салаларындағы ынтымақтастыққа ерекше назар аударылды. Сонымен қатар халықаралық және өңірлік күн тәртібіндегі негізгі мәселелер бойынша пікір алмасу өтті.«Жапония – уақыт сынынан өткен сенімді досымыз әрі стратегиялық серіктесіміз. Қазақстан Жапониямен кеңейтілген стратегиялық серіктестікті одан әрі дамытуға бейілді, бұл екі елдің ұлттық мүдделеріне толық сай келеді», – деп атап өтті Қазақстан сыртқы саяси ведомствосының басшысы.Й.Мутомен өткен келіссөздер Қазақстан мен Жапония арасындағы сауда-экономикалық ынтымақтастықтың перспективаларына арналды. М.Нұртілеу инвестициялық және ғылыми-техникалық өзара іс-қимылды кеңейту, сондай-ақ декарбонизация саласындағы бірлескен жобаларды іске асыру бойынша елеулі әлеуеттің бар екенін атап өтті.Тараптар сирек кездесетін металдар, көлік және логистика, сондай-ақ Транскаспий халықаралық көлік бағытын дамыту салаларындағы өзара ынтымақтастыққа жоғары қызығушылық танытты. Осы тұрғыда Қазақстан мен Жапонияның Экономикалық ынтымақтастық жөніндегі үкіметаралық және жеке секторлар арасындағы бірлескен комиссиясының үйлестіруші рөлінің маңыздылығы аталып өтіп, оның кезекті отырысын биыл Астанада өткізу ұсынылды.Т.Эндомен және Қазақстанмен достық жөніндегі Жапония парламенттік лигасының мүшелерімен кездесу барысында екіжақты парламентаралық өзара іс-қимылдың негізгі аспектілері талқыланды. Атап айтқанда, заң шығару органдарының сауда-экономикалық байланыстар мен мәдени-гуманитарлық жобаларды дамытуға жәрдемдесуі мәселелері қарастырылды.Қазақстан сыртқы саяси ведомствосының басшысы екі ел арасындағы сенімді диалог деңгейінің жоғары деңгейін атап өтіп, стратегиялық серіктестікті нығайтуға белсенді қолдау көрсеткені үшін жапон тарапына алғысын білдірді.Тараптар цифрландыру, жасанды интеллект, жасыл экономика және басқа да инновациялық бағыттардағы өзара іс-қимылды кеңейтуге деген ортақ ұмтылыстарын растады.Ақпарат көзі : https://www.gov.kz/memleket/entities/mfa/press/news/details/958950

Сербияның Нише қаласында әйелдер арасындағы бокстан әлем чемпионаты аяқталды. Сайыстың нәтижесінде Қорғаныс министрлігі Армия орталық спорт клубының қызметшісі Алуа Балқыбекова 50 келіге дейінгі салмақта жеңімпаз атанды.Шешуші жекпе-жекте ол Қытай құрамасының қызы Ху Мэйді 5-0 есебімен ұтты.Бұған дейін Алуа Солтүстік Кореялық Ан Кум, кениялық Вероника Нзива, морокколық Ясмин Мутаки мен түркиялық Айсен Ташкинді жеңген болатын. Айта кету керек, Алуа Балқыбекова әлем чемпионатының күмісжәне қола жүлдегері, Азияның екі дүркін чемпионы атанған. Бұл Алуаның әлем чемпионатындағы алғашқы алтыны.Ақпарат көзі : https://www.gov.kz/memleket/entities/mod/press/news/details/958262

Қорғаныс министрлігінің әскери қызметшісі капитан Әділет Әбілмәжінов пен Ұлттық ұлан капитаны Аманғали Ерменовтің батыл әрі епті әрекеті қиын жағдайда қалған әйелді құтқарып қалды.Оқиға орнына Мамыр-2 шағынауданында отбасымен серуендеп жүрген Әділет Әбілмәжінов кездейсоқ барған. Офицер көпқабатты үйдің жанында біраз адам жиналғанын байқайды. Әйел 4-қабаттың балконынан секірмек болғанын көреді.Уақыт ұттырмай Әділет Әбілмәжінов, Аманғали Еменов және ІІМ қызметкерлері 5 қабаттағы пәтерге көтерілді. Тұрғын үй иесінің рұқсатымен әскери қызметшілер көрші пәтердің терезесі арқылы төртінші қабатқа түседі. Сол жерде Аманғали Ерменов әйелді қауіпсіз жерге әкетіп, өмірін арашалап қалады.Өте қауіпті жағдай ойдағыдай шешілді. Психологтар әйелмен жұмыс істеуге жұмылды. Адам өміріне қауіпті жағдай әскери қызметшілердің арқасында тойтарылды.Капитан Әділет Әбілмәжінов – Алматы өңірлік гарнизоны Әскери полиция басқармасы жедел ден қою бөлімі мобильді бөлімшесінің офицері. Ол өзінің батыл әрекетімен керемет ептілік көрсетіп қана қоймай, сондай қиын сәтте қалай әрекет ету керектігін білетін нағыз кәсіпқой ретінде көрсетті. Ақпарат көзі : https://www.gov.kz/memleket/entities/mod/press/news/details/958588

"Наурызнама" онкүндігінің үшінші мерекесі – Шаңырақ күні Гвардейск гарнизонындағы Құрлық әскерлері оқу-жаттығу орталығының әскери қызметшілері Алтынбек пен Айжан Рақышевтардың үйіне барды.Биыл ерлі-зайыптылардың отау құрғандарына 15 жыл. Олар алты бала – үш ұл және үш қыз өсіріп отыр. Отағасы Алтынбек Рақышев Құрлық әскерлерінің оқу-жаттығу орталығында мотоатқыштар мектебі бастығының тәрбие және идеологиялық жұмыс жөніндегі орынбасары болып қызмет атқарады. Жұбайы Айжан үйде бала тәрбиесімен айналысады.– Отбасы – басты тірегіміз. Жұбайым екеуміз балаларды үлкендерді сыйлауға, дәстүрлерді құрметтеуге, ел алдындағы жауапкершілікті сезінуге үйретеміз. Балалардың қамқорлықты сезініп, ынтымақта және еңбекқор болып өсуі біз үшін маңызды. Отбасы – ол болашақтың негізі, – деді А. Рақышев.Әскери қызметшілер үй иелерін мерекемен құттықтап, отбасыларына амандық, зор денсаулық және ұзақ ғұмыр тіледі. Мерекелік дастархан басында, тамаша көңіл-күйде әріптестер өздерінің ата-аналарының өсиеттері мен отбасыларында болған қызықты оқиғаларды еске алды.Кездесу соңында бөлім командирінің орынбасары подполковник Әлішер Табылдиев Рақышевтар отбасына өскелең ұрпақты тәрбиелеуге және ұлттық құндылықтарды сақтауға қосқан үлестерін атап өтіп, алғыс хат табыс етті.Ақпарат көзі : https://www.gov.kz/memleket/entities/mod/press/news/details/957701

Абай облысындағы Шұбарбайтал ауылының маңындағы Үржар – Семей автожолынан 695 шақырым жерде қатты боранның салдарынан автокөлік легі тоқтап қалды.Зардап шеккендерге көмек көрсету үшін құтқару операциясына Қазақстан Республикасы Қарулы күштерінің 97616 әскери бөлімінен сержант Бауыржан Ақасов пен 3-сыныпты сержант Айдын Мәдімов тартылды.Әскери қызметшілер 32 адамды, оның ішінде 15 баланы қар құрсауынан құтқарып, Аягөз қаласының уақытша орналастыру пунктіне жеткізді. Жолаушылар әскери қызметшілерге жедел көмек көрсеткені үшін алғыс айтып, қиын жағдайда қол ұшын созған жандарға шын жүректен ризашылықтарын білдірді.Ақпарат көзі : https://www.gov.kz/memleket/entities/mod/press/news/details/957704

Бүгін Премьер-министр Олжас Бектеновтің төрағалығымен Су тасқынына қарсы шараларды үйлестіру және қарғын су жүру кезеңінің салдарын жою жөніндегі республикалық штаб отырысы өтті.Қазіргі таңда Шардара су қоймасынан Сырдария өзенінің төменгі ағысына секундына 500 текше метр су жіберілсе, оның 200 текше метрі Көксарай су реттегішіне алынуда. Облыс аумағына секундына 378 текше метр су келіп түсуде. Ықтимал су тасқынының алдын алудың кешенді шаралары үйлестіріліп, «2024-2025 жылдардағы қысқы-көктемгі кезеңде Сырдария өзеніндегі үлкен көлемдегі суды қауіпсіз өткізу» жоспары бекітілді.Өзен суы магистральді каналдар мен көлдер жүйесіне жіберу арқылы реттелуде. Су басу қаупі бар аймақтарға арнайы техника, күш-құралдары бар жауапты мекемелер бекітілген. Тасқынға қарсы қажетті материалдық-техникалық қор да, халықты көшіру пункттері де дайын. Жергілікті атқарушы органдар, төтенше жағдайлар мен су шаруашылығы мамандары тәулік бойы кезекшілікте.Облыс бюджетінен 139 млн. теңге бөлініп, «Қазавиақұтқару» акционерлік қоғамымен жасалған келісім-шартқа сәйкес 2 тікұшақ дайындыққа келтірілді. Мұз жарумен айналысатын арнайы мамандандырылған мекемемен келісім-шарт жасалған. Өткен жылы 3 нысандағы қорғаныс бөгеттеріне облыстық бюджеттен 130 млн. 500 мың теңге бөлініп, тиісті жұмыс жүргізілді. Бұдан бөлек, бюджеттен тыс қаржы көздері есебінен 20 нысан жөндеуден өтті.Ақпарат көзі : https://www.gov.kz/memleket/entities/kyzylorda/press/news/details/956190

Ыстанбұл, 2025 жылғы 12 наурыз – Қазақстан Республикасы Сыртқы істер министрінің орынбасары Әлібек Бақаев Түркі ынтымақтастығы ұйымдарының үйлестіру комитетінің 5-ші отырысына қатысты.Аталған отырысқа Түркі мемлекеттері ұйымына (ТМҰ) мүше елдердің сыртқы істер министрлерінің орынбасарлары және түркі ынтымақтастығы ұйымдарының, атап айтқанда, Түркі мәдениетінің халықаралық ұйымы, Түркі мемлекеттерінің Парламенттік ассамблеясы, Түркі академиясы, Түркі мәдениеті және мұрасы қоры, Түркі инвестициялық қоры басшылары да қатысты.Ұйымдардың басшылары атқарған жұмыстары бойынша есеп беріп, алдағы жоспарларымен бөлісті.Отырыс барысында Ә.Бақаев 2024 жылы Әзербайжан мен Қырғызстанда өткен саммиттердің қорытындылары бойынша мемлекет басшылары берген тапсырмалардың уақытылы және сапалы орындалу маңыздылығын, сондай-ақ ұйымдардың тиімділігін арттыру қажеттігін атап өтті.Сонымен қатар ТМҰ Хатшылығы ғимараты алдында делегация басшыларының қатысуымен 2024 жылғы 6 қарашада өткен 11-ші ТМҰ Саммитінде қабылданған Ұйымның жаңа туын көтеру рәсімі өтті.Бұдан бөлек ҚР Сыртқы істер министрінің орынбасары түрік әріптесі Айше Беррис Экинджимен екіжақты кездесу өткізіп, Қазақстан мен Түркия қарым-қатынастарының өзекті мәселелері мен алдағы биік және жоғары деңгейдегі іс-шаралардың кестесін талқылады.Іс-шаралардың нәтижелері түркі интеграция ұйымдарының бағыт-бағдарын айқындап, тараптардың күн тәртібіндегі өзекті мәселелерді шешуге өзара мүдделілігін растады.Ақпарат көзі : https://www.gov.kz/memleket/entities/mfa/press/news/details/957638

Он бесінші наурыз Мемлекеттік құпияларды қорғау қызметі мамандарының күні. Осыған орай ҚР Қарулы күштерінің Ұлттық әскери-патриоттық орталығында салтанатты жиын өтті.Іс-шараға министрлік басшылығы, осы бағыттағы департаменттің жеке құрамы, әскери бөлімдердің МҚҚ бөлімшелері, қызмет ардагерлері мен Сағадат Нұрмағамбетов атындағы әскери колледждің тәрбиеленушілері қатысты.Оларға Әскери-тарихи музейге экскурсия ұйымдастырылды. Іс-шара қонақтары тақырыптық экспозициялармен танысты. Атап айтқанда мұрағаттық құжаттар, ерекше шифрлау, кодтау және көмекші аппаратура, 1909 жылғы үлгідегі "Стайвер" баспа машинасы, техникалық құжаттамаға арналған сөмкелер, құпия поштаны беруге арналған люфт, М-125 десантшысының кодтау техникасы және тағы да басқа жәдігерлер қойылды. Әскери-үкіметтік байланыстың бастауында тұрған әскери қайраткер, кавалерия генералы Ғұбайдолла Жәңгіровке жеке стенд арналды.Қатысушыларды кәсіби мерекемен ҚР Қарулы күштері Бас штабы бастығының бірінші орынбасары генерал-майор Асан Жүсіпов құттықтады.– Қарулы күштердің қалыптасып, даму тарихында мемлекеттік құпияларды қорғау қызметі маңызды орын алады. Оның жүйесін қалыптастыруға ардагерлер айтарлықтай үлес қосты. Қазіргі уақыттағы цифрландыру заманында ақпаратты қорғау және киберқауіпсіздік мәселелері ерекше өзекті болып отыр. МҚҚ бөлімшелерінің қазіргі құрамы бұл міндеттерді жоғары кәсіби деңгейде абыроймен атқарып келеді, – деп атап өтті ол.Қорғаныс министрінің атынан мемлекеттік құпияларды қорғау қызметінің маманы күніне орай генерал-майор Асан Жүсіпов ардагерлер Владимир Метелев пен Айнаш Жайлаубаеваға алғыс хаттар табыс етті.Бұдан бөлек, бірқатар әскери қызметшілерге мерзімінен бұрын әскери атақтар берілді және Қорғаныс министрінің бірінші орынбасары атынан грамотамен марапатталды.Ақпарат көзі : https://www.gov.kz/memleket/entities/mod/press/news/details/957597

"Наурызнама" онкүндігінің екінші күні барлық гарнизондарда Ұлы Отан соғысының ардагерлеріне, әлеуметтік мекемелерге, ауруханаларға барумен, сондай-ақ әскери бөлімдерге экскурсиялар ұйымдастырумен қайырымдылық іс-шаралары өтті. Гвардейск гарнизонның танкистері Қордай аудандық арнаулы әлеуметтік қызмет көрсету орталығында болды. Олар қонаққа концерттік бағдарламалармен және сыйлықтармен келді.– Әскер әрқашан халықпен бірге. Біздің міндетіміз – елді қорғау ғана емес, сондай-ақ мұқтаж адамдарға көмектесу. Аға ұрпақты құрметтеу, қамқорлық пен мейірімділік көрсету ол тұрақты құндылықтар. Мұндай кездесулер біз үшін тек бір реттік акция емес, жалғасын табатын игі дәстүр, – деді бригада командирінің тәрбие және идеологиялық жұмыс жөніндегі орынбасары подполковник Думан Біләлов.Танк бригадасының әскери қызметшілері қазақ халық әндерін, сондай-ақ аға ұрпақтың жандарына жақын, танымал композицияларды орындады. Сонымен қатар, танкистер мекеме қызметкерлеріне аумақты абаттандыруға көмектесті. Көрсетілген қамқорлықтары үшін оларға арнаулы әлеуметтік қызмет көрсету орталығының директоры Айнұр Алматаева шын жүректен алғысын білдірді.Радиоэлектроника және байланыс Әскери-инженерлік институтының оқытушылары мен курсанттары да қайырымдылық күні қарттарға арналған әлеуметтік мекемеге және ата-анасының қамқорлығынсыз қалған балалар үйіне барды. Әскерилер оларға сыйлықтар әкелді, ал ең бастысы жылулық және қамқорлықтарымен бөлісті. Болашақ офицерлер концерт ұйымдастырып, оларға жарқын әсер мен тамаша көңіл-күй сыйлады.Ақпарат көзі : https://www.gov.kz/memleket/entities/mod/press/news/details/957606

Премьер-министрдің орынбасары – ұлттық экономика министрі Серік Жұманғариннің төрағалығымен өткен экономикалық өсімді қамтамасыз ету жөніндегі штабтың кезекті отырысында ТКШ саласы мен халық ең тығыз қоныстанған Алматы және Түркістан облыстарының инвестициялық көрсеткіштері қаралды.Биыл Өнеркәсіп және құрылыс министрлігі мен өңірлердің алдында елімізде кемінде 19 млн шаршы метр тұрғын үй салу міндеті тұр. Штаб отырысында 2025 жылдың алғашқы екі айында Қазақстанда 1,9 млн шаршы метр тұрғын үй пайдалануға берілгені айтылды. Бұл 2024 жылдың қаңтар-ақпан айларымен салыстырғанда 6,8%-ға төмен. Оның ішінде 1,2 млн шаршы метрі – көппәтерлі тұрғын үйлер, ал 713 мың шаршы метрі – жеке үйлер. Өнеркәсіп және құрылыс министрлігі Құрылыс және ТКШ істері комитеті төрағасының орынбасары Қанат Мыңбаевтың айтуынша, құрылыс қарқынының төмендеуі маусымдық жағдайларға байланысты, дегенмен күн жылынысымен бұл көрсеткіштер қайта қалпына келеді. Алматы облысында 2024 жылы негізгі капиталға салынған инвестиция көлемі 980 млрд теңгені (80% жеке, 20% бюджеттік) құраса, 2025 жылға қойылған KPI – 1,35 трлн теңге. Алдын ала мәліметтер бойынша, 2024 жылы тікелей шетелдік инвестиция көлемі $541 млн-ға жетеді, 2025 жылы KPI – $532 млн. Биылғы екі айда 89 млрд теңге инвестиция тартылды, бұл өткен жылдың сәйкес кезеңімен салыстырғанда 16%-ға артық. Инвестициялардың негізгі үлесі – бюджеттен тыс қаражат. Өңірде ең тартымды инвестициялық салалар – өнеркәсіп (32%), жылжымайтын мүлік (22%), көлік және қоймалау (16%), білім беру (17%).Қазіргі уақытта облыстың инвестициялық портфелі 57 мың жұмыс орнын ашатын 6,3 трлн теңге сомасындағы 200 жобаны құрайды. 2025 жылы осы жобалардың 35-і іске қосылып, 303 млрд теңгеге 4,8 мың жаңа жұмыс орны ашылады. Штаб отырысында Алматы облысының әкімі Марат Сұлтанғазиев инвестициялық жобалардың жүзеге асуын тежейтін бірқатар мәселелерді көтерді. Солардың бірі – Алатау қаласының бас жоспарын түзетуге байланысты. Бес жоба іске асырудың белсенді кезеңіне өтсе де, 11 жоба жобалау және құрылыс жүргізуге қажетті рұқсат құжаттарын ала алмай отыр. Вице-премьер ӨҚМ-ге бұл мәселені жақын арада шешуді тапсырды.Тағы бір жоба – балық шаруашылығы кешенінің құрылысы – инвестициялық субсидиялар бойынша лимиттердің қысқаруына байланысты өндірістік қуаттарды кеңейтудің одан әрі кезеңдерін тежеді. Қуаттылығы 1 мың тонна, ал құны 9,5 млрд теңгені құрайтын 1-кезең іске қосылғаннан кейін, қалған 70 млрд теңгені құрайтын 9 кезең инвестицияларды мемлекет тарапынан әрі қарай өтеуге қатысты белгісіздікке байланысты тоқтатылды. Премьер-министрдің орынбасары АШМ-ге инвестор кешеннің құрылысын жалғастыра алуы үшін балық өнімдері жобасындағы лимиттерді қайта қарауды тапсырды.Сондай-ақ отырыста жер учаскелерін бөлу, инфрақұрылымды жүргізу, Алматы облысының бірқатар туристік нысандарына жол салу мәселелері қаралды. Түркістан облысы кластерлік үлгіде дамып келеді. Қазіргі уақытта өңірде үш ірі кластер құрылған: мақта-мата (5 жоба, 197 млрд теңге), жүгері (2030 жылға дейін жүгері өсіру көлемін 30%-ға арттыру және крахмал-потокасы зауытын іске қосу) және ет өндірісі (5 жоба, 43 млрд теңге). Жалпы, 2024-2027 жылдарға арналған инвестициялық жобалар портфелінің құны 2,5 трлн теңгені құрайтын 145 жобаны қамтиды. Бұл жобалар аясында 20,3 мың жаңа жұмыс орны ашылып, бюджетке 100 млрд теңге қосымша салық түсімі күтілуде. 2024 жылы 137 млрд теңгеге 57 жоба іске асырылып, 2,2 мыңнан астам жаңа жұмыс орны ашылды. 2025 жылы тағы 57 жоба 322 млрд теңгеге іске қосылып, 6,9 мың жаңа жұмыс орны ашылады. Тек ауыл шаруашылығы саласында 68 жоба жүзеге асырылып, 423,7 млрд теңге инвестиция тартылады, нәтижесінде 9,2 мыңнан астам жаңа жұмыс орны ашылады деп күтілуде. Штаб отырысының қорытындысы бойынша Серік Жұманғарин барлық өңірлерге жергілікті бюджеттен инвестициялық жобаларға қаржы бөлуді уақытылы қамтамасыз етуді тапсырды. Ал республикалық бюджеттен қарастырылған трансферттер белгіленген мерзімде бөлінетін болады.«Биыл Үкімет әлеуметтік-экономикалық өсу болжамдарымен салыстырғанда экономикалық өсу индикаторларын ұлғайту міндетін қойып отыр. Бұл үшін біз «Бәйтерек» холдингі арқылы ірі бизнес пен ШОБ-ты 8 трлн теңгеге несиелендіруге 1 трлн теңге бағыттаймыз. Ең басты назар – ЖҚҚ беретін қайта өңдеу жобаларына аударылады. Ұлттық экономика министрлігі әрбір өңір үшін экономикалық өсім индексінің салалық декомпозициясын жасады, ал ӨҚМ жақын арада тұрғын үй құрылысының 19 млн шаршы метр көлеміне қол жеткізу бойынша ұқсас схеманы ұсынады. Барлық қойылған индикаторлар белгіленген мерзімде орындалуы тиіс», — деп атап өтті Серік Жұманғарин.primeminister.kzАқпарат көзі : https://www.gov.kz/memleket/entities/almobl/press/news/details/957014

2025 жылғы 14 наурызда Қостанай облысында Қазақстан Республикасының Президенті Қ.К. Тоқаевтың атынан ауызашар берілді, оған еңбек ардагерлері, үлкен әулетке ұйытқы болып отырған ақсақалдар мен көпбалалы аналар, денсаулық сақтау, білім, мәдениет, спорт, дін және еңбек салалары мамандары, сондай-ақ этномәдени бірлестіктердің өкілдері шақырылды.Облыс әкімі Қ.І. Ақсақалов жиналғандарды қасиетті Рамазан айымен құттықтап, Мемлекет басшысының атынан беріліп отырған ауызашардың зор мәнін және туған елдің мәдениеті мен тарихын, ана тілі мен ата-баба дәстүрін құрметтейтін еліміздің нағыз патриот азаматтарын тәрбиелеуде ерекше орын алатынын, атап өтті.Биыл Наурыз мейрамы Рамазан айына тұспа-тұс келіп отыр. Наурызнама онкүндігі аясында бүгін облысымызда «Көрісу күні – Амал мерекесі» атап өтілді және осы күнде ниет етіп ораза ұстаған жандарға ауызашар өткізіліп отырғанын, сонымен қатар Рамазан айы - рухани жетілу, ел бірлігін нығайту, ынтымақ, ізгілік пен мейірімділік мерекесі екенін атап өтті!Ақпарат көзі : https://www.gov.kz/memleket/entities/kostanay/press/news/details/957533