Жұмысшы мамандықтар жылы аясында Астана қаласының Жоғары көлік және коммуникация колледжінің студенттері үшін «Астана Тазалық» ЖШС-да экскурсия өтті. Студенттер кәсіпорын қызметімен және қызметкерлер жұмысының қыр-сырымен танысты, деп хабарлайды елорда әкімдігінің ресми сайты.Кәсіпорын қызметкерлері жолдарды, алаңдарды, тротуарларды, кірме жолдарды және басқа да қоғамдық орындарды тазалайды.Жастарға кәсіпорынның техникалары көрсетіліп, диспетчерлік қызметтің жұмысымен таныстырылды, сол сияқты «Астана Тазалық» ЖШС алдында тұрған күнделікті міндеттер түсіндірілді.«Астана жастары» жастар ресурстық орталығының бастамасымен елорда әкімдігінің көлік және коммуникациялар жоғары колледжінің студенттері шақырылды, өйткені бұл оқу орны негізінен көлік және коммуникация мамандарын дайындайды. Іс-шара «Жұмысшы мамандықтар жылына» және «Таза Қазақстан» акциясына арналған», - деді «Астана жастары» баспасөз хатшысы Әнел Мансұрова.3-курс студенті Сағыныш Сатыбаев экскурсиядан алған әсерімен бөлісті.«Біз техникаларды көрдік, диспетчерлік бөлімде болдық. Бізге «Астана Тазалық» ЖШС-да жұмыс күнінің қалай өтетінін көрсетті. Мұнда 2 мыңнан астам адам жұмыс істейді және қаланың айналасында бірнеше базасы бар. Маған тур ұнады, аумағы кең, компанияда жақсы команда жинақталған», - деді ол.«Астана жастары» ұйымдастырған мұндай шара тұрақты түрде ұйымдастырылып тұрады. Бұған дейін техникалық мамандықтардың студенттеріне құрылыс материалдарын шығаратын зауытқа экскурсия ұйымдастырылған болатын.Ақпарат көзі : https://www.gov.kz/memleket/entities/astana/press/news/details/943445

Есіл ауданының №85 мектеп-лицейінің оқушылары «Жұмысшы мамандықтар жылы» аясында жылу электр орталығына экскурсияға барды, деп хабарлайды елорда әкімдігінің ресми сайты.Бұл іс-шараның мақсаты – оқушыларға энергетика саласының маңыздылығын түсіндіру, өндіріс процесімен таныстыру және жұмысшы мамандықтарына деген қызығушылықты арттыру.Экскурсия барысында оқушылар жылу мен электр энергиясының қалай өндірілетінін, станцияның негізгі құрылғылары мен олардың жұмыс істеу принциптерін көріп, сала мамандарынан қызықты ақпараттар алды. Мамандар өз тәжірибелерін айтып, энергетиканың ел экономикасындағы рөлі туралы баяндады.Мұндай танымдық іс-шаралар оқушылардың кәсіби бағдарын қалыптастыруға және болашақ мамандықтарын таңдауда көмектесуге ықпал етеді.Ақпарат көзі : https://www.gov.kz/memleket/entities/astana/press/news/details/943571

Астананың Сарайшық ауданында мектеп оқушыларына арналған «Таза қозғалыс» квесті өтті, деп хабарлады елорда әкімдігінің ресми сайты.«Таза Қазақстан» акциясы аясындағы іс-шара балаларды интерактивті тапсырмалар арқылы табиғатты қорғауға үйрету мақсатында ұйымдастырылды.Іс-шара барысында қатысушыларға зияткерлік сұрақтар қойылды.«Квест төрт турдан тұрады. Әр команда қатысушыларына сұрақтар қойылады. Олар жан-жануарлардың ізі бойынша қандай екенін табуы керек. Ал үшінші тур қоқыстарды сұрыптау, шыны, пластик, қағаздарды әр қоқыс жәшігіне бөліп салады. Соңында флешмоб ұйымдастырылды», - деді Сарайшық ауданы әкімдігі Ішкі саясат және әлеуметтік сала бөлімі жетекшісінің міндетін атқарушы Динара Закир.Іс-шара соңында қатысушылар алғысхаттармен және естелік сыйлықтармен марапатталды.Ақпарат көзі : https://www.gov.kz/memleket/entities/astana/press/news/details/943577

Астанада №103 орта мектепте Есіл ауданы прокуратурасы мен Есірткі бизнесіне қарсы күрес басқармасының ұйымдастыруымен темекі өнімдерінің зияны, нашақорлық пен вандализм туралы мектеп оқушыларына арналған дәріс өтті, деп хабарлады елорда әкімдігінің ресми сайты.Есіл ауданы прокуратурасы бөлімінің прокуроры Дінмұхаммед Затыбековтің айтуынша, бүгінде жастарға есірткі бизнесінің салдары туралы айтудың маңызы зор.«Жыл сайын елімізде нашақорлар саны артып келеді. Ресми мәліметтер бойынша олардың саны 18 мыңнан асады. Ал нақты көрсеткіш әлдеқайда жоғары болуы мүмкін. Сондықтан қазір жастар арасында бұл мәселені талқылау өте маңызды. Мысалы бүгінгі дәрісте оқушыларға есірткі бизнесі туралы бірнеше бейнеролик ұсынып отырмыз. Онда бұл жолға түскен адамдардың қазіргі өмірі туралы көрсетіледі. Қарапайым өмірден алынған мысалдар мектеп оқушыларына есірткі бизнесінің салдарын түсіндіреді», - дейді Дінмұхаммед Затыбеков.Астана қаласы Полиция департаментінің Нашақорлықпен күрес басқармасының аға жедел уәкілі, полиция подполковнигі Лейла Разимованың сөзінше, қалада кәмелетке толмағандар және оларға қатысты жасалатын есірткі қылмыстарының саны артқан.«Бүгінде есірткі қылмысының алдын алу бойынша уәкілетті мемлекеттік органдар бірлесіп кешенді іс-шараларды жүзеге асырып жатыр. Мәселен 2024 жылғы 12 айда және 2025 жылдың қаңтар айында елордада 1238 есірткі құқық бұзушылық тіркелді. Заңсыз айналымнан 358 келіден астам есірткі, оның ішінде 41 келі синтетика тәркіленді. 2024 жылғы 12 айдағы және 2025 жылдың қаңтар айындағы жедел жағдайда жүргізілген талдау нәтижесінде кәмелетке толмағандар және оларға қатысты жасалатын есірткі қылмыстарының саны артқаны байқалады», - дейді Лейла Разимова.Жедел уәкіл есірткіні насихаттау фактісі бойынша 35 қылмыстық іс қозғалғанын айтты.«Соңғы кездері қылмыскерлер есірткіні тасымалдау мен сатудың және оларды жасырудың әртүрлі тәсілдері мен әдістерін ойлап табуда. Мысалы, есірткіні насихаттау фактілері бойынша 35 қылмыстық іс қозғалды. Бұл үшін 3 жылдан 6 жылға дейінгі мерзімге бас бостандығынан айыру жауапкершілігі қарастырылған. 2024 жылы 2747 граффити жойылып, есірткіні насихаттайтын 268 сайт бұғатталды»,- дейді Лейла Разимова.Ақпарат көзі : https://www.gov.kz/memleket/entities/astana/press/news/details/943633

Қазақстанда жатыр мойны қатерлі ісігіне қарсы күресте маңызды қадам болып саналатын адам папиллома вирусына (АПВ) қарсы қыз балаларды вакцинациялау бойынша ауқымды бағдарлама жүзеге асырылуда. Астана қалалық қоғамдық денсаулық сақтау басқармасы басшысының орынбасары Гүлназ Досмырзаева Коммуникациялар қызметінде өткен брифингте елордада иммундау жұмысы қалай жүріп жатқанын айтты, деп хабарлайды қала әкімдігінің ресми сайты.2024 жылдың қыркүйек айында вакцинация басталып, жыл соңына дейін 6 091 қыз бала алғашқы дозаны алды. Оның ішінде 3 187-сі 11 жаста (жоспарлы вакцинация), ал 2 904-і 12-13 жаста (қосымша иммундау).«Бағдарлама 2025 жылы жалғасуда – бірінші айда 11 жастағы 351 қыз балаға және 12-13 жас аралығындағы 50 қыз балаға екпе салынды. ҚР Денсаулық сақтау министрлігі АҚШ-та өндірілген «Гардасил» төртвалентті вакцинасын қолдануды қарастырған. Ол адам папиллома вирусының (АПВ) ең қауіпті 6, 11, 16 және 18 түрлерінен қорғайды. Екпе мектептерде алты айлық үзіліспен екі кезеңде тегін жүргізіледі.Жатыр мойны обыры Қазақстанда әйелдер арасында жиі кездесетін онкологиялық аурулардың бірі болып саналады. Жыл сайын 600-ден астам қазақстандық әйел осы дерттен көз жұмады. Жаппай вакцинация – қатерлі ісіктің алдын алудағы стратегиялық қадам. Біз әйелдердің келесі ұрпағын АПВ-ден және онымен байланысты қатерлі ісік қаупінен қорғауды қамтамасыз етуге міндеттенеміз», - деді спикер.Айта кетейік, вакцина АПВ-ның онкогенді түрінен 90-95% қорғайды.Ақпарат көзі : https://www.gov.kz/memleket/entities/astana/press/news/details/943690

Астанада салынып жатқан Family park ТК-де заңсыз салынған ғимараттар бұзылып жатыр. Мұндай шешімді сот қабылдады, деп хабарлайды елорда әкімдігінің ресми сайты.Астана қалалық орта сапасы және бақылау басқармасы бұрын «Өркен 777» ЖШС құрылыс салушысына қатысты «Family park» нысаны бойынша жоспардан тыс тексеру жүргізген.Тексеру нәтижелері бойынша бекітілген жобадан ауытқулар анықталды, осыған байланысты заңбұзушылықтарды жою туралы нұсқама берілді. Алайда тапсырыс беруші бұл талаптарды орындаған жоқ, нәтижесінде Астана қаласының мамандандырылған ауданаралық экономикалық сотына талап арыз жолданды.Қазіргі уақытта арыздың талаптары қанағаттандырылды.Қазіргі уақытта мемлекеттік сот орындаушысымен бірлесіп, заңсыз құрылысты бұзу бойынша жұмыстар жүргізілді.Ақпарат көзі : https://www.gov.kz/memleket/entities/astana/press/news/details/943750

ТАУ-КЕН ӨНДІРУ ӨНЕРКӘСІБІН ДАМЫТУ: ӨСКЕМЕНДЕ ҒЫЛЫМИ-ТЕХНОЛОГИЯЛЫҚ СЕССИЯ ӨТТІД.Серікбаев атындағы Шығыс Қазақстан техникалық университетінде «Қазақстан Республикасының тау-кен өндіруші кәсіпорындарының ғылыми-технологиялық дамуы» тақырыбында екі күндік ғылыми-технологиялық сессия өтті. Бұл шара ҚР Ғылым және жоғары білім министрлігі мен «Казцинк» ЖШС қолдауымен ұйымдастырылды.Іс-шараға Қазақстан мен шетелден 54 жетекші ғалым, сондай-ақ «Казцинк» ЖШС компаниясының 12 сарапшысы қатысты. Шараны ҚР ҒЖБМ Ғылым комитетінің төрағасы Ғалымжан Жанқуатов ашты. Өз сөзінде ол ғылыми-техникалық сессияның маңыздылығын атап өтіп, оның болашақта тау-кен өнеркәсібіндегі ғылыми зерттеулер мен инновациялық шешімдерге ықпал ететінін мәлімдеді.Ғылыми-техникалық сессияның алғашқы күні пленарлық мәжіліс өткізілді, онда қатысушылар ғылым мен өндірістің қазіргі жағдайы және оның болашағы туралы пікір алмасты. Сессия барысында Қазақстанның тау-кен өндірісіндегі ғылыми зерттеулер мен инновациялық шешімдер талқыланды.Д.Серікбаев атындағы Шығыс Қазақстан техникалық университетінің басқарма мүшесі – ғылым және инновациялар жөніндегі проректор Жадыра Конурбаева университеттің ғылыми зерттеу орталықтары мен «Казцинк» ЖШС компаниясы арасында тығыз ынтымақтастық орнатылғанын, сондай-ақ көпшілікке пайдалы ғылыми жобалардың әзірленіп жатқанын ерекше атап өтті. Ол «Industrial AI» құзырет орталығының маңыздылығын айтып, орталықтың Шығыс Қазақстанның тау-кен өндірісіндегі ғылыми және техникалық шешімдерді әзірлеуде маңызды рөл атқаратынын жеткізді. Сонымен қатар университет пен «Казцинк» компаниясының ғылыми жобаларды коммерцияландыру және жаңа технологияларды өндіріске енгізу бойынша бірлескен жұмыстарын белсенді жүргізіп жатқанына тоқталды.Екінші күні қатысушылар ғылыми жобалардың прототиптерін әзірлеуге және «Казцинк» ЖШС үшін басым ғылыми жобаларды іріктеуге ерекше назар аударды.Бұл ғылыми-технологиялық сессия Қазақстанның тау-кен өнеркәсібінде инновациялық шешімдер әзірлеуге және ғылым мен өндіріс арасындағы байланысты нығайтуға елеулі үлес қосты. Іс-шараның нәтижесінде Қазақстанның тау-кен өндіруші кәсіпорындарының ғылыми-технологиялық дамуының жаңа мүмкіндіктері мен бағыттары айқындалды.Ақпарат көзі : https://www.gov.kz/memleket/entities/sci/press/news/details/943443

Техникалық және кәсіптік білім беру саласында 200-ден астам ұйым жаңа жүйе бойынша лицензия алды. Бұл туралы ҚР Оқу-ағарту министрлігінің аппараттық кеңесі отырысында хабарланды. Бұған дейін лицензиялау тек жеке біліктіліктерге қатысты берілетін болса, енді лицензиялар мамандықтар бойынша берілетін болады. Бұл шара колледждерге экономикадағы өзгерістерге тез бейімделуге, еңбек нарығының қажеттіліктеріне жедел жауап беруге және мамандар даярлау мүмкіндіктерін кеңейтуге жағдай жасайды. «Енді колледждер лицензияланған мамандықтар аясында жаңа біліктіліктерді қосу үшін бюрократиялық рәсімдерден алшақтап, тек материалдық-техникалық базасы мен кадр құрамының сәйкестігін растаса жеткілікті. Сонымен қатар, модульдік білім беру бағдарламалары студенттерге бір мамандық аясында бірнеше біліктілікті меңгеруге мүмкіндік береді. Бұл олардың бәсекеге қабілеттілігін арттырады», — деді Білім саласында сапаны қамтамасыз ету комитетінің төрағасы Ернұр Дауенов. Қазіргі уақытта ҚР Оқу-ағарту министрлігінің аймақтық департаменттері колледждер арасында түсіндіру жұмыстарын жүргізіп, ресми ресурстарда ақпараттар жариялап, лицензияларды қайта рәсімдеу кестесін әзірледі. Бұл процесті 2025 жылдың 1 наурызына дейін аяқтау жоспарлануда. Колледждер жаңа мамандықтарға лицензия алу немесе қолданыстағы лицензияларын қайта ресімдеу бойынша қазірден бастап өтініш бере алады. Бұл ретте мемлекеттік қызмет көрсету тәртібі мен мерзімдері өзгеріссіз қалады.Ақпарат көзі : https://www.gov.kz/memleket/entities/edu/press/news/details/943132

Қазақстанның мектепке дейінгі ұйымдарында ваучерлік қаржыландыруды енгізу қарқынды жалғасуда. 2025 жылдың басынан бұл жүйеге елордалық мектепке дейінгі ұйымдар да қосыла бастады.Ваучерлік қаржыландыруға Астана қаласынан 670 балабақша қатысуда, бүгінде берілген ваучерлер саны 25 мыңнан асты. Айта кету керек,ваучерлік қаржыландыру сондай-ақ Тараз, Түркістан, Орал және Шымкент қалаларында енгізілді. Түркістан, Орал, Тараз сияқты бірқатар қалаларда жаңа жүйенің арқасында 2 жастан асқан балалардың кезегі толықтай жойылды.Бұл механизм мектепке дейінгі ұйымдар арасында мемлекеттік тапсырысты ашық және тиімді бөлуге бағытталған. Жаңа жүйенің негізгі артықшылықтары - балабақшалар арасындағы шынайы бәсекелестік арқылы қызмет көрсету сапасын арттыру, ата-аналарға білім беру мекемесін таңдау құқығын беру, қаржыландыру мен бюджет қаражатын жұмсаудың ашықтығы. «Негізгі жетістіктердің бірі кезекті заңсыз жылжытудың жойылуы, өйткені ваучерлерді алудың электрондық кезегітең жағдайларды қамтамасыз етеді және тек қана алға жылжиды. Жүйе ең алдымен, «ақша балаға беріледі» қағидаты арқылы қаржыландыру процесінің ашықтығын қамтамасыз етеді. Қаражатты есептеу және аудару ата-аналар балабақшаға бару табеліндегі мәліметтерді растағаннан кейін ғана жүргізіледі», – дейді мектепке дейінгі білім департаментінің директоры Манара Адамова.Болашақта мектепке дейінгі білім беру саласында ашық әрі бәсекеге қабілетті жүйе құра отырып, ваучерлік қаржыландыруды басқа аймақтарға да енгізу жоспарлануда.Ақпарат көзі : https://www.gov.kz/memleket/entities/edu/press/news/details/943134

ҚР Оқу-ағарту министрі Ғани Бейсембаев Германия Федеративтік Республикасының Қазақстан Республикасындағы Төтенше және Өкілетті елшісі Моника Иверсенмен кездесу өткізді. Іскерлік кездесу барысында тараптар білім беру саласындағы екіжақты ынтымақтастықты кеңейту перспективаларын талқылады. Техникалық және кәсіптік білім беруді дамыту, өндірістік кәсіпорындарда студенттер мен педагогтер үшін тағылымдамаларды ұйымдастыру, сондай-ақ неміс тілі пәні бойынша педагогтердің біліктілігін арттыру мәселелеріне ерекше назар аударылды. Сонымен қатар, мектепке дейінгі, орта, инклюзивті білім беру саласында одан әрі ынтымақтастықты орнату мүмкіндіктері қаралды.Ақпарат көзі : https://www.gov.kz/memleket/entities/edu/press/news/details/943301

Жамбыл облысының өңірлік кадр резервінің мүшесі Орынбасар Сқақұлы Талас ауданы әкімі аппаратының жұмылдыру дайындығы және азаматтық қорғаныс бөлімшесінің басшысы лауазымына конкурс өткізілместен тағайындалды.Орынбасар Сқақұлы 1994 жылы Талас ауданында дүниеге келген. Білімі жоғары. Л.Н. Гумилев атындағы Еуразиялық ұлттық университетін «Көлік, көлік техникасы және технологиялары» мамандығы бойынша аяқтаған.Еңбек жолын 2016 жылы Талас ауданы әкімдігі ішкі саясат бөлімінің «Жастар ресурстық орталығы» КММ-ның Ақкөл ауылдық округі бойынша аға инспекторы болып бастаған.2020-2022 жылдары аралығында Қазақ мал шаруашылығы және жемшөп өндірісі ғылыми-зерттеу институтында әр түрлі лауазымдарда еңбек етті.2022 жылдың маусымынан бастап бүгінге дейін Талас ауданы Ақкөл ауылдық округі әкімі аппаратының жетекші маманы, бас маманы қызметтерін атқарды.Ақпарат көзі : https://www.gov.kz/memleket/entities/zhambyl/press/news/details/943336

Қонаев гарнизонының гвардиялық десанттық-шабуылдау бригадасында взводтардың жауынгерлік атысы өтіп жатыр. Әскери қызметшілер бөлімшелердің атысын басқару, ұрыста қаруды шебер және тиімді қолдану дағдыларын пысықтайды. Қауіпсіздік шаралары да назардан тыс қалмайды.Тактикалық әдістер ұрысқа барынша жақын жағдайларда меңгеріледі. – Жауынгерлердің дағдыларын шыңдау үшін оқу-жаттығу полигонында жердегі де, әуедегі де нысандарға қарудың барлық түрінен атыс жүргізуге мүмкіндік беретін жағдай жасалған. Қол гранаталарын лақтыру дағдылары да пысықталуда. Қараңғыда түнгі көру құрылғылар қолданылады, – деді 32363 әскери бөлімі 2-ші десанттық-шабуылдау ротасының командирі гвардия лейтенанты Мұхамед Сахан.Тактикалық дайындық барысында бөлімшеге жүктелген міндеттерді ескере отырып, взводтың шабуылдағы, қорғаныстағы, күндізгі және түнгі уақыттағы арнайы әскери маневрлердегі әрекеттерінің үлгілері жасалады.Ақпарат көзі : https://www.gov.kz/memleket/entities/mod/press/news/details/943652

Талдықорғанда Мемлекеттік сатып алудан түсетін табыс бойынша сапасыз курс бойынша аты шулы іске нүкте қойылды. Сот коуч-тренердің тендер арқылы «жылдам табыс» уәде етіп, бірақ үлкен соманы жоғалтып, зардап шеккен тұтынушылардың пайдасына шешім шығарды.Тұтынушы Жұлдыз Идрисова сапасыз оқыту қызметіне тап болып, адамдарға «миллионды пайда» уәде еткен коучтың іс-әрекетінен шағымдануы арқылы басталды. Ол бұл мәселе бойынша Жетісу облысындағы Сауда және тұтынушылардың құқықтарын қорғау департаментіне жүгінді. Мәселені терең талдап, департамент ақпаратты әлеуметтік желілерде жариялап, 2024 жылғы 11 қазанда азаматтарды қабылдау іс-шарасын ұйымдастырды. Осы күні тендер арқылы табыс табуға арналған серіктестік курстарды сатып алғаннан кейін көмек іздеген сегіз тұтынушының шағымы қаралды.Жетісу облысы бойынша СТҚҚД қызметкерлері жүргізген тексеру барысында коуч-кәсіпкер ресми келісімшарт жасамай, төлем кезінде фискалдық чек бермегені анықталды – бұл салық заңнамасын бұзған жағдай. Уәде етілген айлық курстар орнына тек 3-4 сабақ өткізіліп, содан кейін тренер өз «жағдайларына» сілтеме жасап оқытуды тоқтатқан, бұл тікелей ҚР «Тұтынушылардың құқықтарын қорғау туралы» Заңының 13-бабын бұзу болып табылады. Нәтижесінде, азаматтар білімсіз қалып, ақшасынан да айырылды. Тұтынушылардың кейбірі «пайдалы тендерлер» ұтамыз деген ниетпенен және ақша қайтарылуы үмітімен несиеге алуға дейін барған.«Департамент қызметкерлері осы кәсіпкерге қатысты сотқа дейінгі құжаттарын дайындауда тұтынушыларға құқықтық көмек көрсетіп, 10 күн ішінде жауап беруін талап етті. Наразылық хатқа жауап бермей, кәсіпкер заңды бұзып, сол себепті департамент тарапынан жоспардан тыс тексеру жүргізілді», – деп мәлімдеді СТҚҚД басшысы Айдос Дауешев.Тексеру кезінде сапасыз қызметтен зардап шеккендер саны 18 адамға жетіп, тек Жетісу облысы емес, сонымен қатар Алматылық, Костанайлық және Астана қаласының тұтынушылары да өтініш білдірді. Нәтижесінде, жалпы зиян сомасы 6 593 000 теңгеге артты. Департамент заңды мүдделерін қорғау мақсатында оннан астам тұтынушының атынан Талдықорған қаласының сотына талап арызын жіберді.Сот процесі барысында коуч-кәсіпкер кейбір зардап шеккен тұтынушыларға ақшаларын қайтарды: үш тұтынушыға толық көлемде 850 000 теңге, ал қалған екі тұтынушыға жартылай – әрқайсысына 450 000 теңге қайтарылды. Дегенмен, сот барлық талаптарды толық қанағаттандыру туралы шешім қабылдап, істегі барлық тараптардың мүддесін қорғады.Қызығы, осы іс барысында тағы бір оқиға анықталды: коуч-тренер бұған дейін қалалық мектептердің бірінің жөндеу тендерін ұтып алып, құрылысшыларға төлем жасамаған. Әлеуметтік желілердегі дау-дамайдан кейін ол өз қарызын тез арада өтеді.Сауда және тұтынушылардың құқықтарын қорғау департаменті осындай «жеңіл табысқа» деген курстардың азаматтарға үмітсіздік пен шығын әкелетінін ескертеді. Мамандар тренерлер жайлы ақпаратты мұқият зерттеп, ресми келісім-шарт жасауды және фискалдық чек талап етуді міндетті түрде ұсынады. Күмәнді жағдайларда өз құқықтарыңызды қорғау үшін әрдайым құзырлы органдарға жүгініңіз.Жүгіну үшін байланыс:📞 Жедел желі: 8 (7282) 415 – 610🏢 Мекенжай: Талдықорған қаласы, Кабанбай батыр көшесі, 78Ақпарат көзі : https://www.gov.kz/memleket/entities/mti/press/news/details/943784

Бүгін Жетісу облысында халықтың әлеуметтік осал топтары санатынан 30 отбасы жаңа үйлі болды. Талдықорған қаласындағы «Жастар - 3» жаңа тұрғын ауданынан берілген үйлердің кілтін облыс әкімі Бейбіт Исабаев табыстады. Жалпы жыл басынан бері облыс орталығында кезектегі 102 отбасы жаңа баспанаға кірді. Атап айтқанда, «Береке» коттедж қалашығының, «Жастар-3» тұрғын алабында әлеуметтік осал топ санатындағы азаматтар мен көп балалы отбасылар үйлі болды, - деп хабарлайды Жетісу облысы әкімінің баспасөз қызметі.Кілт беру салтанатына қатысқан облыс әкімі Бейбіт Исабаев жаңа қоныс иелерін қуаныштарымен құттықтап, баспанамен қамту бағытында өңірде атқарылып жатқан шараларға тоқталды:- Мемлекеттің қолдауымен қабылданып жатқан шаралардың арқасында Талдықорғанда биыл жыл басынан бері әлеуметтік осал топтар санатымен кезекте тұрған 102 көпбалалы отбасы үйлі болды. Солардың қатарда бүгін сіздер де өз үйлеріңіздің кілтін алып отырсыздар. Дәл осы жаңа тұрғын алабында 56 үй салынды, биыл біз 150 үй салуды жоспарлап отырмыз. Жалпы мұнда 700-ден астам үй болады. Жол жасалады, құжаттар дайын. Сондай-ақ биыл газдандыру жұмыстарын бастаймыз. Осылайша бұл аудан алдағы уақытта қаланың үлкен әрі әдемі заманауи шағын аудандарының бірі болады. Содан кейін біз мұнда әлеуметтік нысандарды салу мәселесін қарастыра бастаймыз. Жалпы өткен жылы Талдықорғанда тұрғын үй кезегі 8,3%-ға азайды, осы жылы тағы 1400-ден астам отбасына тұрғын үй беріледі деп жоспарлап отырмыз. Сөйтіп 2023-2025 жылдары облыс орталығында кезекте тұрған 5 мыңға жуық адам тұрғын үймен қамтамасыз етіледі, - деген Б. Исабаев «Жастар-3» тұрғын алабындағы үйлердің кілттерін тапсыру рәсімін атқарды.Еске салсақ, осыдан 10 күн бұрын осы шағын ауданда алғашқы 23 отбасы жаңа қонысқа кірген болатын.Жалпы бүгінгі жаңа қоныс иелерінің арасында толық емес отбасылар, мүгедек балаларды асырап отырған отбасылар, кәмелетке толғанға дейін жетім қалған және ата-анасының қамқорлығынсыз қалғандар, мүгедек бала тәрбиелеп отырған отбасылар, І және ІІ топтағы мүгедектер, зейнеткерлер бар.Тұрғын үй кілтін алғандардың қатарындағы Шабельский отбасы қуанышын бөлісті. Жас отағасы Святослав Алексеевич:- Қазір 25 жасқа келдім. 2011 жылдан бастап тұрғын үйге кезегінде тұрамын. Мен кішкентайымнан әжемнің қолында өстім. Осы кезге дейін әйел, бала-шағаммен бірге әжемнің үйінде бірге тұрдық. Әрине, өз үйіміз болса деп армандадық, әсіресе екі қызым өз бөлмеміз болса дейтін. Енді, міне, үйімізге қол жеткіздік, қуанышымызда шек жоқ, - деді.Қаланың тағы бір тұрғыны Жанар Әбділманова да жаңа қоныстың қуанышына кенелді. Ол «толық емес отбасы» санатында тұрғын үйге кезегінде 13 жыл тұрған.- Бүгін біздің әулетімізде үлкен мереке. Жалдамалы пәтерде көшіп жүретін уақытымыз енді артта қалды. Балаларымның жайлы, әдемі, кең үйде еркін өсетініне қуанып отырмын, - дейді ол.Талдықорғандық Дана Демидова да өз жайынан қысқаша баяндап берді:- Менің екі балам бар, кіші ұлым 16 жаста. Ауыр жол апатының салдарынан күйеуім мерт болды, денсаулығым нашарлап, өзім мүгедектік алдым. Бүгін отбасымыз үлкен қуанышқа кенеліп, қоныстойын тойлап жатырмыз. Біз бұл күнді 14 жыл күттік. Бүгінгі қуаныш иелерін шын жүректен құттықтаймын, - деді денсаулық сақтау саласында фельдшер болып 25 жылдай жұмыс істеген Д.Демидова.Атап өтсек, әр үйдің жалпы ауданы 76 шаршы метр. Мұнда үш тұрғын бөлме, ас үй мен жуынатын бөлме бар. Үй электр қазандығы арқылы жылытылады, ал газ қазандықтары табиғи газ жеткізілгеннен кейін іске қосылады. Өңір басшысының айтуынша, жыл соңына дейін тұрғын үй алабына газ тарту жоспарда бар.Жалпы өткен жылы облыста 371,9 мың шаршы метр тұрғын үй тапсырылса, биыл тағы 380 мың шаршы метр тұрғын үй беру жоспарлануда. Жетісу облысы әкімінің баспасөз қызметі.Фотограф: Дмитрий Ерофеев Ақпарат көзі : https://www.gov.kz/memleket/entities/zhetysu-oblysy/press/news/details/943368

Абай облысының әкімі Берік Уәли Семей қаласындағы ірі кәсіпорындардың жұмысымен танысты. «АРАЙ-EAST FOOD» ЖШС, «СемАЗ» ЖШС, Семей цемент зауыты, «Семей инжиниринг» АҚ, Семей машина жасау зауыты сынды өңірдегі іргелі өндіріс орындарында болды. Қызметкерлермен кездесіп, ұсыныс-пікірлерін тыңдады.«АРАЙ-EAST FOOD» ЖШС 2024 жылдан бері халал стандартына сәйкес шұжық өнімдерін өндірумен айналысады. Кәсіпорын 80-нен астам қайнатылған және ысталған шұжық түрлерін шығарады. Зауыт аумағында инновациялық жабдықтары бар орау желісі және үш өндірістік цех жұмыс істейді. Былтыр кәсіпорын базасында шұжық өнімдерін өндіру бойынша қосымша желі пайдалануға берілді. Осының нәтижесінде жылына 1,8 мың тоннаға дейін дайын өнім шығаруға қол жеткізілді. Бүгінде мұнда 120 адам еңбек етеді. Кәсіпорын алдағы уақытта өндірісті кеңейтуді жоспарлап отыр.«СемАЗ» ЖШС - еліміздегі ауыл шаруашылығы және жүк техникасын құрастыратын ірі өндіріс орны. Мұнда 400-ге жуық адам еңбек етеді. Кәсіпорында жылына 3500 «Беларусь» маркалы тракторлар, 10 000 Shacman және «FOTON» жүк көліктері, 1200 түрлі автобус құрастырылады. Былтыр қаладағы автобус паркі осы кәсіпорыннан 60 қоғамдық көлік сатып алған. Бұл жұмыс биыл да жалғасады. Облыс әкімі Берік Уәли Семейдегі тозығы жеткен автобус паркін жаңғырту үшін алдағы уақытта «СемАЗ» ЖШС-нен жаңа автобустар сатып алынатынын жеткізді.«Қала тұрғындары қоғамдық көлікке жиі шағымданады. Сондықтан бұл мәселені жедел әрі жүйелі түрде шешуіміз керек», — деді аймақ басшысы.1958 жылы салынған «Семей цемент зауыты» жылына 1,1 миллион тонна цемент өндіреді. Кәсіпорын 2016 жылдан бастап толық жаңғыртуға бет бұрды. Зауыт өнімдері Қазақстан нарығында сатылып, шетелге экспортталады.Кәсіпорын жетекшілері облыс әкіміне жүзеге асырылған жобалар туралы баяндап, өндірісті кеңейтуге қатысты жоспарларымен бөлісті. Өз кезегінде аймақ басшысы жергілікті өндіріс орындарына мемлекет тарапынан тиісті қолдау болатынын айтып, кәсіпорын жетекшілерін бизнестің әлеуметтік жауапкершілігі аясында Семейді көркейтуге атсалысуға, қалаға инвестиция құюға шақырды. Жұмысшылардың жалақы мәселесіне де назар аударды. Облыс әкімі Семей машина жасау зауытының жұмысымен де танысып, кәсіпорын басшылығына қызметкерлердің орташа жалақысын көтеруді қарастыруды тапсырды.«Бүгін жұмысымен танысқан кәсіпорындардың өңір үшін, тұрғындар үшін маңызы зор. Олардың өндірістік әлеуетін ұлғайту бағытында тиісті жұмыс жүргізіліп жатыр. Оң бастамаларға, тың жобаларға облыс тарапынан қажетті көмек көрсетіледі. Алдағы уақытта жұмыс кестеме сәйкес өңірдегі басқа кәсіпорындарға арнайы баруды жоспарлап отырмын», — деді облыс әкімі.Аймақ басшысы өткен жылы жаңғыртылған қаладағы ІТ және жаңа технологиялар жоғары колледжінің жұмысымен де танысты. Бүгінде мұнда 750-ден астам студент заман талабына сай мамандықтар бойынша білім алуда. Облыс әкіміне студенттердің ғылыми жұмыстары, жетістіктері мен ІТ жобалар таныстырылды.«Мен бұл колледждің жұмысынан хабардармын. Студенттері халықаралық олимпиадаларда жүлдегер болып жүр. Өткен жылы облыс бюджетінен қаржы бөлініп, колледж толық жаңғыртылды. ІТ жобалардың әлеуеті зор. Жасанды интеллектті дамыту маңызды. Бұған Мемлекет басшысы да, Үкімет те ерекше назар аударып отыр. Осы бағыттағы жұмысты жалғастыру керек», — деді Берік Уәли.Ақпарат көзі : https://www.gov.kz/memleket/entities/abay/press/news/details/943765

Алматы облысының полициясында кезекті апта сайынғы азаматтарды қабылдау өтті.Кездесуге бес азамат келіп, әрқайсысы қылмыстық істердің тергеу барысына қатысты сұрақтар қойды. Алыс аудандардың тұрғындары үшін онлайн-формат ұйымдастырылып, қашықтыққа қарамастан, әр адам өз сұрағына толық түсініктеме алу мүмкіндігіне ие болды. Мұндай формат азаматтардың өтініштеріне жедел жауап беруге мүмкіндік беріп, уақыт пен қашықтыққа байланысты шектеулерді азайтады.Барлық өтініштер мұқият қаралып, әрбір жағдай бойынша түсініктемелер беріліп, бақылауға алынды. Белгілі бір мәселелер бойынша қосымша тексерулер тағайындалды, оның нәтижелері туралы азаматтарға тиісті мерзімде хабарланатын болады. – Халықпен ашық диалог біздің жұмысымыздың маңызды бөлігі болып қала береді. Біз қылмыстарды тиімді тергеу және құқықтық тәртіпті қамтамасыз ету қоғамның сенімінсіз мүмкін емес екенін түсінеміз. Сондықтан мұндай кездесулер тергеу барысын түсіндіруге ғана емес, құқық қорғау органдарының ерекше назарын қажет ететін проблемалық мәселелерді анықтауға да көмектеседі, – деп атап өтті ведомство бастығы Мейрам Әбікеев.Алматы облысының полицейлері ашық түрде жұмысын жалғастыруда. Азаматтармен тұрақты кездесулер олардың өтініштеріне жедел жауап беруге мүмкіндік береді, полицияға деген сенімді нығайтады және тергеу үдерістерінің ашықтығын арттыруға ықпал етеді. Естеріңізге сала кетейік, жеке қабылдауға жазылу үшін 8 700 770 70 93 нөміріне қоңырау шалуға болады.Ақпарат көзі : https://www.gov.kz/memleket/entities/qriim/press/news/details/943224

Орталық коммуникациялар қызметінде өткен брифинг барысында Қазақстан Республикасы Экология және табиғи ресурстар министрлігінің 2024 жылғы қызметінің қорытындылары туралы вице-министрлер Ж.Әлиев пен Н.Шәрбиев баяндады. Ж.Әлиевтің  сөзінше: «2024 жылдың қорытындысы бойынша еліміздегі ең ірі 50 өнеркәсіптік кәсіпорындағы I-санаттағы объектілер арасында зиянды шығарындылардың 6% төмендеуіне қол жеткізілді. Алдағы уақытта ЕҚТ енгізе отырып, кешенді экологиялық рұқсаттарға көшуге байланысты эмиссиялардың одан әрі төмендеуі күтілуде».Ол сондай-ақ өңірлердің экологиялық проблемаларын кешенді шешу бойынша Жол карталарын іске асыру барысы, қоршаған ортаға эмиссияларды мониторингілеудің автоматтандырылған жүйелерін (АЖМ) орнату, климаттық саясат мәселелері, экологиялық заңнаманы сақтау жөніндегі тексерулердің қорытындылары, ЕсoQoldaý жаңғырту және пайдаланудан шыққан көлік құралдары мен өздігінен жүретін ауыл шаруашылығы техникасын бағдарламаларын (ВЭТС және ВЭССХТ) кәдеге жарату, сондай-ақ «Таза Қазақстан» экологиялық акциясын өткізу туралы және т.б. турасында айтты.Вице-министр Н.Шәрбиев өз баяндамасында іс-шараға қатысушыларды еліміздің орман қорына 2 млрд. ағаш отырғызу жөніндегі Мемлекет басшысының тапсырмасының іске асырылу барысы жайында, сонымен қатар Арал теңізінің құрғаған табанына (ОДАМ) жасыл желектерді отырғызу, алдағы жылға отырғызу материалымен қамтамасыз ету, ормандарды өрттен қорғау, табиғат қорғау мекемелерін техникалық жарақтандыру, өрттерді ерте анықтау жүйелерін орнату, экологиялық туризмді дамыту, жануарларды  қайта жерсіндіру және қорғау сынды тақырыптарды қозғады.Сондай-ақ, спикерлер алдағы кезеңге арналған жоспарларын айтып, БАҚ өкілдерінің сұрақтарына жауап берді.   Ақпарат көзі : https://www.gov.kz/memleket/entities/ecogeo/press/news/details/943730

Бүгін Экология және табиғи ресурстар министрлігінің кеңейтілген алқа отырысы өтті.Министрлік жетекшілік ететін салалардың өткен жылғы жұмыс қорытындылары мен алдағы жоспарларын талқыланды.Алқа отырысына Қазақстан Республикасы Премьер-Министрінің бірінші орынбасары Р. Скляр, Парламент депутаттары, Президент Әкімшілігінің, Үкімет Аппаратының, мемлекеттік органдардың өкілдері, өңір әкімдіктері, Министрліктің Қоғамдық кеңесінің мүшелері мен Министрлікке қарасты ұйымдар қатысты.Алқа отырысында Министрліктің 2024 жылғы жұмыс қортындылары аталып өтті: Президент Жарлығымен «жасыл экономикаға» көшу тұжырымдамасы өзектендірілді, оны іске асыру жөніндегі іс-шаралар жоспары Үкімет қаулысымен бекітілді, Жасыл экономиканың 9 бағыты бойынша 103 іс-шара қарастырылды.Үкімет қаулысымен Экологиялық мәдениетті дамытудың 2024 – 2029 жылдарға арналған «Таза Қазақстан» тұжырымдамасы бекітілді.Өткен жылы экологиялық жобаларды қаржыландыруды қамтамасыз ету үшін қолдау күшейтілді.Өнеркәсіпті дамыту қоры арқылы өңдеуші өнеркәсіп саласында қоршаған ортаның жай-күйін жақсартуға бағытталған экологиялық жобаларды жүзеге асыру үшін 120 млрд. теңгеден астам қаражат бөлінді.Қалдықтарды жинау және қайта өңдеумен айналысатын арнайы кәсіпорындарға төлем жасауға арналған «EcoQoldau» бағдарламасы қайта іске қосылды.Орман шаруашылығы мекемелерінің машина-трактор паркін жаңарту жалғастырылды.2023-2024 жылдары шамамен 2 мың бірлік техника мен 4 мың бірлік жабдықты сатып алуға шамамен 68 млрд. теңге бөлінді.Мұндай ауқымды жаңарту тәуелсіздік жылдарында алғаш рет жүзеге асып жатқанын атап өткен жөн.2025 жылы да Министрліктің алдында маңызды міндеттер тұр.Біріншіден, Президенттің «Таза Қазақстан» бастамасы Қазақстан халқы тарапынан жоғары деңгейде қолдау табуда.Осы жылы 2024 жылдың қорытындысын салтанатты түрде атап өту мақсатында «TazaLike» фестивалін Астана қаласында өткізу жоспарлануда.Екіншіден, өткен жылғы кемшіліктерді ескере отырып, қатты тұрмыстық қалдықтарды басқару саласындағы инвестициялық жобаларды іске асыру күшейтіледі.Ағашты терең өңдеу бойынша инвестициялық жобаларды жедел жүзеге асыру және олардың инвестициялық тартымдылығын арттыру мақсатында биылғы қаңтар айында өткен Инвестициялық штаб отырысында аукцион өткізбей-ақ инвесторлармен шарт жасасу тәртібі қабылданды.Тағы бір маңызды бағыт – сирек кездесетін және жойылу қаупі бар жануарларды сақтау.Өткен жылы Тұран жолбарысы мен Пржевальский жылқысын қайта жерсіндіру жобалары басталды.Сондай-ақ, Ресей Федерациясымен шекарада киіктердің еркін қоныс аударуы үшін экологиялық дәліздер құру және көші-қон жолдарын қалыптастыру жұмыстары жүргізілуде.24 мемлекеттік орман иеленушінің аумағында ерте анықтау жүйесін енгізу, жабық тамыр жүйесі бар отырғызу материалын өсіруді масштабтау жұмыстарын бастау, лизингтік қаржыландыру шеңберінде өртке қарсы техникаларды сатып алуды аяқтау, Семей Орманы резерваты үшін ағаш дайындау техникасын сатып алу, Ақкөл орман шаруашылығы базасында орман шаруашылығы қызметкерлері үшін өңірлік білім беру орталығын ашу бойынша жұмыстарды бастау, Қызылорда қаласында Қазақ орман шаруашылығы ғылыми институтын филиалын ашу, Ерекше қорғалатын табиғи аумақтарда құру және кеңейту жөніндегі жұмыстарды жалғастыру, 3 Ерекше қорғалатын аумақты 648 мың гектарға кеңейту.Сондай-ақ, «Жасыл даму» АҚ бірлесіп, 6 ұлттық паркте «Таза туризм» жобасын іске асыруды жалғастыру, 6 Ерекше қорғалатын табиғи аумақтарда Бақылау өткізу пункті автоматтандыруды жүргізу, қолма-қол ақшамен төлеуді болдырмау.Келесі маңызды мәселе – Министрлік қадағалайтын бағыттар бойынша заңнаманы жетілдіру. Қазіргі уақытта Мәжілісте Парламент депутаттары мен Үкімет бастамашы болған ауқымды түзетулер қаралуда.Алқа отырысы аяқталғаннан кейін бұқаралық ақпарат құралдарына арналған Орталық коммуникациялық қызметінде брифинг өткізілді.Ақпарат көзі : https://www.gov.kz/memleket/entities/ecogeo/press/news/details/943749

Ақмола облысының әкімі Марат Ахметжанов Бурабай ауданына жұмыс сапары барысында Щучинск қаласындағы тұрғын үйлердің құрылысымен танысып, фильтр шығаратын кәсіпорынға барды.Құрылыс компаниясы өкілдерінің айтуынша, аудан әкімдігі сатып алатын пәтерлерге жөндеу жұмыстары жүргізіледі. Қазіргі таңда екі тұрғын үй кешенінен әлеуметтік осал топтарға арналған 100 пәтерді сатып алу жоспарлануда.«Дайын пәтерлерді сатып алу арқылы баспанаға мұқтаж жандардың кезегін азайтуға бірегей мүмкіндік туды. Сонымен қатар, бұл тұрғын үйлер бюджет есебінен салынған үйлерге қарағанда сапалырақ. Бұл шара көпбалалы отбасылардың, жетім балалардың, мүмкіндігі шектеулі азаматтардың және басқа да әлеуметтік маңызы бар санаттағы тұрғындардың баспана жағдайын жақсартуға мүмкіндік береді. Үй қаланың ішінде орналасқан, барлық коммуникация тартылған, жанында әлеуметтік нысандар бар. Өткен жылы 200 пәтер сатып алынды, биыл да осы көлемнен кем болмайды», – деп атап өтті аймақ басшысы.Халық үшін ең маңызды мәселелердің бірі – тұрғын үйдің қолжетімділігі. Айта кетерлігі, өткен жылы Бурабай ауданында тұрғын үйлердің салынуы мен пәтерлердің сатып алынуы нәтижесінде 178 отбасының баспана жағдайы жақсарды. Жалпы өңір бойынша өткен жылы 850 пәтер сатып алынды.Аймақ басшысы сондай-ақ шаң-газ тазарту, желдету және сұйықтықты сүзу жүйелеріне арналған өнеркәсіптік сүзгілерді шығаратын «Asiafilter Inc» ЖШС кәсіпорнында болды.Коммерциялық директор Руслан Балмағамбетовтың айтуынша, кәсіпорын Қазақстандағы жалғыз өнеркәсіптік сүзгі өндірушісі болып табылады. Компания 2011 жылы жеткізуші ретінде құрылған, ал 2019 жылы 40 жергілікті қызметкер жұмыс істейтін өз өндірісін іске қосты.«Біздің өнімдер энергетика, металлургия, химия және азық-түлік өнеркәсібінде қолданылады. Барлығы төрт түрлі сүзгі шығарамыз: ғимараттарға кіретін ауаны тазартуға арналған сүзгілер (әкімшілік ғимараттар, ауруханалар, мектептер және т.б.); ауа рукавты сүзгілер (өнеркәсіптік кәсіпорындардың шығарындыларын тазарту); сұйықтық сүзуге арналған қапшықты сүзгілер (азық-түлік өнеркәсібінде қолданылады); сұйықтықтан ұсақ қатты бөлшектерді бөлуге арналған сүзгі мата (қымбат металдар өндірісінде қолданылады). Яғни, біздің сүзгілер жеңіл өнеркәсіптен бастап ауыр өнеркәсіпке дейін әртүрлі кәсіпорындарда қолданылуы мүмкін», – деп түсіндірді Р. Балмағамбетов.Бұрын өнеркәсіптік сүзгілер негізінен Еуропадан сатып алынатын, жеткізу екі айға дейін созылатын. «Asiafilter Inc» компаниясының құрылуымен бұл жағдай өзгерді. Оның тұрақты серіктестері Қазақстанның көптеген кәсіпорындарына айналды. Мысалы, Ақмола облысында бұл – «RG Gold» ЖШС және «Altyntau Kokshetau» АҚ алтын өндіруші компаниялары. Өнімдер Қырғызстан мен Ресейге де экспортталады. Өткен жылы Өзбекстан астанасында өкілдік ашылды.Биыл кәсіпорында қосымша өндірістік желілер іске қосылып, азық-түлік өнеркәсібіне арналған сүзгілердің жаңа түрлерін шығару жоспарлануда.Марат Ахметжанов кәсіпорынның жоспарларын қолдап, оның қазақстандық үлесті дамытудағы маңыздылығын атап өтті.Ақпарат көзі : https://www.gov.kz/memleket/entities/aqmola/press/news/details/943764

Балаларды оңалту орталығы Шалқар аудандық ауруханасының ғимараттарының біріне орналастырылған. Мұнда қайта жаңарту, жөндеу жұмыстары жүргізілді. Ауданға жұмыс сапары аясында облыс әкімі Асхат Шахаров оңалту орталығының ғимаратын аралап шықты. Аудандық аурухананың бас дәрігері Есенғали Көпеновтің айтуынша, «Әлихан Ойл» ЖШС орталықта жылу жүйесі мен электр сымдарын ауыстырған, ішкі әрлеу жұмыстарын жүргізіп, жаңа лифт орнатқан, ғимараттың қасбетін жаңартыпты.Орталықта түрлі аурулары бар балалар оңалтудан өте алады. Шалқар ауданы ғана емес, сонымен қатар жақын орналасқан Ырғыз ауданының балаларын қамтуға қауқарлы. Реабилитолог, невропатолог, логопед, травматолог, ортопед, психолог қызмет көрсетеді. Мұнда тыныс алу гимнастикасы, ойын терапиясы, аудиологпен сабақтар, электрофорез, тұз шахтасы және басқа да процедуралар қарастырылған. Барлық қажетті жабдықтар «Самұрық Қазына» ұлттық әл-ауқат қоры және «Қазақстан Халқына» қайырымдылық қоры арқылы сатып алынды. «Оңалту 18 жасқа дейінгі балаларға көрсетіледі. Осындай қызмет көрсету спектрі бар ұқсас орталық Ақтөбедегі облыстық балалар ауруханасында жұмыс істейді. Біздің мамандарымыздан бөлек, телемедицина арқылы облыстық аурухананың дәрігерлері пациенттерге қашықтан кеңес береді. Медициналық қызметтерге және қызмет көрсетуге лицензия алынды. Біз әлеуметтік медициналық сақтандыру қоры арқылы қаржыландыруды күтеміз», - деді аудандық аурухананың бас дәрігері. Бүгінгі таңда Шалқар ауданында 852 бала диспансерлік есепте тұр, 233 бала оңалтудан өтіп жатыр. Бұл орталық бір ауысымда 20 балаға дейін және жылына 450 кішкентай тұрғынды қабылдай алады. Штатта 12 медициналық қызметкер болуы тиіс. Облыс әкімі қысқа мерзімде қаржыландыру мәселесін шешуді және балалар үшін оңалту орталығын ашуды тапсырды. Оңалтудағы басты назар неврологиялық ауруларға аударылуы керек. Әкім атап өткендей, психикалық ауытқулары бар балалар әрдайым медициналық мекеменің тұрақты бақылауында болуы керек.«Бұл оңалту орталығын ашу – ел Президентінің балаларға, әсіресе тұрақты медициналық қолдауды қажет ететіндерге оңалту қызметтерінің қолжетімділігін кеңейту жөніндегі тапсырмасы аясындағы маңызды қадам. Біз балаларымызға өз ауданынан шықпай-ақ ыңғайлы жағдайда жоғары сапалы медициналық көмек алу мүмкіндігін қамтамасыз етуге міндеттіміз. Сондықтан мен қаржыландыру процесін жеделдетуге және осы орталықты қысқа мерзімде ашуға бұйрық бердім. Бұл жоба азаматтарымыздың денсаулығы мен өмір сүру сапасын жақсарту бағдарламасының маңызды бөлігі және өңірдегі осындай орталықтарды кеңейту жұмыстарын жалғастырамыз», - деді әкім.Ақпарат көзі : https://www.gov.kz/memleket/entities/aktobe/press/news/details/943754