Отан қорғаушысы күні қарсаңында Астанада әскери-патриоттық және мәдени іс-шара өтті. Оның мақсаты – қайта жаңғыртылған көне ұлттық музыкалық аспаптардың тарихи маңызын таныту, ұрпақтар сабақтастығын нығайту, жастарға әскери-патриоттық тәрбие беру және әскери қызметтің беделін арттыру.Кездесу Астана қаласы Мәдениет басқармасының Ұлттық өнер музейі ғимаратында өтті. Іс-шараға Қазақстан Республикасы Қарулы Күштері ардагерлері қоғамдық бірлестігінің мүшелері мен “Жас сарбаз”әскери-патриоттық қозғалысының тәрбиеленушілері қатысты.Шараға қоғам қайраткерлері, Халық қаһарманы армия генералы Мұхтар Алтынбаев, Қазақстан Республикасы Қарулы Күштері мен ҰҚК Шекара қызметінің ардагерлері, Астана қаласы әкімдігінің және Қорғаныс істері департаментінің өкілдері қатысты.- Бүгінгі шарадан үлкен әсер алдық. Өнерпаз бауырларымызға рахмет, бұрынғы бабалар уақытына өтіп кеткендей әсерде болдық. Ежелден ерлердің ерлігі арқасында талай тарих тезінен аман өтіп келе жатқан халқымыздың, батыр бабаларымыздың сан ғасырлар бойы жауынгерлік жорықта, майдан даласында әр түрлі дыбыстық белгілер жіберіп, «жау келді», «дұшпан шегінді» белгілерін дабылдатып қолданған, алыс шалғайларда жүргенде туған елдің жылуын жүрегіне жеткізген, бұл күндері ұмыт бола бастаған сазды аспаптардың сан түрін қайта жаңғыртып, жаңа өмір сыйлаған ұжымға алғысымызды білдіреміз. Алда келе жатқан Отан қорғаушысы мерекесі құтты болсын. Ұрпақтар сабақтастығы жалғаса берсін, - деді «ҚР Қарулы Күштері ардагерлері» РҚБ төрағасы Халық қаhарманы армия генералы Мұхтар Алтынбаев.Іс-шара барысында қонақтар көне музыкалық аспаптарды қалпына келтіру шеберханасымен танысып, музей экспонаттарын тамашалады. Экспозицияда, әсіресе сирек кездесетін желбауыз, мес сырнай, уілдек, тастауық, дабыл, кепшік, керней, бұғышақ, нар дауылпаз, сондай-ақ сыбызғының алпыстан астам түрі және өзге де көне музыкалық аспаптар қамтылды.Кездесу этно-фольклорлық Жошы ансамблінің концерттік бағдарламасымен жалғасты.- Ерекше атап өтетін жайт, музыканың орны әскери тәрбиеде өте маңызды күшке ие. Ол рух беріп, жігерлендіреді. Ата-бабаларымыз кезінде жаумен соғысқанда да, әр-түрлі музыкалық асапаптарды қолданып, жорыққа шыққан батырларды осылайша рухтандырып отырған, - деді «Қарулы Күштердің ардагерлері» РҚБ төрағасының орынбасары отставкадағы генерал-майор Марат Нағұманов.Жошы этно-фольклорлық ансамблі сазсырнай, шаңқобыз, сыбызғы аспаптарында «Жолбарыстың жорытуы», «Ортеке» шығармаларын орындады. Музейде естілген көне керней дауысы ардагерлер мен жастарды ерекше әсерге бөледі. Ансамбль мүшесі 2-3 минут ішінде Ұлытау жерінің сазбалшығынан сырнай жасап, ардагерлерге сыйға тартты.- Ардагерлермен кездесуден біз үлкен тәрбие алып, ұлттық құндылықтарымыз туралы білімімізді тереңдете түстік, кездесу біз үшін тағылымды, әрі қызықты болды, - деді Жоғары медицина колледжінің 1 курс студенты Аянат Жақсылықова.Өнер атты жұмсақ күш пен әскери рух біріккен ерекше кездесу жастар есінде көпке сақталары анық.Ақпарат көзі : https://www.gov.kz/memleket/entities/mod/press/news/details/1212293?lang=kk

Қостанай облысында Рудный әлеуметтік-гуманитарлық колледжі базасында ұлы ағартушы, педагог және қоғам қайраткері Ыбырай Алтынсариннің 185 жылдығына арналған «Ыбырай Алтынсариннің рухани-педагогикалық мұрасы және ұлттық білім беру жүйесінің қалыптасуы» тақырыбындағы республикалық ғылыми-практикалық конференция өтті.Іс-шараны Қостанай облысы әкімдігінің білім басқармасы мен Әдістемелік орталық ұйымдастырып, Техникалық және кәсіптік білім беру департаментінің қолдауымен өткізілді. Конференцияны тікелей ұйымдастыруды Рудный әлеуметтік-гуманитарлық колледжі жүзеге асырды.Ауқымды жиын еліміздің түкпір-түкпірінен келген 140-тан астам қатысушыны біріктірді. Олардың қатарында ғылым және білім саласының өкілдері, жоғары оқу орындарының оқытушылары, техникалық және кәсіптік білім беру ұйымдарының педагогтері, докторанттар, ғылыми қызметкерлер мен қоғам қайраткерлері бар.Конференция қазіргі білім беру жүйесін дамыту мәселелерін талқылауға және Ыбырай Алтынсариннің рухани-педагогикалық мұрасын заманауи талаптар тұрғысынан зерделеуге арналған маңызды алаңға айналды. Қатысушылар дәстүрлі құндылықтардың сабақтастығы мен білім беру үдерісіне инновациялық тәсілдерді енгізу мәселелеріне ерекше назар аударды.Пленарлық және секциялық отырыстар барысында ұлттық білім беру моделін қалыптастырудағы Алтынсарин идеяларының рөлі, жастардың рухани-адамгершілік тәрбиесі, педагогика ғылымының дамуы, сондай-ақ заманауи білім беру технологияларын енгізу мәселелері кеңінен қарастырылды. Сонымен қатар отандық педагогиканың озық дәстүрлерін халықаралық тәжірибемен ұштастыру бағыттарына басымдық берілді.Конференция қорытындысы бойынша білім беру жүйесін одан әрі жетілдіруге, мамандар даярлау сапасын арттыруға және елдің ғылыми-білім беру әлеуетін дамытуға бағытталған нақты ұсынымдар әзірленді.Мұндай іс-шараларды өткізу кәсіби диалогты нығайтуға, озық тәжірибе алмасуға және ұлттық құндылықтарға негізделген, инновациялық дамуға бағытталған бірыңғай білім беру кеңістігін қалыптастыруға ықпал етеді.Ақпарат көзі : https://www.gov.kz/memleket/entities/kostanay/press/news/details/1212050?lang=kk

Әлеуметтік маңызы бар азық-түлік тауарларының (ӘМАТ) бағасын реттеу – Қазақстан Республикасы Сауда және интеграция министрлігінің негізгі басым бағыттарының бірі.Бағаны тұрақтандыру мақсатында мемлекеттік бақылауды қоса алғанда, кешенді шаралар іске асырылып жатыр.2026 жылдың басынан бастап ӘМАТ тізімі 19-дан 31 атауға дейін кеңейтілді. Осыған байланысты бақылау шараларын күшейту қажеттілігі туындап отыр.Ағымдағы жылдың сәуір айының ортасындағы жағдай бойынша, ӘМАТ-қа белгіленген шекті сауда үстемесін асырғаны үшін 1 406 әкімшілік айыппұл салынды. Бұл көрсеткіш 2025 жыл бойы осы бап бойынша тіркелген құқық бұзушылықтардың жалпы санының (2 913) шамамен 50 пайызына тең.Баға қалыптастыру тізбегіндегі делдалдық схемаларды анықтау бойынша өңірлік комиссиялардың жұмысы жанданды. Ел бойынша барлығы 372 отырыс өткізіліп, 1 092 заң бұзушылық анықталды, 974 хаттама толтырылды, тауар өткізу тізбегінен 118 делдал шығарылды.Негізгі бағыттардың бірі – электрондық шот-фактураларды талдау. Жыл басынан бері сауда үстемесін асыру тәуекелі бар 2 361 жағдай анықталып, олар бойынша мәліметтер өңірлік бөлімшелерге егжей-тегжейлі қарау және тиісті шаралар қабылдау үшін жолданды.Айта кету керек, министрлік бақылау жүргізудің заманауи тәсілдерін енгізуде. Электрондық шот-фактураларды талдау барысында цифрлық құралдар, соның ішінде жасанды интеллект технологиялары қолданылады. Бұл қысқа уақыт ішінде үлкен көлемдегі деректерді өңдеуге және құқық бұзушылықтарды анықтау тиімділігін арттыруға мүмкіндік береді.Тиімсіз делдалдықты болдырмау үшін деректерді талдаудың жаңа әдістері қолданылады. Атап айтқанда, бір өңір шеңберінде үш және одан да көп көтерме буын қатысатын тізбектер, сондай-ақ бір күн ішінде жасалған төрт және одан көп буынды мәмілелер анықталады. Бұдан бөлек, мәміле қатысушыларының өзара байланысы да талданады. Анықталған барлық тәуекелдер өңірлік комиссиялардың қарауына жіберіледі. Олардың міндеті – сауда заңнамасының сақталуын бағалап, тиімсіз делдалдарды тізбектен шығару бойынша шаралар қабылдау.Қазақстан Республикасы Сауда және интеграция министрлігі мемлекеттік бақылау тетіктерін одан әрі жетілдіруді және әлеуметтік маңызы бар азық-түлік тауарлары бағасының тұрақтылығын қамтамасыз етуге бағытталған шараларды жалғастырады.Ақпарат көзі : https://www.gov.kz/memleket/entities/mti/press/news/details/1211934?lang=kk

Біріккен Ұлттар Ұйымының (БҰҰ) штаб-пəтерінде Ядролық қаруды таратпау туралы шартқа (ЯҚТШ) қатысушы мемлекеттердің Шолу конференциясы аясында Қазақстан Республикасының делегациясы халықаралық таратпау режимі жəне ядролық қарусыздануды нығайту бойынша белсенді жұмысын жалғастырды.Қазақстан Ядролық қарудан бос аймақтар жөніндегі коалицияның төрағасы ретінде Орталық Азиядағы ядролық қарудан азат аймақ туралы шарты (Семей шарты) шеңберінде қазақстандық делегацияның басшысы, Қазақстан Республикасы Сыртқы істер министрінің бірінші орынбасары Ержан Ашықбаев Латын Америкасы мен Кариб бассейніндегі ядролық қаруға тыйым салу агенттігінің (OPANAL) Бас хатшысы Хуан Карлос Охедамен консультациялар өткізді. Кездесу қорытындысы бойынша тараптар 2024 жылғы желтоқсанда қол қойылған Өзара түсіністік туралы меморандумды одан əрі нығайту үшін нақты шаралар мен қадамдарды келісті.Шолу конференциясы аясында Қазақстан БҰҰ-ның Қарусыздану мəселелері жөніндегі басқармасы (UNODA), БҰҰ Қарусыздану мəселелерін зерттеу институты (UNIDIR) жəне Nuclear Threat Initiative (NTI) үкіметтік емес зерттеу орталығы серіктестігімен ядролық қарудан бос аймақтарды нығайту жəне Семей шартының 20 жылдығына арналған арнайы іс-шара ұйымдастырды. Іс-шараны аша отырып, Е.Ашықбаев ядролық қарудан бос аймақтардың қарусыздану жəне жаһандық таратпау режимін тұрақтандыратын маңызды элементтердің бірі ретіндегі рөлін атап өтті.Пікірталасқа Орталық Азия елдерінің өкілдері, сондай-ақ ядролық қаруға ие мемлекеттердің делегация басшылары мен шолу конференциясына қатысушы сарапшылар белсенді қатысты. Талқылау барысында қатысушылар Семей шартына қатысты теріс кепілдіктер хаттамасын ратификациялауды аяқтау жəне басқа да ядролық қарудан бос аймақтардың хаттамаларын ратификациялау қажеттігін, сонымен қатар əлемнің басқа өңірлерінде жаңа аймақтарды құру қажеттігін ерекше атап өтті.Қазақстан делегациясының басшысы АҚШ, Қытай жəне Германия делегация басшыларымен нақты келіссөздер жүргізді. Кездесу барысында тараптар халықаралық қауіпсіздік күн тəртібінің өзекті мəселелері бойынша пікір алмасып, Қазақстанның шолу конференциясының Екінші бас комитетінде төрағалық етуі шеңберіндегі ұстанымдарын талқылады. Қазақстан Президенті Қ.К.Тоқаевтың ядролық державалар арасындағы диалогты қайта бастау туралы бастамасын іске асыру арқылы ядролық қауіпті азайтуға нақты əрі шынайы үлес қосуға дайын екенін қайтадан растады.ЯҚТШ Шолу конференциясы 2026 жылғы 22 мамырға дейін жалғасады.Ақпарат көзі : https://www.gov.kz/memleket/entities/mfa/press/news/details/1211847?lang=kk

Астана, 2026 ж. 29 сәуір – Қазақстан Республикасының Сыртқы істер министрі Ермек Көшербаев Литва Республикасының Астанадағы Елшісі Эгидиюс Навикасты қабылдады.Кездесу барысында тараптар екіжақты және халықаралық алаңдардағы Қазақстан мен Литва ынтымақтастығының жай-күйі мен перспективаларын талқылады. Сауда-экономикалық байланыстарды кеңейту, сондай-ақ көлік және логистика салаларындағы іс-қимылды жандандыру мәселелеріне айрықша назар аударылды.Министр Е. Көшербаев Литваның еліміз үшін Балтық өңіріндегі маңызды серіктесі екенін атап өтіп, Вильнюспен өзара тиімді және сындарлы ынтымақтастықтың одан әрі дами беретініне сенім білдірді.Елші Э. Навикас оның миссиясына көрсетіліп жатқан қолдау үшін ризашылығын жеткізіп, екі ел арасындағы өзара іс-қимылды жалғастыруға дайындығын мәлімдеді.Кездесу қорытындысы бойынша тараптар саяси диалогты одан әрі тереңдетуге, практикалық ынтымақтастықты кеңейтуге және түрлі деңгейлерде тұрақты байланыстарды жалғастыруға өзара мүдделілігін растады.Ақпарат көзі : https://www.gov.kz/memleket/entities/mfa/press/news/details/1211827?lang=kk

Абай облысынан сайысқа барған «Жас сарбаз» балалар-жасөспірімдер әскери-патриоттық қозғалысының тәрбиеленушілері Чирчик қаласында өткен «Vatanparvarlar» халықаралық әскери-спорттық жарысында өздерінің мықты команда екенін көрсетті.Өзбекстан Қорғаныс министрлігі жарысты аты аңызға айналған қолбасшы Әмір Темірдің 690 жылдығына арнады. Құрлық әскерлері институтының базасында өткен жарыстарға Әзербайжан, Беларусь, Қазақстан, Қырғызстан, Тәжікстан, Ресей және Өзбекстан командалары қатысты.Сайыста белтемірге тартылу, АК-74 автоматын шашып-құрастыру бойынша нормативтерді, бірыңғай кедергілер жолағында бақылау жаттығуын орындады, мылтық ату және алғашқы медициналық көмек көрсетуде машықтарын көрсетті. Шығармашылық кезеңде олар өздерінің жан-жақты таланттары мен қабілеттерін паш етті.Жалпы командалық есепте жеті елдің ішінен бірінші орынды Өзбекстан құрамасы иеленді. Қазақстан командасы екінші орын еншіледі. Үшіншіні Қырғызстан мен Беларусь елінен келген жас патриоттар өзара бөлісті.– Жастарымыздың бұл жетістігі «Жас сарбаз» балалар-жасөспірімдер қозғалысының және халықаралық мәртебеге ие болған «Айбын» жастар жиынының дамып келе жатқанын айғақтайды. Бұл сайысқа деген қызығушылық жыл сайын артып келеді. Қатысушы елдердің көбейіп келе жатқаны оған дәлел. Ұдайы жаттығулар мен бәсекелестік тәжірибе біздің командаға Өзбекстан жерінде де нәтижелі өнер көрсетуге ықпал етті, – деді Қарулы күштер Ұлттық әскери-патриоттық орталығының бастығы, Қазақстанның еңбек сіңірген қайраткері Арман Әсенов.«Абай қырандары» клубының тәрбиеленушілері әскери-қолданбалы эстафетада, арқан тартыста және шығармашылық байқауда үздік нәтиже көрсетті. Сонымен қатар, олар мылтық ату, белтемірге тартылу, АК-74 автоматын шашып-құрастыру жарыстарында екінші орын алды. Алғашқы медициналық көмек көрсету кезеңінде үшінші орынға тұрақтады.Ел намысын қорғаған команда құрамында 14 оқушы болды. Жарысқа дайындық Семей қаласының 44793 әскери бөлімінде өткізілді.«Абай қырандары» әскери-патриоттық клубының жетістігі – тамаша дайындық пен патриоттық рухтың айқын көрінісі.Ақпарат көзі : https://www.gov.kz/memleket/entities/mod/press/news/details/1211829?lang=kk

Бүгін Алматы облысында ономастикалық комиссияның кезекті отырысы өтті. Жиында ономастика саласындағы заңнамалық өзгерістер, атау беру және қайта атау үдерісін жетілдіру, 2024–2028 жылдарға арналған жол картасының орындалу барысы талқыланды.Кеңеске комиссия мүшелері, ономастика саласына жауапты аудан әкімдерінің орынбасарлары, бөлім басшылары мен сала мамандары қатысты. Күн тәртібінде өзекті мәселелер қаралып, тиісті баяндамалар тыңдалды. Өңірдегі аудандар мен қалаларда бұл бағытта атқарылып жатқан жұмыстар жайы сөз болды.Мамандардың айтуынша, өткен жылы Алматы облысы бойынша 678 көшеге атау берілген. Сондай-ақ атауы қайталанған не мүлде қойылмаған көшелердің мәселесі шешімін тапқан. Одан бөлек, 154 көшеге соғыс ардагерлерінің есімі берілген.Ономастика саласындағы айтулы жаңалықтың бірі – енді жекеменшік білім беру ұйымдарына тұлғалардың есімін беру және атауын өзгерту үшін міндетті түрде облыстық ономастикалық комиссияның келісімі керек. Бұл «Қазақстан Республикасының Тіл туралы» Заңына енгізілген өзгерістерге сәйкес іске асуда.Комиссия отырысында 181 көшеге атау беру туралы ұсыныстар қаралды. Олар «Жер-су атаулары» және «Дәстүрлі атаулар» тізімдерінен іріктеліп алынған. Жиында көше атауларының дұрыс жазылуын бақылау, аншлагтарды бірыңғай талапқа сәйкес орналастыру, заңнама талаптарының сақталуын күшейту мәселелеріне ерекше назар аударылды. Сонымен қатар жұмыс барысын жүйелеу, түсіндіру шараларын жандандыру және ономастикалық атауларды реттеу бағытында нақты тапсырмалар берілді.Ақпарат көзі : https://www.gov.kz/memleket/entities/almobl/press/news/details/1211822?lang=kk

Қостанай өңірі еліміздің цифрлық трансформациясындағы жетекші орталықтардың біріне айналғанын «QOSTANAI TECH» ауқымды фестивалі айқын көрсетті. 10 мыңнан астам қатысушыны біріктірген бұл іс-шара қала кеңістігін толыққанды технологиялық алаңға айналдырып, өнеркәсіп, ғылым, білім және IT салаларының тоғысу нүктесіне айналды.Фестивальдің ашылуында Қостанай облысының әкімі Құмар Ақсақалов цифрландыру мен жасанды интеллект өңір экономикасының негізгі даму бағыты екенін атап өтті. Бүгінде облыс өңдеу өнеркәсібі бойынша елде 4-орында, ал экономиканың 70 пайыздан астамы осы секторға тиесілі. Өндірісте 145 өнеркәсіптік робот жұмыс істеп, цифрлық басқару және жасанды интеллект элементтері кеңінен енгізілуде.Аграрлық салада да ауқымды цифрлық өзгерістер жүзеге асқан: егістіктің 100 пайызы, жайылымдардың 90 пайызы және шабындықтардың 95 пайызы цифрландырылған. Нәтижесінде шығын 40 пайызға азайып, өнімділік 30 пайызға артқан, ал өндірістік шығындар 15 пайызға қысқарған.Халықаралық бағдарлама аясында TED форматындағы сессиялар өтіп, әлемдік деңгейдегі сарапшылар өз ойларымен бөлісті. Нобель бейбітшілік сыйлығының лауреаты Рае Квон Чунг онлайн байланыс арқылы сөз сөйлеп, болашақ білім беру жүйесінде құндылықтардың шешуші рөл атқаратынын атап өтті.Фестивальдің ерекшелігі — оның қала кеңістігіне терең интеграциялануы. Ашық алаңдарда ғылыми эксперименттер, инженерлік демонстрациялар, робототехника көрмелері мен дрон технологиялары көрсетілді. «Жастар сарайы» толыққанды «ақылды қала» моделіне айналып, интерактивті және цифрлық инсталляциялармен жабдықталды.Жасанды интеллект, робототехника және дрон-футбол сияқты жаңа технологиялық бағыттар үлкен қызығушылық тудырды. Студенттер AI негізіндегі цифрлық шешімдер әзірлеп, хакатон барысында нақты салаларға арналған прототиптер ұсынды.Сонымен қатар өңірде өнеркәсіптік туризм бағыты іске қосылып, қатысушылар ірі кәсіпорындардың өндірістік циклін — Allur, KIA және «Агромаш» зауыттарын — тікелей көріп танысты.«QOSTANAI TECH» фестивалі Қостанай облысының цифрлық экономикаға бет бұруын айқындап, өңірді білім, технология және инновация тоғысқан жаңа даму моделіне жақындатты. Ақпарат көзі : https://www.gov.kz/memleket/entities/kostanay/press/news/details/1211810?lang=kk

Премьер-министрдің орынбасары – ұлттық экономика министрі Серік Жұманғариннің төрағалығымен өткен Салық кодексін енгізу жөніндегі жобалық кеңсенің 13-ші отырысында Қазақстанның резидент еместерінің аванс бойынша міндеттемелері түріндегі кірістерін тану мерзімдері мен шарттары қаралды.Талқылау барысында салық органдары мерзімдерді ұзарту кезінде теріс пайдалану тәуекелдері бар екенін жеткізді. Жиын қорытындысында Салық кодексіне ірі инвестициялық жобаларды жүзеге асыратын инвесторлар үшін, сондай-ақ әуе кемелерін сатып алатын авиакомпаниялар үшін ерекшелік түрінде резидент еместердің кірістерін тану мерзімін ұзарту мүмкіндігін көздейтін өзгерістерді енгізу туралы шешім қабылданды. Мұндай ерекшеліктерді қолдану қажеттілігі бейінді салалық министрліктің қорытындысымен расталатын болады.Ақпарат көзі : https://www.gov.kz/memleket/entities/economy/press/news/details/1211607?lang=kk

Қостанай қаласында жылдың ең ірі отбасылық ғылыми-инновациялық фестивалі — «QOSTANAI TECH» өз жұмысын жалғастыруда. Ауқымды іс-шараға облыс тұрғындары, еліміздің түрлі өңірлерінен келген қонақтар, бизнес, ғылым, ІТ саласының өкілдері мен жастар көптеп жиналды.Таңертеңнен бастап «Жастар сарайы» мен оған іргелес аумақ ғылымға, технологияға және цифрлық экономиканың болашағына қызығушылық танытқан жандардың бас қосатын орталығына айналды.Фестивальдің ашылуына Қостанай облысының әкімі Құмар Ақсақалов қатысып, бүгінде технологиялар мен жасанды интеллектіні дамыту өңірдің және тұтас елдің бәсекеге қабілеттілігін айқындайтын басты факторлардың біріне айналғанын атап өтті.— Бүгінде цифрландыру, роботтандыру және жасанды интеллект өндіріс, ауыл шаруашылығы, денсаулық сақтау, білім беру және қызмет көрсету салаларына кеңінен еніп отыр. Біздің басты міндетіміз — білім экономикасын қалыптастырып, жаңа буын мамандарын даярлау, — деді өңір басшысы.Фестивальдің іскерлік бағдарламасындағы ерекше оқиғалардың бірі — Нобель сыйлығының 2007 жылғы лауреаты, оңтүстіккореялық дипломат және ғалым Ра Квон Чунгтың онлайн байланыс арқылы қатысуы болды.Өз сөзінде ол технологиялық дамудың тұрақты даму және экологиялық жауапкершілікпен тығыз байланыста жүруі қажеттігін ерекше атап өтті.— Экономикалық өсім болашақ ұрпақ алдындағы жауапкершілік пен қоршаған ортаға деген қамқорлықсыз мүмкін емес, — деді Нобель лауреаты фестиваль қатысушыларына арнаған үндеуінде.Осындай халықаралық деңгейдегі спикердің қатысуы форумның мәртебесін арттырып, оны технологиялар мен болашақ мәселелері жөніндегі жаһандық диалог алаңы ретінде айқындай түсті.Қазіргі уақытта фестиваль аясында интерактивті аймақтар, заманауи технологиялар көрмесі, VR және AI алаңдары, робототехника зертханалары, киберспорт аренасы, балалар мен ересектерге арналған ғылыми шоулар жұмыс істеуде.Қонақтардың ерекше қызығушылығын виртуалды шындық арқылы ауыл шаруашылығы техникасын басқару, электромобиль құрастыру желілерінің симуляциясы және инженерлік шеберлік сабақтары тудырып отыр.Сонымен қатар халықаралық және қазақстандық сарапшылардың қатысуымен TED форматындағы баяндамалар жалғасуда.Фестиваль әлі де жалғасуда. Алда қонақтарды өндірістік экскурсиялар, хакатон финалы және үлкен концерттік бағдарлама күтіп тұр.Ақпарат көзі : https://www.gov.kz/memleket/entities/kostanay/press/news/details/1211389?lang=kk

Сауда және интеграция вице-министрі Айдар Әбілдәбеков Ақтау қаласындағы көтерме базарларды аралады. Ол «Асар-С» базарын, сондай-ақ KazFruit және Asia Fruit Aktau ірі көкөніс қоймаларын аралады. Бұл нысандар арқылы Маңғыстау облысына өнімнің негізгі бөлігі жеткізіледі. Аталған жұмыс Премьер-министр Олжас Бектенов тапсырмасы аясында, азық-түлік нарықтарында тәртіп орнату және тиімсіз делдалдықты жою мақсатында жүргізілді.Өңірде арнайы комиссия құрылып, «Көк базар», «Асар-С» базарларында және «Мағаш» базарының ет секторында мониторинг жүргізді. Тексеру нәтижесінде бірқатар заң бұзушылық анықталды. Бес кәсіпкер әлеуметтік маңызы бар азық-түлік тауарларын белгіленген сауда үстемесінен жоғары бағамен сатқан. Оларға қатысты әкімшілік шаралар қабылданды.Сонымен қатар «Мағаш» базарында ет өнімдерінің бағасын негізсіз көтеру дерегі тіркелді. Комиссияның араласуынан кейін еттің бір килограмының бағасы 4500 теңгеден 3500 теңгеге дейін төмендетілді.Бұдан бөлек, жеткізу тізбектерінде артық делдалдық буындар анықталды. Бір күн ішінде бір тауар бойынша бірнеше мәміле жасалған жағдайлар тіркелген. Нәтижесінде «Товары и Сервис» ЖШС тиімсіз делдал ретінде танылып, жеткізу тізбегінен шығарылды. Бұл Ақтаудағы ірі сауда желілерінің біріне өнімді көтерме жеткізушіден тікелей сатып алуға мүмкіндік беріп, картоп бағасын 275 теңгеден 242 теңгеге, пиязды 165 теңгеден 132 теңгеге дейін төмендетуге ықпал етті.Ұқсас жағдай көкөніс жеткізу барысында Asia Fruit Aktau мен Asia Fruit Aktau KZ арасында да анықталды. Делдал алынып тасталғаннан кейін сауда желісі тікелей сатып алуға көшіп, картоп бағасы 235 теңгеден 225 теңгеге, сәбіз 264 теңгеден 205 теңгеге дейін төмендеді.«Өңірде делдалдық схемаларды анықтау бағытындағы жұмысты күшейту қажет. Жыл басынан бері анықталған делдалдар саны аз және бұл көрсеткіш күмән тудырады. Сонымен қатар Маңғыстау облысына өнімнің басым бөлігі импорттаушылар мен өзге өңірлердің көтерме жеткізушілері арқылы жеткізілетін аймақтардың бірі болып отыр. Бұл мәселенің түйіні аймақ басшылығының нақты әрі нәтижелі жұмысына байланысты. Тиісті деңгейде жұмыс жүргізілген жағдайда делдалдық схемаларды жүйелі түрде анықтауға болады»,- деді Айдар Әбілдәбеков.Анықтама үшін: 2026 жылдың басынан бастап мемлекеттік бақылау күшейтілді. 23 сәуірдегі жағдай бойынша 204-4-бап бойынша 1406 айыппұл салынды, бұл 2025 жылы осы бап бойынша тіркелген құқықбұзушылықтардың шамамен 50 пайызына тең. Айыппұлдардың жалпы сомасы 53 млн теңгеден асты. Оның ішінде Маңғыстау облысында 49 айыппұл салынып, жалпы сомасы 540 мың теңгені құрады.Баға айырмашылығын қолдану және баға белгісінің болмауы бойынша 489 қаулы шығарылып, 18,4 млн теңге көлемінде айыппұл салынды. Оның ішінде Маңғыстау облысында 36 қаулы шығарылып, 1,1 млн теңгеден астам айыппұл өндірілді.Қозғалған әкімшілік істер саны бойынша Маңғыстау облысы өңірлер арасында 4-орында тұр.Делдалдық схемаларды анықтау бойынша өңірлік комиссиялардың жұмысы жандандырылды. Республика бойынша 372 отырыс өткізіліп, 1092 заң бұзушылық анықталды, 974 хаттама толтырылып, 118 делдал жеткізу тізбегінен шығарылды.Маңғыстау облысында 23 сәуірдегі жағдай бойынша 27 отырыс өткізілді. Нәтижесінде 51 заң бұзушылық анықталып, оның 49-ында сауда үстемесінің асып кетуі тіркеліп, әкімшілік хаттамалар толтырылды. Сонымен қатар 2 тиімсіз делдал жеткізу тізбегінен шығарылды.Анықталған деректер саны бойынша өңір облыстар арасында 6-орында.Сонымен қатар электронды шот-фактураларға талдау жүргізілуде. Барлығы 4395 жеткізу тізбегі зерделеніп, 2361 тәуекел анықталды. Бұл артық үстеме мен сауда заңнамасын бұзу жағдайларын дер кезінде анықтауға мүмкіндік береді. Ақпарат көзі : https://www.gov.kz/memleket/entities/mti/press/news/details/1211253?lang=kk

Алматыдағы Қазақстан Республикасы Қорғаныс министрлігінің Бітімгерлік операциялар орталығы базасында БҰҰ стандарттарына сәйкес ұйымдастырылған екі апталық сертификатталған «БҰҰ штаб офицерлері» курсы аяқталды.Оқытуға Қарулы күштер, Ұлттық ұлан, Төтенше жағдайлар министрлігі әскери қызметшілері, Пәкістан мен Қытайдан келген тыңдаушылар, сондай-ақ Қазақстан менеджмент, экономика және болжау институтының өкілдері қатысты. Сабаққа Франция мен Сербиядан келген нұсқаушылар да тартылды.Тыңдаушылар БҰҰ бітімгерлік операцияларының жүйесін, қағидаттарын, сондай-ақ оларды жоспарлау мен іске асыру тетіктерін жан-жақты меңгерді. Оқу бағдарламасы теория мен практиканы ұштастыру негізінде құрылды.Әскери қызметшілер штаб офицерлерінің жұмыс алгоритмдерін игеріп, нақты жедел жағдайларға негізделген оқу-жаттығуларға қатысты. Курс барысында халықаралық гуманитарлық құқық, БҰҰ нормативтік-құқықтық базасы және миссияларды логистикалық қамтамасыз ету мәселелері кеңінен қарастырылды.Бітімгерлік операциялар орталығы бастығының орынбасары подполковник Рүстем Сүлейменов атап өткендей, бітімгерлерді даярлау халықаралық қауіпсіздікті қамтамасыз ету мен бейбітшілікті сақтау бағытындағы мемлекеттік саясаттың басым бағыттарының бірі.Тыңдаушылардың көпұлтты ортада жұмыс істеу қабілетін арттыру және миссияларға қатысушылардың халықаралық үйлесімділігін қамтамасыз ету мақсатында оқу ағылшын тілінде жүргізілді.Бұл курс Қазақстанның бітімгерлік әлеуетін дамытуға және оның халықаралық қауіпсіздік жүйесіндегі сенімді серіктес ретіндегі ұстанымын нығайтады.Ақпарат көзі : https://www.gov.kz/memleket/entities/mod/press/news/details/1210958?lang=kk

Астана, 2026 жылғы 28 сәуір – Қазақстан Республикасының Сыртқы істер министрі Ермек Көшербаев Астанаға ресми сапармен келген ЕҚЫҰ Демократиялық институттар мен адам құқықтары бюросының директоры Мария Телалианмен кездесу өткізді.Келіссөз барысында Қазақстанның ЕҚЫҰ ДИАҚБ-мен демократиялық институттарды нығайту, сайлау процестерін жетілдіру, құқықтың үстемдігін қамтамасыз ету және адам құқықтарын қорғау салаларындағы одан әрі ықпалдастықтың перспективалары қаралды. Тараптар 15 наурызда өткен республикалық референдумның қорытындыларына, Қазақстан Республикасының жаңа Конституциясының қабылдануына ерекше назар аударды. Бұл елдің саяси жүйесін одан әрі демократияландыру және жаңғырту процесіндегі маңызды кезең болғаны аталып өтті.Министр Қазақстан тарапының сайлау заңнамасын жетілдіру, азаматтық қоғам институттарын дамыту және адам құқықтарын қорғау механизмдерін нығайту мәселелері бойынша ЕҚЫҰ ДИАҚБ-мен конструктивті диалогты жалғастыруға дайындығын атап өтті.Өз кезегінде М. Телалиан қазақстандық тарапқа жылы қабылдауы үшін алғысын білдірді. Ол Бюроның алдағы уақытта да сараптамалық, құқықтық және техникалық қолдау көрсетуге, сондай-ақ демократиялық реформалар мен сайлауды мониторингтеу саласындағы үздік тәжірибелермен алмасуға дайын екенін растады.Кездесу қорытындысы бойынша тараптар диалогты жалғастыруға өзара мүдделіліктерін растады.  Ақпарат көзі : https://www.gov.kz/memleket/entities/mfa/press/news/details/1210907?lang=kk

Аймақ басшысының төрағалығымен өңірдегі мал шаруашылығының дамуы тақырыбына арналған облыс әкімдігінің отырысы өтті.Мемлекет Басшысы атап өткендей, мал шаруашылығы – ауыл шаруашылығының басым бағыттарының бірі. Бұл азық-түлік қауіпсіздігін қамтамасыз етудің, ауылдарда жұмыспен қамтуды арттырып, оларды тұрақты дамытудың негізгі факторы.Былтыр асыл тұқымды мал сатып алуға, сүт пен ет өндірісінің құнын төмендетуге 7,5 млрд теңге бөлінсе, биыл 10,8 млрд қарастырылған. Өсім – 44%. Жылдық 2,5% мөлшерлемемен несие беру жалғасуда.«Үкіметте 2026-2030 жылдарға арналған мал шаруашылығын дамыту жөніндегі кешенді жоспар бекітілді. Біздің облыс осы жоспардың негізгі бастамашыларының бірі болды, аграршылардың арзан несиелік ресурстарға қол жеткізу мүддесін жүйелі түрде қорғап келеді. Қазіргі таңда жылдық 6% мөлшерлемемен «Береке» және «Игілік» жеңілдетілген несиелік бағдарламалары іске асырылуда. Жайылымдық мал шаруашылығы жобаларын жүзеге асыру үшін 7-10 жыл мерзімге дәл осындай мөлшерлемемен «Жайлау» бағдарламасы іске қосылады. Ол еліміздің үш облысында жүзеге асады. Біздің облыста – Арқалық қаласы, Амангелді және Жангелдин аудандарындағы ауыл шаруашылығы тауар өндірушілеріне арналған. Әрбір салынған теңге нақты нәтиже беруі тиіс. Біздің міндет – мал басын көбейту, сапасын арттыру және заманауи технологияларды енгізу үшін қолда бар мүмкіндіктерді тиімді пайдалану», – деді облыс әкімі.Айта кету керек, 2025 жылы 2022 жылмен салыстырғанда облыста мал мен құс санының өсуі байқалады: ірі қара мал 25,2 мың басқа, жылқы 14,2 мың басқа, қой мен ешкі 14,6 мың басқа артты.Мал шаруашылығындағы тұрақты өсім 7 заманауи, ірі өнеркәсіптік сүт-тауар фермаларының іске қосылуымен байланысты. Тағы да осындай 6 ферма салынуда, олардың 5-еуі ағымдағы жылы іске қосылады. Жылына 77 мың тонна шикі сүт өндіретін 12 жаңа заманауи сүт-тауар фермасы 200 мыңнан астам адамның қажеттілігін қамтамасыз етеді.«Мал шаруашылығын дамытуға біз кешенді түрде қарауымыз қажет. Ел Президенті агроөнеркәсіптік кешенді дамытуда нақты басымдықтарды айқындап берді: бұл – терең өңдеу, өнімділікті арттыру және заманауи технологияларды енгізу. Жаңа және жұмыс істеп тұрған фермалар ішкі және сыртқы жағынан өндірістік және санитарлық мәдениеттің үлгісі болуы тиіс. Барлық жерде тазалық, ұқыптылық жоғары деңгейде болуы қажет», – деп атап өтті Құмар Ақсақалов.Ақпарат көзі : https://www.gov.kz/memleket/entities/kostanay/press/news/details/1210843?lang=kk

Астана, 2026 жылғы 28 сәуір – Қазақстан Республикасының Сыртқы істер министрі Ермек Көшербаев Сингапур Республикасының Сыртқы істер министрлігі Тұрақты хатшысының орынбасары Кевин Чеокпен кездесті.Кездесу барысында екі ел арасындағы өзара іс-қимылдың қазіргі жай-күйі мен даму перспективалары қарастырылды. Саяси диалогтың жоғары деңгейі және сауда-экономикалық, инвестициялық бағыттардағы серіктестікті кеңейтуге ортақ қызығушылық аталып өтті.ҚР сыртқы саяси ведомствосының басшысы цифрландыру, инновациялар және орнықты даму салаларындағы ықпалдастықтың әлеуеті жоғары екенін атап өтіп, екіжақты байланыстарды жандандыруға дайындығын жеткізді.Өз кезегінде, К.Чеок Сингапурдың ынтымақтастықты одан әрі тереңдетуге, оның ішінде «жасыл» экономика, логистика және адами капиталды дамытудағы бірлескен жобаларды іске асыруға мүдделі екенін растады.Сондай-ақ іскерлік байланыстарды дамыту және екі елдің бизнес-қауымдастықтары арасындағы өзара іс-қимылды нығайту мәселелеріне ерекше назар аударылды.Ақпарат көзі : https://www.gov.kz/memleket/entities/mfa/press/news/details/1210845?lang=kk

Аймақ басшысы Құмар Ақсақалов «ЭПК Forfait» ЖШС жқмысымен танысты.Ел Президенті электр қуаты тұрақты әрі жеткілікті көлемде өндірілмесе, жасанды интеллектіні енгізу және жаппай цифрландыруды жүзеге асыру мүмкін болмайтынын атап өтті.«Өткен жылмен салыстырғанда желілердегі апат деңгейі 10%-ке төмендеді. «ЭПК-forfait» ЖШС жаңа цифрлық диспетчерлік орталығының арқасында апаттық ажыратуларға әрекет ету уақыты 2 сағаттан 5 минутқа дейін қысқарды. Инфрақұрылымдық көрсеткіштер бойынша да оң динамика бар – электр желілерінің тозу деңгейін 2021 жылғы 83%-тен биыл 73%-ке дейін төмендету, жабдықтарды жаңарту, желілер мен қосалқы станцияларды қайта жаңғырту бойынша жүйелі жұмыстар жүргізілуде», – деді аймақ басшысы.Желілердегі техникалық шығындарды 6,4%-ға дейін қысқарту маңызды жетістік, республика бойынша бұл көрсеткіш 10–11%.Цифрлық есептеу құралдарын, автоматтандырылған мониторинг жүйелерін және жасанды интеллект негізіндегі алғашқы шешімдерді енгізуді ерекше атап өткім келеді.«Біздің міндетіміз – апат салдарын жоюдан оларды болжау мен алдын алуға көшу. Қолмен басқарудан – интеллектуалды энергия жүйесі моделіне өту», – деді Құмар Ақсақалов.Ақпарат көзі : https://www.gov.kz/memleket/entities/kostanay/press/news/details/1210833?lang=kk

Қазақстан Республикасы Қарулы күштерінің тұңғыш Қорғаныс министрі Кеңес Одағының Батыры, Халық қаһарманы армия генералы Сағадат Нұрмағамбетовті еске алуға арналған балалар мен жасөспірімдер арасындағы дәстүрлі халықаралық турнир өтті.Биыл алтыншы рет ұйымдастырылған айтулы дода спорттық бәсеке ғана емес, нағыз отансүйгіштік пен достықтың мерекесіне айналды.Турнирге бразилиялық джиу-джитсу шебері, Tactical Combat бағытының өкілі, 5-ші данның иегері Джулиано Де Пинна, батырдың қызы Айсұлу Нұрмағамбетова, Қорғаныс министрінің орынбасары Дархан Ахмедиев, Алматы облыстық Ардагерлер кеңесінің төрағасы Ерболат Тұрымбетов, әйгілі спортшылар Сора Рахмонова, Әйгерім Әбілқадірова және өзге де қонақтар қатысып, жасөспірімдердің жеңіске деген жігерін оятты.Биылғы турнирге елімізден ғана емес, Қырғызстан, Өзбекстан, Ресей, Грузия және Біріккен Араб Әмірліктері сияқты мемлекеттерден 300-ден астам спортшы қатысты.ҚР Қорғаныс министрінің орынбасары Дархан Ахмедиев сайысқа арнайы келіп, министрлік атынан қолдау білдірді. Біз әскери бөлімдерде джиу-джитсуды енгізіп, ел қорғанына айналатын рухты жастарды дайындап жатырмыз деді ол.Sarbaz+ пилоттық жобасы бойынша мерзімді әскери қызметтегі сарбаздар джиу-джитсу спортын дамытып, жарыстарға шығып жүргенін айта кеткен жөн.Дүбірлі сайыста командалық есепте бірінші орын Qazaqstan Top Team, екінші орын Roller, үшінші орын UWC спорт клубтарына бұйырды.Жеке есепте мықты белдесу көрсеткен Айлин Ысқақова ерекшеленді. Екі салмақ дәрежесінде боз кілемге шыққан ол үш белдесуден өткізіп, екі мәрте алтын тақты.Жарыс соңында Алматы өңірлік гарнизонының Әскери полиция басқармасының қызметшілері арнайы көрсетілім ұсынды. Олардың қоян-қолтық ұрыстағы шеберлігі мен тактикалық қимылдары турнирдің шырайын келтіріп, жас спортшыларға нағыз сарбаздың қандай болуы керектігін көрсетті.Ақпарат көзі : https://www.gov.kz/memleket/entities/mod/press/news/details/1210723?lang=kk

Бүгін Алматы облысының орталығында қазақ киносының Құлагері, Қазақ КСР-ның еңбек сіңірген өнер қайраткері Абдолла Қарсақбаевтың 100 жылдық мерейтойының салтанатты ашылу рәсімі өтіп, шымылдығы түрілді. Игі шарада ұлт тағдырын таспалаған тұлғаның мұрасы кеңінен насихатталып, ғұмыр жолы дәріптелді, – деп хабарлайды Алматы облысы әкімінің баспасөз қызметі.Айтулы кеште зиялы қауым өкілдері, ақын-жазушылар, кинорежиссердің туыстары мен шәкірттері естеліктерімен бөлісті. Шараға облыс әкімі Марат Сұлтанғазиев те қатысып, кинорежиссердің болмысы ел жадында мәңгілік сақталатынын айтты. Сондай-ақ Мемлекет басшысы Қасым-Жомарт Тоқаевтың құттықтауын оқып берді.«Абдолла Қарсақбаев – қазақ киносын жаңа биікке көтерген тағдырлы тұлға. Ол «Менің атым – Қожа», «Даладағы қуғын», «Алпамыс мектепке барады» және басқа да көркем фильмдер түсіріп, мәдениетіміздің мәртебесін арттырды. Кейіпкерлердің болмыс-бітімін асқан шеберлікпен көрсете білді. Бұл фильмдердің барлығы қазақ киносының алтын қорына қосылған құнды қазына екені сөзсіз. Сондықтан мемлекетіміз Абдолла Қарсақбаевтың еңбегін әрдайым жоғары бағалайды.Дарынды режиссер өз туындыларына қазақы танымды, ұлттық рух пен тәлім-тәрбиені арқау етті, сол арқылы өскелең ұрпақтың дүниетанымын байытуға елеулі үлес қосты.Халқымыздың біртуар перзентінің ғасыр тойы ЮНЕСКО аясында аталып өтіп жатыр. Бұл – ұлт тұлғаларының әлемдік деңгейдегі танымалдылығының айқын көрінісі. Қазақстанда да оның есімі халық жадында сақталуы қажет. Осы орайда, бұл жиынның мән-мағынасы зор» – делінген хатта.Қазақстанның Халық әртісі, кинорежиссердің шәкірті Досхан Жолжақсынов өнер жолында шырағын жаққан ұстазының өнегелі өмір жолы жайлы сыр шертті.«Жазушы Әбіш Кекілбаев: «Уақыттың өлшемі – адамның тағдыры, адамның тағдыры – артына қалған ісі», – дейді. Абдолла Қарсақбаевтың жасаған ісін бір кеште түгендеп шығу мүмкін емес. Бір ғана «Менің атым Қожасы» әлемді дүр сілкіндіріп, бәйгені қанжығасына байлап келгенде, қуанбаған қазақ болмаған шығар деп ойлаймын. Мені де халыққа танытып, бағымды ашқан – Әбекем. Қазір сол сәтті сағынышпен еске аламыз», – деді өнер иесі.Концерттік бағдарламада көрермен Абдолла Қарсақбаевтың туындыларына терең бойлап, мәніне үңілді. Ұлы композитор Нұрғиса Тілендиевпен рухани үндестігі баяндалып, ойлы кино мен мәнді әуеннің үйлесімі жүрекке рухани нәр берді. Рамазан Стамғазы, Нұрлан Өнербай сынды халыққа белгілі тұлғалар ән шырқап, өзге де дарын иелері өнерімен тәнті етті.Айта кетейік, Алматы облысының төл перзенті Абдолла Қарсақбаевтың өмірі мен шығармашылығы жыл бойы кеңінен насихатталып, өңіріміздің түкпін-түкпінде айтулы шаралар жалғасын табады. ЮНЕСКО көлемінде аталып өтіп, әлем жұртшылығы қазақ киносының шоқтығы биік туындыларына қанық болады.Ақпарат көзі : https://www.gov.kz/memleket/entities/almobl/press/news/details/1210694?lang=kk

Алматы қаласында ҚР Сауда және интеграция министрлігі Техникалық реттеу және метрология комитеті департаментінің жоспардан тыс тексеруінің қорытындысы бойынша «Орталық қалалық клиникалық аурухана» ШЖҚ КМК қызметінде өлшем бірлігін қамтамасыз ету саласындағы заңнаманың өрескел бұзушылықтары анықталды.Тексеру барысында 2026 жылғы 11 ақпанға дейін медициналық мекемеде 106 пациент мониторингі модулі міндетті рәсімдерден өтпей пайдаланылғаны белгілі болды. Аталған жабдықтар типін бекітусіз немесе метрологиялық аттестациясыз қолданылған, мемлекеттік реестрде тіркелмеген және міндетті тексеруден (поверкадан) өтпеген. Соған қарамастан, құрылғылар медициналық көмек көрсету барысында пайдаланылған.Бұл модульдер пациенттердің өмірлік маңызды көрсеткіштерін бақылауға арналған, атап айтқанда: жүрек соғу жиілігі, артериялық қысым, қандағы оттегі деңгейі (SpO₂), электрокардиограмма (ЭКГ) және дене температурасы. Мұндай жабдықты өлшеу дәлдігі расталмай қолдану клиникалық шешім қабылдауға тікелей әсер етіп, пациенттердің қауіпсіздігіне қауіп төндіреді.Тексеру нәтижесінде медициналық ұйым қызметінде Қазақстан Республикасының «Өлшем бірлігін қамтамасыз ету туралы» заңының 17 және 19-баптарының талаптары бұзылғаны анықталды. Анықталған фактілер тексеру материалдарымен расталды.Бақылау іс-шараларының қорытындысы бойынша анықталған бұзушылықтарды жою туралы орындалуы міндетті нұсқама берілді. Жабдықтарды пайдалану заң талаптарына толық сәйкестікке келтірілуі тиіс.Жіберілген бұзушылықтар үшін мекеме Қазақстан Республикасының Әкімшілік құқық бұзушылық туралы кодексінің 419-бабы бойынша әкімшілік жауапкершілікке тартылды. Айыппұл мөлшері 600 АЕК (2 595 000 теңге) болып, белгіленген тәртіпте төленді.Департамент метрологиялық бақылау талаптарын сақтау міндетті екенін және оның пациенттердің қауіпсіздігін қамтамасыз етумен тікелей байланысты екенін атап өтті. Белгіленген нормалардан кез келген ауытқуға жол берілмейді.Ақпарат көзі : https://www.gov.kz/memleket/entities/mti/press/news/details/1210598?lang=kk

Қырғызстан астанасында Шанхай ынтымақтастық ұйымына мүше мемлекеттер қорғаныс ведомстволары басшыларының кеңесі өтті. Оған ШЫҰ-ның Бас хатшысы қатысты.Күн тәртібінде әскери ынтымақтастықты дамыту, халықаралық терроризмге қарсы іс-қимыл және ШЫҰ кеңістігіндегі тұрақтылықты нығайту мәселелері қаралды.Қазақстан Қорғаныс министрі авиация генерал-лейтенанты Дәурен Қосанов өз баяндамасында мемлекеттің өңірлік қауіпсіздікті нығайтуға, ШЫҰ аясындағы өзара іс-қимылды дамытуға және қазіргі заманғы сын-қатерлер мен қауіптерге қарсы бірлескен шараларды жетілдіруге қатысты ұстанымдарын атап өтті.Іс-шара барысында қатысушылар қорғаныс ведомстволары арасындағы практикалық ынтымақтастықты кеңейту перспективаларын талқылап, күн тәртібіндегі халықаралық және өңірлік өзекті мәселелер бойынша пікір алмасты. Кеңес қорытындысы бойынша ШЫҰ-ға мүше мемлекеттер Қорғаныс министрліктерінің 2027 жылға арналған ынтымақтастық жоспары бекітілді.Ақпарат көзі : https://www.gov.kz/memleket/entities/mod/press/news/details/1210600?lang=kk