Астана, 2026 жылғы 28 сәуір – Қазақстан Республикасының Сыртқы істер министрі Ермек Көшербаев Астанаға ресми сапармен келген ЕҚЫҰ Демократиялық институттар мен адам құқықтары бюросының директоры Мария Телалианмен кездесу өткізді.Келіссөз барысында Қазақстанның ЕҚЫҰ ДИАҚБ-мен демократиялық институттарды нығайту, сайлау процестерін жетілдіру, құқықтың үстемдігін қамтамасыз ету және адам құқықтарын қорғау салаларындағы одан әрі ықпалдастықтың перспективалары қаралды. Тараптар 15 наурызда өткен республикалық референдумның қорытындыларына, Қазақстан Республикасының жаңа Конституциясының қабылдануына ерекше назар аударды. Бұл елдің саяси жүйесін одан әрі демократияландыру және жаңғырту процесіндегі маңызды кезең болғаны аталып өтті.Министр Қазақстан тарапының сайлау заңнамасын жетілдіру, азаматтық қоғам институттарын дамыту және адам құқықтарын қорғау механизмдерін нығайту мәселелері бойынша ЕҚЫҰ ДИАҚБ-мен конструктивті диалогты жалғастыруға дайындығын атап өтті.Өз кезегінде М. Телалиан қазақстандық тарапқа жылы қабылдауы үшін алғысын білдірді. Ол Бюроның алдағы уақытта да сараптамалық, құқықтық және техникалық қолдау көрсетуге, сондай-ақ демократиялық реформалар мен сайлауды мониторингтеу саласындағы үздік тәжірибелермен алмасуға дайын екенін растады.Кездесу қорытындысы бойынша тараптар диалогты жалғастыруға өзара мүдделіліктерін растады.  Ақпарат көзі : https://www.gov.kz/memleket/entities/mfa/press/news/details/1210907?lang=kk

Аймақ басшысының төрағалығымен өңірдегі мал шаруашылығының дамуы тақырыбына арналған облыс әкімдігінің отырысы өтті.Мемлекет Басшысы атап өткендей, мал шаруашылығы – ауыл шаруашылығының басым бағыттарының бірі. Бұл азық-түлік қауіпсіздігін қамтамасыз етудің, ауылдарда жұмыспен қамтуды арттырып, оларды тұрақты дамытудың негізгі факторы.Былтыр асыл тұқымды мал сатып алуға, сүт пен ет өндірісінің құнын төмендетуге 7,5 млрд теңге бөлінсе, биыл 10,8 млрд қарастырылған. Өсім – 44%. Жылдық 2,5% мөлшерлемемен несие беру жалғасуда.«Үкіметте 2026-2030 жылдарға арналған мал шаруашылығын дамыту жөніндегі кешенді жоспар бекітілді. Біздің облыс осы жоспардың негізгі бастамашыларының бірі болды, аграршылардың арзан несиелік ресурстарға қол жеткізу мүддесін жүйелі түрде қорғап келеді. Қазіргі таңда жылдық 6% мөлшерлемемен «Береке» және «Игілік» жеңілдетілген несиелік бағдарламалары іске асырылуда. Жайылымдық мал шаруашылығы жобаларын жүзеге асыру үшін 7-10 жыл мерзімге дәл осындай мөлшерлемемен «Жайлау» бағдарламасы іске қосылады. Ол еліміздің үш облысында жүзеге асады. Біздің облыста – Арқалық қаласы, Амангелді және Жангелдин аудандарындағы ауыл шаруашылығы тауар өндірушілеріне арналған. Әрбір салынған теңге нақты нәтиже беруі тиіс. Біздің міндет – мал басын көбейту, сапасын арттыру және заманауи технологияларды енгізу үшін қолда бар мүмкіндіктерді тиімді пайдалану», – деді облыс әкімі.Айта кету керек, 2025 жылы 2022 жылмен салыстырғанда облыста мал мен құс санының өсуі байқалады: ірі қара мал 25,2 мың басқа, жылқы 14,2 мың басқа, қой мен ешкі 14,6 мың басқа артты.Мал шаруашылығындағы тұрақты өсім 7 заманауи, ірі өнеркәсіптік сүт-тауар фермаларының іске қосылуымен байланысты. Тағы да осындай 6 ферма салынуда, олардың 5-еуі ағымдағы жылы іске қосылады. Жылына 77 мың тонна шикі сүт өндіретін 12 жаңа заманауи сүт-тауар фермасы 200 мыңнан астам адамның қажеттілігін қамтамасыз етеді.«Мал шаруашылығын дамытуға біз кешенді түрде қарауымыз қажет. Ел Президенті агроөнеркәсіптік кешенді дамытуда нақты басымдықтарды айқындап берді: бұл – терең өңдеу, өнімділікті арттыру және заманауи технологияларды енгізу. Жаңа және жұмыс істеп тұрған фермалар ішкі және сыртқы жағынан өндірістік және санитарлық мәдениеттің үлгісі болуы тиіс. Барлық жерде тазалық, ұқыптылық жоғары деңгейде болуы қажет», – деп атап өтті Құмар Ақсақалов.Ақпарат көзі : https://www.gov.kz/memleket/entities/kostanay/press/news/details/1210843?lang=kk

Астана, 2026 жылғы 28 сәуір – Қазақстан Республикасының Сыртқы істер министрі Ермек Көшербаев Сингапур Республикасының Сыртқы істер министрлігі Тұрақты хатшысының орынбасары Кевин Чеокпен кездесті.Кездесу барысында екі ел арасындағы өзара іс-қимылдың қазіргі жай-күйі мен даму перспективалары қарастырылды. Саяси диалогтың жоғары деңгейі және сауда-экономикалық, инвестициялық бағыттардағы серіктестікті кеңейтуге ортақ қызығушылық аталып өтті.ҚР сыртқы саяси ведомствосының басшысы цифрландыру, инновациялар және орнықты даму салаларындағы ықпалдастықтың әлеуеті жоғары екенін атап өтіп, екіжақты байланыстарды жандандыруға дайындығын жеткізді.Өз кезегінде, К.Чеок Сингапурдың ынтымақтастықты одан әрі тереңдетуге, оның ішінде «жасыл» экономика, логистика және адами капиталды дамытудағы бірлескен жобаларды іске асыруға мүдделі екенін растады.Сондай-ақ іскерлік байланыстарды дамыту және екі елдің бизнес-қауымдастықтары арасындағы өзара іс-қимылды нығайту мәселелеріне ерекше назар аударылды.Ақпарат көзі : https://www.gov.kz/memleket/entities/mfa/press/news/details/1210845?lang=kk

Аймақ басшысы Құмар Ақсақалов «ЭПК Forfait» ЖШС жқмысымен танысты.Ел Президенті электр қуаты тұрақты әрі жеткілікті көлемде өндірілмесе, жасанды интеллектіні енгізу және жаппай цифрландыруды жүзеге асыру мүмкін болмайтынын атап өтті.«Өткен жылмен салыстырғанда желілердегі апат деңгейі 10%-ке төмендеді. «ЭПК-forfait» ЖШС жаңа цифрлық диспетчерлік орталығының арқасында апаттық ажыратуларға әрекет ету уақыты 2 сағаттан 5 минутқа дейін қысқарды. Инфрақұрылымдық көрсеткіштер бойынша да оң динамика бар – электр желілерінің тозу деңгейін 2021 жылғы 83%-тен биыл 73%-ке дейін төмендету, жабдықтарды жаңарту, желілер мен қосалқы станцияларды қайта жаңғырту бойынша жүйелі жұмыстар жүргізілуде», – деді аймақ басшысы.Желілердегі техникалық шығындарды 6,4%-ға дейін қысқарту маңызды жетістік, республика бойынша бұл көрсеткіш 10–11%.Цифрлық есептеу құралдарын, автоматтандырылған мониторинг жүйелерін және жасанды интеллект негізіндегі алғашқы шешімдерді енгізуді ерекше атап өткім келеді.«Біздің міндетіміз – апат салдарын жоюдан оларды болжау мен алдын алуға көшу. Қолмен басқарудан – интеллектуалды энергия жүйесі моделіне өту», – деді Құмар Ақсақалов.Ақпарат көзі : https://www.gov.kz/memleket/entities/kostanay/press/news/details/1210833?lang=kk

Қазақстан Республикасы Қарулы күштерінің тұңғыш Қорғаныс министрі Кеңес Одағының Батыры, Халық қаһарманы армия генералы Сағадат Нұрмағамбетовті еске алуға арналған балалар мен жасөспірімдер арасындағы дәстүрлі халықаралық турнир өтті.Биыл алтыншы рет ұйымдастырылған айтулы дода спорттық бәсеке ғана емес, нағыз отансүйгіштік пен достықтың мерекесіне айналды.Турнирге бразилиялық джиу-джитсу шебері, Tactical Combat бағытының өкілі, 5-ші данның иегері Джулиано Де Пинна, батырдың қызы Айсұлу Нұрмағамбетова, Қорғаныс министрінің орынбасары Дархан Ахмедиев, Алматы облыстық Ардагерлер кеңесінің төрағасы Ерболат Тұрымбетов, әйгілі спортшылар Сора Рахмонова, Әйгерім Әбілқадірова және өзге де қонақтар қатысып, жасөспірімдердің жеңіске деген жігерін оятты.Биылғы турнирге елімізден ғана емес, Қырғызстан, Өзбекстан, Ресей, Грузия және Біріккен Араб Әмірліктері сияқты мемлекеттерден 300-ден астам спортшы қатысты.ҚР Қорғаныс министрінің орынбасары Дархан Ахмедиев сайысқа арнайы келіп, министрлік атынан қолдау білдірді. Біз әскери бөлімдерде джиу-джитсуды енгізіп, ел қорғанына айналатын рухты жастарды дайындап жатырмыз деді ол.Sarbaz+ пилоттық жобасы бойынша мерзімді әскери қызметтегі сарбаздар джиу-джитсу спортын дамытып, жарыстарға шығып жүргенін айта кеткен жөн.Дүбірлі сайыста командалық есепте бірінші орын Qazaqstan Top Team, екінші орын Roller, үшінші орын UWC спорт клубтарына бұйырды.Жеке есепте мықты белдесу көрсеткен Айлин Ысқақова ерекшеленді. Екі салмақ дәрежесінде боз кілемге шыққан ол үш белдесуден өткізіп, екі мәрте алтын тақты.Жарыс соңында Алматы өңірлік гарнизонының Әскери полиция басқармасының қызметшілері арнайы көрсетілім ұсынды. Олардың қоян-қолтық ұрыстағы шеберлігі мен тактикалық қимылдары турнирдің шырайын келтіріп, жас спортшыларға нағыз сарбаздың қандай болуы керектігін көрсетті.Ақпарат көзі : https://www.gov.kz/memleket/entities/mod/press/news/details/1210723?lang=kk

Бүгін Алматы облысының орталығында қазақ киносының Құлагері, Қазақ КСР-ның еңбек сіңірген өнер қайраткері Абдолла Қарсақбаевтың 100 жылдық мерейтойының салтанатты ашылу рәсімі өтіп, шымылдығы түрілді. Игі шарада ұлт тағдырын таспалаған тұлғаның мұрасы кеңінен насихатталып, ғұмыр жолы дәріптелді, – деп хабарлайды Алматы облысы әкімінің баспасөз қызметі.Айтулы кеште зиялы қауым өкілдері, ақын-жазушылар, кинорежиссердің туыстары мен шәкірттері естеліктерімен бөлісті. Шараға облыс әкімі Марат Сұлтанғазиев те қатысып, кинорежиссердің болмысы ел жадында мәңгілік сақталатынын айтты. Сондай-ақ Мемлекет басшысы Қасым-Жомарт Тоқаевтың құттықтауын оқып берді.«Абдолла Қарсақбаев – қазақ киносын жаңа биікке көтерген тағдырлы тұлға. Ол «Менің атым – Қожа», «Даладағы қуғын», «Алпамыс мектепке барады» және басқа да көркем фильмдер түсіріп, мәдениетіміздің мәртебесін арттырды. Кейіпкерлердің болмыс-бітімін асқан шеберлікпен көрсете білді. Бұл фильмдердің барлығы қазақ киносының алтын қорына қосылған құнды қазына екені сөзсіз. Сондықтан мемлекетіміз Абдолла Қарсақбаевтың еңбегін әрдайым жоғары бағалайды.Дарынды режиссер өз туындыларына қазақы танымды, ұлттық рух пен тәлім-тәрбиені арқау етті, сол арқылы өскелең ұрпақтың дүниетанымын байытуға елеулі үлес қосты.Халқымыздың біртуар перзентінің ғасыр тойы ЮНЕСКО аясында аталып өтіп жатыр. Бұл – ұлт тұлғаларының әлемдік деңгейдегі танымалдылығының айқын көрінісі. Қазақстанда да оның есімі халық жадында сақталуы қажет. Осы орайда, бұл жиынның мән-мағынасы зор» – делінген хатта.Қазақстанның Халық әртісі, кинорежиссердің шәкірті Досхан Жолжақсынов өнер жолында шырағын жаққан ұстазының өнегелі өмір жолы жайлы сыр шертті.«Жазушы Әбіш Кекілбаев: «Уақыттың өлшемі – адамның тағдыры, адамның тағдыры – артына қалған ісі», – дейді. Абдолла Қарсақбаевтың жасаған ісін бір кеште түгендеп шығу мүмкін емес. Бір ғана «Менің атым Қожасы» әлемді дүр сілкіндіріп, бәйгені қанжығасына байлап келгенде, қуанбаған қазақ болмаған шығар деп ойлаймын. Мені де халыққа танытып, бағымды ашқан – Әбекем. Қазір сол сәтті сағынышпен еске аламыз», – деді өнер иесі.Концерттік бағдарламада көрермен Абдолла Қарсақбаевтың туындыларына терең бойлап, мәніне үңілді. Ұлы композитор Нұрғиса Тілендиевпен рухани үндестігі баяндалып, ойлы кино мен мәнді әуеннің үйлесімі жүрекке рухани нәр берді. Рамазан Стамғазы, Нұрлан Өнербай сынды халыққа белгілі тұлғалар ән шырқап, өзге де дарын иелері өнерімен тәнті етті.Айта кетейік, Алматы облысының төл перзенті Абдолла Қарсақбаевтың өмірі мен шығармашылығы жыл бойы кеңінен насихатталып, өңіріміздің түкпін-түкпінде айтулы шаралар жалғасын табады. ЮНЕСКО көлемінде аталып өтіп, әлем жұртшылығы қазақ киносының шоқтығы биік туындыларына қанық болады.Ақпарат көзі : https://www.gov.kz/memleket/entities/almobl/press/news/details/1210694?lang=kk

Алматы қаласында ҚР Сауда және интеграция министрлігі Техникалық реттеу және метрология комитеті департаментінің жоспардан тыс тексеруінің қорытындысы бойынша «Орталық қалалық клиникалық аурухана» ШЖҚ КМК қызметінде өлшем бірлігін қамтамасыз ету саласындағы заңнаманың өрескел бұзушылықтары анықталды.Тексеру барысында 2026 жылғы 11 ақпанға дейін медициналық мекемеде 106 пациент мониторингі модулі міндетті рәсімдерден өтпей пайдаланылғаны белгілі болды. Аталған жабдықтар типін бекітусіз немесе метрологиялық аттестациясыз қолданылған, мемлекеттік реестрде тіркелмеген және міндетті тексеруден (поверкадан) өтпеген. Соған қарамастан, құрылғылар медициналық көмек көрсету барысында пайдаланылған.Бұл модульдер пациенттердің өмірлік маңызды көрсеткіштерін бақылауға арналған, атап айтқанда: жүрек соғу жиілігі, артериялық қысым, қандағы оттегі деңгейі (SpO₂), электрокардиограмма (ЭКГ) және дене температурасы. Мұндай жабдықты өлшеу дәлдігі расталмай қолдану клиникалық шешім қабылдауға тікелей әсер етіп, пациенттердің қауіпсіздігіне қауіп төндіреді.Тексеру нәтижесінде медициналық ұйым қызметінде Қазақстан Республикасының «Өлшем бірлігін қамтамасыз ету туралы» заңының 17 және 19-баптарының талаптары бұзылғаны анықталды. Анықталған фактілер тексеру материалдарымен расталды.Бақылау іс-шараларының қорытындысы бойынша анықталған бұзушылықтарды жою туралы орындалуы міндетті нұсқама берілді. Жабдықтарды пайдалану заң талаптарына толық сәйкестікке келтірілуі тиіс.Жіберілген бұзушылықтар үшін мекеме Қазақстан Республикасының Әкімшілік құқық бұзушылық туралы кодексінің 419-бабы бойынша әкімшілік жауапкершілікке тартылды. Айыппұл мөлшері 600 АЕК (2 595 000 теңге) болып, белгіленген тәртіпте төленді.Департамент метрологиялық бақылау талаптарын сақтау міндетті екенін және оның пациенттердің қауіпсіздігін қамтамасыз етумен тікелей байланысты екенін атап өтті. Белгіленген нормалардан кез келген ауытқуға жол берілмейді.Ақпарат көзі : https://www.gov.kz/memleket/entities/mti/press/news/details/1210598?lang=kk

Қырғызстан астанасында Шанхай ынтымақтастық ұйымына мүше мемлекеттер қорғаныс ведомстволары басшыларының кеңесі өтті. Оған ШЫҰ-ның Бас хатшысы қатысты.Күн тәртібінде әскери ынтымақтастықты дамыту, халықаралық терроризмге қарсы іс-қимыл және ШЫҰ кеңістігіндегі тұрақтылықты нығайту мәселелері қаралды.Қазақстан Қорғаныс министрі авиация генерал-лейтенанты Дәурен Қосанов өз баяндамасында мемлекеттің өңірлік қауіпсіздікті нығайтуға, ШЫҰ аясындағы өзара іс-қимылды дамытуға және қазіргі заманғы сын-қатерлер мен қауіптерге қарсы бірлескен шараларды жетілдіруге қатысты ұстанымдарын атап өтті.Іс-шара барысында қатысушылар қорғаныс ведомстволары арасындағы практикалық ынтымақтастықты кеңейту перспективаларын талқылап, күн тәртібіндегі халықаралық және өңірлік өзекті мәселелер бойынша пікір алмасты. Кеңес қорытындысы бойынша ШЫҰ-ға мүше мемлекеттер Қорғаныс министрліктерінің 2027 жылға арналған ынтымақтастық жоспары бекітілді.Ақпарат көзі : https://www.gov.kz/memleket/entities/mod/press/news/details/1210600?lang=kk

Қарулы күштердің Ұлттық әскери-патриоттық орталығында генерал-лейтенант Сұлтан Камалетдиновтың әскери қызметтен босатылуына және зейнетке шығуына арналған салтанатты іс-шара өтті.Оған Қорғаныс министрлігінің басшылығы, Ақмола өңірлік гарнизонының әскери қызметшілері, Қарулы күштердің ардагерлері, салтанатты шара иесінің туған-туыстары қатысты.Қорғаныс министрінің орынбасары – Қарулы күштер Бас штабының бастығы генерал-лейтенант Қаныш Әбубәкіров Сұлтан Камалетдиновке көп жылғы мінсіз қызметі, елдің қорғаныс қабілетін нығайтуға қосқан елеулі үлесі және армияны реформалаудың негізгі кезеңдеріне белсенді қатысқаны үшін алғысын білдірді.– Сіз өзіңізді жүйелі ойлайтын, салмақты шешім қабылдайтын әрі бағынысты жеке құрамға сыйлы жоғары кәсіби көшбасшы ретінде көрсеттіңіз. Сіз әрқашан әскери қызметшілердің кейінгі буыны үшін әскери борышты мінсіз орындаудың үлгісі болып қала бересіз, – деп атап өтті ол.Жауынгерлік тумен қоштасу рәсімі салтанатты түрде өтті. Генерал-лейтенант Сұлтан Камалетдинов Құрмет қарауыл ротасы алып шыққан әскери абыройдың, ар-намыстың және даңқтың нышаны Жауынгерілк тудың жанына барып, еңкейіп басын иді.Оған құрмет белгісі ретінде «Ел қорғаны» ведомстволық медалі және Қорғаныс министрінің атынан грамота табыс етілді.Сұлтан Бүркітбайұлы 40 жылдан астам ғұмырын әскери қызметке арнады. Ол Ташкент жоғары танк командалық училищесінің курсантынан бастап Қорғаныс министрінің бірінші орынбасары – Қазақстан Қарулы күштері Бас штабының бастығына дейінгі лауазымдық жолдан өтті.Мансабының әртүрлі кезеңдерінде ол жоғары құзыреттілікті, стратегиялық ойлауды, берік мінезді және төзімділікті талап ететін жауапты қызметтерді атқарды. Ол әскери полиция органдарының қызметіне, резервтегі қызметке, аумақтық қорғанысқа және әскери қызметшілерді әлеуметтік қорғауға қатысты негізгі заң жобаларын әзірлеуге және ілгерілетуге атсалысты.Сұлтан Камалетдиновтың еңбегі I және II дәрежелі «Даңқ» ордендерімен, сондай-ақ бірқатар ведомстволық және мерейтойлық медальдармен марапатталды.Қорғаныс ведомствосының басшылығы Сұлтан Бүркітбайұлының бай тәжірибесі мен білімі болашақта кәсіптік салада да, әскери-патриоттық тәрбие беру ісінде де сұранысқа ие болатынына сенім білдірді.Іс-шара соңы Ұлттық әскери-патриоттық орталығының шығармашылық ұжымы дайындаған концертпен аяқталды.Ақпарат көзі : https://www.gov.kz/memleket/entities/mod/press/news/details/1210466?lang=kk

Қазақстан Республикасының Қорғаныс министрлігі Қарулы күштердің әскери қызметшілеріне ақшалай үлес, жәрдемақылар және өзге де төлемдерді төлеу қағидаларына өзгерістер енгізді.Тиісті бұйрық үстіміздегі жылдың 21 сәуірінен бастап күшіне енді.Түзетулер материалдық қамтамасыз етудің жекелеген нормаларын нақтылауға және төлемдерді есептеу тәртібін жетілдіруге бағытталған.Атап айтқанда, қағидаларға «істер мен лауазымды қабылдау күні» және «істер мен лауазымды тапсыру күні» деген жаңа ұғымдар енгізілді. Бұл күндер командирдің бұйрығымен бекітіліп, ақшалай үлесті есептеу кезінде қолданылады. Жекелеген төлемдерді есептеу тәртібі де нақтыланды. Мәселен, әскери қызметтен теріс себептермен босатылған жағдайда сауықтыруға арналған жәрдемақы енді айдағы нақты күнтізбелік күндер санына пропорционалды түрде есептеледі. Құжатта сыйақы беру тәсілдері де айқындалған.Әскери қызметшілер ерекше маңызды әрі күрделі тапсырмаларды орындағаны, жоғары нәтижелерге қол жеткізгені және қызметтік міндеттерін үлгілі атқарғаны үшін ынталандырылуы мүмкін. Сыйақылар мемлекеттік және кәсіби мерекелерге, сол секілді мерейтойлық күндерге орай берілуі мүмкін. Мерейтойлық жасқа 40 жас және одан кейінгі әрбір бес жыл кіреді. Өзгерістердің жеке бір бөлігі әлеуметтік қолдауға арналған. Әскери қызметшілерге көрсетілетін материалдық көмектің көлемі ұлғайтылды. Енді оның мөлшері ең төменгі жалақыға еселенген түрде айқындалады. Бұл биыл 85 000 теңгені құрайды.Материалдық көмек бюджет қаражатының үнемделуі есебінен беріледі. Жақын туыстарының, жұбайының немесе қайын жұртының қайтыс болуы жағдайында ол ең төменгі жалақының бес еселенген мөлшеріне дейін (425 мың теңгеге дейін) жетуі мүмкін. Ал некеге тұру, бала туу, бала асырап алу, мүліктік залал келтірілуі немесе емделу қажеттілігі кезінде – үш еселенген мөлшерге дейін (255 мың теңгеге дейін) беріледі.Қорғаныс министрлігінің мәліметінше, енгізілген өзгерістер төлемдер жүйесінің ашықтығы мен әділдігін арттыруға, сондай-ақ әскери қызметшілердің әлеуметтік қорғалуын күшейтуге бағытталған.Ақпарат көзі : https://www.gov.kz/memleket/entities/mod/press/news/details/1210327?lang=kk

Абу Даби, 2026 жылғы 27 сәуір – Қазақстан Респубикасының Сыртқы істер министрі Ермек Көшербаев Абу Даби Әмірлігін билеуші әулеттің аға өкілі шейх Сурур бен Мұхаммед Әл Наһаянмен кездесті.Сұхбат барысында министр Біріккен Араб Әмірліктері Қазақстан үшін ислам әлеміндегі сенімді әрі басты стратегиялық серіктес ел екенін атап өтті.Келіссөздер барысында тараптар екі ел халықтарының игілігі үшін қолға алынған уағдаластықтар мен жобаларды табысты жүзеге асыру, сауда-экономика, инвестиция салаларындағы ынтымақтастықты одан әрі нығайту мәселелерін талқылады.Өз кезегінде шейх Сурур бен Мұхаммед Әл Наһаян Қазақстан мен Әмірліктер арасындағы берік бауырластық қатынастардың қарқынды дамуына назар аударды.Кездесу соңында Қазақстан СІМ басшысы шейх Сурурдың екі ел арасындағы ынтымақтастықты нығайтуға қосқан елеулі үлесін атап өтіп, Әмірліктер халқына тыныштық пен бақ-береке тіледі.Ақпарат көзі : https://www.gov.kz/memleket/entities/mfa/press/news/details/1209965?lang=kk

Астана, 2026 жылғы 27 сәуір – Қазақстан Республикасының Сыртқы істер министрлігінде Қазақстан Республикасы Сыртқы істер министрінің орынбасары Әлібек Бақаев пен Сингапур Республикасы Сыртқы істер министрлігінің Тұрақты хатшысының орынбасары Кевин Чеоктың қатысуымен Қазақстан-Сингапур саяси консультацияларының бесінші раунды өтті.Консультациялар барысында Қазақстан мен Сингапур арасындағы өзара іс-қимылдың қазіргі жай-күйі мен даму перспективалары жөнінде мазмұнды пікір алмасу өткізілді. Саяси диалогты одан әрі нығайтуға, шарттық-құқықтық базаны кеңейтуге және жоғары әрі биік деңгейдегі байланыстарды жандандыруға өзара ұмтылыс расталды.Сауда-экономикалық және инвестициялық ынтымақтастықты кеңейтуге басым назар аударылды. 2025 жылдың қорытындысы бойынша өзара сауда көлемі 954,4 млн АҚШ долл. жетіп, орнықты оң серпін көрсеткені атап өтілді. Қаржы саласында, цифрландыруда, «ақылды» қалаларды дамытуда, жасыл экономикада, көлік-логистикалық инфрақұрылымда, сондай-ақ білім беру мен инновациялар саласында серіктестікті тереңдетудің айтарлықтай әлеуеті бар екені атап өтілді.Ә.Бақаев сингапурлық бизнеске еуропалық және жаһандық нарықтарға шығу үшін қауіпсіз, тиімді әрі коммерциялық тұрғыдан тартымды бағыттарды қамтамасыз ете алатын Қазақстанның транзиттік-логистикалық әлеуетінің ерекше маңыздылығын атап өтті.Сонымен қатар халықаралық және өңірлік күн тәртібінің өзекті мәселелері, сондай-ақ БҰҰ мен Оңтүстік-Шығыс Азия мемлекеттері қауымдастығы (АСЕАН) аясындағы өзара іс-қимыл бойынша пікір алмасу өтті.Келіссөздер қорытындысы бойынша тұрақты саяси диалогты жалғастыруға және екіжақты ынтымақтастықты одан әрі серпінді дамытуға өзара дайындық расталды.Ақпарат көзі : https://www.gov.kz/memleket/entities/mfa/press/news/details/1209878?lang=kk

Қазақстан Республикасы Сыртқы істер министрінің орынбасары Әлібек Қуантыров Оңтүстік-Шығыс Еуропадағы ең беделді халықаралық пікірталас алаңдарының бірі саналатын Дельфи экономикалық форумына қатысты. Аталған форум үкіметтер, бизнес, сарапшылық қауымдастық және халықаралық ұйымдар өкілдерін біріктіреді.Қазақстан делегациясының форумға қатысуы елдің сыртқы экономикалық басымдықтарын ілгерілетуге, Грекиямен және Еуропалық одақ елдерімен ынтымақтастықты нығайтуға, сондай-ақ инвестициялық және сауда байланыстарын кеңейтуге бағытталды.Форум аясында Әлібек Қуантыров Грекия Сыртқы істер министрінің орынбасары Харри Теохариспен бірлескен панельдік сессияға қатысты. Пікірталас барысында тараптар жаһандық экономикалық даму, энергетикалық және көлік байланыстылығы, халықаралық жеткізу тізбектерінің тұрақтылығы, сондай-ақ Қазақстан, Грекия және Еуропа арасындағы ынтымақтастықты кеңейту перспективалары жөнінде пікір алмасты.Қазақстандық дипломат өз сөзінде Қазақстанның Еуропа үшін сенімді экономикалық әріптес, Орталық Азиядағы ірі транзиттік торап және Транскаспий халықаралық көлік бағытының негізгі қатысушысы ретіндегі рөлінің артып келе жатқанын атап өтті. Экономиканы әртараптандыру, өнеркәсіпті дамыту, инфрақұрылымды жаңғырту және Азия мен Еуропа арасындағы жаңа логистикалық бағыттарды қалыптастыру мәселелеріне ерекше назар аударылды.Харри Теохарис Еуропалық одақтың Орталық Азиядағы сенімді серіктестермен өзара іс-қимылды нығайтудың маңыздылығын атап өтіп, энергетикалық тұрақтылық, көлік байланыстары және жаңа сауда бағыттарын дамыту мәселелеріндегі Қазақстанның рөлін жоғары бағалады. Сондай-ақ ол екіжақты экономикалық ынтымақтастықты одан әрі кеңейтуге қызығушылық білдірді.Қазақстан делегациясы сондай-ақ Грекияның ұлттық агенттігі «Enterprise Greece» ұйымымен бірлесіп өткізілген «Қазақстанның инвестициялық әлеуеті және Қазақстан мен Грекия арасындағы ынтымақтастық мүмкіндіктері» атты дөңгелек үстелге қатысты. Іс-шараға Грекияның іскер топтары, салалық бірлестіктері мен инвестициялық қауымдастығының өкілдері қатысты.Дөңгелек үстелде сөз сөйлеген Әлібек Қуантыров Грекияның Қазақстан үшін екіжақты форматта да, Еуропалық одақ аясында да маңызды әріптес екенін атап өтті. Ол 2025 жылы екі ел арасындағы тауар айналымы 2,4 млрд АҚШ долларына жеткенін, ал Қазақстан Грекияға шикі мұнай жеткізуші екінші ірі мемлекетке айналғанын хабарлады.Сонымен қатар ынтымақтастықты одан әрі әртараптандырудың елеулі әлеуеті атап өтілді. Қазақстан грек компанияларын жаңартылатын энергетика, көлік және логистика, металлургия, қалдықтарды қайта өңдеу, агроөнеркәсіптік кешен, фармацевтика, туризм, цифрлық технологиялар және өңдеу өнеркәсібі салаларындағы жобаларға қатысуға шақырды.Сапар аясында Министрдің орынбасары Оңтүстік-Шығыс Еуропа энергетика институтының Атқарушы директоры Костис Стамболиспен жеке кездесу өткізді. Тараптар өңірлік энергетикалық нарықтардағы өзекті үрдістерді, Еуропаның энергетикалық қауіпсіздігін нығайту перспективаларын, қазақстандық энергоресурстарды еуропалық нарықтарға жеткізуді дамыту мәселелерін, сондай-ақ сараптамалық алмасу және Қазақстан мен Грекияда өтетін бейінді халықаралық энергетикалық іс-шараларға өзара қатысу мүмкіндіктерін талқылады.Ақпарат көзі : https://www.gov.kz/memleket/entities/mfa/press/news/details/1209950?lang=kk

Абу Даби, 2026 жылғы 27 сәуір – Қазақстан Республикасының Сыртқы істер министрі Ермек Көшербаев Біріккен Араб Әмірліктеріне ресми сапары аясында БАӘ Өнеркәсіп және озық технологиялар министрі, «Masdar» компаниясының төрағасы, «ADNOC» компаниясының Бас директоры Сұлтан Ахмед Әл-Жабермен кездесу өткізді.Келіссөздер барысында тараптар Қазақстан мен Әмірліктер арасындағы инвестициялық ынтымақтастықтың қазіргі жай-күйі мен перспективаларын, сондай-ақ жаңартылатын энергетика саласындағы ықпалдастықты ілгерілету мәселелерін талқылады.ҚР СІМ басшысы экономика саласындағы екіжақты қарым-қатынастар орнықты дамып келе жатқанын атап өтті. Атап айтқанда, 2025 жылдың қорытындысы бойынша Әмірліктер Қазақстанға шамамен 1,64 млрд АҚШ доллары көлемінде инвестиция салып, ірі инвестор елдердің алғашқы бестігіне енді. Сондай-ақ өзара сауда-саттық көлемінің өскені де атап өтілді.«Masdar» компаниясының Жамбыл облысында іске асырып жатқан қуаты 1 ГВт жел электр станциясын салу жобасына ерекше назар аударылды. Бұл жоба жаңартылатын энергетика саласы бойынша Орталық Азиядағы ең ірі бастамалардың бірі және екі ел арасындағы стратегиялық серіктестіктің жарқын үлгісі саналады.Бұдан бөлек, тараптар жобаны одан әрі кеңейту перспективаларын, оның ішінде станцияның қуатын арттыру және энергияны сақтау жөніндегі заманауи шешімдерді енгізу мәселелерін қарастырды.Е.Көшербаев жаңа бағыттар бойынша ынтымақтастықты одан әрі дамыту, оның ішінде «жасыл» сутегі жобаларын, өндірісті жергіліктендіру және қосымша құн тізбектерін дамытудың маңыздылығына назар аударып, бұл сапар инвестициялық ынтымақтастыққа, оның ішінде бірлескен жобаларды іске асыруға тың серпін беретініне сенім білдірді.Кездесу қорытындысы бойынша тараптар стратегиялық серіктестікті одан әрі нығайтуға мүдделі екендіктерін растады.Ақпарат көзі : https://www.gov.kz/memleket/entities/mfa/press/news/details/1209357?lang=kk

Қорғаныс министрінің бірінші орынбасары – Қазақстан Республикасы Қарулы күштері Бас штабының бастығы генерал-лейтенант Қаныш Әбубәкіров Гвардейск гарнизонына барып, «Айбалта-2026» жедел-тактикалық командалық-штабтық оқу-жаттығуына дайындық барысын тексерді.Ол «Мәтібұлақ» полигонында алдағы практикалық іс-қимылдардың жоспарын зерделеп, бөлімшелердің міндеттерін айқындады. Оларды орындау кезеңдерін нақтылап, күш-құралдарды бөлу мәселелерін пысықтады. Қазіргі заманғы соққы беру тәсілдерін және қару-жарақ пен әскери техниканы кешенді қолдануды ескере отырып, жауынгерлік іс-қимылдарды жүргізудің жаңа элементтеріне ерекше назар аударылды.Оқу-жаттығулардың негізгі бағыты әуе нысандарына қарсы іс-қимылға, соның ішінде ұшқышсыз басқарылатын құрылғыларды анықтау және жоюға арналады.– Бөлімшелердің үйлесімді әрекеті, басқарудың тұрақтылығы, атыс дәлдігі, сондай-ақ әуе қаупін жедел анықтап, бейтараптандыру назарда, – деп атап өтті Бас штаб бастығы.Жұмыс сапары барысында генерал-лейтенант Қаныш Әбубәкіров гарнизондағы әскери бөлімдердің жауынгерлік машиналар парктеріндегі қару-жарақ пен әскери техниканың жай-күйін де тексерді. Ол бөлімшелердің тиімділігі техниканың жарамдылығына, пайдалану ережелерінің сақталуына және уақтылы техникалық қызмет көрсетуге тікелей байланысты екенін атап өтті.Бұдан өзге ол гарнизонның әскери бөлімдерінде жас толықтырудың бейімделуі мен жауынгерлік дайындығын ұйымдастырумен танысып, олардың моральдық-психологиялық жағдайы мен оқу-жауынгерлік міндеттерді орындауға дайындығын бағалады.Бас штаб бастығы сарбаздарға саналы түрде әскери қызметті таңдағаны үшін, сондай-ақ олардың ата-аналарына тәрбие мен қолдау көрсеткені үшін алғыс білдірді. Мысал ретінде ол Жирновтар отбасын атап өтіп, бір мезетте артиллериялық бригадаға үш ұлын әскерге шығарып салғанын айтты. Бұл оқиға ұрпақтар сабақтастығы мен Отанға қызмет ету дәстүрлеріне адалдықтың айқын көрінісі.Ақпарат көзі : https://www.gov.kz/memleket/entities/mod/press/news/details/1209312?lang=kk

Мемлекет басшысы Қасым-Жомарт Кемелұлы Тоқаевтың қатысуымен «Таза Қазақстан» республикалық экологиялық акциясы өтті. Ауқымды шараға Қостанай облысының тұрғындары да атсалысып, 12 мың көшет отырғызды.Экологиялық бағдарлама жүзеге асырылған 2024 жылдан бері аймағымызда 400-ден астам қоғамдық кеңістік абаттандырылды, 250-ден астам балалар және спорт алаңы орнатылды, 600-ге жуық рұқсатсыз қоқыс үйіндісі жойылды, 1 250-ден астам апатты және қараусыз нысан сүрілді, 277 мыңнан астам ағаш пен көшет отырғызылды.Бүгінгі күнге дейін санитарлық тазалық және абаттандыру шараларына 105 мың тұрғын, 1,9 мың кәсіпорын қатысып, 3,5 мың техника жұмылдырылды. 1,3 мың гектар аумақ, оның ішінде 19 мың аула тазартылып, 50 мың тонна қоқыс шығарылды.Соңғы үш жылда облыс бойынша 94 парк пен сквер салынып, абаттандырылды, 420 балалар мен спорт алаңы орнатылды. Сондай-ақ 200-ден астам көпқабатты тұрғын үйдің қасбеті жөнделді.«2026 жылы облысты абаттандыруға 77,3 мың көшет отырғызу, 63 көппәтерлі тұрғын үйдің қасбетін жаңарту, 31 жаңа балалар ойын алаңын орнату, апатты тұрғын үйлерді бұзу, 80 саябақ пен қоғамдық демалыс аймағын жақсарту жұмыстары жоспарланған. Қостанай ауданында 43,8 га аумақта велосаябақ және Қостанай қаласында 40 га аумақта экосаябақ салынады», – деді Қостанай обдлысының әкімі Құмар Ақсақалов.Ақпарат көзі : https://www.gov.kz/memleket/entities/kostanay/press/news/details/1209230?lang=kk

2025 жылдың қорытындысына сәйкес Қазақстан бойынша агроөнеркәсіптік кешеннің өңделген өнімдерінің экспорты 8,1 млн тоннаны құрады. Оның ішінде Қостанай облысының үлесі – 2,2 млн тонна немесе 27,2%.Өңірдегі осындай экспортқа бағытталған кәсіпорындардың бірі – бұршақ тұқымдас дақылдарды өңдеумен айналысатын Kaizen ЖШС. Кәсіпорын екі жыл бұрын іске қосылған. Қазіргі таңда түркиялық Arbel холдингімен макарон өнімдерін шығаратын зауыт салу жөнінде келісімге қол жеткізілді. Сонымен қатар компания жылына 200 мың тонна бидай өңдейтін диірмен кешенін салуды жоспарлап отыр. Нәтижесінде кәсіпорынның жалпы өндірістік қуаты жылына 400 мың тоннаға дейін жетеді.Қостанай облысының әкімі Құмар Ақсақалов атап өткендей, Kaizen ЖШС Мемлекет басшысының агроөнеркәсіптік кешендегі өңделген өнім үлесін 70%-ға дейін арттыру жөніндегі тапсырмасы аясында іске қосылған.Кәсіпорын түркиялық Arbel халықаралық холдингінің инвестициясы есебінен салынған. Мұнда 70 жұмыс орны құрылған. Өндірісте төрт түрлі дақыл өңделеді: бұршақ, ноқат, жасыл және қызыл жасымық.Бүгінде кәсіпорын солтүстік өңір үшін бұршақ тұқымдас дақылдарды өңдеу саласындағы технологиялық жабдықталу деңгейі мен өндірістік үдерістерді ұйымдастыру тұрғысынан бірегей болып саналады. Өндіріс жоғары қосылған құны бар, сапа мен қауіпсіздік талаптарына толық сәйкес келетін өнім шығаруға бағытталған.Кәсіпорынның технологиялық базасы заманауи, жоғары өнімді жабдықтармен қамтамасыз етілген. Бұл өндірістік үдерістерді автоматтандырудың жоғары деңгейін, өнім сапасының тұрақтылығын және халықаралық стандарттарға сәйкестікті қамтамасыз етеді.Өнім ішкі нарықпен қатар экспортқа да шығарылады. Экспорт географиясы Түркия Республикасын, Алжир Халық Демократиялық Республикасын, Ауғанстан Ислам Республикасын, сондай-ақ бірқатар Еуропа елдерін қамтиды. Өткен жылы кәсіпорын 180 мың тонна өнім өндіріп, экспорттаған.Саланы одан әрі дамыту мақсатында кәсіпорын макарон өнімдерін шығаратын зауыт салу жөніндегі инвестициялық жобаны іске асыруды бастады. Жаңа өндірісте қосымша 60 жұмыс орны ашылады.Сонымен қатар компания жылына 200 мың тонна бидай өңдейтін диірмен кешенін салуды жоспарлап отыр.«Аталған жобаларды іске асыру ішкі нарықты отандық өңделген өніммен қамтамасыз етуге, импорттық макарон өнімдеріне тәуелділікті азайтуға, сондай-ақ кәсіпорынның экспорттық әлеуетін арттырып, жақын шетел нарықтарына шығуына мүмкіндік береді», – деді Құмар Ақсақалов.Жалпы алғанда, Kaizen ЖШС қызметі ауыл шаруашылығы шикізатын өңдеу деңгейін арттыру және экономиканы әртараптандыру жөніндегі міндеттерге толық сәйкес келеді.Ақпарат көзі : https://www.gov.kz/memleket/entities/kostanay/press/news/details/1209242?lang=kk

Өңірлік экологиялық саммит аясында Біріккен Ұлттар Ұйымы құрылымында Халықаралық су ұйымын (ХСҰ) құру мәселесі бойынша халықаралық консультациялардың алғашқы раунды өтті.Іс-шараға мемлекеттер мен халықаралық ұйымдардың, сондай-ақ ғылыми және сарапшы қауымдастықтың жоғары деңгейлі өкілдері қатысты.Консультациялардың ашылуында Қазақстан Республикасының Сыртқы істер министрі Ермек Көшербаевтың атынан сөз сөйлеген ҚР СІМ Көпжақты ынтымақтастық департаментінің директоры Дидар Теменов Мемлекет басшысы Қасым-Жомарт Тоқаевтың су күн тәртібін тиімді іске асыру мақсатында БҰҰ-ның тиісті мандаттарын шоғырландыру жөніндегі бастамасының негізгі мақсаттарын атап өтті.БҰҰ Бас хатшысының экономикалық және су мәселелері жөніндегі орынбасары Л.Цзюньхуа, БҰҰ Бас хатшысының су ресурстары жөніндегі арнайы өкілі Р.Марсуди (бейнеүндеу арқылы), БҰҰ ЕЭК атқарушы хатшысы Т.Молчан, сондай-ақ, ЮНЕСКО, UN Water және БҰҰ-ның басқа да мамандандырылған мекемелерінің өкілдері ХСҰ құру мәселесі бойынша өз көзқарастарымен бөлісті.Елдік ұстанымдар мен ұсыныстарды Әзербайжан Президентінің климат мәселелері жөніндегі өкілі, COP29 Президенті М. Бабаев, Өзбекстанның су ресурстары министрі Ш. Хамраев, Сербияның қоршаған ортаны қорғау министрі С. Павков, бірқатар елдердің бейінді министрліктері басшыларының орынбасарлары мен БҰҰ-ға мүше мемлекеттердің өзге де өкілдері ұсынды.Жалпы алғанда, мемлекеттер, халықаралық ұйымдар және ғылыми қауымдастық өкілдері ҚР Президентінің ХСҰ құру жөніндегі бастамасына қолдау білдірді. Қатысушылар су саласындағы жаһандық басқару жүйесін жетілдірудің өзектілігін ескере отырып, оның уақтылығы мен орындылығын атап өтті.Мемлекеттер мен халықаралық ұйымдардың өкілдері ХСҰ құру бойынша алдағы талқылауларға сындарлы түрде қатысуға дайын екендіктерін растады.Өз кезегінде Консультациялар модераторы, ҚР СІМ Ерекше тапсырмалар жөніндегі елшісі З.Сүлейменова қатысушыларға келіссөздер үдерісін бастауға белсенді қатысқандары үшін алғыс білдіріп, Қазақстанның аталған бастаманы барлық халықаралық алаңдарда ілгерілетуді жалғастыратынын растады.Ақпарат көзі : https://www.gov.kz/memleket/entities/mfa/press/news/details/1209178?lang=kk

Премьер-Министр Олжас Бектенов тапсырмасына сай әлеуметтік маңызы бар азық-түлік тауарларына бағаның негізсіз өсуіне жол бермеу және мемлекеттік бақылауды қамтамасыз ету, сондай-ақ тиімсіз делдалдарды жою мақсатында, биылғы жылдың 25 сәуірінде Сауда және тұтынушылардың құқығын қорғау Департаменті Алматы қаласының Кәсіпкерлік және инвестициялар басқармасымен, Мемлекеттік кірістер департаментімен, Экономикалық тергеп-тексеру департаментімен және қала аудандары әкімдерінің аппараттарымен бірлесіп, қаланың ең ірі көтерме базары «Барыс-4»-те кезекті мониторинг жүргізді.Жүргізілген мониторинг аясында Алматы қаласының Сауда және тұтынушылардың құқықтарын қорғау департаменті базардағы көтерме саудамен айналысатын делдалдарды талдады. Кешенді іс-шаралар қорытындысы бойынша қазіргі уақытта 9 делдал анықталды.Сонымен қатар, өңірлік комиссия аясында Алматы қаласының Мемлекеттік кірістер департаменті кәсіпкерлік субъектілеріне қатысты хронометраждық тексерулер жүргізуде.Бұдан бөлек, Департамент тарапынан кәсіпкерлер мен сауда нарығының әкімшілігіне сауда заңнамасының талаптарын түсіндіру және ақпараттық-түсіндіру жұмыстары жүргізілді.Әсіресе, әлеуметтік маңызы бар азық-түлік тауарларына 15%-дан аспайтын сауда үстемесін сақтау, сондай-ақ тауарларды нақты рәсімделген және тұтынушыларға қолжетімді түрде орналастырылған баға белгілерімен сату мәселелеріне ерекше назар аударылды.Аталған мәселе тұрақты бақылауда, анықталған барлық делдалдар мен кәсіпкерлік субъектілеріне қатысты материалдар өңірлік комиссия отырысында қарауға жолданды.Ақпарат көзі : https://www.gov.kz/memleket/entities/mti/press/news/details/1209114?lang=kk

Қостанай облысында «Заң мен тәртіп» тұжырымдамасы аясында жастардың құқықтық санасын қалыптастыруға бағытталған тәрбиелік сабақтар бағдарламасы кезең-кезеңімен жүзеге асырылып келеді. Бастама өскелең ұрпақ арасында құқықтық мәдениетті арттыруға, құқық бұзушылықтардың алдын алуға және қауіпсіз білім беру ортасын қалыптастыруға бағытталған.Жоба аясында облыстың мектептері мен колледждері қамтылып, оған прокуратура және полиция органдарының қызметкерлері, сондай-ақ сала ардагерлері тәлімгер ретінде белсенді түрде тартылуда. Бұл өз кезегінде жастарға тәжірибелік білім беріп, құқықтық мәселелерді нақты мысалдар арқылы түсіндіруге мүмкіндік береді.Бағдарлама шеңберінде оқушыларға құқықтық сауаттылықты арттыруға арналған сабақтар өткізіліп, буллинг пен кибербуллингтің алдын алу, нашақорлық пен құмар ойындарға тәуелділік қаупі, сондай-ақ кәмелетке толмағандар арасындағы девиантты мінез-құлық мәселелері жан-жақты түсіндіріледі. Сабақтар интерактивті форматта ұйымдастырылып, тренингтер мен практикалық тапсырмалар арқылы оқушылардың белсенді қатысуы қамтамасыз етіледі.Осы бағыттағы кезекті іс-шара Қостанай қаласындағы №8 орта мектепте өтті. Кездесу барысында оқушылармен ашық диалог орнатылып, құқықтық нормаларды сақтау, жеке жауапкершілік және заңға құрмет тақырыптары кеңінен талқыланды.Аталған жоба – жастар арасында құқықтық мәдениетті нығайтуға, заңға құрметті қалыптастыруға және олардың саналы азамат болып қалыптасуына ықпал ететін маңызды бастамалардың бірі.Ақпарат көзі : https://www.gov.kz/memleket/entities/kostanay/press/news/details/1209045?lang=kk