Шымкентте әлеуметтік жағынан осал топтарға тұрғын үй беру шаралары кезең-кезеңімен жүзеге асырылуда. Бүгін Тұран шағын ауданында тұрғын үй кезегінде тұрған 24 отбасы муниципалдық тұрғын үй қорынан жалға берілетін пәтерлердің кілттерін алды.
Жаңа тұрғындардың қатарында көп балалы және толық емес ата-аналары бар отбасылар, мүгедектер, ерекше қажеттіліктері бар балаларды тәрбиелеп отырған отбасылар, сондай-ақ жетім балалар мен ата-анасының қамқорлығынсыз қалған балалар бар.
Шымкент қаласының әкімі Ғабит Сыздықбеков маңызды тұсаукесер рәсіміне қатысып, тұрғындарды көптен күткен оқиғамен құттықтады. Өз сөзінде қала әкімі тұрғын үйлерді жөндеу, халықтың әл-ауқатын жақсарту және қалада жайлы орта қалыптастыру әкімдіктің басымдықтарының бірі екенін атап өтті.
Айта кету керек, муниципалдық тұрғын үй қорынан жалға берілетін пәтерлер заңнамалық талаптарға сәйкес, бекітілген тізімдер негізінде және белгіленген тәртіппен беріледі. Жыл басынан бері қала бойынша 235 пәтер таратылды, оның 187-сі тұрғын үй кезегінде тұрған тұрғындарға берілді.
Бұл іс-шара тиімді әлеуметтік қолдаудың айқын мысалы және халықтың өмір сүру сапасын жақсартуға бағытталған жүйелі жұмыстың жалғасы болып табылады.