2026 жылғы 28-30 сәуір аралығында Самарқанд қаласында (Өзбекстан) Химиялық, биологиялық, радиологиялық және ядролық (ХБРЯ) тәуекелдерді азайту жөніндегі Еуропалық Одақтың озық тәжірибелер орталықтары ұйымдастырған «Project 106» жобасының өңірлік дала оқу-жаттығулары өтті.

Іс-шара ірі қоғамдық іс-шаралар кезінде ХБРЯ қаруын қолдану арқылы жүзеге асырылуы мүмкін күрделі әрі үйлестірілген шабуылдарға ұлттық және өңірлік деңгейдегі дайындықты тексеруге бағытталды.

Оқу-жаттығуларға бейінді ведомстволардың, төтенше жағдайлар қызметтерінің және халықаралық ұйымдардың өкілдері қатысты. Бақылаушы ретінде Еуропалық Одақ пен Орталық Азия елдерінің өкілдері қатысты.

Іс-шараға Қазақстан Республикасынан Сыртқы істер министрлігі, Төтенше жағдайлар министрлігі, Ұлттық ұлан және Қазақстан Республикасының Атом энергиясы агенттігі жанындағы Атомдық қадағалау және бақылау комитетінің өкілдері қатысты.

Оқу-жаттығулар барысында қатысушылар ведомствоаралық өзара іс-қимыл тетіктерін, жедел қызметтердің әрекеттерін үйлестіруді, сондай-ақ төтенше жағдайлар кезіндегі өңір мемлекеттері арасындағы ақпарат алмасу мәселелерін пысықтады.

Осындай іс-шараларды өткізу өңірлік ынтымақтастықты нығайтуға және қазіргі заманғы сын-қатерлер мен қауіптерге дайындық деңгейін арттыруға ықпал етеді.

Ақпарат көзі : https://www.gov.kz/memleket/entities/atomic-control/press/news/details/1222479?lang=kk