Қазақстан Республикасының цифрлық даму, инновациялар және аэроғарыш өнеркәсібі министрлігі Мемлекеттік органдардың цифрлық вице-министрлерінің қатысуымен Demo Day ұйымдастырадыКүні: 2024 жылғы 7 қарашаУақыты: 15:00Өтетін жері: Мәңгілік ел даңғылы, 55/8, Блок С 4.6, Astana Hub, Event hallDemo Day шеңберіндегі кезекті таныстырылымды ҚР Қаржы министрлігі өткізеді. Министрлік тарапынан әзірленген жобалар цифрлық трансформациялау бойынша соңғы жаңалықтар мен бизнеске арналған банктік шешімдерді ұсынады.Финтех қауымдастығында тәжірибе алмасуға және жаңа байланыстар жасауға тамаша мүмкіндік! БАҚ аккредитациясы үшін байланыс телефоны:+7 778 552 8116 – Еңлік БердірахмановаАккредитация 6 қараша сағат 15:00-ге дейін қабылданады.Ақпарат көзі : https://www.gov.kz/memleket/entities/mdai/press/news/details/877947

ҚР Еңбек және халықты әлеуметтік қорғау министрі Светлана Жақыпова Үкімет отырысында мүгедектігі бар адамдардың әлеуметтік қорғалуы мен өмір сүру сапасын арттыруға бағытталған қабылданып жатқан бірқатар шаралар туралы айтты.Еңбекминінің басшысы өз сөзінің басында бүгінде елімізде мүгедектігі бар 732 мың адам тұратынын, бұл халықтың жалпы санының 3,6% - ын құрайтынын хабардар етті. Оның ішінде 57% - еңбекке қабілетті жастағы адамдар, 27% – зейнеткерлік жастағы адамдар, 15% - балалар.Аурулардың нозологиялық формаларының құрылымы бойынша 18 жастан асқан адамдар арасында психикалық бұзылулар (18%), қан айналымы жүйесінің аурулары (17,2%), барлық жарақат түрі (13%) басым. Ал балалар мүгедектігі бойынша жүйке жүйесінің аурулары (26,6%), туа біткен ақаулар (25,1%) және психикалық бұзылулар (22,4%) көбірек кездеседі. Жүргізілген талдау көрсеткендей, соңғы 3 жылда балалар мүгедектігінің 11,4%-ға өсуі байқалады.«Мүгедектігі бар адамдарды әлеуметтік қамсыздандыруға арналған шығыстар базалық және міндетті деңгейде жүзеге асырылады. Жыл сайын республикалық бюджеттен шығыстар шамамен 22% - ға ұлғаяды. Биыл ол 748,5 млрд теңгені құрады. Мемлекеттік әлеуметтік сақтандыру қорынан төленетін әлеуметтік төлемдер 46 млрд теңгені құрады», – деді Светлана Жақыпова.Министр мүгедектігі бар адамдарға мемлекеттік қолдау проактивті форматта көрсетілетінін айтты. Бұл қызметтер қазіргі кезде Әлеуметтік қызметтер порталы арқылы көрсетіледі, онда техникалық оңалту құралдары бойынша 794 өнім беруші, ымдау тілі қызметін көрсету бойынша 760 өнім беруші, 122 санаторийлік-курорттық ұйым тіркелген.Осы жылы олар 770,7 мың техникалық оңалту құралын іске асырды, 26,6 мың жеке көмекшінің қызметі көрсетілді, 80 мың санаторийлік-курорттық емдеу қызметі және ымдау тілі бойынша 8,6 мың қызмет ұсынылды.«Қазіргі уақытта Қолжетімділіктің интерактивті картасында 43 312 объект тіркелген, 19 421 объект немесе 45% толық бейімделген. Өңірлік аспектіде 6 облыс бойынша жоспардан төмен көрсеткіштер байқалады.Жыл басынан бері әлеуметтік инспекторлар әлеуметтік және көлік инфрақұрылымы нысандарына мүгедектігі бар адамдардың қолжетімділігін қамтамасыз ету мәніне 2344 тексеру жүргізді.Тексеру қорытындысы бойынша анықталған бұзушылықтарды жою туралы 826 нұсқама берілді, жалпы сомасы 199,2 млн теңгеге 798 әкімшілік айыппұл салынды», – деді Светлана Жақыпова.Жоспарланған 9 оңалту орталығының үшеуі (Семей, Тараз және Кентау қ.) пайдалануға берілді. Ақмола, Ақтөбе, Атырау, Ұлытау, Батыс Қазақстан облыстарында және Шымкент қаласында құрылыс жүргізілуде.Еліміздің 7 өңірінде (Шымкент, Павлодар, Өскемен, Талдықорған, Тараз, Қостанай және Ақтөбе қалалары) аутиcтік спектрі бұзылған және басқа да ментальды ауытқулары бар балаларға арналған күндізгі болу орталықтары ашылды.«Оңалту шараларының тиімділігін арттыру және бақылауды күшейту мақсатында Цифрлық оңалту күнделігі іске қосылды. Нозология түрлері бойынша әлеуметтік оңалту хаттамалары әзірленді.2024 жылдың тамыз айынан бастап 4 өңірде (Абай, Қызылорда және Павлодар облыстары, Шымкент қ.) «Қазақстан халқына» қорымен бірлесіп, тірек-қимыл аппараты бұзылған балаларды инновациялық оңалту құралдарын қолдана отырып, үй жағдайында оңалтуға арналған пилоттық жоба жүзеге асырылуда.Тағы бір сәтті мысал ретінде Алматы облысы Талғар қаласындағы «Ақ жол-М» балаларды оңалту орталығының қызметін атауға болады. «Қазақстан халқына» қорының қолдауымен аталған орталық заманауи инновациялық жабдықтармен жабдықталған.Жалпы, Республика бойынша осы жылдың 9 айында жүргізілген оңалту шараларының қорытындысы бойынша денсаулық жағдайының жақсаруына байланысты толық оңалтудан өткендердің саны 8,9 мың адам болды, мүгедектіктің жеңіл тобына шамамен 8,2 мың адам ауыстырылды», – деді Светлана Жақыпова.Қоғам дамуындағы жаңа трендтерді ескере отырып, әлеуметтік қызметкерлердің кәсіби даярлық деңгейіне, олардың дағдылары мен құзыреттеріне қойылатын талаптар күшейтіледі. Әлеуметтік қызметкерлердің біліктілік деңгейлері бойынша білім беру модульдері әзірленді. Бейінді білімі жоқ әлеуметтік қызметкерлерді қысқа мерзімді оқыту үшін әлеуметтік жұмыс бойынша кафедралары бар 14 ЖОО-мен меморандумдар жасалды. Сондай-ақ skills.enbek алаңында оқыту жүргізіледі.«Әлеуметтік қызметкерлер үшін 8 деңгей бойынша кәсіптік стандарттар бекітілді. Ұлттық ғылыми орталық базасында арнаулы әлеуметтік қызметтер (бұлан әрі – АӘҚ) көрсету саласындағы кәсіби біліктілікті тану орталығы құрылды. Жүйелеу және есепке алу үшін Әлеуметтік қызметкерлердің тізілімі жасалды. Бүгінде 12 704 әлеуметтік қызметкердің 9 568-і оқудан өтіп, 7 537 адам сертификат алды», – деп толықтырды министр.Арнаулы әлеуметтік қызметтер көрсету сапасын арттыру үшін 2025 жылғы 1 қаңтардан бастап АӘҚ ұсынатын меншік нысанына қарамастан субъектілерді лицензиялау енгізіледі. Халықты әлеуметтік қорғау саласындағы реттеу және бақылау комитеті лицензиар болып анықталды. Лицензиялау процесі толығымен цифрланған. Сондай-ақ лицензия алдындағы дайындық жүргізілуде.«Бүгінде 110 мыңнан астам адам 1021 ұйымда стационар, жартылай стационар, уақытша болу және үйде болу жағдайында арнаулы әлеуметтік қызметтер алады. Оның ішінде бұл қызметтерді мемлекеттік әлеуметтік тапсырыс бойынша жұмыс істейтін 177 үкіметтік емес ұйым да көрсетеді. Мемлекеттік әлеуметтік тапсырыс бойынша қолданыстағы ұзақ мерзімді шарттар олардың мерзімі ресми аяқталғанға дейін заңды күшін сақтайтынын атап өткен жөн.Сондай-ақ, жаңа жылдан бастап әрбір қызмет алушының жеке қажеттіліктерін ескере отырып, әлеуметтік көмек пен қолдаудың қажетті көлемдерін анықтауға мүмкіндік беретін жан басына шаққандағы қаржыландыру жүйесі іске қосылады», – деп толықтырды Светлана Жақыпова.Министр мүгедектігі бар адамдарды жұмысқа орналастыру маңызды мәселе екенін атап өтті. 2024 жылғы 1 қарашадағы жағдай бойынша 148 мың адам немесе еңбекке қабілетті (381 мың) мүгедектігі бар адамдардың 39% - ы жұмыспен қамтылды.Жұмыспен қамту бойынша ғылыми қызмет (28%), мемлекеттік басқару (12%), білім беру және сауда (9%), денсаулық сақтау (7%) салалары көш бастап тұр.Мамандығы бойынша мүгедектігі бар адамдардың 21%-ы кәсіби маман, 19%-ы – біліктілігі жоқ жұмысшы, 13%-ы – техник-мамандар, 11%-дан басшылар мен мемлекеттік қызметшілер; қызмет көрсету, сату саласында жұмыс істейтін қызметкерлер.«Мүгедектік мәселелері жөніндегі штаттан тыс кеңесшілер институтына жеке тоқталғым келеді, олардың рөлі артып келеді. Министрлер мен барлық деңгейдегі әкімдердің кеңесшілері өмірдің барлық аспектілерінде мүгедектігі бар адамдардың құқықтарын қорғау жөніндегі саясатты іске асыруға тартылды.Кеңесші жұмысының сәтті үлгісін біз Алматы қаласынан көріп отырмыз. Әкімнің кеңесшісі жобалық кеңсеге енгізілген және мүгедектігі бар адамдардың алға қойған мақсаттары мен қажеттіліктеріне қол жеткізуді қамтамасыз ететін шағын штаты бар. Кеңесші Қасиет Омарова өзекті мәселелерді көтеріп, мемлекеттік органдармен, азаматтық қоғаммен бірлесіп сындарлы шешім табады. Алматы қаласын дамытудың Жол картасын талдау нәтижесінде Кеңесші офисі инклюзия қағидаттарын ескере отырып, жоспарлау және іске асыру үшін 300 іс-шараға 189 түрлі ұсынымдар енгізді.Өңірлердің әкімдерінің назарын осы оң тәжірибені енгізу қажеттілігіне аударғым келеді», – деп түйіндеді ЕХӘҚМ басшысы.Ақпарат көзі : https://www.gov.kz/memleket/entities/enbek/press/news/details/877931

ҚР Үкіметінің отырысында Оқу-ағарту министрі Ғани Бейсембаев инклюзивті және арнайы білім беруді дамыту бойынша қабылданып жатқан шараларға тоқталды.Оның айтуынша, елімізде 496 ұйым жұмыс істейді, сондай-ақ арнайы қолдауға мұқтаж балаларға арналған 1071 кабинет жабдықталған. Мектептердің 88%-да және колледждердің 80%-да инклюзивті оқыту үшін жағдайлар жасалған.Мектептерде «Педагог-ассистент» лауазымы енгізілді, бұл мамандар санын бір жылда 1-ден 2,5 мыңға дейін арттыруға мүмкіндік берді. Енді бұл лауазымның ашылуы мектепке дейінгі ұйымдарда да қарастырылуда. Ерекше білім беру қажеттіліктері бар балалармен барлығы 9 мыңнан астам арнайы педагог жұмыс істейді.«Келесі жылдан бастап педагог-ассистенттер колледждерде дайындала бастайды. Тірек-қимыл аппараты бұзылған балалар үшін мектепте «Жеке көмекші» лауазымы енгізіледі. Сондай-ақ, «Педагог» кәсіби стандартына ерекше білім беру қажеттіліктері бар балалармен жұмыс істеу бойынша жаңа мамандықтар енгізілуде», - деді Ғани Бейсембаев. Сондай-ақ, қатардағы педагогтердің біліктілігін арттыру бойынша жұмыстар жүргізілуде. Биыл біліктілікті арттыру курстарынан 5 мың педагог өтті. Ақпарат көзі : https://www.gov.kz/memleket/entities/edu/press/news/details/877967

АЗАМАТТЫҚ АВИАЦИЯНЫҢ ЕУРАЗИЯЛЫҚ КОНФЕРЕНЦИЯСЫАрмения, Қазақстан, Қырғызстан, Тәжікстан және Өзбекстан кіретін Еуразиялық азаматтық авиация конференциясы (EАCAC) қатысушы елдердің авиациялық билігі өкілдерімен Алматыда алғашқы отырысын өткізді.EАCAC әлемдік сала институттарымен – ИКАО, Еуропалық комиссия, ИАТА және басқа да халықаралық ұйымдармен жұмыс шеңберінде өз ұстанымын шоғырландыруға мүмкіндік береді.Байқаушы мемлекет ретінде отырысқа Моңғолияның авиациялық билігінің өкілдері қатысты.Отырысты Қазақстан Республикасының Көлік вице-министрі Талғат Ластаев ашты. "Еуразия өңірінде алғаш рет азаматтық авиация саласында осындай деңгейдегі ұйым құрылуда. EACAC елдеріміздің авиациялық билік орындарына тиімді өзара іс-қимыл жасауға, ұшу қауіпсіздігі, авиациялық қауіпсіздік, формальдылықты жеңілдету, орнықты даму, авиациялық персоналды даярлау саласында тәжірибе, білім және озық тәжірибемен алмасуға мүмкіндік береді және, ең бастысы, болашақ сын-тегеуріндерге дайындық кезінде проблемалық мәселелер бойынша шешімдер әзірлеу үшін негіз жасайды", - деп атап өтті вице-министр.EACAC-тың негізгі мақсаты – тиімді үйлестіру мен өзара іс-қимылды жеңілдете отырып, Еуразия аймағындағы мүше елдердің авиациялық билік орындары арасында ынтымақтастық платформасын құру. Осы мақсатта іс-шараға қатысушылар Азаматтық авиацияның Еуразиялық конференциясын құру туралы декларацияға қол қойды. Қазақстан тарапынан құжатты ҚР КМ Азаматтық авиация комитетінің төрағасы Салтанат Томпиева куәландырды.Өз сөзінде Қазақстанның авиациялық әкімшілігінің бас директоры Каталин Раду: "Еуразиялық азаматтық авиация конференциясы халықаралық авиациялық қоғамдастықта пікірлер бірлігі мен мықты өкілдікті қамтамасыз ету ісіндегі елдеріміздің күш-жігерін жақсырақ үйлестіруге мүмкіндік береді. Бұл бастама үкіметтерден де, саладан да айтарлықтай қолдау алды. Біз қазір салалас – ACAO, AFCAC, ECAC, LACAC – және негізгі халықаралық ұйымдармен серіктестігімізді нығайта бастадық".Іс-шара барысында Қазақстанның авиациялық әкімшілігін оқыту жөніндегі Excellence Center жобасының, сондай-ақ "ЕАСАС инспекторлар базасы" бірыңғай платформасын құру жөніндегі шешімдер тұсаукесерлері өтті.Отырыс қорытындысы бойынша EAСАС бас хатшысы болып Қазақстан Республикасының Көлік вице-министрі Талғат Ластаев, EAСАС президенті болып Өзбекстан Республикасы Көлік министрлігі жанындағы Азаматтық авиация агенттігінің бас директоры Тахир Назаров тағайындалды.EACAC міндеттерінің арасында аймақтық ынтымақтастық пен өзара қолдауды нығайту; ұшу қауіпсіздігін, авиациялық қауіпсіздікті арттыру, формальдылықты жеңілдету, ұшқышсыз авиацияның тұрақты өсуі мен дамуы үшін жалпы саясаттар мен рәсімдерді әзірлеу және енгізу, бұл азаматтық авиацияның және басқа да байланысты салалардың тиімді дамуына ықпал етеді; азаматтық авиацияның халықаралық стандарттарын және бүкіл аймақ бойынша ұсынылған тәжірибелерді үйлестіру және енгізу; өңір елдерінің авиациялық мүмкіндіктерін нығайту және олардың халықаралық авиациялық аренада болуын арттыру; техникалық көмек көрсету және авиациялық персоналды даярлауға қатысу, сондай-ақ өңірде техникалық ресурстардың бірыңғай "пулын" құру болыпы табылады.Анықтама: Азаматтық авиацияның Еуразиялық конференциясын (EACAC) құру туралы бастама алғаш рет 2023 жылғы мамырда "Орталық Азияның тұрақты дамуы мен транзиттік әлеуетін іске асыру жолындағы энергетикалық көшу" атты 1-ші Қазақстандық авиациялық диалогты өткізу шеңберінде айтылды. 2024 жылдың сәуірінде Тулузада (Франция) EACAC жобасы ИКАО Еуропалық және Солтүстік Атлантикалық бюросының (EURNAT-DGCA) азаматтық авиация бас директорларының кеңесі кезінде ұсынылды.Ақпарат көзі : https://www.gov.kz/memleket/entities/transport/press/news/details/877902

Жамбыл облысында ағымдағы жылдың 10 айының қорытындысы бойынша құрылыс жұмыстарының көлемі 117,8 пайызға орындалды (жоспар 110,2 %). Бұл туралы облыс әкімі Ербол Қарашөкеевтің төрағалығымен өткен кезекті аппараттық кеңесте айтылды.Басқосуда құрылыс басқармасының басшысы Ерлан Орымбаев жоспарланған жұмыстардың барысы мен саладағы өзекті мәселелер туралы баяндама жасады.Мемлекеттік бағдарламалар аясында 282 жобаның құрылысы жүруде. Биыл 201 нысан, қалған 81-і келесі жылы пайдалануға беріледі деп күтілуде.Бүгінге дейін 71 нысанның құрылысы аяқталды.10 айдың қорытындысы бойынша 577,1 мың шаршы метр тұрғын үй пайдалануға берілді (жоспар 750,0 мың шм).Өңірде 2 909 пәтерлі 56 көпқабатты тұрғын үйдің құрылысы жүруде.Бұдан бөлек, 14 шағынауданда 800 пәтерлі 22 әлеуметтік кредиттік тұрғын үйдің құрылысы басталды.Биылғы жылдың қорытындысына сәйкес 2 749 пәтерлі 54 тұрғын үй пайдалануға беріледі.Халықтың әлеуметтік осал топтары үшін коммуналдық тұрғын үй қорынан сатып алу құқығынсыз пайдалануға берілетін 354 пәтер сатып алынады. Сонымен қатар, «Самұрық-Қазына» Ұлттық әл-ауқат қоры» АҚ есебінен жекешелендіру құқығымен жалға берілетін 1 221 пәтер сатып алу көзделген.Жалпы биыл сатып алу тетігі арқылы 1 575 осал топтағы азаматтар арендалық тұрғын үймен қамтылады. Былтырғы жылмен салыстырғанда пәтер 2 есеге (2023 – 864 пәтер), ал қаражат көлемі 3 есеге (2023 – 7,8 млрд., 2024 – 23,2 млрд) артты.Сонымен бірге 82 инженерлік инфрақұрылым жобаларының құрылысына 13,7 млрд.теңге қаржы қаралған.Ербол Қарашөкеев биылға жоспарланған құрылыс жұмыстарын мерзімінде әрі сапалы аяқтаудың маңыздылығына тоқталып, өз міндеттерін орындамаған, олқылықтарға жол берген мердігерлерге заң аясында қатаң шаралар қабылдауды ескертті.Аудан әкімдерінен тұрғындарға арналған баспаналарды сатып алу шараларын жеделдетуді талап етті.Басқосуда Тараз қаласы мен аудан әкімдері қолға алынған құрылыс жұмыстарының қарқыны бойынша есеп берді.Аппараттық кеңесте «қызыл сызық» құрылыс нормасының сақталуы туралы сәулет және қала құрылысы басқармасының басшысы Айтқазы Қарабалаев, мемлекеттік сәулет-құрылыс бақылау басқармасының басшысы Қайрат Бисембаев баяндама жасады.Ербол Қарашөкеев аталған мәселе бойынша жауаптыларға жұмысты жүйелеп, нақты шаралар қабылдауды тапсырды.Ақпарат көзі : https://www.gov.kz/memleket/entities/zhambyl/press/news/details/877880

Ақмола облысының әкімі азаматтарды жеке мәселелері бойынша қабылдады. Кездесу барысында тұрғындармен жер қатынастары, инфрақұрылым және әлеуметтік қамсыздандыру және т. б. мәселелер айтылды.Іс-шара соңында өңір басшысы азаматтардың өтініштері назардан тыс қалмайтынын атап өтті. Барлық көтерілген мәселелер белгіленген заңнамалар шеңберінде өз шешімін табады, мемлекеттік органдардың басшыларына халықтың проблемаларын уақтылы қарау және шешу қажеттігін еске салып, тиісті тапсырмалар берді. Ақпарат көзі : https://www.gov.kz/memleket/entities/aqmola/press/news/details/877851

Бүгін Елисей сарайында Қазақстан мен Франция арасындағы 2024-2026 жылдарға арналған сыни ресурстар мен материалдар саласындағы стратегиялық әріптестіктің Жол картасына қол қойылды.Жол картасының мақсаты-тұрақты жеткізу тізбегін құру, олардың тұрақтылығын арттыру, ғылыми зерттеулер, білім беру және ESG-ынтымақтастық сияқты бағыттардағы ынтымақтастықты нығайту. Серіктестік шеңберінде шикізатты барлау және өндіру, электрондық сынықтар мен магниттерді қайта өңдеу, аккумуляторлар өндіру және «жасыл стандарттарға» көшу жөніндегі жобалар көзделген.Сондай-ақ, Францияның сыни металдар қоры мен АФД қатысуымен Тау-кен және металлургия компанияларына бірлескен инвестициялар жоспарлануда.Жол картасы сыни шикізатты өндіру мен өңдеуді дамытуға, геологиялық зерттеулер мен ғылыми әзірлемелерге бағытталған.Ақпарат көзі : https://www.gov.kz/memleket/entities/mps/press/news/details/877854

Теңдесі жоқ қазақстандық «Апорт» алмасының ерекше хош иісі мен әрқайсысы жарты келі салмақты болып, қайтадан дүкен сөрелерінде пайда болып, экспортқа шығарылуы үшін не істеу керек?Ауыл шаруашылығы министрлігі мен Ұлттық ауыл шаруашылығы ғылыми-білім беру орталығы (ҰАҒБО) Апорт алмасын қайта жаңғырту бағдарламасын әзірледі.«Апорт» - өте талғампаз алма ағашының түрі, оны өсіру мен күтудің ерекше жағдайларын талап етеді. Сапалы жемістерді тек теңіз деңгейінен кем дегенде 850 м және 1 250 м биіктікте өсетін бақтардан алуға болады. Алматының тау етегінде және жақын маңдағы Алматы облысында мұндай учаскелер көп емес. 4-6 жылдан кейін толық жеміс бере бастайтын басқа алма ағашы түрлерінен айырмашылығы, «Апортқа» 8-9 жыл қажет. Дегенмен, қазақстандық «Апорт» өзінің сапалық сипаттамаларының арқасында ел тұрғындарында үлкен сұранысқа ие және шетелдіктердің қызығушылығын тудырады.«Апортты» қайта жаңғырту бағдарламасы 2024-2028 жылдарға арналған. Бағдарламаның операторы Ауыл шаруашылығы министрлігі мен ҰАҒБО болады, ал ғылыми-технологиялық және әдістемелік қолдауды Қазақстан жеміс-жидек және көкөніс ғылыми-зерттеу институты қамтамасыз етеді. «Апортты» қайта жаңғырту бағдарламасын іске асыруға жеке инвесторлар мен мамандандырылған питомник шаруашылықтары қатысады.Бағдарламаның төрт жылы алма бақтарының толық көлемде коммерциялық өндірісін бастау үшін қажетті мөлшерде көшет өсіруді қамтиды. Бірінші кезеңде, 2024 жылы «Сиверс» алмасының тұқымдарын жинау және қазақстандық «Апортты» өсірудің ұлттық стандарттарының жобаларын әзірлеу жүзеге асырылады. 2025 жылы «Сиверс» алма ағашының көшеттерін ҚазҒЗИЖ ҒЗИ «Талғар» аймақтық филиалында 10 га аумаққа отырғызу басталады, ол питомник шаруашылықтары үшін аналық-көшет бағы болады.Келесі екі жылда 100 га аумаққа бақ салу үшін жеткілікті мөлшерде көшет өсіру жоспарлануда. Одан кейін жеке бақша иелері арасында «Апорт» өндірісін кеңейту мүмкін болады.ҚазҒЗИЖ ҒЗИ «Талғар» аймақтық филиалының өкілі Сағи Солтанбеков басқарма отырысында атап өткендей, «Апортты» Қазақстанда қайта жаңғырту үшін қажетті тарихи және селекциялық база бар.«ҚазҒЗИЖ» ЖШС ғалымдары «Апортты» қайта жаңғырту жұмыстарын 2011 жылы бастаған. Бүгінгі күні «Сиверс» алмасының 1000-нан астам түрі бар, олардың арасынан ДНҚ талдауының нәтижесі бойынша ғалымдар «Апорт қызыл-қанды» сортын өндіру үшін 11 түрін таңдап алды. Бұл түрлер сауықтырылып, 2015 жылы 5 га аумаққа көшеттер отырғызылды, «Апорт» сортын көбейту технологиясына патенттер алынды. 2015 жылы салынған тәжірибелік бақ 2023 жылы жеміс бере бастады, жекелеген жемістердің салмағы 300-500 граммға жетті. Биыл біз 6 тонна «Апорт қызыл-қанды» алдық», — деді ол.Серік Жұманғарин «Апорт» алмасын қайта жаңғырту бағдарламасының жобасын бекітті, оған қазақстандық ерекше алма сортын насихаттау да кіреді. Сонымен қатар ауыл шаруашылығы жоғары оқу орындарының студенттерін бағдарламаны іске асыруға тартуды тапсырды.Ақпарат көзі : https://www.gov.kz/memleket/entities/moa/press/news/details/877858

Ұлытау облысының әкімі Дастан Рыспеков цифрлық технологиялар мен IT-кәсіпкерлік орталығының жұмыс барысымен танысу мақсатында арнайы барып, стартаперлермен кездесті. Орталық Astana Hub технопаркі, Цифрлық даму министрлігі және Ұлытау облысы әкімдігінің қолдауымен құрылған. Ulytau Hub-тың негізгі мақсаты - жергілікті IT-қоғамдастық пен стартап мәдениетін дамытуға қолайлы орта құру, технологиялық кәсіпкерлікті ынталандыру және өңір тұрғындары үшін цифрлық білім беруді қолдау. Жергілікті стартаперлердің жобаларымен танысқан өңір басшысы орталықтың ашылуын ІТ саласындағы жастарды қолдауға жасалған жағдай екенін айтты. Сонымен қатар облыс әкімі Хабтың қызмет етуін өңір дамуындағы жаңа кезеңге балап, Ұлытау облысының экономикасын нығайтып, оны заманауи әрі тұрақты етуге бағытталған идеялардың тоғысатын орталығына айналатын орын боларына сенім білдірді. Жаңа орталықта инкубациялық бағдарламалар, оқу курстары және семинарлар ұйымдастырылады. Сондай-ақ митаптар, воркшоптар, Speaker Talks, Idea Battle, Pizza Pitch, форумдар, хакатондар, халықаралық олимпиадалар және басқа да тәжірибе мен идея алмасуға бағытталған кездесулер өткізіледі. Айта кетейік, Ulytau Hub орталығы - стартаптарды қолдауға, IT-білім беруді дамытуға және өңірдің технологиялық экожүйесін нығайтуға бағытталған. Ол Жезқазған қаласы, Абай көшесі, 99 мекенжайы бойынша орналасқан және технологиялық инновацияларға қызығушылық танытқандарды қабылдауға дайын.Ақпарат көзі : https://www.gov.kz/memleket/entities/ulytau/press/news/details/877847

Любляна, 2024 жылғы 5 қараша – Президент сарайында Қазақстанның Словениядағы Елшісі Данияр Сарекеновтің Словения Президенті Наташа Пирц Мусарға сенім грамоталарын тапсыру рәсімі салтанатты түрде өтті.Салтанатты рәсім аяқтаған соң сұхбат барысында Елші Қазақстан Президенті Қасым-Жомарт Тоқаевтың жылы лебізі мен ізгі тілектерін жеткізді және ресми Астананың Люблянамен көпқырлы әріптестікті одан әрі нығайтуға және кеңейтуге мүдделі екенін растады. Мұның айқын дәлелі – Словения астанасында Қазақстанның дипломатиялық өкілдігінің ашылуы.Елші екі ел арасындағы ынтымақтастықтың қазіргі жоғары деңгейін атап өтіп, сауда-экономикалық және инвестициялық салаларда өзара іс-қимылды жандандыру мен бірлескен жобаларды жүзеге асырудың маңыздылығына бас назар аударды.Өз кезегінде Словения Президенті қазақ дипломатын ресми миссиясының басталуымен құттықтап, Қазақстан басшылығына Люблянада елшілік ашу туралы шешімін жоғары бағалайтынын мәлімдеді және алдағы уақытта да өзара тиімді қарым-қатынастарды дамытуға бағытталған өз ұмтылысын қуаттады.Словения басшысы 2025 жылы Қазақстанға жоспарланған сапарын растап, ҚР Президентімен кездесу мен келіссөздері екі ел арасындағы қалыптасқан қарым-қатынастарды жаңа деңгейге көтеретініне сенім білдірді.Кездесу соңында Словения Президенті Елшіге екі ел арасындағы қарым-қатынастарды нығайту жолында табыс тілеп, Қазақстан басшылығы мен халқына ізгі тілектерін жеткізді.Ақпарат көзі : https://www.gov.kz/memleket/entities/mfa/press/news/details/877842

Астана, 2025 жылғы 26 маусым – Қазақстан Республикасы Сыртқы істер министрінің бірінші орынбасары Ақан Рахметуллин БҰҰ Босқындар істері жөніндегі Жоғарғы комиссары басқармасының (БЖКБ) Орталық Азиядағы өкілінің міндетін атқарушысы Думитру Липканумен кездесу өткізді.Тараптар азаматтығы жоқ адамдардың саның қысқарту, босқындарға, ішкі қоныс аударған адамдарға және азаматтығы жоқ адамдарды қорғау және гуманитарлық көмек көрсету мәселелері бойынша ынтымақтастықтың жай-күйі мен перспективаларын талқылады.Қазақ дипломаты босқындарды қорғау саласындағы ұлттық заңнаманы жетілдірудің, сондай-ақ Қазақстанның босқындарға жәрдем көрсету және гуманитарлық көмек көрсету жөніндегі іс-қимылының маңыздылығын атап өтті.Сұхбаттастар босқындардың құқықтарын жақсарту және гуманитарлық қорғау мақсатында Қазақстан мен БЖКБ арасындағы ынтымақтастықты жалғастыру ниетін растады.Ақпарат көзі : https://www.gov.kz/memleket/entities/mfa/press/news/details/1024760?lang=kk

Елордалық Білім басқармасы басшысының орынбасары Серік Әділбаев Өңірлік коммуникациялар қызметінде өткен брифингте мектептер мен колледждерде оқушылардың қауіпсіздігін қамтамасыз ету үшін қабылданып жатқан шаралар туралы айтты, деп хабарлайды Астана қаласы әкімдігінің ресми сайты.Бүгінгі таңда елордада 286 мың бала білім алушылардың жалпы контингенті бар 188 мектеп, сондай-ақ 36 360 студентті қамтитын 32 колледж, 13 қосымша білім беру ұйымы және 16 арнайы білім беру ұйымы жұмыс істейді."Балалардың құқықтарын қорғау мәселесінде біз пәрменді шаралар қабылданатын басым бағыттарды белгілейміз. Бүгінгі таңда қаланың барлық білім беру ұйымдары автоматты өрт дабылы жүйесіне қосылған, сондай-ақ цифрлық бейнебақылаумен қамтамасыз етілген. Сондай-ақ барлық камералар мен дабыл түймелері Астана полиция департаментінің жанындағы ЖБО-ға қосылған", - деді Серік Әділбаев.Биыл барлық білім беру нысандары (мектептер, колледждер, қосымша ұйымдар) Face ID жүйесі бар заманауи турникеттермен жабдықталды.Сонымен қатар барлық білім беру ұйымдарында қала ТЖД мамандарымен бірлесіп, меншік нысанына қарамастан барлық мекеме басшылары, табиғи және техногендік сипаттағы төтенше жағдайлар туындаған жағдайда қызметкерлер мен оқушылар үшін тұрақты негізде жаттығулар, сондай-ақ авариялық жағдайлар бойынша жаттығулар өткізіледі.Айта кету керек, елордада кәмелетке толмағандар арасында суицидтік мінез-құлық пен қорқытудың алдын алу белсенді жүргізілуде."Жеке" психологиялық қолдау орталығы" құрылды (Астана қаласы Достық даңғылы, 13). Ол білім беру ұйымдарының психологиялық қызметтерінің қызметін үйлестіреді, педагог-психологтарға әдістемелік қолдау көрсетеді және оқушылармен, педагогтармен және ата-аналармен профилактикалық және ағартушылық жұмыстар жүргізеді. Биылғы 1 маусым мен 30 қазан аралығында КҚО психологтары 602 жеке консультация өткізді. Қаланың 5 ауданында оқушыларға, ата-аналар мен педагогтарға тегін психологиялық-консультациялық көмек көрсету кабинеттері жұмыс істейді (КҚО, "Нұрсая-2" ТК, №11 КБ, № 105 ОМ, № 22 МБ, № 92 МБ, 10 МБ базасында). Жыл басынан бері 362 бала және 407 ата-ана психологтардан кеңес алды. Осы оқу жылында қала мектептерінде психологтардың саны 200 штаттық бірлікке артты", - деді Білім басқармасы басшысының орынбасары.Қаланың оқу орындарында буллингке қарсы бағдарлама жүзеге асырылуда.Ол үшін пилоттық жобаға 5 мектеп (Алматы ауданының № 72 мектебі, Байқоңыр ауданының № 16 мектебі, Нұра ауданының № 79 мектебі, Есіл ауданының № 24 мектебі, Сарыарқа ауданының № 6 мектебі) енгізілді.Осы бағдарлама шеңберінде қорқытудың алдын алу және азайту (сабақтар, тақырыптық кезекшіліктер, бірлескен оқулар өткізу), буллингтің анықталған жағдайларын шешу бойынша іс-шаралар өткізіледі. Сондай-ақ мұғалімдерге оқушылардың мазасыздық дәрежесін анықтау дағдыларын үйрету жұмысы жүргізіледі.Ақпарат көзі : https://www.gov.kz/memleket/entities/astana/press/news/details/877838

Бүгін Қазақстан Республикасының Ауыл шаруашылығы министрі Айдарбек Сапаров Ветеринариялық бақылау және қадағалау комитетінің жаңа төрағасы-Қазбек Қазиханұлы Тәшімовті таныстырды.Осы лауазымға тағайындалғанға дейін Қазбек Тәшімов ҚР АШМ Ветеринариялық бақылау және қадағалау комитеті төрағасының орынбасары қызметін атқарды.Ол 1980 жылы Батыс Қазақстан облысы Тасқала ауданы Каменка ауылында дүниеге келген.2001 жылы Батыс Қазақстан мемлекеттік университетін «Ветеринариялық санитария» мамандығы бойынша бітірген. 2005 жылы сол университетте «Құқықтану» мамандығы бойынша екінші жоғары білім алды.Еңбек жолын 2002 жылы ҚР АШМ Тасқала аудандық аумақтық басқармасының жетекші маманы болып бастаған. 2005-2011 жылдар аралығында Батыс Қазақстан облысы Тасқала ауданы әкімінің аппаратында әртүрлі лауазымдарда қызмет атқарды.2011 жылдан бастап Орал қаласындағы Батыс Қазақстан облысы Ауыл шаруашылығы басқармасының ветеринария бөлімін басқарды, ал 2015 жылы Батыс Қазақстан облысы ветеринария басқармасының басшысы болып тағайындалды.2017 жылдан 2021 жылға дейін Орал қаласы Батыс Қазақстан облысының ветеринария басқармасы басшысының орынбасары қызметін атқарды.2021-2024 жылдар аралығында Ақтау қаласындағы Маңғыстау облысының Ауыл шаруашылығы басқармасын басқарды.Ақпарат көзі : https://www.gov.kz/memleket/entities/moa/press/news/details/877827

Қасым-Жомарт Тоқаевтың Франция Республикасына мемлекеттік сапары салтанатты қарсы алу рәсімінен басталды.Мемлекет басшысын әскери оркестрдің сүйемелдеуімен Президент Эмманюэль Макрон қарсы алды. Қазақстан мен Францияның мемлекеттік әнұрандары шырқалды.Президенттер республикалық гвардия, әуе-ғарыш, құрлық және теңіз әскерлерінен жасақталған Құрмет қарауылының алдынан жүріп өтті. Бұдан кейін мемлекеттер басшылары Құрмет қарауылының салтанатты шеруін тамашалады.Қасым-Жомарт Тоқаев пен Эмманюэль Макрон бір-біріне ресми делегация мүшелерін және құрметті қонақтарды таныстырды.Ақпарат көзі : https://www.gov.kz/memleket/entities/ontustik/press/news/details/877791

Түркістан облысының әкімі Дархан Сатыбалдының және Абай атындағы ҚазҰПУ-дың Басқарма төрағасы, ректор Болат Тілептің бастамасымен өзара ынтымақтастық туралы меморандум жасалып, Түркістан облысының педагогтері үшін дәрістер ұйымдастырылған болатын.Биыл меморандум аясында «Жайлы мектеп» ұлттық жобасы бойынша қолданысқа берілетін мектептерге ауыстырылатын басшылар мен мұғалімдерінің біліктілігін арттыру және қайта даярлау бағытында онлайн форматта «Пәндерді оқытуда мұғалімдердің метапәндік құзыреттерін жетілдіру» тақырыбындағы пән мұғалімдері үшін, 23-27 қыркүйекте мектеп басшылары үшін «Білім берудегі революция: заманауи мектеп менеджментіне жаңа көзқарас» тақырыбындағы біліктілікті арттыру курсының 1-кезеңі өтті. 28 қазан мен 1 қараша аралығында курстың 2-кезеңі университет базасында офлайн форматта жалғасты.Мақсат – мектеп басшыларының білім беру мекемесін басқаруда, пән мұғалімдерінің метапәндік құзыреттіліктерін қалыптастыруда теориялық білімдері мен практикалық дағдыларының деңгейін арттыру.Курстың І кезеңінде тыңдаушылар ғылыми-теориялық ақпараттармен танысып, практикалық тапсырмаларды орындау арқылы тәжірибе жинақтады. ІІ кезеңде курсқа қатысушылар университеттің профессор-оқытушылар құрамының дәрістерімен қатар университеттің оқу-зертхана базасымен танысып, ҚР Оқу-ағарту министрлігі Білім саласында сапаны қамтамасыз ету комитеті төрағасының орынбасары М.Мелдебекованың «Білім сапасын қамтамасыз етудегі бағалау мен бақылау жүйелері», Ы.Алтынсарин атындағы Ұлттық білім академиясының вице-президенті Р.Қаратабановтың «Орта білім беру мазмұны: басымдықтары мен іске асыру тетіктері» тақырыбындағы дәрістерін тыңдады.Алматы қаласындағы «Жайлы мектеп» ұлттық жобасы аясында қолданысқа берілген тұңғыш мектеп №97 мектеп-гимназиясының, заманауи үлгіде салынған, жоғары білім сапасын көрсетіп жүрген №206 мектеп-гимназиясының, инклюзивті білім беру жүйесі жақсы жолға қойылған № 200 мектеп-гимназиясының іс-тәжірибесімен, материалдық базасымен танысты.1 қарашада курсты аяқтаған 41 тыңдаушыға сертификаттар табысталды.Түркістан облысы әкімінің баспасөз қызметіАқпарат көзі : https://www.gov.kz/memleket/entities/ontustik/press/news/details/877793

Таяуда Астана қаласында ҚР Оқу-ағарту министрлігінің ақпараттық қолдауымен «Bilim orkenieti» ұлттық инновациялық ғылыми-зерттеу орталығының ұйымдастыруымен «Түркі халықтарының үздік студенті» атты халықаралық форум өтті.Мақсаты – дарынды студенттердің арасында байланыс орнату.Халықаралық форумға отандық ғалымдар, қоғам қайраткері мен бұқаралық ақпарат құралдарының өкілдері мен студенттер қатысты.Форумның марапаттау бөлімінде Түркістан облысы білім басқармасының «Қапланбек жоғары аграрлық-техникалық колледжі» МКҚК басшының тәрбие ісі жөніндегі орынбасары, Анаргүл Есқараева жетекшілік еткен 2-курс студенті Ақбота Аршабай «Түркі халықтарының үздік студенті» төсбелгісі және І дәрежелі дипломмен марапатталды.Түркістан облысы әкімінің баспасөз қызметіАқпарат көзі : https://www.gov.kz/memleket/entities/ontustik/press/news/details/877795

Черногория Республикасы, Будва қаласында 21 қазан мен 3 қараша күндері бокстан жастар арасында әлем чемпионаты өтті. Жаһандық бокс бәсекесіне 73 мемлекеттен 598 спортшы қатысып, шаршы алаң төрінде тартысты жекпе-жектер өткізді. Ұлттық құрама сапында түркістандық 5 спортшы қатысып, 1 алтын, 3 қола медаль қанжығалады.Осындай аламанда жүлде салған Түркістан облысының былғары қолғап шеберлері туған жерге оралды. Оларды спорт саласының майталмандары мен туған-туыстары және дос-жарандары құрметпен қарсы алып, зор ықыластарын білдірді. Жиында Түркістан облыстық дене шынықтыру және спорт басқармасы басшысының міндетін атқарушы Алмасбек Нақыпбеков әлемдік додадан олжалы оралған жерлестерімізді құттықтап, жаңа жетістіктер тіледі.Бокстан жастар арасындағы Әлем чемпионатында 67 келіде қолғап түйістіріп, барлық қарсыласын тізе бүктіріп, «Үздік боксшы» атанған Төрехан Сабырхан мен оның жаттықтырушысы Илияс Оралбеков те қарсы алған жанашырларына алғыс білдіріп, алдағы жоспарларымен бөлісті. Енді алдағы уақытта Төрехан 67 келіде ересектер арасында ел біріншілігіне қатысып, бағын сынайды. Ол бұған дейін жасөспірімдер арасында 4 дүркін Азия чемпионы және жастар арасында Әлем чемпионы атанды.Ал қыздар арасындағы жекпе-жекте үш бірдей ару қола медаль иегері атанды. Атап айтсақ, 52 келіде Бағжан Отынбай, 63 келіде Аружан Жаңабаева және Шұғыла Нәлібайлар қола медальді қанағат етті.Айта кетейік, бұл біріншілікке Қазақстан құрамасынан 25 боксшы (13 ер, 12 қыз) барған. Мәресіне жеткен Әлем чемпионатының қорытындысы бойынша, 17 отандасымыз жүлде алды. Тарқатып айтсақ, 6 алтын, 1 күміс және 10 қола. Осылайша Қазақстан құрамасы бірінші рет жастар арасындағы әлем чемпионатында командалық бірінші орынға ие болды.Әлем чемпионатының жеңімпазы Сабырхан Төрехан мен қола жүлдегерлері Бағжан Отынбай, Шұғыла Нәлібай Түркістан облыстық №5 олимпиада резервінің мамандандырылған балалар мен жасөспірімдер спорт мектебінің шәкірттері болса, Аружан Жаңабаева «Түркістан» кәсіби бокс клубының шәкірті.Түркістан облысы әкімінің баспасөз қызметіАқпарат көзі : https://www.gov.kz/memleket/entities/ontustik/press/news/details/877798

Түркістан облыстық Төтенше жағдайлар департаментінің Мемлекеттік өрт бақылау басқармасы 2024-2025 жылдардағы жылыту маусымының жоспарын бекіткен болатын. Соған орай 15 тамыз бен 15 қыркүйек аралығында «Өрт қауіпсіздігі айлығы» іс-шарасы өтті. Шараның мақсаты - жылу беру маусымы басталар алдында адам өмірі мен денсаулығын, мүлік пен қоршаған ортаны өрттен қорғау, тұрғын үйлерде өрттің туындау және табиғи газдан улану тәуекелдерін төмендету. Бұл жайында департаменттің басқарма басшысы Мұхан Байымбетов брифингте мәлімдеді.– Қазіргі таңда әлеуметтік жағдайы төмен осал топтағы отбасылардың тұрғын үйлеріне 200 дана газосигнализатор құрылғысы орнатылды. Биыл жылыту маусымы басталғалы улы газдан улану жағдайы орын алмады. Алайда өткен жылыту маусымында улы газбен уланудың 7 жағдайы тіркеліп, салдарынан 5 адам қайтыс болды. Сонымен қатар, 2024-2025 жылдардағы жылыту маусымында тұрғын үйлерде қазіргі кезге дейін 20 өрт оқиғасы тіркелді. Салдарынан 2 адам жарақат алса, қаза тапқандар жоқ, – деді спикер.Түркістан облысының Өңірлік коммуникациялар қызметіАқпарат көзі : https://www.gov.kz/memleket/entities/ontustik/press/news/details/877799

Облыс әкімдігінде Шардара ауданының 2030 жылға дейінгі даму жоспары талқыланды. Түркістан облысының әкімі Дархан Сатыбалды Шардараның географиялық ерекшеліктерін, су қойманы, суармалы алқаптарын тиімді пайдалану керектігін айтты.– Шардара ауданында суармалы жер көп. Өсімдік шаруашылығын дамыту, егістікті әртараптандыру бойынша мүмкіндік өте жоғары. Соны дұрыс пайдаланған жөн. Инвестиция тарту жұмыстарын күшейту қажет. Біз бұл даму жоспарын не үшін әзірлеп отырмыз? Нақты индикатор қойып, әр жылға бөліп, бекітіп алмасақ, жұмыс жүйелі болмайды. Идея табылса, қаржы тапшы, қаржы табылса, жобалар болмай қалмауы үшін 6 жылға жоспар жасадық. Осыны жүзеге асыру үшін барлық басқарма өздері жауапты сала бойынша жұмыс істейді, инфрақұрылым тарту және тағы басқа мәселелерді шешеді. Сонда ғана жобалар іске асып, аймақтың экономикасы көтеріледі, – деген Дархан Сатыбалды жауаптыларға тиісті тапсырмалар жүктеді.Шардара ауданының әкімі Арман Қарсыбаевтың айтуынша, ауданды дамытуда 4 бағыт таңдалған. Олар: туризм, ауыл шаруашылығы, өнеркәсіп және балық шаруашылығы. 2024-2030 жылдар аралығында 154 инвестициялық жоба жүзеге асып, 4 мыңға жуық жұмыс орны құрылады. Жобалардың жалпы құны 210 млрд. теңгеден асады. Өнеркәсіп және саудада 49 жоба, туризм – 16, балық шаруашылығы – 75 және ауыл шаруашылығында 14 жоба жоспарланған. Нәтижесінде 2030 жылға дейін ауданға тартылған инвестиция көлемі 3,2 есе өседі. Өнеркәсіп саласында 27 жоба жүзеге асып, зауыттар мен өндіріс орындары көбейеді. 2300-ге жуық адам жұмыспен қамтылмақ. Осылайша, өнеркәсіп өнімін 100 млрд. теңгеге жақындатып, 4 есе өсіру көзделіп отыр. Ауданда егістікті әртараптандыру, көкөністі, дәнді дақылдарды терең өңдеу салалары бойынша да жұмыстар атқарылады.Мәжілісте кәсіпкерлік, ауыл шаруашылығы және өзге де басқарма басшыларының ұсыныс-пікірлері тыңдалып, жоспарға енгізілді.Түркістан облысы әкімінің баспасөз қызметіАқпарат көзі : https://www.gov.kz/memleket/entities/ontustik/press/news/details/877805

Түркістан облысы әкімінің бірінші орынбасары Зұлпыхар Жолдасов шетелдік компания өкілдерімен кездесу өткізді.Басқосуда Түркістан қаласының халықаралық әуежайын дамыту перспективалары, жаңа авиакомпанияларды тарту, қосымша әуе бағыттарын ашу, инфрақұрылым нысандары мен көліктік-логистикалық хаб салу және кіші авиацияны дамыту мәселелері талқыланды. Сондай-ақ Түркістан облысында туризмді дамыту, облыс экономикасының әртүрлі салаларына инвестициялар тартуға қатысты ұсыныстар қарастырылды.Айта кетейік, бүгінде Түркістан халықаралық әуежайын дамыту жолдары қаралуда. Қаладағы туристік әлеуетті арттырып, өңірдің экономикасына оң әсерін тигізетін ұсыныстар мен пікірлер зерделенеді.Түркістан облысы әкімінің баспасөз қызметіАқпарат көзі : https://www.gov.kz/memleket/entities/ontustik/press/news/details/877807