«Әлеуметтік көмек көрсетудің, оның мөлшерін белгілеудің және Саран қаласы мен Ақтас кентінің мұқтаж азаматтарының жекелеген санаттарының тізбесін айқындаудың қағидаларын бекіту туралы» Саран қалалық мәслихатының шешіміне сәйкес, Мүгедектігі бар адамдардың құқықтарын қорғау күніне (қазанның екінші жексенбісі) 18 жастан асқан мүгедектігі бар адамдарға қалалық бюджеттен 30 мың теңгеден әлеуметтік көмек төленеді.Ақпарат көзі : https://www.gov.kz/memleket/entities/social-saran/press/news/details/1081325?lang=kk

Мұғалімдер күні қарсаңында Өнер орталығында өткен салтанатты шарада облыс әкімі Нұрлыбек Нәлібаев өскелең ұрпаққа тағылымды тәрбие, озық білім беру ісінде зор жауапкершілік арқалаған мәртебелі мамандық иелерін, Мемлекет басшысының қолынан мемлекеттік награда алған ұстаздарды құттықтады.«Күні кеше мерекеге орай Президентіміз Қасым-Жомарт Кемелұлы бір топ ұстаздарды Ақорда төрінде қабылдап, мемлекеттік наградаларды табыстады. Салтанатты қабылдауда жерлестеріміз, Қорқыт ата атындағы Қызылорда университетінің доценті, филология ғылымдарының кандидаты Жанбершиева Ұлжан Нахатқызы «Парасат» орденімен наградталды. Ардагер ұстаз Серекеева Күміскүл Дүйсенқызына «Қазақстанның еңбек сіңірген ұстазы» құрметті атағы берілді. Марапат иелерін барша Сыр жұртшылығының атынан шын жүректен құттықтаймын!», – деді аймақ басшысы.Ақпарат көзі : https://www.gov.kz/memleket/entities/kyzylorda/press/news/details/1080975?lang=kk

«Қайтарылған активтер есебінен 8 млрд. 200 млн. теңгеге 5 мектептің құрылысы қаржыландырылады». Бұл туралы Мұғалімдер күніне арналған салтанатты шарада аймақ басшысы Нұрлыбек Нәлібаев айтты.«2022-2024 жылдары сапалы білім беруді қамтамасыз ету мақсатында бюджеттен 812 млрд. 245 млн. теңге бөлінді. Өткен жылы қаржыландырудың барлық көзінен 31 млрд. 800 млн. теңгеге 13 білім беру ұйымы жаңадан ашылды.Мемлекет басшымыздың бастамасымен қолға алынған «Келешек мектептері» ұлттық жобасы аясында 54 млрд. 400 млн. теңгеге 10 мектептің құрылысы жүргізіліп, пайдалануға берілуде», – деді облыс әкімі.Айта кетейік, 2023 жылдан бері облыстық бюджет есебінен 5 млрд. 700 млн. теңгеге 2 900 орындық қосымша ғимараттар салынды. Осылайша үш ауысымдық мектептер мәселесі түбегейлі шешімін тапты.«Білімді қолдау қоры» арқылы 8 млрд. 400 млн. теңгеге физика-математика бағытындағы «Білім-инновация» лицей-интернаты бой көтеріп, ел игілігіне табысталды. Аталған қор есебінен 2 млрд. 333 млн. теңгеге Арал ауданы Мергенсай елді мекенінен 150 орындық заманауи мектептің құрылысы жүруде. Алдағы қараша айында пайдалануға беріледі.Демеушілер есебінен Арал ауданы Тоқабай ауылындағы апатты мектептің орнына 500 млн. теңгеге жаңадан білім ордасы салынып, салтанатты түрде ашылды.Президент тапсырмасына сәйкес алдағы үш жылда өңірдегі 51 мектеп күрделі жөндеуден өтеді. Биыл бұл мақсатқа облыстық бюджеттен 2 млрд. 400 млн. теңге бөлініп, 9 мектеп қайта жаңғыртылды.Соңғы үш жылда 5 млрд. 300 млн. теңгеге 15 мектептің ғимараты күрделі жөнделді. Ағымдағы жөндеу жұмыстарына 2022 жылдан бері 2 млрд. 600 млн. теңге бөлінді. Атқарылған жұмыстардың нәтижесінде апатты жағдайдағы 7 мектептің мәселесі толық шешімін тапты.Ақпарат көзі : https://www.gov.kz/memleket/entities/kyzylorda/press/news/details/1081031?lang=kk

«Қайта жаңғыртудан өтіп жатқан Президент саябағында 10 млрд. теңгеге жылдың төрт мезгілінде үздіксіз жұмыс жасайтын 300 орындық заманауи балалар тынығу лагері бой көтеруде. Бұл жерде балаларымыз дария жағалауында серуендеп, таза ауамен тыныстап демалады. Бойына күш-қуат жинап, көңіл сергітіп, білімін шыңдайтын ерекше орын болмақ». Бұл туралы Мұғалімдер күніне арналған салтанатты шарада облыс әкімі Нұрлыбек Нәлібаев атап өтті.«Президент саябағында 5 млрд. теңгеге Ботаникалық білім беру орталығының (қысқы бақ) ғимараты салынуда. Ғимараттың ауданы 3 420 шаршы метр, онда жас жеткіншектердің ой-өрісін кеңейтуге, өсімдіктердің экожүйедегі маңызын түсіндіруге мүмкіндік жасалады. Жасыл екпелерді өсірудің ерекшеліктерін тәжірибе түрінде үйретіп, табиғатты аялауға баулиды», – деді аймақ басшысы.Еске салайық, жас ұрпаққа қосымша білім беру жүйесін дамыту мақсатында 11 млрд. теңгеге балалар мен жасөспірімдерге арналған «Сыр жұлдыздары» академиясы, 3 млрд. теңгеден астам қаржыға Жаңақорған, Жалағаш, Шиелі аудандарында Оқушылар үйі мен Өнер мектептері салынып, зияткер жас ұрпақты қалыптастыруға қызмет етуде.Өткен жылы «ҚазМұнайГаз» Ұлттық компаниясының демеушілігімен Қызылорда қаласында 2 млрд. 500 млн теңгеге заманауи үлгідегі 350 орындық Оқушылар сарайы ашылды.Ақпарат көзі : https://www.gov.kz/memleket/entities/kyzylorda/press/news/details/1081145?lang=kk

Рияд, 2025 жылғы 2-4 қазан – Сауд Арабиясы Корольдігінің астанасында алғаш рет функционалдық көпсайыстан Азия чемпионаты өтті. Оған Қазақстан, Сауд Арабиясы, Пәкістан, Иран, Иордания, Өзбекстан, Моңғолия, Оңтүстік Корея, Аустралия және Үндістанды қоса алғанда, 10 елден 90-нан астам спортшы қатысты.Қазақстан атынан жарысқа 11 спортшы қатысып, жоғары деңгейдегі дене дайындығын, күш пен төзімділікті көрсетті.Чемпионат Сауд Арабиясы Спорт министрлігі мен Спорт федерациясының, сондай-ақ Халықаралық функционалды фитнес федерациясының қолдауымен ұйымдастырылды.Үш күн бойы қатысушылар күш, төзімділік, ептілік, үйлестіру, тепе-теңдік және психологиялық тұрақтылықты сынайтын қарқынды жаттығулар сериясында өз шеберліктерін көрсетті.Қазақстандық спортшылардың жетістіктері:1-ші орын – Камила Такеева2-ші орын – Виктор Ильченко және Валентин Жуков2-ші орын – Асылбек Жалеев және Дина Қасымова3-ші орын – Артём Мацак4-ші орын – Валентин Лукановский және Ксения Жалеева7-ші орын – Амир Гайсин10-шы орын – Нүркен Бахтияров және Баян КинашевФункционалдық көпсайыс – күшті, төзімділікті, жылдамдықты, ептілікті, үйлестіру мен икемділікті дамытуға бағытталған жаттығулар кешенін қамтитын заманауи спорт түрі. Ол ауыр атлетика, гимнастика және кардио жаттығуларының элементтерін біріктіреді, бірақ нақты спорттық құрылымымен, төрешілік стандарттарымен және халықаралық ережелерімен ерекшеленеді.Ақпарат көзі : https://www.gov.kz/memleket/entities/mfa-riyadh/press/news/details/1080828?lang=kk

Жамбыл ауданында қазақтың ұлы композиторы, күйші, дирижер Нұрғиса Тілендиевтің туғанына 100 жыл толуына арналған салтанатты шара өтті. Мерейтой ел руханияты мен өнерін ұлықтаған үлкен мереке болды.Мерекелік іс-шара Жамбыл Жабаев ескерткішіне гүл қоюдан басталып, қонақтар ақынның кесенесіне зиярат етті. Одан кейін Нұрғиса Тілендиевтің мәңгілік мекеніне барып, тағзым жасалды. Айта кетейік, композитордың аманаты бойынша ол Жамбыл Жабаевтың жанына жерленген.Жамбыл Жабаевтың әдеби-мемориалдық музейінде директор Салтанат Тезекбаева қонақтарға экскурсия өткізіп, ұлы жыраудың өмірі мен шығармашылығы туралы баяндады.Негізгі мерекелік жиын «Көкбастау» ипподромында ұйымдастырылды. Мұнда бес мыңнан астам адам жиналды. Алматы облысының әкімі Марат Сұлтанғазиев атап өткендей, ЮНЕСКО Нұрғиса Тілендиевтің 100 жылдығын 2025 жылғы маңызды мерейтойлар тізіміне енгізді.– Нұрғиса Тілендиевтің шығармашылығы қазақ руханиятының алтын қазығына айналды. Оның күйлері мен әндері — халықтың жаны мен тарихының үні, – деді аймақ басшысы. – Кеше ғана Іле ауданында оның аты берілген мәдениет үйі ашылып, ескерткіш орнатылды. Ұлы тұлғаның есімі еліміздің барлық өңірлерінде ұлықталуы тиіс.Шарада қоғам және мәдениет қайраткерлері Нұрлан Оразалин мен Серік Үмбетов те сөз сөйлеп, композитордың адамдық болмысы мен өнердегі орнын ерекше атап өтті. Серік Үмбетов Нұрғиса ағаның соңғы аманатын орындап, оны Жамбылдың қасына жерлеу тарихын еске алды.Мерейтой аясында өткен концертте қазақ фольклоры мен эстрадасының танымал әртістері өнер көрсетті. Орталық сахнада «Отырар сазы» оркестрі орындаған күйлер көрермендерді даланың әуезді үніне бөледі.Кеш соңында қонақтар дәстүрлі тағамдар ұсынылған киіз үйлерге шақырылды. Ал мерекенің спорттық бөлігі бәйгемен жалғасты. «Көкбастау» ипподромында өткен аламан жарыста түрлі өңірлерден келген шабандоздар бақ сынады. Нәтижесінде «Аламан бәйге» бойынша Жетісу облысынан келген Марат Ақперлиновтың «Жұмыртұяқ» атты тұлпары бірінші келді.Нұрғиса Тілендиевтің 100 жылдығына арналған мерейтой — ел мәдениетіне, рухани сабақтастыққа деген құрмет пен мақтаныштың айғағы. Бұл күн қазақ музыкасының мәңгі жасайтынын тағы бір мәрте дәлелдеді.Ақпарат көзі : https://www.gov.kz/memleket/entities/almobl/press/news/details/1080838?lang=kk

«Туған жер – алтын бесігім» жобасы аясында Самар ауданының ұйымдастыруымен өткен бұл тартымды жарысқа Шығыс Қазақстанның әр түкпірінен сегіз команда қатысты. Спортшылар ойынның шеберлігін, мінездің беріктігін және шынайы спорттық жігерін әдемі көрсетті.Қиын әрі қызықты бәсекенің қорытындысы бойынша І орынды Өскемен командасы иеленсе, ІІ орынды Глубокое ауданының командасы, ал ІІІ орынды Самар ауданының командасы алды. Жеңімпаздар ақшалай сертификаттармен марапатталды.Ақпарат көзі : https://www.gov.kz/memleket/entities/vko-samar/press/news/details/1080859?lang=kk

2025 жылғы күзгі шақыру науқаны аясында Астана қаласының жиын пунктінен 40 жас сарбаздан құралған команда Алматы қаласында орналасқан десантшылар бөліміне мерзімді әскери қызмет атқаруға жөнелтілді.Жастарды салтанатты түрде шығарып салуға қала әкімдігінің өкілдері, Қарулы күштердің ардагерлері, әскери қызметшілер, сондай-ақ шақырылушылардың туған-туыстары мен жақындары қатысты.Болашақ десантшыларды құттықтаған Астана қаласының қорғаныс істері жөніндегі департаментінің өкілі запастағы полковник Ғани Артықов жастарға ақ жол тіледі.– Десанттық-шабуылдау әскерлері қатарында қызмет ету – әскери борышты өтеу ғана емес, бұл – үлкен жауапкершілік пен айрықша мәртебе. Мұндай элиталық бөлімшелерге тек дене даярлығы мықты, тәртіпті және ынталы жастар ғана іріктеледі. Көптеген жастар үшін бұл – ерлік мектебі, шынығу мен нағыз отаншылдықты бойға сіңіретін өмірлік сабақ, – деп атап өтті ол.Әскер қатарында жас сарбаздар сұранысқа ие әскери-есептік мамандықтарды меңгеріп, армияда да, азаматтық өмірде де қажет болатын білім мен дағдыларды игереді.Шақырылушыларды шығарып салушылардың арасында Алтай Айбаровты қолдау үшін отбасымен бірге келген Лола Айтмағамбетова да бар.– Екі ұлым да Десанттық-шабуылдау әскерлері қатарында қызмет етті. Олар бұл өмір кезеңін әлі күнге дейін мақтанышпен еске алады. Айбар да өзін лайықты көрсетіп, борышын адал атқарып, ер жетіп оралады деп сенемін, – деді ол.2025 жылғы күзгі шақыру науқанының жоспарына сәйкес, Қазақстан Республикасының Қарулы күштеріне, басқа да әскерлер мен әскери құралымдарға 22 мыңнан астам жас азамат шақырылады. Олардың қатарында 1 200-ден астам елордалық жас бар.Ақпарат көзі : https://www.gov.kz/memleket/entities/mod/press/news/details/1080866?lang=kk

Аудан әкімі аппаратының басшысы Нұржан Ешниязовтың төрағалығымен жергілікті атқарушы органдарға қарасты квазимемлекеттік сектор субъектілерінде бекітілген комплаенс офицерлерімен сыбайлас жемқорлыққа қарсы іс-қимыл мәселелері жөніндегі жиын өтті. Жиынға аудан әкімі аппаратының мемлекеттік-құқықтық жұмыстар бөлімінің басшысы Е. Зұлқарнаев, персоналды басқару қызметі бөлімінің басшысы С. Қожахметов және мәдениет, клуб үйлерінің комплаенс офицерлері қатысты. Жиынның күн тәртібінде «Өңірдегі квазимемлекеттік сектор субъектілеріндегі комплаенс қызметтерінің жұмыс сапасы туралы», «Сырдария аудандық мәдениет үйі» мемлекеттік коммуналдық қазыналық кәсіпорны комплаенс офицерінің 9 айында атқарылған жұмыстары қаралды.– Қазіргі таңда елімізде сыбайлас жемқорлықтың алдын алу және мемлекеттік басқару жүйесінде ашықтықты қамтамасыз ету – басты басымдықтардың бірі болып табылады. Осы орайда, квазимемлекеттік сектор субъектілерінде комплаенс қызметтерін құру және дамыту өзекті мәселеге айналып отыр. Жиынның басты мақсаты – мәдениет ұйымдарындағы комплаенс жүйесінің тиімділігін арттыру, сыбайлас жемқорлықты алдын алу, ағымдағы жылғы 9 айында атқарылған жұмыспен танысу және құқықтық баға беру. Біз қоғам болып сыбайлас жемқорлықпен күресуіміз керек, – деді Нұржан Ерділдаұлы.Жиын қорытындысында аппарат басшысы комплаенс офицерлеріне кәсіпорында сыбайлас жемқорлықпен күрес бағытының жұмыстарына жауапкершілікпен қарап, берілген тапсырмаларды мерзімінде және сапалы орындалуын қамтамасыз ету жөнінде нақты тапсырмалар берді.Ақпарат көзі : https://www.gov.kz/memleket/entities/kyzylorda-syrdarya/press/news/details/1080910?lang=kk

Өнер орталығында Мұғалімдер күніне арналған «Ұстаз – ұлттың шамшырағы» атты салтанатты шара өтті. Оған құқық қорғау органдарының бірінші басшылары, зиялы қауым өкілдері, сала ардагерлері, жоғарғы оқу орындары мен мекеме басшылары қатысты.Облыс әкімі Нұрлыбек Нәлібаев аймақтың білім саласында атқарылған жұмыстарды атап өтіп, ұстаздарды төл мерекесімен құттықтады.«Мемлекет басшымыз Қасым-Жомарт Кемелұлы «Қазір – білім мен ғылымның заманы. Жаһандану дәуірінде озық білімді игерген, жаңа технологияны меңгерген елдің ұпайы түгел болады. Бүгін саналы ұрпақ тәрбиелей алсақ, ертең заман көшінің басында жүреміз. Сондықтан осы саланы қолдау мемлекеттік саясаттың негізгі басымдығы болып қала береді», – деген болатын.«Алаштың анасы» атанған қасиетті Сыр өңірінде Президентіміздің,Үкіметтің ерекше қолдауымен білім саласында ауқымды жобалар мен тың бастамалар жүзеге асуда. Биыл облысымыздың бюджеті 850 млрд. теңгеден асты, 2022 жылдан бері 233 пайызға өсті. Оның 346 млрд. 800 млн. теңгесі білім саласына бағытталды. Бұл облыс бюджетінің 40 пайызын құрайды. 2022-2024 жылдары өңірімізде сапалы білім беруді қамтамасыз ету мақсатында бюджеттен 812 млрд. 245 млн. теңге бөлінді.Ұлттық тәрбие мен заманауи білімді бір-бірімен ұштастырып, білімді ұрпақ тәрбиелеу – Сіздерге жүктелген абыройлы міндет! Ардақты ұстаздар, ел мұраты мен ұрпақ тәрбиесіне адал болайық. Өз уақытын аямаған, өзгенің бақытын аялаған ұстаздарға қандай мақтау, мадақ айтсақ та жарасады. Сіздерді төл мерекелеріңізбен құттықтай отырып, Өздеріңізге мықты денсаулық, қажымас қайрат, отбасыларыңызға бақ-береке тілеймін», – деді Нұрлыбек Машбекұлы.Салтанатты шарада ұстаздарға «Ерен еңбегі үшін», «Шапағат», «Еңбек ардагері» медальдары, «Ыбырай Алтынсарин», «Білім беру ісінің құрметті қызметкері» төсбелгілері, Оқу-ағарту министрлігінің құрмет дипломы, Құрмет грамотасы, Алғыс хаты, Қызылорда облысының Құрмет грамотасы облыс әкімінің Алғыс хаты, облыстық білім басқармасының құрмет грамотасы мен шипажайға жолдама табысталды.Еске салайық, кейінгі жылдары білім беру ұйымдарының материалдық-техникалық базасы, 317 пәндік кабинет жаңартылып, білім сапасын көтеруге мүмкіндік туындады.«Қазақстан халқына» қоғамдық қоры өңірдің білім беру саласына 2 млрд. 600 млн. теңге бөлді. «Ауылдық аймақтардағы тірек мектептердің әлеуетін дамыту» жобасымен 2 млрд. теңгеге 8 мектептің пәндік кабинеттері қайта жабдықталды.Екі жарым мыңнан астам ауыл балалары жазғы лагерьлерде демалды.Ерекше білім беруді қажет ететін балаларға арналған арнайы интернаттардың материалдық-техникалық базасы жаңғыртылды. Аймақтағы 50 ауыл мектебіне «Білім-Инновация» лицейлерінің тәжірибесі енгізіліп, физика, химия, биология кабинеттері жабдықталады. Сонымен қатар, 8 шағын жинақты мектептің материалдық базасы нығайтылады. Жаңадан жабдықталатын мектептердегі 1745 педагог облыстық бюджет есебінен арнайы оқытудан өтеді.Ақпарат көзі : https://www.gov.kz/memleket/entities/kyzylorda/press/news/details/1080923?lang=kk

Мереке қарсаңында Шығыс Қазақстан облысы білім басқармасының басшысы Өскемен қаласының білім бөліміндегі «Шоқан Уәлиханов атындағы №3 мектеп-лицейі» КММ-нің қазақ тілі мен әдебиеті пәні мұғалімі Ибатаева Индира Айтахметовнаға «Ыбырай Алтынсарин» төсбелгісін табыстады.Индира Айтахметовна – педагог-зерттеуші, педагогика ғылымдарының магистрі. Ол облыстық «Үздік педагог – 2025» байқауында жеңімпаз атанып, енді өңіріміздің намысын республикалық деңгейде қорғайтын болады.Облыстық білім басқармасының басшысы құттықтау сөзінде:«Ұстаз еңбегінің бағалануы – ұрпақтың болашағына қосылған үлестің мойындалуы. Индира Айтахметовнаның жетістігі – барша ұстаздарға үлгі. Алдағы республикалық додада табыс тілейміз», – деп атап өтті.Шығыс Қазақстан облысының білім саласы атынан үздік ұстазымызға зор шығармашылық табыс, жаңа белестер мен биік жетістіктер тілейміз!Ақпарат көзі : https://www.gov.kz/memleket/entities/vko-bilim/press/news/details/1080949?lang=kk

Бүгін, 6 қазан, Қазақстан Республикасы мен Грекия Республикасының арасында дипломатиялық қатынастар орнағанына 33 жыл толып отыр. Өткен онжылдықтарда Қазақстан мен Грекия достық, теңдік және өзара құрмет қағидаттарына негізделген берік әрі өзара тиімді қатынастар орнатты.Тараптар сауда-экономикалық байланыстарды дамытуға ерекше мән береді. Экономикалық және технологиялық ынтымақтастық жөніндегі Үкіметаралық комиссия, сондай-ақ Қазақстан-грек іскерлік кеңесі нәтижелі жұмыс істеуде. 2024 жылы Қазақстан мен Грекия арасындағы тауар айналымы екіжақты қатынастар тарихындағы ең жоғары көрсеткішке жетіп, 2,8 млрд АҚШ долларын құрады.Көлік-логистика, энергетика, аграрлық және туризм салаларында ынтымақтастықтың болашағы айқындалуда.Грекиямен өңіраралық ынтымақтастық қарқынды дамып келеді. Тараз – Ежелгі Олимпия, Шымкент – Ахарнон, Ақтау – Пирей, Астана – Эллинико-Аргируполи арасындағы тұрақты сапарлар мен ынтымақтастық туралы келісімдер қалалар мен өңірлер деңгейінде өзара әрекеттестіктің тұрақты дамуын көрсетеді.Мәдени-гуманитарлық байланыстар екі ел арасындағы қарым-қатынастарда маңызды рөл атқаруды жалғастыруда. Қазақстаннан тарихи отанына оралған этникалық гректер мен елімізде тұратын грек диаспорасы – достық пен өзара түсіністіктің маңызды тірі көпірі болып табылады.33 жылдық ынтымақтастық барысында қол жеткізілген нәтижелер Қазақстан мен Грекияның әріптестікті одан әрі тереңдетуге, өзара іс-қимылдың жаңа перспективаларын ашуға және халықтар арасындағы достықты нығайтуға бағытталған берік ұстанымын айқындайды.Ақпарат көзі : https://www.gov.kz/memleket/entities/mfa-athens/press/news/details/1080557?lang=kk

2025 жылдың 2 қазанында Улан ауданы, Қасым Қайсенов кентіндегі «Дарын» мәдениет үйінің алаңында 2026 жылдың 1 қаңтарынан бастап күшіне енетін жаңа Салық кодексінің нормаларын түсіндіру бойынша семинар өткізілді.Іс-шараға Шығыс Қазақстан облысы бойынша Мемлекеттік кірістер департаментінің өкілдері қатысып, негізгі өзгерістерді, соның ішінде:* жаңа Салық кодексінің жалпы ережелерін;* жеке табыс салығы: мөлшерлемелері мен шегерімдерін;* әлеуметтік салықты;* корпоративтік табыс салығын және аванстық төлемдерді төлеу тәртібін;* жер қойнауын пайдалануға салық салуды;* ҚҚС бойынша өзгерістерді: мөлшерлемелерді, есепке қоюды, артық соманы қайтару тәртібін;* арнаулы салық режимдері, камералдық бақылау бойынша өзгерістерді;* борышты мәжбүрлеп өндіріп алу шараларын, сондай-ақ салық төлеу бойынша кейінге қалдыру және бөліп төлеу мүмкіндіктерін егжей-тегжейлі түсіндірді.Қатысушылар жаңа Салық кодексінің салық жүйесінің ашықтығы мен әділдігін арттыруға, сондай-ақ адал бизнес жүргізу үшін қолайлы жағдайлар жасауға бағытталғанын атап өтті.Ақпарат көзі : https://www.gov.kz/memleket/entities/kgd-vko/press/news/details/1080576?lang=kk

1 қазан – Халықаралық қарттар күніне орай бүгін аудан әкімі Жандос Еркінбек аудан әкімдігінің ардагер қызметкерлерін арнайы қабылдап, мерекелік ілтипат көрсетті.-Қазақ халқында «Қарты бар ел қазыналы ел» деген нақыл сөз бар. Үлкенді сыйлау, оларға құрмет көрсету – ата-бабадан келе жатқан салтымыз. Өздеріңіздің өмірлік тәжірибелеріңіз бен ақыл-кеңестеріңіздің біз үшін орны бөлек. Себебі, әрқайсыларыңыздың ауданымыздың өсіп-өркендеуіне қосқан үлестеріңіз бен еңбектеріңіз ерен. Бүгінгі мерейлі мерекеде баршаңызға зор денсаулық, ұзақ өмір, отбасыларыңызға амандық, ұрпақтарыңызға бақ-береке тілеймін,- деді аудан басшысы.Іс-шарада ардагерлерге ауданның әлеуметтік-экономикалық дамуына өлшеусіз үлес қосқан ерен еңбектері үшін мерекелік сый-сияпаттар табысталды. Сондай-ақ, шара барысында қоғамдық кеңес төрағасы Әбдірахман Құлдүйсенов сөз алып, ардагерлерге деген құрметтің маңызын атап өтті. Мереке иелері де жылы лебіздерін білдіріп, аудан басшылығы мен ұжымға шынайы алғыстарын жеткізді.Айта кетейік, Қармақшы ауданында жыл сайын Қарттар күніне орай түрлі игі шаралар ұйымдастырылып келеді. Бұл – ел дамуына еңбек сіңірген аға буын өкілдеріне көрсетілген құрметтің бір көрінісі.Ақпарат көзі : https://www.gov.kz/memleket/entities/kyzylorda-karmakshy/press/news/details/1080596?lang=kk

Ларисса, 2025 жылғы 2 қазан – Қазақстанның Грекиядағы Елшісі Тимур Сұлтанғожин 300 астам бизнес-қауымдастықтар, мемлекеттік органдар, кәсіпкерлер, сондай-ақ ауыл шаруашылығы өндірушілері мен кооперативтердің өкілдерін жинақтаған «Thessaly AgriBusiness Forum-2025» халықаралық форумына қатысты.Өз сөзінде Елші Сұлтанғожин ауыл шаруашылығы Қазақстан экономикасының стратегиялық маңызды саласы екенін атап өтті. Ол Мемлекет басшысының тапсырмасына сәйкес агросекторды технологиялық, ғылыми және инновациялық шешімдерді енгізу, процестерді автоматтандыру және жасанды интеллектті қолдану арқылы экономикалық өсудің негізгі драйверіне айналдыру міндеті тұрғанын жеткізді.Қазақстанның әлемдегі ең ірі егістік алқаптары мен жайылымдары бар ел ретінде тек шикізат өндіруде ғана емес, сонымен қатар ЕАЭО және көрші мемлекеттердің нарығына шығумен бірге ел аумағында қайта өңдеу өнеркәсібін дамытуда зор әлеуетке ие екені айтылды.Елші грек компанияларын бірлескен кәсіпорындар құруға және грек технологиялары мен тәжірибесін пайдалана отырып, Қазақстанда өндірістерді жергілікті деңгейде орналастыру мүмкіндіктерін қарастыруға шақырды.Сонымен қатар, Қазақстаннан дәнді дақылдар мен бидайды, сондай-ақ экологиялық таза өнімдерді экспорттауды ұлғайту перспективаларына ерекше назар аударылды. Сауда байланыстарын дамыту үшін логистикалық бағыттар мен инфрақұрылымды, соның ішінде Орта дәлізді жетілдірудің маңызы атап өтілді.Фессалия өңірінің губернаторы Димитриос Куретас өз сөзінде Фессалияны Грекияның «азық-түлік қоржыны» ретінде сипаттап, оның бай аграрлық мұрасы мен Қазақстанмен ынтымақтастықтағы зор мүмкіндіктерін, әсіресе тұрақты даму мен агроөнеркәсіптік кешенді жаңғырту бағыттарында ерекше атап өтті.Форум аясында Қазақстанның халықаралық имидждік «Born Bold» кампаниясы таныстырылып, елдің серіктестікке ашықтығы мен шетелдік инвесторларға жаңа мүмкіндіктер ұсынуға дайын екені көрсетілді.Ақпарат көзі : https://www.gov.kz/memleket/entities/mfa-athens/press/news/details/1080614?lang=kk

Бүгін Қазақстан Қарулы күштерінің зымыран әскерлері мен артиллерия мамандары кәсіби мерекесін атап өтуде.Бұл күн кездейсоқ таңдалған жоқ. 2000 жылғы 4 қазанда Қорғаныс министрінің бұйрығымен Зымыран әскерлері және артиллерия қолбасшысының басқармасы құрылған болатын.Зымыран әскерлері және артиллерия – Құрлық әскерлерінің негізгі құрамдас бөлігі. Әскери бөлімдер мен құрамалардың соғыс қуатын зымыран кешендері, реактивті дүркіндетіп оқ ату жүйелері, гаубицалық, зеңбіректік және минометтік артиллерия құрайды. Бөлімдердің басты міндеті – қарсыластың оқ ату құралдарын жою, бекіністерін бұзу, тірі күшін талқандау және ұрыс алаңында әскерге оқпен қолдау көрсету.Бұл әскерлер жоғары дәлдіктегі кешендермен, заманауи артиллериялық барлау құралдарымен және оқ атуға арналған автоматтандырылған басқару жүйелерімен жабдықталған. Қарулануында минометтер, өздігінен жүретін артиллериялық қондырғылар, сүйретпелі зеңбіректер, гаубицалар, реактивті дүркіндетіп оқ ату жүйелері, тактикалық және танкіге қарсы зымыран кешендері бар.Офицерлер мен мамандардың жоғары біліктілігі – әскердің жауынгерлік қабілеттілігінің негізі. Артиллеристерді даярлау Құрлық әскерлерінің әскери институты, Ұлттық қорғаныс университеті және Ш. Уәлиханов атындағы әскери колледж секілді жетекші оқу орындарында жүргізіледі. Сонымен қатар Қарағанды техникалық университеті мен Satbayev University әскери кафедраларының түлектері жыл сайын әскери дайындықтан өткен резервті толықтырып отырады.Мамандар өздерінің кәсіби шеберлігін «Айбалта-2025» жедел-стратегиялық оқу-жаттығуы барысында көрсетті. Артиллериялық бөлімшелер атыс тапсырмаларын сәтті орындап, біріккен әскерлердің іс-қимылын қамтамасыз етіп, тиімді қолдау көрсетті.Зымыран әскерлері мен артиллерия барлау, навигация және оқ атуды басқарудың заманауи құралдарымен жоспарлы түрде қайта жарақтандырылып, Қазақстан армиясының соққы қуатын нығайтуда.Ақпарат көзі : https://www.gov.kz/memleket/entities/mod/press/news/details/1080659?lang=kk

Маңғыстау облысында өткен жалпыәскери даярлықтың соңғы кезеңі жауынгерлік атысты қамтыған тактикалық маневрлер болды. Әскери қызметшілер роталық тактикалық оқу-жаттығуы кезінде ұрысқа барынша жақын жағдайлардағы тапсырмалар кешенін пысықтады.Әскери бөлімшелер шартты қарсыластың жаппай шабуылын тойтарып, қорғаныста ұтымды әрекет етумен қатар, қарсы шабуылға шығып, шабуылдың нәтижесін одан әрі дамытты. Маневр жасау қабілеті, инженерлік бөгеттерді қолдану, алғы шепке дәл оқ ату және артиллериялық қолдауды тиімді ұйымдастыруға айрықша мән берілді.Оқу-жаттығуға қатысушылар өздерінің дайындық деңгейін, қару-жарақ пен техниканы шебер пайдалануын, сондай-ақ ұрыстағы үйлесімді іс-қимылдарын жоғары дәрежеде көрсете білді. Командалық құрам әскери қызметшілердің іс-қимылына оң баға берді.«Айбалта-2025» оқу-жаттығуы – Қазақстан Қарулы күштерінің жауынгерлік дайындығын жетілдіру мен елдің қорғаныс қабілетін арттырудағы маңызды қадамдардың бірі болды.Ақпарат көзі : https://www.gov.kz/memleket/entities/mod/press/news/details/1080664?lang=kk

Республикалық маңызы бар қаланың жинақтау пунктінде 35 бозбаланы әскери борышын өтеуге салтанатты жағдайда шығарып салды. Олар жас жауынгер курсынан өткен соң Қонаев гарнизонындағы Десанттық-шабуылдау әскерлерінің әскери бөлімінде қызмет ететін болады.Іс-шараға қалалық қорғаныс істері жөніндегі департамент бастығы полковник Әбдіғабит Шегебаев, құрметті қонақтар, ардагерлер ұйымдарының төрағалары, сондай-ақ сарбаздардың ата-аналары мен туған-туыстары қатысты.– Бабаларымыз ұлан-ғайыр қазақ даласын қасық қаны қалғанша қорғап, бізге аманат етті. Қару асынып, сапқа тұрып, әскери борышын өтеу – әрбір ер азамат үшін үлкен абырой. Біз сіздердің осы құрметті міндетті лайықты орындайтындарыңызға сенеміз. Қызметін үздік атқарған сарбаздар әскерден кейін тегін жоғары білім алуға немесе әскери қызметті жалғастыруға мүмкіндік алады, – деді полковник Ә. Шегебаев.Ал Десанттық-шабуылдау әскерлері әскери бөлімі командирінің тәрбие және идеологиялық жұмыстар жөніндегі орынбасары капитан Мадияр Райымбердиевтің айтуынша, сарбаздар әскери қызмет барысында бронды транспортер көздеушісі, оқшашаршы, граната атқыш, атқыш, мерген сынды әскери-есептік мамандықтарды меңгереді.– Жауынгерлік дайындық бағдарламасына сәйкес, әр сарбаз бір жылдың ішінде екі рет парашютпен секіреді, – деді ол.Болашақ десантшыларды гарнизонның әскери оркестрі шығарып салды. Отан қорғаушыларды қолдауға «Жас сарбаз» жасөспірімдер қозғалысының тәрбиеленушілері, әскери-патриоттық клубтардың мүшелері мен ҚР Қорғаныс министрлігіне қарасты Сабыр Рақымов атындағы әскери колледждің курсанттары да келді. Олар Оқушылар сарайының шығармашылық ұжымдарымен бірге концерттік бағдарлама дайындап әкеліпті.Күзгі шақырылым науқаны аясында алдымен ҰҚК Шекара қызметінің, Мемлекеттік күзет қызметінің бөлімшелері, содан кейін Қарулы күштердің, Төтенше жағдайлар министрлігі мен Ұлттық ұланның әскери бөлімдері жасақталатынын айта кету керек.Күзгі шақырылым бойынша қазіргі таңда Шымкент қаласынан ҰҚК Шекара қызметіне 170 сарбаз жөнелтілді. 1 желтоқсанға дейін Қарулы күштер қатарына тағы 850 жасты шақыру жоспарланып отыр.Ақпарат көзі : https://www.gov.kz/memleket/entities/mod/press/news/details/1080668?lang=kk

Білім беру саласын жетілдіру, оқушылардың қабілеттерін ашуға толыққанды жағдай жасау, ғылымға, соның ішінде жасанды интеллектке деген қызығушылықты арттыру – Қостанай облысы саясатының басты басымдықтарының бірі.Соңғы үш жылда өңірде 23 білім нысаны бой көтеріп, материалдық-техникалық базаны нығайтуға 5,5 млрд теңге бөлінді.Ерекше назар, ең алдымен, тұлғаның болашақ дамуын айқындайтын негіз – мектепке дейінгі білім беру сапасына аударылып отыр.Қазіргі таңда облыста 486 мектепке дейінгі ұйым жұмыс істейді. Оның ішінде 174 балабақша бар, оларда 23 мыңнан астам бала тәрбиеленуде, соның 61-і – жекеменшік. Сонымен қатар 312 шағын орталықта 5 мыңға жуық бүлдіршін білім алуда. 2–6 жас аралығындағы балаларды мектепке дейінгі тәрбиемен қамту деңгейі – 92,4%.Соңғы екі жылда жаңа балабақшалар мен қосымша топтардың ашылуы нәтижесінде 1717 орын пайда болды. Бұл бағыттағы жұмыс жалғасып келеді.Мектептердегі білім сапасы мен қолайлы, қауіпсіз орта құру – басты назарда.Қостанай облысында 4860 орынға арналған 7 жаңа мектеп салынды. Олардың бесеуі «Келешек мектептері» Ұлттық жобасы аясында ашылды. Заманауи жабдықтармен қамтылған бұл мектептер әлемдік үрдістерге сай ойластырылған дизайнға ие. Әрқайсысында пәндік кабинеттер мен зертханалар бар, оқушылардың талантын шыңдауға, ғылыми ізденіске мол мүмкіндік жасалған. Жыл соңына дейін тағы 4 мектеп пайдалануға берілмек.Ауылдағы білім сапасын көтеру үшін «Ауыл мектебі – сапа алаңы» республикалық жобасы іске асырылуда. Бұл бастама аясында 21 тірек және 63 шағын мектеп қамтылған. 2022–2024 жылдары «Қазақстан халқына» қорының қолдауымен 12 мектепке 3 млрд теңгенің заманауи жабдығы жеткізілді. Әр мектепте 25 мамандандырылған кабинет ашылды: STEM-зертханалар, робототехника және жаратылыстану пәндері кабинеттері, жаңа кітапханалар, арт-студиялар мен телестудиялар. Биыл тағы 7 мектеп жаңғыртудан өтеді.Сонымен қатар шағын мектептердің материалдық-техникалық базасы нығайтылды: 1,3 млрд теңгеге 106 кабинет жөнделді. Бұл қала мен ауыл арасындағы алшақтықты қысқарту жөніндегі Мемлекет басшысы қойған міндеттің орындалуына жол ашып отыр.Мұндай инвестициялар алғашқы жемісін беруде.2024–2025 оқу жылында облыс оқушылары халықаралық олимпиадаларда 9 жүлде, ауыл мектептеріне арналған республикалық олимпиадада 26 орын (оның ішінде 3-орындық командалық жүлде), пәндік республикалық олимпиадада 23 медаль иеленді.Облыстың 5 мектебі Қазақстанның ТОП-100 үздік білім ұйымдары қатарына кірді: «Білім-Инновация» лицейі, Қостанай қаласындағы №2 мектеп-лицей, Рудный қаласындағы №10 мектеп-гимназия, Ы.Алтынсарин атындағы мамандандырылған мектеп-гимназия-интернат және «Озат» ақпараттық технологиялар лицейі.Ғылыми жобалар конкурстарында – 16 жүлде, халықаралық ғылыми сайыстарда – 4 медаль алынды.Оқушылардың жетістіктері – тек сапалы білімнің емес, жүйелі тәрбиелік жұмыстың да нәтижесі.Жаңа оқу жылынан бастап «Адал азамат» бағдарламасы негізінде тәрбие жұмысы жүргізіледі. «Мектеп–отбасы–қоғам» үштігін қалыптастыруда ата-аналармен байланыс маңызды рөл атқарады. Осы мақсатта 399 Педагогикалық қолдау орталығы жұмыс істеп тұр.Білім беру саласында отбасыларды қолдау шаралары да жүзеге асуда.Маңызды міндеттердің бірі – балаларды сапалы ыстық тамақпен қамтамасыз ету. Президент Қасым-Жомарт Тоқаевтың тапсырмасына сәйкес, бастауыш сыныптың барлық оқушылары, яғни 45 019 бала, тегін тамақпен қамтылған. Бұған қоса, «Всеобуч» қоры есебінен 5–11 сыныптағы 7 222 оқушыға ыстық тамақ беріледі. Бұл мақсатқа облыстық бюджеттен 5,2 млрд теңге бөлінді.Тегін әрі жеңілдетілген тамақтануды ұйымдастырудың айқындылығын қамтамасыз ету үшін 123 мектепте «Әлеуметтік әмиян» жүйесі енгізілді, ал оқушы саны 700-ден аспайтын 305 мектепте «Бизнес әмиян» сервисі қолданылады.Жаңа оқу жылында жалпы білім беретін мектептерде 3,5 мыңнан астам оқушы инклюзия қолдауымен қамтылмақ. Инклюзияны қолдау кабинеттерінің саны артып келеді: қазіргі таңда 41 кабинет жұмыс істейді. Жаңа оқу жылы қарсаңында Рудный қаласындағы №1 мектеп пен №2 балабақшада жаңа кабинеттер ашылды. Алдағы уақытта Сарыкөл, Меңдіқара, Наурызым аудандарында осындай кабинеттер іске қосылып, балалар өз өңірлерінде сапалы түзету көмегін ала алады.«Еңбек адамын» дәріптеу идеологиясын енгізуде техникалық және кәсіптік білімнің маңызы зор. Бүгінде облыстағы 33 колледжде 21 694 студент оқиды, олардың 87%-ы мемлекеттік тапсырыс бойынша. Индустриалды кластерді дамыту аясында жаңа мамандықтар ашылуда: соңғы жылдары 21 жаңа мамандық енгізілді, тағы 14-і лицензиялану кезеңінде.Кәсіпорындардың сұранысына сәйкес мақсатты дайындық жүргізілуде: соңғы үш жылда студенттердің саны екі есеге жуық өсті (687-ден 1 237-ге дейін). Қазір 853 кәсіпорынмен әріптестік орнатылған, олардың қатарында «KamLitKZ», «СарыарқаАвтоПром», «АгромашХолдинг KZ», «Баян Сұлу», ССГПО, «ERG Service», «Қостанай минералдары» сияқты ірі компаниялар бар. Тәлімгер кәсіпорындардың саны 250-ге жетті.Дуалды оқыту жүйесі дамуда – 7 мыңнан астам студент қамтылған. Түлектердің жұмысқа орналасу деңгейі – 91%, бұл республика бойынша орташа көрсеткіштен 10%-ға жоғары.Колледж студенттерінің жетістіктері де жүйенің тиімділігін дәлелдейді. Өткен оқу жылында 8 студент елдің ТОП-100 үздік жастары қатарына кірді, 5 студент ұлттық деңгейде медаль иеленді. Өңірлік деңгейде 60 құзыреттілік бағыты бойынша жарыстар өткізіліп келеді.Халықаралық чемпионаттарда да жетістіктер бар: биыл Глеб Сауленко Данияда өткен EuroSkills-2025 чемпионатында кәсіби шеберлігі үшін медальон жеңіп алды.Осылайша, облыс білім саласында адам капиталын дамыту жолында жүйелі жұмыстарды жалғастыруда. Бұл үдерістің ортасында – шәкірт пен оның болашақта елінің нағыз азаматы болып қалыптасуы тұр.Ақпарат көзі : https://www.gov.kz/memleket/entities/kostanay/press/news/details/1080686?lang=kk

Астана, 2025 жылғы 4 қазан – Бахрейн тарапының бастамасымен Қазақстан Республикасының Сыртқы істер министрі Ермек Көшербаев Бахрейн Корольдігінің Сыртқы істер министрі Абдуллатиф бен Рашид Әл-Заянимен телефон арқылы сөйлесті.А.Әл-Заяни әріптесін жаңа лауазымға тағайындалуымен құттықтап, жауапты қызметіне мол табыс тіледі. Өз кезегінде Қазақстан СІМ басшысы алғысын білдіріп, екі ел арасындағы достық қарым-қатынастарды жан-жақты тереңдетуге бейілділігін атап өтті.Сұхбат барысында екіжақты және көпжақты форматтағы өзара іс-қимылды одан әрі дамытудың өзекті мәселелері мен перспективалары, сондай-ақ биік және жоғары деңгейлерде қол жеткізілген уағдаластықтарды жүзеге асыру мәселелері талқыланды.Тараптар саяси, сауда-экономикалық және мәдени-гуманитарлық салалардағы көпжоспарлы қазақ-бахрейн ынтымақтастығын нығайтуға өзара дайындығын растады.  Ақпарат көзі : https://www.gov.kz/memleket/entities/mfa/press/news/details/1080688?lang=kk