Отырысқа аудан әкімі Е.Ихсанов, мәслихат төрағасы К.Ермекбаев, бөлім басшылары, қала және ауылдық округ әкімдері, бұқаралық ақпарат өкілдері қатысты.Күн тәртібіндегі «Қанай ауылдық округ әкімі аппаратының атқарған жұмысы мен көрсететін мемлекеттік қызметтері туралы» мәселе бойынша Қанай ауылдық округ әкімі аппаратының бас маманы Д.Урбулатова баяндап, назарға алынды.Қоғамдық кеңес мүшелері аудандық, Ақсай қаласы және ауылдық округтер бюджеттеріне және тұрғын үй көмегін көрсетудің қағидаларына өзгерістер енгізу туралы мәслихаттың шешім жобаларын мақұлдады.Ақпарат көзі : https://www.gov.kz/memleket/entities/burlin-maslihat/press/news/details/1298478?lang=ru

2026 жылғы 1 қаңтардан бастап Қазақстанда бұрын ұсынылған салық есептілігіне өзгерістер енгізу тәртібі өзгерді.Бұрын салық төлеушілер бұрын ұсынылған есептілікті кері қайтарып ала алатын болса, 2026 жылдан бастап мұндай мүмкіндік алынып тасталды. Негіз: ҚР Салық кодексінің 115-бабы 9-тармағы. Тек тауарларды әкелу және жанама салықтарды төлеу туралы өтініш қана бұдан тыс болып табылады.Қатені қалай түзетуге немесе мәліметтерді қалай толықтыруға болады?ҚР Салық кодексінің 116-бабына сәйкес, өзгерістер мен толықтырулар тек мыналарды ұсыну арқылы енгізіледі:Қосымша салық есептілігі;Хабарлама бойынша салық есептілігі.Назар аударыңыз. Ұсынылған салық есептілігі толықтығы мен толтырылуының дұрыстығына форматтық-логикалық бақылаудан өтеді. Есептілік тек «Құжат қабылданды» мәртебесі берілген жағдайда ғана ұсынылды деп есептеледі.Формаларды толтыру кезінде мұқият болыңыздар және қабылданған құжаттардың мәртебесін уақытылы тексеріп отырыңыздар!     Ақпарат көзі : https://www.gov.kz/memleket/entities/kgd-pavlodar/press/news/details/1298495?lang=ru

Мемлекет басшысы Қасым-Жомарт Тоқаев Қазақ-қытай инвестициялық форумының екі елдің іскер топтары арасындағы тікелей байланысты нығайтатын тұрақты алаңға айналуы қажет екенін атап өтті.Президент Қазақстан инвестициялық жобаларды іске асыру үшін заманауи әрі тиімді қаржылық тетіктерді қалыптастыруға басымдық беріп отырғанын айтты. Осы ретте «Астана» халықаралық қаржы орталығы мен Гонконг арасындағы ынтымақтастықтың жаңа мүмкіндіктер ашатынына назар аударды.Қыркүйек айының басында «Самұрық-Қазына» қоры Орталық Азия және ШЫҰ елдерінің эмитенттері арасында алғашқылардың бірі болып Қытайдың банкаралық нарығына шықты. Қор жалпы сомасы 3 миллиард юаньнан астам панда-облигациялар шығарды.Сондай-ақ Kazakh Invest ұлттық компаниясы жанынан қазақ-қытай инвестициялық қорын құру туралы келісімге қол қойылды. Мемлекет басшысы бұл қадамды инвестициялық ынтымақтастықты тереңдетудегі маңызды бағыттардың бірі ретінде атап өтті.Қасым-Жомарт Тоқаев форумды жыл сайын қыркүйек айында «Қазақстан-Қытай» Алматы инвестициялық диалогы атауымен өткізуді ұсынды. Оның айтуынша, мұндай тұрақты алаң нақты жобалар мен жаңа келісімдерді жүзеге асыруға мүмкіндік береді.Президент Қазақстанның Қытаймен мәңгі достық және стратегиялық серіктестік байланыстарын одан әрі нығайтуға баса мән беретінін атап өтті.«Қазақстан мен Қытай – екі дос, көршілес ел болып, әрбір істі ойдағыдай жүзеге асырады» деді Мемлекет басшысы.

Президент Қасым-Жомарт Тоқаев Қазақстан мен Қытайдың мәңгі және жан-жақты стратегиялық серіктестігінің тарихи негізі берік әрі тату көршілік пен өзара сенім рухында тың қарқынмен дамып келе жатқанына назар аударды.– Бүгінде қазақ-қытай қарым-қатынасы сапалық тұрғыдан жаңа деңгейге көтерілді деп айтуға болады. Бұл құрметті Төраға Си Цзиньпин мырзаның тікелей қолдауының арқасы деп айтсақ, артық болмас. Біз мәңгілік дос әрі сенімді серіктес ретінде ынтымақтастығымыздың жаңа «алтын 30 жылдық» кезеңіне қадам басып жатырмыз. Жалпы, Қытай – Қазақстанның ең ірі сауда серіктесі. Былтыр екі елдің тауар айналымы рекордтық межеге жетіп, 50 миллиард долларға жуықтады. Үкіметтеріміз бұл көрсеткішті 100 миллиард долларға дейін жеткізу үшін белсенді жұмыс істеп жатыр. Инвестиция саласындағы ынтымақтастығымыз да тұрақты дамып келеді. Қытай Қазақстан экономикасына 29 миллиард доллардан астам қаржы құйды. Осылайша, еліміздің аса ірі инвесторларының біріне айналды. Қазір Қазақстанда Қытайдың қатысуымен 9 мыңнан астам кәсіпорын табысты жұмыс істеуде, – деді Мемлекет басшысы.Президент өнеркәсіп, цифрландыру, «ақылды қалалар» мен спутниктік технологияларды дамыту, ауыл шаруашылығы, денсаулық сақтау және білім беру салаларындағы серіктестік дәйекті түрде нығайып келе жатқанын жеткізді. Оның айтуынша, Инвестицияларды көтермелеу және өзара қорғау туралы келісімді ратификациялау екіжақты ынтымақтастықты жандандыруға құқықтық тұрғыдан ықпал етті.– Іскерлік байланыстардың кеңеюіне елдеріміз арасында орнаған визасыз режим де елеулі үлес қосты. Қазіргі кезде Қазақстанда қомақты инвестиция тартып, ірі жобаларды іске асыруға барынша оңтайлы жағдай жасалған деп сеніммен айтуға болады. Биыл 1 шілдеде күшіне енген Конституциямыздың негізгі ережелері еліміздің инвестициялық әлеуетін нығайтуға мықты құқықтық негіз қалады. Ережелердің тұрақтылығына және инвестициялық қызметке мемлекет тарапынан қолдау көрсету сапасына айрықша мән береміз. Осы мақсатта Бас прокуратура жанынан Инвесторлардың құқықтарын қорғау комитеті құрылды. Бас прокурорға инвестициялық омбудсмен міндеттері жүктелді, – деді Қасым-Жомарт Тоқаев.Мемлекет басшысының пайымдауынша, әлем экономикасы түбегейлі өзгеріске ұшырап жатқан кезеңде Қазақстан мен Қытай өзара сенімге, ашықтық пен ортақ мүддеге арқа сүйеген озық әрі тиімді ынтымақтастық үлгісін көрсетіп отыр.Осыған орай Президент екі елдің табысты серіктестігін одан әрі дамытуға арналған басым бағыттарды атады. Қасым-Жомарт Тоқаев, ең алдымен, көлік-логистика саласына тоқталды.– Халықаралық серіктестермен бірге теміржол қуатын арттырып, автомобиль магистральдары мен теңіз порттарын кеңейтуді, жүк тасымалы авиациясын және шекара маңы инфрақұрылымын дамытуды қолға алдық. Ляньюньганнан Ақтауға дейін Қытай жағалауын Каспиймен байланыстыратын логистикалық тораптар желісі қалыптасты. Көп ұзамай Ченду қаласындағы қазақ-қытай терминалы осы логистикалық тізбектің маңызды буынына айналады. Аталған шаһарда Қазақстанның Бас консулдығын ашуды жоспарлап отырмыз. Азия мен Еуропа арасындағы заманауи көлік байланысын түзетін Орта дәлізді өркендетуді айрықша міндет деп санаймыз, – деді Президент.Қасым-Жомарт Тоқаев бүгінгі форумға транзит айлақтарының өткізу мүмкіндігін кеңейту жұмыстарына белсенді атсалысып жатқан компаниялар қатысып отырғанын айтты.Президент болжам бойынша 2029 жылға қарай Қытайдан Еуропаға қатынайтын контейнерлі пойыздардың саны үш мыңға дейін ұлғаятынын мәлімдеді. Бұл жаһандық логистика тізбегіндегі маңызды көлік хабтарының бірі ретінде Қазақстанның позициясын күшейтеді.– Бірқатар бірлескен бастамалар қазірдің өзінде нақтылана түсті. Биыл тамыз айында Арал – Каспий автомагистралінің құрылысы басталды. Жаңа бағдар Шығыс – Батыс жолының өткізу қабілетін бірнеше есе арттырады. Таяу уақытта Мойынты – Қызылжар, Бақты – Аягөз теміржолдарының құрылысы аяқталады. Жүк тасымалының ашықтығын «Ақылды шекара» пилоттық жобасы аясында бірлесе енгізілген цифрлық технологиялар қамтамасыз етеді. Қытайлық Minmetals Logistics корпорациясымен серіктестік аясында жүргізушісіз көлік технологияларын және цифрлық шешімдерді қолданатын логистика дәлізі түзіледі. Бұл – біздің еліміз үшін бірегей жоба. Мультимодальді жүк тасымалын дамытуға ерекше мән береміз. Alatau Air Cargo ұлттық авиа жүк жеткізуші компаниясы жұмысын бастады. Қазақстан нарығына Cathay Pacific Cargo секілді әлемнің жүк таситын ірі әуе компаниялары шығып жатыр. Азаматтық авиация да маңызды рөл атқарады. Биыл Алматы – Сиань, Алматы – Шанхай, Астана – Гуанчжоу, Ақтау – Үрімжі рейстері ашылды. Осы аптада алғашқы жолаушылар бағдары Алматы мен Чунцин қалаларын тікелей байланыстырды, – деді Мемлекет басшысы.

Рудный қаласында «Чек талап ет — жүлде ұтып ал!» акциясы басталадыРудный қаласы, Қостанай облысы. 24.09.2026ж.Рудный қаласы бойынша мемлекеттік кірістер басқармасы қала тұрғындары мен қонақтарын «Чек талап ет — жүлде ұтып ал!» акциясына қатысуға шақырады. Акция 2026 жылғы 26 қыркүйектен 16 желтоқсанға дейін өтеді.Қатысу үшін сатып алу кезінде бақылау-касса машинасының фискалдық чегін алып, оған телефон нөміріңізді жазып, Рудный қаласындағы «ЦУМ» сауда үйінде орнатылған арнайы барабанға салу қажет.Жүлделер ұтысы 2026 жылғы 16 желтоқсанда Қазақстан Республикасының Тәуелсіздік күніне орай өткізіледі. Бас жүлде — теледидар. Сондай-ақ аэрогрильдер, құлаққаптар, электр шәйнектер, грильдер мен вафли пісіргіштер ойнатылады.Фискалдық чек тауар немесе қызмет үшін төлем жасалғанын растайды. Чек талап ету сауданың ашықтығына, түсімнің толық есепке алынуына және салық міндеттемелерінің тиісінше орындалуына ықпал етеді. Акцияның басты ұраны — «Сенің чегің — туған қалаңның дамуына қосқан үлесің!»Егер сатып алу кезінде фискалдық чек берілмесе, оның орнына тек тауарлық чек ұсынылса немесе есеп айырысу тәртібіне қатысты сұрақтар туындаса, Рудный қаласы бойынша мемлекеттік кірістер басқармасына жүгінуге болады.Акция туралы қосымша ақпарат Instagram желісіндегі @rudny.salyq.kz парақшасында жарияланады.Чек талап етіңіз, акцияға қатысыңыз және жүлде ұтып алыңыз!Ақпарат көзі : https://www.gov.kz/memleket/entities/kgd-kostanay/press/news/details/1298381?lang=ru

Ақтөбе құрылыс-техникалық колледжінде Облыстық жастар ресурстық орталығының ұйымдастыруымен «Жастарға кеңес» жобасы аясында жастармен рухани-танымдық кездесу өтті.Кездесудің құрметті қонақтары:«Ғалым бол» ағартушылық жобасының авторы – Жасұлан Қазгелдіұлы;Қазақстандық ақын, белгілі хит әндердің мәтін авторы – Оразбек Қиынбаев.Іс-шарада Ақтөбе облыстық жастар ресурстық орталығының маманы Дәулет Алмасұлы модераторлық етті.Кездесу барысында ұлттық құндылықтарды сақтау, салт-дәстүрді дәріптеу, рухани даму мен отансүйгіштік тақырыптары кеңінен қозғалды. Қонақтар жастарға өздерінің өмірлік тәжірибелерімен бөлісіп, білімге ұмтылудың және ұлттық болмысты сақтаудың маңыздылығын жеткізді.Еркін форматта өткен кездесуде жастар көкейлеріндегі сұрақтарын қойып, қонақтармен ашық пікір алмасты.Ақпарат көзі : https://www.gov.kz/memleket/entities/aktobe-zhastar1/press/news/details/1298340?lang=ru

Жетісу облысы бойынша Мемлекеттік кірістер департаменті 2026 жылғы 1 қаңтардан бастап Қазақстанда салық есептілігін ұсынудың жаңа тәртібі қолданылатынын еске салады.Салық кодексінің нормаларына сәйкес, белгіленген тапсыру мерзімі өткеннен кейін салық органының ақпараттық жүйесі тиісті салық кезеңі үшін нөлдік көрсеткіштері бар есептілікті автоматты түрде қалыптастырады.🖥 Осыған байланысты, салық төлеушілер «Салық төлеушінің кабинеті» веб-қосымшасында ұсынылуға тиіс салық есептілігі нысандарын (СЕН) алдын ала белгілеуі қажет.✍ Іс-қимыл алгоритмі:🔸 «Салық төлеушінің кабинеті» (СӘИЖ) веб-қосымшасына кіру;🔸 «Ұсынылатын СЕН» бөліміне өту;🔸 Қолданылатын салық режимі мен қызмет түріне сәйкес қажетті салық есептілігі нысандарын қосу;🔸 Әрбір СЕН бойынша тапсыру басталған «жыл мен салық кезеңін» көрсету;🔸 Енгізілген мәліметтерді сақтау.❗Бұл ретте нөлдік көрсеткіштері бар есептіліктің автоматты түрде қалыптасуы салық төлеушіні іс жүзіндегі салық міндеттемелерін көрсету міндетінен босайтпайды.📌 Егер есептілік автоматты түрде қалыптасқаннан кейін салық төлеушіде есептілікте көрсетілуге тиіс салық салу объектілері нақты тіркелген болса, ол тиісті салық кезеңі үшін қосымша салық есептілігін тапсыруға міндетті.✅ Аталған тәртіп жеке тұлғалардың жеке кәсіпкерлікке қатысы жоқ қызметі бойынша салық есептілігін ұсынуына қолданылмайды.Осылайша, есептілікті нөлдік көрсеткіштермен автоматты түрде қалыптастыру салықтық әкімшілендіруді жеңілдетуге және салық төлеушілерге түсетін әкімшілік жүктемені азайтуға бағытталған.Ақпарат көзі : https://www.gov.kz/memleket/entities/kgd-zhetysu/press/news/details/1305638?lang=ru

Шығыс Қазақстан облысының білім беру ұйымдарындағы 7–11 сыныптың 13 825 оқушылары. Қазақстан Республикасы Оқу-ағарту министрлігінің 2026–2027 жылдарға арналған Медиа-жоспары және Шығыс Қазақстан облысының орта білім беру ұйымдарында кәсіптік бағдар беру жұмысын дамыту жөніндегі 2025–2028 жылдарға арналған Жол картасын іске асыру аясында кәсіптік диагностикадан өтті.Диагностика барысында оқушылардың кәсіби қызығушылықтары мен бейімділіктері, құзыреттері, кәсіби мотивациясы және мамандық таңдауға саналы көзқарасы анықталды. Кәсіби бағыттылықты айқындау мақсатында Mansap.enbek.kz, Edukey.kz платформалары және Е.А. Климовтың дифференциалды-диагностикалық сауалнамасы қолданылды.Диагностика нәтижелері оқушылардың кәсіби бағыттары мен қызығушылықтарын ескеруге, сондай-ақ олардың жеке бейімділіктері, қабілеттері мен кәсіби қалауларына сәйкес одан әрі кәсіптік бағдар беру жұмысын ұйымдастыруға негіз болды.Ақпарат көзі : https://www.gov.kz/memleket/entities/vko-bilim/press/news/details/1298322?lang=ru

Ақтөбе облысының жастар саясаты мәселелері жөніндегі басқармасының жастармен жұмыс бөлімінің басшысы Санжар Жайлыбай және Облыстық жастар ресурстық орталығының басшысы Әлішер Садық Ойыл ауданына жұмыс сапарымен барды.Жұмыс сапарының бағдарламасы аясында:🔹Ойыл ауданының әкімімен кездесу өткізіліп, аудандағы жастар саясатының жүзеге асырылу барысы талқыланды;🔹«Жастармен бірге – жаңа мүмкіндіктерге» тақырыбында ауданның белсенді жастарымен кездесу ұйымдастырылып, жастардың ұсыныс-пікірлері тыңдалды;🔹 Ойыл аграрлық колледжінің материалдық-техникалық базасымен танысып, студенттермен кездесу өткізілді.Сапар барысында аудан жастарының бастамаларын қолдау, олардың әлеуетін арттыру және жастар саясатын тиімді жүзеге асыру бағытында пікір алмасылды.Сонымен қатар аудандық жастар ресурстық орталығының жұмысын жетілдіру бойынша әдістемелік көмек көрсетіліп, алдағы міндеттер мен бірлескен жұмыс бағыттары талқыланды.Ақпарат көзі : https://www.gov.kz/memleket/entities/aktobe-zhastar1/press/news/details/1298323?lang=ru

Халықаралық Lonely Planet туристік басылымы Астананы Best in Travel 2027 жыл сайынғы үздік бағыттар мен туристік әсерлер топтамасына енгізді. Қазақстан астанасы 2027 жылы саяхаттауға ұсынылған әлемнің түкпір-түкпіріндегі 50 орын мен туристік әсер қалдыратын тізімге енді.Best in Travel 2027 топтамасына Lonely Planet командасы таңдаған 25 туристік бағыт пен 25 туристік әсер қалдыратын тізім енгізілген. Астана тізімге дербес туристік бағыт ретінде еніп, «Best for futuristic skylines» – футуристік сәулетімен ерекшеленетін қала ретінде ұсынылды.Lonely Planet авторлары елорданың заманауи сәулеті мен көзге бірден түсетін қалалық келбетіне назар аударған. Қаланың қазіргі бейнесін қалыптастыратын ерекше сәулеттік шешімдер мен нысандардың үйлесіміне айрықша мән берілген.Lonely Planet-тің Астанаға арналған жеке гидінде де қаланың сәулеті елорданың басты ерекшеліктерінің бірі ретінде аталады. Басылым қаланың көрнекті нысандары қатарында «Бәйтерек» монументін, «Хан Шатыр» сауда және ойын-сауық орталығын, Бейбітшілік және келісім сарайын, «Қазақстан» Орталық концерт залын және заманауи сәулеттің басқа да нысандарын атап өткен.Астананың Best in Travel 2027 тізіміне енуі Қазақстан астанасына дербес туристік бағыт ретінде халықаралық қызығушылықтың жоғары екенін көрсетіп, қаланы әлемдік туристік нарықта танытуға қосымша мүмкіндік береді.Бұған дейін Қазақстан да Lonely Planet басылымының жоғары бағасына ие болған. Best in Travel 2025 топтамасында ел саяхаттауға ұсынылған бағыттардың қатарында болды. Ал 2027 жылғы тізімде Астана мен оның заманауи сәулеттік келбетіне ерекше назар аударылған.Бүгінде Астанада заманауи сәулет үлгілері, үлкен қоғамдық кеңістіктер және қазақстандық әрі шетелдік сәулетшілер жобалаған түрлі нысандар қатар орналасқан.Бірнеше онжылдық ішінде қала заманауи сәулет шешімдерін ұлттық нақышпен үйлестіріп, өзіндік келбетін қалыптастырды.Астананың Best in Travel 2027 тізіміне енуі елордаға шетелдік туристердің қызығушылығын арттыруы мүмкін. Бұл қала туралы халықаралық деңгейде көбірек ақпарат таратып, оның туристік мүмкіндіктерін танытуға жол ашады.https://www.instagram.com/p/Ddnmsm3IOJk/ Ақпарат көзі : https://www.gov.kz/memleket/entities/astana-uir/press/news/details/1298326?lang=ru

ШҚО білім басқармасының «Örken» Шығыс Қазақстан өңірлік білім беруді ақпараттандыру және дамыту ғылыми-әдістемелік орталығы Қазақстан Республикасы Оқу-ағарту министрлігінің Ұлттық ғылыми-практикалық дене тәрбиесі орталығының 2026 жылға арналған халықаралық, республикалық спорттық-бұқаралық және дене шынықтыру-сауықтыру іс-шараларының күнтізбелік жоспарына сәйкес, 2026 жылғы 25 қазан – 1 қараша аралығында Алматы қаласында VI республикалық Қазақстан мұғалімдерінің спартакиадасы өтетінін хабарлайды.Спартакиада бағдарламасына спорттың 6 түрі енгізілген.Республикалық спартакиадаға дайындық аясында 2026 жылғы 23 қыркүйекте Д. Серікбаев атындағы Шығыс Қазақстан техникалық университетінің базасында ұлттық спорт түрлері – асық ату және бес асық бойынша іріктеу кезеңі өткізілді.Жарыс барысында асық атудан 9, бес асықтан 7 маман бақ сынасты. Жарыстың жеңімпаздары мен жүлдегерлерін төрешілер алқасы – Е.Т. Сапарғалиев, Ғ.М. Әлайдаров және О. Құлихан анықтады.Іріктеу кезеңінің қорытындысы бойынша жүлделі орындарға ие болған қатысушылар Алматы қаласында өтетін республикалық кезеңге жолдама алды.Республикалық спартакиаданың қорытынды кезеңіне Шығыс Қазақстан облысынан спорттың 6 түрі бойынша барлығы 51 маман қатысады.Барлық қатысушыларға жарыс барысында жоғары нәтижелер көрсетіп, облысымыздың намысын абыроймен қорғауларына тілектеспіз!Ақпарат көзі : https://www.gov.kz/memleket/entities/vko-bilim/press/news/details/1298315?lang=ru

Жаңа оқу жылының басында Шығыс Қазақстан облысында өрт қауіпсіздігі бойынша сабақтар циклі басталды. Ұйымдастырушы – ШҚО білім басқармасының «Örken» ақпараттандыру және білімді дамыту облыстық ғылыми-әдістемелік орталығы» КММ.Алғашқы сабақ облыс оқушыларына арналған сұхбат форматында өтті. Спикер – ШҚО Төтенше жағдайлар департаменті Мемлекеттік өрт бақылау басқармасының аға инженері, майор Сейтқамза Мадина. Өңірдің көптілді ортасын ескере отырып, сабақтар қазақ және орыс тілдерінде мазмұны бірдей етіп өткізілді, бұл мүмкіндігінше көп оқушыны қамтуға мүмкіндік берді.Әңгіме барысында спикер түрлі төтенше жағдайлардағы іс-қимыл алгоритмін талдап берді. Мадина Сейтқамза өрт кезіндегі басты жау – тек от қана емес, сонымен қатар үрей мен улы түтін екенін атап өтті. «Әр оқушы сабыр сақтап, мұғалімнің нұсқауларын нақты орындауы керек», – деді майор.Оқушыларға өмірлік маңызды ережелер еске салынды: дәліз түтіндесе, есікті мықтап жауып, саңылауларды бітеу қажет, ал эвакуация кезінде лифтіні пайдалануға қатаң тыйым салынады. Қалдырылған заттар – рюкзак немесе телефон – үшін жанған ғимаратқа қайта кіруге болмайтынына ерекше назар аударылды.Сонымен қатар спикер тұрмыстық қауіпсіздік тақырыбын қозғады. Оқушыларға ақаулы қуаттағыш құрылғылар мен электр желісінің шамадан тыс жүктелуінің қаншалықты қауіпті екені түсіндірілді. Кездесуді қорытындылай келе, Мадина Сейтқамза үш басты ережені тұжырымдады: үрейге берілмеу және 112 нөмірі арқылы ересектерге хабарлау, қауіпсіз бағыт бойынша ұйымдасқан түрде үй-жайдан шығу және материалдық құндылықтар үшін ешқашан өмірді қауіпке тікпеу.Мұндай сабақтарды өткізу жас ұрпақтың бойында қауіпсіздік мәдениетін және экстремалды жағдайларда дұрыс әрекет ету дағдыларын қалыптастыруға ықпал етеді.Ақпарат көзі : https://www.gov.kz/memleket/entities/vko-bilim/press/news/details/1298306?lang=ru

23 қыркүйекте  ​Егіндікөл ауданы бойынша Мемлекеттік кірістер басқармасында өткізілген «Ашық есік күні» акциясы аясында Ақмола облысы бойынша Мемлекеттік кірістер департаментінің қызметкерлері салық төлеушілермен түсіндіру жұмыстарын жүргізді.Олар жеке табыс салығы мен әлеуметтік салыққа қатысты тәжірибеде жиі кездесетін мәселелерге, атап айтқанда салық мөлшерлемелері мен жеңілдіктеріне, шегерімдерге, жалпыға бірдей декларациялау, мобильді аударымдар және арнайы салық режимдері мәселелеріне кеңінен тоқталды. Шара барысында Мемлекеттік кірістер департаментінің өкілдері қойылған сұрақтарға егжей-тегжейлі жауап берді.Ақпарат көзі : https://www.gov.kz/memleket/entities/kgd-akmola/press/news/details/1298285?lang=ru

Ақмола облысы бойынша Мемлекеттік кірістер департаменті жылжымайтын мүлік және жер учаскелерінің меншік иелері болып табылатын жеке тұлғаларға 2025 жылғы мүлік салығын 2026 жылдың 1 қазанына дейін төлеу қажеттігін еске салады.    Салық сомалары салық төлеушілерге қолжетімді: хабарламаларды қалыптастыру үшін мәліметтер екінші деңгейдегі банктерге жіберілді, соның негізінде олардың пайдаланушыларына, оның ішінде Kaspi және Halyk мобильді қосымшаларында, әрбір объект бойынша сомалардың толық жіктелуі көрсетілген PUSH-хабарламалар келді.    Салықты ыңғайлы тәсілмен төлеуге болады:    - екінші деңгейдегі банктердің мобильді қосымшалары арқылы;    - банк бөлімшелерінде немесе төлем терминалдарында қолма-қол ақшамен;    - банкоматтар мен төлем терминалдарында банк картасы арқылы.     Назарларыңызға салынады: 2026 жылдың 2 қазанынан бастап берешегі жойылмаған меншік иелеріне тиісті хабарламалар жіберіледі. Егер төлем 30 жұмыс күні ішінде түспесе, салық бұйрығы қалыптастырылады; ол 5 жұмыс күні ішінде орындалмаса, іс жеке сот орындаушыларына беріледі.   Департамент осы рәсімнен аулақ болу үшін салықты уақытылы төлеуді ұсынады.Ақпарат көзі : https://www.gov.kz/memleket/entities/kgd-akmola/press/news/details/1298264?lang=ru

Азаматтарға арналған үкімет» мемлекеттік корпорациясы үшін мемлекеттік қызметтердің баршаға бірдей қолжетімді болуы маңызды. Денсаулық жағдайына байланысты ХҚКО-ға өзі келе алмайтын ерекше қажеттілігі бар жандарға және жүріп-тұруы шектелген тұрғындарға мамандар үйіне барып, тегін қызмет көрсетеді.2026 жылдың басынан бері Мемлекеттік корпорация мамандары 12 мыңға жуық азаматтың үйіне барып, 9 мыңнан астам мемлекеттік қызмет көрсеткен. Үй жағдайында көрсетілген қызметтердің ішінде сұранысқа ие болғандардың қатарында паспорт пен жеке куәлік беру, электрондық цифрлық қолтаңба рәсімдеу және тұрғын үй көмегін тағайындау бар.Маманды үйге шақыртып, мемлекеттік қызмет алуға I және II топтағы мүгедектігі бар тұлғалар, Ұлы Отан соғысының қатысушылары, сондай-ақ денсаулық жағдайына байланысты жүріп-тұруы шектелген азаматтар құқылы.Маман шақыру үшін Мемлекеттік корпорация сайтындағы «Қызметтер» бөлімі арқылы немесе 1414 бірыңғай байланыс орталығына хабарласып, өтінім қалдыру қажет. Бұдан кейін қызметкер азаматтың үйіне барып, қажетті құжаттарды қабылдайды. Дайын болған қызмет нәтижесі көрсетілген мекенжайға тегін жеткізіледі.Еске сала кетейік, ХҚКО-ға өзі келетін ерекше қажеттілігі бар азаматтар үшін барлық жағдай жасалып, кедергісіз жайлы орта қалыптасқан. Ал кезексіз қызмет алуға құқылы келушілерге арнайы жеңілдік терезелері арқылы жедел қызмет көрсетіледі.Сонымен қатар, еліміздегі барлық фронт-офистер ыңғайлы пандустармен, көмек шақыру батырмаларымен, көру қабілеті шектеулі жандарға арналған тактильді тақталармен және арнаулы арбалармен қамтылған.Ақпарат көзі : https://www.gov.kz/memleket/entities/abay-kurchatov/press/news/details/1298930?lang=ru

17 қазан күні сағат 9:00-де «Саяхат» базарында облыс қалалары мен аудандарының ауыл шаруашылығы тауар өндірушілерінің қатысуымен ауыл шаруашылығы жәрмеңкесі өтеді.Жәрмеңкеде жаңа піскен көкөністер мен жеміс-жидектер, ет, табиғи бал, сүт өнімдері және басқа да ауыл шаруашылығы өнімдері ұсынылады.Барша қала тұрғындары мен қонақтарын жәрмеңкеге келіп, сапалы әрі балғын өнімдерді тиімді бағамен сатып алуға шақырамыз!Сіздерді 17 қазан күні сағат 9:00-де «Саяхат» базарында күтеміз!Ақпарат көзі : https://www.gov.kz/memleket/entities/kostanai-kalasy-akimat/press/news/details/1312321?lang=ru

Зейнетақы активтерін кім басқарады?Зейнетақы активтерін инвестициялық басқаруды Қазақстан Республикасының Ұлттық Банкі (ҚРҰБ), сондай-ақ 2021 жылдан бастап тиісті лицензиясы бар және уәкілетті органның талаптарына сай келетін инвестициялық портфельді басқарушылар (ИПБ) жүзеге асырады. Мұндай сенімгерлік басқарудың негізгі мақсаты – зейнетақы жинақтарын түрлі қаржы құралдарына инвестициялап, табыс алу.Зейнетақы активтерін басқарушылар – ҚРҰБ пен ИПБ-лардың зейнетақы активтерін инвестициялау бойынша өзіндік стратегиясы бар және олар инвестициялық портфельдің құрылымын инвестициялық декларация шеңберінде дербес айқындайды.Қолданыстағы ИПБ тізіліміне қазақстандықтар зейнетақы жинақтарын сенімгерлік басқаруға бере алатын 6 жеке компания кіреді:«Alatau City Invest» АҚ, «BCC Invest» АҚ, «Сентрас Секьюритиз» АҚ, «Halyk Finance» АҚ, «Halyk Global Markets» АҚ, «Tansar Capital» АҚ. (Бұл ретте «Halyk Global Markets» АҚ «БЖЗҚ» АҚ-ға 2027 жылдан бастап сенімгерлік басқару шартын бұзатыны туралы хабарлаған. Осыған байланысты, 2026 жылғы 1 қаңтардан бастап Қор зейнетақы жинақтарын осы компанияға аудару туралы өтініштерді қабылдамайды).www.enpf.kz сайтындағы «Қызметтер» – «Инвестициялық портфельді басқарушылар тізілімі» бөлімінен, сондай-ақ invest.enpf.kz ақпараттық интернет-платформасы арқылы ИПБ туралы ақпаратпен танысып, олардың инвестициялық декларацияларын зерделеуге болады.Заңнамалық өзгерістерге сәйкес міндетті зейнетақы жарналары және міндетті кәсіптік зейнетақы жарналары есебінен қалыптастырылған зейнетақы жинақтарының 100%-на дейін инвестициялық портфельді басқарушының (ИПБ) басқаруына беруге мүмкіндік қарастырылған. Бұл мүмкіндікті кім пайдалана алады және бұл механизм қалай жүзеге асырылады?Зейнетақы жинақтарының 100%-на дейін жеке басқарушы компаниялар – ИПБ-ларға сенімгерлік басқаруға беру мүмкіндігін БЖЗҚ-ның барлық салымшылары пайдалана алады. Бұл нормалар 2026 жылғы 7 қыркүйектен бастап күшіне енді.www.enpf.kz сайтындағы «Қызметтер» – «Инвестициялық портфельді басқарушылар тізілімі» бөлімінен, сондай-ақ invest.enpf.kz ақпараттық интернет-платформасы арқылы ИПБ туралы ақпаратпен танысып, олардың инвестициялық декларацияларын зерделеуге болады.Жақында бір ИПБ салымшыларға тәуекел деңгейі, күтілетін кірістілік және инвестициялау мерзімі бойынша ерекшеленетін инвестициялық портфельдердің үш түріне дейін – консервативті, қалыпты және тәуекелді портфельдерді ұсына алады.Зейнетақы активтерінің инвестициялық портфельдерін қалыптастыру тәртібін қаржы нарығы мен қаржы ұйымдарын реттеу, бақылау және қадағалау жөніндегі уәкілетті орган айқындайды. Зейнетақы жинақтарын бірнеше басқарушы компания арасында бөлуге бола ма?Салымшы бір немесе бірнеше ИПБ-ны таңдай алады. Халықты кеңінен хабардар ету мақсатында БЖЗҚ invest.enpf.kz бірыңғай ақпараттық интернет-платформасын іске қосты. Бұл – салымшыларға сенімгерлік басқарушылардың (ҚРҰБ пен ИПБ) басқаруындағы зейнетақы активтерінің портфельдері бойынша түрлі деректерді бір ақпараттық алаңда салыстыруға мүмкіндік беретін заманауи цифрлық ресурс. Салымшы мұнда инвестициялық портфельдерді өз бетінше бағалауға, сондай-ақ өзінің мақсаттары мен күтетін нәтижесіне сай келетін басқарушы компания мен оның инвестициялық стратегиясын таңдауға мүмкіндік беретін құралдарды пайдалана алады.Бұдан бөлек, invest.enpf.kz платформасында салымшы ИПБ-лардың инвестициялық декларацияларымен танысып, олардың қаржылық көрсеткіштерін талдай алады. Сондай-ақ ИПБ-ларға қатысты реттеуші орган – ҚР Қаржы нарығын реттеу және дамыту агенттігі (ҚР ҚНРДА) тарапынан қолданылған әкімшілік шаралар, санкциялар мен ықпал ету шаралары туралы ақпаратты да (олар болған жағдайда) көре алады. Зейнетақы жинақтарын БЖЗҚ-дан басқарушы компанияға беру қалай жүзеге асырылады?Зейнетақы жинақтарын сенімгерлік басқаруға беру үшін салымшы алдымен ИПБ-ны таңдап, содан кейін белгіленген нысан бойынша өтініш береді.Өтінішті enpf.kz сайтындағы жеке кабинетте немесе invest.enpf.kz интернет-платформасында электрондық цифрлық қолтаңбаны (ЭЦҚ) пайдалана отырып, сондай-ақ БЖЗҚ-ның кез келген бөлімшесіне барып беруге болады.Жеке кабинетте салымшы, сондай-ақ:ИПБ-ға/ҚРҰБ-қа беруге немесе қайтаруға қолжетімді соманы тексере алады;ИПБ-ны таңдау (өзгерту) туралы немесе ИПБ-ның сенімгерлік басқаруындағы зейнетақы жинақтарын ҚРҰБ-тың сенімгерлік басқаруына қайтару туралы өтініш беру ережелері және талаптарымен таныса алады;ИПБ-ны таңдау (өзгерту) туралы немесе ҚРҰБ-қа қайтару туралы өтініш беріп, оның мәртебесін қадағалай алады;басқа да қолжетімді зейнетақы қызметтерін пайдалана алады.Зейнетақы жинақтарын сенімгерлік басқаруға аудару туралы берілген өтініштің мәртебесін сайттағы жеке кабинеттен немесе БЖЗҚ-ның мобильді қосымшасынан бақылауға болады.ИПБ-ға аударуға өтініш беру және оларды БЖЗҚ-да өңдеу рәсімдері толық автоматтандырылған. БЖЗҚ зейнетақы активтерін сенімгерлік басқаруға нормативтік-құқықтық актілерде белгіленген мерзім ішінде береді.Бұл ретте зейнетақы жинақтарын бір ИПБ-дан екіншісіне аудару немесе оларды ҚРҰБ-тың басқаруына қайтару алғашқы аударылған күннен бастап кемінде бір жыл өткен соң жүзеге асырылуы мүмкін. Салымшылар зейнетақы активтерін басқару туралы толық ақпаратты қайдан алып, басқарушы компаниялардың қызмет нәтижелерін қалай бақылай алады?БЖЗҚ – барлық салымшылар үшін бірыңғай есепке алу және ақпараттық орталық, сондай-ақ активтерді кім басқаратынына қарамастан (ҚРҰБ және/немесе салымшы таңдаған ИПБ) олардың жеке зейнетақы шоттарының операторы.БЖЗҚ зейнетақы активтерін басқаруға байланысты қолжетімді қызметтер мен сервистерді ұсынады. Азаматтардың зейнетақы жинақтары, оның ішінде инвестициялық табыс ескерілген ақпарат enpf.kz сайтындағы жеке кабинетте немесе БЖЗҚ мобильді қосымшасында 24/7 режимінде берілетін үзінді көшірмелерде толық көрсетіледі.Әр басқарушының инвестициялық қызметі туралы ақпарат enpf.kz сайтындағы «Статистика және талдау» – «Зейнетақы активтерін инвестициялық басқару» бөлімінде тұрақты түрде жаңартылып отырады.Сонымен қатар, БЖЗҚ салымшылары үшін invest.enpf.kz ақпараттық интернет-платформасы жұмыс істейді. Бұл – барлық басқарушылардың (ҚРҰБ пен ИПБ) активтерді басқару нәтижелерін өзара салыстыруға мүмкіндік беретін заманауи цифрлық ресурс. Invest.enpf.kz платформасы инвестициялық табыстылық туралы ақпаратқа қол жеткізуге, белгіленген кезең аралығындағы басқарушылар мен олардың инвестициялық портфельдері бойынша деректерді салыстыруға және инвестициялық шешімдерді саналы түрде қабылдауға мүмкіндік береді. Ақпарат көзі : https://www.gov.kz/memleket/entities/abay/press/news/details/1298179?lang=ru

2026 жылғы 24 қыркүйекте «Петропавловск-Орталық кедендік ресімдеу бекеті» басқармасының басшысы С.М. Туралинов сыртқы экономикалық қызметке қатысушылар үшін Тауарлар декларациясының 31-бағанасын дұрыс толтыру мәселелері бойынша дөңгелек үстел өткізді. Кездесу барысында тауарларды егжей-тегжейлі сипаттауға, соның ішінде өндіруші туралы мәліметтерге, техникалық сипаттамалар мен сандық құрамына ерекше назар аударылды. Қатысушыларға жүк орындары, қаптама және контейнер нөмірлері туралы деректерді көрсету ережелері түсіндірілді. Акциздік тауарларды таңбалауға және сәйкестендіру құралдарын (бақылау белгілері мен кодтарын) пайдалануға қойылатын талаптар бөлек қаралды. Сондай-ақ, бақылауға (прослеживаемость) жататын тауарларды декларациялаудың қыр-сырлары талқыланды. Іс-шараның мақсаты — ТД тапсыру кезіндегі қателіктер санын азайту және кедендік ресімдеу процесін жеделдету болды. Кездесу соңында қатысушылар ЕАЭК ТН СЭД классификаторларын қолдану бойынша өзекті сұрақтарға жауап алды.Ақпарат көзі : https://www.gov.kz/memleket/entities/kgd-sko/press/news/details/1298119?lang=ru

Токио, 2026 жылғы 24 қыркүйек – Қазақстан Республикасының Жапониядағы Елшісі Ерлан Баударбек-Қожатаев «Kawasaki Heavy Industries» директорлар кеңесінің Төрағасы және «ROTOBO» Жапон бизнес-қауымдастығының Төрағасы Ёшинори Канэханамен кездесті.Тараптар 2026 жылғы желтоқсанда Астанада өткізілуі жоспарланған Экономикалық ынтымақтастық жөніндегі Қазақстан мен Жапонияның үкіметтік және жеке секторлары бірлескен комиссиясының алдағы 9-шы отырысының күн тәртібін талқылады. Іс-шараға энергетика, машина жасау, көлік, логистика, тау-кен өнеркәсібі, құрылыс және қаржы секторы сияқты түйінді салалардың атынан ірі жапон бизнесінің 150-ге жуық өкілі қатысады деп күтілуде.Бұл шара жасанды интеллект пен цифрлық технологияларды дамытуға, «жасыл» трансформацияны ілгерілетуге, қаржы секторындағы ынтымақтастықты тереңдетуге, сондай-ақ жеткізу тізбегінің тұрақтылығын арттыруға баса назар аудара отырып, Жапония мен Қазақстан арасындағы стратегиялық экономикалық серіктестікті нығайтуға арналады. Жапон бизнесі өкілдерінің комиссия жұмысына қатысуын үйлестіруді Жапония-Қазақстан экономикалық комитетінің хатшылығы ретінде «ROTOBO» қауымдастығы жүзеге асырады.Бірлескен комиссия отырысын өткізу ҚР Президенті Қасым-Жомарт Тоқаевтың 2025 жылғы желтоқсанда Жапонияға жасаған ресми сапарының қорытындысы бойынша қол жеткізілген уағдаластықтарды іске асыруға бағытталған.Кездесу барысында Елші Е.Баударбек-Қожатаев қазақстандық тараптың «Kawasaki Heavy Industries» компаниясымен ұзақ мерзімді технологиялық серіктестікті нығайтуға, соның ішінде бірлескен жобаларды жүзеге асыруға және озық технологиялық шешімдерді жергіліктендіруге мүдделі екенін атап өтті. Қазақстан тарапы роботтандырылған жүйелерді, операцияларды басқарудың заманауи технологияларын және зияткерлік логистикалық шешімдерді енгізе отырып, автоматтандырылған қойма және фулфилмент кешендерін құру бойынша инвестициялық ұсыныстарды табыстады. Сонымен қатар, сутегі энергетикасы, өнеркәсіпті автоматтандыру, көлік-логистикалық және қалалық инфрақұрылымды дамыту салаларындағы, соның ішінде «Alatau City» технологиялық хабының флагмандық жобасы бойынша инвестициялық жобалар таныстырылды.Өз кезегінде «Kawasaki Heavy Industries» директорлар кеңесінің төрағасы Ёшинори Канэхана концерннің Қазақстандағы жобаларды жүзеге асыруға қызығушылық танытатынын растап, мұнай-химия саласы мен энергетикалық машина жасауды өзара іс-қимылдың басым бағыттары ретінде атап өтті. Бұдан бөлек, жапон корпорациясының басшысы әлемдік нарықтардағы құбылмалылық жағдайында Қазақстан жапон бизнесі үшін аса маңызды минералдардың стратегиялық тұрғыдан маңызды әрі сенімді жеткізушісі ретінде қарастырылатынын баса айтты.Анықтама: «Kawasaki Heavy Industries» – энергетика, көлік, авиация және ғарыш техникасы, кеме жасау, өнеркәсіптік жабдықтар, робототехника және инфрақұрылым салаларында жұмыс істейтін ірі жапондық өнеркәсіптік-инжинирингтік корпорация. Сұйытылған сутегі саласындағы әлемдік технологиялық көшбасшылардың бірі бола отырып, «Kawasaki Heavy Industries» оны теңіз арқылы тасымалдауға арналған әлемдегі алғашқы кемені («Suiso Frontier») жобалап салды, сондай-ақ сұйытылған сутегін қабылдайтын әлемдегі тұңғыш мамандандырылған терминалды іске қосты.«ROTOBO» Жапон бизнес-қауымдастығы Жапонияның Еуразия елдерімен сауда-инвестициялық байланыстарын дамытуға ықпал ететін негізгі институт болып табылады. Ұйым бизнеске кешенді ақпараттық және практикалық қолдау көрсетеді, талдау зерттеулерін жүргізеді, іскерлік миссиялар мен форумдар ұйымдастырады, сондай-ақ Қазақстан мен Жапонияның екіжақты экономикалық комитетінің хатшылығы қызметін атқарады.Ақпарат көзі : https://www.gov.kz/memleket/entities/mfa-tokyo/press/news/details/1298093?lang=ru

2026 жылғы III тоқсанда Шығыс Қазақстан облысы бойынша Мемлекеттік кірістер департаменті басшысының орынбасары, Әдеп жөніндегі уәкіл Койшинов К.К. мемлекеттік кірістер органдарының аумақтық бөлімшелерінің мемлекеттік қызметшілерімен онлайн-кеңестер өткізді.Атап айтқанда, 16 шілдеде Алтай ауданы – Алтай қаласы бойынша МКБ-мен, 12 тамызда Самар ауданы бойынша МКБ және Күршім ауданы бойынша МКБ-мен, 22 қыркүйекте Катонқарағай ауданы бойынша МКБ және Тарбағатай ауданы бойынша МКБ-мен кеңестер өткізілді.Кеңестер барысында Қазақстан Республикасының «Мемлекеттік қызмет туралы», «Сыбайлас жемқорлыққа қарсы іс-қимыл туралы» заңнамаларын, Мемлекеттік қызметшілердің әдеп кодексін сақтау, сондай-ақ қызметтік тәртіпті сақтау, құқық бұзушылықтардың алдын алу және мемлекеттік органдарда темекі шегуге қарсы іс-қимыл мәселелері қаралды.Мемлекеттік қызметшілердің құмар ойындарға қатысуына, көлік құралдарын алкогольдік немесе есірткілік масаң күйде басқаруына, сондай-ақ осындай күйде қоғамдық орындарда болуына жол берілмейтініне ерекше назар аударылды.Кездесулер қорытындысы бойынша мемлекеттік қызметшілер арасында заңнама талаптары мен қызметтік әдеп нормаларын тұрақты сақтау, тәртіпті, заңдылықты және жауапкершілікті нығайту қажеттігі атап өтілді.Ақпарат көзі : https://www.gov.kz/memleket/entities/kgd-vko/press/news/details/1298100?lang=ru