Люксембург, 2025 жылғы 20 қазан – Қазақстан Республикасы Сыртқы істер министрінің орынбасары Арман Исетов Орталық Азия мемлекеттері, Шығыс серіктестік елдері, Түркия және Еуропалық одақ арасындағы инфрақұрылымдық өзара байланыс күн тәртібін ілгерілетуге арналған министрлік кездесуге қатысты.Іс-шараға ЕО мүше мемлекеттерінің, Орталық Азия, Оңтүстік Кавказ елдері мен Түркияның сыртқы істер министрлері қатысты.Кездесу барысында көлік, цифрлық трансформация, энергетика және сауда салаларындағы өңіраралық өзара байланысты нығайтуға бағытталған практикалық қадамдар талқыланды.Атап айтқанда, Транскаспий халықаралық көлік бағдарын («Орта дәліз») дамыту, инфрақұрылым желілерін жаңғырту, қолжетімді «таза» энергиямен қамтамасыз ету және цифрлық трансформацияны дамыту мәселелеріне ерекше назар аударылды.Іс-шара барысында сөз сөйлеген А. Исетов көлік саласының Қазақстан мен Еуропалық одақ және оның мүше мемлекеттері арасындағы Кеңейтілген серіктестік пен ынтымақтастық туралы келісімде көзделген 29 басым бағыттың қатарына кіретінін атап өтті. Аталған Келісімге қол қойылғанына биыл желтоқсанда 10 жыл толатыны маңызды оқиға. Бұл құжат – Қазақстан мен Еуропа арасындағы қарым-қатынастарды дамытуда берік іргетасы.Қазақстан Орталық Азиядағы ең ірі экономика және негізгі транзиттік торап ретінде өзара байланыстылық күн тәртібін ілгерілетуде жетекші рөл атқарып отырғаны баса айтылды. Еуропалық серіктестерге соңғы онжылдықта көлік-логистика инфрақұрылымын дамытуға Қазақстан салған ауқымды инвестициялар (35 млрд АҚШ доллары) және іске асырылған жобалар, сондай-ақ осы бағыттағы алдағы жоспарлар таныстырылды.Қазақстан өңірлік ынтымақтастық пен өңіраралық байланыстарды нығайтуға бағытталған практикалық шараларды әзірлеу мен іске асыруға белсенді қатысуға дайын екенін растады.Кездесуге қатысушылар көлік, энергетика және цифрлық өзара байланысты дамытуға бағытталған жобаларды жүзеге асыруды жалғастыруға уағдаласты.Ақпарат көзі : https://www.gov.kz/memleket/entities/mfa/press/news/details/1090168?lang=kk

Аддис-Абеба, 2025 жылғы 20 қазан – Қазақстан Республикасының Эфиопия Федеративтік Демократиялық Республикасындағы Төтенше және Өкілетті Елшісі Жалғас Әділбаев Африка одағы комиссиясының төрағасы Махмуд Али Юсуфқа cенім грамоталарын табыс етті.Сенім грамоталарын тапсыру рәсімі Африка одағының штаб-пәтерінде өзара құрмет пен ізгі ниет рухында өтті. Сұхбат барысында тараптар өзара мүдделі мәселелер бойынша одан әрі ынтымақтастық перспективаларын талқылады.Елші Ж.Әділбаев жылы қабылдауға алғысын білдіріп, Қазақстанның Африка елдерімен және Африка одағы құрылымдарымен, оның ішінде білім, ғылым, тұрақты даму, ЖИ, экология және «жасыл» технологиялар сияқты салалардағы әріптестік байланыстарды одан әрі нығайтуға мүдделі екенін атап өтті.Сондай-ақ, қазақстандық дипломат жаһандық ұйымдар шеңберінде және халықаралық форумдар алаңдарында, соның ішінде Қазақстанда өткізілетін іс-шараларда Қазақстан мен Африка Одағы арасындағы саяси және экономикалық диалог пен байланыстардың жалғасатынына үміт білдірді.Өз кезегінде Африка одағы комиссиясының Төрағасы М.Юсуф Елші Ж.Әділбаевты миссиясының басталуымен құттықтап, Қазақстан мен Африка Одағы арасындағы ынтымақтастықты нығайтуға бағытталған одан әрі диалог пен өзара іс-қимылға дайын екенін білдірді.М.Юсуф Орталық Азия өңіріндегі серпінді дамып келе жатқан ел ретінде Қазақстанның рөлін жоғары бағалады. Төраға Ислам Ынтымақтастығы Ұйымы аясында дамып келе жатқан Қазақстан мен Африка континенті елдері арасындағы конструктивті диалогқа назар аудара отырып, штаб-пәтері Астанада орналасқан Азық-түлік қауіпсіздігі жөніндегі Ислам ұйымындағы ынтымақтастық туралы Қазақстанның бастамасының маңыздылығын атап өтті.Кездесу соңында тараптар достық және өзара түсіністік рухында конструктивті алмасуды қолдауға және өзара тиімді байланыстарды дамытуға ниетті екендіктерін растады.Ақпарат көзі : https://www.gov.kz/memleket/entities/mfa/press/news/details/1090153?lang=kk

Люксембург, 2025 жылғы 20 қазан – Орталық Азия мемлекеттері, Шығыс серіктестігі елдері, Түркия және Еуропалық одақ арасындағы инфрақұрылымдық өзара байланыстылықты ілгерілету мәселелеріне арналған министрлік кездесуі аясында Қазақстан Республикасы Сыртқы істер министрінің орынбасары Арман Исетов Еуропалық комиссия вице-президенті – ЕО Сыртқы істер және қауіпсіздік саясаты жөніндегі жоғарғы өкілі Кая Калласпен, Халықаралық серіктестік жөніндегі еуропалық комиссары Йозеф Сикеламен және Орталық Азия жөніндегі ЕО арнайы өкілі Эдвард Стипрайспен кездесті.Сұхбаттар барысында тараптар Қазақстан мен Еуропалық одақ арасындағы өзара құрметке, сенімге және мүдделердің ортақтығына негізделген жан-жақты әрі қарқынды дамып келе жатқан ынтымақтастықты қанағаттанушылықпен атап өтті.Бұл үдерісті Қазақстан Республикасы мен Еуропалық одақ және оның мүше мемлекеттері арасындағы Кеңейтілген серіктестік пен ынтымақтастық туралы келісімнің практикалық іске асырылуы айтарлықтай ілгерілетіп отыр. Аталған құжатқа биылғы жылдың желтоқсан айында 10 жыл толады және ол Қазақстан мен Еуропалық одақ арасындағы қатынастарды сапалы жаңа деңгейге көтеруге мүмкіндік берді.Келісімде көзделген ынтымақтастықтың 29 бағытының ішінде Астана мен Брюссель көлік және логистика, стратегиялық маңызды шикізат ресурстары, «жасыл» энергетика, цифрлық трансформация, ауыл шаруашылығы, білім және ғылым салаларындағы ортақ басымдықтарды бірлесе жүзеге асырып келе жатқаны аталып өтті.А. Исетовтың айтуынша, екіжақты ынтымақтастықты нығайту Орталық Азия елдерінің Еуропалық одақпен өңіраралық өзара іс-қимылының дамуына ықпал етеді. Осы тұрғыда биылғы жылдың сәуір айында Самарқандта өткен «ОА-ЕО» саммитінің қорытындылары бойынша қол жеткізілген уағдаластықтарды тиімді іске асырудың маңызы ерекше екені ай  тылды.Қазақ дипломаты сұхбаттастарды еліміздегі негізгі реформалар бағыттарымен таныстырды. Бұл реформалар Президент Қасым-Жомарт Тоқаевтың қыркүйек айындағы «Жасанды интеллект дәуіріндегі Қазақстан: өзекті мәселелер және оны түбегейлі цифрлық өзгерістер арқылы шешу» атты жолдауында айқындалған.Тараптар сондай-ақ биік және жоғары деңгейдегі бірлескен халықаралық іс-шаралар кестесін, соның ішінде Э.Стипрайстың Астанаға алдағы сапарын талқылады.Кездесу қорытындысы бойынша тараптар қазақ-еуропалық серіктестіктің барлық бағыттары бойынша диалогты жалғастырып, бірлескен жобаларды ілгерілету жөнінде уағдаластыққа қол жеткізді.Ақпарат көзі : https://www.gov.kz/memleket/entities/mfa/press/news/details/1090121?lang=kk

Биыл облыстың агроөнеркәсіп кешенінде жалпы құны 33,5 миллиард теңгені құрайтын 17 инвестициялық жоба жүзеге асырылып жатыр. Оның ішінде 8 жоба пайдалануға берілді. Олардың қатарында сүт фермалары, қайта өңдеу зауыттары мен жылыжай кешендері бар.Бұл жобалар 500-ден астам жаңа жұмыс орнын ашуға және өңір ішінде ауыл шаруашылығы өнімдерін қайта өңдеу көлемін ұлғайтуға мүмкіндік береді.«Әрбір жаңа жоба – қосылған құн мен жергілікті өңдеу үлесін арттыруға бағытталған. Инвесторларға барлық кезеңде қолдау көрсетіледі», — деді Ғалым Тоқпейісов.Ақпарат көзі : https://www.gov.kz/memleket/entities/almobl/press/news/details/1090070?lang=kk

Аймақта ірі қара саны 621,5 мың басқа, ұсақ мал 2,68 миллионға, ал құс саны 9,29 миллион басқа жетті. 9 айда 192,8 мың тонна ет өндіріліп, өткен жылмен салыстырғанда 4 пайызға артты.Қазіргі уақытта облыста 56 тауарлы сүт фермасы және 57 бордақылау алаңы жұмыс істейді. Сондай-ақ жаңа кешендердің құрылысы жалғасуда.«Мал шаруашылығы – өңір экономикасының басты саласы. Біз фермерлерді субсидиялау және жаңа өндіріс алаңдарын ашу арқылы қолдауды жалғастырып келеміз», — деді Ғалым Тоқпейісов. Ақпарат көзі : https://www.gov.kz/memleket/entities/almobl/press/news/details/1090077?lang=kk

2024 жылы «Ауыл аманаты» бағдарламасы аясында 2,5 миллиард теңгеге 271 жоба қаржыландырылды. Ал 2025 жылы тағы 217 жобаға дәл осындай көлемде қолдау көрсетілмек.Бағдарлама ауыл тұрғындарының табысын арттыруға және шағын бизнесті дамытуға бағытталған. Ең сұранысқа ие бағыттар — мал шаруашылығы, егіншілік және ауыл шаруашылығы кооперативтерін құру.«Бұл бағдарлама ауыл тұрғындарына өз кәсібін бастауға нақты мүмкіндік беріп отыр. Соның арқасында жаңа отбасылық фермалар мен қайта өңдеу цехтары ашылуда», — деді Ғалым Тоқпейісов.Ақпарат көзі : https://www.gov.kz/memleket/entities/almobl/press/news/details/1090084?lang=kk

Өңір диқандары биыл 346,2 мың тонна астық жинады. Орташа өнімділік гектарына 26,9 центнерді құрап, өткен жылмен салыстырғанда 15 пайызға жоғары болды. Әсіресе жүгеріден алынған өнім көлемі артып, биылғы көрсеткіш 338 мың тоннадан асты. Бұл — облыс үшін жаңа рекорд.Мұндай нәтижеге инновациялық егіншілік тәсілдерін енгізу, жоғары сапалы тұқымдарды пайдалану және алқаптарды цифрлық бақылаудың арқасында қол жеткізілді. Іле және Еңбекшіқазақ аудандарында жүгерінің өнімділігі гектарына 80 центнерден асты.«Жоғары өнім — жаңа тұқым түрлерін, заманауи агротехнологияларды және дәлме-дәл егіншілік әдістерін қолданудың нәтижесі», — деді Ғалым Тоқпейісов.Ақпарат көзі : https://www.gov.kz/memleket/entities/almobl/press/news/details/1090032?lang=kk

Ауыл шаруашылығы өндірушілері 183,2 мың тонна картоп, 408,4 мың тонна көкөніс пен бақша дақылдарын жинады. Көкөністің орташа өнімділігі гектарына 263 центнерге жетіп, облыс пен Алматы қаласының ішкі сұранысын толық қамтамасыз етті.Жиналған өнім жергілікті нарықтарда сатылып қана қоймай, Жетісу және Жамбыл облыстарына да жеткізілуде. Бірқатар шаруашылықтарда көкөністі қаптау және қайта өңдеу цехтары жұмыс істейді.«Біз Алматы қаласы мен облыстың қажеттілігін толық қамтып отырмыз. Артық өнім өзге өңірлерге жөнелтіліп, фермерлерге қосымша табыс әкелуде», — деді басқарма басшысы.Ақпарат көзі : https://www.gov.kz/memleket/entities/almobl/press/news/details/1090049?lang=kk

Қазір облыста жалпы аумағы 79,2 гектарды қамтитын 48 жылыжай кешені жұмыс істейді. Биыл бұл шаруашылықтар 13,8 мың тонна көкөніс өндірді. Оның 8,2 мың тоннасы – қызанақ, 4,4 мың тоннасы – қияр.Өнімнің негізгі бөлігі Алматы қаласы мен көршілес аудандарға жеткізіледі. Бұл өңірдің қыс-көктем айларындағы импортқа тәуелділігін азайтады. Сарапшылардың болжамынша, 2026 жылы жылыжай өнімінің көлемі 15 пайызға артады.«Жылыжай шаруашылығын дамыту — басым бағыттардың бірі. Біз фермерлерге жыл бойы жаңа піскен өнім өндіруге жағдай жасап отырмыз», — деді Ғалым Тоқпейісов.Ақпарат көзі : https://www.gov.kz/memleket/entities/almobl/press/news/details/1090052?lang=kk

Бүгінде Алматы облысында 24,4 мың гектар жерге тамшылатып және жаңбырлатып суару жүйелері орнатылған. Жыл соңына дейін бұл көрсеткіш 31,6 мың гектарға жеткізіледі. Нәтижесінде суды пайдалану тиімділігі 25 пайызға артады.Су үнемдеу технологиялары Еңбекшіқазақ, Кеген және Талғар аудандарында белсенді енгізілуде. Мамандардың айтуынша, мұндай жүйелер суды 30–40 пайызға үнемдеп, өнімділікті арттырады.«Су ресурстарын тиімді пайдалану — басты міндет. Мемлекеттік субсидиялар мен оқыту бағдарламаларының арқасында фермерлер су үнемдеуді тұрақты тәжірибеге айналдырып келеді», — деді басқарма басшысы.Ақпарат көзі : https://www.gov.kz/memleket/entities/almobl/press/news/details/1090061?lang=kk

Люксембург, 2025 жылғы 20 қазан – Люксембург Ұлы Герцогтігіне жұмыс сапары аясында Қазақстан Республикасы Сыртқы істер министрінің орынбасары Арман Исетов Люксембург Сыртқы және еуропалық істер министрлігінің Бас хатшысы Жан Олинжемен келіссөздер жүргізді.Тараптар екіжақты өзара іс-қимылдың қазіргі жағдайы мен перспективаларын талқылап, саяси диалогты дамытуға, сондай-ақ экономикалық және мәдени салалардағы ынтымақтастықты кеңейтуге ерекше назар аударды.Ерекше көңіл Қазақстан Президенті Қасым-Жомарт Тоқаев пен Люксембург Премьер-министрі Люк Фриденнің 2025 жылғы 23 қыркүйекте Нью-Йоркте өткен БҰҰ Бас Ассамблеясының 80-сессиясы аясындағы кездесуі барысында қол жеткізілген уағдаластықтарды іске асыру мәселелеріне бөлінді. А. Исетов бұл кездесудің екіжақты қатынастарға жаңа серпін бергенін және ынтымақтастықты одан әрі дамытуға мүмкіндік ашқанын атап өтті.Министрдің орынбасары Қазақстан мен Еуропалық одақтың Кеңейтілген серіктестік пен ынтымақтастық туралы келісімге қол қойғанына 10 жыл толғанын ескере отырып, Люксембургті Еуроодақтағы маңызды серіктес ретінде қарастыратынын атап өтті. Екі ел арасындағы өзара іс-қимыл әлеуеті жасыл технологиялар, цифрландыру, жаңартылатын энергия, фармацевтика және ауыл шаруашылығы сияқты бағыттарды қамтиды.Өз кезегінде Ж. Олинже Қазақстанның өңірлік тұрақтылықты нығайтудағы күш-жігерін жоғары бағалап, Люксембургтің елімізді Орталық Азиядағы сенімді серіктес ретінде қарастыратынын атап өтті. Ол ЕО мен халықаралық ұйымдар, соның ішінде БҰҰ аясындағы өзара іс-қимылды жалғастыруға, сондай-ақ экономикалық және гуманитарлық байланыстарды кеңейтуге бағытталған бірлескен бастамаларды қолдауға дайын екенін білдірді.Келіссөздердің қорытындысы бойынша тараптар саяси диалогты одан әрі дамытуға, сауда-экономикалық ынтымақтастықты арттыруға және екі елдің сыртқы саяси ведомстволары арасындағы байланыстарды нығайтуға өзара мүдделілік бар екенін растады.Анықтама: 2025 жылғы қаңтар-тамыз айларында Қазақстан мен Люксембург арасындағы тауар айналымы 13,6 млн АҚШ долларын құрады, негізінен Люксембургтен импорт есебінен. 2024 жылы тауар айналымы 19,54 млн доллар құрады (экспорт – 36,5 мың, импорт – 19,5 млн). 2024 жылы Люксембургтен Қазақстанға тікелей шетелдік инвестициялар жалпы ағыны 520,5 млн долл., ал 2023 жылы – 424,5 млн долл. құрады. 2005 жылдан 2025 жылдың екінші тоқсанына дейінгі кезеңде инвестициялардың жалпы көлемі 3,5 млрд доллар құрады. Қазақстанда люксембургтік капиталдың қатысуымен 68 кәсіпорын жұмыс істейді.Ақпарат көзі : https://www.gov.kz/memleket/entities/mfa/press/news/details/1089545?lang=kk

Люксембург, 2025 жылғы 20 қазан – Қазақстан Республикасы Сыртқы істер министрінің орынбасары Арман Исетов Еуропалық инвестициялық банктің (ЕИБ) Бас директоры Эндрю МакДауэллмен кездесу өткізді.Кездесу барысында тараптар Қазақстан мен Еуропалық инвестициялық банк арасындағы ынтымақтастықтың қазіргі ахуалы мен оны кеңейту келешегін, соның ішінде бірлескен инфрақұрылымдық, энергетикалық және цифрлық жобаларды талқылап, сыни шикізат материалдары саласындағы қазақстандық-еуропалық стратегиялық серіктестікті іске асыру мәселелерін талқылады.Атап айтқанда, тараптар Транскаспий халықаралық көлік бағытын («Орта дәлізді») дамыту жөніндегі бірлескен бастамаларды, соның ішінде ЕИБ және Қазақстан, Қырғызстан, Өзбекстан үкіметтері, сондай-ақ Қазақстанның Даму банкі арасында жасалған 1,47 млрд еуро көлеміндегі өзара түсіністік туралы меморандумның іске асырылу барысын қарастырды.Таза энергетика және сыни шикізат салаларындағы ынтымақтастыққа аса назар аударылды. А.Исетов 2025 жылғы 9-10 қазанда Брюссельде өткен «Global Gateway» форумының аясында Қазақстан Энергетика министрлігі мен Еуропалық инвестициялық банк арасында «Қамбар ата-1» су электр станциясы жобасы бойынша өзара түсіністік туралы меморандумға қол қойылғанын құптады.Сондай-ақ 2025-2026 жылдарға арналған Қазақстан – Еуропалық Одақ арасындағы сыни шикізат материалдары жөніндегі бірлескен жол картасын іске асыру шеңберінде Еуропалық инвестициялық банктің қазақстандық «Sarytogan Graphite» және «ЖезқазғанРедМет» компанияларымен келіссөздерінің ілгерілеуі аталып өтті.Сонымен қатар цифрландыру және инновациялар саласындағы ынтымақтастық мүмкіндіктері талқыланды. Қазақстан «Alem.AI» халықаралық орталығын құруды және кедендік-логистикалық қызметтерді автоматтандыруға бағытталған ұлттық «Smart Cargo» цифрлық платформасын қоса алғанда жасанды интеллектті дамыту жөніндегі бастамаларын таныстырды.Осы тұрғыда қазақ тарапы Еуропалық инвестициялық банкке цифрлық жобаларды қолдағаны үшін ризашылығын білдірді, оның ішінде банктың Люксембургтік «SES» компаниясымен бірлесіп Қазақстанның 600-ден астам ауылдық елді мекенін интернет желісіне қосу жөніндегі бастаманы қаржыландыруға қатысуын атап өтті.Кездесу қорытындысы бойынша ынтымақтастықты одан әрі нығайтуға және өңірдің орнықтылығын, энергетикалық және көлік өзара байланысын арттыруға бағытталған нақты инвестициялық жобаларды іске асыруға өзара мүдделілік білдірілді.Ақпарат көзі : https://www.gov.kz/memleket/entities/mfa/press/news/details/1089470?lang=kk

Жұмыс сапары аясында Алматы облысының әкімі Марат Сұлтанғазиев Талғар, Қарасай және Іле аудандарында болып, өңірдің әлеуметтік-экономикалық даму барысымен және инфрақұрылымдық жобалардың жүзеге асырылуымен танысты. Өңір қызметінің басым бағыттарының бірі – құрылыс саласын дамыту және тұрғындарды қолжетімді әрі жайлы баспанамен қамтамасыз ету болып табылады.Облыстың барлық аудандарында тұрғын үй құрылысы қарқынды дамып келеді. 2025 жылдың тоғыз айының қорытындысы бойынша құрылыс саласындағы жұмыс көлемі 21,1%-ға артқан. Бұл көрсеткіш өңірде инфрақұрылымдық бағдарламалардың белсенді орындалып жатқанын және инвестициялық белсенділіктің жоғары деңгейін көрсетеді. Соңғы үш жылда Алматы облысында 177 мың шаршы метр тұрғын үй пайдалануға берілді. Ірі құрылыс жобалары Қонаев қаласында, сондай-ақ Іле, Қарасай және Талғар аудандарында жүзеге асырылуда.Мәселен, Қонаев қаласында инженерлік инфрақұрылыммен толық қамтылған жаңа шағын аудандар салынды. Іле ауданында шамамен 600 отбасы жаңа пәтерлерге қоныстанды. Сонымен қатар, Қарасай мен Талғар аудандарында тұрғын үй, әлеуметтік және коммерциялық нысандардың құрылысы жүргізілуде.Әлеуметтік жағынан осал азаматтарды баспанамен қамту мәселесіне де ерекше көңіл бөлінуде. Соңғы жылдары бұл санаттағы азаматтарға 235 пәтер берілді, жұмыс бұл бағытта жалғасуда.Жұмыс сапары барысында Марат Сұлтанғазиев Іле ауданында салынып жатқан ZERGER тұрғын үй кешенінің құрылыс барысымен танысты. «Монолит» компаниялар тобы жүзеге асырып жатқан бұл жоба өңірдегі ең ірі құрылыс жобаларының бірі болып табылады. Кешен құрамына 46 үй және 1372 пәтер кіреді, құрылыста шамамен 250 маман еңбек етуде.Тұрғын үй кешені заманауи технологиялар мен сапалы материалдарды пайдалану арқылы, барлық нормативтік талаптарға сай салынуда. Аумақта демалыс аймақтары, 360 метрлік жаяу және жүгіру аллеясы, автотұрақ және бейнебақылау жүйесі қарастырылған. Мұндай жобалар тұрғындарға жайлы әрі қауіпсіз өмір сүру ортасын қалыптастырып, құрылыс саласының дамуына және жаңа жұмыс орындарының ашылуына ықпал етеді.Айта кету керек, «Монолит» компаниялар тобы әлеуметтік жауапкершілік қағидаттарын белсенді түрде жүзеге асырып келеді және өңірдің дамуына өз үлесін қосуда. Өткен жылы компания өз қаражаты есебінен олимпиада жүлдегері мен оның жаттықтырушысына екі жаңа пәтер сыйға тартты.Халықты тұрғын үймен қамтамасыз ету – Алматы облысы әкімдігінің басты әлеуметтік басымдықтарының бірі. 2025 жылы өңірде 960 мың шаршы метр тұрғын үй салу жоспарланған, оның 901,5 мың шаршы метрі немесе 93,9% пайдалануға берілді. Бұл өткен жылмен салыстырғанда 116% артық көрсеткішті құрап, өңірдің құрылыс саласының тұрақты дамып келе жатқанын дәлелдейді.Ақпарат көзі : https://www.gov.kz/memleket/entities/almobl/press/news/details/1089311?lang=kk

Астана, 2025 жылғы 15 қазан – Қазақстан Республикасы Сыртқы істер министрінің бірінші орынбасары Ержан Ашықбаев «Поляризациядан серіктестікке: халықаралық жүйеге сенімді қалпына келтіру» тақырыбында өткен Astana Think Tank Forum 2025 (ATTF) жұмысына қатысты.«Жол тоғысындағы көпжақтылық: бөлінген әлемде жаһандық басқаруды реформалау» атты бірінші сессияда сөйлеген сөзінде Е.Ашықбаев халықаралық поляризацияның күшеюі жағдайында «сындарлы консенсус» құру және көпжақтылықты нығайту қажеттігін атап өтіп, тұрақтылықты, бейбітшілікті және тұрақты дамуды қолдаудағы «орта державалар» рөлінің артып келе жатқанын атап өтті.Ол сондай-ақ БҰҰ Қауіпсіздік Кеңесін реформалаудың, аймақтық ынтымақтастық форматтарын нығайтудың және жасанды интеллектті реттеуге жауапкершілікпен қарауға ықпал етудің маңыздылығына тоқталды. Қазақстанның 2060 жылға қарай көміртегі бейтараптығына қол жеткізу және Орталық Азиядағы трансконтиненталдық байланысты нығайту жөніндегі күш-жігеріне ерекше назар аударды.Осы тұрғыда Е.Ашықбаев Қазақстан Еуразия аясындағы өзара тиімді байланыстарды дамытуға және Орталық Азия елдері мен олардың сыртқы серіктестері арасында мүдделер синергиясын құруға негізделген аймақтың одан әрі дамуының пайымдауын дәйекті түрде нығайтуда екенін атап өтті.ATTF халықаралық күн тәртібіндегі өзекті мәселелерді талқылауға арналған беделді сараптама алаңы болып табылады. Астанада үшінші рет өткізіліп отырған форум 20 елден 40-қа жуық халықаралық сарапшылардың, жетекші сараптама орталықтарының басшыларының, зерттеушілердің басын қосты.Ақпарат көзі : https://www.gov.kz/memleket/entities/mfa/press/news/details/1089071?lang=kk

Астана, 2025 жылғы 17 қазан – Біріккен Ұлттар Ұйымы күні мен оның 80 жылдығына орай Қуанышбаев атындағы Қазақ мемлекеттік академиялық музыкалық-драма театрында салтанатты концерт өтті. Іс-шараны Қазақстан Республикасының Сыртқы істер министрлігі Қазақстандағы БҰҰ Елдік тобымен бірлесіп ұйымдастырды.Кешке мемлекеттік органдардың, дипломатиялық корпус пен халықаралық ұйымдардың өкілдері, азаматтық қоғам мен жастар қауымы қатысты.Өз сөзінде Қазақстан Республикасы Сыртқы істер министрінің бірінші орынбасары Ержан Ашықбаев Қазақстанның БҰҰ Жарғысына деген берік бейілділігін және оның халықаралық бейбітшілікті, қауіпсіздікті және тұрақты дамуды сақтаудағы орталық рөлін ерекше атап өтті.Ол Мемлекет басшысы Қасым-Жомарт Тоқаевтың БҰҰ Бас Ассамблеясының 80-сессиясындағы сөзінде Біріккен Ұлттар Ұйымының жаһандық сын-қатерлерге қарсы тұру және халықаралық ынтымақтастықты нығайту ісіндегі шешуші рөлін атап өткенін еске салды.Е.Ашықбаев Қазақстанда БҰҰ жүйесіне кіретін 27 агенттік пен мекеме жұмыс істейтінін және Алматыдағы БҰҰ Орталық Азия мен Ауғанстан бойынша Орнықты даму жөніндегі өңірлік орталығының маңыздылығын атап өтті.Өз кезегінде Қазақстандағы БҰҰ-ның Тұрақты үйлестірушісі Саранго Раднарагча бейбітшілік, орнықты даму және адам қадір-қасиеті жолындағы бірлескен күш-жігердің маңыздылығын атап өтіп, БҰҰ мен Қазақстан арасындағы серіктестіктің жоғары деңгейін және 2030 жылға дейінгі Орнықты даму күн тәртібін іске асырудағы нәтижелі ынтымақтастықты ерекше айтты.Дирижёр Ернар Нұртазиннің жетекшілігімен Еркеғали Рахмадиев атындағы академиялық симфониялық оркестрдің өнер көрсетуі кештің ерекшелігі болды. Классикалық және заманауи шығармалардан құралған музыкалық бағдарлама көрермендердің ыстық ықыласына бөленді.Іс-шара аясында, сондай-ақ Біріккен Ұлттар Ұйымының 80 жылдығына арналған «Қазпошта» АҚ-пен бірлесіп шығарылған UN80 мерейтойлық пошта маркасының тұсаукесері өтті. Марка бірлік, ынтымақтастық және орнықты даму құндылықтарына бейілділікті бейнелейді. Ақпарат көзі : https://www.gov.kz/memleket/entities/mfa/press/news/details/1089016?lang=kk

Бүгінгі таңда туризм саласы – экономиканың сауда, қоғамдық тамақтандыру және қонақүй қызметі сияқты өзге де салаларының дамуына тікелей ықпал ететін, болашағы зор бағыттардың бірі болып табылады.Ағымдағы жылдың бірінші жартыжылдығының қорытындысы бойынша орналастыру орындары ұсынған қызметтердің көлемі 2,0 млрд теңгені құрап, өткен жылдың сәйкес кезеңімен салыстырғанда 33,2%-ға артты.Облысқа келген қазақстандық туристердің саны 121,9 мың адамды құрады, бұл 2024 жылдың осындай кезеңімен салыстырғанда 27%-ға көп. Шетелдік туристер саны 6,0 мың адамға жетіп, өткен жылмен салыстырғанда 3%-ға өсті.Қазіргі уақытта облыс аумағында 2 шипажай, 1 оңалту орталығы, 94 қонақүй, 2 мотель, 4 хостел, 22 демалыс базасы мен аймағы қызмет көрсетуде.Туристердің ерекше қызығушылығын тудыратын нысандар қатарында «Сосновый бор» шипажайы, Наурызым қорығы және Therma Park кешені бар.Туризмді дамытудың маңызды бөлігі – санаторий-курорттық демалыс. Қазіргі таңда облыста екі шипажай жұмыс істейді.Негізінен емдік-сауықтыру бағытындағы нысандар Алтынсарин ауданының курорттық аймағында орналасқан. Олардың қатарында «Сосновый бор» шипажайы, «Жайлау» сауықтыру-демалыс кешені, «Мюнхен» және «Бордағы ауыл» демалыс базалары бар. Бұл шипажайлар минералды көлдердің жағасында, сульфатты балшықтары мен қылқан жапырақты ормандары бар өңірде орналасқан. Мұнда емдік, диагностикалық және профилактикалық қызметтердің кең ауқымы, су және балшықпен емдеу, климатотерапия, сондай-ақ түрлі сауықтыру және спорттық-демалыс қызметтері көрсетіледі.Therma Park СПА-кешені Қостанай қаласында орналасқан. Жалпы ауданы 18 000 шаршы метрден асатын бұл ерекше сауықтыру орталығында 24 монша-бассейн кешені, 5 бассейн (оның ішінде ашық аспан астындағы екі термалды бассейн), 2 джакузи және 4 офуро бар. Кешеннің жалпы сыйымдылығы 1 600 адамды құрайды.Сонымен қатар, облыста емдік-сауықтыру туризміне арналған басқа да қызықты орындар бар. Солардың бірі – Меңдіқара ауданындағы Қарабаев атындағы оңалту орталығы, ол күрделі жөндеуден кейін өз жұмысын қайта бастады.Экологиялық туризм бағыты бойынша облыстың ең көрнекті табиғи нысандарының бірі – Наурызым мемлекеттік табиғи қорығы. Ол ЮНЕСКО-ның мәдени мұралар тізіміне енгізілген. Қорықтың бай флорасы мен фаунасы, табиғатының қол тимеген сұлулығы аймақта экотуризмді дамытуға зор мүмкіндік береді. Қорық аумағында 6 экскурсиялық маршрут жұмыс істейді.Сонымен қатар, облыс аумағында ғылым мен туризм өкілдерінің үлкен қызығушылығын тудырып отырған Торғай геоглифтері орналасқан. Ең белгілілері – «Торғай трикветрі» мен «Үштоғай квадраты».Облыс қонақтары мен тұрғындары үшін қызықты табиғи нысандардың бірі – аудан кіреберісіндегі «Күмкешу» жылжымалы бархандары.Туризм саласы өңірде әлі кеңінен танымал болмаса да, бұл бағыт біртіндеп дамып келеді: жаңа әуе бағыттары ашылып, инвестициялық жобалар жүзеге асырылуда. Солардың бірі – Амангелді ауданында салынып жатқан көпфункционалды туристік кешен. Кешен аумағында әлемнің әйгілі сәулет ескерткіштерінің көшірмелері – Үндістандағы Тәж-Махал, Мексикадағы Чичен-Ица, Эйфель мұнарасы, сондай-ақ 200 танымал қазақстандық тұлғаның есімі жазылған Ұлттық жады қабырғасы орналасқан. Туристердің жайлылығы үшін мұнда қонақүй, мейрамхана, спорт және балалар алаңдары салынған.Денисов ауданында күнделікті күйбең тіршіліктен алшақ демалуға арналған «Шаңырақ» демалыс базасы салынуда. Ол Тобыл өзенінің бойында, Жоғарғы Тобыл су қоймасы аумағында орналасқан. Қазіргі уақытта жобаның алғашқы кезеңі аяқталды: екі жайлы жағажай (көлеңкелі және балалар аймақтарымен), жүзу пирсі, катамаран жалға беру пункті, жыл бойы демалуға арналған 6 жайлы үй және 8 гриль аймағы салынды.Қостанай қаласының әуежай аумағында бұрынғы жатақхана ғимараты қонақүйге қайта жаңартылуда, ал Алтынсарин ауданында «Green House» демалыс аймағының құрылысы жүргізілуде.2024 жылы Алтынсарин ауданында «MUNCHEN» демалыс базасы салынды, ал Арқалық қаласында бұрынғы автобекет ғимараты қонақүй кешені мен мейрамханаға айналдырылды.Сонымен қатар, Қостанай қаласында «Сегізаяқ» аквапаркын қайта жаңарту жобасы іске қосылды. Жобаның қуаттылығы – 1 200 адам.Ақпарат көзі : https://www.gov.kz/memleket/entities/kostanay/press/news/details/1088988?lang=kk

Іле ауданының тұрғындары Алматы облысының әкімі Марат Сұлтанғазиевпен өткен есептік кездесуде өңірдің өзекті мәселелерін көтерді. Іс шара 17 қазанда Өтеген батыр ауылындағы Мәдениет үйінде өтті.Кездесуге ауданның түрлі саласында еңбек ететін азаматтар — кәсіпкерлер, фермерлер, педагогтар, депутаттар, мәдениет және кітапхана қызметкерлері, сондай-ақ белсенді тұрғындар қатысты. Әкім мен тұрғындар арасындағы диалог мазмұнды әрі конструктивті өтті.Кездесу барысында 40-тан астам сұрақ қойылды. Оның ішінде:20%–ы жолдар мен көше жарығына қатысты;18%–ы білім саласы, үш ауысымды мектептер мен оқу кабинеттерінің жетіспеушілігі туралы;15%-ы тұрғын үй-коммуналдық шаруашылығы;10%-ы денсаулық сақтау және санитарлық қауіпсіздік;қалған 37%-ы абаттандыру, қоғамдық көлік және экология мәселелерін қамтыды.Жергілікті халық нақты ұсыныстарын да жеткізді. Атап айтқанда, «Сокол» саяжай алабында мектеп салу, Өтеген батыр ауылында музыкалық мектеп ашу, Боралдай кентінде жаңа Мәдениет үйін тұрғызу және бірқатар ауылдық округтерде дәрігерлік амбулатория ашу ұсынылды.Сондай-ақ, Қараой ауылдық округінің тұрғындары сібір жарасы ошағы анықталған жағдай бойынша санитарлық-эпидемиологиялық бақылау шаралары жайында түсіндіру жұмыстарын сұрады.Марат Сұлтанғазиев әрбір көтерілген мәселеге жеке тоқталып, толыққанды жауап берді.«Кездесу қорытындысы бойынша нақты мерзімі мен жауапты тұлғалары көрсетілген іс-шаралар жоспары әзірленеді. Тұрғындардың барлық өтініштері аудан мен облыс әкімдіктерінің басым бағытына енгізіледі», — деді облыс әкімі.Сондай-ақ ол мұндай кездесулердің барлық аудандарда өтіп жатқанын атап өтті.«Мұндай кездесулер халықтың өтініш-тілектеріне жедел жауап беруге, олардың пікірін тікелей естуге және өңірді дамыту жоспарларын нақтылауға мүмкіндік береді», — деді Марат Сұлтанғазиев.Кездесуден кейін өткен жеке қабылдауда 12 тұрғынның өтініші тыңдалды. Барлығы 24 әлеуметтік, инфрақұрылымдық және коммуналдық сипаттағы мәселе қаралды.Ақпарат көзі : https://www.gov.kz/memleket/entities/almobl/press/news/details/1088915?lang=kk

Астана, 2025 жылғы 17 қазан – Кипр тарапының бастамасымен Қазақстан Республикасының Сыртқы істер министрі Ермек Көшербаев Кипр Республикасының Сыртқы істер министрі Константинос Комбоспен телефон арқылы сөйлесті.Келіссөздер барысында К.Комбос қазақ әріптесін тағайындалуымен құттықтап, Қазақстан мен Кипр сыртқы саяси ведомстволар басшылығының арасындағы тұрақты және сындарлы диалогтың сақталуына үміт білдірді.ҚР СІМ басшысы көлік, логистика, цифрландыру, ауыл шаруашылығы, туризм және білім беру сияқты салалардағы ынтымақтастықтың елеулі әлеуетін назарға алып, Қазақстанның Кипрмен серіктестік қатынастарды үдемелі түрде нығайтуға мүдделілігін атап өтті.Осы тұрғыда тараптар саяси, сауда-экономикалық, инвестициялық және мәдени-гуманитарлық салалардағы қазақ-кипр ынтымақтастығының қазіргі жағдайы мен одан әрі даму перспективаларын талқылап, халықаралық күн тәртібі және халықаралық пен өңірлік ұйымдар аясындағы екі елдің өзара іс-қимылының өзекті мәселелері бойынша пікір алмасты.Өз кезегінде К.Комбос Кипр тарапының саяси диалогты тереңдетуге, іскерлік байланыстар мен алмасуларды кеңейтуге дайындығын растады, сондай-ақ Қазақстанның Орталық Азиядағы Кипрдің негізгі серіктесі ретіндегі өсіп келе жатқан рөлін атап өтті.Сұхбат қорытындысы бойынша сыртқы саяси ведомстволардың басшылары сындарлы диалогты жалғастыруға және екіжақты ынтымақтастықты одан әрі нығайтуға деген өзара көзқарасты растады.Ақпарат көзі : https://www.gov.kz/memleket/entities/mfa/press/news/details/1088423?lang=kk

Алматы облысының егіншілері мен фермерлері мегаполис тұрғындарына 200 тоннадан астам жаңа және экологиялық таза ауыл шаруашылығы өнімдерін ұсынады. Сауда сөрелеріне ет, балық, сүт өнімдері, көкөніс, жеміс-жидек, бал, күріш, жұмыртқа және аймақтан өндірілген өзге де тауарлар шығарылады.Ауқымды ауыл шаруашылығы жәрмеңкесі қазанның 18–19 күндері Алматы қаласында, Қазыбек би көшесінде (Абылай хан даңғылынан Панфилов көшесіне дейін, КБТУ төменгі жағында) өтеді. Бұл шара қала тұрғындары мен қонақтары үшін сапалы әрі табиғи өнімдерді нарық бағасынан 15%-ға арзан сатып алуға тамаша мүмкіндік болмақ.Жәрмеңкеге жалпы 16 тонна ет, 1,6 тонна сүт өнімдері, 18,6 тонна картоп, 19,5 тонна пияз, 36,2 тонна түрлі көкөніс, 6 тонна күріш, 3,3 тонна бал, 26 тонна алма мен жеміс-жидек, сондай-ақ 50,5 тонна басқа да өнім жеткізіледі.Іс-шара Алматы облысы мен Алматы қаласы әкімдіктерінің қолдауымен ұйымдастырылып отыр. Жәрмеңкенің басты мақсаты — отандық өндірушілерді қолдау, ішкі нарықты дамыту және тұрғындарды қолжетімді әрі сапалы ауыл шаруашылығы өнімдерімен қамтамасыз ету.Ақпарат көзі : https://www.gov.kz/memleket/entities/almobl/press/news/details/1088339?lang=kk

Бүгін Кеген ауданында Орман шаруашылығы қызметкерлерінің күніне арналған салтанатты жиын өтті.Іс-шараға орман саласының ардагерлері мен еңбеккерлері, облыстық және аудандық мекемелердің өкілдері қатысты.Мереке барысында орман саласында ұзақ жылдар бойы адал еңбек етіп, табиғатты қорғауға зор үлес қосқан қызметкерлер Министрлік пен облыс әкімі атынан Құрмет грамоталары мен Алғыс хаттармен, сондай-ақ «Қазақстан орманын қорғаудағы мінсіз қызметі үшін» төсбелгілерімен марапатталды.Барлығы 25 орманшы І, ІІ және ІІІ дәрежелі төсбелгі иегері атанды.Сондай-ақ, жиын аясында Кеген орман шаруашылығының жаңа ғимаратының тұсаукесері өтті. Бұл жаңа нысан — заманауи талаптарға сай, қызметкерлердің тиімді жұмыс істеуіне арналған кеңсе.Өз баяндамасында облыс әкімінің орынбасары Бақытнұр Бақытұлы орман саласының ел экологиясы үшін маңыздылығын атап өтті: «Орманшы – табиғатты сүйіп қана қоймай, оны сақтай білетін адам. Мемлекет басшысының 2 миллиард ағаш отырғызу тапсырмасын орындауда Алматы облысы ерекше белсенділік танытып келеді», — деді ол.Биыл облыстың орман мекемелерін жаңа техникамен қамтамасыз ету үшін 217,9 миллион теңге бөлініп, патрульдік автокөліктер, тракторлар, экскаваторлар мен мотоциклдер сатып алынды.Сонымен қатар, 829 миллион теңгеге 26 өртке қарсы техника алу жұмыстары жүргізілуде. Орман өртінің алдын алу мақсатында жоғары қауіпті аймақтарға 18 бейнебақылау камерасы орнатылды. Бұл камералар нақты уақыт режимінде жұмыс істеп, өртті ерте анықтауға мүмкіндік береді.Салтанатты жиын соңы жылы лебіздер мен кәсіби мерекеге арналған құттықтауларға ұласты.Барлық марапат иелерін құттықтай отырып, табиғатты қорғау жолындағы еңбектеріне табыс тілейміз!Ақпарат көзі : https://www.gov.kz/memleket/entities/almobl/press/news/details/1088110?lang=kk