ҚР Еңбек және халықты әлеуметтік қорғау вице-министрі Асқар Биахметов Ақмола облысына жұмыс сапары барысында кәсіпкерлікті қолдау бойынша түрлі бағдарламалардың қатысушыларымен, өңір тұрғындарымен кездесіп, азаматтарды жеке мәселелері бойынша қабылдады, сондай-ақ әлеуметтік және білім беру объектілерін аралады.Вице-министрдің алғашқы барған нысаны Қатаркөл ауылындағы ірімшік зауыты болды, оның иесі «Ауыл аманаты» бағдарламасы шеңберінде өз қызметін дамытуға қолдау алды. Өткен жылы өңірде осы бағдарлама шеңберінде бизнесті ашуға немесе кеңейтуге және жаңа жұмыс орындарын құруға бағытталған 200-ге жуық микрокредит берілді, осылайша ауылдық жерлерде халықтың табысын арттырды.Осыдан кейін Асқар Биахметов «Бастау бизнес» жобасы бойынша бөлінген қаражатқа оқығаннан кейін жұмыспен қамтуға жәрдемдесудің белсенді шараларын көрсету шеңберінде грант алған Сара Тайжановамен кездесті.Грант 2023 жылы берілді, сонда облыс бойынша барлығы 178 алушы болды. Ағымдағы жылы өңірде 168 грант берілді.Вице-министр кәсіпкермен сөйлескеннен кейін Көкшетау қаласына барып, азаматтарды жеке мәселелері бойынша қабылдады, содан кейін Ақмола облысының тұрғындарымен кездесті.Өз сөзінде ол Мемлекет басшысының 2025 жылды Жұмысшы кәсіптер жылы деп жариялағанын еске салды, бұл кәсіптік білім беру сапасын арттыруға, жұмысшы кәсіптердің мәртебесі мен беделін арттыруға кешенді бағытталғандығын білдіреді.«Экономика салалары бөлінісінде кәсіптік техникалық білімі бар жұмыскерлердің ең көп саны сауда, өнеркәсіп, ауыл шаруашылығы, көлік және қоймалау салаларында басым, жалпы саны шамамен 2,5 млн адамды құрайды.Ең көп сұранысқа ие жұмысшы мамандықтардың қатарында – дәнекерлеушілер, электромеханиктер, ауыл шаруашылығы жұмыскерлері, слесарлар, электромонтерлер, сумен, жылумен және энергиямен жабдықтау саласындағы мамандықтар бар», – деп атап өтті Асқар Биахметов.Ол сондай-ақ білім беру жүйесінде кадрларды даярлау бағдары ретінде пайдаланылатын жұмысшы кәсіптердің басым тізімі тұрақты негізде қалыптастырылатынын хабарлады. Ал жаңа білім беру бағдарламаларын әзірлеу және қолданыстағы білім беру бағдарламаларын жаңғырту кәсіптік стандарттар негізінде жүргізілетін болады, бұл кадрларды даярлауды жұмыс берушілердің қажеттіліктеріне жақындатады.Вице-министр ақмолалықтарды «Әлеуметтік әмиян» жобасының жүзеге асырылуы туралы хабардар етті. Министрлік осы төлем құралын Отбасының цифрлық картасымен интеграциялауды жүргізеді.«Бұл болашақта әлеуметтік көмекке мұқтаж отбасыларды анықтауға және оларға проактивті форматта уақтылы мемлекеттік қолдау шараларын көрсетуге мүмкіндік береді.2025 жылдан бастап тегін ыстық тамақ, дәрі-дәрмекпен қамтамасыз ету, мектепке дейінгі білім беру бойынша ваучерлер беру бойынша мемлекеттік қолдау оған шынымен мұқтаж азаматтарға бағытталатын болады. Бұған азаматтардың нақты табысы негізінде Әлеуметтік әмиян арқылы қол жеткізіледі», – деп атап өтті Биахметов.Отбасының цифрлық картасы туралы айта отырып, вице-министр онда елдің барлық халқы туралы мәліметтер жиналғанын еске салды. Базада әр отбасының аумақтық орналасуы, әлеуметтік-экономикалық және тұрғын үй жағдайлары, денсаулық сақтау, білім беру, әлеуметтік қорғау қызметтеріне қажеттіліктер және т. б. туралы мәліметтер бар. «ОЦК отбасының осалдықтары мен тәуекелдерін анықтауға, әл-ауқат индексін анықтауға, өмірлік қиын жағдай деңгейін бағалауға мүмкіндік береді. Қолда бар деректер бойынша Ақмола облысында орташа жалақы – 269 мың теңгені құрайды. Бұл көрсеткіш еліміз бойынша – 344 мың теңге», – деп түйіндеді вице-министр.Ол сондай-ақ мемлекеттің әлеуметтік міндеттемелерінің орындалуы, зейнетақы мен жәрдемақы төлеу бойынша негізгі көрсеткіштер, балалы отбасылардың құқықтары мен мүдделерін қорғау бойынша жүргізіліп жатқан жұмыстар, арнаулы әлеуметтік қызметтер көрсету жүйесін жаңғырту туралы айтып берді.Күннің екінші жартысында Асқар Биахметов Көкшетау қаласының «Аяла» арнайы балабақшасы» КММ жұмысымен танысты, онда ерекше білім беру қажеттіліктері бар балаларды мектепке дейінгі тәрбиелеу және оқыту жүзеге асырылады. Мекемеде балалардың психофизикалық даму ерекшеліктерін ескере отырып, кешенді емдеу, түзету және әлеуметтік бейімделу, тәрбиелеу және оқыту үшін жағдайлар қамтамасыз етілген, сондай-ақ отбасы жағдайында ерекше білім беру қажеттіліктері бар балаларды тәрбиелеу мәселелері бойынша ата-аналарға кеңес беру және оқыту жүзеге асырылады.Жұмыс сапарының соңында вице-министр Жоғары техникалық колледжге барды, онда 21 мамандық және 38 біліктілік бойынша, оның ішінде гибридті және электромобильдерді диагностикалау және оларға қызмет көрсету, кадрлар даярлау бойынша 2,5 мыңға жуық студент оқиды.Ақпарат көзі : https://www.gov.kz/memleket/entities/enbek/press/news/details/875034

Алматы облысы қалдықтарды кәдеге жарату саласында ауқымды өзгерістерге дайындалуда. Жақында Іле ауданында тұрмыстық қатты қалдықтарды қайта өңдейтін заманауи зауыттың құрылысы басталады, бұл өңірдің экологиялық жағдайын жақсартуға жасалған маңызды қадам болмақ.Зауыт қоқыс алаңдарының қоршаған ортаға тигізетін кері әсерін айтарлықтай азайтуымен қатар, электр қуатын да өндіретін болады. Жоба жылына 350 мың тоннаға дейін қалдықты өңдеуді және 16 мегаватт электр энергиясын өндіруді көздейді.Жоба түріктің «Инева» компаниясы мен «ADC Taza Alem» ЖШС-мен бірлесіп жүзеге асырылмақ. Зауыттың сұрыптау желісі ірі құрылыс қалдықтары мен қайта өңдеуге жарамды қалдықтарды қосқанда 240 мың тонна қалдыққа есептелген. Бүгінде жоба 60 пайызға дайын. Сұрыптауға қажетті құрал-жабдықтар сатып алынып, инфрақұрылым мәселелері, оның ішінде газ және сумен қамту мәселелері шешілді.Алматы облысының әкімі Марат Сұлтанғазиев екі компания өкілдерімен кездесу барысында, жобаның өңір үшін маңыздылығына ерекше тоқталды:- Біз сіздермен ынтымақтастықтың бірнеше маңызды артықшылықтары бар деп есептейміз. Біріншіден, жоба өңіріміздің экологиялық жағдайын жақсартуға зор үлес қосады. Екіншіден, ірі инфрақұрылымдық жобаларды жүзеге асыру тәжірибесі аймақтағы жасыл экономиканы дамытуға оң әсер етеді.Жобалық қуаттылық Іле ауданындағы полигонда қазіргі және жинақталған қалдықтарды қайта өңдеуге мүмкіндік береді.«ADC Taza Alem» ЖШС бас директоры Ерлан Дүйсебаев былай деп қосты:-Біз құрылыс жұмыстарын биылғы жылдың аяғында немесе келесі жылдың басында бастауға дайынбыз. Жоба экологиялық жағынан таза және бұл Түркиядан келген инновациялық компанияның қолдауымен жүзеге асырылады. Күн сайын біз шамамен 700 тонна қалдықты өңдей аламыз, бұл бізде жиналған немесе келетін қалдық көлемдерімен күресуге мүмкіндік береді.Жобаны жүзеге асыру үшін қаржыландыру екі кезеңге бөлінеді. Индустрияны дамыту қоры арқылы қаржы бөлініп бірінші кезеңі аяқталды. Қазіргі уақытта электрмен жабдықтаудың техникалық шарттарын алу жұмыстары жүргізілуде, одан кейін жоба келесі кезеңге өтеді. Зауыттың өндірістік қуаты 16 МВт құрайды, ал алынған электр энергиясы кәсіпорынның қажеттілігіне жұмсалып, артылғаны облыстық энергетика жүйесіне жеткізіледі.«Облыста жыл сайын 450 мың тоннадан астам тұрмыстық қалдық жиналады, зауыттың салынуы жасыл экономикаға маңызды қадам болмақ», - дейді Алматы облысы энергетика және тұрғын үй-коммуналдық шаруашылық басқармасының басшысы Айдын Бегімбеков. «Бұл алдағы он жылда аймақтағы тұрмыстық қалдықтар мәселесін жояды».Жоба жылына 120 мың тонна ірі құрылыс қалдықтарын және 80 мың тонна қайталама шикізатты сұрыптауды қамтиды. Қазіргі уақытта электрмен жабдықтаудың техникалық шарттарын алу сатысында, одан кейін негізгі нысандардың құрылысы басталады.Жиында зауыттың тиімді тұстарының қатарында экологиялық және әлеуметтік-экономикалық аспектілері де атап өтілді. Кәсіпорынның құрылысы мен жұмыс істеуі отандық және шетелдік елеулі инвестицияларды тартуға мүмкіндік береді. Алматы облысы қалдықтар мәселесін мойындап, оны шешу жолдарын белсенді іздестіретін өңірдің үлгісіне айналуда.Сондай-ақ зауыт Іле өңірінде жаңа жұмыс орындарын ашып, экологиялық жағдайды жақсартып, стихиялық полигондар мен топырақтың ластануын азайтады.Жиналғандардың бәрі жобаның табысты болуы мемлекет пен бизнес өкілдерінің тығыз ынтымақтастығына байланысты екенін атап өтті. Алматы облысының әкімі айтқандай, облыс жобаны табысты жүзеге асыру үшін барлық инфрақұрылымдық және логистикалық мәселелерді шешуді, сондай-ақ инвестиция үшін қолайлы жағдай жасауға қажетті барлық қолдауды көрсетуге дайын. «Біз бұл жобаның экологиялық мәселелерді шешуде, бизнес пен биліктің табысты ынтымақтастығының қалыптасуын көздеп отырмыз», - деп атап өтті «ӘДК Таза Әлем» ЖШС-ның бас директоры Ерлан Дүйсебаев.Құрылысты аяқтау 2025 жылдың соңына жоспарланған, және қазіргі қарқынмен бұл жоба мерзімінде аяқталады деуге болады.Ақпарат көзі : https://www.gov.kz/memleket/entities/almobl/press/news/details/874784

«Еңбек ресурстарын дамыту орталығы» АҚ жұмыспен қамтудың цифрлық экожүйесін дамыту бойынша жұмысты жалғастыруда. Осылайша, Skills Enbek платформасында «Әлеуметтік» қосымшасы құрылды, онда халықтың әлеуметтік осал топтарына жататын қазақстандықтарға кейбір ақылы курстар бойынша тегін негізде оқуға мүмкіндік беріледі.Оқытуды бастау үшін азаматтарға «Әлеуметтік» қосымшасындағы курсты таңдау кезінде ЭЦҚ арқылы олардың мәртебесінің сәйкестігін растау қажет. Тексеруден сәтті өткеннен кейін курс пайдаланушының жеке кабинетінде қолжетімді болады.Қазіргі уақытта жаңа бөлімде киіз басу және тігу сияқты қолданбалы мамандықтар, сондай-ақ экологиялық және әлеуметтік білім беру дағдылары бойынша сурдо аудармасы бар бірнеше курстар бар. Бұл курстарды USAID қолдауымен «Инклюзивті қолөнер» жобасы аясында «Qolqanat Foundation» қоғамдық қоры әзірледі.Естеріңізге сала кетейік, Skills Enbek платформасы маркетплейс қағидаты бойынша курстарға қол жеткізуді қамтамасыз ететін халықаралық оқыту алаңдарының қазақстандық аналогы болып табылады. Іске қосылғаннан бері Skills Enbek-те әртүрлі бағыттар бойынша 600-ден астам курстар орналастырылды, олардың жартысы тегін қол жетімді. Платформа қазірдің өзінде 474 мыңнан астам тіркелген пайдаланушыларды тартты, олардың 390 мыңнан астамы оқуды сәтті аяқтады.Ақпарат көзі : https://www.gov.kz/memleket/entities/enbek/press/news/details/874503

Астана, 2024 жылғы 21 қазан – Қазақстан Республикасы Сыртқы істер министрінің орынбасары Әлібек Қуантыров пен «Kazakh Invest» ҰК» АҚ басқарушы директоры Азамат Қожанов Қазақстанға инвестициялық мүмкіндіктерін зерттеу үшін келген Кувейт инвестициялық компанияның директорлар кеңесінің төрағасы Мұхаммад Әл-Алимен кездесу өткізді.Кездесу барысында Ә.Қуантыров Қазақстан мен Кувейт арасындағы инвестициялық қарым-қатынастарды, оның ішінде екіжақты инвестициялық ынтымақтастық туралы келісімге, сондай-ақ қосарланған салық салуды болдырмау туралы конвенцияға қол қою арқылы тереңдетуге дайын екенін жеткізді. Министрдің орынбасары инвестициялық ахуал, мемлекеттік қолдау шаралары туралы айтып, білім мен денсаулық сақтау салаларындағы инвестициялық мүмкіндіктерге кеңінен тоқталды.Өз кезегінде Ю.Мұхаммад Әл-Али Қазақстанмен инвестициялық ынтымақтастықты кеңейтуге жоғары қызығушылық танытып, ұзақ мерзімді экономикалық өсім үшін білім беру және денсаулық сақтау сияқты негізгі салалардың тұрақты дамуының маңыздылығын атап өтті. Ол Кувейт инвестициялық компаниясының халықтың өмір сүру сапасын жақсартуға және адами капиталды нығайтуға көмектесетін әлеуметтік жобаларға ерекше назар аударатынын баса айтты.Кездесу соңында тараптар өзара тиімді ынтымақтастықты жалғастыру ниетін растап, кувейттік компания жүзеге асыруға арналған перспективалық жобалар туралы ақпарат алмасуға келісті.Анықтама: Кувейт инвестициялық компаниясы – 1961 жылы құрылған және Кувейт Мемлекетіндегі жетекші инвестициялық компаниялардың бірі. Ол активтерді басқару, инвестициялық кеңес беру, брокерлік, қор мен портфельді басқару қызметтерін қоса алғанда, қаржылық және инвестициялық қызметтердің кең спектрін ұсынады. Компания өз клиенттерінің активтерін әртараптандыруға және тұрақты өсуге ұмтыла отырып, жергілікті және халықаралық инвестицияларға белсенді қатысады. Ақпарат көзі : https://www.gov.kz/memleket/entities/mfa/press/news/details/869744

Варшава, 2024 жылғы 22 қазан – Польша астанасында Қазақстан Сыртқы істер министрінің орынбасары Роман Василенко мен Польша Сыртқы істер министрінің бірінші орынбасары Владислав Бартошевскийдің қатысуымен кезекті саяси консультациялар өтті.Тараптар саяси, сауда-экономикалық және мәдени-гуманитарлық салалардағы екіжақты ынтымақтастықты кеңейтудің жай-күйі мен перспективаларын талқылады, өңірлік және халықаралық күн тәртібі бойынша пікір алмасты.Ағымдағы жылдың қыркүйегінде Нью-Йоркте өткен Қазақстан мен Польша сыртқы істер министрлері Мұрат Нұртілеу мен Радослав Сикорскийдің кездесуінде қол жеткізілген уағдаластықтарды іске асыру мәселелері егжей-тегжейлі қозғалды.ҚР делегациясының басшысы «Қазақстан Польша Республикасымен көпжоспарлы ынтымақтастықты нығайтуға маңызды мән береді. Екі елдің көшбасшылары арасында қалыптасқан белсенді саяси диалогтың арқасында басым салалардағы өзара әрекеттестіктің оң динамикасы қолдау тапқанын» атап өтті.Өз тарапынан, В. Бартошевский Польшаның өзара әрекеттестіктің барлық спектрі бойынша Қазақстанмен өзара тиімді ынтымақтастықты арттыруға деген берік көзқарасын растады.Тараптар консультацияларды тұрақты өткізу қажеттігін атап өтіп, екі елдің сыртқы саяси ведомстволары арасындағы тығыз диалогты қолдауға келісті.Сонымен қатар Р. Василенко Польша Сыртқы істер министрінің орынбасары Роберт Купецкиймен кездесу өткізді. Кездесуде Астана мен Варшаваның халықаралық ұйымдар аясындағы өзара тиімді ынтымақтастығын одан әрі нығайту мәселелеріне баса назар аударылды.Бұдан бұрын, ү.ж 21 қазанда Р. Василенконың Польша Экономикалық даму және технологиялар министрлігінде Премьер-министр Кеңсесінің еуропалық істер жөніндегі министрінің орынбасары болып жаңа тағайындалған Игнаций Немчицкиймен, сондай-ақ поляк Инвестициялар және сауда агенттігі төрағасының орынбасары Лукаш Гвяздовскиймен жеке кездесулері өткізілді.Тараптар екіжақты саудада оң динамиканы сақтау жөніндегі практикалық шараларды, бірлескен бизнес-жобаларды іске асыру, сондай-ақ келесі жылы Астанада Экономикалық ынтымақтастық жөніндегі Қазақстан-Польша үкіметаралық комиссиясының 10-шы отырысын өткізу мәселелерін талқылады (ҮАК тең төрағалары – Р. Василенко және Экономикалық даму және технологиялар министрінің орынбасары Я. Томчак).Аталған тақырып қазақ делегация басшысының поляк бизнес өкілдерімен жеке кездесуінде де егжей-тегжейлі талқыланды.Қазақстан мен Польшаның заң шығарушы органдары арасындағы ынтымақтастықты нығайту мәселелері ҚР Сыртқы істер министрінің орынбасарының «Польша – Қазақстан» парламенттік ынтымақтастық тобының мүшелерімен келіссөздерінің нысанасына айналды. Практикалық шешім ретінде екі ел басшылығы мен парламент мүшелерінің өзара сапарларын ұйымдастыру талқыланды.Поляк ақпараттық агенттігіне (PAP) берген сұхбатында, сондай-ақ Польшаның жетекші талдау орталықтарының сарапшыларымен кездесу барысында поляк тарапының өкілдеріне Қазақстанның сыртқы саясатының негізгі тәсілдері, елімізде болып жатқан саяси және әлеуметтік-экономикалық өзгерістер туралы, ҚР Президенті Қасым-Жомарт Тоқаевтың «Әділетті Қазақстан: заң мен тәртіп, экономикалық өсім, қоғамдық оптимизм» Жолдауының негізгі тезистері туралы ақпарат берілді.Анықтама: 2023 жылдың қорытындысы бойынша Қазақстан мен Польша арасындағы екіжақты сауда айналымы 1,23 млрд АҚШ долларын құрады (экспорт – 598,0 млн, импорт – 698,9 млн), бұл 2022 жылмен салыстырғанда 10,4%-ға төмен (1,358 млрд). 2024 жылдың алғашқы сегіз айының ішінде сауда айналымы 758,6 млн АҚШ долларын құрады, оның ішінде (экспорт – 328 млн, импорт – 430,6 млн). 2005 жылдан бері Польшадан Қазақстанға тікелей инвестициялардың жалпы ағыны 447,8 млн АҚШ долларын құрады. Қазақстанда 140 компания поляк капиталының қатысумен жұмыс істейді.Ақпарат көзі : https://www.gov.kz/memleket/entities/mfa/press/news/details/869947

Астана, 2024 жылғы 22 қазан – Қазақстан Республикасы Сыртқы істер министрінің орынбасары Әлібек Қуантыров, ҚР СІМ Инвестициялар комитетінің төрағасы Ғабидолла Оспанқұлов және «Kazakh Invest» ҰК» АҚ басқарма төрағасы Ержан Елекеев Корей импорттаушылар қауымдастығының төрағасы («KOIMA») Бёнг-Гван Киммен кездесті.Кездесу барысында Ә. Қуантыров сұхбаттасын Қазақстанның инвестициялық ахуалымен, мемлекеттік қолдау шараларымен, сондай-ақ қазақ-корей ынтымақтастығын кеңейтудің перспективалы бағыттарымен таныстырды. Министрдің орынбасары Қазақстанның азық-түлік өнеркәсібі, медицина салаларында бірлескен жобаларды жүзеге асыруға және елімізде қажетті шикізаттың болуын ескере отырып, сирек жер металдарынан жасалған құрамдас бөліктер өндірісін оқшаулауға мүдделі екенін атап өтті.Сондай-ақ Қазақстанның жаңа инвестициялық саясаты одан әрі экспортқа баса назар аудара отырып, қосылған құны жоғары салаларды дамытуға бағытталғаны баса айтылды. Осыған байланысты алдыңғы қатарлы корей технологиялары адами және технологиялық мүмкіндіктерді нығайтуда маңызды рөл атқара алады.Б. Ким Қазақстанның бай ресурстық базасы Оңтүстік Кореяның тәжірибесімен және білімімен ұштасып, экспортқа бағытталған тауарлар өндірісін оқшаулау үшін жақсы жағдай жасап отырғанын мәлімдеді. Сонымен бірге «KOIMA» төрағасы екі елдің алыстығына байланысты қазақстандық өнімді Оңтүстік Кореяға экспорттауды қиындатып отырған логистикалық мәселелерге алаңдаушылық білдірді.Кездесу қорытындысы бойынша тараптар қазақстандық бидайды Оңтүстік Кореяға жеткізуден бастап, ауыл шаруашылығы саласындағы ынтымақтастықты дамытуға, сондай-ақ өнімді экспорттауды жеңілдету үшін логистикалық мәселелерді талқылауды жалғастыруға келісті.Ақпарат көзі : https://www.gov.kz/memleket/entities/mfa/press/news/details/870596

Астана, 2024 жылғы 23 қазан – Қазақстан Республикасы Сыртқы істер министрінің бірінші орынбасары Ақан Рахметуллин Перудың Қазақстандағы Елшісі қызметін қоса атқарушы Хуан Хенаро Дель Кампо Родригесті қабылдады.Елшінің жұмыс сапары (резиденциясы Мәскеуде) ҚР Бас прокуратурасымен халықаралық құқықтық ынтымақтастық саласындағы келісімдерге қол қоюға орай өтті.Осы ретте Перу Қазақстан үшін халықаралық қылмыстық сот ісін жүргізу саласында толық құқықтық база қалыптасқан тағы бір латынамерикалық мемлекетке айналды.ҚР Сыртқы істер министрлігінде өткен кездесуде тараптар екіжақты және көпжақты күн тәртібіндегі өзекті мәселелерді талқылап, саяси және сауда-экономикалық диалогты, соның ішінде транзиттік-көліктік салада одан әрі нығайтуға баса назар аударды.Ақпарат көзі : https://www.gov.kz/memleket/entities/mfa/press/news/details/870598

Астана, 2024 жылғы 23 қазан – Қазақстан Сыртқы істер министрлігінде Республика күніне арналған салтанатты жиналыс өтті, оның барысында Министр Мұрат Нұртілеу ведомство ұжымын мерекемен құттықтады.СІМ басшысы өз құттықтауында 1990 жылғы 25 қазанда қабылданған Қазақстанның егемендігі туралы декларация мемлекетіміздің тәуелсіздігін алу жолындағы маңызды кезең болғанын атап өтті. Бұл мереке – елімізде белсенді жүргізіліп жатқан реформалар мен мемлекеттік жаңғырудың жарқын символы.«Қазақ дипломатиясының жетістіктері Мемлекет басшысының сыртқы саяси жолдағы іргелі бастамаларын шешуге ықпал етеді, шет мемлекеттермен саяси диалог пен экономикалық ынтымақтастықты нығайтуға, шетелдік инвестициялар мен технологияларды тартуға қызмет етеді», – деп мәлімдеді М. Нұртілеу.Республика күніне орай СІМ орталық аппаратының және ҚР шет елдердегі мекемелерінің қызметкерлеріне ҚР Президенті Қасым-Жомарт Тоқаевтың атынан мемлекеттік наградалар мен алғыс хаттар табыс етілді.Ақпарат көзі : https://www.gov.kz/memleket/entities/mfa/press/news/details/871654

Астана, 2024 жылғы 23 қазан – Қазақстан Республикасы Сыртқы істер министрінің орынбасары Әлібек Бақаев Сингапур Республикасының Қазақстандағы Елшісі Зулькифли Бахарудинмен кездесу өткізді.Тараптар ағымдағы жылдың мамырда ҚР Президенті Қасым-Жомарт Тоқаевтың Сингапурдағы мемлекеттік сапарының қорытындыларын жоғары бағалады және сапар барысында қол жеткізілген уағдаластықтарды іске асыруды жалғастыруға келісті.«Сингапур Қазақстанның Оңтүстік Шығыс Азиядағы негізгі серіктестерінің бірі болып қалуда. Қазақстан Сингапурмен сауда-экономикалық байланыстарды одан әрі нығайтуға мүдделі. Өткен жылы екіжақты тауар айналымының көлемі 1,8 млрд АҚШ долларын құрады және өзара сауда сапасын арттыру арқылы біз бұл көрсеткішті арттыра алатынымызға сенімдіміз», – деп атап өтті Ә.Бақаев.Министрдің орынбасары сауда-экономикалық, инвестициялық және көлік-логистикалық серіктестік сияқты негізгі бағыттарды қамтитын Сингапурмен екіжақты ынтымақтастықты нығайтуға ерекше назар аударды.Сонымен қатар дипломаттар жаһандық және өңірлік күн тәртібіндегі өзекті мәселелер бойынша пікір алмасты, сондай-ақ көпжақты құрылымдар аясындағы өзара іс-қимылды талқылады.Сингапурлық дипломатқа екіжақты қатынастарды дамытуға қосқан елеулі үлесі үшін ҚР Премьер-Министрінің орынбасары – Сыртқы істер министрі Мұрат Нұртілеудің алғыс хаты табыс етілді.Ақпарат көзі : https://www.gov.kz/memleket/entities/mfa/press/news/details/871743

Астана, 2024 жылғы 22-23 қазан – Тараптардың уағдаластығы бойынша Каспий теңізі мәселелері жөніндегі Жоғары деңгейдегі жұмыс тобының тоғызыншы отырысы өтті (ЖДЖТ).Келіссөздерге Әзербайжан Республикасының (жетекшісі – Самир Шарифов), Иран Ислам Республикасының (жетекшісі – Алиреза Джахангири), Қазақстан Республикасының (жетекшісі – Зульфия Аманжолова), Ресей Федерациясының (жетекшісі – Михаил Петраков) және Түрікменстанның (жетекшісі – Мурат Атаджанов) делегациялары қатысты.Отырысқа қазақ делегациясының басшысы Зүлфия Аманжолова төрайымдық етті.Тараптар Каспий теңізінде бастапқы тік сызықтарды белгілеу әдістемесін талқылауды жалғастырды.Отырыс аясында тараптар Каспий теңізіндегі ынтымақтастыққа шолу жасап, Каспий маңы мемлекеттері сыртқы істер министрлерінің Түрікменстандағы кезекті кездесуіне дайындық мәселелерін, сондай-ақ бесжақты құжаттар жобалары бойынша келіссөздер үдерісінің барысын талқылады.Делегациялар Қазақстан Республикасына кездесуді ұйымдастырудың жоғары деңгейі үшін ризашылықтарын білдірді.ЖДЖТ келесі отырысы Түрікменстанда дипломатиялық арналар арқылы келісілген мерзімде өтеді.Ақпарат көзі : https://www.gov.kz/memleket/entities/mfa/press/news/details/871761

Астана, 2024 жылғы 23 қазан – Қазақстан Республикасы Сыртқы істер министрінің бірінші орынбасары Ақан Рахметуллин БҰҰ-ның Қазақстандағы Халықаралық көші-қон ұйымы миссиясының жаңадан тағайындалған басшысы, Орталық Азия бойынша координаторы Серхан Актопракмен кездесу өткізді.Кездесу барысында тараптар Қазақстанның көші-қон жөніндегі халықаралық ұйымымен өзара әрекеттестік, оның ішінде шетелдік азаматтардың көші-қоны және тіркеуі, шекаралық бақылау, заңсыз көші-қонның, адамдарды заңсыз тасымалдаудың және қанаудың алдын алу сияқты ынтымақтастық салаларының кең ауқымды мәселелерін талқылады.Министрдің орынбасары халықаралық ұйымның өкіліне Орталық Азиядағы көптеген көші-қон мәселелерін шешуге бағытталған Алматы процесіне белсенді қатысқаны және қолдағаны үшін алғысын білдірді.Ақпарат көзі : https://www.gov.kz/memleket/entities/mfa/press/news/details/872775

Астана, 2024 жылғы 28 қазан – Қазақстан Республикасының Сыртқы істер министрлігінде Әмбебап мерзімді шолу шеңберінде ҚР-дың Төртінші кезеңдік ұлттық баяндамасын қорғауды дайындауға арналған «Адами өлшем жөніндегі диалог алаңы» консультативтік-кеңесші органының («АӨДА» ККО) кіші тобының бірінші отырысы өтті.Ұлттық баяндаманы ҚР Әділет министрлігі мемлекеттік органдармен және азаматтық қоғам институттарымен өзара әрекеттестік арқылы дайындады.ҚР СІМ Ерекше тапсырмалар жөніндегі елшісі Алуа Надирқұлова мен ҚР Әділет вице-министрі Ботагөз Жақселекованың тең төрағалығымен өткен отырыс барысында 2019 жылы өткен шолу қорытындысы бойынша Қазақстанның алған ұсынымдарының іске асырылу барысы талқыланды. БҰҰ Адам құқықтары жөніндегі кеңесіне қатысушы мемлекеттердің 245 ұсынымының ішінде Қазақстан 214 ұсынымды қолдады және мемлекеттің жүргізіліп жатқан ұлттық құқықтық саясаты мен қолданыстағы заңнаманы қолдану практикасын ескере отырып, 31 ұсынымды назарға алды. Қолдау көрсетілген ұсынымдарды іске асыру үшін 2020-2024 жылдарға арналған ведомствоаралық жоспар бекітілді.Ұсынымдарды іске асыру шеңберінде Париж қағидаттарына сәйкес Адам құқықтары жөніндегі уәкілдің мандаты кеңейтілді, оның ішінде оны қаржылық және адами ресурстармен қамтамасыз ету мақсаты кеңейді, Бала құқықтары туралы конвенцияға және Мүгедектердің құқықтары туралы конвенцияға Факультативтік хаттамалар ратификацияланды, әйелдер мен балаларды азаптауға, қатыгездік пен зорлық-зомбылыққа қылмыстық сипат беру бойынша заңнамалық шаралар қабылданды, адам саудасына қарсы күрес туралы қолданыстағы заңнама қайта қаралды, саяси партиялар мен бейбіт жиналыстар туралы жаңа заңдар, сондай-ақ жаңа Әкімшілік рәсімдік-процестік кодекс қабылданды, мүмкіндігі шектеулі тұлғалар мен ата-анасының қамқорлығынсыз қалған балаларды қолдау шаралары күшейтілді және т.б.Ресми баяндаманы дайындаумен қатар Қазақстанның үкіметтік емес ұйымдарының коалициясы 8 балама баяндама дайындады, олардың бірі өткен отырыста талқыланды.Жалпы, күн тәртібіндегі мәселелер сындарлы және ашық форматта талқыланды. Мемлекеттік органдар мен ҮЕҰ өкілдері тікелей пікір алмасуға және әзірленген ұсынымдарын таныстыруға мүмкіндік тапты.«АӨДА» ККО 2013 жылы ҚР СІМ бастамасымен құрылды. Алаң Үкімет пен азаматтық сектор арасындағы диалогты ілгерілетудің тиімді құралы ретінде жұмыс істеуде. Алаңда халықаралық ұйымдар (БҰҰДБ, БҰҰ БЖКБ, ЕҚЫҰ және т.б.) өкілдерінің байқаушылар ретінде қатысуымен адам құқықтарын қорғаудың әртүрлі өзекті мәселелері талқыланады.Ақпарат көзі : https://www.gov.kz/memleket/entities/mfa/press/news/details/874230

Астана, 2024 жылғы 29 қазан – Қазақстан Республикасы Сыртқы істер министрінің орынбасары Әлібек Қуантыров Италия Республикасы Сыртқы істер және халықаралық ынтымақтастық министрінің орынбасары Эдмондо Чириеллимен келіссөздер өткізді.Сұхбат барысында екіжақты ынтымақтастықтың негізгі мәселелері, атап айтқанда, Қазақстан Республикасының Президенті Қасым-Жомарт Тоқаевтың 2024 жылғы қаңтарда Италияға ресми сапарының қорытындысы бойынша қол жеткізілген уағдаластықтарды іске асыру барысы талқыланды.Сонымен қатар тараптар «Орталық Азия + Италия» диалогы аясында, сондай-ақ халықаралық ұйымдар алаңында өзара іс-қимыл мәселелері бойынша пікір алмасты.Ә. Қуантыров Италия Қазақстанның Еуропа одағындағы ең ірі сауда әріптесі екенін хабарлады. Қазақ дипломаты Э. Чириеллидің елордамызға сапары аясында өткен Экономикалық және өнеркәсіптік ынтымақтастық пен алмасу жөніндегі Қазақстан-Италия үкіметаралық жұмыс тобының 9-шы отырысының сәтті өткенін ризашылықпен атап өтті.Өз кезегінде италиялық дипломат Римнің Астанамен стратегиялық әріптестікке дәстүрлі түрде жоғары мән беретінін растады. Атап айтқанда, «Sogesid» компаниясының Арал теңізі аймақтарын әлеуметтік-экологиялық жаңғыртуға бағытталған жобасы туралы хабардар етті.Осыған орай Сыртқы істер министрінің орынбасары италиялық тараптың ауыл шаруашылығы, денсаулық сақтау, көлік, жоғары білім, су ресурстары және энергетика салалар бойынша жұмыс топтарының кездесулерін көздейтін Орталық Азия мен Италия арасында білім алмасу желісін құру бойынша іс-шаралар жоспарын әзірлеу жөніндегі бастамасын құптады.Кездесу қорытындысы бойынша тараптар Қазақстан-Италия стратегиялық әріптестігінің барлық спектрін нығайтуға бағытталған көпқырлы диалогты жалғастыруға келісті.Анықтама: Италия – Қазақстанның ЕО-дағы ең ірі экономикалық серіктесі. 2024 жылғы қаңтар-қыркүйекте тауар айналымы 16 млрд АҚШ долларын (экспорт – 15,1 млрд, импорт – 900 млн) құрап, өткен жылдың сәйкес кезеңімен салыстырғанда (11,7 млрд доллар) 36%-ға жоғарылады. 2005 жылдан бастап 2024 жылдың II тоқсанына дейін Италиядан Қазақстанға инвестициялар көлемі 7,6 млрд доллар құрады. Қазақстанда итальяндық капиталдың қатысуымен 278 заңды тұлға тіркелген.Ақпарат көзі : https://www.gov.kz/memleket/entities/mfa/press/news/details/874405

2024 жылғы 1 қазанға жағдай бойынша жергілікті атқарушы органдардың рұқсатымен Қазақстан аумағында 13 707 шетел азаматы еңбек етеді.Шетел жұмыс күшін (бұдан әрі – ШЖК) тартуға рұқсаттардың арасында мынадай санаттар бар: басшылар мен олардың орынбасарлары үшін 548 рұқсат (бірінші санат), құрылымдық бөлімшелердің басшылары үшін 2 503 рұқсат (екінші санат). Тартылған ШЖК негізгі бөлігі үшінші (мамандар) және төртінші (білікті жұмысшылар) санаттарға жатады – тиісінше олар 4 874 және 861 адам. Сондай-ақ маусымдық жұмыстарға 1 586 адам, ал корпоративтік ауыстыру аясында 3 335 адам тартылды.Қазіргі уақытта Қазақстанда ШЖК пайдаланатын 1 799 жұмыс беруші бар. Оларда 390,2 мыңнан астам Қазақстан азаматы жұмыс істейді, бұл қызметкерлердің жалпы санының 96,6%-ы.Экономикалық қызмет түрлері бойынша ең көп жұмыс істейтіндер құрылыс саласында – 5 144 адам, ауыл, орман және балық шаруашылығы – 1 638 адам, әкімшілік және көмекші қызметтер – 1 439, , өңдеу өнеркәсібі – 1 376 адам, тау – кен өнеркәсібі және карьерлерді қазу – 1 344 адам.Еңбек мигранттары келетін негізгі елдер: Қытай – 4 600 адам, Өзбекстан – 1 698 адам, Түркия – 1 145 адам, Үндістан – 1 101 адам.Ішкі еңбек нарығын қорғау мақсатында ҚР Еңбек және халықты әлеуметтік қорғау министрлігі жыл сайын республикаға шетел мамандарын тартуға квота белгілейді және бөледі. 2024 жылы жалпы квота республикадағы жұмыс күшінің санына қатысты 0,23% немесе 21,5 мың бірлік мөлшерінде белгіленді.Ақпарат көзі : https://www.gov.kz/memleket/entities/enbek/press/news/details/872068

ҚР Еңбек және халықты әлеуметтік қорғау министрі Светлана Жақыпова Алматы қаласында өтіп жатқан «Жастар Орталық Азияның тұрақты болашағы үшін» форумы барысында жұмыспен қамту саласындағы цифрлық жүйелерді көрсетті.Бұл форум Жапония Үкіметінің қолдауымен БҰҰ Даму бағдарламасының «Орталық Азиядағы зорлық-зомбылық экстремизмінің алдын алу мақсатында жергілікті қоғамдастықтардың тұрақтылығын нығайту» өңірлік жобасы шеңберінде өткізіледі. Іс-шара аясында Орталық Азия елдерінде жастарды дамыту және оларды жұмыспен қамту мәселелерімен айналысатын мемлекеттік органдар, үкіметтік емес ұйымдар, діни қызметкерлер мен құрылымдар өкілдерінің сөз сөйлеуі жоспарланған.«Зорлықпен экстремизмнің алдын алудың тиімді жолы ретінде жастарды жұмыспен қамту саласындағы озық тәжірибелермен және өзекті бастамалармен алмасу» панельдік сессиясында сөз сөйлеген Светлана Жақыпова жастар алдында тұрған проблемалар мен сын-қатерлерді айтты.«Жастар еңбек нарығында жоғары жұмыссыздық пен тұрақсыздыққа тап болады. Сапалы білімге қол жетімділік шектеулі болуы мүмкін, бұл жеке тұлғаның мансаптық өсуі мен дамуын қиындатады. Жастар қаржылық қиындықтарға әсіресе, тәуелсіз өмірге көшу кезінде кезігуі мүмкін. Денсаулық проблемалары, соның ішінде психикалық денсаулық, жастар үшін үлкен сынақ болуы ықтимал. Әлеуметтік, экономикалық және құрама белгілер бойынша теңсіздік жастарға кедергі келтіру мүмкіндігі жоғарлайды. Сондай-ақ, жастар климаттың өзгеруінің экологиялық дағдарыстар мен экожүйелерге қауіп төндіретін салдарымен бетпе-бет келеді. Технологияның қарқынды дамуы цифрлық сауаттылық пен өзгерістерге бейімделу саласында қиындықтар тудыруы мүмкін», - деді ол.Бұл ретте Министр Орталық Азияның тұрақты дамуындағы жастардың рөлін атап өтті.«Жас ұрпақ өңірдің болашағын қалыптастыруда және оның дамуына әсер ететін шешімдер қабылдауда шешуші рөл атқарады. Жастар Орталық Азияның тұрақты дамуына ықпал ететін жаңа идеялар, инновациялар мен тәсілдер әкелуге қабілетті. Жас буынның білімі мен кәсіби дамуына инвестиция салу аймақтың тұрақты дамуы үшін қажетті білім мен дағдылардың деңгейін арттыруға ықпал етуі мүмкін. Жастардың қоғамдық өмірге белсенді қатысуы демократияның, азаматтық қоғамның дамуына және әлеуметтік тұрақтылықтың нығаюына ықпал етеді.Осылайша, жас азаматтар Орталық Азияның орнықты дамуында маңызды рөл атқарады, оның қатысуы мен қолдауы өңірдегі орнықты даму мақсаттарына қол жеткізу үшін қажет», – деді Светлана Жақыпова.Сонымен бірге ЕХӘҚМ басшысы форум қатысушыларына Қазақстан жастарына жұмыспен қамту саласында кең мүмкіндіктер беретін цифрлық жүйелерді таныстырды.«Бүгінгі күні Электрондық еңбек биржасы шеңберінде жұмыспен қамту саласында көрсетілетін қызметтердің «цифрлық супермаркеті» қалыптастырылды. Бір платформада қазақстандықтар қолда бар кәсіби дағдыларын арттыра алады немесе онлайн-оқыту арқылы жаңаларын ала алады, лайықты жұмыс таба алады, кәсіпкерлік негіздерін үйренеді және өз ісін ашу үшін грант алуға өтінім бере алады. Сондай-ақ электрондық еңбек биржасының цифрлық экожүйесі жұмыс берушілерге кадрлық іс жүргізу процестерін жеңілдетуге және еңбек заңнамасы талаптарының сақталуына өзін-өзі тексеруден өтуге мүмкіндік береді. Бұдан басқа, платформада электрондық форматта еңбек және өңіраралық көші-қон саласында қызметтер көрсетіледі.Осылайша, Электрондық еңбек биржасы жұмыс берушілерді, жұмысшыларды және мемлекеттік құрылымдарды бірыңғай цифрлық кеңістікте біріктіреді, еңбек нарығындағы сұраныс пен ұсынысты тиімді ұштастырады және азаматтарға мемлекеттік қызметтер көрсету сапасын жақсартады. Жасанды интеллектті пайдаланудың арқасында платформа жұмыспен қамту қызметтерін ұсыну процесінде адами факторды барынша азайтады, кадрларды іріктеуде жоғары дәлдікке қол жеткізеді және ізденушілер үшін мансап жолдарын оңтайландырады», – деп атап өтті Светлана Жақыпова.Тағы бір маңызды жоба – мансап компасы, ол көпшілікке мансапты саналы түрде таңдауға ықпал ететін кәсіби мүмкіндіктер мен білім беру бағдарламалары туралы өзекті ақпаратты ұсынады. Ал mansap.enbek.kz сайты 400 мамандық және 12 бағыт бойынша талдамалық деректерді ұсына алады.«Студенттердің практикалық дағдыларын игеру үшін біз Электрондық еңбек биржасында өндірістік практиканың функционалын іске қостық. Бұл оларға өндірістік практиканың қажетті орнын тауып қана қоймай, нақты дағдыларды игеруге, бәсекеге қабілеттілікті арттыруға көмектеседі», – деп толықтырды сөзін Министр.Сонымен қатар Светлана Жақыпова кадрларға қажеттілікті талдау мен болжауды және барлық іске асырылып жатқан жобалардың тиімділігіне уақтылы мониторинг жүргізуді қамтамасыз ететін жобалардың инновациялық навигаторының мүмкіндіктерін көрсетті. Бүгінгі таңда жүйеде 150 мың жұмыс орнын құру жоспарымен 755 инвестициялық жоба бойынша мониторинг жүргізілуде.Ақпарат көзі : https://www.gov.kz/memleket/entities/enbek/press/news/details/872566

ҚР еңбек және халықты әлеуметтік қорғау министрінің бұйрығымен Әсет Бағдатұлы Шонов ҚР Еңбек және халықты әлеуметтік қорғау министрлігі Көші-қон комитетінің төрағасы қызметіне тағайындалды.Әсет Шонов 1986 жылы Ақмола облысында дүниеге келген.Л.Н. Гумилев атындағы ЕҰУ және Еуразиялық гуманитарлық институтын бітірген.Әр жылдары Экономика және бюджеттік жоспарлау, Қаржы министрліктерінің құрылымдарында сарапшы болып жұмыс істеді. 2013 жылдан 2014 жылға дейін болды.ҚР Мемлекеттік қызмет істері агенттігі Жоспарлау және бюджет бөлімі жоспарлау секторының меңгерушісі 2014 жылдан 2017 жылға дейін ҚР Ұлттық экономика министрлігі Стратегиялық жоспарлау және талдау департаменті директорының орынбасары қызметін атқарды.2017 жылдан 2019 жылға дейін ҚР Ұлттық экономика министрлігі Жобалық басқару департаментінің директоры, ҚР Еңбек және халықты әлеуметтік қорғау министрлігі Әлеуметтік көмек департаментінің директоры болып жұмыс істеді.2019 жылдан 2021 жылға дейін — ҚР Премьер-министрі Кеңсесі Экономикалық бөлімі меңгерушісінің орынбасары.15.07.2021 бастап тағайындалғанға дейін ҚР Қаржы министрлігі Заң қызметі департаментінің директоры қызметін атқарды. Ақпарат көзі : https://www.gov.kz/memleket/entities/enbek/press/news/details/872841

ҚР Еңбек және халықты әлеуметтік қорғау министрлігі кәсіпорындарда қауіпсіздік техникасын сақтауға жауапты қызметкерлерге қажетті дағдылар мен құзыреттерді айқындайтын кәсіптік стандартын әзірледі. Ведомство басшысының «Еңбек қауіпсіздігі және еңбекті қорғау» кәсіптік стандартын бекіту туралы» бұйрығының жобасы 2024 жылғы 11 қарашаға дейін «Ашық НҚА» порталында талқылау үшін орналастырылған.«Еңбек қауіпсіздігі және еңбекті қорғау» кәсіптік стандартын қабылдау еңбекті қорғауды басқару жүйесін жоспарлау, ұйымдастыру, бақылау және жетілдіру жөніндегі қызметке қойылатын талаптарды белгілеуге, еңбек қауіпсіздігі және еңбекті қорғау жөніндегі басшылар мен мамандарға қойылатын біліктілік талаптарын біріздендіруге мүмкіндік береді.Бұл кәсіптік стандарт сонымен қатар жоғары және жоғары оқу орнынан кейінгі (қосымша) білім берудің білім беру бағдарламаларын қалыптастыруға, бейінді мамандарды даярлауды жоспарлы және дәйекті қамтамасыз етуге, еңбек қауіпсіздігі және еңбекті қорғау жөніндегі басшылар мен мамандарды қайта даярлауға немесе олардың біліктілігін арттыруға қойылатын талаптарды белгілейтін болады.Кәсіптік формалды, формалды емес және информалды оқыту нәтижелерін тануға негіз береді, біліктілікті кәсіби орта ретінде бағалауға және тануға қол жеткізу үшін жағдай жасайды.Бұйрық жобасымен мына сілтеме бойынша танысуға болады:https://legalacts.egov.kz/npa/view?id=15257882 Ақпарат көзі : https://www.gov.kz/memleket/entities/enbek/press/news/details/872975

Астанада әлеуметтік қорғау жүйесі қызметкерлерінің күніне орай әлеуметтік жобалар Форум-көрмесі өтті. Іс-шара өмір сүру сапасын арттыруға және мүгедек адамдарды қолдауға бағытталған әлеуметтік мәселелерді шешуде үздік тәжірибелерді көрсету және жаңа тәсілдерді талқылау мақсатында ұйымдастырылды.Форумға үкіметтік емес ұйымдардың (бұдан әрі – ҮЕҰ) өкілдерін, инклюзия саласындағы сарапшыларды және халықтың осал топтарының әлеуметтік қолдауы мен өмір сүру сапасын жақсартуға ұмтылатын белсенді азаматтарды қоса алғанда, 150-ден астам адам қатысты.Іс-шара шеңберінде әлеуметтік саясатты жақсарту және қолдауға мұқтаж азаматтар үшін мүмкіндіктерді кеңейту үшін тиімді әріптестік қалыптастыру мақсатында мемлекеттік органдар мен үшінші сектор өкілдері арасында диалог өтті.ҚР Еңбек және халықты әлеуметтік қорғау министрі Светлана Жақыпова өзінің құттықтау сөзінде форум алаңының мемлекеттік органдар мен ҮЕҰ бірлескен жұмысындағы маңыздылығын атап өтті.«Қоғамдық бірлестіктер мен ҮЕҰ өкілдері әлеуметтік жобаларды іске асыруға белсенді қатысып, сенімді және белсенді серіктестерге айналды. Сараптамалық қоғамдастықпен бірге, оның ішінде мүгедектігі бар адамдар арасынан сарапшылармен 2030 жылға дейінгі Инклюзивті саясат тұжырымдамасының жобасы әзірленді, оның тұжырымдамалық жаңалығы мүгедектіктің медициналық-әлеуметтік-әлеуметтік-құқық қорғау моделіне көшу бойынша жағдайлар жасау болып табылады. Белсенді азаматтық ұстанымыңыз үшін алғыс айтамын.Бүгінгі форум серіктестікті кеңейту және дамыту үшін тамаша алаң болды. Мұнда республиканың ең үздік жобалары жинақталған. Бұл форум сіздерді жаңа идеялармен шабыттандырады деп үміттенеміз және біз келесі жылы жаңа жобаларды талқылай отырып, осында кездесеміз», – деді ЕХӘҚМ басшысы.Форум әлеуметтік жобалар көрмесінен басталды, онда Астана қаласынан 20 ҮЕҰ өз бастамаларын ұсынды. Келушілер мүгедектігі бар адамдарды қолдауға, инклюзивті қауымдастықтарды дамытуға, шығармашылық әлеуетті арттыруға бағытталған жобалармен, сондай-ақ жетім балаларға арналған білім беру бағдарламаларымен таныса алды. Мүгедектігі бар адамдар жасаған өнер туындылары қойылған «ISKER» Қоры ұйымдастырған өнер көрмесі ерекше назар аударды.«Әлеуметтік жобалар форумы – бұл өзекті әлеуметтік мәселелерді шешу үшін коммерциялық емес ұйымдардың, әлеуметтік кәсіпкерлердің және мемлекеттік құрылымдардың күш-жігерін біріктіретін маңызды оқиға. Бұл іс-шара халықтың әлеуметтік осал топтарының өмірін жақсарту үшін күнделікті жұмыс істейтіндерді қолдауға және инклюзия мен әлеуметтік әл-ауқаттың дамуына айтарлықтай үлес қосуға бағытталған. Мұндай бастамалар бар мәселелер туралы хабардарлықты арттырып қана қоймайды, сонымен қатар қоғамның пайдасына одан әрі әрекет етуге шабыттандырады. Форум біздің әлемді жақсартуға көмектесетін жаңа идеялар мен серіктестіктердің қайнар көзі болатынына сенімдімін», - деп атап өтті «IteachMe» ҚҚ директоры Захира Бегалиева.Көрмеден кейін «Өмірді өзгертетін әлеуметтік жобалар» тақырыбында пленарлық сессия өткізілді, онда мүгедектігі бар адамдарды жұмысқа орналастыру және оқыту, инклюзивті қоғамдастықтар құру және инклюзивті бастамалар арқылы шығармашылық әлеуетті дамыту мәселелері талқыланды.Сондай-ақ, форум аясында салтанатты марапаттау рәсімі өтті, онда әлеуметтік салада белсенді жұмыс істейтін 20 ҮЕҰ жетістіктері атап өтілді.Марапатталғандар арасында «Бақытты Шаңырақ» ҚБ, «Inclusive Academy» халықаралық жобасы, «Фомальгаут» мүгедектер ҚБ, «Ыбырай» ҚҚ, «Өмір тынысы» ҚБ, «Альрами» клуб үйі, Әлеуметтік инклюзивті бағдарламалар орталығы, Еуразиялық инклюзивті қоғамды дамыту қауымдастығы, «Болашақ» қоры, ҚР жұп би федерациясы, «Особые праздники» ҚҚ, «QazTech Development» ЖШС, «Dos Ortopedia» компаниясы, «Мирас-А» және «Плюс один» қайырымдылық қорлары, «Қазақстандық саңыраулар қоғамы» ҚБ, «Balam AI», «HandInHand», «Bulan» әлеуметтік стартаптары, сондай-ақ Ұлттық еріктілер желісі.Форум жарқын концерттік бағдарламамен аяқталды, оған ҚР жұп бишілер федерациясының, Қазақ ұлттық хореография академиясының, «SILENCE» естімейтін бишілер театрының және «Бақытты Шаңырақ» ҚҚ әртістері қатысты.Әлеуметтік жобалар форумы қатысушыларға тәжірибе мен идеялармен алмасуға мүмкіндік беріп қана қоймай, Қазақстан азаматтарының өмірін жақсарту үшін инклюзивті бағдарламаларды дамыту мен әлеуметтік бастамаларды қолдаудың маңыздылығын атап өтті.Ақпарат көзі : https://www.gov.kz/memleket/entities/enbek/press/news/details/873276

Мемлекет басшысының Моңғолияға сапары аясында Қазақстан Республикасының Үкіметі мен Моңғолия Үкіметі арасында зейнетақы саласындағы ынтымақтастық туралы келісімге қол қойылды.Осы Келісім ынтымақты зейнетақы тағайындау кезінде екі елдің аумағында әзірленген еңбек өтілін өзара есепке алуды көздейді.Бұдан басқа, жинақтаушы зейнетақы экспорты бойынша Қазақстан мен Моңғолия арасындағы ынтымақтастықтың жаңа түрі көзделуде.Қазақстан тарапынан Келісімге Премьер-Министрдің бірінші орынбасары Роман Скляр, Моңғолиядан – отбасы, еңбек және әлеуметтік қорғау министрі Лувсанцэрэнгийн Энх-Амгалан қол қойды.Ақпарат көзі : https://www.gov.kz/memleket/entities/enbek/press/news/details/873544

2024 жылғы 1 қазандағы жағдай бойынша жұмыспен қамтуға жәрдемдесудің түрлі шараларымен 20,7 мыңнан астам мүгедектігі бар адам (бұдан әрі – МбА) қамтылды. Бүгінгі таңда барлығы ерекше қажеттіліктері бар 106,8 мың адам жұмыспен қамтылған (28%).2024 жылғы 1 қазандағы жағдай бойынша Қазақстанда мүгедектігі бар 732,1 мың адам тұрады, ол халықтың жалпы санының 3,6%-ын құрайды, олардың 381,3 мыңы еңбекке қабілетті жаста.ҚР Әлеуметтік кодексіне сәйкес жергілікті атқарушы органдар мүгедектігі бар адамдар үшін ауыр жұмыстардағы, еңбек жағдайлары зиянды, қауіпті жұмыстардағы жұмыс орындарын есепке алмағанда, жұмысшылардың жалпы санының 2-ден 4 %-на дейін (жалдамалы жұмыскерлердің жалпы саны кемінде 50 адам болған кезде) көлемде жұмыс орындарына квота белгілейді. Ағымдағы жылдың тоғыз айына квота шеңберінде мүгедектігі бар 5,4 мың адам жұмысқа орналастырылды.Сондай-ақ ерекше қажеттіліктері бар адамдар жұмыспен қамтуға жәрдемдесудің белсенді шараларына тартылуда. Мәселен, ағымдағы жылдың 1 қазандағы жағдай бойынша тұрақты жұмысқа 5,9 мың адам, жастар практикасына – 505 адам, әлеуметтік жұмыс орындарына – 654 адам, қоғамдық жұмыстарға – 5,9 мың адам, «Күміс жас» жобасы бойынша – 828 адам, «Алғашқы жұмыс орны» жобасы бойынша – 183 адам, «Ұрпақтар келісімшарты» жобасы бойынша – 6 адам жұмысқа орналастырылды.Қысқа мерзімді кәсіптік оқытумен 272 адам, «Бастау бизнес» жобасы бойынша кәсіпкерлік негіздеріне оқытумен 5 мың адам қамтылды.Халықтың әлеуметтік осал топтарына жататын азаматтарға өз бизнесін ашу үшін 400 АЕК-ке дейінгі (1,4 млн теңге) мөлшерінде мемлекеттік гранттар беріледі. Бүгінгі таңда 1470 мүгедектігі бар адам осындай қолдауға ие болды.Сондай-ақ, 2018 жылдан бастап халықаралық тәжірибені ескере отырып, мүгедектігі бар адамдарды жұмысқа орналастыру үшін арнайы жұмыс орнын жарақтандыруға байланысты жұмыс берушілердің шығындарын субсидиялау тәртібі енгізілді. Ағымдағы жылы осындай 71 арнайы жұмыс орны құрылды.Ақпарат көзі : https://www.gov.kz/memleket/entities/enbek/press/news/details/873726