2024 жылдың 11-15 желтоқсан аралығында А. Малдыбаев атындағы Қырғыз ұлттық академиялық опера және балет театрында көрнекті қырғыз бишісі әрі балетмейстері Уран Сарбагышевтың 90 жылдығына арналған «Улуу-Элес» І Халықаралық балет әртістері байқауы өтті. Оған Ресей, Қазақстан, Өзбекстан, Жапония және Қырғызстаннан келген балет әртістері, хореографиялық оқу орындарының студенттері мен балетмейстерлері қатысты.Александр Селезнев атындағы Алматы хореографиялық училищесінің студенттері жоғары нәтижелер көрсетті:1 орын – Амина Батаева2 орын – Ақбота Абылқасенова3 орын – Томирис Ақын мен Алихан Нақысхожаев.Дипломанттар:Ирина Беккер, Анастасия Петина, Алишер Қасымхан, Арсен Ермеков.Ерекше марапат – Роберт Уразғильдеев пен Инга Левченко атындағы жүлде, оны Бубусара Бейшеналиева атындағы Қырғыз мемлекеттік мәдениет және өнер университеті тағайындаған. Бұл жүлдені Ирина Беккер мен оқытушы – Қазақ КСР еңбек сіңірген әртісі Людмила Мунсекқызы Ли иеленді.Байқау балет өнерін дамыту мен насихаттауға, дарынды орындаушыларды анықтап, қолдауға, балет әртістерінің кәсіби шеберлік деңгейін арттыруға, сондай-ақ балет саласындағы халықаралық мәдени байланыстарды нығайтуға бағытталған. ҚР Мәдениет және ақпарат министрлігінің баспасөз қызметіАқпарат көзі : https://www.gov.kz/memleket/entities/mam/press/news/details/904160

Облыстық мәслихаттың XVІІI сессиясы өтіп, күн тәртібінде облыстық бюджетті нақтылау бағытындағы 15 мәселе қаралды. Аймақ басшысы өңірдің әлеуметтік-экономикалық дамуына, алдағы жоспарларға, өткен аптадағы жұмыс сапарының қорытындыларына тоқталды.«Президентіміз Қасым-Жомарт Кемелұлының Сыр өңірін ерекше қолдауының арқасында бүгінде облысымыздың даму қарқыны жоғары.Аймақтың әлеуметтік-экономикалық дамуында оң тенденция қалыптасты. Барлық негізгі макроэкономикалық көрсеткіш бойынша республикада бірінші орындамыз. Өткен 11 айдың қорытындысымен өнеркәсіп өндірісі 0,8, өңдеу өнеркәсібі 20,6, ауыл шаруашылығы 3, тұрғын үй 15,3, көлік 3,3, сауда 6,5, құрылыс жұмыстарының көлемі 57,5 пайызға артты. Негізгі капиталға 559 млрд. теңге инвестиция тартылып, өсім 20,6 пайызды құрады.Айта кету қажет, біз аймаққа шетел инвестицияларын, озық технологияларды тарту жұмыстарын белсенді жүргізудеміз. Таяуда ғана өңірдің бизнес өкілдермен бірге Италия, Испания, Түркия елдеріне барып келдік. Сыртқы істер министрлігі, Қазақстанның шетелдегі елшіліктерінің қолдауымен аталған мемлекеттерде өзара тәжірибе алмасулар, маңызды кездесулер өткіздік. Өнеркәсіп қауымдастығының жұмысымен, биохимиялық ерітінділер, медициналық реагенттер, санфаянс пен санитарлық-техникалық бұйымдар, гидрооқшауланған бетон, ауыл, орман шаруашылығына қажет озық датчиктерді шығаратын, тері, жүн өңдейтін өндіріс орындарымен танысып, келіссөздер жүргіздік. Инвестиция тарту жұмыстарын одан әрі жалғастырамыз,» – деді Н.Нәлібаев.Айта кетейік, биыл 189 449 гектарға ауыл шаруашылығы дақылдары егіліп, егін мерзімінде толық жиналды. Негізгі дақыл күріш 85 600 гектарға егіліп, әр гектардан 58 центнерден өнім алынды. Жарты миллион тонна күріш қамбаға құйылды.Халықтың әл-ауқатын көтеру, өмір сүру сапасын жақсарту үшін баспанамен қамту, сапалы инфрақұрылым жүргізу бағытында нақты жұмыстар атқарылуда. Елді мекендерді сапалы ауыз сумен қамтуда 2022 жылдан бері 16 млрд 800 млн теңгенің 55 жобасы жүзеге асырылды. Нәтижесінде халықты орталықтандырылған ауыз сумен қамтамасыз ету деңгейі 98,6 пайызға жетті. Биыл 13 жаңа жобаға 5 млрд. 300 млн. теңге бөлінді. Алдағы жылы облыс аумағындағы барлық елді мекен орталықтандырылған ауыз сумен 100 пайыз қамтамасыз етіледі.Тұрғындарды электр энергиясымен қамту бағытында 11 млрд. теңгеге 38 жоба жүзеге асырылуда. Бұл жобалар толық жүзеге асқанда электр желілерінің тозу деңгейі 62 пайызға төмендейді.Президенттің тікелей қолдауымен Қызылорда қаласында 215 млрд. теңгеге қуаттылығы 240 мегаватт жаңа жылу-электр орталығы салынуда. Бүгінде инвестор «Акса Энерджи» түрік компаниясы құрылысқа 127 млрд. теңгеден астам инвестиция салды. Жаңа жылу-электр станциясы – тәуелсіздік жылдарындағы инвестор қаржысына салынған ең ауқымды, теңдесіз жобалардың бірі. Аймақ үшін айрықша маңызға ие нысан келер жылы ел игілігіне табысталады.Мемлекет басшысының тапсырмасымен оңтүстік өңірлерде электр энергиясының тапшылығын болдырмау мақсатында Қызылорда облысында құны 800 млрд.теңгені құрайтын, қуаттылығы 1100 МВт-тық бу-газ қондырғыларының құрылысы жоспарлануда. «Самұрық Энерго» компаниясы Катар инвесторымен келіссөз жүргізіп, техника-экономикалық негіздеме әзірленуде.Жаңа бу-газ қондырғылары Қызылорда қаласынан Ұлытау облысына шығаберіс аумаққа салынады. Бұл жұмыстарға әкімдік 280 гектар жер телімін бөлді. Станцияны 2029 жылы толығымен іске қосу жоспарланған.Ақпарат көзі : https://www.gov.kz/memleket/entities/kyzylorda/press/news/details/899488

Бүгін облыс әкімі Нұрлыбек Нәлібаевтың төрағалығымен әлеуметтік-экономикалық көрсеткіштерге, кадрлық өзгерістерге орай актив отырысы өтті.Жиында аймақ басшысы Қызылорда облысының дене шынықтыру, спорт және туризм басқармасының жаңа басшысы Артаев Бақтияр Ғарифоллаұлын таныстырды.«Бүгінгі мәжілісімізді бастамас бұрын кадрлық өзгерістерге тоқталуға рұқсат етіңіздер. Мемлекет басшысы отандық спорт саласын кешенді реформалау арқылы бұқаралық, балалар мен жасөспірімдер спортын дамытуды тапсырды.Ол үшін бізге өз ісін жетік білетін кәсіби мамандар, мықты басшылар, үздік менеджерлер керек. Осы орайда, Туризм және спорт министрлігінің, Мемлекеттік қызмет істері агенттігінің келісімімен Қызылорда облысының дене шынықтыру, спорт және туризм басқармасының басшысы лауазымына Артаев Бақтияр Ғарифоллаұлы тағайындалды.Бақтияр Ғарифоллаұлы – барлығыңызға жақсы таныс, өз ісінің білікті маманы, мықты менеджер. Спорт саласының жандануына орасан зор үлес қосқан азамат. 2004 жылы Афиныда өткен Олимпиада ойындарында ел қоржынына алтын салған чемпионымыз, Вэл Баркер Кубогының иегері, халықаралық спорт шебері, Қазақстанның еңбек сіңірген спорт шебері, бокстан Қазақстан Республикасының 7 дүркін чемпионы.Бақтияр Ғарифоллаұлының осы кезге дейін алған білімі мен жинақтаған мол тәжірибесін ескеріп, Сыр өңіріндегі спорт және туризм саласын бұрынғыдан да қарқынды дамытады деп сенім білдіреміз», – деді Нұрлыбек Нәлібаев.Бақтияр Ғарифоллаұлы Артаев 1983 жылы Тараз қаласында дүниеге келген. Мұхаммед Хайдар Дулати атындағы Тараз мемлекеттік университетін «Құқықтану», «Менеджмент», Қазақ спорт және туризм академиясын «Дене шынықтыру және спорт», ҚазТұтынуодағы Қарағанды экономикалық университетін «Мемлекеттік және жергілікті басқару» мамандықтары бойынша бітірген. «Құқықтану», «Дене шынықтыру және спорт» магистрі.Еңбек жолын 2004 жылы «Тараз газ шаруашылығы басқармасы» жауапкершілігі шектеулі серіктестігінің менеджері болып бастаған. 2009-2013 жылдары Жамбыл облысы Айшабибі ауылдық округінің әкімі, Жамбыл облысының дене шынықтыру, спорт және туризм басқармасының басшысы, Жамбыл облысы әкімі аппараты басшысының орынбасары.2013-2021 жылдары «Астана» Президенттік кәсіпқой спорт клубы» корпоротивтік қорынының президенті, «Тарлан батырлары» ЖШС директоры, «Астана Арланс» ЖШС бас менеджері. 2021-2022 жылдары «Қазақстан бокс федерациясы» қауымдастығының ұлттық командалар үйлестірушісі, вице-президенті, Спорт және дене шынықтыру істері комитеті спортты дамыту дирекциясының бокстан мемлекеттік жаттықтырушысы қызметтерін атқарған.Елімізде спорт саласының дамуына қосқан елеулі үлесі үшін І дәрежелі «Барыс» орденімен наградталған.Бақтияр Ғарифоллаұлы бұған дейінде Жамбыл облысының дене шынықтыру, спорт және туризм басқармасын басқарып, спорт саласының дамуына сүбелі үлес қосқан.Облыс әкімі жаңа басшыға өңірдегі бұқаралық спортпен айналысушылар үлесін арттыруды, командаларды даярлауды және олардың республикалық, халықаралық спорттық жарыстарда өнер көрсетуiн қамтамасыз етуді тапсырды. Білім беру ұйымдарының спорт ғимараттарында сабақтан тыс, кешкі уақытта спорт секциялары жұмысын үйлестіруді және спорттық іс-шаралар өткізуді, «Damu bala» бағдарламасы аясында жан басына шаққанда қаржыландыру мәселесін жүйелендіруді, басқа да міндеттерді айқындап берді.Ақпарат көзі : https://www.gov.kz/memleket/entities/kyzylorda/press/news/details/900291

ҚР Премьер-министрі Олжас Бектеновтің төрағалығымен құрылыс саласын, трансшекаралық хабтарды дамыту мәселелері талқыланған Үкімет отырысы өтті. Жиынға облыс әкімі Нұрлыбек Нәлібаев селекторлық режим арқылы қатысты.Үкімет отырысынан кейін аймақ басшысының төрағалығымен өткен мәжілісте көтерілген мәселелерге орай жауапты сала жетекшілеріне бірқатар тапсырма жүктелді.–Биылғы 10 айда құрылыс жұмыстарының көлемі 193 млрд. 900 млн. теңге болып, өңіріміз республикада бірінші орынға тұрақтады. Құрылысқа мемлекеттік бюджеттен 128 млрд. 500 млн. теңге бөлініп, 197 нысан салынуда.Ендігі міндет – басталған жұмыстарды аяқтап, нысандарды пайдалануға беру. Бекітілген эскиздік жобадан ауытқымауды, ішкі әрлеудің сапасын қатаң бақылауға алыңыздар. Тұрғын үйлердің де сапасына және инженерлік инфрақұрылыммен қамтылуына баса мән берілсін», – деді Н.Нәлібаев.Биыл «Тұрғын үй-коммуналдық инфрақұрылымды дамытудың 2023-2029 жылдарға арналған тұжырымдамасы» аясында қаржыландырудың барлық көзінен 701,6 мың шаршы метр тұрғын үйді пайдалануға беру жоспарланған болатын. Экономикалық өсімді қамтамасыз ету жөніндегі іс-қимыл жоспарына сәйкес 863,9 мың шаршы метр тұрғын үй салу межеленіп, жоспар артығымен орындалуда. Жыл басынан бері 772,6 мың шаршы метр тұрғын үй пайдалануға беріліп, өткен жылдың сәйкес кезеңімен салыстырғанда 109,9% құрады.Бүгінде 1 мектеп қолданысқа берілді, қалған 3-і жыл соңына дейін пайдалануға қабылданса, 6 мектепті алдағы жылы іске қосу жоспарлануда. «Ауылда денсаулық сақтауды жаңғырту» ұлттық жобасы бойынша 15 нысанның құрылысын жүргізуге бюджеттен 5,2 млрд.теңге қаржы бөлінді. «Ауыл – ел бесігі» жобасы аясында 1 дәрігерлік амбулатория, 8 спорт кешені, 4 ауылдық клуб, 8 инженерлік желі салуға 1,5 млрд.теңге берілген. Ал тұрғын үй құрылысына және жеке салушылардан дайын пәтерлер сатып алуға 39,1 млрд. теңге қаралып, жыл қорытындысымен 2 500-ге жуық пәтер табысталмақ.Қызылорда қаласындағы Сырдария өзенінің сол жағалауында жеті қабатты 6 кредиттік үй пайдалануға берілді. Тұрғын үй кезегінде тұрған азаматтардың баспана мәселесін шешу үшін жеке құрылыс салушылардан 1954 дайын пәтер сатып алу жоспарланған. Бүгінде 1060 пәтер сатып алынды, оның 317-сі Қызылорда қаласында, қалған 538-і аудандарда.Алдағы жылы бес қабатты 10 тұрғын үй пайдалануға беріліп, жеті қабатты 10 тұрғын үй құрылысы басталмақ. Сонымен бірге, республикалық бюджет қаржысы есебінен халықтың әлеуметтік осал топтары үшін 275 жаңа пәтер сатып алу қарастырылған.Мәжіліс қорытындысында аймақ басшысы қала, аудан әкімдеріне төтенше жағдайлар департаментімен бірлесіп, алдағы мерекелер қарсаңында баға тұрақтылығын, коммуналдық қызметтердің үздіксіз жұмысын, қауіпсіздік шараларын рейдтік тексеруді тапсырды.Ақпарат көзі : https://www.gov.kz/memleket/entities/kyzylorda/press/news/details/901368

Тәуелсіздік күні қарсаңында облыс әкімі Нұрлыбек Нәлібаевтың қатысуымен Қармақшы ауданында алғашқы «Руханият орталығының» салтанатты ашылу рәсімі өтті.Мерекелік іс-шараға облыстық мәслихат төрағасы Мұрат Тілеуімбетов, облыстық ардагерлер кеңесінің төрағасы Серік Дүйсенбаев, мемлекет және қоғам қайраткерлері Бақберген Досмамбетов, Бекмырза Еламанов, Биғали Қаюпов, «Қоғам» телеарнасының құрылтайшысы, ақын Шәкизада Әбдікәрімов, «Сыр елі әйелдер кеңесі» қоғамдық ұйымының төрайымы, білім саласының ардагері Райкүл Байназарова, жауапты сала басшылары мен аудан тұрғындары қатысты.Аймақ басшысы жұртшылықты жаңа нысанның ашылуымен құттықтап, әлеуметтік-экономикалық бағыттағы жетістіктерге тоқталды.«Бүгін – ғасырлардың үнін жаңғыртып, халқымыздың қазынасын еселеген Сыр руханияты үшін айтулы күн. Ең алдымен, баршаңызды мыңжылдықтардың мұраты, Алаштың асқақ арманы болған Тәуелсіздік күнімен шын жүректен құттықтаймын!Мемлекет басшысы Қасым-Жомарт Кемелұлы «Еліміздің рухани дамуы ұлттық рухқа тікелей байланысты. Сол себепті азаматтарымыздың рухы әрқашан биік болуы үшін мәдениетімізге, руханиятымызға баса мән беруіміз қажет» деген болатын.Биыл өңірімізде «Руханият жылы» жарияланып, айшықты жыл аясында мәдени-көпшілік шаралармен қатар, ауқымды жобалар жүзеге асырылуда. «Анаға тағзым», «Отбасы орталығы», көпфункционалды 1000 орындық «Өнер орталығы» салынып, жаңадан симфония оркестрі, инклюзивті театр, Жастар театры, заманауи би, хор ұжымдары жасақталды.Сыр мәдениетінің негізгі бренді – жыраулық дәстүр өкілдерінің «Жыраулар үйі» ашылды. Құрылысы қарқын алған облыстық тарихи-өлкетану музейі келесі жылы наурыз айында пайдалануға беріледі.Биылғы «Руханият жылы» аясында барлық 7 ауданда құны 11 млрд. 500 млн. теңге болатын, ішінде неке қию залы, кітапхана, музей, архив, жастар сарайы, ардагерлер мен аналар үйі бар «Руханият» орталықтары салынуда. Мақсатымыз әртүрлі бағытта қызмет көрсететін мекемелерді бір орталыққа біріктіру арқылы бюджет қаражатын тиімді басқару, әкімшілік шығындарды азайту болды. Жыл соңына дейін тағы 5 ауданда «Руханият орталықтары» жұмысын бастайды. Қалған 2 орталық келесі жылдың наурыз айында ел игілігіне беріледі.Ең бастысы бұл орталықтарда ұлттық құндылықтар мен салт-дәстүріміз кеңінен насихатталып, өскелең ұрпақтың өзі туып-өскен өңір тарихы, ұлттың бай қазынасы туралы танымы қалыптасады. Барша жерлестерді «Руханият орталығының» ашылуымен тағы да құттықтаймын! Жаңа нысан еліміздің рухани қазынасын толықтырып, жұртшылыққа қуаныш сыйласын. Ұлттық құндылықтарымыз ұлықталып, Тәуелсіз еліміздің абыройы әрқашан асқақ болсын!» – деді Н.Нәлібаев.Жиында аймақтың руханият саласындағы ауқымды жұмыстарға тоқталған Шәкизада Әбдікәрімов пен Бақберген Досмамбетов ақ батасын берді.Сонымен қатар, ауданның өсіп-өркендеуі жолында еңбек еткен ардагерлер мен орталықты салған құрылысшылар облыс әкімінің Алғыс хатымен марапатталды.Айта кетейік, облыс орталығынан балалар мен жасөспірімдердің шығармашылығын шыңдау мақсатында «Шығармашылық академиясы», халықаралық стандарттарға сай келетін 11 мың орындық «Орталық стадион» салынуда. Жаңа нысандар келесі жылдың мамыр айында пайдалануға беріледі. Жабық бассейні бар көпсалалы денешынықтыру-сауықтыру кешені бой көтереді, жақын арада «Қызылорда Арена» көпбейінді спорт кешенінің құрылысы басталады.«Самұрық қазына траст» қорымен бірге «Үстел теннисі орталығы», «ҚазГермұнай» компаниясының демеушілігімен 350 орындық «Оқушылар сарайы» салынып, жұмысын бастап кетті.Ақпарат көзі : https://www.gov.kz/memleket/entities/kyzylorda/press/news/details/901380

Тәуелсіздік күні қарсаңында Қармақшы ауданына жұмыс сапарымен барған облыс әкімі Нұрлыбек Нәлібаев әлеуметтік осал топ санатындағы отбасылар үшін салынған 106 пәтерлік 53 жаңа тұрғын үйдің кілтін иелеріне табыстады.Рәсімге жауапты сала басшылары, қоғам қайраткерлері мен аудан тұрғындары қатысты.Аймақ басшысы жаңа пәтерге қоныстанушыларды құттықтап, өңірдің құрылыс саласының жетістіктеріне тоқталды.«Президентіміздің, Үкіметтің қолдауымен өңірімізде тұрғын үй құрылысы қарқынды, баспанамен қамту мәселесі кезең-кезеңімен шешімін табуда.Биыл бюджеттен тұрғын үй құрылысына және жеке салушылардан дайын пәтерлер сатып алуға 39 млрд. 100 млн. теңге қаралып, жыл қорытындысымен 2500-ден астам пәтер беріледі. Ұлттық жоба аясында 1154 пәтерлік 21 тұрғын үйдің құрылысы жүргізілуде. Әлеуметтік жағынан осал топтар үшін 1819 пәтер, апатты үйлер орнына 135 пәтер сатып алу жоспарланса, бүгінде 1114-і сатып алынды. Соңғы екі жылда 4 мыңға жуық пәтер табысталып, 17 мың тұрғынның баспана мәселесі шешімін тапты.Аймақта тұрғын үй құрылысының көлемі 126 пайызға өсті. Бұл көрсеткіш 2022 жылы 683 мың шаршы метр болса, биыл жыл соңына дейін 864 мың шаршы метрге ұлғаятын болады.Халықты тұрғын үймен қамтамасыз ету бағытында Қармақшы ауданында нәтижелі жұмыстар жүргізілуде. Өткен жылы аудан бюджеті 13 млрд. 353 млн. теңге болса, биыл 17 млрд. 825 млн. теңгеге жетіп, 25 пайызға өсім қалыптасты. Бұл қаржы аудан тұрғындарының өзекті мәселелерін шешуге бағытталуда. Биыл 2 млрд 100 млн. теңгеден астам қаржыға автомобиль жолдары жөндеуден өтті.Жосалы кентіндегі теміржол үстінен өтетін аспалы көпірдің құрылысын бастауға мемлекеттік сатып алу жүргізілуде. Тұрғындарды газбен қамтуға ерекше мән беріп келеміз. Жосалы, Төретам кенттері мен Ақай ауылдық округі «көгілдір отынға» қосылды, аудан халқының 77,5 пайызы табиғи газ қолдануда. Аудан орталығындағы «Тәуелсіздік» ықшам ауданы газдандырылып, Дүр Оңғар ауылдық округінде жұмыс басталды.Елді мекендерді сапалы ауыз сумен қамтуда өткен жылы Көмекбаев, Алдашбай ахун, Қармақшы елді мекендерінде 3 жоба жүзеге асса, биыл Байқоңыр қаласында 1 жоба қолға алынды.Жаңа қоныс құтты болсын! Баспаналарыңыз бақыт пен шаттыққа толып, балалардың қуанышы еселене берсін!» – деді Нұрлыбек Нәлібаев.Іс-шарада құрылыс мекемесінің мамандарына облыс әкімінің Алғыс хаты табысталып, мемлекет және қоғам қайраткері Бекмырза Еламанов батасын берді.Рәсімнен кейін аймақ басшысы тұрғындармен кездесті. Әлеуметтік-экономикалық дамудың бағыт-бағдары, инфрақұрылымдық жобалардың жүзеге асу барысы туралы айтып, жиналған жұртшылықтың ұсыныс-пікірлеріне ден қойды.Ақпарат көзі : https://www.gov.kz/memleket/entities/kyzylorda/press/news/details/901387

Қазақстан Республикасы Премьер-министрінің кеңесшісі Ермек Маржықпаев Сыр еліне жұмыс сапарымен келіп, аймақтың жол-көлік инфрақұрылымын дамытуда атқарылған жұмыстардың барысын көрді. Облыс әкімі Нұрлыбек Нәлібаев алдымен «Қорқыт ата әуежайының» жаңа терминалымен таныстырды.Терминалға «Болат Өтемұратов қоры» әлеуметтік жауапкершілік шеңберінде 16 млрд 600 млн теңге инвестиция салды. Әуежайдың инженерлік-коммуникациялық инфрақұрылымына, автожол салуға, аумағын абаттандыруға, жарықтандыруға жергілікті бюджеттен 4 млрд. 300 млн теңгеден астам қаражат бөлінді. Халықаралық талаптарға сай келетін жаңа нысанда ішкі және халықаралық рейстерге, транзиттік жолаушыларға арналған, CIP залдары, жүкті автоматты түрде беру жүйесі, «Duty Free» аймағы, сауда нүктелері, медпункт, кафе, ғибадат ету, жүк сақтау, ана мен бала бөлмелері бар. Екі қабатты ғимаратта сағатына 250 жолаушыға 10 төлқұжат бақылау кабинасы арқылы қызмет көрсетіледі.Айта кетейік, «Қорқыт Ата әуежайы» соңғы 9 айда жолаушылар мен жүк тасымалында жақсы нәтижелерге қол жеткізді. Қаңтар-қыркүйек айларында әуежайда 264 506 жолаушыға қызмет көрсетіліп, өткен жылдың сәйкес кезеңімен салыстырғанда 20%-ға артқан. Сонымен қатар, осы уақыт аралығында рейстер саны 1420-ға жеткен. Бұл «Қорқыт Ата әуежайы» көрсеткіштерінің тұрақты өсімін және әуе тасымалының жоғары белсенділігін растайды.Ермек Маржықпаев аса маңызды инфрақұрылымдық жоба – жаңа терминалдың ел игілігіне қызмет етуіне тілектестік білдірді.Жұмыс сапары аясында Премьер-министрінің кеңесшісі Қызылорда қаласындағы бірқатар әлеуметтік нысандардың жұмысымен танысады деп жоспарлануда. Ақпарат көзі : https://www.gov.kz/memleket/entities/kyzylorda/press/news/details/901392

Сыр өңіріне жұмыс сапарымен келген Қазақстан Республикасы Премьер-министрінің кеңесшісі Ермек Маржықпаев қала аумағындағы құрылыс нысандарын аралады. Облыс әкімі Нұрлыбек Нәлібаев алдымен сол жағалаудағы «Үстел теннисі орталығының» жұмысымен таныстырды.Орталықтың құрылысы «Samruk Kazyna Trust» әлеуметтік жобаларды дамыту қорымен бірге жүзеге асырылды. Қазіргі уақытта орталықта 16 үстел теннисі алаңы, 350 көрерменге арналған орындар, жаттығу залы мен әкімшілік бөлмелер бар, 31 қызметкер жұмыс істейді.Әрі қарай Премьер-министр кеңесшісі жаңа стадионның құрылыс барысын,бас мердігер «ВД строй-инжиниринг», бас жобалаушы «Жоба», техникалық қадағалаушы «Строй-проф» серіктестіктері атқарған жұмыстарды көрді. Стадион алдағы жылы пайдалануға беріледі деп жоспарлануда.Ермек Маржықпаев шыны зауытының жұмысымен де танысты. Мұнда жылына 197,1 мың тонна шыны өндіріліп, Ресей, Өзбекстан, Қырғызстан және Тәжікстан елдеріне экспортталады. Зауытта 373 маман еңбек етеді.Сонымен қатар, аймақ басшысы «Қызылорда Саз М» ЖШС қолға алған заманауи кірпіш зауытының құрылысымен таныстырды. Өңірлік үйлестіру кеңесінің шешімімен жобаға мемлекеттік қолдау көрсетіліп, Қызылорда қаласындағы «Өндіріс» индустриялық аймағынан 7 гектар жер телімі берілді. Құны 2,3 млрд теңге болатын зауытта жылына 90 млн дана кірпіш шығарылады деген жоспар бар. Іргетасы жыл соңына дейін құйылып бітеді. Құрылыс алаңында 20 жұмысшы, 11 техника жұмыс жасауда. Зауытқа қажетті қондырғылар осы айда түгел жеткізіліп, алдағы жылдың ақпан айында монтаждалады. Бұл зауыттың басқалардан ерекшелігі – өндіріс толығымен автоматтандырылған.Премьер-министр кеңесшісі барған келесі нысан – жаңа жылу-электр орталығының құрылыс алаңы. Мемлекет басшысының еліміздегі жылу-электр орталықтарының жұмысын жандандыру тапсырмасымен қуаттылығы 240 мегаваттық жаңа жылу-электр орталығының құрылысы қарқынды жүруде. Оған «Акса Энерджи» түрік компаниясы 127 млрд.теңге инвестиция салды. Орталық келер жылдың қыркүйек айында ел игілігіне табысталады. Пайдалануға берілгеннен кейін 773 қызметкер озық технологиялармен жабдықталған заманауи ғимаратта жұмыс істейтін болады.Мұнан бөлек, аймақ басшысы Қызылорда қаласындағы Тәуелсіздіктің 25 жылдығы көшесін жаңғырту барысымен таныстырды. Ұзындығы 6,71 шақырым, ені 14 метр төрт жолақты жолды «УАД» ЖШС жаңғыртуда. Техникалық қадағалаушысы «ЗКА Проект», авторлық қадағалаушысы «КБ МұнайГаз Инжиниринг» серіктестіктері.Айта кетейік, биыл Қызылорда облысында республикалық және облыстық бюджеттен бөлінген 44 млрд. 703 млн теңгеге 300 шақырым автомобиль жолы жөндеуден өтті. Облыс орталығының негізгі көшелері – әуежайдан Бейбарыс сұлтан көшесіне дейінгі аралық, қалаға Шиеліден кіреберіс жол, Яссауи, Жаппасбай батыр магистральді көшелері, Тәуелсіздіктің 25 жылдығы даңғылы төрт жолақты болып кеңейтілді. Қызылорда қаласында Жанқожа батыр көшесі арқылы өтетін теміржол асты автожолы, Арал, Жаңақорған аудандарында теміржол үстінен аспалы көпір құрылыстары жүруде.Сонымен қатар жылдар бойы күн тәртібінен түспеген «Қызылорда-Жезқазған» автожолы Президенттің тікелей тапсырмасымен қайта жаңғыртылуда. Қызылорда облысының аумағына тиесілі 216 шақырым жолдың 140 шақырымы аяқталды. Қалған бөлігі 2026 жылы ел игілігіне беріледі. Ақпарат көзі : https://www.gov.kz/memleket/entities/kyzylorda/press/news/details/901407

Бүгін Премьер-министрдің орынбасары Тамара Дүйсенова, облыс әкімі Нұрлыбек Нәлібаев облыстық көпбейінді ауруханада медицина қызметкерлерімен кездесті. Жиынға салалық министрліктің өкілдері, өңірдегі денсаулық сақтау саласының қызметкерлері қатысты.Аймақ басшысы Нұрлыбек Нәлібаев мәжілісті жүргізіп, тұрғындарға медициналық қызмет көрсету сапасын арттыру мәселесіне тоқталды.«Мемлекет басшысы Қасым-Жомарт Кемелұлы 2022 жылы Қазақстан Республикасы Президенті лауазымына кіріскеннен кейін ең бірінші «Ауылдық аумақтарды дамытудың 2023-2027 жылдарға арналған тұжырымдамасы туралы» Жарлыққа қол қойды. Елімізде «Ауылда денсаулық сақтауды жаңғырту» ұлттық жобасы, «Ауыл – ел бесігі» мемлекеттік бағдарламасы сәтті жүзеге асырылуда. Биыл облыстың медицина саласына 146 млрд. 200 млн. теңге қаржы бөлініп, ауқымды жұмыстар атқарылуда. Өткен 11 айдың қорытындысымен негізгі көрсеткіштерде оң динамика қалыптасты. «Ауылда денсаулық сақтауды жаңғырту» ұлттық жобасымен 27 медициналық нысан салу жоспарланып, өткен жылы 15 дәрігерлік амбулатория, 1 медициналық бекет ел игілігіне табысталды. Қалған 11 нысанның құрылысы жақын күндері аяқталып, іске қосылады»,- деді Н.Нәлібаев.Мәжілісте Тамара Дүйсенова денсаулық сақтау саласындағы ауқымды жобаларға тоқталып, қатысушылардың ұсыныс-пікірлерін тыңдады. Сонымен қатар, Денсаулық сақтау вице-министрі Тимур Сұлтанғазиев, "Әлеуметтік- медициналық сақтандыру қорының" басқарма төрағасы Әбілқайыр Сқақов, облыстық денсаулық сақтау басқармасының басшысы Олжас Искаков сөз алып, атқарылған жұмыстар мен алдағы міндеттер туралы баяндады.Айта кету керек, өңірімізде 4 млрд. 500 млн. теңгеге төрт көпбейінді аудандық орталық аурухана жанынан қосымша құрылыс салу жоспарланған. Шиелі ауданында 30 төсектік инфекциялық бөлімше, Шиелі көпбейінді ауруханасының қосымша құрылысы басталды. Қалған қосымша құрылыстар келесі жылы бой көтереді.Облыс орталығында 36 млрд. 400 млн. теңгеге емханасы және онкологиялық бөлімшесі бар 300 орындық көпбейінді аурухананың құрылысы жүруде. Арал ауданы Сексеуіл кентінде 40 төсек-орынға, Жаңақорған ауданы Төменарық ауылында дәрігерлік амбулаториямен қоса 15 төсек-орынға арналған ауылдық аурухана құрылысы аяқталды. Жаңа нысандар жақын күндері ел игілігіне табысталады.Ана мен бала өмірін қорғау басты назарда. Жыл басында көпбейінді облыстық аурухана базасында жаңа МРТ аппараты іске қосылып, перинаталдық бөлім ашылды. Жаңақорған ауданында «Қамқорлық» оңалту орталығы пайдалануға берілді. Жақын күндері осындай орталық Арал ауданында ашылатын болады.Соңғы 2 жылда денсаулық сақтау мекемелеріне 225 санитарлық автокөлік табысталды.Ақпарат көзі : https://www.gov.kz/memleket/entities/kyzylorda/press/news/details/902471

Тәуелсіздік күні қарсаңында облыс әкімі Нұрлыбек Нәлібаев тұрғын үй кезегіндегі азаматтарға жеті қабатты 84 пәтерлік 6 жаңа тұрғын үйдің кілтін табыстады. Рәсімге Сыр өңіріне жұмыс сапарымен келген Премьер-министрдің орынбасары Тамара Дүйсенова, жауапты сала басшылары, еңбек ардагерлері мен қала тұрғындары қатысты.Аймақ басшысы жаңа пәтерге қоныстанушыларды құттықтап, өңірдің құрылыс саласының жетістіктеріне тоқталды.«Ел Президенті Қасым-Жомарт Кемелұлы өз Жолдауында «Елімізде бірыңғай тұрғын үй саясатын әзірлеу қажет. Негізгі қағидат – тұрғындар үшін баспананың қолжетімділігін арттыру» деген болатын. Мемлекет басшысының қолдауымен ұлттық жобалар аясында соңғы 2 жылда 4 мыңға жуық пәтер табысталып, 17 мың тұрғынның баспана мәселесі шешілді. Жыл басынан бері 1500-ден астам отбасы қоныс тойын тойлады. Биыл мемлекеттік бюджеттен бөлінген 34 млрд. 100 млн. теңгеге 2,5 мыңнан астам пәтер пайдалануға беріледі. Осылайша тұрғын үй құрылысының көлемі 126 пайызға өсті.Мемлекет басшысының қолдауымен аймағымыз бүгінде қарқынды құрылыс алаңына, өркенді өзгерістердің ордасына айналды. Өткен жылдан бері қаламызда жеті, тоғыз, он екі қабатты тұрғын үйлер бой көтеруде. Бүгін өздеріңізбен бірге тағы 500-ден астам отбасының қуанышын еселеп, баспана бақытына кенелгеніне куә боламыз! Шаңырақтарыңыз жылулық пен мейірімге, балалардың шат күлкісіне толсын!»– деді Н.Нәлібаев.Сыр өңірінде соңғы жылдары мақсатты бастамалар қолға алынып, ауқымды жобалар жүзеге асуда. Әлеуметтік-экономикалық дамудың барлық негізгі көрсеткіштерінде оң серпін сақталып, облыс республика бойынша алдыңғы қатарға тұрақтады. Екі жыл бұрын облыс бюджеті 364 млрд. теңге болса, бүгінде екі есе артып, 750 млрд. теңгеге жетті. Бұл ауқымды қаражат аймақтағы ең өзекті деген мәселелерді шешуге, тұрғындардың өмір сүру сапасын арттыруға және ауқымды инфрақұрылымдық жобаларды жүзеге асыруға жұмсалуда.Тұрғындарды электр энергиясымен қамту бағытында 38 жоба қолға алынған. Бұл тозған электр желілерін 66 пайыздан 62 пайызға төмендетеді. Елді мекендерді газдандыру бойынша 30 млрд. 500 млн. теңгенің 20 жобасы іске асуда. Жыл соңына дейін өңірді газбен қамту көрсеткіші 78 пайызға жетеді. Тұрғындарды орталықтандырылған ауыз сумен қамтуға бағытталған 5 млрд. 300 млн. теңгенің 13 жобасы бар. Сондай-ақ, 43 млрд. 300 млн. теңгеге 300 шақырымнан астам автомобиль жолдары жөндеуден өтуде. Осылайша облыс аумағындағы жақсы жағдайдағы жолдардың үлесі 92 пайыздан аспақ.Ақпарат көзі : https://www.gov.kz/memleket/entities/kyzylorda/press/news/details/902846

Қазақстан Республикасы Премьер-Министрінің орынбасары Тамара Дүйсенова Қызылорда облысына жұмыс сапары барысында спорт мекемелерінің басшыларымен кездесті.Кездесуде өңір басшысы Нұрлыбек Нәлібаев, спорттық инфрақұрылымды дамыту жұмыстарына, алдағы жобалар мен қолға алынып жатқан бастамаларға тоқталды.< br>- Облыста ҚР Туризм және спорт министрлігімен үйлестірілген жұмыстар жүргізіліп, ауқымды іс-шаралар өткізілуде. – деді Н.Нәлібаев – Бар 1490 спорт нысаны. Халықты спорттық ғимараттармен қамтамасыз ету 44 пайызды құрап, 328 597 адам дене шынықтырумен және спортпен тұрақты айналысады. Облыстағы 22 спорт мектебінде 640 жаттықтырушы-педагог жұмыс істейді, 22266 бала жаттығады. Биыл қызылордалық спортшылар әлем және Азия чемпионаттары мен кубоктарында 120 медаль, Қазақстан Республикасының чемпионаттары мен кубоктарында 808 медаль жеңіп алды.Ақпарат көзі : https://www.gov.kz/memleket/entities/kyzylorda/press/news/details/903084

Құрметті отандастар!Баршаңызды 16 желтоқсан – Тәуелсіздік күнімен шын жүректен құттықтаймын!Тәуелсіздік – еліміздің ең басты мерекелерінің бірі. Бұл күн ерекше мән-мағынаға ие. Халқымыз үшін елдік пен егемендіктен асқан байлық жоқ.Азаттықтың арқасында Қазақстанда татулық пен тұрақтылық, бейбітшілік пен келісім орнады. Тәуелсіздік жылдары жарқын жетістіктерге қол жеткізіп, мемлекеттігіміз нығая түсті. Шекарамыз бекітіліп, қаржы-экономикалық көрсеткіштеріміз қарқынды дамыды. 16 желтоқсан – ұлтымызды ұйыстыратын, жұртымызды жұмылдыратын, абыройымызды асқақтататын мәртебесі биік мейрам.Осынау мерекеде сіздерге зор денсаулық, қажымас қайрат, отбасылық бақыт, қызметте толайым табыс тілеймін!Тәуелсіздігіміз ғұмырлы, туымыз тұғырлы болсын! Құрметпен, Мәди Такиев Ақпарат көзі : https://www.gov.kz/memleket/entities/minfin/press/news/details/903396

«Қайтарылған активтерді басқару компаниясы» ЖШС-нің негізгі міндеті – арнайы мемлекеттік қорды толықтыруға бағытталған активтерді сату.Сондай-ақ, активтерді басқарудың әртүрлі тәсілдері қолданылады, оның ішінде мүлікті жалға беру, сенімгерлік басқару, сондай-ақ Қазақстан Республикасының заңнамасына және актив орналасқан елдің заңнамасына сәйкес Басқарушы компания айқындайтын өзге де әдістер.Ақпарат көзі : https://www.gov.kz/memleket/entities/minfin/press/news/details/903992

«Қайтарылған активтерді басқару компаниясы» ЖШС активтерді өткізу үшін бекітілген ережелерді қатаң сақтай отырып, заманауи және ашық әдістерді қолданады.Активтер E-Qazyna веб-порталында аукцион нысанындағы электрондық сауда-саттық арқылы сатылады. Бұл аукционға қатысқысы келетін кез келген адамға ашық қолжетімділікті қамтамасыз етіп, әділ бәсекелестік жағдайларын жасайды.Ақпарат көзі : https://www.gov.kz/memleket/entities/minfin/press/news/details/903993

Биыл Қазақстан волонтерлікті дамытуда айтарлықтай жетістіктерге қол жеткізді. Халықаралық стандарттарға бейілділігін растап, қоғамдық маңызды міндеттерді шешуде волонтерлердің рөлін нығайтты.Бүгінгі таңда елімізде 755 волонтерлік ұйым, 2 мың бастамашыл топ, 275 мың белсенді волонтер, оның ішінде 3,5 мың «Күміс» волонтер белсенді жұмыс істейді.Азаматтардың волонтерлік қозғалысқа белсенді қатысуы және мемлекет тарапынан бұл үшін жағдай жасауы елдегі волонтерліктің дамуына ықпал етті. Үкімет Қазақстан Республикасының 2024-2026 жылдарға арналған волонтерлікті дамыту мен қолдаудың жаңа Жол картасын бекітті.Оны іске асыруда әлеуметтік және медициналық волонтерлік, экологиялық және ЗОО волонтерлік, білім беру және медиа саласындағы волонтерлік, төтенше жағдайлар салдарын жою саласындағы волонтерлік және басқа да салаларда салалық волонтерлікті дамытуға баса назар аударылды.Елімізде Ұлттық фронт-кеңсе және өңірлік 20 волонтерлік фронт-кеңсесі өз қызметін белсенді жүзеге асырып келеді, олар ұйымдастырушылық, ақпараттық және ресурстық қолдау көрсетеді, сондай-ақ еріктілер топтарына, ұйымдарға және еріктілерге консультациялық көмек береді.2024 жылы 5,6 мыңнан астам іс-шара ұйымдастырылды. Бір жыл ішінде волонтерлік бойынша бірыңғай Call-орталық құрылып, оған 2095-тен астам өтініш келіп түсті. Бірыңғай онлайн «Qazvolonteer.kz» платформасы жұмыс істейді, онда 67 мыңнан астам ерікті тіркелген.2024 жылы мемлекеттік органдар волонтерлік қоғамдастықпен бірлесіп 55 жобаны іске асырды, сондай-ақ волонтерлік бастамаларды қолдау мақсатында 240 шағын грант берілді. Жобалар аясында 42 мыңға жуық түрлі форматтағы іс-шара өткізілді. 10 мың волонтер салалық волонтерлік бойынша оқудан өтті.Халықаралық волонтерлік белсенді дамып келеді. Ұлттық волонтерлер фронт-кеңсесінің жанында 2023 жылдан бастап Халықаралық волонтерлік орталық жұмыс істейді. Қыркүйек айында 7 Қазақстандық волонтер БҰҰ құрылымдарына Түркия, Кения және Таиланд сияқты елдерге жұмысқа жіберілді.Осы жылы 3-4 қазанда Астанада АӨСШК Жастар кеңесінің қолдауымен волонтерлер слеті өтті. Слет Азияның волонтерлері мен волонтерлік ұйымдары үшін ең ірі халықаралық іс-шаралардың біріне айналды. Оған АӨСШК-ға мүше 14 мемлекеттен (Қазақстан, Қырғызстан, Ресей, Шри-Ланка, Қытай, Бахрейн, Өзбекстан, Әзербайжан, Иран, Таиланд, Тәжікстан, Кувейт, Үндістан, Катар) 450 адам қатысты.ҚР Президенті Қ.Тоқаевтың тапсырмасы бойынша 2020 жылы Қазақстанның дамуына үлес қосқан үздік қазақстандық және шетелдік еріктілерді ынталандыру үшін «Жыл волонтері» халықаралық сыйлығы тағайындалды. 2020-2024 жылдар аралығында Қазақстан, Ресей, Өзбекстан және Қырғызстаннан 234 волонтер сыйлық алды.«Игі істер марафоны» жобасы іске асырылды, оның шеңберінде қазақстандықтар 50 мыңға жуық адамның қатысуымен 7 000 «Игі іс» жасады. Жоба аясында еріктілер 7 000 жануарға көмек көрсетті, 3 200 көшет отырғызып, 240 тонна қоқыс жиналды. 5 желтоқсанда 10 номинация бойынша жобаның 20 жеңімпазы марапатталды.2025 жылы осы бағыттағы жұмысты жалғастыру шеңберінде волонтерлік саласы бойынша қолданыстағы заңнаманы жетілдіру үшін жаңа тәсілдерді әзірлеу жоспарлануда.Сондай-ақ, халықаралық волонтерлер жылын өткізуге дайындық аясында Қазақстанда Ұлттық ұйымдастыру комитеті құрылып, іс-шаранының жоспарын әзірлейді. ҚР Мәдениет және ақпарат министрлігінің баспасөз қызметіАқпарат көзі : https://www.gov.kz/memleket/entities/mam/press/news/details/902358

Алматыда Қазақстан Жазушылар одағының 90 жылдық мерейтойына арналған салтанатты шара өтті. Оған Қазақстан Республикасының Мемлекеттік кеңесшісі Ерлан Қарин, Мәдениет және ақпарат министрі Аида Балаева, ТҮРКСОЙ халықаралық ұйымының бас хатшысы Сұлтан Раев, Еуразия Жазушылар одағының президенті Уфук Тузман қатысты.Мемлекеттік кеңесші Ерлан Қарин Қазақстан Республикасының Президенті Қасым-Жомарт Тоқаевтың Одақтың 90 жылдығына орай жолдаған құттықтау хатын оқып берді. Мемлекет басшысының хатында «Жазушылар одағы – руханиятымыздың алтын діңгегі. Бұл ұйым қаламгерлеріміздің кәсіби қауымдастығы ретінде төл әдебиетіміз бен мәдениетімізді өркендетуге және оны әлемге танытуға зор ықпал етеді. Сөз өнерінің қарашаңырағын ұлттық бірегейлігіміздің берік тұғыры деуге болады.Қазір біз ұлттың жаңа сапасын қалыптастырып жатырмыз. Озық ойлы ұрпақ тәрбиелеу ісінде зиялы қауым айрықша рөл атқаруы керек. Осы жауапкершілікті терең сезініп, адамгершілік құндылықтарды кеңінен дәріптеп жүрген барша қаламгерлерге шынайы ризашылығымды білдіремін» делінген.Бұдан соң Қырғыз Республикасы Президентінің кеңесшісі Арслан Қойшиев Қырғыз Республикасының Президенті Садыр Жапаровтың құттықтауын оқыды.Салтанатты шараға шетелден арнайы қонақтар – Түркия Жазушылар одағының Төрағасы Муса Казым Арыжан, Қытай Халық Республикасы Жазушылар одағы Басқармасының мүшесі, Қазақстанның құрметті жазушысы Әкбар Мәжит, Әзірбайжан Жазушылар одағының Төрағасы Анар Рзаев, Әзірбайжан Жазушылар Одағының хатшысы Рашад Мажитов, Өзбекстан Жазушылар одағы Төрағасының орынбасары Мажид Гайрат, Өзбекстанның Халық жазушысы Усманкул Азимов, швед жазушысы, әдебиет зерттеушісі Пауэль Фрийес, Қырғыз Республикасы Ұлттық Жазушылар одағының Төрағасы Қаныбек Иманалиев, Қырғызстанның Ел жазушысы, Қырғызстан Республикасы Президентінің кеңесшісі Арслан Қойшиев, Ресей жазушысы Андрей Рейзвых, Татарстан Жазушылар одағының Төрағасы Ркаил Зайдуллин, Башқұртстан Жазушылар одағының Төрағасы Айгиз Баймухаметов, Якутия Жазушылар одағының Төрағасы, «Чолбон» журналының бас редакторы Гаврил Андросов, Чуваш Республикасы Жазушылар одағы басқарма төрағасының орынбасары Василий Захаров, сондай-ақ еліміздің түкпір-түкпірінен келген ақын-жазушылар, қоғамдық ұйымдар мен кәсіпкерлік өкілдері де қатысты.Жазушылар одағының төрағасы Мереке Құлкенов өз баяндамасында «Бүгінде біз Әділетті Қазақстанға қадам бастық. Қазіргі қазақ әдебиеті де жаңару үстінде деп нық сеніммен айта аламыз. Тың да тосын тақырыптар, жаңа жанрлар, соны стильдер, амбициясы зор авторлар әдеби процеске жаңаша серпін беруде» деп атап өтті.Анықтама үшін:Қазақстан Жазушылар одағының тарихы 1934 жылы 12-18 маусымда Алматыда өткен Қазақстан Жазушыларының I Съезінен басталады. Әр жылдары Одақты белгілі қаламгерлер І.Жансүгіров, Ғ.Тоғжанов, С.Мұқанов, Т.Дүрімбетов, М.Қаратаев, Д.Әбілев, Ә.Тәжібаев, Ә.Жаймурзин, Ғ.Мұстафин, Ғ.Мүсірепов, Ә.Шәріпов, Ә.Әлімжанов, Ж.Молдағалиев, О.Сүлейменов, Қ.Найманбаев, Н.Оразалин, Ұ.Есдәулет басқарған.Қазіргі таңда Жазушылар одағы – 1015 мүшесі бар еліміздегі ең ірі шығармашылық бірлестіктердің бірі. Одаққа қарайтын «Қазақ әдебиеті» газеті, «Жұлдыз», «Простор», «Жалын» журналдары өнер мен әдебиеттің жаршысына айналды. ҚР Мәдениет және ақпарат министрлігінің баспасөз қызметіАқпарат көзі : https://www.gov.kz/memleket/entities/mam/press/news/details/902527

Қазақ ұлттық хореография академиясында Агриппина Ваганова атындағы Орыс балеті академиясының түлегі Вадим Рзаевтың шеберлік сыныбы өтті.Вадим Рзаев – классикалық және заманауи би өнерінде тәжірибесі мол өнерпаз. Ол әлемнің жетекші театр сахналарында жеке партиялар орындап, шетелдік танымал хореографтармен де бірлесе жұмыс істеген.«Хореографиялық өнер педагогикасы» және «Балетмейстер өнері» білім беру бағдарламасының студенттері мастер-классқа қатысып, болашағы үшін құнды тәжірибе жинады. Вадим Рзаев классикалық би техникасын, өзінің кәсіби әдістері мен тәсілдерін бөлісті.Бұл іс-шара – студенттердің кәсіби дағдыларын жетілдіруге және әлемдік хореографиялық өнер туралы білімдерін кеңейтуге бағытталған Академияның білім беру және мәдени бағдарламасының бір бөлігі. ҚР Мәдениет және ақпарат министрлігінің баспасөз қызметіАқпарат көзі : https://www.gov.kz/memleket/entities/mam/press/news/details/903176

Тәуелсіздік күні қарсаңында Түркістанда ÓzgeEpic креативті хабы ашылды. Бұл – еліміздегі он бірінші хаб. Шығармашылық кеңістік Мемлекет басшысының тапсырмасымен құрылған. Қасым-Жомарт Тоқаев креатив индустрияларды дамытуға ерекше назар аударып, Қазақстанның барлық ірі қалаларында хабтар ашу міндетін қойды.Салтанатты іс-шараға ҚР Парламентінің депутаттары, ҚР Мәдениет және ақпарат министрлігінің өкілдері, «Қазпошта» АҚ, жергілікті атқарушы органдар және өңірдің креаторлары қатысты.Түркістандағы креатив хаб ҚР Мәдениет және ақпарат министрлігі мен «Қазпошта» АҚ арасындағы келісім аясында ашылды. Орталық акционерлік қоғам филиалдарының бірінде орналасқан. Ынтымақтастық бойынша ортақ жобалар жасалатын болады.Хабтың ашылуында инклюзивті креатив индустриясын қолдауға бағытталған «Көрінбейтін әлем» көрмесі де ұсынылды.Аталмыш алаңның ауданы – 400 шаршы метр. Негізгі назар түрлі халықтардың қолөнер туындыларына аударылған.Түркістан облысында барлығы 1341 креатив индустрия субъектісі тіркелген. Өңір киім тігу және аксессуарлар жасау бағыттары бойынша көш бастап тұр. ҚР Мәдениет және ақпарат министрлігінің баспасөз қызметіАқпарат көзі : https://www.gov.kz/memleket/entities/mam/press/news/details/903256

Алматыда «Қоғамдық сенім және әлеуметтік капитал» тақырыбында V халықаралық конференция өтті.Іс-шарада спикерлер Азаматтық қоғамды дамыту тұжырымдамасын өзектендіру шеңберінде жүргізілген әлеуметтанушылық зерттеулердің қорытындыларымен және азаматтардың мемлекетке деген сенімін нығайтуға бағытталған жұмыстармен бөлісті.Айта кетейік, ашықтық пен айқындық қағидаттарын тиімді іске асыру мақсатында биылғы сәуір айынан бастап «Қоғамдық бақылау туралы» ҚР Заңы заңды күшіне енді.Сондай-ақ, Қоғамдық кеңестің мүшелері 2025 жылы өкілеттік мерзімінің аяқталуына байланысты құрамы 80%-ға жаңартылмақ. Осыған орай Қоғамдық кеңестің 3 мыңнан астам мүшесінің қатысуымен 20-ға жуық оқыту семинарларын өткізу жоспарланған.Конференцияға ҚР Президенті жанындағы Ұлттық ғылым академиясының, БҰҰ-ның Жаһандық коммуникациялар департаментінің, халықаралық және қазақстандық қоғам қайраткерлерінің, мемлекеттік органдардың өкілдері қатысты. ҚР Мәдениет және ақпарат министрлігінің баспасөз қызметіАқпарат көзі : https://www.gov.kz/memleket/entities/mam/press/news/details/903283

2024 жылғы 9-13 желтоқсан аралығында Астанада Қазақстан Республикасының Мәдениет және ақпарат министрлігінің қолдауымен Қазақ ұлттық өнер университеті ұйымдастырған жас «Astana Piano Passion» II Республикалық жас пианистер байқауы өтті.Байқау ұлттық фортепиано мектебін дамыту, дарынды жас музыканттарды анықтау және қолдау, классикалық, академиялық музыканы, фортепианолық орындаушылықты және Қазақстан композиторларының музыкасын дәріптеу мақсатында өткізілді.Конкурсқа Қазақстан Республикасының мәдениет және өнер саласындағы білім беру ұйымдарында «Фортепиано» мамандығы бойынша білім алып жатқан, 7-18 жас аралығындағы жас пианистер қатысты.Байқау 4 жас санаты бойынша өтті. Олар – 7-9 жас, 10-12 жас, 13-15 жас және 16-18 жас аралығындағы өнерпаздар.Байқау аясында Беларусь мемлекеттік музыка академиясының арнайы фортепиано кафедрасының меңгерушісі, профессор Владимир Дулов пен Қазақстан Республикасының еңбек сіңірген қайраткері, халықаралық конкурстардың лауреаты Әмір Тебенихин шеберлік сабақтарын өткізді.Биыл байқауға Павлодар, Қарағанды, Өскемен, Ақтау, Алматы және Астана қалаларынан 60 жас пианист қатысты.Гран-при иегері – Даниал Дюсембаев (оқытушысы Асабаева Сара Шәкірқызы).«А» санаты (7-9 жас):І орын: Иса Аяла (оқытушысы Бейсембаева Гаухар Серікқызы).ІІ орын: Жарменов Рустам (оқытушысы Қосаманова Гүлназ Ғаянқызы) және Абдулла Жанболат (оқытушысы Мухамеджанова Гүлжәмилә Бурханқызы).ІІІ орын: Алиханова Томирис (оқытушысы Манжула Ольга Николаевна), Сәкенқызы Сана (оқытушысы Тоқтаған Ақдидар Айтжанқызы) және Тян Ратмир (оқытушысы Чечнёва Ольга Геннадьевна).«В» санаты (10-12 жас):І орын: Оңғарбаева Жансая (оқытушысы Здорнова Жанна Викторовна).ІІ орын: Нұрсұлтан Іңкәр (оқытушысы Жакеева Гүлнәра Сапиоллайқызы) және Көпбай Бексұлтан (оқытушысы Бекишева Хадича Искандарқызы).ІІІ орын: Дүйсекеева Аман (оқытушысы Даукеева Мензия Кенжебекқызы), Думитреску Марк (оқытушысы Цветцих Елена Валерьевна) және Каримов Алан (оқытушысы Сұрапбергенова Светлана Алмабайқызы).«С» санаты (13-15 жас):І орын: Ахметов Рауан (оқытушысы Жұмақова Ғафура Рахметоллақызы).ІІ орын: Алдабаев Марлен (оқытушысы Құсаинов Алтай Карпықұлы) және Шайхов Айдар (оқытушысы Кремер Евгения Андреевна).ІІІ орын: Азаматұлы Айтөре (оқытушысы Қаражігітова Шолпан Нариманқызы) және Булат Әдина (оқытушысы Сұрапбергенова Светлана Алмабайқызы).«D» санаты (16-18 жас):І орын: Мхитарян Ашот (оқытушысы Сұрапбергенова Светлана Алмабайқызы).ІІ орын: Нұғманқызы Дария (оқытушысы Ольга Каминская Михайловна) және Каменецкая Софья (оқытушысы Кремер Евгения Андреевна).ІІІ орын: Жанас Бекмырза (оқытушысы Измаилов Нұрлан Тохтарұлы), Жұманғарина Тоғжан (оқытушысы Асабаева Сара Шәкірқызы) және Дастан Елнар (оқытушысы Абдуллаева Әйгерім Оңдасынқызы) ҚР Мәдениет және ақпарат министрлігінің баспасөз қызметіАқпарат көзі : https://www.gov.kz/memleket/entities/mam/press/news/details/903302