Түркістан облысында өндіріс орындарын ашу, инвестиция тарту, индустриалды аймақтарды дамыту және көбейту жұмыстар жалғасып жатыр. Өңірде 1 700 гектардан тұратын өңірлік маңызы бар 14 индустриалды аймақ болса, оның ішіндегі 5-еуі соңғы 1 жылдың ішінде құрылды. Сонымен қатар Арыс қаласындағы «Мега-Агат» және Ордабасы ауданындағы «Бөкей» компанияларының ұсыныстары бойынша 2 жеке индустриалды аймақ құрылып, жұмыс істеп тұрған және жаңадан құрылған индустриалды аймақтардың саны 16-ны құрап отыр. Ол өндірістік аймақтарда бүгінгі күнге 120 млрд теңгені құрайтын 82 жоба жүзеге асырылуда.Түркістан облысының әкімі Нұралхан Көшеров индустриалды аймақтардың жұмысын жандандыру, жаңа жобаларды жүзеге асыру жөнінде мәжіліс өткізіп, өзекті мәселелерді талқылады. Жауапты басшыларға тиісті тапсырмалар берді.– Өңірде жаңадан құрылған және енді ашылатын индустриалды аймақтарды қажетті жермен, инфрақұрылыммен қамту жұмысын жүргізіңіздер. Жұмыс істеп тұрған индустриалды аймақтарға жаңа инвесторлар тартып, жобаларды көбейту маңызды. Аудан, қала әкімдері, жауапты басқарма басшылары осы бағытта жұмысты күшейтіңіздер. Жаңаша көзқарас, ізденіс, зерделеу жұмыстары қажет. Жерді алып, жұмысын бастамаған кәсіпкерлермен келісімді тоқтатып, жерді қайтару керек. Индустриалды аймақтарды абаттандыру, көгалдандыру, ретке келтіру мәселесі де назарда болсын, – деді Нұралхан Көшеров.Түркістан облысының кәсіпкерлік және өнеркәсіп басқармасының басшысы Нұржігіт Мырзахметов осы салада атқарылған жұмыстарды, көрсеткіштерді баяндады. Жаңадан ашылған және ашылуы жоспарланған индустриалды аймақтарды газ, электр, су және өзге де инфрақұрылыммен қамту, жер телімін алу мәселелері туралы айтты. Облыс әкімінің тапсырмасымен аудан және қала әкімдіктері жаңадан құрылатын индустриалды аймақтар бойынша ұсыныстарын берді. Жер телімдері инфрақұрылым нүктелеріне жақын орналасқан.Айта кетейік, Түркістан облысындағы өндірістік аймақтардағы жобалардың басым бөлігі құрылыс материалдарын өндіру, дайын металл өнімдерін өндіру, металлургия, машина жасау, жеңіл және жиһаз өнеркәсібі салаларына жұмылдырылған. 2024 жылы Өңірлік үйлестіру кеңесі тарапынан 18 инвестициялық жоба мақұлданып, индустриалды аймақтарға енгізілген.Түркістан облысы әкімінің баспасөз қызметіАқпарат көзі : https://www.gov.kz/memleket/entities/ontustik/press/news/details/935169

Түркістан облысы, Сайрам ауданында жаңа шағынаудан пайда болады. Аталған мәселе облыс әкімдігінде арнайы талқыланып, ұсыныстар мен жоспарлар тыңдалды. Түркістан облысының әкімі Нұралхан Көшеров құрылысты сапалы атқаруды тапсырды.– Бұл бастаманы қолдаймыз. Аудан әкімі жауапты басқармалармен бірге жұмысты жүйелі атқаруы керек. Бірінші кезекте инфрақұрылымды тарту қажет. Әрбір құрылыс нысаны, ғимараттар терең ойластырылып, сапалы салынуы тиіс, – деді Нұралхан Көшеров.Сайрам ауданының әкімі Арман Сәбитов жаңа шағынауданның жоспарымен таныстырды. Өңірдегі ең халық тығыз орналасқан әрі даму деңгейі жоғары ауданда тұрғын үй мәселесі өте өзекті. Сайрам ауданы, Қарасу ауылдық округі, Қарасу ауылындағы 57 гектар аумақта жаңадан құрылатын шағынауданда 5 қабатты 47 тұрғын үй (2820 пәтер), ауылдық әкімшілік ғимараты, тәулігіне 250 адам қабылдайтын заманауи емхана, Мәдениет үйі мен Жастар сарайы біріктірілген ғимарат, 600 орындық заманауи жаңа мектеп, 280 орындық балабақша, 6 коммерциялық нысан мен саябақ салу жоспарланған. Сонымен бірге мешіт салуға да орын қарастырылған.Жобаның мақсаты – халықтың өмір сүру сапасын жақсартып, тұрғын үйге мұқтаждығын азайту. Аудан әкімдігі тарапынан аталған нысандарды инженерлік-коммуникациялық жүйелерімен қамтамасыз ету мақсатында жобалау-сметалық құжаттары дайындалған.Түркістан облысы әкімінің баспасөз қызметіАқпарат көзі : https://www.gov.kz/memleket/entities/ontustik/press/news/details/935478

Премьер-министр Олжас Бектеновтің төрағалығымен өткен Үкімет отырысында көктемгі дала жұмыстарына дайындық мәселелері қаралды. Ағымдағы жағдай туралы ауыл шаруашылығы министрі Айдарбек Сапаров, ҚР энергетика министрі Алмасадам Сәтқалиев, сондай-ақ бірқатар өңірлердің әкімдері баяндады.2025 жылы 23,8 млн гектар алқапқа ауыл шаруашылығы дақылдарын егу жоспарлануда, бұл 2024 жылмен салыстырғанда 518 мың гектарға артық. Дәнді және бұршақты дақылдардың егістік алқаптары шамамен 16,6 млн гектарды құрайды (2024 жылы – 16,7 млн га). Майлы дақылдардың ауданы 365 мың гектарға артып, 3,3 млн гектарға жетеді, оның ішінде күнбағыс дақылдары 50,6 мың гектарға өсіп, 1,3 млн гектарға дейін жетеді. Сондай-ақ картоп алқабын 14,9 мың гектарға ұлғайтып, аумақты 136,8 мың гектарға дейін жеткізу жоспарлануда, ал қарақұмық дақылдары 41,5 мың гектарға артып, 147 мың гектарды құрайды. 2025 жылы қант қызылшасының ауданы 18,4 мың гектарды құрайды. Жемшөп дақылдарының ауданы 184 мың гектарға ұлғайып, 3,4 млн гектарға жетеді. Мақта дақылдары 135,2 мың гектарды, ал күріш – 90,2 мың гектарды құрайды.Биыл көктемгі-дала жұмыстарын ЖЖМ қамтамасыз ету үшін (МӨЗ-де өндіріс көлемін ескере отырып) 401 мың тонна дизель отыны бөлінді. Дизель отынын тиеп жөнелту бойынша МӨЗ-ге облыстарды бекіту кестесі бекітілді, сондай-ақ межелі стансаға дейін литріне 232 теңге мөлшерінде баға белгіленді.Операторлардың шығындарын ескере отырып, ауыл шаруашылығы тауарын өндірушілер үшін дизель отынының түпкілікті құны литріне 254 теңгені құрайды, бұл жанармай құю стансаларында литріне 295-300 теңгені құрайтын нарықтық бағадан 13-15%-ға төмен.Сонымен қатар Түркістан облысының әкімі Нұралхан Көшеров олардың өңірінде дала жұмыстарына кіріскенін хабарлады. Сондай-ақ Ақмола облысында, өңір әкімі Марат Ахметжановтың айтуынша, биыл картоп алаңын 352 гектарға ұлғайту жоспарлануда, ал жалпы картоп отырғызу 8,9 мың гектарды құрайды, бұл 2024 жылмен салыстырғанда 1,1 мың гектарға артық.Премьер-министр Олжас Бектенов Мемлекет басшысы аграрлық секторды экономикалық өсудің флагмандарының бірі ретінде дамытуға ерекше назар аударатынын еске салды. Премьер-министр өз баяндамасында экспортқа шығатын және нарықта сұраныс жоғары, көбірек табыс әкелетін дақылдардық алқаптарын кеңейтуге басымдық беру қажет екеніне баса назар аударды. Биыл егіншілік саласын қаржыландыру көлемі 700 млрд теңгеге дейін ұлғайтылды. Лизингке жұмсалатын қаражат 200 млрд теңгеге жеткізілді. Сондай-ақ жеңілдікпен 400 мың тоннадан астам дизель отыны бөлінді.Олжас Бектенов бұл шаралардың барлығы егіс науқанын ойдағыдай өткізуге бағытталғанын баса айтты.«Мемлекет егіс науқанын ойдағыдай өткізу үшін қажетті шаралардың барлығын қабылдады. Жұмыстарды нәтижелі әрі ұйымдасқан түрде жүзеге асыруымыз қажет. Ауыл шаруашылығы министрлігі жеңілдетілген несиені тиімділігі әрі жауапкершілігі жоғары диқандарды қолдауға бағыттауы керек», — деп атап көрсетті Премьер-министр. Бұл ретте ол бөлінген қаражаттың дұрыс жұмсалуы әкімдіктердің тұрақты бақылауында болуға тиіс екенін ескертті. Сонымен қатар оның айтуынша, егіншілерді сапалы және тексеруден өткен тұқым қорымен қамтамасыз ету маңызды. Ол үшін бірінші кезекте, отандық өндірушілерді ынталандыру қажет. Сондай-ақ көктемгі дала жұмыстарында агротехнологияларды қатаң сақтап, тыңайтқыштарды және өсімдіктерді қорғау құралдарын уақтылы қолдану керек. Қазақстанда тыңайтқыштар енгізу жоспары ғылыми негізделген норманың тек 59%-ын, ал ауыл шаруашылығы техникасының техникалық дайындығы – 75%-ды құрайды. Олжас Бектенов жаппай егін егу жұмыстары басталғанға дейін бұл көрсеткішті 100%-ға дейін жеткізіу қажет екенін атап өтті.Премьер-министр отырыс барысында министрліктер мен әкімдіктерге бірқатар тапсырмалар берді:Ауыл шаруашылығы министрлігі «Бәйтерек» холдингімен бірлесіп, егіншілерді тиімді мемлекеттік қолдау мақсатында несие мен субсидия беру рәсімдерін оңтайландыру және жеңілдету шараларын қабылдасын.Энергетика, ауыл шаруашылығы министрліктері мен өңір әкімдері арзандатылған отынның тиісті көлемін жеткізуді бақылауда ұстасын. Әкімдіктер бір апта мерзімде өңірлік операторлар бойынша толық деректерді берсін. Шаруаларға тиесілі отынның сатылып кетуіне жол беретін компаниялар мен жеке тұлғаларға қатысты қатаң шаралар қабылдауды тапсырамын.Су ресурстары министрлігі Ауыл шаруашылығы министрлігімен және әкімдіктермен бірге фермерлерді суармалы сумен үздіксіз қамтамасыз ету шараларын қабылдасын. Әкімдіктер қар тоқтату және су қорын жинау жұмыстарын жүргізуі қажет.Сондай-ақ Премьер-министр көктемгі егіс жұмыстарын уақтылы жүргізуді ерекше бақылауда ұстауды тапсырды.Ақпарат көзі : https://www.gov.kz/memleket/entities/ontustik/press/news/details/935948

Мемлекет басшысы Қасым-Жомарт Тоқаевтың бастамасымен қолға алынған «Таза Қазақстан» бағдарламасы аясындағы тазалық, абаттандыру және көгалдандыру жұмыстары Түркістан облысында жүйелі жалғасып келеді.Түркістан облысы, Сарыағаш ауданында тазалық жұмыстары тұрақты түрде жүргізіліп, аудан тұрғындары экологиялық мәдениетті қалыптастыруда.Бүгін «Таза қала» коммуналдық мемлекеттік мекемесі тарапынан Сарыағаш қаласы аумағындағы саябақтарға, балалар ойын алаңшаларына, әлеуметтік нысандар мен ескерткіштер маңына және гүлзарларға тазалық жұмыстары жүргізілді. Бей-берекет тасталған күл-қоқыстар жиналып, шөптер орылды. Бұл жұмыстарға 2 арнайы техника жұмылдырылып, 2 тоннаға жуық қоқыс полигонға шығарылды.Айта кетейік, Түркістан облысында «Taza Qazaqstan» платформасы сәтті іске асырылуда. Тазалық жұмыстарына қатысты өтінімдер @TazaQazBot telegram-бот арқылы қабылданады. Жұмыс алгоритмі бойынша операторларға түскен өтінімдер санаттарына сай әкімдік қызметкерлеріне жолданады. Орындаушы атқарылған жұмыстарды фотоға таспалап, платформаға жүктейді. Өтініш иесіне жауап сол мезетте telegram-бот арқылы түседі. Осылайша, тұрғындармен кері байланыс орнатылады.Түркістан облысы әкімінің баспасөз қызметіАқпарат көзі : https://www.gov.kz/memleket/entities/ontustik/press/news/details/935949

Мемлекет басшысы Қасым-Жомарт Тоқаев 2025 жылды «Жұмысшы мамандықтар жылы» деп жариялады.Түркістан облысының халқы еңбекқор. Аудан, қалаларда адал еңбекпен кәсіп дөңгелетіп жүрген азаматтар көп. Солардың бірі – сарыағаштық Ерғали Мұсабаев. Сарыағаш ауданына қарасты Мәдениет елді мекенінің тұрғыны 10 жылдан бері гүл өсірумен айналысады. Ісін жұбайымен бірге үй гүлдерін өсіруден бастаған кәсіпкер, бүгінде дала гүлдерін өсіруді де қолға алған. Бұл гүлдерді еліміздің түкпір-түкпіріне жөнелтуде.Шаруаның айтуынша, жыл он екі ай бойы өсіп, жайқалып тұратын гүлдердің көбейетін уақыты – қыс мезгілі. Жылыжайда бөлме гүлдерінің 10-ға жуық түрінен 50 мың түбі өсіп тұр. Ерлі-зайыптылар бөлме гүлдерін алдағы Наурыз мейрамына дайындап, өткізуге ниетті. Сондай-ақ кәсібін кеңейтуді жоспарлап, голландиялық гүл түрлерін өсіруді мақсат етіп отыр.Осылайша, адал еңбек пен төзімділіктің арқасында өз кәсібін гүлдендірген Мұсабаевтар отбасылық кәсіптің үлгісін көрсетіп келеді.Түркістан облысы әкімінің баспасөз қызметіАқпарат көзі : https://www.gov.kz/memleket/entities/ontustik/press/news/details/935951

Түркістан облысында «Жұмысшы мамандықтар жылын» өткізу жөніндегі өңірлік жоспар бекітілген. Бұл бағытта ауқымды шаралар жүзеге аспақ. Түркістан облысының әкімі Нұралхан Көшеровтің төрағалығымен өткен мәжілісте Президент тапсырмасын жүзеге асыру бойынша жүргізіліп жатқан жұмыстар талқыланды. Онда облыс әкімі барлық жауапты басшыларға нақты тапсырмалар берді.Облыстағы колледждер мен арнаулы білім орталықтарында мемлекеттік тапсырыспен оқытылып жатқан мамандықтарды қажетті жұмысшы мамандықтарына сәйкестендіруді, инвесторларға алдымен жергілікті мамандарды жұмысқа алу бойынша талап қоюды міндеттеді.Қазақстан Президенті өз Жолдауында 2025 жылды жұмысшы мамандықтар жылы деп жариялады. Бұл шешім жұмысшы кәсіптердің беделін арттыру, оларды жастар арасында танымал ету және кәсіптік білім беру жүйесін дамыту мақсатында қабылданды.– Мемлекет басшысы Қасым-Жомарт Тоқаев «Елімізде еңбекқор адам, кәсіби маман ең сыйлы адам болуға тиіс. Осындай азаматтар мемлекетімізді дамытады»,- деп атап көрсеткендей, еңбек адамы бүгінде көпке үлгі болуы тиіс. Жұмысшы мамандықтарының мәртебесін көтеріп, олардың қоғамдағы маңызын дәріптеуіміз керек. Жауапты басшыларға колледждер мен арнаулы білім орталықтарында мемлекеттік тапсырыспен оқытылып жатқан мамандықтарды қажетті жұмысшы мамандықтарына сәйкестендіруді тапсырамын. Өңірімізде іске асырылып жатқан жеке инвестиция жобаларына қажетті мамандықтарды айқындап, колледждерге кәсіби маман даярлауға ұсыныс енгізіңіздер. Жұмысшы мамандақтарын белсенді дамыту керек. Инвесторларға ең алдымен жергілікті мамандарды жұмысқа тарту бойынша талап қою қажет. Жұмысшы мамандардың әлеуметтік қорғалуы, жалақы мен еңбек жағдайларын жақсарту, олардың жұмысқа деген ынтасын арттырады. Осыған байланысты еңбек ақыны көтеру, еңбек қауіпсіздігін қамтамасыз ету шараларын жүзеге асыруды тапсырамын, – деді Нұралхан Көшеров.Ұлттық статистика бюросының дерегінше, өңірде еңбекке қабілетті адам саны 800 мыңнан асады. Соның ішінде 200 мыңнан астамы жұмысшы мамандығы бойынша жұмыс істейді. Мәжілісте баяндалғандай, бүгінгі таңда облыстағы жұмыс берушілерден 3600-дей жұмысшы мамандықтарға қажеттілік анықталған. Колледждерге бөлінетін мемлекеттік тапсырыс қалыптастыру барысы осы қажеттілікке қарай реттеледі. Яғни, қажетті мамандар еңбек нарығының сұранысына қарай даярланады.2025 жылға «Өңірлік жұмыспен қамту картасы» бекітіліп, 130 769 жұмыс орындарын ашу жоспарланды. Оның 57% -ы жұмысшы мамандықтар болмақ. «Ұлттық жобалар» аясында жүзеге асырылатын 375 жоба шеңберінде 4 мыңнан астам жұмыс орындары құрылады. «Еңбек» бағытындаға бос жұмыс орындары бойынша ашылатын 57 221 жұмыс орындары мен 32 448 субсидияланған жұмыс орындары бойынша да жұмысшы мамандықтарға басымдық беріледі.Облыс әкімінің тапсырмасына сәйкес, өңірде 125 инвестициялық жоба негізінде 2 мыңнан астам жұмыс орындары ашылуы көзделуде. Олардың тең жартысы – жұмысшы мамандар. Сұранысқа сәйкес жаңа жұмыс орындарына жолданатын азаматтарды қысқа мерзімдік кәсіптік оқытудан өткізу жоспарланды. Яғни, жеке инвестор өз базасында кәсіби оқытуды жүргізсе, оқытудың шығындары мемлекет тарапынан өтеліп, әрі қарай, жеке инвесторда тұрақты жұмыспен қамтылады. Бұдан бөлек, мақта өндіру саласын дамытып жатқан шетел инвесторына 1 400 жұмыс орындары ұсынылды.Бекітілген кестеге сәйкес, Түркістан облысында барлық аудан, қалаларында бос жұмыс орындары жәрмеңкелері ұйымдастырылуда. Онда 1500-ден астам бос жұмыс орындарын ұсынуда.Түркістан облысы әкімінің баспасөз қызметіАқпарат көзі : https://www.gov.kz/memleket/entities/ontustik/press/news/details/935957

Түркістан облысының әкімі Нұралхан Көшеров облыс орталығындағы Арнайы экономикалық аймақта құрылысы жүріп жатқан зауыттардағы жұмыспен, жобалармен танысты. Атқарылып жатқан істерді саралап, инвесторлармен алдағы жоспарлар жөнінде пікір алмасты.– Облыс әкімдігі тарапынан жер, инфрақұрылым, құжаттандыруға қатысты мәселелерді шешіп береміз. Сіздер әр жобаны уақтылы жүзеге асырып, іске қосуларыңыз керек. Жергілікті тұрғындардың жұмыспен қамтылуына мән беріледі. Мақсатымыз – өндірісті дамыту, – деді Нұралхан Көшеров.Өңір басшысы «PSI Mineral Technologies» ЖШС Түркістан қаласындағы тау-кен металлургия кешеніне арналған ауыр техника шығаратын зауытының құрылысын қадағалады. Зауыт директорының айтуынша, жобаның қуаты – жылына 956 тонна, жобаның құны – 8 323,4 млн тенге. Өндірілген техникалар елімізге және шетелдерге саудаланбақ. Құрылыс жұмыстары кестеге сай жүруде, бірінші кезеңі биыл іске қосылады.Нұралхан Көшеров «Алтын дала мақта» ЖШС-нің Түркістан қаласындағы біріктірілген қоймасы бар ПВХ құбырларын шығаратын зауытының жұмысын көрді. Бұл зауыт жылына 1,44 млн метр құбыр шығаруға қауқарлы. 60 адам жұмыспен қамтылған.Одан кейін облыс әкіміне «Түркістан мақта агроөнеркәсіп кешені» ЖШС-нің мақта фабрикасы мен цехтарының құрылысы таныстырылды. Жұмыс қарқынды жүруде. Жобаның құны 146,8 млрд теңгені құрайды. Толық циклді тоқыма фабрикасында 11 цех жұмыс істейді деп жоспарланған. Онда мақтаны иіру, мата өндіру, бояу, өңдеу жұмысы жүреді. Өндіріс қуаттылығы жылына 13 мың тонна иірімжіп, 50 млн метр үй тоқымасын, 7 млн жиынтық төсек әбзелдерін құрайды. 2000-нан астам жұмыс орны құрылады.Түркістан облысы әкімінің баспасөз қызметіАқпарат көзі : https://www.gov.kz/memleket/entities/ontustik/press/news/details/936548

Елордада тәулік бойы қар күреу жұмысы жүріп жатыр. Коммуналдық қызметтер күшейтілген ауысымдық режимде жұмыс істейді, деп хабарлайды Астана әкімдігінің ресми сайты.12 ақпанда күндізгі ауысымда қар тазалау жұмысына 2 668 жол жұмысшысы және 1 280 бірлік арнайы техника шықты.12 ақпанға қараған түні елордадан қар полигондарына 1 819 рейспен 26 мың текше метрге жуық қар шығарылды.Қыс мезгілінің басынан бастап 456 466 ауыр жүк рейсімен қаладан 5,6 млн текше метрге жуық қар шығарылды.Ең алдымен, ережеге сәйкес, жолдарда кептеліс болмас үшін қозғалысы өте қарқынды орындар тазартылады. Сондай-ақ, қарқындылығы орташа учаскелер – алаңдар, вокзал маңы аумақтары, тротуарлар, әлеуметтік нысандарға кірме жолдар және т.б. тазартылады.Орталық көшелерді, жолаушылар көлігі маршруттары жүретін орындарды, аялдамалар мен тротуарларда тазалау да басымдыққа ие.Қалада бірнеше жабдықталған қар полигоны бар. Олар самосвал техникасының нөмірлік белгілерін оқу жүйесімен жабдықталған, мұнда бейнебақылау камералары орнатылып, жарықтандыру қосылған.Елорда тұрғындары мен қонақтарынан жолдарда абай болуды, қауіпсіздік ережелерін сақтауды, дауылды ескерту болған жағдайда алыс сапарларға шықпауды сұраймыз.Төтенше жағдай туындаған кезде «112» нөміріне хабарласыңыз. Ақпарат көзі : https://www.gov.kz/memleket/entities/astana/press/news/details/936230

Таиландтың Пхитсанулок қаласында тасжолдағы велоспорттан Азия чемпионаты өтіп жатыр. Астаналық спортшы турнирдің күміс жүлдегері атанды, деп хабарлайды елорда әкімдігінің ресми сайты.Елордалық спортшы Дмитрий Груздев элиталық санаттағы уақыт бойынша жекелей жарыста сынға түсті.Осыған дейін Дмитрий Груздев ұлттық құрама сапында «элита» санатындағы аралас эстафетада (42,8 км) алтын медаль жеңіп алған болатын.Азия чемпионатына 27 елден велошабандоздар қатысуда. Байрақты бәсеке 16 ақпанда аяқталады.Ақпарат көзі : https://www.gov.kz/memleket/entities/astana/press/news/details/936254

Мемлекет басшысының тапсырмаларын орындау аясында халықтың құқықтық сауаттылығын арттыру бойынша түсіндіру жұмысы тұрақты түрде жүріп жатыр. Бұл туралы елорда әкімдігінің ресми сайты Әділет министрлігінің баспасөз қызметіне сілтеме жасап хабарлайды.Мәселен, 2024 жылы «Халық заңгері», «Әділет кеңес береді», «Ашық есік күні», «Тегін заң көмегі күндері» акциялары іске қосылды. Өткен жылы республиканың барлық өңірінде жалпы саны 100 000 мыңнан астам адамды қамтитын 1 310 консультативтік-түсіндіру іс-шарасы өткізілді.Ауылдық елді мекендер тұрғындарының құқықтық сауаттылығын арттыру мақсатында 2000-ға жуық «Құқық кабинеттері» ашылды, олар аудандық, ауылдық клубтардың ғимараттарында, демалыс орталықтарында және т.б. «Egov» бұрыштарының базасында жұмыс істейді. Кабинеттерде қолданыстағы нормативтік құқықтық актілермен танысу үшін «Әділет» АҚЖ, «Заң» ДБ қолжетімділігімен, сондай-ақ ақпараттық жүйелерге (e-otinish, «Ашық НҚА» порталы және т.б.) қолжетімділігімен толық техникалық жабдықталған.«Әрбір цифрлық реформа, әсіресе, заң көмегіне қол жеткізу шектелген шалғай аймақтардағы адамдар үшін неғұрлым қолжетімді сот төрелігіне жасалған қадам», - деген еді ҚР Президенті Қасым-Жомарт Тоқаев.Еup.kz. сайты арқылы онлайн режимінде заң қызметтерін ұсынуға және алуға арналған «E-ZanKomegi» заң көмегінің бірыңғай ақпараттық жүйесі іске қосылды, сондай-ақ, азаматтар өздерін қызықтыратын құқықтық сұрақтарға бейне қоңырау арқылы жауап алуға болатын «Zan Komegi» мобильді қосымшасы да қолжетімді. «Zan Komegi» жүйесінде 2000 мыңнан астам адвокат пен заң кеңесшілері арқылы 472 мыңнан астам азаматбілікті заң көмегін алды.Бұдан басқа, бейнеқоңырау арқылы онлайн режимде мүлікті басқаруға қатысты сенімхаттарды қоспағанда, сенімхаттар мен ерлі-зайыптылардың келісімдерінің барлық түрлерін беруге мүмкіндік беретін «Е-нотариат» бірыңғай нотариаттық ақпараттық жүйесі жұмыс істейді. Бұл қызметті 176 мың азамат пайдаланды.Бұдан бөлек, заңсыз әрекеттердің алдын алу мақсатында клиенттерді биометриялық сәйкестендіру қолданылады, өтініштерге қол қою кезінде QR-қол қою сервисі қолданылып, қызмет нәтижелері 24/7 режимінде EgovMobile «Цифрлық құжаттар» сервисінде қолжетімді. Осылайша, осы қызмет арқылы Қазақстан азаматтары нотариусқа бармай-ақ 168 мыңға жуық сенімхат пен ерлі-зайыптылардың 67,5 мың. келісімін заңды түрде ресімдей алды.Тағы бір маңызды жетістік – «Сот орындаушысы роботын» енгізу болып саналады. Мәселен, 20 АЕК-ке дейінгі әкімшілік айыппұлдар уақытылы төленбеген жағдайда уәкілетті орган мәліметтерді жеке сот орындаушының қатысуынсыз іс жүргізуді қозғайтын Робот сот орындаушысына береді. Іс қозғалғаннан кейін азаматтар іс туралы егжей-тегжейлі ақпараты бар EGov Mobile-да 1414-тен SMS хабарлама және push-хабарлама алады, сол арқылы азаматтар айыппұл сомасының 25% қосымша төлеуден және сот орындаушысына барудан босатылады, өйткені барлық әрекеттер онлайн режимінде жүргізіледі.Цифрлық сот орындаушысы іске қосылған сәттен бастап бүгінгі күнге дейін 2,2 млрд.теңге сомасын құрайтын 109 мыңнан астам атқарушылық іс қозғалды. Азаматтардың пайдасына үнемделген сома550 млн. теңгені құрады.2025 жылы адамдардың өмірін цифрлық дәуірде жеңілдету және ыңғайлы ету, сондай-ақ уақыт пен ақшаны үнемдеу үшін әділет органдарының жұмысын жақсарту жоспарлануда.Негізгі өзгерістер:2025 жылы 300 мыңнан астам азаматты құқықтық сауаттылығын оқыту жоспарлануда;ЖИ – «Әйтеке» көмекшісі- қарапайым заңгерлік кеңестер беруге және құжаттарды жинауға көмектесуге арналған чат-бот.Робот-сот орындаушысының құзыреті кеңейіп, ол айналысатын берешек мөлшерінің шегі 20-дан 40 АЕК-ке дейінартады, бұл азаматтардың пайдасына жылына 12,2 млрд. теңгеге дейін үнемдеуге мүмкіндік береді.Бұл құралдар тәуліктің кез келген уақытында пайдалануға мүмкіндік бере отырып, қарапайымдылығымен, жеделдігімен және қолжетімділігімен ерекшеленеді.Қабылданған шаралар азаматтардың құқықтық сауаттылығын арттырып, өз құқықтары мен міндеттерін мейлінше білуге ықпал етеді. Қызмет көрсетуді жеңілдету жұмысының нәтижесінде қазақстандықтардың уақыты мен қаражаты үнемделеді, аталған қызметтерді алудың қолжетімділігі мен ыңғайлылығы артып, сондай-ақ әкімшілік кедергілер жойылады, бұл процесті неғұрлым ашық және тиімді етеді.Ақпарат көзі : https://www.gov.kz/memleket/entities/astana/press/news/details/936288

Қазақстан Республикасы Сауда және интеграция министрлігі «QazTrade» АҚ-мен бірлесіп, 2025 жылдың 17-20 наурыз аралығында Будапешт қаласында (Венгрия) өтетін Сауда-экономикалық миссияға қатысу үшін өтінімдерді қабылдау басталғанын хабарлайды.Миссияның негізгі мақсаты – тікелей іскерлік байланыстар орнату, қазақстандық кәсіпорындар мен әлеуетті серіктестер арасындағы сауда қатынастарын дамыту, екіжақты кездесулер (B2B) өткізу.Миссияға қатысу үшін 2025 жылдың 25 ақпаны сағат 18:00-ге дейін төмендегі сілтеме арқылы тіркеу формасын толтыру қажет: https://forms.gle/tXNAwZ31wJ8e4uYu5. Қосымша ақпарат алу үшін байланыс телефондары: +7 778 418 06 61, +7 778 674 88 47.Ақпарат көзі : https://www.gov.kz/memleket/entities/mti/press/news/details/936540

Д.А. Қонаев атындағы Кен істері институты «Қазақстан Республикасының минералдық шикізатты кешенді қайта өңдеу ұлттық орталығы» ШЖҚ РМК филиалының ғалымдары Мәскеу қ. тау-кен өндіру саласындағы ірі халықаралық іс-шараға- «Кеншілер апталығы-2025» симпозиумына қатысты.Іс-шара 30 жылдан астам уақыт бойы өткізіліп келеді және тау-кен кешенінің өзекті мәселелері мен инновацияларын талқылау үшін маңызды алаң болып табылады. Бұл жетекші мамандар мен ғалымдарды тартып, білім алмасу және жаңа технологияларды ілгерілету үшін сарапшыларды біріктіреді.Қазақстандық ғалымдар отандық тау-кен өнеркәсібі үшін өз әзірлемелерімен бөлісті. Олардың ішінде алынуы қиын шоғырларды игеру технологиясы бар. Бұл технологияны қолдану массивтегі пайдалы қазбалардың жоғалуын азайтуды қамтамасыз етеді. Ғалымдар мұны Жезқазған кен орнының мысалында көрсетті.Карьерлердегі техникалық-технологиялық аудит әдістемесі ұсынылған. Осы әдістеменің көмегімен мамандар жылына 1 млрд теңгеден астам экономикалық нәтиже ала отырып, тау-кен жұмыстарын жүргізудің неғұрлым тиімді әдісін таба алады.Карьерлердің геотехнологиялық кешендері жұмысының барлық кезеңдерін оңтайландыру үшін басқарушылық шешімдер қабылдаудың жаңа әдістемесі ұсынылды.Жерасты шахталарын желдетуді басқарудың инновациялық автоматтандырылған жүйесі шынайы қызығушылық тудырды. Мұндай жүйелер қанағаттанарлық еңбек жағдайларын қамтамасыз ету үшін қажет және жұмысшылардың қауіпсіздігін едәуір арттырады. Ғалымдар жасанды интеллектті қолданатын өзіндік өндіріс пен бағдарламалық қамтамасыз ету экономикалық орындылыққа қол жеткізуге және қолайлы еңбек жағдайларын жасауға мүмкіндік беретініне сенімді. Ақпарат көзі : https://www.gov.kz/memleket/entities/mps/press/news/details/936437

2025 жылғы 24 наурыздан бастап абоненттік ұялы байланыс құрылғыларын тіркеу ережелеріне енгізілген өзгерістер күшіне енеді. Жаңа ережелер тек 24.03.2025 жылдан кейін елге әкелінген жаңа құрылғыларға ғана қатысты. Қазақстан аумағында бұрыннан бар және Идентификациялық кодтар дерекқорына (ИКД) енгізілген телефондар автоматты түрде «ақ тізімге» енеді және ешқандай шектеусіз жұмысын жалғастырады.Бұл жаңашылдықтар тіркеу жүйесін одан әрі жақсартып, алаяқтықпен күресуге, тұтынушылардың құқықтарын қорғауға және мобильді құрылғыларды пайдалану қауіпсіздігін арттыруға бағытталған.Бүгінгі таңда Қазақстанда шамамен 3,7 миллион қайталанған IMEI-коды бар құрылғылар тіркелген. Олардың заңсыз әкелінуі айтарлықтай экономикалық және әлеуметтік мәселе туындатады. Бұндай мобильді құрылғылар нарығы құрылғылардың заңды айналымын бақылауды қиындатып, телефон ұрлығының көбеюіне ықпал етеді және әділетсіз бәсекелестік туғызады.Осы мәселелерді шешу мақсатында жаңа ережелер енгізіліп, мобильді құрылғылар нарығының ашық әрі қауіпсіз болуын қамтамасыз ету қарастырылған.Негізгі жаңашылдық – мобильді құрылғыларды верификациялау процедурасыЖаңа ережелерге сәйкес тіркеу кезінде арнайы жүйе келесі параметрлерді тексереді:Құрылғының IMEI-кодының түпнұсқалығыIMEI-кодтың GSMA халықаралық базасында ұрланған, бұғатталған немесе жоғалған құрылғылар тізімінде болмауыҚұрылғының Қазақстан аумағына заңды түрде әкелінгеніЕскерту: Өзгерістер тек Қазақстан аумағына жаңадан әкелінген құрылғыларға қатысты. Бұрыннан бар және ИКД базасына енгізілген мобильді телефондар автоматты түрде «ақ тізімге» енеді және ешқандай шектеусіз жұмысын жалғастырады.Қандай тізімдер пайда болады?Верификация нәтижесінде мобильді құрылғылар үш санатқа бөлінеді:Ақ тізім – сәтті верификациядан өткен құрылғылар, олар ешқандай шектеусіз тіркеледі.Сұр тізім – уақытша рұқсат етілген құрылғылар. Олардың иелері 30 күн ішінде құрылғының заңды түрде әкелінгенін растауы тиіс.Қара тізім – заңсыз әкелінген, жалған немесе ұрланған құрылғылар. Олар бұғатталады.Бұл қолданушыларға қалай әсер етеді?Қазақстанда бұраннан қолданыста бар телефондар ешқандай шектеусіз жұмыс істей береді. Қосымша әрекет қажет емес.Жаңа құрылғыларды сатып алушылар 2025 жылдың 24 наурызынан кейін құрылғы сатып алмас бұрын, IMEI-кодты imei.rfs.gov.kz сайтынан тексере алады. Қазіргі уақытта сайт жаңа ережелерге сәйкес жаңартылуда.«Сұр тізімдегі» құрылғы иелері құрылғыны 30 күн бойы қолдана алады. Осы уақыт ішінде операторлар SMS хабарлама арқылы құрылғыны верификациядан өткізу қажеттілігі туралы ескертеді. Хабарламада арнайы анкетаға сілтеме беріледі, оны толтыру қажет.Шетелден әкелінген құрылғы иелері шекарадан өткен күнді көрсетуі керек.Егер пайдаланушы 30 күн ішінде верификациядан өтпесе, кез келген уақытта хабарламадағы сілтеме арқылы анкетаны толтырып, растау процесін аяқтай алады.Бұл шаралар тұтынушыларға заңды әрі сапалы құрылғыларды сатып алуына сенімділік береді. Бизнеске әділ бәсекелестік үшін ашық жағдай жасалады, ал мемлекет импортты қатаң бақылап, заңсыз телефондар санын азайтып, алаяқтық деңгейін төмендетеді.Қашан күшіне енеді?Жаңа ережелер ресми жарияланған күннен бастап 60 күн өткен соң – 2025 жылғы 24 наурызда күшіне енеді.Азаматтарға уайымдауға ешқандай негіз жоқ – ресми тіркелген құрылғылардың иелеріне қосымша әрекет жасап қажет емес. Министрлік жаңа ережелерді енгізу бойынша ақпараттық жұмыстарды одан әрі жалғастырады.Ақпарат көзі : https://www.gov.kz/memleket/entities/mdai/press/news/details/936455

Елімізде биыл «Жұмысшы мамандықтар жылы деп жарияланды. Президент тапсырмасын жүзеге асыру мақсатында Ақтөбеде қала мен облыс мектептерінің оқушыларын кәсіптік бағдарлауға бағытталған «Қадам Life» жаңа жобасы басталды.Жобаның негізгі мақсаты – жұмысшы мамандықтармен таныстыру, практикалық дағдыларын дамыту және мамандық таңдауда дұрыс шешім табуға көмектесу.Жоба бойынша колледж оқытушылары мектептерде түрлі мамандықтар бойынша көрсету сабақтарын өткізеді. Оқушылар колледждерде қолданылатын жабдықтар және оқу материалдарымен танысып, сондай-ақ түрлі салалардың тәжірибелі мамандары өткізетін шеберлік кластастар және кездесулерге қатыса алады.Бағдарламаның тиімділігін қамтамасыз ету үшін оқушылар арасында алдын ала сауалнама жүргізіледі. Бұл ұйымдастырушыларға оқушылардың мүдделері мен қажеттіліктерін түсінуге, сабақтардың мазмұнын олардың сұраныстарына бейімдеуге мүмкіндік береді.Ақтөбе облысы Білім басқармасының орынбасары Дина Жаманбаеваның айтуынша, «Қадам Life» жобасы мектеп оқушыларына жұмысшы мамандықтарына қызығушылық танытып, практикалық дағдыларды игеруге және мектептер мен колледждер арасында байланыс орнатуға көмектеседі. Жоба 93 мамандық, 137 біліктілік бойынша 250 мектеп пен 10 мыңға жуық оқушыны қамтиды. Сонымен қатар, облыстың шалғайдағы ауылдарында да кәсіптік бағдарлау іс-шараларын өткізу жоспарланып отыр.Бүгін қаламыздағы Жоғарғы политехникалық колледжінің оқытушылары №39 мектеп-лицей оқушыларына кәсіби бағдар беру шарасын өткізді. Колледж негізінен техникалық мамандықтарды оқытуға басымдық береді, сондықтан оқушыларға түрлі техникалық құрал-жабдықтардың қолдану процесі көрсетілді. Оқушылар өздері қызықтыратын сауалдарға жауап алып, оқуға қабылдану жағдайлары туралы сұрап білді.Ақпарат көзі : https://www.gov.kz/memleket/entities/aktobe/press/news/details/936405

Бүгін IX қысқы Азия ойындарында шаңғы жарысы командалық эстафетамен аяқталды. Қазақстан ерлер құрамасы (4×7.5 км) мәреге үшінші келіп, қола жүлдеге ие болды.Жарыс жолына Константин Борцов, Наиль Башмаков (классикалық әдіс), Олжас Климин мен Владислав Коволёв (еркін әдіс) шықты. Мұнда барлығы 9 елдің құрамасы жүлдеге таласты.Жарыс қожайыны Қытай чемпион атанса, күміс Жапония шаңғышыларында. Айта кетейік, шаңғы жарысынан Харбин-2025 бәсекесінде Қазақстан 4 жүлде қол жеткізді.Осыған дейін жекелей сында Константин Борцов күміс, Олжас Климин қола олжаласа, әйелдер командасы бағана эстафетада күміске қол жеткізді.Ақпарат көзі : https://www.gov.kz/memleket/entities/tsm/press/news/details/936249

2024 жылы елімізде туризм саласындағы негізгі капиталға салынған инвестициялар көлемі 947,5 млрд теңгені құрады. Бұл 2023 жылмен салыстырғанда 20,3%-ға көп (787,3 млрд теңге). 2022 жылы бұл көрсеткіш 513 млрд теңгені құраған.Инвестициялар өсімі 15 өңірде байқалды, ең жоғары көрсеткіштер тіркелген өңірлер:Батыс Қазақстан облысы – 196,2%-ға өсті (26 млрд тг);Ұлытау облысы – 84,2%-ға өсті (4,7 млрд тг);Қызылорда облысы – 63%-ға өсті (33,7 млрд тг);Түркістан облысы – 45,6%-ға өсті (81,2 млрд тг);Атырау облысы – 31,3%-ға өсті (23,5 млрд тг).Бұл деректер өңірлердегі туристік инфрақұрылымның қарқынды дамып жатқанын және инвестициялық тартымдылықтың артып келе жатқанын көрсетеді.Ақпарат көзі : https://www.gov.kz/memleket/entities/tsm/press/news/details/936344

Астана, 2025 жылғы 12 ақпан – Қазақстан Республикасы Премьер-министрінің орынбасары – Сыртқы істер министрі Мұрат Нұртілеу Астанаға ресми сапармен келген Тәжікстан Республикасының Сыртқы істер министрі Сироджиддин Мухриддинмен келіссөздер өткізді.Кездесу барысында екіжақты ынтымақтастықтың кең ауқымды мәселелері талқыланды, атап айтқанда екі ел арасындағы саяси, экономикалық, су-энергетикалық, транзит-көліктік және мәдени-гуманитарлық өзара іс-қимылдың басым бағыттары қаралды.Тараптар достық пен өзара құрмет рухында стратегиялық серіктестік пен одақтастықты одан әрі нығайтуға өзара бейілділігін атап өтті.Сыртқы саяси ведомстволардың басшылары 2023-2024 жылдары Қазақстан Президенті Қасым-Жомарт Тоқаевтың Душанбеге және Тәжікстан Президенті Эмомали Рахмонның Астанаға жасаған өзара мемлекеттік сапарлары шеңберінде қол жеткізілген уағдаластықтардың практикалық іске асырылу барысын егжей-тегжейлі қарастырды.Сауда-экономикалық ынтымақтастықты одан әрі кеңейтуге ерекше назар аударылды. Қазақстан көптеген жылдар бойы Тәжікстанның ірі сауда серіктестерінің «үштігіне» кіреді. Қабылданған шаралардың арқасында өткен жылы өзара сауда көлемі 7,4%-ға өсіп, 1,2 млрд АҚШ долларды құрады. Тараптар тауар айналымын 2 млрд долларға дейін жеткізу жөніндегі мемлекет басшылары қойған мақсатқа қол жеткізу үшін келісілген шаралар қабылдауға келісті.Ауыл шаруашылығы саласындағы өзара тиімді ынтымақтастықты жандандыру қажеттілігі аталып өтті, оның үлесі екі елдің жалпы тауар айналымының 40%-дан астамын құрайды. Қазақстан дәстүрлі өнімдер – бидай, ұн және кондитерлік өнімдердің экспортын өзара тиімді түрде арттыруға дайын. Үшінші елдерге одан әрі экспорттау үшін жеміс-көкөніс өнімдерін қайта өңдеу бойынша бірлескен кәсіпорындар құру да перспективалы бағыт екені айтылды.«Тәжікстан – еліміз үшін Орталық Азиядағы стратегиялық серіктесіміз және нағыз сенімді одақтас. Өткен жылы биік деңгейде қол қойылған Одақтастық қатынастар туралы шарт тарихи қадам екені сөзсіз», – деп мәлімдеді М.Нутрлеу.Өз кезегінде тәжік министрі елдер арасындағы өзара қарым-қатынастың осындай жоғары деңгейіне мемлекет басшылары арасындағы сенімді әрі достық диалогтың арқасында қол жеткізілгенін атап өтті. «Біз Қазақстанмен қарым-қатынасты жоғары бағалаймыз және сауда-экономикалық трекке үлкен мән береміз, оны практикалық мазмұнмен толтыру қажет», – деді С.Мухриддин.Сондай-ақ ғарыштық және IT-технологияларды игеру, жасанды интеллект пен цифрландыруды дамыту салаларындағы өзара іс-қимыл перспективалары қарастырылды. Атап айтқанда, екі елдің мамандары Тәжікстан серверлерінде «Интернет-ресурстардың бірыңғай платформасы» және «SmartBridge» жүйелерінің негізгі компоненттерін сәтті орналастырды. Осы бастамаларды іске асыру үшін қазіргі уақытта 100-ден астам тәжік мамандары «Astana-Hub-та» тегін оқудан өтіп жатыр.Мәдени-гуманитарлық ынтымақтастықтың мазмұнды күн тәртібі аталып өтті. Мемлекет басшыларының тапсырмасына сәйкес соңғы екі жылда Қазақстан мен Тәжікстанның ауқымды мәдениет күндері өтті, олар екі мемлекеттің қоғамдық топтары арасында оң пікірлер тапты. Душанбеде Абайдың бюсті, сондай-ақ Астанада ибн Сина мен Рудаки ескерткіштері орнатылды. Жоғары білім беру саласында бірлескен жобалар табысты іске асырылуда. Атап айтқанда, Л.Гумилев атындағы Еуразия ұлттық университетінің қатысуымен М.Осими атындағы Тәжік техникалық университетінде бірлескен ақпараттық технологиялар факультеті тиімді жұмыс істеуде.Кездесу барысында министрлер өңірлік және жаһандық күн тәртібіндегі өзекті мәселелер бойынша «сағаттарды теңестіріп», көпжақты құрылымдар шеңберінде одан әрі тығыз ынтымақтасуға, екі мемлекеттің халықаралық бастамаларын ілгерілету кезінде өзара қолдау көрсетуге бейілділігін растады.СІМ басшылары өңірлік кооперацияны одан әрі дамытудың, Орталық Азиядағы бейбітшілік пен тұрақтылықты нығайту жөніндегі бірлескен күш-жігердің, оның ішінде Орталық Азия мемлекеттері басшыларының консультативтік кездесулері, Халықаралық Аралды құтқарудың қоры, АӨСШК, ШЫҰ, ТМД, ҰҚШҰ және басқа да халықаралық алаңдардың шеңберінде өзара ықпалдасудың маңыздылығын атап өтті.Ресми сапар барысында Тәжікстан Республикасының Сыртқы істер министрі С.Мухриддин Қазақстан Республикасының Президенті Қасым-Жомарт Тоқаевтың қабылдауында да болды. Ақпарат көзі : https://www.gov.kz/memleket/entities/mfa/press/news/details/936453

Бүгінгі таңда Қазақстандағы құрылыс сапасының нормативтік базасы құрылыс нормалары мен ережелері (ҚНжЕ) және ГОСТ болып табылады. Бұған дейін материалдық ресурстар мен инженерлік жабдықтар бойынша құрылыс жобаларына бағалар, коммерциялық ұсыныстар ішінара қойылды, олардың бағасы әрдайым нарыққа сәйкес келмеді. Бұл бірнеше рет құрылыстың қымбаттауына әкелді. Осы проблеманы болдырмау, сондай-ақ бюджет қаражатын үнемдеу және мемлекеттік инвестициялар, квазимемлекеттік сектор субъектілерінің қаражаты есебінен және мемлекеттік-жекешелік әріптестік (концессия) есебінен қаржыландырылатын прайс-парақтарды қолдануды барынша азайту мақсатында көзделетін объектілерді салу үшін жобалық шешімдер қабылдау кезінде (жабдықтардың, бұйымдар мен материалдардың ерекшеліктерін қалыптастыру кезінде) сәулет қала құрылысы және құрылыс каталогына (АГСК-3) сәйкес «Құрылыс конструкцияларының, бұйымдары мен құрылыс материалдарының тізбесі» материалдық ресурстар мен инженерлік жабдықтардың номенклатурасын пайдалану қажет. Мәселен, 2022 жылғы шілдеде ҚР ҚН 1.02.03-2022 «Құрылысқа арналған жобалау-сметалық құжаттаманы әзірлеу, келісу, бекіту тәртібі және құрамы» нормативтік техникалық құжаты күшіне енді, онда прайс-парақтар арқылы құрылыс материалдарының сметалық бағаларын көтеруге жол бермеуді көздейтін ЖСҚ-да прайс-парақтарды қолдануды болдырмау туралы норма көрсетілген. АГСК-3-те сметалық-нормативтік базада жоқ қажетті материалдық ресурстарды, жабдықты, жиһаз бен мүкәммалды және тиісті баға және техникалық ақпаратты (техникалық сипаттамаларын егжей-тегжейлі сипаттайтын каталогтарды, сәйкестік сертификаттарын, тауардың шығу тегі туралы сертификаттарды (СТ KZ), сынақ хаттамаларын) ұсына отырып, анықтамалықты қосу ұсынылатынын атап өткен жөн.Ресурстардың сметалық құны сметалық бағалар жинағымен анықталатынын білу маңызды. Егер жинақтарда қажетті атаудың сметалық құны болмаса, онда оның құнын Тапсырыс берушінің бекітілген шешімдеріне сәйкес осындай ресурстардың сметалық бағалары бойынша, яғни жобада қабылданған техникалық параметрлер мен сипаттамаларды ескере отырып, ресурстардың бағалары туралы ақпаратты пайдалана отырып, ең төмен баға бойынша айқындау қажет. Егер прайс-парақтар немесе коммерциялық ұсыныстар бойынша жекелеген ресурстар мен жабдықтардың бағасы анықтамалыққа қарағанда төмен болған жағдайда, тапсырыс беруші қаржы қаражатын тиімді пайдалану мақсатында ведомстводан тыс кешенді сараптама жүргізу процесінде құрылыстың сметалық құнын қайта есептей отырып, анықтамалыққа енгізілген материалдардың бағаларын қайта қарау туралы шешім қабылдауға құқылы. Сметалық құнды қайта есептеу жобаны әзірлеген жобалау ұйымы Тапсырыс берушінің тапсырмасы бойынша жүзеге асырылады. ҚР ҚН 5.13-тармағының талаптары тек материалдық ресурстар мен инженерлік жабдыққа ғана белгіленген. Бүгінгі таңда прайс-парақтар мен коммерциялық ұсыныстарды қолдану тек технологиялық жабдыққа қолданылады. Сметалық құжаттаманы әзірлеу кезінде АГСК-3-ті қолдану сметалық құжаттаманы тексерудің автоматтандырылған тәсілін енгізу кезеңдерінің бірі екенін айта кеткен жөн. Құрылыс саласын цифрландыру шеңберінде барлық жергілікті сметаларды жобаларды сараптау кезінде автоматты тексерумен бір цифрлық сметаға біріктіру бойынша жұмыс жүргізілуде. Бұл бастаманы іске асыру 2025 жылы жоспарланып отыр.Ақпарат көзі : https://www.gov.kz/memleket/entities/mps/press/news/details/936150

ТЖМ өртке қарсы қызмет комитетінің төрағасы Рамиль Камалов Ақмола облысына жұмыс сапары барысында Көкшетау қаласының өрт сөндіру бөлімдеріне барды. Сапар аясында ол материалдық-техникалық базаның жай-күйімен, сондай-ақ өрт сөндірушілер мен құтқарушылар қызметінің жағдайымен танысты. Өрт сөндіру бөлімдерін техникамен жабдықтауға ерекше көңіл бөлінді. Атап айтқанда, 2-МӨСБ-де оған КАМАЗ шассиіне орнатылған бірегей ПНС-500 агрегаты көрсетілді. Бұл әдіс өрт пен су тасқыны жағдайында тиімді жұмыс істеуге арналған, секундына 500 литрге дейін су айдауды қамтамасыз етеді. Рамиль Камалов бұл қадамды жоғары бағалап, мұндай жабдық басқа бөлімшелер үшін үлгі бола алатынын атап өтті. Сапар барысында Камалов №1 және №10 өрт сөндіру бөлімдеріне барып, жеке құрамның техникалық жарақтандырылуымен және еңбек жағдайларымен танысты. Департаментте қызметкерлер үшін тұрғын үй-тұрмыстық жағдайларды жақсартуға көп көңіл бөлінетінін атап өту маңызды, бұл туралы Ақмола облысы ТЖД бастығы Бақытжан Алашов айтып берді. Ол сондай-ақ жұмыс тиімділігін арттыру үшін қызметтерді орналастыруды оңтайландыру жоспарларымен бөлісті. Сонымен қатар, Комитет төрағасы Жоспарлау және жедел басқару орталығына және ТЖ департаментіне барып, алдағы жұмыс бағыттары мен өңірдегі жедел өзара іс-қимыл мен құтқарушылар қызметін жақсарту мүмкіндіктерін талқылады. Рамиль Камалов материалдық-техникалық базаны жетілдіру және қызметкерлер үшін жағдайды жақсарту жөніндегі жұмысты жалғастырудың маңыздылығын атап өтіп, бұл өрт сөндірушілер мен құтқарушылар жұмысының тиімділігін арттыруға айтарлықтай ықпал ететінін атап өтті. Ақпарат көзі : https://www.gov.kz/memleket/entities/emer/press/news/details/936250

Қазақстан ТЖМ тұрақты негізде өрттің алдын алу жұмыстарын жүргізуде. Бұл жұмыс жыл бойы жүргізілуде, ал жылыту маусымы кезінде бұл жұмыстың векторы тұрғын үй секторына бағытталады. Жылыту маусымы басталар алдында өрт қауіпсіздігіне тексерілген және тұрақты аулаларды аралау барысында қайта қаралатын халықтың әлеуметтік осал топтарының 100 мыңнан астам үйі ерекше бақылауда. Анықталған өрт қауіпсіздігі талаптарына сәйкессіздіктер міндетті түрде тұрғындарға жеткізіледі. Тексеру барысында анықталатын негізгі бұзушылықтар пеш жабдықтары мен электр желілері мен аспаптарын орнату және пайдалану ережелерін бұзу болып табылады: пештер мен мұржалардағы жарықшақтар, пеш алдындағы металл қабаттың болмауы, жанғыш конструкциялардан өртке қарсы бөлгіштердің болмауы, электр желілерінің шамадан тыс жүктелуі, электр сымдардың оқшаулауының бұзылуы және т.б. Бұл бұзушылықтарды жою көбінесе үлкен шығындарды қажет етпейді. Жергілікті атқарушы органдармен және волонтерлермен бірлесіп халықтың әлеуметтік осал топтарының үйлерінде 32 мыңнан астам иісті газ, табиғи газ және түтін датчигі орнатылды (2024 жылғы маусымнан бастап). Барлық жерде өткізілетін іс-шараларға қарамастан, қаңтар айында елде 760 өрт тіркелді, оның 580-і пештер мен электр жүйелерін орнату және пайдалану кезінде талаптардың бұзылуына байланысты болды. ТЖМ әркім өз үйін қауіпсіз ете алатынын еске салады! Ол үшін қарапайым қауіпсіздік ережелерін сақтау қажет:- тек жұмыс істейтін пештер мен электр құрылғыларың пайдаланыңыз;- пештердің қызып кетуіне және электр желілерінің шамадан тыс жүктелуіне жол бермеңіз;- мұржаны күйеден уақытында тазалаңыз;- пеш пен электр құрылғыларының ақаулықтарын үнемі тексеріп отырыңыз;- балаларға пешті жағуға тапсырмаңыз;- сіріңке мен тұтандырғыштарды балалардың қолы жетпейтін жерлерде сақтаңыздар. Ақпарат көзі : https://www.gov.kz/memleket/entities/emer/press/news/details/936355