Жамбыл облысының әкімі Ербол Қарашөкеевтің төрағалығымен өткен аппарттық кеңесте азық-түлік бағаларын тұрақтандыру мәселесі кеңінен талқыланды.Кәсіпкерлік және индустриялық-инновациялық даму басқармасының басшысы Аспандияр Сейсебаевтың айтуынша, облыста соңғы бір апта ішінде 5 әлеуметтік маңызы бар азық-түлік тауарының (ӘМАТ): тауық еті, қырыққабат, жұмыртқа, күнбағыс майы, картоп бағасы көтерілген. Ұн мен қарақұмық бағасы төмендеген.Бүгінде өсім көрсеткен тауарларға тұрақтандыру қоры арқылы интервенция жүруде.Жалпы 2025 жылдың маусымаралық кезеңінде 8 тауар түрі бойынша ірі сауда желілеріне, дүкендерге, базарларға 746,1 тонна, 2566,8 мың дана және 75,6 мың литр тауарға интервенция жүргізу жоспарланған.Азық-түлік тауарларының тапшылығын болдырмау мақсатында өңірлік тұрақтандыру қорында тікелей сатып алу арқылы және форварттық келісімшарт негізінде 13 569,5 тонна және 4 731,6 мың дана тауар қоры қалыптасты.Арнайы құрылған жұмыс тобы 2 аптада 1 рет ӘМАТ бағасына мониторинг жүргізеді.Сауда және тұтынушылардың құқықтарын қорғау департаментінің басшысы Еркін Елшібековтің сөзінше, өткен жылы азық-түлік тауарларына сауда үстемеақысын 15 пайыздан асырған 72 кәсіпкерге ескерту беріліп, жетеуіне айыппұл (627 640 теңге) салынған. Сонымен бірге сөредегі тауар құны мен кассадағы баға айырмашылығы үшін 9 сауда нүктесі 1 956 760 теңге көлемінде айыппұл арқалады.Облыс әкімі ӘМАТ бағасына жүргізілген мониторингтен нақты нәтиже көрмей отырғанын баса айтты.- Азық-түлік бағаларын тұрақтандыру - өте маңызды. Бұл бағыттағы шараларға ерекше назар аудару қажет. Сауда департаменті мониторинг, ал жергілікті әкімдіктер түсіндіру жұмыстарын күшейту тиіс, – деді ол.Ербол Қарашөкеев азық-түлік тауарлары бағаларының шекті межеден аспауын жіті бақылауды, өңір тұрғындарын арзандатылған азық-түлік өнімдерімен қамтамасыз ету үшін ауыл шаруашылығы жәрмеңкелерін тұрақты түрде ұйымдастыруды жүктеді. Сондай-ақ жауапты басшыларға дүкендерді өздері аралап, бағалардың нақты жай-күйімен көзбе-көз танысуды тапсырды.Аппарттық кеңесте коммуналдық қызметтердің тарифі сараланды.Облыс әкімі табиғи монополияларды реттеу департаменті, бәсекелестікті қорғау және дамыту департаменті, энергетика және тұрғын үй-коммуналдық шаруашылық басқармасы басшыларының алдына нақты міндеттер қойды.Ақпарат көзі : https://www.gov.kz/memleket/entities/zhambyl/press/news/details/917798

«Кемер Агро» ЖШС өңірде тауық көңінен және қой жүнін қосу арқылы органикалық тыңайтқыштар өндіру жобасын жүзеге асыруда.Жобаның құны 221 миллион теңгені құрайды және ол СҚО тәжірибесін тарату бағдарламасы аясында ішінара қаржыландырылған.Өндірістік қуаты – жылына 6 000 тонна тыңайтқыш.Жаңа кәсіпорынның өнімі өңірде органикалық егіншілікті дамытуға ықпал етеді, бұл тұрақты ауыл шаруашылығына жасалған маңызды қадам болып табылады.Ақпарат көзі : https://www.gov.kz/memleket/entities/moa/press/news/details/917720

«Медицина қызметкерлерінің біліктілігін арттыру жылы» бастамасы шеңберінде Денсаулық сақтау министрлігі бастапқы буын мамандарының - дәрігерлер, фельдшерлер, мейіргелер, медициналық жоғары оқу орындары мен колледждердің оқытушылар құрамының білімі мен кәсіби дағдыларының деңгейін арттыру бойынша «Кадрлық қолдау: теңгерім және қолжетімділік» кешенді жоспарын әзірледі.Мемлекет басшысы 2025 жылы жариялаған Жұмысшы мамандықтары жылы шеңберінде денсаулық сақтау саласында практикаға бағдарлана отырып, медициналық колледждердегі білім беру бағдарламаларының деңгейіне және орта медициналық персоналдың кәсіби құзыреттеріне ерекше назар аударылатын болады.Білім және ғылым ұйымдарымен бірлесіп МСАК мамандарының біліктілігін арттыру іс-қимылдарының жоспары әзірленді, ол 5 негізгі бағыттан тұрады:- МСАК мамандарының біліктілігін арттыру бойынша нормативтік құқықтық базаны қалыптастыру;- МСАК мамандарының (жалпы практика дәрігерлері мен мейіргелердің) біліктілігін арттыру;-медициналық жоғары оқу орындары мен медициналық колледждердің профессорлық-оқытушылық құрамының біліктілігін арттыру- біліктілікті арттыру жүйесін жетілдіру;- жас мамандарға бейімдеу және тәлімгерлік орталықтарын құру.Оқыту бағдарламалары соңғы медициналық жетістіктер мен технологияларды, сондай-ақ заңнамалық және нормативтік актілердегі өзгерістерді ескере отырып әзірленген. Әр курс теориялық және негізінен практикалық сабақтарды, сонымен қатар өзін-өзі оқытуды қамтиды.Оқытудың жаңа бағдарламасымен 3 жылдан аз жұмыс өтілі бар 2,5 мыңнан астам жалпы практика дәрігерлерін қамту жоспарлануда. Оқытуға арналған модульдердің тақырыптары тыңдаушылардың осы санатын тестілеуді талдаудың негізінде медициналық жоғары оқу орындарының базасында әзірленетін болады.Осы жоспардың шеңберінде 3,5 мыңнан астам мейіргер біліктілігін арттырады. Орта медициналық персоналды оқыту модулдері профилактика және диспансерлік бақылау, ерте шақтағы балаларды патронаждау және күтім жасау, ауыр жағдайларда көмек көрсету, ЖОО-ны іске асыруда мейіргердің жұмысы, иммунопрофилактика және цифрлық технологиялар сияқты негізгі бағыттар бойынша әзірленген.Біліктілікті арттыру курстарынан медициналық колледждердің 1 600-ден астам педагогы өтеді. Олардың оқуы тәуелсіз емтихан бағаларының нәтижелерін ескере отырып өтеді. Медициналық жоғары оқу орындарының оқытушыларын педагогикалық өтіліне, педагогикалық құзыреттеріне және білімді тәуелсіз бағалау нәтижелеріне қарай оқыту көзделеді.«Медицина қызметкерлерін кәсіби даярлау еліміздегі медициналық көмек сапасының негізі болып табылады. Біліктілікті арттыру жылы шеңберінде біз МСАК мамандарына, біздің педагогтарға өз құзыреттерін арттыруға және медициналық көмек көрсетудің және болашақ дәрігерлерді даярлаудың жоғары деңгейін қамтамасыз етуге көмектесетін тиімді және қолжетімді бағдарламаларды құруға бағытталғанбыз», - деп атап өтті Денсаулық сақтау министрі Ақмарал Әлназарова медицина қызметкерлерінің біліктілігін арттырудың кешенді жоспарының тұсаукесері барысында.Жаңа курстар 2025 жыл бойы жетекші медициналық орталықтардың, саланың бейінді штаттан тыс мамандарының және білім беру платформаларының қолдауымен ұйымдастырылатын болады. Бағдарламаның барлық қатысушылары денсаулық сақтау жүйесінде танылатын біліктілікті арттыру сертификаттарын алады.Ақпарат көзі : https://www.gov.kz/memleket/entities/dsm/press/news/details/917332

Қазақстан ауыл шаруашылығы бағытында жоғары әлеуетіне қарамастан, тұқым импортына тәуелді. Еліміздің дәнді және бұршақ тұқым дақылдарына қажеттілік 2,0 млн тоннаны құрайды, нақтырақ айтсақ, майлы дақылдар бойынша 87 мың тонна, мал азықтық дақылдары бойынша 23 мың тонна, картоп бойынша 289 мың тоннаны қажет етеді. Аталған мәселені шешу үшін Қазақстан Үкіметі селекция және тұқым шаруашылығын дамытудың 2024 – 2028 жылдарға арналған кешенді жоспарын бекітті.Қазірдің өзінде елімізде 284 сертификатталған түпнұсқа және элиталық тұқым өндірушілер жұмыс істейді, селекциямен 27 мамандандырылған мекеме айналысады.Бұл бағытта биыл 90 жылдық мерейтойын атап өтетін Қазақ егіншілік және өсімдік шаруашылығы ғылыми-зерттеу институты жетекші рөл атқаруда. Институт стресс факторларына төзімді және бәсекеге қабілетті сорттар мен будандар жасаумен, сондай-ақ органикалық егіншілікті дамытумен айналысады. Қазақ егіншілік және өсімдік шаруашылығы ҒЗИ ғалымдары 650-ден астам сорттар мен будандар жасап шығарды, оның 206-сы аудандастырылған.Қазіргі таңда элиталық тұқым өсіретін шаруашылықтармен серіктестік мәселесіне ерекше көңіл бөлінеді. Мәселен, Алматы облысында осындай тоғыз шаруашылықтың төртеуі Қазақ егіншілік және өсімдік шаруашылығы ҒЗИ-мен тығыз байланыста. Алайда, сарапшылар көптеген шаруашылықтар әлі күнге дейін сортты жаңартумен айналыспайтынын немесе шығу тегі белгісіз тұқымдарды сатып алатынын атап өтті. Бұл мәселені шешу үшін институт жыл сайын фермерлерді оқыту және жаңа технологияларды енгізу үшін демонстрациялық алаңдар әзірлеп тұрады.Тұқым шаруашылығын дамытудағы маңызды қадам 2023 жылдың қазан айында Қазақ егіншілік және өсімдік шаруашылығы ҒЗИ базасында жоғары сапалы тұқым өндіру орталығының ашылуы болды. Мұнда тұқымдар бес сатылы тазартудан және калибрлеуден өтеді.Биыл шведтік «ThermoSeed» жабдығы арқылы тұқымдарды сұрыптау және термиялық өңдеу бойынша өндіріс орнының құрылысы басталады. Тұқымдарды өңдеудің органикалық әдістерін, оның ішінде қыша ұнтағы мен тимьян майы сияқты табиғи қосылыстарды қолдануды енгізу жоспарлануда.Бұрынғы «Агропарк Оңтүстік» жауапкершілігі шектеулі серіктестігінің Жер ресурстары институтына қосылуының арқасында элиталық тұқым өндірісі 4,5–5 есеге ұлғайтылатын болады. Айта кетейік, Қазақ егіншілік және өсімдік шаруашылығы ҒЗИ жыл сайын 1500 тоннадан астам дәнді масақ дақылдарының тұқымын, 300 тонна дәнді-жемшөп және 100 тонна дәнді-бұршақты дақылдарды, сондай-ақ жүгері, мақсары және жемшөп дақылдарының тұқымын өндіреді және өткізеді.Ақпарат көзі : https://www.gov.kz/memleket/entities/moa/press/news/details/917156

Қазақстанның агроөнеркәсіптік кешенін орнықты дамыту стратегиясы шеңберінде үш негізгі бағыт айқындалды, олардың ішінде отандық тұқым шаруашылығын дамытуға ерекше көңіл бөлінуде.2015 жылдан бастап Ұлттық аграрлық ғылыми-білім беру орталығы мен оның еншілес ұйымдары 686 ғылыми жоба әзірледі, оның 465-і өсімдік шаруашылығы саласында.Соңғы сегіз жылда ғалымдар дақылдардың 326 сорттары мен будандарын өсірді, олардың 37% - ы дәнді дақылдар. Барлық сорттар мемлекеттік сынақтан өтіп, мемлекеттік тізімге енгізілді.Отандық селекцияның тұқымдары фермерлер арасында үлкен сұранысқа ие. Мысалы, Қарағанды облысында егіс алқаптарының 99%-да отандық тұқым егілді.Биылғы жылы жоғары нәтиже көрсеткен «Таймас», «Дамсинская 2017» астық нарығындағы танымал сорттардың қатарына енді, сондай-ақ «Алтай 1» күздік бидай және «Өскемен» күздік қара бидайлары жақсы көрсеткішке ие болды.Қазақстандағы егіс алқаптарының 80 пайызын отандық тұқыммен қамту мақсатында ҰАҒББО 14 мың тонна суперэлиталық тұқым өндірді. Алдағы екі жылда бұл көлемді 40 мың тоннаға жеткізу жоспарлануда.Ақпарат көзі : https://www.gov.kz/memleket/entities/moa/press/news/details/917453

2024 жылдың қаңтарында Алматы еліміздің оқушылары қала музейлеріне тегін кіруге мүмкіндік алған Қазақстандағы алғашқы қала атанды. Қала әкімінің шешімімен қолға алынған бұл бастама мәдени тәрбие мен білім беру үдерісін дамытудағы маңызды қадам еді. Бір жыл ішінде Алматы музейлеріне 85 019 оқушы келді.Музейлерге тегін кіру мектеп білімін қолдауда маңызды құралға айналды. Бұл мүмкіндікті ата-аналар ғана емес, мұғалімдер де тиімді пайдаланып, оқушыларды экскурсияларға апарып жүр. Балалар тарихи жәдігерлерді, экспонаттар мен өнер туындыларын гидтердің жетекшілігімен зерттеуде. Тарих, әдебиет және басқа пән мұғалімдері көріп-білгенін сабақ тақырыптарымен байланыстырып, оқушылардың білімін тереңдетіп, оқу барысын қызықты етуге барынша ұмтылуда.Қала музейлерінде ұсынылған тарихи маңызды жәдігерлер ерекше қызығушылық тудырады. Мысалы, Алматы тарихы музейіне бару арқылы оқушылар мыңжылдық тарихы бар шаһардың дамуына қатысты негізгі оқиғаларды терең түсінеді, ал Ахмет Байтұрсынұлы музей-үйі қазақ әдебиеті мен тіл реформасын зерделеуде құнды ресурсқа айналған. Ықылас атындағы халық музыкалық аспаптар музейі оқушылардың музыкалық мәдениетті зерттеуге жол ашады.«Оқушылар музейлерге барып қана қоймай, артефактілер арқылы мәдениет пен өнерді терең түсінуге үйренеді. Бұл оларға сабақта алған білімін бекітіп әрі сыни ойлау дағдысын дамытуға септігін тигізеді. Экскурсиялар қазақ халқының тарихы мен дәстүрін құрметтеуге ықпал етеді. Бұл бастама балалардың жан-жақты дамуына ықпал етеді, ой-өрісін кеңейтеді және мәдениет, өнер, тарихты одан әрі зерттеуге деген қызығушылығын оятады», - деп хабарлайды Мәдениет басқармасы.Игі бастаманы жүзеге асыруда музей қызметкерлерінің еңбегі ерекше рөл атқарады. Экскурсиямен қоса, олар мектеп оқушыларына қыш ыдыс жасау, тиын соғу, зергерлік бұйымдар жасау және басқа да дәстүрлі қолөнер бойынша интерактивті шеберлік дәрістер ұйымдастырды. Бұл балаларға өзін шебер ретінде сезінумен қатар, сынап көруге мүмкіндік берді.Жалпы, мектеп жасындағы балалар Алматыдағы мына музейлерге тегін кіре алады:1) Алматы тарихы музейі (Қабанбай батыр көшесі, 132);2) Ықылас атындағы халық музыкалық аспаптар музейі (Зенков көшесі, 24/А);3) Д. А. Қонаев музейі (Төлебаев көшесі, 117);4) Әдеби-мемориалдық музей кешендері: С. Мұқановтың музей-үйі (Төлебаев көшесі, 125 - 4-ші пәтер), Ғ. Мүсіреповтың музей-үйі (Төлебаев 130, 25-ші пәтер);5) Н. Тілендиев мемориалдық музейі (Қонаев көшесі, 96);6) А. Байтұрсынұлы музей-үйі (Байтұрсынұлы көшесі, 60);7) Райымбек батыр музей кешені (Райымбек батыр даңғылы, 96а);8) Дәстүрлі мультимедиялық музыка орталығы (Нұркент шағын ауданы, 5/11).Ақпарат көзі : https://www.gov.kz/memleket/entities/almaty/press/news/details/917748

Mastercard мәліметтерінше, 2024 жылдың 11 айында Алматыда туристердің қанағаттану индексі 67-ге жетті, бұл өткен жылдың осы кезеңімен салыстырғанда 2,7%-ға артты. Туристер атап өткен негізгі факторлардың қатарында қауіпсіздік пен қызмет көрсету сапасы бар, олар саяхат туралы оң пікір қалыптастыруда маңызды рөл атқарады. 2024 жылы Алматыда туризм саласы мамандарының біліктілігін арттыру бойынша ауқымды жұмыстар жүргізілді. Бұл бағыт туристік инфрақұрылымды дамыту мен шаһар қонақтарымен тікелей жұмыс істейтін кәсіби мамандарды даярлауда маңызды элементке айналды. Шілде мен қараша аралығында көлік торабы мен туристермен жұмыс істейтін қызметкерлер үшін ағылшын тілі курстары ұйымдастырылды, оған 400 адам қатысты. Бұл оқыту шетелдік туристермен байланыс деңгейіна жақсартуға мүмкіндік берді, бұл халықаралық мәртебесін нығайтуға ұмтылатын қала үшін аса маңызды. Шілде мен қыркүйек аралығында Дүниежүзілік туристік гидтер қауымдастықтары федерациясының (WFTGA) курстары өткізілді, оған 200 гид пен экскурсовод қатысты. Бұл экскурсия қызметтерінің сапасын арттыруға және туристерге Алматының мәдени-тарихи мұрасын кеңінен танытуға жол ашты. Қараша айында туризм саласында 420 қызметкер үшін фасилитация тренингтері өткізілді. Олар Дүниежүзілік саяхат және туризм кеңесі (WTTC) ұсынған халықаралық сарапшылардың қатысуымен ұйымдастырылды. Бұл сессиялар туристік қызмет көрсетуде озық тәжірибені енгізуге және басқарушылық дағдыларды дамытуға ықпал етті. Сонымен қатар, қыркүйек пен қазан айларында Республикалық жедел-құтқару жасағы (РЖҚЖ) құтқарушылары үшін бастапқы дайындық бағдарламасы бойынша оқыту ұйымдастырылды. Бұл туристік маршруттардағы қауіпсіздік деңгейін арттыруға мүмкіндік берді, әсіресе, табиғи мұраға бай аймақ үшін бұл өте маңызды.Ақпарат көзі : https://www.gov.kz/memleket/entities/almaty/press/news/details/917745

Алматыда мүгедектер арбасындағы жолаушыға назар аударған №66 қалалық маршруттың автобус жүргізушісі Қанат Ахметов мегаполис әкімі Ерболат Досаевтың атынан алғыс алды.Бұған дейін экоактивист Евгений Мұхамеджанов әлеуметтік желілерде мүгедектер арбасындағы жолаушыға берілген көтергіштің көмегімен көлік құралына кіруге көмектескен автобус жүргізушісінің мейірімді және ұқыпты екеніне қалай куә болғаны туралы әңгімелеген еді. Кейінірек бұл жарияланымға қала тұрғындары көптеген жылы лебіздер білдірді.Қала басшысының атынан жүргізушіге бағалы сыйлық пен Алғыс хатты табыстаған «Алматыэлектротранс»автопаркінің басшысы Александр Бейсембиев оның кәсібилігін және бауырмалдығын ерекше атап өтті.Автобус жүргізушісі Қанат Ахметов қала басшысының өзінің ісіне назар аударғанына және қала басшылығының жылы сөздеріне ризашылығын білдірді.«Мен өз жұмысымды тек нұсқаулықта көрсетілген іс-қимылды орындау және қоғамдық көлік жүргізушісі қандай болуы тиіс екендігін түсіну арқылы жасадым. Біз жолаушыларды тасымалдап қана қоймаймы, сонымен қатар күн сайын адамдардың қауіпсіздігі мен жайлылығына мән береміз. Кез келген әріптесімнің осындай игі істі атқаратынына сенімдімін», - деді Қанат Ахметов.Қанат Ахметов төрт баланы тәрбиелеп отыр, «Алматыэлектротранс» автобусының жүргізушісі болып бір жылға жуық жұмыс істейді.Ақпарат көзі : https://www.gov.kz/memleket/entities/almaty/press/news/details/917754

Сәкен Сейфуллин атындағы №80 мектеп-гимназиясының талантты оқушылары Ақбота Мелис мен Омар Джусупбек ерекше жоба жасап шығарды, деп хабарлайды елорда әкімдігінің ресми сайты.SMART SOCKET деп аталатын бұл құрылғы Қазақстанда алғаш рет жасалды және телеграмм бот арқылы кез келген қашықтықтан басқаруға мүмкіндік береді. Ең бастысы, бұл розетканың есте сақтау қабілеті бар және ол Bluetooth пен Wi-Fi арқылы толыққанды жұмыс істейді.SMART SOCKET ерекшеліктері:- Есте сақтау қабілеті: Құрылғы қосылып тұрған құрылғыларды және соңғы параметрлерін есінде сақтайды, бұл оны қолдануды қауіпсіз әрі ыңғайлы етеді.- Қосымша мүмкіндіктер: Телеграмм бот арқылы кез келген қашықтықтан басқару.- Желілік қосылу: Bluetooth арқылы жақын қашықтықта жұмыс істесе, Wi-Fi арқылы қосылуға болады.- Энергия тиімділігі: Қуат тұтынуды нақты уақытта бақылап, қажеттіліктерге қарай баптауға мүмкіндік береді.- Қауіпсіздік:Төтенше жағдайларды анықтап, қауіптерді алдын ала ескерту.- 3D технологиялар: Құрылғының прототипі 3D принтерден жасалып, барлық сынақтардан сәтті өтті.«SMART SOCKET – бұл технологияны адамның игілігі үшін қолданудың айқын үлгісі. Біз жобаны әзірлеу кезінде үлкен тәжірибе жинадық, әрі адамдардың өмірін жеңілдетуді мақсат тұттық»,– дейді жоба авторлары Ақбота мен Омар.«SMART SOCKET – бұл жас буынның шығармашылық әлеуетінің нәтижесі. Біз болашақта бұл жобаны әр үйге қолжетімді етіп, оның мүмкіндіктерін одан әрі кеңейтуді жоспарлап отырмыз,»,– деп атап өтті жоба жетекшісі, информатика пәнінің мұғалімі Жанаргүл Байкенжеева.Ақпарат көзі : https://www.gov.kz/memleket/entities/astana/press/news/details/917792

Бүгін, 14 қаңтар күні өңір басшысы Нұрдәулет Қилыбай облыс активіне кандидатурасы ҚР Президенті әкімшілігімен келісілген жаңа орынбасары Тілек Жеткізгенұлын таныстырды.Тілек Жеткізгенұлы 1979 жылы Маңғыстау облысында туған. Білімі - жоғары. 2002 жылы М. Тынышпаев атындағы Қазақ көлік және коммуникациялар академиясын «Қаржы және несие» мамандығы бойынша, 2013 жылы Ш.Есенов атындағы Каспий мемлекеттік технологиялар және инжиниринг университетін «Құқықтану» мамандығы бойынша бітірген. Еңбек жолын 2001 жылы «Нефтебанк» акционерлік қоғамында несие бөлімінің маманы қызметінен бастап, кепілдік беру бөлімінің бас маманы, несие бөлімінің менеджері қызметін атқарды.2006 -2007 жылдары «ТМ-2006» жауапкершілігі шектеулі серіктестігінің директоры.2007-2010 жылдары Мұнайлы аудандық кәсіпкерлік бөлімінің бас маманы, кейін бөлім басшысы лауазымын атқарды.2010-2012 жылдар аралығында Маңғыстау облысы қаржы басқармасы басшысының орынбасары болып қызмет атқарды.2012-2015 жылдары Жаңаөзен қаласы әкімінің орынбасары, 2015 -2019 жылдары Ақтау қаласы әкімінің орынбасары болды. 2019-2022 жылдары Маңғыстау ауданының әкімі лауазымын атқарды.Маңғыстау облысы әкімінің баспасөз қызметіАқпарат көзі : https://www.gov.kz/memleket/entities/mangystau/press/news/details/917502

Астанада IZhO-2025 математика, физика және информатика пәндерінен XXI Халықаралық Жәутіков олимпиадасы басталды, деп хабарлайды елорда әкімдігінің сайты.Олимпиаданың салтанатты ашылуы Бейбітшілік және келісім сарайында өтті, іс-шараға 850 қонақ пен қатысушы жиналды.Олимпиада алғаш рет елордада өткізіліп отыр. Астана қаласы әкімінің орынбасары Есет Байкен қатысушылар мен олардың тәлімгерлерін ашылу салтанатымен құттықтады.Биыл олимпиадаға Қазақстан, Қырғызстан, Өзбекстан, Түрікменстан, Тәжікстан, Ресей, Беларусь, Армения, Әзірбайжан, Түркия, Грузия, Болгария, Румыния, Сербия және Моңғолия сияқты 15 елден 700-ге жуық оқушы мен 150 жетекші қатысуда. Қатысушылар ұлттық олимпиадалардың қорытындысы бойынша іріктелді.«Олимпиада бес күнге созылады және екі турдан тұрады. Тапсырмалар мамандандырылған сыныптар бағдарламасына сәйкес келеді және оларды халықаралық қазылар алқасы құрастырды. Қазылар алқасының төрағасы ҚР ҰҒА академигі Асқар Жұмаділдаев болып табылады»,- деп атап өтті «Дарын» республикалық ғылыми-практикалық орталығы директорының орынбасары Нұрлан Жұмагелді.Олимпиада қорытындысы бойынша жеңімпаздар мен жүлдегерлерге дипломдар мен медальдар, ал барлық қатысушыларға сертификаттар мен естелік сыйлықтар беріледі. Ұйымдастырушылар - ҚР Оқу-ағарту министрлігі, «Дарын» РҒПО және республикалық физика-математика мектебі.«Мен үшінші жыл қатарынан Халықаралық Жәутіков олимпиадасына қатысып келемін. Елордалық ретінде барлық қатысушылар мен қонақтарды қарсы алғанымызға қуаныштымын. Бүгін Олимпиаданың салтанатты ашылуы керемет шабыттандырды. Барлығымызға ұлттық әуенді таңдағынымызға қатты қуаныштымыз»,-деді Олимпиада қатысушысы және республикалық физика-математика мектебінің оқушысы Альтаир Ақанов.Олимпиаданың салтанатты ашылу жиынында би ұжымдары мен вокалистер өнер көрсетті. Ақпарат көзі : https://www.gov.kz/memleket/entities/astana/press/news/details/917186

Қазақстанда атаулы әлеуметтік көмекті (АӘК) тағайындаудың жаңа тәсілдері күшіне енеді. Бұл процесті мұқтаж азаматтар үшін ашық әрі қолжетімді етеді, деп хабарлайды Астана әкімдігінің ресми сайты.АӘК есептеу кезінде өтініш берген айдың алдындағы тоқсандағы отбасы табысының барлық түрлері ескеріледі. Бұл жалақы, әлеуметтік төлемдер, алимент және басқа да кірістер болуы мүмкін.АӘК сомасы ағымдағы тоқсанға тағайындалады және Астана қаласының аудандық әкімдіктері жанынан құрылған учаскелік комиссиялардың қорытындылары негізінде ай сайын төленеді.2025 жылдан бастап бір жастан алты жасқа дейінгі әрбір балаға АӘК тағайындалған сомасына қосылатын 5 898 теңге (1,5 АЕК) мөлшерінде қосымша төлем енгізіледі.Сонымен қатар, 2025 жылдың қаңтарынан бастап Қазақстанның барлық аумағын қамтитын пилоттық жоба іске қосылуда. Жоба аясында азаматтар өздерінің банктік шоттары туралы деректерді ашық бағдарламалық интерфейстерді (Open API) пайдалана отырып, банкаралық ақпарат алмасу жүйесі арқылы жібере алады. Бұл көмек тағайындау процесін жылдамдатады.АӘК алдын ала есептеу үшін Астана қаласы әкімдігінің Мансап орталығына мына мекенжай бойынша жүгіну қажет: Бейбітшілік көшесі, 9, 137-кабинет.Жұмыс кестесі 09:00 - ден 18: 00-ге дейін (түскі үзіліс: 13:30-дан 14:30-ға дейін).Ақпарат көзі : https://www.gov.kz/memleket/entities/astana/press/news/details/917304

Мүгедектігі бар адамдарды әлеуметтік қолдау және дамыту Астана қаласы Жұмыспен қамту және әлеуметтік қорғау басқармасының басым міндеті. Қалада 36 000-нан астам мүгедек адам тұрады, оның 26 000-нан астамы ересектер, 10 000-нан астамы балалар, деп хабарлайды елорда әкімдігінің ресми сайты.2024 жылы мүгедектігі бар адамдарды техникалық оңалту құралдарымен және қызметтермен қамтамасыз етуге 37 мыңнан астам түрлі құралдар ұсынылды: протездік-ортопедиялық көмек,сурдологиялық көмек, кресло-арбалар, санаторий-курорттық емдеу және т. б.2024 жылы 7 761 адам арнайы әлеуметтік қызметтер алды. Бұл қызметтер 11 ведомстволық бағынысты мекемелерде көрсетіледі. Негізгі мекемелердің арасында:1. «Шарапат» әлеуметтік қызмет көрсету орталығы;2. «Нұрлы жүрек» орталығы;3. «Қамқор» орталығы;4. «Демеу» қайта әлеуметтендіру орталығы;5. «Үміт» дағдарыс орталығы;6. «Жансая» орталығы және т.б.;2024 жылы әлеуметтік қызмет көрсететін үкіметтік емес ұйымдардың саны артты.Олар:* «Балам-ай» ҚҚ-жартылай стационарда 414 адам.* «Erekshe analar» ҚҚ — жартылай стационарда 413 адам.* «Астана қаласының мүгедек балалар қоғамы»ҚБ-үйде 398 адам.* «Орда»ҚБ (аутизмі бар балалар) — үйде 719 адам (18 жасқа дейін), 18 жастан асқан 11 адам.* «Береке Астана мүгедектер бірлестігі» ҚБ-593 адам үйде, 413 адам жартылай стационарда.* «Солнечный мир» ҚҚ- 136 адам.* «АСТ Астана әлеуметтік технологиялар» ҚБ-жартылай стационарда 357 адам.* «Қорғау -Дағдарыс орталығы»- 410 адам.Ақпарат көзі : https://www.gov.kz/memleket/entities/astana/press/news/details/917316

«Қазақстан студенттері Альянсы» республикалық студенттер қозғалысының төрағасы Ұлан Наукен студенттердің құқықтары мен мүдделерін үнемі қорғайтын институттық құрылым туралы айтты, деп хабарлайды елорда әкімдігінің сайты.«Мемлекет басшысы ­Қасым-Жомарт Тоқаевтың бастамалары үнемі студенттердің әл-ауқатын жақсартуға бағытталып келеді. Сөзсіз, білім алушылар үшін қолайлы орта қалыптастыруда әлеуметтік қолдау көрсетудің маңызы айрықша. Себебі, бүгінгі студент – ертеңгі білікті маман.Студенттерді әлеуметтік қолдау бағытында республика көлемінде қоғамдық ұйымдардың тарапынан түрлі бағыттағы жобалар жүзеге асырылуда. Соның ішінде Ғылым және жоғары білім министрлігі мен «Қазақстан студенттері Альянсы» республикалық студенттер қозғалысының бірігіп жасаған жобасы – Студенттік омбудсмендер институтын ерекше атап өтуге болады. Бұл қозғалыс шетелдерде жақсы дамып, іргелі жобалардың қатарында аталады. Ал ТМД елдері арасында ең алғашқы студенттер арасындағы омбудсмендер институты 2022 жылы Қазақстанда құрылды. Келесі жылы бастама жалғасын тауып, еліміздің барлық өңірінде студенттік омбудсмендер бекітілді. Ал былтырдан бастап әр университеттің өзінде студенттік омбудсмендер жұмысын бастады»,- деді Ұлан Наукен.Республикалық студенттер қозғалысының төрағасы студенттік омбудсмен студенттердің құқықтары мен мүдделерін үнемі қорғайтын институттық құрылым екенің атап өтті.«Жоғары білім алған әрбір студент өзінің әлеуетін іске асыра алуы тиіс, осы орайда білім алушыларға жан-жақты қолдау көрсетуде институттың орны ерекше. Мәселен, оқу жылы басталар алдында жатақханаларға арнайы мониторинг жүргізіледі. Тексеріс барысында орындарды бөлу критерийлері мен тұру жағдайлары бағаланады. Сондай-ақ жеке жатақханалардың жаңа оқу жылында жастарды қабылдауға дайындығы мен орын тапшылығы мәселесін шешуге бағытталған университеттермен жасалған шарттар тексеріледі. Мұндай мониторинг жұмыстары жылына төрт-бес мәрте өткізіледі.Атап өтерлігі, 2024 жылы Астана қаласы бойынша 4200 орындық 7 жатақхана тапсырылды. Олар Л.Гумилев атындағы Еуразия ұлттық университеті, «Тұран-Астана» университеті, Астана Медицина Университеті, Аstana IT University, С.Сейфуллин атындағы Қазақ агротехникалық зерттеу университетінде ашылды»,- деді ол.Ұлан Наукен студенттік омбудсмендер «Таза сессия» жобасын да қолға алғаннын атап өтті.«Онда білім алушыларды емтихан кезінде құқық бұзушылыққа бармауға шақырады. Студенттердің тамақтануы мен логистика, яғни жол жүруі мәселесін де реттеуге әсер етеді. Ваканттық грант пен арнайы шәкіртақының әділ бөлінуі үшін мониторинг тобында жұмыс істейді.Білім алушылар тарапынан келіп түскен өтініштерді барынша жедел шешуге мән беріледі. Бакалавриат студенттеріне ғана емес, магистрант және докторанттардың тарапынан туындаған сұрақтарға жауап беріледі. Яғни, омбудсмендер студент пен билік арасында сындарлы диалог құруға жәрдемдеседі.Биыл «Қазақстан студенттері Альянсы» республикалық студенттер қозғалысының құрылғанына 20 жыл толады. Осы уақыт аралығында студенттерді әлеуметтік тұрғыда қолдап қана қоймай, шығармашылық бастамаларын жетілдіру бағытында да бірқатар жобалар өз нәтижесін көрсетті. Студенттер қозғалысы – әр өңірден келген жастарды бір шаңырақ астында біріктірген ұйым. Білім алушылар арасында бұл ұйым ретінде ғана емес, үлкен отбасы тұрғысынан ерекше аталады. Себебі, студенттер қозғалысының көздегені – жастардың мүдделері мен қажеттіліктері»,- деді ол.Ақпарат көзі : https://www.gov.kz/memleket/entities/astana/press/news/details/917328

Астанада 10 жылдан бері тұрғылықты жері бойынша балалар мен жасөспірімдердің бос уақытын тиімді пайдалануға бағытталған «Аула клубтары» әлеуметтік жобасы табысты жұмыс істеп келеді, деп хабарлайды елорда әкімдігінің ресми сайты.Жоба Астана қаласы әкімдігінің «Астана жастары» Жастар ресурстық орталығының аула клубтарын дамыту бөлімінің жетекшілігімен жүзеге асырылуда.Бүгінгі таңда қалада 2500-ге жуық тәрбиеленушіні қамтитын 10 аула клубы жұмыс істейді. Бұл негізінен халықтың әлеуметтік осал топтарынан шыққан балалар мен жастар.* «Алматы» ауданында 4 клуб жұмыс істейді: «Қыран», «Жасқанат», «Tahtay», «Армандастар».* «Байқоңыр» ауданында «Бәйтерек» клубы жұмыс істейді.* «Есіл» ауданында «Ақжол» клубы жұмыс істейді,* «Сарыарқа» ауданында 3 клуб жұмыс істейді: «Динамо» Profit, SABAT FIGHT CLUB.* «Нұра» ауданында «Үркер» клубы жұмыс істейді.Аула клубтары 130 түрлі үйірмелер мен секцияларды ұсынады. Олардың 74-і спорттық, 56-сысы шығармашылық. Клубтардағы Барлық сабақтар тегін өткізіледі.Тәрбиеленушілерді қабылдау процесі ikomek109 бірыңғай байланыс орталығы арқылы жүзеге асырылады. Сондай-ақ, әлеуметтік желілер арқылы клубтар туралы ақпарат алуға және сабаққа жазылуға болады.Ақпарат көзі : https://www.gov.kz/memleket/entities/astana/press/news/details/917374

Астанада әлеуметтік қолдау мен жұмыспен қамтуды дамыту қаланың әлеуметтік саясатындағы басым бағыттардың бірі болып қала береді. 2024 жылы 193 мыңнан астам адам әлеуметтік төлемдермен және тегін қызметтермен қамтылды. Қолдау алушылар арасында 138 мыңнан астам зейнеткер, 36 мыңнан астам мүмкіндігі шектеулі адам, 34 248 көпбалалы отбасы, сондай-ақ «Алтын алқа» және «Күміс алқа» белгілерімен марапатталған 7 088 көпбалалы ана бар, деп хабарлайды елорда әкімдігінің ресми сайты.2024 жылы жұмыспен қамтуға жәрдемдесу шараларымен 23,3 мың адам қамтылды, оның 13,7 мыңы жастар. Жұмыс орындарын құрудың Өңірлік картасын іске асыру шеңберінде 67 634 жұмыс орны құрылды, оның 57 920-сы тұрақты, ал 9 714 -і уақытша.2024 жылы 1 979 мүмкіндігі шектеулі жан жұмыс іздеу бойынша жүгінді. Жұмыспен қамту шараларымен 1 085 мүгедек адам қамтылды, оның 293-і тұрақты жұмыс орындарына орналастырылды. Сондай-ақ 21-і жастар практикасынан өтті, ал 7-і әлеуметтік жұмыс орындарына орналасты. Сонымен қатар, 381 адам қоғамдық жұмыстарға, 49 адам «Күміс жас» бағдарламасы аясында, ал 18 адам кәсіпкерлік қызметті дамытуға грант алды.2025 жыл Қазақстанда Жұмысшы мамандықтар жылы болып жарияланды. Биыл жұмыссыз азаматтар үшін жұмысшы мамандықтар бойынша кәсіптік оқыту ұйымдастырылады. Үш қалалық бос орындар жәрмеңкесі мен 30 шағын жәрмеңке өткізу жоспарлануда.Сондай-ақ, 3000 адамды қамтытын 9-11 сынып түлектерімен кәсіптік бағдарлау іс-шаралары өткізілетін болады. «Еңбек жолы» және «Парыз» сияқты еңбек форумы мен конкурстарын, сондай-ақ спорттық және мәдени іс-шараларды өткізу жоспарлануда.Ақпарат көзі : https://www.gov.kz/memleket/entities/astana/press/news/details/917352

Smart Astana қосымшасының ең пайдалы бөлімдерінің бірі «Медицина» болып табылады. Ол Астанада медициналық қызмет көрсету сапасын жақсартуға бағытталған 7 негізгі қызметті қамтиды, деп хабарлайды елорда әкімдігінің ресми сайты.Қосымша қауіпсіздік, тұрғын үй-коммуналдық шаруашылық, білім беру және т.б. сияқты қалалық қызметтердің кең ауқымын қамтиды. Алайда, елорда тұрғындарына қолжетімді медициналық қызметтерге арналған бөлімге ерекше назар аударылады.«Медициналық ұйымдар» және «Медициналық-әлеуметтік мекемелер»бөлімдерінде емханалар, ауруханалар және әлеуметтік қызмет көрсету орталықтары туралы толық мәліметтер жазылған. Пайдаланушылар мекеменің атын, мекенжайын, байланыс деректерін, мекеме басшысының атын және орналасқан жерін картадан көре алады.Сондай-ақ, әр мекемені 1 ден 5-ке дейін шкала бойынша бағалау мүмкіндігі қарастырылған. «Жақын» функциясы медициналық мекемелерді пайдаланушының қазіргі орналасқан жерінен қашықтығы бойынша сұрыптауға мүмкіндік береді. Ал «Таңдаулылар» функциясы болашақта жылдам қол жеткізу үшін таңдалған мекемелерді жеке тізімге қосуға мүмкіндік береді.Астаналықтарға одан да ыңғайлы болу үшін қосымшада «Менің емханам» бөлімі бар. ЖСН енгізілгеннен кейін экранда байланыс деректерін, мекенжайды және картаны қоса, тіркелген медициналық мекеме туралы ақпарат пайда болады.Енді дәрігерге онлайн жазылуға болады. Ол үшін «Дәрігерге жазылу»бөліміне кіріп, ЖСН енгізу жеткілікті. Ал жүйе учаскелік дәрігерді қабылдаудың қол жетімді күндері мен уақытын ұсынады.Төтенше жағдайлар кезінде қосымшада «Дәрігерді үйге шақыру» бөлімі қарастырылған. ЖСН енгізілгеннен кейін пациент, ұйымның атауы және мекен-жайы туралы ақпарат автоматты түрде пайда болады. Пайдаланушылар шақыртудың себебін көрсетіп, қажет болған жағдайда мекенжайды нақтылау мақсатында қосымша ақпарат жаза алады.Бұдан басқа, қосымша «Медициналық сақтандыру (МӘМС)» бөлімінде медициналық сақтандыру мәртебесі туралы ақпаратты ұсынады. Мұнда қала тұрғындары сақтандыру туралы жиі қойылатын сұрақтарға жауап таба алады.Дәрігерге барғаннан кейін «i-teka дәрі-дәрмектері» бөлімінің арқасында жақын маңдағы дәріханаларда қажетті дәрі-дәрмектердің құны мен бар-жоғын оңай білуге болады. Бұл қызмет қажетті дәрі-дәрмектерді тез табуға және орналасқан жері бойынша ыңғайлы дәріхананы таңдауға көмектеседі.Қолданба сонымен қатар қаладағы ауаның ластану деңгейі туралы маңызды ақпаратты ұсынады. «Ауаның ластануы» бөлімінде AQI ауа сапасының индексін көрсетеді, бұл тұрғындарға қаладағы экологиялық жағдайды бақылауға көмектеседі.2024 жылғы дерек бойынша Smart Astana қосымшасының белсенді пайдаланушыларының саны 30 000 адамнан асты. Бұл қала тұрғындары арасында цифрлық сервистерге деген қызығушылықтың бар екенін көрсетеді.Ақпарат көзі : https://www.gov.kz/memleket/entities/astana/press/news/details/917383

Астана қаласындағы 38 мектеп-лицейінің 7 «Д» сынып оқушысы Бақтығали Ерланұлы ақылды қоқыс жәшігін ойлап тапты, деп хабарлайды елорда әкімдігінің сайты.Әр нәрсеге қызығушылық танытып, қоғамдық ортаның тазалығына мән беріп жүретін елордалық оқушы үйдегі қоқыс жәшіктерін автоматтандырған. Яғни, жәшіктердің қақпақтары адам қолын жақындатқанда өздігінен ашылып, 5 секундтан кейін қайтадан жабылады.«Мен қоқыс салғыштардың қақпақтарын қолмен ашу дұрыс емес деп ойлаймын. Себебі қақпақтағы көзге көрінбейтін микробтар адамның қолында қалып, ішкі ағзасына өтуі мүмкін. Осылайша қақпағы өздігінен ашылатын етіп жасадым»,- дейді оқушы Бақтығали Ерланұлы.Болашақта тілші болуды армандайтын оқушы ғылыми жаңалықтарды зерттеп, оны жариялауды қазірден үйреніп жүргенін айтады. Ақпарат көзі : https://www.gov.kz/memleket/entities/astana/press/news/details/917392

Абай облысының әкімі Нұрлан Ұранхаевтың төрағалығымен төтенше жағдайлардың алдын алу және жою жөніндегі комиссияның кезекті отырысы өтті. Онда азаматтық қорғаудың аумақтық күштері мен құралдарының көктемгі су тасқынына, сондай-ақ қажет болған жағдайда халықты эвакуациялауға дайындығы мәселелері қаралды. Отырыста гидротехникалық құрылыстардың жай-күйі, су басудың алдын алу шаралары және қираған нысандарды қайта жаңарту жұмысы талқыланды.Өткен жылы жалпы ұзындығы 2 шақырым болатын жергілікті маңызы бар автомобиль жолдарының 24 учаскесі тасқын су астында қалды. Облысымыздағы 3 көпір бүлінді. Соның ішінде Кіндікті ауылына апаратын жолдағы көпір қайта қалпына келтірілді. Тассай ауылындағы көпірге жобалық-сметалық құжаттама әзірленуде. Бозай ауылындағы көпірге ЖСҚ әзірлеу биылға жоспарланған.Автомобиль жолдарындағы су тасқынының салдарын жою үшін «Семей Жолдары» ЖШС мердігерлік ұйымы «Ақсуат – Шыбынды – облыс шекарасы» жол учаскесінде 6 су өткізу құрылысын орнатты.Ықтимал төтенше жағдайдың алдын алу үшін 70 арнайы техникасы бар 7 авариялық бригаданың тәулік бойы кезекшілігі ұйымдастырылған. Қажетті материалдар қоры жасақталып, 1000 текше метр құм, 1047 текше метр ПГС, 260 текше метр тасты топырақ жиналды. Мотопомпалар, күрек, етік және басқа да жабдықтар сатып алынды.2024 жылғы су тасқынын талдау негізінде «Қарағанды – Аягөз – Тарбағатай – Боғас» автожолдарының учаскелерінде су өткізу құбырларын жөндеу жоспарланған. Жұмысты аяқтау 2025 жылдың тамызына жоспарланған. Сонымен қатар, Семей қаласындағы Ертіс өзені арқылы өтетін автогуж көпірін қайта жаңарту жалғасуда. Қазіргі уақытта «Integra Construction KZ» ЖШС мердігерлік ұйымы 9 тіректің 5-ін тұрғызды, су деңгейіне күнделікті мониторинг жүргізілуде.Барлық іс-шараларды іске асыру су басу қаупін азайтуға, су тасқыны кезеңінде жол инфрақұрылымының қауіпсіздігін және көліктің үздіксіз қозғалысын қамтамасыз етуге бағытталған.Отырыста көтерілген мәселелер бойынша облыс әкімі басқарма басшылары мен әкімдерге тиісті тапсырма берді.Ақпарат көзі : https://www.gov.kz/memleket/entities/abay/press/news/details/917784

Оқу-ағарту министрлігі тоғызыншы сынып түлектері үшін сұранысқа ие мамандықтар бойынша тегін білім алуға жағдай жасауда. Биыл сұранысқа ие техникалық және кәсіптік білім беру бойынша тегін оқумен қамтылатын студенттер саны 153 мыңды құрайды, бұл көрсеткіш өткен жылмен салыстырғанда 10 мың орынға артты, деп хабарлайды министрліктің баспасөз қызметі. Мемлекеттік тапсырыстың 70%-ы техникалық мамандықтарға, оның ішінде машина жасау, көлік, энергетика, IT, құрылыс және басқа да салаларға бағытталатын болады. «Негізгі басымдық – бәсекеге қабілетті мамандар даярлау, білім беру мекемелерін заманауи материалдық-техникалық базамен толық қамтамасыз ету, педагогтердің біліктілігін арттыру. Қазіргі таңда кәсіптік-техникалық білім беру жүйесін трансформациялау бойынша кешенді жұмыс жүргізілуде, бұл мемлекеттік тапсырыстың көлемін ұлғайтуды, білім беру бағдарламаларына үздік халықаралық тәжірибелерді енгізуді, кәсіби шеберлік чемпионаттарын өткізуді қамтиды. Сондай-ақ, кәсіпорындар үшін дуальді оқыту жүйесін дамыту және мамандарды даярлау мақсатында бизнес құрылымдары мен инвесторларды тарту жоспарлануда», – деп атап өтті Техникалық және кәсіптік білім департаментінің директоры Әсет Мұханбетов. Қазіргі уақытта колледждерге 518 кәсіпорын шефтік қамқорлық көрсетеді, олардың санын 4 мыңға жеткізу жоспарлануда. Сонымен қатар жұмыс берушілермен бірлесіп, кәсіптік стандарттар мен мемлекеттік жалпыға міндетті білім беру стандарттары және WorldSkills стандарттарының талаптарын ескере отырып, 8 мыңға жуық білім беру бағдарламасы әзірленді. Биыл колледждер мен жұмыс берушілер 2 мыңнан астам білім беру бағдарламасын әзірлейді және өндірістік базада 2 мың педагог тағылымдамадан өтеді. Ақпарат көзі : https://www.gov.kz/memleket/entities/edu/press/news/details/917388