2025 жылғы 30-31 қаңтарда Астана қаласында Жасыл климаттық қордың қолдауымен Азия даму банкі іске асыратын «Мұздықтардан фермаларға» (G2F) бағдарламасына арналған семинар өтуде.Бағдарлама Су ресурстарын кешенді басқару, ауыл шаруашылығында тұрақты суару әдістері мен инновациялық технологияларды енгізу мәселелерін қамтиды.Семинар Өзбекстан, Қырғызстан, Түрікменстан, Әзербайжан, Армения, Грузия, Пәкістан және халықаралық ұйымдардың өкілдерін аймақтық деңгейде фермерлерді қорғау, тұрақты сумен жабдықтау және азық-түлік қауіпсіздігі үшін сенімді негізді қамтамасыз ету мәселелерін талқылау үшін жинаған басты оқиға болды.Е. Нысанбаев семинар шеңберінде аймақтық кеңестер өткізудің маңыздылығын атап өтті, ол халықаралық ұйымдармен және қатысушы елдермен өзара іс-қимыл арқылы 2026 жылы БҰҰ қамқорлығымен Өңірлік Климаттық саммитке апаратын жолға негіз болады.Министр сонымен қатар мұздықтарды мониторингілеу және бейімделу стратегияларын әзірлеу мәселелері бойынша ЮНЕСКО қамқорлығымен Орталық Азия өңірлік гляциологиялық орталығының шешуші рөлін атап өтті.Ақпарат көзі : https://www.gov.kz/memleket/entities/ecogeo/press/news/details/928145

Агроөнеркәсіптік кешен экономикалық өсудің негізгі қозғаушы күштерінің біріне айналуы тиіс. Бұл бизнес үшін де, мемлекет үшін де басымдық болып табылады. Бұл туралы Ауыл шаруашылығы қызметкерлері форумында мемлекет басшысы Қасым-Жомарт Тоқаев мәлімдеген еді.«Ең алдымен, бұл азық-түлік қауіпсіздігін қамтамасыз ету тұрғысынан маңызды. Ауыл тұрғындарының өмірі мен әл-ауқаты да саланың жай-күйіне тікелей байланысты», - деп атап өтті Мемлекет басшысы.Абай облысында агроөнеркәсіптік кешенді дамыту жалғасуда. 2024 жылы ауыл шаруашылығы дақылдарының егіс алқабы 760,2 мың га құрады. Бұған су үнемдеу технологияларын әртараптандыру мен енгізудің нәтижесінде қол жетті. Атап айтқанда, жемшөп дақылдарының ауданы 17,1 мың гектарға, картоп – 2,3 мың гектарға ұлғайтылды.Дәнді және майлы дақылдардың өнімділігі гектарына 12-ден 15 центнерге дейін өсті. 2024 жылы суармалы жердің көлемі 30,1 мың га, оның ішінде 13,8 мың га жаңбырлатып және тамшылатып суаруды пайдаланды. Бұл жемшөп көлемін арттырып қана қоймай, мал шаруашылығының дамуына да ықпал етті.Өткен жылы облыста мал басы айтарлықтай өсті: ірі қара мал – 42,1%, қой – 21,4%, ешкі-40,7% - ға артты. Жылқы саны бұрынғы деңгейде қалды-350 мың бас.Мал шаруашылығы өнімдерінің (ет өнімдері) өнімділігінде оң динамика байқалады. 2024 жылы сиыр еті 1,1%, құс еті 1,1%, сүт 2,5%, тауық жұмыртқасы 3,1%-ға өсті.Өңірде көкөніс өнімдерін сақтау үшін жалпы сыйымдылығы 51,8 мың тонналық 13 қойма жұмыс істейді. Бұл жергілікті ауыл шаруашылығы өндірушілерінің қажеттіліктерін өтейді.«2024 жылы агроөнеркәсіптік кешеннің негізгі капиталына инвестициялар тарту жоспарлы көрсеткіштерден асып түсті. Болжам бойынша 40,5 млрд теңге, іс жүзінде 43,2 млрд теңге салынды. 2025 жылы кемінде 48 млрд теңге тарту көзделген. Аймақта 2 ет комбинаты, 1 етті бағыттағы тауық фабрикасы мен 10 мың басқа арналған өндірістік бордақылау алаңын салу мен 5,4 мың гектар егістік алқапқа суару жүйесі орнатылмақ. Аграрлық секторды қолдауға мемлекет 14,4 млрд теңге субсидия бөлді. Импортты алмастыру бойынша жұмыс жалғасуда. Өңір өзін негізгі азық-түлік тауарларының 14 түрімен қамтамасыз етеді», - деді облыс әкімінің орынбасары Қуаныш Сүлейменов.2024 жылы өңірде 76,7 мың тонна ұн, 2,5 мың тонна макарон өнімдері, 122,8 мың тонна тазартылмаған күнбағыс майы, 4,6 мың тонна өңделген сүт, 320 тонна ірімшік пен сүзбе, 179 тонна сары май және 1 254 тонна шұжық өнімдері өндірілді.Маңызды жобалардың бірі - 2025 жылы қуаттылығы жылына 72 мың тонна болатын «Qazaq Astyq Group» ЖШС кәсіпорнында тазартылған өсімдік майын өндіру желісін іске қосу. Жобаның инвестициясы 7,2 млрд теңгені құрайды.Әкім орынбасары бұл шаралардың барлығы өңірдің азық-түлік қауіпсіздігін нығайтуға, ауыл шаруашылығын дамытуға және импорттық тауарларға тәуелділікті азайтуға бағытталғанын айтты.Ақпарат көзі : https://www.gov.kz/memleket/entities/abay/press/news/details/927766

Ауданда әлеуметтік маңызы бар азық-түлік өнімдеріне мониторинг жүргізетін 1 аудандық және 9 мобильдік топ жұмыс істеуде. Дүкен иелеріне атқарушы билік органдарымен арада жасалған меморандумда көрсетілген талаптарды сақтау, негізсіз бағаны өсірмеу туралы түсінік жұмысты үнемі жүргізіледі.Бүгінде сауда дүкендері иелерімен әлеуметтік маңызы бар азық-түлік өнімдеріне үстемені 15 пайыздан асырмау туралы екі жақты 92 меморандум жасалды.Әлеуметтік маңызы бар азық-түлік өнімдері бағасын тұрақты ұстап тұру мақсатында жыл бойы жәрмеңке өткізілді. Былтыр 18 жәрмеңке өткізіліп, жергілікті жерде өндірілген өнімдер халыққа қолжетімді бағада ұсынылды. Сондай-ақ, ауданның тауар өңдірушілері екі мәрте Семей қаласындағы «Северный» сауда базарындағы жәрмеңкеге қатысып, сиыр, қой, жылқы етін бекітілген бағада саудалады.Шағын және орта бизнес те дамып келеді. 2024 жылы ауданда 8 жаңа шағын бизнес нысаны іске қосылды. «Ағайынды» сауда үйі, «Қамбар» мини-маркеті, «Дос» мейрамханасы, Құмкөл ауылынан «Кенжеғали» мини-маркеті сияқты бірнеше нысан ашылып, халыққа қызмет көрсетуде.Ақпарат көзі : https://www.gov.kz/memleket/entities/abay/press/news/details/927988

Қазіргі уақытта жалпы ұзындығы 240 шақырымға жететін елді мекендер мен аудандық жолдарды қардан тазарту үшін 20-дан астам техника жұмылдырылған.Олардың қатарында 2 автогрейдер, 15 трактор, 5 тиегіш және екі К-700 тракторы бар.Қардың көп түсуіне байланысты тазарту жұмыстары күшейтілген режимде жүргізілуде. Сондай-ақ, аудан орталығындағы барлық саябақтар да қардан тазартылған.Ақпарат көзі : https://www.gov.kz/memleket/entities/abay/press/news/details/928004

Бүгін жыр қағаны атанған ақын Жұматай Жақыпбаевтың 80 жылдығына орай Талдықорғандағы Д. Рақышев атындағы филармонияда «Жыр жұлдызы Жұматай» атты әдеби-сазды кеш өтті, - деп хабарлайды Жетісу облысы әкімінің баспасөз қызметі. Облыстық филармония ғимаратының фойесінде С.Сейфуллин атындағы облыстық орталық кітапхана ақынның өлең жинақтарынан, оның шығармашылығы туралы жазылған зерттеу кітаптарынан және ақынның әр кезеңдегі фотосуреттерінен көрме қойды.Әдеби-сазды кеш Б. Римова атындағы драма театры актерларының орындауында шайыр өлеңдерінен қойылған прологпен ашылды.Рухани шарада облыс әкімінің орынбасары Диас Есдәулетов көпшілікке тілегін жеткізді:- Биыл - ұлт поэзиясында өзіндік орны бар қазақтың көрнекті ақыны Жұматай Жақыпбаевтың мерейлі жылы. Жұматай ақынның жерлесіміз болғаны - біз үшін мақтаныш. Қазақ барда ақынның рухы асқақтай береді, - деді Д. Есдәулетов.Аталған әдеби кешті ҚР Мәдениет қайраткері, ақын Жұматай Әміреев жүргізді.Алматыдан арнайы келген ақындар Әбубәкір Қайран, Сайлаубай Тойлыбаев, Маралтай Райымбекұлы, Бақыт Беделхан, сол сияқты жетісулық қаламгерлер Әміре Әрін, Жомарт Игіман сахнада Жұматай шығармашылығына қатысты ой-пікірлерін білдіріп, өлең оқыды. Жыр қағанының көзін көріп, жанында жүрген аға буын ақындар естеліктерін айтты. Осы кеште Д. Рақышев атындағы облыстық филармония әншілерінің орындауында ақынның сөзіне жазылған "Айыбым болса кеше гөр", "О, Ләйлә" әндері, сонымен қатар басқа да концерттік нөмірлер көпшілікке ұсынылды. Атап өтсек, ақынның мерейтойы биылғы қаңтардан облыстың әрбір аудан-қаласында өткізіле бастады.Еске салсақ, Жұматай Жақыпбаев 1945 жылы Ескелді ауданы Ешкіөлмес ауылында туған. «Саратан» (1979 ж.), «Ләйлә» (1981 ж.), «Шұғынық-гүл төркіні» (1988 ж.) және басқа да жыр жинақтарының авторы. Және соңына бірнеше күй шығарып қалдырған. Көзі тірісінде Жақыпбаевтың маңайына топтасқан әдеби ортаның аты аңызға айналып, «Жұматайдың қағанаты» деген атпен қазақ әдебиетінің тарихында қалды. Жетісу облысы әкімінің баспасөз қызметі. Фотосуреттерді түсірген: Жұмабай МұсабековАқпарат көзі : https://www.gov.kz/memleket/entities/zhetysu-oblysy/press/news/details/928222

Келестік шаруалар қырыққабаттың алғашқы өнімін жинауға кірісті. Атап айтқанда, Біртілек ауылдық округіне қарасты Жолбасшы ауылының тұрғыны Шералы Тәжібаев 2 гектар аумаққа қырыққабат өнімін егіп, бүгінде 38 тонна өнім алып отыр. Былтыр қара күзде егілген көкөніс қазір пісіп жетілген. Шаруа ақпан айында тағы 100 тонна өнім алуды жоспарлап отыр. Жиналған өнімнің алғашқы легі еліміздегі үлкен қалаларға жөнелтілуде.– Биыл қар аз түсті. Қыс суық бола қойған жоқ. Жеңіл жамылғының астына егілген көкөніс көшеті тез тамыр байлады. Жиналып жатқан қырыққабаттың әрқайсысының салмағы 4 келіге дейін барады. Қырыққабатты ертерек ексек, мұнан кейін сәуір, мамыр айынан бастап екінші өнім егеміз. Ерте шықса бағаға да әсер етеді. Қанша ерте шықса, сонша қымбат болады, – дейді Шералы Шырынбайұлы.Жыл он екі ай тыным көрмейтін келестік диқандардың дені қазір қырыққабат егіп жатыр. Өңірдегі шаруашылықтар мың гектарға жуық жерден астам жерге көкөністің осы түрін егуде. Бір маусымда егістіктен үш рет өнім жиып алу аграрлық сала үшін де, шаруаға да тиімді болды.Айта кетсек, өткен жылы Келес ауданы бойынша 2 400 гектарға қырыққабат өнімі егіліп, шаруалар 35 мың тонна өнім алды.Түркістан облысы әкімінің баспасөз қызметіАқпарат көзі : https://www.gov.kz/memleket/entities/ontustik/press/news/details/927677

Түркістан облысының әкімі Нұралхан Көшеров Италияның Eni Plenitude энергетикалық компаниясының Қазақстандағы «ArmWind» ЖШС-ның Бас директоры Федерико Пульезе бастаған делегацияны қабылдады. Кездесу барысында тараптар екіжақты ынтымақтастықтың қазіргі жағдайы мен перспективаларын жан-жақты талқылады.Баламалы энергия өндірумен айналысатын халықаралық энергетикалық компания Түркістан облысы, Отырар ауданында қуаты 50 МВт болатын заманауи технологияларға негізделген «Шәуілдір» күн электр станциясының құрылысын жүзеге асырған. Бұл өз кезегінде, қоршаған ортаны ластамай, электр қуатын өндіруге мүмкіндік береді. Кездесу барысында осы жобаның әлеуеті мен оның мүмкін болатын дамуы туралы сөз қозғады.Сондай-ақ энергия үнемдеу мен жаңартылатын қуат көздерін қолдануды өнеркәсіпті дамытуда пайдалану туралы талқыланды. «Күлтөбе» археологиялық алаңында 3D карталау жабдығын орнату мүмкіндігі туралы итальяндық компаниямен талқылаулар жүргізілді. Облыс әкімі бұл жұмыстардың аймақ үшін маңыздылығын ерекше атап өтіп, өңірдің дамуына бағытталған жобаларды қолдауға дайын екенін айтты.– Осы уақытқа дейін өздеріңізбен тығыз байланыста жұмыс атқарып келдік және болашақта да бірлескен жобаларды іске асыру бойынша екіжақты ынтымақтастығымызды одан әрі дамытамыз деп үміттенеміз. Біздің өңіріміз жаңартылатын энергия көздері саласында айтарлықтай ресурстық әлеуетке ие. Сондықтан осы жұмыстарды өңірдің өнеркәсіптік секторына да қолдануды қарастырудамыз. Осы бағытта бірлесе жұмыс атқаруға шақырамын Өз тарапымыздан өңір дамуына, тұрғындарымыздың әл-ауқатын арттыруға ықпал ететін барлық бастамаларды қолдауға әрқашан дайынбыз, – деді облыс әкімі Нұралхан Көшеров.ArmWind компаниясының Бас директорі өз кезегінде аймақтың дамуына жергілікті еңбек күшін және техникалық дағдыларды арттыру арқылы үлес қосатын, сондай-ақ ArmWind компаниясының тұрақты даму миссиясына сәйкес жаңартылатын энергия көздері саласында жаңа мүмкіндіктерді зерттеу мақсатында осы жемісті ынтымақтастықты жалғастыруды ұсынды.Айта кетейік, италиялық Eni Plenitude Arm Wind компаниясы Түркістан қаласындағы мектепке қуаты 50 кВТ-қа тең күн электр станциясын орнатқан болатын, сондай-ақ басқа да энергия тиімділігін арттыру шараларын жүзеге асырды.Түркістан облысы әкімінің баспасөз қызметіАқпарат көзі : https://www.gov.kz/memleket/entities/ontustik/press/news/details/927884

Түркістан облысы әкімдігінде Мемлекет басшысы Қасым-Жомарт Тоқаевтың Үкіметің кеңейтілген отырысында берген тапсырмаларын орындау жолдары талқыланған мәжіліс өтті. Күн тәртібінде 6 мәселе қаралды. Атап айтқанда, экономиканы әртараптандыру, инфрақұрылымды және энергетиканы дамыту, денсаулық сақтау, білім беру және әлеуметтік салаларды дамыту, цифрлық технологияны жан-жақты енгізу, салық-бюджет саясатын реформалау және «Заң мен тәртіп» қағидасын іске асыру жөніндегі жоспарлар баяндалды. Түркістан облысының әкімі Нұралхан Көшеров жауаптыларға өңір экономикасын көтеру бағытындағы жұмыстарды жандандыруды тапсырды.– Мемлекет басшысы экономикамыздың көлемін арттыруды және өңіріміздің жалпы ішкі өнімін өсіруді тапсырды. Өңдеу өнеркәсібін жедел дамытуды және инвестиция таруға баса мән беруді айрықша атап өтті. Өңірге жеке инвестиция тарту – аудан, қала әкімдерінің ең басты міндеті. Облыста жұмыс істеп тұрған өндіріс орындарын жаңғыртумен қатар жаңа өндіріс орындарын ашуға баса мән беру қажет. Шетелдік және отандық инвесторларға бірдей ұстаным мен талап қойылуы керек және олар экологиялық талаптарды міндетті түрде орындаулары қажет. 2025-2027 жылдар аралығында жүзеге асырылатын 85 инвестициялық жобаның пулы қалыптасты. Осы жобаларды іске асыру бойынша жеке-жеке жұмыс жоспарын әзірлеуді тапсырамын, – деді Нұралхан Көшеров.Мәжілісте облыс әкімінің бірінші орынбасары Зұлпыхар Жолдасов пен облыс әкімінің орынбасары Бейсенбай Тәжібаев жетекшілік ететін салалары бойынша жоспарларын баяндаса, басқарма басшыларының да есептері мен жоспарлары тыңдалды. «Заң мен тәртіп» қағидасын іске асыру бойынша Түркістан облысының полиция департаментінің бастығы Мұрат Қабденов баяндама жасады.Облыс әкімі Нұралхан Көшеров экономиканы әртараптандыру, облыс аумағында жер қойнауын пайдаланушыларымен жасалған әрбір келісімшарт міндеттемелерінің толық орындалуын қамтамасыз ету, агроөнеркәсіп кешенін дамыту және су ресурстарын үнемдеп пайдалану, суды көп қажет ететін дақылдарды азайтып, құрғақшылыққа төзімді дақылдарды көбейтуді және су үнемдейтін технологияларын енгізуді тапсырды.Жауаптыларға негізгі басымдықтарды айқындап, стратегиялық маңызы бар жобаларды қаржыландыру және жеке инвестиция тарту жұмыстарын жүргізуді, туризм, инфрақұрылымды дамыту, ауыз су, газ мәселесін шешу, құрылыс жұмыстарының сапасын арттыру, медицина, білім, әлеуметтік саладағы мәселелерді шешу жөнінде тапсырма берді. «Жұмысшы мамандықтар жылы» аясында жүйелі іс атқару, цифрлық технологияны енгізу, бюджетті тиімді игеру, өзіндік кірістерді арттыру, жұмыс орындарын ашу бағытында да жұмыс жанданады.Түркістан облысы әкімінің баспасөз қызметіАқпарат көзі : https://www.gov.kz/memleket/entities/ontustik/press/news/details/928148

Түркістан облысы әкімдігі жанындағы құқық бұзушылық профилактикасы жөніндегі ведомствоаралық комиссия отырысы өтті. Мәжіліске Түркістан облысының әкімі Нұралхан Көшеров төрағалық етті. Күн тәртібінде 4 мәселе қаралды.2024 жылдың қорытындысы бойынша облыстағы қылмыстардың және жол-көлік оқиғаларының деңгейі туралы ҚР Бас прокуратурасының Құқықтық статистика және арнайы есепке алу жөніндегі комитетінің Түркістан облысы бойынша департаменті бастығының орынбасары Е.Пралиев пен Түркістан облысы полиция департаменті бастығының бірінші орынбасары Б.Айтпаев баяндама жасады.Кеден саласындағы құқық бұзушылықтар мен өзекті мәселелер туралы Түркістан облысы мемлекеттік кірістер департаменті, кедендік әкімшілендіру басқармасының басшысы С.Маликов, Түркістан облысы бойынша экономикалық тергеп-тексеру департаменті басшысының орынбасары Д.Сүлейменовтің есебі тыңдалса, пробация қызметі есебіндегілермен қайта қылмыстың алдын-алу шараларының тиімділігі мен оларға құқықтық әлеуметтік көмек көрсету туралы Түркістан облысы прокуратурасының үкімдердің орындалуын қадағалау басқармасының басшысы Н.Мықтыбаев, Түркістан облысы бойынша қылмыстық-атқару жүйесі департаментінің бастығы С.Жұмағұлов, Түркістан облысы жұмыспен қамтуды үйлестіру және әлеуметтік бағдарламалар басқармасының басшысы Ә.Темірбаева баяндама жасады. Сонымен бірге теміржол саласындағы құқықтық тәртіп пен қауіпсіздік жағдайы да талқыланды. Бұл туралы Түркістан станциясындағы желілік полиция бөлімінің бастығы Д.Орынбаевтың ұсыныстары қаралды. Облыс әкімі аталған мәселелерді бақылауда ұстап, тиісті жұмыстар атқаруды тапсырды.– Қылмыстар деңгейі өскен аудан, қалаларда және қоғамдық орындарда рейдтік іс-шараларды күшейтіп, қылмыстардың алдын алу және жол-көлік оқиғаларын болдырмау мақсатында тиісті жұмыстарды жандандыру керек. Пробация есебінде тұрған азаматтардың қайта қылмысқа баруының алдын-алу бойынша тиісті жұмыстарды атқарып, пробация есебінде тұрған азаматтарды толық жұмыспен қамту үшін тиісті жұмыстарды ширатуды тапсырамын, – деген Нұралхан Көшеров жауаптыларға «Атамекен», «Қапланбек», «Қазығұрт» кеден бекетін қайта құру шараларын уақтылы аяқтау және «Жібек жолы» кеден бекетін толық жаңғырту бойынша жұмыстарды сапалы атқаруды тапсырды.Сонымен қатар кеден бекеттерінде адамдар мен көліктердің ретсіз жиналуының алдын алу, импортталатын тауарларды декларациялау жұмыстарын қатаң бақылау, халықаралық жүк айналымы көлемін арттыру бойынша ұсыныстар енгізу, кеден бекеттері мен өткізу пункттеріндегі жолаушылар мен жүктердің қауіпсіздігін қатаң қамтамасыз ету мәселелері де айтылып, тиісті тапсырмалар берілді.Айта кетейік, 2024 жылы Түркістан облысында қылмыстық құқықбұзушылықтардың саны 3,5%-ға (5 453-тен 5 262-ге дейін) азайған. Аймақта қауіпсіздікті сақтау, елді мекендерді дамыту, азаматтардың құқығын қорғау, тұрғындарды жұмыспен қамту бағытында жүйелі жұмыстар жалғасады.Түркістан облысы әкімінің баспасөз қызметіАқпарат көзі : https://www.gov.kz/memleket/entities/ontustik/press/news/details/928165

Қазақстан сәуір айына дейін 11 млрд текше метр су алады. ҚР Су ресурстары және ирригация министрі Нұржан Нұржігітов осы жөнінде келісімге келді.Душанбе қаласында Орталық Азияның Мемлекетаралық су шаруашылығын үйлестіру комиссиясының (МСШҮК) 88-ші отырысы өтті. Жиынға Қазақстан, Өзбекстан, Тәжікстан және Түрікменстан су шаруашылығы ведомстволарының басшылары қатысты.Тараптар Сырдария және Әмудария өзендері бассейндерінде вегетация аралық кезеңнің өту барысын қарастырды.Айта кетейік, келісілген су көлемі Сырдария өзені арқылы Түркістан облысының Шардара су қоймасына келеді. Оның ішінде 1,6 млрд текше метр су Арал теңізіне жіберіледі.«Бұл биыл суару кезеңі үшін қажет су көлемін жинауға, сондай-ақ Қазақстанның оңтүстік облыстарындағы экожүйені сақтау іс-шараларын жүзеге асыруға мүмкіндік береді. Еліміздің оңтүстігіндегі жағдай батыс пен солтүстіктен өзгеше екенін атап өтемін. Мұнда үлкен көлемдегі су тасқыны болған жоқ. Ал жазда суармалы суға деген сұраныс өте жоғары. Сондықтан да біз оңтүстікті сумен қамтамасыз ету бойынша мүлдем басқа жұмыс жүргізіп жатырмыз. Су дипломатиясы – біздің министрлік жұмысының маңызды бағыты. Осы келіссөздердің нәтижесінде өткен жылы еліміздің оңтүстігін сумен тұрақты қамтамасыз еттік. Біз су бөлу және трансшекаралық су нысандарын қорғау жөніндегі барлық мәселелерді Орталық Азия елдеріндегі әріптестерімізбен бірлесе отырып шешеміз», - деді Су ресурстары және ирригация министрі Нұржан Нұржігітов.Ақпарат көзі : https://www.gov.kz/memleket/entities/water/press/news/details/927334

«Астана жастары» жастар ресурстық орталығының еріктілері кезекті акция өткізіп, зейнеткерлердің ауласындағы қарын күреп, қолғабыс етті, деп хабарлайды елорда әкімдігінің ресми сайты.«Таза Қазақстан» және «Игі істер марафоны» аясында «Астана жастары» еріктілері астаналық қарттардың аулаларын тазартуды жалғастыруда.10-ға жуық ерікті Сарыарқа ауданының тұрғынына бірнеше күн тоқтаусыз жауып, жиналған қарды күреуге көмектесті.Еріктілер қала тұрғындарын бір-біріне көмектесуге, игі істерде жарысуға шақырды.«Біз жалғызбасты зейнеткерге барып, ауласындағы қарды тазалауға көмектестік. Біздің волонтерлар қарт кісілерге апта сайын қолғабыс етіп тұрады. Біз осылайша өзгелерге үлгі көрсетіп, игі істерге шақырамыз», - дейді «Астана жастары» волонтері Индира Маремова.Ақпарат көзі : https://www.gov.kz/memleket/entities/astana/press/news/details/928203

Қостанай облысының прокуратурасы «Заң және Тәртіп» қағидатын ұстана отырып, ата-аналардың алименттерді уақытылы төлеуін қамтамасыз ету бойынша қабылданған шараларға талдау жүргізді.Өңірде соңғы үш жылда сотталған қасақана борышкерлердің саны екі есеге артты. 2024 жылы прокуратураның үйлестіруімен 96,3 млн теңге сомаға алимент төлемегені үшін 61 ата – ана сотталды, оның ішінде 6 адам бас бостандығынан айырылды.Мысалы, бір азамат 4 жыл ішінде ұлына алимент төлемей, қарыз сомасы 4,4 млн теңгені құраған. Федоров ауданының прокуроры сотқа дейінгі тергеу бастап, сот үкімімен борышкерге бір жылға бас бостандығын шектеу тағайындалды.Қылмыстық жауаптылықтан басқа әкімшілік жазалау шаралары қолданылады. Барлығы 327 адам әкімшілік жауапкершілікке тартылды, оның 122-сі әкімшілік айыппұлға, 205-і қамауға алынды.Борышкерлер сонымен қатар елден тыс жерлерге шығу, лицензияларды, рұқсаттар мен арнайы құқықтарды алу және пайдалану, өз мүлкіне билік ету құқығымен уақытша шектеледі.Жұмысқа орналасқысы келетіндерге және алимент төлеуді дұрыс төлегісі келетіндерге жұмыспен қамту органдары арқылы көмек көрсетіледі. 360-тан астам борышкер жұмысқа орналастырылды, бұл балаларды ай сайынғы алимент төлемдерімен қамтамасыз етуге мүмкіндік берді.Қадағалау актілері бойынша Қостанай облысының прокуратурасы 275 кәмелетке толмағандардың құқықтарын қорғап, 286,4 млн теңгеге берешекті өтеуге қол жеткізді. 85 сот орындаушысы тәртіптік жауапкершілікке тартылды, оның біреуі әрекетсіздіктің жүйелілігі үшін мемлекеттік лицензиясынан айырылды.Алиментті уақытылы төлеу - бұл ата-ананың міндеті және баланың әл-ауқатын қамтамасыз етудегі маңызды қадам. #Зәң_және_ТәртіпАқпарат көзі : https://www.gov.kz/memleket/entities/kostanay/press/news/details/928168

Қостанайда «Баян Сұлу» АҚ-ның жаңа өндірістік кешені – «Кондитерлік астана» жобасының алғашқы тасын қалау рәсімі өтті. Бұл жоба отандық өнеркәсіптің дамуына серпін беріп қана қоймай, Мемлекет басшысының алдағы үш жыл ішінде ауыл шаруашылығы шикізатын өңдеу үлесін 70%-ға дейін жеткізу жөніндегі тапсырмасын іске асырудың маңызды кезеңі болмақ.Биік мақсаттар: импортқа тәуелділікті азайту және технологиялық дамуЖаңа кешеннің өндірістік қуаты жылына 16 мың тонна өнімді құрайды. Бұл отандық өндірушінің ұннан жасалатын кондитерлік өнімдер нарығында, оның ішінде тоқаш пен бисквит сегменттерінде көшбасшылық орын алуына мүмкіндік береді. Кәсіпорында заманауи технологиялар қолданылады, олар ауыл шаруашылығы шикізатынан бастап дайын өнім шығаруға дейінгі толық өндірістік циклді қамтамасыз етеді.Қостанай облысы әкімінің орынбасары Арман Әбенов өз сөзінде атап өтті:"Мемлекет басшысы экономиканы әртараптандыру, оның ішінде ауыл шаруашылығы шикізатын қайта өңдеу деңгейін үш жыл ішінде 70%-ға дейін жеткізу міндетін қойды. Осындай ауқымды жобалардың іске асырылуымен біз негізгі азық-түлік өнімдері бойынша импортқа тәуелділікті азайтып, отандық шикізатты тереңдетіп өңдеу деңгейін көтеріп, өңірдің экспорттық әлеуетін арттыра аламыз. Бұл жоба – бизнестің және мемлекеттік қолдаудың үйлесімді жұмысының нақты көрінісі", – деді ол.Кәсіпорын өкілдері кешеннің іске қосылуы отандық өндірістің бәсекеге қабілеттілігін арттыруда маңызды рөл атқаратынын атап өтті:"Біздің мақсатымыз – тек ішкі нарықты қамтамасыз ету ғана емес, сонымен қатар Қазақстанның халықаралық нарықтағы орнын нығайту. Жаңа фабрикадағы инновациялық өндіріс желілері өнімнің әлемдік стандарттарға сай болуын қамтамасыз етеді. Біз **«Кондитерлік астана» тек Қостанай облысының ғана емес, бүкіл Қазақстанның мақтанышы болатынына сенімдіміз»" – деп атап өтті «Баян Сұлу» АҚ президенті Тимур Садыков.Ұрпақтар сабақтастығы: ардагер пікіріЖаңа кешеннің құрылысының басталуына орай өткен салтанатты шарада 40 жылдан астам осы салада қызмет еткен зейнеткер Алла Лайконина сөз сөйледі. Ол қарапайым жұмысшыдан кәмпит цехының басшысына дейінгі жолды жүріп өтті. Оның пікірі компанияның дамуы мен саладағы өзгерістердің маңыздылығын көрсетті."Мен бұл салада бүкіл ғұмырымды өткіздім. Соңғы жылдары өнеркәсіптің қалай дамып келе жатқанын, жаңа технологиялар мен жобалардың іске асырылып жатқанын ерекше байқаймын. Жаңа зауыттың ашылуы – бұл жай ғана өндірістік қадам емес, біздің дұрыс бағытта келе жатқанымыздың айқын дәлелі. Мемлекеттің біздің саланың дамуына ерекше көңіл бөліп отырғаны – үлкен қуаныш. Бұл мен үшін зор мақтаныш, өйткені Қостанай Қазақстанның нағыз кондитерлік астанасына айналып келеді", – деді ол.Жаңа өндірістік кешен 260 жаңа жұмыс орнын ашады, бұл облыстың әлеуметтік-экономикалық дамуына оң ықпал етеді. Жоба аясында кәсіпорын заманауи жабдықтармен жұмыс істейтін жоғары білікті мамандарды даярлауды көздеп отыр.Қостанай – кондитерлік өнеркәсіптің орталығыБүгінгі таңда Қазақстанның отандық өндірушілері 300-ден астам түрлі кондитерлік өнім шығарады, оның 55%-ы ішкі нарықта сатылса, 45%-ы экспортқа жіберіледі. Жаңа кешеннің іске қосылуы компанияның ішкі нарықтағы көшбасшылық ұстанымын нығайтуға және экспорт көлемін арттыруға мүмкіндік береді.Жалпы құны 14 миллиард теңгеден асатын бұл жоба жеке инвестицияларды тарту және елдің азық-түлік қауіпсіздігін қамтамасыз ету стратегиясының маңызды бөлігі болып табылады."Мемлекеттік қолдау үшін алғысымыз шексіз. Бұл жоба Қостанай облысында бизнесті дамыту үшін қолайлы жағдай жасалғанының дәлелі. «Кондитерлік астана» бүкіл сала үшін жаңа дәуірдің бастамасы болады және Қостанайды Қазақстанның кондитерлік астанасына айналдырады деп сенеміз", – деп қорытындылады кәсіпорын өкілі.ҚорытындыЖаңа кешеннің құрылысы – ауыл шаруашылығы шикізатын терең өңдеу және отандық өнімнің бәсекеге қабілеттілігін арттыруға бағытталған ұлттық стратегияларды жүзеге асырудағы маңызды қадам. Қостанай облысы өнеркәсіптік даму орталығы ретіндегі орнын одан әрі нығайтып, бизнестің және мемлекеттің табысты серіктестігін көрсетіп отыр.Ақпарат көзі : https://www.gov.kz/memleket/entities/kostanay/press/news/details/928173

Мемлекет басшысы Қасым-Жомарт Тоқаев тұрғын үй салу кезінде оның халық үшін қолжетімді болуын қамтамасыз етуге және құрылыс сапасына ерекше көңіл бөлуге бірнеше рет баса назар аударған болатын.Осы тапсырмаларды орындау аясында Қостанай облысының әкімі Кумар Ақсақалов өңірдегі ірі құрылыс нысандарын аралап шықты. Ол «Астана» және «Бәйтерек» шағын аудандарындағы, сондай-ақ «Береке» шағын ауданындағы тұрғын үйлердің құрылыс қарқынын тексерді. Мұнда мемлекеттік бағдарламалар аясында қолжетімді тұрғын үйлер салынып жатыр.**«Мемлекет басшысының тапсырмасына сәйкес, біз тек жаңа тұрғын үйлер ғана емес, сонымен бірге қолайлы қала ортасын қалыптастырып жатырмыз. Тұрғын үйлер тек қолжетімді ғана емес, жоғары сапа стандарттарына сәйкес болуы керек, ал жаңа шағын аудандардың инфрақұрылымы заманауи талаптарға сай болуы қажет.Бүгін мен негізгі нысандардағы құрылыс барысымен танысып, құрылыс компанияларының өкілдерімен кездестім. Жұмыстар белгіленген кестеге сәйкес жүргізіліп жатқанын тексердік. Өңіріміз тұрғын үй құрылысы бойынша жақсы қарқын көрсетіп отыр, ал 2025 жылы бұл бағыттағы жұмысты жалғастырамыз»,** – деп атап өтті облыс әкімі Кумар Ақсақалов.Құрылыс көлемінің өсуі және жаңа сапа стандарттарыҚұрылыс саласының дамуы өңір экономикасына айтарлықтай әсер етуде. 2024 жылы Қостанай облысында орындалған құрылыс жұмыстарының жалпы көлемі 315,3 млрд теңгені құрады, ал нақты көлем индексі 2023 жылғы деңгейден 124,9%-ға жетті. Бұл өңірдегі құрылыс жұмыстарының шамамен 25%-ға артқанын көрсетеді, бұл республикадағы ең жоғары өсім көрсеткіштерінің бірі.Сонымен қатар, 500 мың шаршы метр тұрғын үй пайдалануға берілді, бұл 2023 жылмен салыстырғанда 4,8%-ға артық. Осы көрсеткіштің нәтижесінде 5000-нан астам отбасы баспаналы болды.Тұрғын үй құрылысы кезінде жергілікті өндірістегі құрылыс материалдарын қолдануға ерекше назар аударылады. Бұл құрылыс шығындарын төмендетіп қана қоймай, сонымен қатар жергілікті кәсіпорындардың дамуына ықпал етіп, жаңа жұмыс орындарын ашуға мүмкіндік береді.2024 жылы Қостанай облысында құрылыс материалдарын өндіру көлемі 51,6 млрд теңгені құрады, бұл өткен жылмен салыстырғанда 3,6%-ға жоғары. Оның ішінде:кірпіш өндірісі 22,1%-ға артты,бетон бұйымдары 6,7%-ға көбейді,цемент-бетон плиталарының өндірісі 15,8%-ға өсті.Бұл көрсеткіштер құрылыс саласының қарқынды дамып жатқанын және сапалы құрылыс материалдарына сұраныстың артып отырғанын көрсетеді.«Астана» және «Бәйтерек» шағын аудандарының құрылыс барысыҚостанай ауданында ауқымды тұрғын үй жобасы – «Астана» және «Бәйтерек» шағын аудандарының құрылысы жалғасуда. Мұнда 154 көпқабатты үй салынып, нәтижесінде 60 мың адам баспанамен қамтамасыз етіледі.Қазіргі таңда 13 тұрғын үйдің құрылысы жүріп жатыр, олардың пайдалануға берілуі 2025 жылдың қыркүйегіне жоспарланған. Сонымен қатар, 7 он алты қабатты, 14 тоғыз қабатты және 13 бес қабатты тұрғын үйдің жобалау жұмыстары жүргізілуде.Жаңа шағын аудандар қажетті инфрақұрылыммен қамтамасыз етіледі:Мектептер мен балабақшаларМедициналық мекемелерСауда және ойын-сауық орталықтарыСпорт нысандары мен саябақтарКең жолдар, велосипед жолдары, «ақылды» аялдамалар мен бейнебақылау жүйелері«Біз жай ғана тұрғын үйлер салып жатқан жоқпыз, біз толыққанды инфрақұрылымы бар заманауи тұрғын үй кешендерін құрудамыз. Бұл кешенді тәсіл мыңдаған отбасы үшін жайлы өмір сүру жағдайларын қамтамасыз етуге мүмкіндік береді», – деді облыс әкімі.2025 жылға арналған жоспарлар2025 жылы өңірде жаңа тұрғын үй жобалары жүзеге асырылады:500 мың шаршы метр тұрғын үй пайдалануға беріледі,Әлеуметтік осал топтарға арналған 1000 жалдамалы пәтер сатып алынады,«Отбасы банк» арқылы 5,5 млрд теңгеге 253 пәтер сатылады.ҚорытындыҚостанай облысында тұрғын үй құрылысы қарқынды дамуда.Өңір Президенттің халықты қолжетімді әрі сапалы баспанамен қамтамасыз ету жөніндегі тапсырмасын орындайды.Жаңа инфрақұрылым дамып, халықтың өмір сүру сапасы артуда.2025 жылы құрылыс жұмыстары жалғасады, ал тұрғын үймен қамту мемлекеттік саясаттың басым бағыттарының бірі болып қала береді.«Біздің басты мақсатымыз – халық үшін қолайлы өмір сүру жағдайларын жасау. Бұл бағыттағы жұмыстар жалғасады», – деп қорытындылады облыс әкімі.Ақпарат көзі : https://www.gov.kz/memleket/entities/kostanay/press/news/details/928143

Елордадағы Qazaqstan жеңіл атлетика спорт кешенінде IX қысқы Азия ойындарына Қазақстан ұлттық құрамасының спортшыларын салтанатты шығарып салу рәсімі өтті. Сары құрлық бәсекесі 7-14 ақпан күндері Қытай Халық Республикасының Харбин және Ябули қалаларында өтеді.Салтанатты жиынға ҚР Туризм және спорт министрі Ербол Мырзабосынов, Ұлттық Олимпиада комитетінің өкілдері, 1998 жылғы қысқы Олимпиада ойындарының жүлдегері, 1996 жылғы қысқы Азия ойындарының екі дүркін чемпионы Людмила Прокашева, шорт-тректен ҚР еңбек сіңірген жаттықтырушысы Мәдіғали Қарсыбеков, спорт ардагерлері, жаттықтырушылар мен қоғам өкілдері қатысты.Іс-шара барысында IX қысқы Азия ойындарының ашылу рәсімінде Ту ұстайтын спортшыларға Қазақстан Республикасының Туы салтанатты түрде тапсырылды. Харбиндегі Ойындардың ашылу салтанатында еліміздің байрағын хоккейден ҚР спорт шебері Әділ Бекетаев пен шорт-тректен халықаралық дәрежедегі спорт шебері Ольга Тихонова алып шығады. Өз кезегінде Әділ Бекетаев Ту ұстаушы ретінде көпшіліктің алдына шығып, салтанатты түрде ант берді.Қазақстан құрамасынан Ойындарға 137 спортшы қатысады. Олар 6 спорт түрінен 10 дисциплинада (конькимен жүгіру спорты, шорт-трек, мәнерлеп сырғанау, биатлон, керлинг, шаңғы жарыстары, тау шаңғысы, фристайл, ски-альпинизм, шайбалы хоккей) өнер көрсетеді. Ұлттық команда 51 медаль жиынтығына таласады.Ербол Мырзабосынов спортшыларға сәттілік тілеп, сары құрлық бәсекесінің еліміз үшін маңызды дода екенін атап өтті.«IX қысқы Азия ойындарының басталуына санаулы күндер қалды. Қазақстан ұлттық құрамасы қысқы Азия ойындарына толық дайын. Оған қажетті барлық жағдай жасалды. Ойындарға сапалы дайындалу үшін ұлттық құрама 137 оқу-жаттығу жиынын өткізді. Спортшыларымыз 86 халықаралық жарыста өнер көрсетіп, 33 медаль жеңіп алды. Жалпы, елімізде қысқы спорт түрлерінде жеңістермен өрілген жақсы дәстүр бар. Бүгінде тек елімізге ғана емес, бүкіл әлемге танымал даңқты спортшыларымыз халықаралық қысқы жарыстарда өнер көрсетіп, үнемі жүлдегерлер қатарынан көрініп жүр. Алдағы қысқы Азия ойындарына қатысатын барлық спортшыға сәттілік тілеймін. Қысқы Азия ойындары – еліміздің спорттық әлеуетін көрсетіп қана қоймай, әрбір спортшы үшін үлкен жетістіктерге жетуге талпыныс болатын маңызды кезең. Құраманың әр жеңісі – еліміз үшін үлкен қуаныш!», – деді Ербол Мырзабосынов.Ақпарат көзі : https://www.gov.kz/memleket/entities/tsm/press/news/details/928196

Қазақстанның көлік министрі Марат Қарабаев Қазақстан мен Ресей үкімет басшыларының екіжақты кездесуінің қорытындысы бойынша көлік саласының қарқынды дамуы және транзиттік дәліздер мен инфрақұрылымды жақсартуға бағытталған бірқатар маңызды бастамалар туралы айтты. Кездесуде қаралған басты мәселенің бірі екі ел де белсенді дамып келе жатқан Солтүстік-Оңтүстік дәлізінің жұмысы. Бұл бағыт Беларусь пен Ресейді Қазақстанмен байланыстырады, содан кейін Түрікменстан арқылы Оңтүстік Кавказға жол ашады. Сонымен қатар біздің еліміз Ақтау және Құрық порттарының мүмкіндіктерін кеңейте отырып, ресейлік экспорттаушылар үшін қолайлы жағдайлар жасауда. Ресейдің Махачқала портында да тереңдету жоспарлары талқыланды.Сондай-ақ министр Қытай, Ресей және Қазақстан арасындағы транзиттік ағындарды дамытудағы маңызды қадам болатын Қытаймен шекарадағы жаңа үшінші теміржол өткізу пункті жобасының перспективаларын атап өтті.«Өткізу бекеттері бойынша бірлескен жұмысты атап өтпеске болмайды. Біз биыл алты өткізу пунктінде жаңғыртуды бастаймыз. Бұл, әрине, олардың өткізу мүмкіндігін 2 есеге немесе одан да көпке арттырады. Біз Қазақстан Республикасының аумағында да, Ресей Федерациясының аумағында да бір мезгілде жаңғырту үшін жұмысты қатар жүргізуді талқыладық. Осы кезеңде бекеттер жабылмай, белгілі бір қалыпта жұмыс істей алатындай етіп жұмыс істеу тетігін әзірлеу талқыланды», — деп түйіндеді Марат Қарабаев. @KZgovernmentАқпарат көзі : https://www.gov.kz/memleket/entities/transport/press/news/details/927848

Қарағанды академиялық музыкалық комедия театры камералық музыка кешін дайындауда. Өнер сүйер қауым серенадаларды тамашалай алады. Бағдарламада ұлы композиторлар Вольфганг Амадей Моцарт, Эдвард Эльгар және Петр Чайковскийдің шығармалары орындалады.Концерт 14 ақпанда қызыл зал сахнасында өтеді. Басталуы 18:30.Дирижерлік пультте халықаралық конкурстардың лауреаты – Қарағандыға Ташкенттен келген дарынды жас музыкант Руслан Бекмаев болады."Моцарт серенадасы сіздерге үйлесімге қаныққан классикалық дыбыстың жеңілдігі мен қуанышын сыйлайды. Эльгардың лирикалық серенадасы сіздердің алдарыңызда нәзік меланхолия мен аристократиялық нәзіктік әлемін ашады. Ал кешті Чайковскийдің ұлы серенадасы аяқтайды, онда жарқын көңіл-күй мен жігерлендіретін қуат шынайы сиқырлы музыкалық желіге ұласады", – деп театрдың өкілдері музыкалық оқиғаны өткізіп алмауға шақырады.Ақпарат көзі : https://www.gov.kz/memleket/entities/karaganda/press/news/details/927381

Саран мектептерінде ерекше жоба – «Әжелер мектебі» іске қосылды. Аға буын өз білімі мен тәжірибесін балалармен бөліседі.«Әжелер мектебі» – Саран қаласының білім беру бөлімінің жобасы. Ол әрбір қалалық мектепте жұмыс істейді. Оқу орындарының әкiмшiлiгi мен қамқоршылық кеңесi он оқушының әжесін iрiктейдi. Оқу жылы барысында жобаға қатысушылар балалармен кездеседі және олармен шеберлік сыныптары, дөңгелек үстелдер, дәрістер және т. б. өткізеді.Әрбір отырыста нақты тақырып талқыланады.– Дәрістер немесе кездесу тақырыбы жобаға қатысушыға байланысты: біреулер балаларға өлеңдер жазуды үйретеді, біреулер өздерінің отбасылық және жеке тәжірибелерінен қызықты оқиғалар айтады, мысалы, мықты отбасын құру, мамандықты қалай таңдау, балаларды қалай тәрбиелеу туралы баяндап береді. Мысалы, Қазақстан халқы Ассамблеясының өкілдері балаларға киізден кәдесыйлар жасауды үйретті, – деп түсіндірді Саран әкімдігінің баспасөз хатшысы Думан Әлімжанов.Сондай-ақ, «Әжелер мектебі» жобасы бойынша интерактивті танымдық ойындар өткізіледі. Кездесулердің бірінде мектеп оқушыларының әжелері түрлі ұлттардың дәстүрлі киімдері туралы әңгімелеп, түрлі тілдерде әндер шырқады.Кездесулер Саран мектептерінде тұрақты түрде өткізіледі. Әжелердің оқушылармен талқылайтын іс-шаралар жоспары бекітілді.Ақпарат көзі : https://www.gov.kz/memleket/entities/karaganda/press/news/details/927436

Бұқар жырау ауданында дарынды әнші, композитор, халық ақыны Доскей Әлімбаевтың есімі берілген ауылда жаңа Мәдениет үйі ашылды. Биыл Қазақ КСР-інің еңбек сіңірген мәдениет қайраткерінің туғанына 175 жыл толады.Доскей ауылының тұрғындары Мәдениет үйін салуды көптен бері өтініп келеді. Жаңа ғимаратта 200 орындық көрермендер залы, үйірмелерге арналған бөлмелер бар. Мұнда тек балалар ғана емес, белсенді зейнеткерлер де өз өнерлерін ортаға салады. Домбыра, би және т. б. үйірмелері жұмыс істейтін болады. Мәдениет үйі «Ауыл – Ел бесігі» арнайы жобасы бойынша салынған.– Президент Қасым-Жомарт Тоқаев: "Мәдениет пен өнер – ел өміріндегі маңызды сала. Өнер – ұлттың жаны, ал мәдениет – оның рухани келбеті. Бұл екі құндылық – біздің өркениетіміздің негізі және ұлттық сананың көрінісі" деп атап өткен болатын. Шынында да, қазақ халқының бірегей рухы оның өнері мен мәдени мұрасынан көрінеді, – деді Бұқар жырау ауданының әкімі Ерлан Құсайын.Аудан басшысы жаңа Мәдениет үйі үшін сегіз домбыра мен баян сатып алуға сертификаттар табыс етті. Ақпарат көзі : https://www.gov.kz/memleket/entities/karaganda/press/news/details/927526

Қарағанды облысында кәсіптік бағдарлау ерте жастан басталуы тиіс деп есептейді. Дәл осы мектепке дейінгі жылдары болашақ мамандықтардың негізі қаланады және баланың белгілі бір бағыттарға қызығушылығы пайда болады.Мемлекет басшысы Қасым-Жомарт Тоқаев "балаларды ерте кәсіптік бағдарлау ерекше маңызға ие болып отыр. Өскелең ұрпақ болашақ мамандық таңдауға саналы түрде қарауы тиіс... " деп бірнеше рет атап өткен болатын.Біздің әрқайсымыз бала кезімізде дәрігер немесе мұғалім болуды армандаймыз, ал жас өткен сайын бағдарлар өзгерді. Балаға болашақ мамандығын анықтауға көмектесу үшін оған түрлі салаларда өзін мүмкіндігінше ерте сынап көруге мүмкіндік беру маңызды. Осындай тәсілді Шахтинск қаласындағы «Салтанат» балабақшасы қолданады, онда 2021 жылдан бастап «Ерекше ғылым» жобасы іске асырылуда.– Сабақтар ойын түрінде өтеді. Балаларға эксперимент арқылы және қолжетімді тілмен жаңбыр қайдан келетінін, температура не екенін, компастың қалай жұмыс істейтінін түсіндіреді, – дейді «Салтанат» бөбекжай-бақшасының директоры Ирина Обердерфер. – Балалар химия, биология, физика, инженерлер мен зерттеушілер сияқты бағыттарда өздерін ғалым ретінде сынай алады, бұл болашақ мамандық таңдаудың алғашқы қадамы болуы мүмкін.2024 жылдан бастап бұл жоба Қарағанды облысының білім беруді дамыту жол картасының «Қызығушылық танытқандарға арналған ерекше ғылым» бағдарламасының бір бөлігі болды. Жобаға өңірдің 22 мектепке дейінгі ұйымы қосылды, ал «Салтанат» педагогтары шеберлік сабақтарын өткізіп, әріптестерін оқыта бастады.Бағдарламаның ерекшелігі – сабақтастық: мектептермен ынтымақтастық ғылымды тереңдетіп оқытуға біртіндеп көшуге ықпал етеді, ал Шахтинск технологиялық колледжімен өзара іс-қимыл болашақ мамандықты таңдауға көмектеседі.Мектепке дейінгі балалар мен техникалық мамандарды даярлайтын оқу орны қалай байланысты? Колледж оқытушылары «ТехноМалыш: Болашақ инженерлерге арналған радиоконструкторлар» жобасын жүргізуде. Студенттермен бірге арнайы балалар радиоконструкторлары әзірленді.– Бұл жиынтықтар 5–6 жастағы балаларға электроника мен ойын түрінде бағдарламалау негіздерін меңгеруге көмектеседі. Балалар радиоқабылдағыштар сияқты қарапайым электронды құрылғыларды жинай алады және есейген сайын күрделі жобаларға, мысалы, шамдарға, сигнализацияға және ақылды үйдің макетіне көшеді, – деп түсіндірді «Электроника» құзыреттілік орталығының бас сарапшысы, колледждегі арнайы пәндер оқытушысы Михаил Правосудов.Бұдан басқа, колледж оқытушылары тәрбиешілерге арналған бояу кітапшасы мен әдістемелік ұсынымдар жасауды жоспарлап отыр.– Жобаның басты мақсаты – ерте жастан балалардың техникалық дағдыларын дамыту, техникалық ойлау қабілетін қалыптастыру және оларды заманауи технологиялармен таныстыру, – дейді колледж директорының орынбасары Валентина Тарасова. – Статистика бойынша, балалардың 26% техникалық ойлау қабілетіне ие. Болашақта мүмкіндігінше көп техникалық маман алу үшін бізге бұл қабілеттерді ерте кезеңде дамыту маңызды.Колледжде екі құзырет орталығы – «Электроника» және «Компьютерлік ойындарды 3D-модельдеу», сондай-ақ студенттік конструкторлық бюро жұмыс істейді. Мұнда 8–9 сынып оқушылары үшін білім беру ортасын құруды қоса алғанда, техникалық шығармашылық пен инновацияларды дамытуға бағытталған жобалар іске асырылуда.– Біз "Мектеп-колледж-ЖОО-жұмыс беруші" үздіксіз кәсіптік білім беру жүйесін құрып жатырмыз, – дейді Валентина Тарасова. – Биыл қорытынды жасап, қорытындылау кезеңін жоспарлап отырмыз.Сондай-ақ колледжде жобалармен алмасу үшін веб-платформа және бағдарламалау, электроника және 3D-модельдеу бойынша интерактивті құралдар әзірленуде.Бұл бастамалардың барлығы ортақ мақсат – жоғары технологиялар мен инженерия саласында жұмыс істейтін болашақ мамандарды даярлау болып табылады. Ақпарат көзі : https://www.gov.kz/memleket/entities/karaganda/press/news/details/927718