Қазақстанның Руандадағы Елшісі Барлыбай Садықов Руанда Президенті Поль Кагамеге сенім грамоталарын табыс етті.Сенім грамоталарын тапсырудың салтанатты рәсімі барысында Қазақстан Елшісі Астананың екі ел арасындағы қарым-қатынасты нығайтуға, оның ішінде сауда-экономикалық, инвестициялық және гуманитарлық салалардағы саяси диалог пен өзара іс-қимылды жандандыруға ерекше назар аударатынын мәлімдеді.Кездесу барысында 2025 жылғы 27-29 мамырда Руанда Президенті Поль Кагаменің Қазақстанға жасаған ресми сапарының қорытындыларына ерекше назар аударылды. Елші осы сапар барысында қол жеткізілген уағдаластықтар екіжақты әріптестікті сапалы жаңа деңгейге шығару үшін берік негіз қалағанын атап өтті.Өз кезегінде П.Кагаме Қазақстанды Руанданың маңызды әрі перспективалы серіктесі деп мәлімдеді және өзара қызығушылық тудыратын барлық салаларда, соның ішінде цифрландыру, тау-кен өнеркәсібі, ауыл шаруашылығы және т.б. салаларда ынтымақтастықты одан әрі тереңдетуге дайын екенін білдірді. Ол Қазақстан Республикасының Президенті Қасым-Жомарт Тоқаевпен Астанадағы келіссөздерін жылы еске алып, бірлескен жобаларды жүзеге асыруға деген ұмтылысын растады.Руанда Президенті Қазақ дипломатын ресми түрде қызметке кірісуімен құттықтап, Қазақстан мен Руанда арасындағы қарым-қатынастарды одан әрі нығайту ісіне табыс тіледі. Сондай-ақ, Руанда басшысы Қазақстан Президенті Қ.Тоқаевқа Қазақстанға сапары барысында қол жеткізілген келісімдерді іске асыруға бейілділігі үшін алғысын білдіріп, Қазақстан басшылығы мен халқына жылы лебіздерін жеткізді.Ақпарат көзі : https://www.gov.kz/memleket/entities/mfa/press/news/details/1178171?lang=kk

Амман, 2026 жылғы 10 наурыз – Қазақстан Республикасының Иордан Хашимит Корольдігіндегі Елшісі Талғат Шалданбай Иорданияның Көлік министрі Нидал Мурди Абдулла Катаминмен кездесті.Кездесу барысында тараптар көлік-логистика саласындағы Қазақстан-Иордания ынтымақтастығын дамыту мәселелерін және екіжақты өзара іс-қимылды кеңейту перспективаларын талқылады. Сұхбаттастар саяси диалогтың жоғары деңгейін атап өтіп, әріптестікті әрі қарай нығайтуға өзара мүдделілікті растады.Қазақстан мен Иордания арасында әуе қатынасын ашу мәселесін пысықтаумен қатар, жоғары деңгейінде бұдан бұрын қол жеткізілген уағдаластықтарды іске асыруға ерекше назар аударылды.Көлік инфрақұрылымы мен логистика саласындағы ынтымақтастықты кеңейтудің, оның ішінде Орталық Азия мен Таяу Шығыс арасындағы халықаралық көлік дәліздерін дамытудың маңыздылығы атап өтілді.Кездесу қорытындысы бойынша тараптар көлік саласындағы ынтымақтастықты әрі қарай дамыту мақсатында салалық ведомстволар желісі бойынша өзара іс-қимылды жалғастыруға дайын екендіктерін растады.Ақпарат көзі : https://www.gov.kz/memleket/entities/mfa-amman/press/news/details/1178176?lang=kk

Афина, 2026 жылғы 10 наурыз – Қазақстанның Грекиядағы Елшісі Тимур Сұлтанғожин Еуропалық жария құқық ұйымының (EPLO) директоры Спиридон Флогаитиспен келіссөздер өткізді.Кездесу барысында тараптар Қазақстанның EPLO ұйымымен жария құқық, мемлекеттік басқару, академиялық және сараптамалық өзара іс-қимыл салаларындағы ынтымақтастығының қазіргі жағдайы мен даму перспективаларын талқылады. Қазақстандық университеттер мен ғылыми-зерттеу орталықтарымен әріптестікті дамытуға, бірлескен білім беру және зерттеу жобаларын іске асыруға, академиялық ұтқырлық бағдарламаларын кеңейтуге, сондай-ақ қазақстандық мамандар мен ғалымдардың ұйым өткізетін халықаралық іс-шаралар мен сараптамалық бастамаларға қатысуына ерекше назар аударылды.Қазақстан Елшісі сұхбаттасына Қазақстан Президенті Қасым-Жомарт Тоқаевтың бастамасымен елде жүргізіліп жатқан саяси және институционалдық реформалар туралы, соның ішінде жаңа Конституцияны қабылдау жөніндегі алдағы референдум туралы ақпарат берді. Конституциялық реформалар құқық үстемдігі қағидаттарын одан әрі нығайтуға, демократиялық институттарды дамытуға және мемлекеттік басқару жүйесін жетілдіруге бағытталғаны атап өтілді.Өз кезегінде Спиридон Флогаитис Қазақстанда жүргізіліп жатқан реформаларды жоғары бағалап, олардың құқықтық мемлекетті нығайту және мемлекеттік институттарды жаңғырту тұрғысынан маңыздылығын атап өтті. Сонымен қатар ол EPLO қызметіне қазақстандық білім беру және ғылыми мекемелерінің белсенді қатысуын, оның ішінде елдің бірқатар жетекші университеттерімен ынтымақтастықты және қазақстандық сарапшылардың ұйымның халықаралық бағдарламалары мен сараптамалық құрылымдарына қатысуын оң бағалады.Кездесу қорытындысы бойынша тараптар ынтымақтастықты одан әрі кеңейтуге өзара мүдделілігін растады және өзара іс-қимылдың перспективалық бағыттарын белгіледі.Ақпарат көзі : https://www.gov.kz/memleket/entities/mfa-athens/press/news/details/1178196?lang=kk

2026 жылғы 10 наурыз, Вена - Қазақстан делегациясы ҚР Ұлттық ядролық орталығының Бас директоры Ерлан Батырбековтің төрағалығымен өтіп жатқан Ядролық сынақтарға жаппай тыйым салу туралы шарт ұйымының (ЯСЖТШҰ) «Б» Жұмыс тобының 66-сессиясына қатысуда.Өз сөзінде ҚР Венадағы халықаралық ұйымдар жанындағы Тұрақты өкілі Мұхтар Тілеуберді халықаралық қауіпсіздік архитектурасындағы қазіргі сын-қатерлер мемлекеттердің жедел ұжымдық әрекетін және өзара сенімді қалпына келтіруді талап ететінін атап өтті. Осыған байланысты ол сессия қатысушыларына ҚР Президенті Қасым-Жомарт Тоқаевтың БҰҰ Бас Ассамблеясының 80-сессиясында айтқан ядролық державалар арасында жоғары деңгейдегі диалогты қайта жандандыру жөніндегі бастамасын еске салды. Бұл бастама ядролық қаруды қолдану қаупін едәуір төмендетуге, Ядролық қаруды таратпау туралы шарттың (ЯҚТШ) және Ядролық сынақтарға жаппай тыйым салу туралы шарттың (ЯСЖТШ) режимдерін нығайтуға бағытталған. Сонымен қатар, Қазақстан мұндай келіссөздерді өткізу үшін өз алаңын ұсынуға дайын екендігін білдірді.Онымен қоса, Елші Қазақстан мен халықаралық қауымдастық биылғы жылы Семей ядролық сынақ полигонының жабылғанына 35 жыл толуын атап өтетінін, бұл оқиға ЯСЖТШ-ға қол қойылғанының 30 жылдығымен тұспа-тұс келетінін ерекше атап өтті. Полигонның жабылуы ядролық сынақтарға жаһандық мораторийдің қалыптасуына ықпал еткен және түптеп келгенде Ядролық сынақтарға жаппай тыйым салу туралы шарт бойынша келіссөздердің басталуына әрі оның қабылдануына жол ашқан маңызды тарихи кезең болды.Осыған байланысты Қазақстан өзінің халықаралық міндеттемелерін әрі қарай да қатаң ұстанатынын және өз аумағында орналасқан Халықаралық мониторинг жүйесінің бес станциясынан нақты уақыт режимінде деректер ұсыну арқылы ЯСЖТШҰ-ның верификациялық режиміне үлес қосуды жалғастыратынын растады.ЯСЖТШҰ-ның «Б» Жұмыс тобының 66-сессиясы 2026 жылғы 19 наурызға дейін жалғасады. Сессия қорытындысы бойынша Шартқа қол қойған мемлекеттер отырыстың қорытынды есебін қарап, қабылдайды.Ақпарат көзі : https://www.gov.kz/memleket/entities/mfa-vienna/press/news/details/1178209?lang=kk

Гаага, 2026 жылғы 10 наурыз – Қазақстан Республикасының Нидерланд Корольдігіндегі Елшісі Ақан Рахметуллин Еуропалық Одақтың сот ынтымақтастығы агенттігінің (Eurojust) президенті Михаэль Шмидпен кездесті. Кездесу барысында Еуроюст басшысы агенттіктің қылмыстық сот төрелігі саласында ЕО мүше мемлекеттерінің прокуратуралары мен сот органдарына, сондай-ақ олардың халықаралық әріптестеріне қолдау көрсететін негізгі үйлестіру орталығы ретіндегі жұмысын таныстырды. Агенттіктің экономикалық және қаржылық қылмыстарды, ақшаны жылыстатуды, киберқылмысты, есірткі саудасын және терроризмді қоса алғанда, трансұлттық қылмысқа қарсы күрестегі рөліне ерекше назар аударылды.Ақпарат көзі : https://www.gov.kz/memleket/entities/mfa-hague/press/news/details/1178210?lang=kk

Бүгін Қызылорда қаласындағы «Өнер орталығында» Қазақстанның еңбек сіңірген қайраткері, Қазақ ұлттық консерваториясының құрметті профессоры, жырау Алмасбек Алматовтың 70 жас мерейтойына арналған «Жыр керуен» атты шығармашылық кеш өтті.Оған облыс әкімі Нұрлыбек Нәлібаев, жазушы, тарихшы-этнограф, Қазақстанның еңбек сіңірген қайраткері Қойшығара Салғараұлы, Халық жазушысы, Қазақстанның еңбек сіңірген қайраткері, Айтыс ақындары мен жыршы-термешілердің халықаралық одағының төрағасы Жүрсін Ерман, ақын, Парламент Мәжілісінің депутаты Жанарбек Әшімжан, Алмасбек Нұрмаханұлының үзеңгілес әріптестері мен елімізге белгілі шәкірттері, жауапты сала басшылары, зиялы қауым өкілдері қатысты.Аймақ басшысы мерейтой иесінің төл өнерді өркендетуге қосқан үлесін атап өтіп, барша Сыр жұртшылығының атынан сый-құрмет көрсетіп, автокөлік кілтін тарту етті.Сондай-ақ кеште  Жанарбек Әшімжан өнер қайраткеріне Мәжіліс төрағасы Ерлан Қошановтың құттықтауын табыстады.«Сыр өңірі – талай марғасқа жыраулар мен тума таланттарды өмірге әкелген, жыраулық өнердің түп қазығы, алтын көмбесі, алып тайқазаны саналатын құтты мекен.Мемлекет басшымыз Қасым-Жомарт Кемелұлы Қызылордада өткен Ұлттық құрылтайдың бесінші қорытынды отырысында «Жалпы, «Сыр елі – жыр елі» деп бекер айтылмайды. Қорқыт ата заманынан жалғасып келе жатқан жыраулық-жыршылық және күйшілік өнер бұл аймақта кең қанат жайған. Жиенбай, Нұртуған, Нартай сынды саңлақтар негізін қалаған жыршылық мектептерді бүкіл еліміз біледі», – деп ерекше атап өткен болатын.Сыр бойындағы жыраулық өнердің көрнекті өкілі, Сыр сүлейлерінің ізін жалғаушы, Қазақстанның еңбек сіңірген қайраткері, зерттеуші-ғалым, «Парасат», үшінші дәрежелі «Барыс» ордендерінің иегері, Қызылорда облысының құрметті азаматы Алмасбек Нұрмаханұлы Алматов мерейлі 70 жасқа толды.Алмасбек Нұрмаханұлы – дәуір көшінде дара із қалдырған жыр алыптарының мұрагері, Сыр өңіріне ғана тән жыраулық дәстүрдің сабақтастығына айрықша еңбек сіңірген өнер қайраткері. Ағамыз жастайынан қолына домбыра алып «Алпамыс батыр», «Қобыланды батыр», «Қыз Жібек» сияқты елге кең тараған дастандарды жырлап, «жас жыршы» атанды.«Сыр сұлуы» ансамблі құрамынан басталған шығармашылық жолы белгілі жырау, ұлағатты ұстаз, өнер зерттеушісі, ғалым, қоғам қайраткері ретінде биік белестерге шығарды.Егемендік алған жылдар ішінде ұлттық өнердің бұл түріне ерекше көзқарас қалыптасып, ата-бабаларымыздың асыл қазынасы жарқырай түсті. Алдағы уақытта да ұлттық өнеріміздің шамшырағы болып, келер ұрпаққа рухани мұра сыйлай беріңіз»,– деді Н.Нәлібаев.Өнер кешінде айтыскер ақын Мұхтар Ниязов мерейтой иесіне арнау айтып, Қазақстанның еңбек сіңірген қайраткерлері Елмұра Жаңабергенова, Айгүл Елшібаева және басқа да ақын-жыршылар өнер көрсетті. Жыраудың өзі «Жыр бастауын» орындады.Алмасбек Алматов Сыр бойында мақам-саз ерекшеліктеріне қарай жыраулық мектептердің қалыптасуына, атадан балаға мирас болған төл өнерімізді жаңа дәуірге жеткізуге ерен еңбек сіңірді. Жыраулық өнер академиялық білім беру жүйесіне енгізіліп, «Дәстүрлі өнер – жыр» мамандығы ашылды. Құрманғазы атындағы Қазақ ұлттық консерваториясындағы, Қазақ ұлттық өнер университетіндегі, Қорқыт ата атындағы Қызылорда университетіндегі кафедраларда жыршы-жыраулар кәсіби тұрғыда қалыптасты. Дәстүрлі жыр орындаушыларды маман етіп даярлау арқылы өткеннің өзегін бүгін мен ертеңге жалғап, жүздеген шәкірт тәрбиелеп, өнер аламанына қосты.  АҚШ, Франция, Италия, Швейцария, Ұлыбритания, Египет, Моңғолия және басқа да шет мемлекеттерде ұлттық мұрамызды ұлықтап, ел мерейін асқақтатты. Бүгінде мерейтой иесі тәрбиелеген шәкірттер халықаралық, республикалық байқаулардың жеңімпазы атанып, еліміздің әр өңірінде жыраулық дәстүрдің алтын арқауын жалғастырып келеді.Айта кету керек, Алмасбек Алматовтың 70 жас мерейтойы аясында Қорқыт ата атындағы университеттің Студенттер сарайында V томдық таңдамалы шығармаларының тұсаукесер рәсімі, Қармақшы ауданында «Асыл жырдың Алмасы» атты республикалық жыршы-жыраулар фестивалі өтуде.Қызылорда облысы әкімінің баспасөз қызметі

Халықаралық әйелдер күні қарсаңында «Анаға тағзым» орталығында Қызылорда облысының әкімі Нұрлыбек Нәлібаев әйел-аналармен кездесті. «Сыйынар ем, Ана деген тәңірге» тақырыбындағы басқосуға еңбек ардагерлері, түрлі сала мамандары мен БАҚ өкілдері қатысты.Аймақ басшысы жиналған қауымды көктемнің шұғылалы мерекесімен құттықтап, қыз-келіншектердің еліміздің, Сыр өңірінің дамуына қосқан сүбелі үлесін атап өтті.«Мемлекет басшымыз Қасым-Жомарт Кемелұлы «Ананың аялы алақаны мен шексіз мейірімі әр үйге жылылық береді. Салт-дәстүріміз бен ана тіліміздің бүгінгі күнге жетуі де, ең алдымен, аналардың арқасы. Өмірдің мәні де, тіршіліктің сәні де – сіздер!» – деген болатын.Өткен тарихымызға қарасақ, ел басына күн туғанда асыл аналарымыз бен аяулы аруларымыз қиындыққа мойымай, ұлт тағдырына араласты. Бала тәрбиесін ұлт тәрбиесі деп қараған дана халқымыз болашақ ұрпақты дүниеге әкеліп, бағып-қағып, қияға қанат қақтыратын аналарды ардақтай да, аялай да білген.Бүгінде отбасы институтын, көпбалалы аналарды, кәсіпкер әйелдерді қолдау, гендерлік теңдікті қамтамасыз ету мемлекеттік саясаттың аса маңызды басымдығына айналды. Аймағымызда аналарды әлеуметтік қолдау бағытындағы жұмыстар нәтижелі іске асырылуда.Сіздер тәуелсіз еліміздің дамуына зор үлес қосып, әрқашан парасаттың, мейірім пен ізгіліктің ұйытқысы болып келесіздер. Көктем мерекесі көңілдеріңізге шаттық сыйласын!» – деді Н.Нәлібаев.Басқосуда облыстық әйелдер кеңесінің төрайымы Райкүл Байназарова аймақта «Келешек мектептерінің», басқа да білім ордаларының салынуы, қосымша білім беретін мекемелердің ашылуы ана мен балаға жасалған қамқорлықтың нағыз үлгісі екенін атап өтті. Қармақшы аудандық әйелдер кеңесінің төрайымы Гүлжаухар Раева «Руханият орталықтарының» ұлттық құндылықтарды сақтап, ұрпақ сабақтастығын жалғастырудағы қызметіне тоқталды. Ал Жаңақорған ауданы «Қыркеңсе» дәрігерлік амбулаториясының аға дәрігері Жазира Мәлікова өзі қызмет ететін саладағы, әсіресе ауылдағы медициналық мекемелердің жабдықталуындағы жетістіктерді айтты.Жиынға қатысушылар облыс әкімінің Алғыс хатымен марапатталды.Бүгінде өңір халқының саны 845 135 болса, оның 419 819-ы, яғни 49,6%-ы – әйелдер, 185 мың қыз-келіншек қалалық жерде, 230 мыңнан астамы ауылда тұрады.Мемлекеттің жүйелі қолдауының арқасында қыз-келіншектердің экономикадағы, саясат пен қоғамдық қызметтегі рөлі жыл өткен сайын артып келеді.Қызылорда облысы әкімінің баспасөз қызметі

Бүгін Қызылорда облысының әкімі Нұрлыбек Нәлібаев  «Ана мен бала» облыстық перинаталдық орталығындағы жас аналар мен медицина қызметкерлерін Халықаралық әйелдер күнімен құттықтады.«Халқымызда «Ата ұлды, ана ұлтты тәрбиелейді» деген даналық сөз бар. Ананың ақ сүтімен дарыған мейірім мен мейман көңіл –ұлт рухының өзегі, елдіктің тірегі. Аяулы жанның жүрегінен бастау алған ізгілік қоғамды ізгілендіріп, адамзатты биік мұраттарға жетелейді.Ана – тіршіліктің шуағы, өмірдің тұтқасы. Оның бір ауыз жылы сөзі – жанға дауа, жанары – балаға бағдар, алақаны тиген жерге береке қонады, батасы дарыған ұрпақтың бағы жанады.Адамзат баласы үшін анадан құдіретті, анадан ардақты, анадан аяулы жан жоқ. Сондықтан да ананы ардақтау– адамдықтың асыл өлшемі, ананы құрметтеу – перзенттік парыз. Әлемдегі ең жоғары мадақ та, құрмет те ару-аналарға арналады. Еріне адал жар, баласына ардақты ана болуымен ұрпаққа өнеге, отбасына ұйытқы болған аналарымызға құрметіміз қашанда шексіз!Сіздер – мейірім мен махаббаттың, сабыр мен төзімнің символысыздар. Дүниеге сәби әкелу – үлкен ерлік, ұлы жауапкершілік. Сәбидің шат күлкісі мен алаңсыз балалығы – ең алдымен ананың ақ жүрегі мен адал еңбегінің жемісі. Сіздердің әрқайсыларыңызға зор денсаулық, отбасыларыңызға амандық, сәбилеріңізге жарқын болашақ тілеймін»,– деді Нұрлыбек Машбекұлы.Басқосуда мереке қарсаңында сәбилі болған аналар мен медицина қызметкерлері облыс әкімінің Алғыс хатымен марапатталды.Бүгінде облыс орталығында 36 млрд 400 млн теңгеге бір ауысымда 100 келушіге арналған емханасы және онкологиялық бөлімшесі бар 300 орындық көпбейінді аурухананың құрылысы қарқынды жүргізілуде. Нысанды жыл соңына дейінпайдалануға беру жоспарланған.Сонымен қатар 45 млрд 800 млн теңгеге 200 төсек-орынға арналған жаңа перинаталдық орталықтың, 14 млрд 700 млн теңгеге 500 келушіге арналған емхананың және 9 млрд 800 млн теңгеге Титов кентінде ауысымына 400 келушіге арналған №5 қалалық емхананың құрылыстары басталды.Қызылорда облысы әкімінің баспасөз қызметі

 Бүгін Қызылорда облысының әкімі Нұрлыбек Нәлібаевтың қатысуымен «Өнер орталығында» 8 наурыз – Халықаралық әйелдер күніне арналған «Ана – әлемнің бесігі» атты салтанатты шара өтті. Аймақ басшысы аналар мен қыз-келіншектерді көктемнің көркем мерекесімен құттықтады.«Президентіміз «Әйелдер қауымының отбасындағы, қоғам өміріндегі және мемлекетті жан-жақты дамыту ісіндегі рөлі орасан зор. Қыз-келіншектер өндірісте, шығармашылық жолында, саясат, бизнес және басқа да көптеген салада биік белестерді бағындырып келеді», – деген болатын. Тәуелсіз Қазақстанның толағай табыстары мен Сыр өңірінің бүгінгі жетістіктерінің барлығында әйелдер қауымының өз қолтаңбалары бар. Аналарымыздың рухынан күш, ұлағатынан тәлім алған аруларымыз бүгінде экономикамыздың барлық саласында табысты еңбек етеді. Облыс бойынша мемлекеттік қызметшілердің 45 пайызы, медицина қызметкерлерінің 88 пайызы, ұлағатты ұстаздардың 78 пайызы, жалпы бюджеттік саланың 62 пайызы, шағын және орта бизнесте еңбек ететіндердің 55 пайызы қыз-келіншектер.Сыр өңірінің өсіп-өркендеуіне қосқан елеулі еңбектеріңіз үшін Сіздерге барша Сыр жұртшылығының атынан шынайы алғысымды, зор ризашылығымды білдіремін. Біз, ер-азаматтар Сіздерді жоғары бағалаймыз, құрметтеп, қадірлейміз. Нәзік жандарға деген біздің ықыласымыз, ниет-тілегіміз әрдайым ерекше.Бір қолымен бесікті, екінші қолымен әлемді тербеген ардақты аналарымыз ел ертеңіне нәр, тіршілікке әр беріп келеді. Алдағы уақытта да ұлтымыздың баянды болашағы жолында аянбай еңбек ете берулеріңізге тілектеспін!», – деді Нұрлыбек Машбекұлы.Салтанатты шарада шуақты мереке қарсаңында Мемлекет басшысының Жарлығымен «Парасат», «Құрмет» ордендерімен, «Ерен еңбегі үшін» медалімен наградталған қызылоралық әйел-аналарға марапаттары табысталды. Сонымен қатар, «Мәдениет саласының үздігі» төсбелгісі, Қызылорда облысының Құрмет грамотасы, облыс әкімінің Алғыс хаты мереке иелерінің мерейін асырды. Айта кетейік, Ақордада өткен қабылдауда «Қызылорда» телеарнасының бас редакторы Тұңғышбаева Айнұр Нұрланқызы «Ерен еңбегі үшін» медалін  Мемлекет басшысының қолынан алды. Бұл – Сыр өңіріндегі іскер әйелдер қауымының адал еңбегіне берілген лайықты баға.Аймақта 48 мыңнан астам көпбалалы отбасы болса, оның 17 мыңға жуығы  «Алтын алқа» және «Күміс алқа» иегерлері. Алтын құрсақты аналар демографиялық ахуалды жақсартуға зор үлес қосып келеді. Өңірде отбасы институтын дамыту және аналарды әлеуметтік қолдау бағытында жүйелі жұмыстар жүргізілуде.Белгілі кәсіпкер Марат Дүйсенбаевтың демеушілігімен «Анаға тағзым» орталығы салынған. Орталықта  екі жылдың ішінде 40 мыңға жуық ана мен қыз-келіншекке  қызмет көрсетілді. Сонымен қатар, кейінгі жылдары бой көтерген «Отбасы орталығында» болашақта шаңырақ көтеретін жастар мен жас отбасыларға психологиялық және құқықтық кеңестер беріліп, мемлекеттік бағдарламалар мен жобалар бойынша ақпараттық-түсіндірме жұмыстары жүргізілді.Облыстағы барлық 7 ауданда заманауи үлгідегі «Руханият орталықтары» салынып, пайдалануға берілді. Аталған орталықтарда музей мен кітапхана жұмыс істейді. Айта кету керек, өңірде соңғы екі жыл қатарынан «Анаға тағзым» республикалық форумы өткізіліп келеді.@Қызылорда облысы әкімінің баспасөз қызметі

Шымкент қаласындағы Ұлағат шағын ауданында орналасқан №153 референдум учаскесінде мүмкіндігі шектеулі азаматтардың дауыс беруіне жасалған жағдайларға мониторинг жүргізілді. Тексеріс жұмыстары қалалық аумақтық референдум комиссиясы мен Еңбекші аудандық аумақтық референдум комиссиясының мүшелері тарапынан жүзеге асырылды.Аталған №153 референдум учаскесі №150 жалпы білім беретін мектеп ғимаратында орналасқан. Учаскеде 2600-ге жуық дауыс беруші тіркелген, оның ішінде 5 азамат мүгедектігі бар сайлаушылар санатына жатады. Комиссия мүшелерінің айтуынша, учаске референдум өткізуге толық дайын. Әсіресе, мүмкіндігі шектеулі азаматтардың дауыс беруіне қолайлы жағдайлар қарастырылған.Учаскелік комиссия төрағасы Шадия Жиенованың мәліметінше, учаскеде ерекше қажеттілігі бар азаматтарға арналған бірқатар арнайы құрал-жабдықтар орнатылған. Атап айтқанда, ғимаратқа келген азаматтардың хабар беруі үшін арнайы қоңырау батырмасы қарастырылған. Сонымен қатар санитарлық талаптарға сай пандустар орнатылып, көзі көрмейтін азаматтарға арналған тактильді бағыттаушы белгілер орналастырылған. Бұл белгілер мүгедектігі бар сайлаушыларға арналған арнайы дауыс беру кабинасына дейін бағыт көрсетеді.Сондай-ақ учаскеде көру қабілеті нашар азаматтарға арналған тифлотехникалық құралдар — электрондық лупа, Брайль қарпімен басуға арналған принтер, бейнеұлғайтқыштар мен экрандық қолжеткізу бағдарламалары қарастырылған. Бұдан бөлек, талапқа сай бейімделген санитарлық торап та жабдықталған.Комиссия төрағасының айтуынша, есту қабілеті шектеулі азаматтар үшін арнайы құлаққаптар мен персоналды ноутбуктер де дайындалған.Жүргізілген тексеріс нәтижесінде комиссия мүшелері №153 референдум учаскесі дауыс беру процесін өткізуге толық дайын деген қорытындыға келді.— Біздің басты мақсатымыз — әрбір сайлаушының дауыс беруіне кедергісіз жағдай жасау және референдумның ашық әрі тең дәрежеде өтуін қамтамасыз ету, — деді тексеріс жүргізген қалалық аумақтық референдум комиссиясының мүшесі Талғат Әліқұлов.Айта кету керек, мүгедектігі бар азаматтардың дауыс беру процесіне толыққанды қатысуын қамтамасыз ету — демократиялық қоғамның маңызды көрсеткіштерінің бірі.

Шымкент қаласының орталығында елдің даму бағыттарына арналған ашық диалог алаңы өтті. Кездесу Қ. Сыпатаев атындағы №7 мектеп-лицейінің акт залында ұйымдастырылып, оған қала тұрғындары, зиялы қауым өкілдері және жастар қатысты.Жиынның негізгі спикері ретінде қоғам қайраткері Досыбай Шерімқұлов сөз сөйледі. Ол өзінің саяси тәжірибесіне сүйене отырып, өткен мен бүгіннің сабақтастығын атап өтіп, қазіргі тарихи кезеңнің маңыздылығына тоқталды. Спикердің айтуынша, әлем қарқынды өзгерістер кезеңін бастан өткеруде, ал Қазақстан жаһандық үдерістерден тыс қала алмайды. Осы тұрғыда қоғам талаптары мен уақыт сұранысына жауап беретін жаңа Конституция қажет, өйткені ол Әділетті Қазақстанды қалыптастырудың берік негізіне айналады.Кездесу барысында қатысушыларға жаңа Конституция жобасын әзірлеу жұмыстары туралы жан-жақты ақпарат берілді. Атап айтқанда, құжатты дайындау үшін құрылған арнайы комиссия құрамына еліміздің 130-дан астам жетекші сарапшысы енгені, ал талқылау процесі ашық түрде жүргізілгені айтылды. Досыбай Шерімқұлов академик Салық Зимановтың демократиялық қоғамда заң халықтың көпшілік еркімен қабылданатыны туралы пікірін келтіріп, бұл қағида тұрақтылықтың басты негізі екенін атап өтті.Сонымен қатар жаңа Конституцияны түсіндіру барысында халықтық бақылау тетіктерін күшейту, жер мен оның қойнауындағы байлықтардың халық меншігі екендігін конституциялық деңгейде бекіту мәселелері кеңінен талқыланды. Бұдан бөлек, азаматтардың құқықтарын қорғау механизмдерін жетілдіру, құқық қорғау институттарының өкілеттіктерін кеңейту және мемлекеттік биліктің теңгерімді, ашық әрі есеп беретін жүйесін қалыптастыру бағытындағы өзгерістерге ерекше назар аударылды.Спикер алдағы жаңа Конституцияны қабылдау жөніндегі референдумның тікелей демократияның ең жоғары көрінісі екенін атап өтті. Оның айтуынша, референдумда берілген әрбір дауыс елдің тұрақтылығы мен өркендеуіне қосылған жеке үлес болып табылады. Сондықтан бұл таңдауға әр азамат саналы әрі жауапкершілікпен қарауы қажет.№7 мектеп-лицейінде өткен ашық кездесу қала тұрғындарының мемлекеттік маңызы бар мәселелерге бейжай қарамайтынын және ел дамуына бағытталған оң өзгерістерге дайын екенін көрсетті. Жиын қорытындысы бойынша қатысушылар жаңа Конституцияға қолдау білдіретіндерін жеткізді.

Алдағы республикалық референдум қарсаңында елдің болашағын айқындайтын маңызды саяси науқанға байланысты білім беру ұйымдарының ұжымдарында кездесу жұмыстары белсенді жүргізілуде. Бұл үдерісте педагогтардың рөлі ерекше, өйткені олар жас ұрпақтың дүниетанымын қалыптастыруда маңызды орын алады.Осы орайда Шымкент қаласындағы Индустрия және тамақтану колледжінде жаңа Конституция жобасын талқылауға арналған кездесу өтті. Іс-шара барысында колледждің педагогикалық ұжымы алдында заңгер-сарапшы Ердәулет Тастамбек сөз сөйледі.Кездесу барысында спикер жаңа Конституция жобасына енгізілген өзгерістердің маңыздылығына тоқталып, әсіресе экологиялық ахуалды жақсартуға бағытталған нормалардың өзектілігін атап өтті. Оның айтуынша, жаңа Конституция жастардың тұрақты әрі құқықтық мемлекетте білім алып, өмір сүріп, еңбек етуіне мүмкіндік береді.«Жаңа Конституция жобасында экологиялық жағдайға қатысты маңызды өзгерістердің қарастырылғаны қуантады. Бүгінде баршаға ортақ мақсат – жастарымыздың білім алып, өмір сүріп, еңбек етуі үшін зайырлы, тұрақты және құқықтары қорғалған мемлекет қалыптастыру. Тұрақтылық – қазіргі таңда аса маңызды құндылық. Өйткені біз елдің болашағымен жұмыс істеп отырмыз, ал еліміздің ертеңі – жастардың қолында», – деді Ердәулет Тастамбек.Сондай-ақ ол адам құқықтары мен бостандықтарын қорғау, білім алу құқығы, мемлекеттің әлеуметтік міндеттемелері, билік тармақтарының өзара іс-қимылы және заң үстемдігін қамтамасыз етуге қатысты негізгі нормалар туралы кеңінен түсіндірді. Бұдан бөлек, білім беру инфрақұрылымын дамыту және педагогтардың құқықтық әрі әлеуметтік мәртебесін нығайтуға бағытталған ережелерге ерекше назар аударылды.Кездесу барысында Құрылтайдың мемлекеттік билік жүйесіндегі қызмет қағидаттары мен өкілеттіктері туралы да сөз қозғалды. Ердәулет Тастамбек Конституция жобасының 56-бабына тоқталып, онда Құрылтайдың заң шығару қызметі, мемлекеттік институттарды қалыптастыруға қатысуы және парламенттік бақылау функциялары айқындалғанын атап өтті.«Жаңа Конституцияда Құрылтайдың негізгі өкілеттіктері бекітілген. Олар 56-бапта нақты көрсетілген және заң шығару қызметін жүзеге асыруды, мемлекеттік институттарды қалыптастыруға қатысуды, сондай-ақ парламенттік бақылауды қамтиды», – деп түсіндірді заңгер.Іс-шара ашық диалог форматында өтті. Кездесу барысында колледж педагогтары мен жоғары курс студенттері өздерін толғандырған сұрақтарын қойып, маманнан жан-жақты жауап алды. Жиын қортыныдысы бойынша қатысушылар жаңа Конституцияға қолдау білдірді.

Шымкент қаласы Абай ауданындағы №140 жалпы білім беретін мектеп ғимаратында жаңа Конституция жобасын түсіндіруге арналған кезекті кездесу өтті. Іс-шараға аудан тұрғындары мен мектептің педагогикалық ұжымы қатысты. Кездесу еркін пікір алмасу, сұрақ-жауап форматында ұйымдастырылды.Жиынның ашылуында ақ жаулықты әжелерден құралған «Киелі кимешек» тобы ән шашуын ұсынып, «Қазағым» және «Бүлдірген» әндерін орындады. Өнерпаздардың әсерлі орындауы жиналған қауымға көтеріңкі көңіл-күй сыйлады. Кездесу барысында қатысушыларға Конституция жобасына енгізілген өзгерістер мен жаңашылдықтар кеңінен түсіндірілді. Атап айтқанда, адам және азамат құқықтары мен бостандықтарын қорғауды күшейту, білім беру саласының рөлін арттыру, педагог мәртебесін көтеру мәселелері талқыланды.Іс-шарада сөз сөйлеген Шымкент қалалық Қазақстан халқы Ассамблеясы жанындағы Ақсақалдар кеңесі төрағасының орынбасары Батырбек Қаратайұлы Жалмұрзаев қабылданғалы отырған Ата Заңның саяси жүйені жетілдіруге және қоғамдық институттарды жаңа жағдайда жаңғыртуға бағытталған маңызды құжат екенін атап өтті. Сонымен қатар ол Конституцияның тарихи негізі ретінде қазақ халқының құқықтық дәстүріндегі «Жеті Жарғы» заңдар жинағының маңызына тоқталып, халық мүддесіне бағытталған заң шығару дәстүрі ертеден қалыптасқанын жеткізді.Кездесу соңында аудан тұрғындары алдағы маңызды саяси науқанға белсенді қатысып, ел болашағы үшін жауапты таңдау жасауға дайын екендіктерін білдірді.

Тәуелсіздік алған сәттен бері Қарулы күштердің бұл қызмет саласы қарқынды дамып, заманауи көпфункционалды кешендермен қамтамасыз етіліп келеді.Бөлімше мамандары радиоэлектрондық күрестің жаңа тәсілдері мен әдістерін ұдайы меңгеруде. Олар барлау құралдарының жаңа техникалық мүмкіндіктерін зерделеп, радиоэлектрондық қорғаныс тәсілдері мен шартты қарсыластың барлау құралдарына қарсы әрекет алгоритмдерін пысықтайды.Сала мамандары жоғары техникалық дайындығымен, аналитикалық ойлау және радиоэлектрондық ахуалды жылдам бағалап, күрделі жағдайда тиімді шешім қабылдау қабілетімен ерекшеленеді. Олар Алматыдағы Радиоэлектроника және байланыс әскери-инженерлік институтында дайындалады.Радиоэлектрондық күрес бөлімшелері қазіргі қарулы қақтығыстарда тиімді әрекет етуге мүмкіндік беретін заманауи радиоэлектрондық күрес құралдарымен жарақтанған.Ақпарат көзі : https://www.gov.kz/memleket/entities/mod/press/news/details/1178170?lang=kk

Кездесу барысында Президент Қасым-Жомарт Тоқаев бейтарап мандат негізінде әрекет ететін Халықаралық Қызыл крест комитетінің бірегей сипатына тоқталып, гуманитарлық көмекті саясиландыруға болмайтынын атап өтті.– Халықаралық Қызыл крест комитеті дүние жүзіндегі гуманитарлық ынтымақтастық жүйесінде аса маңызды рөл атқарады. Халықаралық құқық нормаларын нығайтуға қосқан үлесіңізді жоғары бағалаймыз. Сіз басқаратын Ұйым мен басқа да халықаралық беделді құрылымдар баршаға ортақ адамзат құндылықтарын насихаттауға елеулі үлес қосып келеді. Әсіресе, бұл іс адамдар көмекке мұқтаж аймақтарда өте маңызды, – деді Президент.Қазақстан Халықаралық гуманитарлық құқыққа саяси бейілділікті күшейту жөніндегі жаһандық бастама көтерген алты мемлекеттің бірі саналады. Бұл ретте соғыс кезіндегі адамгершілік тақырыбы бойынша жыл соңына қарай Иорданияда өтетін жоғары деңгейдегі Конференцияға дайындық мәселелері пысықталды.Мирьяна Сполярич Халықаралық Қызыл крест комитетінің қызметіне қолдау көрсеткені үшін Қазақстан тарапына ризашылығын білдірді. Оның айтуынша, тоқсаныншы жылдардан бері еліміз бен Ұйым арасында қалыптасқан сындарлы диалог дәйекті түрде дамып келеді.– Мемлекеттердің қолдауы өте маңызды. Сіз мұны орынды атап өттіңіз. Женева конвенциясына барша ел қатысады. Алайда бұл құжаттың ықпалы аталған нормаларды мемлекеттердің қаншалықты қорғап, қолдауға әзірлігіне байланысты, – деді ХҚКК басшысы.Қасым-Жомарт Тоқаев пен Мирьяна Сполярич халықаралық және гуманитарлық күн тәртібіндегі өзекті мәселелерді талқылап, Қазақстан мен Ұйым арасындағы серіктестікті одан әрі нығайтуға мүдделі екендерін растады. Ақпарат көзі : https://www.gov.kz/memleket/entities/mfa-geneva/press/news/details/1178151?lang=kk

Бүгін аудан әкімдігінің мәжіліс залында аудан әкімі Жандос Еркінбектің төрағалығымен кезекті кеңейтілген жиын өтті. Жиында тұрғын үй құрылысы саласын дамыту және цифрландыру мәселелері қаралды.Биыл аймақ басшысы Байқоңыр қаласындағы 50 пәтерлі 5 тұрғын үйдің ашылу рәсіміне қатысып, пәтер кілттерін табыстады. Сонымен қатар Жосалы кентіндегі Тәуелсіздік ықшам ауданында халықтың әлеуметтік осал топтарын және тұрғын үй кезегінде тұрған азаматтарды тұрғын үймен қамтамасыз ету мақсатында 2 пәтерлі 30 тұрғын үй сатып алынып, қазіргі уақытта табыстау жұмыстары жүргізілуде. Нәтижесінде бұл бағыттағы көрсеткіш өткен жылмен салыстырғанда 103,2 пайызды құрап отыр.Аудан басшысы тұрғын үйлердің сапасына қатысты мәселелерге де тоқталып, кемшіліктер анықталып жатса тиісті жұмыстарды уақытылы жүргізуді тапсырды.Мәжілісте сондай-ақ аудан аумағында санитарлық тазалық жұмыстарын күшейту мәселесі қаралды. Мемлекет басшысының тапсырмасына сәйкес республика көлемінде жүзеге асырылып жатқан «Таза Қазақстан» экологиялық бағдарламасы аясында елді мекендерді абаттандыру және тазалық жұмыстарын жүйелі жүргізу қажеттігі айтылды.Сонымен қатар алдағы Наурыз мерекесіне дайындық мәселесі де талқыланды. Аудан көлемінде 14–23 наурыз аралығында өтетін «Наурызнама» онкүндігі аясындағы мәдени шараларды жоғары деңгейде ұйымдастыру да тапсырылды.Мәжіліс қорытындысында Жандос Еркінбек жауапты сала басшыларына нақты тапсырмалар беріп, олардың орындалуын қатаң бақылауда ұстауды жүктеді.Ақпарат көзі : https://www.gov.kz/memleket/entities/kyzylorda-karmakshy/press/news/details/1178131?lang=kk

Нефедов Сергей Владимирович «Bank RBK» Банкі» АҚ-ның өзге де басшы қызметкері лауазымына келісіп бекітілді (03.03.2026 ж. №20/БВУ/Т хаттама).Ақпарат көзі : https://www.gov.kz/memleket/entities/ardfm/press/news/details/1178126?lang=kk

Кәсіпкерлер алдағы уақытта қай салық режимі бойынша жұмыс істейтінін түпкілікті айқындады.1,2 млн-нан астам кәсіпкер оңайлатылған декларация негізіндегі арнаулы салық режимін таңдады.Бұл – шағын және орта бизнес арасында ең сұранысқа ие режим.Оңайлатылған декларация кімдерге қолжетімді?• Жылдық табысы 600 000 АЕК-ке дейін (шамамен 2,6 млрд теңге).Режимнің артықшылықтары:Қызметкерлер санына шектеу жоқ, бұл жұмыспен қамтуды заңдастыруға ықпал етеді;Бірыңғай КТС/ЖТС мөлшерлемесі – 4% (мәслихаттар мөлшерлемені 50%-ға дейін төмендетуге немесе арттыруға құқылы);ҚҚС-тан босату;Декларация тапсыру және салық төлеу жылына 2 рет жүзеге асырылады.Бұл шарттар бизнесті жүргізуді жеңіл әрі болжамды етеді.346 мың азамат өзін-өзі жұмыспен қамтығандарға арналған арнаулы режимді қолданады, оның ішінде 265 мыңы – жаңа қатысушылар.Бұл 265 мың адамның “көлеңкелі” жұмыспен қамтудан шығып, ресми түрде жұмыс істей бастағанын білдіреді.Өзін-өзі жұмыспен қамтығандарға арналған режимді кімдер қолдана алады?• Ай сайынғы табысы 300 АЕК-ке дейін (шамамен 1,3 млн теңге);• Жалдамалы жұмыскерлері жоқ;• ДК ретінде тіркелмеген;• Рұқсат етілген қызмет түрлерін (40 түрі) жүзеге асыратын;• Бұрын патент немесе арнайы мобильді қосымша арқылы жұмыс істеген ҚР азаматтары және қандастар.Артықшылықтары:ДК ретінде тіркелу талап етілмейді;ЖТС-тан босатылады;Табыстың 4%-ы мөлшеріндегі бірыңғай әлеуметтік төлем төленеді, оған зейнетақы, әлеуметтік және медициналық жарналар кіреді.Бұл режим ресми түрде жұмыс істеуге, зейнетақы жинақтарын қалыптастыруға және әлеуметтік қорғау алуға мүмкіндік береді.Ақпарат көзі : https://www.gov.kz/memleket/entities/kgd-vko/press/news/details/1178084?lang=kk

АҚШ-тың Лас-Вегас қаласында өткен UFC 326 турнирінде Арнайы операциялар күштерінің өкілі кіші сержант Дияр Нұрғожай жартылай ауыр салмақта бразилиялық спортшы Рафаэль Тобиаспен болған тартысты жекпе-жекте қарсыласынан басым түсті.Үш раундқа созылған тартысты жекпе-жекте төрешілердің шешімімен Дияр Нұрғожай жеңіске жетті (30-27, 29-28, 29-28).Осылайша, Дияр Нұрғожай кәсіби мансанбында 11-ші жеңісіне қол жеткізді, ал Рафаэль Тобиас кәсіби ММА-да екінші рет жеңілді.Бұл кездесу файтер үшін UFC ұйымындағы үшінші жекпе-жек болды. Қазіргі уақытта оның кәсіби ММА рекорды 13 жекпе-жек, 11 жеңіс, 2 жеңіліс (11–2) көрсеткішінде тұр. Дияр Нұрғожай 93,4 келі салмақ дәрежесінде өнер көрсетеді.Дияр Нұрғожай – қоян-қолтық ұрыстан Қазақстанның бірнеше дүркін чемпионы, Панкратионнан әлем чемпионы, ММА-дан Азия чемпионы, Eagle FC лигасының жартылай ауыр салмақтағы чемпионы, Dana White’s Contender Series турнирінің жеңімпазы, UFC ұйымының файтері.2024 жылғы қазан айында Дияр Нұрғожай Dana White’s Contender Series турнирінде жеңіске жетіп, кейін UFC ұйымымен ресми келісімшартқа қол қойған болатын.Қазақстандық спортшының UFC-де көрсеткен нәтижесі мен халықаралық аренадағы жетістіктері оның келешектегі матчтардағы мүмкіндіктерін айқын көрсетіп отыр.Ақпарат көзі : https://www.gov.kz/memleket/entities/mod/press/news/details/1178093?lang=kk

Бүгін аудан әкімі Берік Сәрменбаев "Руханият" орталығында Азаматты хал актілерін тіркеу қызметкерлерін кәсіби мерекемен құттықтады. Мерекелік іс-шараға аудандық мәслихат төрағасы Ержан Әжікенов, облыстық мәслихат депутаты Жұмабек Ембергенов, сала ардагерлері ме қызметкерлері қатысты.– Жаңа Конституция жобасында отбасы мен неке ұғымдарының нақты айқындалуы – қоғамдағы дәстүрлі құндылықтарды құқықтық деңгейде бекітудің айқын көрінісі. Жоба мәтінінде отбасы құндылықтарын қорғау, неке институтын нығайту, сондай-ақ ата-ана мен бала арасындағы өзара жауапкершілік мәселелері кеңінен қамтылған. Сонымен қатар құжатта неке ұғымына нақты анықтама берілген. Онда неке ер мен әйелдің мемлекет заңына сәйкес тіркелген ерікті және тең құқықты одағы екені көрсетілген. «Бұл – отбасының жай ғана әлеуметтік ұғым емес, мемлекетіміздің іргетасын құрайтын және оның қорғауындағы ең маңызды институт екенін білдіреді.Азаматтық хал актілерін тіркеу қызметі – қоғам өміріндегі аса маңызды әрі жауапты салалардың бірі. Адам өміріндегі ең маңызды кезеңдер – дүниеге келу, отбасын құру, жаңа өмір бастау, сондай-ақ өмір жолындағы өзге де маңызды сәттер сіздердің тікелей қатысуларыңызбен заңды түрде рәсімделеді. Сондықтан бұл салада қызмет ету үлкен жауапкершілікті, жоғары кәсібилікті, адалдық пен ұқыптылықты талап етеді. Сіздер күн сайын азаматтардың құқықтары мен заңды мүдделерін қорғауға, мемлекеттік қызметтердің сапасын арттыруға, қоғамдағы құқықтық тәртіптің нығаюына зор үлес қосып келесіздер. Сіздердің адал еңбектеріңіз – халыққа көрсетілетін мемлекеттік қызметтің сапасын арттыруға бағытталған маңызды қадамдардың бірі. Осындай жауапты міндеттерді абыроймен атқарып жүрген барша қызметкерлерге шынайы алғысымды білдіремін, – деді Берік Әбдіғаппарұлы.Салтанатты жиында сала ардагерлері мен қызметкерлеріне аудан әкімінің "Алғыс хаты" табысталып, сый-құрмет көрсетілді. Сондай-ақ, зейнетке шыққан ардагерге құрмет жасалып, жас жұбайларға неке куәлігі мен жаңа туған нәрестенің туу туралы куәлігі анасына салтанатты түрде табысталды.Аудан өнерпаздары жиналған жұртшылыққа әсем әндерін тарту етіп, мерекелік көңіл-күй сыйлады.Ақпарат көзі : https://www.gov.kz/memleket/entities/kyzylorda-syrdarya/press/news/details/1177997?lang=kk