Астанада Тыл бастығы басқармасының әскери қызметшілері, "Жас сарбаз" әскери-патриоттық клубының тәрбиеленушілері және Ұлттық әскери-патриоттық орталығы Орталық оркестрінің музыканттары Рзағұл Байкешевті Ұлы Жеңістің 80 жылдығымен құттықтады.Тыл бастығы басқармасының өкілі ардагерге Қорғаныс министрінің құттықтауын жеткізіп, бағалы сыйлық табыс етті.Майдангер әскери қызметшілерге табысты қызмет, отбасылық амандық және ашық аспан тіледі.Ардагерге сыйлық ретінде әскери оркестрдің музыканттары соғыс жылдарындағы шығармаларды орындады.Рзағұл Байкешев 1923 жылы 18 қазанда Ақтөбе облысы Мұғалжар ауданында дүниеге келген. Ол 1933 жылы мектепке барып, 1939 жылы бітірді. Соғысқа дейін совхозда жұмыс істеген.Майданға 1943 жылы шақырылды. Кеңес әскерлерінің құрамында Ржев қаласы маңындағы шайқастарға, Великте Луки шабуыл операциясына қатысты. Польша, Румыния және Венгрия нв жаудан азат етті. Отанына ефрейтор шенімен оралды.Ырзағұл Байкешев I және II дәрежелі Отан соғысы орденімен, Жуков медалімен және басқа да наградалармен марапатталған.Рзағұл Байкешев екі ұл тәрбиелеп, олардан бірнеше немере-шөбере сүйді. Қазір немересі Талғатпен тұрады.Ақпарат көзі : https://www.gov.kz/memleket/entities/mod/press/news/details/992713?lang=kk

9 мамырда ҚР Қарулы күштері Ұлттық әскери-патриоттық орталығының Әскери-тарихи мұражайы елорда тұрғындары мен қала қонақтарына есігін айқара ашты.Мұражай қызметкерлері келушілер үшін "Қазақ даласы – Жеңістің алтын бесігі" бағдарламасын дайындады. Көрме залдарының экспозицияларында соғыс қаһармандарының жеке заттары, құжаттар, фотосуреттер, бейнематериалдар, көркем шығармалар және Ұлы Отан соғысы кезіндегі басқа да жәдігерлер ұсынылды.  Әскери-тарихи мұражайдың гидтері келушілерге театрландырылған экскурсиялар, шебер-класстар, сондай-ақ заманауи әскери техника мен қару-жарақ көрмесін дайындады.- Ұлы Жеңістің 80 жылдығын атап өту үшін біз әскери-патриоттық бағыттағы танымдық әртараптандырылған іс-шаралардың тұтас кешенін дайындадық. Мұражайға келушілерге жеңіс жолының қаншалықты ауыр болғанын және соғыс майдандарында қазақстандық жауынгерлердің қалай жанқиярлықпен күрескенін жеткізуге тырыстық,- деп атап өтті Әскери-тарихи мұражайдың бастығы майор Дәулет Қадыров.Сондай-ақ, Қорғаныс министрлігі құрмет қарауылы ротасы әскери қызметшілерінің үйлесімді қозғалыстары көпшілікті таң қалдырды.Жас қатысушылар үшін мұражай қызметкерлері "Бейбіт аспан астында" атты сурет сабағы мен зияткерлік викторинаны өткізді. Ал шытырман оқиғалы әуесқойлар танымдық квестке қатысты.Іс-шара Еркеғали Рахмадиев атындағы Мемлекеттік академиялық филармония мен "Жастар"театрының концерттік бағдарламасымен аяқталды.Ақпарат көзі : https://www.gov.kz/memleket/entities/mod/press/news/details/992717?lang=kk

9 мамырда Ұлы Жеңістің 80 жылдығына орай Радиоэлектроника және байланыс әскери-инженерлік институтының әскери қызметшілері Алматының Орталық саябақтарының бірінде патриоттық шара ұйымдастырды.Дәстүр бойынша, мереке қонақтарына нағыз сарбаз ботқасы дайындалды — бұл майдандағы бауырластық пен ерліктің символы. Ыстық тағам 80 жыл бұрын майдандағы сияқты далалық ас үйден тікелей таратылды. Ботқаның дәмін татып көргендердің бәрі бір сәтке соғыс жылдарын, майдан өмірінің рухын сезіне алды.— Бұл сарбаз ботқасы – батырларымыздың ерлігі мен төзімділігіне ықпал еткен дәм, – деді институт бастығының тыл жөніндегі орынбасары подполковник Ержан Жамбаев. – Біз мұндай акцияны жыл сайын жеңіске жеткендерге құрмет ретінде өткіземіз. Біздің мақсатымыз – Ұлы Жеңістің маңызын жастарға жеткізу, майдангерлерді есте сақтау және тарихқа деген құрметті нығайту.Бұдан бөлек, курсанттар әр қонақтың кеудесіне естелік белгісін — Жеңіс символын құрметпен тағып берді. Бұл кәдесыйдың мағыналы терең, көптеген адамдар үшін жай сыйлық емес, есте сақтаудың, патриотизмнің және ұрпақтар сабақтастығының маңыздылығын еске түсірді.Шара әр түрлі жастағы еңбек ардагерлерінен бастап балалары бар жас отбасыларына дейінгі жүздеген азаматтың басын қосты. Көбі естелік фотосуретке түсіріп, бостандық үшін күрескен ата-бабалары туралы әңгімелерін айтты. Балалар үшін мұндай кездесулер өткен тарих пен Отанға деген сүйіспеншілікке тәрбиелеу сабағына айналды.Ақпарат көзі : https://www.gov.kz/memleket/entities/mod/press/news/details/992681?lang=kk

Ақтаудағы ауқымды іс-шаралар аясында гарнизонның әскери қызметшілері, Қарулы күштердің ардагерлері, Ауған соғысына қатысушылар, сондай-ақ жергілікті атқарушы органдардың өкілдері Мәңгілік алау мемориалында қаза тапқан батырларды еске алды.Гүл шоқтарын қою рәсімі күннің басты оқиғасы болды.Мерейтойлық датаға орай Маңғыстау облысының әкімі Нұрдәулет Қилыбай Ұлы Отан соғысының ардагерлері Василий Салазкин мен Ольга Зарявнякты құттықтады. Ол майдангерлерге ризашылығын білдіріп, Президент Қасым-Жомарт Тоқаев пен Қорғаныс министрінің құттықтауларын жеткізді.- Сізде Отан қорғауда жанқиярлықтың жарқын үлгісін көрсеттіңіздер. Біз мұны әрқашан есте сақтаймыз. Маңғыстаудың барлық тұрғындары атынан еліміздің бейбітшілігі мен жарқын болашағы жолындағы ерліктеріңіз үшін алғыс айтқым келеді, — деп атап өтті ол.Сондай-ақ, әкім ардагерлерге "Ұлы Отан соғысындағы Жеңіске 80 жыл" естелік медальдарын табыс етті.Ардагерлердің әңгімелері әсерлі. Василий Салазкин 14 жасында майданға кетіп, I Қиыр Шығыс майданында шайқасты. Ольга Зарявняк 13 жасынан бастап Белоруссиядағы партизандық қозғалысқа қатысып, Брест облысының Клещели қаласында байланысшы болды.Ардагерлерге құрмет белгісі ретінде олардың үйлерінің алдында әскери оркестр өнер көрсетіп, патриоттық әндерді орындады.Сол күні "Жеңіс саябағында" мерекелік концерт өтіп, облыс әкімінің ардагерлермен және әскери қызметшілермен кездесуі өтті. Сондай-ақ, аймақ басшысы Қорғаныс істері жөніндегі департаментке барып, әскери мұражай экспонаттарымен танысып, сарбаз ботқасынан дәм татты.Ақтаудағы Жеңістің 80 жылдығын мерекелеу ардагерлерге  ризашылықтың символына айналды.Ақпарат көзі : https://www.gov.kz/memleket/entities/mod/press/news/details/992684?lang=kk

Алматы облысында Ұлы Отан соғысындағы Жеңістің 80 жылдығы кең көлемде аталып өтті.Алматы облысы аумағында тұратын соғыс ардагерлеріне ҚР Президенті Қасым-Жомарт Тоқаевтың атынан құттықтаулар келіп түсті. Жеңісті жақындатқан ардагерлерге атаулы күнге орай ыстық лебізге толы хаттар, естелік сыйлықтар және Жеңістің 80 жылдығына арналған мерекелік медальдар берілді. Бұл күнгі басты қуанышты жаңалықтың бірі - бейбіт өмір сыйлаған соғыс ардагерлеріне мемлекет тарапынан көрсетілген қамқорлық пен құрмет ретінде Қонаев қаласында салынған тұрғын үйлерден демеушілердің атынан баспана кілтінің табыс етілуі болды. Сонымен бірге, облыс әкімі Марат Сұлтанғазиевтің тапсырмасымен аймақта тұратын көзі тірі бес соғыс ардагеріне бес миллион теңгеден әлеуметтік көмек берілді. Жеңіс күніндегі салтанатты шара облыс орталығындағы "Даңқ" мемориалына гүл шоқтарын қоюдан басталды. Шараға облыс басшылығы мен әр деңгейдегі мәслихат депутаттары, ардагерлер ұйымы мен түрлі мекеме өкілдері қатысты.Салтанатты рәсімге соғыс ардагерлері арнайы көлікпен жеткізілді. Облыстық төтенше жағдайлар департаментінің оркестрі шараны музыкамен әрлеп, мереке көркін қыздырды. Шараға қатысқандардың арасында Екінші дүниежүзілік соғыс ардагерлері Солтанбай Жарықбасов пен Алым Кибиров та болды.Солтанбай ата шарада: "Жеңіс - біздің баршамызға ортақ тағылымды тарихымыз, біздің өміріміздің өзегі әрі даңқымыз, абырой-беделіміздің көрінісі!" - десе, ал А. Кибиров Жеңістің қадір-қасиетін кейінгі жас ұрпақ жадына тұтып, сезініп өссе деген тілегін жеткізді."Жеңістің 80 жылдық мерекесі тек ардагерлерге құрмет көрсетумен шектелмейді. Бұл күннің болашақ ұрпақ үшін де маңызы зор", - деді облыс әкімі.Мереке күні аймақ басшысы ардагер Оксана Бетебаеваға ҚР Президентінің атынан Құттықтау хат, естелікке сыйлық ұсынып, жаңа пәтер кілтін табыстады.Мерекелік іс-шаралар бүкіл облыстың бүкіл аймағын қамтыды. Облыс мұражайларында, кітапханаларда және Мәдениет үйлерінде көрмелер, еске алу кештері мен әдеби-танымдық кездесулер ұйымдастырылды.Мәселен, облыстық кітапханада қайсарлық пен батырлық тақырыбында игі шара өтсе, ал Қарасай ауданындағы "Атамекен" орталығында жиналған қауым Халық қаһарманы, генерал-полковник Сапарғали Тоқпақбаевтың тағылымды әңгімесін тыңдады.Жеңіс күнін мерекелеу 9 мамырмен шектелмесі анық. Облыс жастарының бастамасымен "80 жылға – 80 игі іс" акциясы қолға алынды. Бұл акция аясында 200-ден астам ардагерге көмек көрсетіледі. Еріктілер тыл еңбеккерлері мен жалғыз басты қариялардың шаңырақтарына бас сұғып, үй жинауға және ауласын абаттандыруға қол ұшын созуда. Мектеп оқушылары мен студенттер үшін де әскери бөлімдер мен шекара заставалары отаншылдық рухты көтеретін экскурсиялар өткізеді.Ал 10 мамыр күні Жеңістің 80 жылдығына орай "Ұлы дала жорығы" атты V халықаралық марафон өтеді. Ауқымды жарысқа 500-ден астам спортшы қатысып, 5 мың көрерменді қамтиды деп күтілуде. Сондай-ақ, Талғар ауданындағы Нұра ауылында бәйге өтіп, жарыста 100-ге жуық шабандоз өнер көрсетті. Жеңіс күніндегі игі шара Райымбек ауданы Талас ауылындағы соғыс ардагерлеріне арналған ескерткіштің ашылуымен түйінделді.Ақпарат көзі : https://www.gov.kz/memleket/entities/almobl/press/news/details/992664?lang=kk

Іс-шара 316 атқыштар дивизиясының командирі генерал-майор Иван Панфиловтың ескерткіші мен 28 гвардиялық-панфиловшылар мемориалы орналасқан «Жерұйық» саябағында өтті.Гүл шоқтарын қою рәсіміне Қорғаныс министрінің бірінші орынбасары – Қазақстан Республикасы Қарулы күштері Бас штабының бастығы генерал-лейтенант Сұлтан Қамалетдинов, Ресей Федерациясының Қазақстандағы Төтенше және Өкілетті Елшісі Алексей Бородавкин, Қарулы күштердің ардагерлері және «Жас сарбаз» әскери-патриоттық қозғалысының тәрбиеленушілері қатысты.1941 жылы 16 қарашада Панфилов дивизиясының жауынгерлері жиырмаға жуық неміс танкін жойып, фашистердің Мәскеуге жасаған шабуылын тоқтатты. Бұл Ұлы Отан соғысының алғашқы жылындағы шешуші шайқастардың бірі болды.Қазақстаннан 1,2 миллионнан астам адам майданға аттанды. Оның тең жартысы соғыстан оралған жоқ. Бес жүз қазақстандыққа Кеңес Одағының Батыры атағы берілді.Гүл қою рәсімінде іс-шараға қатысушылар қаза тапқан сарбаздарды бір минут үнсіздікпен еске алды.Ақпарат көзі : https://www.gov.kz/memleket/entities/mod/press/news/details/992671?lang=kk

Ұлы Отан соғысындағы Жеңістің 80 жылдығына орай Қостанай облысында ардагерлер мен оларға теңестірілген азаматтарға қолдау көрсетуге бағытталған кешенді іс-шаралар өткізіліп жатыр.Өңірде Ұлы Отан соғысының 10 қатысушысы мен мүгедегі, сондай-ақ ардагерлерге теңестірілген 1949 адам тұрады. Олардың барлығы мерейтойлық жыл бойы әлеуметтік және медициналық қолдауға ие болуда.Жеңіс күніне орай соғысқа қатысушыларға 5 миллион теңгеден, фашистік концлагерь тұтқындарына – 100 мың теңгеден, қоршаудағы Ленинград тұрғындарына – 60 мың теңгеден, тыл еңбеккерлеріне – 50 мың теңгеден, қаза тапқан ардагерлердің жесірлері мен әйелдеріне – 50 мың теңгеден біржолғы әлеуметтік көмек көрсетілді.Бұл төлемдерге бюджеттен жалпы 164,7 миллион теңге бөлінді.Мамыр айының басынан бастап барлық ардагерлер мен оларға теңестірілген азаматтарға Жеңістің 80 жылдығына арналған мерейтойлық медальдар табысталды – барлығы 1959 адам.Ардагерлерге ай сайын әлеуметтік көмек көрсетіледі: соғысқа қатысушыларға – 39 320 теңге, теңестірілген санаттарға – 11 796 теңге.Санаторийлік-курорттық емдеуге ерекше көңіл бөлінуде. Биыл 356 адамды сауықтыруға 108,7 миллион теңге бөлінді. Сонымен қатар, санаторийді өз бетінше таңдаған азаматтардың шығындарын өтеуге 54,4 миллион теңге бағытталды.7 мамырда Қостанай облысынан делегация Астанада өткен Әскери парадқа қатысты. Делегация құрамына ардагерлер, қоғамдық ұйымдардың өкілдері және еріп жүргендер кірді.Ақпарат көзі : https://www.gov.kz/memleket/entities/kostanay/press/news/details/992623?lang=kk

 Шымкент қаласының әкімі Ғабит Сыздықбеков ардагерлерді, 101 жастағы Нина Мосунова мен 99 жастағы Мұраталы Төлепбергенұлын Ұлы Жеңістің 80 жылдығымен құттықтады.  Майдангерлердің құрметіне шерулер ұйымдастырылды. Ғабит Сыздықбеков Мемлекет басшысы мен Қорғаныс министрінің атынан құттықтау хаттарын оқып, ардагерлерге "Ұлы Отан соғысындағы Жеңіске 80 жыл" мерекелік медальдарын табыс етті. Әскери оркестрдің сүйемелдеуімен сол жан түршігерлік сұрапыл соғыстың соңғы куәгерлеріне гүлдер мен сыйлықтар табыс етілді.  Көптеген сыйлықтармен қатар, ризашылық сезімі пен құрмет белгісі ретінде кәсіпкерлердің бірі ардагерлерге жаңа көліктер сыйлады. Мұраталы ақсақал рөлге отырды да жиналғандарға қарап былай деді.– Сендер ешқашан соғыс көрмесін деп тілеймін. Біздің көргенімізді сендерге көрсетпесін. Ел шетіне жау келмесін. Аспанымыз әрқашан ашық, еліміз көркейіп гүлденіп, халқымыздың ынтымағы арта берсін, – деді Мұраталы Төлепбергенұлы.Іс-шара соңында Кеңес Одағының Батыры генерал-майор Сабыр Рахымов атындағы әскери колледж курсанттары ардагерлер алдында салтанатты маршпен жүріп өтті.Нина Егоровна Мосунова 1924 жылы 9 наурызда Татарстан Республикасының Урустамак ауылында дүниеге келген. 1942 жылы ол өз еркімен майданға аттанды. Қазан қаласында дайындықтан өткен соң Горькийде телеграфшы, содан кейін зениттік бригадада радио операторлары бөлімінің командирі болып қызмет етті. Можайск маңындағы шайқастарға қатысып, "Германияны жеңгені үшін" медалімен марапатталған. Соғыстан кейін кассир, кітапханашы, хатшы-машинист болып жұмыс істеді. Бүгінде ол екі немересі және бес шөбересі бар әже.Мұраталы Төлепбергенұлы 1925 жылы 20 мамырда Жаскешу ауылында дүниеге келген. 1943 жылы әскерге шақырылды, Брест, Варшава, Данциг, Висмарк, Биттенберг және Перлебергті азат етуге қатысты.  II дәрежелі Отан соғысы орденімен, "Ерлігі үшін", "Варшаваны азат еткені үшін", "Германияны жеңгені үшін" медальдарымен және басқа да наградалармен марапатталған. Жеңісті Биттенбергте қарсы алып, 1950 жылы елге оралды. Соғыстан кейін ол бригадир, есепші, ферма менеджері болып жұмыс істеді. Сегіз бала тәрбиелеп өсіріп, олардан 19 немере және 10 шөбере сүйіп отыр.Ақпарат көзі : https://www.gov.kz/memleket/entities/mod/press/news/details/992575?lang=kk

"Ұлы Отан соғысында қаза тапқан жауынгерлер" монументіне гүл себеттері қойылды.Қорғаныс министрінің бірінші орынбасары – Бас штаб бастығы генерал-лейтенант Сұлтан Камалетдинов, Қарулы күштер жоғары қолбасшылығының және қаланың атқарушы билігінің өкілдері, әскери қызметшілер мен ардагерлер Екінші дүниежүзілік соғыстың ұрыс даласында қаза тапқан отандастарын еске алуға жиналды. Жиналғандар жауынгерлерді бір минут үнсіздікпен еске алды.Генерал-лейтенант Сұлтан Камалетдинов атап өткендей, 1941 жылдың жазында Ақмолада 310-шы және 387-ші атқыштар дивизиялары құрылды, тағы екі жылдан кейін, 1943 жылдың наурызында мұнда 72-ші гвардиялық атқыштар дивизиясы жасақталды. Соғыс майдандарында ерлік көрсеткен бұл құрамаларға Ақмола, Қарағанды, Көкшетау, Солтүстік Қазақстан және Қостанай облыстарының әскерге шақырылушылары қосылды.  Естеріңізге сала кетейік, қола мен гранитте соғылған "Ұлы Отан соғысында қаза тапқан жауынгерлерге" монументі 1995 жылы қанды шайқастардың батырларына құрмет  ретінде орнатылды. Ақпарат көзі : https://www.gov.kz/memleket/entities/mod/press/news/details/992553?lang=kk

Қазақстан Республикасының Сыртқы істер министрлігі Атом энергиясы жөніндегі халықаралық агенттігінің (АЭХА) Қиыр Шығыс өңірлік тобына Қазақстанды қабылдау бойынша Агенттіктің Басқарушылар кеңесінің бүгінгі отырысында жарияланған шешімді құптайды.Қазақстанның өңірлік топқа кіруі – Агенттіктің Жарғысына және еліміздің бастамасымен қабылданған АЭХА Бас конференциясының 2023 жылғы 29 қыркүйектегі GC(67)/RES/15 қарарына сәйкес мемлекеттердің АЭХА-дағы егемендік теңдігін қалпына келтіру мәселесіндегі маңызды қадам. Сонымен бірге бұл Астананың бейбітшілік пен жаһандық қауіпсіздікке қолдау көрсетуге, ядролық қарусыздану мен таратпау режимін нығайтуға бейілділігін растайды.Мүше мемлекеттердің АЭХА-дағы егеменді теңдікті қалпына келтірудегі іс-жігерін жоғары бағалаймыз және Қиыр Шығыс тобына қатысушы мемлекеттеріне қолдау мен жоғары сенім үшін ризашылығымызды білдіреміз.Бұл шешім Қазақстанға АЭХА басқарушы органдарының жұмысына толыққанды қатысуға мүмкіндік береді. Мемлекетіміз жаппай қырып-жою қаруы тәуекелдерінен азат әлем құруға бағытталған халықаралық іс-әрекеттердің белсенді қатысушысы ретінде атом энергиясын бейбіт мақсатта пайдалануға, ядролық технологияларды жауапкершілікпен қолдануға және сенім мен транспаренттіктің халықаралық механизмдерін нығайтуға өзінің конструктивтік үлесін әрі қарай ұсынуға әзірлігін білдіреді.Ақпарат көзі : https://www.gov.kz/memleket/entities/mfa/press/news/details/1110385?lang=kk

Вена, 2025 жылғы 7 мамыр – ЕҚЫҰ-ның «Инклюзивтілік және құқықтар мен мүмкіндіктерді кеңейту арқылы тұрақтылықты құру» конференциясына Қазақстан Республикасы Сыртқы істер министрлігінің Ерекше тапсырмалар жөніндегі Елшісі Алуа Надирқұлова қатысып, Қазақстанның гендерлік теңдік пен адам құқықтарын ілгерілетудегі күш-жігерін таныстырды.Елші өз сөзінде Президент Қасым-Жомарт Тоқаевтың бастамасымен Қазақстанда жүзеге асырылып жатқан демократиялық реформалардың қайтымсыздығын және олардың ЕҚЫҰ, Еуропалық Одақ және Еуропа кеңесін қоса алғанда, халықаралық серіктестер тарапынан қолдауын атап өтті.Негізгі жетістіктердің қатарында – 2023 жылы БҰҰ ұсынымдарына сәйкес әзірленген Адам құқықтары мен заң үстемдігі жөніндегі іс-қимыл жоспарының бекітілуі, 2024 жылы әйелдердің құқықтарын қамтамасыз ету және балалардың қауіпсіздігі мәселелері бойынша кейбір заңнамалық актілерге өзгерістер мен толықтырулардың енгізілуі, сондай-ақ 2025 жылғы наурызда Алматы қаласында Орталық Азия мен Ауғанстан үшін Орнықты даму мақсаттары жөніндегі БҰҰ Өңірлік орталығын құру туралы БҰҰ Бас Ассамблеясының қарарының қабылдануы атап өтуге тұрарлық. Сонымен қатар Мадина Жарбосынованың 2025-2028 жылдарға Әйелдерге қатысты кемсітушілікті жою жөніндегі БҰҰ комитетіне (CEDAW) сайлануы өңір үшін маңызды қадам болды.Сонымен қатар Н.Надирқұлова Қазақстанның Стамбул конвенциясына қосылуға дайындықты, БҰҰ-ның мүгедек балалар мен адамдардың құқықтары жөніндегі хаттамаларын ратификациялауды, сондай-ақ «Әйелдер, бейбітшілік және қауіпсіздік» күн тәртібіне белсенді қатысуды қоса алғанда, халықаралық міндеттемелерге бейілділігін атап өтті (БҰҰ ҚК 1325 қарары).Ақпарат көзі : https://www.gov.kz/memleket/entities/mfa/press/news/details/992998?lang=kk

Ұлы Жеңістің 80 жылдығына орай Шығыс Қазақстан облысындағы аты аңызға айналған партизан-жазушы Қасым Қайсенов кентінде жаңартылған Батырлар аллеясының салтанатты ашылуы өтті.Аллея осыдан он жыл бұрын Жеңістің 70 жылдығы қарсаңында «Туған жерге тағзым» акциясы аясында ашылған болатын. Биылғы мерейтойға орай алты ескерткіш жаңартылып, аты аңызға айналған партизан Қасым Қайсеновке арналған мурал жасалды. Іс-шараға Қасым Қайсенов атындағы 27943 әскери бөлімінің әскери қызметшілері белсенді қатысты.– Мұндай іс-шаралар жастардың жауынгерлік рухын көтеруде маңызды рөл атқарады. Батырлар аллеясы – өткеннің көрінісі ғана емес, тарихымызға деген құрметтің белгісі, – деп атап өтті 27943 әскери бөлімінің командирі полковник Азамат Әбікенов.Мерекеге Халық қаһарманы Қ. Қайсеновтың ұлы Болат Қайсеновтың қатысуы кент тұрғындары үшін маңызды оқиға болды.– Бүгінгі күн біз үшін өте маңызды. Әкемнің туған жерінде мурал мен оның есімімен аталатын жаңартылған аллеяның ашылуына қатысу үлкен мәртебе. Бұл жастарды патриотизм рухында тәрбиелеу сабағы, – деді Б. Қайсенов.Салтанатты рәсімге қатысушылар қаза тапқан жауынгерлерді бір минут үнсіздікпен еске алып, батырлар ескерткішіне гүл шоқтарын қойды.Шығыс Қазақстан облысының Ұлан ауданынан есімі ел шежіресіне алтын әріптермен жазылған 9 Кеңес Одағының Батыры және 1 Халық қаһарманы шыққан. Олардың арасында аты аңызға айналған партизан-жазушы Қасым Қайсенов ерекше орын алады.Ақпарат көзі : https://www.gov.kz/memleket/entities/mod/press/news/details/992435?lang=kk

Беларусь Республикасы Қарулы күштері Орталық офицерлер үйінде Қазақстан мен Беларусь қорғаныс ведомстволары өкілдерінің жұмыс кездесуі өтті.Қазақстан Қорғаныс министрінің орынбасары генерал-майор Шайх-Хасан Жазықбаев Қорғаныс министрінің Қарулы күштердегі идеологиялық жұмыс жөніндегі көмекшісі – Беларусь Қорғаныс министрлігі идеологиялық жұмыс бас басқармасының бастығы генерал-майор Леонид Касинскиймен келіссөздер жүргізді.Тараптар ақпараттық және әскери-патриоттық тәрбие саласындағы ынтымақтастықты ұйымдастыру мәселелерін талқылады. Шайх-Хасан Жазықбаев пен Леонид Касинский екіжақты өзара іс-қимылды дамытуға өзара қызығушылық білдіре отырып, жетекшілік ететін салада тәжірибе алмасуға бағытталған бірқатар бірлескен іс-шараларды белгіледі.Ақпарат көзі : https://www.gov.kz/memleket/entities/mod/press/news/details/992441?lang=kk

Желтоқсан айының басында Қарулы күштердің барлық әскери бөлімдері дабыл бойынша жоғары жауынгерлік әзірлік деңгейіне келтірілетін болады. Бұл жаңа оқу жылының басталуына байланысты. Әріқарай әскери бөлімдер оқу полигондары мен оқу-жаттығу орталықтарына жөнелтіледі. Кейбір әскери бөлімшелер кешенді сабақтар өтетін орынға әуе,темір жол және  автомобиль көлігімен шоғырланады. Осы кезеңде қауіпсіздік мақсатында өңірлердегі жолдардың жекелеген учаскелерінде жол қозғалысы уақытша шектелуі мүмкін. Осыған байланысты азаматтардан және Бұқаралық ақпарат құралдарының өкілдерінен жалған хабарламалар таратпауды және ресми ақпарат көздеріне ғана сенуді сұраймыз.Ақпарат көзі : https://www.gov.kz/memleket/entities/mod/press/news/details/1115608?lang=kk

2025 жылғы 1 мамырдағы жағдай бойынша 2024 жылдың 1 ақпанынан бастап "БЖЗҚ" АҚ (бұдан әрі – БЖЗҚ, Қор) 11,49 млн аса АҚШ долларына 97 615 өтініш орындады (өтініш берушілердің банктік шоттарына аудару үшін уәкілетті операторларға аударылды). Оның ішінде тұрғын үй жағдайларын жақсарту мақсатында 6,70 млн астам АҚШ долларына 56 937 өтініш, білім алу ақысын төлеу үшін шамамен 4,79 млн АҚШ долларына 40 678 өтініш орындалды. Естеріңізге сала кетейік, нысаналы жинақтарды алушы барлық соманы немесе оның бір бөлігін пайдалануға құқылы, ақшаның пайдаланылмаған қалдығы нысаналы жинақтау шотында (НЖШ) қала береді. Тұрғын үй жағдайларын жақсарту аясында қазақстандықтар қаржыларын көбінесе мынадай мақсатта пайдаланды: одан әрі жинақтау үшін тұрғын үй құрылысы жинақтарындағы салымды толықтыру (6,55 млн жуық АҚШ долларына 55 539 өтініш орындалды), тұрғын үй сатып алуға ипотекалық тұрғын үй қарызын алу үшін бастапқы жарнаны енгізу – шамамен 49,94 мың АҚШ долларына 442 өтініш, азаматтық-құқықтық мәмілелер бойынша меншікке тұрғын үй сатып алу (түпкілікті есеп айырысу) – 38,57 мыңнан аса АҚШ долларына 370 өтініш. Білім алу ақысын төлеу бойынша ең танымал қосалқы мақсаттар: Қазақстан Республикасының аумағында орналасқан білім ұйымдарының білім беру қызметтеріне үлестермен (әрбір академиялық кезең немесе оқу жылы үшін) немесе бір рет толық көлемде (бүкіл оқу мерзімі үшін) ақы төлеу (шамамен 4,24 млн АҚШ долларына 35 617 өтініш орындалды), білім алу үшін жинақтау салымы туралы шарт бойынша білім алу жинақтау салымын толықтыру (412,21 мыңнан аса АҚШ долларына 3 789 өтініш орындалды), шетелдік білім беру ұйымдарының оқыту қызметтеріне үлестермен (әрбір академиялық кезең немесе оқу жылы үшін) немесе толық көлемде біржолғы (бүкіл оқу мерзімі үшін) ақы төлеу (114,96 мыңнан аса АҚШ долларына 1 067 өтініш орындалды).           Нысаналы жинақтар төлемін тұрғын үй жағдайларын жақсарту және (немесе) білім алу ақысын төлеу мақсатында пайдалану бойынша уәкілетті операторлар мен өңірлер бөлінісіндегі толық ақпаратпен enpf.kz сайтында танысуға болады. Естеріңізге сала кетейік, "Ұлттық қор - балаларға" бағдарламасына сай Қазақстан Республикасы Ұлттық қорының инвестициялық кірісінің 50%-ы жылына бір рет 2006 жылы және одан кейін туған, Қазақстан Республикасының азаматы болып есептелетін балалар арасында бөлінеді. 2023 жылы барлық НЖ алушыларына 100,52 АҚШ доллары, 2024 жылы – 129,38 АҚШ доллары есептелгенін хабарлаймыз. 2006 жылы туған азаматтарды қоспағанда, 2023 жылы Ұлттық қордан алғашқы қаражат есептелген балаларға ағымдағы жылы 3,04 АҚШ доллары мөлшерінде инвестициялық кіріс есептелді. Нәтижесінде, 2006 жылы туған баланың нысаналы жинағы 100,52 АҚШ долларына тең болса, 2007 жылы туған баланың НЖШ-да 232,94  АҚШ доллары жинақталды. Кәмелетке толған азаматтар өздерінің НЖ туралы ақпаратты БЖЗҚ-ның немесе электрондық үкіметтің интернет-ресурстарындағы жеке кабинеті арқылы өз бетінше алуы тиіс, содан кейін уәкілетті операторға АҚШ долларында банктік шот ашып, тұрғын үй жағдайларын жақсарту және (немесе) білім алу ақысын төлеу үшін НЖ төлеміне онлайн-өтініш беру үшін жүгіне алады. kids.enpf.kz сайтында және БЖЗҚ/ЕНПФ YouTube-арнасында Бағдарламаның шарттарымен, қажетті нұсқаулықтармен танысып, өзіңізді қызықтыратын сұрақтарыңызға жауап ала аласыз. Сондай-ақ, «Ұлттық қор – балаларға» бағдарламасын іске асыру, бала кәмелетке толғанға дейін және одан кейінгі іс-қимыл алгоритмі туралы бейне нұсқаулықты БЖЗҚ/ЕНПФ YouTube-арнасында https://www.youtube.com/watch?v=a9L8N4Q28OM  сілтемесі бойынша көруге болады.  БЖЗҚ 2013 жылғы 22 тамызда «ГНПФ» ЖЗҚ» АҚ негізінде құрылды. БЖЗҚ құрылтайшысы және акционері – Қазақстан Республикасы Қаржы министрлігінің «Мемлекеттік мүлік және жекешелендіру комитеті» ММ арқылы Қазақстан Республикасының Үкіметі. БЖЗҚ зейнетақы активтерін сенімгерлікпен басқаруды Қазақстан Республикасының Ұлттық Банкі жүзеге асырады. Зейнетақы заңнамасына сәйкес БЖЗҚ міндетті зейнетақы жарналарын, жұмыс берушінің міндетті зейнетақы жарналарын, міндетті кәсіптік зейнетақы жарналарын, ерікті зейнетақы жарналарын тартуды, сондай-ақ "Қазақстан Республикасының екінші деңгейдегі банктерінде орналастырылған депозиттерге міндетті кепілдік беру туралы" Қазақстан Республикасының Заңына сәйкес депозиттерге міндетті кепілдік беруді жүзеге асыратын ұйым аударған кепілдік берілген депозит бойынша кепілдік берілген өтемнің талап етілмеген сомасы есебінен қалыптастырылған ерікті зейнетақы жарналарын есепке алып, оның есебін жүргізеді, зейнетақы төлемдерін жүзеге асыруды қамтамасыз етеді. Сондай-ақ Қор нысаналы активтер мен нысаналы талаптарды есепке алуды, нысаналы жинақтау шоттарына нысаналы жинақтарды (НЖ) есепке алу мен есептеуді, НЖ төлемдерін оларды алушының банк шоттарына есептеуді, "Ұлттық қор – балаларға" бағдарламасы шеңберінде Қазақстан Республикасының Үкіметі айқындаған тәртіппен НЖ қайтарымдарын есепке алуды жүзеге асырады (толығырақ www.enpf.kz сайтында). Ақпарат көзі : https://www.gov.kz/memleket/entities/abay/press/news/details/992303?lang=kk

Францияның фашистік оккупациядан азат етілуінің 80 жылдығына арналған салтанатты рәсім генерал Шарль де Голль ескерткішінің жанында өтті. Оған Қорғаныс министрінің бірінші орынбасары – ҚР Қарулы күштері Бас штабының бастығы генерал-лейтенант Сұлтан Қамалетдинов, Францияның Қазақстандағы Төтенше және Өкілетті Елшісі Сильван Гиоге, Қарулы күштердің ардагерлері мен «Жас сарбаз» әскери-патриоттық қозғалысының тәрбиеленушілері қатысты.Құрмет қарауылы ротасының сүйемелдеуімен генерал-лейтенант Сұлтан Қамалетдинов пен Елші Сильван Гиоге Француз қарсылығының символы болған генерал Шарль де Голль ескерткішіне гүл шоқтарын қойды.Митингте «Қарулы күштердің ардагерлері» РҚБ төрағасының орынбасары отставкадағы генерал-майор Марат Нағұманов Францияны азат етуге кеңес сарбаздары мен партизандарының қосқан үлесін ұмытпаудың маңыздылығын атап өтті.Екінші дүниежүзілік соғыс жауынгерлеріне құрметі үшін қазақстандық тарапқа шын жүректен алғыс білдірген француз Елшісі Сильван Гиоге туыстық қатынастары бар үш отбасы мүшелеріне естелік медаль табыстады.Ақпарат көзі : https://www.gov.kz/memleket/entities/mod/press/news/details/992066?lang=kk

Жамбыл облысында Ұлы Жеңістің 80 жылдығы қарсаңында Тараз гарнизоны әскери бөлімшелерінің әскери қызметшілері ардагерлер үшін "үй жағдайындағы" ерекше парад ұйымдастырды.Бұдан бірнеше жыл бұрын, ардагерлерге орталық алаңдарға бару қиындай бастағанда, Құрлық әскерлерінің "Оңтүстік" өңірлік қолбасшылығы олардың үйлерінің алдында шағын парадтар өткізуді бастаған болатын. Бұл дәстүр кейінгі жылдары тұрақты түрде жалғасын тауып келеді.Биыл бұл шара ауқымдырақ өтті. Оған "Оңтүстік" өңірлік қолбасшылығының бөлімшелерімен қатар, Әуе қорғанысы күштерінің, атап айтқанда, Ұшқышсыз ұшу аппараттары мамандарын даярлау оқу орталығының әскери қызметшілері, ҰҚК Шекара қызметі департаменті мен Ұлттық ұлан өкілдері де қатысты.Қазіргі таңда Жамбыл облысында бар болғаны бес майдангер тұрады. Олардың барлығы Тараз қаласында тұрып жатыр. Жастары ұлғайғандықтан, бұқаралық іс-шараларға қатыса алмайды. Дегенмен ұрпақтардың алғысы мен құрметі оларды назардан тыс қалдырмады. Әскери шеру ардагерлер тұратын аулаларда өтті.Ардагерлер аулаға шығып, салтанатты шеруді өз көздерімен тамашалады. Бұл оларға ерекше әсер етті."Оңтүстік" өңірлік қолбасшылығы әскерлерінің қолбасшысы генерал-майор Ержан Ибраев майдангерлерді арнайы келіп құттықтады. Ол елордадағы парадқа қатысып, түнде Таразға келіп жеткен.– Біз батырларымыз өздерін қамқорлықта сезінуі үшін қолдан келгеннің бәрін жасауымыз керек", – деді қолбасшы.Қорғаныс министрінің атынан әр ардагерге естелік сыйлық пен құттықтау хаты табыс етілді. Сондай-ақ Тараз гарнизонындағы әскери бөлім командирлері де ардагерлерді құттықтады.Ардагерлерге облыстық және қалалық әкімдік өкілдері, мектеп оқушылары, "Жас сарбаз" әскери-патриоттық қозғалысының тәрбиеленушілері де келіп, гүлдер мен сыйлықтарын табыстады.Ақпарат көзі : https://www.gov.kz/memleket/entities/mod/press/news/details/991881?lang=kk

Мәскеу, 2025 жылғы 5-7 мамыр – Каспий теңізі мәселелері жөніндегі Жоғары деңгейдегі жұмыс тобының оныншы отырысы өтті (ЖДЖТ).Келіссөздерге Әзербайжан Республикасының (жетекшісі – Самир Шарифов), Иран Ислам Республикасының (жетекшісі – Алиреза Джахангири), Қазақстан Республикасының (жетекшісі – Зульфия Аманжолова), Ресей Федерациясының (жетекшісі – Михаил Петраков) және Түрікменстанның (жетекшісі – Мурат Атаджанов) делегациялары қатысты. Отырысқа Ресей делегациясының басшысы М.Петраков төрағалық етті.Тараптар Каспий теңізінде бастапқы тік сызықтарды белгілеу әдістемесін талқылауды жалғастырды. Отырыс аясында тараптар Каспий теңізіндегі ынтымақтастыққа шолу жасап, сыртқы істер министрлерінің кезекті кездесуіне дайындық мәселелерін қарастырды.Делегациялар Ресей Федерациясына кездесуді ұйымдастырудың жоғары деңгейі үшін ризашылықтарын білдірді.ЖДЖТ келесі отырысы Түрікменстанда дипломатиялық арналар арқылы келісілген мерзімде өтеді. Ақпарат көзі : https://www.gov.kz/memleket/entities/mfa/press/news/details/991755?lang=kk

9 Мамыр — Ұлы Отан соғысындағы Жеңіс күні қарсаңында Қостанай облысының әкімі Құмар Ақсақалов ардагер Қасымхан Алдабергеновтің үйіне барып, арнайы құттықтады.Кездесу барысында өңір басшысы құрметті ардагерді келе жатқан мерекемен шын жүректен құттықтап, көрсеткен ерлігі үшін терең ризашылығын білдірді. Қазақстан Республикасының Президенті атынан құттықтау хатын оқып беріп, мерейтойлық медаль табыстады.— Сіз – халқымыздың тірі шежіресісіз. Ерлігіңіз ұрпаққа шабыт береді әрі бейбіт өмір мен еркіндіктің қаншалықты қымбат екенін еске салады. Соғыстан кейін Сіз мәдениет, білім және әдебиет салаларының дамуына үлкен үлес қостыңыз. Сіздің өмір жолыңыз – Отанға адал қызмет етудің жарқын үлгісі, – деді Құмар Ақсақалов.Қасымхан Алдабергенов соғыс жылдарында майдан даласында жауға қарсы шайқасып, елге Жеңіспен оралды. Бейбіт өмірде ол гуманитарлық салада белсенді еңбек етіп, жастарды шығармашылық, поэзия және қоғамдық жұмыс арқылы тәрбиеледі. Оның есімі Қостанай облысында ғана емес, еліміздің өзге өңірлерінде де кеңінен танымал.Кездесу соңында облыс әкімі ардагерге көрсеткен ерлігі үшін алғысын білдіріп, мықты денсаулық, ұзақ öмір тіледі. Сондай-ақ жас ұрпақ аға буынның ерлігі мен үлгісін ұмытпай, әрдайым қастерлейтініне сенім білдірді.Қостанай облысында Жеңіс күні аясында Ұлы Отан соғысы ардагерлеріне Мемлекет басшысының атынан құттықтау хаттар мен мерейтойлық медальдар табыстау жалғасуда.Ақпарат көзі : https://www.gov.kz/memleket/entities/kostanay/press/news/details/991712?lang=kk

Қостанай облысында энергиямен қамту жүйесін дамыту стратегиялық маңызға ие. Дәстүрлі энергия көздерімен қатар, жаңартылатын энергия көздеріне (ЖЭК) – жел, күн және газ энергиясына да ерекше көңіл бөлінуде.Соңғы жылдары өңірде бірқатар ірі жобалар сәтті іске асырылды. Мысалы, 2022 жылы Қостанай ауданында қуаты 50 МВт болатын «Жел Электрик» компаниясының жел электр станциясы іске қосылды. 2023 жылы Арқалық қаласында қуаты 48 МВт болатын тағы бір жел станциясы – «KazWindEnergy» жобасы жұмысын бастады.Алдағы екі жылда тағы алты ЖЭК нысанын салу жоспарланған. Бейімбет Майлин ауданында қуаты 22,6 МВт болатын күн электр станциясының құрылысы басталады. Жобаның инвесторы – «Altyn Solar Energy» ЖШС жобалауды аяқтап, сараптама қорытындысын алды. Құрылыс мамыр айында басталып, 2026 жылдың алғашқы тоқсанында аяқталады деп жоспарлануда.Осы ауданда «ГПЭС «Варваринское» компаниясы қуаты 40 МВт болатын газ-поршеньді станция салатын болады. Бұл нысан 2026 жылдың екінші тоқсанында пайдалануға беріледі деп күтілуде.Арқалықта «Aspan Energo» компаниясы қуаты 50 МВт болатын жаңа жел электр станциясының құрылысын бастады. Бұл нысан 2026 жылғы 1 маусымда пайдалануға беріледі.Қостанай ауданында да екі ірі жоба қолға алынған. «Mars Wind» және «Jupiter Wind» компаниялары жалпы қуаты 100 МВт болатын екі жел станциясының құрылысын бастап кетті. Бұл нысандар 2026 жылдың соңында іске қосылады.Сонымен қатар, осы ауданда жалпы қуаты 1 ГВт болатын, 165 жел генераторынан тұратын ірі жел паркін салу жоспарланған. Жобаны жүзеге асыру бойынша тендерде жеңімпаз – «TuranWindEnergy» компаниясы.Барлық жобалар толық іске асқанда, өңірдегі ЖЭК-тен өндірілетін электр қуаты 10 есе артады – қазіргі 0,12 ГВт-тан 1,27 ГВт-қа дейін. Бұл Қостанай облысының энергетикалық дербестігін нығайтады, энергияны жеткізу кезіндегі шығындарды азайтады және жаңа жұмыс орындарын ашады.Ақпарат көзі : https://www.gov.kz/memleket/entities/kostanay/press/news/details/991610?lang=kk