2024 жылы Қазақстанда электр энергиясын өндірудің жалпы көлеміндегі жаңартылатын энергия көздерінің (ЖЭК) үлесі 6,4% - ды (7,58 млрд кВтсағ) құрады. Жалпы қуаты 163 МВт болатын 8 жаңа жоба пайдалануға берілді.ҚР Энергетика министрі Алмасадам Сәтқалиевтің айтуы бойынша 2025 жылы жалпы қуаты 455,5 МВт болатын тағы 9 ЖЭК жобасын пайдалануға беру жоспарланып отыр. Бұл елдің энергия теңгеріміндегі «жасыл» энергияның үлесін едәуір арттыруға және көміртегі ізін азайтуға мүмкіндік береді.Ақпарат көзі : https://www.gov.kz/memleket/entities/energo/press/news/details/946347

Almaty Tourism Bureau Mastercard-пен бірлесіп, қалаға келетін саяхатшының жүріп өткен жолын егжей-тегжей талдап, Алматыдағы турист ағынына зерттеу жүргізді. Талдау саяхаттың негізгі кезеңдерін қамтиды – жоспарлау, брондау, орналасу мен демалыс.Tourism Insights (Mastercard) деректеріне сәйкес, Алматы Орталық Азия бойынша туристік іздеу сұраныстарының 29,7%-ын иеленіп, Қазақстанның басты туристік орталығы болып қала береді, бұл алдыңғы көрсеткіштен 2 пайыз жоғары. Өсімді әуе рейстерінің көбеюінен байқауға болады: Алматыға рейстер саны дәстүрлі әуе компанияларында (+24,7%) және лоукостерлерде (+44,5%) артты. Қайта келушілердің үлесі 78,6%-ға өсіп, 25%-ға жетті, ал әсіресе ірі шаралардың алдында билеттерді ертерек, 40 күн бұрын іздеу уақыты 24%-ға артты.Алматыға рейс брондайтын жолаушылар саны 1,5 есе өсе, бұл қолжетімді рейстердің көбеюімен байланысты. Алдыңғы қатардағы 10 елдің ішінде Қытай ерекше көзге түседі – 2024 жылдың бірінші жартыжылдығында бұл елден брондаулар саны 6 есеге артып, 25,2 мың билетке жетті. Ең көп брондау Түркиядан жасалған, бұл Қазақстанмен іскерлік байланыстардың тығыздығына қатысты.Алматыға келетін туристер белсенді демалысты жөн көреді: 54% табиғат аясындағы турлар мен экскурсияларды, 44% джип-турларды таңдайды. Гастрономия, шопинг және ойын-сауық жоғары бағаланып жүр, 70%-ы оң пікір білдірген. Отбасылық туризмге қатысты жағымды пікірлер үлесі 12 пайызға өсті. Іскерлік шығындар белсенділік, инвестициялар және халықаралық форумдардың көбеюіне байланысты үш есеге артты.Almaty Tourism Bureau Алматының туристік хабқа айналу жоспары осылайша жүзеге асып жатқанын атап өтті. Қаланың әуежайы арқылы транзит жолаушылар санының артуы оның халықаралық бағыттардағы рөлінің өсіп келе жатқанын дәлелдейді. Зерттеу Алматы демалыс пен іскерлік сапарлар үшін танымал бағыт болып қала беретінін, ал қаланың туристік секторы қарқынды дамып жатқанын көрсетті.Толық есеп мына сілтемеде.Ақпарат көзі : https://www.gov.kz/memleket/entities/almaty/press/news/details/946425

Астана қаласының №49 мектеп-гимназиясының 8-сынып оқушысы Сұлтан Ибраһим ерекше және инновациялық жоба ұсынып, ғылыми шығармашылығы мен техникаға деген қызығушылығын тағы бір рет дәлелдеді. Ол ұялы телефонды күн сәулесімен қуаттайтын құрылғы ойлап тапты, деп хабарлайды елорда әкімдігінің ресми сайты.Жобаның мақсаты – экологияны сақтау және энергетикалық ресурстарды үнемдеу. Сұлтанның бұл құрылғысы күн энергиясын электр энергиясына айналдырып, ұялы телефондарды қуаттауға мүмкіндік береді. Құрылғының жұмысы күн сәулесін сіңіріп, арнайы панель арқылы электр энергиясын түрлендіреді, бұл энергия ұялы телефонды зарядтауға жеткілікті болады.Сұлтан Ибраһимнің бұл бастамасы тек ғылыми жетістік қана емес, сонымен қатар экологиялық таза технологияның дамуына бағытталған маңызды қадам болып саналады. Қазіргі уақытта күн энергиясы – әлемдегі ең таза және жаңартылатын энергия көздерінің бірі. Сондықтан да мұндай құрылғылар экологиялық мәселелерді шешуге және энергия тұтынудың тиімді әдістерін дамытуға ықпал етеді.Ақпарат көзі : https://www.gov.kz/memleket/entities/astana/press/news/details/945887

Астанадағы №93 мектеп-лицейінде әлеуметтік жас педагогтарға арналған семинар-практикум өтті, деп хабарлады елорда әкімдігінің ресми сайты.Оған 50-ге жуық жас әлеуметтік педагог пен аттестациядан өтетін педагог қатысты.«Іс-шара барысында осы салада көпжылдық тәжірибесі бар мамандар психологиялық қолдау орталығының бағыттары мен міндеттері, дағдарыс жағдайларында балаларды психологиялық-педагогикалық сүйемелдеу, білім алушылардың әлеуметтік жағдайын тексеру қағазының толтырылуы, әлеуметтік педагогтерді аттестаттау жайлы айтылады, сондай-ақ нақты кейстермен жұмыс жүргізіледі. Одан бөлек қазір оқушылар арасында кездесетін проблемаларды талқылаймыз», - деді Астана қаласы әкімдігінің Психологиялық қолдау орталығының әдіскері Гүлдана Бекетаева.Семинардың мақсаты – жас маманның кәсіби өсуі мен дамуына ықпал ету және әдістемелік қолдау көрсету. Сонымен қоса педагогтердің кәсіби біліктілігін арттыру, әлеуметтік-педагогикалық қызметтің өзекті мәселелерін талқылау.Жиынға қатысушылар спикерлерге сауалдарын қойып, жауаптарын алды.Ақпарат көзі : https://www.gov.kz/memleket/entities/astana/press/news/details/945976

Қазақстанда жер қойнауын пайдалану саласында 345 келісімшарт қолданылады. 2024 жылы өткізілген аукциондардың қорытындысы бойынша геологиялық барлауға салынған инвестицияның жалпы көлемі $72,5 млн құрайтын 14 жер қойнауы учаскесі сатылды. 2024 жылы жер қойнауын пайдаланушылардың сатып алуларындағы қазақстандық қамту үлесі 61,9% - ды (3,8 трлн теңге) құрады.Энергетика министрі Алмасадам Сәтқалиев хабарлағандай, 2025 жылы жер қойнауын пайдаланушылардың сатып алуларындағы қазақстандық қамту үлесін 62% - ға дейін ұлғайту, сондай-ақ мұнай-газ саласындағы 10 жаңа өндірісті оқшаулау, кемінде екі электрондық аукцион өткізу және “Жер қойнауы туралы» кодекске түзетулер енгізу жоспарланып отыр.Келісімшарттарды тексеру жалғасып жатыр: 2022 – 2024 жж. үшін 52 келісімшарт бұзылды, 14 млрд теңгеге бұзушылықтар туралы 141 хабарлама жіберілді, шамамен 11,3 млрд теңге өтелді.Ақпарат көзі : https://www.gov.kz/memleket/entities/energo/press/news/details/946273

  2025 жылғы 26 ақпанда Астана қаласы ТЖД «Құтқарушы» спорт кешенінде ҚР ТЖМ «Астана-2025» өрт сөндіру-құтқару спорты бойынша ерлер арасындағы ХХХІІI, әйелдер арасындағы ХI, жасөспірім ұлдар арасындағы Х қысқы чемпионаттарының ашылуы өтті. Жеңіске жету мақсатында Қазақстанның түкпір-түкпірінен 400-ден астам спортшы келді.  Салтанатты түрде қатысушыларды Қазақстан Республикасы Төтенше жағдайлар вице-министрі Рамиль Камалов, «Қазақстандық өрт сөндірушілер мен құтқарушылардың спорттық федерациясы» ҚБ атқарушы директоры Дәурен Данаев, Астана қаласы ТЖД басшылығы және спорт ардагерлері құттықтады. Ашылу салтанаты нағыз мерекелік атмосфераны қалыптастырды. Қатысушылар бұл шараның маңыздылығын атап өтіп, барлық қатысушыларға сәттілік тіледі.  «Бұл спорттық іс-шара ғана емес, сонымен қатар біздің өрт сөндірушілер мен құтқарушыларымыздың батылдығы, рухы мен кәсібилігінің көрінісі. Жыл сайын өрт-құтқару спортын дамытуда жаңа көкжиектер ашылуда. Біздің спортшылар үшін жарыстар жетілдіру жолындағы маңызды кезеңге айналуда. Болашақ жеңімпаздар шеберліктің жоғары деңгейін көрсетеді және осы қиындықтарға толы, бірақ игі мамандықты таңдағандардың барлығына үлгі болады», - деп вице-министр Рамиль Камалов атап өтті.  Бірінші күні спортшылар оқу мұнарасының 2, 3, 4 қабатына шабуыл сатысымен көтерілуде жарысады.  Бұл өрт сөндіру-құтқару спортының ең керемет түрлерінің бірі және үнемі жоғары бәсекелестікте өтеді. Әр спортшы мәре сызығында қымбат миллисекундтар үшін күреседі. Ертең жарыс жүз метрлік кедергілері бар жолақты өту бойынша жалғасады.Ақпарат көзі : https://www.gov.kz/memleket/entities/emer/press/news/details/946139

    ADAM компаниялар тобы 2024 жылы "SU BEREKE" брендімен айналмалы типтегі алғашқы отандық спринклер өндірісін іске қосты. Жоба суару мәселесін және қол жетімді техниканың жетіспеушілігін шешуге бағытталған: жаңбырлатқыштар суды егістіктерге біркелкі таратуға мүмкіндік береді, оның шығынын 30-40% - ға азайтады.2024 жылы СТ-KZ сертификаты және ЕАЭО сәйкестік сертификаты алынды. 30 машина шығарылды, оның 7-і Шығыс Қазақстан облысының егістіктерінде жиналды.       Биыл ADAM компаниясы машиналардың жаппай өндірісін жолға қоюды жоспарлап отыр. Бірінші тоқсанда Шығыс Қазақстан облысының аумағында "SU BEREKE" маркалы жаңбырлату машиналарын шығаратын екінші зауыт іске қосылады.       Жаңа зауыттың өндірістік қуаты жылына 1000 шашыратқыш машинаны құрайды.           Осылайша, бұл жоба шетелдік техника өндірушілеріне тәуелділікті азайтуға мүмкіндік береді, кепілдік және сервистік қызмет көрсету қарастырылған.         Өнімдер Орталық Азия мен ТМД нарықтарына да бағдарланатын болады.Ақпарат көзі : https://www.gov.kz/memleket/entities/moa/press/news/details/945996

Денсаулық сақтау министрлігі Қазақстандағы фармацевтикалық компаниялардың қызметін реттейтін нормативтік құқықтық актілерге өзгерістер енгізуде.Ұсынылып отырған шаралар инвестициялық ахуалды жақсартуға, саланы дамытуға және экспорттық әлеуеті бар сапалы отандық фармацевтикалық өнім шығаруға бағытталған.Жаңа тәсілдер Қазақстан Республикасы Үкіметінің шешімі бойынша инвестициялар туралы келісімдерге қол қою арқылы фармакомпанияларға преференцияларды кеңейтуді көздейді. Бұл ретте шарттар жасасу мерзімі шығарылатын дәрілік заттардың сапасына және өндірісті оқшаулау деңгейіне қарай айқындалатын болады.Экспорттық әлеуетті дамыту бойынша қарсы міндеттемелерді белгілеу, оның ішінде, ел ішінде дәрілік заттардың бағасын тежеуге ықпал етуі тиіс.Жаңа инвестициялық жобалар клиникалық және зертханалық базаларды жан-жақты нығайтуды көздейтін жол картасын іске асырудың есебінен мемлекеттік қолдаудың қосымша шараларымен сүйемелденетін болады.Тиісті өндірістік практиканың стандарттары бойынша шығарылатын фармацевтикалық өнім тегін медициналық көмектің кепілдік берілген көлемі шеңберінде халыққа қолжетімді болады.Ақпарат көзі : https://www.gov.kz/memleket/entities/dsm/press/news/details/945829

Түркістан облысының ардагерлеріне Жеңістің 80 жылдығына орай әкімдік тарапынан 5 млн теңге көлемінде біржолғы материал­дық көмек беріледі. Өңірде Екінші дүниежүзілік соғысының 9 ардагері тұрады. Екінші дүниежүзілік соғысы ардагерлеріне теңестірілген азаматтарға санаттары бойынша 50 мың теңгеден 120 мың теңгеге дейін біржолғы қаржылай көмек көрсету жоспарланып отыр. Сондай-ақ еліміздің «Ардагерлер туралы» заңына сәйкес әлеуметтік қолдау шаралары көрсетіледі.Түркістан облысының әкімі Нұралхан Көшеровтің төрағалығымен өткен аппараттың апталық мәжілісінде Жеңістің 80 жылдығын атап өту бойынша іс-шара жоспары кеңінен талқыланып, атқарылатын жұмыстар пысықталды.Облыстық жұмыспен қамтуды үйлестіру және әлеуметтік бағдарламалар басқармасының басшысы Асия Темірбаеваның баяндауынша, іс-шаралар жоспары тек мерекелік күндерді ғана емес, жыл бойы орындалуы қамтылған. Бүгінгі таңда Түркістан облысында Ұлы Отан соғысына қатысушылар мен оларға теңестірілгендер саны 3 305 адам. Оның ішінде, ҰОС ардагерлері – 9. Олар Жетісай, Ордабасы, Отырар, Сарам, Сарыағаш, Созақ, Қазығұрт аудандары мен Кентау, Түркістан қалаларында тұрады. ҰОС қатысушыларына теңестірілгендер саны 227 болса, тыл еңбеккерлері – 3 069. Түркістан облысында ҰОС Жеңістің 80 жылдығына орай 3 305 адамға біржолғы ақшалай әлеуметтік көмек көрсету үшін аудан, қала бюджеттері есебінен 242,0 млн.теңге қаржы қаралды.Одан бөлек, «Ұлы Отан соғысындағы Жеңіске 80 жыл» мерейтойлық медалімен марапатталатын адамдардың тізімі жасалуда. Ұлы Отан соғысы ардагерлері мен оған теңестірілген азаматтардың әлеуметтік жағдайын анықтау мақсатында аудан, қала әкімдіктері арқылы әлеуметтік картасы жасақталды. Олардың денсаулығы мен тұрмыстық жағдайы сараланды. Сауықтыру шараларын жүргізу мақсатында соғыс ардагерлеріне жасақталған әлеуметтік картаның нәтижесінде денсаулық сақтау саласы тарапынан жыл басынан 500-ге жуық ардагерге медициналық қызмет көрсетілді. Бұл қызмет жыл бойы көрсетілетін болады. Сонымен қатар «Ардагерлер үйі» мен «Мейір» ардагерлер үйі» арқылы айына 400-ге жуық, жылына 7 800 егде жастағы адамдарға сауықтыру қызметтері көрсетіліп келеді.Жиында Облыстық қоғамдық даму басқармасының басшысы Ерлан Күзембаев іс-шара жоспары туралы баяндады. Жеңістің 80 жылдығы аясында облыста ауқымды іс-шаралар өткізу көзделіп отыр. Атап айтқанда, батырлардың есімдерін насихаттау мақсатында түрлі конкурстар, экскурсиялар, ғылыми-практикалық конференциялар, «Жас Ұлан» әскери-спорттық ойындары, бұқаралық спорттық шаралар, әскерлердің шеруі өткізіліп, мерекелік концерттер, тақырыптық кино кештері, архив құжаттары топтамасынан көрме, кездесулер ұйымдастыру жоспарлануда.«Саламатты Қазақстан» мамандандырылған пойызын іске қосу аясында ҰОС қатысушылары, тыл еңбеккерлері және шалғайдағы стансалардың тұрғындарына негізгі медициналық білікті мамандар тарапынан тегін емдеу шаралары ұйымдастыралуда.Жиын барысында 109 бірыңғай байланыс орталығының жұмысы сараланды. Нұралхан Көшеров жауапты тұлғаларға халық ұсынысына құлақ аса отырып, инфрақұрылым жүйелерін жетілдіруді, абаттандыру жұмыстарын сапалы атқаруды тапсырды. Облыстық цифрландыру, мемлекеттік қызметтер көрсету және архивтер басқармасының басшысы Марат Айнабеков байланыс орталығында атқарылған жұмыстар туралы есеп беріп, алдағы жоспарларды баяндады. Оның айтуынша, Мемлекет басшысы Қасым-Жомарт Тоқаевтың «Халық үніне құлақ асатын мемлекет» тұжырымдамасын іске асыру мақсатында Түркістан облысында 109 бірыңғай байланыс орталығы тәулік бойы тұрғындардан түсетін қоңыраулардықабылдайды.Байланыс орталығына жыл басынан бері 11358 қоңырау түсіп, қаңтар айы бойынша көрсеткіш 15%-ға артты. Олардың 71,4%-ы кеңес беру, 28,5%-ы оқиға ретінде тіркелген. Сонымен қатар көтерілетін мәселелердің басым бөлігі электрмен жабдықтау, сумен қамтамасыз ету, ветеринарлық қызмет, көшені жарықтандыру, тұрмыстық қалдықтарға қатысты. Ал, өткен жылы 130 224 қоңырау тіркеліп, халықпен кері байланыс орнатылған. Сонымен қатар 109 желісінің жұмысына жасанды интеллект мүмкіндіктерін (AI) қолдану жоспары таныстырылды. Бұл өз кезегінде өтініштердің сапалы орындалуын арттырадыжәне мәселелердің тез әрі тиімді шешілуіне ықпал етпек.Түркістан облысы әкімінің баспасөз қызметіАқпарат көзі : https://www.gov.kz/memleket/entities/ontustik/press/news/details/944815

Түркістан облысы, Қазығұрт ауданының тумасы, Мірсәбит Арман Румыния мемлекетінің Брэила қаласында өткен «DRACULLA OPEN» жасөспірімдер арасындағы халықаралық турнирде Греция, Молдова, Румыния мемлекеттерінің боксшыларымен жұдырықтасып, жүлделі 1 орынды иеленді.Бокстан Қазақстан Республикасының 6 дүркін чемпионы Мірсәбит Арман Қазығұрт ауданындағы «№11 колледж» МКҚК-ның «Басқаруды құжаттамалық қамтамасыз ету және мұрағаттану» мамандығының І-курс студенті. Ол тек Қазығұрт ауданының ғана емес, бүкіл Қазақстанның намысын қорғап жүрген талантты спортшылардың бірі. Румыниядағы «DRACULLA OPEN» турнирінде жеңіске жетуі оның үздіксіз еңбегінің нәтижесі. Жас спортшыға болашақта үлкен жетістіктер мен жеңістер тілейміз!Түркістан облысы әкімінің баспасөз қызметіАқпарат көзі : https://www.gov.kz/memleket/entities/ontustik/press/news/details/944993

«Central Asia FIRST Championship/Almaty Tech Cup 2025» конкурсының Орталық Азия кезеңінің Алматы қаласында өткен чемпионатында Түркістан облысының намысын қорғаған Қазығұрт ауданының First Lego League Challenge (10-16) және First Lego League Explore (6-10) санаттары бойынша «QAZYGURT», «ROB», «QARSYBAEV» құрамалары қатысты.Жарысқа Қазақстаннан бөлек, Үндістан, Түрікменстан, Өзбекстан, Қырғызстан, Моңғолия, Түркия, БАӘ, Гонконг және тағы басқа елдерден 3500 оқушы қатысты. Нәтижесінде, «QAZYGURT» құрамасы инновациялық жобадан І орын, жалпы командалық есеп бойынша ІІІ орынды иеленіп, Грекия мемлекетінде өтетін әлемдік чемпионатқа жолдама ұтып алды.«QAZYGURT» құрамасы алда өтетін әлемдік чемпионатта ел намысын қорғайды.Түркістан облысы әкімінің баспасөз қызметіАқпарат көзі : https://www.gov.kz/memleket/entities/ontustik/press/news/details/945013

Түркістанда кәмелеттік жасқа толмаған жасөспірімдер арасындағы қылмыс, ерте жүктілік пен құқық бұзушылықтың алдын алу және білім саласындағы өзекті мәселелер талқыланған мәжіліс өтті. Жиынға облыстық басқарма басшылары мен онлайн байланыс арқылы аудан-қала әкімдерінің орынбасарлары қатысты. Мәжіліске төрағалық еткен облыс әкімінің орынбасары Бейсенбай Тәжібаев жауапты сала басшыларына нақты тапсырмалар берді.– Облыс әкімі Нұралхан Көшеровтің тапсырмасына сәйкес, Түркістан облысында білім саласын дамыту бағытында жұмыстар жалғасып жатыр. Білім сапасын жақсарту, саладағы кемшіліктерді жою бағытындағыжұмыстарды жалғастырамыз. Аудан, қала әкімдігінің жауапты өкілдері өңірдегі ерте жүктілік, жасөспірімдер арасындағы суицид пен қылмыс дерегін азайту бағытында жұмыстарды жүйелеп, нақты жоспармен іс атқаруы керек. Сондай-ақ балалар лагерін жаңғырту, балаларға психологиялық көмек көрсету бағытында жүйелі жұмыс істелуі тиіс. Осы бағытта балалар жасанды интелект арқылы психологиялық кеңеc ала алады. Жобамен барлықтарыңыз танысып, нақты ұсыныстар беріліп, жұмыстар атқарылсын. Осы саладағы жұмыстар қатаң бақылауда болады, – деген облыс әкімінің орынбасары Бейсенбай Дәулетұлы тиісті жұмысты уақтылы атқару керектігін жеткізді.Түркістан облыстық білім басқармасы басшысының орынбасары Айгүл Қасымбекова тәрбие саласындағы өзекті мәселелерді баяндап, алдағы уақытта атқарылатын жұмыстарды атап өтті. Ол кәмелетке толмағандардың арасында өзіне қол жұмсау фактілері статистикалық деректерге сәйкес, өткен жылмен салыстырғанда төмендегенін айтты.Осы жағдайларды алдын алу мақсатында Облыс әкімінің Қаулысымен Түркістан облысы білім басқармасының «Түркістан облысының психологиялық қолдау орталығы» коммуналдық мекемесі құрылды. Алдын алу жұмыстарын әрі қарай жандандыру үшін өткен жылы үкіметтік емес ұйымдарды тартуға қаржы қаралып, 2000-ға жуық тәрбие саласына жауапты маман біліктілігін арттырды. Бүгінгі таңда, Облыстық психологиялық қолдау орталығын қолдау және білім беру ұйымдарына антибуллингтік бағдарламаны енгізу мақсатында Жобалық кеңсе құрылды.Білім басқармасы басшысының орынбасары Жандос Нұрпейісов мектептерді жаңғырту жобасы аясында атқарылатын жұмыстар мен жоспарларды баяндады. Сонымен қатар жекеменшік орта білім беру ұйымдарына қаралған қаржыға тоқталды. Оның мәлімдеуінше, мектептерді жаңғырту жобасына облыстан 115 мектеп енгізілген. 2025-2027 жылдары 115 мектептің ғимараттарына күрделі және ағымдағы жөндеу жұмыстарын жүргізу және асхана, кітапхана, спорт зал, сынып бөлмелерін жабдықтау, қауіпсіздік жүйесімен, пән кабинеттерімен, жиһаздармен қамтамасыз ету жоспарлануда. 2025 жылға жоспарланған 41 мектептің ішінде ағымдағы жөндеумен 15 мектеп қамтылса, 26 мектеп күрделі жөндеуден өтеді.Одан бөлек жиналыста «Таза Қазақстан» бағдарламасы аясында іс-шараларды жүйелі ұйымдастыру талқыланып, аудан, қалалардағы мектептер мен денсаулық сақтау ғимарттарының ауласына тазалық жүргізу, ағаш көшеттерін отырғызу бағытындағы жұмыстарды күшейту қажеттілігі айтылды. Сонымен қоса, мектептердегі ескі көрнекіліктерді 1 ай мерзімде жаңғыртуды және «Жайлы мектеп» жобасы бойынша атқарылып жатқан жұмыстарды жандандыруды тапсырды.Түркістан облысы әкімінің баспасөз қызметіАқпарат көзі : https://www.gov.kz/memleket/entities/ontustik/press/news/details/945217

Түркістан қаласында биыл Оңтүстік Кореяның «Woosong» университетінің филиалының ашылуы жоспарланып отыр. Осыған орай, «Конгресс холл» көпсалалы кешенінде Қазақ-Корей халықаралық білім ордасының таныстырылымы өтті. Жиынға Түркістан облысы әкімінің орынбасары Бейсенбай Тәжібаев, «Woosong» университетінің өкілдері, ұстаздар, ата-аналар мен болашақ түлектер қатысты.Басқосуда алғысөз алған облыс әкімінің орынбасары жастарға сапалы халықаралық білім алуға үлкен мүмкіндік туып отырғанын тілге тиек етіп, түлектерді берілген мүмкіндікті тиімді пайдалануға шақырды.– Құрметті жиынға қатысушылар! Бүгін Оңтүстік Кореяның жетекші жоғары оқу орындарының бірі – «Вусонг» университеті филиалының Түркістан қаласында ашылуына орай, толық ақпарат беру үшін университет өкілдері алдарыңызға келіп отыр. Бұл бастама – Түркістанды білім мен ғылымның орталығына айналдыру жолындағы маңызды қадам, жастарымызға сапалы халықаралық білім алуға берілген тамаша мүмкіндік. Бұл унивеститеттің ашылуы – біздің өңірдегі білім беру саласының жаңа деңгейге көтерілуінің айқын дәлелі. Мұнда тек жоғары деңгейлі академиялық білім ғана емес, Оңтүстік Кореяның заманауи технологиялары мен тәжірибелік оқыту әдістері де ұсынылмақ. Сіздердің алдарыңызда үлкен мүмкіндіктер ашылып отыр. Аталған университетке министрлік және Түркістан облысы әкімдігі тарапынан гранттар бөлу мәселесі қазірден жоспарланып, қажетті шаралар қабылдануда. Біз, облыс басшылығы, жастарымыздың сапалы білім алып, өздерін жан-жақты дамытуына барлық жағдайды жасауға дайынбыз. Тек үздік білім ғана табысты болашақтың кепілі. Сіздерді осы мүмкіндікті тиімді пайдалануға шақырамын! – деді Бейсенбай Тәжібаев.Жиында Оңтүстік Кореяның Халықаралық істер департаментінің деканы Шим Хэк Чже бастаған «Woosong» университетінің өкілдері Корея елінің әлемдік деңгейдегі орнына тоқталып, университеттің тыныс-тіршілігін таныстырды. Қатысушылардың сұрағына жауап беріп, білім ордасы беретін мүмкіндіктер туралы ақпараттандырды.Президент Қасым-Жомарт Тоқаевтың ел аумағында танымал жоғары оқу орындарының филиалын ашу туралы тапсырмасы аясында облыста бірқатар жұмыстар атқарылуда. Түркістан қаласы «облыс орталығы» атанғаннан бері Халықаралық туризм және меймандостық университеті ашылды.Ақпараттық технологиялар саласының кадрларын даярлау мақсатында Түркістан қаласында IT университетін ашу бойынша Оңтүстік Кореяның «Вусонг» білім беру қорының өкілдерімен келіссөздер жүргізіліп, бүгінде Әкімшілік-іскерлік орталығында ғимараттың күрделі жөндеу жұмыстары атқарылуда. Бұл университет – білім мен ғылымның, мәдениет пен тәжірибенің тоғысатын жаңа орталығы болмақ. Студенттер әлемдік деңгейде білім алып қана қоймай, халықаралық тәжірибеден өтуге, еңбек нарығында сұранысқа ие маман атануға мүмкіндік алады. Одан бөлек, «қос диплом» бағдарламасымен білімін Корея елінде жалғастыру, сол елде жұмысқа орналасу мүмкіндігі қарастырылған.Бұл бастама ҚР Ғылым және жоғары білім министрлігінің тікелей атсалысуымен жүзеге асырылуда. Жақында халықаралық университет өкілдері ҚР Ғылым және жоғары білім министрі Нұрбек Саясатпен кездесіп, дайындықтарды пысықтамақ.Халықаралық университетте 4 факультет ашылады. Онда «Жасанды интеллект және үлкен ақпараттар талдауы», «Бағдарламалық қамтамасыз ету», «Әлемдік төртінші IT өнеркәсіптік революция», «Мультимедия және Web дизайн» мамандықтары бойынша 2340 студент білім алады деп жоспарлануда. Университеттің ашылуы 2025 жылдың күзіне жоспарлануда.Айта кетейік, Түркістан облысында жалпы 1088 мектепте 553 мыңнан астам оқушы білім алады. Биыл өңірде мектеп бітіруші түлектердің саны 33 мыңнан асады. Олардың 23 мыңға жуығы жоғары оқу орындарына түсуге ниетті. Өткен жылы еңбек нарығының қажеттіліктерін ескере отырып, Түркістан облысы әкімдігі тарапынан грант бөлінді. Нәтижесінде, Қ.А.Ясауи атындағы Халықаралық қазақ-түрік университетінде 12 мамандық бойынша 107 студент грант негізінде білім алуда.Түркістан облысы әкімінің баспасөз қызметіАқпарат көзі : https://www.gov.kz/memleket/entities/ontustik/press/news/details/945691

«БЖЗҚ» АҚ (БЖЗҚ, Қор) халықпен қарым-қатынас деңгейін жақсарту мақсатында заманауи технологиялар мен сандық шешімдерді көптеп енгізуде.  2025 жылдың қаңтар айында халыққа шамамен 10,6 млн қызмет көрсетілді. Жыл басынан бері көрсетілген қызметтердің жалпы санынан 2,3 млн астамы электрондық форматта, 8,1 млн. қызмет автоматты түрде көрсетілген. Осылайша, автоматты, электрондық және қашықтан көрсетілген қызметтердің үлесі жалпы көрсетілген қызметтер санының 99,1% тең болды. Күндізгі форматта шамамен 98,0 мың қызмет көрсетіліп, оның ішінде тікелей Қордың кеңселерінде 95,4 мың қызмет жүзеге асырылған.Естеріңізге сала кетейік, барлық зейнетақы шоттары БЖЗҚ-ға бірінші жарна түскен кезде автоматты түрде ашылады. Сондай-ақ, "Ұлттық қор ­— балаларға" бағдарламасының қатысушыларына нысаналы талаптар мен нысаналы жинақтар да автоматты түрде есептеледі.Есепті кезең ішінде шартты зейнетақы шоттарын (жұмыс берушінің ЖМЗЖ аударуы нәтижесінде ашылатын ШЗШ) және нысаналы жинақтау шоттарын ("Ұлттық қор ­— балаларға" бағдарламасы аясында ашылатын НЖШ) қоса алғанда, зейнетақы жарналарының барлық түрлері бойынша автоматты режимде ашылған жеке зейнетақы шоттарының (ЖЗШ) жалпы саны 404,5 жетті.  Жеке зейнетақы шотынан, шартты зейнетақы шотынан (ШЗШ), сондай-ақ нысаналы жинақтау шотынан (НЖШ) үзінді көшірме алу бұрынғысынша ең танымал қызмет санатында. Жыл басынан бері ЖЗШ, ШЗШ, НЖШ-дан шамамен 2,8 млн үзінді көшірме берілді. Оның 2,1 млн астамы - электрондық, ал 605,5 мыңнан астамы автоматты түрде рәсімделді.Салымшылардың (алушылардың) Қор сайтындағы және ұялы қосымшасындағы Жеке кабинеттен үзінді көшірме алудан басқа өз деректемелеріне өзгерістер мен толықтырулар енгізу, шотының бар екендігі туралы анықтама алу, 1 немесе 2 топтағы мүгедектіктің мерзімсіз уақытқа белгіленуіне байланысты немесе ерікті зейнетақы жарналары бойынша зейнетақы төлемдерін тағайындау туралы өтініш беру сияқты қызметтерді пайдалануға мүмкіндіктері бар. Сондай-ақ, зейнетақы жарналарын төлеу туралы өтініштің мәртебесін қадағалау, инвестициялық портфельді басқарушыға (ИПБ) жинақтардың бір бөлігін аудару, зейнетақы калькуляторының көмегімен болашақ зейнетақыны болжамды есептеу және т.б. қызметтер әлемнің кез-келген нүктесінде 24/7 режимінде қолжетімді.  2025 жылдың қаңтар айында деректемелерді өзгертуге 14,1 мыңнан астам өтініш қабылданып, оның 13,1 мыңы Қордың кеңселерінде ұсынылды. БЖЗҚ мамандарына қандай да бір қызмет түрі бойынша жүгіне отырып, салымшылар, әдетте, жинақтарды қалыптастыруға қатысты қосымша кеңестер ала алады. Ақпараттық-түсіндіру жұмыстары аясында 3,2 мың көшпелі таныстырылым өткізіліп, оған шамамен 68,4 мың адам қатысты. Бұқаралық ақпарат құралдарында БЖЗҚ хабарламалары бойынша 4,1 мыңнан астам материал жарияланды.Салымшылар мен алушылардың кері байланыс арналары бойынша түскен өтініштерінің саны шамамен 65,0 мың.Естеріңізге сала кетейік, кез келген компания Қор кеңсесіне барып жинақтаушы зейнетақы жүйесінің мәселелері бойынша таныстырылым мен кеңестер өткізуге өтінім бере алады. Ол үшін 1418 нөмірі бойынша байланыс орталығына қоңырау шалып, Қор сайты немесе ұялы қосымшасы арқылы хабарласу қажет.БЖЗҚ-ның кеңес беру қызметтерін мессенджерлер (+7 777 000 14 18 нөмірі бойынша WhatsАpp және Viber чат-боттары) арқылы, 1418 нөмірі бойынша байланыс орталығынан (Қазақстан бойынша қоңырау шалу тегін), enpf.kz корпоративтік сайтынан, сондай-ақ, Instagram, Facebook, ВКонтакте, X(Twitter), Telegram, Одноклассники сияқты әлеуметтік желілердегі БЖЗҚ-ның ресми парақшаларынан алуға болады.   БЖЗҚ 2013 жылғы 22 тамызда «ГНПФ» ЖЗҚ» АҚ негізінде құрылды. БЖЗҚ құрылтайшысы және акционері – Қазақстан Республикасы Қаржы министрлігінің «Мемлекеттік мүлік және жекешелендіру комитеті» ММ арқылы Қазақстан Республикасының Үкіметі. БЖЗҚ зейнетақы активтерін сенімгерлікпен басқаруды Қазақстан Республикасының Ұлттық Банкі жүзеге асырады. Зейнетақы заңнамасына сәйкес БЖЗҚ міндетті зейнетақы жарналарын, жұмыс берушінің міндетті зейнетақы жарналарын, міндетті кәсіптік зейнетақы жарналарын, ерікті зейнетақы жарналарын тартуды, сондай-ақ "Қазақстан Республикасының екінші деңгейдегі банктерінде орналастырылған депозиттерге міндетті кепілдік беру туралы" Қазақстан Республикасының Заңына сәйкес депозиттерге міндетті кепілдік беруді жүзеге асыратын ұйым аударған кепілдік берілген депозит бойынша кепілдік берілген өтемнің талап етілмеген сомасы есебінен қалыптастырылған ерікті зейнетақы жарналарын есепке алып, оның есебін жүргізеді, зейнетақы төлемдерін жүзеге асыруды қамтамасыз етеді. Сондай-ақ Қор нысаналы активтер мен нысаналы талаптарды есепке алуды, нысаналы жинақтау шоттарына нысаналы жинақтарды (НЖ) есепке алу мен есептеуді, НЖ төлемдерін оларды алушының банк шоттарына есептеуді, "Ұлттық қор – балаларға" бағдарламасы шеңберінде Қазақстан Республикасының Үкіметі айқындаған тәртіппен НЖ қайтарымдарын есепке алуды жүзеге асырады (толығырақ www.enpf.kz сайтында).  Ақпарат көзі : https://www.gov.kz/memleket/entities/abay/press/news/details/945763

2024 жылы қазақстандықтарға әлеуметтік-еңбек саласында проактивті форматта 1,5 млн-нан астам түрлі мемлекеттік қызметтер көрсетілді. Көрсетілген қызметтердің саны 2023 жылмен салыстырғанда 200 мыңға өсті.Проактивті формат белгілі бір өмірлік жағдай туындаған кезде қандай да бір қызмет көрсетудің өтінішсіз тәртібін көздейді. Барлық қажетті мәліметтер мемлекеттік деректер қорынан электронды түрде жиналады. Ол үшін азаматтарға ешқайда барудың қажеті жоқ, тек SMS-хабарламаға жауап берсе жеткілікті.Проактивті қызметтердің бір бөлігі Отбасының цифрлық картасы арқылы көрсетіледі, ол автоматты режимде әл-ауқат деңгейін, сондай-ақ мемлекеттік қолдаудың тиісті шараларын айқындайды. Оны енгізудің арқасында 2024 жылы 642 мыңнан астам адам мемлекеттік қызметтерді проактивті көрсету үшін SMS алды. Бұл ретте өтінішсіз жәрдемақы немесе төлем алу мүмкіндігін 263 мың адам пайдаланды.2024 жылғы ақпанда тағы бір мемлекеттік қызмет, атап айтқанда «Мүгедектігі бар балаларды үйде оқытуға жұмсалған шығындарды өтеу» қызметі проактивті форматқа ауыстырылды.Осылайша, бүгінгі таңда проактивті форматта әлеуметтік-еңбек саласында 28 мемлекеттік қызмет көрсетіледі. Олардың ішіндегі ең сұранысқа иелері:- жұмыссыз азаматтарды тіркеу (771 мың);- бала тууына және бала күтімі бойынша жәрдемақы тағайындау (218 мың);- бала күтіміне байланысты табысынан айырылған жағдайда әлеуметтік төлем тағайындау (172 мың);- инфляция деңгейін ескере отырып, нақты енгізілген міндетті зейнетақы жарналарының, міндетті кәсіптік зейнетақы жарналарының сомасы мен зейнетақы жинақтарының сомасы (мемлекеттік кепілдік) арасындағы айырманы төлеу (177 мың);- мүгедектікті және/немесе еңбекке қабілеттілігінен айырылу дәрежесін белгілеу және/немесе қажетті әлеуметтік қорғау шараларын айқындау (97 мың).Сонымен бірге жекелеген қызметтерді түрлендіру және жеңілдету бойынша да жан-жақты жұмыстар жүргізілуде.Атап айтқанда, 30 нозология бойынша мүгедектік тобын белгілеу үшін медициналық-әлеуметтік сараптама жүргізудің сырттай форматы бойынша пилоттық жобаны іске асыру жалғасуда. 2024 жылы осындай форматта 97 мыңға жуық өтінім қаралды.Сондай-ақ мүгедектігі бар адамдарға Әлеуметтік қызметтер порталы арқылы техникалық құралдар мен оңалту қызметтерін өндіруші мен жеткізушіні өз бетінше таңдау мүмкіндігі қолжетімді. 2024 жылы 1,1 миллионнан астам тапсырыс орындалды.Ақпарат көзі : https://www.gov.kz/memleket/entities/enbek/press/news/details/945770

  Дүниежүзілік Азаматтық қорғаныс күні қарсаңында және Төтенше жағдайлар министрлігінің 30 жылдығына орай Қазақстан ТЖМ құтқарушылары теңіз деңгейінен 3680 метр биіктікте орналасқан Үлкен Алматы шыңын бағындырды.  Шыңға көтерілудің маңызды сәті «Азаматтық қорғаныс – халық қауіпсіздігінің кепілі» ұранымен тақырыптық туды биіктікте желбірету болды. Бұл іс-шараның мақсаты азаматтардың қауіпсіздігі мәселелеріне жұртшылықтың назарын аудару және азаматтық қорғау органдарының беделін нығайту болды.  Іс-шараға Алматы қаласы Төтенше жағдайлар департаментінің, Республикалық жедел-құтқару жасағының, Апаттар медицинасы орталығының, Қазавиақұтқару және ТЖМ Қазселденқорғау филиалдарының қызметкерлері қатысты.  «Бұл өрмелеу тек физикалық сынақ емес, бұл біздің кез – келген жағдайда адамдардың қауіпсіздігін қамтамасыз етуге дайындығымыз бен ісімізге бірілгендіміздің белгісі», – деп альпинизмге қатысушылардың бірі, жасақтың құтқару бөлімінің басшысы Вадим Пак атап өтті.  Бұл оқиға төтенше жағдайлар саласында жұмыс істейтін барлық құрылымдардың бірлігі мен кәсібилігін бейнелейді және халықтың қауіпсіздігін қамтамасыз етудегі азаматтық қорғаныстың маңыздылығын еске салады.  «Біз өз кәсібімізді және ең қиын жағдайларда адамдарға көмектесе алатынымызды мақтан тұтамыз. Азаматтық қорғаныстың маңыздылығын асыра бағалау қиын, бүгін біз оны нығайтуға тағы бір қадам жасадық», - деді ТЖД Азаматтық қорғаныс басқармасының аға офицері Әлішер Тутешев.Ақпарат көзі : https://www.gov.kz/memleket/entities/emer/press/news/details/945088

  24 ақпанда ТЖМ Стратегиялық жоспарлау және жедел басқару командалық орталығында Төтенше жағдайлар вице-министрі Батырбек Әбдішевтің Халықаралық ғылыми-техникалық орталық (ХҒТО) өкілдерімен жұмыс кездесуі өтті.   Жұмыс кездесуі аясында ТЖМ-ның ХҒТО мен Еуропалық Одақтың «Орталық Азия суларындағы радиация мен ауыр металдардың мониторингі жүйесі» бірлескен жобасына қатысу мүмкіндіктері талқыланды, ол аймақтық және ұлттық деңгейлерде стандартталған технологиялар мен шешім қабылдау процестерінің көмегімен қолданыстағы ұлттық жүйелерді бағалауға және жетілдіруге бағытталған.  Талқылау барысында Орталық Азия өңірінде осы жобаны іске асырудың негізгі мақсаттары, күтілетін нәтижелері мен негізгі кезеңдері қаралды, сондай-ақ сейсмологиялық датчиктерді орнату бойынша ХҒТО-ның ТЖМ Сейсмологиялық бақылаулар мен зерттеулердің ұлттық ғылыми орталығымен тиімді ынтымақтастығы атап өтілді.  ХҒТО өкілдері үшін ТЖМ Стратегиялық жоспарлау және жедел басқару командалық орталығының ахуалдық залы бойынша қысқаша экскурсия өткізілді, оның барысында дағдарыс жағдайларында басқару мен жедел әрекет етудің заманауи технологиялары, сондай-ақ тәуекелдерді мониторингтеу және болжау жүйелері көрсетілді.  Вице-министр: «Тәуекелдерді мониторингілеу және болжау саласындағы халықаралық ынтымақтастықты дамыту өңірдің қауіпсіздігі мен тұрақтылығын арттыруға ықпал етеді. Озық технологияларды енгізу және тәжірибе алмасу бізге ТЖ ден қою және алдын алу жүйелерін жетілдіруге мүмкіндік береді».  Сонымен қатар, су қоймасына су ағынын есептеуге, көктемгі су тасқынының көлемін анықтауға және су басу аймақтарын модельдеуге мүмкіндік беретін «Tasqyn» қазақстандық су тасқынын болжау және модельдеу ақпараттық жүйесінің және жасанды интеллект негізінде жер сілкінісін болжау жүйесінің жұмыстары таныстырылды.  Кездесу қорытындысы бойынша тараптар өңірдің орнықты дамуын арттыру мақсатында экологиялық қауіпсіздік және ықтимал қауіптерге жедел ден қою саласындағы халықаралық ынтымақтастықтың маңыздылығын растады.Ақпарат көзі : https://www.gov.kz/memleket/entities/emer/press/news/details/945227

  Бейжіңде Қазақстан Республикасы Төтенше жағдайлар министрлігінің Ұлттық сейсмологиялық бақылау және зерттеу ғылыми орталығы мен Қытай Халық Республикасы Жер сілкінісі агенттігінің геофизика институты арасында келісімге қол қойылды. Құжат деректер алмасуды, қатты жер сілкінісі туралы ерте ескерту жүйелерін біріктіруді және сейсмикалық белсенділікті бірлесіп бақылауды қамтиды.  «Бұл келісім - Қазақстанның сейсмология саласындағы халықаралық ынтымақтастығын дамытудағы маңызды қадам. Қытайлық әріптестермен бірлескен жұмыс жер сілкінісі туралы болжау мен ескертуді жақсартуға мүмкіндік береді. Бұл қауіп – қатерлерге жедел ден қоюға және азаматтардың өмірін қорғауға мүмкіндік береді», - деп атап өтті ҚР ТЖМ Сейсмологиялық байқаулар мен зерттеулер Ұлттық ғылыми орталығының директоры Дәулет Сәрсенбаев.  Қол қою рәсімі Алматы қаласының әкімі Ерболат Досаевтың ҚХР жер сілкінісі жөніндегі агенттігіне баруы аясында өтті. Іс-шара барысында қазақстандық делегация Қытайдың сейсмикалық қауіпсіздік саласындағы жаңа әзірлемелерімен және технологияларымен танысты, бұл ынтымақтастық пен тәжірибе алмасу үшін перспективалар ашады.  Келісім екі елдің мамандарына нақты уақыт режимінде сейсмикалық ақпаратпен алмасуға мүмкіндік береді, бұл жер сілкіністерін болжау және олардың салдарын азайту тиімділігін арттырады. Бұл азаматтарға ықтимал табиғи апаттар туралы дәлірек және уақтылы хабарлауды қамтамасыз етеді.  Алматыда 28 мониторинг және қатты жер сілкінісі туралы алдын ала ескерту станциялары жұмыс істейді. 2025 жылы тағы 30 станция, ал 2026 жылдың соңына дейін қосымша 40 станция орнату жоспарлануда, бұл қауіпсіздік жүйесі мен халықты қорғауды айтарлықтай жақсартады.  Келісім сейсмикалық қауіпсіздікті күшейту және азаматтарды сейсмикалық белсенділікке байланысты қауіптерден қорғау үшін жаңа мүмкіндіктер ашады.          Ақпарат көзі : https://www.gov.kz/memleket/entities/emer/press/news/details/945485

Елімізде 1 наурыз – Алғыс айту күні атап өтіледі. Биыл Астанада Алғыс айту күнін мерекелеу тағы бір маңызды оқиғамен – Қазақстан халқы Ассамблеясының 30 жылдығына арналған іс-шаралардың басталуымен есте қалмақ. Мерейлі датаға орай Астанада ондаған түрлі спорттық, мәдени және танымдық іс-шаралар өтеді, деп хабарлайды елорда әкімдігінің ресми сайты.Мереке күндері мәдениет, спорт, білім беру ұйымдары, елордалық ҚХА және басқа да мекемелер қала тұрғындары мен қонақтары үшін түрлі іс-шаралар дайындап отыр. Алғыс айту күніне орай Астанада салт-дәстүрлер мен алғыс айтудың түрлі тәсілдерін дамытуға бағытталған тақырыптық көрмелер, балалар мен оқушыларға арналған тәрбие сағаттары өтіп жатыр. Жалпы, жоспарланған іс-шаралардың барлығы қоғамның тәуелсіздік құндылықтары төңірегінде топтасуына, ел бірлігі мен патриотизмнің нығаюына ықпал етеді.27 ақпанда «AMANAT» партиясы мен астаналық ҚХА ерікті жастар ұйымдары дәстүр бойынша қарт кісілерге көмек көрсетіп, аулаларының қарын күрейді.Дәл осы күні қарттар үйінде ҚХА-ның дәстүрлі қайырымдылық акциясы өтеді. Жұртшылық үшін концерт ұйымдастырылып, этномәдени бірлестіктердің ұлттық тағамдарынан дәм татады.Сондай-ақ, 27 ақпанда елордадағы №43 мектепте әлеуметтік аз қамтылған отбасылардан шыққан балаларға арналған «Бірлік пен ынтымақтастыққа 30 жыл» атты қайырымдылық акциясы өтеді.28 ақпанда қала мектептерінде «Қазақстан халқы ассамблеясына 30 жыл» тақырыптық сынып сағаттары өтеді. Наурыз бойы мектептерде ардагерлермен және ҚХА белсенділерімен кездесулер, түрлі іс-шаралар ұйымдастырылады.1 наурызда елордадағы салтанатты шаралар маңызды оқиғадан басталады: Достық үйінде ҚХА мерейтойына арналған «Қазақстан халқы ассамблеясына 30 жыл» мемориалдық тақтасының ашылу салтанаты болады. Одан кейін халықаралық дөңгелек үстел өтеді, оның барысында Ассамблеяның мерейтойына орай Қазақстан Президентінің құттықтау сөзі оқылады. Бұл шара ҚХА-ның 30 жылдығына арналған жылдың ресми бастамасы болмақ.Одан кейін дөңгелек үстелге қатысушылар «Қазақ еліне мың алғыс» монументіне барады, онда салтанатты түрде гүл шоқтарын қою рәсімі өтеді.Сонымен қатар, әлеуметтік желілерде түрлі этностардың жастардың құттықтаулары бар видео-челлендж бастау алады.Тағы бір маңызды іс-шара – халықтың мұқтаж топтарын қолдауға бағытталған «Қайырымдылық керуені» акциясының басталуы.Дәл осы күні, 1 наурызда Достық үйінде шығармашылық топтардың қатысуымен мерекелік концерт өтеді. Балаларға мерекелік дастархан ұйымдастырылады.Ақпарат көзі : https://www.gov.kz/memleket/entities/astana/press/news/details/945409

Биыл Шығыс Қазақстан облысында балабақшаларда тағы 1500-ге жуық жаңа орын ашу жоспарлануда. Облыстық әкімдікте «Әр балаға қолжетімді сапалы білім» атты ұлттық есептің өңірлік жол картасын жүзеге асыру мәселелері талқыланды.Басты тақырыптар – балабақшалар мен мектептерде жаңа орындар ашу, инклюзивті және қосымша білім беруді дамыту, сондай-ақ мектеп инфрақұрылымын жаңарту.ШҚО білім басқармасының басшысы Инесса Чернышеваның айтуынша, өткен жылы өңірде 1970 жаңа орын ашылды, ал 2025 жылы тағы 1499 орын қосу көзделген, оның 127-сі қазірдің өзінде дайын. Алайда облыста балабақша кезегінде тұрған балалар саны әлдеқайда көп – 2-3 жас аралығындағы шамамен 2000 бала.– Ата-аналарға ыңғайлы болу үшін біз «Балабақша» цифрлық платформасын енгізіп жатырмыз, онда балаларды тіркеп, кезекке қоюға болады. Сондай-ақ білім беру үдерісіне баланың цифрлық даму картасы енгізілді. Педагогтерді даярлау үшін 10 біліктілік орталығы ашылды. Наурыз айында Өскеменде ваучерлік қаржыландырудың пилоттық жобасын іске қосамыз, – деді Инесса Александровна.Облыста барлығы 343 мектеп бар, олардың басым бөлігі шағын жинақты. Апаттық немесе үш ауысымды мектептер жоқ, бірақ орын тапшылығы 6 мыңнан асады. 2024 жылы Өскеменде 600 орындық жаңа мектеп ашылды, биыл тағы 500 орындық екі мектеп салынбақ. Сонымен қатар 2100 орынға арналған бес жайлы мектептің құрылысы аяқталды, ал 900 орындық екі мектептің құрылысы жалғасуда.Мектеп инфрақұрылымы да жаңартылып жатыр. 50 мектепте асханалар, кітапханалар мен оқу кабинеттері жөнделді. Барлық мектептер интернетке қосылған, ал 109 мектеп «Әлеуметтік әмиян» жүйесіне енгізілмек. Бұл бастама аз қамтылған отбасыларға мектеп формасы мен оқу құралдарын сатып алуға мемлекеттік қолдау алуға мүмкіндік береді.2023-2024 оқу жылында білім беру саласына демеушілерден 2,6 млрд теңге тартылды. Биыл өңірдегі 21 мектепте күрделі жөндеу жұмыстары жүргізіледі. Жалпы, мектептерді жаңартуға шамамен 5 млрд теңге қажет.Жұмысшы мамандықтары жылы аясында 2024 жылдың қыркүйегінен бастап өңір мектептерінде «Болашақ мамандары» бейінді оқыту орталықтары ашыла бастайды. Бұл орталықтар әр ауданның кадрлық қажеттіліктеріне сай құрылмақ.Облыс әкімі Нұрымбет Сақтағанов өңірдегі білім беру саласында қордаланған мәселелер бар екенін атап өтіп, басқарма басшылығын жұмысты тиімді ұйымдастыруға шақырды. Сонымен қатар, мектептердегі тәртіп мәселесін де назардан тыс қалдырмау керектігін айтты.–Директорлардың жұмыс тиімділігі тек ҰБТ нәтижелері бойынша ғана емес, балалардың қаншалықты ұйымшыл және тәртіпті екендігіне қарай да бағаланады. Егер бұл бағыттағы жұмыстарды үйлестіруге мән бермесек, лайықты ұрпақ тәрбиелеу туралы айту қиын, – деді облыс әкімі.Тағы бір өзекті мәселе – инклюзивті білім беруді дамыту. Өңірде ерекше білім беру қажеттілігі бар 12 мыңнан астам бала тұрады. Оларға 4 психологиялық-медициналық-педагогикалық кеңес беру орталығы мен 5 арнайы балабақша қызмет көрсетуде. Сонымен қатар 9 ауданда психологиялық-педагогикалық түзету кабинеттері ашылған. 2025 жылы Катонқарағай және Марқакөл аудандарында осындай жаңа кабинеттер ашу жоспарланып отыр.Ақпарат көзі : https://www.gov.kz/memleket/entities/akimvko/press/news/details/945471