Бүгін Харбинде ерлер арасында биатлоннан 10 шақырымдық спринт аяқталды, онда қазақстандық биатлоншы Вадим Қуралес күміс медаль жеңіп алды. Вадимның уақыт көрсеткіші - 30:13,1.Фото: Нұрғали ЖҰМАҒАЗЫАқпарат көзі : https://www.gov.kz/memleket/entities/tsm/press/news/details/935424

Харбинде өтіп жатқан IX қысқы Азия ойындарында фристайл-акробатикадан синхронды секіруде ерлер құрамасы Қазақстан қоржынына екінші алтын медальді салды. Бұл жүлде – Қазақстанның қысқы Азия ойындарындағы фристайл-акробатика тарихындағы алғашқы алтыны. Сондай-ақ жерлестеріміз Азия рекордын жаңартты.«Ел қоржынына екінші алтын медаль түсті. Фристайл-акробатикадан отандастарымыз Шерзод Хаширбаев пен Роман Иванов IX қысқы Азия ойындарының чемпионы атанды. Ерлер арасындағы синхронды секіруде сынға түскен жерлестеріміз екінші мүмкіндіктерінде бар шеберліктерін паш етіп, азулы Қытай құрамасының алтыннан үмітті екі құрамын да басып озды. Жігіттеріміз жәй озып қана қоймай, 97,92 ұпаймен Азия рекордын орнатты. Осылайша жігіттеріміз ел қоржынына екінші алтын медальді салып отыр.Бұл медальдің еліміз үшін маңызы зор. Өйткені бұл қысқы Азия ойындары тарихында отандастарымызфристайл-акробатикадан жеңіп алған тұңғыш алтын медаль. Осы жеңіске орасан зор үлес қосқан жаттықтырушылар мен команданың еңбегін ерекше атап өткен жөн. Спортшыларымыздың қажырлы еңбегі мен үздіксіз дайындықтарының арқасында біз осындай үлкен жетістікке қол жеткізіп отырмыз. Ел мәртебесін асқақтатқан осы жеңісімізбен чемпиондарымызды және барша спорт жанкүйерлерін шын жүректен құттықтаймын! Өзге де спортшыларымызға сәттілік тілеймін! Алға, Қазақстан!», - деді министр.Ақпарат көзі : https://www.gov.kz/memleket/entities/tsm/press/news/details/935476

Харбинде өтіп жатқан IX қысқы Азия ойындарында биатлоннан ерлер арасындағы бәсекеде Владислав Киреев IX қысқы Азия ойындарының чемпионы атанса, тағы бір отандасымыз Вадим Куралес күміс жүлдеге ие болды.«Фристайл-акробатикадағы жігіттердің алтынынан кейін іле-шала биатлон спортындағы саңлақтарымыз ел қоржынына бір алтын, бір күміс жүлде салды. 10 шақырымға спринтерлік жарыста Владислав Киреев мәре сызығын бірінші кесіп, қуаныш үстіне қуаныш сыйлады. Сондай-ақ тағы бір отандасымыз Вадим Куралес те екінші орынға ие болып, күміс жүлдегер атанды. Владислав пен Вадимді айтулы жеңістерімен шын жүректен құттықтаймын. Олар ел сенімін ақтап, барша спорт жанкүйерін жарқын жеңістерімен қуантты.Жігіттеріміз бұл жүлдемен шектеліп қалмайды деп сенемін. Бірер күннен соң олар командалық сында жарыс жолына шығып, бізді тағы да жоғары марапаттармен қуантады деп үміттенеміз. Бүгінгі қос алтын мен бір күміс құтты болсын, Қазақ елі!», - деді министр.Ақпарат көзі : https://www.gov.kz/memleket/entities/tsm/press/news/details/935484

Абай облысының Аягөз ауданында жедел басқару орталығы ашылды.Аягөз қаласында заманауи жедел басқару орталығы өз жұмысын бастады. Ашылу салтанатына Абай облысы полиция департаменті бастығының міндетін атқарушы Ернар Базаров жетекшілік етті. Салтанатты шараның құрметті қонағы – Аягөз ауданының әкімі Данияр Шакарымов азаматтардың қауіпсіздігін қамтамасыз етуде жоғары технологияларды енгізудің маңыздылығын атап өтті.Қазіргі таңда қала көшелері мен қоғамдық орындарға 120 бейнебақылау камерасы орнатылып, олар тәулік бойы үздіксіз жұмыс істейді. Бұл жүйе кез келген оқыс оқиғаға жедел әрекет етуге мүмкіндік беріп, қоғамдық тәртіпті сақтауда маңызды рөл атқарады. Қозғалыс қауіпсіздігін арттыру мақсатында 10 стационарлы жылдамдық өлшегіш құрылғы іске қосылды. Сонымен қатар, пилоттық жоба аясында жол қозғалысы ережелерінің бұзылуын тіркейтін заманауи Ekin Patrol G2 мобильді кешендері қолданысқа енгізілуде. Бұл инновациялық құрылғылар нақты уақыт режимінде заң бұзушылықтарды анықтап, жол қозғалысы жағдайын талдау мүмкіндігіне ие.– Қазақстан Республикасы Ішкі істер министрінің тапсырмасына сәйкес, 2025 жыл "Профилактика жылы" деп жарияланды. Аягөз қаласында жедел басқару орталығының ашылуы – қауіпсіздікті нығайту және құқық бұзушылықтың алдын алу жолындағы маңызды қадам. Біздің басты мақсатымыз – әрбір азаматтың өзін қауіпсіз сезінуін қамтамасыз ету, – деп атап өтті Ернар Базаров.Жаңа жедел басқару орталығы – қаланың қауіпсіздік жүйесін жетілдірудің жаңа кезеңі. Бұл бастама құқық бұзушылықтардың алдын алуға, қоғамдық тәртіпті күшейтуге және тұрғындардың қауіпсіздігін жаңа технологиялар арқылы қамтамасыз етуге бағытталған. Енді Аягөз халқы бейбіт өмір сүріп, өздерін сенімді сезіне алады.Ақпарат көзі : https://www.gov.kz/memleket/entities/qriim/press/news/details/935597

2024 жылдың қорытындысы бойынша ерікті қоныс аудару аясында жұмыс күшінің ұтқырлығын арттыру үшін жұмыс күші артық өңірлерден жұмыс күші тапшы өңірлерге 8 950 адам, оның ішінде 3 000 қандас және 5 950 қоныс аударушы көшіп келді. Барлық қоныс аударушыларға мемлекеттік қолдау шаралары көрсетілді.Қоныстандыру өңірлері бөлінісінде Павлодар облысына – 3 422 адам, Солтүстік Қазақстан облысына – 2 547 адам, Қостанай облысына – 1 020 адам, Шығыс Қазақстан облысына – 781 адам, Ақмола облысына – 537 адам, Абай облысына – 530 адам, Ұлытау облысына – 70 адам, Қарағанды облысына – 43 адам қоныс аударды.Қоныстану аймақтарына көшкен қандастарымыз негізінен Моңғолиядан – 1 072 адам, Өзбекстаннан – 908 адам, ҚХР – 762 адам, Ресейден – 164 адам, басқа елдерден – 94 адам келген.Келушілер қатарынан еңбекке қабілетті жастағы 4 279 адамның (қоныс аударушылар мен қандастар) 2 721-сі тұрақты жұмыс орындарына орналастырылды, 207 адам кәсіпкерлік қызметпен айналысуда, бизнес ашу үшін 25 адам грант алды.Қоныс аударушылар мен қандастар денсаулық сақтау, ауыл шаруашылығы, білім беру, өнеркәсіп және т.б. салаларыға жұмысқа орналасты. Қоныс аударған кейіпкерлеріміздің бірі – Сүлейменовтер отбасы, олар қоныс аударғаннан кейінгі өмірлеріндегі оң өзгерістерімен бөлісті.«2023 жылы облыстық қоныс аудару квотасына енгізілгеннен кейін олар Маңғыстау облысынан Солтүстік Қазақстан облысының Тайынша қаласына қоныс аударған. Отбасының әрбір мүшесіне қоныс аударуға 1 690 500 теңге көлемінде материалдық көмек түрінде мемлекеттік қолдау көрсетілді, сонымен қатар экономикалық ұтқырлық сертификаты бойынша тұрғын үй сатып алдық. Біз көшуге шешім қабылдағанымызға және қоныс аударушыларға жұмыс іздеуге көмектесетін, алғашқы материалдық көмек көрсететін мемлекет тарапынан осындай бағдарлама бар екеніне өте қуаныштымыз», – деді отағасы Жанболат Сүлейменов.Жанболат Ақтау қаласының №1 кәсіптік лицейін «Есептеу техникасына қызмет көрсету жөніндегі техник оператор» мамандығы бойынша бітірген, жұбайы Жадырдың «Педагогика және психология» мамандығы бойынша жоғары білімі бар.Тайынша ауданының мансап орталығы жұмысқа орналасуға көмек көрсетті. Жанболат «Көкше Техстрой» ЖШС-де жұмыс істейді. Жұбайы «Қарлығаш» балабақшасына тәрбиеші болып жұмысқа орналасты.Естеріңізге сала кетейік, ерікті қоныс аудару аясында қоныс аударушыларға мемлекеттік қолдаудың мынадай шаралары ұсынылады:- отағасына және отбасының әрбір мүшесіне 70 АЕК мөлшерінде көшуге арналған бір реттік субсидия;- отбасы мүшелері саны мен елді мекенге байланысты 15-тен 30 АЕК-ке дейінгі мөлшерде 12 ай ішінде тұрғын үй жалдауға және коммуналдық қызметтерге ақы төлеуге ай сайынғы субсидиялау;- қысқа мерзімді кәсіптік оқытуға жолдама;- жұмысқа орналасуға немесе кәсіпкерлік бастаманы дамытуға жәрдемдесу;- экономикалық ұтқырлық сертификаттарын беру.Бұдан басқа, өңіраралық қоныс аударуға жәрдем көрсететін жұмыс берушілерге тұрғын үймен қамтамасыз етілген және кемінде 2 жыл мерзімге тұрақты жұмысқа қабылданған әрбір қызметкер үшін 400 АЕК мөлшерінде жұмысқа орналасуға біржолғы субсидия беріледі.Ақпарат көзі : https://www.gov.kz/memleket/entities/enbek/press/news/details/935152

САЯСАТ НҰРБЕК: ҒЫЛЫМИ-ТЕХНОЛОГИЯЛЫҚ СЕССИЯЛАР – ҒЫЛЫМ МЕН ӨНДІРІСТІҢ ӨЗАРА ӘРЕКЕТТЕСУІНІҢ ЖАҢА ФОРМАТЫӘбілқас Сағынов атындағы Қарағанды техникалық университетінің базасында «Заманауи сілтілеу әдістері және оларды Қазақстанның тау-кен металлургия кешенінде қолдану перспективалары» атты ғылыми-технологиялық сессия басталды. Іс-шара ҚР Ғылым және жоғары білім министрлігі мен «Қазақмыс» корпорациясының қолдауымен ұйымдастырылып, гидрометаллургия саласындағы озық технологияларды талқылауға жетекші ғалымдарды, сарапшыларды және өнеркәсіп өкілдерін жинады.Бағдарлама аясында пленарлық отырыстар, қазақстандық және шетелдік мамандардың баяндамалары, сондай-ақ инновациялық шешімдерді іздеуге бағытталған пікірталастар ұйымдастырылды. Сессия барысында мыс кендерін жерасты және жерүсті сілтілеу тәсілдерінің келешегі, ғылыми әзірлемелерді коммерцияландыру мәселелері және оларды өндіріске енгізу жолдары қарастырылды. Ғылым мен бизнестің өзара ықпалдастығына ерекше көңіл бөлінді.Сессия жұмысына ҚР Ғылым және жоғары білім министрі Саясат Нұрбек және Қарағанды облысының әкімі Ермағанбет Бөлекпаев қатысты. Министр ғылыми-технологиялық сессиялар ғылым мен өнеркәсіптің өзара әрекеттесуінің жаңа форматы екенін атап өтті.– Бүгін Қарағандыда өте маңызды оқиға, ірі кәсіпорындармен серіктестікте өткізетін сегізінші ғылыми-технологиялық сессия өтуде. Бізде ғылымды қаржыландыру және жалпы Қазақстанның ғылыми-технологиялық саясатын іске асыру моделі толығымен өзгеруде. Енді біздің ғалымдар, ҒЗИ мен жоғары оқу орындарының өкілдері ірі кәсіпорынға барады. Басты мақсат – өндірістің нақты проблемаларын анықтау. Бұл сессиялар не үшін маңызды, біз ғылым мен өнеркәсіптің өзара әрекеттесуінің жаңа форматын бастадық. Өндіріс, ірі корпорациялар Қазақстандағы ғылымның тиімділігіне сенді. Бізде жақсы мысалдар бар. Біздің мақсатымыз – нақты ірі өндірістік компанияларды жаңа технологиялық деңгейге шығару, олардың ғылым мен өндіріс саласындағы экономикаға қосқан үлесін арттыру, – деп атап өтті Саясат Нұрбек.Хакатон аясында өндірістік процестерге енгізілген ғылыми жобалардың көрмесі ұйымдастырылды.Екі күн ішінде қатысушылар өздерінің ғылыми баяндамаларын ұсынып, заманауи технологияларды енгізу тәжірибесімен бөлісіп, қолданбалы зерттеулерге негізделген шешімдер әзірлейді.Ғылыми-технологиялық сессияның қорытындысында хакатон бағыттары бойынша прототиптер мен жобалық шешімдер таныстырылады.Ақпарат көзі : https://www.gov.kz/memleket/entities/sci/press/news/details/935411

Мемлекет басшысы жариялаған Жұмысшы мамандықтарының жылы аясында Астанада техникалық және кәсіптік білім беру саласындағы ең ауқымды іс-шара — «Жұмысшы мамандықтар қаласы» фестивалі ашылды. Салтанатты шараға премьер-министрдің орынбасары Тамара Дүйсенова, Оқу-ағарту министрі Ғани Бейсембаев, сондай-ақ ірі компаниялардың, кәсіпорындар мен ұйымдардың өкілдері, колледж студенттері, сарапшылар қатысты, деп хабарлайды Қазақстан Республикасы Оқу-ағарту министрлігінің баспасөз қызметі. Фестиваль қонақтарын қарсы ала отырып, Оқу-ағарту министрі техникалық және кәсіптік білім беру жүйесін трансформациялаудың маңыздылығын атап өтті. 2025 жылдың 1 қыркүйегінен бастап колледждерді жан басына шаққандағы қаржыландыру көлемі екі есеге ұлғаяды. Қазіргі уақытта колледждерге 518 кәсіпорын шефтік қамқорлық көрсетеді, ал болашақта олардың санын 4 мыңға дейін арттыру жоспарлануда. «Жұмысшы мамандықтар жылында іске асырылатын негізгі іс-шаралардың бірі еліміздің 10 колледжін интернационалдандыру болмақ. Негізгі мақсат - олардың жаһандық деңгейде бәсекеге қабілеттілігін арттыру және білім беру бағдарламаларын халықаралық стандарттарға сәйкестендіру. Атом энергетикасы бойынша мамандарды даярлауда Венгрияның тәжірибесін енгізу, сондай-ақ Қытайдың IT, дрон құрастыру және машина жасау саласындағы тәжірибесін қолдану жоспарлануда», - деді Ғани Бейсембаев. Сонымен қатар Астанада техникалық және кәсіптік білім беру ұйымдарының студенттерін қолдау және дамыту мақсатында Ұлттық құзыреттілік орталығы құрылады. Мұндай орталық Қытайда, Оңтүстік Кореяда және БАӘ-де табысты жұмыс істеуде. Ал осы күзде Ақтауда TurkicSkills - түркітілдес елдер арасында I-ші кәсіби шеберлік чемпионаты өтеді. Айта кетейік, «Жұмысшы мамандықтар қаласы» фестивалі — Жұмысшы мамандықтарының жылын ресми түрде ашатын алғашқы іс-шара. Бұл болашақ мамандардың, жұмыс берушілердің, техникалық және кәсіптік білім беру ұйымдарының өзара ынтымақтастығы үшін құрылған алаң. Фестивальдің бірегей форматы қонақтарға әртүрлі кәсіптердің ерекшеліктерімен танысуға және интерактивті алаңдар мен мамандандырылған жабдықтардың көмегімен экономиканың түрлі саласында өздерін сынап көруге мүмкіндік береді.«Жұмысшы мамандықтары қаласында» сегіз тақырыптық көше ашылды: тау-кен ісі және металлургия, машина жасау және көлік, энергетиктер мен мұнайшылар, ауылшаруашлығы, су шаруашылығы мамандары, құрылысшылар, сондай-ақ құтқарушылар, өрт сөндірушілер, медицина көшелері, сондай-ақ болашақ мамандықтарына арналған көшелер де бар. Сонымен қатар кәсіби дамудың түрлі салалары мен бағыттарын көрсететін 40 креативті үй ұсынылған. Бірнеше күн ішінде қала аумағында түрлі семинарлар мен мастер-класстар, мұнай және энергетика өнеркәсібі тақырыптары бойынша хакатон, кәсіптер шеруі, бос орындар жәрмеңкесі, стартаптардың тұсаукесерлері, концерттер мен тренингтер өтеді. Фестивальді ұйымдастырушы – Қазақстан Республикасының оқу-ағарту министрлігі, оған өнеркәсіп және құрылыс, көлік, энергетика, ауылшаруашылығы, экология және табиғи ресурстар, су ресурстары және ирригация, цифрлық даму, инновациялар және аэроғарыш өнеркәсібі, төтенше жағдайлар, денсаулық сақтау министрліктері, сондай-ақ Ұлттық компаниялар мен еліміздің кәсіпорындары қолдау көрсетті. Анықтама: Қазақстанның кәсіптік-техникалық білім беру жүйесінде 772 колледж жұмыс істейді, онда 556 мың студент оқиды. Мемлекет басшысының қолдауының арқасында 2 жыл ішінде колледж студенттерінің стипендиясы екі есе өсті. 2025 жылы студенттерді сұранысқа ие мамандықтар бойынша тегін техникалық және кәсіптік біліммен қамту 153 мыңды құрайды, бұл өткен жылмен салыстырғанда 10 мыңға артық. Мемлекеттік тапсырыстың 70% - ы машина жасау, көлік, энергетика, IT, құрылыс және т. б. қоса алғанда, техникалық мамандықтарға бағытталатын болады.Ақпарат көзі : https://www.gov.kz/memleket/entities/edu/press/news/details/935482

Бүгін, 11 ақпанда алғаш рет «Ақтау-Жаңаөзен-Ақтау» бағытына және Маңғыстау ауданындағы ауылдарды аудан орталығы – Шетпе ауылымен байланыстыратын жаңа, заманауи және комфортабелді автобустар жүре бастады. Алғашқы рейс таңғы 09:00-де Ақтаудан жолға шықты.Жаңа бағыттардың ашылу рәсіміне аймақ басшысы арнайы қатысып, 20 автобустың кілтін табыстады. Облыс әкімінің айтуынша, қазіргі таңда Маңғыстау облысы бойынша автобус паркі 90%-ға, ал Ақтау қаласында 100%-ға жаңарған.- Мемлекет басшысы Қасым-Жомарт Тоқаев халықтың әл-ауқатын арттыруды басты назарда ұстайды. Соның бірі – қоғамдық көлікпен қамту мәселесі. Бұл бағдарлама Маңғыстау облысында 2020 жылы басталып, бүгін нәтижесін беріп отыр. Өңір тұрғындары Жаңаөзен қаласына және ауданішілік бағыттарда кең әрі жайлы туристік автобустармен қатынай алады. Жол ақысы қолжетімді, қызмет сапасы жоғары автобустар халық игілігі үшін жасалды. Алдағы уақытта бұл жұмыстар жалғасады, – деді Нұрдәулет Қилыбай.«Ақтау-Жаңаөзен-Ақтау» бағытында «Yutong» маркалы, 51 орындық, үлкен класты автобустар жолаушыларға барлық қажетті жағдаймен қамтамасыз етілген. Автобустарда санитарлық торап (дәретхана), желдеткіш және жолаушылардың жол бойы жайлы уақыт өткізуі үшін теледидар қарастырылған.12 ақпаннан бастап 6 автобус күн сайын таңғы 07:00-де Ақтау қаласынан – 31 шағынаудандағы «Сары базар» жанындағы автотұрақтан, ал Жаңаөзен қаласынан – «Жібек жолы» базары аумағындағы «Өзен» сауда үйінің алдынан жолға шығады. Жол жүру ақысы ересектер үшін – 750 теңге, 7-18 жас аралығындағы балалар үшін – 375 теңге.Ал Маңғыстау ауданының орталығы Шетпе ауылын ауылдармен байланыстыратын жолаушылар тасымалы үшін «Yutong» маркалы, 24 орындық, кіші класты жайлы автобустар бөлінді.Енді тұрғындар Шетпе ауылішілік бағытында және Шетпе-Қызан-Ақшымырау, Шетпе-Тұщықұдық-Шебір, Шетпе-Онды, Шетпе-Ұштаған, Шетпе-Шайыр, Шетпе-Жармыш, Шетпе-Сайөтес, Шетпе-Тұщыбек-Жыңғылды бағыттары бойынша қатынай алады. Жолаушыларға барлығы 14 автобус қызмет көрсетеді.Айта кетейік, жаңа автобустар «Өнеркәсіпті дамыту қоры» АҚ-ның қаржылық қолдауымен алынды.Маңғыстау облысы әкімінің баспасөз қызметіАқпарат көзі : https://www.gov.kz/memleket/entities/mangystau/press/news/details/935521

2025 жылғы 7 ақпанда ШҚО әкімі аппаратында Шығыс Қазақстан облысы мемлекеттік-құқықтық бөлімінің өкілдері мен жобалау кеңсесінің басшысы Шолпан Жумадилованың қатысуымен жұмыс кеңесі өтті. Іс-шараның мақсаты — есірткі бизнесіне қарсы іс-қимыл жасау және нашақорлықтың алдын алудың тиімді әдістемесін әзірлеу тәсілдерін талқылау.Кеңес барысында өңірдегі есірткі қауіпінің ағымдағы ахуалының негізгі аспектілері және күрестің тиімді алгоритмін әзірлеу үшін ықтимал бағыттар қаралды.Талқылау қорытындысы бойынша жобалық басқару шеңберінде нашақорлық пен есірткі қылмысына қарсы іс-қимыл жөніндегі жұмысты ұйымдастыру туралы мәселені қарау ұсынылды. Жобаны iске асыру үшiн Қазақстан Республикасы Iшкi iстер министрлiгi бекiткен критерилер негiзiнде Жобалар картасын әзiрлеу, оның орындалуына жауапты адамдарды айқындау, бағалау параметрлерi мен есептiлiк нысандарын дайындау қажет.Ақпарат көзі : https://www.gov.kz/memleket/entities/akimvko/press/news/details/935535

Үкімет пен Дүниежүзілік жануарлар денсаулығы ұйымы арасындағы келісімді жүзеге асыру аясында, АШМ ВБжҚК 2025 жылға ветеринариялық қызметтің симуляциялық оқу-жаттығуларының жоспарын әзірледі.Осы жоспарға сәйкес, 18 аса қауіпті ауырулар ошақтарына қарсы іс-қимыл бойынша оқу-жаттығулар жыл бойы жүргізіледі. Сондай-ақ, Қазақстанның 16 облысындағы ветеринарлық бақылау бекеттерінде импорт, экспорт және транзит рәсімдерін жүргізу кезінде ветеринарлық бақылау бойынша симуляциялық оқу-жаттығулар жоспарланған.Осыған байланысты Түркістан облысында сібір жарасы бойынша оқу-жаттығулары өткізілді, оған 70 ветеринариялық қызметкер қатысып, 14-тен астам арнайы көлік бірлігі пайдаланылды. Оқу-жаттығулар барысында қызметтердің ведомствоаралық өзара іс-қимыл, диагностика, ақпараттандыру, локализациялау, жою және инфекциялық аурудың алдын алу мәселелері пысықталды. Сондай-ақ, облыстық және аудандық ветеринариялық қызмет бөлімшелерінің төтенше жағдайдың салдарын жоюға дайындығы тексерілді.Оқу-жаттығуларға қатысушылар қолайсыз пункттің шекарасын белгілеуді, ауру ошағында жою іс-шараларын жүргізуді, тәуекел аймағында алдын алу іс-шараларын іске асыруды қоса алғанда, дала жұмысының дағдыларын көрсетті.Дүниежүзілік жануарлар денсаулығы ұйымының ұсыныстарына сәйкес сібір жарасы ошағы пайда болған жағдайда ветеринарлық қызметтің жедел әрекет етуге дайындығы расталды.Осындай оқу-жаттығулар Қазақстанның барлық өңірінде өткізілетін болады.Ақпарат көзі : https://www.gov.kz/memleket/entities/moa/press/news/details/935415

Ауыл шаруашылығы министрлігі облыс әкімдіктерімен бірлесіп алдағы егіс науқанына қызу дайындалуда. Биыл ауыл шаруашылығы жалпы өнімін  екі есеге арттыру мақсатындағы Жол картасына сай, егіс алқаптарын әртараптандыру жалғасады. Бұл туралы Үкімет отырысында Ауыл шаруашылығы министрі Айдарбек Сапаров мәлімдеді.«Ауыл шаруашылығы дақылдары 23,8 млн гектар жерге орналастырылады, бұл өткен жылмен салыстырғанда 518 мың гектарға артық. Әртараптандыру бағдарламасы шамамен 1 млн гектарды қамтиды, соның ішінде жоғары рентабельді дақылдардың алқабы 750 мың гектарға ұлғайтылады. Атап айтқанда, майлы дақылдар 365 мың гектарға, жем-шөп дақылдары 184 мың гектарға, арпа 114 мың гектарға, қарақұмық 41,5 мың гектарға, картоп 15 мың гектарға көбейтіледі», – деді министр.Тұрақты жем-шөп базасын қамтамасыз ету мақсатында жем-шөп дақылдарының алқабын 3,4 млн гектарға дейін жеткізу жоспарлануда. Майлы дақылдардың көлемі 3,3 млн гектарға дейін ұлғайтылады. Жоспарланған алқаптар ішкі нарықтың қажеттілігін толық қамтамасыз етуге мүмкіндік береді.Ақпарат көзі : https://www.gov.kz/memleket/entities/moa/press/news/details/935419

Бұл туралы Үкімет отырысы барысында ауыл шаруашылығы министрі Айдарбек Сапаров мәлімдеді.Алдағы ауылшаруашылық маусымына дайындық аясында 2024 жылдың қарашасында көктемгі егіс жұмыстарын ерте қаржыландыру басталды.«Несиелеу арналары кеңейтілді: алғаш рет егіс несиесін ӘКК арқылы алуға болады. 1,3 мыңнан астам ауыл шаруашылығы тауарын өндірушілерден егіс науқанын қаржыландыруға өтінімдер пулы 205,1 млрд теңгені құрады. 914 АШТӨ 126,3 млрд теңгеге қаржыландырылды», - деді министр.Сондай-ақ, Айдарбек Сапаров 2025 жылы жеңілдетілген лизингке 200 млрд теңге бөлу жоспарланғанын айтты. Қаржыландыру ағымдағы айда басталады.Облыс әкімдіктеріне қар ұстау және ылғалды жабу жөніндегі іс-шараларды уақтылы жүргізуді, агротехникалық іс-шараларды уақтылы сақтауды және т.б. мәселелер тапсырылды.Көктемгі науқанды өткізу мәселесі ерекше бақылауда.Ақпарат көзі : https://www.gov.kz/memleket/entities/moa/press/news/details/935422

Үкімет отырысында Ауыл шаруашылығы министрі Айдарбек Сапаров әкімдіктердің жедел ақпараты бойынша ауыл шаруашылығы техникасының дайындығы шамамен 75% құрайтынын атап өтті. Көктемгі егіс жұмыстарының басында бұл көрсеткіш 100% жетеді.Осыған байланысты өңірлердің әкімдіктеріне техниканы жөндеу жұмыстарын күшейту және машина-трактор шеберханаларының үздіксіз жұмыс істеуін қамтамасыз ету тапсырылды.Сондай-ақ, мемлекеттік қолдау шараларының арқасында 2024 жылы фермерлер 22 мың заманауи техника сатып алғаны атап өтілді. Жыл қорытындысы бойынша ауыл шаруашылығы техникасы паркін жаңарту деңгейі 5,5% құрады.«Бұл көктемгі егіс және егін жинау кезеңіндегі еңбек өнімділігіне тікелей әсер етеді. Ағымдағы жылы біздің алдымызда осы көрсеткішті 6,5%-ға жеткізу міндеті тұр, бұл, әрине, ауыл шаруашылығы өндірісінің тиімділігін арттыруға ықпал етеді», - деді министр. Жалпы, еліміздің ауыл шаруашылығы құрылымдарында 140 мың трактор, 5,5 мыңға жуық өнімділігі жоғары егіс кешендері, 76,4 мың сепкіш және 220 мың топырақ өңдеу құралдары бар. Техниканың бұл саны фермерлерге барлық жұмыстарды оңтайлы мерзімде аяқтауға мүмкіндік береді.Көктемгі егіс жұмыстарын өткізу үшін өңірлерге 401 мың тонна дизель отыны бөлінді, бұл 2024 жылғы деңгейден 6,5% - ға артық.Ақпарат көзі : https://www.gov.kz/memleket/entities/moa/press/news/details/935442

Бұл туралы Үкімет отырысында Ауыл шаруашылығы министрі Айдарбек Сапаров мәлімдеді.Облыс әкімдіктерінің жедел деректеріне сәйкес, 2025 жылғы өнім үшін ауыл шаруашылығы тауар өндірушілеріне 2,3 млн тонна тұқым қажет, бүгінде бұл көлем толық қамтамасыз етілді. Алдын ала жүргізілген сараптама нәтижесінде 1,6 млн тонна тұқымның сапасы тексерілді. Тұқымды жаппай тексеру наурыз айының соңына дейін аяқталады.«Өткен жылы алғаш рет отандық тыңайтқыш өндірушілеріне аванстық субсидиялау тетігі енгізілді. Бұл механизм тыңайтқыштарды шаруалар үшін қолжетімді етті: нәтижесінде оларды енгізу деңгейі алғаш рет ғылыми негізделген қажеттіліктің 40%-дан асып, алдыңғы жылдары 21%-дан аспаған көрсеткіштен едәуір жоғары болды», – деді Айдарбек Сапаров.2025 жылы тыңайтқыш енгізу жоспары 1,9 млн тоннаны немесе ғылыми негізделген қажеттіліктің 59%-ын құрайды. Қазіргі уақытта тыңайтқыш өндірушілер мен жеткізушілер келісімшарт жасасу және қоймаларда қор қалыптастыру жұмыстарын жүргізуде.Ақпарат көзі : https://www.gov.kz/memleket/entities/moa/press/news/details/935470

Облыс әкімі Асхат Шахаровтың төрағалығымен өткен аппарат мәжілісінде өңірдегі креативті индустрияны дамыту мәселесі қаралды.Өңір басшысы жастардың өз тарапынан шығармашылық жолын дамыту үшін қолайлы жағдай жасаудың маңызын атап өтті. Ол дизайн, сән, музыка, сәулет және басқа да салаларда жаңа өнімдер жасау мен қызметтер көрсету арқылы табыс таба алатын заманауи бағыттарды дамыту қажет екенін жеткізді. Сондай-ақ, Асхат Шахаров білім беру, мәдениет және стартаптарға мемлекеттік инвестициялар арқылы шығармашылық адамдарды қолдау маңызды екенін атады.Мәдениет, архивтер және құжаттама басқармасының басшысы Алтынай Юнисованың айтуынша, облыс креативті индустрияны белсенді дамытуда. 2023 жылы С.Жиенбаев атындағы кітапхана базасында шығармашылық орталығы ашылды, онда коммюнити спейс, IT-кабинеттер, дыбыс жазу студиялары және фото-аймақ бар. Бұл жастарға өз таланттарын тегін дамытуға және жобаларды жүзеге асыруға мүмкіндік береді. Жастардың сұранысы бойынша С.Бәйішев атындағы облыстық әмбебап ғылыми кітапханада «Makerspace» орталығы құрылды, онда жасөспірімдер робототехника мен технологияны меңгере алады.Сонымен қатар, басқарма басшысы заңнамаға сәйкес креативті қызметтерді монетизациялау мүмкін болмай тұрғандығын атап, бұл осы бағытты одан әрі дамыту мүмкіндіктерін шектейтіндігіне тоқталды. Бұл мәселе «Атамекен» ӨКП-да өңір кәсіпкерлерінің қатысуымен қаралды және қазіргі уақытта осы мәселені шешудің мүмкін жолдарын іздеу жұмыстары жүргізілуде.«Әр ауданда шығармашылық идеяларды енгізу үшін платформалар құру қажет. Жобалар нәтиже беруі керек және жастардың оларды өз бетінше ұсынуы маңызды. Жобаларды әзірлеп, өз идеяларымен бөлісу үшін жетістікке жеткен ақтөбелік әншілерді, блогерлерді, әртістерді, журналистерді тартуға болады. Креативті индустрия жобалары сұранысқа ие және өңірді дамытуға бағытталуы тиіс», - деп толықтырды әкім.Айта кетейік, Ақтөбеде өңір басшысының тапсырмасымен жергілікті тұрғындардың шығармашылық әлеуетін дамытуға және қолдауға бағытталған жастарға арналған креативті орталық салу жоспарлануда. Орталықта контент жасауға арналған студиялар, шығармашылық кабинеттер және пікір алмасу аймақтары сияқты шығармашылық жобаларды жүзеге асыруға арналған әртүрлі кеңістіктер болады деп күтілуде. Сондай-ақ, жоба аясында ғимараттың басқа қанатында облыстық планетарий салу жоспары бар. Қазіргі уақытта жобаны демеушілердің жеке қаражаты есебінен қаржыландыру мәселесі шешілуде.Ақпарат көзі : https://www.gov.kz/memleket/entities/aktobe/press/news/details/935301

Франция астанасында жасанды интеллект саласындағы іс-қимылға арналған әлемдік саммит – Жасанды интеллект жөніндегі жаһандық әріптестіктің (GPAI) елдері арасындағы министрлік кездесуі өтуде. Іс-шараға Франция Президенті Эммануэль Макрон, Канада премьер-министрі Джастин Трюдо және ЭЫДҰ Бас хатшысы Матиас Корман қатысты. Франция Президенті Эммануэль Макронның шақыруымен Қазақстан делегациясын цифрлық даму министрі Жаслан Мәдиев басқарды. Ол өз сөзінде Қазақстан Республикасының GPAI-ға – жасанды интеллект технологияларын дамыту және жауапты қолдануға бағытталған халықаралық бастамаға қосылуға ниетті екенін айтты. Іс-шараға 44 ел қатысты. Олардың ішінде Камбоджа, Мальта, Румыния, Хорватия, Руанда, Марокко және Қазақстан GPAI-ға мүше болуға қызығушылықтарын білдірді. Жақында серіктестік қатысушылары олардың өтінімдерін қарау процесін мақұлдаған еді. Бұл мәлімдеме жасанды интеллекттің жаһандық басқару аясында кең ауқымды және әртүрлі қатысуға жол ашады. Қазақстанның цифрлық даму, инновациялар және аэроғарыш өнеркәсібі министрі Жаслан Мәдиев елдегі цифрлық трансформация нәтижелері мен жасанды интеллектті дамыту жоспарларымен бөлісіп, Alem.AI орталығының тұжырымдамасы туралы айтты. «Қазақстан жасанды интеллекттің болашағымызды қалыптастырудағы маңызды рөлін мойындайды және бұл саладағы халықаралық ынтымақтастықтың бірегей алаңы ретінде GPAI-ды жоғары бағалайды. Біз үкіметтер мен сарапшыларды біріктіре отырып, GPAI-дың жасанды интеллектке байланысты мүмкіндіктер мен сынақтарға жауап беру жөніндегі күш-жігерін қолдаймыз және оның жасанды интеллект саласындағы білім мен тәжірибені бүкіл әлемге тарату миссиясын толықтай құптаймыз. Қазақстанда біз ұлттық жасанды интеллект экожүйемізді белсенді түрде дамытып жатырмыз. Біз Alem.AI – жасанды интеллект саласындағы инновацияларды қолдау, стартаптардың дамуын жеделдету және ғылыми зерттеулерді ынталандыруға арналған Халықаралық орталық құрып жатырмыз. Жылына 200 мың азаматты мектеп оқушыларынан бастап мемлекеттік қызметшілерге дейін базалық және ілгері деңгейдегі жасанды интеллект дағдыларына оқытатын кешенді білім беру бағдарламалары арқылы адами капиталды дамытуға міндеттенеміз», – деді Жаслан Мәдиев. Іс-шара сондай-ақ ЭЫДҰ-ның жасанды интеллектке қатысты ұсынымдарын іске асыруды ілгерілету бойынша GPAI жұмысына арналған талқылау алаңы болды. Талқылау барысында жасанды интеллект саласындағы алшақтықты жою, ИИ-дің еңбек нарығы мен қоршаған ортаға әсерін түсіну және бағалау, тұрақты ауыл шаруашылығын қолдау, зияткерлік меншік құқықтарын қорғау арқылы инновацияларды ынталандыру, сондай-ақ деректерге қол жеткізу мен оларды жауапкершілікпен алмасуды жақсарту мәселелері қозғалды. Толығырақ: https://www.diplomatie.gouv.fr/fr/politique-etrangere-de-la-france/diplomatie-numerique/actualites-et-evenements/article/sommet-mondial-pour-l-action-sur-l-ia-reunion-ministerielle-des-pays-membres-du   ҚР ЦДИАӨМ баспасөз қызметі Анықтама: Жасанды интеллект жөніндегі жаһандық әріптестік (GPAI) – адам құқықтарын және қатысушы елдердің ортақ демократиялық құндылықтарын сақтау арқылы жасанды интеллектті жауапты әзірлеу мен қолдануға басшылық етуге арналған халықаралық бастама. Бұл әріптестік алғаш рет 2018 жылы G7-нің 44-ші саммитінде Канада мен Франция тарапынан ұсынылып, 2020 жылдың маусымында ресми түрде жарияланды. GPAI-дың ұйымдастырушысы – Экономикалық ынтымақтастық және даму ұйымы (ЭЫДҰ). GPAI теория мен практиканың арасындағы алшақтықты қысқартуға тырысып, жасанды интеллект саясатына тікелей қатысы бар салалардағы зерттеулер мен қолданбалы қызметті қолдайды. Ол өнеркәсіп, азаматтық қоғам, үкіметтер және ғылыми қауымдастық өкілдерін жасанды интеллекттің ұсыныстары мен қиындықтары бойынша бірлесіп жұмыс істеу үшін біріктіреді.  Ақпарат көзі : https://www.gov.kz/memleket/entities/mdai/press/news/details/935277

Әскер боксшысы Ангелина Лукас халықаралық аренада өз шеберлігін дәлелдеуді жалғастыруда. Стамбулда өткен кезекті жекпе-жекте ол венесуэлалық Джоанна Суньиганы ұтты. Бұл жекпе-жекте төрешілер қазақстандық спортшыны бірауыздан басым түсті деді.– 8 раундқа созылған жекпе-жекті жеңіспен аяқтадым. Осындай тәжірибе мен рингке қайта шығу мүмкіндігі үшін ризамын. Қолдау көрсеткен барша қазақстандықтарға рахмет! Әрбір жекпе-жек менің спорттағы өмірімнің бір бөлігі, мені алға ұмтылуға итермелейді, – деді Ангелина Лукас. Соңғы екі аптаға жуық уақытта бұл оның екінші сәтті өнер көрсетуі. Бұған дейін, 31 қаңтарда Мәскеуде өткен «IBA чемпиондар түні» турнирінде Ангелина Лукас нигериялық спортшы Айисат Орийомимен жұдырықтасып, жекпе-жекті мерзімінен бұрын аяқтаған болатын.Ақпарат көзі : https://www.gov.kz/memleket/entities/mod/press/news/details/935195

Жамбыл облысында жұмыспен қамтуға жәрдемдесудің мемлекеттік шараларының арқасында кәсіпкерлікті және оқыту бағдарламаларын дамыту, мемлекеттік гранттар беру есебінен жұмыс орындарының саны артуда.2024 жылы әлеуметтік саланы дамытуға 42,4 млрд теңге бөлінді, бұл 2023 жылмен салыстырғанда 1,2 есеге артық.Мемлекет басшысының 10 мың тұрғынға 100 жұмыс орнын құру туралы тапсырмасын орындау міндеті асыра орындалды. Жаңа кәсіпкерлік бастамаларды қолдау есебінен 13,1 мыңнан астам жұмыс орны құрылды (жоспар – 11 мың).Өңірлік жұмыспен қамту картасы азаматтарды жұмысқа орналастыруды жоспарлауға және еңбек нарығының қажеттіліктерін анықтауға мүмкіндік береді. Осы карта шеңберінде 70,1 мыңнан астам жұмыс орны құрылды, оның ішінде - 51,3 мың тұрақты жұмыс орны.Жыл қорытындысы бойынша халықты жұмыспен қамтудың белсенді шараларымен қамту жоспары да асыра орындалды.2024 жылы жұмыспен қамтуға жәрдемдесу шараларымен 62,7 мың жамбылдық (жоспар – 55,6 мың) қамтылды. Атап айтқанда, олар тұрақты және субсидияланатын жұмыс орындарына орналастырылды, өтеусіз гранттар алды.Қабылданған шаралардың нәтижесінде 2024 жылы атаулы әлеуметтік көмек алушылардың саны 2023 жылмен салыстырғанда 10,8 мың адамға кеміді.Өңірде 2025 жылы 65,6 мың жұмыс орнын құру күтілуде, оның ішінде 48,2 мың тұрақты жұмыс орны.Ақпарат көзі : https://www.gov.kz/memleket/entities/zhambyl/press/news/details/935216

Ақпарат көзі : https://www.gov.kz/memleket/entities/tsm/press/news/details/935218

Алматы қаласындағы комьюнити-орталықтары Отбасы банкпен бірлесіп, жастарға арналған жеке қаржылық кеңес беру бағдарламасын бастады. Бұл бастама жастардың қаржылық сауаттылығын арттырып, өз қаражатын тиімді басқаруға көмектесуге бағытталған.Бағдарлама аясында қатысушылар қаржы саласындағы өзекті ақпараттарды алып, жеке бюджет жүргізудің негізгі қағидаларын меңгереді. Сарапшылар кірістер мен шығыстарды дұрыс басқару жолдарын түсіндіріп, жинақ жасау, несие алу, инвестиция салу туралы маңызды кеңестер береді. Жастар өздерін қызықтырған сұрақтарын қойып, қаржылық тұрақтылықты қалыптастыруға арналған практикалық ұсыныстар ала алады.Кеңес алуға комьюнити орталықтардың жұмыс кестесіне сәйкес келуге болады. Кеңес беру күнін білу үшін өзіңізге ыңғайлы комьюнити орталыққа барып, толық ақпарат алуға болады.Алматы қаласы Жастар саясаты басқармасының ақпараты бойынша, бұл жоба жастардың қаржылық сауатын арттырып, қаржылық тәуелсіздікке қол жеткізуіне мүмкіндік беруге бағытталған.Ақпарат көзі : https://www.gov.kz/memleket/entities/almaty/press/news/details/934654