Қазақстан Республикасы Ұлттық қорғаныс университетінің жеке құрамы Кеңес Одағының Батыры, Халық қаһарманы, Қазақстанның тұңғыш қорғаныс министрі армия генералы Сағадат Нұрмағамбетовтің рухына тағзым етті. Дәстүрге айналған игі шара аясында университет басшылығы, профессорлық-оқытушылар құрамы мен «Қарулы күштердің Бас штабы академиясы» факультетінің 1 курс магистранттары және әскери қызметшілердің отбасы мүшелері Ақмола облысының Ақкөл ауданындағы даңқты қолбасшының ескерткішіне гүл шоғын қою рәсіміне қатысты.Митингте Ұлттық қорғаныс университетінің бастығы генерал-майор Асқар Мұстабеков көрнекті қолбасшының қазақ мемлекеттілігінің қалыптасуындағы, ұлттық армияның құрылуындағы және жастарды әскери-патриоттық рухта тәрбиелеудегі айрықша рөлін атап өтті. Іс-шараға қатысушылар жергілікті музейге барып, онда қойылған армия генералы Сағадат Нұрмағамбетовтің өмір жолы, әскери қызметі мен мемлекеттік қызметін бейнелейтін бірегей фотоқұжаттармен танысты.«Қарулы күштердің Бас штабы академиясы» факультеті магистранттарының бұл еске алу іс-шарасына қатысуы – әскери дәстүрдің сабақтастығын, әрі көрнекті қолбасшының есімін ардақтап, оны ұрпақ жадында мәңгі сақтау ісінің маңыздылығын айғақтай түсті.Ақпарат көзі : https://www.gov.kz/memleket/entities/mod/press/news/details/1067287?lang=kk

Қарулы күштердің XV Спартакиадасы аясында Қорғаныс министрлігі мен Бас штаб бөлімшелері арасында ұйымдастырылған офицерлік үшсайыс және табельдік қарудан оқ ату біріншіліктерінің жеңімпаздары мен жүлдегерлері салтанатты жағдайда марапатталды.Жарыстар екі топ бойынша өтті.Бірінші топта – Қорғаныс министрлігі мен Бас штабтың құрылымдық бөлімшелері, ал екінші топта – Қарулы күштердің бас басқармалары қатысты.Үшсайыс бағдарламасына Макаров тапаншасынан ату, жүзу және жас ерекшеліктеріне қарай бөлінген жүгіру жарыстары енді.Бірінші топ бойынша жалпыкомандалық есепте офицерлік үшсайыстан жеңіс тұғырына Әскери өкілдіктер орталығының командасы көтерілсе, екінші орынды Қару-жаоақты бақылау және инспекцияны қамтамасыз ету орталығы, үшінші орынды Жауынгерлік даярлық департаменті иеленді.Жеке біріншілік нәтижесінде 30 жасқа дейінгі санатта Жауынгерлік даярлық департаментінің өкілі майор Нұрзат Оразбек, 40 жасқа дейін – Қару-жарақты бақылау және инспекцияны қамтамасыз ету орталығының өкілі капитан Мұрат Смғұлов, 40 жастан жоғары – Мемлекеттік құпияларды қорғау департаментінің өкілі подполковник Альнұр Қуанғалиев үздік атанды.Әйелдер арасында Әскери өкілдіктер орталығының қызметшісі Меруерт Қалиева ең үздік нәтиже көрсетті.Қарулы күштердің бас басқармалары арасындағы екінші топта Бірінші орынды Қару-жарақ бастығының басқармасы, екінші орынды Тыл бастығының басқармасы,үшінші орынды Әскери инфрақұрылым бас басқармасы иеленді.Жеке біріншілікте: 30 жасқа дейін – Әскери полиция бас басқармасынан капитан Нұрдәулет Тағайбек, 40 жасқа дейін – Әскери инфрақұрылым бас басқармасынан лейтенант Марат Өтешқалиев, 40 жастан жоғары – Тыл бастығы басқармасынан подполковник Мұрат Ақынбеков топ жарды.Әйелдер арасында Қару-жарақ бастығы басқармасынан подполковник Ұлпан Талап озды. Ал тапаншадан ату чемпионатында әскери қызметшілер ПМ-3 жаттығуы бойынша 25 метр қашықтықтағы нысанаға оқ атты.Бірінші топтың командалық нәтижесінде: алтын Әскери өкілдіктер орталығына, күміс Жауынгерлік даярлық департаментіне, қола  Әскери-техникалық саясат департаментіне бұйырды.Жеке есепте ерлер арасында подполковник Тұрғынбек Хаким (Әскери өкілдіктер орталығы), әйелдер арасында кіші сержант Дәуренгүл Нұрланқызы (Жауынгерлік даярлық департаменті) чемпион атанды.Екінші топтың нәтижелері бойынша командалық есепте  Тыл бастығы басқармасы бірінші, Қару-жарақ бастығы басқармасы екінші, Әскери инфрақұрылым бас басқармасы үшінші орын алды.Жеке біріншілікте ерлер арасында подполковник Мұрат Ақынбеков (Тыл бастығы басқармасы), әйелдер арасында  майор Динара Байкенова (Әскери инфрақұрылым бас басқармасы) жеңіске жетті.Чемпиондар мен жүлдегерлер кубоктармен, медальдармен, дипломдармен және естелік сыйлықтармен марапатталды.Ақпарат көзі : https://www.gov.kz/memleket/entities/mod/press/news/details/1067286?lang=kk

Бүгінгі таңда туризм саласы – сауда, қоғамдық тамақтандыру мен қонақ үй қызметін көрсету сияқты экономикаға қатысты өзге де салалардың дамуына тікелей ықпал ететін, болашағы зор қызмет түрлерінің бірі болып отыр.Ағымдағы жылдың бірінші жартыжылдығының қорытындысы бойынша орналастыру орындары көрсеткен қызмет көлемі 2,0 млрд теңгені құрап, өткен жылмен салыстырғанда 33,2%-ға артқан.Өңірге келген қазақстандық азаматтардың саны – 121,9 мың адамды, шетелдік туристердің саны – 6,0 мың адамды құрады. Нөмірлік қор 6331 төсек-орыннан тұрады.Жалпы облыс аумағында 2 шипажай, 1 оңалту орталығы, 94 қонақ үй, 2 мотель, 4 хостел, 14 демалыс базасы жұмыс істейді.Туристердің ерекше қызығушылығын тудыратын негізгі нысандар – «Сосновый бор» шипажайы, Наурызым қорығы және «Термопарк» кешені. Бұл нысандар қажетті инфрақұрылыммен қамтылған және көлік қатынасы да қолжетімді.Туризмді дамытудың маңызды буыны – санаторий-курорттық демалыс. Бүгінде облыста 2 шипажай мен 14 демалыс базасы қызмет көрсетуде.Емдеу-сауықтыру бағытындағы негізгі нысандар Алтынсарин ауданының курорттық аймағында орналасқан. Олардың қатарында «Сосновый бор» шипажайы, «Жайляу» сауықтыру-ойын-сауық кешені, «Мюнхен», «Бордағы ауыл» демалыс базалары бар.Аймақта сауықтыру туризмін дамытуға қолайлы әрі қызықты өзге де орындар бар екендігін атап өту қажет.Солардың бірі – Мендыкарин ауданындағы Қарабаев атындағы оңалту орталығы. Ол күрделі жөндеуден кейін өз қызметін қайта жалғастырды.Аймақта туризмнің әлі де аса кең танымал болмауына қарамастан, бұл сала біртіндеп дамып келеді: жаңа әуе рейстері ашылуда, инвестициялық жобалар іске асырылуда, экскурсиялар ұйымдастырылуда.Қазіргі уақытта облыста туризм саласында бірқатар инвестициялық жобалар жүзеге асырылуда. Соның ішіндегі ең ауқымдысы – Амангелді ауданында көпфункционалды туристік кешеннің құрылысы. Оның аумағында Үндістандағы Тәж-Махалдың, Мексикадағы Чичен-Ица ғимаратының, Эйфель мұнарасының көшірмелері тұрғызылған.Сонымен қатар, бұл жерде әлемде теңдесі жоқ 200 белгілі қазақстандық тұлғаның есімі жазылған Ұлттық жады қабырғасы орнатылған.Туристердің ыңғайы үшін аумақта қонақ үй, мейрамхана, жазғы амфитеатр, спорт және балалар алаңдары салынған. Жобаның жалпы құны – 3,5 млрд теңге, құрылысты ағымдағы жылы аяқтау жоспарланған.Аталған туристік нысан алдағы уақытта Торғай өңірінің басты туристік орталығына айналып, тек хабқа ғана емес, жақын аймақтардағы өзге де тарихи-мәдени және табиғи орындарға туристерді тартуға мүмкіндік береді.Аудан аумағында ғылыми қауымдастық пен туристердің зор қызығушылығын тудырып отырған бірегей ескерткіштер – Торғай геоглифтері орналасқан («Торғай свастикасы» Амангелді ауылынан 22 км, «Үштоғай шаршысы» 125 км қашықтықта).Сондай-ақ аудан кіреберісінде орналасқан «жүретін» Құмкешу бархандары да қонақтар үшін ерекше қызық.Күнделікті күйбеңнен алшақтап, тынығу үшін Денисов ауданында «Шаңырақ» демалыс базасының құрылысы жүріп жатыр. База Тобыл өзенінің бойында, Жоғарғы Тобыл су қоймасының аумағында орналасқан. Жобаның бірінші кезеңі аяқталып, екі жайлы жағажай, катамаран жалдау бекеті бар пирс, көлеңкелі және балалар алаңдары, «Балықшы ауылы» тұрғын кешенінде жыл бойы тұруға арналған 6 жайлы үй және 8 гриль-аймақ салынды.Облыс аумағында жыл бойғы «Баден Баден» атты жаңа термалды кешеннің құрылысы да жоспарланған. Жобаға франшиза сатып алынып, жер телімі бөлінген, болжамды құны – 3,5 млрд теңге. Жоспар бойынша ол 2028 жылға дейін іске асырылмақ.Сонымен қатар, Тобыл қаласында халықаралық «Courtyard by Marriott Kostanay» қонақ үй кешенінің құрылысы қолға алынуда. Жобаның құны – 9,8 млрд теңге, кешен 9 қабаттан, 141 нөмірден тұрады.Қостанай қаласында халықаралық «Holiday Inn» қонақ үй кешенінің құрылысы да жоспарланған. Жобаның құны – 9,0 млрд теңге, 100 нөмірден тұрады.Қостанай әуежайы аумағында бұрынғы жатақхана ғимараты қайта жөнделіп, қонақ үйге айналдырылуда, жоба құны – 600 млн теңге.2024 жылы Алтынсарин ауданында «MUNCHEN» демалыс базасының құрылысы жүзеге асырылып, оған 700 млн теңге жұмсалды.Ағымдағы жылы Арқалық қаласында бұрынғы автовокзал ғимараты қайта жөнделіп, қонақ үй кешеніне айналды. Жоба құны – 200 млн теңге.Жыл соңына дейін Алтынсарин ауданында «Green House» демалыс аймағының құрылысы аяқталады деп күтілуде, құны – 150 млн теңге.Сонымен бірге, Қостанай қаласында туристердің бос уақытын қызықты өткізу үшін «Осминог» аквапаркін қайта құру жобасы басталды. Жобаның құны – 11,2 млрд теңге, сыйымдылығы – 1200 адам. Жоспар бойынша жоба 2026 жылы аяқталады.Ақпарат көзі : https://www.gov.kz/memleket/entities/kostanay/press/news/details/1067260?lang=kk

Астана, 2025 жылғы 11 қыркүйек – Қазақстан Республикасы Сыртқы істер министрінің орынбасары Әлібек Бақаев Мажарстан Премьер-министрі Кеңсесінің Мемлекеттік хатшысының орынбасары – Премьер-министрінің Саяси директоры кеңсесінің басшысы Мартон Угрошдимен келіссөздер өткізді.Кездесу барысында сұхбаттастар Түркі мемлекеттері ұйымы (ТМҰ) аясындағы мәдени-гуманитарлық және экономикалық ынтымақтастықтың бірқатар мәселелерін талқылады. Жоғары білім, ғылым, жасанды интеллект және инновациялар саласындағы ынтымақтастықтың перспективаларына ерекше назар аударылды.Ә.Бақаев ҚР Президенті Қасым-Жомарт Тоқаевтың 2025 жылғы 8 қыркүйектегі Қазақстан халқына жасаған Жолдауын негізге алып, ҚР Үкіметі ел экономикасына ЖИ енгізуге үлкен көңіл бөлетінін және жоғарыда аталған бағыттар бойынша ынтымақтастыққа ашық екенін айтты.М.Угрошди ТМҰ-ға мүше мемлекеттердің университеттері арасындағы ынтымақтастықтың зор әлеуетіне назар аударып, осы мәселелерде Ұйым Хатшылығының маңызды үйлестіруші рөлін атап өтті.Экономикалық ынтымақтастық аясында тараптар Түркі инвестициялық қорын одан әрі дамыту мен нығайтудың өзекті мәселелері бойынша пікір алмасып, осы бағыттағы ынтымақтастықты жалғастыруға келісті.Ақпарат көзі : https://www.gov.kz/memleket/entities/mfa/press/news/details/1066726?lang=kk

Астана, 2025 жылғы 11 қыркүйек – Қазақстан Республикасы Сыртқы істер министрінің орынбасары Арман Исетов Финляндия Республикасының Қазақстандағы Елшісі Янне Хейсканенмен кездесу өткізді.Сұхбат барысында тараптар саяси, сауда-экономикалық, инвестициялық және мәдени-гуманитарлық салалардағы екіжақты ынтымақтастықтың қазіргі жағдайы мен келешегін талқылады.А.Исетов қазақ тарапының саяси диалогты одан әрі ілгерілетуге және экономикалық байланыстарды нығайтуға, соның ішінде Қазақстандағы инновациялық жобаларға фин компанияларының цифрлық технологиялар мен жасанды сананы пайдалана отырып қатысуына мүдделі екенін атап өтті.Сұхбаттастар халықаралық және өңірлік күн тәртібіндегі өзекті мәселелер, сондай-ақ БҰҰ мен ЕҚЫҰ аясындағы алдағы іс-шаралар бойынша да пікір алмасты.Кездесу қорытындысы бойынша тараптар Қазақстан мен Финляндия арасындағы екіжақты және көпжақты форматтағы белсенді өзара іс-қимылды жалғастыруға дайындықтарын растады.Ақпарат көзі : https://www.gov.kz/memleket/entities/mfa/press/news/details/1066693?lang=kk

Ішкі сауданы дамыту шараларын іске асыру аясында сауда саласындағы 400-ден астам кәсіпкер мемлекеттік қолдау алды. Қазақстан Республикасының Сауда және интеграция министрлігі сауда инфрақұрылымын жаңғырту, шағын және орта бизнестің бәсекеге қабілеттілігін арттыру үшін қолайлы жағдай жасау бағытында жүйелі жұмыс жүргізуде. Биылғы жылдың басынан бері субсидиялау аясында жалпы кредит сомасы 57,5 млрд теңгені құрайтын 418 жобаға қол қойылды. Төленген субсидиялардың жалпы сомасы 2 788 млн теңгені құрады. Сонымен қатар, кепілдендіру құралы бойынша кредит сомасы 8 млрд теңгені құрайтын 103 кепілдік беріліп, мемлекет тарапынан кепілдіктердің көлемі 3,6 млрд теңгені құрады. Аймақтардағы сауда инфрақұрылымын дамытуға ерекше көңіл бөлінуде. Шығыс Қазақстан облысында қазіргіуақытта мемлекеттік қолдау аясында ішкі сауда саласында шамамен 7 млрд теңге болатын 21 жоба жүзеге асырылуда. Базарларды жаңғыртудың Жол картасы аясында 2025 жылы Өскемен қаласында «Заря», «Заречный» және «Орталық» атты үш базарды жаңарту аяқталады. Оның ішінде «Заря» мен «Заречный» базарлары Сауда және интеграция министрлігінен мемлекеттік қолдау алды. Аймаққа жұмыс сапары барысында Сауда комитеті төрағасының орынбасары Ернұр Жәутікбаев жобалардың жүзеге асырылу барысымен танысып, сауда нысандарын аралап, сауда алаңдарын жаңғыртудағы оң динамикасын атап өтті. 2002 жылы пайдалануға берілген «Заря» - азық-түлік тауарлары басым универсалды бөлшек сауда базары болыып табылады. 2024 жылы мұнда орталық коммуникацияларға қосылған екі жаңа бір қабатты павильон салынды. Мемлекеттік қолдаудың арқасында базар дамып жатыр: 2025 жылы автотұрақ аймағы абаттандырылып, тағы екі павильонның құрылысы жүргізілуде. Нысан осы жылдың соңына дейін толық жаңғыртудан өтеді деп жоспарланған. 1999 жылдан бері жұмыс істеп келе жатқан «Заречный» базары да ауқымды жаңғыртудан өтіп жатыр. Оның аумағында 5 жабық ғимарат және бірнеше сауда қатары орналасқан. Өткен жылдан бастап стационарлық сауда нысанының құрылысы жүргізілуде, оны 2025 жылдың қыркүйегінде аяқтау жоспарланған. Инженерлік желілерді тарту және ішкі әрлеу жұмыстары қарқынды жүргізіліп жатыр. Нысан өз автотұрағымен қамтамасыз етілген. 2000 жылы пайдалануға берілген Орталық базар екі негізгі стационарлық ғимараттан тұрады, онда азық-түлік те, азық-түліктен тыс тауарлар да сатылады. Сонымен қатар аумағында павильондар мен сауда қатарлары орналасқан. Базарларды жаңғыртудың Жол картасы аясында бұл нысанда да жұмыстар жүргізілуде. «Сауда базарларын толық жаңғырту - Үкіметтің басым міндеттерінің бірі. Бұл - заң мен тәртіп жолы. Сауда министрлігі қажетті нормативтік-құқықтық базаны толық әзірледі. Енді сауда нысандары өз қызметін заң талаптарына сәйкестендіруі тиіс. Ең алдымен, бұл — бизнестің әлеуметтік жауапкершілігі. Келесі жылдың басынан бастап жаңғыртудан өтпеген базарлар жұмысын жалғастыра алмайды», - деді ҚР Сауда және интеграция министрлігінің Сауда комитеті төрағасының орынбасары Ернұр Жәутікбаев.ҚР Сауда министрлігі 2029 жылға қарай сауданың заманауи форматтарының үлесін 70%-ға жеткізуді жоспарлап отыр. Қазіргі уақытта бұл көрсеткіш 41%-ды құрайды. Сауда базарлары да заманауи стандарттарға көшуі тиіс, яғни өрт қауіпсіздігі мен санитарлық-эпидемиологиялық нормаларға сәйкес болуы, төлемкарталары арқылы салық түсімдерінің ашықтығын қамтамасыз етуі, сондай-ақ тұтынушыларға ыңғайлы автотұрақ аймақтарымен жабдықталуы қажет.Ақпарат көзі : https://www.gov.kz/memleket/entities/mti/press/news/details/1066605?lang=kk

Қазақстанда Baqylauda арнайы цифрлы сервисін енгізуге байланысты жұмыс жалғасып келеді. Аталған платформа онлайн режімде мемлекеттік қолдау түрлерін толық көруге мүмкіндік береді. Ведомство мемлекеттік қолдау түрлерін жедел қадағалау үшін олардың барлығын (бүгінде олардың жүзден астам түрі бара) біріктірді: мемлекеттік қаражат нақты қайда жұмсалып жатыр және оның нәтижесі қандай? Бұл тәсіл мемлекеттен бөлінетін қаражаттың тиімділігін арттыруы тиіс.ҚР Қаржы министрлігі Baqylauda сервисін Qoldau.kz (https://baqylauda.qoldau.kz) цифрлы платформасында орналастырды. Бүгінде жүйеге кейінгі 10 жылдағы мемлекеттік қолдау шаралары туралы деректер жүктеліп жатыр. Осы жұмыс аяқталған бойда арнайы талдау мемлекеттік қолдау құралдарының тиімді немесе тиімсіз екенін көрсетеді. Аталған жүйенің көмегімен жеңілдіктердің, субсидиялардың немесе басқа да құралдардың тиімділігін, оларды жекелеген салалар бойынша, операторлар және белгілі бір қолдау алушы кәсіпорын деңгейіне дейін «масштабтау» арқылы тексеріп, бағалауға болады.Кейінгі екі жылдағы мәліметтер әлі жүктелмегеніне қарамастан қазір жүйеде өзекті аналитикалық мәліметтер бар. Мәселен, 9 жылдың ішінде (2015 жылдан 2023 жылға дейін) мемлекеттік қолдау көлемі 9,94 трлн теңге мөлшерінде болған. Осы ретте бюджеттегі айтарлықтай шығын «ковид» кезеңінде «Жұмыспен қамту жол картасы» жобасына бөлінген кезде байқалған, шығын мөлшері шамамен – 973 млрд теңге. Екінші орында аграрлық секторға арналған техника мен жабдықтарды жеңілдетілген лизингпен алуға арналған шығындар тұр – 920 млрд теңге. Үшінші орынды ауыл шаруашылығы саласы түйіндеп тұр – асыл тұқымды мал шаруашылығын дамытуға 675 млрд теңгеден астам қаражат жұмсалды. Сол секілді ауыл шаруашылығына қатысты тағы бір бағдарлама – «Кең Дала» бойынша 650 млрд теңге жұмсалған.«Көптеген компания, әсіресе аграрлық салада түрлі мемлекеттік бағдарламалар мен қолдау шараларын алып, пайдаланады немесе сан алуан операторлар мен түрлі министрліктер арқылы қолдауға ие болады. Бүгінгі күнге дейін бірыңғай база болған жоқ. Сондықтан да бұл шығыстардың тиімділігін бағалау қиынға соқты. Енді мемлекет мұны анық байқайтын болады. Айталық, салық бойынша, өнімділік жағынан, сондай-ақ жұмыс орындарын ашу сынды көрсеткіштер бойынша өсімі жоқ, бірақ жылма-жыл ондаған млн теңге алатын компанияға қолдау көрсету қаншалықты дұрыс?!», деді Қаржы вице-министрі Әсет Тұрысов.Оның айтуынша, Baqylauda электронды сервисі – бірінші деңгейлі жүйе. Ол кәсіпкерді тексеріп, оның белгіленген критерийлерге сәйкестігін бағалайды. Қазір онда төрт негізгі стоп-фактор жұмыс істеп тұр: терроризмді қаржыландыруға байланысты адамдардың тізімде бар-жоқтығы, жалған кәсіпкерлік белгілерінің болмауы, банкроттық фактілері, сондай-ақ бұрын алынған мемлекеттік қолдау шаралары бойынша орындалмаған міндеттемелер. Мұндай факторлар болған жағдайда – жүйе бұл ақпаратты көрсетілетін қызметті берушіге, яғни мемлекеттік органға немесе операторға көрсетеді. Мысалы, Ауыл шаруашылығы министрлігі немесе Азық-түлік корпорациясына. Өз кезегінде қызмет көрсетуші бизнесті мақұлдау туралы немесе мемлекеттік қолдаудан бас тарту туралы шешімді дербес қабылдайды.«Әлбетте, мысалы ауыл шаруашылығында көп нәрсе ауа-райына, нарықтағы құбылмалыққа байланысты екенін жақсы түсінеміз. Бірақ бағалау бір жылда емес, бірнеше жылдан кейін жүргізіледі. Сонымен қатар жүйе экономика салаларының көрсеткіштерін бағалап, тұтастай ескеріп нәтиже шығарады», деп түсіндірді Әсет Нұрланұлы.Мемлекеттік қолдау шараларын пайдалану мен оларды алатын тұлғаларға мониторинг жасайтын Baqylauda сервисі ҚР Президентінің «Экономиканы ырықтандыру жөніндегі шаралар туралы» 2024 жылдың 8 мамырдағы №542 Жарлығын орындау үшін кәсіпкерлікке мемлекеттік қолдау шараларына ашық және тең қолжетімділікті қамтамасыз ету және базалық өлшемдерге сәйкес мемлекеттік қолдау шараларын алушыларды іріктеу рәсімін автоматтандыру үшін іске асырылды.Осы жобаны Қаржы министрлігіне қарасты «Ақпараттық-есепке алу орталығы» АҚ-ның мамандары әзірлеп шыққан.Ақпарат көзі : https://www.gov.kz/memleket/entities/minfin/press/news/details/1066597?lang=kk

Бүгін Қазақстанда Жергілікті әскери басқару органдарының күні атап өтілуде. Дәл осы күні 1991 жылы Президенттің Жарлығы күшіне еніп, Әскери комиссариат республикалық орган мәртебесін алды және оның қарамағына облыстық әскери комиссариаттар берілді. Жергілікті әскери басқару органдарын әдетте Қорғаныс министрлігінің «қоғамдық қабылдауы» деп атайды. Бұл мамандар жұмылдыру ресурстарының есебін жүргізеді, мерзімді қызметке және келісімшарт бойынша шақыруды ұйымдастырады, әкімдіктермен және қоғамдық ұйымдармен өзара іс-әрекет жасайды, одан бөлек жастарды әскери-патриоттық тәрбиелеумен де айналысады.Соңғы жылдары цифрландыруға ерекше көңіл бөлініп отыр. Бүгінгі күні процедуралардың көпшілігі автоматты түрде өтеді:17 жастағы балаларды тіркеу;әскерге шақыруды кейінге қалдыру немесе босату;азаматтың жеке қатысуынсыз жаңа тұрғылықты жеріне тіркеу.2025 жылдың 16 шілдесінен бастап әскерге шақырылушыларға ресми түрде тиісті хабарлау әдісі ретінде танылған SMS-хабарламаларды енгізу тағы бір қадам болды. Әскери есепке алу және әскерге шақыру туралы барлық ақпарат eGov және mGov порталдарындағы «жеке кабинетте» қолжетімді.Жергілікті әскери басқару органдары қоғам мен армия арасындағы байланыс көпірі болып қала отырып, елдің жұмылдыру дайындығын қамтамасыз етуге және қорғаныс қабілетін нығайтуға айтарлықтай үлес қосуды жалғастырып келеді.Ақпарат көзі : https://www.gov.kz/memleket/entities/mod/press/news/details/1066559?lang=kk

Алматы облысында 2025–2026 жылдардағы жылыту маусымына дайындық жұмыстары аяқталуда. Өңірде қазандықтар мен жылу желілеріне жөндеу жүргізіліп, жаңа қазандықтар салынуда, көмір мен сұйық отын жеткізіліп жатыр.Орталықтандырылған жылумен қамту Іле, Талғар, Балқаш, Еңбекшіқазақ және Қарасай аудандарында, сондай-ақ Қонаев пен Алатау қалаларында жұмыс істейді. Жылу желілерінің жалпы ұзындығы – 176 шақырым. Облыста 18 қазандық пен жалпы жылу қуаттылығы 457,5 Гкал болатын 66 блок-модульді қазандық бар.2065 көпқабатты тұрғын үйдің 1371-і (66,4%) жылумен қамтылған. Әлеуметтік салада 51 нысан (4,7%) орталықтандырылған жылумен жабдықталған. Қалған нысандар автономды қазандықтар мен баламалы отын түрлерін пайдаланады: газ – 29,7%, сұйық отын – 36,8%, қатты отын – 23,8%.Дайындық жұмыстары мамыр айында басталған. Халық пен әлеуметтік нысандарға отын жеткізу көлемдері бекітілген. Халықтың көмірге қажеттілігі – 696 мың тонна, ал әлеуметтік нысандарға 13,4 миллион литр сұйық және 4,6 мың тонна қатты отын қарастырылған. Бүгінде жеткізу жұмыстары кестеге сәйкес жүргізілуде.Жылу және электр желілері жаңартылып жатыр. Суық түскенге дейін 2,7 шақырым жылу желісін ауыстыру жоспарланған, оның 83%-ы қазірдің өзінде жаңартылды. Барлығы 18 орталықтандырылған және 81 блок-модульді қазандық дайындалады, оның ішінде 15-і жаңа. Еңбекшіқазақ ауданында 3, Талғар ауданында 12 блок-модульді қазандық салынды.Сонымен қатар, 30 қазандық жөндеуден өтті, оның ішінде 5-і күрделі, 25-і ағымдағы жөндеуден өтті.Энергетикалық инфрақұрылымды жаңғырту басым бағыттардың бірі болып қала береді. 148 қосалқы станса мен 1 626 шақырым электр желісін қайта жаңарту жоспарланған. Оның ішінде 391 шақырымы бюджет есебінен (Алатау, Іле және Талғар аудандарында), ал 1 235 шақырымы энергия кәсіпорындарының қаражаты есебінен, соның ішінде «АЖК» АҚ тарапынан қаржыландырылады. Бұл жобаларды іске асыру желілердің тозу деңгейін 72%-дан 66%-ға дейін төмендетуге мүмкіндік береді.Дайындық пен іске қосу-реттеу жұмыстары биылғы жылдың қазан айына дейін толық аяқталмақ.Ақпарат көзі : https://www.gov.kz/memleket/entities/almobl/press/news/details/1066374?lang=kk

Алматы облысы Райымбек ауданына қарасты Қызылшекара ауылындағы К. Байшығанұлы атындағы орта мектепке күрделі жөндеу жұмыстары жасалады. 1979 жылы салынған бұл білім ошағы осы уақытқа дейін бірде-бір рет толық жаңартудан өтпеген.Мектептің жобалық қуаттылығы – 640 орын. Жалпы аумағы – 3254 шаршы метр, жер телімі 5,2 гектарды құрайды. Білім ордасында 38 мұғалім қызмет етеді, қазіргі таңда 227 оқушы білім алуда. Сондай-ақ мектеп жанында шағын орталық жұмыс істейді.Аудан әкімінің орынбасары Жанарбек Жантөреұлының айтуынша, жобалық-сметалық құжаттама әзірленіп, мемлекеттік сараптамадан өткен. Жобаның жалпы құны 1 млрд 600 млн теңгені құрайды.— «Мектеп 1979 жылы салынған, содан бері күрделі жөндеу жүргізілмеген. Биыл оқушылар саны 25 балаға артты. Бұл – жергілікті тұрғындармен қатар қоныс аударған азаматтар мен шекара қызметінің әскери қызметкерлерінің балалары есебінен көбейіп отыр. Сондықтан күрделі жөндеу жұмыстарының жүргізілуі аса қажет», — деді аудан әкімінің орынбасары.Алматы облысының әкімі Марат Елеусізұлы Сұлтанғазиев жергілікті атқарушы органдарға мектеп ғимаратын тиімді пайдалану мәселесін қарастыруды тапсырды.— «Күрделі жөндеу жұмыстары білім беру сапасын арттыруға және оқу процесінің жағдайын жақсартуға мүмкіндік береді. Дегенмен ғимараттың көлемі өте үлкен. Жобалық қуаты 640 орынға есептелгенімен, қазіргі оқушылар саны әлдеқайда аз. Сондықтан бос тұрған бөлмелерді халық игілігіне жарайтындай етіп бейімдеп, тиімді пайдалану қажет», — деп атап өтті өңір басшысы. Жоспарланған жөндеу жұмыстары Қызылшекара ауылының әлеуметтік дамуына және білім беру саласының сапасын көтеруге елеулі үлес қоспақ.Ақпарат көзі : https://www.gov.kz/memleket/entities/almobl/press/news/details/1066361?lang=kk

Астана, 2025 жылғы 10 қыркүйек – Қазақстан Республикасы Сыртқы істер министрлігінде «Орталық Азиядағы мүгедектігі бар әйелдердің мүдделерін ескере отырып Орнықты даму мақсаттарына қол жеткізу» атты халықаралық конференция өтті. Бұл іс-шара Финляндияның «Кюннюс» қауымдастығы қолдаған Орталық Азияның мүгедектігі бар әйелдер ұйымдары желісі жобасының қорытынды кезеңі болды.Іс-шараны «Шырақ» мүгедектігі бар әйелдер қауымдастығы, Орталық Азия мүгедектігі бар әйелдер желісі, ҚР Сыртқы істер министрлігі, ҚР Президенті жанындағы Әйелдер істері және отбасылық-демографиялық саясат жөніндегі ұлттық комиссия, «Кюннюс» қауымдастығы және Астанадағы ЕҚЫҰ Бағдарламалар офисі бірлесіп ұйымдастырды.Конференция барысында Орталық Азиядағы мүгедектігі бар әйелдер ұйымдарының жұмыс тәжірибесі қарастырылып, тақырыптық бағыттар бойынша талдау жасалды және мүгедектігі бар әйелдер мен қыздардың құқықтарын қамтамасыз ету тұрғысынан Орнықты даму мақсаттарына қол жеткізу жөнінде ұсыныстар берілді.Қатысушылар алдында сөйлеген сөзінде ҚР Парламенті Сенаты Төрағасының орынбасары Ольга Перепечина Орнықты даму мақсаттарының болашаққа бағытталған әмбебап күн тәртібі екенін атап өтті. «Алайда оларды іске асыру халықтың осал топтарының мүдделерін ескермей мүмкін емес. Мүгедектігі бар әйелдер мен қыздар – бұл бүкіл әлем бойынша білімге, медицинаға, жұмыспен қамтуға және қоғамдық өмірге тең қолжетімділігі болуы тиіс миллиондаған азаматтар. Сондықтан біздің ортақ борышымыз – ешкімнің назардан тыс қалмауын және мүмкіндіктерден шет қалмауын қамтамасыз ету», – деді ол.Өз кезегінде ҚР Сыртқы істер министрлігінің Ерекше тапсырмалар жөніндегі елшісі Алуа Надиркулова инклюзия қағидаттарын ілгерілету және Орнықты даму мақсаттарына қол жеткізу Қазақстан үшін басты басымдықтар болып қала беретінін атап өтті. «Біз мемлекеттердің, халықаралық ұйымдардың және азаматтық қоғамның күш-жігерін біріктіру арқылы мүмкіндігі бар әйелдер мен қыздар өзін-өзі танытуға және өмірдің барлық салаларына белсенді қатысуға тең мүмкіндіктерге ие болатын инклюзивті қоғам құруға болатынына сенімдіміз. Қазақстан ынтымақтастыққа және озық тәжірибе алмасуға ашық болып, осы ортақ іске өз үлесін қосуды жалғастыруға дайын», – деді дипломат.Конференция Орталық Азия елдерінің Орнықты даму мақсаттарын іске асыруға, БҰҰ-ның Мүгедектер құқығы туралы конвенциясының және Әйелдерге қатысты кемсітушіліктің барлық нысандарын жою туралы БҰҰ конвенциясының ережелерін орындауға бағытталған халықаралық міндеттемелерін орындауға елеулі үлес қосады. Сондай-ақ бұл іс-шараға қолдау көрсету ЕҚЫҰ-ның адам құқықтары, гендерлік теңдік және инклюзия саласындағы басымдықтарды ілгерілетуге қосқан үлесін, ЕҚЫҰ Сыртқы істер министрлері кеңесінің шешімдері мен Ұйымның стратегиялық құжаттарында, соның ішінде Хельсинки қорытынды актісі мен 2004 жылғы Гендерлік теңдікті ілгерілету жөніндегі іс-қимыл жоспарына бекітілгенін көрсетеді.2005 жылдан 2025 жылға дейін Орталық Азия мүгедектігі бар әйелдер желісі серіктестерімен бірге мүгедектігі бар әйелдердің теңдігін, құқықтары мен мүмкіндіктерін ілгерілету бағытында жұмыс істеп келеді.Желі ұлттық және халықаралық деңгейде мүгедектігі бар әйелдердің құқықтарын қорғау жөніндегі адвокация жобаларын, мүгедектігі бар әйелдердің репродуктивтік құқықтарын іске асыру, мүгедектігі бар қыздарға арналған Тәуелсіз өмір мектептерін ұйымдастыру, мүгедектігі бар әйелдерге қатысты теріс стереотиптерді өзгерту, зорлық-зомбылықтан қорғау және көшбасшылық бойынша білім беру бағдарламаларын әзірледі.Ақпарат көзі : https://www.gov.kz/memleket/entities/mfa/press/news/details/1066359?lang=kk

Астана, 2025 жылғы 11 қыркүйек – Қазақстан Республикасы Премьер-министрінің орынбасары – Сыртқы істер министрі Мұрат Нұртілеу Өзбекстан Республикасының Сыртқы істер министрі Бахтиёр Саидовпен телефон арқылы сөйлесті.Сыртқы саяси ведомстволардың басшылары екіжақты қатынастардың өзекті мәселелерін және олардың одан әрі даму перспективаларын, сондай-ақ биік және жоғары деңгейлерде қол жеткізілген уағдаластықтардың іске асырылу барысын талқылады. Қазақстан мен Өзбекстан арасындағы стратегиялық серіктестік пен одақтастықты достық пен тату көршілік рухында жан-жақты нығайтуға өзара дайындық расталды.Тараптар өңірлік кооперацияны, сондай-ақ Орталық Азиядағы тұрақтылықты нығайтуға бағытталған бірлескен күш-жігерді тереңдетудің маңыздылығын атап өтіп, Таяу Шығыстағы жағдайды қоса алғанда, халықаралық күн тәртібіндегі өзекті мәселелер бойынша «сағаттарын теңестірді».Сұхбат барысында министрлер ағымдағы жылдың соңына дейін жоспарланған алдағы іс-шаралар кестесін де қарастырды. Ақпарат көзі : https://www.gov.kz/memleket/entities/mfa/press/news/details/1066344?lang=kk

Райымбек ауданында шекара қызметі қызметкерлеріне арналған жаңа тұрғын үйдің құрылысы аяқталды. Салтанатты түрде пәтер кілттері Нарынқол шекара отрядында табысталды.Тұрғын үйлердің құрылысы 2024 жылдың қараша айында басталып, биыл толық аяқталды. Әрбір пәтердің ауданы – 70 шаршы метр, заманауи талаптарға толық сәйкес келеді. Жобаның жалпы құны 124,3 млн теңгені құрады, қаржыландыру облыс әкімдігінің қаражаты есебінен қамтамасыз етілді.Шараға Алматы облысының әкімі Марат Сұлтанғазиев қатысты. Ол әскери қызметкерлерді жаңа баспанамен құттықтап, бұл мемлекет тарапынан ел тәуелсіздігі мен аумақтық тұтастығын қорғап жүрген азаматтарға көрсетілген қамқорлықтың айқын көрінісі екенін атап өтті.— "Бүгін біз тек пәтер кілттерін емес, сонымен қатар мемлекеттің және халықтың ризашылығы мен сенімін тапсырып отырмыз. Мемлекет басшысы Қасым-Жомарт Тоқаев атап өткендей, шекарашылар – мемлекеттіліктің берік тірегі. Бұл үйлер – сіздердің адал еңбектеріңіздің және мінсіз қызметтеріңіздің жемісі. Жаңа жағдайлар отбастарыңыздың берік негізіне айналып, табысты болашаққа жол ашады деп сенемін", — деді облыс әкімі.Нарынқол шекара отрядының бастығы, подполковник Айдос Айтахуновтың айтуынша, жаңа үйлердің салынуы шекара қызметінің инфрақұрылымын жақсартуға бағытталған кең ауқымды жұмыстың бір бөлігі болып табылады. Бұл жұмыстарды Алматы облысы мен Райымбек ауданы әкімдіктері бірлесіп жүзеге асыруда.— "Бұған дейін мұнда тұрғын үйлер болғанымен, жаңа үйлер заманауи стандарттарға толық сай салынды. Бүгін алты отбасы жаңа пәтермен қамтамасыз етілді, кілттерді оларға облыс әкімі мен шекара қызметінің басшылығы жеке табыстады. Жобаны іске асыруға атсалысқан барша азаматтарға алғыс білдіреміз", — деді Айдос Айтахунов.Жаңа тұрғын үйлер әскери қызметшілердің әлеуметтік жағдайын жақсартып қана қоймай, олардың қызметтік міндеттерін сапалы орындауына да қосымша мүмкіндік береді.Айта кетейік, Нарынқол шекара отрядының жауапкершілік аймағы Қырғыз Республикасымен шектесетін 61 шақырымды және Қытай Халық Республикасымен шектесетін 50 шақырымды қамтиды. Ақпарат көзі : https://www.gov.kz/memleket/entities/almobl/press/news/details/1066177?lang=kk

Алматы облысында облыстық маңызы бар «Нарынқол – Сүмбе» автожолының жөндеу жұмыстары мерзімінен бұрын аяқталуда. Жұмысшылар қар түспей тұрып үлгеруге тырысуда.Жөндеу жұмыстары 2024 жылдың мамыр айында басталып, жоспар бойынша 2025 жылдың желтоқсан айында аяқталуы тиіс еді. Мердігер компанияның мәліметінше, жолшылар жұмысты белгіленген мерзімнен ерте бітіреді.L-VESA құрылыс компаниясы директорының орынбасары Алексей Фоминнің айтуынша, бүгінде жөндеу жұмыстарының басым бөлігі аяқталған:«Біз «Нарынқол – Сүмбе» жолына орташа жөндеу жүргізіп жатырмыз. Жөндеуден өтетін учаскенің жалпы ұзындығы – 38 шақырым. Қазіргі уақытта 11 шақырымы ғана қалды. Жаңа жабынның қалыңдығы – 6 сантиметр. Жұмысты осы айда аяқтауды жоспарлап отырмыз. Нысанда 18 жұмысшы және грейдер, самосвалдар мен ескі асфальтты қырып, жаңасын төсеуге арналған 8 арнайы техника жұмылдырылған».Жобаның жалпы құны 1,9 млрд теңгені құрайды. Жөндеу жұмыстарының сапасы мен барысына «КазАрт-Құрылысы» ЖШС техникалық қадағалау жүргізуде.Ақпарат көзі : https://www.gov.kz/memleket/entities/almobl/press/news/details/1066154?lang=kk

10-11 қыркүйекте Гонконгта "Бір белдеу, бір жол" бастамасының 10-саммиті өткізіледі. Ұлттық экономика вице-министрі Ерлан Сағнаев саяси диалог жөніндегі сессияда сөйлеген сөзінде осыдан 12 жыл бұрын халықаралық ынтымақтастықтың негізгі факторына айналған осы жаһандық бастама Қазақстанда жарияланғанын атап өтті."Осы уақыт ішінде Қазақстан мен Қытай екіжақты қатынастарды жаңа деңгейге көтеріп, жаңа Жібек жолы кеңістігіндегі инвестициялық ынтымақтастыққа қуатты серпін берді. Бүгінде біз үшін Қытай - Еуропа контейнерлік бағытын дамытуды жалғастыру маңызды. Осыған байланысты Қазақстан транзиттік-логистикалық инфрақұрылымды белсенді дамытуда", - деді Ерлан Сағнаев.Ол Қытайдан Еуропаға Орталық Азия арқылы жүк тасымалдау көлемі, әсіресе, "алтын дәліз" аталатын Транскаспий халықаралық көлік бағытын бірлесіп дамытудың арқасында қарқынды өсіп келе жатқанын атап өтті."Қытай жүктері транзитінің одан әрі тұрақты өсуін қамтамасыз ету мақсатында біз Гонконг компанияларын көлік инфрақұрылымын дамытуға және Каспий теңізінің қазақстандық жағалауында "Орталық Азия – Қытай"форматында бірлескен жобаларды іске асыруға қатысуға шақырамыз. Қазақстан осы мәселе бойынша қытайлық серіктестермен ынтымақтастықты арттыруға дайын",-деді вице-министр.ТХКБ өткізу қабілеті 6 млн тонна. 2024 жылғы қорытынды бойынша тасымалдау көлемі 4,5 млн тонна. 2025 жылғы 9 маусымда "ҚТЖ" АҚ және "Lianyungang Port" АҚ-мен бірлесіп Ақтау портында ТХКБ бағыты бойынша жылына 500 мың транзиттік контейнерді өңдеуге қабілетті контейнерлік хаб іске қосылды.Саммит барысында Ерлан Сағнаев Гонконг сауда және экономикалық даму министрі Алджернон Яумен және АӘА валюта басқармасы басшысының орынбасары Артур Йенмен кездесулер өткізді. Тараптар сауда-экономикалық өзара іс-қимылдың перспективаларын, соның ішінде "Бір белдеу, бір жолмен”байланысты жаңа бастамаларды талқылады.Вице-министрдің айтуынша, Қазақстан тұрақты экономикалық өсуді көрсетіп отыр: бірінші жартыжылдық қорытындысы бойынша ЖІӨ 6,2% – ға, ал негізгі капиталға салынған инвестиция 19,3%-ға ұлғайды. Бұл нәтижелер Қазақстанның инвесторлар үшін тартымды және аймақтағы сенімді серіктес болып қала беретінін растайды.Қытай Қазақстанның ең ірі сыртқы сауда әріптесінің бірі. 2024 жылғы екіжақты тауар айналымы 43 млрд доллардан асса, 2025 жылғы бірінші жартыжылдықта 21,8 млрд доллар. Екі ел үкіметі Қазақстан мен Қытай көшбасшыларының бұл көрсеткішті 80 млрд долларға дейін жеткізу жөніндегі тапсырмасын іске асыру бойынша жұмыс жүргізуде.Ақпарат көзі : https://www.gov.kz/memleket/entities/economy/press/news/details/1066076?lang=kk

Қорғаныс министрі «Жауынгерлік достастық – 2025» тактикалық оқу-жаттығуының қорытындысын шығардыҚарағанды облысындағы «Сарышаған» полигонында бірлескен «Жауынгерлік достастық – 2025» тактикалық оқу-жаттығуы сәтті аяқталды. Оқу-жаттығудың жауынгерлік атыстарды қамтыған шешуші кезеңін еліміздің Қорғаныс министрі, Қарулы күштер түрлерінің бас қолбасшысылары, әскер тектерінің қолбасшылары тікелей бақылады.Бірлескен маневрлерге 1500-ден астам әскери қызметші, 200-ге жуық әскери және арнайы техника, сондай-ақ 30-дан аса ұшу аппараттары жұмылдырылды. Әуе техникасы құрамында көп мақсатты Су-30СМ жойғыш ұшақтары, Су-25 шабуылдаушы ұшақтары мен әртүрлі типтегі тікұшақтар болды.Авиация мен әуе шабуылына қарсы қорғаныс әскерлерінің үйлесімді іс-қимылы барысында ұшқыштар шартты қарсыластың әуе шабуылына қарсы қорғаныс жүйесін бұзып өту, жақын қашықтықтағы маневрлік әуе шайқасы, жерүсті нысандарын жою және жаппай әуе соққысын тойтару секілді тактикалық эпизодтарды пысықтады.Шартты қарсыластың радиотехникалық бөлімшелеріне барлау-соққы жасаушы дрондармен соққы берілді. Әуе барлауы мен шабуыл мақсатында SkyLark-1LEX және Anka ұшқышсыз ұшу аппараттары қолданылды. Ал әуе шабуылына қарсы тұру үшін С-300ПС, С-125, Бук-М2Э және ТОР-М2К зениттік-зымыран кешендері пайдаланылды.Оқу-жаттығу аясында алғаш рет «әуе-әуе» санатындағы басқарылатын Р-60М зымырандары сәтті сынақтан өтті. Сонымен қатар, әуе шабуылына қарсы операция барысында әскери оқу орындарының курсанттары құрастырған дрондардың мүмкіндіктері көрсетілді. Сынақтар зымырандардың дәлдігі мен тиімділігін, сондай-ақ қазіргі заманғы ұрысқа авиациялық бөлімшелердің дайын екендігін дәлелдеді.Қарсыластың ұшқышсыз ұшу аппараттарын басу үшін «Алмаз» радио және радиотехникалық бақылау әрі нысана көрсету кешені, дрондарға қарсы радиоэлектрондық күрес жүйесі – «Янтарь», ұшқышсыз аппараттардың спутниктік навигациясын тұншықтыратын «Маржан» жүйесі, сондай-ақ «Гроза-Р2» және «Меруерт» антидрондық қарулары қолданылды.Төмен жылдамдықпен ұшатын және көзге түсуі қиын нысандарды жоюда ПЗРК «Игла», «Стрела-1М», «Стрела-10» және «Шилка» зениттік кешендерінің есептоптары өз шеберлігін көрсетті.Оқу-жаттығудың жабылу салтанатында Қорғаныс министрі жауынгерлік дайындықтың жоғары деңгейін, есептоптардың үйлесімді әрекетін атап өтті.Оқу-жаттығудан кейін авиация генерал-лейтенанты Дәурен Қосанов Сарышаған және Приозерск гарнизондарындағы әскери бөлімдерге барып, командирлердің есептерін тыңдап, әскери нысандарды аралады. Қорғаныс министрі оқу-жаттығу міндеттерін сапалы орындау, әскери инфрақұрылым нысандарын жұмыс күйінде ұстау, қару-жарақ пен оқ-дәрілерді сақтау тәртібін қатаң сақтау жөнінде нақты тапсырмалар берді.Ақпарат көзі : https://www.gov.kz/memleket/entities/mod/press/news/details/1065945?lang=kk

Алматы облысында ауыл шаруашылығы қарқынды дамып келеді. Бүгінде өңірде 29,0 мың ауыл шаруашылығы тауар өндірушісі жұмыс істейді. Оның ішінде:1490 – заңды тұлға,845 – жеке кәсіпкер,26 696 – шаруа қожалығы.Ағымдағы жылы саланы қолдауға 27,7 млрд теңге субсидия бөлінді.Ауыл шаруашылығының жалпы өнімі 283,8 млрд теңгені құрады. Нақты көлем индексі – 103,3%, оның ішінде:өсімдік шаруашылығы – 47,9 млрд теңге (НКИ – 107,8%),мал шаруашылығы – 235,7 млрд теңге (НКИ – 102,4%).Облыс жалпы республикалық ауыл шаруашылығы өндірісінде 11,8% үлеспен 2-орында тұр.2025 жылы ауыл шаруашылығы дақылдарының жер көлемі 434,1 мың гектарды құрады, бұл өткен жылмен салыстырғанда 10,2 мың гектарға артық. Оның ішінде:дәнді және дәнді-бұршақты дақылдар – 171,7 мың га,жүгері – 50,8 мың га,күріш – 6,0 мың га,майлы дақылдар – 32,2 мың га,картоп – 10,4 мың га,көкөніс – 15,8 мың га,бақша дақылдары – 2,3 мың га,мал азықтық дақылдар – 201,4 мың га.Тыңайтқыш және тұқым шаруашылығы2024–2028 жылдарға арналған Жол картасына сәйкес облысқа 60,8 мың тонна минералды тыңайтқыш енгізу жоспарланған. Бүгінде 45,3 мың тоннасы алынды (74,5%).Сондай-ақ, облыста 20 тұқым өсіруші және 9 тұқым өткізуші жұмыс істейді. 2025 жылғы өнімге 63,0 мың тонна тұқым қоры дайындалған.2030 жылға дейін су үнемдеу технологияларын 186,6 мың гектарға дейін ұлғайту жоспарланған. 2025 жылы 50 мың гектарға енгізу межеленген. Қазірдің өзінде 22 318 гектарда (оның ішінде тамшылатып суару – 11 123 га, жаңбырлатып суару – 11 195 га) жаңа технологиялар қолданылуда.Ірі қара мал саны 617,8 мың басқа жетіп, 41,7%-ға артты. Қой мен ешкі – 2,7 млн бас, жылқы – 247,6 мың бас, құс – 9,5 млн басқа жетті.Өндірілген өнім көлемі:ет – 143,0 мың тонна,сүт – 162,8 мың тонна,тауық жұмыртқасы – 276,9 млн дана.Облыс республикада ет өндірісі бойынша – 1 орында (14,0%), құс еті өндірісі бойынша да – көшбасшы (30,0%).2025–2027 жылдарға арналған Жол картасы шеңберінде құны 317,2 млрд теңге болатын 36 жоба іске асырылуда, нәтижесінде 734 тұрақты жұмыс орны ашылады. Биылғы жылы 33,5 млрд теңгеге 17 жоба жүзеге асырылады. Ақпарат көзі : https://www.gov.kz/memleket/entities/almobl/press/news/details/1065870?lang=kk

2025 жылғы 10 қыркүйекте Министрліктің әдеп жөніндегі уәкілі заң департаментімен бірлесіп «Қоғам алдында сөйлеу, БАҚ, әлеуметтік желілер және сыбайлас жемқорлықтың алдын алу» тақырыбында семинар өткізді.Іс-шараның мақсаты – мемлекеттік қызметшілердің құқықтық және этикалық мәдениетін нығайту, азаматтармен, бұқаралық ақпарат құралдарымен және цифрлық кеңістікте өзара әрекеттесу кезінде олардың жауапкершілігін арттыру.Семинар барысында мына мәселелерге ерекше назар аударылды:- Қоғам алдында сөйлеу әдебі және цифрлық мәдениет. Қатысушыларға интернеттегі әңгімелерде, ресми сөз сөйлеулерде және әлеуметтік желілердегі жарияланымдарда сыпайы әрі дұрыс үн қолдану ұсынылды. Бұл – цифрлық этиканың негізгі талабы.- Лудоманияға қарсы іс-қимыл. Мемлекеттік қызметшілердің құмар ойындарға қатысуы және ойынханаларға баруы жол берілмейтіні атап өтілді.- Дискриминацияға жол бермеу. Әйелдерге қатысты кез келген кемсіту түрлеріне қатаң тыйым салынатынына және барлық азаматтарға жынысына, әлеуметтік жағдайына қарамастан құрметпен қарау қажеттігіне назар аударылды.- Ар-ождан және діни сенім бостандығы. Қызметкерлерді немесе азаматтарды діни ұйымдардың жұмысына қатысуға мәжбүрлеу – этикалық нормалар мен заңнамаға қайшы келетін өрескел бұзушылық екендігі ерекше атап өтілді.Семинар қызметтік іссапарларда, тексерулер жүргізу кезінде және қызметтен тыс уақытта сыбайлас жемқорлық тәуекелдерінің алдын алу жөніндегі практикалық мәселелерді талқылаумен, сондай-ақ заңнамада көзделген шектеулер мен тыйымдарды түсіндірумен аяқталды.Ақпарат көзі : https://www.gov.kz/memleket/entities/mti/press/news/details/1065736?lang=kk

Енді қостанайлықтар өз шақырған жедел жәрдемнің қозғалысын картадан нақты уақыт режимінде бақылай алады. Бұл шешім Қазақстан Республикасының Денсаулық сақтау министрлігі, Қостанай облысының әкімдігі және Yandex Qazaqstan компаниясының бірлескен жұмысы нәтижесінде іске асырылды. Бригаданың қозғалысын браузердегі картадан көруге болады. Жаңа мүмкіндік диспетчерлерге түсетін жүктемені айтарлықтай азайтуы тиіс. Бұл туралы Yandex Qazaqstan басшысы Тимур Шалекенов Қостанай облысының әкімі Құмар Ақсақалов және Цифрлық даму вице-министрі Дмитрий Мунмен өткен QostanAI Investment Forum барысында айтты. Шақырылған жедел жәрдемнің қозғалысын картадан көру мүмкіндігі әзірге браузерде қолжетімді болады, ал болашақта — Яндекс Go қосымшасына енгізіледі деп жоспарлануда. Бұл да диспетчерлердің жұмысын жеңілдетеді деп күтіледі. Жедел жәрдем шақырылғаннан кейін жүйе автоматты түрде картаға сілтемесі бар SMS жолдайды. Сол сілтеме арқылы бригаданың нақты уақыттағы қозғалысын көруге болады. Бұл шешім Яндекс Картаның JavaScript API технологиясы негізінде жүзеге асырылған. Жаңа жоба шұғыл қызметтердің жұмысын барынша ашық етуге, диспетчерлердің жүктемесін азайтуға және халықпен өзара әрекеттесуді жақсартуға бағытталған. Алғашқы кезеңде қызмет Қостанай аумағындағы кейбір шақыруларға қолжетімді болса, алдағы уақытта барлық шақыртуға енгізу жоспарланып отыр.Ақпарат көзі : https://www.gov.kz/memleket/entities/kostanay/press/news/details/1065689?lang=kk

Алматы облысы елдегі цифрлық трансформацияға қарқын беріп отырған жетекші өңірлердің бірі саналады. Бұл бағыт өңірде қазірдің өзінде жүзеге асырылып жатқан нақты жобалар арқылы дәлелденуде.Президент Қасым-Жомарт Тоқаевтың «Жасанды интеллект дәуіріндегі Қазақстан: өзекті міндеттер және оларды цифрлық трансформация арқылы шешу жолдары» атты Жолдауын талқылауға арналған кеңейтілген отырыста өңірде жүріп жатқан өзгерістер мен алдағы жоспарлар жан-жақты қаралды. Жиынға Алматы облысының әкімі Марат Сұлтанғазиев төрағалық етті.Өңірде Алатау қаласының инновациялық инфрақұрылымы салынуда, жерді спутниктік бақылау енгізілуде, жасанды интеллект құрылыс алаңдарында және су ресурстарын басқару жүйесінде қолданыла бастады. Сонымен қатар, өнеркәсіп, логистика, туризм және тұрғын үй-коммуналдық шаруашылық салалары дамуда. Бұл Президент Жолдауында көрсетілген цифрландыру мен инновацияға деген басымдықпен толық үйлеседі.Негізгі басымдық – инвестиция тарту. Бірнеше айдың ішінде өңірге жарты триллион теңгеден астам қаражат тартылды. Жыл қорытындысымен бұл көрсеткіш 1 триллион теңгеге жуықтайды деп күтілуде. Әкім Марат Сұлтанғазиев атап өткендей, инвесторлар үшін ең бастысы – ашық ережелер, жедел шешім қабылдау және кооперация алаңдарының болуы. Бұл міндеттерді Alatau АЭА мен «Қонаев» ӘКК жүзеге асырады.Алатау қаласы инновациялар орталығы әрі бүкіл облыс үшін «цифрлық полигон» ретінде қарастырылуда. Мұнда бас жоспар бекітілді, шағынаудандар қалыптасты. Болашақта қалаға ерекше мәртебе беріліп, өзгеше юрисдикция қарастырылмақ. Алатауда сынақтан өткен шешімдер ертең бүкіл өңірде, тіпті ел көлемінде енгізілуі мүмкін: «ақылды» ТКШ-дан бастап басқарудың цифрлық платформаларына дейін.Өңірдің экономикалық іргетасы энергетика мен инфрақұрылымды дамыту арқылы нығаюда. Күн және жел электр станцияларын салу бойынша ірі меморандумдарға қол қойылды. Бұл Мемлекет басшысы қойған энергетикалық қауіпсіздік міндеттеріне толық сәйкес келеді.Көлік-логистика саласында Алматы торабының жүктемесін азайтуға басымдық берілген. «Жетіген – Қазыбек бек» теміржол желісі салынып жатыр, заманауи көлік-логистикалық хаб пен жаңа логистикалық парктер құрылуда. Автожолдарға қатысты нақты межеге қол жеткізу жоспарланған – кемінде 95 пайызы жақсы немесе қанағаттанарлық жағдайда болуы тиіс.Облыс әкімінің орынбасары Рустам Исатаев атап өткендей, агросекторда негізгі басымдық – дәлме-дәл егіншілік пен суды тиімді пайдалану. Тозған желілер үлкен шығынға әкелуде. Осыған байланысты өңірде арналарды қайта жаңғырту, заманауи суару технологияларын енгізу және пайдаланылмай жатқан жерлерді қайта айналымға қайтару шаралары жүзеге асырылуда.– Мемлекет басшысы атап өткендей, пайдаланылмай жатқан ауыл шаруашылығы жерлері инвестиция мен жұмыспен қамтудың орталығына айналуы тиіс. 2026 жылдың ортасына дейін қайтарылған барлық жерлер ауыл шаруашылығы айналымына енгізілуі қажет, – деді Рустам Исатаев.Бұл міндеттерді шешуде дрондар, спутниктер мен жасанды интеллект күнделікті бақылаудың тиімді құралына айналып келеді.Өңір әлеуметтік салада да цифрлық дәуірге қадам басуда. «Болашақ мектептері» салынып, жасанды интеллектке басымдық берілген білім беру жүйесі қалыптасуда. Жаңа медициналық мекемелер ашылып, әлеуметтік көмек нақты мұқтаж жандарға бағытталуда. Тұрғын үй құрылысы қолжетімділікке бағдарланса, коммуналдық қызметтер «ақылды» жүйеге біріктірілуде – таза сумен қамтудан бастап газдандыруға дейін.Президент атап өткендей, туризм – экономиканың маңызды драйвері. Алматы облысында осы бағытта жүйелі жұмыстар жүргізілуде, әсіресе тау кластерін дамытуға ерекше көңіл бөлінген.– Қазіргі таңда тау кластерін инженерлік инфрақұрылыммен және көлік қолжетімділігімен қамтамасыз ету бойынша ауқымды жұмыс атқарылуда. «Ой-Қарағай» курортына газ құбыры тартылуда, сыртқы электрмен жабдықтау жобалары әзірленуде, туристік базаларға жол салу жоспарланған. Мұның барлығы туристер ағынын жылына 850 мың адамға дейін арттыруға мүмкіндік береді, – деді «Ақ Бұлақ» шипажайының директоры Сұңқар Искаков.Қазірдің өзінде туристер саны артып келеді, жаңа курорттар салынып, инфрақұрылым жүргізілуде. Туризм жаңа жұмыс орындарын құрып, жергілікті тұрғындар үшін тұрақты табыс көзіне айналып отыр.Осылайша, Алматы облысы Президент Қасым-Жомарт Тоқаев белгілеген стратегиялық міндеттердің аясында жасанды интеллект дәуіріне батыл қадам жасауда. Цифрлық Алатау, жасыл энергетика, заманауи жолдар, жаңа мектептер мен медициналық нысандар, туризмді дамыту, ауыл шаруашылығы мен ТКШ-дағы «ақылды» технологиялар – өңірдің алдағы жылдардағы басты бағыты болып табылады.Ақпарат көзі : https://www.gov.kz/memleket/entities/almobl/press/news/details/1065604?lang=kk