Қорғаныс министрінің тәрбие және идеологиялық жұмыс жөніндегі орынбасары генерал-майор Асқар Мұстабековтың басшылығымен «Жаңа форматтағы әскер. Әскери-патриоттық тәрбие» тақырыбында дөңгелек үстел отырысы өтті. Бауыржан Момышұлы атындағы әскери-спорт колледжде ұйымдастырылған іс-шараға Парламент депутаттары, мемлекеттік органдардың, үкіметтік емес сектордың өкілдері және медиасарапшылар қатысты. Қорғаныс министрінің орынбасары генерал-майор Асқар Мұстабеков әскерде жастардың жан-жақты дамуына жағдай жасалып жатқанын атап өтті.– Біз цифрландыруды дәйекті түрде дамытып, әскер мектебінен өткен азаматтарға білім беру мен әлеуметтік мүмкіндіктерін кеңейтеміз. Біздің стратегиялық мақсатымыз – жоғары технологиялық армия құру, адами әлеуетті нығайту, әскери қызметшілердің әлеуметтік қорғалуын қамтамасыз етіп, олардың жауынгерлік рухын арттыру, – деді ол. Парламент Сенатының депутаты, Халықаралық қатынастар, қорғаныс және қауіпсіздік комитетінің мүшесі Ғалиасқар Сарыбаев әскери-патриоттық тәрбие мәселесі төңірегінде өз ұстанымын білдірді. – Патриоттық тәрбиені армиямен ғана байланыстыру дұрыс емес. Сондықтан біз бүгін осында жиналып, мектеп жасынан ант беруге дейінгі аралықта қалыптасатын тәрбиені айтып отырмыз, – деп атап өтті сенатор.Парламент Сенатының Халықаралық қатынастар, қорғаныс және қауіпсіздік комитетінің мүшесі Геннадий Шиповских Қорғаныс министрлігіндегі тәрбие және патриоттық даярлықтың қолданыстағы жүйесі туралы оң пікір айтып, бұл жұмыстың бейінді жоғары және арнаулы оқу орындарында да жолға қойылғанын атап өтті. Сонымен қатар, депутаттың пікірінше, жастардың патриоттық санасын нығайтуда интеграцияланған мәдени-білім беру стратегиясы мен азаматтарды ақпараттандыру маңызды рөл атқарады. – Мәдениет және ақпарат министрлігі қорғаныс ведомствосымен тығыз жұмыс істеуге тиіс. Армия туралы объективті түсінік алу үшін фильмдер түсіру, әскери бөлімдер туралы сапалы репортаждар жариялау, әскери мамандардың кәсіби жұмысын және олардың ел қауіпсіздігіне қосқан үлестерін көрсету қажет, – деді Г. Шиповских. Алматы қаласы, Алматы облысы және Жетісу облысы бойынша «Аналар жүрегі» сарбаз аналары комитетінің өкілі Татьяна Тропина патриоттық тәрбие ең алдымен қоғам арқылы қалыптасып, отбасынан басталу керектігін алға тартты. – Әскери-патриоттық тәрбие беру идеясын қолдаймыз. Алайда сенім қарапайым нәрседен – адам қауіпсіздігінен, отбасын құрметтеуден, шынайы іріктеуден, қызметтен мән табудан және қоғамның бұл тақырыпта сөзбен емес, іспен әрекет етуінен басталады. Сонда патриотизм абстракциялы ұғым ғана болмай, жастар саналы түрде қабылдайтын жауапкершілікке айналады, – деп атап өтті қоғам өкілі. Дөңгелек үстелге қатысушылар әскери-патриоттық тәрбие беру, әскери қызметтің беделін және Қарулы күштердің имиджін арттыру саласындағы жұмыс жүйелі негізде құрылып, барлық жас санаттары мен әлеуметтік топтарды қамтуы тиіс деген пікірде болды. Іс-шара аясында дөңгелек үстелге қатысушылар әскери-спорт колледжінің материалдық-техникалық базасымен және кадеттердің күнделікті тынысы мен бос уақыты қалай өтетінін көрді.Ақпарат көзі : https://www.gov.kz/memleket/entities/mod/press/news/details/1167273?lang=kk

Премьер-министрдің орынбасары – ұлттық экономика министрі Серік Жұманғариннің төрағалығымен өткен Жобалық кеңсенің алтыншы отырысында жаңа Салық кодексінің нормаларын имплементациялау мәселесінің кезекті тобы талқыланды.Бау-бақша қоғамы: ҚҚС бойынша есепке тұру керек пе?Отырыста бау-бақша кәсіподақтарының өтініштері қаралды. Бау-бақша қоғамдары тұтыну кооперативі түрінде коммерциялық емес ұйым ретінде тіркеледі. ҚҚС бойынша міндетті тіркеу шегінің 40 млн теңгеге дейін төмендеуіне байланысты, ҚҚС төлеуші болу міндетті ме деген сұрақ туындап отыр.Қаржы вице-министрі Ержан Біржанов түсіндіргендей, тұтыну кооперативі дегеніміз - жалпы шығынды жабу үшін мүшелік жарна есебінен ортақ қор құратын азаматтардың бірлестігі. Мұндай жарна тауар немесе қызмет үшін төлем болып саналмайды, яғни ҚҚС бойынша салық салынатын айналым деп танылмайды. Тиісінше, мүшелік жарнаны алған кезде ҚҚС пайда болмайды да, мұндай жарна бойынша шот-фактура жазылмайды. Осы себепті, ҚҚС бойынша есепке тұру қажеттілігі жоқ.ҚҚС бойынша міндет кооператив қосымша кәсіпкерлік қызмет жүргізіп, тауарды немесе қызметті сатудан кіріс алған жағдайда ғана туындауы мүмкін.Егер қызмет жарна жинаумен және оны кооператив мүшелерінің қажеттілігіне жұмсаумен шектелсе, салық салынатын табыс пайда болмайды.ЖЖМ импорты кезінде ҚҚС-тан босатуЖиында халықаралық тасымалдау кезінде әуе кемелері пайдаланатын жанар-жағармай материалы импортын ҚҚС-тан босатуды көздейтін Салық кодексінің 479-бабының нормалары талқыланды. Ол дипломатиялық немесе консулдық мекемелер тарапынан отынды мақсатты пайдалану туралы қосымша растауды көздейді. Отырысқа қатысушылар мұндай талаптарды артық деп таныды. Артық бюрократияны болдырмау үшін бұл шарт қолданылмайды.Резидент еместердің қызметі бойынша шот-фактура2026 жылдан бастап резидент еместерден жұмыстар мен қызметтерді сатып алу кезінде шот-фактура жазып беру талабы енгізіледі. Бұл ретте ҚҚС төлеуші мен төлемейтіндер үшін тәртіп әр түрлі. Мемлекеттік кірістер комитеті жақын арада осы нормалардың іс жүзінде қолданылуы жөнінде ресми түсініктеме береді.Өзін-өзі жұмыспен қамтығандармен жұмыс істеу кезіндегі шығыстар және ауыл шаруашылығы тауарын өндірушілердің өнім өндірісін растауҰзақ қарастыруды және жан-жақты талдауды талап ететін жүйелік мәселе ретінде, ЖШС-ның мүмкіндігі бойынша жалпыға бірдей белгіленген режимде КТС бойынша шығысты, егер тұлға бір мезгілде осы серіктестіктің құрылтайшысы болып табылса, өзін-өзі жұмыспен қамтығандар үшін арнаулы салық режимін қолданатын жеке тұлғамен шартқа сәйкес, шегерімге жатқызу мәселесі қаралды.Қазіргі уақытта Салық кодексінде мұндай шығысты шегерімге жатқызуға тыйым жоқ. Жеке тұлғаның (оның ішінде құрылтайшының) қосымша мәртебесі шегерімнен бас тартуға негіз болмайды.Бұл ретте өзін-өзі жұмыспен қамтушылар үшін режим бастапқыда өзге кәсіпкерлік қызметті жүргізбейтін адамдарға арналғаны атап өтілді. Еңбек қатынастарын азаматтық-құқықтық шартпен алмастыруға жол берілмейді.Бұл мәселе Жобалық кеңсенің келесі отырысында да қаралады.Сондай-ақ, арнайы салық режимін қолданатын шаруа қожалықтарының өнім өндірісін растау мәселесі талқыланды. Бұл ауыл шаруашылығы өнімін сату кезінде сұр импортты болдырмау үшін қажет. Егер мал шаруашылығында малдың шығу тегі ақпараттық жүйе арқылы расталса, егін шаруашылығында қадағалау жүйесі жұмыс істейді. Растау механизмі нақтылауды қажет етеді. Мәселе бейінді мемлекеттік органмен бірлесіп пысықталып, Жобалық кеңсесінің кезекті отырысына шығарылады.Ақпарат көзі : https://www.gov.kz/memleket/entities/economy/press/news/details/1167516?lang=kk

Амангелді ауданында «Адал азамат» біртұтас тәрбие бағдарламасы аясында аудандық «SMART BALA» жобасы – «Жас өнертапқыштар әлемінде» тақырыбында жоба байқауы ұйымдастырылды.Аталған білім бәйгесі оқушылардың шығармашылық қабілетін шыңдауға, ғылыми ізденісін қолдауға және инновациялық ойлауын дамытуға бағытталған маңызды алаңға айналды. Жоба аясында жас буынның цифрлық сауаттылығын арттыру, инженерлік ойлау қабілетін жетілдіру, заманауи технологияларды тиімді қолдана алатын көшбасшы ұрпақ қалыптастыру және жобалық жұмыс жасау дағдыларын дамыту көзделді.Байқауға ауданның 11 мектебінен 19 оқушы қатысып, өз жобаларын қорғады. Зияткерлік сайыс екі аталым бойынша өткізілді: «Цифрлық жоба» және «SMART POSTER».Байқауға ұсынылған жұмыстар мазмұны жағынан алуан түрлілігімен ерекшеленді. Қатысушылар смарт-мектеп макеттерін, экологиялық бағыттағы инновациялық жобаларды, IT және робототехника саласындағы тың идеяларды, цифрлық қауіпсіздік пен жасанды интеллектке негізделген бастамаларды таныстырды.Жобаларды қорғау кезеңі жоғары деңгейде өтіп, ерекше тартысқа толы болды. Әділқазылар алқасы қатысушылардың жұмыстарын жаңашылдығы, практикалық маңыздылығы, ғылыми негізділігі, безендірілу сапасы және қорғау шеберлігі бойынша бағалады.Аудандық «SMART BALA» жобасы – дарынды оқушыларды қолдауға, олардың ғылыми-техникалық әлеуетін арттыруға және білім беру саласында заманауи трендтерді енгізуге бағытталған жүйелі жұмыстың нақты көрінісі. Осындай бастамалар өскелең ұрпақтың зияткерлік дамуына серпін беріп, болашақ инженерлер мен өнертапқыштардың қалыптасуына жол ашады.Ақпарат көзі : https://www.gov.kz/memleket/entities/kostanay/press/news/details/1167577?lang=kk

Қорғаныс министрінің тәрбие және идеологиялық жұмыс жөніндегі орынбасары генерал-майор Асқар Мұстабеков аталған өңірде болашақ офицерлерді даярлау барысымен танысып, әскери қызметшілерді медициналық қамтамасыз ету қалай ұйымдастырылатынын көрді.Радиоэлектроника және байланыс әскери-инженерлік институтында министрдің орынбасары жоғары оқу орны басшылығының оқу-тәрбие қызметінің ағымдағы көрсеткіштері, курсанттарды даярлау нәтижелері және қос дипломды білім беру бағдарламаларын іске асыру перспективалары туралы баяндамасын тыңдады. Білім ордасының оқу-материалдық базасымен және инфрақұрылымдық объектілерімен танысқанда ол мамандандырылған аудиторияларды және бейіндік пәндер бойынша практикалық дағдыларды жетілдіруге арналған виртуалды жаттықтыру кешенін қарап шықты.Сағадат Нұрмағамбетов атындағы Құрлық әскерлерінің әскери институтына барғанда генерал-майор Асқар Мұстабеков Қарулы күштер құрамаларына басшылық құрам кадрларын даярлауға жіті назар аударды. Әскери оқу орнында өткен кеңес аясында кадрлық әлеуетті нығайту және білім беру бағдарламаларын жетілдіру мәселелері қаралды. Дәрежелі оқытушылардың үлесін арттыру және мемлекеттік тілде бейіндік әдебиеттерді басып шығару қажеттілігі де назардан тыс қалмады.ҚР Қорғаныс министрлігінің әскери-клиникалық госпиталінде генерал-майор Асқар Мұстабеков емдеу процесінің қалай ұйымдастырылатынын, пациенттерді кешенді тексеруге және дәл диагностикалауға арналған заманауи емдеу және диагностикалық аппараттарды көрді. Бөлімшелерді аралау барысында ол емделіп жатқан әскери қызметшілердің денсаулығы мен медициналық көмек көрсету сапасына мән берді. Жұмыс сапарының соңында Қорғаныс министрінің орынбасары білім беру, тәрбие қызметін одан әрі жетілдіру, сонымен қоса ҚР Қарулы күштерінің әскери қызметшілерін медициналық қамтамасыз етудің тиімділігін арттыру жөнінде нақты тапсырмалар берді.Ақпарат көзі : https://www.gov.kz/memleket/entities/mod/press/news/details/1167711?lang=kk

МТ-С компаниясы (Tele2 және Altel брендтерінің операторы) мен Қостанай облысының әкімдігі өңірдің телекоммуникациялық инфрақұрылымын дамыту жөніндегі стратегиялық әріптестік туралы меморандумға қол қойды. Бұл келісім Қостанай қаласы мен шалғай аудандар тұрғындары үшін жоғары жылдамдықты 5G интернетке қолжетімділікті едәуір жақсартып, өңірді шынайы цифрлық хабқа айналдыруға мүмкіндік береді.2026 жылы Tele2/Altel Қостанай қаласы мен облыста 24 жаңа 5G базалық станциясын және кемінде 40 жаңа LTE+ алаңын іске қосуды жоспарлап отыр. Сонымен қатар қала мен аудандардағы  қолданыстағы 25 станция жаңғыртылады. Жыл соңына дейін базалық станциялар саны 400-ге дейін артады, оның 74-і бесінші буын байланыс технологиясын қолданады. Кеңжолақты қолжетімділік жобасы аясында аймақтың сегіз елді мекені жоғары жылдамдықты интернетке қосылады.«Биыл цифрландыру және жасанды интеллект жылы. Бұл – облыс экономикасын дамытуға және тұрғындардың өмір сапасын арттыруға бағытталған нақты жұмыс. 2025 жылдың қорытындысы бойынша IT-салада шамамен 340 компания жұмыс істейді. Олар бюджетке шамамен 650 миллион теңге салық түсіріп, бір жыл ішінде 30 пайыздық өсім көрсетті. Сонымен қатар IT-компаниялар қызметтерін экспортқа шығаруда. Өнеркәсіп орындарында автоматтандыру және роботтандыру желілері белсенді енгізілуде», – деп атап өтті Қостанай облысының әкімі Құмар Ақсақалов. –.Меморандум аясында Қостанай облысының әкімдігі тиісті қызметтердің жұмысын үйлестіруді, жер телімдеріне рұқсат беру және желілерге, соның ішінде электр энергиясына қосылу рәсімдерін жеделдетуді өз міндетіне алады.Тұрғындар үшін бұл байланыс тұрақтылығының артуын және қамту аймақтарындағы «ақ дақтардың» азаюын білдіреді. Практикалық тұрғыдан алғанда, бұл бейнематериалдарды жылдам жүктеуге, онлайн-білім беру мен телемедицина мүмкіндіктерін кеңінен пайдалануға жол ашады.Компания басшылығының мәліметінше, биыл өңірге салынатын инвестиция көлемі 2025 жылмен салыстырғанда екі еседен астам ұлғаяды. Соңғы үш жылда өңірдегі желіні салу және жаңғырту жобаларына 5 миллиард теңгеден астам инвестиция бағытталған.«Қостанай облысын дамыту бағдарламасы тек Қостанай қаласының аумағында 5G желісін орнатумен шектелмейді, сондай-ақ моноқалаларды дамытуға қатысуды көздейді. Кездесу барысында Рудный, Лисаков, Арқалық және Жітіқара қалаларында 5G базалық станцияларын салу мүмкіндігін талқыладық. Қала көлеміне қарамастан, барлық тұрғындарға интернетке тең қолжетімділік беру – табысты цифрландырудың негізі» – деп атап өтті Tele2/Altel басқарма төрағасы Александр Бабичев.Tele2 желісі өзінің технологиялық артықшылығын бірнеше рет дәлелдеді. 2025 жылдың қорытындысы бойынша компания SpeedChecker Champion Award халықаралық марапатын «Қазақстандағы ең жылдам мобильді байланыс» номинациясы бойынша иеленді. Бұған дейін компания Ookla ұсынған Speedtest Awards сыйлығын 2025 жылдың бірінші жартыжылдығы қорытындысы бойынша «Қазақстандағы ең үздік 5G желісі» аталымында алған болатын.Меморандумға қол қою тараптардың өңірдің цифрлық экожүйесін тұрақты дамытуға ортақ мүдделі екенін көрсетеді. Жоба технологиялық маңызымен қатар әлеуметтік-экономикалық мәнге де ие: байланыс сапасының артуы кәсіпкерлік белсенділікті ынталандырып, білім, медицина және мемлекеттік қызметтерге қолжетімділікті кеңейтеді, сондай-ақ халықтың өмір сапасын жақсартады.Ақпарат көзі : https://www.gov.kz/memleket/entities/kostanay/press/news/details/1167743?lang=kk

Қостанай облысы әкімдігі мен Полиция департаментінің бірлескен кеңесі өтті. Кеңейтілген жиынның басты тақырыбы – елімізде жүзеге асырылып жатқан «Заң мен тәртіп» және «Таза Қазақстан» бағдарламалары. 2025 жылғы 5 қарашада Қазақстан Республикасы ішкі саясатының негізгі қағидаттары, құндылықтары мен бағыттарын бекітті. Бұл құжатта «Заң мен тәртіп» және «Таза Қазақстан» Әділетті Қазақстанды құру жолындағы негізгі қағидаттар болып белгіленді. Енді міне Жаңа Конституция жобасында да осы қағидаттар конституциялық деңгейде бекітілетін болады.«Ел Президентінің бастамасымен өңірде «Заң және тәртіп» қағидаты кезең-кезеңімен жүзеге асырылып келеді. Соңғы 5 жылда қылмыс деңгейі 40%-ке төмендеді. Қоғамдық орындар мен көшелерде жасалатын қылмыстар саны екі есеге азайды. Қауіпсіздікті цифрландыру аясында Жедел басқару орталықтарының жүйесі қарқынды дамуда. 2025 жылы аталған жүйелердің көмегімен шамамен 63 мың құқық бұзушылық анықталып, 370-тен астам қылмыс ашылды. Соңғы 5 жылда облыстағы бейнебақылау камераларының саны 3,3 мыңнан 46,9 мыңға дейін өсті», – деді Қостанай облысының әкімі Құмар Ақсақалов.Жаңа Конституция жобасындағы табиғатты аялау және оған жауапкершілікпен қарау қағидаты «Таза Қазақстан» бағдарламасымен тікелей үндеседі.Өңірімізде 2024 жылдан бері елді мекендерді абаттандыру, сәулеттік келбетін жақсарту, қараусыз қалған ғимараттарды, өндірістік үй-жайларды реставрациялау және қалпына келтіру, аумақтарды тазарту, көгалдандыру, жарықтандыру, сондай-ақ халықты экологиялық тәрбилеу бойынша ауқымды жұмыстар басталды.Өткен жылы облыста 108 көпқабатты үйдің күрделі жөндеуі өткізілді, 80 саябақ пен скверге абаттандыру жұмыстары жүргізілді, 144 мың жасыл желек отырғызылды, 164 балалар және спорт алаңдары, 6 мыңнан астам баған орнатылды.«Таза Қазақстан» бастамасын тиімді жүзеге асыруға облыс экономикасының тұрақты өсімі оң ықпал етуде. 2025 жылдың қорытындысы бойынша өңір экономикасының өсімі кемінде 8% деңгейінде болады деп күтілуде. Бұл көрсеткіш республикалық орташа деңгейден (6,5%) жоғары. Автожол саласын қаржыландыру жыл сайын артуда. Былтыр 103 млрд теңге бөлінген, бұл 2024 жылдан 40%-ке, ал 2022 жылға қарағанда 2,6 есе артық. 1 300 шақырым автожол, сондай-ақ облыстың 103 елді мекеніндегі 400-ден астам көше және ауылдық елді мекендерге апаратын 81 жуық кіреберіс жол жөнделді. Ауылдық жерлердегі 80 619 ауланың 80%-не су кіргізілді. Өткен жылы аймақта 51 әлеуметтік нысан салынды», – деп атап өтті аймақ басшысы.Ақпарат көзі : https://www.gov.kz/memleket/entities/kostanay/press/news/details/1167798?lang=kk

Қонаев қаласында Gas Gun Competition PRS (снайпинг) дисциплинасы бойынша Алматы облысының Кубогы өтті. Жарыс әртүрлі қашықтықта және түрлі позициялардан ату жаттығуларын қамтыды. Турнирге Қазақстан Республикасының Ұлттық қауіпсіздік комитеті, Мемлекеттік күзет қызметі, Қорғаныс министрлігінің Арнайы операциялар күштері, Ұлттық ұлан бөлімшелерінің мергендері, сондай-ақ құралайды көзге атқан әуесқой мергендер қатысты. Жарыс төрт бағыт бойынша өткізілді.Мергендер дәлдікті, атыс дағдыларының тұрақтылығын, шектеулі уақытта жұмыс істеу қабілетін, қашықтықты жылдам бағалап, әртүрлі жағдайда оқ ату бағытын түзету шеберлігін тексеруге бағытталған практикалық жаттығулар кешенін орындады. Сынға түскен мергендер жоғары техникалық дайындықты, заманауи жоғары дәлдікті ату әдістерін меңгеруді және барынша жинақылықты көрсете білді. Нәтижесінде «жартылай автоматты карабин» класында жүлделі орындардың барлығын Қорғаныс министрлігінің Арнайы операциялар күштерінің әскери қызметшілері иеленді.Мергендер сайысы әскери қызметшілер мен күштік құрылым қызметкерлерінің кәсіби шеберлігін жетілдіруге, сондай-ақ кәсіби және азаматтық атқыштар қауымдастығы арасындағы өзара іс-қимылды нығайтуға ықпал етті.Ақпарат көзі : https://www.gov.kz/memleket/entities/mod/press/news/details/1168007?lang=kk

«Әділетті және Прогрессивті Қазақстанның Халықтық Конституциясы үшін!» жалпыұлттық коалициясының мүшелері, ҚР Парламенті Сенатының депутаттары Жанболат Жөргенбаев пен Закиржан Кузиев Іле ауданындағы «Алатау жарық компаниясы» АҚ ұжымымен кездесті.Жиын барысында 15 наурызға белгіленген республикалық референдумға ұсынылатын жаңа Конституция жобасының негізгі бағыттары кеңінен түсіндірілді. Әсіресе билік тармақтарының тепе-теңдігі, бір палаталы Құрылтай институтын енгізу, Конституциялық Соттың тәуелсіздігін күшейту және Президент өкілеттігінің бір реттік жеті жылдық мерзімі мәселелері назарға алынды.Коалиция мүшесі Жанболат Жөргенбаев жаңа конституциялық өзгерістердің мәні саяси жүйені сапалық жаңа деңгейге көшіруде екенін атап өтті.«Жаңа Конституцияның маңызды жаңалығы – Президенттің өкілеттік мерзімінің нақты әрі өзгермейтін болып белгіленуі. Мемлекет басшысы бір реттік жеті жылдық мерзімге сайланады және қайта сайлана алмайды. Бұл талап болашақта өзгертілмейді. Мұндай шешім биліктің тұрақтылығын қамтамасыз етіп, саяси жүйенің болжамды әрі ашық жұмыс істеуіне мүмкіндік береді. Мемлекеттік басқару нақты ережелерге сүйенуі керек», – деді сенатор.Оның айтуынша, жаңа Конституцияда тежемелік әрі тепе-теңдік тетіктері күшейтіліп, Парламенттің рөлі артады, ал Конституциялық Соттың мәртебесі нақты бекітіледі. Бұл шешімдер мемлекет пен қоғам арасындағы сенімді арттыруға бағытталған.«Алатау жарық компаниясы» АҚ Іле ауданы электр тораптары бөлімшесінің басшысы Бекжан Түгелбаев ұжымның ұстанымын жеткізіп, сала үшін тұрақты құқықтық ортаның маңызына тоқталды.«Энергетика – ел экономикасының тірегі. Біз тәулік бойы жұмыс істейтін стратегиялық инфрақұрылымды қамтамасыз етеміз. Сондықтан саяси және құқықтық жүйенің тұрақтылығы біз үшін тек теориялық мәселе емес, нақты өндірістік қауіпсіздік пен инвестициялық сенімге тікелей әсер ететін фактор. Жаңа Конституцияда институционалдық жауапкершілік пен тепе-теңдік тетіктерінің күшеюі сала үшін де ұзақ мерзімді сенімді негіз қалыптастырады деп санаймыз», – деді ол.Кездесу ашық форматта өтті. Қызметкерлер әлеуметтік мемлекеттің қағидаттары, еңбек құқықтарының қорғалуы және стратегиялық инфрақұрылым нысандарының құқықтық қауіпсіздігіне қатысты сауалдарын қойды.Жиын қорытындысында Алматы облысының энергетиктері алдағы республикалық референдумға белсенді қатысуға дайын екендерін білдіріп, елдің болашақ даму бағытын айқындайтын өзгерістерді қолдайтындарын жеткізді.Ақпарат көзі : https://www.gov.kz/memleket/entities/almobl/press/news/details/1168129?lang=kk

Өңірлік экологиялық саммиттің https://res2026.kz/ ресми сайтында қатысушылар мен қонақтарды тіркеу басталды.RES 2026-ға қатысу үшін «Тіркелу» бөліміндегі арнайы нысанды толтырып, мына сілтеме: https://res2026.kz/ru/register бойынша тіркелуге болады.Өңірлік экологиялық саммит 2026 жылғы 22-24 сәуір аралығында Қазақстан Республикасының астанасы Астана қаласында өтеді. Саммит негізгі климаттық және экологиялық мәселелер бойынша келісілген диалогты қалыптастыру үшін Орталық Азия елдерінің басын қосады.Өңірлік экологиялық саммит 2026 мәселелері бойынша байланыстар:e-mail: office@caclimate.fundRES 2026 EXPO халықаралық көрмесіне қатысу мәселелері бойынша байланыстар:e-mail: partnership@res2026expo.kzАқпарат көзі : https://www.gov.kz/memleket/entities/ecogeo/press/news/details/1168160?lang=kk

Жобалық кеңсенің Салық Кодексін енгізу мәселесі жөніндегі отырысының бірінде Салық кодексінің 2-тармағының 7) тармақшасына және 484-бабының 5-тармағына сәйкес, ауыл шаруашылығы шикізатын қайта өңдеу нәтижесі болып табылатын өнім бойынша есепке жатқызылатын ҚҚС-ты 80 пайызға түзету мәселесі көтерілді.Ұлттық экономика министрлігі «Агроөнеркәсіптік кешенді және ауылдық аумақтарды дамытуды мемлекеттік реттеу туралы» Қазақстан Республикасының 2005 жылғы 8 шілдедегі №66 Заңының ережелерін ескере отырып, ауыл шаруашылығы шикізатын қайта өңдеу нәтижесі болып табылатын өнім экспортталған жағдайда аталған түзету қолданылмайтынын хабарлайды.Мысалы, ұнды экспорттау кезінде ҚҚС-ты қайтару, ұн өңделген өнімге жататындықтан, салық заңнамасының талабын сақтай отырып, жалпыға бірдей белгіленген тәртіппен толық көлемде жүзеге асырылады.Осылайша, жаңа Салық кодексінің ережесі бойынша қайта өңдеу өніміне салық салудың бұрын қолданылған тәртібі сақталады.Ақпарат көзі : https://www.gov.kz/memleket/entities/economy/press/news/details/1168185?lang=kk

Астана, 2026 жылғы 24 ақпан – Қазақстан Республикасы Сыртқы істер министрінің орынбасары Арман Исетов Италия Республикасының Елшісі Антонелло Де Риумен кездесті.Тараптар қазақ-итальян стратегиялық серіктестігін одан әрі нығайту мәселелерін талқылап, саяси диалогты дамытуға, сауда-экономикалық ынтымақтастықты кеңейтуге, сондай-ақ мәдени-гуманитарлық саладағы бірлескен жобаларды іске асыруға ерекше назар аударды.«Италия Қазақстанның Еуропадағы негізгі серіктестерінің бірі әрі экономикамыздағы жетекші инвестор болып қала береді. 2025 жылы екіжақты сауда көлемі шамамен 17 млрд АҚШ долларын құрады, бұл экономикалық ынтымақтастығымыздың тереңдігі мен тұрақтылығын айқын көрсетеді. Соңғы отыз жыл ішінде италиялық инвестициялар көлемі 9,5 млрд АҚШ долларынан асты. Қазіргі уақытта елімізде стратегиялық секторлардың кең ауқымында 267 италиялық компания жұмыс істейді», – деп атап өтті А.Исетов.Министрдің орынбасары сондай-ақ Антонелло Де Риуды қысқы Олимпиада ойындарының табысты өтуімен және Италия құрамасының жоғары нәтижелерімен құттықтады.«Ойындар ең жоғары деңгейде ұйымдастырылып, бүкіл әлемде олимпиадалық құндылықтарды ілгерілетуге елеулі үлес қосты», – деді А.Исетов.Сұхбаттастар өзара қызығушылық тудыратын бағыттар бойынша тығыз ынтымақтастықты жалғастыруға мүдделігін білдіріп, 2026 жылға арналған екіжақты іс-шаралар кестесін қарастырды.Кездесу қорытындысы бойынша дипломаттар Астана мен Рим арасындағы стратегиялық серіктестікті одан әрі тереңдетуге ниеттерін растады.Ақпарат көзі : https://www.gov.kz/memleket/entities/mfa/press/news/details/1168549?lang=kk

ҚР Ұлттық экономика министрлігі «Ашық НҚА» порталында жария талқылау үшін орналастырылған «Қазақстан Республикасының кейбір заңнамалық актілеріне Мемлекеттік мүлік мәселелері бойынша өзгерістер мен толықтырулар енгізу туралы» Заң жобасын ұсынды.Құжат мемлекеттік активтерді басқару жүйесін кешенді жаңғыртуды көздейді және Азаматтық кодекске, Бюджет кодексіне, «Мемлекеттік мүлік туралы» Заңға және басқа да бірқатар заңнамалық актілерге түзетулерді қамтиды.Мемлекеттік активтерді басқарудың бірыңғай жүйесін енгізуЖобамен мемлекеттік мүлікті басқарудың базалық қағидаттары бекітіледі: активтердің толық және шынайы есебін қамтамасыз ету, белгіленген өлшемдерге сәйкес оларды иелену, жекешелендіру, қайта ұйымдастыру және тарату арқылы бәсекелестік секторларға мемлекеттің қатысуын қысқарту, корпоративтік басқарудың қазіргі заманғы стандарттарын енгізу және есептіліктің ашық жүйесін қалыптастыру.Үкіметке Мемлекеттік активтерді басқарудың бірыңғай жүйесін бекіту бойынша өкілеттіктер беріледі.Стратегиялық объектілерді басқарудың жаңа тәсілдеріОбъектілерді стратегиялық объектілерге жатқызудың, сондай-ақ оларды республикалық және өңірлік маңызы бар объектілерге бөлудің нақты критерийлері енгізіледі. Салалық қорытындылар негізінде тиісті тізбелерді енгізудің және одан шығарудың ашық тәртібі белгіленеді.Стратегиялық объектілерге ауыртпалық салу немесе иеліктен шығару туралы шешім қабылдау кезінде жергілікті атқарушы органдардың өкілеттіктері кеңейтіледі.Мәміле жасалғаннан кейін мұндай объектілерге міндетті бес жылдық мониторинг енгізіледі.Мемлекеттік кәсіпорындарды реттеуді жетілдіруТиісті нарықта бәсекелестік болмаған немесе төмен болған кезде және тек монополияға қарсы органның келісімімен шаруашылық жүргізу құқығындағы кәсіпорындарды құру шарттары нақтыланады.Жедел басқару құқығында, атап айтқанда білім беру, жұмыспен қамту, мәдениет, спорт және арнаулы әлеуметтік қызметтер көрсету салаларындағы әлеуметтік міндеттерді шешу үшін кәсіпорындар құру жағдайлары қайта қаралды.ӘКК қызметін жүйелі реттеуЖоба әлеуметтік-кәсіпкерлік корпорациялардың (ӘКК) қызметін кешенді реттейтін жаңа тарауды енгізеді.Олардың мақсаттары, мәртебесі, жұмыс принциптері, функционалдығы, мүлікті қалыптастыру тәртібі және есептілікке қойылатын талаптар анықталады.Ашықтық, есептілік, жеке бизнеспен бәсекелестікке жол бермеу және мемлекет пен кәсіпкерлердің тең құқылы әріптестігі қағидаттары бекітіледі.ӘКК-ге инвестициялар тарту, инвесторларды "бір терезе" қағидаты бойынша сүйемелдеу, экспорттық әлеуетті қолдау бойынша функциялар беріледі.ӘКК-нің даму жоспарлары жаңа функционалға байланысты тиімділіктің негізгі көрсеткіштерін (KPI) қамтитын болады, сондай - ақ корпоративтік басқару күшейтіледі-инвестициялық құзыреттері бар Тәуелсіз директорларды енгізу және директорлар Кеңесі жанынан инвестициялық комитет құру көзделеді.Өтпелі ережелер жыл ішінде активтерді түгендеуді, бейінді емес және тиімсіз активтерді қайта құрылымдауды және одан шығуды, сондай-ақ ӘКК қызметін жаңа заңнамаға сәйкес келтіруді міндеттейді.Мемлекеттік мүлікті есепке алудың ашықтығын арттыруМемлекеттік мүлік тізіліміне енгізуге жататын мәліметтер тізбесі кеңейтіледі. Оған резидент компанийстерді қоса алғанда, холдингтік компаниялардың корпоративтік құрылымы туралы деректер енгізілетін болады.Ұсынылған өзгерістер квазимемлекеттік сектордың ашықтығын арттырады, активтерді басқаруды бақылауды күшейтеді және мемлекеттік меншікке жүйелі көзқарасты қамтамасыз етеді деп күтілуде.​​​«Қазақстан Республикасының кейбір заңнамалық актілеріне Мемлекеттік мүлік мәселелері бойынша өзгерістер мен толықтырулар енгізу туралы» Заң жобасына сілтеме.Құжат келесі сілтеме бойынша орналастырылған: https://legalacts.egov.kz/npa/view?id=15771240 Ақпарат көзі : https://www.gov.kz/memleket/entities/economy/press/news/details/1168565?lang=kk

Қостанай қаласында республикалық «Таза Қазақстан» бағдарламасы аясында облыстық «Қарлы десант» волонтерлік акциясы өтті.Іс-шараның ұйымдастырушысы — Қостанай облысы әкімдігі Қоғамдық даму басқармасының «Қостанай облысының Жастар ресурстық орталығы» КММ.Акцияның басты мақсаты — жалғызбасты зейнеткерлер мен мүмкіндігі шектеулі жандарға көмек көрсету. Қыс мезгілінде олардың үй маңындағы аумақты қардан тазалау аса маңызды. Осы міндетті еріктілер өз мойындарына алды.«Қарлы десант» акциясы мұқтаж жандарға нақты қолдау көрсетіп қана қоймай, өңірдегі волонтерлік қозғалыстың дамуына да маңызды үлес қосты. Мұндай бастамалар жастардың әлеуметтік жауапкершілігін арттырып, өзара көмек қағидаттарын нығайтады және қоғамның бірлігін күшейтеді.«Таза Қазақстан» бағдарламасы аясында өткізілетін осындай іс-шаралар адамдарға және қоршаған ортаға қамқорлық жасау Қостанай облысында қоғамдық жұмыстың басым бағыттарының бірі болып қала беретінін көрсетеді.Ақпарат көзі : https://www.gov.kz/memleket/entities/kostanay/press/news/details/1166706?lang=kk

  Павлодар қаласында Екінші дүниежүзілік соғысқа қатысушысы Василий Иванович Григораш ғасырлық мерейтойын атап өтті.  Айтулы мерекеге орай майдангерді Павлодар облысы қорғаныс істері жөніндегі департаментінің бастығы полковник Руслан Әбіханов және «Қазақстан Республикасы Қарулы күштерінің ардагерлері» РҚБ облыстық филиалының төрағасы Жан Қаратаев құттықтады.  Олар қорғаныс ведомствосы басшысының атынан Василий Ивановичке жауынгерлік ерлігі, батылдығы мен әскери борышқа адалдығы үшін алғыс сөздер жазылған құттықтау хатын табыс етті.  – Сіздің өмір жолыңыз –шынайы төзімділік пен жанқиярлықтың үлгісі, жас ұрпақ үшін тағылымды өнеге. Сіздің жүріп өткен жолыңыз бен жасаған қызметіңіз үшін бас иеміз, бейбіт өмір үшін алғыс айтамыз. Әр күніңіз қуанышқа, қамқорлыққа және лайықты құрметке толы болсын, – деді департамент басшысы полковник Р. Әбіханов.  Василий Григораш 1926 жылғы 21 ақпанда Алтай өлкесінің Гурлинка ауылында дүниеге келген. Мектепті тәмамдаған соң қызыл әскер қатарына шақырылды. Аға сержант Василий Григораш Байкал өңірі әскери округінің 293-дивизиясы құрамында соғысып, бөлімше командирі болған. Оның жауынгерлік ерлігі ІІ дәрежелі «Отан соғысы» орденімен, «Жапонияны жеңгені үшін» медалімен және басқа да мерейтойлық марапаттармен атап өтілген.  Василий Иванович қонақтарға жылы лебіздері үшін алғыс айтып, әскери қызметшілерге зор денсаулық, отбасылық амандық және ел игілігі жолындағы қызметтеріне табыс тіледі. Ол ең бастысы – бейбітшілікті көздің қарашығындай сақтау екенін атап өтті.Ақпарат көзі : https://www.gov.kz/memleket/entities/mod/press/news/details/1166705?lang=kk

 Бітімгерлік миссияның қолбасшысы генерал-майор Анита Асма Қазақстанның әскери қызметшілеріне бітімгерлік миссияға қатысқаны үшін Біріккен Ұлттар Ұйымының медальдарын табыс етті.  Қазақстандық дербес бітімгерлік контингент Фауар базасында қызмет атқарып, Сирия Араб Республикасында орналасқан Голан жоталарында атысты тоқтату режимін қамтамасыз ету жөніндегі міндеттерді БҰҰ-ның ажыратуды қадағалау күштері құрамында орындап келеді. БҰҰ медалімен миссияда қызмет атқарып жатқан барлық 139 әскери қызметші марапатталды.  Қазақстандық әскери қызметшілер Ұйым базаларын күзету мен қорғанысын күшейтуді қамтамасыз етіп, жергілікті тұрғындармен өзара іс-қимыл жасайды және жауапкершілік аймағында тұрақтылықты сақтауға бағытталған түрлі міндеттерді орындайды.  — Контингенттің жеке құрамы жоғары кәсіби дайындықты, үйлесімділік пен жедел әрекет ету қабілетін көрсетіп келеді. БҰҰ медалі — әрбір әскери қызметшінің батылдығы, тәртібі мен өз ісіне адалдығының, сондай-ақ миссия аймағында бейбітшілікті сақтау ісіне қосқан үлесінің мойындалуы, — деді бітімгерлік ротаның командирі подполковник Жанибек Нурланов.  2025 жылғы сәуірден бері контингент әскери қызметшілері 55 тапсырманы орындап, 1200-ден астам жарылғыш зат пен 43 қолдан жасалған жарылғыш құрылғыны жойды. Жалпы, қазақстандық бітімгерлік контингенттің екінші құрамы миссия басталғалы бері 675 тапсырманы орындады.  Естеріңізге сала кетсек, Қазақстан Голан жоталарында алғашқы дербес бітімгерлік контингентін 2024 жылғы наурызда орналастырған болатын.Ақпарат көзі : https://www.gov.kz/memleket/entities/mod/press/news/details/1166682?lang=kk

Қазақстан Республикасы Сыртқы істер министрінің Бірінші орынбасары Ержан Ашықбаев Қазақстандағы БҰҰ Балалар қорының (ЮНИСЕФ) Өкілі Рашед Сарвармен кездесу өткізді.Кездесу барысында тараптар балалардың денсаулығын қорғау, инклюзивті білім беруді дамыту, балаларды зорлық-зомбылықтан қорғау, цифрлық қауіпсіздікті қамтамасыз ету, психикалық денсаулық мәселелері және әлеуметтік қорғау жүйелерін нығайтуға бағытталған бағдарламаларды талқылады.«Біз Ұйымының озық халықаралық тәжірибені енгізу, балалар құқықтарын қорғау саласындағы әдіснама мен мониторинг тетіктерін жетілдіру, сондай-ақ инновациялық шешімдер мен жұмыс тәсілдерін енгізу бағытындағы күш-жігерін жоғары бағалаймыз», – деп мәлімдеді Министрдің бірінші орынбасары.Е.Ашықбаев ЮНИСЕФ-тің «Қазақстан балалары» ұлттық бағдарламасын әзірлеуге көрсеткен сараптамалық қолдауы үшін ризашылығын білдірді, сондай-ақ Қазақстанның 2025 жылғы қарашада Балаларға қатысты зорлық-зомбылықты тоқтатуға бағытталған Жаһандық альянсқа қосылуына жәрдемдескені үшін алғыс айтты.ЮНИСЕФ Өкілі 2026–2030 жылдарға арналған ынтымақтастық бағдарламасы ұлттық стратегиялық құжаттардың басымдықтарына және БҰҰ Балалар құқықтары жөніндегі комитетінің қорытынды ескертпелеріне сәйкес келетінін атап өтті.Кездесу қорытындысы бойынша тараптар әріптестікті нығайтуға және ЮНИСЕФ-тің 80 жылдығына арналған бірлескен іс‑шаралар өткізуге келісті.  Ақпарат көзі : https://www.gov.kz/memleket/entities/mfa/press/news/details/1166642?lang=kk

Батыс Қазақстан облысына жұмыс сапары аясында Премьер-министрдің орынбасары – ұлттық экономика министрі Серік Жұманғарин өңірлік бизнес өкілдерімен кездесу өткізді.Жаңа Конституция жобасының негізгі қағидалары, Салық кодексінің қолданысқа енгізілуі, проактивті экономикалық саясат құралдары, сондай-ақ кәсіпкерлердің нақты мәселелері талқыланды.Жаңа Конституция жобасы – экономиканы дамыту, мемлекеттік басқаруды жетілдіру, азаматтардың құқықтары мен бостандықтарына кепілдік беруКездесудің бірінші бөлігінде вице-премьер жаңа Конституция жобасының негізгі бағыттарына жан-жақты тоқталды. Атап айтқанда, экономиканы дамыту, мемлекеттік басқару жүйесін жетілдіру, азаматтардың құқықтары мен бостандықтарына кепілдік беру, стратегиялық жоспарлау тетіктері мен мемлекеттік жүйенің тұрақтылығын қамтамасыз ету мәселелері сөз болды. Экономикалық дамуға ерекше басымдық берілгені атап өтілді.«Білім беру, ғылым, инновациялар мен адами капиталды дамыту мемлекеттің стратегиялық басым бағыты ретінде айқындалады. Бәсекеге қабілеттілік деңгейі зияткерлікке, технологияға және кәсібилікке негізделген білім экономикасының іргетасы қаланады. Өсімді ынталандыру мақсатында қаржы саласында және «жедел дамушы қалалар» форматында арнайы құқықтық режимдерді енгізу мүмкіндігі қарастырылуда. Мұндай режимдер мемлекеттік басқару мен сот жүйесі қызметінің ерекшеліктерін қамтуы мүмкін, алайда тек конституциялық заңдар аясында ғана жүзеге асырылады», — деп атап өтті Серік Жұманғарин.Мұндай жаңашылдықтар инвестициялар тартуға, реттеудің жаңа тәсілдерін сынақтан өткізуге және экономикалық өсім нүктелерін қалыптастыруға мүмкіндік береді.Сонымен қатар құқықтық болжамдылыққа, мемлекеттік қадағалауға, негізсіз шешімдердің болмауына, біртұтас құрылымның сақталуына кепілдік береді.Аталған модель халықаралық қаржы орталықтары мен инновациялық аймақтарды дамытуда өзінің тиімділігін дәлелдеп үлгерді.«Жаңа Конституция жобасында меншік нысандарының барлығы тең дәрежеде қорғалатынын атап өткен жөн. Бұл инвесторлар, кәсіпкерлер, шағын және орта бизнес үшін аса маңызды. Меншік құқығы қорғалады, алайда оны пайдалану экологиялық стандарттар мен өзге тұлғалардың құқықтарын ескеруі тиіс. Бұл жауапты нарықтың заманауи үлгісін қалыптастырады», — деп жалғастырды Премьер-министрдің орынбасары.Ұлттық валютамыз — теңге ең жоғары деңгейде бекітіліп отыр. Бұл елдің қаржылық егемендігін нығайтады.Жаңа Конституция жобасының экономикалық бөлімі ұзақ мерзімді дамуға бағытталған, ашық әрі болжамды тұрақты құқықтық ортаны қалыптастырады.Сөзінің соңында Серік Жұманғарин жобаны жалпыұлттық референдумға шығару азаматтарға деген сенімнің көрінісі екенін және халық билігі қағидатын растайтынын атап өтті. Ол кездесуге қатысушыларды Конституция жобасымен мұқият танысып, референдумға қатысу арқылы саналы шешім қабылдауға шақырды.Салық кодексін енгізу жөніндегі жобалық офис және бизнесті қолдауВице-премьер Салық кодексін енгізу бойынша жобалық кеңсенің жұмысы туралы мәлімет берді. Оның алаңында апта сайын бизнестің өтініштері қаралып, құқық қолдану тәжірибесін түзету бойынша түсіндірмелер мен ұсыныстар әзірленеді.Сонымен қатар «Бәйтерек» инвестициялық холдингі арқылы қолдау құралдары таныстырылды. Олардың мақсаты – сұранысқа ие тауарлар өндірісін арттыру, импортқа тәуелділікті төмендету және ішкі өңдеуді тереңдету.Кездесу барысында кәсіпкерлер бірқатар нақты сұрақтар қойды. Желаев нан өнімдері комбинатының басшысы Алмагүл Хамитова макарон өнімдерін өндіру көлемін кеңейту үшін 2,5% жеңілдікпен несие алу мүмкіндігі туралы сұрады. Аталған мөлшерлеме Солтүстік Қазақстан облысының сүт өнімдері фермаларын салу тәжірибесін тарату бағдарламасы аясында, сондай-ақ суармалы жерлерді дамыту, көкөніс және жеміс сақтау қоймаларын салу, балық шаруашылығын дамыту және ауыл шаруашылығында импортқа тәуелділігі жоғары басқа жобаларды жүзеге асыру кезінде қолданылады.Ал, бұл ретте Қазақстанның ұн өңдеу саласы дамыған: елде жылдық жалпы қуаты 9,3 млн тонна ұн шығаратын 254 кәсіпорын жұмыс істейді. Ұн өндірісі ішкі тұтынудан шамамен 2,1 есе асып түседі, ал макарон өнімдері өндірісі ішкі нарық қажеттілігін толық қамтамасыз етеді. Экспорттық әлеуетін және өнімнің кең ассортиментін (20 түрлі макарон өнімдері) ескере отырып, Серік Жұманғарин комбинатқа биыл Кабулда өтетін Қазақстан–Ауғанстан бизнес-форумына және отандық өнімдер көрмесіне қатысуға ұсыныс жасады. «Бәйтерек» холдингіне «Инвестицияға тапсырыс» бағдарламасы аясында жобаның қаржылық моделін қарастыру тапсырылды.«Стройкомбинат» ЖШС өкілі Нұрлан Нұрбаев кәсіпорынның өз алдына немесе келісім-шарт бойынша төтенше-құтқару қызметінің міндетті болуының орындылығы туралы мәселені көтерді. Бұл норма 2014 жылдан бастап күшіне енген және қызмет саласына қарамастан ірі өндірістік кәсіпорындарға қатысты қолданылады. Кәсіпкердің айтуынша, кәсіпорынның қызметі жоғары тәуекел нысандарға жатпайды, бірақ төтенше-құтқару қызметін қамтамасыз ету немесе мамандандырылған ұйымның қызметіне ақы төлеу айтарлықтай шығындарды талап етеді.«ORALMEZ» компаниясы қуаттылығы тәулігіне 500 тонна күнбағыс майын өндіретін зауыт құрылысының жобасын таныстырып, жеңілдетілген қаржыландыру мүмкіндіктері туралы сұрады. Аграрлық несие корпорациясының бас директоры жобаның экспортқа бағдарлануы жағдайында жеңілдетілген валюталық несие алу мүмкіндігі барын айтып, бұл жағдайда басқа мөлшерлеме қолданылатынын хабарлады.Сонымен қатар кәсіпкерлер жаңа ҚҚС-тың жаңа мөлшерлемесі жағдайында келісімшарттардың орындалуы мен өнімді қабылдауға, арнайы салық режимдерін қолданатын жеткізушілер мен ірі кәсіпорындардың жұмысына, сондай-ақ несиелерді қайта қаржыландыру мүмкіндігіне қатысты мәселелерді көтерді.Жұмыс сапары өңірдегі өндірістік кәсіпорындарға барумен жалғасты.Ақпарат көзі : https://www.gov.kz/memleket/entities/economy/press/news/details/1166649?lang=kk

Батыс Қазақстан облысына жұмыс сапары барысында Премьер-министрдің орынбасары - ұлттық экономика министрі Серік Жұманғарин өңірдегі бірқатар ірі өнеркәсіптік кәсіпорындардың қызметімен танысты.Нысандардың бірі «Кублей» консерві зауыты бір ауысымда 180 мың банка жоғары сапалы өнім шығарады. Зауыт толық өндірістік цикл қағидаты бойынша жұмыс істейді: мал союдан бастап қаңылтыр ыдыс шығаруға дейін қалдықсыз өндірісті қамтамасыз етеді.Тері шикізатын WET-BLUE хромдалған былғары жартылай фабрикатына дейін өңдейтін, сондай-ақ сүйектерді мал азығын өндіруге арналған сүйек ұнына қайта өңдейтін цехтар жұмыс істейді. Ассортиментінде ет, балық, көкөніс және сүт консервілері, дайын тағамдар бар. 2026 жылдан бастап кәсіпорын ақбөкен етінен консерві өндіруді игерді.«Желаев нан өнімдері комбинаты» АҚ-өңірдегі ең көне кәсіпорындардың бірі. Компания ұн мен макарон өнімдерін шығарады. Ассортимент 34 атауды қамтиды: әр түрлі сортты ұнның 14 түрі және макаронның 20 түрі (кеспе, ұя, қысқа және ұзын макарон және т.б.).Кәсіпорында 532 адам жұмыс істейді. Жылдық өндіріс көлемі 51,5 мың тонна ұн мен 18,2 мың тонна макарон өнімдерін құрайды. Өнімдер ішкі нарықта да, экспортқа да сатылады. Дәстүрлі өткізу нарықтарында қазақстандық ұнға сұраныстың төмендеуіне байланысты кәсіпорын ұзын макарон өндіретін фабриканы өңдеу және кеңейту тереңдігін ұлғайту мүмкіндігін қарастыруда.«Жайық АТА» ЖШС шұжық өнімдері мен ет деликатестерінің барлығы 160-тан астам атауын, сондай-ақ құс етін өндіреді. Кәсіпорынның қуаттылығы бір ауысымда 30 тонна өнімді құрайды, мұнда 240 адам жұмыспен қамтылған. 2024 жылдың қорытындысы бойынша 8,4 мың тонна өнім өндірілді, жеткізілімдер ішкі нарыққа бағдарланған.Сондай-ақ вице-премьер «QazExpoCentre-Pipe» ЖШС-де болды, онда процестерді толық автоматтандырумен мұнай-газ саласына арналған қаптама және сорғы-компрессорлық құбырлар өндірісі жолға қойылған. Кәсіпорын сорғы-компрессорлық және корпустық муфталарды өндіру бойынша жаңа автоматтандырылған желіні салу есебінен кеңейтуді жоспарлап отыр.Бұдан бөлек, «Стекло-Сервис» ЖШС-нің жалпы құрылыс мақсаттағы екі қабатты терезелер, шыңдалған шыны және шыны өнімдерінің басқа да түрлерін өндіретін және энергетика секторы үшін электротехникалық өнім шығаруды қамтамасыз ететін Орал трансформатор зауытының қызметімен танысты.Отандық өндірістің толық циклі — шикізатты өңдеуден бастап логистикаға дейін — бигбэгтерді (өнеркәсіптік жұмсақ контейнерлер) шығаратын «Packaging Systems» ЖШС-де жүзеге асырылған. Кәсіпорынның қуаттылығы жылына 5 млн өнімді құрайды. Полипропилен шикізаты Атырау KPI зауытынан жеткізіледі. Жоба 2023 жылдың қазан айында пайдалануға берілді. Өнімдер Ресей мен ЕО елдеріне — Польша, Литва, Бельгия, Аустрияға экспортталады. алдағы уақытта Мысыр және Франция нарықтарына шығу жоспарланған.Әрбір нысанда вице-премьер, «Бәйтерек» холдингі мен оның қаржы институттарының, сондай-ақ салалық мемлекеттік органдардың өкілдері кәсіпорындардың даму перспективаларымен және мемлекеттік қолдау шараларын көрсету мүмкіндігін бағалау үшін олардың қызметіндегі өзекті мәселелермен танысты.Ақпарат көзі : https://www.gov.kz/memleket/entities/economy/press/news/details/1166653?lang=kk

2026 жылғы 20 ақпанда S&P рейтингтік агенттігі «Позитивті» болжамын сақтай отырып, Қазақстан Республикасының тәуелсіз кредиттік рейтингін «BBB–» деңгейінде растады. Рейтинг пен позитивті болжамның сақталуы одан әрі фискалдық шоғырлануға, өтімділігі жоғары активтердің елеулі буферлерінің сақталуына, экономиканы әртараптандырудың жалғасуына, ауқымды цифрландыру арқылы мемлекеттік басқару тиімділігінің артуына, сондай-ақ институционалдық және әкімшілік реформалардың жалғасуына байланысты.Оның ішінде Ұлттық қордың қаражатын пайдалану бойынша қатаң фискалдық қағидалардың сақталуы, мұнайға қатысты емес салық базасын кеңейтумен бірге мемлекеттік қаржының орнықтылығын нығайтуға ықпал ететін болады. ҚҚС-ты арттыру, салықтық әкімшілендіруді жетілдіру, сондай-ақ бюджет шығыстарының өсуін шектеу тапшылықты біртіндеп қысқартуға ықпал ететін болады.S&P өңдеу өндірістерін дамытуға бағытталған өткен жылы басталған инвестициялық бағдарламаны ерекше атап өтті. Басым секторлардағы «Бәйтерек» ҰИХ жобаларының ауқымы мен портфелі өткен жылдарға қарағанда ЖІӨ-ге қатысты инвестициялардың жоғары деңгейін қолдауға мүмкіндік береді. Болжау бойынша әртараптандыру процесі жалғасады. ЖІӨ құрылымындағы өңдеу өнеркәсібінің үлесі екінші жылы тау-кен өндіру саласының үлесінен асып түседі және жедел деректер бойынша 2025 жылы 12,7% - ға дейін көтерілді.Талдаушылардың болжамы бойынша, біркелкі сыртқы борыш деңгейінің және шетел валютасындағы активтер көлемінің арқасында Қазақстан сыртқы нетто-кредитор болып қала береді. Қайталама санкциялар қаупінің төмен екені де атап өтілді.Ақпарат көзі : https://www.gov.kz/memleket/entities/economy/press/news/details/1166669?lang=kk

2026 жылғы 20 ақпанда Қостанай облысының бірқатар ауданында республикалық «Таза Қазақстан» бағдарламасы аясында экологиялық және әлеуметтік бағыттағы іс-шаралар өтті. Аталған бастамалар еріктілер қозғалысын дамытуға, экологиялық мәдениетті қалыптастыруға және халықтың әлеуметтік осал топтарын қолдауға бағытталды.Қарабалық ауданында Қазақстан Республикасының бастамасымен БҰҰ Бас Ассамблеясы жариялаған Халықаралық еріктілер жылының салтанатты ашылуы өтті. Ресми бөлімнен кейін еріктілер «Қарлы десант» акциясына қатысып, жалғызбасты аналар мен зейнеткерлер тұратын 12 ауланы қардан тазартты. Акцияға 25 ерікті қатысып, мемлекеттік құрылымдар мен жастардың тиімді өзара іс-қимылының үлгісін көрсетті.Қостанай қаласында Жастар сарайы базасында облыстық «Қарлы десант» еріктілер акциясы өтті. Қостанай облыстық Жастар ресурстық орталығы ұйымдастырған шара аясында студент-еріктілер 25 мекенжай бойынша жалғыз тұратын зейнеткерлер мен мүмкіндігі шектеулі азаматтардың аулаларын қардан тазартты. Дана Токжанова – Қостанай облысының Жастар ресурстық орталығының ақпараттық-әдістемелік сектордың жетекшісі былай деді:«Әрбір қардан тазартылған аула – бұл тек үйге қамқорлық емес, сонымен қатар қоғамымыздағы бірлік пен қолдауды нығайтуға жасалған кішкентай қадам. Біздің еріктілеріміз белсенді жастар шын мәнінде адамдардың пайдасына нақты істер атқара алатынын көрсетеді».Акция әлеуметтік жауапкершілікті арттыруға және өзара көмек мәдениетін дамытуға септігін тигізді.Федоров ауданында «Заттарға екінші өмір» атты экологиялық іс-шара ұйымдастырылды. Шараның мақсаты – жастар арасында саналы тұтыну қағидаттарын дәріптеу және қоршаған ортаға ұқыпты қарауды қалыптастыру. Қатысушылар экологиялық өзекті мәселелерді талқылап, заттарды қайта пайдалану тәсілдерімен танысты және тақырыптық белсенділіктерге қатысты.Жітіқара ауданында Абай атындағы мектеп-лицейінде «Таза Қазақстан» бағдарламасының іске асырылу барысына арналған кездесу өтті. Іс-шара барысында абаттандыру, көгалдандыру, рұқсат етілмеген қоқыс орындарын жою, инфрақұрылымды дамыту және қоғамдық кеңістіктерді жаңғырту бойынша атқарылған жұмыстар таныстырылды. Сонымен қатар, оқушылар мен әлеуметтік серіктестердің экологиялық бастамаларға белсенді қатысуы атап өтілді.Өткізілген іс-шаралар өңірде «Таза Қазақстан» бағдарламасының жүйелі түрде жүзеге асырылып жатқанын, қоғам белсенділігінің жоғары деңгейін және билік органдары, жастар мен тұрғындардың абаттандыру, экологиялық жауапкершілік пен әлеуметтік қолдау бағытындағы бірлескен күш-жігерін айқын көрсетті.Ақпарат көзі : https://www.gov.kz/memleket/entities/kostanay/press/news/details/1166634?lang=kk