Париж қ. 2026 ж. 5 ақпан – Экономикалық ынтымақтастық және даму ұйымның (ЭЫДҰ) Париждегі бас пәтерінде Орталық Азия, Шығыс Еуропа және Кавказ елдерінен, ЭЫДҰ-ға мүше мемлекеттерден, сондай-ақ мүдделі халықаралық және үкіметтік емес ұйымдар мен бизнес-құрылымдардың өкілдерін қоса алғанда 200-ден астам делегаттың қатысуымен кезекті «Еуразия апталығы» өтті. «ЭЫДҰ-ның Еуразия апталығы» – 2008 жылы бастамашылық еткен Еуразиялық бәсекеге қабілеттілік бағдарламасы (ЕБҚБ) аясында өңір елдері мен Ұйымға мүше мемлекеттердің тұрақты түрде өтетін кездесуі. Іс-шара Еуразия елдері мен ЭЫДҰ арасындағы өңірдің бәсекеге қабілеттілігіне және оның әлеуметтік-экономикалық дамуына ықпал ететін мәселелер бойынша ынтымақтастықты нығайтуға бағытталған. «ЭЫДҰ Еуразия апталығына» қатысқан Қазақстан делегациясы құрамына ҚР Сауда және интеграция бірінші вице-министрі Айжан Бижанова, ҚР Қаржы вице-министрі Ержан Біржанов, ҚР Ұлттық экономика министрлігінің, ҚР Өнеркәсіп және құрылыс министрлігінің, Qaztrade сауда саясатын дамыту орталығының, Экономикалық зерттеулер институтының және Париждегі халықаралық ұйымдар жанындағы ҚР Тұрақты өкілдігінің қызметкерлері кірді. Іс-шараның ашылу сессиясында Орталық Азия бастамасының ЕБҚБ шеңберіндегі өңірлік тең төрағасы ретінде сөйлеген сөзінде Қазақстан делегациясы ЭЫДҰ-ның сапалы талдамасы мен нақты ұсынымдары елімізде және өңірде экономиканың бірқатар негізгі салалары мен мемлекеттік басқару жүйесінде реформаларды әзірлеу және іске асыруда маңызды рөл атқарып, Ұйымның жоғары стандарттары ұлттық заңнаманы жүйелі түрде жетілдіруге ықпал ететінін атап өтті. Бұл ретте, Қазақстан ЭЫДҰ-ның өңіріміздегі елдермен – сауда рәсімдерін жеңілдету және көлік байланыстылығын нығайту салаларын қоса алғанда жүйелі ынтымақтастығын қолдайды. Сонымен қатар, Қазақстан делегациясы Еуразия апталығының қатысушыларын 22–24 сәуір аралығында Астанада өтетін Өңірлік экологиялық саммит туралы хабардар етіп, ЭЫДҰ-ға оның мазмұнды күн тәртібін әзірлеудегі серіктестігі үшін алғыс білдірді. ҚР Сауда және интеграция бірінші вице-министрі А. Бижанова Транскаспий халықаралық көлік дәлізінің бәсекеге қабілеттілігін көтеруге және Азиядағы стратегиялық инфрақұрылым бағдарламасына (SIPA) арналған сессияларда сөз сөйледі. Өз баяндамаларында ол Транскаспий дәлізіндегі институционалдық кедергілерді жою бойынша Қазақстанның басымдықтарын атап өтті. Цифрландырудың, келісілген инфрақұрылымдық шешімдердің және сауда рәсімдерін үйлестірудің рөлі атап өтілді. Экологиялық тұрақтылық қағидаттарын ескере отырып, «көміртегі күн тәртібіне» және көлік және сауда инфрақұрылымын дамытуға ерекше назар аударылды. Бұл тұрғыда сауда-саттықты кеңейту және тұрақты жаһандық жеткізу тізбегіне интеграциялау тетігі ретінде өңір елдерінің SIPA шеңберіндегі ынтымақтастығының құндылығы атап өтілді. Делегация аса маңызды шикізат материалдарына арналған сессияға белсенді қатысты. ҚР Қаржы вице-министрі Е. Біржанов Қазақстанда пайдалы қазбалардың бағасын төмендету, зиянды салықтық жеңілдіктер беру, трансферттік баға белгілеу сияқты тәуекелдерге қарсы іс-қимыл жүйесі қалай жолға қойылғаны туралы айтып, жаңа Салық кодексінің бірқатар нормалары осы саладағы инвесторлар үшін тиімді жағдайлар жасауға бағытталғаны атап өтті. Өз кезегінде, ҚР Өнеркәсіп және құрылыс министрлігінің Еуропалық одақтағы өкілі Сайран Байжаханов жауапты бизнес жүргізу саласындағы ЭЫДҰ стандарттарын, атап айтқанда тау-кен өндіру секторында қолдану жөніндегі талқылау барысында Қазақстанның тәжірибесімен бөлісті. Экономикалық зерттеулер институты басқарма төрағасының орынбасары Қайсар Нығметов Еуразия елдері экономикаларының бәсекеге қабілеттілігі мәселелеріне арналған сессияда отандық тәжірибені таныстырып, нарықтық бұрмалауларды шектеу және мемлекеттік кәсіпорындардың қызметінің тиімділігін арттыру үшін қолданылатын реттеушілік және басқарушылық тетіктерге тоқталды. Бұл ретте, ол осы саладағы реформаларды іске асыруда Қазақстанға және өңірдің басқа да елдеріне ЭЫДҰ тарапынан көрсетіліп отырған бағалы қолдауды атап өтті.Сонымен қатар, Qaztrade сауда саясатын дамыту орталығы бас директорының орынбасары Нұрлан Құлбатыров халықаралық сауда рәсімдерін жетілдіру, экспортты әртараптандыру және инвестиция тарту тұрғысынан Қазақстанның тәжірибесін таныстырды. Іс-шара аясында ҚР делегациясының ЭЫДҰ-ның құрылымдық бөлімшелерінің және іс-шараға қатысқан басқа делегациялармен бірқатар екіжақты кездесулері өтті.Ақпарат көзі : https://www.gov.kz/memleket/entities/mti/press/news/details/1156687?lang=kk

Іле ауданы Мұхаметжан Түймебаев ауылындағы 1000-нан астам үй орталықтандырылған ауызсу жүйесіне қосылды. Жоба құны – 1,4 млрд теңге. Нәтижесінде 21,5 шақырым су құбыры тартылып, 2 резервуар мен 220 метр тереңдікке жететін 2 артезиандық ұңғыма, лаборатория салынған.Су 2025 жылдың тамыз айынан беріле бастап, құрылыс-монтаждау жұмысы қараша айында толығымен аяқталған. Болашақта тұрғындар саны 30 пайызға дейін өскен жағдайда да сумен қамтамасыз етуге қуаты жетеді. Осы уақытқа дейін әр үйде 35 метрге жететін ұңғыма болған. Бірақ ол су ішуге жарамсыз болғандықтан тұрғындар ауыссуды үйлеріне тасып, әкеліп жүрген.Іле аудандық тұрғын-үй коммуналдық шаруашылық және тұрғын үй инспекциясы бөлімінің басшысы Ғазиз Алтайұлының айтуынша, өткен жылы Іле ауданында ауызсу жүйесінің 55,2 шақырымы жаңадан салынып, 10 шақырымы жаңартылған.Сонымен қатар Ащыбұлақ ауылдық округіне қарасты Көкқайнар ауылында да ауызсу жүйелерін салуға жобалық-сметалық құжаттама әзірленіп, мемлекеттік сараптаманың оң қорытындысы алынған. Жобаға сәйкес 22 шақырым су құбыры жүргізіліп, 1100-ден астам үй орталықтандырылған сумен қамтылатын болады. Ақпарат көзі : https://www.gov.kz/memleket/entities/almobl/press/news/details/1156749?lang=kk

Премьер-министр Олжас Бектенов «Атамекен» ҰКП алаңында мұнай-газ және энергетика саласы, тау-кен және металлургия өнеркәсібі, АӨК бизнес өкілдері, салалық қауымдастықтар мүшелері мен барлық өңір сарапшыларының қатысуымен кәсіпкерлікті дамыту мәселелері жөнінде кеңес өткізді.  Салық реформалары, бизнесті қолдау, ақпараттық жүйелерді цифрландыру сынды басқа да өзекті мәселелерге назар аударылды.Жиынды ашқан Премьер-министр кәсіпкерлікті дамыту Мемлекет басшысы айқындаған басым бағыттардың бірі екенін ерекше атап өтті. Бизнес – экономикалық реформалар жүргізуде басты серіктес, бұл жұмыста «Атамекен» ҰКП маңызды рөл атқарады.«Біз бүгін сіздермен еліміз үшін өте маңызды, тарихи маңызы бар сәтте кездесіп отырмыз. Жарты жыл бойы қоғамда конституциялық реформаны белсенді талқылау жүріп жатыр. Ашық дискуссиялар болып жатыр. Азаматтардан мыңдаған ұсыныс келіп түсуде және олардың барлығы терең зерделеніп, ескеріліп жатыр. Бұл – еліміздегі демократиялық процестердің айқын дәлелі. Еліміздің жаңа Конституциясының жобасы халыққа ұсынылды, басты мақсат – егемендігімізді, Тәуелсіздікті нығайту. Барлығыңызды Президентімізді және жаңа Конституцияны қолдауға шақырамын. Сіздердің қарамақтарыңызда мыңдаған азамат жұмыс істейді. Олардың әрқайсысына реформа міндеттерін дұрыс жеткізу маңызды», — деп атап өтті Олжас Бектенов.Жаңа Конституция жобасында Мемлекет басшысының Заң және Тәртіп жаппай үстемдік құрған Әділетті Қазақстанды құру туралы бағдары кәсіпкерлер қауымына үлкен жауапкершілік жүктеп, адал еңбек, кәсіпке деген құрмет, елге жанашыр болу сияқты құндылықтардың маңызын арттыра түседі. Әділдік пен заңдылық қағидаттарын конституциялық деңгейде бекіту сенім мен ұзақмерзімді әріптестік орта қалыптастырады.Кеңес барысында Президенттің жаңа салық ережелерін біртіндеп енгізуге қатысты тапсырмасының орындалуына назар аударылды. Қатысушылар салық төлеушілер үшін өтпелі кезең мен салықтық әкімшілендіру мәселелерін талқылады.Қазақстанда кәсіпкерлердің салықтық әкімшілендірудің жаңа шарттарына қолайлы көшуін қамтамасыз ету бойынша шаралар қабылданды. Осылайша, Үкіметтің шешімімен шағын және микробизнес жекелеген жағдайды қоспағанда, 2026 жылғы 1 қаңтарға дейін тексерулерден, камералдық бақылаудан және әкімшілік жауапкершіліктен босатылды. Биылғы 1 сәуірге дейін берешекті төлеу кезінде өсімпұлдар мен айыппұлдарды есептен шығару ережесі қолданылады, қызметті жою және тоқтату рәсімдері қайта қаралды. 2026 жылдың соңына дейін шағын және микробизнес үшін өтпелі кезең енгізілді, қателер үшін өсімпұлдар мен айыппұлдар алынбайды.Премьер-министрдің орынбасары – ұлттық экономика министрі Серік Жұманғарин бір мезгілде 250 мыңға дейін салық төлеушіге қызмет көрсету мүмкіндігі бар Жобалық кеңсенің жұмысы туралы баяндады. Жұмыс өтініштерді жедел қараумен «бірыңғай терезе» қағидаты бойынша құрылған. Соңғы үш аптада сұраныстар ағынының 19,5 мыңнан 7,1 мыңға дейін төмендеуі байқалады, бұл техникалық процестердің тұрақтанғанын көрсетеді. «Халық бухгалтері» акциясына 17 мыңнан астам салық төлеуші қатысты. Сондай-ақ салық жүйесінде азаматтар мен бизнесті тіркеудің өсуі байқалғаны атап өтілді. Жылдың басынан бері 41,2 мыңнан астам адам қайтадан есепке алынды. Өзін-өзі жұмыспен қамтығандар үшін жаңа режим бұрын есепке алынбаған 187,2 мыңнан астам адамды заңды ортаға шығарды. Бизнесті қаржылық қолдау шаралары күшейтілуде. 2025 жылы қолданыстағы бағдарламалар шеңберінде жалпы құны 365 млрд теңге болатын 3,4 мыңға жуық ШОБ жобасы субсидияланды.«Атамекен» ҰКП басқарма мүшесі – басқарма төрағасының орынбасары Тимур Жаркенов арнайы салық режимін қолдануға және денсаулық сақтау секторына салық салу тәсілдерін қайта қарауға байланысты мәселелерді шешу жолдарын ұсына отырып, жаңа Салық кодексінің ережелері бойынша бизнес-қоғамдастықтың ұстанымын айтты.Бизнес-қоғамдастық атынан «Алматы бояулары» ЖШС директоры Римма Салықова, «Қазэлектромаш» ЖШС директоры Виталий Распопин ұсыныстар мен сұрақтар қойды. Атап айтқанда, ШОБ-пен өзара іс-қимылды, мемлекеттік сатып алу практикасын және салалық талаптарды ескере отырып, салықтық әкімшілендірудің жекелеген аспектілерін реттеу қажеттілігі айтылды. Сондай-ақ кәсіпорындарды өндірістік цикл деңгейі мен ауқымы бойынша санаттарға бөлуді енгізу, мемлекеттік қолдау шаралары мен мемлекеттік тапсырысты локализациялау және инвестициялау деңгейіне байланыстыру, сондай-ақ Тізілімнен өнімдерді пайдалануды нақты әрі әділ цифрлық бақылауды қамтамасыз ету арқылы Қазақстандық тауар өндірушілер тізілімін жетілдіруге қатысты одан әрі жұмыс бойынша ұсыныс айтылды.Премьер-министр бизнестің айтылған бастамаларына пікір білдіріп, мемлекеттік органдарға «Атамекен» ҰКП-мен бірлесіп ұсыныстарды жан-жақты пысықтауды және нақты нәтижені қамтамасыз етуді тапсырды. Шешімдер тұрақты өсуді қолдау, нақты секторды нығайту, экспорттық мүмкіндіктерді кеңейту және жұмыс орындарын ашу бойынша оң экономикалық нәтиже беруі керектігі атап өтілді.https://primeminister.kz/news/olzas-bektenov-zana-konstituciia-zobasy-memleket-pen-biznes-arasyndagy-senim-men-uzakmerzimdi-seriktestik-orta-kalyptastyrady-31062Ақпарат көзі : https://www.gov.kz/memleket/entities/economy/press/news/details/1156502?lang=kk

Қонаев қаласында жастарға бағытталған көші-қон мәселелері бойынша кездесу өтті. Жиынды Мансап орталығы мен Халықаралық көші-қон ұйымының (IOM / UN Migration) ұйымдастырды. Мұндағы негізгі мақсат - азаматтардың шетелге шығуына заңды түрде дайындығы мен саладағы маңызды ақпараттармен бөлісу.Кездесу барысында қатысушыларға қолжетімді бағдарламалар, виза талаптары, еңбек көші-қонының кезеңдері, сондай-ақ адам құқықтар мен міндеттер талқыланды. Мамандар заңсыз жұмысқа орналасудың қауіптері мен адам саудасының алдын алу жолдарына да ерекше тоқталды. Шара аясында Халықаралық көші-қон ұйымының ұлттық бағдарлама қызметкері Светлана Бекмамбетова сөз сөйлеп, IOM-ның Қазақстандағы қызметі туралы баяндады.Аталған кездесу екі сессиядан тұрады. Бірінші сессияда шетелге шығу алдындағы дайындықтың негізгі аспектілері қарастырылды. Қатысушылар құжаттарды рәсімдеу, жұмыс берушіні тексеру жәнк еңбек шартын оқу бойынша кеңес алды. Екінші сессия интерактивті ойынға негізделген тренинг түрінде өтті. Онда нақты өмірлік жағдайлар талқыланып, қауіпсіз шешім қабылдау дағдылары пысықталды.Жалпы елімізде шетелде жұмыс істеуге дайындық орталықтары ашылып, көші-қон қызметтері кезең-кезеңімен цифрландырылып жатыр. Бұл азаматтарға құжат рәсімдеу мен кеңес алу процесін жеңілдетуге мүмкіндік береді. Мұндай ақпараттық кездесулер жастардың саналы шешім қабылдауына, заңсыз көші-қонның алдын алуға және шетелге шығу кезінде өз құқықтарын қорғауға ықпал етеді.Аталған кездесу — жастар мен тұрғындардың қауіпсіз еңбек көші-қоны туралы білімін арттыруға бағытталған маңызды қадам. Ақпараттанған азамат - қорғалған азамат. Сондықтан мұндай бастамалар қоғам үшін аса өзекті.Ақпарат көзі : https://www.gov.kz/memleket/entities/almobl/press/news/details/1156518?lang=kk

2025 жылы Алматы облысы агроөнеркәсіптік кешенге (АӨК) тартылған инвестициялар көлемі бойынша елдегі жетекші өңірлердің қатарына енді. Сараптамалық деректерге сәйкес, өңірге шамамен 190 миллиард теңге инвестиция тартылған.Сараптамалық деректерге сәйкес, 2025 жылы АӨК секторының негізгі капиталына салынған инвестициялар жедел өсу кезеңіне өтті. Атап айтқанда, ауыл шаруашылығында инвестициялардың нақты көлем индексі 153 пайызды құрап, қаржы көлемі 1,2 триллион теңгеге жеткен. Тамақ өнімдері өндірісінде бұл көрсеткіш 208 пайызға (389,4 миллиард теңге), ал сусындар өндірісінде 240 пайызға (124,4 миллиард теңге) артқан.Сонымен қатар, ел бойынша АӨК-ке бағытталған инвестициялардың 69 пайызы ауыл шаруашылығына, ал 31 пайызы ғана қайта өңдеу саласына тиесілі. Бұл жағдай Ауыл шаруашылығы министрлігі қайта өңдеу мен қосылған құнды арттыруды басымдық ретінде атап өткенімен, инвестициялық циклдің әзірге шикізаттық базаны кеңейтуге көбірек бағытталғанын көрсетеді.АӨК-ке салынған инвестициялардың жиынтық көлемі бойынша Павлодар және Түркістан облыстары көш бастап тұр. Әр өңірге шамамен 246–247 миллиард теңгеден инвестиция тартылған. Одан кейінгі орындарда Солтүстік Қазақстан облысы (192 миллиард теңге) мен Алматы облысы (190 миллиард теңге) орналасқан.Алайда өңірлер арасындағы инвестициялық құрылым әркелкі. Солтүстік өңірлерде капитал салымдарының басым бөлігі ауыл шаруашылығына бағытталса, Алматы облысы қайта өңдеу саласына, атап айтқанда тамақ өнімдері мен сусындар өндірісіне басымдық беріп отыр.Екінші деңгейдегі өңірлер қатарына Ақмола, Қарағанды, Ақтөбе және Қостанай облыстары кіреді. Бұл аймақтарда инвестиция көлемі бар болғанымен, қайта өңдеу бағытына айқын бетбұрыс байқалмайды. Ал Жамбыл облысында қайта өңдеу саласына салынған инвестиция үлесі ауыл шаруашылығы өндірісінен асып түскенімен ерекшеленеді.АӨК-ке ең аз инвестициялар Ұлытау және Маңғыстау облыстарында тіркелген. Бұл көбіне табиғи-климаттық шектеулерге және азық-түлік жеткізіліміне жоғары тәуелділікке байланысты. Сарапшылардың айтуынша, аталған өңірлер ел бойынша ең жоғары жалақы көрсеткіштеріне ие болғанымен, бұл ауыл шаруашылығы емес, шикізаттық салалардың есебінен қалыптасқан. Сонымен қатар, дәл осы өңірлерде азық-түлік бағасының жоғары болуы логистикалық шығындар мен жергілікті өндірістің жеткіліксіздігімен байланысты.Жалпы алғанда, агроөнеркәсіптік кешендегі инвестициялық белсенділік артқанымен, өңірлер арасында теңгерімсіздік сақталып отыр. Мамандардың пікірінше, ауыл шаруашылығы мен қайта өңдеу саласы бірін-бірі толықтырып, қатар дамуы тиіс. Бұл инвестицияларды тұрақты өндіріс көлеміне, жұмыспен қамтуға және елдің азық-түлік қауіпсіздігіне айналдырудың басты шарты болып отыр. Ақпарат көзі : https://www.gov.kz/memleket/entities/almobl/press/news/details/1156416?lang=kk

ҚР Сауда және интеграция министрлігі ішкі сауда субъекттеріне жеке кәсіпкерлікті мемлекеттік қолдау шараларын көрсету қағидаларына өзгерістер енгізу жөніндегі жобаны қоғамдық талқылауға шығарды. Құжат «Ашық НҚА» порталында жарияланып, 20 ақпанына дейін талқыланады. Жоба шағын бизнесті практикалық тұрғыда қолдауды күшейтуге және қазақстандық өндірістің дамуын ынталандыруға бағытталған. Ұсынылып отырған өзгерістер мемлекеттік бағдарлама шарттарына әсер етіп, мемлекеттік қолдау шараларын алушылар үшін кәсіпкерлердің мүдделерін қорғауға басымдық бере отырып, қарсы міндеттемелерді күшейтуді көздейді. Негізгі ұсыныстардың бірі – сауда нысаны үшін мемлекеттік қолдау алған, яғни несиенің сыйақы мөлшерлемесінің бір бөлігін субсидиялау және несиелер бойынша кепілдік алған кәсіпкерге бір жыл ішінде жалдау құнын өсіруге шектеу қойылады. Бұл шара жалға алынған алаңдарда жұмыс істейтін шағын және орта бизнес, сондай-ақ жеке кәсіпкерлер үшін ерекше маңызды. Ол шығындардың болжамдылығын қамтамасыз етіп, қызметті жоспарлауға мүмкіндік береді және жалдау ақысының кенеттен әрі негізсіз өсу қаупін төмендетеді. Сонымен қатар жоба аясында қазақстандық тауар өндірушілердің тізіліміне енгізілген жаңа қазақстандық брендтердің тауарларын сауда алаңдарында және сөреге жеңілдетілген шарттармен орналастыру көзделген. Бұл өндірушінің жазбаша өтініші негізінде үш айдан одан да ұзақ мерзімге жүзеге асырылады. Ұсынылып отырған өзгерістер жаңа отандық брендтер үшін нарықта өзін танытуға және дамуға қажетті бастапқы мүмкіндік береді. Бұдан бөлек, айналым қаражатын толықтыру кезінде Қағидаларда тауарларды, шикізат пен материалдарды қазақстандық тауар өндірушілер тізіліміне енгізілген кәсіпкерлерден сатып алу талабы бекітіледі. Бұл шешім ішкі кооперацияны дамытуға, жергілікті жеткізу тізбектерін қолдауға және импортқа тәуелділікті азайтуға бағытталған. Жалпы алғанда, ұсынылып отырған нормаларды іске асыру шағын бизнес мәселелерін шешуге жүйелі көзқарасты көрсетіп, ұзақ мерзімді экономикалық әсер қалыптастыруға мүмкіндік береді. Нәтижесінде шағын өндірушілер санының артуы, отандық тауарлар ассортиментінің кеңеюі және жаңа жұмыс орындарының құрылады деп жоспарланған. Жобаны талқылау 20 ақпанға дейін жалғасады. ҚР Сауда және интеграция министрлігі барлық мүдделі тұлғаларды «Ашық НҚА» порталында қоғамдық талқылауға қатысуға шақырады. Сілтеме - https://legalacts.egov.kz/npa/view?id=15757905Ақпарат көзі : https://www.gov.kz/memleket/entities/mti/press/news/details/1156418?lang=kk

Ұлттық қорғаныс университеті Әскери-зерттеу институтының базасында Құрлық әскерлері ұшқышсыз авиациялық жүйелер операторларының біліктілігін арттыруға арналған апталық курс өтіп жатыр. Сабақты ұшқышсыз авиация саласында он жылдан астам жұмыс тәжірибесі бар оқытушылар мен нұсқаушылар жүргізуде.Қазіргі жағдайларда сұранысқа ие практикалық дайындыққа негізгі басымдық берілгенін айта кету керек.Курс барысында әскери қызметшілер «Торғай-10» құрылғысын ұшқышсыз ұшу аппаратына бөлшектеп жинау дағдыларын игереді. Сонымен бірге тактикалық-техникалық сипаттамаларын зерделеп, қауіпсіздік шаралары мен әртүрлі жағдайда қолдану ерекшеліктерін де үйренеді. Бұдан бөлек, Ұлттық қорғаныс университетінің ғылыми қызметкерлері әзірлеген «Ара» дрондарын қолдану бойынша да практикалық сабақтар жүргізіледі. Жеке оқу модулі FPV-дрондарға арналған. Тыңдаушылар оларды құрастыруды, бағдарламалауды, диагностикалауды және ақауларды жоюды үйреніп шығады.  – Біз қолданбалы дағдыларға басымдық береміз. Біздің мақсатымыз – алған білімдерін өз бөлімшелерінде тарата алатын мамандарды даярлау, – деп атап өтті ҚР ҰҚУ Қару-жарақ және әскери техника ғылыми-зерттеу институты зерттеу қызметінің бастығы полковник Жарқын Қабдолда. Ұшқышсыз авиациялық жүйелерді қолдану жеке құрамның қауіпсіздігін арттырып, жауынгерлік тапсырмаларды орындаудың тиімділігін жоғарылатады, дәлдікті, жедел барлауды және қарсыласқа қашықтан әсер етуді қамтамасыз етеді.– Ұшқышсыз ұшу аппараттары тактикалық басымдықтың негізгі элементіне айналды. Оларды қолдану формалары мен тәсілдерінің эволюциясы қазіргі заманғы ұрыс қимылдарының сипатына елеулі түрде әсер етуде, – дейді институттың Зерттеу қызметінің бастығы полковник Алексей Бойко.Ұшқышсыз жүйелерді басқару мамандарын даярлау Қарулы күштердің басты басымдықтарының бірі болып қала береді. Оның жүзеге асырылуы жеке құрамның техникалық біліктілігінің өсуіне және ұшқышсыз технологияларды қолдану мүмкіндіктерінің кеңеюіне ықпал етеді.Бұған дейін Сағадат Нұрмағамбетов атындағы Құрлық әскерлері әскери институтының базасында ҰҰА мамандарын даярлайтын әскери мектептің ашылғаны, сондай-ақ Десанттық-шабуылдау әскерлерінде ұшқышсыз аппараттарды құрастыру, сынақтан өткізу және оларды бөлімшелерге беру бойынша жұмыстардың толық циклі жолға қойылғаны хабарланған болатын. Ақпарат көзі : https://www.gov.kz/memleket/entities/mod/press/news/details/1156363?lang=kk

Мемлекеттік аппараттың парасаттылығыАғымдағы жылдың 5 ақпанында ҚР Мемлекеттік қызмет істері агенттігінің Қостанай облысы бойынша департаментінің басшысы Е.А. Салықбаевтың, Қостанай облысы әкімі аппаратының басшысы М.М. Сандыбаевтың, облыстық басқармалардың басшылары мен мамандарының қатысуымен жұмыс кеңесі өтті. Өз сөзінде Е.А. Салықбаев Мемлекет басшысының Қызылорда қаласындағы Ұлттық құрылтайда айтқан басымдықтарын атап өтті. Шенеуніктердің адалдығына қойылатын талап жалпы мемлекеттік сипаттағы өзекті міндет болып қала береді. Бұл мемлекеттік қызметтің бүкіл жүйесі үшін -бірінші басшылардан бастап әр орындаушыға дейін тікелей және біржақты бағдар. БАҚ және әлеуметтік желілерде мемлекеттік қызмет туралы жағымсыз жарияланымдардың саны едәуір өсті, сын тек қарапайым қызметкерлерге ғана емес, сонымен қатар бірінші басшыларға да қатысты. Бұл алаңдатарлық жағдай, өйткені қоғам мемлекетті белгілі бір шенеуніктердің мінез-құлқы мен шешімдері бойынша бағалайды. Спикер көбінесе жанжалдарға, тәртіптік салдарға және беделді түсіруге әкелетін негізгі тәуекелдерді атап өтті: декларациялар мен қаржылық бақылау, мүдделер қақтығысы, сыбайлас жемқорлыққа қарсы шектеулер, отбасылық бағыну, шетелдегі шоттар, құмар ойындар және ставкалар. Міндет - бұзушылыққа жол беру қиын, ал адал мінез-құлық норма болып табылатын жүйені құру. Е.А. Салықбаев Мемлекеттік қызметті дамытудың 2024-2029 жылдарға арналған тұжырымдамасы шеңберінде мемлекеттік қызметшілер үшін өзгерістер туралы да хабардар етті. Бұл кадрлық процестерді цифрландыру, қаржылық бақылау. Заң декларацияның екі түрін және лауазымды тұлғалардың жекелеген санаттары үшін декларациялардың жариялылығын белгілейді. Сыбайлас жемқорлыққа қарсы шектеулерді, оның ішінде жақын туыстарының, жұбайлары мен жекжаттарының, егер олардың арасында бағыныштылық туындаса, бірлескен қызметін (жұмысын), сондай-ақ Қазақстан Республикасынан тыс жерлерде ақша қаражаттары мен құндылықтарды сақтауға байланысты шектеулерді сақтау маңызды. М.М. Сандыбаев қатысушылардың назарын Мемлекет басшысының барлық уәкілетті мемлекеттік органдарға - өз жұмысын идеологиялық платформаға сәйкес қайта қарау және үндестіру туралы үндеуіне аударды. Қоғамның трансформациясы жағдайында тиімді кері байланыс арналарының, оның ішінде БАҚ пен әлеуметтік аккаунттардың болуы маңызды. Көшбасшылардың шеберлігі - азаматтық қоғаммен, БАҚ-пен байланыс орнату. Әдеп жөніндегі уәкіл К.Ж. Сюндиков практикалық кейстер мысалында мемлекеттік қызметшілердің әдеп стандарттары мен жауапкершілігін сақтамау мысалдары туралы хабардар етті. Кеңесте қызметшілердің құмар ойындарға және (немесе) бәс тігуге тыйым салуға байланысты шектеулерді сақтамағаны үшін, оның ішінде телекоммуникация желілері мен Интернет желісін ставкаларға, бәс тігулерге қатысу арқылы пайдаланғаны үшін жауапкершілігі жеке мәселе ретінде айтылды.Ақпарат көзі : https://www.gov.kz/memleket/entities/kostanay/press/news/details/1156361?lang=kk

Астанада Конституциялық реформа жөніндегі комиссияның сегізінші отырысы өтіп, онда ҚР Бас прокурорының орынбасары Жандос Өмірәлиев жаңа Конституция жобасындағы 18-бапты орыс тілінде нақтылай түсуді ұсынды. Конституцияның әрбір нормасы анық, түсінікті болуы керектігін, комиссияның орасан зор жұмыс атқарып жатқанын ерекше атап өтті.Мемлекеттік кеңесші Ерлан Қарин жаңа Конституцияның мәтіні аударма еместігіне тоқталды.–Жаңа Конституция жобасының мемлекеттік тілдегі нұсқасы – бұл аударма емес. Қолдарыңыздағы қазіргі жоба – о бастан мемлекеттік тілдің мүддесі тұрғысынан жазылған жоба. Екіұшты мәселелер туындаған кезде әуелі қазақ тіліндегі нұсқа назарға алынып отыр, – деді.Сондай-ақ Мемлекеттік кеңесші жаңа Конституцияның жобасында ескірген, мағынасы өзгерген сөздер қайта қаралғанын айтты.Е.Бөкетов атындағы Қарағанды университетінің ректоры Нұрлан Дулатбеков жаңа Конституцияда жоғары білімге қол жеткізудің қағидаттары нақты жазылу керек деген ұсынысын жеткізді. Сонымен бірге білім орындарын діни идеологиядан ажырату не үшін керек болғанын, білім беру жүйесі үшін мұның іргелі мәні бар екенін айтты.– Университеттер мен мектептер ғылымның, білімнің және әрине, академиялық еркіндіктің кеңістігі болып қалу керек. Мұндай тәсіл студенттерді қорғайды, бейтарап білім ортасына сақтайды және идеологиялық қысымның қатерін төмендетеді, – деді ғалым.Кезекті отырыста Мәжіліс депутаты Айдарбек Қожаназаров Конституцияда «Қазақстанның ұлттық валютасы – теңге» деп нақты бекіту бастамасын көтерді. М.Нәрікбаев атындағы КАЗГЮУ университеті» АҚ басқарма төрағасы, Конституциялық комиссия мүшесі Талғат Нәрікбаев комиссияның Ата заңның қазақ тіліндегі мәтінін жетілдіру бағытында атқарған жұмыстарына тоқталды.Конституциялық комиссия төрағасы Эльвира Әзімова Ата заңның жаңа редакциясы туралы азаматтардан түскен ұсыныстардың тағдыры не болғанын жиынтық кесте арқылы халыққа жеткізуді тапсырды.Еске салсақ, аймақ басшысы Нұрлыбек Нәлібаев Конституциялық комиссияның мүшесі ретінде комиссия отырыстарына, жекелеген жұмыс секцияларындағы талқылауларға қатысуда.Ақпарат көзі : https://www.gov.kz/memleket/entities/kyzylorda/press/news/details/1156329?lang=kk

Райымбек ауданында тұрғындарды жұмыспен қамтуға бағытталған «Бос жұмыс орындары жәрмеңкесі» ұйымдастырылды.Аталған іс-шараның негізгі мақсаты – еңбек нарығындағы сұранысты реттеу, жұмыссыз азаматтарды тұрақты және уақытша жұмыс орындарымен қамтамасыз ету, сондай-ақ әлеуметтік осал топтарды қолдау болып табылады.Жәрмеңкені «Алматы облысы еңбек мобильділігі орталығы» КММ-нің Райымбек ауданы бойынша мансап орталығы ұйымдастырды. Жәрменке аясында 28 жұмыс беруші тарапынан 56 бос жұмыс орны ұсынылды. Барлығы 58 азамат қатысты, оның ішінде пробация есебінде тұрған 20 адам қамтылды.Шара қорытындысы бойынша 6 азамат тұрақты жұмысқа орналастырылды, 30 адам қоғамдық жұмыстарға тартылды, ал 3 тұрғын әлеуметтік жұмыс орындарына жолданды.Сонымен қатар 2 азамат «Күміс жас» жобасы аясында жұмысқа орналасуға мүмкіндік алды.Айтулы жиын еңбек нарығындағы теңгерімді қамтамасыз етуге, азаматтарды тұрақты табыс көзімен қамтуға және олардың кәсіби әлеуетін арттыруға бағытталған тиімді алаң болып табылады.Айта кету керек, мұндай жәрмеңкелер алдағы уақытта да жүйелі түрде өткізілетін болады.Ақпарат көзі : https://www.gov.kz/memleket/entities/almobl/press/news/details/1156014?lang=kk

Астана, 2026 жылғы 5 ақпан – Қазақстан Республикасы Сыртқы істер министрінің орынбасары Арман Исетов Португалия Республикасының жаңадан тағайындалған Елшісі Жозе Атаиде Амаралдан сенім грамоталарының көшірмелерін қабылдады.Кездесу барысында А.Исетов португалиялық дипломатты жылы қабылдап, оның тағайындалуы Қазақстан мен Португалия арасындағы ынтымақтастықтың жаңа кезеңін ашатынына сенім білдірді.Дипломаттар саяси, сауда-экономикалық және мәдени-гуманитарлық салалардағы екіжақты өзара іс-қимылдың қазіргі ахуалы мен перспективаларын жан-жақты талқылап, шарттық-құқықтық базаны кеңейтудің маңыздылығына назар аударды. Бұл елдер арасындағы өзара тиімді байланыстарды едәуір жандандыруға мүмкіндік береді.Кездесу қорытындысы бойынша тараптар қазақ-португал ынтымақтастығын одан әрі дамыту бағытындағы жұмысты жандандыруға өзара дайындықтарын растады.Ақпарат көзі : https://www.gov.kz/memleket/entities/mfa/press/news/details/1155960?lang=kk

Астана, 2026 жылғы 5 ақпан – Қазақстан Республикасы Сыртқы істер министрінің орынбасары Арман Исетов Грек Республикасының жаңадан тағайындалған Елшісі Антония Кацурудан сенім грамоталарының көшірмелерін қабылдады.А.Исетов Грекияның Қазақстан үшін Жерорта теңізі өңіріндегі маңызды серіктестердің бірі екенін атап өтіп, Астана мен Афины арасындағы ынтымақтастықтың одан әрі нығая түсетініне сенім білдірді.Кездесу барысында тараптар саяси, сауда-экономикалық және инвестициялық салалардағы өзара іс-қимыл мәселелерін талқылап, туризм саласындағы ынтымақтастықты дамытуға ерекше назар аударды.Кездесу қорытындысы бойынша дипломаттар екіжақты ынтымақтастықтың барлық бағыттары бойынша сындарлы диалогты жалғастыруға дайындықтарын растады.Ақпарат көзі : https://www.gov.kz/memleket/entities/mfa/press/news/details/1155961?lang=kk

28-сінен 30-сына дейін астанада AstanaBuild халықаралық құрылыс және интерьер көрмесі өтеді — құрылыс секторы, архитектура, дизайн саласындағы кәсіпқойлар үшін негізгі салалық алаңдардың бірі. Іс-шара өндірушілерді, жеткізушілерді, құрылысшыларды, жобалаушыларды, салалық мемлекеттік органдар мен қауымдастықтардың өкілдерін біріктіреді.Көрмеге Қазақстан, Қытай, Ресей, Түркия және Өзбекстаннан келген компаниялар, оның ішінде Қытай мен Ресейдің ұжымдық экспозициялары қатысады. Қатысушылар арасында ірі халықаралық өндірушілер де, аймақтық компаниялар да бар. Alubest, Alstar, Avcom Kazakhstan, Dalmex, Garant Tranzit Plus, Panelsan, Yasar, Анкор-Астана, Гипсовинил, М-Конструктор, Полимерметалл-Т өз қатысуын растады. Экспозиция өнімдердің кең спектрін қамтиды: қабырға панельдері мен алюминий профильдерінен бастап лифт жабдықтары мен энергия тиімді инженерлік шешімдерге дейін.Көрменің іскерлік бағдарламасы іс-шараның маңызды бөлігі болып табылады және құрылыс дамуының өзекті мәселелеріне, нормативтік реттеу мен саланы цифрландыруға бағытталады. Бағдарлама аясында стратегиялық сессиялар мен семинарлар, кәсіби кездесулер, талқылаулар мен тәжірибе алмасу жоспарланған.AstanaBuild 2026 бизнес үшін жаңа көкжиектер ашады, қатысушыларға өнімдерін таныстыруға, келісімшарттар жасауға және Қазақстанның құрылыс нарығында өздерін танытуға көмектеседі.Іс-шараға ресми қолдау көрсететіндер: ҚР Индустрия және құрылыс министрлігі, Астана қаласының әкімдігі, Құрылыс және ТКШ істері комитеті, «Мемсараптама» РМК.Іс-шараның ұйымдастырушысы — Қазақстандық көрме компаниясы Iteca және оның халықаралық серіктесі – ICA Events компаниялар тобы.Келушілер үшін кіру алдын ала тіркелу арқылы тегін: https://astanabuild.kz/kz/kormege-bilet-alu?promo=ASB2026MPSӨтетін орны:Қазақстан Республикасы, Астана қ., «EXPO» ХКОӨтетін күндері: 2026 жылғы 28–30 сәуір Ұйымдастырушылардың байланыс деректері:Тел.:  +7 771 258 34 34, +7 727 258 34 34 E-mail: Kz.Build@iteca.events Ақпарат көзі : https://www.gov.kz/memleket/entities/mps/press/news/details/1155569?lang=kk

«Таза Қазақстан» экологиялық мәдениетті дамыту тұжырымдамасын іске асыру аясында Лисаковск қаласының Октябрьское кентінде республикалық «Қарлы десант» акциясы өтті.Іс-шараға Лисаковск техникалық колледжінің студенттері, еріктілер, Жастар ресурстық орталығының белсенділері, мемлекеттік қызметшілер, сондай-ақ Лисаковск қаласының төтенше жағдайлар бөлімінің қызметкерлері қатысып, барлығы 30-ға жуық адам жұмылдырылды.Акция барысында қатысушылар жалғыз тұратын зейнеткерлерге көмек көрсетіп, олардың ауласы мен үй маңындағы аумақтарды қардан тазалады. Мұндай бастамалар өңір жастары арасында экологиялық мәдениетті қалыптастыруға, еріктілер қозғалысын дамытуға және әлеуметтік жауапкершілікті нығайтуға бағытталған.Ұйымдастырушылардың айтуынша, «Қар десанты» акциясы қыс мезгілінде елді мекендердің санитарлық жағдайын жақсартумен қатар, әлеуметтік осал санаттағы азаматтарға нақты қолдау көрсетуге мүмкіндік береді.Аталған акциялар «Таза Қазақстан» тұжырымдамасы аясында алдағы уақытта да жалғасын табатын болады.Ақпарат көзі : https://www.gov.kz/memleket/entities/kostanay/press/news/details/1155362?lang=kk

Президент тапсырмаларын жүзеге асыру аясында ҚР Премьер-министрі Олжас Бектеновтің төрағалығымен Алатау қаласын дамыту жөніндегі кеңестің отырысы өтті.Жиында инвестициялық жобалардың орындалу барысы, инфрақұрылымдық қамтамасыз ету бойынша жұмыс қарқыны, сондай-ақ құқықтық экожүйге қатысты мәселелер және сапалы адами капиталды қалыптастыру тәсілдері талқыланды. Отырысты ашқан Премьер-министр Президенттің Alatau City-ді дамытуға ерекше көңіл бөліп отырғанын атап өтті.«Мемлекет басшысы Алатау қаласын ұзақмерзімді экономикалық дамудың жаңа орталығы ретінде белгілеп, жұмыс барысын тікелей өзі қадағалап отыр. Сонымен қатар жаңа Конституция жобасында қала дамуының негізгі қағидаттары да қамтылды. Елімізде арнайы құқықтық режимдердің пайда болуы Қазақстанның ұзақмерзімді экономикалық мүдделеріне сай әрі инвестиция тартуға жаңа мүмкіндіктер ашады. Алатау қаласын дамыту – бұл ерекше мәртебеге ие, жеделдетілген дамудың заманауи цифрлық қаласын құруға бағытталған инновациялық шешім», — деп атап өтті Олжас Бектенов.Бұл ретте елімізде арнайы құқықтық режимдердің пайда болуы елдің әкімшілік-аумақтық құрылымына әсер етпейтіні баса айтылды. Аумақтың тұрақтылық принципі сақталады әрі маңызды болып қала береді, бұл оның жаңа Конституция жобасының бірінші бөлімінде – «Конституциялық құрылым негіздерінде» бекітілуімен дәлелденеді.Премьер-министрдің орынбасары Қанат Бозымбаев Алатау қаласын дамыту бағытында атқарылып жатқан жұмыстар туралы баяндады. Қазіргі уақытта Парламентте «Алатау қаласының арнаулы мәртебесі туралы» Конституциялық заң жобасы қаралуда.Институционалдық база құрумен қатар инвесторлар үшін тартымды орта қалыптастыратын және қала экономикасының өсуіне жаңа серпін беретін жүйе құраушы жобаларды іске қосу бойынша практикалық жұмыс жүргізілуде. Басым бағыттар қатарында қаланың сәулеттік-іскерлік өзегі ретінде Iconic Complex көпфункционалды кешенін және жоғары білікті мамандар даярлайтын әрі озық технологияларды дамыту орталығы ретінде KAIST Kazakhstan технологиялық университетін салу жобалары бар.Жалпы инвестициялық портфель өнеркәсіп, логистика, агроөңдеу, қызмет көрсету және креативті индустрия салаларындағы жалпы көлемі шамамен 1,8 трлн теңге болатын 44 жобадан тұрады. Оларды жүзеге асыру 30 мыңнан астам жұмыс орнын ашуға және Alatau City тұрақты экономикалық орта қалыптастыруға мүмкіндік береді.Инженерлік және көлік инфрақұрылымын дамытуға баса назар аударылды. Бірқатар бағыт бойынша жобалар кезең-кезеңімен жүзеге асырылуда:энергиямен қамтамасыз ету — «Арна» қосалқы стансасының құрылысы 220/110 кВ, 6 қосалқы стансаны жобалау;сумен жабдықтау және су бұру – «Ынтымақ» су тоғанының қуатын кеңейту, үш су тоғанының құрылысы, ағын суды тазарту стансасы және су таратушы коллекторлар салу;газбен қамту – «Gate City-1» жаңа автоматтандырылған газ тарату стансасының (АГТС) құрылысын жобалау, Жетіген АГТС құрылысын аяқтау;жол инфрақұрылымы – Growing және Gate District-ке жол өтпесін салу бойынша құжаттама әзірленуде және EPC-F келісімшарттары шеңберінде Golden District-те жол өтпесін және инженерлік желілері бар жол салу көзделген.Alatau City Authority мемлекеттік қорының бас атқарушы директоры Әлішер Әбдіқадыров Алатау қаласын дамыту бойынша тұжырымдамалық және қала құрылысы жоспарлары, даму стратегиясы сияқты іргелі құжаттардың әзірленгені туралы баяндады.Тұжырымдамалық жоспарды енгізу қаланың стратегиялық және кеңістіктік дамуын айқындайды. Қала құрылысы жоспары мен даму стратегиясы аймақтарға бөлуді және құрылыс параметрлерін, сондай-ақ тұрғын үйдің өмір сүру ортасының сапасына қойылатын талаптарды, оның ішінде ғимараттардың биіктігі бойынша шектеулерді, көгалдандыру және абаттандыру нормаларын, аумақтың желдетілуін және жеке көліктер мен автотұрақтардың қолжетімділігін қамтамасыз етеді. Даму стратегиясы салалық актілер мен инвестициялық жоспарды бекітуге, сондай-ақ Алатау қаласының жедел дамуын қамтамасыз ету үшін преференциялар беруге негіз болады.Сапалы адами капиталды қалыптастыру тәсілдері жеке қарастырылды. Шэньчжэнь, Дубай және Сингапурдың табысты тәжірибесін ескере отырып, Алатауда адами капиталды қалыптастырудың кезеңдік моделі ұсынылады. Бұл модель сапа басымдығы бар еңбек ресурстарының басқарылатын және селективті ағыны принциптеріне негізделген. Негізгі бағдарлардың қатарында көші-қон саясатын экономиканың қажеттіліктерімен байланыстыру, жұмыспен қамтуды институционалдық реттеу және ел ішінде дағдылар мен құзыреттерді жүйелі жаңғырту есебінен еңбек нарығының жоғары білікті және басқарушылық сегменттеріндегі қазақстандық мамандардың барынша жоғары үлесін қамтамасыз ету үшін жағдайлар жасау көрсетілген.Отырыс қорытындысы бойынша кеңеске қатысушылар Алатау қаласын дамыту бойынша ұсынылған тәсілдер мен жұмыс бағыттарын қолдады. Қаланың экожүйесін толыққанды қалыптастыру үшін дербес актілерді әзірлеу басым міндет болып саналатыны атап өтілді. Осы жұмысты үйлестіру және сүйемелдеу мақсатында қажетті мәселелерді уақтылы қарап әрі жедел шешімдер қабылдау үшін Жедел комитет құрылды.Барлық нормативтік актілерді әзірлеу олардың инвесторлар үшін айқындылығы мен ашықтығына бағдарлануы тиіс екендігі атап өтілді. Осыған байланысты Алатау актілерін әзірлеуге және сараптауға отандық сарапшылармен қатар халықаралық ұйымдардың өкілдерін тарту тапсырылды.Премьер-министр табысты проактивті инвестициялық саясатты жүргізу үшін инженерлік инфрақұрылымды, әсіресе ірі зәкірлік жобаларды қарқынды дамыту талап етілетінін атап өтті. Алатау қаласының инженерлік инфрақұрылымын дамыту мәселелері бойынша министрліктерге Алматы облысының әкімдігімен бірлесіп бірқатар тапсырма берілді.Сондай-ақ ұйымдастырушылық және қаржылық сипаттағы бірқатар шешім қабылданды. primeminister.kz Ақпарат көзі : https://www.gov.kz/memleket/entities/almobl/press/news/details/1155264?lang=kk

 9 ақпан ақиық ақын Мұқағали Мақатаевтың туғанына 95 жыл толады. Осыған орай Қазақстан Қарулы күштерінде ақын өлеңдерін оқудан челлендж басталды.Аталған поэзиялық челлендждің басты мақсаты - Мұқағали Мақатаевтың бай әдеби мұрасын әскери ортада кеңінен насихаттау, әскери қызметшілер арасында ұлттық әдебиетке деген құрметті нығайту. Сондай-ақ, патриоттық тақырыптағы өлеңдер арқылы Отанға адал қызмет етудің биік рухын дәріптеу көзделген.4-9 ақпан аралығына жоспарланған поэзиялық челленджге Қазақстан Қарулы күштерінің барлық әскери қызметшілер мен сарбаздар қатыса алады. Қатысушылар ақын өлеңдерін оқып, бейнежазба форматында жариялап, эстафетаны келесі әскери бөлімге жолдайды.Поэзиялық челлендж әскери ұжымдар арасындағы шығармашылық байланысты нығайтып, жеке құрамның бірлігін арттыруға оң ықпал етеді. Мұндай рухани іс-шаралар әскери қызметшілердің бойында азаматтық ұстанымды қалыптастырып, ұлттық рухты көтеруге септігін тигізеді.Аталған акцияны Мұқағали Мақатаевтың «Отан» өлеңімен бастаған Қорғаныс министрлігі Медиа-контент орталығы Атырау гарнизоны баспасөз қызметінің бастығы лейтенант Нұржанат Мұхамет эстафетаны Әскери-теңіз күштеріне жолдады.Мұқағали Мақатаевтың шығармалары отансүйгіштік пен адамгершіліктің, ерлік пен елдік рухтың айқын көрінісі екенін айта кету керек. Ақын поэзиясы бүгінгі күні де өзектілігін жоғалтпай, жас ұрпақты туған жерді қадірлеуге, елге адал қызмет етуге үндейді.Бұл бастама Қарулы күштерде рухани-мәдени құндылықтарды дамытуға, жас әскери қызметшілердің әдебиетке қызығушылығын арттыруға бағытталған.Ақпарат көзі : https://www.gov.kz/memleket/entities/mod/press/news/details/1155049?lang=kk

Бизнес-форум алаңында барлығы 32 коммерциялық құжат рәсімделді. Қол қойылған келісімдер қаржы, логистика, өнеркәсіп, энергетика, агроөнеркәсіп кешені, цифрлық сервистер мен инфрақұрылым салаларындағы қазақстандық-пәкістандық ынтымақтастықты дамыту мен тереңдетуге бағытталған.Сапар аясындағы ең ірі өнеркәсіптік келісім – қазақстандық Falcon EuroBus ЖШС мен пәкістандық QCC International компаниясы арасында отандық электробустарды Пәкістанға жеткізу туралы жасалған, құны 108 млн АҚШ доллары болатын келісімшарт болды. Бұл құжат ұлттық машина жасау саласын ілгерілету және халықаралық нарықтарда Made in Kazakhstan брендін нығайту тұрғысынан стратегиялық маңызға ие. Сонымен қатар, экспорттық өнім түрлерін кеңейту мен жоғары технологиялық өндірісті одан әрі жергіліктендіруге жаңа мүмкіндіктер ашады.Келісімдердің елеулі бөлігі бірлескен инвестициялау тетіктерін іске қосуға және қаржылық ынтымақтастық инфрақұрылымын дамытуға арналды. Атап айтқанда, «Самұрық-Қазына» АҚ мен Fauji компаниялар тобы Қазақстан мен Пәкістан аумағында жобаларды іріктеу және іске асыру үшін бірлескен инвестициялық платформа құру жөніндегі келісімге келді.«Бәйтерек» ҰБХ» АҚ Habib Bank Limited арқылы жобалық және сауда қаржыландыру бағытындағы серіктестігін кеңейтіп, көлік-логистика секторында TCS Private Limited компаниясымен ынтымақтастық орнатты.Сондай-ақ Freedom Holding Corp. пен «Фридом Банк Қазақстан» АҚ пәкістандық серіктестермен бірқатар келісімдерге қол қойды. Атап айтқанда, Meezan Bank Limited-пен 20 млн АҚШ доллары көлемінде корреспонденттік қатынастарды дамыту және халықаралық есеп айырысулар жөнінде келісім жасалды. Бұдан бөлек, трансшекаралық қаржылық және цифрлық сервистерді дамытуға бағытталған уағдаластықтар бекітілді.Келісімдердің маңызды бөлігі көлік-логистика секторына тиесілі болды. «Қазақстан темір жолы» ҰК» АҚ пен National Logistics Corporation мультимодальды тасымалдар мен транзит саласындағы ынтымақтастық туралы келісті.«Қазпошта» АҚ Pakistan Post және TCS Private Limited компанияларымен пошта-логистикалық инфрақұрылымды дамыту және цифрлық шешімдерді енгізу жөнінде меморандумдарға қол қойды. Сонымен қатар, Ақтау халықаралық теңіз сауда порты мен Карачи порты порттық логистиканы дамыту және өзара ықпалдастықты кеңейту туралы келісімдерге келді.Өнеркәсіп саласында KazFoodProducts пен Almoiz Group арасында Жетісу облысында қант өндіретін бірлескен кәсіпорын құру жөнінде 20 млн АҚШ доллары көлеміндегі инвестициямен келісім жасалды. Сондай-ақ Kusto Group пен QazTrade арасында құрылыс материалдарын өндіруді дамытуға бағытталған 20 млн АҚШ доллары көлеміндегі меморандумға қол қойылды.Химия және қайта өңдеу өнеркәсібінде BARK Qazaqstan ЖШС мен пәкістандық бейінді құрылымдар арасында келісімдер жасалды. Сонымен қатар, Қызылорда облысында химиялық өндіріс іске қосу жөнінде NorSon Chemical Industries мен «Байқоңыр» ӘКК арасында меморандумға қол қойылды.Цифрлық сервистер, IT және телекоммуникация саласын қамтитын жеке келісімдер топтамасы да бар. Astana Hub пен IGNITE Pakistan стартап-экожүйелерді дамыту бойынша ынтымақтастық меморандумына қол қойды. QazCode пен Jazz Pakistan телекоммуникация секторындағы өзара іс-қимылды жолға қою жөнінде уағдаласты.Бұдан бөлек, цифрлық шешімдер мен жасанды интеллект саласында, сондай-ақ төлем сервистерін интеграциялау бағытында келісімдер жасалды. Білім беру және медицина салаларында Астана медицина университеті мен Maroof International Hospital, сондай-ақ iTech KZ пен Gift University арасында ынтымақтастықты кеңейтуге бағытталған меморандумдарға қол қойылды.Ғарыш саласында «Қазақстан Ғарыш Сапары» АҚ мен SUPARCO ғылыми-техникалық ынтымақтастық және спутниктік деректер алмасу жөнінде келісімге келді.Сонымен қатар, Отбасы Банк пен Meezan Bank Limited арасында исламдық қаржыландыру саласындағы келісімдерге, сондай-ақ агроөнеркәсіп кешенін дамыту мен екі елдің сауда-өнеркәсіп ұйымдары арасындағы іскерлік байланыстарды нығайтуға бағытталған меморандумдарға қол қойылды.«Қазақстан – Пәкістан» бизнес-форумы Қазақстан Республикасының Сауда және интеграция министрлігі тарапынан QazTrade және Kazakh Invest ұйымдарының белсенді қатысуымен ұйымдастырылды. Форум Қазақстан Республикасының Президенті Қасым-Жомарт Тоқаевтың Пәкістан Ислам Республикасына мемлекеттік сапары аясында өтті.Ақпарат көзі : https://www.gov.kz/memleket/entities/mti/press/news/details/1155035?lang=kk

Кездесу барысында Айша Айтқалиева Әділет министрлігінің қызметі туралы айтып, жүргізіліп жатқан құқықтық реформалармен және Министрліктің негізгі жетістіктерімен таныстырды.Сондай-ақ тараптар өзара қызығушылық тудыратын мәселелер бойынша пікір алмасып, екіжақты ынтымақтастықты одан әрі дамыту перспективаларын талқылады.Кездесу қорытындысы бойынша тараптар өзара ризашылықтарын білдіріп, бір-біріне алдағы жұмыста табыс тіледі.Ақпарат көзі : https://www.gov.kz/memleket/entities/adilet/press/news/details/1154739?lang=kk

Алматы облысы Ұйғыр ауданында орналасқан «Прима Құс» ЖШС — Қазақстандағы тұйық циклді бройлер етін өндіру және өңдеу бағытындағы ірі агроөнеркәсіптік кешендердің бірі. Chickodelli брендімен танылған кәсіпорын сапа, қауіпсіздік және тұрақты даму қағидаттарын басты орынға қойып келеді.Компания 2019 жылы Алматы қаласында құрылған. Ал құс кешенінің құрылысы 2021 жылдың мамыр айында Алматы облысында басталған. Бүгінде өндірістік алаңның жалпы аумағы 547,5 гектарды құрайды. Қазіргі таңда кәсіпорында 750-ден астам адам еңбек етеді. Үшінші құрылыс кезеңі толық аяқталған соң, жұмысшылар саны 1200 адамға дейін артады деп жоспарлануда.Өндіріс көлемі ұлғайып, экспорт үлесі артып келедіКомпания кезең-кезеңімен іске асырылып жатқан инвестициялық жоба аясында өндірістік қуатын тұрақты түрде арттыруда. Алғашқы құрылыс кезеңі 2022 жылы жүзеге асырылып, оған 33,5 млрд теңге инвестиция тартылған. Бұл кезеңде жылына 17 500 тонна құс еті (тірі салмақта) және айына 200 тоннаға дейін шұжық өнімдерін өндіру мүмкіндігі іске қосылды.Ал екінші кезең 2025 жылы аяқталып, өндірістік қуат 50 пайызға артып, жылына 26 500 тонна құс етін өндіруге жетті. Сонымен қатар, шұжық өнімдерінің жылдық көлемі 400 мың тоннаға дейін ұлғайды.Компанияның маркетинг және жарнама бөлімінің өкілі Анастасия Покатовичтің айтуынша, «Прима Құс» өнімдеріне сұраныс жыл сайын артып келеді.- «Компания тұрақты түрде дамып, өндіріс көлемін ұлғайтып келеді. Барлық өнімдер мұсылман дәстүріне сай, “Халал” стандарты бойынша өндіріледі. 2025 жылдың қорытындысы бойынша өніміміздің 38 пайыздан астамы экспортқа шығарылды. Бүгінде біз Өзбекстан, Ресей, Қырғызстан, Біріккен Араб Әмірліктері мен Әзербайжан нарықтарына өнім жеткіземіз. Алдағы уақытта Қытай мен Моңғолия бағытындағы экспортты жолға қоюды көздеп отырмыз», - дейді ол.Экспортқа құс етімен қатар, шұжық өнімдері мен түрлі жартылай фабрикаттар шығарылады. Компанияның барлық өнімі халықаралық талаптарға сай, ISO 22000 және HACCP сапа және тағам қауіпсіздігі жүйелерімен сертификатталған.Кәсіпорындағы өндірістік процестің қалай ұйымдастырылғанын цех басшысының өндіріс жөніндегі орынбасары Тлеген Нұржанов тарқатып берді.- «Өндіріс таңертең ерте басталады. Құстар алдымен кәсіпорын аумағына жеткізіледі. Сою цехында ветеринар дәрігерлер олардың жағдайын толық тексеріп шығады. Содан кейін “Халал” стандартына сай дұға оқылып, бауыздау процесі басталады. Тауықтар бірнеше технологиялық кезеңнен өтеді: қанын ағызу, қауырсынын жұлу. Одан соң құстар ауа-тамшылы салқындату бөлімінде 2 сағат 45 минут айналдырылады. Бұл - еттің температурасын барынша төмендету үшін қажет», - дейді ол.Температура қажетті деңгейге түскеннен кейін, сойылған құстар өндірістік цехқа жіберіледі. Мұнда салқындатылған және мұздатылған құс еті дайындалады. Сонымен қатар, бауыр, жүрек, асқазан секілді ішкі ағзалар да мұздатылған күйде өңделіп, Қазақстанның барлық өңіріне жөнелтіледі.Өнімді қаптауға да қатаң талап қойылған: көтерме қаптаманың салмағы 13 500 килограмнан кем болмауы, ал бөлшек саудаға арналған жеке қаптамадағы құс еті 800 грамнан төмен болмауы тиіс.Қазіргі уақытта, компания үшінші құрылыс кезеңін іске асыруда. 2026 жылға қарай өндіріс көлемі жылына 35 мың тоннаға дейін жетіп, 12 200 тоннаға арналған элеватор салу жоспарланған. Жоба Қазақстан Даму Банкі мен KazakhExport қолдауымен жүзеге асырылуда.Chickodelli бренді тек өндірісті ғана емес, фирмалық дүкендер мен франчайзинг желісін де белсенді дамытып келеді. Жаңа өнім түрлері ұсынылып, қаптама дизайны жаңартылуда.Осылайша, «Прима Құс» ЖШС отандық нарықты сапалы өніммен қамтамасыз етіп қана қоймай, Қазақстанның экспорттық әлеуетін арттыруға да елеулі үлес қосып отыр.Ақпарат көзі : https://www.gov.kz/memleket/entities/almobl/press/news/details/1154644?lang=kk

Қазақстандық Falcon EuroBus компаниясы Пәкістанға 600 дана электр автобусын жеткізбек. Бұл туралы Исламабадта өтіп жатқан «Қазақстан-Пәкістан» бизнес форумында екі елдің бизнес тараптары келісімге келді. Автобустардың алғашқы жеткізілімі биыл сәуірде басталады. Коммерциялық келісімнің құны 108 млн АҚШ долларын құрайды. 2027-2028 жылға қарай компания Пәкістан автобус экспортын 2000 данаға жеткізуге ниетті. 2018 жылы Алматы қаласында құрылған кәсіпорын бүгінде еуропалық стандартқа сай автобустардың кең түрін шығарады. Жылына 1500 дана автобус шығаратын кәсіпорын биыл өндіріс қуатын 3000 данаға жеткізуді көздеп отыр. Өйткені қазақстандық электр автобусына көршілес Өзбекстан, Маңғолия, Пәкістанда ғана емес, еуропа елдерінен де сұраныс жоғары. «Біз барлық циклдегі автобустарды шығарамыз. Бүгінгі «Қазақстан-Пәкістан» бизнес форумы аясында біз үшін үлкен нарықтың есігі ашылды. Қазіргі келісім бойынша жолаушылар тасымалына арналған 600 электр автобусын жеткіземіз. B2B кездесуде Пәкістанның білім министрігінің өкілдерімен кездесіп, алдағы уақытта оқушылар тасымалына арналған 2000 дана автобус жеткізуге келісіп отырмыз», - деді Falcon EuroBus директорлар кеңесінің төрағасы Мұрат Әділханов.Бизнес форум қорытындысы бойынша Falcon EuroBus пен транспорт саласына маманданған пәкістандық «OGCC International» компаниялары арасында коммерциялық құжатқа қол қойылмақ. Айта кету керек, «Қазақстан-Пәкістан» бизнес форумы ҚР Президенті Қасым-Жомарт Тоқаевтың Пәкістан Ислам Республикасына мемлекеттік сапары аясында ұйымдастырылып жатыр.Ақпарат көзі : https://www.gov.kz/memleket/entities/mti/press/news/details/1154610?lang=kk