ҚР Сыртқы істер министрінің орынбасары Әлібек Қуантыров METLEN грек өнеркәсіптік тобының басшылығымен кездесті.Тараптар Қазақстанның инвестициялық ахуалы жөнінде пікір алмасып, ынтымақтастық мүмкіндіктерін талқылады. Сонымен қатар металлургия және өнеркәсіп секторларындағы, оның ішінде аса маңызды шикізат, экономикалық цикл мәселелері және алюминийдің өндіру тізбегін дамыту бағытындағы инвестициялық мүмкіндіктер қарастырылды.Аталған сапар «Kazakh Invest» ҰК» АҚ қолдауымен жүзеге асырылып, шетелдік инвесторларға «бір терезе» қағидаты аясында компанияның Қазақстандағы инвестициялық жобаларын одан әрі пысықтау жұмыстары таныстырылды.METLEN компаниясы энергетика және металлургия салаларында қызметін жүзеге асырады, әлемнің 40-тан астам елінде жұмыс істейді және Лондон қор биржасында листингтен өткен.Ақпарат көзі : https://www.gov.kz/memleket/entities/mfa/press/news/details/1256005?lang=ru

Ресей Федерациясында армия қоян-қолтық ұрысынан Тәуелсіз Мемлекеттер Достастығының чемпионаты өтті. Сайысқа ТМД-ға мүше елдер қарулы күштерінің құрама командалары сапындағы кіл мықты спортшылар қатысты.Чемпионат қорытындысы бойынша жалпы командалық есепте Ресей Федерациясы Қарулы күштерінің құрамасы бірінші орын иеленді. Екінші орынды Қазақстан Республикасы Қарулы күштерінің құрамасы, үшінші орынды Беларусь Республикасы Қарулы күштерінің құрамасы олжалады. Төртінші орын Өзбекстан Республикасына, бесінші орын Қырғызстан Республикасына, алтыншы орын Тәжікстан Республикасына бұйырды.Қазақстан Республикасы Қарулы күштерінің өкілдерінің қоржынында алты медаль: үш алтын, бір күміс және екі қола.Чемпионатта қатардағы жауынгер Қасымбай Мұхит (65 келіге дейін), лейтенант Ержан Олжас (70 келіге дейін), майор Вадим Федосеев (75 келіге дейін) жеңіске жетті. 80 келіге дейінгі салмақта ефрейтор Дархан Дабылбек күміс жүлделі болды. Қола жүлде алғандар: сержант Досқали Әшіров (85 келіге дейін), сержант Еламан Қуатов (85 келіден жоғары).Қазақстан Республикасы Қорғаныс министрлігі Спорт комитетінің төрағасы – Армия орталық спорт клубының бастығы полковник Арман Әбеуов спортшылар мен жаттықтырушылар штабын нәтижелі жетістіктерімен құттықтады.– Қазақстан Республикасы Қарулы күштерінің құрамасы армия қоян-қолтық ұрысынан ТМД чемпионатында лайықты жекпе-жек көрсетті. Достастықтың ең мықты командалары арасында екінші жалпы командалық орын және жеңіп алған алты медаль біздің әскери қызметшілеріміздің жоғары дайындығының, кәсібилігінің, батылдығы мен мықты рухының айқын дәлелі. Сіздер Қазақстанның Қарулы күштерін намысын халықаралық аренада абыроймен қорғап, отандық армия қоян-қолтық жекпе-жек мектебінің беделін көрсеттіңіздер. Спортшыларға, жаттықтырушыларға және осы жетістікке үлес қосқандардың бәріне алғыс айтамын. Еліміздің атынан жаңа жеңістерге жете беріңіздер, – деді Спорт комитетінің төрағасы.Армия құрамасының жемісті өнер көрсетуі әскер спортшыларының дайындық деңгейі жоғары және оларды оқытудың қолданыстағы жүйесінің тиімді екенін айқындады.Ақпарат көзі : https://www.gov.kz/memleket/entities/mod/press/news/details/1256010?lang=ru

Бүгін Алматы облысында Су шаруашылығы қызметкерлері күні қарсаңында өңірдің су қауіпсіздігін қамтамасыз етіп, ирригациялық жүйелердің үздіксіз жұмысын тәулік бойы қадағалайтын мамандарға құрмет көрсетілді. Іс-шараға сала ардагерлері, «Алматыоблсушар» мекемесінің, Д. Қонаев атындағы Үлкен Алматы каналы филиалының, Балқаш-Алакөл бассейндік инспекциясының қызметкерлері, сондай-ақ жобалау және құрылыс ұйымдарының өкілдері қатысты, – деп хабарлайды Алматы облысы әкімінің баспасөз қызметі.Жиында облыс әкімінің орынбасары Бақытнұр Бақытұлы құттықтау сөз сөйледі.«Егістік алқаптарының өнімділігі, аграрлық саланың дамуы және халықтың азық-түлік қауіпсіздігі – сіздердің қажырлы еңбектеріңіздің жемісі. Өңірде су қоймалары мен каналдарды жаңғырту, ирригациялық инфрақұрылымды жетілдіру бағытында атқарылып жатқан жұмыстар экономиканың өркендеуіне зор үлес қосуда. Баршаңызды кәсіби мерекелеріңізбен құттықтаймын!» – деген Бақытнұр Бақытұлы бұл салада қажырлы еңбек етіп жүрген мамандарға мемлекеттік және ведомстволық наградаларды, Құрмет грамоталары мен Алғыс хаттарды табыстады.Марапатталғандардың бірі – Тасқұтан су көтергіш бөгетінде инженер-гидротехник болып еңбек ететін Абзал Рахымбаев. Ол «Су шаруашылығының үздігі» ведомстволық төсбелгісінің иесі атанды. Осы салада он жылдан астам уақыт бойы еңбек етіп келеді.«Бұл марапат – тек менің емес, бүкіл ұжымның еңбегінің нәтижесі. Тасқұтан бөгетінде біз суармалы аймақтарға судың уақытылы әрі тұрақты жеткізілуін бақылаймыз. Әрбір литр су диқандар үшін аса маңызды. Сондықтан біздің жұмысымыз үлкен жауапкершілікті талап етеді. Әсіресе суару маусымында демалыс пен мереке деген ұғым болмайды. Бірақ еңбегіңнің арқасында елдің ырысы артып, мол өнім жиналғанын көргенде, мамандығыңның қаншалықты маңызды екенін сезінесің. Барша әріптестерімді кәсіби мерекемен құттықтаймын», – деді Абзал Рахымбаев.Бүгінде мемлекеттік деңгейде кеңінен талқыланып жатқан су инфрақұрылымын дамыту мен су үнемдеу технологияларын енгізу ісі дәл осындай өз кәсібіне адал мамандардың еңбегі арқылы жүзеге асуда. Ардагерлердің мол тәжірибесі мен жас мамандардың жігері су ресурстарын сақтай отырып, болашаққа нық қадам басуға мүмкіндік беріп келеді.Ақпарат көзі : https://www.gov.kz/memleket/entities/almobl/press/news/details/1255856?lang=ru

Қостанай облысының әкімі Құмар Ақсақалов Арқалық қаласына барып, шаһардың 70 жылдығы қарсаңында атқарылып жатқан жұмыстармен танысты. Қалада инфрақұрылым, спорт және көлік салаларын дамытуға бағытталған жұмыстар жоспар бойынша жүзеге асырылуда.3 жыл ішінде 138 тұрғын үйдің қасбеті жаңартылды, биыл тағы 50 үйдің сырт келбеті жөнделеді.Теміржол вокзалы жаңғыртылуда. Инженерлік желілер, күту залдары мен кассалық аймақтар, санитариялық жайлар жаңартылып, заманауи қауіпсіздік жүйелері енгізілетін болады.Биыл Арқалықта облыстық жазғы спартакиада өтеді. Жарыстар өтетін басты нысан — «Жігер» стадионы жөнделіп жатыр. Өткен жылы Арқалықта 3 жаңа спорт нысаны пайдалануға берілді.Жабық хоккей корты мен денешынықтыру-сауықтыру кешені салынып жатыр.Арқалық әуежайының құрылысы аяқталуға жақын. Терминал бойынша негізгі құрылыс және инженерлік жұмыстар орындалды. Авариялық-құтқару станциясының, диспетчерлік мұнараның құрылыс жұмыстары жалғасуда. Ұшу-қону жолағында асфальт фрезерлеу жұмыстары жүргізіліп жатыр. Автономды қазандық пен сорғы станциясы толығымен орнатылды.Ақпарат көзі : https://www.gov.kz/memleket/entities/kostanay/press/news/details/1255870?lang=ru

Алматы әкімі Дархан Сатыбалды Республика алаңында аяқталған көріктендіру жұмыстарының нәтижесімен танысты. Жұмыс сапары барысында оған қаланың басты қоғамдық кеңістіктерінің бірі – Республика алаңын қайта жаңғырту қорытындысы таныстырылып, сондай-ақ Сәтбаев көшесінің Байзақов көшесінен Луганский көшесіне дейінгі аралығын кешенді көркейту жобасының жүзеге асырылу барысы баяндалды.Жобаның тұжырымдамасын Ұлыбританияның Лондон қаласындағы LDA Design компаниясы әзірлеген. Бұл жұмысты Алматы қаласының Қоғамдық кеңістіктерді дамыту басқармасы «қасбеттен қасбетке дейін» қағидаты негізінде жүргізді.Жобаның басты мақсаты – жүргіншілерге басымдық берілетін, заманауи, қауіпсіз әрі жайлы орта қалыптастыру. Республика алаңында көріктендірілген аумақтың жалпы көлемі 4,5 гектар.Алаңда қоғамдық кеңістіктің жабындары толық жаңартылып, инженерлік желілер, сыртқы жарықтандыру және автоматтандырылған суару жүйесі заман талабына сай жаңғыртылды. Құрылыс барысында пайдалану мерзімі 10 жылдан заманауи, төзімді материалдар қолданылды. Бұл алдағы уақытта аумақты күтіп-ұстау шығынын айтарлықтай азайтуға мүмкіндік береді.Көгалдандыру жұмыстары ауқымды көлемде жүргізілді. Алаңға 233 ірі ағаш, 63 мыңнан астам бұта және 17,7 мың көпжылдық өсімдік егіліп, көгалдар мен беде жамылғысы төселді. Кешкі уақытта жасыл желек сәулеттік-көркем жарықпен әрленіп, қоғамдық кеңістіктің ажарын аша түседі. Сонымен бірге, аумаққа 129 заманауи жарық шамы орнатылып, алаң толық жарықтандырылды.Тұрғындардың жайлы демалысы үшін заманауи балалар ойын алаңдары, серуендеу жолдары, демалыс аймақтары және екі амфитеатр салынды. Сондай-ақ, алаңда велосипед жолақтары жасалып, олар болашақта Сәтбаев көшесі бойымен өтетін бірыңғай веложол желісінің құрамына енеді. Бұдан бөлек, орындықтар, қоқыс жәшіктері, велосипед тұрақтары, үстелдер, креслолар, ландшафтық жиһаздар, аркалар және басқа да шағын сәулет нысандарын қамтитын 500-ден астам көріктендіру элементі орнатылды.Жаңартылған алаңның басты ерекшеліктерінің бірі – қоғамдық кеңістіктің жаңа ландшафтық келбетін айшықтайтын сегіз сәндік су айдыны. Бұған қоса, бұрыннан бар субұрқақтар толық жөндеуден өткізіліп, заманауи жаңа субұрқақ кешендері салынды. Олар қала тұрғындары мен қонақтарының сүйікті демалыс орындарының біріне айналмақ.Жоба аясында көлік және жаяу жүргінші инфрақұрылымын жетілдіруге де ерекше көңіл бөлінді. Сәтбаев көшесінде жаңа қоғамдық көлік аялдамасы пайдалануға беріліп, қаланың әкімшілік әрі іскерлік орталығына қатынау мүмкіндігі жақсарды. Сонымен қатар қосымша бағдаршамдар орнатылып, реттелетін жүргіншілер өткелдері жасалды және халықтың барлық санатына қолайлы кедергісіз орта қалыптастырылды.Жобаны іске асыру барысында ескі жабындар алынып, жаңа инженерлік коммуникациялар тартылды, автоматты суару жүйесі, павильондарға арналған негіздер және басқа да қажетті құрылыс жұмыстары орындалды.Жоба толық аяқталған соң Сәтбаев көшесі бойында біртұтас заманауи қоғамдық кеңістік қалыптасады. Ал жаңарған Республика алаңы Алматының ең көрікті әрі тартымды қоғамдық орындарының бірі ретінде тұрғындар мен қала қонақтарына серуендеуге, тынығуға, спортпен айналысуға, мәдени іс-шаралар мен мерекелік басқосулар өткізуге қолайлы мекен болмақ.Ақпарат көзі : https://www.gov.kz/memleket/entities/almaty/press/news/details/1255740?lang=ru

Бүгін Алматы қаласында белгілі актер Джеки Чанның қатысуымен түсірілетін Armour of God: Ultimatum («Доспехи бога: Ультиматум») халықаралық көркем фильмінің өндірісін ресми түрде бастау рәсімі өтті.Салтанатты іс-шараға ҚР Премьер-Министрінің орынбасары – Мәдениет және ақпарат министрі Аида Балаева, Алматы қаласының әкімі Дархан Сатыбалды, Алматы облысының әкімі Марат Сұлтанғазиев, сондай-ақ қазақстандық және халықаралық киноиндустрия өкілдері қатысты.Үкімет басшысының орынбасары Джеки Чанның Қазақстан мен Қытай арасындағы мәдени-гуманитарлық байланыстарды дамытуға қосып отырған үлесін жоғары бағалады.«Қазақстан мәдениетін әлемдік аренада танытуға және екі ел арасындағы мәдени-гуманитарлық байланысты нығайтуға қосып отырған үлесіңіз үшін Сізге алғыс білдіремін. Алдағы түсірілім жұмыстарына сәттілік, жаңа шығармашылық табыстар тілеймін», – деді Аида Балаева.Кездесу барысында Джеки Чан Алматының талантты жас суретшілерімен және Т. Жүргенов атындағы Қазақ ұлттық өнер академиясының түлектері – жас кинематографистермен әңгімелесті. Ол жастарға шығармашылық жолда табыс тілеп, үздіксіз ізденіс пен өз ісіне деген сүйіспеншіліктің маңызын атап өтті. Кездесу соңында балалар әйгілі актерге өздері салған портреттерді тарту етті.Іс-шара соңында қатысушылар дәстүрлі түсірілім тақтайшасымен естелік суретке түсті. Осылайша фильм өндірісінің ресми басталғаны айшықталды.Жоба ҚР Мәдениет және ақпарат министрлігінің және Қытайдың мемлекеттік кинокомпаниясы China Film Group Corporation-ның қолдауымен жүзеге асырылуда. Фильм өндірісімен қазақстандық Sәlem Entertainment компаниясы және гонконгтық Billion Target компаниясы айналысады.Фильм түсірілімі 2026 жылғы шілде мен қазан айлары аралығында Қазақстан аумағында өтеді. Картинаның қоюшы режиссері – қазақстандық Роберт Кун. Туынды кең халықаралық прокатқа бағытталған. Негізгі түсірілім алаңдары Алматы қаласында, Алматы және Маңғыстау облыстарында орналасады.Бұл жоба Қазақстан үшін стратегиялық әрі имидждік тұрғыдан маңызды. Оның жүзеге асырылуы еліміздің мәдени, туристік және инвестициялық әлеуетін ілгерілетуге, кинотуризмді дамытуға, халықаралық ынтымақтастықты нығайтуға және Қазақстанды әлемдік деңгейдегі ірі киножобаларды түсіруге қолайлы заманауи алаң ретінде кеңінен танытуға ықпал етеді.ҚР Мәдениет және ақпарат министрлігінің баспасөз қызметіАқпарат көзі : https://www.gov.kz/memleket/entities/almobl/press/news/details/1255715?lang=ru

Қазақстан Республикасы Қарулы күштері тарихында алғаш рет «Киберқауіпсіздік» әскери-есептік мамандығы бойынша запастағы офицерлер даярланды.Радиоэлектроника және байланыс әскери-инженерлік институтында 170-тен астам запастағы офицерлер мен сержанттарды оқыту аяқталды. Оқу қорытындысының басты оқиғасы – Қарулы күштер тарихындағы «Киберқауіпсіздік» мамандығы бойынша алғашқы запастағы офицерлердің түлеп ұшуы болды. Сонымен қатар «Байланыс» мамандығы бойынша запастағы сержанттар да оқуын аяқтады.Іс-шараның салтанатты қорытындысы әскери даярлық бағдарламасын сәтті аяқтаған жоғары оқу орындары студенттерінің Әскери ант қабылдау рәсімі болды.Әскери даярлық негізгі оқу кестесінен қол үзбей жүргізілді. Бағдарлама теориялық сабақтарды, практикалық дайындықты және әскери оқу-жаттығу тәжірибесін қамтыды. «Киберқауіпсіздік» мамандығы бойынша білім алған болашақ запастағы офицерлер ақпараттық жүйелерді қорғау және кибершабуылдарға қарсы іс-қимыл мәселелерін пысықтады. Ал «Байланыс» мамандығы бойынша дайындықтан өткен сержанттар заманауи байланыс құралдарын орналастыру мен пайдалануды меңгерді.– Қазіргі Қарулы күштер жоғары технологиялық ортада тиімді жұмыс істей алатын мамандарға мұқтаж. Сондықтан запастағы офицерлер мен сержанттарды даярлау барысында теориялық біліммен қатар, әскери қызметшілер нақты жағдайда орындауы мүмкін міндеттерді тәжірибе жүзінде пысықтауға ерекше көңіл бөлінеді. Киберқауіпсіздік және байланыс бағыттары бойынша дайындық цифрлық технологиялардың қарқынды дамуы жағдайында сұранысқа ие мамандарды қалыптастыруға мүмкіндік береді, – деді Радиоэлектроника және байланыс әскери-инженерлік институты академиялық ұтқырлық бөлімінің әдіскері майор Жанарбек Керімқұлов.Жаңа әскери-есептік «Киберқауіпсіздік» мамандығының алғашқы түлектерінің бірі – Алматы технологиялық университетінің студенті Азамат Нәбиев.– Оқу бізге тек кәсіби білім беріп қана қоймай, әскери маманның жоғары жауапкершілігін түсінуге мүмкіндік берді. Біз топпен жұмыс істеуді, күрделі жағдайда шешім қабылдауды және алған білімімізді тәжірибеде қолдануды үйрендік. Әскери ант қабылдау – Отанға қызмет етуге және алған құзыреттерімізді ел қауіпсіздігін қамтамасыз ету жолында пайдалануға дайын екеніміздің белгісі, – деді ол.Радиоэлектроника және байланыс әскери-инженерлік институты мемлекеттің қорғаныс қабілетін қамтамасыз етудің заманауи талаптарын ескере отырып, әскери-есептік мамандықтар тізбесін кеңейтуді жалғастырып жатыр.2025 жылдан бастап институтта әуе шабуылына қарсы қорғаныс бағыты бойынша запастағы офицерлерді даярлау жүзеге асырылып келеді. Ұшқышсыз ұшу аппараттарының кеңінен қолданылуы жағдайында мұндай мамандар елдің әуе кеңістігін қорғауда маңызды рөл атқарады.Институтта әскери даярлық бағдарламалары іске қосылғаннан бері заманауи әскери-есептік мамандықтар бойынша 190-нан астам запастағы офицерлер мен сержанттар дайындалды.Ақпарат көзі : https://www.gov.kz/memleket/entities/mod/press/news/details/1255628?lang=ru

Ауыл шаруашылығы министрі Айдарбек Сапаров Full Vision Capital (FVC), Towngas және EcoCeres сияқты азиялық жетекші компаниялар делегациясымен кездесті.Тараптар Қазақстанның агроөнеркәсіптік кешеніне инвестиция тарту, экологиялық таза заманауи технологияларды енгізу және қосылған құны жоғары бірлескен жобаларды іске асыру перспективаларын талқылады.Кездесуде техникалық майлы дақылдар негізінде экологиялық авиациялық отын (Sustainable Aviation Fuel – SAF) өндіру жобасына ерекше назар аударылды.Министр ауыл шаруашылығы шикізатын терең өңдеуді дамыту мен қосылған құны жоғары өндірістерді қалыптастыру мемлекеттік аграрлық саясаттың басым бағыттарының бірі екенін атап өтті.«Бұл жобаларды іске асыру пайдаланылмай жатқан жерлерді ауыл шаруашылығы айналымына тартуға, техникалық майлы дақылдардың егіс алқаптарын кеңейтуге, отандық ауыл шаруашылығы тауарын өндірушілер үшін тұрақты өткізу нарығын қалыптастыруға және ауылдық аумақтардың дамуына тың серпін беруге жол ашады», – деді Айдарбек Сапаров.Сондай-ақ азық-түлікке арналған майларды пайдаланбай, ауыл шаруашылығы мен тамақ өнеркәсібі қалдықтарын шикізат ретінде пайдалану мүмкіндіктері қарастырылды.Атап айтқанда, биокөмір (Bio-Char) өндіру және «жасыл» метанол өндірісі саласындағы бастамаларды бірлесіп жүзеге асыру мәселелері талқыланды.Кездесу соңында тараптар ынтымақтастықты дамытуға өзара мүдделі екендерін алға тарта отырып, межелі жобалардың техникалық өлшемдерін жан-жақты пысықтау және оларды іске асырудың алдағы нақты қадамдарын айқындау жөніндегі бірлескен жұмысты жалғастыруға уағдаласты.Ақпарат көзі : https://www.gov.kz/memleket/entities/moa/press/news/details/1255630?lang=ru

2026 жылы 23–26 шілде аралығында Алматыда білім беру, креативті индустрия, жасанды интеллект және цифрлық технология саласының Қазақстан мен Корея Республикасындағы өкілдерін біріктіретін ACT Creative Tech Week 2026 халықаралық форумы өтеді.Форумды өткізу Сеул қаласында «Диалог» аудармашылар одағы» қоғамдық бірлестігі, Academy of Creative Technologies (ACT) және YLAB Academy арасында қол қойылған өзара түсіністік туралы меморандумды іске асырудың алғашқы практикалық қадамы болды.2026 жылы 4 шілдеде Сеул қаласында «Диалог» аудармашылар одағы» қоғамдық бірлестігі, Academy of Creative Technologies (ACT) және YLAB Academy өзара түсіністік туралы меморандумға қол қойды.Құжат білім беру, креативті индустрия, жасанды интеллект және цифрлық технология салаларындағы ынтымақтастықты дамытуды көздейді. Тараптар бірлескен білім беру бағдарламаларын әзірлеп, халықаралық іс-шаралар өткізеді және кәсіби тәжірибе алмасады.ACT – ALT University базасында жұмыс істейтін, жасанды интеллект, ақпараттық технология және креативті технология салалары бойынша мамандар даярлайтын халықаралық білім беру платформасы. Ал YLAB Academy – вебтун индустриясы мен зияткерлік меншік (IP) әзірлеу бағытындағы әлемдік көшбасшылардың бірі саналатын YLAB компаниясының білім беру бөлімшесі.Ақпарат көзі : https://www.gov.kz/memleket/entities/almaty/press/news/details/1255114?lang=ru

Шымкент қаласының дене шынықтыру және спорт басқармасының 2026-2028 жылдарға арналған бюджеттік бағдарламаларының паспорты туралы «Ашық НҚА» интернет-порталында жарияланды.Аталған қаулы жобасы бойынша қоғамдық талқылауға қатысуларыңызды сұраймыз.Толығырақ кіру сілтемесі: https://budget.egov.kz/budgetprogram/budgetprogram?govAgencyId=4379571&budgetId=4335758Ақпарат көзі : https://www.gov.kz/memleket/entities/shymkent/press/news/details/1255198?lang=ru

Жыл сайын 8 шілдеде атап өтілетін әскери дәрігерлер күніне орай Астанада «Қазақстан Республикасы Қарулы күштеріндегі әскери медицинаның өзекті мәселелері» атты ғылыми-практикалық конференция өтті.Іс-шараны Қазақстан Республикасы Қарулы күштері Бас әскери-медициналық басқармасы ұйымдастырды. Конференция Астана медицина университетінде өтіп, оған әскери-медициналық қызметтің басшылығы, ғалымдар, жоғары медициналық оқу орындарының оқытушылары, тәжірибелі дәрігерлер, әскери мамандар мен әскери медицина саласының ардагерлері қатысты.Конференцияны ашқан Бас әскери-медициналық басқармасының бастығы медицина қызметінің полковнигі Ержан Смайыл әскери медицина қызметкерлерін кәсіби мерекемен құттықтап, олардың мамандыққа адалдығы, жоғары кәсібилігі және әскери қызметшілердің өмірі мен денсаулығын сақтаудағы жанқиярлық еңбегі үшін алғыс білдірді.– Әскери медицинаны дамыту, заманауи технологияларды енгізу, мамандарды даярлау жүйесін жетілдіру және озық тәжірибе алмасу – әскери-медициналық қызметтің басым бағыттарының бірі болып қала береді, – деді Ержан Смайыл.Пленарлық отырыс барысында қатысушылар әскери медицинаны дамытудың өзекті мәселелерін кеңінен талқылады. Атап айтқанда, вакуумдық терапияны қолдана отырып мина-жарылыс жарақаттарын емдеу, санитариялық-эпидемиологиялық бақылауды жетілдіру, магистральдық қан тамырлары жарақаттарын емдеудің заманауи тәсілдері, әскери қызметшілерге мамандандырылған медициналық көмек көрсету тәжірибесі, медициналық оңалту, тәрбие және идеологиялық жұмыс, сондай-ақ әскери дәрігерлердің кәсіби дамуы мәселелері қарастырылды.Бас әскери клиникалық госпиталі бастығының міндетін уақытша атқарушы медицина қызметінің подполковнигі Дастан Кенжерахмановтың айтуынша, конференцияның басты мақсаты –мамандардың басын қосып тәжірибе алмасуға және әскери-медициналық қызметті дамытудың заманауи тәсілдерін талқылауға мүмкіндік жасау.– Осындай ғылыми-практикалық конференциялар кәсіби диалогқа арналған тиімді алаң болып табылады. Білім алмасу, қазіргі заманғы сын-қатерлерді талдау және диагностика мен емдеудің озық әдістерін енгізу әскери-медициналық қамтамасыз ету жүйесін одан әрі жетілдіруге және әскери қызметшілерге көрсетілетін медициналық көмектің сапасын арттыруға ықпал етеді, – деп атап өтті Дастан Кенжерахманов.Конференция соңында сұрақ-жауап сессиясы өтіп, үздік мамандар марапатталып, жұмыс қорытындыланды. Осындай ғылыми-практикалық шаралар әскери-медициналық қызметтің ғылыми әлеуетін арттыруға, кәсіби өзара іс-қимылды нығайтуға және медицина ғылымының заманауи жетістіктерін Қарулы күштердің тәжірибесіне енгізуге ықпал етеді.Ақпарат көзі : https://www.gov.kz/memleket/entities/mod/press/news/details/1255249?lang=ru

Экономиканың өсуі, кредиттік нарықтың дамуы, бизнесті қолдау және экономиканың нақты секторын ынталандыру Үкімет, Ұлттық Банк, Қаржы нарығын реттеу және дамыту агенттігі, «Атамекен» ұлттық кәсіпкерлер палатасы және сарапшылар қоғамдастығы өкілдерінің бірлескен талқылау тақырыбының негізіне айналды.Мемлекет басшысы алға қойған міндет – орнықты экономикалық өсуді және азаматтардың әл-ауқатын арттыруды қамтамасыз ету экономикалық блоктың жұмысы үшін негізгі бағдар болып қала береді. Осы мақсатқа сүйене отырып, кездесуге қатысушылар ағымдағы макроэкономикалық жағдайды, 2026 жылдың бірінші жартыжылдығындағы Қазақстанның экономикалық белсенділігінің алдын ала қорытындыларын қарастырып, макроэкономикалық саясаттың одан арғы басымдықтарын талқылады.Сараптамалық кездесу Ұлттық экономика министрлігі жанындағы Экономикалық зерттеулер институтының алаңында өткізілді. Талқылауға Премьер-министрдің орынбасары – ұлттық экономика министрі Серік Жұманғарин, ҚР Ұлттық банкінің төрағасы Тимур Сүлейменов, Қаржы нарығын реттеу және дамыту агенттігі төрағасының орынбасары Дәурен Сәлімбаев, «Атамекен» ҰКП басқарма төрағасының орынбасары Тимур Жәркенов, Экономикалық зерттеулер институты төрағасының орынбасары Дастан Әкебаев және институт сарапшылары қатысты.Экономикалық зерттеулер институтының ішкі сұраныс динамикасына, несиелендіруді дамытуға және салалық белсенділікке арналған талдамалық баяндамасы талқылауға негіз болды.Ұсынылған дерекке қарағанда, 2026 жылғы қаңтар–мамыр қорытындылары бойынша Қазақстандағы ЖІӨ нақты өсімі – 3,7%. Экономиканың мұнай емес секторы 5%-ға, құрылыс – 13,4%-ға, өңдеу өнеркәсібі – 9%-ға өсті. Өңдеудің өсуіне негізінен машина жасау, химия өнеркәсібі, металл бұйымдарын өндіру, сондай-ақ азық-түлік өндірісі үлес қосты. 6 айдың қорытындысы бойынша жылдық инфляция 10,3%-ға баяулады. Сондай-ақ талдамалық баяндамада азық-түлік және азық-түлікке жатпайтын тауардың бөлшек сауда динамикасы, іскерлік белсенділіктің түрлі индикаторы, тұтынушылық сұраныстың несиелік арнасы және проблемалық несиелер динамикасы туралы мәлімет ұсынылды.Талқылау барысында Серік Жұманғарин кредиттік нарықтың ағымдағы үрдістеріне егжей-тегжейлі тоқталды.«Бүгін біз экономиканың түрлі секторында көп бағытты процесті көріп отырмыз. Тұтынушылық несиелеу қарқыны 2024 жылы баяулай бастап, кепілсіз қарыздардың динамикасы да біртіндеп төмендеген. Нәтижесінде автомобиль нарығы, тұрмыстық техника, электроника, қызмет көрсету және жөндеу жұмыстары қарқынды өсу кезеңінен кейін объективті тұрақтануға көшуде. Бұл үрдіс тек 2025 жылдан бері жүзеге асырылып келе жатқан макропруденциалдық саясатқа ғана емес, сонымен қатар нарықтың табиғи қанықтылығына да байланысты екенін түсіну маңызды. Тұтынушылық несиелеу түбегейлі жаңа сұранысты тудырмайды, тек оның уақытын ғана өзгертеді. Сонымен қатар бүгінгі таңда сараланған тәсілді ұстану өте маңызды: қызып кеткен тұтынушылық сегменттерді шектеу, сонымен бірге ұзақ мерзімді экономикалық өсуді қалыптастыратын салалардың дамуына жағдай жасау. Тұрғын үй, сапалы ипотека және автомобиль өнеркәсібі іргелес өндірістер мен қызметтердің дамуын қамтамасыз ететін маңызды өсу нүктелері болып қала береді. Үкіметтің басты міндеті-еңбек өнімділігін арттыру және экономиканың негізгі секторларында азаматтардың нақты табысын арттыру», — деп атап өтті Серік Жұманғарин.ҚР Ұлттық банкінің төрағасы Тимур Сүлейменов Ұлттық Банктің бағалауы бойынша ішкі сұраныстың ағымдағы серпіні экономиканың жүйелі салқындауын көрсетпейтінін атап өтіп, монетарлық реттеушінің ұстанымын ұсынды. Бөлшек сауда жыл басынан бері біршама жеделдесе, ал тұтынушылық несиелендірудің баяулауы халықтың кредиттелуін және инфляциялық қысымды төмендету бойынша қабылданған шаралардың нысаналы нәтижесі. Мұндай жағдайларда сұранысты қосымша ынталандыру талап етілмейді. Өйткені ұсыныстың ағымдағы шектеулерінде ол негізінен инфляциялық әсерге ие болуы мүмкін.«ҚНРДА-мен бірлесіп іске асырылған шаралар кешені инфляция драйверінің бірі болған кепілсіз несиелердің нормативтен тыс өсуін тоқтатуға мүмкіндік берді. Бұл ретте біз барынша салмақты әрекет етеміз. Қазіргі уақытта қабылданған шаралардың нәтижесін талдау негізінде біз БЖК және ҚТК бойынша талаптарды қатаңдатудан бас тарту, сондай-ақ ипотека бойынша СЭС төмендетпеу туралы бірлескен шешім қабылдадық. Бұдан басқа, экономикадағы жиынтық сұраныс қазір инвестициялардағы оң үрдіс есебінен қолдау табуда, онда инвестицияның 70%-дан астамы жеке секторға тиесілі», — деп атап өтті ҚР Ұлттық банкінің төрағасы Тимур Сүлейменов.Кредиттік портфельдер мен қаржы жүйесін қорғау шараларының сапасын талдауды ҚНРДА төрағасының орынбасары Дәурен Сәлімбаев жалғастырды.«NPL 90+ қалдықтарының жалпы көлемінің өсуі өткен кезеңдердің жинақтаушы көрсеткіші және жаңадан берілетін қарыздардың сапасын көрсетпейді. Біз жеке тұлғалардың кепілсіз несиелері бойынша 1,5% бақыланатын деңгейде болатын дефолт-рейтингке назар аударамыз. Корпоративтік секторда және ШОБ-та портфельдердің жүйелі нашарлауы да тіркелмейді. Сонымен бірге Агенттік бизнесті макропруденциалды ынталандырудың белсенді саясатын жүргізуде: ШОБ кредиттері үшін тәуекел-салмақтау коэффициенті 50%-ға дейін (стандартты 100%-ға қарсы және тұтынушылық 350%-ға дейін) төмендетілді. Бұл нақты секторды қаржыландыру үшін банктердің капиталын босатады», — деді Қаржы нарығын реттеу және дамыту агенттігі төрағасының орынбасары.Кездесуге қатысушылар Қазақстанның жалпы макроэкономикалық бейнесі оң күйінде қалуда, ал тұтынуды тұрақты салқындату бірнеше жыл бойы кредиттеудің аса жоғары (30%+) қарқынынан кейін қалыпқа келтірудің заңды процесі деген пікірге келісті.Кездесуде сауданы трансформациялауға және e-commerce-ке сұраныс ағынына ерекше назар аударылды (ҚР-да электрондық бөлшек сауда көлемі 2025 жылға қарай 3,77 трлн теңгеге дейін ұлғайды). Ірі цифрлық платформалар мен маркетплейстер біртіндеп қаржылық экожүйеге айналып, банктердің белгілерін игеріп жатқан кезде, қатысушылар жедел әрекет ету қажеттілігін мәлімдеді.Ұлттық Банк пен ҚНРДА бірлесіп әзірлеген BNPL (бөліп төлеу) нарығын реттеу жөніндегі заңнамалық түзетулер тұтынушылардың құқықтарын қорғауға қатаң талаптарды енгізеді. Егер сатып алу процесіне үшінші қаржыландырушы тарап тартылса, ол банк болып табылмаса да, оған тиісті міндеттемелер жүктеледі.Қатысушылар атап өткендей, маркетплейстерді реттеу – бұл тұтынушылардың құқықтарын қорғау, жасырын комиссияларды монополиялық белгілеуге жол бермеу және тәуекелдерді бөлуді бақылау мәселесі. Ойынның бірыңғай ережелерін Сауда және интеграция министрлігі, ҚНРДА, БҚДА және «Атамекен» ҰКП әзірлейді.Экономикалық саясатты талқылау шеңберінде Тимур Сүлейменов шағын және орта бизнес елдегі жұмыспен қамтудың шамамен 40% қамтамасыз ететініне және нарықтағы кез келген ауытқулар азаматтардың осы санатының нақты табысына тікелей әсер ететініне назар аударды.Кеңеске қатысушылар банктердің қаржылық белсенділігін тұтыну секторынан нақты экономика мен ШОБ-ты кредиттеуге қайта бағдарлаудың маңыздылығын атап өтті. Осыған байланысты «Бәйтерек» холдингі мен «Даму» кәсіпкерлікті дамыту қоры» АҚ желісі бойынша стратегиялық жобаларды қаржыландыру бағдарламаларын қоса алғанда, ШОБ іскерлік белсенділігін ынталандырудағы мемлекеттік даму институттарының рөлі атап өтілді. Қатысушылар бизнесті қолдау бағдарламалары ең алдымен экономиканың өндірістік әлеуетін кеңейтуге бағытталған, ашық, нүктелі болуы тиіс екенін атап өтті. Ұлттық Банк квази-фискалды қаржыландыру ұсыныстың, өнімділіктің және локализацияның өсуіне әкелген жағдайда ғана дезинфляциялық әсер етуі мүмкін екенін атап өтті. Әйтпесе, мұндай бағдарламалар жиынтық сұранысты күшейтеді және қосымша инфляциялық қысым жасайды.Банк қауымдастығымен бірлесіп жұмыс істеу қажеттілігі, тікелей бәсекелестікке/банктерді нарықтық саладан шығаруға жол бермеу де атап өтілді.Фискалдық саясат туралы айта отырып, тараптар мерзімсіз салықтық жеңілдіктер беру тәжірибесінен бас тарту керектігіне келісті. Мемлекеттік преференциялар инвесторларға қарсы міндеттемелердің орнына ғана бөлінуі керек: ашық есеп беру және өндірісті нақты оқшаулау. Тиімді нарықтық жобаларға қолдау көрсетілуі тиіс, ал тек тиімсіз мемлекеттік субсидиялар есебінен қолдан жасалған экономикалық модельдер жасауға жол берілмейді.Кездесу қорытындысы бойынша тараптар өзекті деректерді мониторингілеу және талдау негізінде макроэкономикалық, пруденциалдық және квазифискалдық тетіктерді нүктелік баптауды жалғастыруға келісті. Бұл ретте қатысушылар экономикалық саясат шаралары сұранысты жасанды ынталандыруға емес, инфляцияны төмендетуге, өнімділікті арттыруға, ұсынысты кеңейтуге және экономикалық өсу сапасын арттыруға бағытталуы тиіс екенін атап өтті.Кездесу қорытындысы бойынша қатысушылар экономика салалары бөлінісінде жобаларды қаржыландырудың өзекті мәселелері бойынша «Бәйтерек» холдингімен және екінші деңгейдегі банктермен жеке кездесу өткізуге келісті.Ақпарат көзі : https://www.gov.kz/memleket/entities/economy/press/news/details/1255292?lang=ru

Үкіметте Премьер-министрдің орынбасары – ұлттық экономика министрі Серік Жұманғариннің төрағалығымен жаңа Салық Кодексін енгізу жобалық кеңсесінің 20-шы отырысы өткізілді. Отырыстың негізгі тақырыбы – жеке табыс салығы (ЖТС) бойынша базалық және әлеуметтік салық шегерімдерін қолданудың практикалық мәселелері.Жаңа Салық кодексінің негізгі жаңалығының бірі – салық шегерімдері жүйесін жетілдіру және азаматтарға салық жүктемесін азайту. Атап айтқанда, ай сайын 30 АЕК мөлшерінде, бірақ күнтізбелік жылда 360 АЕК-тен аспайтын базалық салық шегерімі енгізілді. Ол жеке тұлғаның салық салынатын кірісін азайтады, демек, төлеуге жататын ЖТС сомасын азайтады. Бұдан басқа, міндетті зейнетақы жарналары, әлеуметтік аударымдар және міндетті әлеуметтік медициналық сақтандыру жарналары бойынша шегерімдер сақталды.Отырыс барысында қызметкердің табыс мөлшері шегерім сомасынан төмен болған жағдайларда базалық салық шегерімін қолдану мәселесі қаралды. Бұрын қолданыста болған Салық кодексі күнтізбелік жыл шегінде салық шегерімдерінің асып кетуін келесі айларға ауыстыруды көздейтін. Кодекстің жаңа редакциясында мұндай норма жоқ.«Атамекен» ұлттық кәсіпкерлер палатасының өкілдері базалық шегерімнің пайдаланылмаған бөлігін ауыстырудың бұрын қолданыста болған тетігін сақтауды ұсынды. Сонымен бірге, мемлекеттік кірістер комитетінің өкілдері жаңа норманың идеологиясы азаматтарды, ең алдымен табысы төмен қызметкерлерді ай сайынғы қолдау шарасы ретінде базалық салық шегерімін беру болып табылатынын түсіндірді. Сондықтан базалық салық шегерімі әрбір күнтізбелік ай үшін жеке қолданылады және пайдаланылмаған соманы кейінгі салық кезеңдеріне ауыстыруды көздемейді.Талқылау қорытындысы бойынша Мемлекеттік кірістер комитеті келесі күнтізбелік кезеңдерге базалық салық шегерімінің асып кетуіне жол берілмейтінін растайтын ресми түсініктемелер дайындайды деп шешілді.Отырысқа қатысушылар ЖТС бойынша әлеуметтік салық шегерімін қолдану мәселелеріне ерекше назар аударды. Салық кодексінде I және II топтағы мүгедек адамдар үшін 5 000 АЕК, сондай-ақ III топтағы мүгедек адамдар, мүгедек балалардың ата-аналары, асырап алушылар, асырап алушылар мен қамқоршылар үшін 882 АЕК мөлшерінде әлеуметтік салық шегерімі көзделген.Отырысқа қатысушылар Салық кодексінің қолданыстағы редакциясы жұмыс берушінің ауысуы кезінде әлеуметтік салық шегерімінің пайдаланылмаған сомасын есепке алу мүмкіндігін көздейтінін атап өтті. Сонымен қатар Кодексте жеке тұлға бір мезгілде бірнеше жұмыс берушілерде жұмыс істейтін жағдайларда мұндай шегерімді қолдану тәртібін тікелей реттеу қамтылмаған.Талқылау барысында нақты ережелердің болмауы норманы екіұшты қолдану және оны жосықсыз пайдалану тәуекелдерін тудыруы мүмкін екендігі атап өтілді. Осыған байланысты Қаржы министрлігі мен Мемлекеттік кірістер комитетіне салықтық жеңілдіктің әлеуметтік бағытын сақтауды қамтамасыз ететін және оны қолдану кезінде теріс пайдалану мүмкіндігін болдырмайтын бірыңғай тәсілді әзірлеу тапсырылды.Ақпарат көзі : https://www.gov.kz/memleket/entities/economy/press/news/details/1255312?lang=ru

Серік Жұманғарин Ghazanfar Bank төрағасы Мұхаммед Исмаил Газанфармен кездесті.Кездесу барысында тараптар Қазақстан мен Ауғанстан арасындағы қаржылық-банктік ынтымақтастықты дамыту мәселесін талқылады.Серік Жұманғарин атап өткендей, Қазақстан Ауғанстанмен сауда-экономикалық байланысты нығайтуға зор мән береді. Өзара сауданың одан әрі өсуінің негізгі шартының бірі екі елдің шаруашылық жүргізуші субъектілері арасында есеп айырысудың үздіксіз жүргізілуін қамтамасыз ететін сенімді және ашық банк инфрақұрылымын дамыту.Қазіргі уақытта 23 қазақстандық банктің екеуі ауған банктерімен корреспонденттік қатынастарды қолдайды. 2025 жылдың қорытындысы бойынша Қазақстан мен Ауғанстан арасындағы трансшекаралық төлемдер мен ақша қаражатын аудару көлемі 2024 жылмен салыстырғанда 26%-ға ұлғайып, 140 млрд теңгеге жетті. Бұл ретте көрсетілген кезеңде тауарлар мен қызметтер үшін төлемдер көлемі бес есеге өскен.Тараптар банктер арасындағы корреспонденттік қатынасты кеңейту, тікелей банк арналарын құру, трансшекаралық төлемдер тетігін жетілдіру және сыртқы сауда операцияларын қаржылық сүйемелдеу перспективаларын талқылады. Қазіргі уақытта тағы бір қазақстандық банк Ghazanfar Bank-пен корреспонденттік шоттар ашу рәсімінен өтіп жатқаны атап өтілді.Оң динамика өзара саудада да сақталады. 2026 жылғы қаңтар-сәуірдің қорытындысы бойынша Қазақстан мен Ауғанстан арасындағы тауар айналымы $342,4 млн-ға жетті, бұл 2025 жылғы ұқсас кезеңнің көрсеткішінен 2,3 есе ($150,6 млн) артық. Негізгі салым экспортпен қамтамасыз етіліп, оның көлемі $338,5 млн-ға жетіп, 2,3 есеге ұлғайды. Жеткізілімдердің өсуі, ең алдымен, бидай және бидай-қара бидай ұны, күнбағыс майы және басқа да өнімдер экспортының ұлғаюына байланысты.Анықтама:Ghazanfar Bank – Ауғанстандағы ең көне коммерциялық банктің бірі және 2009 жылдан бастап елдің Орталық Банкінің лицензиясы бойынша жұмыс істейді. Банк корпоративті және бөлшек клиенттерге дәстүрлі және исламдық банктік қызметтердің толық спектрін ұсынады. Соңғы төрт жыл ішінде Ghazanfar Bank Ауғанстан реттеушісі тарапынан банктердің қаржылық тұрақтылығын, басқару сапасын, өтімділігі мен сенімділігін бағалаудың ең жоғары көрсеткішінің бірі – CAMEL 2 рейтингін алды.Банк Қазақстан, Түркия, БАӘ, Қытай, Үндістан, Өзбекстан, Бахрейн және тағы да басқа бірқатар елдегі қаржы институттарымен корреспонденттік қатынастарды қолдайды. Қазақстанда Ghazanfar Bank серіктесі Zaman bank болып табылады. 2025 жылы банк арқылы халықаралық төлемдер мен аударымдар, соның ішінде халықаралық ұйымдар мен бизнес үшін шамамен $1,3 млрд өтті.Ghazanfar Bank кірістерді жылыстатуға қарсы іс-қимыл саласындағы (AML/CFT) халықаралық стандарттардың сақталуына ерекше назар аударады, қаржылық мониторингтің заманауи жүйелерін пайдаланады және қаржылық операциялардың ашықтығын қамтамасыз ету бойынша халықаралық ұйымдармен ынтымақтасады.Ақпарат көзі : https://www.gov.kz/memleket/entities/economy/press/news/details/1255323?lang=ru

ҚР Премьер-министрі Олжас Бектеновтің төрағалығымен өткен Үкімет отырысында су ресурстарын басқару мәселелері қаралды. Оған облыс әкімі Мұрат Ергешбаев селекторлық режим арқылы қатысты.Үкімет отырысынан кейінгі мәжілісте су ресурстарын басқаруға қатысты жауапты тұлғаларға тапсырмалар жүктелді.«Су алу науқанында су шаруашылығы нысандары жұмысының тұрақтылығын, жоспарға сәйкес ұйымдастырылуын қатаң бақылауға алыңыздар. Сырдария суын егістікке ысырапсыз пайдаланып, Кіші Аралға жіберілетін көлемді жеткізу қажет.Одан бөлек, көлдер жүйесі мен шабындық, жайылымдарды суландыруға ерекше назар аудару керек. Бұл аймақтағы экологиялық жағдайды тұрақтандыруға септігін тигізеді.Биыл су жеткізу қызметінде биллингтік жүйе ресми түрде іске қосылып, су тұтынушылармен электрондық келісімшарт жасау толық аяқталды. Қолданыстағы қағидаларға сәйкес, шаруашылықтар әр айдың 25-іне дейін су жеткізу қызметі үшін төлем жүргізуі тиіс», – деді Мұрат Нәлқожаұлы.Айта кетейік, су саласын дамытудың 2024-2028 жылдарға арналған өңірлік кешенді жоспарына 112 жоба енгізілген. Су ресурстарын тиімді пайдаланудың жүйелі шараларына 10 млрд. теңгеге жуық қаржы бөлінді.Өткен жылы су үнемдеу технологияларын пайдалана отырып, 8,1 мың гектар жерге ауыл шаруашылығы дақылдары егілсе, биыл бұл көрсеткіш 14,2 мың гектарға жеткізілді.Су шығынын азайту үшін 65 мың гектар күріш алқаптары лазерьмен тегістелді. Осыған сәйкес бірінші кезекте 75 нысанның су қорғау жобалық құжаттамасын әзірлеу жоспарлануда.Ақпарат көзі : https://www.gov.kz/memleket/entities/kyzylorda/press/news/details/1254994?lang=ru

Астана, 2026 жылғы 8 шілде – Қазақстан Республикасы Сыртқы істер министрінің Бірінші орынбасары Ержан Ашықбаев ҚР-дың АҚШ-тағы Аризона штатындағы Құрметті консулы Хью Холлманмен кездесу өткізді.Кездесу барысында білім беру, экономика, инвестиция салаларындағы қазақ-америкалық ынтымақтастықты одан әрі дамыту, сондай-ақ Қазақстанның серіктес Аризона штатымен кең ауқымды бағыттар бойынша дәйекті түрде дамып келе жатқан өңіраралық байланыстарды нығайту мәселелері талқыланды.Екі ел арасындағы академиялық өзара іс-қимылдың жарқын үлгісіне айналған Манаш Қозыбаев атындағы Солтүстік Қазақстан университеті мен Аризона Университеті арасындағы ынтымақтастыққа ерекше назар аударылды. Бірлескен білім беру бағдарламаларымен 1 200-ден астам студент қамтылғаны, сондай-ақ ү.ж. 11 шілдеде қос диплом бағдарламасының алғашқы түлектерін бітіру рәсімі өтетіні аталып өтті.Бұдан басқа, тараптар сауда-экономикалық ынтымақтастықты одан әрі кеңейту, жаңартылатын энергетика, ауыл шаруашылығы және ақпараттық технологиялар салаларына инвестицияларды тарту, сондай-ақ Қазақстан мен Аризона штаты арасында өзара іскерлік миссиялар ұйымдастыру перспективаларын талқылады.Аризона штаты жоғары технологиялар, тау-кен өнеркәсібі, ауыл шаруашылығы және білім беру салалары қарқынды дамыған АҚШ-тың жетекші экономикалық әрі инновациялық орталықтарының бірі болып табылады.Ақпарат көзі : https://www.gov.kz/memleket/entities/mfa/press/news/details/1254971?lang=ru

Қазақстан Республикасы Қорғаныс министрінің орынбасары генерал-майор Алмаз Жұмакеевтің Жетісу гарнизонына жұмыс сапары аясында Талдықорған қаласындағы әскери госпитальға заманауи медициналық жабдықтар табысталды.Салтанатты рәсімге Қазақстан Республикасы Қарулы күштері Бас әскери-медициналық басқармасының бастығы медицина қызметінің полковнигі Ержан Смайыл, Жетісу гарнизонының әскери прокуроры әділет полковнигі Еркін Қожа-Ахмет, әскери-медициналық қызмет өкілдері, госпиталь басшылығы және отандық «L-Group» ЖШС өкілдері қатысты.Қорғаныс министрлігінің медициналық мекемесіне төрт өкпені жасанды желдету аппараты мен 50 инфрақызыл термометрі табысталды. Жаңа жабдықтар әскери-медициналық қызметтің әскери қызметшілері мен олардың отбасы мүшелеріне мамандандырылған медициналық көмек көрсету мүмкіндігін кеңейтіп, диагностика мен емдеу сапасын арттыруға мүмкіндік береді.Әскери госпитальға медициналық жабдықтар Жетісу гарнизонының әскери прокуратурасы мен отандық «L-Group» ЖШС-нің бірлескен жұмысының нәтижесінде өтеусіз көмек ретінде табысталды.Қарулы күштердің Бас әскери-медициналық басқармасының бастығы медицина қызметінің полковнигі Ержан Смайыл әскери-медициналық қызметті дамыту Қорғаныс министрлігі қызметінің басым бағыттарының бірі екенін атап өтті.– Бүгінде әскери медицина алдында заманауи технологияларды енгізу, емдеу-диагностикалық базаны жетілдіру және медициналық көмектің сапасын одан әрі арттыру міндеті тұр. Табыс етілген жабдықтар медициналық ұйымдарымыздың мүмкіндігін едәуір кеңейтіп, мыңдаған әскери қызметші мен олардың отбасы мүшелеріне сапалы медициналық көмек көрсетуге жол ашады, – деді ол.Әскери госпиталь басшылығы жобаға қатысқан барлық тарапқа алғыс білдіріп, мұндай бастамалар әскери-медициналық мекемелердің материалдық-техникалық базасын нығайтып, жеке құрамға заманауи медициналық қызмет көрсетуге қосымша мүмкіндік беретінін атап өтті.Ақпарат көзі : https://www.gov.kz/memleket/entities/mod/press/news/details/1254863?lang=ru

1992 жылғы 8 шілдеде Қарулы Күштер Бас штабының Әскери-медициналық басқармасы құрылды. Бұл күн тәуелсіз Қазақстанның әскери медицина жүйесінің қалыптасуы мен дамуының бастауына айналды.Бүгінде әскери-медициналық қызмет мамандары әскерлердің жауынгерлік даярлығын, оқу-жаттығуларды, жұмылдыру жиындарын және Қарулы Күштердің басқа да іс-шараларын медициналық қамтамасыз етеді, сондай-ақ елімізден тыс жерлерде де өз міндеттерін абыроймен атқаруда. Қазақстандық бітімгерлік контингент құрамында Голан жоталарында әскери дәрігерлер әскери қызметшілерге, қажет болған жағдайда жергілікті тұрғындарға да медициналық көмек көрсетіп келеді.Бүгінде әскери медицина жыл санап дамып келеді. Оның құрамына сегіз әскери госпиталь, төрт лазарет, Орталық әскери-дәрігерлік комиссия, санитариялық-эпидемиологиялық бөлімшелер және медициналық білім беру ұйымдары кіреді.Әскери медицина инфрақұрылымын жандандыруға да бүгінгі күні баса мән берілген. 2024 жылы Ақмола облысының Щучинск қаласында Қорғаныс министрлігінің Бас әскери клиникалық госпиталі базасында ауыр сырқаттар мен жарақаттардан кейін әскери қызметшілерді оңалтуға арналған бөлімше ашылды. Астана мен Алматы қалаларындағы әскери госпитальдарды реконструкциялау және техникалық жаңғырту жұмыстары жалғасуда, Семей қаласындағы әскери госпитальға күрделі жөндеу жүргізу аяқталуға жақын. Сонымен қатар Ақтау қаласында әскери теңізшілерге арналған госпиталь ашу және Алматы қаласында Әскери медицина академиясын құру бағытындағы жұмыстар жүргізілуде.Әскери-медициналық мекемелердің материалдық-техникалық базасын нығайтуға ерекше көңіл бөлінеді. Соңғы жылдары олар заманауи диагностикалық және хирургиялық жабдықтармен, оның ішінде компьютерлік томографтармен, цифрлық рентгенологиялық кешендермен, ультрадыбыстық диагностика аппараттарымен және эндоскопиялық жүйелермен жабдықталуда.Білікті кадрлар даярлау басым бағыттардың бірі болып қала береді. Әскери дәрігерлер еліміздің жетекші медициналық жоғары оқу орындарымен бірлесіп даярланады. Қазіргі уақытта әскери-медициналық мамандықтар бойынша 130-дан астам курсант пен әскери интерн білім алуда. Болашақ әскери дәрігерлер шетелдік оқу орындарында да білім алады. Жыл сайын шамамен 1300 маман біліктілікті арттыру курстарынан өтіп, тактикалық медицина бағдарламалары бойынша оқытылады.Жыл сайын әскери-медициналық мекемелерде мыңдаған әскери қызметші стационарлық ем алады. Тәжірибелі әскери дәрігерлер жоғары білікті медициналық көмек көрсетіп, күрделі хирургиялық операциялар да жасайды.Әскери дәрігердің еңбегі көп жағдайда көзге көріне бермейді. Дегенмен әскери қызметшілердің денсаулығы, адам өмірін сақтау және Қарулы Күштердің жоғары жауынгерлік әзірлігін қамтамасыз ету олардың кәсібилігіне, жауапкершілігіне және кез келген сәтте көмек көрсетуге дайындығына тікелей байланысты.Ақпарат көзі : https://www.gov.kz/memleket/entities/mod/press/news/details/1254710?lang=ru

Гвардейск гарнизонының 21450 әскери бөлімінде Қазақстан Республикасы Қарулы күштерінің XXIII спартакиадасы аясында АК-3 автоматы мен ПМ-3 тапаншасынан атудан чемпионат өтті.Армия орталық спорт клубы ұйымдастырған бұл сайыс Кеңес Одағының Батыры, Халық Қаһарманы, Қазақстанның тұңғыш ғарышкері Тоқтар Әубәкіровтің 80 жылдығына орай өткізілді.Чемпионатқа Қарулы күштердің түрлері, тектерінен және әскери бөлімдерден жасақталған 14 команданың сапында 100-ден аса әскери қызметші қатысты. Қатысушылар атыс дайындығының жоғары деңгейін, мергендіктерін және кәсіби шеберліктерін көрсетті.Жарыстың бас төрешісі, Армия орталық спорт клубы бастығының орынбасары подполковник Мирхат Химиденов айтқандай, штаттық қарудан атыс чемпионаты Қарулы күштердің игі дәстүріне айналған. Мұндай жарыстар әскери қызметшілердің жауынгерлік даярлығын жетілдіруге, мергендік шеберлігін арттыруға және команданың іс-әрекетін нығайтуға ықпал етеді.Сайыс қорытындысына келсек, жалпыкомандалық есепте бірінші орынды Әуе қорғанысы күштерінің командасы олжалады. Екінші орынды 32039 әскери бөлімінің командасы, үшінші орынды Десанттық-шабуылдау әскерлерінің өкілдері еншіледі.Әйелдер арасында сержант Аяжан Әміржанова төртінші рет чемпион атанды.– Десанттық-шабуылдау әскерлерінің намысын қайта қорғап, Қарулы күштердің чемпионы атану – мен үшін үлкен мәртебе. Осындай жарыстар шеберлігімізді ұдайы жетілдіруге және армияның үздік мергендерімен тәжірибе алмасуға зор мүмкіндік береді, – деді әскери қызметші.Чемпионат қорытындысына қарай халықаралық әскери жарыстарда ел намысын қорғайтын Қарулы күштердің құрама командасы жасақталатын болады.Ақпарат көзі : https://www.gov.kz/memleket/entities/mod/press/news/details/1254614?lang=ru

Тіршілік иесінің киелі мекені – Алакөл өңірі ежелден табиғатының сұлулығымен, көл суының емдік қасиетімен ерекшеленіп, талайлардың көз жауын алып келген. Қанатты жиһанкездердің көптеген түрлерінің мекендейтін нағыз жұмағы, ақын-жазушылар ән-жырына арқау еткен, ата-бабамыздан мұра болып қалған осы бір тамаша жерді келешек ұрпақтарға қаз-қалпында аманат ету - қазіргі біздің міндетіміз.Алакөл мемлекеттік табиғи қорығы 1998 жылы Тентек өзенінің атырауының жануарларымен өсімдік әлемін және Алакөл көліндегі Аралтөбе аралдарындағы көне дәуір шағаласының ерекше популяциясын сақтау мақсатында құрылған.Қорық аумағы 65 672 гектар жерді құрайды, оның ішінде 17 877 гектар Жетісу облысының Алакөл ауданында және 47 795 гектар Абай облысының Үржар және Мақаншы аудандарында жатыр.Бұл өңір құстардың Орталық-Азия – Үнді миграциялық жолы болып табылғандықтан, Алакөл-Сасықкөл көлдер жүйесі 2009 жылы 25 қараша күні 1892 реттік санымен Рамсар конвенциясының тізіміне енгізілді, қазіргі таңда бұл жерлер әлемдік маңызы бар сулы-батпақты алқап болып табылады.2013 жылы 29 мамырда Алакөл қорығы ЮНЕСКО-ның биосфералық резерваттар желісіне қосылды.Алакөл қорығы Қазақстандағы сулы-батпақты құстардың негізгі ұя салатын, түлейтін және миграция кезінде тоқтайтын ең ірі орындарының бірі болып табылады. Мұндағы жануарлардың басым бөлігін құстар мен балықтар алып отыр.Алакөл қорығының құстар фаунасы 330 түрімен берілген, оның ішінде 133 түрі қорық аумағында тұрақты ұя салады. 16 түрі Қазақстан Республикасының Қызыл кітабына енгізілген. Көне дәуір шағаласы – Алакөлдің символы мен мақтанышы болып табылады.Қорықта сүтқоректілердің 35 түрі мекендейді. Оның ішінде басым көпшілігі шөлді аймақтың кеміргіштері болып келген. Қорық аумағы үшін сүтқоректілерден маңыздысы ретінде қабан, түлкі, борсық, елік, қоян, ондатр және қасқыр жатады.Балықтардың 18 түрі суайдындарды мекен етеді, оның ішінде 9 түрі аборигенді болып есептеледі, сонымен қатар Балқаш-Алакөл ойпатының эндемиктері болып саналатын балқаш алабұғасы мен балқаш қарабалығы кездеседі.Алакөл ойпатында бауырымен жорғалаушылардың 24 түрі таралған, соның ішінде қорық аумағында 10 түрі кездеседі.Қосмекенділердің 2 түрі қорықта кездеседі, оның ішінде даната құрбақасы Қазақстан Республикасының Қызыл Кітабына енгізілген.Алакөл қорығы аумағындағы жәндіктердің 392 түрі белгілі.Қазіргі таңда өсімдік жамылғысының 290 түрі өседі, оның ішінде жоғарғы топтағы 288 түрі тіркелген, төменгі топтағы өсімдіктер 2 түрмен берілген.Табиғаттың бергені мен берері адамзат үшін теңдесі жоқ байлық. Сондықтан, барымызды бағалай білейік. Табиғатты қорғау парызымыз екенін ұмытпайық. Қайда жүрсек те, қандай іспен айналыссақ та туған жердің табиғатына жетер ештеңе жоқ. Ақпарат көзі : https://www.gov.kz/memleket/entities/ecogeo/press/news/details/1254494?lang=ru