Бүгін Қоғамдық кеңестің алғашқы отырысы өтті. Жиын барысында Самар аудан әкімі С. Жеңісов  және мәслихатының төрағасы Г. Шаймарданова  Қоғамдық кеңестің жаңа құрамын құттықтап, оларға ресми куәліктерін табыстады. Бұл кеңестің басты мақсаты – тұрғындар мен билік арасындағы ашық диалогты қамтамасыз ету және ауданның әлеуметтік-экономикалық дамуына үлес қосу.Ақпарат көзі : https://www.gov.kz/memleket/entities/vko-samar/press/news/details/1072910?lang=kk

Ақтөбе қаласында Қорғаныс министрлігіне қарасты Әуе қорғанысы күштері әскери институтының түлектеріне арналған салтанатты рәсім өтті. Іс-шара "Қазақ халқына мың алғыс" стеласы орналасқан алаңда ұйымдастырылды.Екі мәрте Кеңес Одағының батыры, авиация генерал-майоры Талғат Бигелдиновтің есімі берілген әскери институт жарты ғасырдан астам уақытта мыңдаған кәсіби мамандарды даярлап, нағыз патриот, әскери антқа адал офицерлердің ұстаханасына айналды.Салтанатты шараға Қорғаныс министрлігінің басшылығы, институттың профессорлық-оқытушылар құрамы, Қарулы күштердің ардагерлері, құрметті қонақтар мен түлектердің жақындары қатысты.– Бүгінгі күн – тек түлектер үшін ғана емес, Қарулы күштер үшін де үлкен мереке. Институт қабырғасында сіздер шыңдалып, білім алып, тәртіпке үйрендіңіздер. Енді Отан игілігі үшін қызмет етесіздер. Әскери қызмет – үлкен құрмет әрі зор жауапкершілік. Сіздер – батылдық пен ерліктің символысыздар, – деді Қорғаныс министрінің орынбасары – Әуе қорғанысы күштерінің бас қолбасшысы генерал-майор Қайрат Садықов.Рәсім барысында ең әсерлі сәт – дәстүрлі офицерлік вальс болды. Биылғы түлек Даниэль Дәулет өзінің сүйіктісі, медициналық ротаның 3-курс курсанты Айару есімді арумен вальс биледі.– Айарумен 2024 жылдың 21 маусымында, мен тәжірибеден оралған күні таныстым. Сол күннен бастап араласа бастадық. Бүгін мен оны ата-анама таныстырдым. Алда бізді уақытша екі жаққа кетеміз – мені Тараз қаласына қызметке жіберді. Бірақ бірге болуды, мықты әрі бақытты отбасы құруды армандаймыз, – деді Дәулет.Жас лейтенанттар үшін бұл күн тек курсанттық өмірмен қоштасу ғана емес, сонымен қатар қызметтік мансаптың бастамасы болды. Әуе қорғанысы күштерінің әскери институтын тәмамдаған түлектер еліміздің әскери бөлімдеріне жіберіліп, Қазақстанның әуе шебін және бейбіт тұрғындардың тыныштығын күзететін болады.Ақпарат көзі : https://www.gov.kz/memleket/entities/mod/press/news/details/1072915?lang=kk

Қонаев қаласында «World Clean Up Day» халықаралық акциясы және «Таза Қазақстан» экологиялық бағдарламасы аясында кең ауқымды жалпықалалық сенбілік ұйымдастырылды.Шараға қала тұрғындары, кәсіпкерлер, жастар және ардагерлер белсене қатысты. Қатысушылардың бірлескен еңбегімен ағаштар отырғызылып, аулалар мен қоғамдық аумақтар абаттандырылды, бордюрлер сырланып, көшелер мен саябақтар тазартылды.Акцияның басты мақсаты – қаланың экологиялық жағдайын жақсарту, тұрғындар арасында қоршаған ортаға ұқыпты қарау мәдениетін қалыптастыру және экологиялық жауапкершілікті арттыру.Мұндай игі бастамалар қала тұрғындарын біріктіріп, туған жердің тазалығы мен жайлылығын сақтауға ортақ үлес қосуға мүмкіндік береді.Ақпарат көзі : https://www.gov.kz/memleket/entities/almobl/press/news/details/1072954?lang=kk

Облыс әкімі Нұрлыбек Нәлібаев өңірдегі ірі өнеркәсіп кәсіпорындарының бірі – «Orda Glass Ltd» табақша шыны өндіру зауытының бас директоры Цай Го мырзамен кездесті. Кездесуде зауыттың ағымдағы жұмысы, өндірістік қуаты және алдағы инвестициялық жобалар талқыланды.Айта кетейік, «Orda Glass Ltd» зауыты 2022 жылы Индустрияландыру бағдарламасы және «Бір белдеу – бір жол» Қазақстан-Қытай ынтымақтастық жобасы аясында іске қосылған. Жылдық қуаттылығы 197,1 мың тонналық бұл кәсіпорын – республикадағы табақша шыны өндіруші жалғыз инновациялық зауыт. Жобаны жүзеге асыру үшін 42 млрд теңге шетелдік инвестиция тартылған.Зауыт іске қосылғаннан бері өнімінің 70%-ы ішкі нарыққа бағытталса, 30%-ы Өзбекстан, Қырғызстан, Тәжікстан және Грузия елдеріне экспортталуда.2023 жылы облыс әкімінің Қытай Халық Республикасына жұмыс сапарының нәтижесінде былтыр жылына 5 млн шаршы метр энергия үнемдейтін шыны өндіретін жаңа желі іске қосылды. Жобаның инвестициялық құны 15 млн АҚШ доллары.Облыс әкімдігі зауыттың тұрақты жұмысын қамтамасыз ету, инфрақұрылымдық қолдау көрсетуде кешенді шаралар атқарып келеді. Өз кезегінде қытайлық инвестор құны 55 млн АҚШ доллары болатын, екі кезеңнен тұратын жаңа инвестициялық жобаны жүзеге асыруды жоспарлаған.Шыны зауытының жұмысы аймақта ілеспе өндірістердің дамуына серпін берді. Алдағы уақытта айна, бөтелке және шыңдалған шыны шығаратын зауыттар ашылмақ. Бұл жобалар өңір экономикасын әртараптандыруға, шыны кластерін дамытуға, жаңа жұмыс орындарын ашуға, сондай-ақ импортты алмастырып, ішкі нарықты сапалы отандық өніммен қамтамасыз етуге мүмкіндік береді. Бастамалар облыстық бюджетке қосымша кіріс әкеліп, жергілікті тұрғындарды жұмыспен қамтуға жағдай жасайды.Ақпарат көзі : https://www.gov.kz/memleket/entities/kyzylorda/press/news/details/1072736?lang=kk

Жетісу облысы бойынша Мемлекеттік кірістер департаментінің қызметкерлері Ескелді ауданының кәсіпкерлері мен тұрғындары үшін көшпелі семинар өткізді. Іс-шара барысында 2026 жылдан бастап күшіне енетін Салық кодексіндегі негізгі өзгерістер талқыланды.Семинарға қатысқан жеке кәсіпкерлер, шаруа қожалықтарының басшылары мен бухгалтерлер салық заңнамасындағы алдағы жаңалықтар туралы ақпарат алып, өз сұрақтарын қоя алды.Кездесу барысында келесі мәселелер талқыланды: салық есептілігі нысандарын қысқарту, арнаулы салық режимдерін өзгерту, ҚҚС-ты реформалау, жалпыға ортақ декларациялау және салықтық әкімшілендіруді цифрландыру.Ашық диалогтың арқасында салық төлеушілер алдағы өзгерістерге дайындық бойынша нақты ұсыныстар алып, өзекті мәселелерді талқылады.Ақпарат көзі : https://www.gov.kz/memleket/entities/kgd-zhetysu/press/news/details/1072739?lang=kk

Бухарест қаласы, 2025 жылғы 8–9 қыркүйек – «PetroCouncil» және «KazService» қауымдастықтарының басшылығы мен мүшелерінің Румынияға жасаған сапары аясында энергетика, ақпараттық технологиялар және логистика сияқты негізгі салаларда Қазақстан мен Румыния арасындағы екіжақты ынтымақтастықты дамытуға бағытталған бірқатар кездесулер өтті.Делегация мүшелері «Rompetrol» компаниясы, Румыния Сауда-өнеркәсіп палатасының басшылығымен кездесіп, стратегиялық маңызды өндірістік нысандар — «Vega Refinery» (Плоешти қаласы) және «Petromidia Refinery» (Констанца қаласы) мұнай өңдеу зауыттарын аралады.Кездесулер барысында қазақстандық мұнай-сервистік және инжинирингтік компанияларды румын жобаларына тарту мүмкіндіктері, энергетика және өнеркәсіп салаларының қажеттіліктеріне бағытталған бірлескен цифрлық жобалар мен технологиялық шешімдер әзірлеу, сондай-ақ тәжірибе алмасу мәселелері талқыланды.Сондай-ақ тараптар мұнай-газ саласындағы ортақ жобаларды іске асыру үшін Қазақстан мен Румыниядан білікті мамандарды тарту мүмкіндігін қарастырды. Бұл екі елдің де сараптамалық деңгейі мен технологиялық жабдықталуын арттыруға мүмкіндік береді.Сапар қорытындысы бойынша стратегиялық әріптестікті нығайтуға, жаңа нарықтарға шығуға және Қазақстан мен Румынияның экономикалық өсімі мен технологиялық дамуына ықпал ететін бірлескен жобаларды іске асыруға өзара мүдделілік расталды.              Ақпарат көзі : https://www.gov.kz/memleket/entities/mfa-bucharest/press/news/details/1072759?lang=kk

Қазақстандық TrustExam.ai IT-компаниясы (жергілікті нарықта Oqylyq.kz брендімен танымал) Ұлыбританияның кәсіби жүргізушілерді даярлау және білім беру саласындағы жетекші ұйымы – Driving Instructors Association (DIA) қауымдастығымен стратегиялық әріптестік орнатқанын жариялады.Қазақстанның Ұлыбританиядағы Елшілігінің қолдауымен, TrustExam.ai компаниясы Astana Hub және басқа да қазақстандық IT-компаниялармен бірге 2025 жылғы маусымда Ұлыбританиядағы ең ірі жыл сайынғы технологиялық көрме – London Tech Week шарасына қатысты. Бұл көрмеге 90-нан астам елден 45 000-нан аса қатысушы жиналды.Қазақстанның ұлттық стенді аясында TrustExam.ai компаниясы жоғары деңгейдегі питч-сессиялар өткізіп, Ұлыбританияның жасанды интеллект және финтех салаларындағы көшбасшыларымен тікелей байланыс орнатты. Нәтижесінде, компанияның Ұлыбританиядағы сертификация нарығында DIA ұйымымен стратегиялық әріптестік орнатуына жол ашылды.Бұл серіктестік Ұлыбританиядағы көлік және мотоцикл жүргізушілеріне арналған теориялық емтихандар жүйесін цифрлық трансформациялауға бағытталған. Жасанды интеллект технологияларын енгізу тестілеу әділдігін және объективтілігін қамтамасыз етіп, емтихан процесін тез, ыңғайлы әрі кең көлемде өткізуді мүмкін етеді.TrustExam.ai мәліметінше, кандидаттар үшін бұл күту уақытын қысқартып, икемді кесте мен жүргізуші куәлігін алу жолындағы кедергілерді азайтады. Ал емтихан орталықтары мен оқу орындары үшін сапа мен сенімділікке нұқсан келтірмей, өткізу қабілетін арттыруға мүмкіндік береді.Carly Brookfield, DIA-ның бас атқарушы директоры: «DIA практикалық емтихандар мен нұсқаушыларды кәсіби даярлау сапасы бойынша жоғары стандарттарды ұстанады. TrustExam.ai компаниясымен жаңа серіктестік арқылы біз жүргізуші куәлігін алуға немесе нұсқаушы болуға үміткерлердің біліктілігін бағалауға арналған бұрынғыдан да сенімді, тиімді және ыңғайлы шешімдер ұсына аламыз», - деп атап өтті.TrustExam.ai – Стэнфорд университетінің StartX стартап-экожүйесіне мүше Қазақстандық AI-платформа. Жыл сайын 2 миллионнан астам қолданушыға қызмет көрсететін бұл шешім мемлекеттік органдарға, университеттерге және емтихан орталықтарына академиялық адалдықты қамтамасыз етуге көмектеседі.Driving Instructors Association (DIA) – Ұлыбританиядағы ең ірі жүргізуші нұсқаушылар қауымдастығы. Ол сала мүдделерін қорғайды және нұсқаушылардың кәсіби дамуына қолдау көрсетеді. DIA құрамындағы Diamond Advanced Motorists бөлімі – жүргізушілерді жетілдіріп оқыту саласындағы халықаралық деңгейде танылған бренд және түрлі мемлекеттік әрі жекеменшік ұйымдардың сенімді серіктесі.Ақпарат көзі : https://www.gov.kz/memleket/entities/mfa-london/press/news/details/1072511?lang=kk

Абайдың 180 жылдығына арналған «Сұлу Сырдан - шырайлы Шығысқа» атты Қызылорда облысының өнер күндері Шығыс Қазақстан облысының орталығы Өскеменде жалғасты. Сыр елінің сәлемін еліміздің шығысына жеткізген делегацияны облыс әкімі Нұрлыбек Нәлібаев бастап барды. Делегация құрамында Парламент Сенаты мен Мәжілісінің депутаттары Н.Байқадамов, Р.Рүстемов, М.Ергешбаев, облыстық ардагерлер кеңесінің төрағасы С.Дүйсенбаев, аймақ ардагерлері, зиялы қауым өкілдері, Тұрмағамбет атындағы халық аспаптар, симфония оркестрлері, «Сыр самалы» вокалды-аспапты, «Томирис» би ансамбльдері, хор ұжымы, басқа да өнерпаздар бар.Шығыс Қазақстан облыстық филармониясында «Сыр өңірі – түркі өркениетінің алтын бесігі» атты көрме ашылып, Қызылорда облысының әкімі Нұрлыбек Нәлібаев, Шығыс Қазақстан облысының әкімі Нұрымбет Сақтағанов және өскемендіктерҚызылорда облыстық тарихи-өлкетану музейі қорындағы құнды жәдігерлермен танысты. Кейінгі жылдары музей қоры ежелгі қалалар орнынан табылған жәдігерлерді негізге алып қайта жаңғыртылған «Шірік Рабат сақ жауынгері», «Сығанақ ханшайымы», «Түгіскен көсемі», «Жетіасар ақсүйек әйелі» археологиялық реконструкцияларымен толыққан болатын. Бүгінгі көрмеге келушілер осы жәдігерлерге ерекше назар аударды. Археологиялық экспедициялар кезінде табылған алтындар коллекциясы да осы жерден орын алған. Ежелгі өркениеттің бесігі саналатын Шірік Рабат және Бәбіш мола қалашықтарынан табылған алтын жапсырмалар сол дәуірдің көзіндей. Сондай-ақ, көрмеге орта ғасырларда сауда-саттық пен мәдениеті өркендеген Сығанақ қалашығынан табылған алтын сырғалар, тұмар, түймелер және маржан моншақтардың түпнұсқа коллекциясы қойылған. Шығыс жұртшылығы Жанкент, Асанас, Қышқала, Сығанақтан табылған терракоталар, глазурлі қаптамалар, қыш ыдыстар және Бидайықасар қалашығынан табылған қоссаз домбыра көшірмесін де қызыға тамашалады.Көрмедегі зергерлік және тұрмыстық бұйымдардың орны бөлек. Өңіржиек, жырға, алқа, ағаш жиһаздар, ыдыстар, тері бұйымдары Сыр бойында қолөнердің бай мұрасы сақталғанын көрсетеді. Қару-жарақ коллекциясындағы қылыш, айбалта, семсер, шоқпар, найза, қалқан, жебе тарихтан сыр шертеді.«Деде Қорқыт» кітабының Дрезден нұсқасы, нар қобыз, ЮНЕСКО сертификаты, кәдесыйлар, Марал ишанның көк асасы, Керей ерінің түпнұсқасы, Қалқай ишан, Сердалы Бекшорин, Ер Сейтпенбет, Бұқарбай батырдың мөрлердің көшірмелері де көрмеге келушілер қызығушылығын туғызды.Сондай-ақ, Абайдың 1922 жылы жарық көрген өлеңдер жинағы мен Қызылорданың астана болған кезеңінің фото және архив құжаттары көрме құндылығын арттыра түсті.Еске салайық, кеше «Сыр өңірі - түркі өркениетінің алтын бесігі» көрмесі Абай облысының жұртшылығына ұсынылды.Ақпарат көзі : https://www.gov.kz/memleket/entities/kyzylorda/press/news/details/1072581?lang=kk

Қазақстанның шикізаттық емес экспорты кеңейіп келеді. 2020–2024 жылдары «Экспорттық акселерация» бағдарламасы арқылы 306 кәсіпорын шетелдік нарыққа шықса, жасалған келісімшарттардың жалпы көлемі 189 млн АҚШ долларынан асты. Биыл бағдарламаға тағы 120 өңдеуші өнеркәсіп пен қызмет көрсету компаниясы іріктелді. Бағдарламаның басты артықшылығы – кәсіпкерлерге нарықты зерттеу, өнімді сертификаттау, маркетинг пен қаптамада кәсіби көмек беру, сондай-ақ шетелдік алаңдарда оқыту мүмкіндігін ұсыну. Осы тұрғыда 2025 жылдың тамыз–қыркүйек айларында қазақстандық кәсіпкерлер Бейжің, Үрімші және Гуйян қалаларында білім алды. Оқыту агроөнеркәсіп, жеңіл өнеркәсіп, азық-түлік өңдеу және инновациялар салаларын қамтып, қатысушылар қытайлық стандарттар мен жетекші кәсіпорындардың тәжірибесін зерттеді және ынтымақтастықтың жаңа бағыттарын талқылады. «Қытай – өндіріс пен саудада әлемдік көшбасшы. Егер қазақстандық компаниялар жаһандық нарықта бәсекеге түскісі келсе, алдымен осы елдің талаптары мен тәжірибесін білуі шарт. Сол себепті біз акселераторларды дайындау алаңы ретінде Қытайды таңдадық», – деді QazTrade бас директоры Айтмұхаммед Алдажаров. «Оқу барысында біз негізінен өндірістегі қауіпсіздік мәселелерін талқыладық. Қытайлық әріптестердің жұмыс тәсілдері мен стандарттарын көзбен көріп, тәжірибеден өттік. Сондай-ақ ірі тоқыма фабрикаларына барып, мата үлгілері мен баға ұсыныстарын алдық. Ең қатты таңғалдырғаны – автоматтандыру деңгейі. Алып цехтарда бар болғаны елуге жуық адам жұмыс істейді, ал қалғанын толықтай роботтар атқарады. Бұл тәжірибеден Қазақстандағы тоқыма өндірісіне жаңа технология енгізудің маңызын түсіндік», – деді «UNIFORMA Systems» өндіріс жөніндегі менеджері Сандибек Далмаханов. Соның нәтижесінде Қытайдағы семинарлар қазақстандық өндірушілер үшін нағыз «экспорт мектебіне» айналды. Қатысушылар тек технология мен маркетинг бойынша білім алып қана қоймай, болашақ экспорттық келісімшарттарына қадам жасады.Ақпарат көзі : https://www.gov.kz/memleket/entities/mti/press/news/details/1072652?lang=kk

2025 жылдың 18 қыркүйегінде «Жұмысшылар жылы» аясында мектеп оқушыларына кәсіптік бағдар беру мақсатында Өскемен қаласы бойынша «№50 жалпы білім беретін мектебі» коммуналдық мемлекеттік мекемесінде 9-11- сынып оқушыларына арналған «Көлік әлемінде: Болашақ сіздің қолыңызда» атты  тақырыбында іс-шара өтті. Бұл іс-шараның негізгі мақсаты: «Еңбек нарығы ұсынған мамандықтарға қатысты оқушыларға кеңес беру, таңдаған мамандықтарды меңгеруге болатын оқу орындары туралы ақпарат беру; оқушыға оның бейімділігіне сәйкес еңбек қызметінің нақты түріне қатысты өз қабілеттері мен қасиеттерін бағалауға көмектесу, кәсіптік бағдар беру»Іс-шара қонақтары: Қазақстан Республикасының көлік вице-министрі Ластаев Талғат Тлеубекұлы, «ҚТЖ «ҰҚ» АҚ - магистральдық желінің Семей бөлімшесі филиалының директоры Шаукежанов Айдын Максутбекович, «КазАэроНавигация » АҚ Өскемен филиалы әуе қозғалысы қызметінің әуе кемелерінің қозғалысын тікелей басқаруды  жүзеге асыратын диспетчер-нұсқаушы Ягудин Қалқаман Азаматұлы, Шығыс Қазақстан облысы бойынша «Жол активтері саласының ұлттық орталығы» РМК директорының м.а Мұсапиров Саяхат Оралханұлы, Д. Серікбаев атындағы Шығыс Қазақстан техникалық университетінің аға-оқытушысы Абеджанова Арай Сайлаубекқызы.Алғашқы сөз:  Қазақстан Республикасының көлік вице-министрі Ластаев Талғат Тлеубекұлына берілді. Қазақстан Республикасының көлік вице-министрі Ластаев Талғат Тлеубекұлы оқушылардың сұрақтарына жауап беріп, өзінің іс-тәжірибесімен бөлісе отырып, оқушыларға кәсіптік бағыт-бағдар берді.Іс – шара аясында «Менің кәсібім-теміржолшы», «Әуе қозғалысын басқару», «Мамандық -жолшы», «Көлік саласындағы оқыту бағдарламалары туралы» атты баяндамаларымен таныстырылды. Оқушылар өздерін қызықтырған сұрақтарына жауап алып,  қызықты да мағыналы кездесу-сұхбат болды.Ақпарат көзі : https://www.gov.kz/memleket/entities/vko-bilim/press/news/details/1072674?lang=kk

Хайдарабад, 2025 жылғы 18–19 қыркүйек – Үндістандағы Қазақстан Республикасының Елшісі Азамат Есқараев Хайдарабад қаласына жұмыс сапарымен барып, Телангана штатының губернаторы Джишну Дев Варма мырзамен кездесті.Келіссөздер барысында экономика, инвестициялар, денсаулық сақтау және білім беру салаларындағы екіжақты ынтымақтастықты нығайту перспективалары талқыланды. Ерекше назар Қазақстан мен Үндістан арасындағы әуе қатынасының географиясын кеңейту мәселесіне, атап айтқанда Қазақстаннан Хайдарабад және Ахмедабад қалаларына тікелей рейстер ашу мүмкіндігіне аударылды.Сапар аясында Қазақстан Республикасының Хайдарабадтағы Құрметті Консулы Н.М. Насир Али Ханның ұйымдастыруымен Елші өңірдің бірқатар жетекші компаниялары және ұйымдарымен кездесті:Power Mech Projects Ltd. – энергетикалық және өнеркәсіптік құрылыстағы Үндістанның ірі компаниясы. Қазақстандағы инфрақұрылымдық жобаларға қатысу мәселелері қаралды.NephroPlus – Үндістандағы ірі диализ клиникаларының желісі. Қазіргі заманғы медициналық технологияларды енгізу және Қазақстанда бірлескен жобаларды ашу бойынша алдын ала уағдаластыққа қол жеткізілді.GMR Group – әуежайлар мен инфрақұрылым саласында жұмыс істейтін Үндістанның ірі конгломераты. Қазақстаннан Хайдарабад және Ахмедабад қалаларына тікелей әуе қатынастарын дамыту, сондай-ақ көлік инфрақұрылымы саласындағы ынтымақтастық мәселелері талқыланды.Apollo Medskills – Apollo Hospitals тобының білім беру құрылымы. Медициналық кадрларды даярлау бойынша бірлескен бағдарламалар, Қазақстанда медициналық хаб құру, телемедицина жобаларын әзірлеу және диализ бойынша заманауи орталық ашу мәселелері қаралды.KIMS Hospitals – Үндістанның оңтүстігіндегі көпсалалы клиникалар желісі. Қазақстанда тәжірибе алмасу және алдыңғы қатарлы медициналық тәжірибелерді енгізу жобалары қарастырылды.SAP Medical – медициналық технологиялар мен жабдықтар компаниясы. Медициналық жабдықтарды өндіру және денсаулық сақтау саласындағы ынтымақтастық бойынша бірлескен бастамалар талқыланды.Сапар қорытындысы бойынша энергетика, медицина, инфрақұрылым, білім және туризм салаларын қамтитын Қазақстан экономикасына инвестициялық жобаларды іске асыру жөнінде алдын ала уағдаластыққа қол жеткізілді. Бірқатар кәсіпорындар тікелей инвестиция салуға дайын екендіктерін білдірді. Атап айтқанда, Power Mech Projects Ltd. – 50–500 млн АҚШ доллары, NephroPlus – 10–15 млн АҚШ доллары көлемінде инвест-жобалармен таныстырды.Қазақстан тарапынан инвестиция тарту жұмыстары Мемлекет басшысының қыркүйек айындағы Жолдауында айқындалған тәсілдерге сәйкес жүргізіліп отырғаны атап өтілді.Сонымен қатар, 2025 жылғы 17 қыркүйекте Елші «Big B Corporation» компаниясының негізін қалаушы Махендра Джошимен кездесті. Келіссөздер барысында Қазақстанда ірі инвестициялық жобаларды іске асыру перспективалары талқыланды.Атап айтқанда, М. Джоши қазіргі уақытта Алматы облысында қонақүй, университет (10 000 студентке арналған) және кампус салуды көздейтін «Kazind Medical Group» ЖШС құрылғанын хабарлады. Компания сондай-ақ 1000 төсек-орындық аурухана салуды жоспарлап отыр.Осыған орай, «Kazind Medical Group» ЖШС Алматы облысы әкімдігімен 2023 жылғы 15 тамызда өзара түсіністік пен ынтымақтастық туралы Меморандумға, сондай-ақ 2025 жылғы 2 қыркүйекте «KazakhInvest» ҰК» АҚ-мен меморандумға қол қойған. Жобаларды қысқа мерзімде жүзеге асыру жоспарланып отыр. Бұдан бөлек, компания Ақмола облысында да ұқсас жобаны іске асыру мүмкіндігін қарастыруда.Сонымен қатар, Қазақстанда Медициналық Хаб құруға, сондай-ақ пайдалы қазбаларды өндіруге қызығушылық білдірілді. Жалпы инвестиция көлемі шамамен 1,6 млрд АҚШ долларын құрайды деп бағалануда.А. Есқараев аталған жобаларды жүзеге асыру үшін Елшілік тарапынан консультациялық және визалық қолдау көрсетілетінін атап өтті.Ақпарат көзі : https://www.gov.kz/memleket/entities/mfa-delhi/press/news/details/1072675?lang=kk

Абайдың 180 жылдығына арналған «Сұлу Сырдан - Шырайлы шығысқа» атты Қызылорда облысының өнер күндері Өскемен қаласында жалғасын тапты. Сырдың бойынан Ертіс жағасына сапар шеккен делегацияны облыс әкімі Нұрлыбек Нәлібаев бастап барды. Делегация құрамында Парламент Сенаты мен Мәжілісінің депутаттары Н.Байқадамов, Р.Рүстемов, М.Ергешбаев, облыстық ардагерлер кеңесінің төрағасы С.Дүйсенбаев, аймақ ардагерлері, зиялы қауым өкілдері, Тұрмағамбет атындағы халық аспаптар, симфония оркестрлері, «Сыр самалы» вокалды-аспапты, «Томирис» би ансамбльдері, хор ұжымы, басқа да өнерпаздар бар.Шығыс Қазақстан облыстық филармониясына жиналған көрерменге өнерпаздар ән-жырдан шашу шашты.Аймақ басшысы ұлт руханияты мен мәдениетінің, әдебиеті мен өнерінің қайнар бастауындағы тұлғалар түлеген Шығыс жұртшылығына ізгі тілегін білдірді.«Өз заманынан көш ілгері ойлайтын Шәкәрім Құдайбердіұлынан «Сыр – Алаштың анасы» деген нақыл қалған. Қилы заманда, зұлматқа толы күндерде, ақтабан шұбырынды кезеңінде, ел ішін ашаршылық жайлағанда бүкіл қазақ баласы көш-керуенінің басын Сырға бұрып, Сырды анасындай паналаған. Сол себепті, Алашқа ана болған Сырдың қазақ үшін орны да, жөні де бөлек. Күллі түркі әлемінің алтын бесігі саналатын Алтай төріндегі шырайлы шығыс өлкесі – түркілердің сана-сезімін қалыптастырған, рухани ұясында талай ұлы тұлғалар тәрбиеленген қасиетті мекен.Ырыс аунап, құт қонған Шығыс Қазақстан – қазақ халқының жан-дүниесінің тереңдігін айқындайтын киелі өлке.Шыңғыс тауының бөктерінде ұлы Абайдың 180 жылдығы Президентіміздің қолдауымен жоғары деңгейде атап өтілуі де осының айқын дәлелі. Мемлекет басшымыз «Ұлы Абай – біздің еліміздің мақтанышы ғана емес, әлемдік деңгейдегі кемеңгер. Оның өлеңдері мен қара сөздері – ұлттық болмысымыздың айнасы» деген болатын.Баршаңызды қазақтың біртуар ұлы ақыны, «адамзаттың Абайы» атанған ағартушы, рухани реформатор Абай Құнанбайұлының жалпыхалықтық тойымен Сыр жұртшылығының, Өзімнің атымнан шын жүректен құттықтаймын!», – деді Н.Нәлібаев.Мерекелік басқосуда Шығыс Қазақстан облысының әкімі Нұрымбет Сақтағанов сөз сөйлеп, өнер күндерін өткізуге қолдау білдірген облыс әкімі Нұрлыбек Нәлібаевқа, атсалысқан өнерпаздарға алғысын жеткізді.Концертте Қорқыттың сарыны қылқобыздан төгіліп, «Күлтегін» жырының үзіндісі орындалды, көрермен қошеметіне ие болған «Қорқыт–қобыз» әні шырқалды.«Ұлы дала поэмасы» хореографиялық қойылымын қойған «Томирис» би ансамбліне ерекше құрмет көрсетілді.Сыр сүлейлерінің толғауларына сусаған көрерменге Нұртуған жыраудың «Өсиеті», Нартай ақынның «Өздерің білер Нартаймын», Ақ Кете Шернияздың «Сөз сөйлейін бөлмелеп» термелері ұсынылды.«Бүлдірген», «Сұрша қыз», «Сырдың қараторғайы», «Ауылың сенің іргелі» сияқты халық әндері, әлемдік классиканың жауһар туындылары орындалды.Еске салайық, кеше «Сұлу Сырдан - ұлы Абай еліне» атты Қызылорда облысының өнер күндері Абай облысында өтті.Ақпарат көзі : https://www.gov.kz/memleket/entities/kyzylorda/press/news/details/1072685?lang=kk

Физика-математика ғылымдарының докторы, профессор Т.И. Аманов атындағы жалпы білім беретін мектептердің 9-11 сынып оқушыларына арналған математикадан облыстық олимпиаданың аудандық кезеңі өткізілді.Олимпиада қорытындысы:9 сынып қазақ тіліндеI орын- Дулат Наргиз “Сосновка орта мектебі”КММII орын- Чалова Нұрдана “№1 Жалпы білім беретін орта мектебі” КММIII орын- Төлеубекова Аида “Өндіріс орта мектебі”КММ9 сынып орыс тіліндеIII орын- Савчук Ульяна “Қ. Рыскұлбеков атындығы ОМ” КММ10 сынып қазақ тіліндеIII орын- Қазбекова Дильназ “Беген орта мектебі” КММ10 сынып орыс тіліндеI орын- Калиев Шыңғыс “Қ. Рыскұлбеков атындығы ОМ” КММIII орын- Нургалиев Ринат “Сосновка орта мектебі”КММ11 сынып қазақ тіліндеI орын- Мурат Дильназ “№1 Жалпы білім беретін орта мектебі” КММII орын Магауова Нұрай “№1 Жалпы білім беретін орта мектебі” КММIII орын- Исабеков Алинур “Н.Баймұратов атындағы орта мектебі “КММ11 сынып орыс тіліндеIII орын- Сағындық Бектұр “Мало-Владимировка орта мектебі” КММАқпарат көзі : https://www.gov.kz/memleket/entities/beskaragay-roo/press/news/details/1072348?lang=kk

Облыс әкімі Нұрлыбек Нәлібаев бастаған делегация сапары Шығыс Қазақстан облысында жалғасты. Делегация құрамында Парламент Сенаты мен Мәжілісінің депутаттары Н.Байқадамов, Р.Рүстемов, М.Ергешбаев, облыстық ардагерлер кеңесінің төрағасы С.Дүйсенбаев, аймақ ардагерлері, зиялы қауым өкілдері, Тұрмағамбет атындағы халық аспаптар, симфония оркестрлері, «Сыр самалы» вокалды-аспапты, «Томирис» би ансамбльдері, хор ұжымы, басқа да өнерпаздар бар.Меймандарды ШҚО әкімі Нұрымбет Сақтағанов қарсы алды. Делегация мүшелері ең әуелі Өскемендегі Халифа Алтай атындағы мешіттің сәулеттік құрылымымен, ішкі жұмысымен, діни ағартушылық қызметімен танысты.Одан кейін Жеңіл атлетика манежіне барды. Олимпиада чемпионы Ольга Рыпакованың аты берілген спорттық нысан 2014 жылдан бері жұмыс істейді. Онда жеңіл атлетиканың түрлі бағытында жаттығатын өлке спортшылары жарыстарда жоғары нәтиже көрсетіп келеді. Делегация назарына ұсынылған Жекпе-жек кешені де - Шығыс Қазақстандағы озық спорт нысандардың бірі.Содан соң қонақтар өз өнімдерін тек өңірге ғана емес, республика аумағына саудалайтын «Шығыс сүт» ЖШС-ға барды.Бүгінде мұнда 80 түрлі өнім шығарылады. Қызылордалықтар корпорацияның тарихымен, жабдықтарымен танысып, жұмыс барысын бақылады. Делегация мүшелері ШҚО әкімдігі ғимаратының алдындағы Абай Құнанбайұлы ескерткішіне тағзым етіп, жуырда ашылған «Алтай» көтерме-тарату орталығына барды. Шығыс өңірдегі ең ірі сауда орталығы ауыл шаруашылығы өнімдерін қайта өңдеуге және бағаның тұрақталуына оң септігін тигізуде.Айта кету керек, өңірлер арасындағы байланысты күшейте түсетін осындай делегациялар сапары Бердібек Сапарбаевтың бастамасымен қолға алынған болатын. Игі дәстүр бұдан кейін де үзілмей, жалғасын таба бермек.Ақпарат көзі : https://www.gov.kz/memleket/entities/kyzylorda/press/news/details/1072358?lang=kk

Маңғыстау облысында «Айбалта-2025» жедел-стратегиялық командалық-штабтық оқу-жаттығуының екінші кезеңі жалғасуда. Қазақстан Республикасы Қарулы күштері Құрлық әскерлерінің бөлімшелері топтасып, операция өтетін бағыттарда топтар құру үшін белгіленген аудандарға марш жасауда.Әскерлерді басқаруды ұйымдастыруда жорық қимылдарын пысықтауға ерекше назар аударылады. Әскери бөлімдер ұзақ қашықтыққа – 3000 шақырымға дейін немесе одан да көп жол жүреді, белгіленген аудандарда орналасып, онда тактикалық іс-қимылдарға дайындалады.Екінші кезеңнің басты мақсаты – құрамалар мен бөлімдердің ұрысқа барынша жақын жағдайда іс-қимыл жасау қабілетін тексеру.«Айбалта – 2025» оқу-жаттығуы әскери қызметшілерді даярлаудың жоғары деңгейін, олардың ұтқырлығын және алыс шептерде елдің қорғаныс қабілетін қамтамасыз ету жөніндегі күрделі міндеттерді орындауға әзірлігін көрсетеді.Ақпарат көзі : https://www.gov.kz/memleket/entities/mod/press/news/details/1072359?lang=kk

Германияның Котбус қаласында батут гимнастикасынан 2025 жылғы Әлем кубогының төртінші кезеңі өтті. Қарағандылық спортшылар Данил Мұсабаев пен Никита Тумаков жарыстың чемпиондары болып танылды.Байрақты бәсекеге 13 елден 57 спортшы қатысып, бес жиынтық медаль сарапқа салынды.Қарағандылық дуэт синхронды секіру сайысында 52,200 ұпай жинап, қарсыластарын артта қалдырды. Екінші орынға әлем чемпиондары – германиялық Кайо Локстерман мен Фабиан Фогель (52,050) жайғасса, үшінші орынды әлем және Еуропа чемпиондары – британдық Зак Перзаманос пен Кори Уолкс (51,530) иеленді.Жеңімпаздарды жаттықтырушы Сергей Вертянкин дайындады.Айта кетерлігі, Мұсабаев пен Тумаков үшін бұл маусым табысты өтіп келеді. Биыл ақпанда олар Әзірбайжанда өткен әлем кубогы кезеңінде күміс жүлде алған болатын.Данил Мұсабаев – Қазақстан спортындағы жұлдыздардың бірі, 2022 жылғы Азия ойындарының күміс жүлдегері әрі 2024 жылы Парижде өткен Олимпиадаға қатысушы. Ал 18 жастағы Никита Тумаков үшін сол күміс – әлемдік деңгейдегі алғашқы медаль еді. Енді ол алтынды да қанжығасына байлады.Бұл туралы Қарағанды облысының дене шынықтыру және спорт басқармасының баспасөз қызметі хабарладыАқпарат көзі : https://www.gov.kz/memleket/entities/karaganda/press/news/details/1072361?lang=kk

Соттың төлем қабілеттілігін қалпына келтіру немесе сот арқылы банкроттық рәсімдерін қолдану туралы іс бойынша ұйғарым шығарған күнінен бастап мынадай салдарлар туындайды:Борышкердің борыштық міндеттемелерінің мерзімі өткен болып саналады.Борышкерден міндеттемелерді орындауды талап етуге тыйым салынады.Тұрақсыздық айыбы (өсімпұл, айыппұл) мен сыйақыны есептеу тоқтатылады.Борышкерге жаңа ақшалай немесе мүліктік міндеттемелерді қабылдауға тыйым салынады (ломбардтардың микрокредиттерінен басқа).Борышкердің мүлкі туралы ақпарат алуға келісімі беріледі.Борышкердің Қазақстан Республикасынан тыс жерлерге шығуына тыйым салынады (кейбір ерекшеліктермен).Банктік шоттардан ақша өндіріп алуға және мүлікке өндіріп алуды қолдануға жол берілмейді.Борышкерге талаптар тек банкроттық рәсімдер шеңберінде ғана қойылуы мүмкін (алименттер мен өмірге/денсаулыққа келтірілген зиянды өтеуден басқа).Атқарушы құжаттар мен мемлекеттік органдардың шешімдерін орындау тоқтатыла тұрады.Кредиторға реттеу және/немесе өндіріп алу шараларын қолдануға тыйым салынады. Ақпарат көзі : https://www.gov.kz/memleket/entities/kgd-zhetysu/press/news/details/1072367?lang=kk

Куала-Лумпур, 2025 жылғы 17-20 қыркүйек - Қазақстан Республикасының Сауда және интеграция министрі Арман Шаққалиев бастаған қазақстандық сауда делегациясы халал индустриясындағы халықаралық көрме — Malaysia International Halal Showcase (MIHAS) көрмесіне қатысты. Бұл — халал өнім өндірушілері мен сатып алушыларын біріктіретін Оңтүстік-Шығыс Азиядағы ең ірі платформа.Қазақстанның ұлттық павильоны көрмедегі ең ірі және көзге түсерлік стендтердің бірі болды. Онда азық-түлік пен агроөнеркәсіптік өнімдерден бастап, өңделген тауарлар мен халал саласындағы қызметтерге дейінгі кең ассортиментін ұсынған 20 отандық экспорттаушы компания өз өнімдерін көрсетті.Көрме аясында «Kazakhstan Networking Session» іскерлік форумы өтті. Онда қазақстандық қатысушылар еліміздің сауда және инвестициялық әлеуеті туралы таныстырылымдар жасады. Форумның қорытынды бөлімінде B2B-сессия ұйымдастырылып, отандық экспорттаушылар Малайзияның жетекші компанияларымен тікелей келіссөздер жүргізді.Форумда сөйлеген сөзінде министр А.Шаққалиев Қазақстанның диалогқа ашық екенін және екі ел экономикасының тұрақты өсуі, сауданы әртараптандыру және металлургия, тамақ өнеркәсібі, машина жасау, химия, көлік-логистика секторы сияқты түрлі салаларда бірлескен жобаларды іске асыру арқылы Малайзиямен өзара тиімді ынтымақтастықты нығайтуға дайын екенін атап өтті. Бұл Мемлекет басшысы Қасым-Жомарт Тоқаевтың 2025 жылғы 8 қыркүйектегі Жолдауында жарияланған жаңа инвестициялық цикл аясында ерекше маңызға ие. Бұл цикл өңдеу өнеркәсібін, жоғары технологияларды және цифрлық экономиканы дамытуға бағытталған.MATRADE төрағасы Ризал Мерикан Наина Мерикан MATRADE пен QazTrade арасындағы Өзара түсіністік туралы меморандумға қол қойылуы — сауда ынтымақтастығын тереңдетудің, нарық туралы ақпарат алмасудың және бизнес қауымдастықтар арасындағы өзара іс-қимылды кеңейтудің берік негізін қалайды деп атап өтті. Бұл — Малайзия мен Қазақстан арасындағы экономикалық қарым-қатынасты жаңа деңгейге көтеруге деген ортақ ниеттің айқын белгісі.Қазақстанның MIHAS-2025 көрмесіне қатысуы Оңтүстік-Шығыс Азия нарығындағы позициясын нығайтудағы маңызды қадам болды. Бұл отандық өнімнің танымалдылығын арттыруға, іскерлік байланыстарды кеңейтуге және экспортты ұлғайту мен инвестиция тартуға мықты негіз қалыптастыруға ықпал етті.Ақпарат көзі : https://www.gov.kz/memleket/entities/mfa-kuala-lumpur/press/news/details/1072402?lang=kk

Минск, 2025 жылғы 19 қыркүйек - Қазақстанның Беларусьтегі Елшілігінде белорус қоғам қайраткерлері мен сарапшыларының қатысуымен Президент Қ.К.Тоқаевтың «Жасанды интеллект дәуіріндегі Қазақстан: өзекті мәселелер және оны түбегейлі цифрлық өзгерістер арқылы шешу» атты Қазақстан халқына Жолдауына арналған дөңгелек үстел өттіКездесуді аша отырып, Қазақстанның Беларусьтегі Елшісі Тимур Жақсылықов Жолдауда Президент Қ.К.Тоқаев цифрлық трансформацияға, инвестициялық жаңғыртуға, жаһандық өзара байланысқа және институционалдық жаңаруға бағытталған өршіл реформалар бағдарламасын ұсынғанын атап өтті. Жолдауда Қазақстанның саяси жүйесін одан әрі дамыту – заң шығарушы органды реформалау, атап айтқанда бір палаталы Парламентке көшу туралы ұсынысты қоса алғанда, бастамалардың ауқымды кешені айтылды. Осылайша, Қазақстан бастамашылық ететін ауқымды қайта құрулар тек Қазақстан үшін ғана емес, сонымен қатар Беларусь Республикасын қоса алғанда, біздің стратегиялық әріптестерімізбен ынтымақтастықты нығайту үшін мүмкіндіктер туғызады.Өз кезегінде, Беларусь Республикасы Ұлттық жиналысының Өкілдер Палатасының депутаты, Заңнама жөніндегі тұрақты комиссияның Төрағасы, Қазақстан Парламентімен ынтымақтастық жөніндегі Беларусь Ұлттық Жиналысының жұмыс тобының жетекшісі Марина Ленчевская бұл Жолдау елдің стратегиялық дамуындағы жаңа кезеңді белгілегенін, тез өзгеретін жаһандық сын-қатерлер жағдайында мықты және тұрақты елді құруға бағытталған нақты шаралар мен іргелі реформаларға бағдар белгіленгенін атап өтті. Қазақстан өз алдына экономиканы неғұрлым жоғары технологиялық, әртараптандырылған және бәсекеге қабілетті экономикаға айналдыру мақсатын қойып отыр. Жолдаудың Қазақстан мен көрші елдер үшін ғана емес, жалпы еуразиялық кеңістік үшін де маңызы зор. Осыған байланысты М.Ленчевская Қазақстан Мәжілісінің цифрландыру саласындағы заңнамалық тәжірибесінің маңыздылығын атап өтіп, Беларусь парламентшілерінің олармен тығыз және нәтижелі өзара іс-қимыл жасайтынын ерекше атап өтті.Дөңгелек үстелге қатысушылар Жолдауда баяндалған бастамалардың Қазақстан мен Беларусьтің инвестиция, екі елдің транзиттік-көліктік әлеуеті, атом энергетикасы, ауыл шаруашылығы, сондай-ақ цифрландыру және жасанды интеллект саласындағы ынтымақтастығын кеңейтуге жаңа мүмкіндіктер ашатынына ерекше назар аударды. Ақпарат көзі : https://www.gov.kz/memleket/entities/mfa-minsk/press/news/details/1072423?lang=kk

      Мемлекеттік қызметтерді цифрландыру және олардың сапасын арттыру мақсатында «Азаматтарға арналған үкімет» мемлекеттік корпорациясы «ЦОН» мобильді қосымшасына «Көлік тарихы» жаңа сервисін енгізді.    Жаңа сервис азаматтарға Қазақстанда тіркелген көлік құралдары туралы толық ақпарат алуға мүмкіндік береді. Мұнда автокөліктің тіркелуі, тыйым салулар мен кепілдіктердің болуы, әкімшілік айыппұлдар, кедендік рәсімдер, утилизациялық алымның төленуі, ерекше белгілер мен берілген техпаспорттар жөніндегі мәліметтер қамтылады.    Бұл мүмкіндік көлікті сатып алу кезінде жасырын мәселелерді алдын ала анықтап, тәуекелдерді азайтуға және автокөліктің заң жүзінде «таза» екеніне көз жеткізуге жағдай жасайды. Сонымен қатар, сервис мәмілелердің ашықтығын арттырып, автонарықтағы алаяқтықтың алдын алуға ықпал етеді.     Ақпарат алу үшін азаматқа көліктің VIN-кодын енгізу жеткілікті. Осылайша, есеп мемлекеттік деректер қорынан алынатын мәліметтердің негізінде нақты уақыт режимінде жасалады.       Маңыздысы, сервис «ЦОН» мобильді қосымшасында (App Store/Google Play) ЖСН мен телефон нөмірі арқылы тіркелгеннен кейін қолжетімді.      Бір тексерістің бағасы – 500 теңге. Сондай-ақ, басқа да тиімді ұсыныстар бар: 10 тексеріс – 4500 теңге, 20 тексеріс – 8000 теңге.      «Көлік тарихы» сервисінің іске қосылуы – азаматтар мен мемлекет арасындағы қарым-қатынасты анағұрлым ыңғайлы, ашық әрі қауіпсіз ететін маңызды қадам.Ақпарат көзі : https://www.gov.kz/memleket/entities/abay-kurchatov/press/news/details/1073879?lang=kk