Қазақстан мен Солтүстік Македония арасындағы екіжақты ынтымақтастықты кеңейту перспективалары саяси консультациялардың 3-ші раунды күн тәртібінің негізгі тақырыбына айналды.Қазақстан Сыртқы істер министрінің орынбасары Арман Исетов пен Солтүстік Македония Сыртқы істер және сыртқы сауда министрінің орынбасары Зоран Димитровски екіжақты қарым-қатынастардың үдемелі дамуын атап өтті, сондай-ақ өңірлік және халықаралық күн тәртібі бойынша пікір алмасты. Дипломаттар Президент Гордана Силяновска-Давкова мен Сыртқы істер және сыртқы сауда министрі Тимчо Муцунскидің 2025 жылы Астанаға жасаған сапарларының қорытындыларына жоғары баға берді.Тараптар екіжақты және көпжақты ынтымақтастықтың басым мәселелерін, оның ішінде саяси, сауда-экономикалық және мәдени-гуманитарлық ынтымақтастықты одан әрі кеңейтуді талқылады.Келіссөздердің маңызды тақырыбы өзара сауданы жандандыру және оның құрылымын ауыл шаруашылығы, энергетика, көлік, туризм, білім, мәдениет сияқты салаларда әртараптандыру болды. Шарттық-құқықтық базаны кеңейту перспективалары, оның ішінде ұлттық паспорт иелері үшін визасыз режим енгізу мүмкіндігі қарастырылды.Солтүстік Македония Сыртқы істер министрлігінің басшылығы Қазақстанды 15 наурызда өткен референдумда жаңа Конституцияның сәтті қабылдануымен құттықтап, реформалар елдің одан әрі дамуына ықпал ететініне сенім білдірді.А. Исетов: «Қазақстан Солтүстік Македония Республикасымен көпқырлы қарым-қатынастарды жан-жақты тереңдетуге ерекше мән береді. Былтыр 30 жылдығы аталып өткен елдер арасындағы дипломатиялық қатынастар орнаған сәттен бастап басым салалардағы өзара іс-қимылдың оң динамикасы сақталуда», – деп атап өтті.Қорытындылай келе, тараптар екіжақты ынтымақтастықтың одан әрі белсенді дамуына ықпал етуге дайын екендіктерін білдіріп, бірлескен бизнес-жобаларды іске асырудың практикалық шараларына және екі ел экономикасының әртүрлі секторларына өзара инвестиция тартуға ерекше назар аударылатын болады.Осыған байланысты дипломаттар биыл сәуір айында Скопьеде Қазақстанның сауда-экономикалық миссиясын ұйымдастыруды және оның аясында жоспарланған сауда-өнеркәсіп палаталары арасында Іскерлік кеңес құруды құптады.Ақпарат көзі : https://www.gov.kz/memleket/entities/mfa/press/news/details/1190543?lang=kk

Алматыда күштік құрылымдар арасында самбодан өткен ашық чемпионаттың жеңімпаздары мен жүлдегерлері марапатталды.Турнирге Қорғаныс министрлігі, Ішкі істер министрлігі, Төтенше жағдайлар министрлігі, Мемлекеттік күзет қызметі, Шекара қызметі, Ұлттық қауіпсіздік комитеті және Ұлттық ұланнан барлығы 156 спортшыдан тұратын 26 команда қатысты.Тартысты өткен бәсекеде балуандар 7 салмақ дәрежесі бойынша белдесті. Оның ішінде армия спортшылары бозкілемде басымдық танытып, бірқатар салмақта жеңіске жетті. Атап айтқанда, 58 келіге дейінгі салмақта – Жасұлан Нариманов (АОСК), 64 келіде – Жандос Бейсенбаев (32039 әскери бөлімі), 71 келіде – Арнұр Қуатай (АОСК), 79 келіде – Санжар Нұрсейіт (АОСК), 88 келіде – Бейбарыс Нұғыман (АОСК), 98 келіде – Жалғас Серіков (АОСК) және 98 келіден жоғары салмақта – Болат Сапар (Ұлттық ұлан) топ жарды.Командалық есепте турнирдің бірінші орнын Қорғаныс министрлігі Армия орталық спорт клубының командасы иеленді. Екінші орынды Ішкі істер министрлігінің командасы еншілесе, үшінші орынды Қорғаныс министрлігінің 32039 әскери бөлімінің спортшылары олжалады.Жоғары деңгейде ұйымдастырылған жарыстар Халықаралық әскери спорт кеңесінің (CISM) бастамасымен өткізілетін әскери қызметшілер арасындағы әлем чемпионатына іріктеудің маңызды кезеңі болғанын айта кету керек. Турнир жеңімпаздары әскери қызметшілер арасында өтетін халықаралық жарыстарда ел намысын қорғайтын болады.Ақпарат көзі : https://www.gov.kz/memleket/entities/mod/press/news/details/1190348?lang=kk

Біріккен Ұлттар Ұйымының бөлінуді бақылау жөніндегі миссиясы (UNDOF) аясында бітімгерлік тапсырмаларды атқарып жүрген біздің әскери қызметшілер қазақ халқының бай мәдени дәстүрлері мен ұлттық құндылықтарын әлемге танытуға да белсенді үлес қосып келеді.Соның бір дәлелі ретінде қазақстандық бітімгерлер Ұлыстың ұлы күніне орай спорттық-көпшілік іс-шаралар ұйымдастырып, қазақ халқының салт-дәстүрлері мен әдет-ғұрыптарын таныстырды. Ұлттық тағамдарға, оның ішінде Наурыз көжеге толы мерекелік дастархан достық пен өзара құрмет рәуішінде өтті.Сондай-ақ, Үндістан, Непал, Уругвай және Фиджи елдерінің бітімгерлік контингенттері қатысқан спорттық жарыстар да тартысты өрбіді. Кедергілер жолағымен эстафета, арқан тарту, қол күресі, кір тасын көтеру сияқты сайыстарда біздің жігіттер жоғары деңгейдегі дене дайындығы мен ұйымшылдығын көрсетіп, бірінші орынға ие болды.UNDOF миссиясының ұлттық контингенттері қатысқан бұл іс-шара бітімгерлер арасындағы достық қарым-қатынасты нығайтуға ықпал етті.Ақпарат көзі : https://www.gov.kz/memleket/entities/mod/press/news/details/1190232?lang=kk

Қостанай ауданында 50-ден аса отбасы жаңа баспанаға ие болды. Пәтер кілттері жаңадан бой көтеріп жатқан «Астана» шағын ауданындағы тұрғын үйлерден табысталды.Аталған шағын аудан бүгінде қарқынды дамып келе жатқан тұрғын үй кешендерінің бірі саналады. Соңғы жылдары мұнда бірнеше көпқабатты тұрғын үйлер салынып, инженерлік және әлеуметтік инфрақұрылым жүйелі түрде дамуда. Табысталған пәтерлер толық әрленген күйде пайдалануға берілді.Жалпы, биыл облыс орталығы мен аудандарда жүздеген мың шаршы метр тұрғын үйді пайдалануға беру жоспарланып отыр. «Астана» шағын ауданы – осы бағыттағы нақты жұмыстардың айқын көрінісі. Мұндағы үйлер заманауи талаптарға сай салынған және тұрғындарға жайлы жағдай жасауға бағытталған.Пәтерлер аудандағы №2, №6, №8 және №10 тұрғын үйлерден берілді. Жаңа баспана көпбалалы отбасыларға, мүгедектігі бар азаматтарға және тұрғын үй жағдайын жақсартуды қажет ететін өзге де санаттағы азаматтарға үлестірілді.Сонымен қатар, шағын ауданда әлеуметтік инфрақұрылымды дамыту жұмыстары да қатар жүргізілуде. Атап айтқанда, жаңа өрт сөндіру бөлімінің құрылысы басталып, қазіргі уақытта іргетасын құю жұмыстары жүргізілуде. Нысанды жыл соңына дейін аяқтау жоспарланған. Бұдан бөлек, кәріз сорғы станциясының құрылысы да қарқынды түрде жүзеге асырылып жатыр.Ақпарат көзі : https://www.gov.kz/memleket/entities/kostanay/press/news/details/1190189?lang=kk

Алматы облысының әкімі Марат Сұлтанғазиев Қытай Халық Республикасына іссапары кезінде «Xinjiang Commercial Logistics (Group) Co., Ltd.» компаниясының басшысы Шэнь Цзиншэнмен кездесті. Аталған компания сауда және логистика саласында зор әлеуетке ие. «Бір белдеу – бір жол» бастамасын жүзеге асыруға үлкен үлес қосып келеді.Кездесу барысында екі жақты сауда-экономикалық байланыс, транспорттық-логистикалық инфрақұрылым, халықаралық тасымалдау, логистиканы цифрландыру және агроөнеркәсіп өнімдерін экспорттау мәселелері талқыланды.Өз сөзінде Марат Елеусізұлы компанияның қарқынды дамуын жоғары бағалайтынын атап өтті. Алматы облысы Қытай мен Орта Азия арасындағы негізгі транспорт жолдарының қиылысында орналасқанын, Шыңжаң ұйғыр автономиялық ауданы үшін стратегиялық маңызды серіктес екеніне тоқталды.«Достық қарым-қатынастың арқасында Алматы облысы мен Қытай елі арасындағы тауар айналымы жылдағы дәстүрге сай жоғары деңгейін сақтап келеді. Соңғы үш жыл ішінде тауар айналымы тұрақты түрде 1 млрд АҚШ долларынан асты. Бүгінгі таңда облыста Қытай капиталының қатысуымен 143 кәсіпорын жұмыс істейді. Біз сауда-экономикалық байланысты әрі қарай нығайтуға үлкен мән береміз», – деген аймақ басшысы екі жақты байланыстың маңызды бағыттарына тоқталды. Айтуынша, ең алдымен транспорттық-логистикалық инфрақұрылымды дамыту маңызды. Бұл бағытта Алматы облысында заманауи логистикалық орталықтар, қойма кешендері мен мультимодальды хабтар құру көзделіп отыр. Сонымен қатар халықаралық тасымалдау саласындағы байланысты арттыруға басымдық берілді. Атап айтқанда, «Батыс Еуропа – Батыс Қытай» бағытындағы маршруттарды дамыту, құрғақ порттар мен шекарадағы өткізу пункттерінің мүмкіндігін тиімді пайдалану арқылы транзиттік әлеуетті арттыру жоспарланған. Одан бөлек, логистиканы цифрландыру, яғни заманауи технологиялар мен платформаларды енгізу арқылы жүк тасымалдауды басқару және электронды сауданы дамыту да негізгі міндеттердің бірі ретінде қарастырылды.Аймақ басшысы Алматы облысы Қазақстандағы ауыл шаруашылығы қарқынды дамып келе жатқан өңірлердің бірі екенін айтты. Экологиялық таза ауыл шаруашылығы өнімдерін Қытай және халықаралық нарыққа шығару үшін компанияның логистикалық және сауда мүмкіндігін пайдалануға мүдделі екенін жеткізді.Іссапар барысында облыс делегациясы «XINJIANG COMMERCIAL LOGISTICS (GROUP) Co., Ltd.» компаниясының төрт еншілес кәсіпорнымен танысты. Оның құрамына жоғары технологиялық жабдықтармен айналысатын «Xinjiang Machinery Research Institute Co., Ltd.,» жеміс-жидек пен орман өнімдерін шығаратын «Xinjiang Fruit Industry Group», сапа стандарттары мен өнеркәсіптік сараптаманы жүргізетін «Xinjiang Standard Testing and Certification Company Limited», сондай-ақ халықаралық құрғақ порт логистикасы бағытында жұмыс істейтін Шыңжаң компаниясы кіреді.Жүздесу нәтижесінде халықаралық тасымалдау саласында Қазақстандағы ірі компаниялардың бірі «Atasu Group» пен Шыңжаң халықаралық құрғақ порт компаниясы құны 270 млн доллар тұратын меморандумға қол қойды. Бұл бірлескен жобаларды іске асыруға, ұзақ мерзімді серіктестікті нығайтуға жол ашады.Ақпарат көзі : https://www.gov.kz/memleket/entities/almobl/press/news/details/1190114?lang=kk

Қонаев қаласында Кешенді даму жоспары аясында М.Әуезов көшесін күрделі жөндеу жұмыстары басталды.Жобаға сәйкес, жол екі жолақтан төрт жолаққа дейін кеңейтіледі. Көшенің жалпы ені 14 метрді, ұзындығы 1,2 шақырымды құрайды. Сонымен қатар, тротуарлар салынып, орындықтар мен қоқыс жәшіктері орнатылады, көше жарығы жаңартылып, «Шошқалы сай» арнасы арқылы өтетін автомобиль көпірі тұрғызылады.«Құрылыс жұмыстарын 9 ай ішінде аяқтау жоспарланып отыр. Бұл көше қаланың негізгі көлік артерияларының біріне айналады. Шомылу маусымында қалада көлік кептелісі жиі байқалады. Көшені кеңейту осы мәселені шешуге мүмкіндік береді», – деді жолаушылар көлігі және автомобиль жолдары бөлімінің басшысы Бағдат Алиев.Оның айтуынша, Кешенді даму жоспары аясында Алматы және Абай көшелерін де күрделі жөндеуден өткізу көзделген. Қазіргі таңда жобалық құжаттар дайын, жуырда мемлекеттік сараптамаға жолданады.Бұдан бөлек, қалада шұңқырларды жамау және ағымдағы жөндеу жүріп жатыр.Айта кетейік, өткен жылы Қарлығаш шағынауданында жолдарды жаңғырту жұмыстары басталған болатын. Жобаны биыл аяқтау жоспарланған._______В Конаеве началась реконструкция улицы М. АуэзоваВ городе Конаев в рамках Комплексного плана развития начаты работы по капитальному ремонту улицы М. Ауэзова.Согласно проекту, дорога будет расширена с двух до четырёх полос. Общая ширина составит 14 метров, протяжённость – 1,2 километра. Также предусмотрено обустройство тротуаров, установка скамеек и урн, модернизация уличного освещения, а также строительство автомобильного моста через канал «Шошқалы сай».«Завершение строительных работ планируется в течение 9 месяцев. Улица станет одной из ключевых транспортных артерий города. В купальный сезон в Конаеве часто возникают заторы, и расширение улицы позволит существенно снизить нагрузку на дорожную сеть», – отметил руководитель отдела пассажирского транспорта и автомобильных дорог Багдат Алиев.По его словам, в рамках Комплексного плана развития также предусмотрена реконструкция улиц Алматы и Абая. Проектная документация уже подготовлена и в ближайшее время будет направлена на государственную экспертизу.Кроме того, в городе ведутся работы по ямочному и текущему ремонту дорог.Напомним, в прошлом году началась модернизация дорожной инфраструктуры в микрорайоне Карлыгаш. Завершение работ запланировано на текущий год.Ақпарат көзі : https://www.gov.kz/memleket/entities/almobl/press/news/details/1190047?lang=kk

Аймақ басшысы Құмар Ақсақалов  «Альтаир» ПК жаңа автобустарымен танысты. Бүгінгі күні облыс орталығында 38 маршруттан тұратын дамыған маршруттық желі жұмыс істейді. Күн сайын желіге 187 автобус шығады, олардың 73%-ы – пайдалану мерзімі 7 жылдан аспайтын көліктер.Соңғы 3 жылда лизинг арқылы 90 жаңа автобус сатып алынды, оның ішінде өткен жылы – 28 автобус.Ағымдағы жылы «Альтаир» ПК тасымалдаушысы Yutong маркалы 12 жаңа автобусты 5 жыл мерзімге 7% мөлшерлемемен Өнеркәсіпті дамыту қоры арқылы лизингке алды.«Қоғамдық көлікті жаңарту және жолаушыларды тасымалдау ыңғайлы әрі қолжетімді қалалық ортаны қалыптастыруда басым бағыт болып қала береді. Соңғы жылдары мемлекеттің қолдауымен жүйелі жаңғырту басталды: тасымалдаушылар лизинг тетігі арқылы жаңартылған, заманауи автобустар алуда. Автобус паркін жаңарту нәтижесінде пайдалану мерзімі 7 жылдан аспайтын қоғамдық көліктердің үлесі 8%-ға артып, 81%-ды құрады», – деді облыс әкімі.Аймақ басшысының сөзінше, мақсат – автобустар санын көбейту емес, бүкіл жүйені сапалы түрде өзгерту: қозғалыс тұрақтылығын қамтамасыз ету, жайлылық деңгейін арттыру, әлеуметтік маңызы бар нысандар мен жаңа шағын аудандарды көлікпен қамту.Сонымен қатар, тасымалдаушылар қозғалыс кестесін сақтау, тәртіпті қамтамасыз ету және қызмет көрсету мәдениетін арттыру бойынша міндеттерін толық орындауы тиіс.Айта кету керек, бүгінгі таңда тұрғындар заманауи цифрлық сервистерге қол жеткізуде – мобильді қосымша арқылы автобустардың қозғалысын нақты уақыт режимінде қадағалап, өз маршруттарын жоспарлап, уақыттарын үнемдей алады.Бұл тек қолайлы сервис емес, сонымен қатар тасымалдаушылар жұмысының ашықтығын қамтамасыз ету болып табылады.Ақпарат көзі : https://www.gov.kz/memleket/entities/kostanay/press/news/details/1190084?lang=kk

Қазақстан Қарулы күштерінде әскери қызметшілерді азық-түлікпен қамтамасыз ету жүйесін кешенді түрде жаңғырту жұмыстары жүргізіліп жатыр. Негізгі жаңалықтардың бірі әскери қызметшілерге бірнеше тағам арасынан өз таңдауын жасауға мүмкіндік беретін «швед үстелі» элементтерін енгізу болып отыр.Жаңа тамақтану моделі әскери қызметшілерге әр күн сайын бірнеше түрлі бірінші және екінші тағамнан өз таңдауын жасауға мүмкіндік береді, бірақ пайлардың бағасы өзгермейді. Мұны тағамды дайындау мен тарату процесін оңтайландыру арқылы іске асыру көзделген.Қазіргі таңда әскерлерді тамақтандыруды 40 мыңнан астам әскери қызметшіні қамтитын 23 қызмет көрсетуші қамтамасыз етеді. Оның ішінде мерзімді қызмет сарбаздары, курсанттар мен кадеттер бар. Конкурс нәтижесінде бәсекелестікті арттырып, қызмет көрсету сапасын жақсартуға мүмкіндік беретін 11 жаңа жеткізуші анықталды.Сонымен бірге, тамақтандыруды ұйымдастыру жүйесі ұзақ мерзімді негізге көшірілмек. Келісімшарттар үш жыл мерзімге жасалып, конкурс рәсімдері толықтай электрондық форматқа ауыстырылады. Бұл процессті ашық етеді, әрі сыбайлас жемқорлық қаупін жойып, жеткізушілердің тұрақтылығын қамтамасыз етеді.Тамақ сапасын арттыру аясында бірқатар практикалық шаралар жүзеге асырылды. Шамамен 300-дей бақылау және көрсетілімдік тағам әзірлеу рәсімі ұйымдастырылып, аспаздарға арналған оқыту шаралары өткізілді.Бұл ретте әскери қызметшілердің пікірін есепке алуға ерекше назар аударылды. Әскери бөлімдерде анонимдік сауалнамалар жүргізіліп, оның нәтижесі бойынша мәзірдің кейбір пункттері қолданыстағы азық-түлік пайларының нормаларын сақтай отырып түзетілді.Қорғаныс министрінің тыл және әскери инфрақұрылым жөніндегі орынбасары генерал-майор Алмаз Жұмакеев атап өткендей, жаңа тамақтану жүйесіне көшу – әскери қызметшілерді қамтамасыз етудің сапасын арттырудағы принциптік қадам болмақ.  – Біз тамақтануды ұйымдастырудың заманауи моделіне көшудеміз. Бұл жерде негізгі назар әскери қызметшінің нақты қажеттілігіне аударылады. «Швед үстелі» элементтерін енгізу сарбазға таңдау жасау мүмкіндігін беру, тағамның әр түрлілігін қамтамасыз ету және тамақ сапасын арттыру жолы болмақ. Бірақ мұның бәрі шығындарды көбейтпей жүзеге асырылады, – деді ол.Қорғаныс министрінің орынбасары сонымен бірге барлық процестердің ашықтығын қамтамасыз ету басты міндет болып қала беретінін атап өтті. Рәсімдердің бәрі мүмкіндігінше электрондық форматқа көшірілетінін және конкурс кезінде адам факторының әсері жойылатынын жеткізді. Бұл – сыбайлас жемқорлық тәуекелдерін азайту және жеткізушілер арасында әділ бәсекелестік ортаны қалыптастыруға бағытталған жүйелік шара. Сол себепті қабылданған шаралар азық-түлікпен қамтамасыз ету жүйесінің сапалы жаңартылуына бағытталған. – Біздің міндетіміз – тамақтануды ұйымдастыруды жаңа деңгейге көтеру. Бұл бір реттік шара емес, аспаздардың біліктілігін арттырудан бастап, жаңа бақылау стандарттарын енгізу және қоғамдық институттармен өзара іс-қимылды ұйымдастыруға дейінгі барлық кезеңді қамтитын кешенді жұмыс, – деп атап өтті генерал-майор Алмаз Жұмакеев.Сонымен қатар, тамақ рационын ұлттық тағамдармен толықтыру және калория мөлшерін арттыру бойынша қосымша жұмыстар жүргізілуде. Бөлімшелерде ұлттық тағамдар күні өткізу тәжірибесі енгізіліп, оған мампар, қуырдақ, палау, ет және бауырсақ сияқты дәстүрлі тағамдар қосылған.Сонымен қатар, далалық жағдайда тамақ сапасын арттыруға және әскери аспаздар институтын дамытуға ерекше мән берілуде. Олар полигондарда азаматтық жеткізушілермен бірлесе отырып жұмыс істейтін болады.  Бүгінде «Аналар жүрегі» сарбаз аналары комитеті қоғамдық бақылаудың маңызды элементі болып табылады. Ұйым өкілдері тамақ сапасын бағалау және жеке құраммен өзара іс-қимыл жасау процестеріне қатыса алады. Қоғамдық ұйым жүйенің ашық жұмыс істеуін қамтамасыз ету мен объективті кері байланыс алудағы қосымша механизм болып саналады.Ақпарат көзі : https://www.gov.kz/memleket/entities/mod/press/news/details/1189555?lang=kk

Баспасөз турының екінші күні есте қаларлықтай мазмұнды болды. Журналистер Әскери-теңіз күштеріндегі жауынгерлік дайындықтың заманауи бағыттарымен танысып, ұшқышсыз ұшу жүйелері операторларының жұмысына қанығып, тіпті сүңгуір жабдығын тәжірибе жүзінде сынап көруге мүмкіндік алды.Ақтау гарнизонының әскери бөлімдерінде БАҚ өкілдеріне ұшқышсыз авиацияның даму жағдайы және дрон операторларын дайындау туралы жан-жақты ақпарат берілді. Қазіргі уақытта Әскери-теңіз күштерінде мамандандырылған екі зертхана және бір оқу сыныбы жұмыс істейді. Онда бейінді мамандармен қатар өзге бөлімшелердің әскери қызметшілері де дайындықтан өтеді.Әскери-теңіз күштері бас қолбасшысы басқармасы бас штабының роботтандырылған жүйелерді қолдану жөніндегі аға офицері подполковник Григорий Селивановтың айтуынша, оқыту әскери қызметшілерге ұшқышсыз жүйелерді басқарудың бастапқы дағдыларын үйретіп, заманауи қару түрлері туралы жалпы түсінік беруге бағытталған.– Бұл бөлімшелердің дайындығын арттырып, жеке құрамның қазіргі заманғы ұрыс жағдайларына бейімделуін қамтамасыз етеді, – деп түсіндірді ол.Сонымен бірге журналистерге «бірінші жақтан көретін» FPV-дрондардың мүмкіндігі көрсетілді. Онда оператор дрон камерасынан түскен бейнені көзілдірік арқылы көріп, дронның ішінде отырғандай сезімде болады. Бұл ұшқышсыз аппаратты жоғары дәлдікпен басқаруға мүмкіндік береді.Одан кейін баспасөз туры оқу-сүңгуірлік орталығында жалғасты. Бөлімше бастығы капитан-лейтенант Руслан Қунақов орталық барлық мамандықтағы сүңгуірлерді, соның ішінде жауынгерлік жүзушілерді, техникалық бейіндегі мамандарды, сондай-ақ штаттағы және штаттан тыс кеме сүңгуірлерін дайындайтынын атап өтті. Журналистерге ашық және жабық циклді аппараттар, сондай-ақ шлангалы сүңгуір құралдары көрсетілді.Республикалық телеарналардың бірінің өкілі олардың функционалдық мүмкіндігін тәжірибе жүзінде тексеріп көрмек боп, арнайы нұсқаушымен бірге сүңгуір жабдығымен суға түсті.Түс ауа баспасөз туры Әскери-теңіз күштерінің теңіз жаяу әскерлерінде жалғасты. Мұнда десанттық-шабуылдау батальонында мерзімді қызметін өтеген әскери қызметшілердің Жауынгерлік тумен қоштасу рәсімі өтті. Салтанатты іс-шараға әскери-теңіз базасының қолбасшылығы, ардагер теңізшілер, қоғамдық ұйымдардың өкілдері және әскери қызметшілердің ата-аналары қатысты.Бөлім басшылығы матростарға әскери борышын адал атқарғаны үшін алғыс айтып, алдағы өмірлеріне сәттілік тіледі. Әрбір әскери қызметшіге алғыс хаттар мен естелік сыйлықтар табысталды.Баспасөз турының соңында БАҚ өкілдері әскери теңізшілердің тұрмыс жағдайларымен және күнделікті қызметімен танысты.Ақпарат көзі : https://www.gov.kz/memleket/entities/mod/press/news/details/1189391?lang=kk

Әскерде кең таралып келе жатқан дайындықтың жаңа тәсілімен республикалық және өңірлік БАҚ өкілдері Маңғыстау облысында өткен баспасөз туры барысында танысты.Сапар бағдарламасы Астанадан Ақтауға Әуе қорғанысы күштерінің С-295 ұшағымен ұшудан басталды.Журналистер алдымен теңіз жаяу әскерлері нысандарын аралап, пейнтбол қалашығындағы екі взводтың шартты қақтығысын тамашалады. Онда әскери қызметшілер тактикалық маневрлерді пысықтап, үйлесімді іс-қимылдарын көрсетті.25744 әскери бөлімінің командирі гвардия подполковнигі Азамат Сүлейменовтің айтуынша, пейнтбол ғимараттарға шабуылдау, аумақты тазарту, қорғаныс пен шабуыл кезіндегі іс-қимылдар сияқты нақты жауынгерлік жағдайларды модельдеуге мүмкіндік береді. Осындай дайындықтың арқасында теңіз жаяу әскерлері дұрыс қозғалып, тиімді позицияларды иеленуге және бөлімше құрамында өзара іс-қимылды үйлестіруге машықтанады.Оқу сыныбында қонақтар жас жауынгерлердің әскери техниканы жүргізу және заманауи қару түрлерін қолдану дағдыларын қалай меңгеріп жатқанын бақылап көрді. Одан соң «Оймаша» полигонында көрсетілімдік атыстар ұйымдастырылды. Әскери қызметшілер мерген мылтықтары мен түрлі гранатаатқыштардан жаттығулар орындап, ұрыс жағдайына барынша жақын ортада тактикалық әрекеттерді пысықтады.Сондай-ақ бригаданың сап алаңында төрт жасар блогер Бек Сәбитті теңіз жаяу әскерлерінің қатарына қабылдау рәсімі өтті. Әскери ант сөздерін салмақты кейіппен әрі мақтанышпен айтқан бүлдіршін жиналғандардың қошеметіне бөленді.Әскери-теңіз базасына жасалған сапар да есте қаларлықтай болды. Мұнда қонақтар бөлімнің инфрақұрылымымен, жауынгерлік кемелердің міндеттерімен және елдің теңіз шебін қорғаудағы Әскери-теңіз күштерінің рөлімен танысты. Әскери теңізшілер экипаж жұмысы, кемені шабуылдау тактикалық көрінісі, заманауи навигация және бақылау жүйелерін көрсетті.Ең әсерлі сәттердің бірі кемемен теңізге шығу болды. Журналистер теңіздің кермек суын ішіп, әскери теңізшілердің бауырластық рухын сезінуге мүмкіндік алды.Сонымен қатар, Әуе қорғанысы күштерінің нысандарын аралау да мазмұнды өтті. БАҚ өкілдері ұшу құрамын даярлау және авиациялық техникаға қызмет көрсету процесімен танысты. Әсіресе заманауи авиация мүмкіндіктерін айқын көрсеткен көрсетілім ерекше әсер қалдырды.Медиа өкілдері құрлықта, теңізде және әуеде қызмет етудің ерекшеліктерімен осылай танысты. Олар жеке құраммен тілдесіп, күнделікті тұрмыс жағдайларын, оның ішінде сарбаздардың тамақтануын да бағалай алды.Осының бәрі кәсібилік, қатаң тәртіп және заманауи технологиялар біртұтас, әрі тиімді қорғаныс жүйесін қалай қалыптастыратынын айқын көрсетті.Ақпарат көзі : https://www.gov.kz/memleket/entities/mod/press/news/details/1189324?lang=kk

Әскерге шақыру науқанының қызған шағында қорғаныс министрінің тәрбие және идеологиялық жұмыс жөніндегі орынбасары генерал-майор Асқар Мұстабеков Астанада шақырылушыларды іріктеу жұмысының қалай ұйымдастырылатынын және болашақ әскери қызметшілерге қандай жағдай жасалғанын тексерді.Астананың жинау пунктінде басты назар цифрлық шешімдерге аударылды. «Smart-военкомат» және «e-Медосмотр» жобалары рәсімдерді жылдамдатуға, адам факторын азайтуға және шақыру процесін барынша ашық етуге мүмкіндік береді.Қорғаныс істері жөніндегі департаменті, әкімдік және ардагерлік ұйымдардың өкілдерімен бірге әскерді жасақтау және барлық қатысушы құрылымдардың өзара іс-қимылы мәселелері талқыланды. Мұндай жұмыс форматы әр шақырылушы үшін нақты ережелермен және ақаусыз жүйемен шақыруды ұйымдастыруға мүмкіндік береді.Әскерге шақырылушыларға ерекше назар аударылды. Ашық әңгіме барысында генерал-майор Асқар Мұстабеков олардың көңіл-күйі, тұрғылықты жайы және қызметке дайындықтары туралы сұрады. Жастарға «Срочник 2.0» бағдарламасының артықшылықтары мен бұл бағдарлама қызметтен кейін елдің жетекші жоғары оқу орындарына түсуге мүмкіндік беретіні айтылды.– Тоғызыншы сыныптан кейін әскери колледжге түскім келді, бірақ мүмкіндік болмады. Университетті бітірген соң әскерге баруға, міндетті қызметті өтеуге нақты шешім қабылдадым. Қазір медициналық тексеруден өтіп, МКҚ қатарына құжат жинап жүрмін, – деді әскерге шақырылушы Альтаир Сәкен.Қорғаныс министрінің орынбасары орналастыру жағдайына, тамақтандырудың ұйымдастырылуына және медициналық комиссия жұмысына баға берді. Тексерістердің сапасы мен кабинеттердің жабдықталуына жіті назар аударылды.– Астананың жинау пунктіндегі барлық процестер қажетті деңгейде ұйымдастырылған, мұнда ашықтық пен шақыру науқанының тиімділігін арттыруға бағытталған заманауи цифрлық шешімдер қолданылады. Шақырылушылар үшін барлық қажетті жағдайлар жасалған, – деп қорытындылады ол.Мемлекеттік органдар мен қоғам өкілдерімен кездесуде генерал-майор Асқар Мұстабеков шақырылушыларға моральдық қолдау көрсетудің рөлін ерекше атап өтті. Ол ардагерлердің қатысуы мен күштік құрылымдармен өзара іс-әрекет жастарға қызметтің бастапқы кезеңінен сенімді өтуге және оның маңызын түсінуге көмектесетінін айтты.Ақпарат көзі : https://www.gov.kz/memleket/entities/mod/press/news/details/1189166?lang=kk

Алматыда Қазақстанның күштік құрылымдары арасындағы қазақ күресінен өткен ашық чемпионаттың жеңімпаздары мен жүлдегерлерін марапаттау рәсімі өтті. Министрлік ұйымдастырған жарыс Армия орталық спорт клубында өткізілді. Жеңімпаздар мен жүлдегерлерді марапаттау рәсіміне Қорғаныс министрі, авиация генерал-лейтенанты Даурен Косанов, Парламент депутаттары, Әскери-қолданбалы спорт түрлері федерациясының президенті Болат Байжан және қазақ күресі федерациясының бірінші президенті Ерғали Мұхадинов қатысты. Турнирге Қорғаныс министрлігі, Ішкі істер министрлігі, Төтенше жағдайлар министрлігі, Мемлекеттік күзет қызметі, Шекара қызметі, Ұлттық қауіпсіздік комитеті және Ұлттық ұланнан барлығы 200 спортшы қатысты.Қазақ күресінен төменде аталған салмақ санаттары бойынша жеңімпаздар анықталды. Олар 60 келіге дейін – Бекжан Тепенов (АОСК), 66 келі – Ернұр Сүлеймен (АОСК), 74 келі – Жұмажан Қожамбеков (АОСК), 100 келі – Аян Байғазов (Десанттық-шабуылдау әскерлері). Екінші орын 55 келіге дейін – Мұхтар Әлиевке (АОСК), 66 келі – Диас Дәулетовке (Десанттық-шабуылдау әскерлері), 82 келі – Жұман Мұхамеджанға (АОСК), 100 келі – Ақылжан Тұрсынбекке (АОСК), 100 келіден жоғары – Әділ Оразбаевқа (АОСК) бұйырды. Үшінші орынды 55 келі салмақта – Арсен Асқарбек («Оңтүстік» ӨңҚ), 60 келі – Дәурен Сүйкенов (Десанттық-шабуылдау әскерлері), 66 келі – Кемелбек Молдаш (Әуе қорғаныс күштері) және Жандос Жанәділ («Шығыс»ӨңҚ), 74 келі – Ислам Тоқтасын (Десанттық-шабуылдау әскерлері), 82 келі – Нұрдәулет Бақтыбайұлы («Оңтүстік» ӨңҚ), 90 келі – Айдар Бескемпір (АОСК) және Айбек Балабек (Десанттық-шабуылдау әскерлері), 100 келі – Ертуған Теренов , («Оңтүстік» ӨңҚ), 100 келіден жоғары – Асылхан Қуанышбеков және Нұртөре Оралов (екеуі де 32039 әскери бөлімінен) олжалады.Жарыс жоғары деңгейде ұйымдастырылды. Қатысушылар барынша шеберліктерін, жеңіске деген ерік-жігерін, спорттық қағидалар мен дәстүрлерге адалдығын көрсетті.Чемпионат қорытындысы бойынша Қазақстанның күштік құрылымдарының құрамасы жасақталады. Алда олар әскери қызметшілер арасында өтетін әлем чемпионаттарында ел намысын қорғайтын болады.Ақпарат көзі : https://www.gov.kz/memleket/entities/mod/press/news/details/1189118?lang=kk

Гвардейск гарнизонында Қорғаныс министрлігінің Бас инспекциясы инженерлік-саперлік полкіне кешенді тексеріс жүргізді.Комиссия полк қызметінің ұйымдастырылуын, қару-жарақ пен инженерлік техниканың жайын, сонымен қоса жеке құрамның кәсіби даярлығын көрді.Инженерлік бөлімшелердің жауынгерлік мүмкіндіктеріне ерекше назар аударылды. Олардың инженерлік барлау жүргізуге, кедергілерді еңсеруге және инженерлік жарақтардан өткелдер жасауға дайындығы бақыланды.Комиссия бұдан басқа, әскери қызметшілердің тактикалық, атыс және дене шынықтыру даярлығының деңгейін, олардың радиациялық, химиялық және биологиялық қауіптілік жағдайында жасайтын іс-әрекетке дайындығын тексерді.Бөлімшелердің күнделікті қызметін ұйымдастыруға, әскери тәртіптің жай-күйіне және әскери ұжымдағы моральдық-психологиялық ахуалға да баға берілді.Инженерлік-саперлік полктің дайындық деңгейін және оның мақсатына сай міндеттерді орындауға қаншалықты дайындығын кешенді бағалау негізінде комиссия бөлімше қызметін одан әрі жетілдіруге қатысты ұсынымдар әзірледі.Ақпарат көзі : https://www.gov.kz/memleket/entities/mod/press/news/details/1187078?lang=kk

Астана, 2026 жылғы 24 наурыз – Қазақстан Республикасының Сыртқы істер министрі Ермек Көшербаев Біріккен Араб Әмірліктерінің Қазақстан Республикасындағы Елшісі Мұхаммед Әл-Арикиді қабылдады.Кездесу барысында тараптар Таяу Шығыстағы ахуалды талқылап, өңірлік қауіпсіздік мәселелері бойынша пікір алмасты. Сондай-ақ сұхбаттасушылар екі ел арасындағы саяси диалогтың жоғары деңгейін, сауда-экономикалық және инвестициялық байланыстардың қарқынды дамуын атап өтті.Е.Көшербаев өңірдегі шиеленістің күшеюіне алаңдаушылық білдіріп, Қазақстанның барлық даулы мәселелерді халықаралық құқық қағидаттары негізінде тек саяси-дипломатиялық жолмен реттеуді қолдайтынын атап өтті.Кездесу қорытындысы бойынша тараптар екіжақты ынтымақтастықты одан әрі дамытуға, сондай-ақ халықаралық және өңірлік ұйымдар аясындағы іс-қимылдарды үйлестіруге бейілділігін растады.Ақпарат көзі : https://www.gov.kz/memleket/entities/mfa/press/news/details/1187102?lang=kk

Ақтау гарнизонында Қорғаныс министрінің бірінші орынбасары - Бас штаб бастығы генерал-лейтенант Қаныш Әбубәкіров Әскери-теңіз күштерінің жауынгерлік, техникалық және жедел әзірлігін жан-жақты тексерді.Әсіресе кезекшілікті ұйымдастыруға, жауынгерлік дайындық пен бөлімшелердің тыныс-тіршілігіне баса назар аударылды. Министрдің бірінші орынбасары теңізшілердің қызметімен және тұрмыс жағдайымен танысып, олардың материалдық-техникалық құралдармен қамтамасыз етілу деңгейін зерделеді.Десанттық-шабуылдау әскерлеріне қарасты десанттық-шабуылдау бригадасына барған кезде генерал-лейтенант Қаныш Әбубәкіров жеке құрамға үлгілі қызметі мен әскери борышқа адалдығы үшін алғыс білдірді.– Сендердей рухы мықты ұлдарды тәрбиелеген ата-аналарыңа шын жүректен алғыс айтамын. Қызмет барысында үлкен тәжірибе жинадыңдар. Алдағы уақытта да елдің сенімді тірегі, нағыз патриот болатындарыңа сенімдімін, – деді ол.«Орал» зымыран-артиллериялық кемесінде генерал-лейтенант Қ. Әбубәкіров қару-жарақ жүйелерінің, навигация және радиотехникалық жабдықтардың дайындығын тексерді. Оқу-жаттығу жиыны барысында экипаждың атыс тапсырмаларын орындау кезіндегі іс-қимылы пысықталып, жеке құрамның үйлесімділігіне баға берді.Сонымен қатар, Бас штаб бастығы «Қайсар» диверсияға қарсы катері мен арнайы бөлімшелердің Каспий теңізінің қазақстандық акваториясы мен порттық аймақтарын су асты және су үсті қатерлерінен қорғауға әзірлігін бақылады.Ол Қазақстанның Әскери-теңіз күштері өңірлік тұрақтылықты сақтауда шешуші рөл атқаратынын, сондықтан оларды жаңғырту қорғаныс ведомствосының басым бағыттарының бірі болып қала беретінін атап өтті.Инспекция қорытындысы бойынша Қорғаныс министрінің бірінші орынбасары генерал-лейтенант Қаныш Әбубәкіров жауынгерлік даярлықты жетілдіруге және бөлімшелердің үйлесімділігін нығайтуға бағытталған нақты тапсырмалар берді.Ақпарат көзі : https://www.gov.kz/memleket/entities/mod/press/news/details/1187161?lang=kk

Жалпыреспубликалық «Наурызнама» онкүндігіне орай елордадағы Қарулы күштердің Ұлттық әскери-патриоттық орталығында мультфильмдер көрсетілімі өтті.Мультипликациялық фильмдер циклінің коммерциялық емес көрсетілімін Шәкен Айманов атындағы «Қазақфильм» киностудиясы жанындағы «Қазақанимация» шығармашылық бірлестігі ұйымдастырды. Бұл іс-шара Президенттің ұлттық анимацияны дамыту және аудиовизуалды өнім нарығын мемлекеттік тілдегі сапалы контентпен толтыру туралы тапсырмасын орындау мақсатында жүзеге асырылуда.Отандық үздік анимациялық туындыларды тамашалауға әскери қызметшілердің, азаматтық персоналдың, Қарулы күштер ардагерлерінің балалары мен немерелері, сондай-ақ шығармашылық взводтың сарбаздары келді.Шараны Ұлттық әскери-патриоттық орталығы бастығының орынбасары подполковник Ерболат Жүсіпов ашып, аталған жобаның мәдени мұраны, рухани құндылықтарды сақтау мен мемлекеттік тілді дамытудағы айтарлықтай маңызына тоқталып өтті.«Қазақфильм» киностудиясы жанындағы «Қазақанимация» шығармашылық бірлестігінің продюсері Айнұр Исаева атап өткендей, Ұлттық әскери-патриоттық орталықтың қолдауымен ұйымдастырылған мұндай көрсетілімдер енді Абай, Гвардейск, Сарыөзек және Алматы гарнизондарында да өтетін болады.– Көрермендер назарына түрлі аудиторияның талғамына сай жанрлар ұсынылады. Оның ішінде толық метражды анимациялық ертегілерден бастап қысқа метражды авторлық киноларға дейін бар. Бұдан басқа жас көрермендер 2025 жылдың эксклюзивті премьераларын және «Қазақфильм» мен Ұлттық киноны қолдау мемлекеттік орталығының алтын қорынан алынған анимациялық ленталарды да тамашалай алады, – деді ол.Шара Мәдениет және ақпарат министрлігі мен Ұлттық киноны қолдау мемлекеттік орталығының көмегімен өтіп жатқанын естеріңізге сала кетейік. Жобаның серіктестері – Қарулы күштердің Ұлттық әскери-патриоттық орталығы, Астана қаласындағы «Арсенал» және Қарағандыдағы «Сарыжайлау» кинотеатрлары.Ақпарат көзі : https://www.gov.kz/memleket/entities/mod/press/news/details/1187168?lang=kk

Астана, 2026 жылғы 25 наурыз – Қазақстан Республикасының Сыртқы істер министрі Ермек Көшербаев Біріккен Араб Әмірліктері Премьер-министрінің орынбасары – Сыртқы істер министрі шейх Абдалла бен Заид Әл Наһаянмен телефон арқылы сөйлесті.Сұхбат барысында тараптар Таяу Шығыстағы қазіргі ахуалды талқылап, өңірдегі шиеленіс төңірегінде  пікір алмасты.Е.Көшербаев Қазақстан Республикасының Президенті Қасым-Жомарт Тоқаев бұрын білдірген ұстанымды растады және өңірдегі эскалацияның жалғасуына, оның ішінде БАӘ аумағына жасалған соққыларға байланысты алаңдаушылық танытты. Қазақстан бейтарап мемлекеттерді әскери іс-қимылдарға тартуға қарсы екені, сондай-ақ өңір елдерінің егемендігі мен аумақтық тұтастығын бұзуға жол берілмейтіні жеткізілді.Ахуалды халықаралық құқық қағидаттары негізінде жедел түрде деэскалациялау және дағдарысты саяси-дипломатиялық жолмен реттеу қажеттігіне назар аударылды.Екіжақты ынтымақтастық мәселелерін талқылау барысында Е.Көшербаев БАӘ-нің өңірдегі Қазақстанның негізгі серіктестерінің бірі екенін және елдерімізді дәстүрлі бауырластық қатынастары байланыстыратынын атап өтті.Қазақстан СІМ басшысы БАӘ аумағында болған ҚР азаматтарын эвакуациялауға көрсеткен жәрдемі үшін әріптесіне алғыс білдірді. Азаматтардың қауіпсіздігін қамтамасыз ету және оларды отанына қайтару ел үшін басым міндет болғанын жеткізді.Сыртқы саяси ведомстволардың басшылары халықаралық аренада екі мемлекеттің жоғары деңгейдегі саяси диалогы мен өзара қолдауына да назар аударды.Өз кезегінде шейх Абдалла бен Заид Әл Наһаян көрсетілген қолдау үшін қазақстандық тарапқа ризашылығын білдіріп, өңірлік тұрақтылық пен қауіпсіздікті қамтамасыз етуге бағытталған халықаралық күш-жігердің маңыздылығын атап өтті.Сұхбат қорытындысы бойынша тараптар екіжақты ынтымақтастықты одан әрі нығайтуға, сондай-ақ халықаралық және өңірлік ұйымдар аясында іс-қимылдарды үйлестіруді жалғастыруға дайын екендерін растады.Ақпарат көзі : https://www.gov.kz/memleket/entities/mfa/press/news/details/1187183?lang=kk

Қазақстан Республикасы Сыртқы істер министрінің орынбасары Ермұхамбет Қоныспаев Қазақстандағы Молдова Республикасының Елшісі Штефан Горданы дипломатиялық миссиясының аяқталуына байланысты қабылдады.Кездесу барысында тараптар екіжақты ынтымақтастықтың оң серпінмен дамып келе жатқанын атап өтіп, қазақ-молдова өзара байланыстарын одан әрі нығайтуға деген ұмтылыстарын растады.Министрдің орынбасары Елшіге сындарлы ынтымақтастығы және Қазақстан мен Молдова арасындағы достық қатынастарды нығайтуға қосқан жеке үлесі үшін алғыс білдіріп, алдағы кәсіби қызметіне табыс тіледі.Ақпарат көзі : https://www.gov.kz/memleket/entities/mfa/press/news/details/1187190?lang=kk

Қостанай облысында Наурыз мейрамы кең көлемде және жоғары деңгейде атап өтілді. Биыл өңір мерекені ұйымдастыруда заманауи әрі креативті тәсілді көрсетіп, бай мәдени мұраны озық цифрлық технологиялармен үйлестірді.Мерекенің басты ерекшелігі — геймификация элементтерін енгізу және заманауи IT-шешімдерді пайдалану болды. Жалпы облыс бойынша ұлттық дәстүрлерді интерактивті форматта насихаттауға бағытталған 50-ден астам цифрлық жоба жүзеге асырылды. Тұрғындар мен қонақтар мерекелік іс-шараларды тамашалап қана қоймай, цифрлық платформалар мен ойын элементтері арқылы белсенді қатысу мүмкіндігіне ие болды.Іс-шаралардың ауқымы кең болды: 150 мыңнан астам адам офлайн форматта қатысса, 600 мыңнан астам қолданушы онлайн кеңістікте мерекеге қосылды.Мерекелік атмосфераны облыстың барлық қала мен аудандарында тігілген 340 тақырыптық киіз үй айшықтай түсті. Сонымен қатар, 170 LED-экранда мерекелік бағдарламалар, мәдени жобалар және интерактивті контенттер көрсетілді.Кең ауқымды мәдени бағдарлама аясында 150 өнерпаз өнер көрсетті. Олардың қатарында «Қыран» тобы, Қайрат Түнтеков және «1465» этнотобы бар. Өнер иелерінің өнер көрсетуі ұлттық мәдениет пен заманауи форматтардың үйлесімді сабақтастығын айқын көрсетті.Қостанай облысында өткен Наурыз мейрамы ұлттық дәстүрлердің цифрлық кеңістікке сәтті бейімделе алатынын, өз болмысын сақтай отырып, жаңа форматта кең аудиторияға ұсынылуының жарқын үлгісіне айналды.Ақпарат көзі : https://www.gov.kz/memleket/entities/kostanay/press/news/details/1187222?lang=kk

Ұлттық әскери-патриоттық орталықта отандық қорғаныс-өнеркәсіп кешені кәсіпорындарының басшылығымен өткен жұмыс кездесуіне Қорғаныс министрінің орынбасары генерал-майор Шайх-Хасан Жазықбаев төрағалық етті.Жиында отандық қорғаныс-өнеркәсіп кешені мен мемлекеттік қорғаныс тапсырысының қазіргі жағдайы талқыланып, оларды қолдау шаралары аясындағы ведомствоаралық өзара іс-қимылдың басым бағыттары айқындалды.Кездесуде тақырыпқ қатысты бірқатар баяндамалар жасалды.Жиынды ашқан генерал-майор Шайх-Хасан Жазықбаев отандық қорғаныс-өнеркәсіп кешенінің айтарлықтай жетістіктерге қол жеткізгенін атап өтті.– Еліміздің қорғаныс-өнеркәсіп кешені – мемлекеттің әскери қауіпсіздігін қамтамасыз ететін және экономиканың түрлі салаларының дамуына серпін беретін стратегиялық маңызды сала. Оның құрамына қару-жарақ, әскери және арнайы техника өндіретін кәсіпорындар, сондай-ақ ғылыми-зерттеу институттары кіреді.Бүгінде заманауи бронетехника үлгілерін жасау, сервистік қызмет көрсету мен жөндеу базасын дамыту, халықаралық ынтымақтастықты кеңейту және цифрландыру бағытында ілгерілеу бар, – деді Қорғаныс министрінің орынбасары.Сонымен бірге Қорғаныс министрлігі әскери-техникалық ынтымақтастық аясындағы алдын ала келісімдерге сүйене отырып, отандық кәсіпорындардың жүктемесін арттыру шараларын іске асырып жатыр. Оның ішінде әртүрлі типтегі ұшқышсыз ұшу аппараттарын, радиоэлектрондық күрес құралдарын локализациялау бойынша ұсыныстар енгізілуде.Кездесу қорытындысы бойынша Қорғаныс министрінің орынбасары мемлекеттік қорғаныс тапсырысының шарттарын, оларды уақтылы әрі сапалы орындау жөніндегі кешенді шараларға ерекше назар аударды.Ақпарат көзі : https://www.gov.kz/memleket/entities/mod/press/news/details/1187225?lang=kk