Ақтауда мерзімді әскери қызметті аяқтаған 500-ден астам теңіз жаяу әскерінің әскери қызметшісін салтанатты түрде шығарып салу рәсімі өтті.Әскери оркестрдің үнімен кеудесін мақтанышпен тіктеп, борышын абыроймен атқарған сарбаздар бөлімнің әскери абыройы мен даңқының символы – Жауынгерлік тумен қоштасты.Іс-шараға Ақтау гарнизоны әскери бөлімдерінің командирлері, Қарулы күштердің ардагерлері, «Аналар жүрегі» сарбаздар аналары комитетінің төрағасы, әскери қызметшілердің туыстары мен жақындары қатысты.Бригада басшылығы жауынгерлерге лайықты қызметі үшін алғысын білдіріп, олардың әрқайсысы Қазақстанның теңіз жаяу әскерлерінің бір бөлігі болып қала беретінін атап өтіп, алдағы өмірде сәттілік тіледі.Бір жыл ішінде сарбаздар заманауи әскери техниканы қалай қолдануды үйреніп, қару-жарақтың барлық түрінен ату шеберліктерін шыңдады, сонымен қатар әртүрлі оқу-жаттығуларға қатысты.Олар үшін «Айбалта-2025» жедел-тактикалық командалық-штабтық оқу-жаттығуына қатысу ерекше маңызды болды, онда әскери қызметшілер бөлімшелер құрамындағы даярлық пен өзара іс-қимылдың деңгейі жоғары екенін көрсетті.Одан өзге теңіз жаяу әскерлері елордада өткен Ұлы Жеңістің 80 жылдығына арналған парадта олар «Батыс» өңірлік қолбасшылығының атын абыроймен таныстырып, мінсіз саптық машық мен тәртіпті көрсетті.Петропавл қаласынан келген қатардағы жауынгер Равиль Қасенов өз әсерімен бөлісті:– Бүгін біз үйге қайтамыз. Бір жыл тез өте шықты. Теңіз жаяу әскерінде қызмет еткенімді мақтан тұтамын. Жолақ жейде мен қара беретті құрметпен киемін. Осылай қалыптасуымыз үшін көп еңбек еткен командирлерімізге алғысымды білдіргім келеді.Қызмет қорытындысы бойынша ерекше көзге түскен әскери қызметшілер басшылық атынан грамоталармен, алғыс хаттармен және бағалы сыйлықтармен марапатталды. Ақпарат көзі : https://www.gov.kz/memleket/entities/mod/press/news/details/1085114?lang=kk

Қаржы пирамидасы — бұл алаяқтықтың бір түрі, бұл жағдайда жаңа қосылған адамдар ақша салады, ал олардың салған ақшалары бұрын қосылған қатысушыларға төленеді. Негізгі идея – жоғары кіріс уәде етіп, жаңа қатысушыларды тарту болып табылады. Адамдар мен ақша ағыны тоқтағанда ақ пирамида құлайды.Қаржы  пирамидаларының түрі:Көпдеңгейлі пирамидалар — мұндай құрылымды құру және оның жұмыс істеуінің негізгі тетігі мыналардан тұрады: әрбір жаңадан келген қатысушы бірінші жарна енгізеді, ол пирамида мүшелерінің иерархиясы бойынша жоғары тұрған мүшелер арасында бөлінеді.  Өз кезегінде, жаңадан келген адам ақша табу үшін бірнеше адамды шақыруға тиіс, жаңадан шақырылғандардың жарналары да осыған ұқсас тәсілмен өзара бөлінеді. Бұл жаңа мүшелер ағыны тоқтағанға дейін жалғаса береді.Желілік маркетинг қағидаты бойынша құрылған пирамидалар – схеманы іске асырудың негізгі тетігі компанияның тауарларды/қызметтерді сатуы болып табылады. Бұл жағдайда тауар жай бүркеніш болып табылады және көбінесе оның құны да жоғары болады. Әдетте бұл сағат, косметика, тұрмыстық химия және т.б. сияқты өнімдер.Мессенджерлерде шақыру жіберу қағидаты бойынша схеманы қолданатын пирамидалар – олар тек WhatApp, Telegram және т.б. сияқты мессенджерлерде онлайн-топтарда жұмыс істейді. Мұндай кезде топ құрылады, оған кіру үшін ақшалай жарна салу және қосымша 2 ден 4 адамға дейін шақыру қажет, олар үшін 200%-дан 400%-ға дейін сыйақы беріледі. Шақырылатын қатысушылар саны шектелмейді. Эксклюзивті клубқа қатысу (мүше болу) – мұнда қатысушыларға круиздер, жолдамалар, саяхаттар, бизнесті құру және ілгерілету, маркетинг, инвестициялар, копирайтинг, сондай-ақ хиромантия, астрономия, психикалық тепе-теңдікті жақсарту, психология, нумерология, рәміздер, магия және т.б. бойынша оқыту ұсынылады. Міндетті талаптардың бірі – бағдарламаларға байланысты (1-3 жылдан 5-10 жылға дейін) белгілі бір мерзімге басқа адамдарды тарту немесе кіру жарнасын салу. Қаржы пирамидаларының белгілері: БАҚ-та, интернет-ресурстарда, оның ішінде әлеуметтік желілерде жоғары табысты, пассивті кірісті уәде еткен белсенді жарнама;Компания клиенттерден жылжымалы немесе жылжымайтын мүлікті нарықтық бағасынан жоғары бағамен сатып алуды (үш айдан басталатын бөліп төлеуге не ең төмен пайыздық мөлшерлемемен) ұсынады;Белгілі бір сомаға тауарды/көрсетілетін қызметті сатып алу және қосымша бірнеше адамды тарту міндетті талап болып табылады (бұл ретте бөлшек сауда болмайды);Мыналарды қоса алғанда, бірақ олармен шектелмей:банктік қызметті, оның ішінде депозиттер тарту, кредит беру, аударымдар мен төлемдерді жүзеге асыру және т.б.;бағалы қағаздар нарығындағы қызметті;сақтандыру нарығындағы қызметті;микрокредиттер беру жөніндегі қызметті;коллекторлық қызметті жүзеге асыруға ҚР Қаржы нарығын реттеу және дамыту агенттігі (бұдан әрі – ҚНРДА) лицензиясының/есептік тіркеуінің болмауы. Ақшаны енгізу жеке тұлғаның карточкалық шотына немесе төлем ұйымдарының терминалдары арқылы электрондық әмиянға қолма-қол ақшамен жүзеге асырылады;Компанияның, жеке тұлғаның немесе жария жобаның нақты анықтамасы жоқ (бірегей қызмет туралы мәлімдеме) Алаяқтар жұмыстарын жоғары табыс әкелетін салада жасаймыз деп айтады: мұнай өндіру, алытн өндіру, құрылыс, микроқаржы саласы, Forex нарығы, бағалы қағаздар нарығы.Нарықтық көрсеткіштен едәуір жоғары жоғары кірістілік туралы ашық айту;Кепілдік берілген кірістіліктер (банктік салымдарды қоспағанда, қаржы нарығында тыйым салынған);Атауында, символикасында, жарнама хабарландыруларында танымал брендтердің брендбук элементтерін, сөздер мен сөз тіркестерін қолдану.Ақшаңызды салмас бұрын, кімге және қандай мақсатқа беріп жатқаныңыз туралы ойланыңыз. Егер өз қаражатыңызды сенім білдіріп салғыңыз келетін ұйымда жоғарыда аталған белгілердің барлығын немесе бірнешеуін анықтасаңыз, кезекті қаржы пирамидасына тартып жатқан жоқ па дегенді ойланғаныңыз дұрыс.Қаржы (инвестициялық) пирамида құрғаны үшін Қазақстан Республикасының Қылмыстық кодексінің 217-бабында үш жылға дейінге мерзімге қылмыстық жауапкершілік көзделген.Жарнама дайындағаны, таратқаны және орналастырғаны үшін қаржы (инвестициялық) пирамидасының қызметіне ҚР ӘҚтК-нің 150-бабы бойынша әкімшілік жаза және 150-600 АЕК аралығындағы мөлшерде айыппұл салынуы мүмкін.Қазақстан Республикасы Қаржы нарығын реттеу және дамыту агенттігінің ресми интернет-ресурсында ҚНРДА-ға қызметіне қатысты Қазақстан Республикасының азаматтарынан шығымдар келіп түскен жосықсыз қызмет белгілеріне ие ұйымдардың тізімі жарияланған.Сондай-ақ, Қазақстан Республикасы Қаржылық мониторинг агенттігінің (бұдан әрі – ҚМА) ресми интернет-ресурсында қаржы пирамидасы ретіндегі қызметпен айналысады деген күдікке ие, олар бойынша сот үкімдері шығып қойған ұйымдардың кеңейтілген тізімі жарияланған.Сізге қаржы пирамидасына қатысуға ұсыныс жасалатын болса, тұрғылықты орныңыз бойынша дереу құқық қорғау органдарына, Қазақстан Республикасының Ішкі істер министрлігі мен ҚМА-ға жүгіну қажет.Сондай-ақ, қаржы нарығында заңсыз қызметті жүзеге асыруға күдік туындаған жағдайда Cіз ҚНРДА-ға жүгіне аласыз. Қаржы реттеушісіне «FingramotaOnline» мобильді қосымшасының» «Қаржы пирамидалары және қаржылық алаяқтық» бөлімі арқылы байланыса аласыз. Сондай-ақ, қаржылық алаяқтық пен қаржы пирамидаларының заманауи түрлері туралы қаржылық сауаттылықты арттыру бойынша www.fingramota.kz интернет-порталындағы «Абайлаңыз, алаяқтар» бөлімінен оқып танысуға болады.Ақпарат көзі : https://www.gov.kz/memleket/entities/aktobe-irgiz/press/news/details/1085165?lang=kk

Қала күні қарсаңында Тәуелсіздіктің 25 жылдығы даңғылының екінші кезеңі аяқталып, Әбілқайыр хан көшесінен Саламатов көшесіне дейін жаңадан салынған автомобиль жолының салтанатты ашылу рәсімі өтті. Оған ҚР Парламент сенатының депутаттары,зиялы қауым өкілдері мен ел ағалары, қала тұрғындары қатысты.Аймақ басшысы Нұрлыбек Нәлібаев жол инфрақұрылымын дамытуда атқарылған жұмыстарды атап өтіп, жиналған қауымды жаңа жолдың ашылуымен құттықтады.«Қызылорда - мегаполис болмағанымен, қарқынды қалалық инфрақұрылым мен өмір сүру сапасын арттыру, экономиканы әртараптандыру бағытында нақты қадам жасаған қала. Халық саны жыл сайын өсуде, аймақ тұрғындарының шамамен 50%-ға жуығы облыс орталығында тұрады. Біз жұртшылықтың жайлы өмір сүруіне бағытталған, қауіпсіз, таза, қолжетімді әрі зияткер қала құру бағытында нақты қадамдар жасадық.Облыс орталығының негізгі көшелері –Шиелі ауданынан кіреберіс жол, Яссауи, Жаппасбай батыр магистральді көшелері төрт жолақты болып кеңейтілді. Бүгін міне, Тәуелсіздікке 25 жыл даңғылының екінші кезеңі аяқталып, ел игілігіне табысталуда.Қорқыт ата әуежайының жаңа терминалынан бастап Гагарин көпіріне дейінгі 27,3 шақырым жол төрт жолақты болып салынды.Жол бойындағы Сыздық, Жаңадария, Шіркейлі каналдары үстіндегі 3 көпір қайта жаңғыртудан өтіп, төрт жолақты болып кеңейтілді.Бұл мақсатқа бюджеттен 23 млрд. 962 млн. теңге бөлінді.Жолдарды дамыту қалада өмір сүруді әлдеқайда ыңғайлы әрі қауіпсіз етіп, көліктердің кедергісіз қозғалысына оң септігін тигізеді.Құрылыс жұмыстарын сапалы әрі мерзімінде жүргізген «УАД» жауапкершілігі шектеулі серіктестігіне қызылордалықтардың атынан шынайы алғысымды білдіремін.Әрдайым бірлігіміз бекем, ынтымағымыз ырысты болсын! Жаңа жол берекенің бастауына айналсын! Еліміз еңселі, Тәуелсіздігіміз мәңгілік болсын!»,- деді Нұрлыбек Машбекұлы.Рәсімде жаңа жолды сапалы етіп салуға үлес қосқан мердігер мекеме қызметкерлері Құрмет грамотасымен және облыс әкімінің Алғыс хатымен марапатталды. Қоғам қайраткері Ибрагим Әбибуллаев ақ батасын берді.Тәуелсіздік даңғылының ашылу рәсімінде авто және велошеру ұйымдастырылды. Шеруде кейінгі жылдары заманауи техникамен қамтамасыз етілген салалардың көліктері көрсетілді. Атап айтқанда, соңғы үш жылда облыстың медицина ұйымдары мен жедел жәрдем станцияларына 270 жаңа санитарлық көлік, білім саласына 30 оқушы автобусы, қоғамдық көлік паркіне 300 жаңа автобус және 100 экотакси, төтенше жағдайлар қызметіне 31 өрт сөндіру техникасы, коммуналдық кәсіпорындарға 169 арнайы техника, ветеринария саласына 98 көлік берілген.Ақпарат көзі : https://www.gov.kz/memleket/entities/kyzylorda/press/news/details/1085167?lang=kk

Дүниежүзілік EXPO 2025 Osaka көрмесі өз жұмысын аяқтады. Көрмеге қатысушы мемлекеттер үшін басты оқиға болып саналатын EXPO Awards марапаттау рәсімі кеше, 12 қазанда өтті. Аталған рәсім барысында Қазақстан павильоны Theme Development («Көрме тақырыбын ашу») негізгі номинациясы бойынша «С» санатындағы шағын павильондар арасында бірінші орынды иеленді. Бұл санатқа 90-нан астам ел кірді. Қазақстан экспозициясы көрменің басты тақырыбын мазмұнды және ерекше түрде ашқаны үшін жоғары бағаға ие болды. Көрме басталған күннен бастап Қазақстан павильоны жапондықтар мен шетелдік туристер арасында үлкен қызығушылық тудырды. Павильон еліміздің мәдениеті, дәстүрі мен тарихы, инвестициялық, экономикалық және инновациялық дамуы, сондай-ақ цифрландыру, технология және тұрақты даму салаларындағы мазмұнды әрі тартымды экспозициясымен ерекшеленді. Осы орайда халықаралық және жапон бұқаралық ақпарат құралдары павильон туралы бірқатар мақалалар жариялады. Көрме барысында Қазақстан павильоны ынтымақтастық пен өзара тәжірибе алмасудың маңызды алаңына айналып, еліміздің жаһандық қоғамдастықтағы ашық әрі сенімді серіктес ретіндегі мәртебесін нығайтты. Павильон аясында тоғыз іскерлік және мәдени іс-шара ұйымдастырылды. 10 тамызда қазақтың ұлы ойшылы Абай Құнанбайұлының 180 жылдығына орай өткізілген Қазақстанның Ұлттық күні атаулы оқиғалардың бірі болды. Бұл күні Жапониядағы EXPO National Day Hall алаңында Қазақстан Республикасының туы көтерілді. Мерекелік шараға делегацияны Сауда және интеграция министрі Арман Шаққалиев бастап барды. Ұлттық күнді тойлау аясында Дүниежүзілік EXPO қонақтары үшін 3000-ға жуық көрермен жиналған үлкен мәдени бағдарлама ұйымдастырылды.Қазақстан павильоны «Өмірді біріктіру» кластерінде орналасып, шамамен 1,5 миллион адамды қабылдады. Олардың қатарында ресми делегациялар, халықаралық ұйымдар, дипломатиялық миссиялар, бизнес, медиа және шығармашылық қауым өкілдері болды. Павильонға Халықаралық көрмелер бюросының (BIE) Бас хатшысы Димитри Керкентзес ресми сапармен келіп, оның ұйымдастырылу деңгейін, мазмұнын және экспозициялық шешімін жоғары бағалады. Дүниежүзілік EXPO 2025 Osaka көрмесі 2025 жылғы 13 сәуір мен 13 қазан аралығында өтті. Іс-шараға 160 мемлекет пен 9 халықаралық ұйым қатысты, ал жалпы келушілер саны 28 миллион адамнан асты. Алты ай бойы Юмешима аралы «Біздің өміріміз үшін болашақ қоғамын құру» тақырыбындағы жаһандық диалогтың басты алаңына айналды.Ақпарат көзі : https://www.gov.kz/memleket/entities/mti/press/news/details/1085171?lang=kk

      Абай облысы бойынша «Азаматтарға арналған үкімет» мемлекеттік корпорациясының филиалы Курчатов қаласының тұрғындарын бірқатар бөлімшелердің  жұмыс уақытының өзгергені туралы хабардар етеді. 2025 жылғы 13 қазаннан  бастап АХАТ бөлімі, Зейнетақы төлемдері жөніндегі мемлекеттік орталық және Жер кадастры бөлімі келесі кесте бойынша жұмыс істейтін болады: дүйсенбіден жұмаға дейін сағат 08:00-ден 17:30-ға дейін.Түскі үзіліс уақыты өзгеріссіз қалады – 13:00-тен 14:30-ға дейін.Сонымен қатар, Абай бойынша облысындағы ХҚКО-лар бұрынғы тәртіппен қызмет көрсетеді:* дүйсенбіден жұмаға дейін – 09:00-ден 18:00-ге дейін;* кезекші ХҚКО жұмыс күндері – 09:00-ден 20:00-ге дейін, ал сенбі күні – 09:00-ден 13:00-ге дейін қызмет көрсетеді.Абай облысы бойынша Мемлекеттік корпорация филиалы тұрғындардың түсіністік танытқаны үшін алғыс білдіреді және бөлімшелерге баруды жаңа жұмыс кестесін ескере отырып жоспарлауды сұрайды. Ақпарат көзі : https://www.gov.kz/memleket/entities/abay-kurchatov/press/news/details/1085200?lang=kk

Облыс әкімі Нұрлыбек Нәлібаев қайта жаңғыртудан өткен Қорқыт ата саябағында өткен «Таза Қазақстан» экологиялық акциясы аясындағы тал егу шарасына қатысты. Оған ҚР Парламенті Сенатының депутаттары, зиялы қауым өкілдері, ел ағалары және қала тұрғындары келді.«Қорқыт ата» кітабының 1300 жылдығына арнап орнатылған ескерткіш маңындағы саябақ 2002 жылы ашылған. Бүгінде толық жаңарып, тұрғындардың демалысына, серуендеуіне, балалардың ойнауына қолайлы орынға айналды.Абаттандыру жұмыстары 38 828 шаршы метр аумақты қамтыды. Оның 1 826 шаршы метрі – құрылыс алаңы, 13 430 шаршы метріне брусчатка төселген, ал 23 572 шаршы метрі көгалдандырылған.Саябақ аумағында заманауи субұрқақтар, спорт және балалар ойын алаңдары, серуен жолдары мен жарықшамдар орнатылған. Сондай-ақ келушілердің жайлы демалысы үшін орындықтар, шағын сәулеттік нысандар қойылып, көгалдандыру және суару жүйесі жүргізілген.«Таза Қазақстан» жалпыұлттық экологиялық акциясы аясында өңірдің барлық елді мекенінде жаппай сенбіліктер мен тал егу шаралары ұйымдастырылды.Шара барысында облыс аумағындағы скверлер мен аллеялар, парктер мен көшелер, теміржол бойы, су айдындары және республикалық, облыстық маңызы бар автомобиль жолдарының бойы тазартылды.Жалпы экологиялық акцияға 20 мыңға жуық адам қатысып, зиялы қауым, еріктілер, экобелсенділер, үкіметтік емес ұйымдар өкілдері, кәсіпорындар мен мекеме қызметкерлері белсенділік танытты. Нәтижесінде облыс аумағына 13 мың түп тал егілді.Ақпарат көзі : https://www.gov.kz/memleket/entities/kyzylorda/press/news/details/1085204?lang=kk

      Төтенше жағдайлар салдарынан зардап шеккен халықты дер кезінде орналастыру және оларға көмек көрсету мақсатында Курчатов қаласы аумағында (немесе елді мекен атауы көрсетіледі) зардап шеккен азаматтарды қабылдау пункттері айқындалды.Әрбір қабылдау пункті халықты нақты және қауіпсіз эвакуациялауды ұйымдастыру мақсатында қаланың белгілі бір көшелері мен шағын аудандарына бекітілген.Қабылдау пункттерінің негізгі міндеттері:эвакуацияланған азаматтарды тіркеу және есепке алу;уақытша орналастыруды қамтамасыз ету;алғашқы медициналық және психологиялық көмек көрсету;ыстық тамақ, ауыз су және алғашқы қажетті заттармен қамтамасыз ету;туыстар мен тиісті қызметтерді хабардар етуді ұйымдастыру.Ақпарат көзі : https://www.gov.kz/memleket/entities/abay-kurchatov/press/news/details/1085214?lang=kk

Абу Даби, 2025 жылғы 9 қазан – Қазақстанның Біріккен Араб Әмірліктеріндегі Елшісі Рауан Жұмабек Мұсылман ақсақалдар кеңесінің Бас хатшысы Мұхаммед Әбделсаламмен кездесті.Сұхбат барысында тараптар екіжақты ынтымақтастық мәселелерін қарастырып, алдағы уақытқа жоспарланған іс-шаралар жөнінде пікір алмасты.Қазақстан Елшісі М.Әбделсаламға Әлемдік және дәстүрлі діндер лидерлері Съезінің жұмысына тұрақты түрде белсенді қатысып жүргені үшін ризашылығын білдірді.Өз кезегінде Бас хатшы Қазақстанның дінаралық және өркениетаралық диалогты ілгерілетудегі бастамаларының маңыздылығын атап өтті. Сондай-ақ жуырда Астанада өткен Съезде көтерілген идеялар Мұсылман ақсақалдар кеңесінің ұстанымдарымен сәйкес келетінін, толеранттылық және бейбіт қатар өмір сүру жолында Қазақстанмен бірлескен іс-қимылдарды жүзеге асыруға дайын екенін айтты.Кездесу соңында тараптар өзара ынтымақтастықты одан әрі кеңейтуге уағдаласты.Ақпарат көзі : https://www.gov.kz/memleket/entities/mfa-abudhabi/press/news/details/1085232?lang=kk

Облыс әкімі Нұрлыбек Нәлібаевтың төрағалығымен Мемлекет басшысының Жолдауындағы негізгі бағыттардың бірі агроэкономика және аграрлық ғылымды дамыту мәселелері талқыланған жиын өтті. Оған мәслихат депутаттары, басқармалар мен аумақтық департамент басшылары, ғалымдар, шаруашылық құрылымдарының өкілдері, онлайн байланыс арқылы Қызылорда қаласы мен барлық аудан әкімдері қатысты.Облыс әкімі сала басшыларына Жолдаудан туындайтын міндеттерді сапалы әрі уақытылы жүзеге асыру бойынша нақты тапсырмалар жүктеді.«Президентіміз Жолдауында: «Қолданбалы ауыл шаруашылығы ғылымын жедел өркендетпейінше, агроөнеркәсіп кешенін ұзақ уақыт бойы қарқынды дамыту мүмкін емес» деген болатын. Әсіресе, аграрлық саланы цифрландыруға, ауыл шаруашылығы ғылымын жетілдіруге негізгі басымдық беруді ерекше атап өтіп, бес міндетті айқындады. Бірінші кезекте ауыл шаруашылығы саласына жаңа тәсілдерді, заманауи технологиялар мен цифрлық шешімдерді, жасанды интеллектіні енгізу, екінші, өнімділік пен қайта өңдеуді арттыру, үшінші, технологиялық жаңғырту, төртінші, ғылым мен зерттеуді дамыту, бесінші, қаржылай қолдау көрсету.Аграрлық салаға цифрлық технологияларды кеңінен қолдану, терең өңдеу бағытындағы жұмыс баса мән беруді қажет етеді. Ғылымды дамытып, цифрлық технологияларды қолданудың тиімділігін шаруашылық құрылымдарына түсіндіру керек.Саланы жетілдіруге арналған ғылыми жобаларды қолдап, оларды іске асыруды сүйемелдеп, цифрландырудағы тың бастамаларды өндіріске енгізуді қарастырыңыздар. Ыбырай Жақаев атындағы Қазақ күріш ғылыми зерттеу институты білім беру орталығының жұмысын жандандыру, ғылыммен айналысатын білікті мамандар даярлау өте маңызды. Оқу орындарын бітірген түлектерді жұмысқа тарту керек.Президентіміздің сенімін ақтау – баршамыздың ортақ парызымыз. Сондықтан осы бағытта атқаратын жұмыстарымыз жүйелі, нәтижелі болсын.Бүгінгі берілген барлық тапсырманың орындалуы тұрақты бақылауымызда болады. Жүктелген міндеттерді жауапкершілікпен бірлесе атқаруға шақырамын», – деді Нұрлыбек Машбекұлы.Мемлекет тарапынан жыл сайын бөлінген қаржының арқасында өткен 8 айдың қорытындысымен ауыл шаруашылығында 66 млрд. 900 млн. теңгенің өнімі өндіріліп, былтырғы сәйкес кезеңмен салыстырғанда 2,5 пайыз, тамақ өнімдерін өңдеу көлемі 16 пайыз артқан.Жиында облыстық ауыл шаруашылығы және жер қатынастары басқармасының басшысы Талғат Дүйсебаев күріш көлемін кезең-кезеңімен оңтайландырып, суды аз қажет ететін дақылдарды жерсіндіру туралы хабарлама жасады.Ы.Жақаев атындағы Қазақ күріш ғылыми-зерттеу институтының директоры, облыстық қоғамдық кеңес төрағасы Сұлтанбек Тәуіпбаев аграрлық ғылымды жедел өркендету арқылы агроөнеркәсіп кешенін қарқынды дамыту мүмкіндіктеріне тоқталды. «Ер-Әлі» шаруа қожалығының төрағасы Әліби Бекжанов цифрландыру тәсілдері арқылы өндіріс тиімділігін арттыру, Қорқыт Ата атындағы Қызылорда университетінің ректоры Бейбіткүл Кәрімова білікті кадр дайындап, озық ғылыми жобаларды өндіріске енгізу, сала ардагері, мемлекет және қоғам қайраткері Бекмырза Еламанов су тапшылығы жағдайында қолданылған тәжірибелер жайында пікір білдірді.Ақпарат көзі : https://www.gov.kz/memleket/entities/kyzylorda/press/news/details/1084948?lang=kk

Шақырамыз! Шынайы өнер кешіне куә болыңыз! 16 қазан күні, сағат 18:30-да  Бикен Римова атындағы драма театрындаСахна төрінде – Қазақстанның халық әртісі – Рамазан Стамғазы,  Қазақстанның Еңбек сіңірген қайраткері – Нұржан Жанпейісов  “Сал-серілер ізімен” атты әсерлі концертМұқан Төлебаев атындағы халық аспаптары оркестрінің сүйемелдеуімен өтеді.Билет бағасы: 1-8 қатар 3000 тенге, 10-16 қатар 2000 тенгеБайланыс телефондар: 8-747-787-88-81, 8-701-567-48-07Өнерді сүйетін қауым, бұл кештен қапы қалмаңыз!Келіңіз, көріңіз, рухани азық алыңыз!Ақпарат көзі : https://www.gov.kz/memleket/entities/zhetysu-archive/press/news/details/1084958?lang=kk

Ұлан-Батыр, 2025 жылғы 10 қазан – Қазақстан Республикасының Моңғолиядағы Елшісі Алмас Сейтақынов Моңғолияның Ұлттық сауда-өнеркәсіп палатасы президенті Батарджав Лхагважавпен кездесті.Келіссөздер барысында тараптар Қазақстан мен Моңғолия арасындағы сауда-экономикалық ынтымақтастықтың ағымдағы жағдайы мен даму перспективаларын талқылады. Сұхбат барысында іскер топтар арасындағы өзара іс-қимылды тереңдету мәселелеріне ерекше назар аударылды.Елші Моңғолияның Қазақстан үшін маңызды экономикалық әріптес екенін атап өтіп, өзара сауданы кеңейту, инвестиция тарту және көлік-логистика, ауыл шаруашылығы, тау-кен өнеркәсібі және туризм салаларындағы бірлескен жобаларды іске асырудың маңыздылығын атап өтті.Өз кезегінде Б.Лхагважав моңғол тарапының іскер байланыстарды жандандыруға, кәсіпкерлер арасындағы тікелей өзара іс-қимыл тетіктерін дамытуға, сондай-ақ екі ел компанияларының нарықтарға шығуы үшін қолайлы жағдай жасауға мүдделі екенін білдірді.Тараптар Қазақстан мен Моңғолияның бизнес қауымдастықтары арасында тұрақты кездесулер мен өзара сапарларды жалғастыруға, сондай-ақ екі елдің сауда-өнеркәсіп палаталарының қолдауымен ынтымақтастықты нығайтуға уағдаласты.Ақпарат көзі : https://www.gov.kz/memleket/entities/mfa-ulaanbaatar/press/news/details/1084971?lang=kk

Облыс әкімі Нұрлыбек Нәлібаевтың қатысуымен Парламент Сенаты Қаржы және бюджет комитетінің көшпелі отырысы өтіп, онда жаңартылған заңнама талаптарына сәйкес бюджет процесін іске асыру мәселелері талқыланды.Отырысқа Парламент Сенаты Қаржы және бюджет комитетінің төрағасы Сұлтанбек Мәкежанов, Ұлттық экономика министрлігі бюджет саясаты департаментінің директоры Гульором Муллабаева, Қаржы министрлігі бюджеттік жоспарлау департаментінің директоры Сейілхан Исмағұлов қатысты.Аймақ басшысы Президент тапсырмасында нақтыланған бюджет қаражатын ұтымды жоспарлау мен тиімді игеру міндетін атап өтті.«Мемлекет басшымыз Қасым-Жомарт Кемелұлы бюджет қаржысын тиімді жоспарлау, мақсатқа сай бөлу мен игеру жөнінде міндеттер жүктегені белгілі. Облыс бюджетінен әлеуметтік салаға 2023-2025 жылдары бөлінген қаражаттың мақсатты жұмсалуына жүргізілген зерделеу, бақылау шараларының нәтижесінде 100 млрд. теңгеге жуық қаржы үнемделді. Оның ішінде білім саласынан 58 млрд. 600 млн. теңге, «Арт спорт» бағдарламасынан 13 млрд. 100 млн. теңге, әлеуметтік қорғау саласынан 8 млрд. 200 млн. теңге үнемделіп, бюджет қазынасында қалды.Жаңадан жүзеге асырылатын инвестициялық жобаларға құжаттама әзірлеуге демеушілер есебінен 7 млрд. теңге бөлінді. Барлық 7 ауданда «Руханият орталықтарын» салып, бұған дейін әр жерде орналасқан мекемелерді бір орталыққа біріктірдік. Бұл ғимараттарды ұстап тұру шығындарын қысқартуға жол ашты. Мектептерге қосымша ғимараттар салу арқылы үш ауысымдық оқу мәселесін түбегейлі шешіп, жаңа мектеп салуға қажеттіліктің алдын алдық. Осылайша, бюджетке түсетін салмақ азайтылып, 13 млрд. 100 млн. теңге оңтайландырылды», – деді Нұрлыбек Машбекұлы.Мамандардың айтуынша, жаңа үшжылдық кезеңге арналған жалпы сипаттағы трансферттер Үкіметтің алдына қойылған негізгі міндеттерді шешуге, оның ішінде өңірлердің қаржылық дербестігін кеңейтуге, халық үшін әлеуметтік игіліктер мен мемлекеттік қызметтердің қолжетімділігін теңестіруге, сондай-ақ өңірлер арасындағы инфрақұрылымдық теңсіздіктерді азайтуға ықпал етеді.Жиынға қатысушылар бюджет процесін іске асыру барысында туындайтын өзекті мәселелерді, сондай-ақ елімізде қолданыстағы трансферттік тетіктерді талқылап, туындаған сұрақтарға жауап алды.Ақпарат көзі : https://www.gov.kz/memleket/entities/kyzylorda/press/news/details/1084984?lang=kk

Шымкент қаласы әкімінің орынбасары А. Сәбитов Иран Ислам Республикасының Қазақстан Республикасындағы Төтенше және Өкілетті Елшісі Джоукар Али Акбар мырзамен ресми кездесу өткізді.Кездесу барысында тараптар екіжақты әріптестікті кеңейту, сауда-экономикалық байланыстарды дамыту, сондай-ақ инвестиция, мәдени-гуманитарлық ынтымақтастық бағыттары бойынша өзара іс-қимыл перспективаларын талқылады. Сонымен қатар, шетелдік делегациямен бірге Шымкент қаласындағы Иран өндірушілерінің ІІІ көрмесінің ашылу салтанатына қатысты.Көрмеде ауыл шаруашылығы тауарын өндірушілердің табиғи өнімдері, ұлттық тағамдар, қолөнер бұйымдары мен экологиялық таза азық-түлік түрлері ұсынылды. Бұл — тек сауда-саттық емес, мәдени алмасудың, өзара түсіністік пен сенімнің нақты көрінісі. Шара шеңберінде Қазақстан мен Иран арасындағы достық байланыстарды одан әрі нығайтуға, сондай-ақ өңірдің халықаралық деңгейдегі инвестициялық тартымдылығын арттыруға бағытталған бірқатар мәселелер сөз болды. Бұл кездесу мен көрме – елдеріміз арасындағы ынтымақтастықты тереңдетуге бағытталған нақты қадамдардың бірі.Ақпарат көзі : https://www.gov.kz/memleket/entities/shymkent-turizm/press/news/details/1085052?lang=kk

Өнер орталығында «Қорқыт және Ұлы дала сазы» халықаралық фольклорлық-музыкалық өнер фестивалінің гала-концерті өтті. Фестиваль Қызылорда облысы әкімдігінің қолдауымен, халықаралық «Түркі мәдениеті және мұрасы» қорымен бірлесіп ұйымдастырылған.Оған «Түркі мәдениеті және мұрасы» қорының президенті Ақтоты Райымқұлова, Түркия, Әзербайжан, Қырғызстан, Өзбекстан және отандық белгілі ғалымдар, зерттеушілер, мәдениет пен өнер майталмандары, зиялы қауым өкілдері, қоғам қайраткерлері қатысты.Аймақ басшысы Нұрлыбек Нәлібаев фестивальдің түркі халықтарының мәдени байланысын нығайтудағы және ұлттық өнерді дәріптеудегі маңызын атап өтіп, бауырлас елдерден келген қонақтарға алғысын білдірді.«Президентіміз Қасым-Жомарт Кемелұлы күні кеше Әзербайжан Республикасының Габала қаласында өткен Түркі мемлекеттері ұйымының 12-ші саммитінде: «Түбі бір түркі жұртының тарихы тамырлас, халықтарымызға ортақ сан ғасырлық шежіреміз бар деп үнемі айтып жатырмыз. Мұның бәрі – берекелі бірлігіміз бен мәңгілік ынтымағымыздың алтын арқауы», – деген болатын.Бауырлас халықтардың рухын көтеру, фольклорлық-музыкалық өнерін дәріптеу, өзара мәдени байланысын нығайтуда фестивальдің маңызы зор.Қорқыт баба мұраларының Біріккен Ұлттар Ұйымы жанындағы ЮНЕСКО-ның ғаламдық материалдық емес мұралар тізіміне енгізілуі – жылдар бойы бірлесіп атқарған жұмысымыздың нәтижелі жемісі.Күллі түркі дүниесінің назарын өзіне аударған, кең даланы жырға бөлеп, нұрға толтырған бұл дәстүрлі өнер мерекесі – ұлттық рухымыздың, түркі жұртының мәңгілік мұрасы мен мәдени сабақтастығының жарқын көрінісі. Түркі халықтарының бірлігі мен рухани тұтастығы нығая берсін! Тәуелсіз еліміздің тұғыры биік, егемендігі еңселі болғай!», – деді Нұрлыбек Машбекұлы.«Түркі мәдениеті және мұрасы» қорының президенті Ақтоты Райымқұлова түбі бір түркі туыстардың басын қосқан халықаралық іс-шараны жоғары деңгейде ұйымдастырған Қызылорда облысының басшылығына алғысын айтты. Концертте әйгілі жыраулар мен жыршылардың қайталанбас мақамдарын бүгінге жеткізген, ұлттық өнеріміздің шынайы насихатшыларына айналған Сыр сүлейлерінің ізбасарлары Елмұра Жаңаберген, Ұлжан Байбосынова, Ақмарал Ноғайбаева, Шолпан Бимбетова, Майра Сәрсенбаева, Серік Жақсығұлов, Күнсұлу Түрікпен, Бисембек Төлеубай және Жетісу жыр мектебінің түлегі Нұржан Жанпейісов, Арқа мектебінің өкілі Біржан Есжанов, Салтанат Ерсұлтан жырдан шашу шашты.Ресей Федерациясының Алтай Республикасынан келген Урмат Ынтаев, Айдын Орсулов табиғатқа, ата-баба рухына және ерлік жырларына негізделген көшпелі халықтың әуені өз болмысын жоғалтпағанын тағы бір көрсетті. Көмеймен айту өнері мен топшур, қобыз сияқты көне аспаптардың үні Алтай халықтарында әлі күнге дейін сақталған. Бұл әуендер таудың желін, өзен суының сылдырын және малшы өмірінің тынысын бейнелейді.Әзербайжаннан келген «Карабах» мұғамшылар тобы ұлттық нақыштағы күрделі әуен өрнектерін орындап, көрерменді ерекше әсерге бөледі. Қырғыз елінің қомызшылар ансамблі мен Самат Кочербаев «Ақақ» шығармасын орындап, түркі халықтарының көне саз мұрасын жаңғыртты. Өзбекстанның «Шашмақом» ансамблі мен бишілер тобы ұлттық өнердің үздік үлгісін сахнаға шығарды. Алматы қаласынан келген «Арқайым» нео-этно фольклорлық ансамблі «Тенгир Азун» шығармасын орындап, ескі сарынды заманауи тәсілмен үйлестірді.Көне түріктердің көмеймен ән салу дәстүрі Тыва халықтарында жақсы сақталған. Олар көмеймен ән салуды «хоомей» деп атайды. Ықылым заманның мұра өнерін сақтап қалған халықтың «Эш» фольклорлық дуэті де бүгінгі фестивальдің құрметті қонағы болды. Түркия Республикасынан келген Синан Барыш, Камбер Нардың өнеріне көрермен ерекше қошемет көрсетті.Халықаралық фестиваль бүгінгі түркі мәдениеті мен музыкасы ортақ тарих пен рухани тамырдан нәр алғанын, туыс халықтардың әндері мен әуендері бір-бірімен үндесіп, бауырлас елдердің бірлігін күшейтетінін тағы бір дәлелдеді.Ақпарат көзі : https://www.gov.kz/memleket/entities/kyzylorda/press/news/details/1085079?lang=kk

Қазақстан–Қытай шекарасындағы «Нұр жолы» өткізу бекетінде Қытай Халық Республикасына бағытталған автокөлік құралдарының уақытша жиналуы байқалуда. Қалыптасқан жағдайдың негізгі себебі – отандық тасымалдаушылардың шекарадан өтуге қажетті шетелдік рұқсат бланкілерінің болмауы. Аталған бланкілер екі елдің салалық көлік ведомстволары арасында өзара айырбасталады.Қалыптасқан жағдайды реттеу мақсатында Қазақстан Республикасы Қаржы министрлігінің Мемлекеттік кірістер комитеті Көлік министрлігімен бірлесіп белсенді жұмыс жүргізуде. Қазіргі уақытта Қазақстан мен Қытайдың салалық ведомстволары қазақстандық тарапты қосымша шетелдік рұқсат бланкілерімен қамтамасыз ету мәселесі бойынша келіссөздер жүргізіп жатырСонымен қатар, ҚР ҚМ МКК Қытай Халық Республикасының Бас кеден басқармасымен келіссөздер өткізді. Нәтижесінде қытай тарапы қабылдайтын автокөлік құралдарының санын уақытша арттыру жөнінде уағдаластыққа қол жеткізілді. Сондай-ақ, қытай өткізу бекеттерінде өткізу қабілетін арттыру және кедендік ресімдеу рәсімдерін жеделдету жөніндегі қосымша шаралар келісілді.Қалыптасқан жағдайды және тасымалдаушылардың қаржылық шығындарын азайту қажеттілігін ескере отырып, ҚР ҚМ МКК «CarGoRuqsat» электрондық кезек жүйесінің әкімшісі – «АЭО» АҚ-мен бірлесіп белсенді броньдардың қолданылу мерзімін 72 сағатқа ұзарту туралы шешім қабылдады. Бұл тасымалдаушыларға жүйенің жаңартылған жұмыс қағидаларына сәйкес бронь үшін төленген 1 АЕК сомасын және 20 АЕК көлеміндегі кепілдік жарнаны сақтауға, сондай-ақ шетелдік рұқсаттардың берілуі қайта басталғаннан кейін өткізу тұрақтылығын қамтамасыз етуге мүмкіндік береді.Бұдан бөлек, Қытай Халық Республикасының Көлік министрлігінен «С» санатындағы жаңа рұқсат бланкілері партиясы түскеннен кейін, өтініш беріп үлгермеген отандық тасымалдаушылар белгіленген тәртіппен бұрын брондалған кезек арқылы бланкілерді рәсімдеп, алуға мүмкіндік алады.ҚР ҚМ МКК жағдайдың тұрақты бақылауда екенін хабарлайды. Қабылданып жатқан барлық шаралар автокөлік құралдарының өткізу режимін жедел қалпына келтіруге және көлік ағынының үздіксіз қозғалысын қамтамасыз етуге бағытталған.Осыған байланысты ҚР ҚМ МКК тасымалдаушыларға түсіністік танытқандары үшін алғыс білдіреді және жаңа партия шетелдік рұқсат бланкілері келіп түскенге дейін өткізу бекеттеріне барудан уақытша бас тартуды сұрайды.Ақпарат көзі : https://www.gov.kz/memleket/entities/kgd/press/news/details/1084776?lang=kk

Ақтау қаласының ең ірі сауда және ойын-сауық орталықтарының бірінде Маңғыстау облысындағы қорғаныс істері жөніндегі департаментінің бастамасымен әскери қызметке қабылдау бойынша бос орындар жәрмеңкесі өтті.Іс-шараның мақсаты – қала тұрғындарын әскери бөлімдердегі бос лауазымдар жөнінде хабардар ету, оған қоса Қазақстан Республикасының Қарулы күштеріндегі мерзімді және келісімшарттық әскери қызметті насихаттау болды.Жәрмеңкеге келген ақтаулықтар гарнизон бөлімдеріндегі бос орындармен танысып, кадр қызметінің өкілдеріне өз сұрақтарын қойып, әскери қызметке өту тәртібі жайлы кеңес алды.– Іс-шара барысында қатысушылар келісімшарт негізіндегі әскери қызметтің талаптары мен артықшылықтары жайында толық ақпарат алып, мерзімді қызметтің ерекшеліктерімен танысты. Бұдан өзге жергілікті әскери басқару органдары мен кадр бөлімдерінің өкілдеріне сұрақтарын қойды, – деді Маңғыстау облысы қорғаныс істері жөніндегі департаментінің бастығы полковник Руслан Балтеміров.Жәрмеңке қорытындысы бойынша шамамен жүз адам әскери қызмет туралы толық мәлімет алды. Оның ішінде 20 адам келісімшарт бойынша, ал тағы 15 азамат мерзімді әскери қызмет өткеруге ниет білдірді.Одан бөлек, әскердегі қызметтің шарттары мен артықшылықтары көрсетілген үш жүзге жуық ақпараттық парақша таратылды.Ұйымдастырушылардың айтуынша, мұндай жәрмеңкелер желтоқсан айына дейін әр апта сайын өткізіліп тұрады. Келесі кездесулер қаладағы түрлі сауда орталықтарында және Амфитеатр алаңында өтеді.Ақпарат көзі : https://www.gov.kz/memleket/entities/mod/press/news/details/1084789?lang=kk

Алматы облысында бір өркешті мың түйеден құралған керуен ресми түрде Гиннестің рекордтар кітабына енді. Бір шақырым қашықтықты жүріп өткен керуен 20 қыркүйекте Іле ауданы, Күрті ауылдық округінің Ақши ауылында ұйымдастырылған болатын.Әлемдік жетістік сертификатын Гиннестің рекордтар кітабының өкілі Ричард-Уильям Стэннинг табыстады. Ол қазақстандық жобаның ерекшелігіне ерекше тоқталды: «Бұл – айрықша жағдай. Өзге елдерде мұндай керуендер әртүрлі адамдардың жануарларынан құралады – бірінде төрт түйе, екіншісінде екі түйе болады. Ал Қазақстанда мың түйенің бәрі бір адамның иелігінде. Бұл – рекордты шынымен де ерекше әрі бірегей етеді. Қазақстан мені таңғалдырды, енді бұл елге турист ретінде де келгім келеді», – деді ол.Алматы облысының әкімі Марат Сұлтанғазиев те бұл оқиғаның ел үшін маңызын атап өтті: «Рекордтың ресми түрде мойындалуы – біздің ұлттық рухымыз бен мәдени мұрамызға көрсетілген үлкен құрмет. Мың түйеден құралған керуен халықты біріктіріп, қазақ дәстүрінің символына айналды», – деді аймақ басшысы.Идея авторы әрі керуен иесі, «Даулет-Бекет» ЖШС директоры Сыдық Даулетов жобаны дайындауға жарты жыл уақыт кеткенін айтты: «Түйе – еркіндікке үйренген жануар. Мың түйені бірге жинау оңай болған жоқ. Бірақ мақсат пен сенім болса, мүмкін емес дүние жоқ. Алдағы уақытта шұбат фестивалін өткізуді жоспарлап отырмыз. Халыққа осындай дәстүрімізді жаңғыртатын шаралар қажет», – деді ол.Ақпарат көзі : https://www.gov.kz/memleket/entities/almobl/press/news/details/1084793?lang=kk

Радиоэлектроника және байланыс әскери-инженерлік институты Алматы қаласы Әуезов ауданының оқуды аяқтаушы түлектері мен демалыс орталықтарының тәрбиеленушілеріне ашық есік күнін өткізді.Жас қонақтар институттың оқу-материалдық базасымен, курсанттардың оқу және тұрмыс жағдайларымен танысып, оқу орнына түсу ережесі мен әскери білімнің артықшылықтары жайында жан-жақты мәлімет алды.Оқушылар кафедралар мен оқу аудиторияларын, тренажер кешендерін аралап, жоғары технологиялық әскерлердің болашақ офицерлері қалай даярланатынын өз көздерімен көрді.Оларды, әсіресе, ұшқышсыз басқарылатын аппараттармен жұмыс істеу қатты қызықтырды. Балалар ұшуларды қызыға бақылап, заманауи технологиялардың әскери салада қалай қолданылатынын білді.Институттың курсанттары оқушыларға өздерінің оқу тәжірибелерін көрсетіп, таңдаған мамандықтары, ғылыми және спорттық жетістіктері, казармадағы өмірі туралы айтып берді. Тікелей әңгіме барысында оқушылар әскери формадағы қатаңдықтың артында еңбек, тәртіп және Отанға қызмет етуге дайындық жатқанын түсінді.Экскурсия барысында әскери-спорттық эстафета ұйымдастырылып, оның қорытындысы бойынша қатысушыларға алғыс хаттар мен сыйлықтар табыс етілді.Шара жылы және символдық атмосферада аяқталды. Қатысушылар нағыз сарбаз ботқасынан дәм татты.– Әскери институттың атмосферасы ерекше әсер қалдырды. Мұнда маңызды әрі сұранысқа ие мамандықтарға үйретеді. Осында оқу қызықты әрі абыройлы екеніне сенімдімін. Экскурсиядан кейін дәл осы оқу орнына түскім келді, – деді Ғ. Мүсірепов атындағы №86 мектеп-гимназиясының оқушысы Жалғас Әбдікәрім.Осындай кездесулер әскери жоғары оқу орнында игі дәстүрге айналған. Тұрақты түрде өтетін ашық есік күндері мен үгіт-насихат шаралары болашақ талапкерлерге әскери оқу орнының өмірімен танысып, сұрақтарына жауап алып, мамандықты саналы түрде таңдауға мүмкіндік береді.Ақпарат көзі : https://www.gov.kz/memleket/entities/mod/press/news/details/1084800?lang=kk

Алматы облысының Іле ауданында Тереңкара өзенінің арнасына құрылыс және тұрмыстық қалдықтар төгілу фактілері анықталды. Бұл жағдай жергілікті билік назарынан тыс қалмады. Ащыбұлақ ауылдық округі әкімдігі заң бұзушылықты жою және жерді қалпына келтіру (рекультивациялау) бойынша материалдарды сотқа жолдауға дайындық жүргізіп жатыр.Мәселе алғаш рет 2024 жылы Ащыбұлақ ауылдық округінің әкімі Бахтияр Қасымбектің бастамасымен көтерілген болатын. Ол өзен арнасына жасалған заңсыз әрекеттерге байланысты бірнеше рет бақылаушы және экологиялық мекемелерге ресми хаттар жолдаған. Әкімнің табандылығының арқасында жағдайға бірқатар мемлекеттік органдар назар аударып, экологиялық заң бұзушылықтарға ресми баға берілді.Тексеру барысында Түймебаев ауылындағы жер телімінің иесі аумақты өз бетінше тегістеп, өзеннің табиғи арнасын ішінара жауып тастағаны анықталды. Мұндай әрекеттер өзеннің тереңдігі мен ағысын өзгертеді, ал бұл өз кезегінде экожүйеге және жергілікті тұрғындардың қауіпсіздігіне қауіп төндіреді.Ащыбұлақ округі әкімдігінің мәліметінше, жер иесі экологиялық нормаларды бұзғаны үшін бірнеше рет әкімшілік жауапкершілікке тартылған. 2025 жылы Алматы облысы бойынша экология департаментінің тексерісі нәтижесінде оған 275 мың теңге көлемінде айыппұл салынып, заң бұзушылықтарды жою туралы нұсқама берілген. Алайда бұл талап әлі күнге дейін орындалмаған.Соған қарамастан, прокуратура ауыл әкімі Бахтияр Қасымбекке де әкімшілік айыппұл салған. Қадағалау органы оны уақтылы әрекет етпеді деп таныған. Әкімнің өзі бұл шешіммен келіспей, сотқа шағымдануға ниетті. Себебі дәл оның бастамасымен бұл мәселе алғаш көтеріліп, облыстық деңгейге жеткізілген.«Табиғи аумақтардың ластану фактілері назардан тыс қалмайды. Өзен арнасын қалпына келтіру және тәртіп орнату жұмыстары жалғасып жатыр. Әкімдік тарапынан бақылау күшейтіледі», – делінген Ащыбұлақ ауылдық округі әкімінің аппаратында.Қазіргі таңда барлық құжаттар Балқаш-Алакөл бассейндік инспекциясына, Экология департаментіне және Алматы облысы бойынша жер ресурстарын басқару департаментіне жолданған.Тереңкара өзені – Кіші Алматы өзенінің сол жақ саласы, ол Қапшағай су қоймасына құяды. Ащыбұлақ ауылдық округі аумағында өзеннің ұзындығы шамамен 17 шақырым, ал су қорғау аймағының ені – 120 метр. Экологтардың айтуынша, өзен арнасына кез келген араласу табиғи тепе-теңдікке айтарлықтай зиян келтіруі мүмкін.Ақпарат көзі : https://www.gov.kz/memleket/entities/almobl/press/news/details/1084815?lang=kk

Арқалық қаласында Республика күніне орай «Ұлы дала дүбірі» атты ұлттық ат спорты ойындары басталды. Іс-шараның мақсаты – ата-бабалар мұрасын сақтау мен дәріптеу, ұлттық спорт түрлерін дамыту және жас ұрпақты патриоттық рухта тәрбиелеу.Дәстүрлі түрде өткізіліп келе жатқан бұл жарысқа Арқалық қаласы мен оған қарасты ауылдық округтердің төрт құрама командасы қатысуда. Ұйымдастыру жұмыстарына қалалық дене шынықтыру және спорт бөлімі қолдау көрсетуде.Салтанатты ашылу рәсімі мемлекеттік рәміздерге құрмет көрсетуден басталды. Қатысушылар мен көрермендер алдында қала әкімі Әмірхан Асанов сөз сөйлеп, жарыстың мәні мен маңызын атап өтті. Іс-шара барысында Арқалық қаласының құрметті азаматы, белгілі қолөнер шебері және тарихшы-өлкетанушы Шөптібай Байділдин жас спортшыларға бата берді.Ат спорты ойындары екі күнге жоспарланған. Бағдарламада көкпар, тай жарыс, құнан жарыс және аламан бәйге сынды ұлттық спорт түрлері қамтылған. Жарыс барысында көрермендер өңір шабандоздарының шеберлігін тамашалай алады.Арқалық қаласында ұлттық ат спорты сайыстары жыл сайын көктем және күз мезгілдерінде дәстүрлі түрде ұйымдастырылады. Бұл шаралар өңірде ұлттық спортты дамытуға және жастардың салауатты өмір салтын қалыптастыруға бағытталған.Ақпарат көзі : https://www.gov.kz/memleket/entities/kostanay/press/news/details/1084818?lang=kk