Вице-премьер – ұлттық экономика министрі Серік Жұманғарин өткізген кеңесте биылғы 5 айдағы еліміздің ЖІӨ өсімінің құрамдас бөлігі мен экономикаға қомақты үлес қосып отырған салалардың даму серпінін арттыру мүмкіндіктері талқыланды.Өнеркәсіп экономикалық өсудің негізгі қозғаушы күші болып қала береді: 2024 жылғы қорытынды бойынша оның ЖІӨ-дегі үлесі 25,7%-ды құрады. 2025 жылғы қаңтар–мамыр айларында сала 6,4%-ға өскен. Дегенмен, қарқын бәсеңдеп барады: бір ай бұрын өсім 6,6%-ды құраған. Оның басты себебі – өндірістің өскеніне қарамастан өңдеу өнеркәсібінің баяулауы. Өнеркәсіптік өндіріс индексінің төмендеуі үш өңірде: Шығыс Қазақстан облысы (90,4%), Ұлытау облысы (96,2%) және Қостанай облысында (97,6%) тіркелді.Өңдеу жоспарынан артта қалу, ең алдымен, өңдеу өнеркәсібінің 40%-ын құрайтын металлургиямен байланысты. Кеңесте басқа сегменттердегі – машина жасау, тамақ, химия және мұнай өңдеу өнеркәсібіндегі өсу әлеуеті де қарастырылды.Белсенді өсу қарқыны бар тағы бір сала – құрылыс. Оның 5 айдағы өсімі 15,4%-ды, жұмыс көлемі 2 трлн теңгені құрады. Алайда, екі өңір, Атырау мен Ұлытау облыстары артта қалып келеді. Атырауда (жоспардың 43,2%) ТШО жобасы шеңберінде зауыт жұмысының тоқтауына байланысты, Ұлытауда (78,4%) тау-кен өндіру саласындағы нысандар салу мен жөндеудің қысқаруына байланысты қарқын бәсеңдеген.Тұрғын үй құрылысы саласында биыл 19 млн шаршы метр тұрғын үйді пайдалануға беру міндеті тұр. Соңғы 5 айда 6 млн шаршы метр тұрғын үй пайдалануға берілген. Бұл 2024 жылғы қаңтар-мамырмен салыстырғанда 5,7%-ға жоғары.«Біздің мақсатымыз – биыл ЖІӨ 6%-дық өсіміне қол жеткізу. Ол үшін нақты сектордағы барлық сала белгіленген индикаторға сәйкес жұмыс істеуі тиіс. Әкімшілік кедергілерді жедел жойып, компаниялар өз өнімін шығаруды ұлғайтуы үшін әрбір саладағы қарқынның баяулауы есебінен нақты айлық жоспарлар әзірлеу қажет», — деп атап өтті Серік Жұманғарин.https://primeminister.kz/news/ekonomikalyk-shtab-kazakstan-6-zhio-osimine-kalay-kol-zhetkizbek-30159 Ақпарат көзі : https://www.gov.kz/memleket/entities/economy/press/news/details/1017743?lang=kk

«Даму» кәсіпкерлікті дамыту қоры Ұлттық экономика министрлігі мен «Бәйтерек» холдингінің қолдауымен жеңілдікті несиелендірудің жаңа «Өрлеу» бағдарламасы іске қосылғанын хабарлайды.Бұл құрал микро, шағын және орта бизнесті қолдауға бағытталған. Жеңілдетілген несиелеу үшін басымдық берілетін экономиканың салалары – өңдеу өнеркәсібі, көлік және қоймалау, туризм, білім беру, денсаулық сақтау.Жеңілдікті кредиттеудің жаңа бағдарламасы бойынша түпкі қарыз алушы үшін сыйақы мөлшерлемесі жылдық 12,6% -дан аспайды.Бағдарлама бойынша жалпы қаражат көлемі 750 млрд теңге болады, оның 300 млрд теңгесін Қор бөледі, ал 450 млрд теңге екінші деңгейлі банктер тарапынан бірлесіп қаржыландыру аясында тартылады.«Өрлеу» бағдарламасы инвестициялық мақсаттарға жеңілдікті қарыз беруді, айналым қаражатын толықтыруды және 2025 жылғы 1 қаңтардан бастап берілген қолданыстағы кредиттерді қайта қаржыландыруды көздейді.Негізгі шарттар:• қарыздың ең жоғары сомасы - инвестицияға 7 млрд теңгеге дейін, айналым қаражатына 3,5 млрд теңгеге дейін;• сыйақы мөлшерлемесі - жылдық 12,6% -дан аспайды;• қаржыландыру мерзімі: - инвестициялық мақсаттарға 10 жылға дейін, - айналым қаражатын толықтыруға - 3 жылдан аспайды, - кредиттерді қайта қаржыландыруға - қаржыландырылатын берешек мерзімінің қалдығынан артық емес.«Өрлеу» бағдарламасы жеңілдікті кредит беру арқылы кәсіпкерлік қызметті келесі экономиканың басым секторларында:- өңдеу өнеркәсібі (оның ішінде тамақ өнімдерін, тоқыма бұйымдарын, киімдерді, химия өнеркәсібі өнімдерін, негізгі фармацевтикалық өнімдер мен фармацевтикалық препараттарды, резеңке және пластмасса бұйымдарын, электр жабдықтарын, жиһаздарды және т.б. өндіру),- көлік және қоймалау (жүк және жолаушылар тасымалы, жүктерді қоймалау қызметтері және т.б.), - туризм (қонақ үйлер, кемпингтер және т.б. қызмет көрсету),- білім беру (мектеп және мектепке дейінгі мемлекеттік білім беру тапсырысы бар),- денсаулық сақтау (медициналық орталықтар, көп бейінді клиникалар) ынталандыруға бағытталған.«Өрлеу» бағдарламасына қатысу үшін кәсіпкерлер тікелей несие берушілерге жүгінуі қажет. Қазіргі кезеңде Freedom Bank, ЦентрКредит Банкі және Halyk bank-пен тиісті келісімдерге қол қойылды.Ақпарат көзі : https://www.gov.kz/memleket/entities/economy/press/news/details/1015883?lang=kk

ҚР Ұлттық экономика министрлігіне қарасты «Экономикалық зерттеулер институты» АҚ беделді халықаралық FocusEconomics Analyst Forecast Awards 2024 премиясының жеңімпазы атанып, Kazakhstan Current Account номинациясы бойынша 1-орынға ие болды.Аталған премия жыл сайын әлемнің 130-дан астам елінен қатысатын макроэкономикалық болжам жасайтын ұйымдар арасында нақты болжам үшін беріледі. 2024 жылдың қорытындысы бойынша Институт ондаған халықаралық сараптамалық орталық, инвестициялық банктер мен зерттеу агенттіктері арасында үздік нәтиже көрсетіп, көш бастады. Сондай-ақ, Институт Real and External Sector және Overall Categories секілді жиынтық санаттарда да үздіктер қатарынан көрініп, болжамдарының кең ауқымдылығы мен дәлдігін тағы бір мәрте дәлелдеді.Институт 2023 жылы да Exchange Rate санатында 2-орын алғанын айта кеткен жөн. Бұл оның макроэкономикалық талдау саласындағы тұрақты кәсібилігі мен жүйелілігін көрсетеді.FocusEconomics – консенсус-болжамдар мен талдаулардың жетекші жаһандық провайдері ретінде – қазақстандық институттың халықаралық зерттеулерге белсенді қатысатынын, аналитиканың тереңдігін және ғылыми негізділігін жоғары бағалады.Ақпарат көзі : https://www.gov.kz/memleket/entities/economy/press/news/details/1015243?lang=kk

Бұған қоса, Астана қаласы әкімдігінің алдын ала бағалауынша, форум күндері елордаға 5 мыңнан астам шетелдік қонақтың келуі қонақ үйлер, мейрамханалар, көлік қызметтері және қаланың басқа да салалары үшін 2,6 млрд теңге көлемінде табыс әкелді.Астана халықаралық форумы қарсаңында өткен «Қазақстан–Франция» және «Қазақстан–Италия» бизнес-форумдарында, сондай-ақ AIF 2025 алаңдарында еліміз үшін маңызды бірқатар инвестициялық келісімдерге қол қойылды.Қазақстан–Франция бизнес-форумы аясында энергетика, денсаулық сақтау, логистика, агроөнеркәсіп, білім беру және орнықты даму салаларын қамтитын 15 келісім жасалды. Солардың ішіндегі ірісі — Павлодар қаласында сутегін өндіретін қондырғы салу жобасы. Бұл жобаға 90 миллион еуродан астам инвестиция тартылмақ.Қазақстан–Италия бизнес-форумы шеңберінде жалпы сомасы 180 миллион еуро болатын 10 келісімге қол қойылды. Олардың аясында логистика, машина жасау, ауыл шаруашылығы өнімдерін қайта өңдеу, өнеркәсіпті цифрландыру және «жасыл» энергетика салаларындағы жобалар қамтылған.AIF 2025 алаңында да ірі келісімдер жасалды. ҚР Сыртқы істер министрлігінің Инвестициялар комитеті мен «Kazak Protein» ЖШС Түркияның Tiryaki Agro, Катардың Hassad Food компанияларының қатысуымен және KAZAKH INVEST ұлттық компаниясының қолдауымен Астана қаласында дәнді дақылдарды терең өңдейтін кешен салу жөнінде 320 миллион АҚШ доллары көлеміндегі инвестициялық келісімшартқа қол қойды.Сонымен қатар, KAZAKH INVEST италиялық серіктестермен тағы үш келісім жасасты. Олардың қатарында Түркістан облысында TRAMITE Group жүзеге асыратын 180 миллион долларлық агроөнеркәсіптік жоба бар. Жоба жылыжай кешені, қызанақ өңдеу зауыты, жоңышқа түйіршіктеу жүйесі және басқа да инфрақұрылымдарды қамтиды.Қаржылық құжаттармен қатар, AIF 2025 аясында еліміздің экономикасы үшін стратегиялық маңызы бар бірқатар келісімдерге де қол қойылды.Қазақстан Республикасы Үкіметі мен Экономикалық ынтымақтастық және даму ұйымы (ЭЫДҰ) Еуразиялық бәсекеге қабілеттілік бағдарламасын қаржыландыру жөніндегі келісімге қол қойды. Құжат экономикалық реформаларды тиімді жүргізуге арналған сараптамалық қолдауды көздейді. Бұл бағдарлама ЭЫДҰ стандарттарын енгізу, құқықтық және институционалдық ортаны жетілдіру, сондай-ақ өңірдің бәсекеге қабілеттілігін арттыруға серпін береді.Цифрлық даму, инновациялар және аэроғарыш өнеркәсібі министрлігі Solana Foundation және Intebix компанияларымен Орталық Азиядағы алғашқы блокчейн аймағы — Solana Economic Zone Kazakhstan жобасын іске қосу туралы меморандумға қол қойды.Сондай-ақ Сауда және интеграция министрлігінің қолдауымен Алматы облысында Қазақстандағы бірінші халықаралық аутлет-орталықты салу жөнінде келісімге қол қойылды. Жобаның бастамашысы - QSM тобы, серіктесі — Еуропаның коммерциялық жылжымайтын мүлік нарығында 60 жылдан астам тәжірибесі бар Ekazent Management GmbH (Австрия). Кешеннің жалпы аумағы 80 мыңнан 120 мың шаршы метрге дейін болмақ.Ақпарат көзі : https://www.gov.kz/memleket/entities/economy/press/news/details/1014406?lang=kk

Астана халықаралық форумы (AIF) шеңберінде ҚР Ұлттық экономика вице-министрі Асан Дарбаевтың ЭЫДҰ Мемлекеттік басқару директоратының басшысы Эльза Пиличовскимен жұмыс кездесуі өтті.Экономикалық тұрақтылықты арттыру жөніндегі панельдік сессиясының мәселелері мен ЭЫДҰ дайындаған Қазақстанның мемлекеттік басқаруына Қысқаша шолуы талқыланды. Вице-министр инклюзивтікті және азаматтардың мемлекеттік басқаруға қатысуын арттыруға бағытталған «Халық үніне құлақ асатын мемлекет» және «Заң мен тәртіп» қағидаттарын іске асыру бойынша іс-шаралар туралы айтты.«Адамға бағдарланған» моделін құруға бағытталған Мемлекеттік басқаруды дамытудың 2030 жылға дейінгі тұжырымдамасы басты назарда болды. Негізгі бағыттары –басқару деңгейлері арасындағы ресурстарды және өкілеттіктерді теңгерімдеу үшін орталықсыздандыру, сондай-ақ бизнесті жүргізу жағдайларын жеңілдету үшін бюрократиядан арылту.Тараптар халықаралық тәжірибені ескере отырып, Қазақстанның мемлекеттік басқаруын жақсарту бойынша ұсыныстарды қарастырды. Кездесу қорытындысы бойынша ынтымақтастықты жалғастырудың маңыздылығы атап өтілді. Ақпарат көзі : https://www.gov.kz/memleket/entities/economy/press/news/details/1009714?lang=kk

Астана халықаралық форумы аясында Қазақстан Республикасы Премьер-министрінің орынбасары – ұлттық экономика министрі Серік Жұманғарин Қырғыз Республикасы Министрлер Кабинеті төрағасының бірінші орынбасары Данияр Амангелдиевпен кездесу өткізді.Серік Жұманғарин Қазақстан мен Қырғызстанның тек тату көрші ғана емес, сенімді одақтас екенін, сондай-ақ Мемлекет басшысы Қасым-Жомарт Тоқаев бауырлас қазақ-қырғыз қарым-қатынасын нығайтуға ерекше көңіл бөліп отырғанын баса айтты.Бүгінде екі ел алдында жылдық тауар айналымын $3 млрд-қа жеткізу міндеті тұр. Тараптар 2025 жылғы бірінші тоқсанның қорытындысы бойынша өзара сауда көлемі қарқынды түрде өсіп отырғанын атап өтті. Алғашқы үш айда Қазақстан мен Қырғызстан арасындағы тауар айналымы 2024 жылғы сәйкес кезеңмен салыстырғанда 25,2%-ға артып, $435,1 млн-ға жеткен (экспорт – $341,9 млн, импорт – $93,3 млн). Тауар айналымын мақсатты $3 млрд-қа жеткізу үшін тауар түрлерін кеңейту және B2B байланысын тиімді жандандыру шарасы қажет. Кездесуге қатысушылар өзара сауда көлемін арттыру жөніндегі жол картасы жобасының тетіктерін талқылады. Серік Жұманғарин Қазақстан мұнайхимиясы, тамақ өнеркәсібі, металлургия мен басқа да саланың өнімін қоса алғанда, 195 тауар позициясы бойынша экспортты $260 млн-нан астам сомаға арттыруға дайын екенін атап өтті.Ауыл шаруашылығына ерекше назар аударылады. Екі елдің өзара саудасындағы бұл саланың үлесі 20%-ды құрайды. Аталған сала белсенді өсу үстінде: биыл 1 тоқсанда АӨК өнімінің тауар айналымы 40,7%-ға артқан. Қазақстан 2025 жылғы бірінші тоқсандағы 3,4 мың тонна астық пен 10,9 мың тонна ұнды қосқанда, дәнді және майлы дақыл экспортын ұлғайтуға ниетті. Серік Жұманғарин Астанада өткен ресми кездесуде қырғыз тарапының сәуірде Қазақстанға өзінің ауыл шаруашылығы өнімін экспорттау үшін жасыл дәліз құру туралы ұсынысы оң шешілгенін атап өтті. Қазақстан шекарада қырғыздың ерте пісетін көкөнісі мен жемісін кедергісіз өткізуге дайын.  Екіжақты ынтымақтастықтың негізгі жобасы – «Қарасу»–«Ақ-тілек» бақылау-өткізу пункті шекарасында Индустриялық сауда-логистикалық кешен (ИСЛК) құру болып отыр. Бүгінде екі тарап та индустриялық сауда-логистикалық кешені (Қазақстан – 50 га, Қырғызстан – 40 га) құрылысына жер телімін бөліп, инвесторды анықтады. Бас жоспар мен техникалық-экономикалық негіздеме әзірленуде. Қазақстанда «Romsey Holdings KZ» ЖШС басқаратын «Алатау» ИСЛК» индустриялық аймағы құрылды. Ықтимал инвестиция – 2,2 млн. Бұл жоба ауыл шаруашылығы өнімін қайта өңдеу, халық тұтынатын тауарлар мен құрылыс материалын жасау, сервистік қызмет пен көлік логистикасы бойынша өндірістік тұтас кешен құруға мүмкіндік береді. 2025 жылы Ош мемлекеттік университетінде Л.Н. Гумилев атындағы Еуразия ұлттық университетінің филиалы ашылады. Бұл әл-Фараби атындағы ҚазҰУ-дың Бішкек филиалының табысты тәжірибесінің жалғасы. Онда 2022 жылдан бастап 800-ден астам студент оқуда. Қазақстанның жоғары оқу орындарында 556 қырғыз студенті, 200-ге жуық қазақстандық Қырғызстанда оқиды. Жаңа филиалдың ашылуы екі ел арасындағы академиялық ұтқырлық пен тәжірибе алмасуды нығайтпақ. Сондай-ақ кездесуде тараптар транзиттік-көлік әлеуетін дамытиу мүмкіндіктерін, әсіресе, Алматы – Ыстықкөл автожолы құрылысы жобасын, су ресурсы мәселелері, мәдени-гуманитарлық ынтымақтастық бойынша өзара іс қимылды дамыту мәселесін талқылады.Кездесу соңында вице-премьерлер екі елдің экономикалық әлеуетін нығайту үшін сауда, логистика, көлік, білім беру мен басқа да саладағы басым бағыттар бойынша ынтымақтастықты жандандыруға уағдаласты.https://primeminister.kz/news/islk-zholdar-sauda-zhane-bilim-beru-kazakstan-men-kyrgyzstan-vitse-premerleri-aif-2025-alanynda-ozara-yntymaktastyk-maselesin-talkylady-30107 Ақпарат көзі : https://www.gov.kz/memleket/entities/economy/press/news/details/1008397?lang=kk

Астана халықаралық форумының алғашқы күні әлемнің түкпір-түкпірінен келген 600-ден астам делегат пен 5000 қонақтың басын қосты. Форумды Қазақстан Президенті Қасым-Жомарт Тоқаев ашты. Ол өз сөзін әлемдегі алаңдатарлық саяси жағдайдан бастады: 52 мемлекет қарулы қақтығыс жағдайында болды. Бұл ретте зорлық-зомбылықтан келген экономикалық шығын 19 триллион долларға жетті – бұл дүниежүзілік ЖІӨ-нің шамамен 13,5% құрайды. Заманауи қақтығыстар ұзағырақ және күрделі болып барады. Мұндай қақтығыстардың негізінде тереңде жатқан қайшылықтар жатыр. Ядролық қаруы бар мемлекеттер арасында да шиеленіс артып келеді.Қасым-Жомарт Қазақстан орта державалар әділетті әрі инклюзивті әлемдік тәртіптің орнауына мүдделі болуы керек екеніне нық сенетінін айтты. Соған сәйкес, орта державалар да жауапкершілік жүгін көтеруге дайын болуға тиіс.Форумның панельдік сессияларының бірі БҰҰ-ға арналды. Биыл ұйым өзінің 80 жылдығын атап өтеді. Қазақстан Президенті БҰҰ құрылымдары, әсіресе Қауіпсіздік кеңесі уақыт өте аз өзгергенін атап өтті.«80 жыл бұрын жасалған институционалды құрылым мен қазіргі заман арасында алшақтық көп. Бұл Ұйымға және оның тиімділігіне деген сенімге селкеу түсіреді. Миллиардтаған адамның тағдырына әсер ететін аса маңызды шешімді бірнеше елдің қабылдағаны дұрыс емес», - деп атап өтті Тоқаев.Сондықтан Қазақстан БҰҰ Қауіпсіздік Кеңесінің құрамын кеңейтіп, оған әлемнің әр өңірінен өкіл қосу туралы ұстанымды қолдайды.Форумның маңызды тақырыптарының бірі – экология және климат болды. Қасым-Жомарт Тоқаев Орталық Азия – планетадағы климат өзгерістеріне осал өңірлердің бірі екенін атап өтті. Мұндағы жылыну әлемдік орташа деңгейден екі есе жылдам жүріп жатыр.Сөзінің соңында президент форумға қатысушыларға сөз сөйлеп, оларды мазмұнды диалогқа шақырды.Форумның алғашқы күні белгілі саясаткерлер, сарапшылар,  халықаралық компаниялардың басшыларының қатысумен 9 панельдік сессия және 6 жеке кездесу өтті. Панельдік сессияларға қатысушылар Орталық Азиядағы су қауіпсіздігі; жаһандық нарықтар, жеткізу тізбегі және валюталық жүйелер үшін экономикалық соғыстың ұзақ мерзімді салдары; энергияға жаһандық сұраныс және таза энергетиканы дамыту; ЖИ дамыту; Қазақстанда Алатау қаласының құрылуын талқылады. Ақпарат көзі : https://www.gov.kz/memleket/entities/economy/press/news/details/1008121?lang=kk

Астана халықаралық форумы аясында Қазақстанның Көлік министрлігі еліміздің көлік әлеуеті тұсаукесерін жасады. Іс-шараға түрлі елдердің премьер-министрлері орынбасарлары – Қазақстаннан Серік Жұманғарин, Ресейден Алексей Оверчук, Қырғызстаннан Данияр Амангелдиев, Өзбекстаннан Жәмшид Ходжаев, сондай-ақ Ауғанстан өнеркәсіп және сауда министрінің міндетін атқарушы Нұриддин Азизи қатысты.Қазақстан Еуразияның стратегиялық көлік хабы ретінде Шығыс – Батыс және Солтүстік – Оңтүстік бағыты бойынша жаһандық жеткізу тізбегінің аймақтық байланысы мен орнықтылығын қамтамасыз етуде шешуші рөл атқарады. Бүгінгі таңда елімізде 13 халықаралық көлік дәлізі бар. Оның бесеуі – теміржол, сегізі – автокөлік дәлізі.«Біздің көліктік инфрақұрылым Қытай, Еуропа, Ресей, Каспий жағалауы елдерін, Парсы шығанағы мен Оңтүстік Азияны байланыстырады. Демек, Қазақстан еуразиялық логистикалық жүйедегі маңызды буын. Қазақстандық желі барлық негізгі халықаралық көлік дәліздерімен түйісетіндіктен, әлемдік нарыққа тұрақты түрде шығуымызды қамтамасыз етеді», — деп атап өтті Көлік вице-министрі Мақсат Қалиақпаров. Тұсаукесер барысында ТРАСЕКА, «Солтүстік – Оңтүстік» халықаралық көлік дәлізі, Солтүстік маршрут, сондай-ақ Ауғанстан, Парсы шығанағы, Оңтүстік Азия елдерімен логистикалық байланысты кеңейтуге ықпал ететін Оңтүстік және Орталық Азия сияқты басым бағыттардың дамуына ерекше назар аударылды.«Солтүстік – Оңтүстік» көлік дәлізін дамыту, оның әлеуетті жалғасы – трансауғандық бағыттың маңыздылығы туралы айтылды.«Бұл бағыт Үнді мұхиты порттарына, соның ішінде Гвадар, Карачи мен Мумбайға шығуды қамтамасыз ететін перспективалық дәліз. Оның есептік өткізу қабілеті жылына 15 млн тонна. Біз бұл векторды аймақтық өзара байланысты нығайтуға, сауда айналымын ұлғайту мен жаңа логистикалық тізбекті қалыптастыруға ықпал ететін қолданыстағы маршруттарға стратегиялық қосымша ретінде қарастырамыз», — деді  Мақсат Қалиақпаров. Кездесуге қатысушылар Қазақстанның қазіргі автожол, теміржол және авиациялық бағытының негізгі параметрлерін, шекара маңындағы өзара іс-қимылдың өзекті мәселелерін, аймақтың негізгі жүк құраушы нүктелерінде терминалдық инфрақұрылымды дамыту перспективасын талқылады. Талқылау қорытындысы бойынша тараптар келісілген көлік саясатын әзірлеуге және логистикалық саладағы ынтымақтастықты нығайтуға дайын екендіктерін жеткізді.https://primeminister.kz/news/kazakstan-astana-khalykaralyk-forumynda-kolik-aleuetin-tanystyrdy-30106 Ақпарат көзі : https://www.gov.kz/memleket/entities/economy/press/news/details/1008132?lang=kk

ҚР Парламенті Мәжілісінің депутаттары палатаның жалпы отырысында "Қазақстан Республикасының кейбір заңнамалық актілеріне астана мен республикалық маңызы бар қалаларды дамыту мәселелері бойынша өзгерістер мен толықтырулар енгізу туралы"заң жобасын екінші оқылымда мақұлдады.Заң жобасында бірқатар негізгі өзгерістер қарастырылған. Атап айтқанда, қалалардың сыртқы келбетін жақсартатын дизайн-кодты бекіту бойынша республикалық маңызы бар қалалар мен астана мәслихаттарының құзыретін кеңейтетін норма енгізіледі. Сондай-ақ әкімдіктер сауда дүңгіршегі секілді стационарға жатпайтын объектілерді орналастыру қағидасын әзірлеу бойынша өкілеттікке ие болмақ. Қоғамдық орындардағы аудио жарнамаға, тротуарлардың, веложолдар мен автожолдардың бетіне көрнекі жарнама орналастыруға шектеу қойылады.Қалалық инфрақұрылым саласында қолайлы ортаны қамтамасыз ету, тұрғын аудандарда қорғаныс конструкцияларын орнату мен қалалық аумақтарды тазалау үшін заңды тұлғаларды айқындау қағидасы енгізіледі.Елорданың жасыл белдеуін сақтауға ерекше көңіл бөлінбек. Экологияға зиян келтіретін қызметтерге, мысалы, мал жаюға немесе қоқыс үюге тыйым салатын мемлекеттік заңды тұлға басқаратын санитарлық-қорғау жасыл аймағы құрылады.Түзетулердің енгізілуі қалалардың орнықты дамып, халыққа жайлы болуына, барлық тұрғынға  бірдей қолайлы жағдай туғызуға ықпал етпек.Ақпарат көзі : https://www.gov.kz/memleket/entities/economy/press/news/details/1006140?lang=kk

Мемлекет басшысы наурыздағы Ұлттық құрылтайда Қазақстанда егжей-тегжейлі пысықтай әрі есеп-қисабын жүргізе отырып, ғылыми қалашықтар құруды міндеттеген болатын. Вице-премьер – ұлттық экономика министрі Серік Жұманғарин бастаған қазақстандық делегация Новосібір облысында құрылған Ресей Ғылым академиясы Сібір бөлімшесінің (РҒА СБ) базасындағы Ресейдегі ең ірі ғылыми-білім беру және инновациялық орталықта болды.Делегация құрамына Өнеркәсіп және құрылыс, Цифрлық даму, инновациялар және аэроғарыш өнеркәсібі, Ғылым және жоғары білім министрліктерінің, ҰЭМ жанындағы Экономикалық зерттеулер институтының басшылары, бизнес өкілдері кірді.РҒА Сібір бөлімшесі – Академияның ең ірі өңірлік бөлімшесі. Оның айрықша ерекшелігі, ғылыми-зерттеу қызметін қолданбалы және мемлекеттік міндеттерді шешуге арнаған. РҒА СБ төрағасы Валентин Пармон атап өткендей, экожүйе дәйекті интеграция принципі бойынша жұмыс істейді: ғылым білімді қалыптастырады, содан кейін оларды білім беру жүйесіне енгізу мен практикалық іске асыру жүреді.Новосібір ғылыми орталығының аумағында үш академиялық қалашық, РҒА СБ 53 ғылыми-зерттеу институты, Новосібір мемлекеттік университеті, Академиялық парк, медбиотехнопарк, «Кольцово» ғылыми қалашығы және ғылыми-инновациялық кластердің басқа да негізгі объектілері жұмыс істейді. 2003 жылы ғылыми қалашық ретінде ресми мәртебеге ие болған Кольцово бүгінде Ресейдегі ең ірі биотехнологиялық кластердің бірі. Мұнда Эбола, А гепатиті және COVID-19 вакциналарын жасаған «Вектор» вирусология және биотехнология Мемлекеттік ғылыми орталығы орналасқан. Кластерде 30-дан астам шағын инновациялық компания жұмыс істейді.Новосібір облысының губернаторы Андрей Травников, РҒА СБ төрағасы Валентин Пармон, ғылыми орта мен бизнес өкілдері қатысқан жұмыс жиналысында Лаврентьевтің «ғылым – білім – өндіріс» үштағаны қағидаты бойынша құрылған экожүйенің технологиялық және инновациялық артықшылықтары айтылды.Андрей Травников атап өткендей, академиялық қалашық, ғылыми қалашық, атом қалашығы сияқты әртүрлі форматтағы ғылым мен технология көп шоғырланған аумақ құру тәжірибесі өткен ғасырда өзін сан мәрте ақтаған. Ол ХХІ ғасырда қолдануға да, қайталауға да лайық. Егер тәжірибе пайдалы болып, Қазақстанның ғылыми-технологиялық әлеуетін дамытуға ықпал етіп жатса, ол қуанарлық жағдай.Кездесуде экономикалық көрсеткіштер де айтылды: Академиялық парк резиденттерінің 2021 жылдан 2024 жылға дейінгі жиынтық кірісі екі есе: сәйкесінше 31,8 млрд рубльден 60,5 млрд рубльге дейін өскен. Төленген салық мөлшері 2021 жылы 2,9 млрд рубльден 2024 жылы 6,7 млрд рубльге дейін артқан. «Біз ШОБ-ты дамытуды көздейміз, технологиялық орталықтарды кеңейтуге көп көңіл бөлеміз. Біздің бағалауымыз бойынша, Академпарктің 253 резиденті Новосібір облысының жалпы өңірлік өнімінің шамамен 1,5%-ын қамтамасыз етеді. Салыстырар болсақ, өңірдің барлық аграрлық секторының үлесі ЖӨӨ-нің шамамен 5%-ы», — деп атап өтті «Новосібір Академиялық қалашығы технопаркі» АҚ бас директоры Дмитрий Верховод.Қазақстандық делегация Ресейдегі алғашқы 4+буынды синхротрондық сәулелену көзі – «Сібір айналмалы фотон көзі» (САФК) ұжымдық пайдалану орталығының құрылыс алаңына барды. 2025 жылдың соңында іске қосылатын орталық еуропалық және оңтүстік америкалық технологиямен салыстыруға болатын әлемдегі ең озық ғылыми қондырғының бірі.Сапар соңында Серік Жұманғарин РҒА Сібір бөлімшесіне және Новосібір облысы әкімшілігіне ғылыми-инновациялық кластер құру тәжірибесімен танысуға мүмкіндік жасағаны үшін алғыс айтты. Тараптар ғылым қалашығының жұмыс істеу моделін тереңірек зерделеп, оны Қазақстанда қолданудың болашағын бағалау үшін бейінді мамандармен тәжірибе алмасуды жолға қоюға уәделесті.  https://primeminister.kz/news/gylym-bilim-ondiris-serik-zhumangarin-bastagan-kazakstandyk-delegatsiya-novosibir-oblysyndagy-rf-gylymi-kalashykka-bardy-30076 Ақпарат көзі : https://www.gov.kz/memleket/entities/economy/press/news/details/1002699?lang=kk

Қазақстандық мемлекеттік-жекеменшік әріптестік орталығы (МЖӘ) БҰҰ Еуропалық экономикалық комиссиясының (БҰҰ ЕЭК) қолдауымен Сербия астанасы Белград қаласында өткен ІХ Халықаралық МЖӘ форумында халықаралық марапатқа ие болды. Халықаралық қазылар алқасы Орталықтың орнықты даму мақсаттары мен цифрлық трансформация қағидаттарына сәйкес келетін МЖӘ жобаларын ілгерілетуге қосқан үлесін жоғары бағалады.«Бұл марапат – бүкіл кәсіби ортаның бірлескен еңбегінің нәтижесі. Қазақстан МЖӘ тетіктерін халықаралық стандарттарға сай жетілдірумен қатар, цифрлық технологияларды тиімді енгізу арқылы саланың сапалы дамуына жол ашып отыр», – деді «Қазақстандық мемлекеттік-жекеменшік әріптестік орталығы» АҚ Басқарма төрағасы Аслан Қалиғазин.Орталықтың мәліметінше, 2006 жылдан бері елімізде жалпы 2,6 трлн теңге сомасына 1100-ден астам келісімшарт жасалған. Жобалардың негізгі бағыттары – білім беру, денсаулық сақтау, энергетика және тұрғын үй-коммуналдық шаруашылығы болып табылады. Бұл ретте рәсімдердің ашықтығына, сыбайлас жемқорлық тәуекелдерін азайтуға және инвестициялық тартымдылықты арттыруға баса назар аударылып отыр. Жобаларды конкурстық іріктеу үшін веб-портал іске қосылып, тікелей келіссөздер жүргізу тәжірибесіне шектеу қойылды, МЖӘ және концессиялар туралы заңдар біріктірілді. Жобаларды жүзеге асыру саны бойынша Түркістан, Шығыс Қазақстан және Атырау облыстары көш бастап тұр.МЖӘ саласындағы негізгі бағыттардың бірі – әлеуметтік инфрақұрылымды дамыту. 2023 жылғы қарашада Үкімет 2024-2028 жылдарға арналған МЖӘ дамытудың кешенді жоспарын бекітті. Құжат білім беру, денсаулық сақтау, спорт және әлеуметтік қорғау салаларындағы 43 жобаны қамтиды.Ақпарат көзі : https://www.gov.kz/memleket/entities/economy/press/news/details/1001685?lang=kk

Қазіргі уақытта «Даму» қорының бағдарламалары негізгі 3 құрал арқылы жүзеге асырылады: субсидиялау, кепілдік беру және жеңілдетілген несие беру. Қаржы бағдарламалары іске асырылған уақытта 14,2 трлн теңге несие сомасына 226,3 мың жобаға қолдау көрсетілді. Оның ішінде субсидиялау бойынша 8,93 трлн теңге несие сомасына 119 мың жоба,  кепілдендіру бойынша 2,37 трлн теңге сомасына 73,2 мың жоба, жеңілдетілген несие бойынша мөлшерлеме 3,3 трлн теңге сомасына 32,1 мың жоба қолдау тапты. Бұл жайлы «Даму» кәсіпкерлікті дамыту қоры» АҚ басқарма төрағасының орынбасары Талғат Смағұлов ОКҚ брифингінде хабарлады.«2024 жылы мемлекеттік бағдарламалар арқылы 1 трлн 713 млрд теңге бойынша 29 513 жобаға қолдау көрсетілді. Атап айтқанда, субсидиялау бойынша 17 623 жоба 1014 млрд теңге көлемінде, несиені кепілдендіру бойынша  9 173 жоба 449 млрд теңге сомасына, жеңілдетілген несие бойынша 2 717 жоба 554 млрд теңге көлемінде. Ал, салалар бойынша, ең басты мақсатымыз - ол өнеркәсіп саласын дамыту, сол салаға атап өткен көлемнің 36%-ы берілді. Бұл  622 млрд теңгені құрады. Одан кейін көлік және қоймалау саласы,246 млрд теңне жқмсалды.  Туризм саласына 109 млрд теңгеден астам және білім беру саласына 109 млрд теңге, өзге салаларға 627 млрд теңге жұмсалды», – деді спикер. Бұл жобаларды іске асыру есебінен мемлекеттік қолдау алған барлық өндіруші 2024 жылы 25,4 млрд теңгеге өнім шығарды. Олар 1,7 трлн теңгеге салық түсімдерін қамтамасыз етіп, 9,7 мың жаңа жұмыс орнын құрды. 2024 жылғы динамикаға сәйкес, 2023 жылмен салыстырғанда қолдау тапқан жобалар саны 24%-ға және несиелер сомасы 9%-ға өсті. Пандемия және пандемиядан кейінгі кезеңде кәсіпкерлерді қолдау көлемі ұлғайтты, нәтижесінде қамту орташа жылдық деңгейден 1,5-2 есе асып түсті.Қазіргі уақытта Қор бағдарламаларының шарттарына өзгерістер енгізіп жатыр.Мемлекет басшысының 2025 жылғы 21 қаңтарда Үкіметтің кеңейтілген отырысы барысында айтылған тапсырмасы мен Үкіметтің 2025 жылғы 02 сәуірдегі қаулысына сәйкес Қор 2 Кепілдік қорын құрды. Біріншісі 7 млрд теңгеге дейінгі жобаларға, екіншісі 7 млрд теңгеден астам ірі инвестициялық жобаларға арналған.Бірінші Кепілдік қоры шеңберінде кепілдіктер берудің негізгі шарттары: кепілдік беру жүзеге асырылатын жоба шеңберінде қаржыландыру сомасы 7 млрд теңгеден аспайды; кепілдіктің ең жоғары мөлшері-қаржыландыру сомасының 85%-на дейін, бірақ 3,5 млрд теңгеден аспайды; ұсынылатын кепілдік мерзімі-қаржыландыру мерзімінің 5 айынан асатын мерзім; кепілдіктер жеделдетілген рәсім бойынша — екі жұмыс күні ішінде, «Даму» Қоры тарапынан қайта сараптама жасалмайды. Жеке кәсіпкерлік субъектілерінің міндеттемелері бойынша кепілдіктер  екінші деңгейдегі банктермен жасалған портфельдік кепілдік беру туралы келісімдер шеңберінде беріледі. Екінші Кепілдік қоры шеңберінде кепілдіктер берудің негізгі шарттары: кепілдік беру жүзеге асырылатын жоба шеңберінде қаржыландыру сомасы 7 млрд теңгеден асады; кепілдіктің ең жоғары мөлшері – жоба құнының 30% дейін; берілетін мерзімі – 15 жылға дейін. Әр өтінім «Даму» қоры тарапынан жеке қаралады.https://ortcom.kz/kk/novosti/1747814931 Ақпарат көзі : https://www.gov.kz/memleket/entities/economy/press/news/details/1000902?lang=kk

Өткен жылы Қазақстан мен Болгария арасындағы тауар айналымы 4 есеге жуық өскен.20 мамырда Софияда (Болгария Республикасы) Экономикалық ынтымақтастық жөніндегі Қазақстан-Болгария үкіметаралық комиссиясының 5-отырысы өткізілді. Іс-шара Қазақстан Республикасы Премьер-министрінің орынбасары-Ұлттық экономика министрі Серік Жұманғарин мен Болгария Республикасының Экономика және өнеркәсіп министрі Петъра Диловтың төрағалығымен өтті.Бірлескен комиссия төрағалары Қазақстан мен Болгария арасында дипломатиялық қатынас орнаған 30 жылдан аса уақыттан бері екі ел достық пен әріптестік байланысты берік ұстанып келе жатқанын ризашылықпен атап өтті. Тараптар сауда мен инвестиция, көлік, өнеркәсіп, ауыл шаруашылығы, туризм, энергетика, мәдениет пен білім беру саласындағы өзара іс-қимылды тереңдету мәселесін егжей-тегжейлі талқылады.Отырыспен қатар екі ел іскер топтары өкілдері қатысқан қазақстан-болгар бизнес-форумы өткізілді. Жиын қорытындысында тараптар тұрақты байланысты сақтап, екі ел арасындағы өзара тиімді қарым-қатынасты одан әрі кеңейту үшін күш-жігерін қосуға дайын екенін білдірді. Қол жеткізілген уағдаластық бесінші Үкіметаралық комиссия хаттамасына қол қоюмен бекітілді.Бүгінде Қазақстанда Болгарияның тау-кен, өңдеу өнеркәсібі, құрылыс, көлік, бөлшек сауда мен ғылымға қатысты 60-тан астам кәсіпорыны табысты жұмыс істейді. Тараптар кооперацияны тереңдетудің перспективасын ауыл шаруашылығы өнімін бірлесіп өңдеу, логистикалық хабты дамыту, жаңа индустриялық жобаларды іске қосудан көреді.2024 жылғы қорытынды бойынша Қазақстан мен Болгария арасындағы өзара сауда көлемі 2023 жылмен салыстырғанда төрт есе артып, 375,2 млн АҚШ долларына жетті. Өткен жылы Қазақстан экономикасына салынған болгар инвестициясының көлемі 7,8 млн доллар. Бұл бұрнағы жылмен салыстырғанда 86,5%-ға артық. 2025 жылғы қаңтар-наурыздағы тауар айналымы 66,6 млн. АҚШ доллары. Бұл өткен жылғы сәйкес кезеңмен салыстырғанда 93,3%-ға жоғары (34,5 млн. АҚШ). Бұл ретте Қазақстанның Болгарияға экспорты биылғы бірінші тоқсанда 2,4 есе өсіп, 51,4 млн. АҚШ долларына жетті.Ақпарат көзі : https://www.gov.kz/memleket/entities/economy/press/news/details/999917?lang=kk

Премьер-министрдің орынбасары – ұлттық экономика министрі Серік Жұманғариннің төрағалығымен өткен Орнықты даму жөніндегі үйлестіру кеңесінің отырысында Орнықты даму мақсаттары жөніндегі (ОДМ) үшінші ерікті ұлттық шолудың тұсаукесері өтті.БҰҰ-ның Қазақстандағы тұрақты үйлестірушісінің міндетін атқарушы Стивен О' Малли ұсынылған құжаттың жай ғана есеп еместігін, Қазақстанның БҰҰ-ның 2030 күн тәртібіне шынайы берілгендігінің көрінісі мен барлық әлемге еліміздің ілгерілеуі, сабақтары мен амбициялары туралы айту мүмкіндігі екенін атап өтті.«Қазақстан – шолуды үш жылда бір рет өткізетін санаулы елдердің бірі. Бұл ОДМ бойынша прогресс мониторингіндегі, ашықтықты ілгерілетудегі нағыз көшбасшылығын айқын көрсетеді. Жақында Алматыда ашылған БҰҰ-ның Орталық Азия мен Ауғанстан үшін орнықты даму мақсаттары жөніндегі өңірлік орталығы Қазақстанның ОДМ-ны елде де, аймақта да іске асыруға бейілділігін көрсетеді. БҰҰ тұрғысынан мұндай шолуларды жүргізу шынайы әріптестік пен іс-қимылға шақыру ретінде бағаланады. БҰҰ Қазақстан үкіметін толығымен қолдайды», — деп атап өтті Стивен О' Малли. Ұлттық экономика вице-министрі Асан Дарбаев үшінші құжатта ОДМ-ны жергілікті жерге бейімдеуге, яғни жаһандық мақсаттарды аймақтар мен жергілікті қоғамдастықтар деңгейіне көшіру мәселелеріне ерекше назар аударылғанын айтты. Сондай-ақ Шолу 2025-тің басты ерекшелігі – азаматтық қоғамның, ғылыми-сараптамалық қоғамдастықтың жұмысына белсенді қатысу.«Екінші ерікті ұлттық шолу ұсынылған сәттен бастап ОДМ-ны іске асырудың институционалдық негіздерін жетілдіруде елеулі нәтижелерге қол жеткізілді: 2023 жылы Қазақстанның орнықты дамуы саласындағы ұлттық мақсаттары мен міндеттерін іске асыру мониторингі жөніндегі парламенттік комиссия құрылды. 2060 жылға дейін елдің көміртегі бейтараптығына қол жеткізу стратегиясы қабылданды. Орнықты даму мақсаттарының тиімді мониторингін қамтамасыз ету үшін ОДМ ұлттық индикаторлары өзектендіріліп, жалпы саны бүгінде 200-ге жеткізілді», —  деді Асан Дарбаев.Экономикалық зерттеулер институтының басқарма төрағасы Әсел Сәрсенбаеваның айтуынша, ОДМ «Ешкімді артта қалдырмау» қағидатына сәйкес дайындалған Үкімет тарапынан да, азаматтық қоғам тарапынан да іске асырылуды бағалауды көрсетеді. Ол жұртшылық пікірін ескере отырып айқындалған басым мақсаттардың орындалуы туралы ақпарат ұсынды.«Үкімет Орнықты даму мақсаты бойынша және жаһандық сын-тегеуріндерге жауап ретінде еңбек нарығының талабына сәйкес бизнесті қолдау мен кадр даярлау шарасын жүйелі түрде қабылдауда», — деп атап өтті Әсел Сәрсенбаева.Ол, азаматтық қоғам әлеуметтік кодекс әлеуметтік саясаттың негізін нығайтты деп санайды. Қазақстан ана өлімін тез төмендеткен (ДДҰ бағалауы бойынша) он елдің қатарына кіреді. Гендерлік теңдік саласында мемлекет деңгейінде де, жеке секторда да ілгерілеу байқалады. Онда ірі компаниялар гендерлік стратегиялар мен харассментке қарсы іс-қимыл саясатын енгізеді. Құқықтық мәдениеттің өсуі сот жүйесіне қойылатын жаңа талаптарға әкелуде. Қоғам оны одан әрі жақсартуды күтетіні орынды.Үйлестіру кеңесін қорытындылай келе, Серік Жұманғарин Орнықты даму мақсаттарының қағидаттарын енгізу бірінші кезекте халықтың өмір сүру сапасын арттыруға, үздік халықаралық стандарттарды қабылдауға бағытталғанын, бұл тұтастай алғанда елдің халықаралық аренадағы беделін нығайтуға ықпал ететінін атап өтті.Кеңес қатысушылары Қазақстанның үшінші ерікті ұлттық шолуын мақұлдады. Енді құжат осы шілдеде Нью-Йорктегі жоғары деңгейдегі Саяси форумда ұсынылады.https://primeminister.kz/news/kazakstan-ana-olimin-aytarlyktay-tez-tomendetken-on-eldin-kataryna-kirdi-30049 Ақпарат көзі : https://www.gov.kz/memleket/entities/economy/press/news/details/998709?lang=kk

Қазақстанның барлық өңірінен келген 350 өндіруші өз өнімін Астанадағы «Ulttyq ónim» VIII отандық өндірушілер көрмесінде ұсынды. EXPO халықаралық көрме орталығында басталған сегізінші жылсайынғы көрмеде қазақстандық өндірушілер тамақ, жеңіл, химия өнеркәсібі, машина жасау, жабдықтар, зергерлік бұйым мен басқа да мыңдаған тауар түрін ұсынды. Экспозицияға қатысқан барлық кәсіпорынға еліміздегі шағын және орта бизнеске қолдау жасайтын негізгі қаржы институты «Даму» қоры қаржылай және басқа да көмек көрсетті.«Ulttyq ónim сегізінші көрмесі – отандық кәсіпкерлікті дамытудың ең жақсы дәлелі мен көрінісі. Өндірушілер еліміздің ішкі нарығындағы ұстанымын нығайтып, экспортқа шығуда. Шетелде танымал брендке айналып жатыр. Ал шағын және орта бизнесті мемлекеттің қолдауы тек күшейе бермек. Биыл экономиканың нақты секторын жедел дамытуға бет бұрдық. Мемлекет ақпараттық технология, логистика, туризмге, тамақ өнімін, құрылыс материалын өндіруге, машина жасау, жеңіл және химия өнеркәсібі сияқты басым салалардағы ШОБ инвестициялық жобаларына ашық тапсырыс жариялады. Бұл бағытта жан-жақты қолдау көрсетіледі», — деп атап өтті көрменің ашылуында Премьер-министрдің орынбасары – ұлттық экономика министрі Серік Жұманғарин. Көрмеде ас үй плиталары, желдеткіш, медициналық жабдықтар, трансформаторлар, құрама жем, чемодандар, тоқыма бұйымдары, құрылыс материалдары, антисептиктер, киім, аяқ киім және басқа да сұранысқа ие тауарлар ұсынылған. Қатысушылардың бірі зарарсыздандыру және жуу құралын өндіруші «Аврора» өндірістік кешені» ЖШС нарықта 15 жылдан бері жұмыс істеп келеді. Мұнда косметикалық өнімнің 40, тұрмыстық химияның 55, зарарсыздандыру құралының 80-нен астам түрі бар.«Біз өнім өндіруде тиімділікке, қауіпсіздік пен тауардың тым қымбат болмауына баса назар аударамыз. Бізден ыдыс жууға арналған сабын, сұйық сабын, әйнек жууға, ас үйге, кір жууға арналған тұрмыстық химияны сатып алуға кеңес береміз. Біз желіні үнемі жаңартып отырамыз. Жаңа өнімдердің арасында үй мен кеңсеге арналған хош иісті диффузорлар бар. Booboo брендімен балаларға арналған өнімдердің сан алуан түрін шығарудамыз. Өнімдеріміз Қазақстандағы сауда желілерінде, маркетплейстерде және таяу шет елдерде кеңінен ұсынылған», — деді «Аврора» өндірістік кешені» ЖШС өңірлік директоры Ермек Еркінов.2024 жылы «Бәйтерек» холдингінің субсидиялау және кепілдік беру құралдары арқылы Үкімет бизнесті қолдау бағдарламаларын іске асыруға 336 млрд теңге бөлді. 2,7 мың жобаға 254 млрд теңге жеңілдетілген несие берілсе, жалпы 29,5 мың жоба 1,7 трлн теңгеге мемлекеттің қолдауына ие болды. Бұл шаралар 9,7 мың жұмыс орнын ашуға, 25,4 трлн теңгенің өнімін шығаруға, 1,7 трлн теңге салық түсіміне мүмкіндік берді. Нәтижесінде 2024 жылы ШОБ секторында жұмыспен қамтылғандар үлесі халықтың 48%-на тиесілі болса, ЖІӨ-ге қосылған үлес шамамен 40%-ды құрайды.Ақпарат көзі : https://www.gov.kz/memleket/entities/economy/press/news/details/997324?lang=kk

Ертең, 16 мамырда, Астанада EXPO халықаралық көрме орталығында отандық өндірушілердің жылсайынғы VIII «Ulttyq ónim» көрмесі басталады. Іс-шара 18 мамырға дейін жалғасады. Қазақстанның барлық өңірінен 350 өндіруші өз өнімін ұсынады. Елорда тұрғындары мен қонақтары Қазақстанда Үкіметтің қолдауымен «Даму» қорының бағдарламалары арқылы өндірілген тауарлардың алуан түрімен танысып, сатып ала алады.Көрмеде тамақ, жеңіл, химия өнеркәсібінен бастап, машина жасау, жабдық, зергерлік бұйымға дейінгі түрлі өнім ұсынылады. Олардың ішінде «Гормолзавод» танымал бренді, «Аq Dam» ұлттық тәттісі, Galamilk, Altay Outwear белсенді демалыс пен туризмге арналған киім мен жабдық, «Balausa Jewelry» зергерлік бұйымы, «Қайнар АКБ» ЖШС аккумуляторлық батарея өндіруші, толықтай қазақстандық брендпен әзірленіп, жиналған алғашқы ирригациялық машина өндіруші «Su bereke», «Аврора» дезинфекциялық, косметикалық және жуғыш заттарды әзірлеу мен өндіру көшбасшысы, «Almaty Turmystyq Tehnika zavody» ЖШС тұрмыстық техника өндіру зауыты және тағы басқалар бар.Сонымен қатар, «Ulttyq ónim» шеңберінде отандық кәсіпкерлікті дамыту мәселесіне арналған панельдік сессиялар өтеді. Оларға жетекші қазақстандық және халықаралық спикерлер қатысады. Қатысушылар Қазақстандағы бизнес үшін өзекті трендтерді, сын-қатерлер мен мүмкіндіктерді талқылайды.Сондай-ақ, көрме барысында «Халық Таңдауы» атты тәуелсіз, дәм тату байқауы, қазақстандық жетекші өндірушілердің әйелдер мен ерлердің киімдерінің топтамасын көрсету, кәсіпкерлердің шеберлік сыныбы, көрмеге қатысушылар ұсынатын күнсайынғы ұтыс ойыны мен концерттік бағдарлама ұйымдастырылады.Айта кетсек, көрмеде кәсіпкерлерді қолдаудағы мемлекеттік саясатты табысты іске асырудың аз ғана бөлігі көрсетіледі. Тек 2024 жылы ғана «Даму» қоры арқылы мемлекеттің қолдауымен 1,7 трлн теңге несиемен 29,5 мың жоба қамтылған екен. Ол үшін 590 млрд теңге бөлінді. Нәтижесінде 25,4 трлн теңгеге өнім шығарылып, 1,7 трлн теңге салық төленген. 9,7 мың жұмыс орны құрылған. Барлығы «Даму» қорының құралдары арқылы мемлекеттің қолдауына 225,3 мың адам ие болды. Берілген несиенің жалпы сомасы 14,1 трлн теңгелік жобалар. Осының арқасында 220 мыңнан астам жаңа жұмыс орны құрылып, 1,2 млн-нан астам жұмыс орны сақталды. Шамамен 130 трлн теңгеге өнім шығарылып, 9,0 трлн теңге салық түсті.«Ulttyq ónim» өткізу отандық тауарлар мен қызметтерді танымал етуге және ілгерілетуге ықпал ететін жақсы дәстүрге айналып отыр. Жыл сайын көрмеге қызығушылық артуда. 2022 жылы келушілер саны 20 мыңнан асса, 2023 жылы 22 мың. Сату көлемі де артып, 2022 жылы 70 млн теңгеден 2023 жылы 74,1 млн теңгеге жетті.Көрмеге кіру тегін. Тек сол көрмеде немесе «Ulttyq ónim» сайтында алдын ала онлайн-форматта тіркелу қажет. Тіркелу үшін сілтемеЕлорда тұрғындары мен қонақтарын «Ulttyq ónim» көрмесіне қатысып, отандық өндірушілерді қолдауға шақырамыз!Орны: EXPO халықаралық көрме орталығы (Мәңгілік Ел даңғылы, 53/1)Салтанатты ашылуы: 16 мамыр, сағат 09:00-де.Көрменің жұмыс уақыты: 2025 жылғы 16-18 мамыр, сағат 08:00-18:00.Ақпарат көзі : https://www.gov.kz/memleket/entities/economy/press/news/details/995792?lang=kk

Қазақстан Республикасы Үкіметінің қаулысымен Жандос Нұрланұлы Шаймарданов ұлттық экономика вице-министрі қызметіне тағайындалды. Бұл туралы Үкіметтің Баспасөз қызметі хабарлайды.  1987 жылы Шығыс Қазақстан облысында дүниеге келген. Йорк университетін (Ұлыбритания), IE университетін (Испания) бітірген.Еңбек жолын 2009 жылы ҚР Экономика және жоспарлау министрлігінде бас сарапшы қызметінен бастаған. 2010–2013 жылдары — «Самұрық-Қазына» ҰӘҚ АҚ менеджері.     2013–2014 жылдары — ҚР Экономика және бюджеттік жоспарлау министрлігі Мемлекеттің міндеттемелерін басқару және қаржы секторын дамыту саясаты басқармасының бас сарапшысы.2014–2016 жылдары — ҚР Ұлттық экономика министрлігі Стратегиялық жоспарлау және талдау департаментінің директоры.2016–2019 жылдары — Департамент директоры, «Бәйтерек» ҰБХ АҚ басқарушы директоры. 2019–2020 жылдары — «QazTech Ventures» АҚ басқарма төрағасы.2020–2022 жылдары — ҚР Ұлттық банкі Ақша-несие саясаты департаментінің директоры.  2022–2023 жылдары — ҚР Стратегиялық жоспарлау және реформалар агенттігі Ұлттық статистика бюросының басшысы.2023–2025 жылдары — ҚР Стратегиялық жоспарлау және реформалар агенттігінің төрағасы.   Ақпарат көзі : https://www.gov.kz/memleket/entities/economy/press/news/details/995732?lang=kk

Кәсіпкерлік қызметті ынталандыру мен бизнестің қаржыға қол жеткізуін қамтамасыз ету бойынша мемлекеттің саясатын іске асыру мақсатында ҚР Ұлттық экономика министрлігі «Даму» кәсіпкерлікті дамыту қорымен бірлесіп, 2025 жылдың басынан бастап жалпы сомасы 4 898 жобаға 586 млрд теңгеге қолдау көрсеткен.Бұрын айтылғандай, ағымдағы жылғы сәуірде «Даму» қоры арқылы кепілдік беру қорлары жұмысын бастады. Мұның біріншісі 7 млрд теңгеге дейінгі шағын және орта бизнес жобаларына, екіншісі 7 млрд теңгеден асатын ірі жобаларға арналған.Бүгінгі таңда 8 банкпен келісім жасалған. Кепілдік қорына алғашқы 537 млн теңге жарнаны Freedom Bank салып отыр. Сонымен қатар, Halyk Bank, ForteBank пен Банк Центркредит банкі тиісінше 2 млрд, 1,8 млрд және 1,6 млрд теңгеден үлес қоспақ.ШОБ-қа арналған Кепілдік қоры ашылғаннан бері 230 жобаға 27,7 млрд теңге несие берілген. Бұл ретте кепілдік сомасы 13,9 млрд теңге. Жобалардың 70%-дан астамы жаңа өндірісті іске қосуға, жабдық сатып алу мен құрылысқа, инвестициялық мақсатқа арналған. Ең көп қолдау көрсетілген, шамамен 40% өтінім өңдеу өнеркәсібіне тиесілі. Сондай-ақ, көлік және логистика, денсаулық сақтау мен білім беру саласында да сұраныс жоғары деңгейде.Кепілдік беру бойынша 2025 жылдың басынан бері «Даму» қоры жалпы сомасы 256 млрд теңге, жалпы кепілдік сомасы 178 млрд теңгеге 2 017 жобаға қолдау көрсетті.Пайыздық мөлшерлемелерді субсидиялаудан ШОБ субъектілеріне жеңілдікпен несие беруге көшу шеңберінде биыл қаржы көлемін 750 млрд теңгеге дейін ұлғайту көзделіп отыр. Бұл 2024 жылғы көрсеткіштен үш еседей артық. Сондай-ақ, соңғы қарыз алушы үшін сыйақы мөлшерлемесі жылдық 12,6% жаңа бағдарлама іске қосылмақ. Ол бойынша өңдеу өнеркәсібі, туризм, білім беру, денсаулық сақтау, көлік және логистика сияқты басым сектордағы жобаларға қаржы бөлінеді.Бүгінде қолданыстағы жеңілдікпен несие беру бағдарламасына сай, 755 жобаға 53 млрд теңге қолдау көрсетілген.Бұл ретте микро және шағын бизнеске берілетін 200 млн теңгеге дейінгі несиенің сыйақы мөлшерлемесінің бір бөлігін субсидиялау сақталады. Осы арқылы экономиканың басым саласындағы шағын кәсіпорындарға көмек жасалмақ.Бүгінгі таңда сыйақы мөлшерлемесінің бір бөлігін субсидиялау бойынша 2 126 жобаға 276 млрд теңге берілді. Қаражаттың негізгі бөлігі бірыңғай кешенді бағдарлама шеңберінде басым саланы қолдауға жұмсалды: өңдеу өнеркәсібіндегі 595 жобаға 90,8 млрд. теңге, көлік және қоймалауда 576 жобаға 52,8 млрд.теңге, білім беруде 158 жобаға 28,5 млрд. теңге несие бөлінген.Ақпарат көзі : https://www.gov.kz/memleket/entities/economy/press/news/details/994325?lang=kk

2025 жылғы 15 мамырда ҚР Экология және табиғи ресурстар вице-министрі Ж. Әлиевтің Атырау қаласының тұрғындарымен кездесу өткізеді.📍Кездесудің мекен-жайы: Атырау қ. Н. Балғымбаева атындағы коммуникациялар дамыту орталығында.14:30 – 15:30 - азаматтарды жеке қабылдау;15:30 – 17:00 - халықпен, коммерциялық емес және қоғамдық ұйымдармен кездесулер;17:15 – 17:45 - өңірлік бұқаралық ақпарат құралдарымен брифинг.⏯️Онлайн-көрсетілім тікелей эфирде Экология және табиғи ресурстар министрлігі «Facebook», «Youtube» әлеуметтік желілеріндегі ресми парақшасында өткізілетін болады.Сіз өз сұрақтарыңыз бен ұсыныстарыңызды вице-министрмен кездесу барысында қоя аласыз немесе келесі байланыс арналары арқылы жібере аласыз:WhatsApp: 8 (701) 100-44-66Электрондық пошта: s.koblashov@ecogeo.gov.kz  📌 Жеке қабылдауға жазылу 2025 жылғы 14 мамырға дейін (қоса алғанда) жүргізіледі. Жазылу үшін 8 (701) 100-44-66 нөміріне хабарласуыңызды сұраймыз.Барша азаматтарды белсенді қатысуға және ҚР Экология және табиғи ресурстар вице-министріне өз сұрақтарын қоюға шақырамыз!#халықпенкездесуАқпарат көзі : https://www.gov.kz/memleket/entities/ecogeo/press/news/details/994047?lang=kk

Премьер-министрдің орынбасары – ұлттық экономика министрі Серік Жұманғариннің төрағалығымен өткен экономикалық өсуді қамтамасыз ету жөніндегі штабтың кезекті отырысында газ өнеркәсібіндегі инвестициялық жобалар мен Ақтөбе облысының инвестициялық дамуы талқыланды. «QazaqGaz» ҰК» АҚ ақпараты бойынша, жобадағы мерзімі 2026 жылы белгіленген «Талдықорған–Үшарал» магистралды газ құбыры құрылысын биыл аяқтау жоспарлануда. Бұл құны 123 млрд теңге болатын жоба 2025 жылдың өзінде-ақ газ саласының қосылған құнына өз үлесін қосуы тиіс дегенді білдіреді. 2027 жылы «КС-14–Қостанай» жаңа магистралды газ құбырының құрылысы аяқталады. 2029 жылға дейін Қашаған кен орнында газ өңдеу зауыты құрылысының екі кезеңі және «Бейнеу–Бозой–Шымкент» магистралды газ құбырының екінші желісі аяқталмақ. Штаб отырысында жобаларды дамытудың барлық түйткілдері мен олардың орындалу мерзімін ұзартатын кедергілерді жою мүмкіндігі талқыланды.Ақтөбе облысында өнеркәсіптік және инвестициялық өсімнің айтарлықтай жоғары қарқыны байқалады. Өткен жылғы қорытынды бойынша өңірдің өнеркәсіптік өндіріс көлемі 4,5%-ға өсіп, 2,6 трлн теңгеге жетті (2023 жылы 2,5 трлн). 2024 жылы негізгі капиталға салынған инвестиция 901,1 млрд теңгені құрады. Оның 78%-ы жеке, 22%-ы – бюджеттік. 53%-ы тау-кен өнеркәсібіне, 42%-ы өңдеу өнеркәсібіне салынған. 2024 жылғы 9 айда тікелей шетелдік инвестиция көлемі $337,4 млн-ды құрады. Ақтөбе облысы әкімінің орынбасары Абзал Әбдікәрімовтің айтуынша, бүгінде өңірде 74 инвестициялық жоба іске асырылуда. Оның ішінде 2025 жылы 460 млрд теңгелік 10 жоба бойынша 1,2 мың жұмыс орны ашылған. Олардың қатарында «ПЗТМ Ltd» ЖШС рельс дәнекерлеу кәсіпорны, Лиманное кен орнын игеру, «Қазақстан тәуелсіздігінің 10 жылдығы» шахтасының екінші кезегі, «KAZFELTEC» ЖШС жүн өңдеу және тоқыма емес материалдар өндірісі, «Хромтау 1» жел электр стансасы құрылысы бар.Облыста Ақтөбе облысының инвестициялық бағдарламасы әзірленген. 46 іс-шарадан тұратын инвестиция тарту бойынша кешенді іс-қимыл жоспары жасалған. Инвестицияларға тапсырыс беру үшін тауашалық жоба анықталып, 265 млрд теңгеге 13 инвестициялық ұсыныс берілген. Олардың қатарында тау-кен техникасы, санфаянс, аяқ киім, балық өнімдері, құс фабрикасы, мұнара фермалары және басқалары бар.2026-2028 жылдарға жоспарланған негізгі жобалардың қатарында инвестиция көлемі 207 млрд теңгені құрайтын «AltynEx Company» ЖШС алтын құрамды кендерді өңдеу бойынша байыту фабрикасын салу, «Қазпошта» АҚ көлік-логистикалық хабы (25 млрд теңге), «Batys Bitum» ЖШС битум зауыты (111 млрд теңге) және басқалары бар. Аммиак пен карбамид, шыны ыдыстар өндіру, диатомит шикізатын өңдеу жобалары пысықталуда.Штаб отырысында өңірді газбен және сумен жабдықтау, ТЖ шеңберінде білім беру объектілері мен автожолдарды қалпына келтіру мәселелері талқыланды. Вице-премьер облыс әкімдігіне «Бәйтерек» холдингі арқылы ұсынылатын шағын және ірі бизнес үшін мемлекеттік қолдау шаралары туралы өңірдің бизнес-ортасын хабардар етуді ұсынды. Осылайша олар өз жобаларын қаржыландыруға тезірек өтінім бере алады.Ақпарат көзі : https://www.gov.kz/memleket/entities/economy/press/news/details/952543