Ішкі істер министрлігінде тәлімгерлер кеңесінің отырысы өтті.Аға буын офицерлердің қатарынан құралған бұл ұйымның жас мамандарды тәрбиелеуде орны ерекше. Тәлімгерлер кеңесі министрлік жанында ғана емес, бүкіл республика бойынша аумақтық полиция департаменттерінде жұмыс істейді.Ішкі істер органдарында жоғары моральдық-психологиялық және жауынгерлік рухты қамтамасыз етуде, басшыларға бағыт-бағдар беруде тәлімгерлердің ықпалы өте зор. Барлық өңірде 65 тәлімгерлер кеңесі құрылды. Былтыр олардың 821 отырысы өткізілді. Биылдың өзінде жеке құрамның қатысуымен 207 жиын ұйымдастырылды. Отырыстарда ішкі істер органдарының қызметін жетілдіру, әдістемелік және практикалық көмек көрсету, сондай-ақ заң мен тәртіпті сақтау мәселелері қаралды.Министрлік ұрпақтар сабақтастығы жүйесін ұстанып келеді. Осы бағыттағы жұмыс аясында мектеп қабырғасындағы балаларға да көңіл бөлінуде. Бүгінде еліміздің 103 мектебінде 125 "Жас сақшы" полиция сыныптары ашылған. Онда екі мыңнан астам оқушы білім алуда. Сонымен қатар 291 алғашқы әскери дайындық кабинеттері жұмыс істейді. Одан бөлек, сақшылардың мерейін үстем етіп, ерліктерін көпшілікке насихаттау мақсатында "Қазіргі заман қаһарманы" сынды іс-шаралар жалғасын табуда.Ақпарат көзі : https://www.gov.kz/memleket/entities/qriim/press/news/details/966345?lang=kk

Білім – кез келген мемлекеттің өркендеуінің негізгі іргетасы. Бүгінгі жастардың ғылым мен білімге деген құштарлығы – елдің ертеңін жарқын ететін басты күш. Осындай алғыр да еңбекқор жастардың бірі – Еңбекшіқазақ ауданындағы Толқын орта мектебінің оқушысы Санжар Қуандық. Ол Ұлттық бірыңғай тестілеудің (ҰБТ) наурыз айындағы сынағында ең жоғары 140 балл жинап, өзінің білім деңгейін дәлелдеді.Санжардың бұл жетістігі туған мектебінің ғана емес, бүкіл облыстың мақтанышына айналды. Осы орайда, Алматы облысының әкімі Марат Сұлтанғазиев дарынды оқушымен арнайы кездесіп, оны құттықтады. Кездесу барысында өңір басшысы білім саласындағы жаңа бастамаларға тоқталып, мектептерді жаңғырту, оқушыларға заманауи білім беру мен қауіпсіздік мәселелерінің маңыздылығын атап өтті.– Бұл жетістік – сенің табандылығыңның, ата-анаң мен ұстаздарыңның қолдауының нәтижесі. Бүгінде елімізде жастарға сапалы білім алуға барлық мүмкіндік жасалып жатыр. Осы мүмкіндікті пайдаланып, одан әрі биіктерді бағындыруға тілектеспін, – деді облыс әкімі.Санжар өз кезегінде болашақ жоспары туралы ой бөлісіп, ұстаздық жолды таңдауды мақсат еткенін жеткізді. Ол алған білімін келешек ұрпақпен бөлісуді ең үлкен миссиясы санайды.Кездесу соңында өңір басшысы жас түлекке 500 мың теңгенің сертификатын табыстап, анасы мен ұстаздарына Алғыс хат ұсынды. Мұндай қолдау – білімді жастарды ынталандырудың және олардың еңбегін бағалаудың жарқын үлгісі.Санжар Қуандықтың жетістігі – білімге ұмтылған әрбір жасқа шабыт сыйлайды. Осындай талапты, алғыр жастар көбейген сайын, еліміздің де болашағы жарқын болары сөзсіз.Ақпарат көзі : https://www.gov.kz/memleket/entities/almobl/press/news/details/966324?lang=kk

Астана, 2025 жылғы 31 наурыз – Словения Президенті Наташа Пирц-Мусардың Қазақстанға ресми сапары аясында Қазақстан Республикасы Премьер-министрінің орынбасары – Сыртқы істер министрі Мұрат Нұртілеу Словения Премьер-министрінің орынбасары – Сыртқы және еуропалық істер министрі Таня Файонмен кездесу өткізді.Тараптар Қазақстан мен Словения арасындағы ынтымақтастықты дамыту мәселелері мен келешегін талқыланды. Сауда-экономикалық байланыстарды нығайтуға және екі елдің іскерлік орталары үшін қолайлы жағдай жасауға ерекше назар аударылды.Министрлер Словения президентінің сапары аясында өтетін бизнес-форумның байланыстарды кеңейтуде маңызды қадам болатынына сенім білдірді. Осы тұста көлік және логистика, фармацевтика, жасыл энергетика, су ресурстары мен телекоммуникация салалары басым бағыттар ретінде аталып өтті.«Астана Орталық Еуропа мен Еуропалық одақтағы маңызды серіктес ретінде Люблянамен байланысты жоғары бағалайды. Көптеген мәселелер бойынша ортақ мүдделеріміз бар, атап айтқанда транзит-көліктік әлеуетімізді өзара тиімді пайдалана аламыз», – деп атап өтті М.Нұртілеу.Сыртқы саяси ведомстволар басшылары сондай-ақ көпжақты форматтағы конструктивті өзара іс-қимылды атап өтіп, өңірлік және халықаралық күн тәртібіндегі өзекті мәселелер бойынша «сағат теңестірді». Бұл бағытта Астана мен Люблянаның БҰҰ Жарғысы мен халықаралық құқық қағидаттарын сақтаудың маңыздылығы бойынша ұстанымдарының жақындығы айтылды.М.Нұртілеу Алматыда Орталық Азия мен Ауғанстан үшін БҰҰ-ның Орнықты даму мақсаттары жөніндегі өңірлік орталық құруда, сондай-ақ Қазақстан азаматтары үшін Еуропалық одақтың визалық режимін жеңілдету бойынша келіссөздерді бастауға Еурокомиссияның мандатын алуда білдірген қолдауы үшін словен тарапына алғыс білдірді.Өз кезегінде Т.Файон Словенияның Қазақстанмен өзара қызығушылық тудыратын барлық салаларда көпқырлы ынтымақтастықты дамыту жөніндегі ниетін растады.Кездесу қорытындысы бойынша тараптар екіжақты және көпжақты ынтымақтастықты одан әрі нығайту жөніндегі күш-жігер туралы уағдаласты.Ақпарат көзі : https://www.gov.kz/memleket/entities/mfa/press/news/details/966146?lang=kk

«Қазақстанға жаһандық, әсіресе өңірлік нарықта табысты бәсекеге қабілетті, қуатты әрі технологиялық тұрғыдан прогрессивті өнеркәсіп қажет» Қасым-Жомарт ТОҚАЕВ,Қазақстан Республикасының Президенті  Мемлекет басшысының өңір экономикасына инвестициялар тарту жұмысын тиімді жүргізу жөніндегі тапсырмасын іске асыру аясында инвестициялық жобаларды жүзеге асыру бойынша жүйелі жұмыстар атқарылуда.  Қостанайда 2014 жылдан бері жұмыс істеп келе жатқан индустриялық аймақ өңір дамуының негізгі драйверіне айналды. Бұл учаске барлық қажетті дайын инфрақұрылыммен, соның ішінде магистральдық газ құбыры, су құбыры, кәріз, байланыс және электр жабдықтау желілерімен қамтамасыз етілген.Қазіргі уақытта Қостанай қаласының Индустриялық аймағында жалпы құны 97,4 млрд теңгені құрайтын 7 жоба іске қосылды, 1 000-нан астам жаңа жұмыс орны құрылды. Жобалардың басым бөлігі ауыл шаруашылығы машинасын жасау саласында жүзеге асырылуда. Жалпы сомасы 348,5 млрд теңге сомасына 3,9 мың жұмыс орнын ашуды көздейтін тағы 9 жоба әртүрлі іске асыру кезеңдерінде тұр.  Сонымен қатар, Индустриялық аймақ аумағында жаңа ірі жобаларды іске қосу және жүзеге асыру жұмыстары жүргізілуде. Мәселен, 2024 жылы металлургия өндірісі саласында «KamLitKZ» ЖШС шойын құю зауыты іске қосылды. Кәсіпорын сұр шойыннан цилиндр блоктары мен бастиектерін құюға бағытталған. Өндіріс барлық заманауи талаптарға сәйкес келеді, жоғары деңгейде автоматтандырылған және энергия тиімділігі жоғары.Жобаның құны – 78,2 млрд теңге, жылдық өндірістік қуаты – 45 мың тонна құйма, 500 жаңа жұмыс орны ашылды. Бұдан бөлек, «KamLitKZ» ЖШС металлургия кластерін дамыту аясында биыл тағы 2 жобаны іске қосуды жоспарлап отыр. Олар – жетекші көпірлердің басты берілістерін өндіру және жүк көліктеріне арналған жетекші көпір балкасын тереңдетілген локализациямен шығару. Жобалардың өндірістік қуаты – жылына 74 мың редуктор және 90 мың көпір балкасы, жалпы инвестиция көлемі – 160,5 млрд теңге, 650 жұмыс орны құрылады. Бұдан басқа, 2024 жылы машина жасау саласында «Беларус» тракторларының кабиналарын («МТЗ Қазақстан» ЖШС) және көлік құралдарының кузовтарын (жедел жәрдем, автозактар, жедел әрекет ету қызметтеріне арналған көліктер – «TEHNOPARK KZ» ЖШС) өндіру басталды. Жыл қорытындысы бойынша 250 кабина және 600 бірлік кузов шығарылды. Сондай-ақ өткен жылдан бастап теміржол жылжымалы құрамына арналған серіппелердің сериялық өндірісі жолға қойылды. Осы жобаларды жүзеге асыру нәтижесінде өндіріс көлемін ұлғайтумен қатар, жаңа тауар ассортименті пайда болуына байланысты өндірілетін өнімнің номенклатурасы кеңейіп келеді. Жергілікті билік коммуникацияларды қосу тұрғысынан әрбір инвесторға жеке тәсіл қолданады. Осылайша, 2023 жылы Индустриялық аймақ аумағында автомобиль жасау секторындағы негізгі жобалардың бірі – толық циклді KIA автокөлік зауытының құрылысы басталды. Бұл жоба өңірдің экономикалық дамуына оң әсер етіп, экспорттық әлеуетін арттыруға ықпал етеді. Жобаның жалпы инвестиция көлемі – 90 млрд теңге, жылдық өндірістік қуаты – 70 мың автокөлік, 1 500 жаңа жұмыс орны ашылады. Зауытты іске қосу 2025 жылдың екінші жартыжылдығына жоспарланған. Дүниежүзілік ірі концерн – KIA Corporation компаниясының келуімен Қазақстандағы машина жасау саласындағы кадрларды даярлау жүйесінде түбегейлі өзгеріс күтілуде. Бұл елімізде жаңа буын инженерлерін даярлауға мүмкіндік береді. Баршаға мәлім, адами капитал – бәсекеге қабілетті экономиканы қалыптастырудағы басты факторлардың бірі. Осылайша, өңірде Индустриялық аймақтардың болуы инвесторларға қолайлы жағдайлар ұсынып, инфрақұрылыммен қамтамасыз ету, көлікке қолжетімділік және басқа да артықшылықтар береді. Ал бұл өз кезегінде өңірді нақты сектордың негізгі салаларына инвестиция тарту үшін тартымды етеді. Нәтижесінде, бюджетке түсетін түсімдер, жаңа жұмыс орындарының ашылуы және экономиканың тұрақты өсімі қамтамасыз етіледі.Ақпарат көзі : https://www.gov.kz/memleket/entities/kostanay/press/news/details/966122?lang=kk

Алматыда Кеңес Одағының Батыры Әлия Молдағұлованың 100 жылдығына арналған қазақ күресінен ашық чемпионат аяқталды.Ең мықты деген балуандар турнирі Қорғаныс министрлігі Спорт комитеті – Армия орталық спорт клубының филиалында өтті.300-ден астам спортшы қатысқан жарыста Қорғаныс, Төтенше жағдайлар, Ішкі істер министрліктерінің, Мемлекеттік күзет қызметінің, Шекара қызметінің, Ұлттық қауіпсіздік комитетінің және ведомстволық оқу орындарының спортшылары чемпион атағын сарапқа салды. Оның ішінде  халықаралық дәрежедегі 11спорт шебері, 52 спорт шебері және бірнеше спорт шеберіне үміткерлер бар.Чемпионат қорытындысы бойынша командалық есепте Қорғаныс министрлігі Армия орталық спорт клубының құрамасы жеңімпаз атанды. Ал екінші орынды «Оңтүстік» өңірлік қолбасшылығының балуандары иелсенсе, Ұлттық ұлан командасы үшінші орынға табан тіреді.Қазақ күресінен өткен сайыста жеке есепте 58 келіге дейінгі салмақ дәрежесінде Бекжан Төлепов (АОСК), 60 келіге дейінгі салмақ дәрежесінде Ернұр Сүлеймен (АОСК), 66 келіге дейінгі салмақ дәрежесінде Әшім Сағындық (Мемлекеттік күзет қызметі), 74 келіге дейінгі салмақ дәрежесінде Жұмажан Қожамбеков (АОСК), 82 келіге дейінгі салмақ дәрежесінде Ахметқали Әділет (Ұлттық ұлан), 90 келіге дейінгі салмақ дәрежесінде Айдар Бескемпір («Оңтүстік» ӨңҚ), 100 келіге дейінгі салмақ дәрежесінде Құдірет Досымов (Әскери полиция бас басқармасы) және100 келіден астам салмақ дәрежесінде Ғалымжан Қырықбай (АОСК) чемпион атанды.Қорғаныс министрлігі Спорт комитетінің төрағасы – Армия орталық спорт клубының бастығы полковник Арман Әбеуов атап өткендей, турнир жеңімпаздары биылғы 12-16 тамыз аралығында әскери қызметшілер арасында қазақ күресінен Астанада өтетін әлем чемпионатында сынға түседі.Ақпарат көзі : https://www.gov.kz/memleket/entities/mod/press/news/details/966095?lang=kk

Қорғаныс ведомствосының басшысы генерал-полковник Руслан Жақсылықов Алматы өңірлік гарнизонына жұмыс сапары аясында көшет отырғызуды бастап берді. Көгалдандыру акциясы Ұлы Жеңістің мерейтойына арналып отыр.Отырғызылған көшеттердің бір бөлігі Армия үйі, Даңқ мемориалы және 28-ші гвардияшы-панфиловшылар саябағын қамтитын мемориалдық кешеннің бір бөлігі болмақ.Акцияға Парламент депутаттары, Бас әскери прокурор әділет генерал-майоры Дастан Секенов, Десанттық-шабуылдау әскерлерінің қолбасшысы генерал-майор Алмаз Жұмакеев, Алматы қаласы әскери-тарихи мұражайының басшысы Алуа Байқадамова, жергілікті әскери басқару органдарының, қалалық әкімдіктің, ардагерлер ұйымдарының өкілдері және «Жас Ұлан» республикалық әскери мектебінің тәрбиеленушілері қатысты. Қорғаныс министрі Ұлы Отан соғысы жылдарында қаза тапқан қазақстандықтарды еске алуға арналған экологиялық акция отандастарымыздың Жеңіске қосқан үлесіне деген құрмет деп атап өтті.- Мегаполисте 80 түп ағаш отырғызылмақ. Жалпы Қарулы күштердің әскери бөлімдері бар әр гарнизонда осынша көшет отырғызылады. Осылайша біз Ұлы Отан соғысының батырларына құрмет көрсетеміз, - деді генерал-полковник Руслан Жақсылықов.Ақпарат көзі : https://www.gov.kz/memleket/entities/mod/press/news/details/966054?lang=kk

ҚР Қорғаныс министрлігі Армия орталық спорт клубының әскери қызметшілері ефрейтор Нұрқожа Қайпанов пен сержант Жәмила Бақбергенова Иордания астанасы Амманда өткен Азия чемпионатында алтынға ие болды.74 келіге дейінгі салмақ дәрежесіндегі финалдық жекпе-жекте балуан Нұрқожа Қайпанов қырғыз спортшысы Орозобек Тоқтомамбетовті 2:1 есебімен жеңді.Армия спортшысы Нұрқожа Қайпанов бұған дейін өткен әлем чемпионаттарында да күміс пен алтынға ие болған. Бұл оның Азия құрлығы біріншіліктеріндегі үшінші алтын жүлдесі. Спортшының қоржынында Азия чемпионатының күміс медалі де бар. Еркін күрестен Азия біріншілігінде әйелдер арасында армия спортшысы сержант Жәмила Бақбергенова чемпиондық атаққа ие болды. Ол 72 келіге дейінгі салмақ дәрежесінде қытайлық қарсыласын 4-1 есебімен жеңді. Бұл оның спорттық мансабындағы құрлықтық біріншіліктегі төртінші жеңісі.Ақпарат көзі : https://www.gov.kz/memleket/entities/mod/press/news/details/965875?lang=kk

Облыстық газдандыру схемасына сәйкес облыста газды қажет ететін 284 елді мекен бар. Қазіргі уақытта оның 157-сі (55,3%) газдандырылып, 1,2 млн адам (77%) газға қол жеткізді. Облысқа табиғи газ келетін ірі магистральдық газ құбырлары: Алматы-Талдықорған, Алматы-Байсерке-Талғар, 2 желілі Алматы-Байсерке-Талғар, Байсерке-Қапшағай, Ташкент-Бішкек-Алматы, Бұхара газ құбыры, Қазақстан-Қытай және «Шелек-Кеген-Нарынкол» газ құбырлары салынып жатыр. 2023 жылы «Алматы-Байсерке-Талғар» газ құбыры салынды (АБТ газ құбырының учаскесін жою жұмыстары 2025 жылға жоспарланды). Алдағы уақытта газ құбырын «Интергаз Орталық Азия» АҚ-на беру жоспарланып отыр. 2024 жылы 17 елді мекенде құрылыс-монтаж жұмыстары аяқталды.Олар: Жамбыл ауданында – Бірлік, Ақтерек, Ақсеңгір, Көкдала, Жайсан, Б. Қыдырбекұлы, Беріктас, Дегерес, Қазыбек бек; Алатау қаласында – Жаңаарна ықшамауданы, Еңбек ықшамауданы, Талғар ауданында – Арқабай, Көктал, Қайнар, Төңкеріс; Ұйғыр ауданында – Бахар, Шарын. Осылайша, облыстың 40 мыңнан астам тұрғынының тұрмыс жағдайы жақсарды.Сондай-ақ, 18 жоба бойынша мемлекеттік сараптаманың оң қорытындысы шықты. Олар: Балқаш ауданында – Береке, Еңбекшіқазақ ауданында – Талдыбұлақ, Сатай, Қаракемер, Нұрлы, Масақ, Достық, Лавар, Қорам, Қаратұрық, Дихан, Қаражота, Шелек-Кеген-Нарынкөл, Қарасай ауданында – Қарасай, Талғар ауданында – Дәулет ауылы. Қонаев қаласы бойынша – МКД, КПР, №19, №20, «Арна», «Спутник», «Рауан» ықшам аудандары. Бұл тағы да 100 мыңнан астам тұрғынды көгілдір отынмен қамтамасыз етуге мүмкіндік береді. 2025 жылы 12 елді мекенді газбен қамту жүйесін жүргізуге бюджеттен 3,75 млрд теңге бөлінді. Олар: Балқаш ауданында – Бақанас, Ақжар, Бояулы, Миялы жаңа ықшамауданы; Жамбыл ауданында – Таңбалытас, Шилібастау, Арқарлы; Талғар ауданында – Еламан, Кіші Байсерке, Дәулет; Ұйғыр ауданында – Тасқарасу; Қарасай ауданында – Сауыншы (РБ – 250 млн теңге, МБ – 3,5 млрд теңге).Сонымен қатар, 29 жобаны дамытуға облыстық бюджеттен 1,4 млрд теңге бөлінді. Оның 673,8 млн теңгесі Қонаев қаласын кешенді дамыту жоспарына сәйкес 8 шараны жүзеге асыруға жұмсалады. Балқаш ауданында – Бура, Үшжарма, Ақкөл; Еңбекшіқазақ ауданында – Ақши, Қайрат, Балтабай, Бөлек, Аймен, Алға, Қойшыбек, Базаркелді, Космос, Қызылшарық; Талғар ауданында – Өзтерім, Нұра, Туғанбай; Іле ауданында – Құйған; Ұйғыр ауданында – Кіші Дихан, Үлкен Дихан, Қолжат, Кетпен; КПР – «Конаев 2» АГТС, «Жаңа Іле» АГТС, аталған автоматты газ тарату стансаларынан газ құбырларын жүргізу. Қонаев қаласындағы газ магистральдарын кеңейту жұмыстары.Бұл ретте 2025 жылдың соңына дейін облысты газдандыру пайызын 59,8%-ға дейін ұлғайтып, 170 елді мекенді көгілдір отынмен қамтамасыз ету жоспарланып отыр. Қалған 114 елді мекен «Алматы облысының 2030 жылға дейінгі өңірлік газдандыру схемасына» сәйкес толық қаржыландырылған соң уақытылы газдандырылады.  Ақпарат көзі : https://www.gov.kz/memleket/entities/almobl/press/news/details/965632?lang=kk

Қазақстан Қорғаныс министрлігінің делегациясы Шанхай Ынтымақтастық Ұйымына мүше мемлекеттер қорғаныс министрліктері құрылымдық бөлімшелері басшыларының бірінші отырысына қатысты. Халықаралық әскери ынтымақтастыққа жауапты ШЫҰ-ға мүше елдер қорғаныс ведомстволары өкілдерінің кездесуі Циндао қаласында өтті. Тараптар ШЫҰ-ға мүше мемлекеттердің қорғаныс министрлері кеңесінің іс-шаралар бағдарламасын, күн тәртібін, хаттама жобаларын және бірлескен коммюникесін талқылады.Отырыста бұған қоса, Шанхай Ынтымақтастық Ұйымына мүше мемлекеттер қорғаныс министрліктері ынтымақтастық жоспарының жобасы да қаралды.Ақпарат көзі : https://www.gov.kz/memleket/entities/mod/press/news/details/965589?lang=kk

Қазақстан Республикасы Президентінің 2025 жылғы 13 ақпандағы №782 Жарлығына және облыс әкімдігінің 18 ақпандағы №47 қаулысына сәйкес, елімізде көктемгі әскерге шақыру науқаны жүзеге асуда.Биыл көктемгі әскерге шақыру аясында Алматы облысынан 1 746 жас сарбаз Қарулы күштер, Ұлттық ұлан, ҰҚК Шекара қызметі, Мемлекеттік күзет қызметі және Төтенше жағдайлар министрлігінің бөлімдеріне аттанбақ. Қазіргі таңда олардың 192-сі ҰҚК Шекара қызметіне жөнелтілді.Алматы облысының әкімі Қонаев қаласындағы облыстық жинақтау пунктіне барып, көктемгі әскерге шақыру науқанының ұйымдастырылу барысымен танысты. Өңір басшысына облыстық қорғаныс істері жөніндегі департаменттің бастығы, полковник Нұрбол Жұмашхан мен оның орынбасары Дулат Акишев шақыру жұмыстарының негізгі кезеңдері мен атқарылған шаралар жөнінде баяндама жасады.Сондай-ақ облыс әкімі «Мобилизациялық дайындықты, азаматтық және аумақтық қорғанысты қамтамасыз ету қызметі» КММ-не барып, мекеме директоры Айдын Бекбосыновтың есебін тыңдады. Одан бөлек, ТОО «Гранит» компаниясының өкілдері өз өндірістері мен әскери мақсаттағы өнімдері туралы таныстырылым жасады.Жауынгерлік қабілет – басты назарда. Өңір басшысы көктемгі шақыру науқанының маңыздылығын атап өтіп, барлық жауапты құрылымдардың үйлесімді әрі ашық жұмыс істеуін қамтамасыз етуді тапсырды.“Әскерге шақыру – тек формальды рәсім емес, бұл – еліміздің қауіпсіздігі мен қорғаныс қабілетіне тікелей әсер ететін маңызды мемлекеттік процесс. Сондықтан барлық шаралардың заң аясында, әділ және ашық өтуі маңызды. Жас сарбаздар үшін барынша жайлы жағдай жасалып, медициналық тексеру мен дайындық жоғары деңгейде жүргізілуі тиіс”, – деді облыс әкімі.Айта кетейік, көктемгі әскерге шақыру науқаны аясында болашақ сарбаздар медициналық тексеруден өтіп, әскери бөлімдерге жіберілмес бұрын тиісті дайындық шараларынан өтеді.Ақпарат көзі : https://www.gov.kz/memleket/entities/almobl/press/news/details/965559?lang=kk

Ақтау гарнизонындағы Әскери-теңіз күштерінің офицерлерінен, старшиналары мен матростарынан құралған 150-ден астам әскери қызметшісі Ұлы Отан соғысындағы Жеңістің 80 жылдығына арналған әскери парадқа дайындық үшін Астанаға шықты. 7 мамырда Астанада өтетін салтанатты парадқа қатысатын теңізшілерді туған-туыстары вокзалда зор ықыласпен және мақтанышпен шығарып салды.– Ұлымды мақтан тұтамын, – деді матрос Әли Битевтің анасы Гүлмира Қалмұратова, – ол алты айдан бері әртекті корабльдер  дивизионында әскери корабльде қызмет етіп келеді. Парадқа қатысу – бұл үлкен мәртебе және мұндай мүмкіндік бәріне бірдей беріле бермейді. Барлық теңізшілерге осы жауапты миссияны орындауда сәттілік тілеймін. Әскери парадқа әртүрлі бөлімшелердің теңізшілері, соның ішінде әртекті корабльдер дивизионы, десанттық-шабуылдау батальоны, гидрографиялық қамтамасыз ету қызметі, коменданттық рота және Әскери-теңіз күштерінің оқу-жаттығу орталығы қатысады.Шеруге дайындық қарқынды жүріп жатыр және әскери қызметшілердің әрқайсысы бұл күннің ел үшін қаншалықты маңызды екенін түсінеді. Олар өздерін машығын және Астанадағы Жеңіс парадында Қазақстанның Әскери-теңіз күштерін лайықты деңгейде көрсетуге дайын.Ақпарат көзі : https://www.gov.kz/memleket/entities/mod/press/news/details/965543?lang=kk

Ұлы Отан соғысындағы Жеңістің 80 жылдығына арналған әскери шеруге Ақтау гарнизонынан 150-ге жуық теңізші қатысады.Әскери теңізшілер елордада өтетін салтанатты шараға дайындығы қарқынды жүріп жатыр. Әртекті кемелер дивизионының жеке құрамынан 30-ға жуық теңізші, десантты-шабуылдаушы батальонынан 40 теңіз жаяу әскері, гидрографиялық қамтамасыз ету қызметінің 25 жауынгері және әскери-теңіз базасы басқармасының 30 әскери қызметшісі қатысады.Олар қазір әскери-теңіз базасы мен әскери пирсте саптық дайындық элементтерін жетілдіруге жаттығып жатыр.– Бүгін біз саптық байқау өткіземіз. Содан кейін жеке құрамның күшейтілген дайындығы жалғасады. Көп ұзамай парадқа қатысатын әскери қызметшілер елордаға жол жүреді, – деп атап өтті әскери-теңіз базасының командирі полковник Есенғали Байботаев.Дайындық әскери қызметшілерден қатаң тәртіп пен ұйымшылдықты талап етеді. Өйткені әр элемент жетілдірілуі керек. Теңізшілердің жаттығуы елордада Әскери-теңіз күштерінің сап дайындығын лайықты паш ете аларлық нақты жоспарға сәйкес ұйымдастырылған.Ақпарат көзі : https://www.gov.kz/memleket/entities/mod/press/news/details/965537?lang=kk

Аймақ басшысы Нұрлыбек Нәлібаевтың төрағалығымен облыс әкімдігі жанындағы терроризмге қарсы комиссия отырысы өтті. Күн тәртібінде 3 мәселе қаралды.Облыстық жұмылдыру дайындығы, аумақтық және азаматтық қорғаныс басқармасының басшысы Марат Құрманбаев терроризмге қарсы орталық пен облыстық комиссияның хаттамалық шешімдерінің, ақпараттық қажеттілік тізбесінің орындалуы туралы баяндады. Облыстық дін істері басқармасының басшысы Дінмұхамед Ермеков тәуекел топтармен жүргізілген ақпараттық-түсіндіру жұмыстарының нәтижелеріне тоқталды. Этносаралық қарым-қатынастар мен этностар арасындағы қақтығыстардың алдын алуда атқарылған жұмыстарды облыстық қоғамдық даму басқармасының басшысы Руслан Каюпов айтты.Жиында облыс әкімі көтерілген мәселелерге қатысты жауапты тұлғаларға бірқатар тапсырма берді. Облыстық жұмылдыру дайындығы, аумақтық және азаматтық қорғаныс басқармасы терроризмге қарсы орталық пен облыстық комиссияның хаттамалық шешімдерінің орындалуын қатаң бақылауға алып, шараларды толық әрі сапалы жүзеге асыруы тиіс. Профилактикалық шаралардың сапасын арттыруда Қызылорда қаласы мен аудан әкімдіктері, жауапты мемлекеттік органдар әдістемелік көмек көрсетуі керек. Облыстық дін істері басқармасына тәуекел топтармен жүргізілетін профилактикалық шаралардың тиімділігін арттыру үшін ақпараттық-түсіндіру тобының жұмысын жетілдіру жүктелді.Аймақ басшысы этносаралық қарым-қатынас ерекше бақылауды қажет ететін маңызды мәселе екенін атап өтті. Өңірлік ақпараттық-түсіндіру тобының көмегімен этнос өкілдері көп шоғырланған жерлердегі профилактикалық және мәдени-көпшілік іс-шараларға оларды кеңінен тарту, этносаралық достық пен татулықты насихаттау әрдайым назарда болуы керек.Ақпарат көзі : https://www.gov.kz/memleket/entities/kyzylorda/press/news/details/965497?lang=kk

Бүгін ҚР Премьер-министрі Олжас Бектеновтің төрағалығымен республикалық кеңес өтті. Күн тәртібінде жаңа энергетикалық қуат көздерін ұлғайту, батыс өңірінің желілерін бірыңғай энергетикалық жүйеге қосу, оңтүстік өңір желілерінің қуатын күшейту, энергия үнемдеу және тиімділігін арттыру мәселелері қаралды. Оған облыс әкімі Нұрлыбек Нәлібаев селекторлық режим арқылы қатысты.Мемлекет басшысының тікелей қолдауымен Қызылорда қаласында 215 млрд. теңгеге қуаттылығы 240 мегаваттық жаңа жылу-электр орталығы салынуда. Бүгінде инвестор «Акса Энерджи» түрік компаниясы жылу орталығының құрылысына 137 млрд. теңгеден астам инвестиция құйып, жұмыстың 70 пайызы аяқталды.Жаңа станция облыстың электр энергиясына деген қажеттілігін толығымен қамтамасыз етіп, өндірілген электр энергиясының бір бөлігін өзге өңірлерге сатуға мүмкіндік береді. Биыл 4 тоқсанда аймақ үшін ерекше маңызы бар нысан ел игілігіне пайдалануға беріледі. Жаңа орталыққа бюджет есебінен 15 млрд. теңгеге газ құбыры тартылды.Президент тапсырмасына сәйкес, оңтүстік өңірлерде электр энергиясының тапшылығын болдырмау үшін Катар еліне іссапар кезінде қуаттылығы 1100 МВт, құны 800 млрд теңге болатын бу-газ қондырғысын салу келісілді. Жаңа бу-газ қондырғылары Сырдария ауданының аумағынан берілген 280 гектар жерге салынады. Аталған мегажобаны 2028 жылы толығымен іске қосу жоспарланған.Қазіргі таңда техника-экономикалық негіздемесі әзірленуде. Жоба аясында «Қызылорда-Жезқазған» және «Қызылорда-Шымкент» 500 киловольттық жоғары қуатты электр желісі тартылады. Аймақта 10 мыңнан аса шақырым электр желісі мен 2 000 аса қосалқы станция бар.Олардың тозу деңгейі 62% құрайды. Энергия үнемдеудің жаңа технологияларын қолданып, тозған желілерді азайту үшін өткен жылы 741 шақырым электр желісі мен 127 қосалқы станция жаңғыртылды. Биыл 15 млрд. теңгеге 3 ірі қосалқы станция, 314 шақырым әуе желісі және 127 қосалқы станцияны қайта жаңғыру қолға алынбақ.Ақпарат көзі : https://www.gov.kz/memleket/entities/kyzylorda/press/news/details/965493?lang=kk

Сыр елі өнерпаздарының Наурыз мерекесінің тарихи-мәдени маңызын түсіндіру, тәжірибе алмасу мақсатындағы өнер сапары жалғасуда. Халқымыздың ұлттық мұрасын әлем жұртшылығына таныстыратын «NAURYZ – CELEBRATION OF SPRING» концерті бұл жолы Эстонияның Таллин қаласында өтті. Қазақтың дәстүрлі музыкасы мен өнерін ұлықтаған Қызылорда облыстық филармониясының өнерпаздары қазақтың ән-жырын әуелетіп, көрермен ықыласына бөленді.Концерттің ашылуында сөз алған Қазақстан Республикасының Эстония Республикасындағы Елшісі Алтай Күлгінов өнер ұжымына қолдау көрсеткен аймақ басшысы Нұрлыбек Нәлібаевқа алғысын айтты.Шараны 30 мемлекеттің елшілері мен дипломаттары, жергілікті қазақтар мен таллиндіктер барлығы 200-ден астам көрермен тамашалады. Келуші қонақтарға қазақтың түрлі ұлттық тағамдары ұсынылып, наурыз дәмі үлестірілді.Эстон фольклоры қазақ ауыз әдебиеті секілді ұрпақ бойына сан ғасырлық тағылым сіңіретін мұраға бай, яғни біздің халықтың мәдениетімен мазмұндас келеді. Терең тәрбие мен сыйластыққа шақырады. Сол себепті жиналған қауым өнер сапарымен келген шығармашылық ұжымды зор қошеметпен қолдады. Мерекелік концерт «Жарапазан» жырымен басталып, қазақ дәстүрімен шашу шашылды. «Тойбастар» шырқалып, Наурыз-думанға қатысқан қала тұрғындары мен қонақтары, диаспора мүшелері мен шетелдік студенттер қазақ музыкасы және дәстүрлері жайлы мол мағлұмат алды.Ұлттық музыканың ұлы жауһарларын төрткүл дүниеге танытып жүрген «Ақмешіт» фольклорлық ансамблінің (Жетекшісі – Нұрғиса Нұрбай), Сыр мәдениетінің майталмандары Руслан Ахметов, Шолпан Бимбетова, Самал Байсейтова, Ақмарал Ноғайбаева, Марат Сүгірбай, айтыскер ақын Мұхтар Ниязов, халықаралық және республикалық конкурстардың лауреаттары Бағдәулет Қарғабаев, Сымбат Тасбергенова, Мағжан Аманжолов, Ақылбек Табынбаев, Тоқтар Ағыраев, Ақнұр Аманбаева, Сәбит Ділдабаев, Алмас Әлжанов, Заманбек Нысанбаев, Арман Төлештің өнерін таллиндік талғампаз көрермен жоғары бағалады.Концертке келушілерге ұлттық нақышта жасалған сый-сияпаттар берілді.Ақпарат көзі : https://www.gov.kz/memleket/entities/kyzylorda/press/news/details/965492?lang=kk

29 наурызда Ұлы Отан соғысының қатысушысы Василий Иванович Зинченко 101-ші туған күнін атап өтті. Қарияны Десанттық-шабуылдау әскерлерінің, Түрксіб ауданының қорғаныс істері жөніндегі басқармасының әскери қызметшілері, Радиоэлектроника және байланыс әскери-инженерлік институтының, Құрлық әскерлері әскери институтының курсанттары, әкімдік пен ҚР Қарулы күштері ардагерлер кеңесі филиалының өкілдері құттықтады.Ардагердің қаһармандық жолына терең құрмет көрсете отырып, оған Ұлы Жеңіске, бейбітшілікке қосқан баға жетпес үлесі үшін алғыс айтып, Қорғаныс министрінің атынан құттықтау хатын табыс етті.Мерейтой иесі шын жүректен жылы лебізін білдіріп, майдан жылдары мен соғыс уақытындағы ауыр сынақтар туралы естеліктерін әңгімелеп берді.Василий Иванович Ленинград, 2-ші Украина және Беларусь майдандарында шайқасты. Ол Сталинградты қорғауға, Польша мен Украинаны азат етуге және Берлинге шабуыл жасауға қатысты. Германия астанасында фашистік Германияны жеңді.Соғыстан кейін Алматыға оралып, көп жылдар бойы жергілікті сүт комбинатында еңбек етті. Жұбайымен бірге үш ұл мен бір қыз тәрбиелеп өсірді. Олардан жеті немере, он үш шөбере және екі шөпшек сүйді.Ұлы Отан соғысы жылдарында көрсеткен ерлігі мен батырлығы үшін Василий Зинченко Отан соғысы, Қызыл Жұлдыз ордендерімен және "Сталинградты қорғағаны үшін" және "Германияны жеңгені үшін" медальдарымен марапатталды. Ақпарат көзі : https://www.gov.kz/memleket/entities/mod/press/news/details/965465?lang=kk

Армияның орталық спорт клубында Ұлы Отан соғысындағы Жеңістің 80 жылдығына және Кеңес Одағының Батыры Әлия Молдағұлованың 100 жылдығына арналған күштік құрылымдар арасында самбодан чемпионат өтті.Турнирдің құрметті қонақтары қатарында Халық қаһарманы генерал-полковник Сәт Тоқпақбаев, ҚР Парламентінің депутаттары, күш құрылымдарының басшылары және белгілі спортшылар болды.– Сіздерді Армияның орталық спорт клубында көргеніме қуаныштымын. Спорттық және жауынгерлік самбо федерациясының президенті ретінде біз бейінді министрлікпен бірлесіп самбоны дамыту жүйесін жетілдіру және оны өңірлерде қаржыландыруды ұлғайту үшін қадамдар жасап жатқанымызды атап өткім келеді. Спорттың осы түрімен жаппай қамту үшін балалар мен жасөспірімдерге арналған самбо секцияларын ашамыз, – деді Қорғаныс министрі генерал-полковник Руслан Жақсылықов федерация қызметінің бағытын нақтылай түсіп.Чемпионатқа Қорғаныс, Ішкі істер, Төтенше жағдайлар министрліктерінің, Мемлекеттік күзет қызметінің, Ұлттық ұланның, Шекара қызметінің, Ұлттық қауіпсіздік комитетінің, өзге де құрылымдардан 26 командадан 140-тан астам спортшы қатысты. Татами шеберлері жеті салмақ дәрежесінде өнер көрсетті.Чемпионат қорытындысы бойынша командалық есепте Қорғаныс министрлігінің Армия орталық спорт клубы құрамасы Ұлттық ұлан мен Арнайы операциялар күштерінен басым түсіп, жеңіске жетті.58 келіге дейінгі салмақ дәрежесінде жеке есепте Айбек Қалимов (Десанттық-шабуылдау әскерлері), 64 келіге дейін – Жандос Бейсенбаев (Арнайы операциялар күштері), 71 келіге дейін – Арнұр Қуатай (АОСК), 79 келіге дейін – Санжар Нұрсейіт (АОСК), 88 келіге дейін – Азат Қуанов (Ұлттық ұлан), 98 келіге дейін – Болат Сапар (Ұлттық ұлан), 98 келіден жоғары – Әділ Оразбаев (АОСК) чемпион атанды.Жарыс алдындағы іс-шарада қатысушылар үшін шеберлік сабақтары ұйымдастырылды. Қазақ күресінен әлем чемпионы капитан Ғұмар Қырғызбаев, қазақ күресінен екі дүркін әлем чемпионы қатардағы жауынгер Жұмажан Қожамбеков, самбодан әлем чемпионы қатардағы жауынгер Есентай Имаханов және самбодан әлем чемпионатының жүлдегері сержант Арнұр Қуатай аудару, партерде ұстау және тепе-теңдіктен шығару элементтері бар техникалық әдістерді көрсетті.Айта кету керек, қазақ күресінен жарыс 30 наурызда басталады. Бұл осы жылдың 12-16 тамызы аралығында Астанада әскери қызметшілер арасында қазақ күресінен өтетін әлем чемпионатына Қазақстан командасын қалыптастыру үшін іріктеу кезеңдерінің бірі болмақ.Ақпарат көзі : https://www.gov.kz/memleket/entities/mod/press/news/details/965462?lang=kk

Вице-премьер – ұлттық экономика министрі Серік Жұманғариннің төрағалығымен өткізілген экономикалық өсуді қамтамасыз ету жөніндегі штаб отырысында Шығыс Қазақстан және Павлодар облыстарын, сондай-ақ ауыл шаруашылығы саласын дамыту мәселелері қаралды.Қазақстанның ЖІӨ-дегі ауыл шаруашылығының үлесі 3,9%-ды құрайды. Саланың биылғы экономикалық өсімінің міндеті – өткен жылдың көрсеткішіне +2%-ды қамтамасыз ету. Биылғы екі айда ауыл шаруашылығы жалпы өнімінің көлемі 3,2%-ға ұлғайып, 434,1 млрд теңге болды. АӨК субъектілерін ұзақмерзімді мемлекеттік қолдау тәсілдерін іске асыру есебінен жоспарланған индикаторға қол жеткізу қарастырылып отыр.Ауыл шаруашылығы вице-министрі Азат Сұлтановтың дерегінше, көктемгі егіс жұмысын жеңілдікпен несиелендіруге қол жеткізудегі маңызды фактор – 2024 жылы несиені ӘКК арқылы алудың мүмкіндігі. Енді шаруалар көктемгі егіс жұмысына алты арна арқылы жеңілдігі бар несие ала алады: Аграрлық несие корпорациясы, ӘКК, екінші деңгейлі банктер, несиелік серіктестіктер, өңірлік инвестициялық орталықтар және МҚҰ. Бүгінде жалпы сомасы 367,3 млрд теңгеге 5 мыңға жуық өтінім келіп түсті. Берілген несие көлемі бойынша ӘКК көш бастап тұр (берілген қаражаттың жалпы көлемінің 39%-ы).Сонымен қатар кепілдік базасы жеткіліксіз фермерлер үшін көктемгі дала жұмыстарына арналған қарыз сомасының 85% мөлшерінде кепілдік беру бағдарламасын іске асыру жалғасуда. Осы жылы жалпы кепілдік сомасы 85,9 млрд теңгеге 502 кепілдік берілді. Қарыз сомасы 101,1 млрд теңге. Өткен жылы 80 млрд теңге кепілдік сомасына 401 өтінімге кепілдік берілді. Несие сомасы 94,2 млрд теңге.Азық-түлік өнімін өндіру саласында биылғы екі айда қант өндірісі (15,2 мың тоннадан 65,6 мың тоннаға дейін), өсімдік майы 26,7%-ға, шұжық өнімі 12%-ға, сары май 11,2%-ға, ұн 6,8%-ға және ашытылған сүт өнімі 3,5%-ға өсті. Азық-түлік өндірісін одан әрі дамыту үшін ауыл шаруашылығы өнімдерін қайта өңдеуді дамыту жөніндегі кешенді жоспар іске асырылуда. Жоспар шеңберінде 2024 жылы 30 млрд теңгеден астам сомаға 37 инвестициялық жоба пайдалануға берілді. Бұл ірімшік, ет өнімі, өсімдік майы, жарма және басқа да өнімдер өндіретін кәсіпорындар. Алдағы үш жылда 176 млрд теңгеден астам сомаға 58 инвестициялық жобаны іске асыру жоспарлануда.«Өңдеу кәсіпорындарына көктемгі егіс жұмысын несиелендіруге ұқсас айналым қаражатын толықтыруға жылдық 5%-бен 48,5 млрд теңге бөлу көзделіп отыр», — деді Азат Сұлтанов.Ауыл шаруашылығы министрлігін тыңдағаннан кейін вице-премьер өңірлердің алдына АШМ ұсынымдарын ескере отырып, егіс алқаптарын әртараптандыруды жалғастыру міндетін қойды.«Сұранысқа ие және жоғары маржалық дақылдарды өсіруге көшу керек. Бұл ауыл шаруашылығының экономикалық өсуін қамтамасыз ету бойынша қойылған индикаторды орындауға қол жеткізудің жалғыз жолы ғана емес. Үкіметтің инвестицияларға тапсырысы шеңберінде азық-түлікті қайта өңдеу және өндіру жөніндегі жобаларға өтінімдерді жинау бойынша жұмыс әлсіз жүргізіліп жатыр. Барлық өңірлер кәсіпкерлерге Аграрлық несие корпорациясы арқылы несиеге қол жеткізудің мүмкіндігі туралы хабарлауы қажет», — деп атап өтті Серік Жұманғарин.Павлодар облысында қаңтар-ақпанда қысқамерзімді экономикалық өсім өткен жылғы сәйкес кезеңмен салыстырғанда – 5,9%-ды құрады. 2030 жылға дейін 12 370 жұмыс орнын ашатын, құны 6,8 трлн теңге болатын 85 инвестициялық жобадан тұратын пул қалыптастырылды. Олардың ішінде 5 ірі металлургиялық жоба бар. Олар 2028 жылға қарай өңірдің металлургия саласы өндірісінің көлемін 29,4%-ға ұлғайтуға мүмкіндік береді. Бұл қуаты 160 мың тонна және 240 мың тонна екі ферроқорытпа зауытының, қуаты 89,6 мың тонна Ақсу электр металлургия зауытының, көлемі 35 мың тонна техникалық кремний өндіру зауытының құрылысы. Сонымен қатар Екібастұзда 60 мың тоннаға ферроқорытпа өндірісін ұйымдастыру жобасы бар.Металлургиялық кәсіпорындар өнімінің өзіндік құнының құрылымында электр энергиясы елеулі үлесті алады. Штаб отырысында Павлодар облысы әкімінің орынбасары Дәурен Жамбайбек бүгінгі таңда қолданыстағы электр энергиясының бірыңғай тарифі аумақтың қашықта орналасуына және қосылу нүктесіне қарамастан өнімнің өзіндік құнының айтарлықтай өсуіне және осы жобалардың өндірістік шығындарының артуына әкелетінін атап өтті. Аса ірі жобаларға инвестициялық келісімшарттың қолданылу кезеңінде бірыңғай жеңілдігі бар инвестициялық тарифті енгізу мүмкіндігі мәселесі көтерілді. Сонымен қатар әкімнің орынбасары «Kazferro Limited» ЖК жобасын іске асыру үшін Екібастұз индустриялық аймағына және «Павлодар» АЭА-ға инженерлік-коммуникациялық инфрақұрылым (ИКИ) жүргізуді қаржыландыру қажеттігін атап өтті. Вице-премьер Табиғи монополияларды реттеу комитетіне электр энергиясының тарифі бойынша мәселені қарауды, ал ИКИ жүргізуге арналған өтінімді өңірлердің қажеттіліктерінің жалпы парағына енгізуді тапсырды. СҚО-да өткен екі айдағы экономиканың өсу қарқыны 11,1%-ды құрады. 2024-2028 жылдары 7193 жұмыс орнын ашатын 51 инвестициялық жобаның пулы әзірленді. Оның 15-і 2024 жылы іске асырылса, биыл 1119 жұмыс орны құрылатын 87 млрд теңгеге тағы 11-ін пайдалануға беру жоспарлануда.СҚО әкімінің орынбасары Рүстем Құрманов инвестициялық жобаларды іске асыру кезінде туындаған бірқатар мәселені көтерді.Бірінші кезекте, қажетті инженерлік инфрақұрылымды субзоналарға жеткізу және 21 қатысушы тіркелген «Qyzyljar» арнайы экономикалық аймағы қызметінің басым түрлерінің тізбесін кеңейту. Екіншісі – Петропавлда тұрмыстық қатты қалдықты көмуге арналған полигон салу. Биыл қолданыстағы полигонды пайдалану мерзімі аяқталатындықтан, жаңасын салу қажет. Өңірден берілген өтінімді қаржыландыруға қаржы бөлу үшін оны келісуді жеделдету қажет.Отырыс қорытындысы бойынша вице-премьер Ұлттық экономика министрлігіне бірінші тоқсан қорытындысы бойынша инвестициялық жобаларды дамытуды тежейтін өңірлердің инженерлік-инфрақұрылымдық тізімін және бюрократиялық кедергілерді Үкімет деңгейінде жедел шешу үшін дайындауды тапсырды.Ақпарат көзі : https://www.gov.kz/memleket/entities/economy/press/news/details/965416?lang=kk

Елордалықтар мен қала қонақтары елорда теміржол вокзалында Десанттық-шабуылдау әскерлерінде қызмет өткерген сарбаздарды қарсы алды.Ұлы Отан соғысындағы Жеңістің 80 жылдығы аясында өткен қала әкімдігінің бұл іс-шарасы әскери қызметтің беделін арттыруға бағытталды. Десантшыларды Қарулы күштердің ардагерлері, ауған жауынгерлері мен ата-аналары қарсы алды.– Бүгін біз Десанттық-шабуылдау әскерлерінің 32363 әскери бөлімінде қызмет еткен 27 сарбазды қарсы алдық. Өткен жылы үздіктердің үздігі ғана  іріктеуден өтіп, осы әскери бөлімге жолдама алған болатын, – деді Астана қаласы қорғаныс істері жөніндегі департаментінің өкілі запастағы полковник Ғани Артықов. – Маусым айының соңына дейін Астанаға өткен жылдың көктемінде шақырылған 1000-нан астам жас оралады. Наурыз-маусым айларында олардың орнына 1200-ге жуық жас әскерге жіберіледі.Әскери қызметтен өткен азаматтар үшін жұмысқа орналасу мен жоғары білім алуда жаңа перспективалар ашылғанын атап өткен жөн. Олар жоғары оқу орындарына ҰБТ тапсырмай түсуге құқылы. Ал жауынгерлік дайындық үздіктері грантпен тегін жоғары білім ала алады.Кіші сержант Қуаныш Ибрагимов өз болашағына сенімді.– Бұл кезең менің өмірімді түбегейлі өзгертті. Күн сайын қиындықтарды жеңуге тура келді. Әрбір тапсырма, жаттығу мені келесі деңгейге көтеріп, жауапкершіліктің, тәртіп пен серіктестіктің мағынасын түсінуге көмектесті. Алған тәжірибем өмірде тез шешім қабылдауға және жауапкершілікті сезінуге көмектеседі, – деді ол.Ақпарат көзі : https://www.gov.kz/memleket/entities/mod/press/news/details/965414?lang=kk

54-ші артиллериялық құраманың жүзге жуық әскери қызметшісі Ұлы Отан соғысындағы Жеңістің 80 жылдығына арналған әскери парадқа дайындыққа қатысу үшін елордаға аттанды.Жеке құрам өздерімен бірге шеру өтетін жерге Шпагин пситолет-пулеметтерін, 7,62 мм калибрлі «Максим» пулеметтерін, Орал-4320 базасындағы «Прима» реактивті жүйесінің жауынгерлік машиналарын және 2А65 152 мм гаубицаларын әкелуде.– Біздің әскери қызметшілер қарқынды дайындықтан өтті және Гвардейск гарнизоны мен «Оңтүстік» өңірлік қолбасшылығы атынан шеруге қатысуға дайын, – деді құрама командирі полковник Дәулет Жорғатаев.54-ші артиллериялық құраманың тарихы 1941 жылы Барнауыл қаласында құрылған 828-ші артиллерия полкінен басталады. 1942 жылы 3 наурызда бір бөлігі Батыс майданға аттанып, онда 51-ші армияның 298-ші атқыштар дивизиясының құрамында ірі жауынгерлік операцияларға қатысты.1942 жылғы 23 қарашадан 1943 жылғы 3 ақпанға дейінгі Сталинград шайқасы кезінде полк жау тобын қоршауға алып, жою шайқастарына қатысты. Көрсеткен ерлігі үшін бөлімге құрметті гвардиялық атағы берілді. Кейін171-ші гвардиялық артиллериялық полк болып өзгертілді. 1946 жылы маусымда құрама Самарқандқа, ал 1970 жылы Жамбыл облысының Гвардейск кентіне көшірілді. – Жеңіс шеруіне қатысу мен үшін үлкен мәртебе. Үлкен атам Нұрмұхан Есімов пен оның бауыры Нұрғазы Ұлы Отан соғысы майданында соғысқан. Елордада өтетін осы маңызды оқиғаға қатысу құрметіне ие болғанымды мақтан тұтамын, – деп атап өтті гвардия қатардағы жауынгері Ілияс Есімов.Аға буынның жауынгерлік дәстүріне адал артиллериялық құрама әскери қызметшілерінің Жеңіс шеруіне қатысуы – фашистік басқыншылармен болған қанды шайқаста бейбітшілік үшін қан төккен қазақстандық жауынгерлердің ерлігіне көрсеткен құрмет болмақ.Ақпарат көзі : https://www.gov.kz/memleket/entities/mod/press/news/details/965411?lang=kk