2025 жылғы 18 қыркүйекте Ақтау қаласында өңірлік деңгейде Орнықты даму мақсаттарын (ОДМ) жергіліктендіруге арналған алғашқы кездесу өткізілді. Іс-шара әртүрлі деңгейдегі мәслихат депутаттарын біріктіріп, орнықты дамудың ұлттық басымдықтарын ілгерілетудегі маңызды қадам болды.Кездесуге бас болғандар Қазақстан Республикасының Ұлттық экономика министрлігі мен БҰҰ Даму Бағдарламасы (БҰҰДБ). Семинарды ұйымдастыру парламенттік комиссияның орнықты даму саласындағы ұлттық мақсаттар мен міндеттердің орындалуын мониторингілеу жөніндегі ұсынымдарын іске асырады.Қатысушыларға арнап, Маңғыстау облыстық мәслихатының төрағасы Жаңбырбай Матаев, Маңғыстау облысы әкімінің орынбасары Тілек Қошмағанбетов, Ұлттық экономика министрлігінің Әлеуметтік саланы, құқық қорғау және арнайы органдарды дамыту департаментінің директоры Нұргүл Жанназарова және БҰҰДБ жобалық талдаушысы Заур Ибрагимов құттықтау сөз сөйледі.Нұргүл Жанназарова өз сөзінде жергіліктендіру жаһандық мақсаттарды табысты іске асырудың негізгі шарты екенін атап өтті."ОДМ-ға жергілікті деңгейде белсенді жұмыс істеу арқылы ғана қол жеткізуге болады. Сондықтан мәслихат депутаттарының қатысуы маңызды рөл атқарады", - деді Нұргүл Жанназарова.Семинар қатысушылардың ОДМ жергіліктендіру әдістемесі туралы хабардарлығын арттыруға және өңірлік даму жоспарына мақсаттарды интеграциялауда депутаттардың құзыретін нығайтуға ықпал етті. Бұл өңірлердің неғұрлым теңгерімді әлеуметтік-экономикалық және экологиялық дамуын қамтамасыз етуге мүмкіндік береді.Мемлекеттік жоспарлау жүйесі шеңберінде ОДМ ұлттық индикаторларын стратегиялық құжаттарға, оның ішінде оларды бейімдеуді және өңірлік даму бағдарламаларына енгізуді декомпозициялау жүргізіледі.Ақпарат көзі : https://www.gov.kz/memleket/entities/economy/press/news/details/1070489?lang=kk

ҚР Энергетика министрлігінің Мемлекеттік энергетикалық қадағалау және бақылау комитетінде 2025–2026 жылғы жылу беру маусымына дайындық мәселелері бойынша республикалық селекторлық кеңес өтті.Кеңеске ҚР Индустрия және құрылыс министрлігінің, облыстар мен Астана, Алматы, Шымкент қалалары әкімдіктерінің, «KEGOC» АҚ, «Қазақстан Темір Жолы» ҰК» АҚ, «ҚазТрансГаз Аймақ» АҚ және энергетикалық кәсіпорындардың өкілдері қатысты.Іс-шара барысында энергия көздері, электр және жылу желілерін жөндеу науқанының іске асырылу барысы туралы есептер тыңдалды.Бүгінгі таңда Қостанай, Ақмола, Батыс Қазақстан, Қарағанды және Ұлытау облыстарының жылу желілерінде, сондай-ақ Аягөз және Сәтпаев қалаларындағы қазандықтарда жөндеу жұмыстарының қарқыны төмен деңгейде қалып отыр.Бұдан бөлек, бірқатар электр станцияларында негізгі жабдықтарды жөндеу мерзімдерінің сақталуын бақылауды күшейту қажеттігі атап өтілді.Кеңес қорытындысы бойынша жергілікті атқарушы органдар мен энергетикалық кәсіпорындарға жылыту маусымына уақтылы және сапалы дайындықты қамтамасыз ету бойынша нақты тапсырмалар берілді.Ақпарат көзі : https://www.gov.kz/memleket/entities/energo/press/news/details/1070592?lang=kk

Қазақстан Республикасының Қаржы вице-министрі Дәурен Кеңбеил бастаған еліміздің делегациясы Мәскеуде «Манеж» орталығының көрме залында өткен X Мәскеу қаржы форумына қатысты.Аталған форум – макроэкономикалық саясат пен қаржылық даму, сондай-ақ инвестициялық ынтымақтастықтың өзекті мәселелерін талқылауға арналған кәсіби пікірталас алаңы болып саналады.Дәурен Маратұлы қаржы жүйесінің алдында тұрған сын-қатер мен міндеттеріне арналған пленарлық және сараптамалық сессияларға қатысты. Оның барысында халықаралық қаржы, инвестиция тарту, мемлекеттік сатыпалым мен қаржылық бақылауды цифрландырудың жаңа бағыттары, сол секілді экономикалық өсімнің өңірлік аспектілері қаралды.Форум аясында ТМД-ға мүше мемлекеттердің қаржы министрліктері мемлекеттік қаржы саласын басқару бағытындағы ынтымақтастық туралы меморандумға қол қойды. Оның мақсаты – қаржы қызметіндегі өзара іс-қимылды нығайту, мамандар арасында тәжірибе алысу арқылы экономикалық дамуға қолғабыс ету.Сонымен қатар форум кезінде ведомство өкілі Ресей Федерациясының Қаржы министрінің орынбасары И.Чебесковпен кездесіп, өзара тиімді байланысты дамыту мәселелері мен ынтымақтастықты одан әрі кеңейту жолдарын пысықтады.Ақпарат көзі : https://www.gov.kz/memleket/entities/minfin/press/news/details/1070630?lang=kk

Қазақстан әлемдегі халал өнімдер мен қызметтерді ілгерілетуге арналған ең ірі халықаралық платформа саналатын Malaysia International Halal Showcase (MIHAS) көрмесіне алғаш рет қатысып отыр. Көрмеде Қазақстанның ұлттық павильонында 20 отандық компанияның өнімі қойылған. Бұл еліміздің халал сегментіндегі экспорттық зор әлеуетінің көрінісі. MIHAS көрмесі жыл сайын Куала-Лумпур қаласында өтеді және халал өнімдерді халықаралық нарықтарға шығару, тәжірибе алмасу мен іскерлік байланыстар орнатуға арналған жаһандық алаң саналады. Қазақстанның бұл көрмеге қатысуы елдің халал индустриясының жаһандық экожүйесіне белсенді қатысуға және Оңтүстік-Шығыс Азия елдерімен экономикалық байланыстарды нығайтуға деген ұмтылысын көрсетеді. Малайзияға сапарының алғашқы күнінде Қазақстан Республикасының Сауда және интеграция министрі Арман Шаққалиев MIHAS-2025 халықаралық көрмесінің ашылуына қатысып, экономикалық әріптестікті дамыту және негізгі салалардағы ынтымақтастықты тереңдетуге бағытталған бірқатар екіжақты кездесулер өткізді. Қазақстан Республикасының Сауда және интеграция министрі мен Малайзияның Ауыл шаруашылығы және азық-түлік қауіпсіздігі министрі Мохамад Сабу арасында екіжақты кездесу өтті. Кездесу барысында тараптар агроөнеркәсіп кешені, азық-түлік қауіпсіздігін қамтамасыз ету және өнімдерді жаңа нарықтарға шығару салаларындағы ықпалдастықтың перспективаларын талқылады. Сондай-ақ агроөнеркәсіп кешенін дамыту және Қазақстанның экспорттық мүмкіндіктерін кеңейту мәселелеріне ерекше назар аударылды. Қазақстан тарапы ауыл шаруашылығы өнімдерін бәсекеге қабілетті бағамен Малайзия нарығына экспорттауға дайын екенін мәлімдеп, JAKIM ұйымының қазақстандық халал стандарттарын мойындауын ерекше атап өтті. Сонымен қатар, санитарлық және ветеринарлық келісімдер, жаңа экспорттық бағыттарды ашу және өнімді қайта өңдеу саласындағы бірлескен инвестициялар мәселелері қарастырылды. Интеграцияланған логистикалық дәліздерді дамыту, соның ішінде Транскаспий халықаралық көлік бағдары мен екі ел арасында тікелей әуе қатынасын орнату мүмкіндіктері басты назарда болды. Малайзия тарапы ауыл шаруашылығы саласындағы инновациялар мен технологиялар алмасуға, сондай-ақ академиялық және ғылыми-зерттеу бағдарламаларын дамытуға қызығушылық білдірді. «Азық-түлік қауіпсіздігіне қатысты жаһандық сын-қатерлер жағдайында Қазақстан мен Малайзияның бірлескен күш-жігері екі ел үшін де орнықты даму мен тұрақтылықтың кепілі болмақ», - деп атап өтті министрлер. Сол күні ҚР Сауда және интеграция министрі Малайзияның Ұлттық сауда және өнеркәсіп палатасы (NCCIM) президенті Н. Гобалакришнанның басшылығымен ұйым өкілдерімен кездесу өткізді. Кездесу барысында сауда айналымын ұлғайту, логистиканы дамыту, цифрландыру, жасыл энергетика, химия өнеркәсібі мен тамақ өнеркәсібі сияқты ынтымақтастықтың негізгі бағыттары талқыланды. Халал өнімдерін ілгерілету перспективаларына және бірлескен инвестициялық жобаларды жүзеге асыруға ерекше назар аударылды. Қазақстан тарапы Малайзияның Оңтүстік-Шығыс Азия нарығына шығу үшін стратегиялық хаб ретіндегі рөлін атап өтіп, малайзиялық компаниялардың Қазақстан мен Еуразиялық экономикалық одақ елдеріндегі жобаларға қатысу мүмкіндіктерін ұсынды. Тараптар Қазақстан-Малайзия іскерлік кеңесінің жұмысын қайта жандандыру және оның келесі отырысын 2026 жылы Қазақстанда өткізу туралы келісімге келді. Бұл отырыста жаңа бірлескен жобалар ұсынылатын болады. «Біз NCCIM ұйымы Қазақстан мен Малайзия іскер топтарының арасындағы маңызды көпірге айналып, сауда мен инвестиция үшін жаңа мүмкіндіктерге жол ашады деп сенеміз», - деді Қазақстан Республикасының Сауда және интеграция министрі Арман Шаққалиев.Ақпарат көзі : https://www.gov.kz/memleket/entities/mti/press/news/details/1070341?lang=kk

Абу Даби, 2025 жылғы 17 желтоқсан – Қазақстан Республикасының Біріккен Араб Әмірліктеріндегі Елшісі Рауан Жұмабек Халықаралық жаңартылатын энергия көздері агенттігінің (IRENA) Бас директоры Франческо Ла Камераға сенім грамоталарын тапсырды.Кездесу барысында тараптар ынтымақтастықтың перспективалық бағыттарын, оның ішінде климаттың өзгеруімен бірлескен күресті және жаңартылатын энергетиканы адамзаттың орнықты болашағының аса маңызды факторы ретінде дамыту мәселелерін талқылады.Қазақ дипломаты IRENA жаңартылатын энергия көздерін ілгерілетуде мемлекеттерді біріктіретін беделді халықаралық алаң ретіндегі маңызды рөлін атап өтіп, Қазақстанның Агенттік жұмысына белсенді қатысуға, сондай-ақ екіжақты және көпжақты әріптестік байланыстарды нығайтуға дайындығын растады.Өз кезегінде Ф. Ла Камера ү.ж. 2–4 қазанда Астанада өтетін «KazEnergy Week – 2025» халықаралық форумының жұмысына қатысатынын растады.Кездесу қорытындысы бойынша тараптар ынтымақтастықты одан әрі тереңдетуге өзара мүдделі екендіктерін білдірді.IRENA 2009 ж. 26 қаңтарда Бонн қаласында құрылған. Құрылтайшылар конференциясы барысында Агенттік Жарғысына әлемнің 75 мемлекетінің ресми өкілдері қол қойды. Бүгінде IRENA құрамына 169 мемлекет пен Еуропалық одақ мүше .Ақпарат көзі : https://www.gov.kz/memleket/entities/mfa/press/news/details/1070121?lang=kk

Облыс әкімі Нұрлыбек Нәлібаевтың қатысуымен облыстық мәслихаттың кезекті XXV сессиясы өтті. Басқосуға құқық қорғау органдарының, облыстық басқармалар мен департамент басшылары, қала және аудан әкімдері, мәслихат депутаттары қатысты. Күн тәртібінде 9 мәселе қаралды.Аймақ басшысы өңірде ауқымды жұмыстың жүзеге асырылуына қатысты мәселелерді қозғап, ұсыныстарын жеткізді.«Мемлекет басшымыз Қасым-Жомарт Кемелұлы «Жасанды интеллект дәуіріндегі Қазақстан: өзекті мәселелер және оны түбегейлі цифрлық өзгерістер арқылы шешу» атты Қазақстан халқына Жолдауын жариялады.Ендігі кезекте Сіздермен бірлесіп, Президентіміздің Жолдауынан туындайтын міндеттерді сапалы әрі мерзімінде жүзеге асыруымыз қажет.Баршаңызды ел игілігі жолындағы жұмысты ауызбірлікпен, асқан жауапкершілікпен атқаруға шақырамын.Бүгінде аймағымызда Мемлекет басшымыздың, Үкіметтің ерекше қолдауымен ауқымды инвестициялық жобалар қарқын алды. Өткен 8 айдың қорытындысымен негізгі макроэкономикалық көрсеткіштердің өсімі қамтамасыз етілді.Биыл облыс бюджеті 829 млрд. 200 млн. теңге болды, 2022 жылдан бері 228 пайызға өсті. Оның 477 млрд. 600 млн. теңгесі (58%-ы) әлеуметтік саланың үлесінде.Даму бюджетінің көлемі 2022 жылғы 62 млрд.теңгеден 214 млрд.теңгеге дейін артты (3,5 есе). Бұл қаражат аймағымыздың ең өзекті деген мәселелерін шешуге, тұрғындардың өмір сүру сапасын жақсартуға, ауқымды инфрақұрылымдық жобаларды іске асыруға бағытталды.Бүгінде өңірде қолайлы инвестициялық климат қалыптасып, ірі жобалар жүзеге асырылуда. Биылға 631 млрд. 400 млн. теңгеден астам инвестиция тарту жоспарланса, жаңа жобаларды іске қосу есебінен жоспар 716 млрд. теңгеге дейін артығымен орындалады. Қазіргі таңда 408 млрд. 200 млн. теңге инвестиция тартылды.Биыл құны 302 млрд. 500 млн. теңге болатын 27 жоба іске қосылады. Облыста 166 млрд. 800 млн. теңгеге 96 жобаның құрылысы жүруде.Соңғы үш жылда қаржыландырудың барлық көзінен 2 млн. 500 мың шаршы метр тұрғын үй пайдалануға берілді. Қаламыздағы 623 көпқабатты тұрғын үй ыстық сумен қамтамасыз етіледі. Жыл соңына дейін газдандыру деңгейін 83 пайызға жеткіземіз.Биыл 189 600 гектарға ауыл шаруашылығы дақылдары, оның ішінде 80 900 гектарға күріш егілді. Президентіміздің тапсырмасына сәйкес су үнемдеу технологияларын қолдану, суды аз қажет ететін дақылдар көлемін ұлғайту үшін кешенді шаралар атқарылуда», – деді Н.Нәлібаев.Сессияда қоғамдық қауіпсіздікті қамтамасыз ету, құқық бұзушылықтың алдын алу үшін бейнекамералар орнату, алдағы жылу беру маусымын іркіліссіз өткізу, халықтың әлеуметтік осал топтары үшін тұрғын үй сатып алу, Қызылорда қаласының архитектуралық-сәулеттік келбеті мен туристік әлеуетін арттыру, тұрғындарды ауыз сумен жабдықтау, кәріз желілерін жүргізу, «Сабалақ» елді мекенін газдандыру және басқа да ауқымды жұмыстарды жүзеге асыру үшін облыстық мәслихат сессиясының қарауына 2025 жылға арналған облыстық бюджетті нақтылау туралы ұсыныс енгізілді.Бұл қаражат облыстық бюджеттің өз кірістерін ұлғайту, бюджеттік бағдарлама әкімшілерінен үнемделген қаржыны қысқарту есебінен қалыптасқан.Сондай-ақ, сессияда облыстық жолаушылар көлігі және автомобиль жолдары басқармасының басшысы Жәнібек Сыздықов, облыстық полиция департаментінің бастығы Серік Ергешов баяндама жасады.Мәслихат депутаттары ұсыныстарға қолдау білдіріп, олардың барлығы кезек күттірмейтін маңызды мәселе екенін айтты.Ақпарат көзі : https://www.gov.kz/memleket/entities/kyzylorda/press/news/details/1070125?lang=kk

Алматы–Қонаев автожолының 35-шақырымындағы тұрмыстық қалдықтар полигонында шыққан өртке байланысты жақын маңдағы елді мекендерде ауа сапасына санитарлық-эпидемиологиялық мониторинг жүргізілді.15–16 қыркүйек күндері 288 сынама алынып, олардың бір бөлігінде шекті мәннен асып кеткен көрсеткіштер анықталды. Осыған орай тұрғындарға, әсіресе балалар мен қарттарға және тыныс алу жолдарының созылмалы ауруы бар адамдарға алдын алу шараларын сақтау жөнінде нұсқаулық берілді.17 қыркүйекте сол нүктелерде жүргізілген қайта тексерулер нормаларға сай нәтижелер көрсетті. Қазіргі таңда ауа сапасы желдің бағытына байланысты тұрақты түрде қадағалануда.Маңыздысы, 15–17 қыркүйек аралығында улану жағдайлары тіркелмеген және медициналық мекемелерге шағымданғандар болмаған. Зардап шеккендер жоқ.Ақпарат көзі : https://www.gov.kz/memleket/entities/almobl/press/news/details/1069907?lang=kk

Астана, 2025 жылғы 17 қыркүйек – Қазақстан Республикасы Сыртқы істер министрлігі Инвестициялар комитетінің төрағасы Ғабидолла Оспанқұлов қытайлық «Cheng Tian Run Kang Medical Limited» компаниясы директорлар кеңесінің төрағасы Ли Шу-хэмен кездесу өткізді.Инвестор Қазақстанда техникалық қарасораны өсіру және қайта өңдеу жобасын іске асыруға ниет білдірді. Өсімдік құрамындағы тетрагидроканнабинолдың рұқсат етілген мөлшері (0,3%-дан аспайды) халықаралық стандарттарға сәйкес келеді және оның психоактивті қасиеттерін жоққа шығарады. Алынатын шикізат медициналық препараттар, биологиялық белсенді қоспалар және тоқыма өнеркәсібі өнімдерін өндіру үшін пайдаланылатын болады. Бұдан бөлек, инвестор ет өңдеу саласындағы жобаны жүзеге асыруға да қызығушылық танытты.Ғ.Оспанқұлов фармацевтика және ауыл шаруашылығы шикізатын терең қайта өңдеу саласындағы жобаларды дамыту Қазақстан инвестициялық саясатының басымдықтарына сәйкес келетінін атап өтті. Ол мемлекет қажетті қолдау көрсетіп, тиісті ведомстволармен үйлестіруді қоса алғанда, толық сүйемелдеу шараларын қамтамасыз етуге дайын екенін ерекше айтты.Өз кезегінде Ли Шу-хэ Қазақстан ауыл шаруашылығы шикізатын қайта өңдеу саласында жобаларды жүзеге асыру үшін қолайлы жағдайға ие екенін атап өтті. Ол компанияның Қазақстанды Орталық Азиядағы стратегиялық серіктес ретінде қарастыратынын және ұзақ мерзімді ынтымақтастыққа мүдделі екенін жеткізді.Кездесу қорытындысы бойынша тараптар жобаның параметрлерін талқылауды жалғастыруға және Қазақстан аумағында практикалық іске асыру мүмкіндіктерін қарастыруға уағдаласты.Ақпарат көзі : https://www.gov.kz/memleket/entities/mfa/press/news/details/1069988?lang=kk

Астанадағы аумақтық қорғаныс бригадасы бөлімшесінің командирі 3-сыныпты сержант Рауан Әбілханов Астана – Көкшетау – Астана бағыты бойынша ара қашықтығы 600 шақырым болатын бірегей спорттық сынаққа – супермарафонға дайындалуда. Бұл бастамасын ол ұлттық мереке — Республика күніне арнап, жүгіруді 25 қыркүйекте бастауды жоспарлап отыр. Әскери қызметші осы мақсаты арқылы қазақстандық ультрамарафондардың барлық алдыңғы рекордтарын жаңартпақ.Рауан Әбілхановтың бастамасы Қазақстан Республикасы Қарулы күштері мен Астана қаласы әкімдігінің әскери қызметшілері тарапынан қолдау тапты.Сержант Әбілхановтың жүгіруде рекорд жасаудан тәжірибесі бар. 2022 жылы ол Алматы облысындағы «Әли» оқу-жаттығу орталығынан Шелек ауылы бағыты бойынша 48 сағат ішінде 350 шақырымды жүргіріп өтіп, Қазақстанның рекордтар кітабына енді.42 жастағы спортшы 15 жылдан астам жеңіл атлетикамен айналысады. Алматыда және әскери қызметшілер арасында марафондардың бірнеше дүркін жеңімпазы. Алдағы марафоннан өзге оның жоспарында 10 күнде 1000 шақырым жүгіру – жаңа жобасы да бар.Ақпарат көзі : https://www.gov.kz/memleket/entities/mod/press/news/details/1070014?lang=kk

Талдықорған қаласында жаңа Салық кодексінің нормаларын түсіндіруге байланысты ҚР ҚМ Мемлекеттік кірістер комитеті төрағасының орынбасары Жәнібек Нұржанов және «Атамекен» ҰКП өкілдерінің қатысуымен өңірдің кәсіпкерлері мен тұрғындарына арналған көшпелі семинар өткізілді.Мемлекет басшысы Қасым-Жомарт Тоқаев аталған заңға 2025 жылдың 18 шілдесінде қол қойған еді. Кодекс салық жүйесін түбегейлі өзгертуге, ашықтық қағидаттарын енгізіп, қазіргі экономикалық жағдайға бейімделуге бағытталған. Президент айтқандай, реформаның басты мақсаты – нормаларды өзгерту емес, салық төлеушілердің жаңа менталитетін қалыптастыру.Жетісуда ауыл шаруашылығы, туризм және кәсіпкерлік сынды салалар жолға қойылғандықтан жаң заң облыстың экономикасын алға сүйрейтін маңызды тетікке айналады деді ведомство өкілдері. Оның көмегімен көлеңкелі экономика азайып, құзырлы органдармен жұмыс жеңілдеп, салықтық әкімшілендірудің тиімділігі артады деп көзделген.Негізгі өзгерістер:Салық жүктемесін дифференциациялау. Медицина және білім беру сияқты әлеуметтік маңызы бар салаларға 2026 жылы 5% мөлшеріндегі төмендетілген корпоративті салық қарастырылған. Бұған қоса жеке табыс салығының прогрессивті шкаласы енгізіліп, ол салық жүктемесін әділ бөлуге бағытталған. Айталық, 8500 АЕК-ке дейінгі кірістер үшін 10% (шамамен 33,5 млн теңге) және одан жоғары кірістер үшін 15% көзделген.Салық режімдерін жеңілдету. Үш негізгі режім қалып отыр. Арнайы салық режімдерін үшке дейін азайту жергілікті кәсіпкерлерге жүйені жеңілдетуге мүмкіндік береді. Бұл жеңілдетілген декларация негізінде қызмет ететін өзін-өзі жұмыспен қамтыған азаматтарға, шаруа (фермерлік) қожалықтарға, әсіресе өңірдің экономикасындағы басымдыққа ие сектор – аграрлық салада жұмыс істейтіндерге тиімді болады.Бизнесті бөлшектеуге қарсы күрес. ҚҚС мөлшерлемесі 16% дейін көтеріліп, тіркеу шегі төмендейді. Бұл ірі кәсіпорындарды көлеңкеден шығарып, әділ бәсекелестікке жол ашады.Сән-салтанат салығы. Акциздер жалпы құны 450 млн теңгеден асатын қымбат автокөліктерге, яхталарға, ұшақтарға және жылжымайтын мүлікке енгізіледі, бұл норма ауқатты азаматтарды қамтып, осы арқылы өңірлердегі әлеуметтік маңызы бар бағдарламаларды іске асыруға қосымша қаражат тартуға оң әсер береді.Салық кодексінің нормаларын түсіндіруге арналған келесі семинар 18 қыркүйекте Қонаев қаласында өтеді.Ақпарат көзі : https://www.gov.kz/memleket/entities/minfin/press/news/details/1069963?lang=kk

ҚР Ұлттық экономика министрлігінде вице-министр Ерлан Сағнаевтың Азия-Тынық мұхиты аймағындағы Халықаралық кооператив альянсының басшысы Баласубраманиан Айермен мемлекеттік органдар, ұлттық институттар мен салалық бірлестіктер өкілдерінің қатысуымен кездесуі өткізілді.Кездесуді ашқан Ерлан Сағнаев кооперативтің экономикада ерекше рөл атқаратынын атап өтті: азаматтарды кәсіпкерлік қызметке тартып, жұмыс орнын құрады, шағын және орта бизнесті қолдап, сондай-ақ қоғам мен мемлекет арасындағы байланыстырушы буын ретінде әрекет етеді.Айтылған негізгі мәселенің бірі өнімді сертификаттау жүйесін дамыту. Қазақстанда халықаралық талапқа сай аккредиттелген зертханалар жұмыс істейді. Олардың қызметін Азия-Тынық мұхиты елдерінің стандартына сәйкес келтіру жөніндегі бірлескен жұмыс отандық өндірушілердің экспорттық әлеуетін арттыруға мүмкіндік береді.Кооперативтік жобалар негізінде Қазақстанда халықаралық компаниялардың өндірісін жергіліктендіру перспективасы жеке талқыланды. Бұл тәсіл озық технологияға қол жеткізуге мүмкіндік беріп, жаһандық қосылған құн тізбегіне интеграциялаудың жаңа мүмкіндігін жасайды.Вице-министр сондай-ақ Қазақстан үшін кооперацияны дамытудың негізгі факторы көлік байланысы екенін атап өтті. "Достық - Мойынты" учаскесінде 800 шақырымнан астам темір жол құрылысының аяқталуы тауарлардың шетелдік нарыққа неғұрлым тиімді түрде шығуын қамтамасыз ете отырып, елдің логистикалық әлеуетін едәуір арттырды.Ынтымақтастықтың перспективалық бағытының ішінде қатысушылар қаржыландырудың икемді шарттарымен, яғни төмен пайызбен немесе өнім түрінде қайтарумен кредиттік одақтарды дамытуды атап өтті. Қазақстан осы тәжірибені енгізу мүмкіндігін зерделеуге ниетті.Өз кезегінде Баласубраманиан Айер БҰҰ Бас Ассамблеясы 2025 жылды "Кооперативтер жақсы әлем құрады" ұранымен Халықаралық кооперативтер жылы деп жариялағанын еске салды. Ол кооперативтердің экономикалық, экологиялық және әлеуметтік дамуға айтарлықтай әсер ететінін атап өтті. Бүгінде оған миллиардтан астам адам немесе планета халқының шамамен 12% - ы мүше. Баласубраманиан Айер Халықаралық кооператив альянсының Орталық Азияда белсенді жұмыс істеуге, жаңа өткізу нарықтарын іздеуге және өнімді ілгерілетуге жәрдемдесуге дайындығын атап өтті. Сондай-ақ Қазақстанға ICA қатарына қосылуды ұсынды.Келіссөздер қорытындысы бойынша тараптар бірлескен жұмыс тобын құру, сараптамалық кездесулер өткізу және өңірлік форумдарға, көрмелерге және электрондық сауда алаңдарына қатысу мүмкіндігін қарастыруға дайын екендіктерін білдірді.Анықтама: Халықаралық кооператив альянсы (ICA) — әлемнің 110 елінен 310-нан астам мүше ұйымды біріктіретін жаһандық федерация. 1895 жылы негізі қаланған ICA үкіметтік емес сектордың ең көне және ең ірі бірлестігінің бірі және тұрақты дамудың кооперативтік моделін белсенді түрде насихаттайтын БҰҰ серіктесі.Ақпарат көзі : https://www.gov.kz/memleket/entities/economy/press/news/details/1069684?lang=kk

ҚР Қарулы күштерінің Ұлттық әскери-патриоттық орталығында елордалық оқу орындарының «Жас сарбаз» сынып жетекшілерімен жиналыс өтті.Есептік іс-шараға Астана қаласы жастар саясаты басқармасының, қорғаныс істері жөніндегі, полиция және төтенше жағдайлар департаменттерінің өкілдері, елордалық «Жас сарбаз» клубтарының тәрбиеленушілері қатысты.– Бүгін біз жыл басынан бері атқарған жұмысымыз жайлы айтатын боламыз, одан өзге алдағы жылға арналған жұмыстың маңызды бағыттарын да талқылаймыз, – деді «Жас сарбаз» балалар-жасөспірімдер әскери-патриоттық қозғалысы» РҚБ төрағасы майор Мейірбек Меңдіғалиев.Қазіргі уақытта «Жас сарбаз» қозғалысының елордалық филиалында 110 мектеп пен 35 колледжде «Жас сарбаз» сыныптары мен клубтары құрылды. Елордада тәрбиеленушілердің жалпы саны 10 000-нан асты. Есептік кезеңде интернационалист-жауынгерлермен кездесулер өткізіліп, Екінші дүниежүзілік соғыс ардагерлері құттықталды. Елордалық кәсіпорындармен бірлесіп қайырымдылық шаралары ұйымдастырылды.Жас сарбаздықтар қазақтың тұңғыш ғарышкері Халық қаһарманы Тоқтар Әубәкіровтің қатысуымен «Ерлік сабағын» ұйымдастырды, елорданы көгалдандыру мақсатында жалпы қалалық он сенбілікке қатысты. «Жас сарбаз» қозғалысының елордалық филиалы Астана оқушылары арасында әскери-патриоттық ән байқауын өткізіп, музейлер мен мемориалдық кешендерге саяхат жасады.Жас сарбаздықтар спорттық сайыстарға белсенді қатысып, 68665 әскери бөлімінде күзгі үш күндік әскери-патриоттық далалық жиында да бақтарын сынады.Жиын қорытындысы бойынша үздік өрендер мен «Айбын» XI халықаралық әскери-патриоттық жастар жиынының белсенді қатысушыларына еліміздің тұңғыш қорғаныс министрі, Кеңес Одағының Батыры, Халық қаһарманы Сағадат Нұрмағамбетовтің өмірбаяны жазылған алғыс хаттар мен кітаптар табыс етілді.Ақпарат көзі : https://www.gov.kz/memleket/entities/mod/press/news/details/1069701?lang=kk

Бүгін облыс әкімі Нұрлыбек Нәлібаевтың қатысуымен сол жағалаудан бой көтерген, әлеуметтік осал топтағы азаматтарға арналған 280 пәтерлік 7 тұрғын үйді иелеріне табыстау рәсімі өтті. Салтанатты шараға жауапты сала басшылары, зиялы қауым өкілдері мен қала тұрғындары қатысты. Аймақ басшысы жаңа қоныс иелеріне құттықтауын жеткізді.«Биыл ұлтымыздың тарихи «Қазақ» атауының қайтарылғанына, Қызылорданың Қазақ елінің астанасы болғанына 100 жыл, бұл мереке кең көлемде аталып өтуде.Мемлекет басшысының қолдауымен мерейлі жыл аясында аймағымызда сәулеті келіскен, әсем де заманауи ғимараттар бой көтеріп, саябақтар мен аллеялар қайта жаңғыртылып, жолдарымыз кеңейіп келеді. Бүгін жерлестеріміздің баспаналы болу қуанышына ортақтасып, пәтер кілтін табыстау рәсіміне жиналдық. Аймағымызда халқымыздың тұрмыстық жағдайын жақсартуға бағытталған маңызды ірі инфрақұрылымдық жобалар іске асырылуда.Соңғы үш жылда қаржыландырудың барлық көзінен 2 млн. 500 мың шаршы метр тұрғын үй пайдалануға берілді. Кезекте тұрған халықтың әлеуметтік осал топтарына, жалғыз баспанасы апатты деп танылған азаматтарға 5 мыңнан астам пәтер (5148) сатып алынып, 25 мыңға жуық тұрғын қоныс тойын тойлады.Аудан орталықтарында жаңадан салынған 1500-ге жуық пәтер табысталды.Аймағымыздың ажарын айшықтап, сәулетіне сән қосатын, өңіріміздің өсіп-өркендеуіне жаңаша серпін беретін құрылыс индустриясын дамытуда құрылысшыларымыздың үлесі орасан зор. Баспаналы болу әрбір отбасыны жақсылыққа жетелейді. Қоныстарыңыз құтты болсын!», – деді Н.Нәлібаев.Салтанатты рәсімде пәтер иелеріне қуаныш сыйлап, тұрғын үйлердің құрылысын сапалы жүргізген мердігер мекеме «Мелиоратор» ЖШС-нің құрылысшыларына облыс әкімінің алғыс хаты табысталып, Қызылорда облысының құрметті азаматы Ибрагим Әбибуллаев батасын берді.Биыл тұрғын үй құрылысы мен жеке салушылардан 3 800 дайын пәтерді сатып алуға бюджеттен 58 млрд. 785 млн. теңге бөлінді. Қаржыландырудың барлық көзінен 870 мың шаршы метр тұрғын үй беріледі.Ерекше атап өту қажет, өткен жылдан бастап қаламызда заманауи жаңа дизайнмен 7, 9, 12 қабатты тұрғын үйлер бой көтеруде.Ақпарат көзі : https://www.gov.kz/memleket/entities/kyzylorda/press/news/details/1069733?lang=kk

Қазір мемлекеттік сатыпалымның барлық процесі (жоспарлаудан бастап төлемге дейін) www.goszakup.gov.kz веб-портал арқылы электронды форматта жүзеге асырылып келеді. Бұл барлық бизнес-процесті толық автоматтандыруға жол ашты.Электронды формат барлық рәсімді қамтиды: сатыпалымды жүргізу, келісімшарттар жасау және тіркеу, электронды банк кепілдіктерін пайдалану, тауарларды жеткізу, жұмыстарды орындау және қызметтерді көрсету актілерін рәсімдеу, электронды шот-фактуралар және төлем шоттары.Веб-порталдың мемлекеттік органдардың ақпарат жүйелерімен ауқымды интеграциясы әлеуетті өнім берушілердің біліктілік талаптарына сәйкестігін, салық және сот берешегінің бар-жоқтығын, сондай-ақ жосықсыз өнім берушілер тізімінен автоматты түрде тексеруге мүмкіндік берді. Бұл ашықтықты айтарлықтай арттырып, адами фактордың алдын алуға септесті.Global Data Barometer халықаралық зерттеуіне сүйенсек, Қазақстанның сатыпалым жүйесі қолжетімділік пен ашықтық көрсеткіші жағынан әлемде 3-ші орында тұр.2025 жылдың 1 қаңтарынан бастап «Мемлекеттік сатып алу туралы» Заң күшіне енді. Осы реформаға сәйкес сатыпалымның барлық түрін біріктіретін Бірыңғай сатып алу платформасын құру көзделді: мемлекеттік және квазимемлекеттік сектор субъектілерінің, ұлттық әл-ауқат қорларының, сондай-ақ білім беру ұйымдарындағы тамақтандыру мәселелеріне байланысты және басқа да сатыпалымдар.Бірыңғай сатып алу платформасы «Электрондық қаржы орталығы» АҚ базасында жасалып, қолданыстағы goszakup.gov.kz, zakup.sk.kz және mitwork.kz жүйелерімен интеграцияланды. Сонымен қатар платформа сот кабинеті, «Қазынашылық-клиент», борышкерлер тізімі, жылжымайтын мүлік тізімі, «Е-лицензиялау» жүйесі және т.б. қоса алғанда, 20-дан астам мемлекеттік ақпарат жүйесімен де біріктірілгенін айта кетейік.Бірыңғай платформаның іске қосылуы реттелетін сатыпалымның барлық түріне ашық, жайлы және бірыңғай қолжетімділікті қамтамасыз етті. Тың тетік өндірушілер арасындағы бәсекелестік деңгейін арттырып, заңсыз практикалардың сын-қатерін азайту мен бюджет қаражатын неғұрлым тиімді пайдалануға мүмкіндік береді.Ақпарат көзі : https://www.gov.kz/memleket/entities/minfin/press/news/details/1069798?lang=kk

Бүгін облыс әкімі Нұрлыбек Нәлібаев балалардың жол қауіпсіздігі бойынша шұғыл жиналыс өткізді. Оған құқық қорғау органдарының, облыстық басқармалармен департамент басшылары, қала және аудан әкімдері қатысты.Аймақ басшысы жеке балабақшаның тасымал көлігінің жол-көлік оқиғасына ұшырауы жауапты сала басшыларының жұмысты дұрыс үйлестірмеуінен болғанын қатаң сынға алып, тиісті шара қабылдауды тапсырды.«Бұған дейін жеке және мемлекеттік балабақшалардағы, мектептердегі тасымал мәселесі, балалардың жол қауіпсіздігі бойынша қала және аудан әкімдеріне, полиция департаментіне, білім басқармасына бірнеше рет тапсырмалар берген болатынмын.Дегенмен, жұмыс әлі күнге дейін өз деңгейінде дұрыс ұйымдастырылмады.Жеке балабақшалардың тасымал көліктерінде орын алып жатқан заңбұзушылықтар полиция органдары тарапынан бақылаудың жоқтығын көрсетеді.Қызылорда қаласы мен барлық ауданда ашылған Жедел басқару орталықтарының, әсіресе патрульдік полицияның жұмысын күшейту қажет. Балалардың қауіпсіздігіне қатысты жағдайды қатаң бақылауда ұстаңыздар!Өңіріміздегі барлық білім беру ұйымындағы тасымал мәселесін шұғыл түрде жан-жақты тексеріп, талаптарға сай келмейтіндерді анықтап, тиісті шаралар қабылдаңыздар.Жол қауіпсіздігін, оның ішінде білім беру ұйымдары аумағындағы қауіпсіздікті қатаң бақылауға алып, тұрақты түрде рейд ұйымдастырыңыздар», – деді Н. Нәлібаев.Жиналыста облыстық полиция департаментінің бастығы Серік Ергешов баяндама жасады.ІІМ бекіткен бұйрыққа сәйкес, балалар тасымалымен айналасатын көліктер екі есікті, ұстау құрылғысы және «Балалар тасымалы» деген жазуы бар, сары түсті жарқылдауық маякпен жабдықталған болуы тиіс.Осы бұйрықтың орындалуын тексеру барысында 29 заңды тұлғаға қатысты ҚР ӘҚБтК-нің 474-бабымен әкімшілік хаттама рәсімделіп, 75 көлік айып алаңына қойылса, 58 көліктің мемлекеттік белгісі тәркіленді.Жыл басынан тасымалдау ережесін бұзған жүргізушілерге қатысты 800-ге жуық әкімшілік құқықбұзушылық анықталып, тиісті шаралар қабылданды. Рейд жыл аяғына дейін жалғады.Сондай-ақ, жиналыста білім, мәдениет, спорт басқармаларына, Қызылорда қаласы және аудан әкімдеріне балалардың қауіпсіздігін тек білім беру ұйымдарында ғана емес, спорттық, мәдени-көпшілік шараларға қатысқан кезде де қатаң бақылауға алу міндеттелді.Ақпарат көзі : https://www.gov.kz/memleket/entities/kyzylorda/press/news/details/1069466?lang=kk

ҚР Қарулы күштерінің XXII спартакиадасы аясында «Астана» өңірлік қолбасшылығының «Спасск» оқу орталығы базасында әскери-спорттық кешенінің үшсайыс және көпсайыс бойынша чемпионаттары өтті.Көпсайысқа автоматтан ату, граната лақтыру (қашықтыққа), белтемірге тартылу, 100 және 3000 метрге жүгіру жатса, үшсайыс бағдарламасына автоматтан ату, граната лақтыру және 400 метрлік кедергілер жолағын еңсеру кірді.«Спасск» оқу орталығында өткен бұл чемпионаттарға Қарулы күштер түрлері мен әскер тектерінің, өңірлік қолбасшылықтардың, сондай-ақ жоғары әскери оқу орындарының командалары қатысты.– Мұндай жарыстар – тек күш пен төзімділікті, бірлік пен командалық рухты сынау ғана емес. Олар әскери қызметшілердің кәсіби және жеке дамуына жол ашып, үлкен серпін береді. Қарсыласпен әділ бәсекелестік мінезді шыңдап, жауынгерлік бауырластықты қалыптастырады. Сонымен қатар, әрбір қатысушының өзіне деген сенімін арттырады. Бұл – жай спорт қана емес, бұл – Отан қорғаушының жолында кез келген сын-қатерге дайын болуға бағытталған маңызды дайындық, – деп атап өтті жарыстың бас төрешісі, ҚР Қорғаныс министрлігі Спорт комитеті төрағасының орынбасары подполковник Мирхат Химеденов.Бәсекелестік жағдайында өткен көпсайыста жалпыкомандалық есеп бойынша бірінші орынды «Оңтүстік» өңірлік қолбасшылығының әскери қызметшілері иеленді. Екінші орын 32039 әскери бөлімінің өкілдеріне бұйырса, үшінші орынды Десанттық-шабуылдау әскерлерінің құрамасы еншіледі.Жеке есепте алтын медальді «Оңтүстік» ӨңҚ өкілі 3-сыныпты сержант Евгений Нам жеңіп алды. Күміс медаль 32039 бөлімінің жауынгері сержант Ақпейіл Күтуевке бұйырса, қола жүлдені Десанттық-шабуылдау әскерлерінен аға лейтенант Шыңғыс Құдайбергенов иеленді.Белтемірге тартылу жаттығуларында 3-сыныпты сержант Евгений Нам («Оңтүстік» ӨңҚ) үздік шықса, атыста 3-сыныпты сержант Марат Ибраимов («Шығыс» ӨңҚ) жеңімпаз атанды. 32039 әскери бөлімінің өклдері сержант Нұржан Іскендір қашықтыққа граната лақтыруда ең жоғары нәтиже көрсетсе, үш шақырымға жүгіруде сержант Ақпейіл Кутуев мәреге алғашқы болып жетті. Ал жүз метрге жүгіруде сержант Қозыбай Амантаев алдына жан салмады.Үшсайысқа 14 команда қатысты. Оның қорытындысы бойынша бірінші орынды Десанттық-шабуылдау әскерлерінің әскери қызметшілері иеленді. Екінші орынды «Шығыс» өңірлік қолбасшылығының командасы, ал үшінші орынды «Оңтүстік» ӨҚ өкілдері еншіледі.Жеңімпаздарға кубоктар, құрмет грамоталары, жалаулар мен медальдар табысталды.Ақпарат көзі : https://www.gov.kz/memleket/entities/mod/press/news/details/1069610?lang=kk

«Мен сияқты істе, менен де жақсы істе» ұранымен өтетін кіші командирлер арасындағы жалпыармиялық турнир Қазақстан Республикасы Қорғаныс министрлігі Шоқан Уәлиханов атындағы әскери колледжінің «Амандық» оқу орталығында ұйымдастырылуда.Бұл – Қарулы күштер аясындағы сержанттар құрамының рейтингін анықтауға бағытталған жыл сайынғы сайыстың үшінші кезеңі. Алғашқы екі кезең әскери бөлімдер мен өңірлік қолбасшылықтар, әскер тектері, ҚР ҚК бас басқармалары мен  басқармалары деңгейінде өткізілді.Сержанттар – әскери бөлімдердің тірегі. Себебі кіші командирлер жауынгерлердің күнделікті қызметіне басшылық жасап, олардың тәрбиесі мен тәртібін қамтамасыз етеді, сондай-ақ сарбаздар мен офицерлер арасындағы дәнекер буын болып саналады. Сондықтан мұндай спорттық және әскери-қолданбалы жарыстардың басты мақсаты – жеке құрамды даярлаудың заманауи әдістерін қалыптастыру.– Сержант – командирдің бірінші көмекшісі. Байқаудың Шоқан Уәлиханов атындағы әскери колледжде өткізіліп жатқаны да кездейсоқтық емес. Өйткені дәл осы оқу ордасы болашақ кіші командирлерді даярлайды, – дейді Қазақстан Республикасы Қарулы күштерінің бас сержанты шебер-сержант Темірбек Халықов. – Жеңімпаздар арнайы сертификаттармен және бағалы сыйлықтармен марапатталады. Ең бастысы, олар жоғары лауазымға көтерілетін артықшылыққа ие болады.Байқаудың басты міндеті – Қарулы күштер арасынан ең үздік сержанттар мен старшиналарды анықтау, олардың жауынгерлік даярлықты қамтамасыз етудегі білімдері мен тәжірибелік дағдыларын жетілдіруге бағытталған тиімді әдістерді әскери оқу жүйесіне енгізу. Мұндай жарыстар кіші командирлер арасында үздіктердің жетістіктерін насихаттап, алдыңғы қатарлы тәжірибені әскерге кеңінен таратуға жол ашады.Бүкілармиялық деңгейде өтіп жатқан үшінші кезең аясында «Айбын» әскери-спорттық сайысы, «Бағдар» әскери топографиядан бәсеке, «Жәрдем» тактикалық медицинадан жарыс, «Қайсар» әскери-кәсіби тапсырмасы өтеді. Сонымен қатар, сержанттар «Білімпаз» тестін тапсырып, атыс шебінде мергендігін көрсетеді, тактикалық дайындық бойынша білімдерін дәлелдейді және қоян-қолтық ұрыстан шеберліктерін сынайды.Ақпарат көзі : https://www.gov.kz/memleket/entities/mod/press/news/details/1069639?lang=kk

Астана, 2025 жылғы 16 қыркүйек – Қазақстан Республикасы Сыртқы істер министрлігінде Қазақстан Сыртқы істер министрінің орынбасары Ермұхамбет Қоныспаев пен Беларусь Сыртқы істер министрінің орынбасары Павел Утюпиннің төрағалығымен екіжақты саяси консультациялар өтті.Консультациялар барысында тараптар екіжақты және көпжақты форматтағы қазақ-белорус ынтымақтастығының ағымдағы жай-күйі мен даму перспективаларын талқылады, өңірлік интеграциялық бірлестіктер мен басқа да халықаралық ұйымдар шеңберінде одан әрі өзара іс-қимыл бойынша пікір алмасты, сондай-ақ алдағы екіжақты іс-шаралар кестесі бойынша «сағаттарды теңестірді».Кездесу қорытындысы бойынша қазақ-белорус көпжақты ынтымақтастығының барлық спектрі бойынша екіжақты серіктестікті одан әрі нығайту үшін сыртқы саяси ведомстволар арасындағы тығыз өзара іс-қимылды жалғастыру туралы уағдаластыққа қол жеткізілді.Ақпарат көзі : https://www.gov.kz/memleket/entities/mfa/press/news/details/1069131?lang=kk

12 қыркүйекте Еуразиялық экономикалық комиссия (ЕЭК) Кеңесінің кезекті отырысы өтті. Кеңес барысында техникалық реттеу саласындағы өзекті мәселелер қаралды.ЕЭК Кеңесі ЕАЭО аясында стандарттау жөніндегі жұмыстарды үйлестіру тәртібіне өзгерістер енгізді.Өзгерістер нақты сипатта. Атап айтқанда, мемлекеттік стандарттарды әзірлеуді (өзгерістер енгізу, қайта қарау) жоспарлау кезінде енді күшіне енген ЕАЭО техникалық регламенттерінің және оларға арналған стандарттар тізбелерінің ғылыми-техникалық деңгейіне міндетті мерзімді бағалау нәтижелерін ескеру мүмкіндігі қарастырылды.Сондай-ақ, бұл өзгерістер ЕАЭО техникалық регламенттеріне арналған мемлекеттік стандарттарды әзірлеу бағдарламаларында мемлекеттік стандарттарлы әзірлеудің қайталану жағдайларын болдырмауға бағытталған.Өзгерістер ресми жарияланғаннан кейін 30 күнтізбелік күн өткен соң күшіне енеді.ЕЭК Кеңесі парфюмерия-косметикалық өнімге қатысты техникалық регламентке өзгерістер қабылдады.Парфюмерия-косметикалық өнім құрамына қойылатын талаптар нақтыланды. Атап айтқанда тыйым салынған заттар тізімі, белгілі шектеулермен қолдануға рұқсат етілген заттар, рұқсат етілген бояғыштар, консерванттар және УФ-фильтрлер тізімдері өзектендірілді.Өзгерістер ресми жарияланғаннан кейін 12 айдан соң күшіне енеді.Сонымен қатар, формальдегидке қатысты нормалар бойынша 2027 жылғы 1 қаңтарға дейін өтпелі кезең қарастырылған: Қазір «формальдегид бар» деген таңбалау өнімдегі формальдегидтің теориялық концентрациясы 0,05%-дан асқан жағдайда талап етіледі.2027 жылдан бастап бұл шек 0,001%-ға дейін төмендейді. Яғни, егер теориялық концентрация 0,001%-дан асса, онда қаптамада «формальдегид бар» деген жазуды көрсету міндетті болады.Жеңіл өнеркәсіп өнімдеріне қатысты техникалық регламентке өзгерістер қабылданды.Құжатта сәйкестікті растау бойынша сертификаттау және декларациялау сұлбалары мен рәсімдері ЕЭК Кеңесінің №44 шешімімен бекітілген үлгі сұлбаларға сәйкестендірілді және қолданыстағы тәжірибе ескерілді.Бір жыл ішінде сынақ хаттамаларын ұқсас өнімнің келесі партиялары үшін, сондай-ақ үш жыл бойы материалдар мен құрамдас бөліктердің сынақ хаттамаларын осы материалдар мен құрамдас бөліктер қолданылған сериялық өнімнің сәйкестігін бағалау кезінде қолдану мүмкіндігі регламенттелді.Бұл түзетулер сәйкестікті бағалау рәсімдерінің бірізді қолданылуын және ЕАЭО-ның әрбір елінде жүргізілетін бағалау нәтижелерінің салыстырмалылығын қамтамасыз етеді.Осылайша, Еуразиялық экономикалық одақтың техникалық регламенттеріндегі сәйкестікті бағалау рәсімдерін жүйелі түрде қайта қарау жалғасуда.Ақпарат көзі : https://www.gov.kz/memleket/entities/mti/press/news/details/1068935?lang=kk

Алматыда Қазақстан Республикасы Қорғаныс министрлігі Әскери-техникалық мектебінің курсанттары мен оқытушылары «Өмірге үміт сыйла» қайырымдылық акциясына қатысты. Қайырымдылық жобасы ауыр науқастарға қан доноры болуды көздейді. Акция барысында Әскери-техникалық мектептің курсанттары мен оқытушылары мұқтаж жандарға көмектесу үшін шамамен 16 литр қан тапсырды. Қан тапсырар алдында әрқайсысы медициналық тексеруден өтті. Мамандар қан тобын анықтап, денсаулық жағдайын тексерді және қарсы көрсеткіштер қандай болатыны туралы айтты. Осыдан кейін донорлар 450 миллилитр қан тапсырды.ӘТМ бастығының орынбасары запастағы полковник Мұрат Сахратов қан тапсыру адамдарға көмек қана емес, жастарды тәрбиелеудің маңызды бөлігі екенін атап өтті.–  Біз курсанттарымызды әскери мамандыққа ғана дайындап қоймай, оларды жоғары моральдық және азаматтық құндылықтарға тәрбиелейміз, – дейді ол. – Донор болу – алғыс алумен қатар жауапты қадам. Мұндай іс-шаралар оқушыларымызға адам өмірінің құндылығын тереңірек түсінуге мүмкіндік береді.10 жылдан астам уақыт бойы донорлық қан өткізу Әскери-техникалық мектептің жақсы дәстүрі болды. Жыл сайын мектеп тәрбиеленушілері мен оқытушылары 50-60 литрден астам қан тапсырады, өмірді сақтауға үлес қосып, азаматтық жауапкершілік пен қоғамға қызмет етудің үлгісін көрсетеді.Алматы қаласының қан құю орталығында донорлар үшін әлеуметтік жауапкершілік сезімі басты әдіске айналатынын атап өтті. Ерікті өткізудің арқасында пациенттер қалпына келіп қана қоймай, адамдарға деген сенімін де қалыптастырады.Ақпарат көзі : https://www.gov.kz/memleket/entities/mod/press/news/details/1068909?lang=kk