2025 жылы Алматы облысы агроөнеркәсіптік кешенге (АӨК) тартылған инвестициялар көлемі бойынша елдегі жетекші өңірлердің қатарына енді. Сараптамалық деректерге сәйкес, өңірге шамамен 190 миллиард теңге инвестиция тартылған.Сараптамалық деректерге сәйкес, 2025 жылы АӨК секторының негізгі капиталына салынған инвестициялар жедел өсу кезеңіне өтті. Атап айтқанда, ауыл шаруашылығында инвестициялардың нақты көлем индексі 153 пайызды құрап, қаржы көлемі 1,2 триллион теңгеге жеткен. Тамақ өнімдері өндірісінде бұл көрсеткіш 208 пайызға (389,4 миллиард теңге), ал сусындар өндірісінде 240 пайызға (124,4 миллиард теңге) артқан.Сонымен қатар, ел бойынша АӨК-ке бағытталған инвестициялардың 69 пайызы ауыл шаруашылығына, ал 31 пайызы ғана қайта өңдеу саласына тиесілі. Бұл жағдай Ауыл шаруашылығы министрлігі қайта өңдеу мен қосылған құнды арттыруды басымдық ретінде атап өткенімен, инвестициялық циклдің әзірге шикізаттық базаны кеңейтуге көбірек бағытталғанын көрсетеді.АӨК-ке салынған инвестициялардың жиынтық көлемі бойынша Павлодар және Түркістан облыстары көш бастап тұр. Әр өңірге шамамен 246–247 миллиард теңгеден инвестиция тартылған. Одан кейінгі орындарда Солтүстік Қазақстан облысы (192 миллиард теңге) мен Алматы облысы (190 миллиард теңге) орналасқан.Алайда өңірлер арасындағы инвестициялық құрылым әркелкі. Солтүстік өңірлерде капитал салымдарының басым бөлігі ауыл шаруашылығына бағытталса, Алматы облысы қайта өңдеу саласына, атап айтқанда тамақ өнімдері мен сусындар өндірісіне басымдық беріп отыр.Екінші деңгейдегі өңірлер қатарына Ақмола, Қарағанды, Ақтөбе және Қостанай облыстары кіреді. Бұл аймақтарда инвестиция көлемі бар болғанымен, қайта өңдеу бағытына айқын бетбұрыс байқалмайды. Ал Жамбыл облысында қайта өңдеу саласына салынған инвестиция үлесі ауыл шаруашылығы өндірісінен асып түскенімен ерекшеленеді.АӨК-ке ең аз инвестициялар Ұлытау және Маңғыстау облыстарында тіркелген. Бұл көбіне табиғи-климаттық шектеулерге және азық-түлік жеткізіліміне жоғары тәуелділікке байланысты. Сарапшылардың айтуынша, аталған өңірлер ел бойынша ең жоғары жалақы көрсеткіштеріне ие болғанымен, бұл ауыл шаруашылығы емес, шикізаттық салалардың есебінен қалыптасқан. Сонымен қатар, дәл осы өңірлерде азық-түлік бағасының жоғары болуы логистикалық шығындар мен жергілікті өндірістің жеткіліксіздігімен байланысты.Жалпы алғанда, агроөнеркәсіптік кешендегі инвестициялық белсенділік артқанымен, өңірлер арасында теңгерімсіздік сақталып отыр. Мамандардың пікірінше, ауыл шаруашылығы мен қайта өңдеу саласы бірін-бірі толықтырып, қатар дамуы тиіс. Бұл инвестицияларды тұрақты өндіріс көлеміне, жұмыспен қамтуға және елдің азық-түлік қауіпсіздігіне айналдырудың басты шарты болып отыр. Ақпарат көзі : https://www.gov.kz/memleket/entities/almobl/press/news/details/1156416?lang=kk

Райымбек ауданында тұрғындарды жұмыспен қамтуға бағытталған «Бос жұмыс орындары жәрмеңкесі» ұйымдастырылды.Аталған іс-шараның негізгі мақсаты – еңбек нарығындағы сұранысты реттеу, жұмыссыз азаматтарды тұрақты және уақытша жұмыс орындарымен қамтамасыз ету, сондай-ақ әлеуметтік осал топтарды қолдау болып табылады.Жәрмеңкені «Алматы облысы еңбек мобильділігі орталығы» КММ-нің Райымбек ауданы бойынша мансап орталығы ұйымдастырды. Жәрменке аясында 28 жұмыс беруші тарапынан 56 бос жұмыс орны ұсынылды. Барлығы 58 азамат қатысты, оның ішінде пробация есебінде тұрған 20 адам қамтылды.Шара қорытындысы бойынша 6 азамат тұрақты жұмысқа орналастырылды, 30 адам қоғамдық жұмыстарға тартылды, ал 3 тұрғын әлеуметтік жұмыс орындарына жолданды.Сонымен қатар 2 азамат «Күміс жас» жобасы аясында жұмысқа орналасуға мүмкіндік алды.Айтулы жиын еңбек нарығындағы теңгерімді қамтамасыз етуге, азаматтарды тұрақты табыс көзімен қамтуға және олардың кәсіби әлеуетін арттыруға бағытталған тиімді алаң болып табылады.Айта кету керек, мұндай жәрмеңкелер алдағы уақытта да жүйелі түрде өткізілетін болады.Ақпарат көзі : https://www.gov.kz/memleket/entities/almobl/press/news/details/1156014?lang=kk

Президент тапсырмаларын жүзеге асыру аясында ҚР Премьер-министрі Олжас Бектеновтің төрағалығымен Алатау қаласын дамыту жөніндегі кеңестің отырысы өтті.Жиында инвестициялық жобалардың орындалу барысы, инфрақұрылымдық қамтамасыз ету бойынша жұмыс қарқыны, сондай-ақ құқықтық экожүйге қатысты мәселелер және сапалы адами капиталды қалыптастыру тәсілдері талқыланды. Отырысты ашқан Премьер-министр Президенттің Alatau City-ді дамытуға ерекше көңіл бөліп отырғанын атап өтті.«Мемлекет басшысы Алатау қаласын ұзақмерзімді экономикалық дамудың жаңа орталығы ретінде белгілеп, жұмыс барысын тікелей өзі қадағалап отыр. Сонымен қатар жаңа Конституция жобасында қала дамуының негізгі қағидаттары да қамтылды. Елімізде арнайы құқықтық режимдердің пайда болуы Қазақстанның ұзақмерзімді экономикалық мүдделеріне сай әрі инвестиция тартуға жаңа мүмкіндіктер ашады. Алатау қаласын дамыту – бұл ерекше мәртебеге ие, жеделдетілген дамудың заманауи цифрлық қаласын құруға бағытталған инновациялық шешім», — деп атап өтті Олжас Бектенов.Бұл ретте елімізде арнайы құқықтық режимдердің пайда болуы елдің әкімшілік-аумақтық құрылымына әсер етпейтіні баса айтылды. Аумақтың тұрақтылық принципі сақталады әрі маңызды болып қала береді, бұл оның жаңа Конституция жобасының бірінші бөлімінде – «Конституциялық құрылым негіздерінде» бекітілуімен дәлелденеді.Премьер-министрдің орынбасары Қанат Бозымбаев Алатау қаласын дамыту бағытында атқарылып жатқан жұмыстар туралы баяндады. Қазіргі уақытта Парламентте «Алатау қаласының арнаулы мәртебесі туралы» Конституциялық заң жобасы қаралуда.Институционалдық база құрумен қатар инвесторлар үшін тартымды орта қалыптастыратын және қала экономикасының өсуіне жаңа серпін беретін жүйе құраушы жобаларды іске қосу бойынша практикалық жұмыс жүргізілуде. Басым бағыттар қатарында қаланың сәулеттік-іскерлік өзегі ретінде Iconic Complex көпфункционалды кешенін және жоғары білікті мамандар даярлайтын әрі озық технологияларды дамыту орталығы ретінде KAIST Kazakhstan технологиялық университетін салу жобалары бар.Жалпы инвестициялық портфель өнеркәсіп, логистика, агроөңдеу, қызмет көрсету және креативті индустрия салаларындағы жалпы көлемі шамамен 1,8 трлн теңге болатын 44 жобадан тұрады. Оларды жүзеге асыру 30 мыңнан астам жұмыс орнын ашуға және Alatau City тұрақты экономикалық орта қалыптастыруға мүмкіндік береді.Инженерлік және көлік инфрақұрылымын дамытуға баса назар аударылды. Бірқатар бағыт бойынша жобалар кезең-кезеңімен жүзеге асырылуда:энергиямен қамтамасыз ету — «Арна» қосалқы стансасының құрылысы 220/110 кВ, 6 қосалқы стансаны жобалау;сумен жабдықтау және су бұру – «Ынтымақ» су тоғанының қуатын кеңейту, үш су тоғанының құрылысы, ағын суды тазарту стансасы және су таратушы коллекторлар салу;газбен қамту – «Gate City-1» жаңа автоматтандырылған газ тарату стансасының (АГТС) құрылысын жобалау, Жетіген АГТС құрылысын аяқтау;жол инфрақұрылымы – Growing және Gate District-ке жол өтпесін салу бойынша құжаттама әзірленуде және EPC-F келісімшарттары шеңберінде Golden District-те жол өтпесін және инженерлік желілері бар жол салу көзделген.Alatau City Authority мемлекеттік қорының бас атқарушы директоры Әлішер Әбдіқадыров Алатау қаласын дамыту бойынша тұжырымдамалық және қала құрылысы жоспарлары, даму стратегиясы сияқты іргелі құжаттардың әзірленгені туралы баяндады.Тұжырымдамалық жоспарды енгізу қаланың стратегиялық және кеңістіктік дамуын айқындайды. Қала құрылысы жоспары мен даму стратегиясы аймақтарға бөлуді және құрылыс параметрлерін, сондай-ақ тұрғын үйдің өмір сүру ортасының сапасына қойылатын талаптарды, оның ішінде ғимараттардың биіктігі бойынша шектеулерді, көгалдандыру және абаттандыру нормаларын, аумақтың желдетілуін және жеке көліктер мен автотұрақтардың қолжетімділігін қамтамасыз етеді. Даму стратегиясы салалық актілер мен инвестициялық жоспарды бекітуге, сондай-ақ Алатау қаласының жедел дамуын қамтамасыз ету үшін преференциялар беруге негіз болады.Сапалы адами капиталды қалыптастыру тәсілдері жеке қарастырылды. Шэньчжэнь, Дубай және Сингапурдың табысты тәжірибесін ескере отырып, Алатауда адами капиталды қалыптастырудың кезеңдік моделі ұсынылады. Бұл модель сапа басымдығы бар еңбек ресурстарының басқарылатын және селективті ағыны принциптеріне негізделген. Негізгі бағдарлардың қатарында көші-қон саясатын экономиканың қажеттіліктерімен байланыстыру, жұмыспен қамтуды институционалдық реттеу және ел ішінде дағдылар мен құзыреттерді жүйелі жаңғырту есебінен еңбек нарығының жоғары білікті және басқарушылық сегменттеріндегі қазақстандық мамандардың барынша жоғары үлесін қамтамасыз ету үшін жағдайлар жасау көрсетілген.Отырыс қорытындысы бойынша кеңеске қатысушылар Алатау қаласын дамыту бойынша ұсынылған тәсілдер мен жұмыс бағыттарын қолдады. Қаланың экожүйесін толыққанды қалыптастыру үшін дербес актілерді әзірлеу басым міндет болып саналатыны атап өтілді. Осы жұмысты үйлестіру және сүйемелдеу мақсатында қажетті мәселелерді уақтылы қарап әрі жедел шешімдер қабылдау үшін Жедел комитет құрылды.Барлық нормативтік актілерді әзірлеу олардың инвесторлар үшін айқындылығы мен ашықтығына бағдарлануы тиіс екендігі атап өтілді. Осыған байланысты Алатау актілерін әзірлеуге және сараптауға отандық сарапшылармен қатар халықаралық ұйымдардың өкілдерін тарту тапсырылды.Премьер-министр табысты проактивті инвестициялық саясатты жүргізу үшін инженерлік инфрақұрылымды, әсіресе ірі зәкірлік жобаларды қарқынды дамыту талап етілетінін атап өтті. Алатау қаласының инженерлік инфрақұрылымын дамыту мәселелері бойынша министрліктерге Алматы облысының әкімдігімен бірлесіп бірқатар тапсырма берілді.Сондай-ақ ұйымдастырушылық және қаржылық сипаттағы бірқатар шешім қабылданды. primeminister.kz Ақпарат көзі : https://www.gov.kz/memleket/entities/almobl/press/news/details/1155264?lang=kk

Кездесу барысында Айша Айтқалиева Әділет министрлігінің қызметі туралы айтып, жүргізіліп жатқан құқықтық реформалармен және Министрліктің негізгі жетістіктерімен таныстырды.Сондай-ақ тараптар өзара қызығушылық тудыратын мәселелер бойынша пікір алмасып, екіжақты ынтымақтастықты одан әрі дамыту перспективаларын талқылады.Кездесу қорытындысы бойынша тараптар өзара ризашылықтарын білдіріп, бір-біріне алдағы жұмыста табыс тіледі.Ақпарат көзі : https://www.gov.kz/memleket/entities/adilet/press/news/details/1154739?lang=kk

Алматы облысы Ұйғыр ауданында орналасқан «Прима Құс» ЖШС — Қазақстандағы тұйық циклді бройлер етін өндіру және өңдеу бағытындағы ірі агроөнеркәсіптік кешендердің бірі. Chickodelli брендімен танылған кәсіпорын сапа, қауіпсіздік және тұрақты даму қағидаттарын басты орынға қойып келеді.Компания 2019 жылы Алматы қаласында құрылған. Ал құс кешенінің құрылысы 2021 жылдың мамыр айында Алматы облысында басталған. Бүгінде өндірістік алаңның жалпы аумағы 547,5 гектарды құрайды. Қазіргі таңда кәсіпорында 750-ден астам адам еңбек етеді. Үшінші құрылыс кезеңі толық аяқталған соң, жұмысшылар саны 1200 адамға дейін артады деп жоспарлануда.Өндіріс көлемі ұлғайып, экспорт үлесі артып келедіКомпания кезең-кезеңімен іске асырылып жатқан инвестициялық жоба аясында өндірістік қуатын тұрақты түрде арттыруда. Алғашқы құрылыс кезеңі 2022 жылы жүзеге асырылып, оған 33,5 млрд теңге инвестиция тартылған. Бұл кезеңде жылына 17 500 тонна құс еті (тірі салмақта) және айына 200 тоннаға дейін шұжық өнімдерін өндіру мүмкіндігі іске қосылды.Ал екінші кезең 2025 жылы аяқталып, өндірістік қуат 50 пайызға артып, жылына 26 500 тонна құс етін өндіруге жетті. Сонымен қатар, шұжық өнімдерінің жылдық көлемі 400 мың тоннаға дейін ұлғайды.Компанияның маркетинг және жарнама бөлімінің өкілі Анастасия Покатовичтің айтуынша, «Прима Құс» өнімдеріне сұраныс жыл сайын артып келеді.- «Компания тұрақты түрде дамып, өндіріс көлемін ұлғайтып келеді. Барлық өнімдер мұсылман дәстүріне сай, “Халал” стандарты бойынша өндіріледі. 2025 жылдың қорытындысы бойынша өніміміздің 38 пайыздан астамы экспортқа шығарылды. Бүгінде біз Өзбекстан, Ресей, Қырғызстан, Біріккен Араб Әмірліктері мен Әзербайжан нарықтарына өнім жеткіземіз. Алдағы уақытта Қытай мен Моңғолия бағытындағы экспортты жолға қоюды көздеп отырмыз», - дейді ол.Экспортқа құс етімен қатар, шұжық өнімдері мен түрлі жартылай фабрикаттар шығарылады. Компанияның барлық өнімі халықаралық талаптарға сай, ISO 22000 және HACCP сапа және тағам қауіпсіздігі жүйелерімен сертификатталған.Кәсіпорындағы өндірістік процестің қалай ұйымдастырылғанын цех басшысының өндіріс жөніндегі орынбасары Тлеген Нұржанов тарқатып берді.- «Өндіріс таңертең ерте басталады. Құстар алдымен кәсіпорын аумағына жеткізіледі. Сою цехында ветеринар дәрігерлер олардың жағдайын толық тексеріп шығады. Содан кейін “Халал” стандартына сай дұға оқылып, бауыздау процесі басталады. Тауықтар бірнеше технологиялық кезеңнен өтеді: қанын ағызу, қауырсынын жұлу. Одан соң құстар ауа-тамшылы салқындату бөлімінде 2 сағат 45 минут айналдырылады. Бұл - еттің температурасын барынша төмендету үшін қажет», - дейді ол.Температура қажетті деңгейге түскеннен кейін, сойылған құстар өндірістік цехқа жіберіледі. Мұнда салқындатылған және мұздатылған құс еті дайындалады. Сонымен қатар, бауыр, жүрек, асқазан секілді ішкі ағзалар да мұздатылған күйде өңделіп, Қазақстанның барлық өңіріне жөнелтіледі.Өнімді қаптауға да қатаң талап қойылған: көтерме қаптаманың салмағы 13 500 килограмнан кем болмауы, ал бөлшек саудаға арналған жеке қаптамадағы құс еті 800 грамнан төмен болмауы тиіс.Қазіргі уақытта, компания үшінші құрылыс кезеңін іске асыруда. 2026 жылға қарай өндіріс көлемі жылына 35 мың тоннаға дейін жетіп, 12 200 тоннаға арналған элеватор салу жоспарланған. Жоба Қазақстан Даму Банкі мен KazakhExport қолдауымен жүзеге асырылуда.Chickodelli бренді тек өндірісті ғана емес, фирмалық дүкендер мен франчайзинг желісін де белсенді дамытып келеді. Жаңа өнім түрлері ұсынылып, қаптама дизайны жаңартылуда.Осылайша, «Прима Құс» ЖШС отандық нарықты сапалы өніммен қамтамасыз етіп қана қоймай, Қазақстанның экспорттық әлеуетін арттыруға да елеулі үлес қосып отыр.Ақпарат көзі : https://www.gov.kz/memleket/entities/almobl/press/news/details/1154644?lang=kk

GITEX, әлемдегі ең ірі технологиялық және стартап-іс-шаралар желісі 2026 жылдың 4–5 мамыр аралығында Алматы қаласында өтетін GITEX Ai CENTRAL ASIA & CAUCASUS Kazakhstan іс-шарасының іске қосылғанын жариялайды. Жаңа алаңның таңдалуы сауда, өнеркәсіптік өндіріс, корпоративтік сектор мен инновациялар шоғырланған өңірдің негізгі іскерлік және инновациялық орталығы ретіндегі Алматының рөлін айқындайды.Іс-шара Қазақстандағы Цифрландыру және жасанды интеллект жылы аясында өтеді. GITEX Ai CENTRAL ASIA & CAUCASUS Kazakhstan еліміздің әлемдегі жетекші технологиялық экожүйелер қатарындағы орнын нығайтуға ұмтылысын көрсетіп, технологиялық жобаларға экспорттың өсуін, әріптестіктерді дамытуды және инвестициялар тартуды қолдайды.Іс-шара GITEX-тің жаһандық ұйымдастырушысы inD компаниясымен ұйымдастырылып, Қазақстан Республикасының Жасанды интеллект және цифрлық даму министрлігінің қолдауымен, Astana Hub және Алматы қаласының әкімдігімен серіктестікте өтеді. GITEX Ai CENTRAL ASIA & CAUCASUS Kazakhstan мемлекеттік органдардың өкілдерін, технологиялық компанияларды, ЖИ, бұлтты және деректер-инфрақұрылымдар саласындағы көшбасшыларды, финтех-инноваторларды және өңірдің ең перспективалы стартаптарын біріктіріп, Орталық Азия мен Кавказды бәсекеге қабілетті цифрлық хабқа айналдыру үдерісін жеделдетуге бағытталады.Қазақстан Республикасы Премьер-Министрінің орынбасары - Жасанды интеллект және цифрлық даму министрі Жаслан Мәдиев:«GITEX-тің Алматыда өтуі Қазақстанның өңірдегі технологиялық көшбасшылар, стартаптар мен инвестициялар үшін тартымды орталыққа айналып келе жатқанын растайды. Бұл біз үшін жай ғана ауқымды іс-шара емес, цифрлық трансформацияны және ЖИ-ді экономика мен мемлекеттік басқаруға енгізуді жеделдететін тәжірибелік құралдардың бірі. Біздің міндетіміз - осы серпіннің өлшенетін нәтиже беруін қамтамасыз ету, шешімдерді нарыққа тезірек шығару, өнімділікті арттыру және бүкіл өңір бойынша адамдар мен бизнес үшін жаңа мүмкіндіктер қалыптастыру» екенін атап өтті.Алматы қаласының әкімі Дархан Сатыбалды:«GITEX-ті Алматыда өткізу арқылы біз қаланың Орталық Азиядағы инновация, сауда және кәсіпкерлік саласындағы негізгі орталықтардың бірі ретіндегі позициясын күшейтеміз. Алдыңғы қатарлы технологиялар жергілікті деңгейде дамыған сайын, оларды жаһандық нарықтарға экспорттау жөніндегі ұлттық мақсатымыз да айқынырақ көрініс табуда» - деді.GITEX-тің жаһандық ұйымдастырушысы inD компаниясының CEO-сы Трикси Ло Мирманд:«Қазақстан мүмкіндіктерге және әлеуметтік-экономикалық әсерге негізделген цифрлық болашақты қалыптастыруда стратегиялық тәсіл танытып отыр. Алматы - осы көзқарасты іске асыру үшін қажет кәсіпкерлік энергия мен инновациялық әлеует тоғысқан нүкте. Алматыдағы GITEX әлемге Орталық Азия мен Кавказдағы ауқымды индустриялық және технологиялық серпілісті тек бақылап қана қоймай, осы үдерісті қалыптастыруға белсенді қатысуға мүмкіндік береді».Елдің инновациялық орталығына қарай жасалған стратегиялық қадамАлматыға негізгі технологиялық ойыншыларды тарту Қазақстанның ұлттық цифрлық стратегиясына сәйкес келеді және қаланың инновациялық орталық ретінде қарқынды өсіп келе жатқанын көрсетеді. Алматыда 1 500-ден астам стартап орналасқан, елдегі венчурлық капиталдың 50%-ы осы қалада шоғырланған, сондай-ақ жақын арада әлемдік деңгейдегі халықаралық ғылыми-технологиялық институт – Qazaqstan Advanced Institute of Science and Technology (QAIST) ашылады. Осындай жағдайда GITEX Орталық Азиядағы жаңа буын цифрлық экономикасын қалыптастырып жатқан компаниялармен, стартаптармен, инвесторлармен және зерттеу орталықтарымен тікелей байланыс орнатуға мүмкіндік береді.Жаһандық технологиялық және инвестициялық іс-шаралар желісінің жаңа тірек алаңыОрталық Азия мен Кавказ жедел цифрландыру, стартап-экожүйелердің жетілуі және болашаққа бағдарланған трансформация стратегияларын іске асыру аясында ауқымды технологиялық өзгерістер кезеңінен өтуде. Осы тұрғыда Қазақстан өңірлік көшбасшы ретінде ерекшеленеді: мұнда Орталық Азиядағы ең ірі гипермасштабталатын деректер-орталығы орналасқан, мемлекеттік қызметтердің 90%-дан астамы цифрлық форматқа көшірілген, сондай-ақ alem.ai халықаралық жасанды интеллект орталығын қоса алғанда, бірқатар флагмандық бастамалар жүзеге асырылуда.GITEX-тің Қазақстанда пайда болуы осы цифрлық жолдағы маңызды кезеңге айналады. Іс-шараның Алматыда өтуі қаланы Орталық Азия мен Кавказды Абу-Даби, Дубай, Бразилия, Германия, Үндістан, Кения, Марокко, Нигерия, Сербия, Сингапур, Түркия және Вьетнам сияқты негізгі халықаралық нарықтармен байланыстыратын GITEX-тің жаһандық желісінің өңірлік тірек нүктесіне айналдырады.Толығырақ ақпарат: https://shorturl.at/Ejl2CСтендті қазір брондаңыз: https://shorturl.at/X5D5d Қатысу үшін тіркелу: https://shorturl.at/ifrK1Іс-шараның брошюрасын жүктеу: https://shorturl.at/xXaNGАқпарат көзі : https://www.gov.kz/memleket/entities/almaty/press/news/details/1156485?lang=kk

Бірнеше жыл бұрын спинальды стеноз диагнозы қойылған науқас ірі медициналық орталықтарға жүгінуге мәжбүр болатын. Бүгінде осындай жоғары технологиялық операциялар міндетті әлеуметтік медициналық сақтандыру шеңберінде Қонаев қалалық көпсалалы ауруханасында сәтті жүргізілуде.58 жастағы науқас қатты бел ауруымен және қозғалыстың шектелуімен ауруханаға түсті. Әр қадам ауырлық тудырып, күнделікті өмірі тек бірнеше метрге дейін ғана ауырсынусыз жүруге дейін қысқарған. Аурухана мамандары жүргізген кешенді диагностикалық тексерулер спинальды стенозды анықтады - омыртқа арнасының тарылуы салдарынан жұлын мен жүйке тамырлары қысылған. Уақытылы хирургиялық араласусыз бұл жағдай ауыр неврологиялық асқынуларға және мүгедектікке әкелуі мүмкін еді.Шешім дереу қабылданды. МӘМС шеңберінде науқасқа омыртқа арнасының микрохирургиялық декомпрессиясы және гипертрофияланған байламды алу отасы жасалды - күрделі, бірақ өте тиімді араласу.Отаны орындаған - жоғары білікті нейрохирург Гизатуллин Марат Римұлы, омыртқа патологияларын емдеудің заманауи микрохирургиялық әдістеріне терең маманданған дәрігер. Операцияның қауіпсіз өтуі мен науқастың тұрақты физиологиялық жағдайын қамтамасыз еткен - реаниматолог - анестезиолог дәрігері Бакриев Рият Айсамжанұлы, ол наркоз жүргізу және науқастың ота кезіндегі жағдайын кәсіби деңгейде бақылады. Дәрігерлердің бірлескен жұмысы ота жасауды қауіпсіз етіп, асқынулар қаупін азайтып, қалпына келу мерзімін қысқартты.Операция сәтті өтті. Бірнеше күннен соң науқас ауырсынудың айтарлықтай азайғанын және жалпы жағдайының жақсарғанын байқады. Қазіргі уақытта ол дәрігерлерге ерекше алғыс білдіреді, өтйкені ақ халаттылар науқасты "аяққа тұрғызды".-Осындай күрделі операцияның Қонаевта жүзеге асырылатынын күтпедім. Марат Римұлына, Рият Айсамжанұлына және аурухананың барлық ұжымына кәсібилік, ілтипаттылық және науқастарға деген қарым-қатынастары үшін үлкен алғыс айтамын, - дейді науқас.Бұл оқиға өңірлік медицинаның дамуының нақты мысалы болып табылады. Қонаев қалалық көпсалалы ауруханасы заманауи медициналық құрал-жабдықтармен, жоғары білікті кадрлармен және жоғары технологиялық медициналық көмекті көрсету мүмкіндіктерімен толық қамтамасыз етілген. Бұрын мұндай көмек тек республикалық орталықтарда ғана қолжетімді болған.Алматы облысының тұрғындары үшін бұл сапалы медициналық көмек өз тұрғылықты жерінде қолжетімді және ұзақ күтуге, басқа қалаларға қымбат сапарларға шығуға қажеттілік жоқ, науқастар өз жерінде жоғары деңгейлі мамандарға сенім арта алады. Ақпарат көзі : https://www.gov.kz/memleket/entities/almobl/press/news/details/1153538?lang=kk

Алматыда «Qonaev Media» телеарнасының жаңа кеңсесі мен заманауи студиясының ресми ашылу салтанаты өтті. Іс-шараға Алматы облысының әкімі Марат Елеусізұлы Сұлтанғазиев арнайы қатысып, телеарнаның жұмыс барысымен танысты.Жаңа телеарна 2025 жылдың қыркүйек айында көрерменге жол тартып, қазіргі уақытта Алматы облысының барлық аудандары мен қалаларын қамти отырып, республикалық деңгейде хабар таратып отыр.Салтанатты шара барысында телеарнаның техникалық мүмкіндіктері, жаңа студиялары мен жұмыстың атқарылу барысы таныстырылды. Өңір басшысы өз сөзінде жаңа телеарнаның ашылуы облыс үшін маңызды әрі тарихи оқиға екенін атап өтті.- “Бүгін біз өңіріміз үшін маңызды, тарихи сәттің куәсі болып отырмыз. Өңірлік жаңа телеарнаның ашылуы – бұл тек бір медиа алаңның іске қосылуы емес, бұл – қоғамдық сананы қалыптастыруға, ашық диалог орнатуға және өңірдің дамуын жаңа деңгейге көтеруге бағытталған маңызды қадам. Жаңа арнаның басты ұстанымы – шынайылық, жауапкершілік және халық мүддесіне адал қызмет болуы керек. Ақпараттық саясатта тепе-теңдік пен кәсібилікті сақтай отырып, көрерменге пайдалы әрі сапалы контент ұсынады деп сенемін.”– деді, облыс әкімі Марат Сұлтанғазиев.Сондай-ақ цифрландыру дәуірінде «Qonaev Media» телеарнасы «Digital Sana» жобасы аясында жасанды интеллект технологияларын енгізіп, отандық медиа кеңістігіндегі озық әрі жаңашыл арналардың қатарына қосылуды мақсат етіп отыр.Өз кезегінде «Qonaev media» телеарнасының бас директоры Қымбат Хангельдина шынайы алғысын білдіре отырып, телеарна тарапынан өңірдің оң имиджін қалыптастыруға бағытталған сапалы контенттер алдағы уақытта да жалғасатынын айтты: «Облыс әкімдігі тарапынан көрсетіліп отырған қолдау үшін алғыс білдіремін. Ұжым мүшелері өңірдің дамуына өз үлестерін қосып ғана қоймай, бұқаралық ақпарат құралдарынан облысымыздың оң имиджін қалыптастыруды мақсат етуде. Одан бөлек, телеарна ұжымы сапалы әрі заманауи телевизиялық өнім әзірлеуге бағытталған ұзақ мерзімді жұмысты жалғастыруға ниетті», - деді, телеарна директоры.Айта кетейік, телеарна эфирлік, кабельдік, Smart TV және онлайн платформалар арқылы хабар таратып, өңір тұрғындарына сапалы әрі қолжетімді контент ұсынуға толық мүмкіндікке ие.Ақпарат көзі : https://www.gov.kz/memleket/entities/almobl/press/news/details/1153475?lang=kk

Алматы облысының әкімі Марат Сұлтанғазиевтің төрағалығымен өңір активімен кездесу өтіп, онда Қазақстан Республикасының жаңа Конституциясының жобасы кеңінен талқыланды. Жиынға қала және аудан әкімдері, облыстық басқарма басшылары, құқық қорғау органдарының өкілдері мен азаматтық қоғам мүшелері қатысты.Кездесуді ашқан облыс әкімі негізгі мақсат – Ата Заң жобасында көзделген өзгерістерді жан-жақты талқылау екенін атап өтті. Сондай-ақ тұрғындарды конституциялық реформа барысынан хабардар етіп, азаматтардың белсенді қатысуының маңыздылығына тоқталды.Жиын барысында ағымдағы жылдың қаңтар айында еліміздің әр өңірі мен түрлі әлеуметтік топ өкілдерінен құралған 130 адамдық Конституциялық реформа жөніндегі комиссия құрылғаны айтылды. Комиссия азаматтардан, саяси партиялардан, қоғамдық ұйымдар мен сарапшылардан түскен ұсыныстарды зерделеп, жаңа Конституцияның жобасын әзірлеген.Алматы облыстық мәслихатының төрағасы, Конституциялық реформа жөніндегі комиссия мүшесі Қуат Байғожаев реформаның Мемлекет басшысы Қасым-Жомарт Тоқаевтың бастамаларына негізделгенін жеткізді. Оның айтуынша, бірпалаталы Парламент құру идеясы Президенттің 2025 жылғы 8 қыркүйектегі Қазақстан халқына Жолдауында көтеріліп, саяси жүйені кешенді жаңғыртуға және жасанды интеллект дәуіріндегі әлеуметтік-экономикалық дамуға серпін беруге бағытталған.Сондай-ақ аталған бастамаларды іске асыру мақсатында ғалымдар, сарапшылар, саяси партиялар мен қоғамдық бірлестіктер өкілдері қатысқан жұмыс тобы құрылғаны айтылды. Азаматтар e-Otinish және eGov порталдары арқылы екі мыңнан астам ұсыныс жолдаған. 2026 жылғы қаңтарда өткен Ұлттық құрылтай отырысында Мемлекет басшысы атқарылған жұмысты қорытындылап, алдағы өзгерістердің негізгі бағыттарын айқындады.Қуат Байғожаевтың сөзінше, Комиссия Конституцияның барлық бөлімін қамтитын 77 бапқа өзгеріс енгізуді қарастырған. Бұл құжат мәтінінің 84 пайызын құрайды. Өзгерістер адамға бағдарланған мемлекеттік саясатты күшейтуге, қоғамдық құндылықтарды нығайтуға және саяси институттардың тиімділігін арттыруға бағытталған.Жаңа Конституция жобасында адам құқықтары мен бостандықтары мемлекеттің ең жоғары құндылығы ретінде бекітіледі. Ел бірлігі, ынтымақ, ұлтаралық және конфессияаралық келісім, егемендік пен аумақтық тұтастық негізгі құндылықтар ретінде айқындалған. Сондай-ақ әділеттілік, Заң мен Тәртіп қағидаттары, қоршаған ортаға ұқыпты қарау мәселелері қамтылып, Қазақстан халқы мемлекеттік биліктің бірден-бір қайнар көзі ретінде танылады.Құжатта білім мен ғылымды, мәдениет пен инновацияны, цифрландыруды дамыту және азаматтардың цифрлық ортадағы құқықтарын қорғау басты бағыттар ретінде көрсетілген. Мемлекет пен дін арасындағы қатынастар нақты айқындалып, білім беру жүйесінің зайырлы сипаты сақталады. Неке ер мен әйелдің тең құқықты, ерікті одағы ретінде белгіленген.Негізгі жаңашылдықтардың қатарында 145 депутаттан тұратын, пропорционалды жүйе бойынша бес жыл мерзімге сайланатын бірпалаталы Парламент – Құрылтай құру, заң шығару бастамасы құқығы бар жоғары консультативтік орган – Халық Кеңесін қалыптастыру, сондай-ақ қоғамдық-саяси, ғылыми және мәдени ұйымдармен өзара іс-қимыл жасайтын Вице-президент институтын енгізу бар.Сонымен қатар Конституцияда алғаш рет адвокаттық қызмет пен зияткерлік меншікті қорғауға қатысты жеке нормалар бекітіліп, азаматтардың құқықтық кепілдіктері күшейтіледі. Атап айтқанда, бір құқықбұзушылық үшін қайта жауапқа тартуға тыйым салу, кінәсіздік презумпциясын сақтау және ұстау кезінде құқықтарды міндетті түрде түсіндіру («Миранда ережесі») енгізіледі.Жиынды қорытындылаған Қуат Байғожаев жаңа Конституция жобасы мемлекеттік басқарудың заманауи қағидаттарына сай келетінін, Қазақстанның халықаралық беделін арттырып, адами капиталды, білім мен ғылымды дамытуға басымдық беретінін атап өтті. Құжаттың жаңа редакциясы жалпыұлттық референдумға шығарылып, Комиссия жұмысы жалғасады.Кездесу соңында облыс әкімі ішкі саясат басқармасына, қала және аудан әкімдеріне, барлық басқарма мен департамент басшыларына кең көлемді ақпараттық-түсіндіру жұмыстарын ұйымдастыруды тапсырды. Халықпен кездесулер, еңбек ұжымдарындағы ашық диалогтар, Қоғамдық кеңестер мен азаматтық қоғам алаңдары ұсынылған өзгерістердің мәні мен олардың күнделікті өмірге әсерін терең түсіндіруге бағытталуы тиіс.«Ақпараттық жұмыс мазмұнды әрі тек ресми және сенімді дереккөздерге сүйенуі керек. Бұқаралық жалған пікірлер мен бұрмаланған ақпараттарға жедел жауап беріп, кәсіби сарапшылар мен заңгерлерді тарту маңызды. Осындай жүйелі жұмыс қана азаматтардың саналы таңдау жасауына мүмкіндік береді», – деп түйіндеді Марат Сұлтанғазиев.Ақпарат көзі : https://www.gov.kz/memleket/entities/almobl/press/news/details/1152901?lang=kk

Қазақстан Республикасында жаңа Конституцияны әзірлеу үдерісінде Конституциялық комиссия шешуші рөл атқарды. Комиссияның негізгі міндеті – конституциялық реформа аясында құқықтық тұрғыдан негізделген, қоғам сұранысына сай ұсыныстар әзірлеу болды.Комиссия құрамына 130 адам кіріп, оның жұмысына құқықтанушы ғалымдар, мәслихат төрағалары, Ұлттық құрылтай өкілдері, өңірлік қоғамдық кеңестер мүшелері, сарапшылар, ғылыми қауымдастық пен бұқаралық ақпарат құралдарының басшылары тартылды. Бұл құрам реформаны жан-жақты әрі кәсіби тұрғыда талқылауға мүмкіндік берді.Комиссияның жұмыс органы ретінде Қазақстан Республикасы Конституциялық Сотының Аппараты белгіленіп, ұсыныстарды жүйелеу мен құқықтық сараптауды қамтамасыз етті. Комиссия отырыстары ашық форматта өтіп, онда белгілі заңгерлер, құқық қорғаушылар, қоғам белсенділері, депутаттар мен саясаттанушылар сөз сөйледі.Сонымен қатар, комиссия жұмысы тікелей эфирде көрсетіліп, бұқаралық ақпарат құралдарында кеңінен әрі егжей-тегжейлі жарияланып отырды. Бұл жаңа Конституция жобасының ашықтық, жариялылық және қоғамдық бақылау қағидаттарына сай әзірленгенін айқын көрсетеді.

Премьер-министрдің орынбасары Қанат Бозымбаев Алматы облысында су ресурстарын тиімді пайдалану және ауылдық аймақтарды тұрақты дамыту мәселелері бойынша кеңес өткізді.Жиынға облыс әкімі Марат Сұлтанғазиев, Су ресурстары және ирригация министрі Нұржан Нұржігітов, Ауыл шаруашылығы вице-министрі Азат Сұлтанов, Ұлттық экономика министрлігінің және «AMANAT» партиясының өкілдері, сондай-ақ өңірдің ауыл шаруашылығы тауар өндірушілері қатысты.Кеңесте вегетация кезеңінің тұрақты өтуін қамтамасыз ету, су үнемдеу технологияларын енгізу, егістік құрылымын әртараптандыру, су ресурстарын есепке алу мен бөлуді цифрландыру, тарифтік саясатты жетілдіру және суды заңсыз алудың жолын кесу шаралары талқыланды.Су ресурстары және ирригация министрлігі Бас прокуратурамен бірлесіп судың «қара нарығымен» күрес жөніндегі жол картасын әзірледі. Жол картасы аясында республикалық және өңірлік деңгейде ведомствоаралық жұмыс топтары құрылады. Құжатта анықталған заңбұзушылықтарды талдау, цифрлық мониторинг құралдарын енгізу, тексерулер мен рейдтер ұйымдастыру, сондай-ақ лауазымды тұлғалар мен су шаруашылығы ұйымдары жасайтын құқықбұзушылықтарды анықтау және алдын алу мақсатындағы сыбайлас жемқорлыққа қарсы іс-шаралар қарастырылған.Вице-премьер Күрті су қоймасынан суды заңсыз алудың жолын кесуге ерекше назар аударуды тапсырды.Суару маусымында тұрақты су пайдалануды қамтамасыз ету үшін ауыл шаруашылығы дақылдарын әртараптандыру шаралары көзделген. 2026 жылға арналған жоспарға сәйкес, Алматы облысында күріш егісінің жалпы аумағы 5,8 мың гектардан аспауы тиіс.Белгіленген лимиттерді сақтау мақсатында суды меншікті нормадан артық тұтынған, өсірілетін дақылдарды өз бетінше ауыстырған және тиісті келісімшартсыз су алған жағдайда тарифтерді ұлғайтуды көздейтін суармалы суды пайдалану қағидалары қабылданды.«Суармалы судың тапшылығы ел экономикасының дамуына кері әсерін тигізеді. Сондықтан су ресурстарын пайдалану тиімділігін арттыру мәселесі аса өзекті. Әкімдік дақылдар құрылымын әртараптандыруға және құрғақшылыққа төзімді дақылдарды енгізуге ерекше назар аударуы тиіс. Күріш дақылдарының ауданын Ауыл шаруашылығы министрлігі бекіткен индикаторларға сәйкес келтіру қажет. Былтырғы күрделі жағдайға қарамастан, вегетация кезеңінің салыстырмалы түрде жеңіл өтуіне су үнемдеу технологияларын енгізу ықпал етті. Мемлекет басшысы Ақмола облысына жұмыс сапары барысында атап өткендей, су ресурстарының 50%-дан астамы жерге сіңіп кетеді. Бұл заманауи жүйелерді қолданатын көрші елдермен трансшекаралық суды бөлу жөніндегі келіссөздерді қиындатады. Алдағы 3-4 жылда бұл мәселемен жүйелі түрде айналысу қажет», — деп атап өтті Қанат Бозымбаев.2030 жылға дейін Қазақстандағы 1,3 млн гектар суармалы жерді су үнемдеу жүйелерімен қамту жоспарланып отыр. Оның ішінде Алматы облысы бойынша көрсеткіш – 186,6 мың гектар. Осы көрсеткіштерге қол жеткізу үшін 2026-2028 жылдары республика бойынша жалпы сипаттағы трансферттер аясында су үнемдеу технологияларын енгізуді қолдауға және суару суының құнын субсидиялауға 228,2 млрд теңге қарастырылған. Бұл алдыңғы үш жылмен салыстырғанда төрт есе көп. Оның ішінде Алматы облысына 27,6 млрд теңге бекітілген. 2028 жылға дейінгі су шаруашылығын дамытудың кешенді жоспары аясында Су ресурстары және ирригация министрлігі Бартоғай су қоймасын реконструкциялау жобасын әзірлеп жатыр. Сондай-ақ жалпы ұзындығы 270 шақырым болатын топтық су құбыры мен төрт магистральдық канал салу жоспарланған. Үлкен Алматы каналының учаскелерін реконструкциялау жұмыстары жүргізіліп жатыр. Бұл жұмыстар биыл толық аяқталады. Жергілікті атқарушы органдар «Сұңқар» және «Тегермен» су қоймаларын салуға арналған жобалау-сметалық құжат дайындап жатыр. Сонымен қатар төрт су қоймасына күрделі жөндеу жүргізу және 74 гидротехникалық құрылысты көпфакторлы тексеруден өткізу көзделген. Вице-премьер облыс әкімдігіне осы жобалардың жүзеге асырылуын ерекше бақылауға алуды және нысандарды белгіленген мерзімде пайдалануға беруді қамтамасыз етуді тапсырды.Ислам даму банкімен ынтымақтастық аясында Еңбекшіқазақ, Балқаш, Ұйғыр және Райымбек аудандарында суару желілерін реконструкциялау жобаларын жүзеге асыру жоспарланып отыр. Нысандардың жалпы ұзындығы 550 шақырымнан асады. Нәтижесінде 34 мың гектардан аса ауыл шаруашылығы жері тұрақты сумен қамтамасыз етіледі. Бұл өңірдің агроөнеркәсіп кешенін дамытуға және оның климаттық тұрақтылығын арттыруға елеулі үлес қосады.Кеңесте «Ауыл аманаты» бағдарламасының жүзеге асырылу барысы да қаралды. Биыл Алматы облысында ауыл кәсіпкерлігін дамытуға 10,8 млрд теңге бөлінеді. Облыс әкімінің орынбасары Бақытнұр Бақытұлының айтуынша, бағдарлама қазірдің өзінде айқын әлеуметтік-экономикалық нәтиже көрсетіп отыр. Ауыл тұрғындарының орташа табысы 23%-ға артқан, ал кейбір кәсіпкерлердің өнімдері басқа өңірлерге және экспорттық нарықтарға шығарылып жатыр.   Соңғы үш жылда бағдарлама аясында 1436 жоба қаржыландырылып, 90 кооператив құрылды және 1616 жаңа жұмыс орны ашылды.   Қазіргі таңда Алматы облысы халқының 81%-ы ауылдық жерлерде тұрады. Қанат Бозымбаев ауылда тұрақты табыс көздерін, жұмыс орындарын және шағын бизнесті дамытуға қажетті жағдай жасаудың маңыздылығын атап өтті.Өңірде «Ауыл аманаты» бағдарламасының сапалы орындалуын бақылау Ұлттық экономика министрлігіне жүктелді. primeminister.kz #Ауыл шаруашылығы #су ресурстары #Қанат Бозымбаев #ӨңірлерАқпарат көзі : https://www.gov.kz/memleket/entities/almobl/press/news/details/1151898?lang=kk

Алматы облысында өңір басшысы Марат Сұлтанғазиевтің төрағалығымен жер ресурстарын тиімді пайдалану және заңсыздықтарға тосқауыл қою мәселелері талқцланған жиын өтті.Ккеңестің күн тәртібіндегі негізгі тақырыптар қатарында облыста пайдаланылмай жатқан ауыл шаруашылығы жерлері, пайдалы қазбаларды заңсыз өндіру деректері және мемлекеттік тапсырмалардың формалды орындалуы болған.Жер қатынастары басқармасының басшысы Аманжол Әбдірахмановтың мәліметінше, 2022–2025 жылдар аралығында облыста ауыл шаруашылығы мақсатындағы 1,26 млн гектар пайдаланылмай жатқан жер анықталған. Оның ішінде:• 517,2 мың гектар жер мемлекет меншігіне қайтарылған,• тек 2025 жылдың өзінде 91,1 мың гектар жер қайта алынған.Қазіргі таңда 323 мың гектар жер қайтадан ауыл шаруашылығы айналымына енгізілген. Сонымен қатар:• 9,4 мың гектар жер сот өндірісінде қаралып жатыр,• 2,1 мың гектар жер иесіз мүлік ретінде тіркелген,• 272,6 мың гектарға қатысты жер салығын өсіру туралы ұйғарым берілген.Сондай-ақ ол, жергілікті атқарушы органдар қазіргі уақытта сенімсіз жер пайдаланушылармен келісімшарттарды бұзу мақсатында 1 059 жер учаскесіне (136 мың гектар) қатысты құжаттарды әзірлеп жатқанын айтты.«Біздің міндет – жерді қайтару ғана емес, оны экономикаға нақты енгізу. Биыл қосымша 40 мың гектар жерді мемлекетке қайтаруды, бес инфрақұрылымдық жобаны іске асыруды және Алматы маңында үш индустриялық аймақ құруды жоспарлап отырмыз», – деді Аманжол Әбдірахманов.Мемлекет меншігіне өткен жерлердің ішінде 322,9 мың гектар қайта ауыл шаруашылығы айналымына енгізілген. Оның ішінде:• 165,9 мың гектар – конкурс арқылы таратылған;• 138,5 мың гектар – жергілікті тұрғындардың мал жаюына берілген;• 18,5 мың гектар – инвестициялық жобалар үшін бөлінген.2025 жылы бірқатар аудандар мен Қонаев қаласында сәулет және жер заңнамасының сақталуына талдау жүргізілген. Негізгі заңбұзушылықтар жер учаскелерін беру және олардың мақсатты бағытын бас жоспарға қайшы өзгерту деректерімен байланысты болған.Алдын алу мақсатында ведомствоаралық өзара іс-қимыл алгоритмдері қабылданып, мониторинг күшейтілді. Нәтижесінде 2025 жылы бұзушылықтар саны алдыңғы жылдармен салыстырғанда азайған.Кеңесте жер қойнауын пайдалану мәселесіне де ерекше назар аударылды. Кәсіпкерлік және индустриялық-инновациялық даму басқармасы басшысының орынбасары Айгүл Манасбаеваның айтуынша, Алматы облысында шамамен 296 карьер жұмыс істейді, ал облыстың шикізат қоры өңір мен Алматы қаласының қажеттілігін толық өтейді.«2024 жылдың қорытындысы бойынша пайдалы қазба өндіру көлемі 13 пайызға артты. Ал 2025 жылы бюджетке түскен түсім 18,2 млрд теңгені құрады», – деді Айгүл Манасбаева.Алайда заңсыз өндіру мәселесі әлі де өзекті күйінде қалып отыр. 2025 жылы:• 18 заңсыз өндіру фактісі анықталған,• келтірілген алдын ала шығын 15,1 млрд теңгені құраған,• қылмыстық істер қозғалған.Әсіресе Еңбекшіқазақ ауданындағы бір ауылдық округте жылдың басынан бері бір учаскеде 25 рет қайталанған заңсыз өндіру дерегі тіркелген.Кеңесті қорытындылаған облыс әкімі Марат Сұлтанғазиев бұған дейін берілген тапсырмалар толық орындалмағанын атап өтті.«Жер мен жер қойнауын заңсыз пайдалану экономикаға да, экологияға да тікелей зиян келтіреді. Тапсырмалар формалды емес, толық орындалуы тиіс. Заңсыз шешімдер жойылып, жер мемлекет меншігіне қайтарылуы қажет», – деді өңір басшысы.Әкім жерді қайтару бойынша сот жұмыстары мен тексерістерді күшейтуді, аумақтарды толық зонирлеуді, егжей-тегжейлі жоспарлау жобаларын аяқтауды және Алматы агломерациясында ауыл шаруашылығы жерлерін бөлшектеу тәжірибесін тоқтатуды тапсырды.Сонымен қатар, заңсыз қазба өндіру ошақтарына бақылау бекеттерін орнату және ведомствоаралық өзара іс-қимылды кеңейту жоспарланып отыр.Ақпарат көзі : https://www.gov.kz/memleket/entities/almobl/press/news/details/1151089?lang=kk

Қонаев қаласында нашақорлық пен есірткі бизнесіне қарсы күрес мәселелері бойынша мемлекеттік органдардың ведомствоаралық штаб отырысы өтті. Жиынға өңір басшылығы, аудан әкімдері және салалық мемлекеттік органдардың өкілдері қатысты.Отырыста 2025 жылдың қорытындылары қаралып, жастар арасында нашақорлықтың таралуына жол бермеу және алдын алу шараларын күшейту мәселелері кеңінен талқыланды. Полиция департаментінің мәліметінше, қазіргі таңда есірткі заттарын тарату көбіне интернет пен әлеуметтік желілер арқылы жүзеге асырылуда. Осыған байланысты заңсыз онлайн контентке және күмәнді қаржылық операцияларға бақылау күшейтілген.Қабылданған кешенді шаралардың нәтижесінде өткен жылы облыс аумағында 11 тоннаға жуық түрлі есірткі заттары тәркіленіп, синтетикалық есірткі дайындайтын екі жасырын зертхана жойылған. Сонымен қатар есірткі қылмысына қатысы бар төрт кәмелетке толмаған жасөспірім анықталды.Жиын барысында өңір басшысы бұл мәселені шешу үшін барлық сала өкілдерінің бірлескен жұмысы қажет екенін атап өтті.Марат Сұлтанғазиев,Алматы облысының әкімі:«Полиция департаменті, прокуратура, білім басқармасы, жастар саясаты саласы – бәрі бірлесе жұмыс істемесе, бұл проблема жойылмайды. Біз көбіне тек сатушылармен айналысып келеміз, ал тұтынушылармен жүйелі жұмыс жеткіліксіз. Бұл – тек құқық қорғау органдарының ғана емес, барлық мектептердің, мемлекеттік органдардың, қоғамдық ұйымдардың және ата-аналардың ортақ міндеті».Әкімнің айтуынша, әсіресе білім беру ұйымдарында профилактикалық жұмысты күшейту маңызды. Осы орайда мектептер мен колледждерде түсіндіру шараларын тұрақты өткізу, жастар мен жасөспірімдерді кеңінен қамту, сондай-ақ интернет пен әлеуметтік желілердегі есірткі жарнамаларына қарсы бақылауды арттыру тапсырылды.Штаб отырысының қорытындысы бойынша нашақорлықтың алдын алу тек құқық қорғау органдарының емес, бүкіл қоғамның ортақ жауапкершілігі екені атап өтілді. Алдағы уақытта мемлекеттік органдар, білім беру ұйымдары, ата-аналар мен қоғамдық бірлестіктердің бірлескен жұмысы күшейтіліп, жастарды зиянды әдеттерден қорғауға бағытталған кешенді шаралар жалғасын таппақ.Ақпарат көзі : https://www.gov.kz/memleket/entities/almobl/press/news/details/1150213?lang=kk

Алматы облысында Жұмысшы мамандықтары жылының қорытындысына арналған «ЖҰМЫСШЫ МАМАНДЫҒЫ – ТАБЫСТЫ ЕЛДІҢ ТІРЕГІ» атты салтанатты іс-шара өтті. Іс-шараның мақсаты – еңбек адамына құрмет көрсету, жұмысшы мамандықтарының беделін арттыру және кәсіби шеберлігімен, адал еңбегімен көзге түскен азаматтарды марапаттау.Бүгінде Алматы облысындағы әрбір бесінші оқушы жұмысшы мамандығын тұрақты жұмыспен қамтылу мен кәсіби дамудың саналы таңдауы ретінде қарастырады. Бұған ауқымды кәсіби бағдар беру бағдарламалары мен мектеп–колледж–еңбек нарығы арасындағы жүйелі байланыстың қалыптасуы ықпал етті.Іс-шараға Алматы облысының әкімі Марат Сұлтанғазиев, облыстық мәслихат депутаттары, білім беру ұйымдарының басшылары, колледж директорлары, еңбек ардагерлері, кәсіпкерлер, халықаралық грант иегері атанған студенттер, сондай-ақ WorldSkills Kazakhstan республикалық чемпионатының жүлдегерлері қатысты.Құттықтау сөз сөйлеген өңір басшысы еңбек адамына қолдау көрсету тақырыптық жыл аяқталғаннан кейін де өңірлік саясаттың басым бағыты болып қала беретінін атап өтті.«Білікті маман мен еңбекқор азамат экономиканың стратегиялық маңызы бар тірегі болып табылады. Сондықтан еңбек адамына қолдау жүйелі түрде жалғасын табады», – деді Марат Сұлтанғазиев.Өңірде бүгінде 41 колледж жұмыс істейді, онда шамамен 22 мың студент білім алуда. Кадр даярлау еңбек нарығының сұранысына бағытталған: 950 студент жұмыс берушілердің өтінімі бойынша оқиды, 60 оқушы аттестатымен қатар колледж дипломын қатар алуда. 19 колледж дуальды оқыту жүйесі бойынша 238 кәсіпорынмен ынтымақтастықта жұмыс жасайды, 23-тен астам компания колледждерге шефтік қамқорлық көрсетуде.«Гидротехникалық мелиорация», «Лифт шаруашылығы және эскалаторлар», «Қашықтықтан басқарылатын авиациялық жүйе», «Газбен қамтамасыз ету жабдықтары мен жүйелерін құрастыру және пайдалану», «Жиһаз өндірісі» сынды жаңа мамандықтар ашылды.Халықаралық ынтымақтастық та дамып келеді: 32 бірлескен іс-шараның нәтижесінде 35 студент пен 14 педагогты Қытай еліне тағылымдамадан өткізу жоспарлануда.Студенттердің әлеуметтік жағдайын жақсартуға ерекше көңіл бөлінуде. Қазіргі таңда облыста 16 жатақхана жұмыс жасайды, ал биыл жалпы құны 6 млрд теңге болатын, 711 орынға арналған тағы 4 жатақхананы пайдалануға беру көзделген.Жүргізіліп жатқан жұмыстың тиімділігі республикалық деңгейде де расталды: WorldSkills Kazakhstan X чемпионатында Алматы облысының өкілдері 12 жүлделі орынға ие болды.Іс-шара аясында марапаттау рәсімі өтті. Атап айтқанда:– «Қазақстан Республикасының білім беру ісінің құрметті қызметкері» төсбелгісімен 2 адам;– Алматы облысы әкімінің Құрмет грамотасымен 11 адам;– Алматы облысы әкімінің Алғыс хатымен 9 адам;– WorldSkills Kazakhstan чемпионатының 13 жүлдегер студенті марапатталды.Салтанатты жиын концерттік бағдарламамен қорытындыланды.Жұмысшы мамандықтары жылының қорытындысы еңбек адамына жасалған қолдаудың нақты нәтижелер беріп отырғанын және жұмысшы кәсіптердің Алматы облысы жастары үшін болашағы зор, сұранысқа ие таңдау екенін айқын көрсетті.Ақпарат көзі : https://www.gov.kz/memleket/entities/almobl/press/news/details/1150124?lang=kk

2025 жылы зообақта 31 түрлі жануардан 87 төл дүниеге келді. Сондай-ақ, зообақ коллекциясы жыл сайын жаңа және сирек кездесетін бизон, тамандуа, цивета, генета, агама сияқты түрлермен толықтырылды. Бұл туралы Өңірлік коммуникациялар қызметінде өткен брифингте Алматы қаласы Мәдениет басқармасының басшысы Данияр Әлиев мәлімдеді.Бүгінгі таңда Алматы хайуанаттар бағы – Қазақстандағы ең көне және беделді зообақтардың бірі. Аумағы 21 гектарды қамтитын хайуанаттар бағында қазіргі уақытта 385 түрге жататын 4000-нан астам жануар, құс және бауырымен жорғалаушылар бар. Олардың 76 түрі Халықаралық табиғатты қорғау одағының қауіпсіздік тізіміне, ал 24 түрі Қазақстан Республикасының Қызыл кітабына енгізілген.«2025 жылы зообаққа келушілер саны 1,2 миллион адамға жетті. Бұл біздің зообақтың елдегі және аймақтағы танымалдығын айқын көрсетеді. Жыл сайын келушілер санының артуы – біздің жұмысымыздың және табиғатты қорғау миссиямыздың көрінісі», - деді басқарма басшысы Данияр Әлиев.2025 жылы Алматы хайуанаттар бағы Еуропалық зообақтар мен аквариумдар қауымдастығының толыққанды мүшесі ретінде қабылданды. Бұл мәртебе зообақтың халықаралық стандарттарға сай екенін, жануарларды қорғау және ғылыми зерттеулерде жаңа мүмкіндіктерге қол жеткізетінін растайды.Алматы хайуанаттар бағы биыл ауқымды реконструкциядан өтеді. Жобаның мақсаты – келушілерге ыңғайлы, заманауи және білім беру тұрғысынан бай тәжірибе ұсыну. Жоба аяқталғанда зообақ жылына 2 миллионға дейін адамды қабылдай алады.Алматы хайуанаттар бағы – табиғатқа деген сүйіспеншілікті арттыратын, балалар мен ересектерге білім мен әсер қалдыратын ерекше орын. Жаңа кезеңде зообақ Алматының ғана емес, бүкіл Орталық Азияның ең ірі және заманауи орталығына айналмақ.Ақпарат көзі : https://www.gov.kz/memleket/entities/almaty/press/news/details/1149668?lang=kk

«Алматы» ӘКК» АҚ әлеуметтік маңызы бар азық-түлік тауарлары (ӘМАТ) бағасын тұрақтандыру тетіктерін іске асыру аясында кәсіпкерлік субъектілеріне жеңілдетілген несие беру үшін өтінім қабылдаудың басталғанын хабарлайды.          Несие жылдық 0,01% мөлшерлемемен айналым қаражатын толықтыруға беріліп, кәсіпкерлерге шикізат сатып алу, қызметтерге ақы төлеу, еңбекақы, логистика сынды негізгі өндірістік және басқа да шығындарды жабуға мүмкіндік береді.          Өндірушілер мен ритейлерлер өз кезегінде ӘМАТ бағасын ұстап тұру бойынша міндеттеледіы. Жеткізу көлемін кәсіпкер өзі айқындайды, алайда несие алу кезінде белгілі бір мерзімге сауда сөрелеріндегі бағаны бекітуге міндеттеледі. Несие  үш айдан үш жылға дейінгі мерзімге беріледі.          Жеңілдетілген қаржыландыру қолданылатын әлеуметтік маңызы бар азық-түлік тауарларының тізбесіне мыналар кіреді:1Бірінші сұрыпты бидай ұны2Бірінші сұрыпты ұннан пісірілген бидай наны (қалыпты)3Макарон өнімдері (рожки)4Қарақұмық жармасы5Тегістелген күріш (домалақ дәнді)6Картоп7Асханалық сәбіз8Пияз9Ақ қырыққабат10Қызанақ («черри», «жүзім» сорттарынан басқа)11Қияр («корнишон» сортынан басқа)12Алма13Ақ қант — құмшекер14Күнбағыс майы15Сүйекті сиыр еті16Сүйексіз сиыр еті17Тартылған ет (фарш)18Қой еті, оның ішінде сүйексіз19Жылқы еті, оның ішінде сүйексіз20Балғын, салқындатылған және мұздатылған балық (лещ, мөңке, көксерке, тұқы, сазан)21Тауық еті (сан, жіліншік, тауықтың жамбасы)22Тауық (тұтас)23Пастерленген, ультрапастерленген, стерильденген сүт (майлылығы 2,2%-дан 6%-ға дейін, дәм қоспасыз, лактозасыз өнімдерден басқа)24Айран (майлылығы 2-3%, лактозасыздан басқа)25Қаймақ (лактозасыздан басқа)26Сүзбе (майлылығы 5–9%, лактозасыздан басқа)27Қатты және жартылай қатты ірімшік (майлылығы 40–50%)28Сары май (тұзсыз, майлылығы 72,5%-дан 80%-ға дейін, қоспасыз және өсімдік майынсыз)29Тауық жұмыртқасы (I санат)30Қара шай (дәм қоспасыз, қаптамалы шайдан басқа)31Ас тұзы ( «Экстрадан» басқа)          Несие беру шарттарымен кәсіпкерлер «Алматы» ӘКК ресми сайтында жарияланған хабарландыру арқылы таныса алады.          Несие беру туралы шешімді Алматы қаласы әкімдігі жанындағы ӘМАТ бағасын тұрақтандыру тетіктерін іске асыруды қамтамасыз ету жөніндегі комиссия қабылдайды.          Өтінім 2026 жылы 20 ақпанға дейін қабылданады. Кеңес алу үшін кәсіпкерлер +7 701 410 49 12 нөміріне хабарласа алады.          Қазіргі уақытта «Алматы» ӘКК өндірушілермен келесі қарыз шарттарын іске асырып отыр: «Сары-Бұлақ» компаниясы — I санаттағы жұмыртқа (сауда сөресінде бір данасы 59 теңгеге дейін), «Алатау Құс» — тауық саны мен жамбасы 1 100 теңгеден, жіліншігі 1 650 теңгеден, «Nauryz Agro KZ» — тауық саны мен жамбасы 1 250 теңгеден. Аталған тауарлар бойынша баға тұрақтандыру үш жылға дейінгі мерзімге қамтамасыз етілген.«Алматы» ӘКК ірі сауда желілерімен де ынтымақтасады. Magnum Cash&Carry желісі арқылы 10 440 тонна көкөніс (картоп — 5 120 тонна, сәбіз — 2 000 тонна, пияз — 2 120 тонна, қырыққабат — 1 200 тонна) 2026 жылғы 30 сәуірге дейін белгіленген бағамен тұрақтандырылып отыр.          Сонымен қатар, осы сауда желісімен 2026 жылы наурыз айына дейін ӘМАТ-тың 11 атауы бойынша (қарақұмық, күріш, макарон өнімдері, май, сүт өнімдері, тауық еті, сиыр еті, ұн, тұз және басқа да тауарлар) бағаны тұрақтандыру жөніндегі келісім қолданыста.Ақпарат көзі : https://www.gov.kz/memleket/entities/almaty/press/news/details/1149659?lang=kk

Әзербайжандық танымал тревел-блогерлер Орхан Асланов, Сеймур Алиев және Аяз Кара Алматы мен «Шымбұлақ» тау-шаңғы курортына барды. Шетелдік инфлюенсерлердің мегаполистің тау бөктеріндегі демалыс орындарына қызығушылық танытуы қаланың қысқы және белсенді туризм бағыты ретіндегі тартымдылығы артып келе жатқанын аңғартады. Бұл туралы Алматы қаласының Туризм басқармасының өкілдері хабарлады.Сапар барысында қонақтар Шымбұлақтың инфрақұрылымымен танысып, шаңғышылар мен сноубордшыларға арналған түрлі деңгейдегі трассаларды, сондай-ақ тау көріністері мен қала панорамасының ерекше үйлесімін жоғары бағалады.Алматыға бұған дейін де бірнеше рет келген Орхан Асланов бұл жолғы сапарының да әсерге толы болғанын айтты. Әсіресе, Шымбұлақтағы түнгі сырғанау ерекше әсер сыйлаған.«Теңіз деңгейінен шамамен 3200 метр биіктіктен түнгі қала аясында төмен сырғанауды сөзбен жеткізу қиын. Мұны міндетті түрде сезініп көру керек», – деді блогер.Сеймур Алиев өз кезегінде Әзербайжан мен Қазақстан арасындағы туризмнің тәжірибе алмасудың әлеуеті жоғары екенін атап өтті.«Алматы мәдениетімен, қонақжайлығымен және тау-шаңғы курорттарының қалаға жақын орналасуымен тартымды. Бұл демалысты жайлы әрі мазмұнды етеді», – деді ол.Аяз Кара Қазақстанға алғаш рет келгенін айтты. Оған әсіресе Шымбұлақтағы түнгі сырғанау ерекше әсер қалдырған.«Мұнда шынайы қонақжайлық пен достық көңіл айқын сезіледі», – деді блогер.«Блогерлердің әлеуметтік желілердегі жарияланымдары Алматының халықаралық туристік кеңістіктегі имиджін нығайтып, қысқы, тау және белсенді демалыс бағыты ретінде одан әрі танылуына ықпал етеді», - деді қалалық Туризм басқармасының өкілдері.Ақпарат көзі : https://www.gov.kz/memleket/entities/almaty/press/news/details/1149652?lang=kk

Кеген ауданына қарасты Тоғызбұлақ ауылында Қапес Байғабылұлының туғанына 130 жыл толуына орай жаңа ауылдық кітапхананың салтанатты ашылу рәсімі өтті. Мәдени нысанның жұмысын бастау дәстүрлі түрде қызыл лентаны қию рәсімімен айшықталды. Іс-шараға ауыл тұрғындары, қоғам өкілдері мен құрметті қонақтар қатысты.Ашылу салтанатына Кеген ауданының әкімі Нұрбақыт Теңізбаев, аудандық мәслихат төрағасы Нұғман Алмасбек, Алматы облыстық орталық әмбебап кітапханасының директоры Галина Тоқабаева қатысты. Сонымен қатар белгілі жазушы, педагог Сағатбек Мәдібекұлы, облыстық филармония директоры Нұрлан Сағынбай және шығармашылық зиялы қауым өкілдері де арнайы келді. Қонақтар оқырмандарға жасалған жағдай, кітап қоры және техникалық жабдықталуымен танысып, ауыл үшін жаңа мәдени нысанның ашылуының маңыздылығын атап өтті. Жаңа кітапхана заманауи талаптарға сай жабдықталған. Мұнда кітап қорын есепке алуға және оқырмандарға қажетті әдебиеттерді жылдам табуға мүмкіндік беретін автоматтандырылған ИРБИС кітапханалық жүйесі енгізілген. Кітапхана екі бөлімнен – кітап қоры мен оқу залынан тұрады. Қазіргі таңда кітап қоры шамамен 3 мың данаға жетеді. Барлық бөлмелер компьютерлермен, принтерлермен, кітап сөрелерімен, үстел және орындықтармен толық жабдықталған. Бұл оқуға және білім алуға қолайлы жағдай жасайды. 2026 жылға қарай кітапхананың қызметін 689 ауыл тұрғыны пайдалануы жоспарланып отыр.Салтанатты рәсімде сөз сөйлеген Кеген ауданының әкімі Нұрбақыт Теңізбаев: «Бүгінде ауданымызда 13 кітапхана жұмыс істейді, ал бұл – он төртіншісі. Қазіргі таңда кітапханалар тек кітап сақтайтын орын ғана емес, білім мен мәдениеттің, шығармашылық пен қарым-қатынастың орталығына айналып отыр. Олар барлық жастағы тұрғындарды біріктіріп, ауылдың мәдени өмірін нығайтып, рухани дамуына үлес қосады», – деді.Сондай-ақ ауыл тұрғындарына жылы лебізін білдірген Сағатбек Мәдібекұлы:«Бұл – елімізде оқитын, білімді ұлт қалыптастыру жолындағы аса игі әрі маңызды бастама. Кітапханаға жастар көптеп келіп, білімге ұмтылсын. Өскелең ұрпақ саналы, тәрбиелі, парасатты болып қалыптассын. Бұл білім ордасы елді біріктіріп, шабыт беретін рухани орталыққа айналсын, кітап қоры жыл сайын толыға берсін», – деп атап өтті.Тоғызбұлақ ауылында жаңа кітапхананың ашылуы мәдениет пен білім саласындағы жалпыұлттық басымдықтарға толық сәйкес келеді. Ұлттық құрылтайда Мемлекет басшысы Қасым-Жомарт Тоқаев заманауи кітапханаларды дамыту мен кітаптың қолжетімділігін арттырудың маңызын ерекше атап өткен болатын. Жаңа мәдени нысан ауыл тұрғындары мен жас ұрпақ үшін білім мен рухани дамудың орталығына айналмақ.Ақпарат көзі : https://www.gov.kz/memleket/entities/almobl/press/news/details/1149065?lang=kk

Мұның айқын дәлелі - Қонаев қалалық көпсалалы ауруханасында ем қабылдаған 24 жастағы науқастың клиникалық жағдайы.Науқас ауруханаға сол жақ бүйректің II–III дәрежелі гидронефрозы диагнозымен түсті. Аталған патология бүйрек астаушасы мен несепағар түйіскен аймақтың тарылуы және қосымша бүйрек артериясының несепағарды қысуы салдарынан, созылмалы пиелонефриттің асқынуы аясында дамыған. Яғни, зәрдің бүйректен табиғи жолмен ағуы бұзылып, оның жиналуы органның біртіндеп кеңеюіне, қатты ұстамалы ауырсынулар мен қабыну үдерісінің өршуіне әкелген. Уақтылы әрі дұрыс ем көрсетілмегенде бұл жағдай бүйрек қызметінің айтарлықтай төмендеуіне, тіпті толық жоғалуына себеп болуы мүмкін еді.Бұған дейін науқасқа жедел медициналық көмек көрсетіліп, бүйрек шаншуы себебімен несепағарға стент-катетер орнатылған болатын. Бұл шара зәрдің уақытша ағуын қалпына келтіріп, науқастың жалпы жағдайын тұрақтандырғанымен, аурудың түпкі себебін жоймайтыны белгілі. Уролог дәрігердің жоспарлы кеңесінен кейін патологияның негізгі себебін түбегейлі жою мақсатында хирургиялық ем жүргізу туралы шешім қабылданды.Қонаев қалалық көпсалалы ауруханасының хирургия бөлімшесінде уролог дәрігер Сабаев Айдар Жанбатырұлы, хирург Сабаев Серік Жанбатырұлы және анестезиолог - реаниматолог Хайленко Юрий Александровичтің қатысуымен түбекше-несепағар сегментінің лапароскопиялық пластикасы сәтті орындалды. Ота құрсақ қабырғасында бірнеше шағын тілік арқылы, ірі кесусіз жүргізілді.Бейнебақылау жағдайында тарылған аймақ дәл анықталып, қосымша бүйрек артериясының несепағарға түсірген қысымы жойылды, сондай-ақ бүйрек астаушасы мен несепағар арасында жаңа анатомиялық байланыс қалыптастырылды. Тігістердің қауіпсіз жазылуын және зәрдің еркін ағуын қамтамасыз ету үшін ішкі стент-катетер орнатылды.Аталған аз инвазивті әдіс операциялық жарақаттылықты айтарлықтай төмендетіп, операциядан кейінгі ауырсынуды азайтуға және науқастың қалпына келу кезеңін қысқартуға мүмкіндік береді.Айта кетейік, мұндай лапароскопиялық араласулар жоғары технологиялы және техникалық тұрғыдан күрделі операциялар санатына жатады. Хирургтер шектеулі кеңістікте, тек бейнекамера көмегімен бағдар алып, аса жоғары дәлдікпен жұмыс атқарады. Әсіресе, ірі қан тамырларына, оның ішінде қосымша бүйрек артериясына жақын орналасуы отаның күрделілігін арттыра түседі. Бұл жағдайда несепағарды қысу себебін жойып қана қоймай, бүйректің қанмен қамтамасыз етілуін толық сақтау басты міндет болды.Сонымен қатар, операцияны жоспарлау барысында науқастың жеке анатомиялық ерекшеліктері, бүйректің кеңею дәрежесі және қабыну үдерісінің айқындылығы жан-жақты ескерілді. Мұндай күрделі хирургиялық араласулар тек тәжірибелі мамандар командасының, заманауи медициналық жабдықтың және медициналық ұйымның жоғары деңгейдегі дайындығының арқасында ғана мүмкін.Отадан кейінгі кезең асқынусыз өтті. Ауырсыну синдромы мен қабыну белгілері толық жойылып, науқас қанағаттанарлық жағдайда амбулаториялық бақылауға шығарылды.Аталған клиникалық жағдай МӘМС аясында азаматтардың басқа аудандарға шықпай-ақ, қаржылық жүктемесіз, күрделі әрі жоғары технологиялы медициналық көмекті тегін ала алатынын айқын көрсетеді. Операцияның сәтті өтуі дәрігерлердің кәсіби шеберлігіне, хирургиялық және анестезиологиялық қызметтердің үйлесімді жұмысына, сондай-ақ Қонаев қалалық көпсалалы ауруханасының заманауи материалдық - техникалық базасына тікелей байланысты.Міндетті әлеуметтік медициналық сақтандыру жүйесі өз әлеуметтік маңызын тағы бір мәрте дәлелдеп, халықтың сапалы медициналық көмекке тең қолжетімділігін қамтамасыз ету арқылы азаматтардың денсаулығын сақтауға қызмет етуде.Ақпарат көзі : https://www.gov.kz/memleket/entities/almobl/press/news/details/1148560?lang=kk

Қонаев қаласында Алматы облысының әкімі Марат Сұлтанғазиев Корея Республикасының еңбек миграциясы жөніндегі делегация өкілдерімен кездесті. Кездесудің негізгі мақсаты – қазақстандық азаматтарды Корея Республикасына жұмысқа орналастыруға мүмкіндік беретін рұқсат жүйесі аясындағы ынтымақтастықты дамыту. Жиынға ҚР Еңбек және халықты әлеуметтік қорғау вице-министрі Виктория Шегай мен жергілікті атқарушы органдардың өкілдері қатысты.Басқосуда корей тарапы «ЭйПиЭС» (Employment Permit System) бағдарламасының жұмыс тәртібімен таныстырып, оның Кореяда жұмыс күші тапшы салаларға шетелдік азаматтарды заңды түрде тартуға бағытталғанын атап өтті. Осы орайда Қазақстанның аталған жүйеге қосылу мүмкіндігі кеңінен талқыланды.Қазақстан тарапынан жүргізіліп жатқан дайындық жұмыстары жөнінде Алматы облысының мобильді еңбек орталығының директоры Абылай Зуайда мәлімет берді.«Қазіргі таңда келіссөздердің екінші кезеңі өтіп жатыр. Бірінші кезеңде тараптар президенттер деңгейінде меморандумға қол қойған болатын. Ал екінші кезеңде Қазақстанның жұмыс күшін Кореяға жіберуге қаншалықты дайын екені бағаланады. Осы мақсатта корей делегациясы арнайы колледждер мен оқу орталықтарын аралап, дайындық деңгейімен танысып жатыр. Егер барлық талаптар оң бағаланып, келіссөздер сәтті аяқталса, алдағы уақытта толыққанды меморандумға қол қою жоспарлануда», – деді ол.Мамандардың пікірінше, бағдарламаға қосылған жағдайда өңірде арнайы оқу орталықтарын ашу жоспарланып отыр. Қазіргі уақытта осы бағытта тиісті нысандармен танысу және инфрақұрылымдық мүмкіндіктерді бағалау жұмыстары жүргізілуде. Алматы облысының әкімі бұл бастаманың тұрғындарды заңды жұмыспен қамтуға және халықаралық еңбек тәжірибесін игеруге жол ашатынын атап өтті.Ал корей тарапы түпкілікті шешім барлық дайындық кезеңдері аяқталғаннан кейін Корея Республикасының ведомствоаралық комиссиясында қабылданатынын жеткізді.Ақпарат көзі : https://www.gov.kz/memleket/entities/almobl/press/news/details/1147366?lang=kk