Қазақстан Республикасы Қарулы күштеріндегі құрамы жағынан ең саны көп Құрлық әскерлері 1993 жылғы 21 сәуірде құрылды. Құрлық әскерлерінің бүгінгі әлеуеті еліміздің аумақтық тұтастығы мен егемендігін қорғауға, мемлекеттік және әскери нысандарды күзетуге, заңсыз қарулы топтармен күресуге, сондай-ақ халықаралық шарттар аясындағы міндеттерді орындауға толық мүмкіндік береді.Құрлық әскерлерінің бейбіт уақытта атқаратын міндеттерінің де ауқымы кең. Олар жауынгерлік әзірлікті сақтау, оқу-жаттығулар өткізу, жеке құрамды даярлаудан бөлек, төтенше жағдайлардың салдарын жоюға да қатысады.Оның құрамына «Астана», «Шығыс», «Батыс», «Оңтүстік» өңірлік қолбасшылықтары, тылдық және техникалық қамтамасыз ету құрамалары мен бөлімдері, Құрлық әскерлерінің әскери институты, Шоқан Уәлиханов атындағы Қорғаныс министрлігінің әскери колледжі кіреді.Қолбасшылықтың негізгі күш-жігері тұрақты жауынгерлік дайындықты сақтауға, әскери басқару органдары мен әскерлерді жауынгерлік мақсатқа сәйкес міндеттерді шешуге дайындауға бағытталған.Қазіргі заманғы қарулы күрес сипатының өзгеруіне байланысты әскерлерде жауынгерлік дайындық бағдарламалары қайта қаралды. Оқу-жаттығулар барысында жаңа әдіс-тәсілдер сынақтан өтуде. Қару-жарақ паркі жаңартылып, әскери инфрақұрылым дамытылуда, оқу-жаттығулардың сапасы мен саны жыл сайын артып келеді.Мамандық бойынша теориялық және практикалық сабақтарды сапалы өткізу үшін шамамен 20 000 әскери қызметші даярланды. Кәсіби нұсқаушыларды тарта отырып, офицерлер мен сержанттар қатарынан 3000-нан астам адам дайындықтан өтті.2026 жылғы қысқы оқу кезеңінде Құрлық әскерлерінде жауынгерлік даярлық бойынша 17 мыңнан астам іс-шара өткізілді. Оның 12 мыңнан астамы практикалық атыстарды қамтиды. Бұдан бөлек танктер мен жаяу әскер жауынгерлік машинасының қару-жарағынан 5 мыңнан аса атыс жүргізілді.Бөлімшелерді үйлестірудің қорытынды кезеңінде 900-ден астам жауынгерлік атыс пен 200-ден аса тактикалық оқу-жаттығу өткізілді. Сонымен қатар бөлімшелер 300-ден астам далалық жорық жасады.Офицерлік құрамның біліктілігін арттыру мақсатында «Тактик», «Абырой», «Зымыран» курстарының даярлығы жолға қойылды. Онда кіші командалық буынның кәсіби деңгейі тұрақты түрде жетілдіріліп отырады.Құрлық әскерлерінде ұшқышсыз ұшу аппараты операторларын даярлауға ерекше назар аударылуда. Әскери бөлімдер мен оқу орталықтарында дрондарды жинау, жөндеу және қайта іске қосуға арналған шеберханалар жұмыс істейді.Әскерлер қару-жарақ пен әскери техниканың, жоғары дәлдіктегі қарулардың, байланыс, барлау және автоматтандырылған басқару жүйелерінің қазіргі заманғы үлгілерімен жабдықталған.Кейінгі жылдары Құрлық әскерлеріндегі жауынгерлік даярлықтың қарқыны бірнеше есе артты. Жеке құрам әртүрлі оқу-жаттығуларға, оның ішінде халықаралық ауқымдағы жаттығуларға тұрақты қатысып, өздерінің тәжірибесі мен далалық дағдыларын жетілдіріп келеді. Атап айтқанда, олардың қатарында «Батыл тойтарыс», «Шығыс», «Айбалта», «Көкжал», «Бекет» және басқа оқу-жаттығулар бар.Бүгінде Жоғары жауынгерлік қабілетті Құрлық әскерлері егемендікті, елдің аумақтық тұтастығы мен азаматтардың бейбіт өмірін қорғауға дайын.Ақпарат көзі : https://www.gov.kz/memleket/entities/mod/press/news/details/1204954?lang=kk

Қостанай облысының қалалары мен аудандарында «Таза Қазақстан» республикалық бағдарламасы аясында жүзеге асырылып жатқан «Таза аула» экологиялық акциясы кеңінен қолдау тапты.Елді мекендердің санитарлық жағдайын жақсартуға және экологиялық мәдениетті қалыптастыруға бағытталған бұл бастама тұрғындар тарапынан зор қолдауға ие болды. Іс-шараларға мемлекеттік мекемелердің қызметкерлері, кәсіпорын ұжымдары, шағын және орта бизнес өкілдері, сондай-ақ белсенді тұрғындар қатысты.Акцияның негізгі мақсаты – аула аумақтары мен тұрғын үйлерге іргелес жерлерді ретке келтіру, сондай-ақ азаматтардың қоршаған ортаға деген жауапкершілігін арттыру. Мұндай іс-шаралар елді мекендердің көркін жақсартумен қатар, тұрғындар арасында тазалықты сақтау мәдениетін қалыптастыруға ықпал етеді.Акция барысында қатысушылар санитарлық тазалық жұмыстарын жүргізіп, тұрмыстық қалдықтар мен құрғақ жапырақтарды жинады, ортақ пайдаланылатын аумақтарды тазалады, сондай-ақ аулаларды абаттандыру жұмыстарын атқарды. Аула аумақтарын ретке келтіруге ерекше назар аударылды.Нәтижесінде көптеген аулалар айтарлықтай таза, көрікті әрі жайлы бола түсті. «Таза аула» акциясы Қостанай облысы тұрғындарының азаматтық жауапкершілігінің жоғары деңгейін және қоршаған ортаны қорғау мен абаттандыру мәселелерін бірлесіп шешуге дайын екендігін тағы да көрсетті.Ақпарат көзі : https://www.gov.kz/memleket/entities/kostanay/press/news/details/1204938?lang=kk

Үкімет жанындағы Жобалық кеңсенің отырысында Салық кодексіне кезекті түзетулер тобы, оның ішінде қаржы секторына қатысты мәселелер қаралды.Жобалық кеңсенің ақпандағы отырысында қаржы секторында жаңа Салық нормасын қолдануға байланысты 38 мәселе қаралған болатын. Мемлекеттік бюджет кірістері мен салықтық әкімшілендіруге әсерін тексеру үшін оның 7-еуі тағы да пысықтауға жіберілді. Талқылаудың қорытындысында үш мәселе түпкілікті шешім қабылдау үшін осы отырысқа шығарылды.Бірінші мәселе 17-ші қаржылық есептіліктің халықаралық стандартына (ҚЕХС) көшуге байланысты сақтандыру компаниялары үшін корпоративтік табыс салығы бойынша салық жүктемесінің өсуіне қатысты.Жаңа талапқа сәйкес, сақтандыру ұйымдары 2026 жылғы салық кезеңінде 4-ҚЕХС-тен 17-ҚЕХС-ке көшу кезінде пайда болған айырманы кірісте (немесе шегерімде) көрсетуге міндетті. Бұл айырмашылық біржолғы сипатқа ие және 2026 жылғы қызмет нәтижесін емес, бұрынғы кезеңдердегі (2023-2025 жылдар) жинақталған қаржылық әсерді көрсетеді.Оның салық базасына қосылуы копоративті табыс салығы (КТС) сомасының айтарлықтай өсуіне әкеледі. Осыған байланысты Қаржы нарығын реттеу және дамыту агенттігі (ҚНРДА) 2026-2028 жылдар аралығында салықты тең үлеспен төлеу мүмкіндігін қарастыру ұсынысын қолдады.Бұл шара сақтандыру секторының салық салудың жаңа ережесіне біртіндеп көшуіне арналған. Бұл ретте аванстық төлемді есептеу кезінде біржолғы әсердің кейінгі кезеңдерге әсері алынып тасталады.Екінші мәселе, Қазақстанның қаржыгерлер қауымдастығы бастамашылық еткендей факторингтік операцияларды қосылған құн салығынан босатуға қатысты.Салық кодексінің алдыңғы редакциясында факторингтік және форфейтингтік операциялар, сондай-ақ банктік кепілдіктер мен кепілдемелер халықаралық тәжірибеге сәйкес қосылған құн салығынан (ҚҚС) тікелей босатылды. Қолданыстағы кодексте факторинг қарызға жатқызылмайды. Оған кредитте қарастырылатын босату қолданылмайды.Нәтижесінде факторингтік операцияларға ҚҚС салынып, бұл клиенттер үшін қаржыландыру құнын 16%-ға арттырады. Яғни, құралдың тартымдылығы төмендейді. ҚНРДА мәліметі бойынша, екінші деңгейдегі 23 банктің тек 4-еуі ғана факторингтік операцияларды жүзеге асырады.Агенттік төрағасының орынбасары Олжас Қизатов агенттік факторингті бизнесті қаржыландыру құралы ретінде дамытуды мақұлдап, бұл операцияларды ҚҚС-тан босатуды ұсынатынын мәлімдеді.Үшінші мәселе резидент еместердің бағалы қағаз операцияларынан түскен табыстарына салық салуға қатысты.Қолданыстағы нормаға сәйкес, салық салудан босату Қазақстан қор биржасында бағалы қағаздарды сату кезінде резидент емес жеке тұлғалардың табыстарына қолданылады. Бұрын осындай жеңілдік заңды тұлғаларға да қатысты болған.Инвесторлардың барлық санаты үшін салық салудың тең шарттарын қалпына келтіру ұсынылады. Бұл нарыққа қатысушылар шеңберін арттыруға және сауда-саттықтың өтімділігін арттыруға ықпал етеді.Отырыс қорытындысында бұл ұсыныстар қолдау тапты.Сондай-ақ көрсетілген қызметтер туралы мәлімет ұсынуды реттейтін Салық кодексінің 56-бабының 6-тармағындағы техникалық сипаттағы түзетулер қаралды.Қолданыстағы нормаға сәйкес сумен жабдықтау, су бұру, кәріз, газ және электрмен жабдықтау, жылумен жабдықтау, қалдықтарды жинау, лифтілерге қызмет көрсету және тасымалдау қызметтерін көрсететін ұйымдар салық органдарына осындай қызметтер туралы мәліметтерді есепті тоқсаннан кейінгі айдың 10-ынан кешіктірмей, электрондық нысанда ұсынуға міндетті. Норма осы салада жұмыс істесе де, жеке кәсіпкерлерге қолданылмайды.Талқылау қорытындысында бұл талапты бизнес субъектілерін тең қамти отырып, жеке кәсіпкерлерді (ЖК) қосқанда, барлық салық төлеушілерге қолдану туралы шешім қабылданды. Сонымен қатар, міндетті мәліметтер тізбесінен бірқатар коммуналдық қызметтер (сумен жабдықтау, су бұру, жылумен жабдықтау, қалдықтарды шығару, лифтілерге қызмет көрсету) туралы деректер алынып тасталды. Өйткені бұл Мемлекеттік кірістер комитетінің ақпараттық жүйелерінде қамтылған.Мерзімі де қайта қаралды: 10-ының орнына соңғы мерзім белгіленді, ол – есепті тоқсаннан кейінгі айдың ақырғы күні. Бұл бастапқы құжаттар негізінде деректерді қалыптастыруға және олардың дұрыстығын арттыруға мүмкіндік береді.Ақпарат көзі : https://www.gov.kz/memleket/entities/economy/press/news/details/1204815?lang=kk

Алматыда әскери қызметшілер майданда байланысшы болған Любовь Горковскаяны құттықтады.Бүгін Екінші дүниежүзілік соғысының ардагері Любовь Николаевна Горковская 101 жасқа толды.Оны туған күнімен Алматы қаласы Бостандық ауданы қорғаныс істері жөніндегі басқармасының әскери қызметшілері мен ҚР Қарулы күштері Ардагерлері кеңесінің Алматы қаласы бойынша төрағасы запастағы майор Ербол Игисинов құттықтады.Қорғаныс министрінің атынан олар Любовь Николаевнаға алғыс білдіріп, құттықтау хатын табыстады. Әскери қызметшілер оған ізгі тілектерін айтып, оның ерлігі мен өмір жолы өскелең ұрпаққа әрдайым үлгі болатынын атап өтті.Любовь Горковская 1925 жылғы 20 сәуірде Украинада дүниеге келген. Екінші дүниежүзілік соғысы жылдары ол әскери байланысшы қызметін атқарған. 1-Украина майданы құрамында шайқастарға қатысып, Харьков түбіндегі ұрыстарда, Қырымды азат ету кезінде және Севастополь үшін шешуші шайқастарда ерекше көзге түскен. Соғысты Прибалтикада аяқтаған.Соғыстағы ерлігі мен жанқиярлығы үшін І және ІІ дәрежелі Отан соғысы ордендерімен, сондай-ақ мерейтойлық медальдармен марапатталған.Соғыстан кейін Қазақстанға қоныс аударып, «Қазақфильм» киностудиясында еңбек етті. Сонымен қатар халық шаруашылығының әртүрлі салаларында ұзақ жылдар жұмыс істеп, ел дамуына елеулі үлес қосты.Қазіргі уақытта ардагер немересімен бірге тұрады. Ол егде жасына байланысты тұрақты күтім мен қолдауды қажет етеді, бұл көмекті әскери қызметшілер көрсетіп келеді.Ақпарат көзі : https://www.gov.kz/memleket/entities/mod/press/news/details/1204805?lang=kk

Астана, 2026 жылғы 20 сәуір – Қазақстан Республикасының Сыртқы істер министрі Ермек Көшербаев Израиль Мемлекетінің Елшісі Йоав Быстрицкиді қабылдады.Кездесу барысында тараптар көпқырлы екіжақты ынтымақтастықтың қазіргі жағдайы мен даму перспективаларын талқылап, сондай-ақ одан әрі тереңдетуге өзара мүдделілігін растады.Сонымен қатар сұхбаттастар өңірлік және халықаралық күн тәртібіндегі өзекті мәселелер жайлы пікір алмасты.Өз кезегінде, Е.Көшербаев Таяу Шығыстағы ахуалдың шиеленісуіне алаңдаушылық білдіріп, еліміздің бейбіт келіссөздер өткізу үшін Түркістан қаласын ұсынуға дайын екенін жеткізді.Ақпарат көзі : https://www.gov.kz/memleket/entities/mfa/press/news/details/1204796?lang=kk

2025 жылы облыс шаруашылықтарының барлық санаттарымен 89,5 мың тонна немесе 2024 жылғы деңгейге қатысты алғанда 105,7% ет (сойыс салмағында), 315,8 мың тонна барлық түрдегі сүт (тиісінше 106,4%), 58,3 млн. дана жұмыртқа (99,5%), 0,5 мың тонна бал (107,7%), 2,1 мың тонна жүн (99,7%) өндірілді. Ет өндірудің өсіміне құс етін (5,5%), жылқы етін (4,4%), сиыр етін (6,6%) өткізу көлемінің артуы әсер етті. Сүт өндірудің өсімі - өнімді сиыр үйірінің көбеюімен қамтамасыз етілді.Еттің (тірідей салмақта) негізгі өндірушілері (аталған өнімнің 80,8%-ға жуығы) облыстың жеті өңіріндегі шаруашылықтар болып табылады. Олар: Семей қаласы (11,6 мың тонна), Абай (34,8 мың тонна), Жаңасемей (25,1 мың тонна), Жарма (18,0 мың тонна), Аягөз (17,6 мың тонна),  Ақсуат (11,4 мың тонна), Мақаншы (10,7 мың тонна)  аудандары. Сүт өндіру көлемінің жартысына жуығы Абай (45,3 мың тонна), Жарма (39,2 мың тонна), Бесқарағай (36,5 мың тонна),  Бородулиха(34,7 мың тонна)   және Үржар (32,3 мың тонна) аудандарында өндірілді. Алты ауданның шаруашылықтарымен 80% жұмыртқа өндірілді: олар Бородулиха (11,4 млн. дана), Үржар (10,9 млн. дана), Көкпекті (6,9 млн. дана),  Жаңасемей (6,6 млн. дана), Мақаншы (5,3 млн. дана) және Бесқарағай (5,1 млн. дана) аудандары. Бал өндіру Үржар  (128,5 тонна), Мақаншы (113,3 тонна),  Бородулиха (110,5 тонна), Бесқарағай (41,0 тонна)  аудандарының және Семей қаласының (41,0 тонна) шаруашылықтарында шоғырланған, оларға облыстағы аталған өнім көлемінің  90%-ға жуығы тиесілі. Әдіснамалық түсініктемелерМал шаруашылығы өнімдерін өндіру – ауыл шаруашылығы малдарын пайдалану нәтижесінде  дайын өнімдерді және шикізатты өндіру (сүт, жұмыртқа, жүн, тері және т.б.), мал және құстың барлық түрлерін шаруашылықта сою немесе союға өткізу, ара шаруашылығы және терісі бағалы аң шаруашылығы өнімі.Мал мен құстардың шаруашылықта сойылғаны немесе союға өткізілгені - тікелей шаруашылықта немесе қасапханада мал мен құсты етті өз қажеттіліктеріне пайдалану үшін, ұйымдарға, кәсіпорындарға және шаруашылықтың қызметкерлеріне, соның ішінде баспа-бас мәмілелер  бойынша сату немесе беру үшін сою, сондай-ақ мал мен құсты  базарларды қоса алғанда тамақтандыру желілері (асханалар, мейрамханалар, дәмханалар), сауда желісі арқылы даярлау ұйымдарына, өңдеу кәсіпорындарына союға сату, сондай-ақ экспортқа шығару.Сүт өндіру нақты сауылған сиыр, қой, ешкі, түйе, жылқы сүтін, оның өткізілгеніне немесе бір бөлігі шаруашылықта бұзаулар мен торайларды суаруға кеткеніне қарамастан сипаттайды. Емізіп асырау кезінде бұзаулар сорған сүт өнімге кірмейді және бір сиырдан сауылатын сүт мөлшерін анықтағанда есепке алынбайды. www.stat.gov.kz/ ҚР өңірлерінің статистикасы/Абай облысы/Электрондық кестелер/Ауыл шаруашылығы статистикасы Орындаушы ауыл шаруашылығы және  санақ статистикасы бөлім басшысы:Исатаева А.К.Тел. +7 (7222) 52-47-05E-mail: al.isataeva@aspire.gov.kzАдрес:180000, г.Семейул.Мәңгілік ел, 25 © Қазақстан Республикасы Стратегиялық жоспарлау және реформалар агенттігінің Ұлттық статистика бюросыАқпарат көзі : https://www.gov.kz/memleket/entities/abay/press/news/details/1204650?lang=kk

Алматы облысының Кеген ауданы – қарағай өсіруден елімізде көш бастап тұрған аймақтардың бірі. Тау бөктерін жасыл-желекке бөлеген осындай сұлулықты сақтау үшін орман шаруашылығы қызметкерлері жүйелі жұмыс жүргізіп келеді. Қазіргі кезде орманшылардың діттеген басты мақсаты – жергілікті табиғатқа тән Шренк шыршасының санын көбейту, – деп хабарлайды Алматы облысы әкімінің баспасөз қызметі.«Кеген орман шаруашылығы» КММ директоры Айболат Сұлтанғазиевтің айтуынша, бүгінде 154,4 гектар аумаққа 1 069 920 қылқан жапырақты ағаш отырғызылған. Одан бөлек 110 гектар аумаққа 118 мың ағаш көшеті егілген. Бұл жұмыстар топырақтың тозуына жол бермейді. Орманшылардың жұмысы отырғызылған көшеттердің санымен емес, олардың жергілікті аумаққа бейімделу деңгейімен бағаланады. Қазіргі таңда бұл көрсеткіш 75-80 пайызды көрсетіп отыр.Орманның алтын қоры тұқым өсіру станциялары және дендрарийлерде дайындалады. 2021-2025 жылдар аралығында орман шаруашылығы мамандары 1400 келіден астам іріктелген тұқым жинаған. Осылайша, сырттан көшет әкелмей-ақ, жергілікті жерде әзірленген тұқым арқылы орман алқабы одан сайын жайқалып келеді.Бұл бағыттағы негізгі нысан – дендрарий. Мұнда 3,25 гектар аумақта бірнеше жыл ішінде 2 879 000 көшет өсірілген. Бұл Саты ауылы маңындағы орманды толықтыруға арналған. Сонымен қатар көшеттер Алматы облысының өзге де аймақтарына жіберіледі. Болашақта дендрарийде өсірілген үш миллионға жуық ағаш орманнан орын тауып, экологиялық тұрақтылықты сақтауға оң әсерін тигізбек.Бүгінде жалпы аумағы 89 941 гектар болатын Орман шаруашылығында 109 адам еңбек етеді. Қажетті техникамен толық қамтамасыз етілген. Олардың қатарында жол талғамайтын 19 патрульдік автокөлік, 62 жылқы, 2 өрт сөндіру көлігі, 3 жүк көлігі, 6 дөңгелекті және 5 шынжыр табанды трактор, 1 шағын трактор және 1 экскаватор бар.Соңғы жылдары бұл салаға жас мамандар көптеп келуде. Бұған жалақының өсуі мен материалдық-техникалық құралдардың тұрақты жаңартылуы оң әсерін тигізіп отыр. Аталған жұмыстар Мемлекет басшысы Қасым-Жомарт Тоқаевтың екі миллиард ағаш отырғызу жөніндегі тапсырмасына сәйкес іске асуда. Сондай-ақ өңірдің экотуризмін дамытуға және табиғи байлығын сақтауға серпін беруде.Ақпарат көзі : https://www.gov.kz/memleket/entities/almobl/press/news/details/1204341?lang=kk

Қазақстан Республикасының Қорғаныс министрлігі запасқа шығарылатын әскери қызметшілерге арналған онлайн қайта даярлау бағдарламасын енгізді. Бағдарлама бастапқы әскери дайындық (АӘД) пәнінің оқытушысы болуды жоспарлаған азаматтарға бағытталған.Бастама жаңартылған бастапқы әскери дайындық қағидалары аясында Әскери білім және ғылым департаменті тарапынан жүзеге асырылуда. Оқу үдерісі қашықтан ұйымдастырылған, бұл тыңдаушыларға қызметтен қол үзбей педагогикалық біліктілік алуға мүмкіндік береді.Бағдарлама қорғаныс министрінің бұйрығына сәйкес әзірленген. Курс мектептер мен колледждер үшін мамандар даярлауға бағытталған. Оқу мазмұнына оқыту әдістемесі, педагогика және психология негіздері, сондай-ақ әскери-патриоттық тәрбиенің заманауи стандарттары кіреді.Оқуды аяқтағаннан кейін қатысушыларға белгіленген үлгідегі сертификат беріледі, ол бастапқы әскери дайындық пәнін оқытуға ресми құқық береді.Қазіргі уақытта алғашқы топ оқуын бастап кетті. Әскери білім және ғылым департаментінің бастығы полковник Мұрат Олжабаевтың айтуынша, онлайн форматқа көшу әскери қызметшілердің әлеуметтік бейімделу мүмкіндіктерін кеңейтіп, олардың әрі қарай кәсіби тұрғыда жүзеге асуына ықпал етеді.Ведомствода бастапқы әскери дайындық жүйесіне кадр даярлау жұмысы жалғасатыны атап өтілді. Бағдарлама Қарулы Күштер мен білім беру саласы арасындағы байланысты нығайтуға, сондай-ақ оқу орындарын білікті тәлімгерлермен қамтамасыз етуге бағытталған.Ақпарат көзі : https://www.gov.kz/memleket/entities/mod/press/news/details/1204287?lang=kk

«Астана» өңірлік қолбасшылығы 31775 әскери бөлімінің рота старшинасы 3-сыныпты сержант Тимур Ержанов Қазақстан Қарулы күштері әскери қызметшілері арасында жаңа рекорд орнатты. 200 шақырымдық ультрамарафон қашықтығын 34 сағат 55 минутта еңсерген ол бұл жүгірісін Құрлық әскерлерінің құрылған күніне арнады.Қарағанды қаласындағы әскери бөлімнің аумағынан басталған марафонның алғашқы шақырымдарын Тимур жұбайы Жанармен бірге жүгіріп өтті. Туған жері – Ұлытау облысының Жаңаарқа кентінде мәреге жеткен әскери қызметшіні туған-туыстары, әріптестері мен жерлестері қарсы алды.Жол бойы сержантқа әріптестері қолдау көрсетіп, кейбір учаскелерде бірге жүгіріп отырды. Әйтсе де, шақырымдардың негізгі бөлігін ол өз күшімен бағындырды.– Тимур рухының мықтылығын, төзімділігі мен қызметке адалдығын көрсетті. Оны жеке құрам үлгі тұтады, – деді мотоатқыштар батальонының командирі майор Тасқын Әнуарбекұлы.Жүгірумен бес жылдан бері айналысатын әскери қызметшінің айтуынша, ол марафондарға тұрақты қатысып тұрады. Биыл Құрлық әскерлері күніне орай 200 шақырым қашықтықты жүгіріп өтуді мақсат еткен.– Жолда жаңбыр да, қар да жауды. Шаршаған кездерім де болды. Бірақ отбасым мен әріптестерімнің қолдауы мәреге жетуіме көмектесті, – деді Тимур Ержанов.Бұған дейінгі рекорд Қарағанды гарнизоны Әскери полиция басқармасының офицері майор Заңғар Әлкеновке тиесілі болғанын айта кету керек. Ол 2020 жылы 200 шақырымды 35 сағат 11 минутта жүгіріп өткен болатын.Жаңа нәтиже Қазақстан Қарулы күштері әскери қызметшілерінің жоғары дене дайындығын және қызметке адалдығын көрсетеді.Ақпарат көзі : https://www.gov.kz/memleket/entities/mod/press/news/details/1203948?lang=kk

Анталия, 2026 жылғы 18 сәуір – 5-ші Анталия дипломатиялық форумы аясында Қазақстан Республикасының Сыртқы істер министрі Ермек Көшербаев Түркі мемлекеттері ұйымы Сыртқы істер министрлері кеңесінің (ТМҰ СІМК) бейресми отырысына қатысты.Отырыс барысында тараптар халықаралық және өңірлік күн тәртібіндегі өзекті мәселелерді, соның ішінде Таяу Шығыстағы ахуалды ушықтырмау жөніндегі күш-жігерді талқылады. Министрлер өңірдегі жағдайдың одан әрі дамуы және оны тұрақтандырудың ықтимал жолдары жөнінде пікір алмасты.Өз сөзінде Е. Көшербаев Қазақстан Республикасының бейбіт бастамаларды ілгерілетуге бейілділігін атап өтіп, Қазақстан қақтығыстарды тек саяси-дипломатиялық жолмен шешуге табанды түрде шақыратынын мәлімдеді. Осы тұрғыда Қазақстан келіссөздер өткізу үшін алаң ұсынуға дайын екенін тағы да растады.Сонымен қатар министр ағымдағы жылдың мамыр айында Түркістан қаласында өтетін ТМҰ-ның бейресми саммиті ұйымның рөлін одан әрі нығайтуға жаңа серпін беріп, ынтымақтастықты тереңдетуге және қатысушы мемлекеттердің күш-жігерін шоғырландыруға ықпал ететінін атап өтті.Осы тұрғыда сұхбаттасушылар ТМҰ-ның институционалдық дамуының келешек мәселелерін де талқылады.Форум аясында ҚР Сыртқы істер министрі Люксембург Премьер-министрінің орынбасары – Сыртқы істер және сыртқы сауда, сондай-ақ даму мақсатындағы ынтымақтастық және гуманитарлық істер министрі Ксавье Беттельмен, Боливия СІМ басшысы Ф. Арамайо Карраскомен, Литва Республикасының Сыртқы істер министрі Кястутис Будриспен, Гвинея-Бисау СІМ басшысы Жоау Бернарду Виейрамен және ЕО-ның Адам құқықтары жөніндегі арнайы өкілі Кайса Оллонгренмен екіжақты кездесулер өткізді. Кездесулер барысында екіжақты және көпжақты ынтымақтастықтың өзекті мәселелері талқыланды. Ақпарат көзі : https://www.gov.kz/memleket/entities/mfa/press/news/details/1203826?lang=kk

Қарулы күштерде бірыңғай Ашық есік күні өтті. Оның аясында еліміздің әр өңіріндегі 50-ден астам әскери бөлім келушілерге есігін ашты. Іс-шараға 15 мыңнан астам адам қатысты. Олардың қатарында мектеп оқушылары, студенттер, педагогтер, сондай-ақ мерзімді әскери қызметшілердің ата-аналары мен жақындары бар.  Акция Қарулы күштердің барлық түрлері мен әскер тектерін қамтыды: Құрлық әскерлері, Әуе қорғанысы күштері, Әскери-теңіз күштері, Десанттық-шабуылдау әскерлері және Арнайы операциялар күштері. Қонақтар армия тыныс-тіршілігін ішінен көріп, әскери қызмет туралы жан-жақты түсінік алды.  Іс-шара аясында келушілер казармаларды, асханаларды және тұрмыстық нысандарды аралады. Олар әскери қызметшілердің тұрмыс жағдайымен және күнделікті қызметтің ұйымдастырылуымен танысты.  – Біз әскери қызметтің өту барысын барынша ашық көрсетеміз. Бұл жастар үшін де, ата-аналар үшін де маңызды. Армия – мінез, тәртіп пен жауапкершілік қалыптасатын өмір мектебі, – деді Тәрбие және идеологиялық жұмыстар департаментінің бастығы әділет полковнигі Тілеухан Басқожаев.  Бағдарламаның практикалық бөлігі ерекше қызығушылық тудырды. Мектеп оқушылары мен студенттер әскери қызметшілердің жаттығуларын тамашалап, әскери техникамен және түрлі бөлімшелердің жұмысымен танысты. Сонымен қатар олар өздерін болашақ Отан қорғаушысы ретінде сынап көрді.  Елордадағы №13 мектептің 9-сынып оқушысы Даяна Гуляева алған әсерімен бөлісті:  – Бұған дейін мұндай техниканы тек фильмдер мен жаңалықтардан көретінбіз. Бүгін оны өз көзімізбен көріп, тіпті қолмен ұстауға мүмкіндік алдық. Әсіресе заманауи дрондар мен бронды техника ерекше әсер қалдырды. Бұл – армиямызға деген мақтаныш сезімін оятатын маңызды сәт.  Бағдарлама саптық алаңдағы көрнекі қойылымдармен аяқталды. Әскери қызметшілер саптық дайындық элементтерін, қоян-қолтық ұрыс тәсілдерін және тактикалық іс-қимыл эпизодтарын көрсетті.  Іс-шара соңында қонақтарға сарбаз ботқасы ұсынылды.  Ашық есік күнін тұрақты түрде өткізу қоғамның армияға деген сенімін нығайтып, жастардың әскери қызметке қызығушылығын арттыруға және оның беделін көтеруге ықпал етеді.Ақпарат көзі : https://www.gov.kz/memleket/entities/mod/press/news/details/1203814?lang=kk

Астана, 2026 жылғы  17 cәуір – Қазақстан Республикасының Сыртқы істер министрінің орынбасары Арман Исетов Хорватия Республикасының Қазақстан Республикасындағы Елшісі Рефик Шабановичті қабылдады.Кездесу барысында тараптар Қазақстан мен Хорватия арасындағы саяси, сауда-экономикалық және мәдени-гуманитарлық салалардағы қатынастардың қазіргі жай-күйі мен даму перспективаларын жан-жақты талқылап, екіжақты ынтымақтастықтың оң серпінін атап өтті.Сауда-экономикалық байланыстарды кеңейту, инвестиция тарту, сондай-ақ білім, ғылым және туризм салаларындағы ынтымақтастықты нығайту мәселелеріне назар аударылды. Екі елдің іскер топтары арасындағы байланыстарды жандандыру және өзара мүдделі бірлескен жобаларды іске асырудың маңыздылығы атап өтілді.Тараптар сындарлы диалогты одан әрі дамытуға және екіжақты әрі көпжақты форматтардағы, оның ішінде халықаралық ұйымдар аясында тығыз өзара іс-қимылды жалғастыруға дайындығын  білдірді.Ақпарат көзі : https://www.gov.kz/memleket/entities/mfa/press/news/details/1203775?lang=kk

Алматы облысында республикалық «Таза Қазақстан» экологиялық акциясы жалғасуда. Бұл бастама елді мекендердің санитарлық жағдайын жақсартуға, жасыл желектерді көбейтуге және халықтың экологиялық мәдениетін қалыптастыруға бағытталған. Өңірдің барлық аудандарында тұрғындар сенбіліктерге, ағаш отырғызуға және қоғамдық аумақтарды абаттандыруға белсене қатысуда.Оның айқын мысалдарының бірі – Еңбекшіқазақ ауданы. Мұнда акция әртүрлі буын өкілдерін біріктірді. Алмалы ауылындағы И. Шорманов атындағы орта мектепте «Жасыл мекен – жасыл болашақ» атты экологиялық іс-шара өтіп, педагогтар, оқушылар және жергілікті тұрғындар бірлесе көшеттер отырғызып, аумақты абаттандыру жұмыстарын жүргізді.Мектеп директоры Айжан Талқамбаева атап өткендей, туған жердің тазалығы мен көркеюі әр адамның жеке жауапкершілігінен басталады. Оның айтуынша, мұндай бастамалар оқушылардың табиғатқа деген жанашырлық көзқарасын қалыптастыруға ықпал етеді.Оқушылар да экологиялық акцияға жоғары жауапкершілікпен қатысып, өз үйлері мен көшелерін көгалдандыруға үлес қосуға ниетті екенін жеткізді. Олардың пікірінше, қоршаған ортаны таза ұстау – әр азаматтың күнделікті дағдысына айналуы тиіс.Игі бастама Іле ауданында да жалғасын тапты. Мұнда елді мекендерді абаттандыру мақсатында кезекті ауқымды сенбілік ұйымдастырылды. Оған ауыл тұрғындары, мекеме қызметкерлері мен белсенді азаматтар қатысты.Сенбілік барысында Өтеген батыр ауылындағы орталық стадион аумағы, Ажимуратов және Титов көшелері, сондай-ақ №13 орта мектеп маңы тазартылды. Қатысушылар қоқыстарды жинап, стадиондағы орындықтарды сырлап, көгалдарды ретке келтірді.Іле ауданы әкімінің орынбасары Аскар Садыковтың айтуынша, стадионды абаттандыру жұмыстары демеушілердің қолдауымен жүргізілуде және жалғасын табады. Сонымен қатар, Байсерке ауылындағы «Даму» логистикалық орталығында да 500-ге жуық адам қатысқан ірі сенбілік өтті. Мұнда ағаш отырғызу, аумақты тазалау және әктеу жұмыстары жүргізілді.Қарасай ауданында да «Таза Қазақстан» акциясына діни қызметкерлер белсене атсалысуда. «Түркістан» мешіті аумағында көгалдандыру жұмыстары ұйымдастырылып, жиырмадан астам ағаш отырғызылды. Іс-шараға ауданның бас имамы мен теолог мамандар қатысты.Бас имамның айтуынша, әр азамат өз үйі мен айналасын таза ұстауға жауапты, ал мұндай шаралар жас ұрпаққа үлгі болуға тиіс. Сонымен қатар, ол аудан тұрғындарын тазалық пен тәртіпті сақтауға шақырды.Облыс орталығы Қонаев қаласында да ауқымды көгалдандыру жұмыстары жүргізілуде. Биылғы маусымда қала аумағында шамамен бес мыңға жуық ағаш отырғызылды. Жаңа көшеттер көшелер бойына, тұрғын үй аулаларына және бос жатқан аумақтарға егілді.Мамандардың айтуынша, сенбіліктерге тұрғындардың белсенді қатысуы қаланың келбетін жақсартып қана қоймай, экологиялық мәдениетті де қалыптастырады. Қала тұрғындары қоршаған ортаның тазалығы өз еңбегінің нәтижесі екенін түсіне бастаған.Осылайша, «Таза Қазақстан» акциясы қоғамды ортақ мақсат – жайлы, таза және экологиялық қолайлы ортаны қалыптастыру төңірегіне біріктіретін тиімді тетікке айналды. Аталған бағыттағы жұмыстар Алматы облысының барлық аудандарында кеңінен жүргізіліп, ұқсас іс-шаралар тұрақты түрде ұйымдастырылуда. Бұл бағыттағы жұмыс алдағы уақытта да жүйелі түрде жалғасын табады.Ақпарат көзі : https://www.gov.kz/memleket/entities/almobl/press/news/details/1203768?lang=kk

Кеген ауданында Мемлекет басшысының бастамасымен жүзеге асырылып жатқан «Таза Қазақстан» республикалық экологиялық акциясы жалғасуда. Аудан тұрғындары үшін бұл бастама тек сенбіліктер өткізумен шектелмей, елді мекендерді, қоғамдық орындарды және туристік бағыттарды абаттандыруға бағытталған ауқымды жұмыстарға ұласты.Экологиялық науқан аясында ауыл тұрғындары, әкімдік қызметкерлері, ұйымдар мен кәсіпорын өкілдері, сондай-ақ қоғамдық ұйым мүшелері көшелерді, аулаларды және әкімшілік ғимараттарға іргелес аумақтарды санитарлық тазалау жұмыстарын жүргізуде. «Киелі мекен» апталығы барысында тарихи-мәдени ескерткіштердің аумақтарын абаттандыру шаралары ұйымдастырылды.Сонымен қатар, «Жасыл аймақ» бағдарламасы аясында биылғы 15 сәуірде 40 түп шырша көшеті отырғызылды. Бұған дейін 150 жас терек, 40 алма ағашы, 20 алмұрт және 150 қайың егілген болатын.Саты ауылы әкімінің орынбасары Олжас Қырғызжанұлының айтуынша, 4 мамырға дейін «Өнегелі ұрпақ» апталығы аясында ардагерлердің аулаларын абаттандыруға бағытталған бірқатар іс-шаралар жоспарланған. Ал «Мөлдір бұлақ» акциясы шеңберінде су айдындары мен жағалауларды қоқыстан тазарту көзделген. Соңғы апталарда ауыл маңынан бірнеше тонна қоқыс шығарылды.Акция аясында көгалдандыру жұмыстарына ерекше мән берілуде. Биыл Саты ауылында және оған іргелес аумақтарда жүздеген көшет отырғызылды. Ағаш егу әр буын өкілдерін біріктіретін игі дәстүрге айналып, жастар арасында экологиялық мәдениетті қалыптастыруға ықпал етуде. Ақпарат көзі : https://www.gov.kz/memleket/entities/almobl/press/news/details/1203765?lang=kk

 «Таза Қазақстан» республикалық экологиялық акциясында Қонаев қаласындағы «Көшпенділер» қалашығы аумағында жалпы облыстық сенбілік өтті. Аталған шара аясында мәні зор мәдени нысанның маңы қоқыстан тазартылып, айналасына ағаштар егілді.Аталған тазалық жұмыстары мен тал егуге мемлекеттік мекемелер, жеке ұйымдар мен діни бірлестіктердің мүшелері, жастар, волонтерлік және үкіметтік емес ұйымдар, сондай-ақ эко белсенділер қатысты. Аталған ауқымды сенбілікте облыс әкімінің орынбасары Ғани Майлыбаев тазалық акциясының тағылымды шара екенін еске салды. «Табиғаты таңғажайып Іле өзенінің жағасындағы «Көшпенділер» қалашығы алда көрнекті туристік нысанға айналмақ. Сондықтан бұла аумақта келушілерге жайлы орта жарату үшін мұнда экопарк салынбақ.Бұл қадам өңіріміздің туристік әлеуетіне тың серпін береді деп ойлаймын. Бүгін сол игі бастамаға үн қосу үшін жиналдық» – деді Ғани Айдарұлы. 300-ге жуық адам қатысқан шарада «Көшпенділер » қалашығы маңына 500 түп ағаш егіліп, Іле өзенінің бойы тазаланды. Экологиялық акцияға қатысушылар табиғатты аялап, қоршаған ортаны таза ұстау – адам баласына жүктелген міндет екенін айтысты. «Жер бетіндегі тау, тастар, теңіздер, яғни, барша табиғат атаулы мен барлық нәрселер – Ұлы Алланың жаратқандары.Әсіресе, осы Табиғат ананы қорғап қалу мәселесінде ағаштарға көңіл бөлудің, тал, шыбық отырғызудың мәні өте зор. Себебі, тал егудің адамзат баласына тигізер пайдасы, жалпы қоршаған ортаға жақсы әсері бар екені баршаға белгілі» – дейді Қонаев қаласындағы Абай мешітінің наиб имамы Хожанепес Сейітұлы.Облыс әкімдігінің мәліметіне сүйенер болсақ, аймақ аумағындағы сенбілікке 32000-ға жуық адам қатысып, 225 техника жұмылдырылды. Сенбілік қорытындысы бойынша 264 тонна қоқыс шығарылып, 17800 түп ағаш отырғызылды. Мемлекет басшысы Қасым-Жомарт Тоқаевтың бастамасымен жүзеге асырылып жатқан «Таза Қазақстан» республикалық экологиялық акциясы аймағымызда қарқынды түрде жалғасуда. alatau_araiy_gazetiАқпарат көзі : https://www.gov.kz/memleket/entities/almobl/press/news/details/1203758?lang=kk

Алматыда әскери қызметшілер арасында қазақ күресінен «Әскер барысы – 2026» атағына іріктеу турнирі аяқталды.Еліміз күштік құрылымдарының ең мықты балуандарын біріктірген жарысты, әдеттегідей, Қорғаныс министрлігінің Спорт комитеті – Армия орталық спорт клубы ұйымдастырып отыр.Жарысқа Қорғаныс министрлігі, Ішкі істер министрлігі, Төтенше жағдайлар министрлігі, Ұлттық ұлан, Мемлекеттік күзет қызметі және Шекара қызметінің намысын қорғайтын он команда қатысты. Бұл жолы боз кілемге шыққан 18 әскери спортшының бәрі де жоғары дайындық деңгейі мен жеңіске деген жігерін көрсете білді.Турнир әскери қызметшілер арасында қазақ күресін насихаттауға және олардың дене дайындығы деңгейін арттыруға бағытталған. Сонымен қатар, ол жауынгерлік рухты нығайтып, әскери-қолданбалы спорт түрлерін дамытуға ықпал етеді.Байрақты бәсекенің қорытындысы бойынша бірінші орынды Қорғаныс министрлігі Спорт комитеті – Армия орталық спорт клубының өкілі ефрейтор Айдар Бескемпір иеленді. Екінші орынға тағы бір армия спортшысы сержант Әділ Оразбаев тұрақтады. Ал үшінші орын Ішкі істер министрлігінің спортшысы майор Жәнібек Дүйсембаевқа бұйырды.Жарыста 1, 2-ші орын алған спортшылар республикалық «Қазақстан барысы» турнирінде Қорғаныс министрлігінің намысын қорғайтын болады.Армия орталық спорт клубының өкілдері ұдайы жоғары нәтиже көрсетіп жүргенін айта кету керек. Капитан Марат Байқамұров 2025 жылғы «Қазақстан барысы» турнирінің жеңімпазы атанса, лейтенант Ерасыл Қажыбаев – 2024 жылғы турнирдің жеңімпазы және осы беделді республикалық жарыстың үш дүркін күміс жүлдегері.Ақпарат көзі : https://www.gov.kz/memleket/entities/mod/press/news/details/1203732?lang=kk

Қорғаныс министрінің орынбасары генерал-майор Асқар Мұстабеков Алматы гарнизонына жұмыс сапары барысында үшінші ұлттық бітімгерлік контингенттің БҰҰ-ның Голан жоталарындағы миссиясын орындауға дайындық барысын бағалады.ҚР Қорғаныс министрлігі Бітімгерлік операциялар орталығының «Бітімгер» оқу-жаттығу орталығында министрдің орынбасарына әскери қызметшілерді даярлаудың толық циклі көрсетілді. Бағдарлама тактикалық, арнайы, медициналық және тілдік дайындықты, одан өзге халықаралық стандарттарға сәйкес көпұлтты ортадағы іс-әрекеттерді оқытуды қамтиды.Оқыту кезінде барынша жауапкершілікпен жұмыс істеуге және шетелдік контингенттермен өзара іс-әрекетке жіті назар аударылады.Сапар барысында генерал-майор Асқар Мұстабеков орталықтың оқу-материалдық базасымен танысып, қызмет көрсету шарттары мен оқу процесін қалай ұйымдастырылатынын тексерді. Бұдан басқа оған бітімгерлердің заманауи жабдықтары мен БҰҰ миссиясына жіберілетін жеке құрамды қамтамасыз етудің қолданыстағы нормалары көрсетілді.Сапар қорытындысы бойынша ол әскери қызметшілерді даярлау және сабақтарды өткізу сапасының деңгейі жоғары деп атап өтті.Сапар соңы үшінші бітімгерлік контингенттің жеке құрамын салтанатты сапқа тұрғызумен аяқталды. Министрдің орынбасары әскери қызметшілерге қызметі және халықаралық міндеттерді орындауға дайындығы үшін алғыс айтып, Қазақстанның жаһандық қауіпсіздікті қолдауға қосқан үлесінің маңыздылығын атап өтті. Қорғаныс ведомствосының атынан жеке құрамға бағалы сыйлық табыс етілді.БҰҰ-ның Голан жоталарындағы бөлінген аймақты бақылау миссиясы 1974 жылдан бері іске асырылуда. Қазақстан оған 2024 жылдан бастап дербес ұлттық контингент ретінде қатысып келеді.Ақпарат көзі : https://www.gov.kz/memleket/entities/mod/press/news/details/1203701?lang=kk

Мәскеу, 2026 жылғы 17 сәуір – Қазақстан Республикасының Сыртқы істер министрі Ермек Көшербаев «Орталық Азия - Ресей» форматындағы Сыртқы істер министрлерінің кезекті кездесуіне қатысты.Кездесу барысында тараптар 2025 жылғы қазанда Душанбе қаласында өткен «Орталық Азия - Ресей» екінші саммитінің қорытындысы бойынша қол жеткізілген уағдаластықтардың іске асырылу барысын қарастырды. Күн тәртібіне сауда, энергетика, көлік және логистика салаларындағы ынтымақтастықтың негізгі бағыттары енгізілді. Сондай-ақ халықаралық күн тәртібінің өзекті мәселелері және өңірлік қауіпсіздікті қамтамасыз ету бойынша пікір алмасу өтті.«Орталық Азия мен Ресейдің экономикалық әлеуетінің үйлесуі жан-жақты әріптестікті нығайтудың ұзақ мерзімді перспективаларын ашып, болашақ жетістіктер мен ынтымақтастықтың жаңа көкжиектеріне берік негіз қалыптастырады», – деп Е.Көшербаев өз сөзінде атап өтті.Өткен жылдың қорытындысы бойынша өңір мен Ресей арасындағы жиынтық тауар айналымы 6,5 пайызға артып, шамамен 50 млрд АҚШ долларына жетті, бұл көлемнің жартысынан астамы Қазақстанның үлесіне тиесілі. Сауда көлемінің өсуімен қатар, инвестициялық ынтымақтастық және өнеркәсіптік кооперация саласындағы өзара іс-қимыл да дәйекті түрде кеңеюде. Тек Ресеймен Қазақстанда жалпы инвестиция көлемі 55 млрд доллардан асатын 177 жобаның пулы құрылды, оның 122-сі іске асырылды. Бұл «Орталық Азия - Ресей» форматындағы экономикалық өзара іс-қимылдың ауқымы мен нысаналы сипатын айқын растайды.Қазақстан СІМ басшысы өңірлік қауіпсіздік мәселелерінің өзектілігін атап өтіп, заманауи сын-қатерлер мен қауіптердің барған сайын күрделене түсіп, келісілген жауаптарды талап ететінін атап өтті.«Мұндай жағдайда терроризмге, экстремизмге, трансұлттық ұйымдасқан қылмысқа, есірткі трафигіне, қарудың заңсыз саудасына және заңсыз көші-қонға қарсы іс-қимыл жөніндегі күш-жігерді үйлестіру ерекше маңызға ие», – деді Е.Көшербаев.Орталық Азияның Ресеймен өзара іс-қимылының берік тіректерінің бірі болып табылатын білім беру, мәдениет және адам арасындағы байланыстарды қоса алғанда, гуманитарлық өлшем мәселелеріне жеке назар аударылдыІс-шара қорытындысы бойынша тараптар «Орталық Азия - Ресей» форматындағы көпқырлы ынтымақтастықты нығайтуға бейілділіктерін растап, оның орнықты өңірлік дамуды қамтамасыз етудегі маңызды рөлін атап өтті және қол жеткізілген уағдаластықтарды дәйекті іске асыруға дайын екендіктерін білдірді.Ақпарат көзі : https://www.gov.kz/memleket/entities/mfa/press/news/details/1203641?lang=kk

Мәскеу, 2026 жылғы 17 сәуір – Қазақстан Сыртқы істер министрі Ермек Көшербаев Тәуелсіз Мемлекеттер Достастығы Сыртқы істер министрлері кеңесінің отырысына қатысты.«Биыл ТМД-ның құрылғанына және Алматы декларациясына қол қойылғанына 35 жыл толып отыр. Бүгінде Алматы келісімінің қабылдануының арқасында өңірімізде бейбітшілік, ынтымақтастық пен тату көршіліктің түбегейлі жаңа парадигмасы қалыптасты деп сеніммен айтуға болады», – деп атап өтті Қазақстан СІМ басшысы.Министр сондай-ақ күрделі геосаяси жағдайға қарамастан ТМД кеңістігіндегі тұрақтылық пен ынтымақтастық ахуалы сақталып отырғанын атап өтті. Сауданың дәйекті кеңеюі, кооперация мен көлік байланысының дамуы сыртқы күйзелістерді теңестіруге және өсудің жаңа көздерін қалыптастыруға мүмкіндік береді.«ТМД шеңберіндегі үйлестіру мен өзара іс-қимылды одан әрі нығайту біздің байырғы мүдделерімізге сай келеді және Достастық мемлекеттерінің орнықты дамуын қамтамасыз етудің маңызды факторы», - деп қосты ол.Е. Көшербаев ТМД шеңберіндегі ынтымақтастықтың түрлі аспектілері бойынша Қазақстанның ұстанымын баяндап, Ұйымның одан әрі дамуына бағытталған бірқатар ұсыныстар енгізді.Кездесу барысында қатысушылар өңірлік және халықаралық күн тәртібіндегі өзекті мәселелерді, сондай-ақ Достастыққа қатысушы мемлекеттердің өзара іс-қимылының жай-күйі мен перспективаларын талқылады. Сауда-экономикалық және халықаралық ынтымақтастықты дамытуға, цифрлық және көлік-транзиттік салалардағы өзара іс-қимылды жандандыруға ерекше назар аударылды. Отырыс қорытындысы бойынша сыртқы саяси ведомстволардың басшылары әлеуметтік даму және өмір сапасы, кәмелетке толмағандарды тұрақты тұратын мемлекеттеріне қайтару, сондай-ақ білім беру және ағартушылық қызмет салалары бойынша бірқатар құжаттарды келісті.Сондай-ақ, Таяу Шығыстағы ахуал мен адамның ғарышқа алғашқы ұшуының 65 жылдығына орай бірлескен мәлімдемелер де қабылданды.Кездесу соңында тараптар ТМД шеңберіндегі өзара іс-қимылды дамытуға және осы Ұйымның көпқырлы әлеуетін одан әрі нығайтуға бейілділіктерін растады.Сыртқы істер министрлері кеңесінің кезекті отырысы 2026 жылдың қазан айында Түрікменстанда өтеді.Ақпарат көзі : https://www.gov.kz/memleket/entities/mfa/press/news/details/1203560?lang=kk

Астанада Қорғаныс министрлігі, Бас штаб және Қарулы күштер құрылымдық бөлімшелері арасындағы XVI Спартакиада аясында табельдік қарумен атудан чемпионат өтті.Қорғаныс министрлігінің Спорт комитеті – Армия орталық спорт клубы ұйымдастырған жарысқа құрамында 246 әскери қызметші бар 40 команда қатысты. Чемпионат ережесіне сәйкес, мергендер Макаров тапаншасы мен Калашников автоматынан дәлдеп ату бойынша екі топта өзара сынға түсті.Алғашқы топта Қорғаныс министрлігі мен Бас штаб құрылымдық бөлімшелерінің өкілдері бақ сынасты. Бұл топта жалпы командалық есепте бірінші орынды Ақпараттық технологиялар департаменті иеленсе, екінші орын Әкімшілік департаментіне бұйырды. Ал үшінші орынды Жауынгерлік дайындық департаменті мен Сержанттар құрамымен жұмыс басқармасының біріккен командасы еншіледі.Екінші топта Қарулы күштердің бас басқармалары, басқармалары, әскери бөлімдері мен мекемелерінің әскери қызметшілері сынға түсті. Нәтижесінде 14776 әскери бөлімі бірінші орынға ие болды. Ұлттық қорғаныс университетінің командасы екінші орынға тұрақтаса, үшінші орын Құрлық әскерлері бас қолбасшысы басқармасына бұйырды.Жеңімпаздар мен жүлдегерлер кубоктармен, грамоталармен және бағалы сыйлықтармен марапатталды. Сонымен қатар,ерлер мен әйелдер арасындағы үздік мергендер анықталып, олардың кәсіби шеберлігі ерекше аталып өтті.Мұндай жарыстар әскери қызметшілердің жауынгерлік әзірлігін арттырып қана қоймай, бөлімшелер арасындағы ынтымақтастықты нығайтуға ықпал етеді. Қатысушылардың айтуынша, чемпионат тәжірибе алмасуға және өзара бәсекелестікті дамытуға жақсы мүмкіндік болды.Ақпарат көзі : https://www.gov.kz/memleket/entities/mod/press/news/details/1203434?lang=kk