Ташкент, 2025 жылғы 10 ақпан – Қазақстан Республикасы Сыртқы істер министрінің орынбасары Әлібек Қуантыров пен Қазақстан Республикасы Сауда және интеграция вице-министрі Қайрат Төребаев Өзбекстан Республикасының Инвестициялар, өнеркәсіп және сауда министрі Лазиз Кудратовпен кездесті.Келіссөздер барысында сауда-экономикалық және инвестициялық ынтымақтастықты, өнеркәсіптік кооперацияны, логистиканы кеңейту, сондай-ақ сауда рәсімдерін жеңілдету және екі елдің нарығына өнімді жеткізу көлемін ұлғайту үшін жағдай жасау мәселелері талқыланды. Инвестицияларды тарту тетіктеріне, оның ішінде инвестициялық ахуалды жақсарту және кәсіпкерлік қызмет үшін қолайлы жағдайлар жасау мәселелері бойынша пікір алмасуға ерекше назар аударылады.Тараптар Өзбекстан Республикасының Президенті Шавкат Мирзиёевтің 2024 жылғы тамыздағы Астанаға мемлекеттік сапарының қорытындысы бойынша қол жеткізілген уағдаластықтарды жүзеге асыру барысы туралы пікір алмасты. Осы тұрғыда өнеркәсіп және сауда саласындағы бірлескен жобаларды әзірлеу, сондай-ақ инвестициялық ынтымақтастық саласындағы өзара іс-қимылды күшейту шаралары талқыланды. 2025 жылға жоспарланған екіжақты және көпжақты жоғары деңгейдегі алдағы іс-шараларға ерекше назар аударылады.Қазақстандық делегация «Технопарк» ЖШҚ, «Ташкент Пласт Полимер» және «BMB Holding» өндірістік кәсіпорындарды аралады. Аталған кәсіпорындар ішкі және сыртқы нарыққа жеткізу үшін жоғары технологиялық және бәсекеге қабілетті өнім шығаруға бағытталған.Кездесу қорытындысы бойынша тараптар белгіленген бағыттар бойынша ынтымақтастықты жалғастыру ниетін растады.Ақпарат көзі : https://www.gov.kz/memleket/entities/mfa/press/news/details/936252

Астана, 2025 жылғы 11 ақпан – Қазақстан Республикасы Премьер-министрінің орынбасары – Сыртқы істер министрі Мұрат Нұртілеу Пәкістан Ислам Республикасының Қазақстандағы Елшісі Науман Башир Бхаттиді қабылдады.Кездесу барысында тараптар Қазақстан-Пәкістан ынтымақтастығының ағымдағы жағдайы мен перспективаларын талқылап, өткен жылы жоғары деңгейдегі байланыстардың оң динамикасын қанағаттанушылықпен атап өтті.Қазақстанның сыртқы саяси ведомствосының басшысы сауда-экономикалық және транзит-көліктік салаларында екіжақты өзара іс-қимылды одан әрі дамытуға бағытталған бұрын қол жеткізілген уағдаластықтарды іске асырудың маңыздылығы туралы мәлімдеді.Ауыл шаруашылығы, денсаулық сақтау және фармацевтика сияқты басым секторларға ерекше назар аударылды. Осыған байланысты елдер арасындағы өзара іс-қимылды нығайтуға жәрдемдесетін Сауда-экономикалық, ғылыми-техникалық және мәдени ынтымақтастық жөніндегі үкіметаралық комиссияның маңыздылығы аталып өтті.Тараптар сондай-ақ биік және жоғары деңгейдегі алдағы іс-шаралар кестесін қарады.Өз тарапынан пәкістандық дипломат екіжақты байланыстарды тереңдету мақсатында Қазақстанның сыртқы саяси ведомствосымен тығыз ынтымақтастыққа дайындығын растады.Келіссөздер қорытындысы бойынша бірлескен жұмысты жалғастыру және өзара іс-қимыл бағыттарын кеңейту туралы уағдаластыққа қол жеткізілді.Ақпарат көзі : https://www.gov.kz/memleket/entities/mfa/press/news/details/935974

Астана, 2025 жылғы 10 ақпан – Қазақстан Республикасы Сыртқы істер министрінің бірінші орынбасары Ақан Рахметуллин 2025 жылдың қаңтарында тағайындалған БҰҰ Халықтың қоныстануы саласындағы қорының (ЮНФПА) Қазақстандағы жаңа өкілі Чинве Огбоннамен кездесті.Кездесу барысында тараптар Қазақстандағы гендерлік теңдікті нығайту, денсаулық сақтау және әлеуметтік қызметтерді жақсарту мәселелеріне қатысты ынтымақтастықтың негізгі бағыттарын талқылады.А.Рахметуллин БҰҰ қорының өкілін қарсы ала отырып, ЮНФПА-ның белсенді күш-жігерінің көмегімен Қазақстан репродуктивті денсаулықты қорғау, перинаталдық күтім және отбасын жоспарлау, сондай-ақ ұзақ өмір сүру саласындағы үздік әлемдік тәжірибені енгізуде елеулі табыстарға қол жеткізгенін атап өтті.Өз кезегінде Ч.Огбонна Қазақстанға демография мен денсаулық сақтау салаларындағы ұлттық стратегиялар мен бағдарламаларды жүзеге асыруда одан әрі қолдау мен көмек көрсетуге дайын екенін білдірді.Кездесу қорытындысы бойынша тараптар халықаралық және ұлттық күн тәртіптері аясында әріптестікті нығайтуға және басым бағыттар бойынша ынтымақтастықты дамытуға келісті.Ақпарат көзі : https://www.gov.kz/memleket/entities/mfa/press/news/details/935992

Өткен жылдың қаңтар айында құрылған жаңа қалада құрылыс жұмыстары қарқынды. Іле ауданының құрамында болған , бүгінде асқаралы Алатаудың атын иемденген бұл шаһарда 50 мыңнан астам халық тұрады. 12 ықшам ауданы бар өңірдің инфрақұрылымын жүйелі түрде қалыптастыру мақсатында 13 «өсу нүктесі» анықталып, олардың егжей-тегжейлі жоспарлау жобалары мен инженерлік-коммуникациялық желілердің техникалық құжаттамалары әзірленуде. Бұл туралы алатау қаласының әкімі Әркен Хамитұлы баспасөз мәслихатында айтты.«Халық қаласа, хан түйесін сояды» демекші, бұқараның жергілікті биліктен сұрағаны заманауи жабдықталған аурухана, яғни, сапалы медициналық қызметке қол жеткізу екен. Халық үніне құлақ асуды ұйғарған әкімдік бірнеше ықшам ауданда медициналық мекеменің құрылысын бастауға ниетті. Атап айтар болсақ, «Ауылда денсаулық сақтауды жаңғырту» пилоттық ұлттық жобасы аясында Еңбек және Жаңаарна ықшам аудандарында 2 фельдшерлік акушерлік пунктің құрылыс жұмыстары жүргізілуде және ағымдағы жылы қолданысқа беру көзделіп отыр.«Жетіген және Қоянқұс ықшам ауданында 250 орындық емхананың, сондай-ақ Жаңадәуір ауылында жаңа дәрігерлік амбулаторияның жобалық-сметалық құжаттарын әзірлеу бойынша кешенді жұмыстар атқарылуда. Жобалау жұмыстарының оң сараптамалық қорытындысы алынғаннан кейін құрылыс-монтаждау жұмыстары жоспарлы түрде, кезең-кезеңімен іске асырылатын болады», - деді Алатау қаласының әкімі Әркен Хамитұлы.Бұдан бөлек, шаһар аумағында «жайлы мектеп жобасы» жанданған. Қала басшысының сөзіне сенсек, 2024 жылы ұлттық жоба аясында Еңбек ықшам ауданында жобалық қуаттылығы 600 орынға арналған мектеп қолданысқа берілді. Сонымен қатар, осы жоба шеңберінде «Gate City» қалашығында 900 орынға арналған мектептің құрылыс жұмыстары жүргізілуде және ағымдағы жылы қолданысқа беру жоспарлануда.Сондай-ақ, Жетіген ықшам ауданында 280 орындық мәдениет үйі мен 100 келушіге арналған спорт кешенінің құрылысын салу үшін 1 гектар жер телімі бөлініп, бүгінде жобалау-сметалық құжаттамалары әзірленіп жатыр.Қала әкімі Әркен Хамитұлы былтыр 46 млрд.теңге инвестиция тартылғанын алға тартуда. Ал, биыл бұл көрсеткіш 100,7 млрд.теңгеге жетуі тиіс.«Қазіргі таңда, қалаға инвестиция тарту мақсатында «Алатау арнайы экономикалық аймағы» басқарушы компаниясымен және Алматы облысының Өңірлік даму орталығымен белсенді өзара іс-қимыл жүргізілуде.Ағымдағы жылы 10 ірі инвестициялық жобаның құроылысы басталад»,-деп қорытындылады қала әкімі Әркен Хамитұлы.Ақпарат көзі : https://www.gov.kz/memleket/entities/almobl/press/news/details/935571

Түркістан облысында бөлімшелерді жауынгерлік үйлестіру бағдарламасы шеңберінде өткен жауынгерлік атысқа механикаландырылған бригаданың 150-ден аса мерзімді қызмет сарбазы қатысты.Мамандық бойынша даярлықтан өтіп, тактиканың теориялық негіздерін меңгерген бөлімшелер құрамындағы жауынгерлер штаттық қарудан жауынгерлік міндеттерді пысықтауға кірісті. Оқу-жаттығу орындарында әдістемелік нұсқау беру сабақтары барысында офицерлер мен сержанттар жауынгерлік атыстың барлық кезеңдерін өткізу жөнінде нақты тапсырмалар алды. – Сабақтың негізгі мақсаты – командирлер мен жеке құрамды атыс құралдарын қолдана отырып, тиімді ұрыс жүргізуге үйрету. Атысты сауатты басқару және жауынгерлік бұйрықтарды нақты беру қойылған міндеттерді ойдағыдай шешуге мүмкіндік береді, – деп түсіндірді бригада командирінің жауынгерлік даярлық жөніндегі орынбасары майор Ержан Сабырбекұлы.Әскери қызметшілер бөлімшелердің жорығы, елді мекендердегі іс-қимылдар және қорғанысты ұйымдастыру сияқты негізгі тақырыптар бойынша дағдыларын жетілдірді.Мақсатқа сәйкес бөлімшелер құрамындағы жауынгерлер әуе шабуылына тойтарыс беру, диверсиялық топтарды анықтап, көзін құрту, зақымданған жерлерден өту, мина-жарылғыш тосқауылдарды пайдаланып қорғаныс іс-қимылдарын жүргізу және қорғаныстың алдыңғы шебінде жауды жою сценарийлерін пысықтады.Жауынгерлік жағдай қазіргі заманғы қарулы қақтығыстардың тәжірибесін ескеріп, жеке құраммен жұмыс істеудің тиімді формалары мен әдістерін қолдана отырып модельденді.Ақпарат көзі : https://www.gov.kz/memleket/entities/mod/press/news/details/935549

Астана, 2025 жылғы 10 ақпан – Қазақстан Республикасы Сыртқы істер министрінің орынбасары Әлібек Бақаев Индонезия Республикасының Елшісі Мохамад Фаджрул Рахманмен кездесті.Сұхбат барысында тараптар өзара қызығушылық тудыратын барлық салалардағы екіжақты ынтымақтастықтың қазіргі жай-күйі мен перспективаларын талқылады, сондай-ақ ағымдағы жылы биік және жоғары деңгейде жоспарланған іс-шаралар кестесін қарастырды.«Индонезия – Қазақстанның Оңтүстік Шығыс Азиядағы негізгі серіктестерінің бірі. Астана Джакартамен саяси диалог пен сауда-экономикалық қатынастарды одан әрі нығайтуға ұмтылады. Өткен жылы екіжақты тауар айналымының көлемі 5 пайызға артып, 300,5 млн АҚШ долларын құрады және екі тарап оны әртараптандыру арқылы өзара сауданы одан әрі кеңейту үшін бар әлеуетті бірлесіп пайдаланатынына нық сенеміз», – деді Ә.Бақаев.Өз тарапынан индонезиялық дипломат екіжақты және көпжақты бағытта әртүрлі салалардағы ынтымақтастықты тереңдетуді жалғастырудың маңыздылығымен келісті.Сонымен қатар дипломаттар жаһандық және өңірлік күн тәртібіндегі өзекті мәселелер бойынша пікір алмасып, көпжақты құрылымдар аясындағы ықпалдастықты талқылады.Ақпарат көзі : https://www.gov.kz/memleket/entities/mfa/press/news/details/935556

Харбинде IX қысқы Азия ойындарында ерлер арасында өткен екі атыс шепті 10 шақырымдық спринт жарысы аяқталды. Спринт жарысында армия биатлоншысы Владислав Киреев үздік нәтиже көрсетіп, жеңіске жетті. Дәл осы жарыста қазақстандық Вадим Куралес күміс еншіледі. Үшінші орын қытайлық Цан Гуге бұйырды.Бұл сайыста спортшының әріптестері Қарулы Күштердің қызметшілері Әсет Дүйсенов пен Александр Мухин де жақсы нәтижемен үздік ондыққа кірді. Олар рейтингтің алтыншы және жетінші сатысын иеленді. Естеріңізге сала кетсек, бұған дейін 10 шақырым қашықтықта еркін стильдегі жарыста армиялық шаңғышысы Олжас Климин қола жүлде алған болатын. Ақпарат көзі : https://www.gov.kz/memleket/entities/mod/press/news/details/935514

ҚР Ұлттық қорғаныс университетінде Қорғаныс министрінің тыл және әскери инфрақұрылым жөніндегі орынбасары генерал-лейтенант Қаныш Әбубәкіровтың басшылығымен дөңгелек үстел отырысы өтті.Тылдық қамтамасыз ету мәселелері соңғы қарулы қақтығыстар аясында қарастырылды. Талқылауға Тыл бастығы басқармасының басшылығы мен бөлімшелердің бастықтары, Қарулы Күштер түрлері бас қолбасшыларының тыл жөніндегі орынбасарлары, Әскери-әуе күштері, Арнайы операциялар күштері қолбасшыларының орынбасарлары және ЖОО бейіндік кафедрасының профессор-оқытушылар құрамы қатысты. – Біз әскерлерді жабдықтау процестерін басқару жүйесін жетілдірудің оңтайлы жолдарын анықтау үшін жиналдық. Ұрыста сәттілікке жету үшін әр жауынгер тоқ, киімі бүтін, қарулы және толық жабдықталған болуы керек. Осының бәрінің артында тыл әскерлерінің қажырлы және жауапты еңбегі тұр, – деп талқылау бағытын нақтылады генерал-лейтенант Қ. ӘбубәкіровКездесуге қатысушылар Құрлық әскерлерінің, Әуе қорғанысы күштері мен Әскери-теңіз күштерінің тылдық қамтамасыз етуді ұйымдастырудың ағымдағы жай-күйі мен жетілдіру перспективалары мәселелерін талқылады. Тыл бастығы басқармасы қызметінің тиімділігін арттырудың маңызды факторы материалдық-техникалық құралдарды есепке алуды цифрландыру болып табылады деп атап өтілді. Сондықтан, осы жылдың басынан бастап тыл қызметі толығымен электрондық құжат айналымына көшті. Кездесуде шетел армияларын мысалға ала отырып, жауынгерлік іс-қимылда бөлімшелерді жабдықтау логистикасын ұйымдастыру ерекшеліктері талданды. Отырыс қорытындысы бойынша Қорғаныс министрінің орынбасары генерал-лейтенант Қаныш Әбубәкіров Қарулы Күштерді тылдық қамтамасыз ету жүйесінің тиімділігін оңтайландыруға және арттыруға бағытталған тапсырмалар берді.Ақпарат көзі : https://www.gov.kz/memleket/entities/mod/press/news/details/934860

2025 жылғы 9 ақпанда Қазақстанның шорт-трек құрамасы Азиада ойындарында алғашқы алтын медалін жеңіп алып, ел спорты тарихына өз есімін жазды. Харбинде өткен жарыстарда 5000 метрлік эстафетада ұлттық команда жоғары дайындық деңгейін, тактикалық шеберлікті және командалық рухты көрсетті.Қостанай облысының мақтанышыБұл тарихи жетістіктің маңызды қатысушыларының бірі – Глеб Ивченко, Қостанай облысының шорт-трек мектебінің түлегі, халықаралық дәрежедегі спорт шебері, Рудный қаласының тумасы. Жас әрі дарынды спортшы ұлттық құрама сапында тамаша нәтиже көрсетіп, Қазақстанның Азиядағы ең мықты құрамалармен тең дәрежеде бәсекеге түсе алатынын дәлелдеді.Глебтің жетістіктеріне оның жаттықтырушысы Николай Николаевич Федоренконың қосқан үлесі зор. Дәл осы бапкердің басшылығымен ол жоғары нәтижелерге жетіп, спорттық шеберлігін шыңдап келеді.Өңірде қысқы спортты дамытуҚостанай облысының әкімі Құмар Ақсақалов өзінің Instagram парақшасында Глеб Ивченко мен Қазақстан құрамасын тарихи жеңісімен құттықтап, өңірде қысқы спорт түрлерін дамытуға ерекше көңіл бөлініп отырғанын атап өтті. Қазіргі уақытта облыста 3 мұз сарайы, коньки тебу стадионы, 36 шаңғы базасы және 77 хоккей корты жұмыс істейді. Алдағы жылдары ауылдық жерлерде жабық хоккей корттарын салу және барлық аудан орталықтарын заманауи спорттық инфрақұрылыммен қамтамасыз ету жоспарланып отыр.Қазақстан жаңа белестерге ұмтылады2025 жылғы Азиада ойындарында Қостанай облысынан 10 спортшы ел намысын қорғап, жоғары дайындық деңгейін көрсетіп жатыр. Глеб Ивченконың жеңісі – бұл тек жеке жетістік емес, сонымен қатар бүкіл команда, жаттықтырушылар штабы мен еліміздегі спортшыларды даярлау жүйесінің жеңісі.Бұл триумф – Қазақстан спортының қарқынды дамып келе жатқанын тағы бір дәлелдейді. Біз спортшыларымызбен мақтанамыз және олардың алда жаңа жеңістерге жететініне сенімдіміз!Фото: Сали Сабиров, Қазақстан ҰОК баспасөз қызметіАқпарат көзі : https://www.gov.kz/memleket/entities/kostanay/press/news/details/934446

Қоғамдық көлік паркін жаңарту және жолаушылар тасымалының сапасын арттыру – жайлы қалалық орта қалыптастырудағы маңызды міндеттердің бірі. Бүгін Қостанай облысының әкімі Құмар Ақсақалов өңірге жеткізілген жаңа автобустарды қарап шықты.Бүгінгі таңда облыс орталығындағы 289 автобустың 85-і 7 жылдан астам уақыт пайдаланылуда. Автопаркті жаңарту мақсатында соңғы жылдары лизингке 113 жаңа автобус сатып алынды, ал өткен жылы қолма-қол төлем арқылы тағы 4 бірлік (2 Yutong автобусы және 2 екі қабатты автобус) алынды.Қоғамдық көлікті жаңарту жұмыстары жалғасуда. Биыл 28 жаңа автобусты сатып алу бойынша келісімшарттар жасалып, төлем жүргізілді. Оның 15-і бүгін жеткізіліп, таныстырылды. Тағы 10 автобус 14 ақпанда келеді, ал қалған 3-уі биылғы маусым айында пайдалануға беріледі.Сонымен қатар, биыл толық субсидиялау арқылы тағы 18 жаңа автобус сатып алу жоспарлануда. Әлеуметтік маңызы бар маршруттарды субсидиялау үшін бюджеттен 2,1 млрд теңге бөлінді.Айта кету керек, автопаркті жаңарту кезінде тұрғындардың ұсыныстары ескерілді – үлкен сыйымдылықтағы автобустар сатып алынды. Бұл қозғалыс аралығын қысқартып, жолаушылар үшін сапарларды ыңғайлы етеді.Осы шаралардың нәтижесінде пайдалануға берілгеніне 7 жылдан аспаған автобустардың үлесі 14%-ға өсіп, 71%-ды құрайды. Бұл Қостанай мен қала маңындағы жолаушылар тасымалының сапасын айтарлықтай жақсартады.Ақпарат көзі : https://www.gov.kz/memleket/entities/kostanay/press/news/details/933032

Бүгін Қостанай облысының әкімі Құмар Ақсақаловтың төрағалығымен құрылыс, сәулет және қала құрылысы, жолаушылар көлігі және автомобиль жолдары, сондай-ақ энергетика және тұрғын үй-коммуналдық шаруашылық басқармаларының алқасы өтті. Жиында 2024 жылдың қорытындылары шығарылып, 2025 жылға арналған басым бағыттар белгіленді.Құрылыс саласы: өсім мен жаңа тәсілдерҚұрылыс саласы өңір экономикасының негізгі секторларының бірі болып қала береді. 2024 жылы құрылыс жұмыстарының көлемі 25%-ға артып, 315,3 млрд теңгені құрады. 500 мың шаршы метр тұрғын үй пайдалануға беріліп, 5 мың отбасы баспаналы болды.Құрылыс индустриясының дамуы жергілікті материалдарды пайдаланумен тығыз байланысты. Облыста құрылыс материалдары өндірісі 51,6 млрд теңгені құрап, 3,6%-ға өсті.Бюджеттік тұрғын үй құрылысына жаңа сәулеттік және дизайндық шешімдер енгізілуде. Көшелерді абаттандыруға ерекше назар аударылады. Құрылыс компаниялары үшін міндетті болатын абаттандыру стандарттары әзірленді.Облыс тұрғындары үшін қолжетімді баспана• “Қостанай жастары” бағдарламасы – үш жыл ішінде 250 жас отбасы баспаналы болды, бағдарлама 2025 жылы жалғасады.• Ипотекалық несие беру – берілген несиелер көлемі 17%-ға өсіп, Отбасы банк салымшыларының саны 85,4 мың адамға жетті.• Жалдамалы тұрғын үй – 2024 жылы оған 18 млрд теңге бөлініп, 940 пәтер сатып алынды. 2025 жылы бұл мақсатқа 20 млрд теңге қарастырылып, 1 000 кезекте тұрған азамат тұрғын үймен қамтамасыз етіледі, сондай-ақ 250 несиеге берілетін пәтер ұсынылады.Жол-көлік инфрақұрылымын дамыту2024 жылы жол саласының бюджеті 27%-ға артып, 93,5 млрд теңгені құрады. Бұл қаражат есебінен:• 1 300 км автожол және 103 елді мекендегі 382 көше жөнделді.• Ауылдарға апаратын 80 кіреберіс жол жаңартылып, 38 млрд теңге бөлінді.Үш жыл бұрын облыста бар болғаны 20 кіреберіс жол жөнделсе, бүгінгі күні бұл көрсеткіш төрт есеге жуық өсті.Ауыл жолдарына ерекше назар аударылды:• Ашутасты ауылы (Арқалық) – 13 көшенің 11-і жөнделді (85%).• Үлкен Чураковка ауылы (Алтынсарин ауданы) – екі жылда 18 көшенің 8-і жаңартылды (44%).• Федоровка ауылы (Ұзынкөл ауданы) – 13 көшенің 8-і жөнделді (47%), қалғаны жоспарға енгізілді.Республикалық трассаларды қайта құру:• Арқалық – Ұлытау облысы шекарасы тас жолының жөндеу жұмыстары аяқталуда. Бұл жолдың ашылуы арқылы Қазақстанның оңтүстік аймақтарынан Ресейге дейінгі қашықтық 400 км-ге қысқарады.• Сарыкөл – СҚО шекарасы және Ұзынкөл – Троебратное бағытындағы жолдар жаңартылуда.• 2024 жылы Бестөбе – Ақтөбе облысы шекарасы жолының жөндеу жұмыстары басталады.Арқалық әуежайын қайта жаңарту үшін жобалық-сметалық құжаттама әзірленуде. Жаңғыртудан кейін әуежайдың өткізу қабілеті сағатына 70 жолаушыға дейін артады, Қостанай мен Астанаға әуе қатынасын қайта жандандыру жоспарлануда.Тұрғын үй-коммуналдық шаруашылығы: желілерді жаңғырту және жаңа жобалар2025 жылға жоспарланған:• 6 млрд теңгеге 39 коммуналдық желіні жаңғырту жобасы.• 76 жобаны жүзеге асыру үшін 55 млрд теңгеге өтінімдер берілді.• 2029 жылға дейін жылу желілерінің тозуы 40%-ға дейін төмендетілмек (қазір 45,4%), бұл апаттық жағдайлардың санын 20%-ға азайтуға мүмкіндік береді.Сумен жабдықтау• 2024 жылы су жобаларына 7,7 млрд теңге бөлініп, 40 жоба іске асырылуда.• 2025 жылы 42 млрд теңгеге 59 жоба қаржыландырылады (өткен жылмен салыстырғанда екі есе көп).• Орталықтандырылған су жүйесімен қамтылған ауыл тұрғындарының үлесі 61,5%-дан 68,9%-ға дейін артты.• Мемлекет су тарифінің 96%-ын субсидиялайды, нәтижесінде тұрғындар 1 текше метр суды 1 342 теңге орнына 55 теңгеге тұтынады.Газдандыру• Қостанай – Боровское газ құбырының жобасы басталды, ол 24 мың тұрғынды көгілдір отынмен қамтамасыз етеді.• 2024 жылы 5 жоба іске асырылып, 1,2 млрд теңге бөлінді. Бұл жұмыстар облыстың газдандыру деңгейін 60,4%-ға дейін арттырады.Көше жарығы2024 жылы елді мекендерде 15 мың жарық шамы мен 4,3 мың тірек орнатылады. Бұл 992 км жолды жарықтандыруға мүмкіндік береді.Жаңартылатын энергетикаӨңірде жалпы қуаты 1 ГВт болатын 580 млрд теңгеге 5 ірі ЖЭК жобасы жүзеге асырылуда:• 1 күн электр станциясы• 1 газ-поршеньді станция• 3 жел электр станциясыБұл жобалар іске қосылғаннан кейін аймақтың электр қуатын өндіру көлемі 10 есе артып, облыстың барлық қажеттіліктерін қамтамасыз етеді.2024 жылы қалалар мен ауылдарды абаттандыруға 14,7 млрд теңге бөлінді (2023 жылмен салыстырғанда 34%-ға көп). Қаражат саябақтарды, балалар алаңдарын, көше жарығын, қасбеттерді жаңартуға және апатты үйлерді бұзуға бағытталды.Тұрақты даму бағытыМемлекет басшысы энергиямен толық өзін-өзі қамтамасыз ету, инфрақұрылымды дамыту және азаматтардың өмір сүру сапасын арттыру міндеттерін қойды. Қостанай облысы бұл мәселелерді шешу үшін ТКШ жаңғыртуға, жол желісін жақсартуға, қолжетімді тұрғын үй салуға және жаңартылатын энергия көздерін енгізуге ресурстар бағыттауда.Бұл жұмыстар 2025 жылы қаржыландыру көлемін арттыра отырып және инвестиция тарту арқылы жалғасады.Ақпарат көзі : https://www.gov.kz/memleket/entities/kostanay/press/news/details/934034

ҚР Қорғаныс министрлігінің Бітімгерлік операциялар орталығында Канаданың Қазақстандағы Төтенше және Өкілетті елшісі Кристофер Дагган бастаған делегация болды. Тараптар кездесу барысында БҰҰ-ның бітімгерлік қызметі аясындағы ынтымақтастықтың алдағы мүмкіндіктерін талқылады. Канадалық делегация БҰҰ-ның бітімгерлік миссияларындағы міндеттерді сапалы орындау үшін әскери қызметшілердің кәсіби және бейімделу дағдыларын дамытуға бағытталған бітімгерлерді даярлауды ұйымдастыру деңгейін жоғары бағалады.Ақпарат көзі : https://www.gov.kz/memleket/entities/mod/press/news/details/932935

Астана қаласының халықаралық әуежайында 1–5 ақпан аралығында Дубайда өткен The UAE SWAT Challenge арнайы мақсаттағы бөлімшелердің басты сынағына қатысқан командаларды салтанатты түрде қарсы алды.Іс-шараға Мемлекеттік күзет қызметінің, Ұлттық қауіпсіздік комитетінің, Қорғаныс министрлігінің, Ішкі істер министрлігінің және Ұлттық ұланның басшылары қатысты.Қазақтың қонақжайлылық дәстүрімен ұлттық киімдегі қыздар келгендерді "Шашу" шашып, бауырсақпен қарсы алды.Жеңімпаздардың құрметіне біріккен оркестр арнайы мақсаттағы бөлімшелердің әнұранына айналған "Рух" және "Сауыт" шығармаларын орындады.Командаларға қарап арнайы мақсаттағы бөлімшелердің символы – қызыл күрең береттің иегері, Қазақстан Республикасының Қорғаныс министрі генерал-полковник Руслан Жақсылықов арнайы мақсаттағы бөлімшелердің даярлық деңгейі жоғары деп атап өтті:– Жарыс барысында көрсеткен тамаша нәтижелер – Қазақстанның барлық арнайы мақсаттағы бөлімшелерінің жеңісі. Сендер халықаралық аренада еліміздің абыройын асқақтатып, Жоғарғы Бас қолбасшының тапсырмасын сәтті орындадыңдар. Дегенмен жеңіс ешқашан оңайлықпен келмейді. Бұл, ең алдымен, қажырлы еңбектің, үйлесімді іс-әрекеттің және адал қызметтің нәтижесі, – деп атап өтті Қорғаныс министрі.Арнайы мақсаттағы бөлімшелер олимпиадасының бірінші күнінен бастап Қазақстан Ішкі істер министрлігінің "Сұңқар" командасы жақсы нәтиже көрсетіп, жарыс финалында екінші орын алды. Сондай-ақ, үздік ондыққа Ұлттық ұлан, Ұлттық қауіпсіздік комитеті және Мемлекеттік күзет қызметі кірді.Жарысқа Қорғаныс министрлігі Арнайы операциялар күштерінің "Жаубасар" командасы алғаш рет қатысты. Осыған қарамастан, Қарулы күштердің арнайы күштері жақсы нәтиже көрсетіп, 100-ден астам команданың ішінде 22-ші орынға табан тіреді.Ішкі істер министрлігінің "Томирис" командасы да көпшілікті ерекше таң қалдырды. Полиция қыздары ерлермен иық тіресе жарысып, финалдық кестеде 77-орынға ие болды.Қазақстандық командалар Дубайдан Қазақстан Қарулы күштері әскери-көліктік авиациясының А-400М ауыр жүк тасымалдайтын ұшағымен келді. Подполковник Асылбек Жұмабаевтың басшылығымен экипаж басқарған ұшақтың бортында бір рейске 130-дан астам әскери қызметші жайлы орналасты. Біріккен Араб Әмірліктерінен Қазақстанның бас қаласына 3000 шақырымнан аса қашықтыққа ұшу бес сағатқа созылды. Бұл жеке құрамды тасымалдау шеңберінде әуе кемесінің шетелге алғашқы дербес ұшуы.Ақпарат көзі : https://www.gov.kz/memleket/entities/mod/press/news/details/933080

ҚР Қарулы күштерінің Ұлттық әскери-патриоттық орталығында «Жас сарбаз» балалар-жасөспірімдер әскери-патриоттық қозғалысы» РҚБ мен «Қазақстан Парамаунт Инжиниринг» ЖШС арасында меморандумға қол қою рәсімі өтті.Құжатқа қоғамдық бірлестіктің төрағасы майор Мейірбек Меңдіғалиев пен кәсіпорынның бас директоры Ербол Сәлімов қол қойды.Меморандум өскелең ұрпақты әскери-патриоттық тәрбиелеу саласындағы ынтымақтастықты дамытуға, жастардың бастамаларын қолдауға және бірлескен жобаларды іске асыруға бағытталған. – Ел Президенті биылғы жылды жұмысшы мамандықтар жылы деп жариялады. Біздің тәрбиеленушілер қазаіргі заманғы сауытты дөңгелекті машиналар шығаратын кәсіпорында болды. Экскурсия балалар үшін кәсіби бағдар тұрғысынан өте пайдалы болды деп ойлаймын. Меморандум аясында біз бұл жұмысты жалғастырамыз, – деді М.Меңдіғалиев.Меморандумға қол қою рәсімі «Жас сарбаз» балалар шығармашылық студиясы мен Орталық әскери оркестрдің концертімен аяқталды.Ақпарат көзі : https://www.gov.kz/memleket/entities/mod/press/news/details/933691

ҚР Қарулы күштерінің Ұлттық әскери-патриоттық орталығында Құралбек Құлажанов атындағы Қазақ технология және бизнес университетінде әскери кафедраның құрылған күніне арналған шара өтті. Оған Қорғаныс министрлігі Әскери білім және ғылым департаментінің өкілдері, Қ. Құлажанова атындағы ҚазТБУ, Nazarbaev Universitety, Maqsut Narikbaev Universitety, Turan-Astana және Esil Universitety басшылығы, Қарулы күштердің ардагерлері, әскери кафедраның оқытушылары мен студенттері қатысты. Бүгінде Қорғаныс министрлігінің басшылығы азаматтық жоғары оқу орындары жанындағы әскери кафедраларда резервті дайындауға ерекше назар аударады. Болашақ запастағы сержанттар мен офицерлер теориялық негіздермен қатар әскери-есептік мамандықты да меңгеру үшін қажетті практикалық дағдылар мен машықтарды үйренеді. Қазақ технология және бизнес университетінің президенті Ернұр Құлажанов жиналғандарға арнап сөз сөйледі. Ол әскери кафедралары бірнеше жоғары оқу орындарының студенттерін дайындап жатқанын айтты. Ол Қарулы күштердің оқу құрамасының ұжымына алдағы жоспарлардың сәтті жүзеге асырылуын тіледі. – Әскери кафедра – біздің университеттің мақтанышы. Олардың жас мамандарды даярлауға қосқан үлесі зор. Оқу барысында студенттер әскери іс бойынша тиянақты білім алып қана қоймай, шынайы патриоттар ретінде қалыптасады, – деді ол. Әскери кафедраның оқытушылары мен студенттерін осы атаулы күнмен Қарулы күштердің ардагері отставкадағы генерал-лейтенант Абай Тасболатов құттықтады. – Бүгінде бізде запастағы офицерлер мен сержанттарды даярлайтын қырықтан аса әскери кафедра жұмыс істейді. Студенттерді даярлаумен айналысатын барлық оқытушыларды білемін. Олардың бастамасымен студенттер негізгі білім алып, өз саласында мықты маман болатынына сенімдімін, – деп атап өтті ардагер.Іс-шара барысында Қазақ технология және бизнес университетінің президенті кәсіби дайындықтағы жетістіктері мен оқудағы жетістіктері үшін үздік оқытушылар мен студенттерді грамоталармен марапаттады. Әскери кафедра он бес әскери-есептік мамандық бойынша әскери дайындықты жүзеге асыратынын айта кеткен жөн.Ақпарат көзі : https://www.gov.kz/memleket/entities/mod/press/news/details/934054

Қорғаныс министрлігі қорғаныс ведомствосы басшысының «Қазақстан Республикасы Қарулы күштерінің әскери бөлімдерін, мекемелері мен әскери оқу орындарын орналастырудың заттай нормаларын бекіту туралы» бұйрығының жобасын дайындады.Нормативтік құқықтық акт ҚР Бюджет кодексіне сәйкес әзірленді. Бұйрық жобасы ҚР Қарулы күштерінің әскери бөлімдерін, мекемелері мен әскери оқу орындарын орналастырудың заттай нормаларын өзектендіреді.Бұйрық жобасының толық мәтінімен «Электрондық үкімет» порталында «Ашық НҚА» бөлімінде ағымдағы жылдың 24 ақпанына дейін мына сілтеме бойынша танысуға болады: https://legalacts.egov.kz/npa/view?id=15434173 Ақпарат көзі : https://www.gov.kz/memleket/entities/mod/press/news/details/934073

Спорттық жарыстар биылғы 7-14 ақпан аралығында Қытайдың Харбинінде өтеді. Оған Азия құрлығындағы 34 елден 1200-ден астам спортшы қатысады.Армия орталық спорт клубының өкілдері шаңғы жарысы мен биатлонда өнер көрсетеді. Шаңғы жарысы 8 ақпанда, ал биатлон 11 ақпанда басталады.Спортшыларды шығарып салған Қорғаныс министрлігі Спорт комитетінің төрағасы полковник Арман Әбеуов оларға жеңіс тіледі.Биатлоннан өтетін жарыстарда ҚР Қарулы күштерінің қызметкерлері Кирилл Бауэр, Әсет Дүйсенов, Вадим Куралес, Александр Мухин, Дарья Климина, Арина Крюкова, Полина Егорова және спорт ротасының сарбазы Владислав Киреев ел намысын қорғайды. Бұл пәнде төрт медаль жиынтығы ойналады.6 медаль жиынтығымен шаңғы жарысына ҚР Қарулы күштерінің қызметкерлері Надежда Степашкина, Ксения Шалыгина, Ернар Нұрсебеков, Олжас Климин қатысады.2017 жылы Жапонияның Саппоросында өткен сайысқа жеті армия спортшысы қатысып, бір алтын, жеті күміс және екі қола медаль жеңіп алғанын естеріңізге саламыз.Ақпарат көзі : https://www.gov.kz/memleket/entities/mod/press/news/details/934085

ҚР Қарулы күштерінің Әскери инфрақұрылым бас басқармасы «Қазақстан Республикасы Қорғаныс министрінің кейбір бұйрықтарына өзгерістер мен толықтырулар енгізу туралы» қорғаныс ведомствосы басшысы бұйрығының жобасын әзірледі.Жоба нормативтік құқықтық актілерді ҚР Үкіметінің 2018 жылғы 12 ақпандағы № 49 қаулысымен бекітілген Әскери қызметшілерді қызметтік тұрғын үймен қамтамасыз ету, тұрғын үй төлемдерінің мөлшерін есептеу, тағайындау, қайта есептеу, жүзеге асыру, тоқтату, тоқтата тұру және қайта бастау қағидаларының нормаларына және «Мемлекеттік көрсетілетін қызметтер туралы» ҚР Заңына сәйкес келтіру мақсатында әзірленді.Қағидалардың 12-тармағына сәйкес ҚР Қорғаныс министрлігінің аудандық пайдалану бөлімдерінің құзыретіне тұрғын үйге мұқтаж деп тану мәселесі берілді. Мемлекеттік басқаруды цифрлық трансформациялау қағидаларына сәйкес «Мемлекеттік көрсетілетін қызметтер туралы» ҚР Заңының 10-бабының 9) тармағы бойынша тікелей көрсетілетін қызметті беруші мемлекеттік қызмет көрсетудің баламасын болдырмайды.Бұдан басқа, «Мемлекеттік көрсетілетін қызметтер туралы» ҚР Заңы 27-2-бабының 9-тармағы бойынша көрсетілетін қызметті алушының құқықтарын, бостандықтары мен заңды мүдделерін іске асыруда кедергілер тудырған заңнаманы бұзушылықтарға жол берілген жағдайда оның қайта жүгінуін талап етпейді. Бұзылған құқықты қалпына келтіру жөніндегі міндет көрсетілетін қызметті берушіге жүктелген. Қорғаныс министрі бұйрығы жобасының толық мәтінімен «электрондық үкімет» порталында осы жылдың 20 ақпанына дейін «Ашық НҚА» бөлімінде мына https://legalacts.egov.kz/npa/view?id=15431647 сілтеме бойынша танысуға болады. Ақпарат көзі : https://www.gov.kz/memleket/entities/mod/press/news/details/934226

Бітімгерлік миссияның қолбасшысы Гана Республикасы армиясының генерал-майоры Анита Асма Қазақстанның әскери қызметшілеріне Біріккен Ұлттар Ұйымының миссиясына қатысқаны үшін медальдар табыс етті.Қазақстанның дербес бітімгерлік контингенті Сирия Араб Республикасындағы Голан жоталарындағы атысты тоқтату режимін қамтамасыз ету жөніндегі міндеттерді орындай отырып, Фауар базасында қызмет атқаруда. Барлық 139 әскери қызметші мен төрт штаб офицері БҰҰ-ның марапатын алды.Қазақстандық әскери қызметшілер ұйымның базаларындағы қорғанысты күзетуді және нығайтуды қамтамасыз етіп, жергілікті тұрғындармен өзара қарым-қатынас жасайды. 11 айдың ішінде бітімгерлер 200-ге жуық жарылмаған снарядты залалсыздандырды және медициналық көмекке мұқтаж БҰҰ-ның қызметкерін эвакуациялады. Өткен жылдың желтоқсан айында өміріне және денсаулығына қауіпті аймақтан БҰҰ персоналын эвакуациялау кезінде контингенттің жеке құрамы кәсіби даярлық, келісім және жедел іс-қимыл жасап, жоғары деңгейін көрсетті.– БҰҰ Бас хатшысының бітімгерлік операциялар жөніндегі орынбасары Жан-Пьер Лакруа және БҰҰ-ның бөлінген аймақты бақылау миссиясының (UNDOF) қолбасшысы Гана Республикасы армиясының генерал-майоры Анита Асма әскери қызметшілеріміздің жауынгерлік дағдысы, тәртібі және моральдық-ерік күші жоғары екенін атап өтті. Бұл біздің бейбітшілік пен халықаралық қауіпсіздікті сақтауға қосқан үлесіміз, – деді бітімгерлік ротасының командирі подполковник Жігер Аипов.Естеріңізге сала кетсек, 2024 жылдың наурыз айында Қазақстан Голан жоталарында тұңғыш дербес бітімгерлік контингентін ашып, тарихи қадам жасады. Қазақстан әскери қызметшілерінің бітімгерлік миссияларға қатысу географиясының кеңеюі еліміздің әскери және гуманитарлық дағдарыстардан зардап шегетін адамдарға қолдау көрсетуге деген ниетін айғақтайды.Ақпарат көзі : https://www.gov.kz/memleket/entities/mod/press/news/details/934235

Алматы облысының әкімі көктемгі су тасқыны мен көшкін қаупі жоғары аймақтарға жұмыс сапарымен барып, жағдайды көзбен көріп, бақылау жүргізді. Инспекция барысында ол бірқатар маңызды нысандарды аралап, жауапты тұлғалардың есептерін тыңдады.Ең алдымен, Іле ауданындағы Жармұханбет өзені бойындағы су басу қаупі бар аумаққа барды. Мұнда Іле, Қарасай және Жамбыл аудандарының әкімдеріне су тасқынының алдын алу шараларын күшейтіп, инженерлік құрылыстардың дайындығын қамтамасыз ету тапсырылды.Одан кейін Талғар, Есік және Түрген өзендері бассейндеріндегі мореналық көлдерге әуе шолу жасалды. Әсіресе, қауіпсіздік шараларын күшейту мен жаңа бөгеттер салу қажеттілігі бар аймақтарға ерекше назар аударылды.«Халықтың қауіпсіздігі – басты міндет. Табиғи қауіп-қатерлерге жедел әрекет етіп, ықтимал тәуекелдерді барынша азайтуымыз қажет», – деп атап өтті облыс әкімі.Өңірдің төтенше жағдайлар департаменті су тасқыны мен көшкіннің алдын алу және салдарын жою бойынша кешенді шараларды жүзеге асыруда. Қорғаныс құрылыстары күшейтіліп, мореналық көлдер бақылауға алынған. Барлық шұғыл қызметтер жоғары дайындық режиміне көшірілді. Жыл басынан бері 23,5 км өзен арналары түзетіліп, бекітілді, 16 тонна қалдық шығарылды, 5 қорғаныс бөгеті (7,9 км) салынды. Тасқындарға жедел әрекет ету үшін 1326 маман, 471 техника, 126 мотопомпа және 29 қайық жұмылдырылды. Қажетті материалдық қорлар дайындалған. Су басу қаупі жоғары 20 учаскенің 7-еуі толық қауіпсіздендіріліп, қалған 13-інде алдын алу жұмыстары жүргізілуде.Ақпарат көзі : https://www.gov.kz/memleket/entities/almobl/press/news/details/933656