Облыс әкімі аппаратында 2026 жылғы 6 мамырда «Жаңа Конституция — Қазақстан Республикасының конституциялық құрылысын дамытудың жаңа кезеңі» тақырыбында құқықтық оқу сабағы өтті.Спикер ретінде А. Байтұрсынов атындағы ҚӨУ-нің қауымдастырылған профессоры, заң ғылымдарының кандидаты С.Қ. Укин сөз сөйледі.Сабақ барысында Негізгі заңның негізгі өзгерістері, құқық үстемдігі, азаматтардың құқықтары мен бостандықтарын қорғау мәселелері, сондай-ақ мемлекеттік қызметшілердің конституциялық нормаларды іске асырудағы рөлі қаралды.Қатысушылар алған ақпараттың қызметтік жұмыстағы тәжірибелік маңыздылығын атап өтті.Мұндай іс-шараларды жүйелі түрде өткізу мемлекеттік қызметшілердің құқықтық мәдениеті мен кәсіби құзыреттілігін арттыруға бағытталған.Ақпарат көзі : https://www.gov.kz/memleket/entities/kostanay/press/news/details/1215791?lang=kk

Алматы облысында «Сөз құндылығы – цифрлық дәуірде» жобасының қорытынды шарасы өтіп, қазақ тілін дамытуға үлес қосып жүрген өзге ұлт өкілдері, кәсіпкерлер, мемлекеттік қызметкерлер, мұғалімдер мен жастар марапатталды. Бастама еліміздегі тіл саясатын дамытудың 2023-2029 жылдарға арналған тұжырымдамасына сәйкес қолға алынған. Жоба Талғар ауданынан басталып, Қарасай, Еңбекшіқазақ, Жамбыл аудандарында жалғасты. Бүгін Іле ауданында қорытындыланып, өз мәресіне жетті, – деп хабарлайды Алматы облысы әкімінің баспасөз қызметі.Іс-шара аясында тіл мен технологияны ұштастырған жобалардың көрмесі ұйымдастырылды. Облыс жастарының тіл меңгеруге қатысты танымдық курстары, мұғалімдердің жасанды интеллект арқылы іске асырылып жатқан ерекше бастамалары таныстырылды.Салтанатты жиынға облыс әкімі Марат Сұлтанғазиев те қатысып, жобаның мән-мазмұнына тоқталды. Мемлекеттік тілдің мәртебесін арттырып, ұлттық құндылықтарды ұлықтаудағы ерен еңбегі үшін бірқатар азаматқа марапат табыстады.«Бұл жоба Мемлекет басшысының «Жасанды интеллект дәуіріндегі Қазақстан: өзекті мәселелер және оны түбегейлі цифрлық өзгерістер арқылы шешу» атты Жолдауында белгіленген стратегиялық бағыттарға сай іске асуда.«Тіл мәртебесі – ел мәртебесі» дейді халық даналығы. Ал цифрлық кеңістікте тіліміздің табиғи тазалығын сақтай отырып, оны заманауи талаптарға бейімдеу – уақыт талабы. Бұл ретте қазақ тілінің ғылыми, техникалық, цифрлық терминологиясын жүйелеу, контент сапасын арттыру және мемлекеттік тілдің цифрлық ресурстардағы үлесін көбейту маңызды бағыттардың бірі болып қала береді.Цифрлық технологиялардың қарқынды дамуы тіл мәдениетіне жаңа талаптар қойып отыр. Әлеуметтік желілер, онлайн платформалар, жасанды интеллект жүйелері тілдің қолданыс аясын кеңейтіп, сонымен қатар оның сапасына, нақтылығына және сауаттылығына деген жауапкершілікті күшейтуде. Осындай жағдайда сөздің құндылығын сақтау – тек тіл мамандарының ғана емес, бүкіл қоғамның ортақ міндеті деп білемін», – деген аймақ басшысы мемлекеттік тілдің қолданыс аясын кеңейту үшін атқарылып жатқан жұмыстар жайлы баяндады. Мәселен, Алматы облысының Тілдерді дамыту жөніндегі басқармасы «Көп тіл – бір әлем» байқауын өткізіп, нәтижесінде өңірде 110 азаматтың 5 тіл білетіні анықталған. Марат Елеусізұлы бірнеше тілді меңгеру – жеке тұлғаның бәсекеге қабілеттілігін арттыратын негізгі факторлардың бірі екенін айтып, алайда бұл үдеріс ана тілінің мәртебесін әлсіретуге емес, керісінше оны нығайтуға бағытталуы тиіс екенін жеткізді. Сонымен қатар «Алатау дарыны» бағдарламасы аясында Қытай елінде білім алып жатқан үздік түлектер жайын сөз етті. 2024 жылы Қытай Халық Республикасымен облыс арасында жасалған меморандум негізінде Синьцзянь университетінде 30, 2025 жылы 27 түлек тегін оқуға жолдама алған. Ал биыл 65 дарынды талапкерге грант беріледі. Қазіргі таңда өңірдің 513 студенті шетелде білім алуда.Аймақ басшысының айтуынша, облыстық «Тіл» оқу-әдістемелік орталығы тегін тіл үйрену курстарын тұрақты түрде жүргізіп келеді. Мәселен, өткен жылы 2653 адам аталған курстарда мемлекеттік тілді меңгерген, оның 723-і – этнос өкілі. 674 адам ағылшын тілін, 120 адам орыс тілін үйрену курсына қатысқан. Сонымен қатар қандастардың тілдерді тез үйренуі үшін өткен жылы 3 айлық курс ұйымдастырылып, 302 қатысушыға сертификат тапсырылған.Шара барысында Алматы облыстық цифрлық технологиялар басқармасы дайындаған платформалар халық назарына ұсынылды. Мәселен, «iProtocol» –хаттамалық тапсырмалар мен кеңестердің орындалуын бақылауға арналған жоба. «QazaqLaw» және Ұлттық ЖИ платформасы ресми құжаттар мен хаттарды сауатты дайындауға көмектеседі. Ал «MangiSoz» жүйесінде аудио мен мәтінді жеңіл әрі тиімді өңдеуге мүмкіндік бар. Бұл бастамалар – қазақ тілінің қолданыс аясы кеңейіп келе жатқанының дәлелі.Мазмұнды шара концерттік бағдарламаға ұласып, тіл меңгерудің маңызы, ана тілін ұлықтаудың мәні, ұлттар достығы мен бірлігін дәріптеген қойылымдар сахналанды.Тіл тек қарым-қатынас құралы емес. Тіл – ұлттың жаны, болмысы. Кез келген халықты тілі арқылы ғана толық тануға болады. Технология қарыштап дамыған заманда оны меңгерудің заманауи тәсілдерінен де хабардар болған жөн. Ең бастысы, тілді жасанды интеллект пен инновацияларға икемдеп, жаңа платформаларды ана тілімізде еркін қолдана алуымыз маңызды. Алматы облысында бұл бағыттағы жұмыстар басты назарға алынған. «Сөз құндылығы – цифрлық дәуірде» жобасы – соның айқын дәлелі. Алдағы уақытта да тіл саясатын жетілдіру маңызды міндеттердің бірі болып қала береді.Ақпарат көзі : https://www.gov.kz/memleket/entities/almobl/press/news/details/1215812?lang=kk

Отан қорғаушы күні қарсаңында елімізде алғаш рет жоғары және жоғары оқу орнынан кейінгі білім беру ұйымдарының әскери кафедра курсанттары Әскери ант берді.Салтанатты іс-шараларға Қорғаныс министрлігінің өкілдері, жоғары оқу орындарының басшылары, кафедра оқытушылары, Қарулы күштердің ардагерлері, қадірлі қонақтар мен ата-аналар қатысты.– Биыл 2-6 мамыр аралығында еліміздің 80-нен астам жоғары оқу орнында шамамен 13 мың студент әскери ант берді. Бұл – елге қызмет ету жолындағы жауапты қадамды білдіретін шын мәніндегі ауқымды әрі маңызды оқиға. Біз үшін білім беру ғана емес, төзімді, рухты, жауапкершілігі жоғары, Отанды қорғауға шынайы дайын жас буынды тәрбиелеу де маңызды, – деп атап өтті Қорғаныс министрлігі Әскери білім және ғылым департаментінің бастығы полковник Мұрат Олжабаев.Л.Н. Гумилев атындағы Еуразия ұлттық университетінде 400-ден астам студент өз халқына, заңды сайланған Президентке адал болуға және егемен Қазақстанның Конституциясын қастерлеуге ант берді.– Отбасымыз үшін бұл күн ерекше маңызды. Үлкен ұлым әскери қызмет жолын таңдаған, ал бүгін інісі де осы бағытта маңызды қадам жасап отыр. Бұдан сабақтастық пен әскери мамандыққа деген құрметті көремін. Ұлдарымды мақтан тұтамын, – деді Л.Н. Гумилев атындағы ЕҰУ әскери кафедрасы түлегінің анасы Нұрсұлу Серікбаева.Іс-шараға қатысушылар мен қонақтарға ЕҰУ-де отандық әскери техникалар көрмесі ұйымдастырылды. Онда «Besqaru» зауыты шығарған TAIMAS және AIBAR сауытты көліктері таныстырылды.Бұдан бөлек ALAN жауынгерлік машиналарын қолдана отырып, барлау тобының тактикалық іс-қимылдары, ҰҚК Шекара қызметі Құрмет қарауылы ротасының және Арнайы операциялар күштері әскери қызметшілерінің орындауында қоян-қолтық ұрыс элементтерінің қойылымдары көрсетілді.Енді «сержант» және «лейтенант» запастағы әскери атақтарын алған әскери кафедра түлектеріне күштік құрылымдарда әрі қарай қызмет ету және кәсіби дамуға кең мүмкіндіктер ашылады.– Әскери кафедрада «әскери журналистика» мамандығы бойынша білім алдым. Осы бағытты таңдау себебім, әскери қызмет туралы ақпарат тарату, форма киген жандар мен олардың адалдығы жайында айту маңызды деп санаймын, – деді Л.Н. Гумилев атындағы ЕҰУ әскери кафедрасының түлегі Айдар Ахмет.Мұнда алған білім мен машық түлектердің ел қауіпсіздігін қамтамасыз етуге және қорғаныс қабілетін нығайтуға үлес қосатын білікті маман ретінде қалыптасуына негіз болары анық.Ақпарат көзі : https://www.gov.kz/memleket/entities/mod/press/news/details/1215265?lang=kk

Бүгін Алматы облысында бір мезетте өңірдегі 439 мектепте 360 мыңнан астам оқушы «Болашақты бірге отырғызайық» акциясына қатысып, ағаш дәнегін екті. Шара «Таза Қазақстан» экологиялық бағдарламасы аясында 2024 жылы бастау алған. Алғашқы жылы 340 мың, өткен жылы 350 мың тұқым себілген. Оның 60%-дан астамы өніп шығып, бүгін мектеп аулаларына отырғызылды, – деп хабарлайды Алматы облысы әкімінің баспасөз қызметі.Игі шараға облыс әкімі Марат Сұлтанғазиев те қатысып, Іле ауданындағы №24 лицей оқушыларымен бірге Шренк шыршасы, қайың, арша, жиде, туя (бозаша), қарағаш, Сиверс алмасының дәнектерін екті. Ал өңірдің өзге аудандарындағы оқушылар акцияға онлайн форматта қосылды. Сондай-ақ білім ордасының аумағына жеткіншектер өздері өсіріп, баптаған көшеттерін аймақ басшысымен бірге отырғызды. Марат Елеусізұлы бұл тек көгалдандыру жұмысы емес, жас ұрпақ бойына жанашырлық пен жауапкершілік сезімін дарытатын маңызды жоба екенін айтып, оқушыларға ізгі тілегін арнады.«Бұл бастама Мемлекет басшысының «Таза Қазақстан» бағдарламасымен тығыз байланысты және өңірімізде жыл сайын дәстүрлі түрде жүзеге асып келеді. Ағаш дәнегін егу, көшетін отырғызу – қоршаған ортаға қамқорлықтың айқын үлгісі. Бұл жұмыстар еңбекқорлық пен ұқыптылыққа тәрбиелейді. Осындай игі істерге белсенді қатысып, үлгі көрсетіп жүргендеріңіз үшін алғыс білдіремін. Алдағы уақытта да табиғатты аялау өмірлік дағдыларыңызға айналады деп сенемін», – деді аймақ басшысы.Шара барысында оқушылар экологиялық бағыттағы ғылыми жобаларын таныстырды. Жас зерттеушілердің бірі күн батареясымен қуатталатын көлік жобасын көрсетті. Енді бірі қалдықты тыңайтқышқа айналдырудың тың әдісін зерттеуге кіріскен. Сонымен қатар су үнемдеу, экологиялық әрі қауіпсіз саябақтар мен бекеттер құру бойынша жұмыстарын таныстырған оқушылар да болды.Осылайша, оқушылар бірнеше жыл бойы өздері өсірген көшеттерін мектеп айналасына отырғызып, білім ордасының көркін аша түсті. Сондай-ақ тың жобалары арқылы экологиялық мәселелерге бей-жай қарамайтынын көрсетті. Бұл – өңірдегі мектептер тек білім беріп қана қоймай, оқушылардың бойына экологиялық мәдениет ұғымын терең сіңіріп жатқанының көрінісі. Сондықтан «Болашақты бірге отырғызайық» акциясы алдағы уақытта да дәстүрлі түрде жалғасын табады.Ақпарат көзі : https://www.gov.kz/memleket/entities/almobl/press/news/details/1215335?lang=kk

Қазақстан Республикасы Сыртқы істер министрінің орынбасары Әлібек Қуантыров 2026 жылғы инвесторлардың жылдық кездесуіне қатысты.Іс-шараға Орталық Азиядағы инвестициялық ахуалдың болашағын талқылау үшін жетекші институционалдық инвесторлар, активтерді басқарушылар және мемлекеттік қызметкерлер қатысты.Пленарлық отырыстағы сөзінде Ә.Қуантыров еліміздің инвестициялық әлеуетін таныстырды және халықаралық бизнес қауымдастығымен екіжақты ынтымақтастықтың басымдықтарын белгіледі.Былтырдың өзінде шетелдік тікелей инвестициялардың жалпы ағыны 20,5 миллиард долларға жетті. ЮНКТАД бағалауы бойынша, Қазақстан Орталық Азиядағы тікелей шетелдік инвестициялардың ең ірі бағыты.Ә.Қуантыров елдің негізгі артықшылықтарын, соның ішінде Қазақстанда 13 халықаралық көлік дәлізінің орналасуын және озық цифрлық логистикалық шешімдерді енгізу туралы баяндады. Ол елдің кең табиғи ресурстық базасын, сондай-ақ ауылшаруашылық әлеуетін атап өтті.«Үкімет инвестициялық жобаларға, соның ішінде қаржылық және қаржылық емес шараларға кешенді қолдау көрсетеді. Сонымен қатар, жаңа құрал – үкіметпен тікелей жасалуы мүмкін инвестициялық келісім пайда болды», – деп атап өтті Министрдің орынбасары.Форум аясында Әлібек Қуантыров жетекші халықаралық инвестициялық ұйымдардың өкілдерімен бірқатар екіжақты кездесулер өткізді.BlackRock өкілдерімен компанияның Қазақстанның цифрлық және дәстүрлі активтер нарықтарына шығу перспективалары талқыланды.B Capital компаниясының бас серіктесі Тимур Ақажановпен кездесу барысында аймақтағы венчурлық және жеке капиталды дамыту мәселелері талқыланды.Investindustrial компаниясының серіктесі және Таяу Шығыс және Азия бөлімінің басшысы Эмануэла Чисинимен экспортқа бағдарланған өндірісті құру және Қазақстанның жаһандық құндылықтар тізбегіне интеграциялану мүмкіндіктері талқыланды.Investors Annual Meeting 2026 іс-шарасын өткізу Қазақстанның әлемдік капитал нарықтарына интеграциялану және елдің инвестициялық имиджін нығайту жөніндегі дәйекті саясатын көрсетеді.   Ақпарат көзі : https://www.gov.kz/memleket/entities/mfa/press/news/details/1215358?lang=kk

Алматы облысында Жеңіс күні қарсаңында соғыс ардагерлеріне 5 миллион теңгеден біржолғы әлеуметтік төлем берілді. Яғни, әр ардагерге 10 мың АҚШ долларынан тиесілі – деп хабарлайды Алматы облысының әкімінің баспасөз қызметі.Өңірде сұм соғысты көзбен көрген 4 майдангер бар. Олардың ең үлкені – 103 жастағы Тәңірберген Толғанбаев. Іле ауданының тұрғыны 1942 жылы соғысқа аттанып, Сталинград шайқасына қатысқан. Ал, Ұйғыр ауданының 102 жастағы тұрғыны Алим Кебиров Белорусь шайқасында Белгород қаласын азат етуге қатысып, жараланған. Соған қарамастан 1943 жылы майдан даласына қайта оралып, Украина жерінде соғысқан. Еңбекшіқазақ ауданында тұратын Солтанбай Жарықбасов қазір 101 жаста. Алматы облысындағы тағы бір ардагер –  Федор Ковалевтың жасы 98-де. Жамбыл ауданында тұратын батыр тұлға 1945 жылы Жапон соғысына да қатысқан.Отан үшін отқа түскен ардагерлерге Алматы облысы әкімдігі тарапынан жүйелі түрде қолдау көрсетіліп келеді. Олардың тұрмыстық және әлеуметтік жағдайын, сондай-ақ денсаулығын  жақсартуға бағытталған шаралар да мемлекет назарында. Батырлар жылда шипажайда ем алады және үнемі дәрігерлердің бақылауында.Бұдан бөлек, облыстағы 2 038 тыл еңбеккерінің әрқайсысына әкімдік тарапынан 64 875 теңге мөлшерінде біржолғы әлеуметтік көмек көрсетіледі. Сондай-ақ, Ленинград қаласының қоршауы кезінде еңбек еткен және тиісті марапаттарға ие болған өңірдегі 2 азаматқа 86 500 теңгеден біржолғы төлем қарастырылған.Зұлмат жылдары фашистік концлагерьлерде, геттоларда және өзге де мәжбүрлі ұстау орындарында болған азаматтарға да 64 875 теңге көлемінде біржолғы әлеуметтік көмек беріледі.Ақпарат көзі : https://www.gov.kz/memleket/entities/almobl/press/news/details/1215144?lang=kk

Сапар барысында Қазақстан Республикасы Қорғаныс министрінің бірінші орынбасары – Қазақстан Республикасы Қарулы Күштері Бас штабының бастығы генерал-лейтенант Қаныш Әбубәкіров Түркия Республикасы Ұлттық қорғаныс министрлігінің Ұлттық қорғаныс университетінде оқып жатқан қазақстандық курсанттар және тыңдаушылармен кездесті.Сондай-ақ Қазақстан Қорғаныс министрлігінің делегациясы Түркия Республикасында өтіп жатқан «SAHA EXPO-2026» қорғаныс және аэроғарыш өнеркәсібінің халықаралық көрмесіне барды.Көрме аясында генерал-лейтенант Қаныш Әбубәкіров Түркия Республикасы Қарулы Күштері Бас штабының бастығы армия генералы Сельчук Байрактароглу және басқа да лауазымды тұлғалармен бірқатар кездесулер өткізді. Кездесулер барысында екіжақты әскери ынтымақтастық мәселелері талқыланды.Ақпарат көзі : https://www.gov.kz/memleket/entities/mod/press/news/details/1215159?lang=kk

ҚР Ұлттық экономика министрлігі такси тасымалдаушылардың хабарлама беру ережесіне өзгеріс енгізді. Енді тасымалдаушы такси қызметін бастамас бұрын жергілікті атқарушы органға хабарлама жіберуге міндетті. Сонымен қатар, жаңартылған нысанда көлік құралы ауыстырылғанда және жаңадан көлік қосылғанда, яғни автопаркті жаңарту кезінде өзгеріс енгізу мүмкіндігі қарастырылған.Бұрынғы тәртіп бойынша, тасымалдаушы белгілі бір көлік құралына байланбайтын. Бұл жол-көлік оқиғасы кезінде жолаушыларға немесе үшінші тұлғаға зиян келтірілген жағдайда жауапты адамды анықтауды қиындататын.Осыған байланысты хабарлама нысаны көлік құралының маркасын, мемлекеттік тіркеу нөмірін және шығарылған жылын көрсететін мәліметпен толықтырылды.Бұл шара жолаушыларды тасымалдау қауіпсіздігіне жауапты такси тасымалдаушысын жедел сәйкестендіруге, сондай-ақ нарыққа заңсыз қатысушылардың үлесін қысқартуға мүмкіндік береді.Анықтама:Өзгерістер «Мемлекеттік органдардың хабарламалар нысандарын және хабарламаларды қабылдау қағидаларын бекіту туралы, сондай-ақ хабарламаларды қабылдауды жүзеге асыратын мемлекеттік органдарды айқындау туралы» Қазақстан Республикасы Ұлттық экономика министрінің 2015 жылғы 6 қаңтардағы № 4 бұйрығына өзгерістер енгізу туралы» бұйрыққа енгізілді. Ақпарат көзі : https://www.gov.kz/memleket/entities/economy/press/news/details/1214973?lang=kk

Астана, 2026 жылғы 5 мамыр – Поляк тарапының бастамасымен Қазақстан Республикасының Сыртқы істер министрі Ермек Көшербаев пен Польша Республикасы Премьер-министрінің орынбасары – Сыртқы істер министрі Радослав Сикорский арасында телефон арқылы сөйлесу өтті.Сұхбат барысында сыртқы саяси ведомстволардың басшылары өзара құрметке, сенімге және сындарлы диалогқа негізделген қазақ-поляк қатынастарының қазіргі жағдайы мен даму перспективаларын талқылады.Тараптар тұрақты саяси байланыстарды одан әрі қолдауға, ведомствоаралық өзара іс-қимылды жандандыруға, сондай-ақ көлік және ауыл шаруашылығы сияқты перспективалы салалардағы ынтымақтастықты кеңейтуге өзара мүдделілігін растады.Сұхбат қорытындысы бойынша дипломаттар Астана мен Варшава арасындағы екіжақты және көпжақты әріптестікті нығайту бағытында бірлескен күш-жігерді жалғастыруға уағдаласты.       Ақпарат көзі : https://www.gov.kz/memleket/entities/mfa/press/news/details/1214942?lang=kk

ҚР Премьер-министрінің орынбасары – ұлттық экономика министрі Серік Жұманғариннің төрағалығымен Міндетті талаптар тізілімін енгізу мәселесі бойынша кеңес өткізілді. Кеңеске мемлекеттік органдардың, «Атамекен» ҰКП және бизнес-қоғамдастықтың өкілдері қатысты.Тізілімді енгізу Мемлекет басшысы Қасым-Жомарт Тоқаевтың Қазақстан халқына Жолдауындағы шағын және орта бизнесті жүйелі түрде дамыту мен кәсіпкерлердің әкімшілік жүктемесін азайту қажеттігі туралы тапсырмасын орындау үшін жүзеге асырылып отыр.Кеңестегі басты оқиға – Әділет министрлігінің Ұлттық экономика министрлігімен бірлесіп әзірлеген ЖИ жүйесінің тұсаукесері. Цифрлық шешім арқылы бизнеске қойылатын талап үш көзден: заңнамадан, тексеру парағынан және рұқсат беру құжатынан автоматты түрде алынады. Жүйе нақты уақыт режимінде қайталануды, қарама-қайшылық пен жөнсіз реттеуді анықтауға мүмкіндік беретін бірыңғай деректер тобынан тұрады.Әзірлеушілердің айтуынша, экология, көлік пен жерді пайдалану саласындағы пилоттық тестілеу шеңберінде алгоритмнің дәлдігі 93-95%-ға жетті. Бүгінгі таңда жүйеге заңнан 67 мыңдай, тексеру парағынан 64 мың талап жүктелген.Жұмыс 12 басым бағыт бойынша жүргізілуде. Реттеудің ең үлкен көлемі, шамамен 14 мың талап, денсаулық сақтау саласында тіркелді.Жүйені енгізу арқылы жасырын нормалар мен түсініксіз түсіндірулер жойылып, кәсіпкерлер қызметті іске қосу мен жүзеге асыру талаптарының нақты тізбесімен бизнесті жүргізудің «дайын сценарийін» ала алады.Сонымен қатар, Мемлекет басшысының Міндетті талаптар тізілімін енгізу жөніндегі тапсырмасын орындау үшін құрылған Бизнеске қойылатын талаптарды тексеру жөніндегі жобалық кеңсенің жұмысы жалғасуда. Жобалық кеңсенің жұмысы шеңберінде Ұлттық экономика министрлігі мемлекеттік органдармен және «Атамекен» ҰКП-мен бірлесіп, бизнестің және сарапшылардың қатысуымен нормаларды әдіснамалық сүйемелдеуді және практикалық пысықтауды қамтамасыз етті. Тексеру тәсілі барынша нәтижелі: қаралған 180 талаптың 50-і мемлекеттік органдардың қолдауына ие болды. Бұл қайталанатын және маңызы жоқ нормаларды алып тастауға мүмкіндік береді.Қазақстан кәсіпкерлер форумы төрағасының орынбасары Гүлнар Қуанғанова Жобалық кеңсенің жұмысы нормалардың қайталануын жоюға және нақтылауға бағытталғанын атап өтті.«Екі ай бойы қауырт жұмыс жүргізілді. Өнеркәсіптік қауіпсіздікке ерекше назар аударылып, түрлі ведомствоның түрлі талаптарын бірыңғай құжатқа шоғырландыру ұсынылды», — деді ол.Бұл ретте азаматтардың өмірі мен денсаулығының қауіпсіздігіне қатысты нормалар қайта қарауға жатпайтыны белгілі.Кеңес қорытындысында Серік Жұманғарин мемлекеттік органдарға екі апта ішінде «Атамекен» ҰКП базасында ЖИ жүйесін верификациялау мен «оқытуға» салалық сарапшыларды қатыстыруды тапсырды.«Бізде деректер базасы заңға тәуелді актілерге дейін цифрландырылған. Жүйе алгоритм бойынша талаптарды тауып алады. Болашақта процесс автоматты түрде жүруі үшін машинаны үйрету керек. Бұл басым міндет. Оқу кезеңі аяқталысымен, жүйе барлық деректер тобын өз бақылауына алады», — деп атап өтті вице-премьер.Ақпарат көзі : https://www.gov.kz/memleket/entities/economy/press/news/details/1214946?lang=kk

Астана, 2026 жылғы 5 мамыр - Қазақстан Республикасы Сыртқы істер министрінің бірінші орынбасары Ержан Ашықбаев БҰҰ-ның даму құқығы мәселелері жөніндегі Арнайы баяндамашысы Сурия Деваны қабылдады. Сапар Қазақстан тарапының шақыруы бойынша адам құқықтарының ажырамас бөлігі болып табылатын даму құқығын іске асыру саласындағы ұлттық тәжірибені зерделеу мақсатында өтуде.Кездесу барысында қазақстандық дипломат Қазақстан Республикасының Президенті Қасым-Жомарт Тоқаевтың бастамасымен елде жүзеге асырылып жатқан саяси реформалар туралы, оның ішінде 2026 жылғы 15 наурызда жаңа Конституцияның қабылдануы жөнінде ақпарат берді.Мемлекеттік басқару жүйесін жаңғыртуға, Конституциялық Соттың рөлін күшейтуге, адам құқықтарын қорғау институттарын дамытуға, азаматтардың шешім қабылдау үдерісіне қатысу тетіктерін кеңейтуге, сондай-ақ әлеуметтік саясатты одан әрі жетілдіруге және халықтың осал топтарын қолдау кепілдіктерін нығайтуға ерекше назар аударылды.С. Дева Қазақстанда жүргізіліп жатқан реформаларға, оның ішінде адам құқықтарын қорғаудың ұлттық жүйесін нығайту тұрғысындағы шараларға оң баға берді. Осы тұрғыда Қазақстанның Тұрақты даму мақсаттарын ілгерілетудегі рөлі, сондай-ақ оның өңірлік және жаһандық деңгейлердегі халықаралық бастамалары талқыланды.Тараптар адам құқықтары саласындағы ашық және сындарлы диалогты жалғастыруға, сондай-ақ тұрақты және инклюзивті өсудің маңызды құрамдас бөлігі ретінде даму құқығын одан әрі ілгерілетуге бейілділігін растады.БҰҰ Адам құқықтары жөніндегі кеңесінің Арнайы баяндамашылары – жекелеген мемлекеттер немесе тақырыптар бойынша адам құқықтары саласындағы тәуелсіз сарапшылар. Олар өз өкілеттіктерін жеке қасиетінде жүзеге асырады, елдерге сапарлар жасайды, мемлекеттік органдармен және азаматтық қоғаммен өзара іс-қимыл жасайды, сондай-ақ өз баяндамаларын БҰҰ-ның тиісті органдарына ұсынады.Ақпарат көзі : https://www.gov.kz/memleket/entities/mfa/press/news/details/1214935?lang=kk

Еліміздің ең маңызды екі патриоттық мерекеге орай Қорғаныс министрлігі ауқымды бағдарлама әзірледі. Оның аясында әскери шерулер, салтанатты рәсімдер, әскери техникалар көрмелері және ардагерлермен кездесулер еліміздің барлық өңірінде өтпек.Ер есімі – ел есіндеҚорғаныс министрлігі 1938–1945 жылдары Қызыл әскер қатарына шақырылған қазақстандықтардың тағдыры туралы мәліметтерді қамтитын «Батырларға тағзым» ұлттық порталын дамыту жұмысын жалғастыруда. Құжаттарды цифрландыруға 20 мыңнан астам студент, курсант және кадет тартылды.Мереке күндері Ұлы Отан соғысының ардагерлеріне Қорғаныс министрінің атынан алғыс хаттар табысталады. Сонымен қатар ведомство өкілдері мен әскери оркестр әрбір ардагердің үйіне арнайы барып, құрмет көрсетеді.Астанадағы Ұлттық әскери-патриоттық орталығында (Республика даңғылы, 2) «Ерлікке тағзым» көрмесі жұмыс істеп тұр. 6 мамыр күні мұнда үздік әскери қызметшілерді марапаттау рәсімі және мерекелік концерт өтеді.Отан қорғаушы күні «Бәйтерек» монументі алдында (12:00–12:30) өтетін плац-концертпен басталады. Орталық әскери оркестр мен Құрмет қарауылы ротасы мерекенің сәнін келтіреді.Түстен кейін (15:00–16:00) әскери оркестр қала көшелерімен шеру жасап өтеді: Кенесары хан ескерткішінен бастап, Есіл өзенінің жағалауы арқылы «Атырау» көпірінен өтіп, Орталық саябақтағы концертпен аяқталады.Сонымен қатар «Отан қорғаушылар» монументі, «Жастар» сарайы, қала әкімдігі және Бауыржан Момышұлы ескерткіші маңында концерттер ұйымдастырылады.9 мамыр күні «Отан қорғаушылар» монументі жанында қару-жарақ пен әскери техниканың көрмесі өтеді. Таңғы сағат 9:00-де ардагерлерге көрсетілген ерекше құрмет белгісі ретінде оларға сарбаз ботқасы ұсынылады.Қорғаныс министрлігінің басшылығы «Жерұйық» саябағындағы генерал И.В. Панфилов ескерткішіне гүл шоқтарын қою рәсіміне қатысады.7–9 мамыр аралығында өңірлерде әскери шерулер, ашық есік күндері, ерлік сабақтары және әскери оркестрлердің дефилелері өтеді. Ерекше форматта мерзімді әскери қызмет өткерген азаматтармен кездесулер ұйымдастырылып, олардың өмірлік оқиғалары, архивтік фотосуреттері көрсетіліп, Отанға қызмет етудің мәні туралы ашық әңгіме өрбиді.Ақпарат көзі : https://www.gov.kz/memleket/entities/mod/press/news/details/1214913?lang=kk

Астана, 2026 жылғы 5 мамыр – Қазақстан Республикасының Сыртқы істер министрі Ермек Көшербаев Қазақстан Республикасындағы Украина Төтенше және Өкілетті Елшісі Виктор Майкомен кездесу өткізді.Кездесу барысында тараптар қазақ-украин ынтымақтастығының қазіргі жай-күйі мен даму перспективаларын, сондай-ақ екіжақты және өңірлік күн тәртібіндегі өзекті мәселелер бойынша пікір алмасты.Әңгімелесушілер өзара қызығушылық тудыратын басым бағыттар бойынша өзара іс-қимылды одан әрі дамытуға мүдделілігін растады.Ақпарат көзі : https://www.gov.kz/memleket/entities/mfa/press/news/details/1214875?lang=kk

Қостанай облысының әкімі Құмар Ақсақаловтың төрағалығымен тұрғын үй құрылысын дамыту және облыс елді мекендерінің сәулеттік келбеті тақырыбында аймақ әкімдігінің отырысы өтті.Тұрғын үй саясаты – халықтың өмір сапасын арттыруға бағытталған мемлекеттің негізгі стратегиялық бағыттарының бірі. Президент атап өткендей, пайдалануға берілетін баспананың көлеміне ғана емес, оның қолжетімді әрі сапалы болуына назар аудару қажет.Аймақта тұрғын үй салуға тек мемлекеттік бюджеттен 2022 жылы 19,1 млрд бөлінсе, 2025 жылы 49,3 млрд теңге бөлінді, бұл 2,6 есе көп.  Жыл сайын тұрғын үй салу көлемін жоспардан асырып орындап келеміз. Нәтижесінде, соңғы 3 жылда шамамен 1,5 млн шаршы метр тұрғын үй пайдалануға берілді. 251 көпқабатты үй және 1809 жеке үй салынды. 14 мың 729 отбасы баспана жағдайын жақсартты.«Заманауи, сапалы баспана ауылдық елді мекендерде де салынуда. Өткен жылы 517,4 мың шаршы метр тұрғын үй салынды, оның 63,7 мың шаршы метрі ауылдық жерлерде. Жалпы алғанда 5,4 мыңнан астам отбасы баспанамен қамтамасыз етілді. Баспана қолжетімді болу үшін әлеуметтік тұрғын үй салынады және жеңілдетілген ипотекалық несиелер беріледі. 3 жыл ішінде 1,7 мың әлеуметтік пәтер тапсырылды. Бұл жұмысты одан әрі жалғастырамыз», – деді аймақ басшысы.Жастарды баспанамен қамтамасыз ету мақсатында облыстың барлық өңірінде «Қостанай жастары» бағдарламасы жұмыс істейді. 3 жыл ішінде бағдардарламаны қаржыландыруға шамамен 6 млрд теңге бөлінді. Нәтижесінде, 400-ден астам жас отбасы өз баспанасына ие болды. Биыл тағы 750 млн теңге қаражат бөлінді. Ал биыл облыста 520 мың шаршы метр тұрғын үй салу жоспарланған.Биылғы жылдың бірінші тоқсанының қорытындысы бойынша Денисов ауданында (жылдық жоспардың 96%-ы немесе 2,8 мың шаршы метр), Қостанай ауданында (67,6% немесе 46,6 мың шаршы метр) және Қамысты ауданында (50,1% немесе 2,1 мың шаршы метр) тұрғын үйді пайдалануға беру жоспарының орындалуы 50%-дан асты.«Мен бұдан 3 жыл бұрын бос тұрған үйлерді қалпына келтіру бойынша тапсырма берген едім. Бұл да тұрғындарды баспанамен қамтамасыз етудің бір мүмкіндігі. Осы мақсатта облыстық бюджеттен нысаналы түрде қаражат бөлінді. Үш жыл ішінде облыста 56 тұрғын үй қалпына келтірілді, оның ішінде 30-ы көпқабатты үйлер. Мысалы, Рудный қаласында – 11 үй, Арқалықта – 3 үй, Денисов және Қамысты аудандарында 2 үйден қалпына келтірілді».«Елді мекендердің сәулеттік келбеті де ерекше назарды талап етеді. Сәулеттік келбет пен абаттандыруға қойылатын талаптар барлық жерде – қалаларда да, аудандарда да сақталуы тиіс. Біздің міндетіміз тек ғимараттар салу ғана емес, сонымен қатар тұрғындар үшін сапалы, заманауи орта құру. Барлық шешімдердің нәтижесі – тұрғындардың ыңғайлығы мен қауіпсіздігі болуы керек», – деді Құмар Ақсақалов.Аймақ басшысы қалалар мен аудандардың әкімдеріне құрылыс басқармасымен бірлесіп, тұрғын үйді пайдалануға беру жоспарын орындауды, халықтың әлеуметтік осал топтары үшін жоспарланған мөлшерде тұрғын үй сатып алуды, қала құрылысы жобаларын уақтылы және сапалы әзірлеуді және түзетуді тапсырды.  Ақпарат көзі : https://www.gov.kz/memleket/entities/kostanay/press/news/details/1214807?lang=kk

Алматы облысындағы Іле өзенінің аңғарында Қазақстан мен Орталық Азиядағы ең күрделі әрі беделді ультрамарафондардың бірі – TENGRI ULTRA 2026 өтті.Оған Қазақстанның түрлі өңірлері мен шетелдерден 185-тен астам спортшы қатысты.Ерекше климаттық және табиғи жағдайлар, әртүрлі рельеф, шатқалдар мен дала аймақтары спортшылардан температураның күрт өзгеруіне дайын болуды, жоғары төзімділікті және күшті дұрыс пайданануды талап етті.100 шақырым қашықтықты таңдаған Қорғаныс министрлігінің Бітімгерлік операциялар орталығының жауынгерлік және дене дайындығы қызметінің жауынгері сержант Алтай Әбіш бұл қашықтықты 15 сағат 33 минутта еңсерді.– Алтай Әбіш жоғары деңгейдегі дене дайындығын, мақсатқа ұмтылысын және экстремалды жағдайларда тапсырмаларды орындауға дайын екенін көрсетті, – деп атап өтті Бітімгерлік операциялар орталығының жауынгерлік және дене дайындығы басқармасының бастығы подполковник Алмат Кенжеев.Әскери қызметшінің нәтижесі жүйелі дайындық пен тәртіп ең күрделі сынақтарды да сәтті еңсеруге мүмкіндік беретінін айқын дәлелдеп берді.Ақпарат көзі : https://www.gov.kz/memleket/entities/mod/press/news/details/1214661?lang=kk

 «Даму» кәсіпкерлікті дамыту қоры («Бәйтерек» ҰИХ еншілес ұйымы) шалғай қалалар мен аудан орталықтарында бизнес үшін мемлекеттік қолдауға қол жеткізуді арттыруға арналған мобильді фронт-офистерді іске қосады. Бастама Мемлекет басшысының ШОБ-ты қолдау шараларымен қамту жөніндегі тапсырмасы шеңберінде Үкіметтің қолдауымен іске асырылуда.Жобаның негізгі мақсаты – кәсіпкерлерді консультациялар өткізу, сондай-ақ жергілікті жерде өтінім қабылдау арқылы «Бәйтерек» холдингі іске асыратын мемлекеттік қолдау шаралары туралы өзекті ақпаратпен қамтамасыз ету.Бастама шеңберінде Қордың консультанттары әкімдіктердің, «Атамекен» ҰКП және ЕДБ өкілдерімен бірлесіп, шалғай өңірлерге барады. Мобильді топтар моноқалалар мен аудан орталықтарын, ауылдарды қамтиды. Бұл әсіресе ауылдар мен шағын қалалардан кәсіпкерлерді мемлекеттік қолдау шараларына тартуға бағытталған «Іскер аймақ» өңірлік бағдарламасын іске асыру жағдайында өзекті болып отыр. Бағдарлама шикізатты жергілікті өңдеуді дамыту арқылы өңірлердің әлеуетін нақты өндірістік қуатқа айналдыруға көмектеседі.Кәсіпкерлерге «Даму» қоры ғана емес, «Бәйтерек» холдингінің бірыңғай фронт-офисі шеңберінде Қазақстанның Даму Банкі, Өнеркәсіпті дамыту қоры, Экспорттық-кредиттік агенттік және Qazaqstan Investment Corporation секілді басқа да еншілес ұйымдары да түйінді қолдау шараларын ұсынады:кредиттер бойынша пайыздық мөлшерлемелерді субсидиялау;кепіл жеткіліксіз болған кезде қарыздарға кепілдік беру;мемлекеттік бағдарламалар шеңберінде жеңілдікпен кредиттеу;лизингтік қаржыландыру құралдары;жаңа бастаған кәсіпкерлерге арналған микроқаржыландыру құралдары;экспорттық жобаларды қолдау құралдары;өңдеу саласын және лизингті қолдау;қаржысыз қолдау-оқыту, кеңес беру және жобаларды қолдау.Мобильді фронт-офистер Қазақстанның 17 өңірінде (Астана, Алматы және Шымкент қалаларын қоспағанда) бекітілген кесте бойынша жұмыс істейді. Сапарлар апта сайын ұйымдастырылғанмен, сұранысқа, кәсіпкерлік белсенділік деңгейіне байланысты жиілеуі мүмкін. Шығу кестесі www.damu.kz сайтында және Қордың әлеуметтік желілерінде күні бұрын жарияланып отырады.Жобаны іске асыру қала мен ауыл арасындағы географиялық кедергілерді жоя отырып, мемлекеттік қолдау шараларына қол жеткізуді, ашықтық пен тиімділікті арттыруға мүмкіндік береді. Ауыл кәсіпкерлері ірі қалалардағы бизнес сияқты мүмкіндіктер мен құралдарға қол жеткізе алады. Бұл бүкіл ел бойынша кәсіпкерліктің біркелкі дамуына ықпал етеді.Ақпарат көзі : https://www.gov.kz/memleket/entities/economy/press/news/details/1214497?lang=kk

ҚР Ұлттық экономика министрлігі реттеуші саясаттың орталық және жергілікті атқарушы органдардың функциясын бәсекелестік ортаға беру рәсімін қайта қарайтын консультативтік құжат жобасын дайындады. Сондай-ақ, құжат жекелеген өкілеттіктерді мемлекеттік басқару деңгейі арасында қайта бөлуді ұсынады. Құжат жобасы процестерді бюрократтықтан арылтып, мемлекеттік аппарат жұмысының жеделдігін арттыруды ескереді.Мемлекеттік функцияларды бәсекелестік ортаға берудің қолданыстағы тетігі артық рәсіммен және көп сатылы келісумен сипатталады. Осыған байланысты кезең санын қысқарту ұсынылады. Атап айтқанда, егер шешімді Кәсіпкерлік қызметті реттеу мәселелері жөніндегі ведомствоаралық комиссия мақұлдаған болса, оны басқа деңгейде қайта қарау талап етілмейді.Бұдан басқа, «Атамекен» ҰКП-мен өзара іс-қимыл күшейтіледі. Палата бәсекелестік ортаға ұсынылатын функциялардың дерегін беріп отырады.Жобада, сонымен қатар, Үкіметтің бірқатар функциясын салалық министрліктерге беру қарастырылған. Өзгерістер экология, ветеринария, энергия үнемдеу, денсаулық сақтау, мәдениет және басқа да салаға әсер етпек.Сонымен қатар, мемлекеттік органдардың функцияларды іске асыруға арналған функционалдық қызметін олардың күнделікті процестік әрекетінен ажырату үшін «бизнес-процесс» ұғымын заңнамалық деңгейде бекіту ұсынылады.Құжат жобасы «Ашық НҚА» порталында жария талқылау үшін орналастырылды. Талқылау 2026 жылғы 1 маусымға дейін жалғасады.Анықтама:Құжат жобасы Мемлекеттік басқаруды дамытудың 2030 жылға дейінгі тұжырымдамасын іске асыру шеңберінде әзірленді. Ұсынылған шаралар мемлекеттік аппараттың тиімділігін арттыруға арналған.Ақпарат көзі : https://www.gov.kz/memleket/entities/economy/press/news/details/1214483?lang=kk

Астана, 2026 жылғы 5 мамыр – Қазақстан Республикасының Сыртқы істер министрі Ермек Көшербаев Қазақстанға ресми сапармен келген Аустрияның Еуропалық және халықаралық істер федералдық министрі Беате Майнль-Райзингерді және Аустрияның Ішкі істер федералдық министрі Герхард Карнерді қабылдады.Тараптар өзара сенім мен прагматикалық өзара іс-қимылға негізделген қазақ-аустрия қатынастарының жоғары деңгейін растады. «Бүгін біз қазақ-аустрия ынтымақтастағының негізгі бағыттарын талқылап, өзара іс-қимылдың жаңа көкжиектерін айқындадық. Аустрия Қазақстанның Еуропа Одағындағы маңызды серіктесі және біз екіжақты әрі көпжақты деңгейде байланыстарымызды барынша тереңдетуге ниеттіміз», - деп атап өтті Қазақстанның СІМ басшысы.Келіссөздер барысында дипломатиялық паспорт иелері үшін визалық талаптарды алып тастау және реадмиссия туралы келісімдерді іске асырудағы ілгерілеу атап өтілді. Бұл екіжақты ынтымақтастықты одан әрі тереңдетуге қосымша мүмкіндіктер ашады. Бұдан бөлек, Аустрия тарапы ЕҚЫҰ-мен өзара іс-қимыл аясында Астана халықаралық әуежайына 25 дана паспорт оқу құрылғысын табыстайды.Сауда-экономикалық және инвестициялық байланыстарды дамытуға, оның ішінде іскерлік дөңгелек үстел өткізуге ерекше назар аударылды. Осы тұрғыда Үкіметаралық комиссия мен Іскерлік кеңестің, сондай-ақ Қазақстанда қызмет ететін аустриялық компаниялардың рөлі атап өтілді.Тараптар тау-кен өнеркәсібі, көлік және инфрақұрылым, энергетика, туризм және білім беру салаларындағы ынтымақтастықтың елеулі әлеуетін атап өтті. Орта дәлізді дамыту және «Global Gateway» бастамасына қатысу аясында көлік-логистикалық серіктестікті кеңейтуге ерекше мән берілді, бұл Қазақстандағы аустриялық бизнес үшін жаңа мүмкіндіктер ашады.Экономикалық өзара іс-қимыл аясында энергетикалық ынтымақтастық мәселелері талқыланды. Қазақстанның Аустрияға мұнай жеткізудегі негізгі серіктестердің бірі ретіндегі рөлі, сондай-ақ елдің энергетикалық қауіпсіздік пен жеткізілімдердің тұрақтылығын қамтамасыз етуге қосқан үлесі атап өтілді.Тараптар халықаралық күн тәртібіндегі және өңірлік қауіпсіздік мәселелері бойынша пікір алмасты, көпжақты ынтымақтастықты нығайтуға және қазіргі сын-қатерлерді БҰҰ Жарғысына сәйкес тек бейбіт жолмен шешуге бейілділігін растады.Кездесу қорытындысы бойынша тараптар бірлескен күш-жігер қазақ-аустрия әріптестігіне жаңа серпін беріп, ынтымақтастықты одан әрі кеңейтуге ықпал ететініне сенім білдірді. Ақпарат көзі : https://www.gov.kz/memleket/entities/mfa/press/news/details/1214449?lang=kk

Қостанай облысында Қазақстан Республикасының «Ардагерлер туралы» Заңына сәйкес ардагерлер мен оларға теңестірілген тұлғаларды әлеуметтік қорғау бойынша жүйелі жұмыс жалғасуда.Бүгінгі таңда өңірде 4 Ұлы Отан соғысының қатысушысы, сондай-ақ аталған заңның қолданылу аясына кіретін 3040 ардагер және басқа да санаттағы азаматтар тұрады.Жыл бойы ардагерлер мен тыл еңбеккерлері олардың өмір сүру сапасын арттыруға және әлеуметтік қолдауды күшейтуге бағытталған әлеуметтік, экономикалық және мәдени іс-шаралар кешенімен қамтылуда.9 мамыр - Жеңіс күніне орай жергілікті өкілді органдардың шешімдері негізінде Ұлы Отан соғысының қатысушыларына 5 000 000 теңге мөлшерінде біржолғы әлеуметтік көмек көрсетілді.Қосымша төлемдер азаматтардың өзге де санаттарына қарастырылған, оның ішінде: Екінші дүниежүзілік соғыс кезеңінде фашистер мен олардың одақтастары құрған концлагерьлердің, геттолардың және басқа да мәжбүрлі ұстау орындарының кәмелетке толмаған тұтқындарына; қоршаудағы Ленинград қаласында кәсіпорындарда, мекемелерде және ұйымдарда жұмыс істеген және «Ленинградты қорғағаны үшін» медалімен немесе «Қоршаудағы Ленинград тұрғыны» белгісімен марапатталған азаматтарға; Ұлы Отан соғысы жылдарында тылдағы жанқиярлық еңбегі және мінсіз әскери қызметі үшін бұрынғы КСРО ордендерімен және медальдарымен марапатталған тұлғаларға, сондай-ақ 1941 жылғы 22 маусымнан 1945 жылғы 9 мамырға дейін кемінде алты ай еңбек еткен (қызмет атқарған), бірақ жоғарыда аталған марапаттарға ие болмаған азаматтарға; Ұлы Отан соғысында қаза тапқан жауынгерлердің жесірлеріне және мүгедектігі бар деп танылған Ұлы Отан соғысы ардагерлерінің қайтыс болған жұбайларына. Аталған санаттар үшін төлем мөлшері қала және аудан мәслихаттарының шешімдерімен айқындалады.Біржолғы төлемдерден бөлек, тұрақты негізде ардагерлерге, тыл еңбеккерлеріне, сондай-ақ оларға теңестірілген тұлғалар мен олардың отбасы мүшелеріне ай сайын әлеуметтік көмек көрсетіледі.Жергілікті өкілді органдардың шешімдеріне сәйкес, аталған санаттағы азаматтар сауықтыру бағытындағы әлеуметтік қолдау шараларымен де қамтылған.Облыстық мәслихаттың шешіміне сәйкес ардагерлерге санаторий-курорттық емделуге тегін жолдамалар беріледі. 2026 жылы облыстық бюджет қаражаты есебінен 360 адамды сауықтыру жоспарланған.Бұдан бөлек, 2024 жылдан бастап өңірде баламалы қолдау тетігі енгізілді — санаторий-курорттық емделуге жұмсалған шығындарды өтеу. Өтемақы әлеуметтік қызметтер порталында белгіленген жолдаманың кепілдендірілген құнынан аспайтын мөлшерде беріледі.Ақпарат көзі : https://www.gov.kz/memleket/entities/kostanay/press/news/details/1214428?lang=kk

Астанада К. Құлажанов атындағы қазақ технология және бизнес университетінің әскери кафедрасында ант беру рәсімі өтті. Отан қорғаушы күні қарсаңында бір мезетте 448 студент әскери ант қабылдап, запастағы әскери қызметшілердің қатарын толықтырды.Салтанатты іс-шараға оқу орнының басшылығы, әскери кафедра жеке құрамы, Қарулы күштердің ардагерлері, сондай-ақ курсанттардың ата-аналары мен жақындары қатысты.Әскери кафедра бастығы вице-адмирал Жандарбек Жанұзақов студенттерді құттықтап, анттың мән-маңызына тоқталды.– Әскери ант – бұл жай рәсім емес, ол – Отан алдындағы қасиетті серт. Бүгін сіздер ел қауіпсіздігі үшін үлкен жауапкершілікті мойындарыңызға алдыңыздар. Алдағы өмірде қандай салада еңбек етсеңіздер де, осы сертке адал болып қалуларыңыз қажет, – деді ол.  Әскери кафедра еліміздегі 10 жетекші жоғары оқу орнының студенттерін біріктіреді. Бағдарлама 2024 жылы іске қосылған.Курсанттардың ата-аналары да ерекше толқыныста болды. Солардың бірі – Анар Серікқызы:– Біз балаларымызды әрдайым адал, қайсар, елжанды болуға тәрбиеледік. Бүгін соның жемісін көріп отырмыз. Барлық курсанттарға сәттілік тілеймін, анттарына берік болып, елге абыроймен қызмет етсін, – деген тілек білдірді.Іс-шара соңында Қарулы күштердің ардагерлері генерал-лейтенанттар Абай Тасболатов, Бақытжан Ертаев пен генерал-майор Марат Нағұманов бірқатар офицерлер мен үздік студенттердің ата-аналарына естелік белгілер мен алғыс хаттар табыс етті. Әскери ант беру рәсімі Ұлттық әскери-патриоттық орталық өнерпаздарының концерттік бағдарламасымен аяқталды.Әскери кафедраның оқу бағдарламасы теориялық сабақтарды ғана емес жан-жақты практикалық дайындықты да қамтиды. Екі жыл оқу барысында студенттер екінші мамандықты меңгеріп, запастағы лейтенант және сержант әскери атағын алып шығады. Сонымен бірге көшбасшылық қасиеттерін шыңдайды.Ақпарат көзі : https://www.gov.kz/memleket/entities/mod/press/news/details/1214309?lang=kk